រាជធានីភ្នំពេញ ៖ តុលាការរាជធានីភ្នំពេញកាលពីម្សិលមិញបានចេញដីកាបង្គាប់ឱ្យឃុំខ្លួនបុរស៣នាក់ ពាក់ព័ន្ធរឿងដើរប្រមូលលុយពីកុមារៗ និងអ្នកសុំទាននៅតាមស្តុប បន្ទាប់ពីជនសង្ស័យទាំង៣នាក់ត្រូវបានឃាត់ខ្លួននាពេលកន្លងទៅ ។
បុរសទាំង៣នាក់ដែលត្រូវឃុំខ្លួនរួមមាន៖ ទី១ឈ្មោះ ឃុត នឹម ហៅ តាលឹម ភេទប្រុស អាយុ ៥៥ឆ្នាំ ជាបុគ្គលិកជាប់កិច្ចសន្យា មន្ទីរសង្គមកិច្ច-ទី២ឈ្មោះ ហឹង សារ៉ូម ហៅ តារុំ ភេទប្រុសអាយុ ៤២ឆ្នាំ ជាបុគ្គលិកជាប់កិច្ចសន្យា មន្ទីរសង្គមកិច្ច -និងទី៣ឈ្មោះ សាន សិត ភេទប្រុស អាយុ៤១ឆ្នាំ អតីតជាអ្នកសុំទាន បច្ចុប្បន្នជាអ្នកដើរប្រមូលលុយពីអ្នកសុំទានតាមភ្លើងស្តុប ឲ្យទៅឈ្មោះ ឃុត នឹម ហៅតាលឹម និងឈ្មោះ ហឹង សារ៉ូម ហៅ តារុំ។
សូមបញ្ជាក់ថា បុរសទាំង៣នាក់ត្រូវបានឃាត់ខ្លួនកាលពីថ្ងៃទី០១ ខែតុលា ឆ្នាំ២០១៧ កន្លងទៅ ក្រោយពីសមត្ថកិច្ចនិងមន្ត្រីពាក់ព័ន្ធរកឃើញថាពួកគេបាន ទទួលយកផលប្រយោជន៍ពីអ្នកសុំទាន និងជារនុកក្នុងផ្តល់ព័ត៌មានដល់អ្នកសុំទាន ធ្វើការគេចខ្លួនពីការ ចុះបង្ក្រាប របស់មន្ទីរសង្គមកិច្ច និងសមត្ថកិច្ចផងដែរ។
នៅចំពោះមុខសមត្ថកិច្ច បុរសទាំង ៣នាក់ បានសារភាពថា ពួកគាត់ពិតជាបានធ្វើសកម្មភាពប្រមូលលុយ ពីអ្នកសុំទានរៀងរាល់ថ្ងៃ នៅតាមភ្លើងស្តុប ដោយអ្នកសុំទានម្នាក់ត្រូវបង់ ១ម៉ឺន ទៅ ១២,០០០ រៀលក្នុង១ថ្ងៃ ៕
រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាបានប្រកាសជាសាធារណៈទិញយកស្ពាន និងផ្លូវលីយ៉ុងផាត់ព្រែកព្នៅ មកគ្រប់គ្រងវិញ ដូច្នេះបងប្អូនប្រជាពលរដ្ឋនឹងធ្វើដំណើរដោយមិនបាច់បង់ថ្លៃតទៅទៀតឡើយ ចាប់ពីថ្ងៃទី១៥ ខែតុលា ឆ្នាំ២០១៧ខាងមុខនេះ។
សម្តេចតេជោ ហ៊ុន សែន បានថ្លែងបញ្ជាក់នៅលើ Facebook Page នៅថ្ងៃទី៥ ខែតុលា ឆ្នាំ២០១៧នេះយ៉ាងដូច្នេះថា «ដើម្បីដោះស្រាយនូវការលំបាក និងជួយលើកកំពស់ជីវភាពប្រជាជន ពិសេសសម្រួលដល់ការធ្វើដំណើរទៅមករបស់ប្រជាពលរដ្ឋ ចាប់ពីម៉ោង ០០:០០នាទី ថ្ងៃទី១៥ ខែតុលា ឆ្នាំ២០១៧នេះតទៅ ស្ពាន និងផ្លូវតភ្ជាប់ពីផ្លូវជាតិលេខ៦A ទៅផ្លូវជាតិលេខ៥ (ស្ពាន និងផ្លូវ លី យ៉ុងផាត់ ព្រែកព្នៅ) នឹងត្រូវធ្វើដំណើរដោយមិនបាច់បង់ថ្លៃឆ្លងកាត់ទៀតទេ រាជរដ្ឋាភិបាលនឹងទិញយកមកគ្រប់គ្រងវិញ»។
សម្តេចតេជោ ហ៊ុន សែន បានមានប្រសាសន៍បន្តទៀតថា «ក្រសួងសេដ្ឋកិច្ច និងហិរញ្ញវត្ថុ ក្រសួងសាធារណការ និងដឹកជញ្ជូន សាលារាជធានីភ្នំពេញ និងស្ថាប័នពាក់ព័ន្ធត្រូវពិភាក្សាជាមួយក្រុមហ៊ុន ដើម្បីពិនិត្យដោះស្រាយបញ្ហាមួយចំនួនដែលនៅសេសសល់។ សង្ឃឹមថា ប្រជាពលរដ្ឋយើងនឹងទទួលបានផលប្រយោជន៍ពីការសម្រេចនេះ»៕
យេម៉ែន ៖ អង្គការសហប្រជាជាតិបាននិយាយថា គិតត្រឹមថ្ងៃទី០២ ខែតុលា ករណីជំងឺអាសន្នរោគនៅក្នុងប្រទេសយេម៉ែនបានកើនឡើងដល់ជាង៧៧ម៉ឺន៧ពាន់ករណី ដោយក្នុងនោះជនរងគ្រោះភាគច្រើនគឺជាកុមារ។
យោងតាមអង្គការសុខភាពពិភពលោក មនុស្សជាង២ពាន់នាក់បានបាត់បង់ជីវិតដោយសារជំងឺអាសន្នរោគនេះនៅទូទាំងប្រទេសយេម៉ែនគិតត្រឹមថ្ងៃទី១៣ ខែកញ្ញា រួមជាមួយនឹងរបាយការណ៍ពីមុនៗដែលបានប៉ាន់ស្មានថា ជារៀងរាល់ថ្ងៃមានមនុស្សចំនួន៥ពាន់នាក់បានឆ្លងជំងឺនេះ។ អង្គការសុខភាពពិភពលោកបាននិយាយថា នេះគឺជាការផ្ទុះឡើងនៃជំងឺអាសន្នរោគដ៏អាក្រក់បំផុតដែលត្រូវបានកត់ត្រាទុកនៅក្នុងប្រវត្តិសាស្ត្រសម័យទំនើប។
សូមរម្លឹកថា កាលពីសប្តាហ៍មុន ប្រធានគណៈកម្មាធិការកាកបាទក្រហមអន្តរជាតិប្រចាំក្នុងប្រទេសយេម៉ែនក៏បានព្រមានផងដែរថា ករណីជំងឺអាសន្នរោគនៅទីនោះអាចនឹងឈានទៅដល់ចំនួន១លានករណីនៅត្រឹមចុងឆ្នាំ២០១៧នេះ៕
រាជធានីភ្នំពេញ ៖ តាមគម្រោងនារសៀលថ្ងៃនេះសម្តេច ហ៊ុន សែន នាយករដ្ឋមន្ត្រីនៃកម្ពុជា នឹងដឹកនាំគណៈប្រតិភូជាន់ខ្ពស់ ចាកចេញពីប្រទេសកម្ពុជា ឆ្ពោះទៅប្រទេសប្រ៊ុយណេ ដើម្បីចូលរួមក្នុងពិធីខួបអនុស្សាវរីយ៍លើកទី៥០ នៃការឡើងគ្រងរាជសម្បត្តិរបស់ ព្រះមហាក្សត្រ ព្រះចៅស៊ុលតង់ ហាជី ហាសាណាល់ បុលគីយ៉ាស់ (SULTAN HAJI HASSANAL BOLKIAH) នៃប្រទេសប្រ៊ុយណេ ៕
រាជធានីភ្នំពេញ ៖ នៅព្រឹកថ្ងៃទី៥ ខែតុលា ឆ្នាំ២០១៧នេះ សមត្ថកិច្ចបានបញ្ជូនខ្លួនជនសង្ស័យ ២នាក់ ដែលជាសន្តិសុខ ក្រុមហ៊ុនបុរីពិភពថ្មី ទៅសាលាដំបូងរាជធានីភ្នំពេញ ពាក់ព័ន្ធករណី ប៉ុនប៉ងឃាតកម្មលើ ស្ត្រីពាណិជ្ជករម្នាក់ ប្លន់យកទ្រព្យសម្បត្តិ។ ជនសង្ស័យទី១ឈ្មោះ ប្រាក់ រ៉ាន្នី ភេទប្រុស អាយុ ៣៦ឆ្នាំ មុខរបរ សន្តិសុខ បុរីពិភពថ្មី និងទី២ឈ្មោះ កឿន សុធា ភេទប្រុស អាយុ ២០ឆ្នាំ មុខរបរ សន្តិសុខ បុរីពិភពថ្មី។
គួររំលឹកថា កាលពីព្រឹកថ្ងៃទី០១ ខែតុលា ឆ្នាំ ២០១៧កន្លងទៅ មានករណីជនរងគ្រោះម្នាក់ឈ្មោះ គឹម សុផុនវឌ្ឍនា ភេទស្រីអាយុ៣៦ឆ្នាំ មុខរបរ ជាពាណិជ្ជករ ត្រូវបានជនសង្ស័យ អាក របួសធ្ងន់ នៅចំណុចក្នុងផ្ទះលេខ៣១ ក្រុម១២ ផ្លូវលេខ៦បេតេ ភូមិគោកឃ្លាង សង្កាត់គោកឃ្លាង ខណ្ឌសែនសុខ។
សមត្ថកិច្ចខណ្ឌសែនសុខ នៅថ្ងៃដដែល បានឃាត់ខ្លួនជនសង្ស័យចំនួន ៦នាក់ ដែលជាក្រុមហ៊ុន បុរីពិភពថ្មី ប៉ុន្តែក្រោយមក ជនសង្ស័យ ៤នាក់ដែលមិនមានការជំពាក់ព័ន្ធ ក៏ត្រូវសមត្ថកិច្ចដោះលែងឱ្យមានសេរីភាពវិញ។
នៅកន្លែងកើតហេតុសមត្ថកិច្ចនគរបាលជំនាញព្រហ្មទណ្ឌ បានចុះធ្វើកោសល្យវិច័យ រកឃើញសម្ភារ បន្សល់ទុក នៅកន្លែងលើតហេតុរួមមាន៖-ពិលពាក់ក្បាលសន្តិសុខពិភពថ្មីចំនួន ១ -ខ្សែក្រវ៉ាត់របស់សន្តិសុខបុរីពិភពថ្មីចំនួន ១ -មួកសន្តិសុខបុរីពិភពថ្មី ប្រលាក់ឈាម ចំនួន ១-ស្បែកជើង ផ្ទាត់មួយចំហៀងផងដែរ ៕
រាជធានីភ្នំពេញ ៖ នៅព្រឹកថ្ងៃទី៥ ខែតុលា ឆ្នាំ២០១៧នេះ ក្រសួងព័ត៌មាន បានរៀបចំសិក្ខាសាលា ស្តីពីច្បាប់ស្តីពីគណបក្សនយោបាយ នៅទីស្តីការក្រសួង ដើម្បីផ្សព្វផ្សាយអំពីខ្លឹមសារនៃច្បាប់នេះ ជូនដល់ពិធីករ និងអ្នកព័ត៌មាន ឱ្យបានកាន់តែទូលំទូលាយ ថែមទៀតក្នុងពេលដែលច្បាប់ស្តីពីគណបក្សនយោបាយកំពុងត្រូវបានយកមកប្រើប្រាស់យ៉ាងសកម្មក្នុងស្ថានភាពបច្ចប្បន្ន ។
សិក្ខាសាលានេះ ត្រូវបានរៀបចំឡើង ក្រោមអធិតីភាពលោក ខៀវ កាញារីទ្ធ រដ្ឋមន្ត្រីក្រសួងព៌តមាន។ សិក្ខាសាលានេះ ក៏មានការចូលរួមពីសំណាក់ពិធីករ ទូរទស្សន៍ វិទ្យុ គេហទំព័រ ប្រមាណ ១០០នាក់ ៕
រាជធានីភ្នំពេញ ៖ អាជ្ញាធរបានបន្តជម្លៀសប្រជាពលរដ្ឋទៅរកទីតាំងសុវត្តិភាពនៅព្រឹកថ្ងៃព្រហស្បតិ៍នេះ ខណៈដែលប្រតិបត្តិការស្វែងរក និងដោះគ្រាប់បែកគីមីដ៏គ្រោះថ្នាក់របស់អាមេរិក ឈានដល់ថ្ងៃទី៣ហើយ ។
លោកឧត្តមសេនីយ៍ឯក កេ ដា អ្នកនាំពាក្យក្នុងប្រតិបត្តិការដោះគ្រាប់បែកគីមីបានបញ្ជាក់ថា ថ្ងៃនេះ កម្លាំងជំនាញរបស់យើងចាប់ផ្តើមប្រតិបត្តិការ ស្វែងរកគ្រាប់បែកគីមីរបស់អាមេរិក១គ្រាប់ទៀត បន្ទាប់ពីថ្ងៃម្សិលមិញ យើងបានរកឃើញគ្រាប់បែក១គ្រាប់ហើយ ដោយធ្វើការគ្របទុកយ៉ាងម៉ត់ចត់ មិនឲ្យភាយសារធាតុចេញមកក្រៅឡើយ ៕
តួកគី ៖ អតីតទាហានចំនួន៣៤នាក់ត្រូវបានតុលាការមួយរបស់ប្រទេសតួកគីសម្រេចផ្តន្ទាទោសម្នាក់ៗជាប់ពន្ធធនាគារអស់មួយជីវិត ក្រោមបទចោទប្រកាន់ថា បានចូលរួមក្នុងគម្រោងសម្លាប់ លោកប្រធានាធិបតី Recep Tayyip Erdogan នៅអំឡុងពេលប៉ន់ប៉ង់ធ្វើរដ្ឋប្រហារមួយកាលពីឆ្នាំមុន។ នេះបើយោងតាមសារព័ត៌មានរដ្ឋរបស់តួកគី Anadolu Agency ។
លោក Ali Yazici អតីតប្រធានជំនួយការរបស់លោកប្រធានាធិបតី ត្រូវបានផ្តន្ទាទោស ឲ្យជាប់ពន្ធធនាគារចំនួន១៨ឆ្នាំ ខណៈអតីតវរសេនីយ៍ឯកមួយរូប ត្រូវបានរួចផុតពីទោស នៅក្នុងការកាត់ក្តីមួយទៅលើជនសង្ស័យសរុបចំនួន៤៧នាក់ ដោយតុលាការនៅខេត្ត Mugla ភាគខាងត្បូងឆៀងខាងលិច ប្រទេសតួកគី។ ក្រុមចុងចោទ ដែលរងការចោទប្រកាន់ថា បានបង្កើតជាក្រុមវាយប្រហារ ដើម្បីសម្លាប់លោកប្រធានាធិបតីនោះ ក៏ត្រូវបានរងការចោទប្រកាន់ ពីបទព្យាយាមលុបបំបាត់រដ្ឋធម្មនុញ្ញ និងរងការចោទប្រកាន់ថា ពួកគេគឺជាសមាជិករបស់ក្រុមភេរវករប្រដាប់ដោយអាវុធ៕
អេស្ប៉ាញ ៖ រដ្ឋាភិបាលនៅក្នុងតំបន់បានថ្លែងថា មេដឹកនាំតំបន់ កាតាឡាន (Catalonia) អាចនឹងប្រកាសឯករាជ្យផ្ដាច់ខ្លួនពីប្រទេសអេស្ប៉ាញ នៅថ្ងៃចន្ទសប្តាហ៍ក្រោយនេះ ខណៈវិបត្តិមួយ បាននឹងកំពុងកើនឡើង រវាងរដ្ឋាភិបាលទីក្រុង Madrid និងក្រុមមេដឹកនាំពួកផ្តាច់ខ្លួន ស្តីពីការបោះឆ្នោតប្រជាមតិ ទាមទារឯករាជ្យដោយខុសច្បាប់។ នេះបើយោងតាមសារព័ត៌មានAFP ។
ក្រុមមេដឹកនាំពួកផ្តាច់ខ្លួន នៅក្នុងតំបន់ កាតាឡាន បានស្នើឲ្យមានសម័យប្រជុំសភា នៅថ្ងៃចន្ទ ដើម្បីវិភាគអំពីលទ្ធផលនៃការធ្វើប្រជាមតិ ហើយយោងតាមរបៀប វារៈនៃសម័យប្រជុំដែលបានសម្រេចនោះ ឯករាជ្យអាចនឹងត្រូវបានប្រកាសឡើង។ នេះបើតាមការស្រង់សម្តីពីប្រភពមួយដែលសុំមិនបញ្ចេញឈ្មោះ។
ជុំវិញករណីខាងលើនេះរដ្ឋមន្ត្រីយុត្តិធម៌អេស្ប៉ាញ បានបញ្ជាក់ថា ទីក្រុង Madrid នឹងធ្វើអ្វីៗគ្រប់បែបយ៉ាង នៅក្រោមប្រព័ន្ធច្បាប់ដែលមានស្រាប់ ដើម្បីរារាំងការប្រកាសឯករាជ្យនៃតំបន់កាតាឡាន (Catalonia) ព្រមទាំងព្រមានថា ការរឹងទទឹងចង់ទាមទារឯករាជ្យភាពនេះ គឺជាការរំលោភបំពានលើមាត្រា១៥៥ នៃរដ្ឋធម្មនុញ្ញជាតិ ដែលអាចនឹងបង្ខំឲ្យរដ្ឋាភិបាលចូលធ្វើ អន្តរាគមន៍គ្រប់គ្រងតំបន់ស្វយ័តកាតាឡាន៕
ភ្នំពេញ ៖ បណ្តាភាគីសហជីពនៅឆ្នាំនេះ បានប្តេជ្ញានឹងជួយទៅដល់ភាគីនិយោជក គ្រោងនឹងធ្វើលិខិតដាច់ដោយឡែករៀងៗខ្លួន ទៅបណ្តាប្រទេសដែលទទួលបញ្ជាទិញទំនិញពីកម្ពុជា រួមមាន៖ សហរដ្ឋអាមេរិក សហគមអឺរ៉ុប កាណាដា ជប៉ុណ កូរ៉េ ជាដើម ដោយស្នើឱ្យកែសម្រួលលក្ខខ័ន្តពាណិជ្ជកម្ម ដើម្បីធ្វើឱ្យទំនិញរបស់កម្ពុជា អាចទៅកាន់ទីផ្សារសហរដ្ឋអាមេរិក សហគមអឺរ៉ុប និងបណ្តាប្រទេសផ្សេងៗទៀងឱ្យបានកាន់តែច្រើន។
គម្រោងការស្នើនេះ ផ្អែកលើរយៈពេលកន្លងមក សហរដ្ឋអាមេរិក និងសហគមអឺរ៉ុប តែងតែជម្រុញឱ្យភាគីកម្មករ និយោជិត ក៏ដូចជារាជរដ្ឋាភិបាលផ្តល់សច្ចាប័ណ្ណនូវអនុសញ្ញាអន្តរជាតិខាងការងារឱ្យបានច្រើនជាងគេនៅក្នុងតំបន់ មានលក្ខខ័ន្តការងារល្អ តម្លើងប្រាក់ឈ្នួលជារៀងរាល់ឆ្នាំ ជាមួយនឹងការសន្យាថាពង្រីកទីផ្សារការងាររបស់កម្ពុជានៅសហរដ្ឋអាមេរិក និងសហគមអែរ៉ុប ក៏ដូចជាបណ្តាប្រទេសផ្សេងទៀត ពិសេសជួយសម្រួលពាណិជ្ជកម្ម ធ្វើម៉េចឱ្យតែកម្ពុជាអនុវត្តអនុសញ្ញាខាងលើឱ្យបានល្អ។
ទាក់ទិននឹងបញ្ហានេះ លោក ហេង សួរ អនុប្រធានលេខាធិការដ្ឋាន នៃគណៈកម្មការប្រឹក្សាការងារ កាលពីល្ងាចម្សិលម៉ិញនេះបានបញ្ជាក់ថា ជាក់ស្តែងកន្លងមកនេះ ការបញ្ជាទិញរបស់សហរដ្ឋអាមេរិក និង សហគមអឺរ៉ុប នៅមានកម្រិតនៅឡើយ។ ដូច្នេះ ឆ្នាំនេះ ជាមួយនឹងកំណើនប្រាក់ឈ្នួលថ្មី ភាគីសហជីព ជាមួយនឹងនិយោជក នឹងធ្វើការអំពាវនាវដោយផ្ទាល់ ទៅបណ្តាប្រទេសដែលនាំទំនិញកម្ពុជាចូល ឱ្យរក្សាការសន្យារបស់ខ្លួន ព្រោះភាគីពាក់ព័ន្ធ នឹងផ្នែកវាយនភណ្ឌនៅកម្ពុជា បានប្តេជ្ញាបន្តកំណើនប្រាក់ឈ្នួលទៅតាមអ្វីដែលជាលក្ខខណ្ឌតម្រូវ ហើយក៏អនុញ្ញាឱ្យមានគម្រោង អាយឡូ ប៊ី អែហ្វ ស៊ី រួមទាំងពង្រឹងសមត្ថភាពមន្រ្តីអធិការរកិច្ចរបស់ខ្លួន ដើម្បីធានាថា លក្ខខន្តការងាររបស់កម្ពុជាជាលក្ខខន្តពាណិជ្ជកម្មដែលសហរដ្ឋអាមេរិក និងសហគមអឺរ៉យបចង់បាននិងចង់ឃលញជាងគេ ហើយចង់យកកម្ពុជាធ្វើជាងគំរូនោះគឺនឹងមានលទ្ធផលជាក់ស្តែង។
យ៉ាងណាទាំងរដ្ឋាភិបាល និងភាគីពាក់ព័ន្ធ លើផ្នែកវាយនភណ្ឌ កាត់ដេរ និងផលិតស្បែកជើងនៅកម្ពុជា សង្ឃឹមថា បើកម្ពុជាមានការរីកចំរើន និងពង្រីកទីផ្សាររបស់ខ្លួន ទៅកាន់សហរដ្ឋអាមេរិក និងសហគមអឺរ៉ុប នោះបណ្តាប្រទេសនៅក្នុងតំបន់គេនឹងមើលឃើញថា ការសន្យារបស់សហរដ្ឋអាមេរិក និងសហគមអឺរ៉ុប ពិតជាល្អ ហើយគេនឹងធ្វើតាម។ ប៉ុន្តែបើកម្ពុជាមិនទទួលបានការលើកលែង ការអនុគ្រោះ ពីសហរដ្ឋអាមេរិក និង សហគមអឺរ៉ុបទេនោះ ប្រទេសមួយចំនួននៅក្នុងតំបន់ គេនឹងមិនកែសម្រួលលក្ខខ័ន្តការងារ តាមឡើយ ហើយពេលនោះ បេសកម្មរបស់ ILO ,USA and EU ដែលចង់លើកតម្កើងកម្មករ និយោជិត និងលក្ខខន្តការងារផ្សេងៗនោះ ប្រាកដជាបរាជ័យនៅក្នុងតំបន់នេះតែម្តង៕
Garment workers make Adidas apparel at the Shen Zhou garment factory in Phnom Penh, Cambodia, October 18, 2011.
ភ្នំពេញ ៖ ខណៈធនាគារអភិវឌ្ឍន៍អាស៊ី បានព្យាករកំណើនសេដ្ឋកិច្ចកម្ពុជាសម្រាប់ឆ្នាំ២០១៧ និងឆ្នាំ២០១៨ ប្រមាណ៧,១ភាគរយនោះ ធនាគារពិភពលោកបានព្យាករកំណើននេះត្រឹមតែ៦,៨ភាគរយ សម្រាប់ឆ្នាំ ២០១៧ និង ៦,៩ភាគរយ សម្រាប់ឆ្នាំ២០១៨ ប៉ុណ្ណោះ។
តាមរបាយការណ៍របស់ធនាគារពិភពលោក ចេញផ្សាយនៅថ្ងៃពុធទី៤ តុលា នេះថា កំណើនត្រូវបានព្យាករថា មានការថមថយតិចតួចមកនៅត្រឹម៦,៨ភាគរយក្នុងឆ្នាំ២០១៧ ថយពី៧,០នៅឆ្នាំ២០១៦ ។ ការថមថយកំណើននេះមកពីការនាំចេញវាយនភណ្ឌមានការថយល្បឿនបន្តិច ខណៈការនាំចេញគ្រឿងយន្ត បរិក្ខារ និងគ្រឿងបន្លាស់អគ្គិសនី មានការកើនឡើងជំនួសវិញ ។
លោក លី សូដេត សេដ្ឋវិទូជាន់ខ្ពស់នៃធនាគារពិភពលោក ប្រចាំកម្ពុជាបានឱ្យដឹងថា ការព្យាកររបស់ធនាគារពិភពលោក គឺបានពឹងផ្អែកទៅលើឯកសារ តឹកតាងមួយចំនួនដែលខ្លួនបានសិក្សា ។ ម្យ៉ាងទៀតការទម្លាក់ការព្យាករនេះដែរ ក៏ស្រដៀងគ្នាទៅនឹងក្រសួងសេដ្ឋកិច្ច និងហិរញ្ញវត្ថុចេញផ្សាយកាលពីពេលថ្មីៗនេះដែរ ដោយក្នុងនោះ ក្រសួងបានព្យាករថា សេដ្ឋកិច្ចកម្ពុជា នឹងនៅត្រឹម៦,៩ភាគរយ ក្នុងឆ្នាំ ២០១៧ ។
លោកបន្តថា បើក្រលេកមកមើលស្ថានភាពជាក់ស្ដែងវិញ ក៏បានបង្ហាញដូចនេះដែរ ក្នុងនោះឃើញថា វិស័យកាត់ដេរ បានធ្លាក់ចុះបន្តិចតែវាមិនធ្វើឱ្យប៉ះពាល់ដល់កំណើនសេដ្ឋកិច្ចកម្ពុជានោះទេ ព្រោះវាបានជំនួសមកវិញនៅវិស័យទេសចរណ៍ និងការនាំចេញគ្រឿងយន្ត សម្ភារៈអគ្គិសនីជាដើម ។
ពាក់ពន្ធ័នឹងហានិភ័យ សម្រាប់កំណើនសេដ្ឋកិច្ចកម្ពុជា ធនាគារពិភពលោកបានបង្ហាញថា បើសិនជាសេដ្ឋកិច្ចប្រទេសធ្លាក់ចុះយ៉ាងគំហុកនោះ វានឹងធ្វើឱ្យកំណើនសេដ្ឋកិច្ចកម្ពុជា ក៏ត្រូវធ្លាក់ចុះដែរ ។ ដូចនេះមានន័យថា ចិនជាទីផ្សារធំមួយនៅក្នុងប្រទេសកម្ពុជា ដែលជួយជំរុញកំណើសេដ្ឋកិច្ច ឱ្យមានស្ថេរភាព៕
ភ្នំពេញ ៖ ចាប់ពីខែមករា ឆ្នាំ២០១៨ តទៅ កម្មការិនីរោងចក្រដែលមានផ្ទៃពោះ នឹងទទួលបាន ប្រាក់ឧបត្ថម្ភ ៤០ម៉ឺនរៀល នៅពេលសម្រាលកូនបានម្នាក់។ ដោយឡែក កម្មការិនីដែលសម្រាលបានកូនភ្លោះ២ នឹងទទួលបាន៨០ម៉ឺនរៀល និងអ្នកដែលមានកូនភ្លោះ៣ ទទួលបាន១លាន២សែនរៀល។លើសពីនេះទៀតប្រមុខរាជរដ្ឋាភិបាល ក៏ស្នើឲ្យថៅកែរោងចក្រ អនុញ្ញាតឲ្យកម្មការិនី ដែលមានផ្ទៃពោះ អាចចេញមុនម៉ោងការងារយ៉ាងតិច ១៥ នាទី ផងដែរ។
ការផ្តល់ប្រាក់ដល់កម្មការិនីសម្រាលកូននេះ ជាគោលនយោបាយផ្តល់សាច់ប្រាក់ ដែលសម្តេចនាយករដ្ឋមន្ត្រី ហ៊ុន សែន ប្រកាសនៅចំពោះមុខកម្មករ-កម្មការិនីប្រមាណ១ ម៉ឺននាក់ នៅរោងចក្រតំបន់កំបូល តាមផ្លូវជាតិលេខ ៤ នៅព្រឹកថ្ងៃទី៤ ខែតុលា នេះ ។
រាជរដ្ឋាភិបាល ក៏សម្រេចឲ្យកម្មការិនីដែលសម្រាលកូន អាចឈប់សម្រាកមាតុភាព រយៈពេល៣ខែ ហើយអាចទទួលបានប្រាក់ខែចំនួន ១២០ ភាគរយទៀតផង ដែលប្រាក់ ខែនេះ បេឡាជាតិរបបសន្តិសុខសង្គមជាអ្នកផ្តល់ឲ្យ៧០ ភាគរយ និងភាគីរោងចក្រផ្តល់ ជូន៥០ ភាគរយ។
បន្ថែមពីនេះ សម្ដេចតេជោ បានអំពាវនាវឲ្យបង្កើតគិលានដ្ឋាន ទារកដ្ឋាន អាហារ ដ្ឋាន ឲ្យបានគ្រប់រោងចក្រសហគ្រាស ដែលពេលនេះ នៅតាមរោងចក្រ សហគ្រាសមានគិលានដ្ឋានមានប្រមាណ៨០% អាហារដ្ឋានមានជាង៣០% ចំណែកទារកដ្ឋាន មានតែជាង២០%ប៉ុណ្ណោះ៕
ភ្នំពេញ ៖ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចម៉ែ បានស្តេចយាងនិវត្តន៍មកដល់កម្ពុជាវិញហើយ នៅម៉ោង ៣រសៀល ថ្ងៃទី៤ ខែតុលា ឆ្នាំ២០១៧ នេះ បន្ទាប់ពីព្រះអង្គទាំងទ្វេ ស្តេចយាងទៅពិនិត្យព្រះរាជសុខភាព នៅទីក្រុងប៉េកាំង នៃសាធារណរដ្ឋប្រជាមានិតចិន កាលពីចុងខែកក្កដា ឆ្នាំ២០១៧ កន្លងទៅ។
ការយាងត្រឡប់របស់ព្រះមហាក្សត្រ និងសម្តេចម៉ែ នៅឯព្រលានយន្តហោះអន្តរ ជាតិ ភ្នំពេញ មានការទទួលព្រះរាជដំណើរដោយ ព្រះញាតិវង្ស សម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចពញាចក្រី ហេង សំរិន ប្រធានរដ្ឋសភា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន កាកបាទក្រហមកម្ពុជា ព្រមទាំងមន្ត្រីជាន់ខ្ពស់រាជរដ្ឋាភិបាលកម្ពុជា និងមន្ត្រីព្រះបរមរាជ វាំងផងដែរ។
សូមបញ្ជាក់ថា ព្រះមហាក្សត្រខ្មែរ និងសម្តេចម៉ែ តែងបានយាងទៅពិនិត្យព្រះរាជ សុខភាពយ៉ាងទៀងទាត់នៅទីក្រុងប៉េកាំង ប្រទេសចិន តាមការកំណត់របស់ក្រុមគ្រូពេទ្យ ចិន៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
