ខេត្តរតនគិរី ៖ ជនសង្ស័យម្នាក់ត្រូវនគរបាលឃាត់ខ្លួន ពាក់ព័ន្ធករណីរំលោភសេពសន្ថវៈបានសម្រេច កាលពីវេលាម៉ោង៤ល្ងាចថ្ងៃទី៤ ខែឆ្នូ ឆ្នាំ២០១៧នៅត្រង់ចំណុចចម្ការស្វាយចន្ទីជនរងគ្រោះ ស្ថិតនៅភូមិ៥ ឃុំត្រពាំងច្រេស ស្រុកកូនមុំ ខេត្តរតនគិរី។
អធិការរងទទួលបន្ទុកសណ្តាប់ធ្នាប់សាធារណៈ លោក ពុធ សាវី បានឲ្យដឹងតាមទូរស័ព្ទនៅព្រឹកថ្ងៃទី៥ ខែឆ្នូនេះថា ជនរងគ្រោះឪពុកប្រើទៅបោកខោអាវម្នាក់ឯងនៅខាងក្រោយផ្ទះរបស់ខ្លួន ហើយត្រឡប់មកផ្ទះវិញជួបជនសង្ស័យចាប់រំលោភនៅចម្ការស្វាយចន្ទីបានសម្រេចតែម្តង។ លោកអធិការរងបានបន្តថា បន្ទាប់មកមានក្មេងម្នាក់បានប្រទះឃើញជនសង្ស័យកំពុងធ្វើសកម្មភាពរំលោភសេពសន្ថវៈ ហើយក្មេងនោះបានរត់ទៅប្រាប់ឪពុកស្ត្រីរងគ្រោះ ហើយមកវាយទៅលើជនសង្ស័យ២ដំបង រួចតេប្រាប់សមត្ថកិច្ចចុះមកឃាត់ខ្លួនតែម្តង។
អធិការរងបញ្ជាក់ថា ជនរងគ្រោះឈ្មោះ ធ . វ អាយុ២២ឆ្នាំជនជាតិខ្មែរ មានទីលំនៅភូមិឃុំកើតហេតុខាងលើ ស្នាក់នៅក្នុងបន្ទុកឪពុកម្តាយ ហើយនាងក៏មានសតិមិនគ្រប់។ ចំណែកជនសង្ស័យឈ្មោះ ធួយ ធឿន ភេទប្រុសអាយុ២១ឆ្នាំជនជាតិខ្មែរ ស្នាក់នៅភូមិឃុំជាមួយគ្នា។
បច្ចុប្បន្នជនសង្ស័យត្រូវបានសមត្ថកិច្ចឃាត់ខ្លួនបណ្តោះអាសន្ន នៅអធិការដ្ឋាននគរបាលស្រុកកូនមុំ ដើម្បីកសាងសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធីច្បាប់៕
រាជធានីភ្នំពេញ ៖ រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន បានថ្លែងបញ្ជាក់ថា ការចាត់វិធានការលើគណបក្សសង្គ្រោះជាតិរបស់ស្ថាប័ននិតិប្បញ្ញាត្តិ និងនិតិប្រតិបត្តិនិងតុលាការ ស្របទៅនឹងច្បាប់របស់កម្ពុជា សំដៅរក្សាឲ្យបាននូវផលប្រយោជន៍ ជាយុទ្ធសាស្ត្ររបស់ប្រទេសជាតិ គឺឯករាជ្យអធិបតេយ្យភាព ប្រឆាំងការជ្រៀតជ្រែករបស់បរទេសចូលកិច្ចការផ្ទៃក្នុងរបស់កម្ពុជា ៕
រាជធានីភ្នំពេញ ៖ សមត្ថកិច្ចខណ្ឌពោធិ៍សែនជ័យបានឃាត់ខ្លួនបុរសបីនាក់ប្រគល់ឲ្យប៉ូលិសខណ្ឌឫស្សីកែវ កាលពីវេលាម៉ោង៨និង៣០នាទីយប់ថ្ងៃទី៣ ខែធ្នូ ឆ្នាំ២០១៧ ក្រោយពីជនសង្ស័យជួលរថយន្តមួយគ្រឿងម៉ាកឡិចស៊ីស៤៧០យកទៅប្រចាំនៅកុងស៊ីបញ្ចាំក្នុងតំលៃ១៧០០០ដុល្លារអាមេរិករួចគេចខ្លួនបាត់លុះមកដល់ព្រឹកថ្ងៃទី៣ខែធ្នូឆ្នាំ២០១៧ក្រុមហ៊ុនលីហួរស៊ីធីលីង ត្រេនស្ព័រថេសិន(ខេមបូឌា)ប្តឹងសមត្ថកិច្ចឲ្យឃាត់ខ្លួនតែម្តង។
សមត្ថកិច្ចបានឲ្យដឹងថា ជនសង្យ័យចំនួន៣នាក់នោះ ១/ឈ្មោះ មៀច ស៊ីដេត ភេទប្រុស អាយុ៣៩ឆ្នាំ មុខរបរលក់ដូរ ស្នាក់នៅផ្ទះលេខ២៧ ផ្លូវបេតុង ភូមិវិហារចិន ឃុំស្វាយបង្គំ ខេត្តសៀមរាប (អ្នកជួលរថយន្ត) ២/ឈ្មោះ កែវ ភួង ភេទប្រុស អាយុ៥០ឆ្នាំ មុខរបរលក់ដូរ ស្នាក់នៅបូរីពិភពថ្មី ផ្សារដីហុយ ខណ្ឌសែនសុខ (អ្នកធ្វើសាក្សី)៣/ឈ្មោះសង ប៊ុនថេង ភេទប្រុស អាយុ៣៤ឆ្នាំ មុខរបរលក់ដូរ ស្នាក់នៅផ្ទះគ្មានលេខ ផ្លូវបេតុង ភូមិឃ្លាំងសាំង សង្កាត់ឬស្សីកែវ (អ្នករួមដំណើរជាមួយ) ។
បើតាមតំណាងក្រុមក្រុមហ៊ុន លី ហួរ បានឲ្យដឹងថា ក្រុមហ៊ុនបានជួលរថយន្តឡិចស៊ីស៤៧០ចំនួន២គ្រឿងឲ្យទៅឈ្មោះ ងួន ហេង ដោយគ្រឿងតម្លៃ១១០០ដុល្លារក្នុងមួយខែ ស្រាប់បែរជា ឈ្មោះ ងួន ហេង បានយករថយន្តមួយគ្រឿង ពាក់ស្លាកលេខ ភ្នំពេញ 2L-6399 ជួលបន្តឲ្យទៅឈ្មោះ កែវ ភួង និង ឈ្មោះ មៀច ស៊ីដេត បានក្នុងតម្លៃ១៥០០ដុល្លារក្នុងមួយខែ តែបែរជាមនុស្សទាំង២នាក់ខាងលើ លួចយករថយន្តជួលនោះទៅដាក់បញ្ចាំបន្តទៀត នៅក្រុមហ៊ុនចិនមួយកន្លែង ក្នុងសង្កាត់បឹងសាឡាង ខណ្ឌទួលគោក កាលពីថ្ងៃទី២៩ ខែវិច្ឆិកា ឆ្នាំ២០១៧កន្លងមក ក្នុងតម្លៃ១៧០០០ដុល្លារទៅវិញ រួចមកជួលរថយន្តឡិចស៊ីស៤៧០ ពាក់ស្លាកលេខ ភ្នំពេញ 2AK-1546 ពីឈ្មោះ ងួន ហេង មួយគ្រឿងទៀតកាលពីថ្ងៃទី០២ ខែធ្នូ ឆ្នាំ២០១៧ មកជិះធ្វើតែមិនដឹង ។
ប្រភពដដែលបន្តទៀតថា ដឹង ឃើញ ការជួលរថយន្តខាងលើ មានសភាពមិនប្រក្រតី កាលពីជួល ឲ្យទៅមនុស្សទី១ បែជាឃើញរថយន្ត នៅមនុស្សទី២ជិះ និងយកទៅបញ្ចាំទៀត ទើបស្រាវជ្រាវ តាមដានភ្លាមៗទីបំផុតប្រទះឃើញរថយន្តខ្លួននៅអ្នកផ្សេងជិះ ឃើញឃាត់ប្តឹងប៉ូលីសនាំទៅសាកសួរ។
តាមសម្តីជនជាតិចិនអ្នកទទួលបញ្ចាំថា ជនសង្ស័យទាំង២ខាងលើពិតជាអ្នកយករថយន្តទៅបញ្ចាំ កាលពីថ្ងៃទី២៩ ខែវិច្ឆិកា កន្លងមកក្នុងតម្លៃ១៧០០០ដុល្លារ។
ក្រោយពីសាកសួរ រឿងរ៉ាវអង្គហេតុខាងលើ កើតឡើងនិងមានឯកសារ បញ្ចាំនៅខាងក្រុមហ៊ុនលី ហួរ ទើបនគរបាលខណ្ឌពោធិសែនជ័យ ប្រគល់រថយន្តមួយគ្រឿងនិងមនុស្ស២នាក់ ដែលជាអ្នកជួលជិះទី២ ទៅឲ្យខាងនគរបាលខណ្ឌឫស្សីកែវដើម្បីចាត់ការបន្ត៕
ហ្ស៊ីមបាវ៉េ ៖ ប្រធានាធិបតីថ្មីនៃប្រទេសហ្ស៊ីមបាវ៉េបានស្បថចូលកាន់តំណែងដើម្បីដឹកនាំគណៈរដ្ឋមន្ត្រីថ្មីដែលរួមបញ្ចូលទាំងក្រុមអ្នកស្មោះនឹងគណបក្សកាន់អំណាច និងមន្ត្រីនៅជួរកងទ័ពដែលបានជួយបណ្ដេញលោក រ៉ូប៊ឺត មូហ្គាបេ អតីតមេដឹកនាំប្រទេសនេះចេញពីអំណាច។
ប្រធានាធិបតីថ្មីលោក អេមឺសុន មីណានហ្គាកវ៉ា (Emmerson Mnangagwa) បាននិយាយក្រោយពីវិធីស្បថចូលកាន់តំណែងពីថ្ងៃចន្ទម្សិលមិញថា គោលនយោបាយជាអាទិភាពគឺត្រូវស្ដារសេដ្ឋកិច្ចប្រទេសជាតិដែលកំពុងតែជួបវិបត្តិឡើងវិញ។
សូមរំលឹកថា កាលពីថ្ងៃទី១៥ខែវិច្ឆិកា លោកឧត្តមសេនីយ៍ទោ ម៉ូយ៉ូ បានប្រកាសពីការដណ្ដើមអំណាចពីរដ្ឋាភិបាលដែលធ្វើឲ្យលោក មូហ្គាបេ បង្ខំចិត្តចុះចេញពីអំណាចក្រោយពីលោកបានកាន់អំណាច រយៈពេល៣៧ឆ្នាំ ហើយលោក មីណានហ្គាកវ៉ា ដែលត្រូវបានលោក មូហ្គាបេ បណ្ដេញពីតំណែងជាអនុប្រធានាធិបតីនោះត្រូវបានគណបក្សកាន់អំណាចសម្រេចជ្រើសរើសយកធ្វើជាប្រធានាធិបតីថ្មីដើម្បីបន្តតំណែងពីលោក មូហ្គាបេ៕
អាហ្វហ្គានីស្ថាន ៖ មន្ត្រីអាហ្វហ្គានីស្ថានម្នាក់បាននិយាយថា អ្នកបំផ្ទុះគ្រាប់បែកអត្តឃាតម្នាក់បានជិះម៉ូតូបើកការវាយប្រហារនៅខាងក្រៅពហុកីឡដ្ឋានបាល់ទាត់មួយនៅក្នុងទីក្រុងចាឡាឡាបាដ (Jalalabad) ភាគខាងកើតប្រទេសអាហ្វហ្គានីស្ថានបណ្តាលឲ្យមនុស្ស៦នាក់បាត់បង់ជីវិត និង១៣នាក់ផ្សេងទៀតរងរបួស។
យោងតាមអ្នកនាំពាក្យឲ្យមន្ត្រីជាន់ខ្ពស់ម្នាក់, ក្នុងចំណោមអ្នកស្លាប់នៅក្នុងការវាយប្រហារ នោះរួមមានស្ត្រីម្នាក់ និងកូនក្មេងតូចម្នាក់។ អ្នកនាំពាក្យបានបន្ថែមថា ការវាយប្រហារនោះបានកើតឡើងក្នុងរយៈពេលយ៉ាងខ្លីបន្ទាប់ពីការប្រមូលផ្តុំគ្នារបស់អ្នកគាំទ្ររដ្ឋាភិបាលរបស់ប្រធានាធិបតីអាហ្វហ្គានីស្ថានលោក អាស់រ៉ាហ្វ ហ្គានី (Ashraf Ghani) បានបញ្ចប់នៅពហុកីឡដ្ឋានបាល់ទាត់។
ទោះបីយ៉ាងណាភ្លាមៗនោះមិនទាន់មានក្រុមណាមួយចេញមកអះអាងទទួលខុសត្រូវនៅក្នុងការវាយប្រហារនោះនៅឡើយទេ។
គួរបញ្ជាក់ថា ក្រុមក្នុងតំបន់មួយដែលមានទំនាក់ទំនងជាមួយក្រុមអាយស៊ីសកំពុងស្វះស្វែងពង្រីកទីតាំងមូលដ្ឋានរបស់គេនៅក្នុងប្រទេសអាហ្វហ្គានីស្ថាន៕
រាជធានីភ្នំពេញ ៖ សាលាដំបូងរាជធានីភ្នំពេញកាលពីរសៀលថ្ងៃទី៤ ខែធ្នូ ឆ្នាំ២០១៧នេះ បានសម្រេចឃុំខ្លួនបុរស ជនជាតិនីហ្សេរីយ៉ាម្នាក់ ជាប់ពាក់ព័ន្ធនឹងករណីលាងលុងកង្វក់តាមរយះរូបភាពផ្ញើប្រាក់ពីសហរដ្ឋអាមេរិកមកកម្ពុជា រួចយកប្រាក់ដដែលនោះផ្ញើពីកម្ពុជា ទៅអាមេរិកវិញចំនួន៩០ម៉ឺនដុល្លារ ។
មន្ត្រីតុលាការបញ្ជាក់ថា បុរសជនជាតិនីហ្សេរីយ៉ា នេះឈ្មោះ GOO DLUCKOMOBIA អាយុ៣៥ឆ្នាំ។ ចំណែកបុរសជនជាតិនីហ្សេរីយ៉ាម្នាក់ទៀត ដែលកំពុងរត់គេចខ្លួនឈ្មោះ BELLO និងប្រពន្ធខ្មែរឈ្មោះ គឹម ស្រីខួច អាយុ២២ឆ្នាំ ៕
យ៉េមែន ៖ ទីភ្នាក់ងារសារព័ត៌មាន Reuters បានរាយការណ៍ថា អតីតប្រធានាធិបតីយ៉េមែន លោក Ali Abdullah Saleh បានស្លាប់បាត់បង់ជីវិតនៅក្នុងការវាយប្រហារមួយរបស់ក្រុមឧទ្ទាមហ៊ូទី នៅឯទីក្រុងសាណាអា ប្រទេសយ៉េមែន។ នេះបើតាមមន្ត្រីជាន់ខ្ពស់គណបក្សរបស់លោក។
ការអះអាងនេះ ធ្វើឡើងបន្ទាប់ពីស្ថានីយ៍ទូរទស្សន៍ក្រុមឧទ្ទាមហ៊ូទី បានបង្ហោះរូបភាពសាកសពបុរសម្នាក់ ដែលគេជឿជាក់ថា ជាអតីតប្រធានាធិបតីយ៉េមែនរូបនេះ ខណៈនៅលើបណ្ដាញទំនាក់ទំនងសង្គមក៏មានការអះអាងថា លោក Ali Abdullah Saleh បានស្លាប់ផងដែរ។ ការស្លាប់របស់លោក Ali Abdullah Saleh ត្រូវបានគេរំពឹងថា នឹងបង្កឱ្យមានភាពតានតឹងកាន់តែខ្លាំងរវាងអារ៉ាប៊ីសាអូឌីត និងក្រុមឧទ្ទាមហ៊ូទីដែលមានអ៊ីរ៉ង់ជាខ្នងបង្អែក៕
រាជធានីភ្នំពេញ ៖ នៅព្រឹកថ្ងៃទី៤ ខែធ្នូនេះ កម្មករ-កម្មការិនីរោងចក្រ « ណានតាយ » ប្រមាណ២០០នាក់ ដែលមានទីតាំងស្ថិតតាមបណ្តោយ ផ្លូវវេងស្រេង ក្នុងភូមិដំណាក់ធំ២ សង្កាត់ស្ទឹងមានជ័យ៣ ខណ្ឌមានជ័យ បានផ្ទុះកូដកម្មតវ៉ាទាមទារ ប្រាក់បៀវត្សរ៍ជាច្រើនចំណុច ពីថៅកែរោងចក្រ ។
យ៉ាងណាក៏ដោយ ភ្លាមៗ នោះ លោក ឌី រ័ត្នខេមរុណ អភិបាលរងខណ្ឌមានជ័យ សហការជាមួយមន្ត្រីក្រសួងការងារបានចុះអន្តរាគមន៍សម្របសម្រួលនិងពិភាក្សារកដំណោះស្រាយ ។ ក្រោយការពិភាក្សាប្រជុំរកដំណោះស្រាយ អស់រយៈពេលជាង១ម៉ោងរួចមក អាជ្ញាធរសម្រេចយកថ្ងៃទី៦ ខែធ្នូ ឆ្នាំ២០១៧ ជាថ្ងៃដោះស្រាយបញ្ចប់បញ្ហានេះ ជូនបងប្អូនកម្មករឲ្យបានរួចស្រេច ក្នុងពេលតែ១ថ្ងៃប៉ុណ្ណោះ ។
លោកអភិបាលរងបានបញ្ជាក់ថា មូលហេតុដែលអាជ្ញាធរមិនអាចដោះស្រាយជូនបងប្អូននៅថ្ងៃនេះបាន គឺដោយសារម្ចាស់រោងចក្រ ដែលជនជាតិចិន កំពុងជាប់រវល់នៅឯប្រទេស លុះថ្ងៃទី៦ ទើបត្រឡប់មកវិញ ទើបអាជ្ញាធរសម្រេចដោះស្រាយនៅថ្ងៃទី៦តែម្តង ៕
រាជធានីភ្នំពេញ ៖ កម្ពុជា និងបង់ក្លាដែសបានចុះហត្ថលេខាលើឯកសារចំនួន១១ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោកស្រី សេក្ខ ហាស៊ីណា (Sheikh Hasina) នាយករដ្ឋមន្ត្រីនៃសាធារណរដ្ឋប្រជាមានិតបង់ក្លាដេសនៅវិមានសន្តិភាព បន្ទាប់ពីបញ្ចប់ជំនួបទ្វេភាគីរបស់នាយករដ្ឋមន្ត្រីប្រទេសទាំងពីរកាលពីព្រឹក ថ្ងៃទី០៤ ខែធ្នូ ឆ្នាំ២០១៧នេះ។
ឯកសារចំនួន១១នោះរួមមាន៖
១៖ សេចក្តីថ្លែងការណ៍រួមស្តីពី លទ្ធផលនៃដំណើរទស្សនកិច្ចផ្លូវការរបស់ លោកស្រី សេក្ខ ហាស៊ីណា នាយករដ្ឋមន្ត្រីបង់ក្លាដេស។ ចុះហត្ថលេខាដោយ លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា និង លោក Abul Hassan Mahmood All រដ្ឋមន្ត្រីក្រសួងការបរទេសបង់ក្លាដេស។
២៖ អនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការ និងកិច្ចសហប្រតិបត្តិការលើបញ្ហាពាក់ព័ន្ធក្នុងការអនុវត្តគោលដៅអភិវឌ្ឍន៍ ដោយចីរភាពរហូតដល់ឆ្នាំ២០៣០។ ចុះហត្ថេលខាដោយ ឯកឧត្តមទេសរដ្ឋមន្ត្រី ឆាយ ថន រដ្ឋមន្ត្រីក្រសួងផែនការ និង លោក Md. Abul Kalam Azad នាយកសម្របសម្រួលកិច្ចការគោលដៅអភិវឌ្ឍន៍ដោយចីរភាព នៃខុទ្ទកាល័យនាយករដ្ឋមន្ត្រីបង់ក្លាដេស។
៣៖ អនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈ។ ចុះហត្ថលេខាដោយ ឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និង លោក លោក Abul Hassan Mahmood All រដ្ឋមន្ត្រីក្រសួងការបរទេសបង់ក្លាដេស។
៤៖ អនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការលើវិស័យទេសចរណ៍។ ចុះហត្ថលេខាដោយ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និង លោក Rashed Khan Menon MP រដ្ឋមន្ត្រីក្រសួងអាកាសចរណ៍ស៊ីវិល និងទេសចរណ៍បង់ក្លាដេស។
៥៖ អនុស្សារណៈនៃការយោគយល់គ្នា ស្តីពីម៉ូឌែលសម្រាប់កិច្ចសហប្រតិបត្តិការរវាងស្ថាប័នចំណុះក្រុមប្រឹក្សាពាណិជ្ជកម្មចម្រុះ។ ចុះហត្ថលេខាដោយ ឯកឧត្តម ប៉ាន សូរសក្តិ រដ្ឋមន្ត្រីក្រសួងពាណិជ្ជកម្មកម្ពុជា ជាមួយ លោក លោក Abul Hassan Mahmood All រដ្ឋមន្ត្រីក្រសួងការបរទេសបង់ក្លាដេស។
៦៖ អនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការស្ថាប័នលើកិច្ចការពាក់ព័ន្ធនឹងការជំរុញវិនិយោគរវាងក្រុមប្រឹក្សាអភិវឌ្ឍកម្ពុជា និងអាជ្ញាធរអភិវឌ្ឍន៍ការវិនិយោគបង់ក្លាដេស។ ចុះហត្ថលេខាដោយ ឯកឧត្តម សុខ ចិន្តាសោភា រដ្ឋមន្ត្រីប្រតិភូមិអមនាយករដ្មឋន្ត្រី និងជាអគ្គលេខាធិការក្រុមប្រឹក្សាអភិវឌ្ឍកម្ពុជា និងលោក Kazl M. Aminul Islam ប្រធានប្រតិបត្តិការអាជ្ញាធរអភិវឌ្ឍវិនិយោគបង់ក្លាដេស។
៧. អនុស្សារណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យបច្ចេកវិទ្យាព័ត៌មាន និងគមនាគមន៍។ ចុះហត្ថលេខាដោយឯកឧត្តមបណ្ឌិត កាន ច័ន្ទមេត្តា រដ្ឋលេខាធិការក្រសួងប្រៃសណីយ៍ និងទូរគមនាគមន៍កម្ពុជា ជាមួយលោក Zunaid Ahmed Palak អនុរដ្ឋមន្ត្រីទទួលបន្ទុកផ្នែកបច្ចេកវិទ្យាព័ត៌មាន និងគមនាគមន៍ក្រសួងប្រៃសណីយ៍ ទូរគមនាគមន៍ និងបច្ចេកវិទ្យាព័ត៌មានបង់ក្លាដែស។
៨. អនុស្សារណៈយោគយល់គ្នាស្តីពីកិច្ចសហប្រតិបត្តិការវិស័យវារីវប្បកម្ម និងនេសាទ។ ចុះហត្ថលេខាដោយឯកឧត្តម ម៉ម អំណត់ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទកម្ពុជា ជាមួយលោក M.d Maksudul Hasan Khan អគ្គលេខាធិការក្រសួងនេសាទ និងបសុសត្វបង់ក្លាដែស។
៩. អនុស្សារណៈយោគយល់គ្នាស្តីពីសហប្រតិប
ត្តិការក្នុងការអភិរក្ស ប្រវត្តិសាស្ត្រសង្គ្រាម បូជនីយស្ថានសង្គ្រាម និងកេរដំណែលសង្គ្រាម។ ចុះហត្ថលេខាដោយលោក សោម សុគន្ធ រដ្ឋលេខាធិការក្រសួងវប្បធម៌ និងវិចិត្រសិល្បៈកម្ពុជា ជាមួយលោក Aparup Chowdhury អគ្គលេខាធិការក្រសួងកិច្ចការសង្គ្រាមរំដោះជាតិបង់ក្លាដែស។
១០. អនុស្សារណស្តីពីកិច្ចសហប្រតិបត្តិការលើវិស័យកសិក្សាស្រាវជ្រាវរវាងរាជបណ្ឌិត្យសភាកម្ពុជា និងវិទ្យាស្ថានសិក្សាអន្តរជាតិ និងយុទ្ធសាស្ត្របង់ក្លាដែស។ ចុះហត្ថលេខាដោយឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា ជាមួយលោក Md. Shahidul Haque អគ្គលេខាធិការក្រសួងការបរទេសបង់ក្លាដែស។
១១. កិច្ចព្រមព្រៀងស្តីពីសហប្រតិបត្តិការរវាងសភាពាណិជ្ជកម្មកម្ពុជា និងសហព័ន្ធសភាពាណិជ្ជកម្ម និងឧស្សាហកម្មបង់ក្លាដែស។ ចុះហត្ថលេខាដោយអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ជាមួយលោក Md. Shafiul Islam ប្រធានសហព័ន្ធសភាពាណិជ្ជកម្ម និងឧស្សាហកម្មបង់ក្លាដែស៕
រាជធានីភ្នំពេញ ៖ ក្នុងរយៈពេល១១ខែ ឆ្នាំ២០១៧នេះ ភ្ញៀវទេសចរអន្តរជាតិ បានទិញប័ណ្ណចូលទស្សនាអង្គរជាង២លាននាក់ កើនឡើង១២.៤៣% និងទទួលបានចំណូលជាង៩៥លានដុល្លារ។ នេះបើយោងរបាយការណ៍ពីគ្រឹះស្ថានអង្គរដែលដក្សរង់ចេញផ្សាយដោយសារព័ត៌មានក្នុងស្រុកមួយ។
របាយការណ៍ដដែលបញ្ជាក់ថា ចំនួននេះកើនឡើងជិត៧៣% បើធៀបនឹងរយៈពេលដូចគ្នា កាលពីឆ្នាំ២០១៦។ សម្រាប់ខែវិច្ឆិកាកន្លងទៅនេះ ភ្ញៀវទេសចរអន្តរជាតិមកទស្សនាអង្គរមានជាង២សែន៤ម៉ឺននាក់ ដោយបានទិញប័ណ្ណចូលទស្សនា រមណីយដ្ឋានអង្គរ កើនឡើងជាង១៣% និងទទួលចំណូលជាង១១លានដុល្លារ កើនឡើងជាង៨០% បើធៀបនឹងរយៈពេលដូចគ្នា កាលពីឆ្នាំ២០១៦។
សូមជំរាបថា កម្ពុជារំពឹងថា នឹងទាក់ទាញភ្ញៀវទេសចរអន្តរជាតិ បានចំនួន៥លាន៥សែននាក់ នៅត្រឹមចុងឆ្នាំ២០១៧នេះ ដោយបើគិតជាភាគរយនឹងកើនឡើង៨%។ ចំណែកឯនៅឆ្នាំ២០២០ កម្ពុជានឹងទាក់ទាញភ្ញៀវបរទេស បានចំនួន៧លាននាក់៕
សេអ៊ូល ៖ អ្នកនាំពាក្យក្រសួងការពារជាតិកូរ៉េខាងត្បូងបានថ្លែងទៅកាន់ក្រុមសារព័ត៌មាននៅក្នុងទីក្រុងសេអ៊ូលថា កូរ៉េខាងត្បូង និងសហរដ្ឋអាមេរិកបានចាប់ផ្តើមសមយុទ្ធយោធារួមគ្នាមួយនៅថ្ងៃចន្ទនេះ ដែលត្រូវបានចាត់ទុកថា ជាសមយុទ្ធធ្វើឲ្យល្អប្រសើរឡើងនូវសមត្ថភាពរបស់កងកម្លាំងប្រទេសទាំង២នៅក្នុងការអនុវត្តប្រតិបត្តិការរួមគ្នា។
អ្នកនាំពាក្យរូបនោះអះអាងថា សមយុទ្ធនៅក្នុងឆ្នាំនេះគឺជាសមយុទ្ធដ៏ធំបំផុតដោយមានការចូលរួមពីយន្តហោះចម្បាំងអេហ្វ-២២ (F-22) ចំនួន៦គ្រឿង, យន្តហោះបំបាំងកាយអេហ្វ-៣៥អេ (F-35A) ចំនួន៦គ្រឿង និងយន្តហោះបំបាំងកាយអេហ្វ-៣៥ប៊ី (F-35B) ចំនួន១២គ្រឿងដែលមកពីកងកម្លាំងដែនអាកាសអាមេរិក រួមជាមួយនឹងយន្តហោះចម្បាំងផ្សេងទៀតរបស់ប្រទេសកូរ៉េខាងត្បូងដែលមានដូចជាយន្តហោះអេហ្វ-១៥ខេ (F-15K), ខេអេហ្វ-១៦ (KF-1៦) និងអេហ្វអេ-៥០ (FA-50) ។ ទន្ទឹមនោះរូបពាក្យដដែលបានបន្ថែមថា វាជារឿងដ៏កម្រដែលយន្តហោះចម្បាំងអេហ្វ-២២ (F-22) ចំនួន៦គ្រឿងរបស់សហរដ្ឋអាមេរិកត្រូវបានដាក់ពង្រាយនៅលើឧបទ្វីបកូរ៉េក្នុងពេលព្រមៗគ្នាបែបនេះ។
គួរបញ្ជាក់ថា សមយុទ្ធរួមគ្នាធ្វើឡើងរយៈពេល៥ថ្ងៃ និងត្រូវបានគេចាត់ទុកថាជាការសម្ញែងកម្លាំងយោធាប្រឆាំងទៅនឹងការគំរាមកំហែងដោយមីស៊ីល និងនុយក្លេអ៊ែររបស់ប្រទេសកូរ៉េខាងជើងនោះនឹងបញ្ចប់នៅថ្ងៃទី០៨ ខែធ្នូខាងមុខ៕
រាជធានីភ្នំពេញ ៖ ខណៈនេះសម្តេច ហ៊ុន សែន នាយករដ្ឋមន្ត្រីនៃកម្ពុជាបាននិងកំពុងជួបពិភាក្សាជាមួយលោកស្រីនាយករដ្ឋមន្ត្រីបង់ក្លាដេស ចូលជួបពិភាក្សាទ្វេភាគីនៅវិមានសន្តិភាព ។ តាមគម្រោងនៅក្នុងជំនួបទ្វេភាគីរវាងមេដឹកនាំកំពូលរវាងកម្ពុជា-បង់ក្លាដែស នៅវិមានសន្តិភាព ក៏នឹងមានការចុះហត្ថលេខាលើឯកសារសំខាន់ៗមួយចំនួនផងដែរ ។
យោងតាមកម្មវិធីជាក់ស្តែងនៅវេលាម៉ោង១១៖០០នាទីព្រឹកថ្ងៃទី០៤ ខែធ្នូ ឆ្នាំ២០១៧នេះ លោកស្រីនាយករដ្ឋមន្ត្រីបង់ក្លាដេស នឹងចូលបង្គំគាល់ ព្រះមហាក្សត្រកម្ពុជា ព្រះករុណា ព្រះបាទសម្តេចព្រះ បរមនាថ នរោត្តម សីហមុនី នៅព្រះបរមរាជវាំង នាពេលរសៀល ។
* ម៉ោង ០៣៖០០នាទី រសៀល៖ លោកស្រីនាយករដ្ឋមន្ត្រី នឹងជួបសន្ទនាជាមួយ ក្រុមធុរជនមួយចំនួននៅកម្ពុជា ក្នុងសណ្ឋាគារសូហ្វីតែល
* ម៉ោង ០៣៖៣០នាទី រសៀល៖ លោកស្រីចូលជួបសម្តែងការគួរសមជាមួយ សម្តេច ហេង សំរិន ប្រធានរដ្ឋសភា
* ម៉ោង ០៤៖៣០នាទី រសៀល៖ លោកស្រីចូលជួបសម្តែងការគួរសមជាមួយ សម្តេច សាយ ឈុំ ប្រធានព្រឹទ្ធសភា ហើយត្រឡប់ទៅសណ្ឋាគារវិញ
* ម៉ោង ០៦៖៣០នាទី រសៀល៖ លោកស្រីនាយករដ្ឋមន្ត្រី នឹងចូលរួមពិសារអាហារពេលល្ងាច ដែលរៀបចំដោយសម្តេចតេជោ ហ៊ុន សែន នៅវិមានសន្តិភាព។
សូមជម្រាបថា លោកស្រីនាយករដ្ឋមន្ត្រី បង់ក្លាដេស នឹងអញ្ជើញចាកចេញពីកម្ពុជា ត្រឡប់ទៅប្រទេសបង់ក្លាដេសវិញ នៅព្រឹកថ្ងៃទី០៥ ខែធ្នូ ឆ្នាំ២០១៧ តែម្តង បន្ទាប់បំពេញទស្សនកិច្ចរយះពេល២ថ្ងៃជាប់ៗគ្នានៅកម្ពុជា ៕
ខេត្តសៀមរាប ៖ ប្រជាពលរដ្ឋយ៉ាងច្រើនកុះករ បានចូលរួមក្នុងពិធីបួងសួងសូមសេចក្តីសុខ និងសន្តិភាពសម្រាប់ប្រទេសកម្ពុជាដែលបានប្រារព្ធឡើងនៅព្រឹកថ្ងៃ១៥កើត ថ្ងៃពេញបូរមី ខែមិគសិរ ឆ្នាំរកា ព.ស២៥៦១ ត្រូវនឹងថ្ងៃទី០៣ ខែធ្នូ ឆ្នាំ២០១៧នេះ នៅមុខ ប្រាសាទអង្គរ ក្រោមអធិបតីភាពសម្តេច ហ៊ុន សែន នាយករដ្ឋមន្ត្រី នៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ។
លោកស្រី ភឿង សក្កណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានថ្លែងថា ពិធីបួងសួងនេះ គឺធ្វើតាមលំអានរបស់ព្រះមហាក្សត្រខ្មែរ ក៏ដូចជាអតីតព្រះមហាក្សត្រតាំងពីបុព្វកាល ដែលតែងតែធ្វើពិធីបួងសួងនៅពេលទទួលបានជោគជ័យអ្វីមួយ ។ លោកស្រីបន្តថា ពិធីបួងសួងនេះ ក៏ជាការឧទ្ទិសកុសលជូនដល់បុព្វការីជន ក៏ដូចជាបុព្វបុរសខ្មែរ ដែលបានតស៊ូលះបង់ និងបូជាជីវិតក្នុងបុព្វហេតុជាតិមាតុភូមិផងដែរ ។ លោកស្រីបន្ថែមថា ពិធីនេះក៏ជាសាបព្រោះ និងបញ្ច្រៀបចំណេះដឹងដល់កុលបុត្រខ្មែរ ឲ្យបាន ដឹងពីប្រពៃណីទំនៀមទម្លាប់ខ្មែរពាក់ព័ន្ធពិធីបួងសួងនេះ៕
រុស្ស៊ី ៖ កាលពីថ្ងៃអាទិត្យក្រសួងការពារជាតិប្រទេសរុស្ស៊ីបានបញ្ចេញវីដេអូមួយដែលបង្ហាញឲ្យឃើញពីយន្តហោះចម្បាំងរបស់ខ្លួនមួយចំនួនកំពុងវាយប្រហារគោលដៅក្រុមសកម្មប្រយុទ្ធនៅភាគអាគ្នេយ៍នៃខេត្តឌែរអាល់ហ្ស័រនៅប្រទេសស៊ីរី។
ក្រសួងការពារជាតិនេះបានបញ្ជាក់ថា យន្តហោះទម្លាក់គ្រាប់បែកប្រភេទ Tu-22M3 បានហោះចេញពីមូលដ្ឋានទ័ពអាកាសនៅប្រទេសរុស្ស៊ី និងវាយប្រហារចំគោលដៅរបស់ក្រុមសកម្មប្រយុទ្ធមួយចំនួនដូចជាឃ្លាំង រថយន្តយោធា និងមូលដ្ឋានជាដើម។ ក្រសួងដដែលនេះបានបន្ថែមទៀតថា យន្តហោះទម្លាក់គ្រាប់បែកនេះត្រូវបានហោះអមការពារដោយយន្តហោះចម្បាំងប្រភេទ Su-30SM ដោយហោះចេញពីមូលដ្ឋានយោធារបស់ប្រទេសរុស្ស៊ីនៅប្រទេសស៊ីរី។
ទីភ្នាក់ងារព័ត៌មានប្រទេសរុស្ស៊ីបានរាយការណ៍ថា ប្រទេសរុស្ស៊ីពេលនេះកំពុងត្រៀមខ្លួនដកអង្គភាពយោធារបស់ខ្លួនចេញពីដែនដីប្រទេសស៊ីរី៕
កូរ៉េខាងត្បូង ៖ មនុស្សចំនួន១៣នាក់បានស្លាប់ និង២នាក់ផ្សេងទៀតកំពុងបាត់ខ្លួននៅឡើយនៅប្រទេសកូរ៉េខាងត្បូងក្រោយពីទូកនេសាទមួយគ្រឿងបានបើកបុកនឹងនាវាចាក់ប្រេងបណ្ដាលឲ្យលិចកាលពីថ្ងៃអាទិត្យម្សិលមិញ។
មន្ត្រីឆ្មាំសមុទ្រប្រទេសកូរ៉េខាងត្បូងបាននិយាយថា ចំនួនអ្នកស្លាប់អាចកើនឡើងនៅពេលមនុស្សចំនួន៦នាក់ក្នុងចំណោម១៣នាក់ដែលត្រូវបានជួយសង្គ្រោះកំពុងសន្លប់ស្ថិងក្នុងស្ថានភាពធ្ងន់ធ្ងរ។ មន្ត្រីនេះបានបញ្ជាក់ថា មនុស្សចំនួន២២នាក់បានជិះនៅលើទូកនេសាទនៅពេលទូកនេះបានក្រឡាប់លិចក្រោយពីបានបុកជាមួយនាវាចាក់ប្រេងនៅជិតទីក្រុងកំពង់ផែអ៊ីនឈាន់ប្រទេសកូរ៉េខាងត្បូង។ ចំណែកនាវាចាក់ប្រេងមិនបានរងការខូចខាតអ្វីទេ។
ជាមួយគ្នានោះប្រធានាធិបតីប្រទេសកូរ៉េខាងត្បូងគឺលោក មូន ជេអ៊ីន បានបញ្ជាឲ្យមន្ត្រីក្រោមឱវាទបញ្ជូនឆ្មាំសមុទ្រជាង១០នាក់ នាវាជើងទឹកមួយចំនួន និងឧទ្ធម្ភាគចក្រយ៉ាងតិច៤គ្រឿងទៅកន្លែងកើតហេតុ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
