លីបង់ ៖ មេដឹកនាំហេសប៊ូឡាកំពុងអំពាវនាវឲ្យប្រជាជាតិមូស្លីម និងតំបន់អារ៉ាប់ទាំងអស់រួមគ្នាដាក់សម្ពាធទៅលើសហរដ្ឋអាមេរិកដើម្បីឲ្យកែប្រែការសម្រេចចិត្តរបស់ខ្លួនក្នុងការទទួលស្គាល់ទីក្រុងហ្សេរុយសាឡឹមថា ជាទីក្រុងរបស់ប្រទេសអ៊ីស្រាអែល។
លោក ហាស្សាន ណាស្រាឡា មេដឹកនាំក្រុមហេសប៊ូឡាបាននិយាយពីព្រហស្បតិ៍ថា រាល់កិច្ចចរចានៅតំបន់មជ្ឈិមបូព៌ាទាំងអស់ត្រូវតែបញ្ឈប់ ហើយថា ការប្រកាសរបស់ប្រធានាធិបតីសហរដ្ឋអាមេរិកលោក ដូណាល់ ត្រាំ នេះគឺជាការឈ្លានពានរបស់អាមេរិកទៅលើប្រជាពលរដ្ឋប៉ាឡេស្ទីន។
លោក ណាស្រាឡា បាននិយាយតាមទូរទស្សន៍ថា លោកមិនបានគំរាមធ្វើសកម្មភាពយោធាទេ ប៉ុន្តែលោកគ្រាន់តែគាំការអំពាវនាវរបស់ពលរដ្ឋប៉ាឡេស្ទីនសុំឲ្យមានការក្រោកឈរជាថ្មីម្ដងទៀតដើម្បីប្រឆាំងនឹងទង្វើរបស់សហរដ្ឋអាមេរិក។
សូមបញ្ជាក់ថា ក្រុមហេសប៊ូឡាគឺជាក្រុមសកម្មប្រយុទ្ធនៅប្រទេសលីបង់ ហើយក្រុមនេះគឺជាក្រុមយោធាឈានមុខគេមួយដែលបានគំរាមកំហែងប្រទេសអ៊ីស្រាអែលកាលពីឆ្នាំ២០០០ក្រុមនេះបានបង្ខំឲ្យប្រទេសអ៊ីស្រាអែលចេញពីផ្នែកខាងត្បូងប្រទេសលីបង់ ហើយឆ្នាំ២០០៦ក្រុមនេះក៏បានធ្វើសង្គ្រាមជាមួយប្រទេសអ៊ីស្រាអែលផងដែរ៕
អាមេរិក ៖ សហរដ្ឋអាមេរិកកំពុងពិចារណាដាក់ទណ្ឌសេដ្ឋកិច្ចជាថ្មីម្ដងទៀតទៅលើមេដឹកនាំយោធាមួយនៅប្រទេសមីយ៉ាន់ម៉ា និងក្រុមហ៊ុនមួយចំនួនទៀតដែលមានទំនាក់ទំនងជាមួយមេដឹកនាំទាំងនេះដោយសារវិបត្តិរ៉ូហ៊ីងយ៉ានៅរដ្ឋរ៉ាក់ឃីននៅភាគខាងជើងប្រទេសក្នុងតំបន់អាស៊ានមួយនេះ ខណៈដែលកំពុងពិភាក្សាជាមួយបង់ក្លាដែសពិភាក្សាពីការបញ្ជូនជនភៀសខ្លួនរ៉ូហ៊ីងយ៉ាត្រឡប់ទៅប្រទេសមីយ៉ាន់ម៉ាវិញនោះ។
មន្ត្រីជំនាញបាននិយាយថា បើសិនសហរដ្ឋអាមេរិកដាក់ទណ្ឌកម្មជាថ្មីទៅលើប្រទេសមីយ៉ាន់ម៉ាមែន វាអាចធ្វើឲ្យខាតប្រយោជន៍និងរារាំងដល់អន្តរកាលរបស់ប្រទេសនេះដែលកំពុងងាកចេញពីរបបសឹកយោធាជាច្រើនទសវត្សរ៍មកហើយឆ្ពោះទៅរករបបលទ្ធិប្រជាធិបតេយ្យ។ មន្ត្រីជំនាញលោក ហ័រស៊ី បាននិយាយថា ទណ្ឌកម្មទាំងនេះនឹងមិនទំនងជាប៉ះពាល់ខ្លាំងទៅលើគោលនយោបាយនៅប្រទេសមីយ៉ាន់ម៉ាទេ ខណៈប្រទេសនេះទើបតែបានរួចផុតពីទណ្ឌកម្មបានប៉ុន្មានឆ្នាំនេះដែលគេបានដាក់ទណ្ឌកម្មរយៈពេលជាច្រើនទសវត្សរ៍មកហើយ៕
ម៉ានីល ៖ យោធាហ្វីលីពីនស្នើសុំប្រធានាធិបតី លោក រ៉ូឌ្រីហ្គោ ឌូតឺតេ ពន្យារច្បាប់អាជ្ញាសឹកនៅខេត្តមីដាណាវ ភាគខាងត្បូងប្រទេសថែមមួយឆ្នាំទៀត គិតចាប់តាំងពីដើមខែធ្នូនេះតទៅ បន្ទាប់ពីពួកឧទ្ទាម គាំទ្រ ISIS ភាគត្បូង បានបើកការវាយប្រហារមកលើកងកម្លាំងយោធារបស់រដ្ឋាភិបាលហ្វីលីពីនជាថ្មី។ នេះបើតាម ទីភ្នាក់ងារព័ត៌មានចិន ស៊ីនហួរ។
ការទាមទារបែបនេះធ្វើឡើងទៅកាន់ប្រធានាធិបតីហ្វីលីពីន លោក រ៉ូឌ្រីហ្គោក ឌូតឺតេ និងត្រូវបានមន្ត្រីយោធា បង្ហើបឲ្យដឹងនៅថ្ងៃព្រហស្បតិ៍ម្សិលមិញ ដោយរង់ចាំតែការសម្រេចចុងក្រោយ ពីលោកប្រធានាធិបតីប៉ុណ្ណោះ។ ប្រការនេះបានកើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីពួកឧទ្ទាមភាគត្បូង បានបើកការវាយប្រហារមកលើកងកម្លាំងយោធារបស់រដ្ឋាភិបាលហ្វីលីពីនជាថ្មី ហើយក៏កើតចេញជាការប្រយុទ្ធតបតគ្នាជាច្រើនលើក នាំឲ្យមនុស្សស្លាប់ជាច្រើននាក់បន្ថែមទៀត នៅលើប្រជុំកោះភាគខាងត្បូងនោះ។
សូមបញ្ជាក់ថា ការប្រកាសបន្តប្រើច្បាប់អាជ្ញាសឹកមួយឆ្នាំទៀតនេះ គឺបានកើតមានរយៈពេល៥០ថ្ងៃ ក្រោយពីការប្រការជោគជ័យ លើសង្គ្រាមរំដោះទីក្រុងម៉ារ៉ាវី កាលពីថ្ងៃទី២៧ ខែតុលា ឆ្នាំ២០១៧បន្ទាប់ពីរយៈពេល១៤៨ថ្ងៃ នៃសង្គ្រាមដ៏ក្តៅគគុកនៅភាគខាងត្បូងហ្វីលីពីន បានអូសបន្លាយដែលជាហេតុបង្កឲ្យមនុស្សរាប់រយនាក់បាត់បង់ជីវិត រួមមានទាំងយោធា ជនស៊ីវិល និងក្រុមឧទ្ទាមគាំទ្រ ISIS៕
ខេត្តកំពង់ស្ពឺ ៖ តាមសេចក្តីរាយការណ៍បានឲ្យដឹងថា នៅព្រឹកព្រលឹមថ្ងៃទី០៨ ខែធ្នូ ឆ្នាំ២០១៧នេះ មានករណីគ្រោះថ្នាក់ចរាចរណ៍មួយកើតឡើង ដោយរថយន្តដឹកកម្មករ-កម្មការិនី ធ្វើការរោងចក្រមួយគ្រឿង បានបើកបរក្នុងល្បឿនលឿន ក៏បែកកង់រេចង្កូតក្រឡាប់ធ្លាក់ផ្លូវ។ ករណីនេះកើតឡើងនៅម៉ោង០៦ និង២០នាទី ថ្ងៃទី០៨ ខែធ្នូ ឆ្នាំ២០១៧ ស្ថិតក្នុងភូមិអណ្តូងច្រុះ ឃុំស្នំក្រពើ ស្រុកគងពិសី ខេត្តកំពង់ស្ពឺ។
សេចក្តីរាយការណ៍ដដែលបញ្ជាក់ថា ក្នុងករណីខាងលើនេះបានបណ្តាលឲ្យស្លាប់កម្មការិនីម្នាក់ និងកម្មការិនី១៦នាក់ផ្សេងទៀត របួសធ្ងន់ស្រាល កំពុងបញ្ជូនទៅសង្គ្រោះនៅមន្ទីរពេទ្យ៕
ហ្សាការតា ៖ ទីភ្នាក់ងារសារព័ត៌មានចិន ស៊ីនហួរ ចេញផ្សាយថា ស្ថានទូតអាមេរិកប្រចាំប្រទេសឥណ្ឌូណេស៊ីបានចេញផ្សាយសារព្រមានពីសន្តិសុខ សម្រាប់ពលរដ្ឋរបស់ខ្លួនដែលកំពុងស្ថិត ឬរស់នៅក្នុងប្រទេសក្នុងតំបន់អាស៊ីអាគ្នេយ៍មួយនេះឲ្យប្រយ័ត្នពីសុវត្ថិភាពផ្ទាល់ខ្លួន។
ការចេញសារព្រមាននេះធ្វើឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ ប្រកាសទទួលស្គាល់ទីក្រុងហ្សេរុយសាឡឹម ជារដ្ឋធានីរបស់អ៊ីស្រាអែល និងក្រោយពីប្រធានាធិបតីឥណ្ឌូណេស៊ី លោក ចូកូ វីដូដូ ប្រកាសថ្កោលទោសខ្លាំងៗ លើការសម្រេចចិត្តបែបនេះ និងអំពាវនាវឱ្យសហរដ្ឋអាមេរិកពិចារណាឡើងវិញ។
នៅក្នុងសេចក្ដីថ្លែងការណ៍ ស្ថានទូតអាមេរិកក៏បានព្រមានដែរថា ការទទួលស្គាល់នេះអាចនឹងជំរុញឱ្យមានការតវ៉ា ដែលអាចនឹងផ្ទុះទៅជាអំពើហិង្សា។ សេចក្ដីថ្លែងការណ៍ដដែលបញ្ជាក់ថា «ស្ថានទូតអាមេរិកប្រចាំទីក្រុងហ្សាការតា សូមរំលឹកដល់ពលរដ្ឋអាមេរិក ពីភាពចាំបាច់នៃការប្រុងប្រយ័ត្ន និងស្វែងយល់ពីសន្តិសុខផ្ទាល់ខ្លួន ដោយត្រូវនៅឱ្យឆ្ងាយពីការតវ៉ា ស្ដាប់តាមការណែនាំពីអាជ្ញាធរនៅក្នុងតំបន់ ព្រមទាំងតាមដានការវិវត្តន៍ព័ត៌មាន ឱ្យបានដិតដល់»៕
រាជធានីភ្នំពេញ ៖ ចាប់ពីថ្ងៃទី០៨ រហូតដល់ថ្ងៃទី១៤ ខែធ្នូ ឆ្នាំ២០១៧ សីតុណ្ហភាពនឹងធ្លាក់ចុះខ្លាំង នៅបណ្ដាខេត្តមួយចំនួន និងជាពិសេសតាមបន្ទាត់ព្រំដែន (តំបន់ជួរភ្នំដងរែក)។ នេះបើយោងតាមសេចក្តីប្រកាសព័ត៌មានរបស់ក្រសួងធនធានទឹក និងឧតុនិយម។
ក្រសួងធនធានទឹកបានបញ្ជាក់ថា ខេត្តដែលត្រូវសីតុណ្ហភាពអប្បបរមា នឹងធ្លាក់ចុះខ្លាំងរួមមាន៖ ខេត្តរតនគិរី មណ្ឌលគិរី ស្ទឹងត្រែង ព្រះវិហារ ឧត្ដរមានជ័យ និងខេត្តប៉ៃលិន សីតុណ្ហភាពអប្បបរមានឹងចុះមកនៅក្នុងរង្វង់ពី ១៦-១៨ អង្សាសេ និងបណ្ដារាជធានី-ខេត្ត ដទៃទៀត សីតុណ្ហភាពអប្បបរមា នឹងចុះមកនៅក្នុងរង្វង់ពី១៩-២១ អង្សាសេ៕
ភ្នំពេញ ៖ ឯ.ឧ ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បានចាត់ទុកសេចក្តីសម្រេចចិត្តរបស់ក្រសួងការបរទេសសហរដ្ឋអាមេរិក ដែលហាមមិនឲ្យមន្ត្រីរាជរដ្ឋាភិបាលកម្ពុជា និងក្រុមគ្រួសារ ធ្វើដំណើរចូលទឹកដីអាមេរិក ថាជាការសម្រេចចិត្តខុស ដែលធ្វើឱ្យប៉ះពាល់ដល់ទំនាក់ទំនងរវាងកម្ពុជា-អាមេរិក និងបំផ្លាញលិទ្ធិប្រជាធិបតេយ្យដែលសហរដ្ឋអាមេរិកបានសាងនៅកម្ពុជា។
ប្រតិកម្មរបស់មន្ត្រីជាន់ខ្ពស់រាជរដ្ឋាភិបាលកម្ពុជាខាងលើនេះ បានធ្វើឡើងភ្លាមៗ នាព្រឹកថ្ងៃ ទី៧ ខែធ្នូ ឆ្នាំ២០១៧នេះ បន្ទាប់ពីក្រសួងការបរទេសសហរដ្ឋអាមេរិក បានប្រកាសដាក់កំហិតទិដ្ឋាការលើមន្ត្រីរដ្ឋាភិបាលកម្ពុជា រួមទាំងក្រុមគ្រួសារ មិនឲ្យធ្វើដំណើរចូលទឹកដីសហរដ្ឋអាមេរិក ក្រោមហេតុផលថា មន្ត្រីទាំងនោះបានធ្វើឱ្យខូចដល់ដំណើរការលិទ្ធិប្រជាធិបតេយ្យនៅកម្ពុជា។
ឯ.ឧ ផៃ ស៊ីផាន បានលើកឡើងថា “សេចក្តីថ្លែងការណ៍របស់ក្រសួងការបរទេសអាមេរិកជាការសម្រេចចិត្តមួយខុសពីស្ថានភាពពិតប្រាកដរបស់កម្ពុជា អំពីការប្រឹងប្រែងពង្រឹងលទ្ធិប្រជា ធិបតេយ្យនៅកម្ពុជា ចំពោះគណបក្សដែលត្រូវបានរំលាយរួចទៅហើយនោះ គឺ សម រង្ស៊ី និង កឹមសុខា មិនបានរួមជាដៃគូក្នុងការពង្រឹងលទ្ធិប្រជាធិបតេយ្យដែលជាទំនិញរបស់សហរដ្ឋអាមេរិកចង់ បាននោះទេ គឺ សម រង្ស៊ី និង កឹម សុខា តែងតែធ្វើពហិការ គេតែងតែមិនទទួលស្គាល់លទ្ធផលនៃការបោះឆ្នោតនោះទេ គេប្រឆាំងជាមួយស្ថាប័នជាតិទាំងបី មានរាជរដ្ឋាភិបាល សភា និងតុលាការ ។ ឯ.ឧ បន្តថា ការសម្រេចចិត្តរបស់ក្រសួងការបរទេសអាមេរិក នាពេលនេះ មិនត្រឹមតែជាការបំផ្លាញលទ្ធិប្រជាធិបតេយ្យនៅកម្ពុជាទេ ក៏ជាការបំផ្លាញមិត្តភាព និងកិច្ចសហប្រតិបត្តិការរវាងកម្ពុជា និងសហរដ្ឋអាមេរិក ទៀតផង”។
ឯ.ឧ ផៃ ស៊ីផាន បន្ថែមថា “ការសម្រេចចិត្តរបស់ក្រសួងការបរទេសអាមេរិកនេះគឺអយុត្តិធម៌ចំពោះអ្វីដែលកើតឡើងពិតប្រាកដនៅកម្ពុជា រួមទាំងការប្រឹងប្រែងរបស់កម្ពុជា ហើយអ្វីដែលកើត ឡើងនេះ គឺសហរដ្ឋអាមេរិកទេ ដែលបង្ហាញថា ខ្លួនមិនធ្វើកិច្ចសហប្រតិបត្តិការជាមួយកម្ពុជា មិនស្វែងយល់ឲ្យបានច្បាស់គ្រប់ជ្រុងជ្រោយនៅក្នុងការសម្រេចចិត្ត។ ចំពោះសេចក្តីសម្រេចចិត្តនេះ ដែរ គឺទទួលបានសារមិនល្អពីស្ថានទូតសហរដ្ឋអាមេរិកប្រចាំកម្ពុជា គឺលោក វីល្លៀម ហេដ ដែលលោកបានយល់ច្រលំថា កម្ពុជាមានជំហរប្រឆាំងនឹងសហរដ្ឋអាមេរិក គឺជាការយល់ខុស ១០០%ដែលជាការបរិហារលើភក្តីភាពរបស់កម្ពុជា ចំពោះសហរដ្ឋអាមេរិក”។
គួរកត់សម្គាល់ថា នេះជាលើកទីពីរហើយដែលអាមេរិកប្រើវិធានតឹងរ៉ឹងមកលើកម្ពុជា បន្ទាប់ ពីការបញ្ឈប់ផ្តល់ជំនួយរបស់អាមេរិកមកកាន់គណៈកម្មាធិការជាតិរៀបចំការបោះឆ្នោតកម្ពុជា។
សូមជម្រាបផងដែរថា ក្នុងសេចក្តីប្រកាសរបស់ក្រសួងការបរទេសអាមេរិក មិនបានចុចឲ្យចំឈ្មោះថា តើមានមន្ត្រីរាជរដ្ឋាភិបាលកម្ពុជារូបណាខ្លះដែលត្រូវបិទទិដ្ឋាការនោះទេ តែបានភ្ជាប់ សមាជិកគ្រួសាររបស់មន្ត្រីទាំងនោះ ក៏មិនឱ្យចូលទៅកាន់ដឹកដីអាមេរិកផងដែរ។
ទោះជាយ៉ាងណាក៏ក្តី ការប្រកាសរបស់ក្រសួការបរទេសអាមេរិក ក៏បានអំពាវនាវរំឮកឲ្យរាជរដ្ឋាភិបាលកម្ពុជា បង្វិលស្ថានការទាំងអស់ឲ្យវិលទៅរកស្ថានភាពដូចដើមឡើងវិញ ដែលទង្វើនេះ អាចឈានទៅរកការលើកលែងការហាមឃាត់ថ្មីរបស់អាមេរិកនេះវិញ ប៉ុន្តែ មន្ត្រីជាន់ខ្ពស់រាជ រដ្ឋាភិបាល ឯ.ឧ ផៃ ស៊ីផាន បានបញ្ជាក់អះអាងថា ការអំពាវនាវរបស់អាមេរិក គឺមិនអាចឱ្យធ្វើតាមបានទេ ដោយកម្ពុជានៅតែបន្តដំណើរទៅមុខដដែល៕
រាជធានីភ្នំពេញ ៖ នៅព្រឹកថ្ងៃព្រហស្បតិ៍នេះ រដ្ឋសភាបានបោះឆ្នោតលោក នុត សុខុម ឱ្យធ្វើជា អនុប្រធានគ.ជ.ប ។ ចំណែកលោក ហ៊ែល សារ៉ាត់ និង លោក ឌឹម សុវណ្ណារុំ បានជាប់ជាសមាជិកគ.ជ.ប ផងដែរ ។
ទន្ទឹមនោះរដ្ឋសភាក៏បានការប្រកាសសុពលភាពរបស់ តំណាងរាស្ត្រថ្មី១៦រូបផងដែរ ដែលតំណាងរាស្ត្រថ្មីទាំង១៦រូបនោះនៃរដ្ឋសភា បានបញ្ចប់ហើយ នៅវេលាម៉ោងជិត៩ និង០០នាទី ព្រឹកថ្ងៃទី០៧ ខែធ្នូ ឆ្នាំ២០១៧នេះ នឹងចូលស្បថកាន់តំណែងនៅរដ្ឋសភា ក្នុងថ្ងៃនេះតែម្តង ៕
រាជធានីភ្នំពេញ ៖ អនុប្រធានគណបក្សហ្វ៊ុនស៊ិនប៉ិច លោក យូ ហុកគ្រី ត្រូវបានគណៈកម្មាធិការ អចិន្ត្រៃយ៍ នៃរដ្ឋសភា ប្រកាសទទួលស្គាល់ជាបេក្ខជនអនុប្រធានទី១ នៃរដ្ឋសភា ហើយ កាលពីព្រឹកមិញ ។ ចំណែកការបោះឆ្នោតជ្រើសតាំងលោក យូរ ហុកគ្រី នឹងធ្វើឡើងនៅក្នុងកិច្ចប្រជុំពេញអង្គខាងមុខ។ នេះបើតាមសេចក្តីប្រកាសលទ្ធផលរបស់រដ្ឋសភា ក្រោយកិច្ចប្រជុំគណៈកម្មាធិការអចិន្ត្រៃយ៍ នៅព្រឹកថ្ងៃទី៧ ខែធ្នូ ឆ្នាំ២០១៧នេះ ៕
រាជធានីភ្នំពេញ ៖ នៅព្រឹកថ្ងៃទី០៧ ខែធ្នូ ឆ្នាំ២០១៧នេះ លោក វង្ស ភក្តី មេធាវីរបស់អគ្គមេបញ្ជាការ នៃកងយោធពលខេមរភូមិន្ទ បានដាក់ពាក្យប្តឹងទណ្ឌិត សម រង្ស៊ី ទៅកាន់សាលាដំបូងរាជធានីភ្នំពេញរួចហើយ ពាក់ព័ន្ធនឹងអំពើញុះញង់កុំឲ្យយោធិនស្តាប់បង្គាប់ថ្នាក់ដឹកនាំស្របច្បាប់ ធ្វើឲ្យខូចទឹកចិត្តកងទ័ព និងប្រមាថថ្នាក់ដឹកនាំកងយោធពលខេមរភូមិន្ទ។
នាយឧត្តមសេនីយ៍ ប៉ុល សារឿន អគ្គមេបញ្ជាការកងយោធពលខេមរភូមិន្ទ បានថ្លែងកាលពីម្សិលមិញថា កងយោធពលខេមរភូមិន្ទមិនចង់ទារសំណងនោះឡើយ ហើយចង់ឱ្យដាក់ទោស ទៅតាមច្បាប់ឱ្យបានធ្ងន់ធ្ងរបំផុត ខណៈដែលទោសនេះជាទោសក្បត់ជាតិ នេះបើយោងតាមរដ្ឋធម្មនុញ្ញ និងច្បាប់នៃព្រៃរាជាណាចក្រកម្ពុជា។ លោកបានអះអាងទៀតថា កងយោធពលខេមរភមិន្ទ មិនសុខចិត្តចំពោះការអំពាវនាវរបស់ លោក សម រង្ស៊ី ឡើយព្រោះថា ការអំពាវនាវនោះគឺជាការញុះញង់ឲ្យកងទ័ពផ្តួលរំលំរដ្ឋាភិបាល ធ្វើឱ្យខុសវិន័យ និងលក្ខន្តិកៈកងទ័ព និងរដ្ឋធម្មនុញ្ញ ហើយកងទ័ពត្រូវតែតស៊ូតាមផ្លូវច្បាប់ ចំពោះករណីនេះ ៕
រាជធានីភ្នំពេញ ៖ គំនុំចាស់រវាងព្រះសង្ឃ និងព្រះសង្ឃបានដោះស្រាយ ក្នុងវត្តទួលសំរោងបណ្តាលឲ្យ ព្រះសង្ឃ១អង្គរងរបួសបែកក្បាល បង្កឲ្យមានការភ្ញាក់ផ្អើលឡើង កាលពីវេលាម៉ោង៧យប់ ថ្ងៃទី៦ ខែធ្នូ ឆ្នាំ២០១៧ ក្នុងវត្តទួលសំរោង សង្កាត់ដង្កោ ខណ្ឌដង្កោ។ ព្រះសង្ឃរងគ្រោះមានព្រះនាម វ៉ា សែម ព្រះជន្ម៤៦ព្រះវស្សា ស្នាក់នៅក្នុងវត្តទួលសំរោង រងរបួសដេរ១២ថ្នេរ ចំណែកព្រះសង្ឃបង្កព្រះនាម អ៊ី វ៉ាហៃ ព្រះជន្មប្រហែល ២៥ព្រះវស្សា ស្នាក់នៅក្នុងវត្តទួលសំរោង និងម្នាក់ទៀត មិនស្គាល់ឈ្មោះ។
ប្រភពពីព្រះសង្ឃរងគ្រោះបានឲ្យដឹងថា ព្រះអង្គ និងសង្ឃបង្កធ្លាប់មានទំនាស់ពាក្យសម្ដីគ្នា បន្តិចបន្តួចម្តងរួចមកហើយ ហើយមកដល់ពេលនេះ ទើបខាងសង្ឃបង្កគុំគួន ទើបធ្វើបែបនេះមកលើព្រះអង្គតែម្តង។ ក្រោយពេលកើតហេតុ ព្រះសង្ឃរងគ្រោះ បានដាក់ពាក្យបណ្តឹងសុំឲ្យសមត្ថកិច្ចចាត់ការតាមផ្លូវច្បាប់ តែយ៉ាងណារឿងនេះសមត្ថកិច្ច មិនទាន់អាចធ្វើអ្វីបាននៅឡើយទេ គឺបានត្រឹមឈរនៅមុខខ្លោងទ្វារវត្ត រង់ចាំទាល់តែព្រឹកទើបអាចដោះស្រាយបាន៕
រាជធានីភ្នំពេញ ៖ រដ្ឋសភាបានចាប់ផ្តើមបើកកិច្ចប្រជុំពេញអង្គរបស់ខ្លួន ក្រោមអធិបតីភាព សម្តេច ហេង សំរិន ប្រធានរដ្ឋសភា ដោយមានកូរ៉ុមចូលរួមចំនួន១០២រូប មកពីគណបក្សចំនួន៤ ដើម្បីប្រកាសសុពលភាពរបស់តំណាងរាស្ត្រថ្មី១៦រូប រួមទាំងបោះឆ្នោតផ្តល់សេចក្តីទុកចិត្តលើ អនុប្រធាន-សមាជិកថ្មីរបស់ គណៈកម្មាធិការជាតិរៀបចំការបោះឆ្នោត (គ.ជ.ប) ៣រូប ដែលជំនួសអ្នកដែលបានលាលែងផងដែរ។
សូមបញ្ជាក់ថា តំណាងរាស្ត្រថ្មី១៦រូប ដែលត្រូវប្រកាសសុពលភាពនេះរួមមាន១១រូប មកពី CPP ដែលទទួលបានការបែងចែកអាសនៈដោយ គ.ជ.ប, ៤រូប មកពី CPP ដែលជំនួសសមាជិកសភា៤រូបរបស់ CPP ដែលលាលែងដើម្បីទៅឈរជាបេក្ខជនសមាជិកព្រឹទ្ធសភា និង១រូបទៀត មកពីគណបក្សហ្វ៊ុនស៊ិនប៉ិច ដែលជំនួស លោក នុត សុខុម ដែលលាលែងពីសមាជិករដ្ឋសភា ទៅឈរជាអនុប្រធានរបស់ គ.ជ.ប។ ដោយឡែក បេក្ខជនអនុប្រធាន-សមាជិក គ.ជ.ប ថ្មី៣រូប ដែលត្រូវបោះឆ្នោតផ្តល់សេចក្តីទុកចិត្ត នៅថ្ងៃទី០៧ ខែធ្នូនោះ រួមមាន ១៖ លោក នុត សុខុម មកពីគណបក្សហ្វ៊ុនស៊ិនប៉ិច ២៖ លោក ហ៊ែល សារ៉ាត់ មកពីគណបក្សសញ្ជាតិកម្ពុជា និងទី៣៖ លោក ឌឹម សុវណ្ណារុំ មកពីសាលាក្តីខ្មែរក្រហម៕
ប៉ាឡេស្ទីន ៖ កាលពីថ្ងៃពុធ ប្រជាពលរដ្ឋប៉ាឡេស្ទីននៅតំបន់ហ្គាហ្សា និងនៅប្រទេសលីបង់បានបញ្ចេញប្រតិកម្មតវ៉ាប្រឆាំងនឹងប្រធានាធិបតីសហរដ្ឋអាមេរិកលោក ដូណាល់ ត្រាំ ដែលទទួលស្គាល់ទីក្រុងហ្សេរុយសាឡឹមជាទីក្រុងរបស់ប្រទេសអ៊ីស្រាអែល ជាទង្វើមួយដែលអាចនឹងបន្ថែមអំពើហិង្សានៅក្នុងពិភពលោក។
មេដឹកនាំហាម៉ាសនៅទីក្រុងហ្គាហ្សាលោក អ៊ីស្មែល រ៉ាដវ៉ាន បានហៅផែនការនេះថា «អយុត្តិធម៌» ហើយបានអំពាវនាវឲ្យគេបណ្ដេញឯកអគ្គរដ្ឋទូតសហរដ្ឋអាមេរិកទាំងអស់ចេញពីទឹកដីនៅពិភពអារ៉ាប់និងពិភពអ៊ីស្លាម។ ទន្ទឹមនេះដែរ ក្រុមអ្នកតវ៉ាគ្រប់ស្រទាប់ទាំងអស់បានប្រមូលផ្ដុំគ្នានៅក្នុងជំរំជនភៀសខ្លួនមួយនៅទីក្រុងបេរួតប្រទេសលីបង់ដើម្បីតវ៉ាប្រឆាំងនឹងការទទួលស្គាល់នេះផងដែរ។
តំណាងក្រុមហាម៉ាសនៅប្រទេសលីបង់បានប្រាប់ក្រុមអ្នកកាសែតពីថ្ងៃម្សិលមិញថា ការទទួលស្គាល់របស់អាមេរិកនេះគឺជាឈ្លានពានមិនត្រឹមតែទៅលើពលរដ្ឋប៉ាឡេស្ទីនប៉ុណ្ណោះទេ ប៉ុន្តែថែមទាំងទៅលើប្រទេសនៅតំបន់អារ៉ាប់ និងអ៊ីស្លាមទាំងមូលថែមទៀត។
សូមបញ្ជាក់ថា លោកប្រធានាធិបតី Donald Trump បានទទួលស្គាល់ក្រុងយេរូសាឡឹមជារដ្ឋធានីរបស់ប្រទេសអ៊ីស្រាអែលនៅថ្ងៃពុធដោយមិនអើពើនឹងការព្រមានអំពីកំហុសឆ្គងជាប្រវត្តិសាស្ត្រដែលអាចបង្កឲ្យមានអំពើហិង្សាកាន់តែខ្លាំងនៅតំបន់មជ្ឈឹមបូព៌ា៕
រាជធានីភ្នំពេញ ៖ តាមរបាយការណ៍រយៈពេល១១ខែឆ្នាំ ២០១៧ របស់អនុគណៈកម្មទី២បង្ហាញថា មានគ្រោះថ្នាក់ចរាចរណ៍កើតឡើងចំនួន ៣,២៣៤លើក បណ្តាលអោយស្លាប់ចំនួន១,៦១៧នាក់ និងរងរបួសចំនួន៥១០៧នាក់។
របាយការណ៍ដដែលបញ្ជាក់ថា ប្រៀបធៀបរយៈពេលដូចគ្នានៃឆ្នាំមុន គ្រោះថ្នាក់ថយចំនួន១០៤លើក ស្មើនឹង៣% ស្លាប់កើន៤១នាក់ ស្មើនឹង២.៦% របួសថយចុះ ៨៥៥នាក់ ស្មើនឹង១៤% បង្កឡើងដោយល្មើសល្បឿនកំណត់ ៣៦% មិនគោរពសិទ្ធិ ១៧%, មិនប្រកាន់ស្តាំ ១៣%, វ៉ាជែង១១%, បត់មិនប្រយ័ត្ន១០%, ស្រវឹង១០%, កក្តាយានយន្ត៤%, និងងងុយគេង១% ។ អ្នកស្លាប់ជាអ្នកជិះម៉ូតូមានចំនួន៧៦% (៨៣% មិនពាក់មួក)៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
