ខេត្តព្រះសីហនុ ៖ តាមព័ត៌មានទទួលបាននៅព្រឹកថ្ងៃទី១១ ខែធ្នូនេះ នគរបាលខេត្តព្រះសីហនុ នឹងបញ្ជូនជនជាតិចិនចំនួន ៣នាក់ ដែលពាក់ព័ន្ធបទឧក្រិដ្ឋជំរិតទារប្រាក់ចំនួន៨០ម៉ឺនដុល្លារ ពីជនជាតិចិនដូចគ្នាទៅតុលាការ ។
គួរម្លឹកថា ការឃាត់ខ្លួនជនជាតិចិនទាំង៣នាក់នោះធ្វើឡើងកាលពីវេលាម៉ោង៦ និង៣០នាទីយប់ ថ្ងៃទី៩ ខែធ្នូ ឆ្នាំ២០១៧ នៅចំណុចផ្ទះជួលមួយកន្លែង ក្នុងបុរីប៊ីអេសអូមួយ ក្នុងក្រុមទី១ ភូមិ៥ សង្កាត់លេខ៤ ក្រុងព្រះសីហនុ ខណដែលករណីនេះ សមត្ថកិច្ចក៏បានរំដោះជនរងគ្រោះដោយសុវត្ថិភាពផងដែរ ។
សមត្ថកិច្ចជំនាញ បានឲ្យដឹងថា ជនសង្ស័យទាំង៣នាក់នោះ ១.ឈ្មោះ ZHENG RONGMAO ភេទប្រុស អាយុ២៦ឆ្នាំ, ២.ឈ្មោះ DAI HONGDA ភេទប្រុស អាយុ២៣ឆ្នាំ និង៣.ឈ្មោះ LIN JINPEI ភេទប្រុស អាយុ២៤ឆ្នាំ។ ចំណែកជនរងគ្រោះឈ្មោះ LI FUJIE ភេទប្រុស អាយុ៤៧ឆ្នាំ ជាពាណិជ្ជករ និងជាជនជាតិចិនដូចគ្នា។ ចំណែកវត្ថុតាងរឹបអូសបាន កាំភ្លើងខ្លី១ដើម ម៉ាកBERITA STOM បង់ចំនួន២ គ្រាប់ចំនួន១០គ្រាប់, កូនកាំប៊ិត១, ខ្សែចងរឹត(ស៊ីល)២ដុំ ទូរស័ព្ទដៃ៦គ្រឿង និងរថយន្តម៉ាកលុច្សស៊ីស១គ្រឿង ៕
ចិន ៖ មន្ត្រីមូលដ្ឋានបាននិយាយថា មនុស្សចំនួន៤នាក់បានស្លាប់ ហើយចំនួន៦នាក់ទៀតបានកប់នៅក្រោមគំនរបែកបាក់ ខណៈមនុស្សម្នាក់ទៀតត្រូវបានជួយសង្គ្រោះក្រោយពីមានការផ្ទុះរោងចក្រគីមីមួយនៅទីក្រុងលៀនយុងហ្គាងនៅខេត្តជាំងស៊ូនៅភាគខាងកើតប្រទេសចិនកាលពីចុងសប្តាហ៍កន្លងទៅនេះ។
មន្ត្រីមូលដ្ឋានភ្លាមៗនោះបានបញ្ជូនក្រុមអ្នកជួយសង្គ្រោះ និងគ្រឿងម៉ាស៊ីនដើម្បីធ្វើការជួយសង្គ្រោះរួមទាំងរថយន្តពន្លត់អគ្គិភ័យចំនួន២០គ្រឿង អ្នកពន្លត់ភ្លើង១៣៥នាក់ រថយន្តសាមុយ១២គ្រឿង បុគ្គលិកពេទ្យចំនួន៥០នាក់ និងគ្រឿងចក្រមួយចំនួនទៀត។
កម្មករម្នាក់ត្រូវបានជួយសង្គ្រោះក្នុងគ្រោះថ្នាក់ដែលបានកើតឡើងកាលពីចុងសប្ដាហ៍មកនេះ ហើយកំពុងទទួលការព្យាបាលនៅមន្ទីរពេទ្យក្បែរកន្លែងកើតហេតុ ហើយប្រតិបត្តិការជួយសង្គ្រោះនេះនឹងបន្តរហូតដល់កម្មករដែលកប់ក្រោមគំនរទាំង៦នាក់នេះត្រូវបានជួយសង្គ្រោះអស់។
មន្ត្រីមូលដ្ឋានបានបញ្ជាក់ថា រោងចក្រនេះបានបញ្ឈប់ការផលិត និងដកគ្រឿងគីមីដែលនៅសល់ប៉ុន្មានទៀតចេញពីរោងចក្រនេះ ហើយគេមិនទាន់ឃើញមានការលេចធ្លាយសារធាតុគីមីនៅឡើយទេ ប៉ុន្តែមូលហេតុនៃគ្រោះថ្នាក់នេះគេមិនទាន់ដឹងច្បាស់នៅឡើយទេ៕
លីបង់ ៖ កាលពីថ្ងៃអាទិត្យក្រុមបាតុករបានធ្វើការតវ៉ានៅជិតស្ថានទូតសហរដ្ឋអាមេរិកនៅប្រទេសលីបង់ប្រឆាំងនឹងការសម្រេចចិត្តរបស់ប្រធានាធិបតីសហរដ្ឋអាមេរិកលោក ដូណាល់ ត្រាំ ដែលបានទទួលស្គាល់ទីក្រុងហ្សេរុយសាឡឹមថា ជារដ្ឋធានីប្រទេសអ៊ីស្រាអែល។
ក្រុមអ្នកតវ៉ាមួយចំនួនបានគ្រវីទង់ជាតិ ហើយខ្លះទៀតបាននាំគ្នាដុតភ្លើង និងដុតទង់ជាតិសហរដ្ឋអាមេ រិក និងប្រទេសអ៊ីស្រាអែលនៅតាមផ្លូវ និងចោលវត្ថុរឹងទៅលើកងកម្លាំងសន្តិសុខដែលបានបិទផ្លូវសំខាន់ធ្វើដំណើរទៅស្ថានទូតសហរដ្ឋអាមេរិកនៅតំបន់អាវកានៅខាងជើងទីក្រុងបេរូតនៅប្រទេសលីបង់។ ប្រទេសលីបង់ដែលមានជនភៀសខ្លួនប៉ាឡេស្ទីនប្រហែល៤៥ម៉ឺននាក់បានថ្កោលទោសចំពោះការសម្រេចចិត្តរបស់លោក ត្រាំ ហើយកាលពីសប្ដាហ៍មុនប្រធានាធិបតីប្រទេសលីបង់គឺលោក ម៉ៃឃែល អូន បានហៅទង្វើនេះថា ជាការគំរាមកំហែងចំពោះស្ថិរភាពតំបន់។
សូមបញ្ជាក់ថា ការដែលលោក ត្រាំ ទទួលស្គាល់ទីក្រុងហ្សេរុយសាឡឹមជារដ្ឋធានីប្រទេសអ៊ីស្រាអែលបានធ្វើឲ្យពិភពអារ៉ាប់ខឹងសម្បារយ៉ាងខ្លាំងព្រមទាំងធ្វើឲ្យសម្ពន្ធមិត្តបស្ចិមលោកអាក់អន់ចិត្តដោយនិយាយថា វាជាឧបស័គ្គមួយចំពោះកិច្ចប្រឹងប្រែងសន្តិភាព និងអាចបង្កចលាចលបន្ថែមទៀតនៅមជ្ឈិមបូព៌ា៕
អេហ្ស៊ីប ៖ រដ្ឋមន្ត្រីការបរទេសលីបង់ លោក Gebran Bassil បាននិយាយថា សម្ព័ន្ធអារ៉ាប់គួរតែដាក់ទណ្ឌកម្ម ឬសម្ពាធលើសហរដ្ឋអាមេរិកឱ្យលុបចោលការសម្រេចចិត្តចំពោះការទទួលស្គាល់ទីក្រុងហ្សេរុយសាឡឹមជារដ្ឋធានីរបស់អ៊ីស្រាអែល។
លោក Bassil ថ្លែងបែបនេះនៅក្នុងពិធីកិច្ចប្រជុំមួយក្នុងទីក្រុងគែរ ប្រទេសអេហ្ស៊ីប កាលពីថ្ងៃសៅរ៍ ធ្វើឡើងដោយមានសំណើពីប៉ាឡេស្ទីន និងហ្ស៊កដានី បន្ទាប់ពីលោកដូណាល់ ត្រាំ បាន ប្រកាសកាលពីថ្ងៃពុធទទួលស្គាល់ទីក្រុងហ្សេរុយសាឡឹមជារដ្ឋធានីរបស់អ៊ីស្រាអែល ក៏ដូចជាបញ្ជាឱ្យក្រសួងការបរទេសរបស់ខ្លួន ត្រៀមរៀបចំផ្លាស់ប្ដូរស្ថានទូតអាមេរិក ប្រចាំទីក្រុងតែអាវីវ ទៅទីក្រុងហ្សេរុយសាឡឹម បើទោះជាមានការរិះគន់ និងថ្កោលទោសពីអន្តរជាតិក៏ដោយ។ នេះបើតាមសរព័ត៌មាន Russian Today ។
ថ្លែងនៅក្នុងកិច្ចប្រជុំនៃក្រុមរដ្ឋមន្ត្រីការបរទេសសម្ព័ន្ធអារ៉ាប់ កាលពីថ្ងៃសៅរ៍ លោក Gebran Bassil ក៏បានថ្កោលទោសយ៉ាងខ្លាំងផងដែរចំពោះការសម្រេចចិត្តរបស់ ប្រធានាធិបតីអាមេរិក លោក ដូណាល់ ត្រាំ ដោយលោកចាត់ទុកថា វាគឺជាការសម្រេចចិត្តដ៏គ្រោះថ្នាក់ និងមិនអាចទទួលយកបាន។ លោក Bassil បានបញ្ជាក់ថា «វិធានការបឋមគួរតែត្រូវធ្វើឡើងប្រឆាំងនឹងការសម្រេចចិត្តនេះដោយផ្ដើមដំបូងពីការដាក់សម្ពាធការទូត ហើយបន្ទាប់មកគឺសម្ពាធនយោបាយ មុននឹងយើងត្រូវ ចាត់វិធានការដាក់ទណ្ឌកម្មសេដ្ឋកិច្ច និងហិរញ្ញវត្ថុ»៕
រាជធានីភ្នំពេញ ៖ ជាថ្មីម្តងទៀតកម្ពុជាបាសិទ្ធិធ្វើជាម្ចាស់ផ្ទះក្នុងការប្រកួតផ្ដាច់ព្រ័ត្របវរកញ្ញាសកលវិទ្យាល័យពិភពលោកលើកទី២៨ ដែលមកពី៨២ប្រទេសខុសៗគ្នានេះ ក្នុងនោះមាន៨៤រូប ដែលបរវកញ្ញាកម្ពុជា ៣រូប ហើយការប្រលងផ្ដាច់ព្រ័ត្រនឹងប្រព្រឹត្ដទៅ នៅមជ្ឈមណ្ឌលសន្និបាតកោះពេជ្រ នៅថ្ងៃទី២០ធ្នូខាងមុខនេះ។
សូមជម្រាប់ថា វត្ដមានបវរកញ្ញាសាកលវិទ្យាល័យពិភពលោកនេះ បានធ្វើមកដំណើរមកកម្ពុជា រួចជាស្រេចហើយ ចាប់ពីថ្ងៃទី៦ រហូតមកដល់ថ្ងៃទី១០ ខែធ្នូនេះ ដើម្បីត្រៀមខ្លួនការប្រលងផ្ដាច់ព្រ័ត្រ ក្នុងពេលខាងមុខនេះ។
សូមបញ្ជាក់ថា កាលពីខែវិច្ឆិកាកន្លងទៅនេះកម្ពុជាក៏បានទទួលធ្វើជាម្ចាស់ផ្ទះរៀបចំការប្រកួតវគ្គផ្តាច់ព្រ័ត្របវរកញ្ញាពិភពលោក (Miss Global 2017) ដែលមានបវរកញ្ញាមកពីជាង៦០ប្រទេសផងដែរ៕
សាណាអា ៖ មនុស្សយ៉ាងហោចណាស់០៦នាក់បានស្លាប់បាត់ជីវិត និងជាច្រើននាក់ទៀតរងរបួស នៅក្នុងការវាយប្រហារតាមផ្លូវអាកាសរបស់ក្រុមចម្រុះអារ៉ាប់ដឹកនាំដោយ អារ៉ាប៊ីសាឌីត លើផ្សារពីរកន្លែងក្នុងប្រទេសយ៉េមែន។ នេះបើយោងតាមសារព័ត៌មានចិន CGTN ។
បើតាមប្រភពពីមន្ទីពេទ្យនៅក្នុងតំបន់និយាយថា ការវាយប្រហារលើកទីមួយគឺមានគោលដៅលើផ្សារ Khalakah ក្នុងស្រុក Nehm ស្ថិតនៅចំងាយ៣០គីឡូម៉ែត្រ ភាគឦសាន នៃរដ្ឋធានីសាណាអា ស្ថិតនៅក្រោមការគ្រប់គ្រប់របស់ក្រុមឧទ្ទាមហ៊ូទី។ ការវាយប្រហារនេះបានផ្ដាច់យកអាយុជីវិតមនុស្ស០៥នាក់ និង២០នាក់ទៀត រងរបួស។ ចំណែកឯការវាយប្រហារតាមផ្លូវអាកាសលើកទី២ គឺបានកើតឡើងនៅឯផ្សារមួយផ្សេងទៀត ស្ថិតនៅក្នុងស្រុក Zabid នៃភាគខាងត្បូងទីក្រុង Hodeidah ដោយបណ្ដាលឱ្យមនុស្សម្នាក់ស្លាប់ និង១៥នាក់រងរបួស។
សូមជម្រាបថា ការវាយប្រហារតាមផ្លូវអាកាសទាំងនេះ កើតឡើងតែ០៦ថ្ងៃប៉ុណ្ណោះ បន្ទាប់ក្រុមឧទ្ទាមហ៊ូទី បានសម្លាប់អតីតប្រធានាធិបតីយ៉េមែន លោក Ali Abdullah Saleh ដែលបានបង្ហាញពីទំនោរចង់ផ្សះផ្សាជាមួយទីក្រុងរីយ៉ាដ៕
រាជធានីភ្នំពេញ ៖ កាលពីវេលាម៉ោង៤ និង៣០នាទីទៀបភ្លឺថ្ងៃទី៩ ខែធ្នូ ឆ្នាំ២០១៧ មានការភ្ញាក់ផ្អើលមនុស្សម្នាមកចោមរោមមើល បន្ទាប់ពីគេប្រទះឃើញមានមនុស្សដេកស្លាប់ ក្នុងរថយន្តព្រូសមួយគ្រឿង នៅមុខក្លឹបកម្សាន្តរ៉ុក ស្ថិតភូមិ១៣ សង្កាត់ទន្លេបាសាក់ ខណ្ឌចំការ រាជធានីភ្នំពេញ។
សមត្ថកិច្ចបានឲ្យដឹងថា ករណីមនុស្សដេកស្លាប់ក្នុងរថយន្តម៉ាកព្រូស ពណ៌ស ពាក់ស្លាកលេខភ្នំពេញ 2AM-2186 ជនរងគ្រោះឈ្មោះ ហេង សីហា ភេទប្រុស អាយុ៣៣ឆ្នាំ ស្នាក់នៅផ្ទះលេខ៤ ផ្លូវជាតិលេខ១ ភូមិព្រែក សង្កាត់ច្បារអំពៅ១ខណ្ឌច្បារអំពៅមុខរបរលក់ដូរ។
បច្ចុប្បន្នសមត្ថកិច្ចកំពុងធ្វើការត្រួតពិនិត្យនៅកន្លែងកើតហេតុ។ ចំណែកសព ត្រូវបានបញ្ជូនទៅវត្តច្បារអំពៅ ដើម្បីគ្រួសារចាត់ចែងធ្វើបុណ្យ៕
ប៉ារីស ៖ រដ្ឋមន្ត្រីការទេសបារាំង លោក Jean-Yves le Drian បាននិយាយថា ការសម្រេចចិត្តរបស់ប្រធានាធិបតីអាមេរិក លោក ដូណាល់ ត្រាំ ទទួលស្គាល់ទីក្រុងហ្សេរុយសាឡឹម ជារដ្ឋធានីរបស់អ៊ីស្រាអែល គឺជាទង្វើផ្ទុយទៅនឹងច្បាប់អន្តរជាតិ ប៉ុន្តែលោកសូមឲ្យគ្រប់គ្នាមានការស្ងប់ស្ងាត់ កុំឲ្យស្ថានការណ៍កាន់តែរីកធំ។ លោកបញ្ជាក់ថា សកម្មភាពប្រឆាំងអ៊ីស្រាអែល ឬគេស្គាល់ថា intifada អាចនឹងបង្កជា ហានិភ័យនៅលើទឹកដីប៉ាឡេស្ទីន។ នេះបើយោងតាមសារព័ត៌មានបារាំង Le Figaro។
លោក Jean-Yves le Drian ថ្លែងបែបនេះនៅក្នុងកិច្ចសម្ភាសន៍ជាមួយវិទ្យុបារាំង France inter តែប៉ុន្មានថ្ងៃប៉ុណ្ណោះមុនទីក្រុងប៉ារីស ត្រូវទទួលស្វាគមន៍ដំណើរទស្សន កិច្ចរបស់នាយករដ្ឋមន្ត្រីអ៊ីស្រាអែល លោក Benyamin Netanyahou នៅថ្ងៃអាទិត្យនេះ។
រដ្ឋមន្ត្រីការបទេសបារាំងរូបនេះបានបញ្ជាក់ថា «ការសម្រេចចិត្ត របស់លោក ដូណាល់ ត្រាំ គឺជាទង្វើផ្ទុយទៅនឹងច្បាប់អន្តរជាតិ ហើយយើងជំទាស់នឹងការសម្រេចិត្តបែបនេះ… ប៉ុន្តែយើងនៅតែអំពាវនាវឱ្យមានការរក្សាភាពស្ងៀមស្ងាត់»។
សូមបញ្ជាក់ថា ប្រធានាធិបតីអាមេរិក លោក ដូណាល់ ត្រាំ កាលពីថ្ងៃពុធកន្លងទៅបានប្រកាសទទួលស្គាល់ទីក្រុងហ្សេរុយសាឡឹម ជារដ្ឋធានីរបស់អ៊ីស្រាអែល ហើយក៏បាន បញ្ជាឱ្យក្រសួងការបរទេសអាមេរិក ត្រៀមរៀបចំផ្លាស់ប្ដូរស្ថានទូតអាមេរិកពីទីក្រុងតែលអាវីវ ទៅកាន់ទីក្រុងហ្សេរុយសាឡឹមផងដែរ៕
ប៉ាគីស្ថាន ៖ មន្ត្រីប៉ូលិសប៉ាគីស្ថានម្នាក់បាននិយាយថា មនុស្សយ៉ាងតិច១៤នាក់បានបាត់បង់ជីវិត និង៣០នាក់ផ្សេងទៀតកំពុងបាត់ខ្លួន នៅពេលដែលទូកមួយគ្រឿងដឹកអ្នកធម្មយាត្រាសាសនាជាច្រើននាក់បានលិចនៅក្បែរកោះមួយស្ថិតក្នុងសមុទ្រអារ៉ាប់។
មន្ត្រីរូបនោះបន្តថា ទូកមួយគ្រឿងនោះបានលិចកាលពីថ្ងៃព្រហស្បតិ៍នៅក្បែរទីក្រុងថាតតា (Thatta) ដែលមានចម្ងាយប្រហែល១រយគីឡូម៉ែត្រពីភាគខាងកើតទីក្រុងការ៉ាជី (Karachi) ប្រទេសប៉ាគីស្ថាន។មន្ត្រីដដែលបញ្ជាក់ថា អ្នកធម្មយាត្រាសាសនាទាំងនោះកំពុងធ្វើដំណើរតាមទូកមួយគ្រឿងដែលដឹកមនុស្សលើសចំណុះឆ្ពោះទៅកាន់កន្លែងគោរពបូជាមួយដែលស្ថិតនៅលើកោះមួយកន្លែង ហើយភ្លាមៗនោះស្រាប់តែទូកនោះបានលិចតែម្តង៕
ខេត្តក្រចេះ ៖ កងកម្លាំងអាវុធហត្ថខេត្តក្រចេះនិងបញ្ជូនជនសង្ស័យ04នាក់ពាក់ព័ន្ធករណីជួញដូរនិងរក្សាទុកនៅសារសារធាតុញៀនហើយវត្ថុតាងមួយចំនួនធំទៅកាន់តុលាការនៅព្រឹកស្អែក ថ្ងៃទី០៩ខែធ្នូ ឆ្នាំ២០១៧នេះ។
លោកឡុង យឹង ប្រធានមន្ទីរយុត្តិធម៌កងរាជអាវុធហត្ថខេត្តក្រចេះបានបញ្ជាក់តាមទូរស័ព្ទកាលពីព្រឹក ថ្ងៃទី០០៨ខែធ្នូឆ្នាំ២០១៧ឱ្យដឹងថាកងរាជអាវុធហត្ថក្រុងក្រចេះបានចុះប្រតិបត្តិការបង្ក្រាបនិងឃាត់ខ្លួនបានជនសង្ស័យចំនួន០៤នាក់ដែលមាន០២ទីតាំងបង្ក្រាបក្នុងថ្ងៃតែមួយកាលពីថ្ងៃទី០៧ខែធ្នូ ឆ្នាំ២០១៧។ ទីតាំង១ នៅចំណុចសណ្ឋាគាររីវឺដូហ្វីនស្ថិតក្នុងភូមិអូរឬស្សី១ សង្កាត់អូរឬស្សីក្រុងក្រចេះខេត្តក្រចេះកាលពីល្ងាចវេលាម៉ោងជាង០៥ថ្ងៃទី០៧ខែធ្នូឆ្នាំ២០១៧។ គឺឃាត់ខ្លួនជនសង្ស័យបានចំនួន០៣នាក់ស្រីចំនួន០២នាក់មានឈ្មោះ១\ គង់ ម៉ានិតភេទ ស្រីអាយុ២៣ឆ្នាំរស់នៅក្នុងភូមិស្រែស្តៅសង្កាត់អូរឬស្សីក្រុងក្រចេះខេត្តក្រចេះ២\ឈ្មោះរស់ ចាន់ធី អាយុ២៧ឆ្នាំរស់នៅក្នុងភូមិបារាយណ៍ ឃុំតាឡោតស្រុកបារាយណ៏ ខេត្តកំពង់ធំ៣\ឈ្មោះ ម៉ុល ពុទ្ធារះអាយុ២០ឆ្នាំរស់នៅក្នុងភូមិអូរឬស្សី១សង្កាត់អូរឬស្សីក្រុងក្រចេះ ។ ក្នុងនោះរឹបអូសបានវត្ថុតាងមានម្សៅក្រាមពណ៌ចំនួន០២កញ្ចប់តូច ធំនិងសម្ភារប្រើប្រាស់គ្រឿងញៀនមួយចំនួនធំ ។ ទីតាំងទី២ស្ថិតនៅចំណុចភូមិកន្ទ្រីង សង្កាត់អូរឬស្សីក្រុងក្រចេះខេត្តក្រចេះកាលពីយប់វេលាម៉ោងជាង០៧ថ្ងៃទី០៧ខែធ្នូឆ្នាំ២០១៧នេះធ្វើការឃាត់ខ្លួនជនសង្ស័យ១ម្នាក់ ។មាន ឈ្មោះ តេង រេង ភេទប្រុសរស់នៅក្នុងភូមិស្រែស្តៅ សង្កាត់អូរឬស្សីក្រុងក្រចេះខេត្តក្រចេះ។ចាប់បានវត្ថុតារួមមានម្សៅក្រាមពណ៍(ម៉ាទឹកកក)ចំនួន១កញ្ចប់តូចសារធាតុញៀន ទូរស័ព្ទ១គ្រឿងនឹងប្រាក់រៀលចំនួន៣៥០០៛ ។
លោក ផាត សុភ័ក្រវាសនា មេបញ្ជាការកងរាជអាវុធហត្ថក្រុងក្រចេះ បានឲ្យដឹងថាប្រតិបត្តិការបង្ក្រាបនេះដោយមានការសម្របសម្រួលពីលោក ជា សុភ័ក្រព្រះរាជអាជ្ញារងអមសាលាដំបូងខេត្តក្រចេះទើបឈានដល់ការឃាត់ខ្លួនជនសង្ស័យចំនួន០៤នាក់នៅចំណុចកើតហេតុខាងលើ។
លោកឡុង យឹង ប្រធានមន្ទីរយុត្តិធម៌កងរាជអាវុធហត្ថខេត្តបានបន្តទៀតថា បច្ចុប្បន្នជនសង្ស័យចំនួន០៤នាក់និងវត្ថុតាងខាងលើត្រូវបានឃាត់ខ្លួនបណ្ដោះអាសន្ននៅបញ្ជាការកងរាជអាវុធហត្ថខេត្តក្រចេះនឹងកំពុងកសាងសំណុំរឿងបញ្ជូនជនសង្ស័យទៅកាន់សាលាដំបូងខេត្តនៅព្រឹកស្អែកថ្ងៃទី០៩ខែធ្នូឆ្នាំ២០១៧ដើម្បីចាត់វិធានការតាមនីតិវិធីច្បាប់បន្ត៕
អាមេរិក ៖ ទីភ្នាក់ងារសារព័ត៌មានចិន ស៊ីនហួរ បានរាយការណ៍ថា មនុស្ស០៣នាក់បានស្លាប់បាត់ជីវិត ក្នុងនោះមានសិស្សសាលាពីរនាក់ និងខ្មាន់កាំភ្លើងម្នាក់ នៅក្នុងហេតុការណ៍បាញ់ប្រហារក្នុងសាលារៀនមួយកន្លែងស្ថិតនៅ ភាគពាយ័ព្យនៃរដ្ឋញូមិចស៊ីកូ (New Mexico) សហរដ្ឋអាមេរិក។
ប៉ូលិសបាននិយាយថា ហេតុការណ៍បាញ់ប្រហារខាងលើបានកើតឡើងកាលពីម៉ោង៨ និង០០នាទីព្រឹកថ្ងៃព្រហស្បតិ៍ (ម៉ោងនៅវ៉ាស៊ីនតោន) នៅឯសាលាឈ្មោះ Aztec High School ក្នុងតំបន់ អាសតិច (Aztec) ដែលស្ថិតនៅចំងាយ២៩០គីឡូម៉ែត្រ ពីភាគពាយ័ព្យរដ្ឋ New Mexico។ ទោះបីយ៉ាងណាប៉ូលិសមិនបានបញ្ជាក់ពីអត្តសញ្ញាណជនសង្ស័យឡើយ ដោយគ្រាន់តែថា ខ្មាន់កាំភ្លើងគឺជាបុរសម្នាក់។
ជុំវិញខាងលើនេះប៉ូលិសនៅកំពុងតែបន្តការស៊ើបអង្កេត និងជំរុញឱ្យអ្នកបានឃើញហេតុការណ៍ផ្ទាល់ភ្នែក រាយការណ៍ដល់ប៉ូលិសបន្ថែមទៀត៕
ខេត្តតាកែវ ៖ កម្លាំងនគរបាលស្រុកគិរីវង់ដឹកនាំដោយលោកវរសេនីយ៍ឯក យុគ សារ៉ាត់ អធិការស្រុកបន្ទាប់ពីមានការបញ្ជាពីសំណាក់ឧត្តមសេនីយ៍ទោ សុខ សំណាង ស្នងការនគរបាលខេត្ត បានដឹកនាំកម្លាំងចុះបង្ក្រាបកញ្ឆាក្រៀមជាង២០គីឡូបម្រុងដឹកឆ្លងដែនទៅវៀតណាម និងឃាត់ខ្លួនជនសង្ស័យម្នាក់។ ប្រតិបត្តិការនេះធ្វើឡើងកាលពីវេលាម៉ោង៧ និង៣០នាទីយប់ថ្ងៃទី០៧ ខែធ្នូ ឆ្នាំ២០១៧ នៅចំណុចភូមិចំបកទឹម ឃុំគិរីចុងកោះ ស្រុកគិរីវង់ ខេត្តតាកែវ។
បើតាមលោកអធិការស្រុកគិរីវង់បានឲ្យដឹងថា ជនសង្ស័យឈ្មោះ អោក ធិនដាវីន ភេទប្រុស អាយុ១៧ឆ្នាំ ទីលំនៅភូមិជ្រោយ ឃុំព្រះបាទជាន់ជុំ ស្រុកគិរីវង់។ ចំណែកបក្សពួកម្នាក់ទៀងបានរត់គេចខ្លួន។ លោកបន្តថា មុននឹងឈានដល់ឃាត់ខ្លួនជនសង្ស័យម្នាក់ ដំបូងឡើយជនសង្ស័យមានគ្នា២នាក់ ជិះម៉ូតូ១គ្រឿងម៉ាក YAMAHA TAURUS ពណ៌ខ្មៅ គ្មានស្លាកលេខ ដោយដឹកកញ្ឆាក្រៀមចំនួន២៤គីឡូក្រាម បម្រុងនាំចេញទៅប្រទេសវៀតណាម។
ទោះបីយ៉ាងណាលោកអធិការបញ្ជាក់ថា បច្ចុប្បន្នកម្លាំងជំនាញកំពុងស្រាវជ្រាវស្វែងរកមេខ្លោងធំ ដើម្បីយកមកផ្តន្ទាទោសតាមច្បាប់៕
ខេត្តព្រះវិហារ ៖ គ្រោះថ្នាក់ចរាចរណ៍ដ៏រន្ធត់មួយបានកើតឡើងបណ្តាលឲ្យប្តីប្រពន្ធ និងកូន ស្លាប់ និងរបួសធ្ងន់ ខណៈកំពុងជិះម៉ូតូដឹកគ្នាត្រឡប់មកទិញម្ហូបនៅផ្សារ ទៅផ្ទះវិញមិនប្រយ័ត្នបុកគោ ។ ករណីនេះកើតឡើងកាលពីរសៀលថ្ងៃទី៧ ខែធ្នូ ឆ្នាំ២០១៧ ស្ថិតតាមបណ្តោយផ្លូវជាតិលេខ៦៩ ពីរង្វល់មូលផ្សារស្រអែមឆ្ពោះទៅកាន់តំបន់ប្រាសាទព្រះវិហារចន្លោះបង្គោលគីឡូម៉ែត្រលេខ២២៥-២២៦ ស្ថិតក្នុងភូមិសាស្ត្រ ភូមិធម្មជាតិ ឃុំស្រឯម ស្រុកជាំក្សាន្ត ខេតព្រះវិហារ។
បុរសជាប្តីឈ្មោះ ក្រូច ទ្រូ អាយុ៤៩ឆ្នាំ មុខរបរកសិករ ប្រពន្ធឈ្មោះ ប៉ែន ចន្ថា អាយុ៤៣ឆ្នាំ មុខរបរកសិករ និងកូនឈ្មោះ វង្ស ធារ៉ា អាយុ១៩ឆ្នាំ រងរបួសធ្ងន់ ជនរងគ្រោះទាំង៣ រស់នៅភូមិតេជោបុសស្បូវ ឃុំស្រឯម ស្រុកជាំក្សាន្ត ខេត្តព្រះវិហារ។
បើតាមនាយប៉ុស្តិ៍នគរបាលឃុំស្រឯម លោកអនុសេនីយ៍ឯក ហ៊ុយ សុផុន បានឲ្យដឹងថា មុនពេលកើត បុរស និងស្ត្រី រួមនិងកូនម្នាក់ផងនោះ បានជិះម៉ូតូម៉ាកវេវ ពណ៌ខ្មៅ គ្មានស្លាកលេខ ឌុបគ្នាត្រឡប់មកពីផ្សារ មកដល់ចំណុចកើតហេតុ ក៏បុកគោពេញទំហឹង បណ្តាលឲ្យប្តីប្រពន្ធ និងកូនបោកក្បាលនៅលើដងផ្លូវ រងរបួសធ្ងន់។ លោកបន្តថា ក្រោយកើតហេតុជនរងគ្រោះត្រូវបានរថយន្តសង្គ្រោះមន្ទីរពេទ្យបង្អែកសម្តេច ជា ស៊ីម ស្រះក្តុលដឹកយកមកសង្គ្រោះភ្លាមៗ តែអកុសលដោយសាររបួសធ្ងន់ធ្ងរពេក ក្រោយបញ្ជូនមកដល់មន្ទីរពេទ្យ ក៏ស្លាប់ទាំងពីរនាក់ប្តីប្រពន្ធ ដោយឡែកកូនរងរបួសធ្ងន់។
ក្រោយពិនិត្យសាកសពរួច សមត្ថកិច្ចបានប្រគល់ឲ្យសាច់ញាតិយកទៅធ្វើបុណ្យតាមប្រពៃណី៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
