បាល់ទាត់៖ខ្សែប្រយុទ្ធសញ្ជាតិអាល់ហ្សេរីរបស់ក្រុមកញ្ជ្រោងព្រៃ Leicester City កីឡាករ Riyad Mahrez បានជាប់ឈ្មោះជាកីឡាករល្អបំផុតប្រចាំទ្វីបអាហ្វ្រិកឆ្នាំ២០១៦ (African Player of the Year 2016 ) ។
កីឡាករវ័យ ២៥ឆ្នាំរូបនេះ បានដើរតួនាទីយ៉ាងសំខាន់ជួយឲ្យ ក្រុមកញ្ជ្រោងព្រៃឈ្នះជើងឯក Premier League រដូវកាល ២០១៥-២៦ ដោយបានស៊ុតបញ្ចូលទីចំនួន ១៧ គ្រាប់ និងបញ្ជូនបាល់ឲ្យដៃគួបាន១០លើកក្នុងបង្ហាញខ្លួន៣៧ប្រកួត។
Riyad Mahrez បានឈ្នះពានកីឡាករល្អបំផុតប្រចាំទ្វីបអាហ្វ្រិកឆ្នាំ២០១៦ បន្ទាប់ពីឈ្នះឆ្នោតលើខ្សែប្រយុទ្ធ Pierre-Emerick Aubameyang របស់ក្លឹប Borussia Dortmund និងខ្សែបម្រើល្បឿនលឿន Sadio Mane របស់ក្លឹបហង្សក្រហម Liverpool។
ក្នុងចំណោមបេក្ខភាព៣នាក់ចុងក្រោយ តារាជើងញាក់របស់ក្រុមកញ្ជ្រោងខៀវ Leicester ទទួលបានសំឡេងឆ្នោតច្រើនជាងគេ ៣៦១សំឡេង, ម្ចាស់ពានកាលឆ្នាំ២០១៥ Aubameyang ទទួលបាន ៣១៣សំឡេង និង Mane របស់ហង្សក្រហម បានចំណាត់ថ្នាក់លេខ៣ បាន១៨៦សំឡេង។
ក្រោយបានទទួលពានរង្វាន់នេះកាលពីថ្ងៃព្រហស្បតិ៍ Mahrez បាននិយាយ «វាជាកិត្តិយសធំ, ខ្ញុំសប្បាយចិត្តនិងរីករាយ។ ខ្ញុំសូមអរគុណដល់មិត្តរួមក្រុមរបស់ខ្ញុំទាំងអស់ក្រុម Leicester និងប្រទេសអាល់ហ្សេរី ។«ខ្ញុំសូមជូនពរទៅគ្រួសាររបស់ខ្ញុំនិងអស់អ្នកដែលគាំទ្រខ្ញុំជារៀងរាល់ថ្ងៃ»៕
រាជធានីភ្នំពេញ៖លោក សុខ សូកាន ដែលជាកូនប្រុសលោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ត្រូវបានតែងតាំងជាអនុរដ្ឋលេខាធិការនៃក្រសួងការបរទេស ខណៈដែលការតែងតាំងនេះរងនូវការរិះគន់យ៉ាងដៃពីបក្សប្រឆាំង រួមទាំងមន្ត្រីបក្សកាន់អំណាចអំពីការតែងតាំងតាមបែបបក្សពួកនិយម ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានថ្លែងរិះគន់ថា ការតែងតាំងកូនមន្ត្រីដែលមានអំណាចបំផុតឲ្យកាន់តួនាទីកម្រិតកំពូលនៅក្នុងក្រសួងមួយក្នុងចំណោមក្រសួងសំខាន់ៗបំផុតគឺបង្ហាញពីសាច់ញាតិនិយមយ៉ាងពិតប្រាកដ ។
ចំណែកមន្ត្រីបក្សកាន់អំណាចមួយរូបទៀតនៅក្រសួងការបរទេសបានហៅការតែងតាំងនោះ តាមខ្សែស្រឡាយមិនខុសពីជំនាន់លោក ហោ ណាំហុង នោះទេ ក្នុងពេលដែលមន្ត្រីជាច្រើនដែលបានតស៊ូក្នុងការងារនិងមានស្នាដៃក្នុងក្រសួងមួយនេះ ត្រូវគេបំភ្លេចចោល ។
សូមបញ្ជាក់ថាក្រៅពីលោក សុខ សូកេន លោក សុខ អាន ក៏មានកូនប្រុស ៣ នាក់ទៀតដែលកាន់តំណែងខ្ពស់ផងដែរគឺ លោក សុខ សង្វារ ជាអគ្គនាយករងអាជ្ញាធរជាតិអប្សរាលោក សុខ ពុទ្ធិវុឌ្ឍ ជាប្រធានសហព័ន្ធផលិតស្រូវអង្ករកម្ពុជា និងលោក សុខ សូកាន ជាតំណាងរាស្ត្រខេត្តតាកែវផងដែរ ។ ប៉ុន្តែជានិច្ចកាលការតែងតាំងនោះបានរងនូវការរិះគន់ជាបន្តបន្ទាប់ពីបក្សប្រឆាំង និងសាធារណជនរួមទាំងមន្ត្រីបក្សកាន់អំណាចថែមទៀត៕
ខេត្តបន្ទាយមានជ័យ៖ពលករខ្មែរ២៤នាក់បាននាំគ្នាចូលលួចកាប់ឈើគ្រញូងនៅក្នុងឧទ្យាន ជាតិថៃតម្លៃជាង១លានបាតតែត្រូវសមត្ថកិច្ចឃាត់ខ្លួនបានម្នាក់កាលពីរំលង អធ្រាត្រឈានចូលថ្ងៃទី៤ ខែមករា ឆ្នាំ២០១៧ នៅក្នុងខេត្តណាក់ខនរ៉ាចសីមា ប្រទេសថៃ។
យោងតាមមន្ដ្រីថៃដែលផ្ដល់ព័ត៌មាន មកមន្ដ្រីនគរបាលកម្ពុជាជាប់ព្រំដែនបានបញ្ជាក់ថា ជនជាតិខ្មែរម្នាក់ក្នុងចំណោម បក្ខពួកទាំង២៤នាក់ត្រូវបានទាហានថៃ ឃាត់ខ្លួនរួមជាមួយឈើគ្រញូងដែលមានតម្លៃប្រមាណជាង១លានបាត ខណៈដែល ជនជាតិខ្មែររូបនេះបានលបចូលទៅក្នុង ឧទ្យានជាតិដែលជាតំបន់ហាមឃាត់ដើម្បីធ្វើសកម្មភាពជញ្ជូនឈើគ្រញូងទាំងនោះចេញពីព្រៃ ។
ប្រតិបត្តិការនេះ ត្រូវបានធ្វើឡើងដោយ កម្លាំងជំនាញសហការជាមួយកម្លាំងយោធា បានឡោមព័ទ្ធព្រៃឧទ្យានដែលនៅជាយ ភូមិឡាំភឿក ក្នុងភូមិ១ ឃុំឡាំភឿក ស្រុក ខនបុរី ខេត្តណាក់ខនរាជសីមា ប្រទេសថៃ ដោយក្នុងនោះបានប្រទះឃើញមនុស្ស ប្រមាណជាង២០នាក់ដែលកំពុងធ្វើសកម្មភាពស្ពាយនិងជញ្ជូនដុំឈើគ្រញូងចេញពីព្រៃទើបកម្លាំងបានសម្រុកឡោមព័ទ្ធដើម្បីឃាត់ខ្លួន ។ ប៉ុន្តែដោយសារយប់ងងឹតផងនោះទើបកម្លាំងសមត្ថកិច្ចឃាត់ខ្លួនបានតែម្នាក់ដែលជាជនជាតិខ្មែរឈ្មោះ ផេង ធួន អាយុ២៥ឆ្នាំ រួមជាមួយនឹងឈើគ្រញូង ដែលបានកែច្នៃជាដុំៗ ហើយស្រេចចំនួន ២៨ដុំ បើគិតជាទឹកប្រាក់សរុបប្រហែល ជាង១លានបាតឯណោះ ។
ក្រោយឃាត់ខ្លួនជនសង្ស័យរូបនោះ បានសារភាពថា ខ្លួននិងបក្ខពួកចំនួន២៤ នាក់បានចូលមកក្នុងទឹកដីថៃតាមខ្សែបន្ទាត់ ព្រំដែនក្នុងខេត្តស្រះកែវតាំងពីថ្ងៃទី២៦ ខែ ធ្នូ ឆ្នាំ២០១៦មកម្ល៉េះ ហើយក៏បានចូលមកសំងំនៅក្នុងឧទ្យានជាតិនេះរង់ចាំឱកាសល្អទើបចាប់ផ្តើមកាត់ឈើដើម្បីនាំចេញទៅឲ្យឈ្មួញតែក៏ត្រូវក្រុមអង្គភាពជំនាញឃាត់ខ្លួនតែម្តង ។
បច្ចុប្បន្នជនសង្ស័យត្រូវបានកម្លាំងជំនាញនាំយកទៅកាន់ស្នាក់ការដើម្បីសាក សួរបន្ត និងស្រាវជ្រាវរកអ្នកដែលនៅពីក្រោយខ្នង ។
ដោយឡែកឈើគ្រញូងទាំង អស់ក៏ត្រូវបានបញ្ជូនទៅរក្សាទុកនៅទីតាំង មេព្រៃជាបណ្តោះអាសន្នដើម្បីចាត់ការតាមច្បាប់ ៕
តួកគី៖អភិបាលខេត្តបាននិយាយថា មន្ត្រីប៉ូលិសម្នាក់ និងបុគ្គលិកតុលាការម្នាក់ត្រូវបានសម្លាប់នៅក្នុងហេតុការណ៍វាយប្រហារដែលបានកើតឡើងនៅជិតតុលាការមួយកន្លែងក្នុងស្រុក Bayrakli នៅក្នុងទីក្រុង Izmir នៅភាគខាងលិចនៃប្រទេសតួកគី ខណៈដែលឃាតករ២នាក់ត្រូវបានកងកម្លាំងប្រដាប់អាវុធបាញ់សម្លាប់ផងដែរ។
អភិបាលខេត្តរូបនោះបានបញ្ជាក់ថា ក្រុមសកម្មប្រយុទ្ធឃើដសង្ស័យបានបើកការបាញ់ប្រហារទៅលើមន្ត្រីប៉ូលិសដែលបានព្យាយាមបញ្ឈប់រថយន្តពួកគេនៅកន្លែងត្រួតពិនិត្យនៅក្នុងទីក្រុង Izmir នៅភាគខាងលិចនៃប្រទេសតួកគី ហើយពួកគេបានបំផ្ទុះគ្រាប់បែកក្នុងរថយន្តពួកគេតែម្ដង។ បន្ទាប់មកប៉ូលិសក៏បានរកឃើញរថយន្តមួយគ្រឿងទៀតនៅជិតកន្លែងកើតហេតុនោះដែលគេបម្រុងនឹងធ្វើការបំផ្ទុះបន្ថែមទៀតផងដែរ ហើយត្រូវបានប៉ូលិសដោះគ្រាប់បែកនោះដោយសុវត្ថិភាព។
ការវាយប្រហារនេះកើតឡើងរយៈពេល១ថ្ងៃក្រោយពីប៉ូលិសបានចាប់ឃាត់ខ្លួនមនុស្សចំនួន២០នាក់នៅក្នុងទីក្រុងនេះដែលគេសង្ស័យថា ជាប់ពាក់ព័ន្ធជាមួយអ្នកវាយប្រហារនៅក្លឹបរាត្រីមួយកន្លែងដែលរហូតមកដល់ពេលនេះប៉ូលិសមិនទាន់បានចាប់ខ្លួននៅឡើយទេ។
គួរបញ្ជាក់ថា កាលពីចុងសប្ដាហ៍កន្លងទៅនេះមានការវាយប្រហារមួយនៅក្លឹបកម្សាន្តរ៉េណាដែលជាស្នាដៃរបស់ក្រុមរដ្ឋអ៊ីស្លាមនៅក្នុងទីក្រុងអ៊ីស្តាន់ប៊ូលដោយបានសម្លាប់មនុស្សចំនួន៣៩នាក់៕
ស៊ីរី៖យ៉ាងហោចណាស់មនុស្ស៩នាក់បានស្លាប់បាត់បង់ជីវិតក្នុងហេតុការណ៍បំផ្ទុះគ្រាប់បែកក្នុងរថយន្តមួយនៅក្នុងទីក្រុង Jableh ខេត្តឡាតាគៀប្រទេសស៊ីរីដែលគ្រប់គ្រងដោយរដ្ឋាភិបាល។ នេះបើយោងតាមប្រព័ន្ធផ្សយព្វផ្សាយរដ្ឋនៅប្រទេសស៊ីរី។
តំបន់នេះធ្លាប់ជាគោលដៅនៃការវាយប្រហារស្រដៀងគ្នាកាលពីពេលមុនមក ហើយក៏ជាបេះដូងនៃក្រុម Alawites ដែលជាសាខានិកាយស៊ីអ៊ីតគោរពកាន់ដោយក្រុមគ្រួសាររបស់លោក បាសារ អាល់អាសាដ ប្រធានាធិបតីនៃប្រទេសស៊ីរី។
ភ្លាមៗនោះគ្មានក្រុមណាមួយអះអាងទទួលខុសត្រូវចំពោះការវាយប្រហារដែលបានកើតឡើងកាលពី នេះទេ ហើយក្រុមរដ្ឋអ៊ីស្លាម និងក្រុមសកម្មប្រយុទ្ធមួយចំនួនទៀតមិនមែនជាអ្នកចុះហត្ថលេខាលើបទឈប់បាញ់គ្នាដែលបានសម្រេចដោយរដ្ឋាភិបាលនិងក្រុមប្រឆាំងនោះទេ៕
ខេត្តក្រចេះ៖លំនៅដ្ឋានរបស់ប្រជាពលរដ្ឋ រស់នៅតាមដងទន្លេមេគង្គ ស្ថិតក្នុងភូមិអន្តែងដូន សង្កាត់ក្រគរ ក្រុងក្រចេះ ជាច្រើនគ្រួសារកំពុងរងការគម្រាមកំហែងយ៉ាងខ្លាំងពីការបាក់ច្រាំងទន្លេ ដែលពួកគាត់ថា អាចមកពីការធ្វើអាជីវកម្មបូមខ្សាច់ខុសបច្ចេកទេស នៅក្បែរលំនៅដ្ឋានទាំងនោះ។
ប្រជាពលរដ្ឋបានឲ្យដឹងថា អាជីវកម្មបូមខ្សាច់នេះ គឺជារបស់លោក រស់ ចិន្តា ដែលមើលទៅគឺអនុវត្តខុសស្តង់ដាបច្ចេកទេស ដែលច្បាប់បានកំណត់ ហើយទីតាំងបូមខ្សាច់នោះ លោក រស់ ចិន្ដា បានបូមដាក់លើដីឡូត៍មួយកន្លែង ដែលជាដីរបស់មន្ទីរសាធារណការ និងដឹកជញ្ជូនខេត្តក្រចេះទៀតផង។
ដីឡូនេះទៀតសោត កន្លងមកគេឃើញដាក់គ្រឿងចក្ររបស់មន្ទីរ តែមិនដឹងថា លោក រស់ ចិន្ដា មានទំនាក់ទំនងយ៉ាងម៉េចជាមួយលោក ស្រេង ស្រស់ ប្រធានមន្ទីរសាធារណការខេត្ត ទើបលោក ស្រេង ស្រស់ ផ្ដល់ដីនោះឲ្យទៅលោក រស់ ចិន្ដា ធ្វើជាទីតាំងស្តុកខ្សាច់ទៅវិញ។
ប្រជាពលរដ្ឋបានបន្តថា អាជីវកម្មបូមខ្សាច់របស់លោក រស់ ចិន្ដា មិនត្រឹមតែគម្រាមកំហែងដល់ការបាក់ស្រុតច្រាំងទន្លេ ប៉ុណ្ណោះទេ ថែមទាំងមានរថយន្ដធំៗដឹកខ្សាច់បណ្ដាលឲ្យខូចផ្លូវ ក្នុងភូមិរបស់ពួកគាត់ទៀត ហើយការជញ្ជូនខ្សាច់ចេញពីទីតាំងស្តុកខ្សាច់នោះ ពេលខ្លះការដឹកជញ្ជូនមិនបានគ្របឲ្យបានត្រឹមត្រូវទៀត ធ្វើឲ្យហុយប៉ះពាល់ដល់ប្រជាពលរដ្ឋធ្វើដំណើតាមដងផ្លូវ និងបរិស្ថានថែមទៀត។
ទោះជាយ៉ាងណា ប្រជាពលរដ្ឋបានស្នើយ៉ាងទទូចទៅអាជ្ញាធរ ក៏ដូចមន្ទីរជំនាញ មេត្តាចុះមកត្រួតពិនិត្យមើល និងទប់ស្កាត់ផង បើនៅតែបណ្ដោយអាជីវកម្មបូមខ្សាច់មួយកន្លែងនេះទៀត ច្រាំងទន្លេនឹងបាក់ជាក់ជាមិនខាន ព្រោះកន្លងមកក៏ធ្លាប់មានការបាក់ច្រាំងទន្លេ នៅភូមិថ្មក្រែ ស្រុកចិត្របុរី ខេត្តក្រចេះ និងភូមិឈើទាលភ្លោះ ស្រុកឆ្លួង ខេត្តក្រចេះ រួចហើយដែរ៕
ដោយ៖ប៉ែន សុផល
បាត់ដំបង៖ឈ្មួញរកស៊ីវេរលុយក្នុង និងក្រៅប្រទេសម្នាក់ត្រូវសមត្ថកិច្ចឃាត់ខ្លួនជាលើកទី២ពាក់ព័ន្ធករណីឆបោកលុយអតិថិជនរាប់លានរៀល ហើយមិនទទួលខុសត្រូវ។
សមត្ថកិច្ចកងរាជអាវុធខេត្តបាត់ដំបងបានអោយដឹងថា ក្នុងមូលដ្ឋានស្រុកម៉ោងឬស្សីនៅថ្ងៃទី០៥ ខែមករា កម្លាំងសមត្ថកិច្ចបានឡោមព័ទ្ធទីតាំងផ្ទះវីងវេរលុយយីហោ(ចំរើន សុម៉ាលី)ដែលជាប់សង្ស័យពីបទឆបោកប្រាក់រាប់លានបាតពីអតិថិជនរបស់ខ្លួនដើម្បីសាកសួរជាថ្មីបន្ទាប់ពីសមត្ថកិច្ចឃាត់ខ្លួនកាលពីទី២ហើយត្រូវចៅក្រមស៊ើបសួរអោយវិលត្រឡប់ទៅកាន់លំនៅដ្ឋានវិញក្រោយ២ថ្ងៃនៃថ្ងៃចាប់ខ្លួន លុះដល់ថ្ងៃទី៥ ខែមករានេះត្រូវប្រជាពលរដ្ឋដែលរងគ្រោះជាច្រើននាក់ បាននាំគ្នាសម្រុកទៅប្តឹងប្រឆាំងសាលាដំបូងខេត្ត។
ម្ចាស់ទីតាំងវីងវេរលុយដ៏ធំខាងលើឈ្មោះ ជា សុម៉ាលី អាយុ៣២ឆ្នាំរស់នៅភូមិពោធិ៍១ ឃុំគារ ស្រុកមោងប្ញស្សី ខេត្តបាត់ដំបងត្រូវអតិថិជនជាដៃគូដាក់ពាក្យបណ្ដឹង ចោទប្រកាន់ថាបានប្រើល្បិចបោកប្រាក់រាប់លានបាត ដែលកូនចៅពួកគាត់ជាកម្មករធ្វើការនៅប្រទេសថៃផ្ញើមកឱ្យជាហើយបន្តរបន្ទាប់ប៉ុន្តែត្រូវស្ត្រីម្ចាស់វេលុយមិនបានហៅសាច់ញាតិឬក្រុមគ្រួសារមកបើកលុយឡើយ។
ប្រភពដដែលបានអោយដឹងបន្តថា សមត្ថកិច្ចខណៈបានព្យាយាមនាំខ្លួន ជា សុម៉ាលី ត្រូវស្ត្រីរូបនេះគេចចូលទៅក្នុងរួចបិទទ្វារលេងចេញក្រៅជាច្រើនម៉ោង។ លុះដល់សៀលថ្ងៃដដែល សមត្ថកិច្ចបង្ខំចិត្តដីសុំដីកាពីព្រះរាជអាជ្ញាដើម្បីសម្រុកចូលតាមនីតិវិធីឈានដល់ការឃាត់ខ្លួនតែម្តង៕
រាជធានីភ្នំពេញ៖អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា បានបង្ហើបថា គេហទំព័រគ.ជ.ប «voterlist.org.kh» ត្រូវបានក្រុម Hacker នៅក្រៅប្រទេសចូលលុកលុយ ប៉ុន្តែបញ្ហានេះ ត្រូវបានដោះស្រាយរួចរាល់ហើយ មិនប៉ះពាល់អ្វីនោះទេ ។ លោកថា ពេលនេះ គ.ជ.ប កំពុងតែសហការជាមួយសមត្ថកិច្ចក្នុងការស្វែងរកអ្នកព្យាយាមចូលទៅបំផ្លាញគេហទំព័រ គ.ជ.បនោះ។
សមត្ថកិច្ចរួមសហការជាមួយ គ.ជ.ប កំពុងស្វែងរកអ្នកចូលទៅ Hack គេហទំព័រ បើទោះជាករណីនេះ ត្រូវបានដោះស្រាយដោយមិនប៉ះពាល់អ្វីក៏ដោយចុះ៕
ខេត្តឧត្តរមានជ័យ៖ក្រុមអាជ្ញាធរថៃបាន ដោះលេងអ្នកទោសខ្មែរ៥នាក់ដែលជាប់ពាក់ព័ន្ធពីបទឆ្លងដែនខុសច្បាប់កាប់ឈើគ្រញូង កាលពីវេលាម៉ោង៥ល្ងាចថ្ងៃទី៤ ខែមករា ឆ្នាំ២០១៦ ស្ថិតនៅភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។
អ្នកទោសខ្មែរទាំង៥នាក់៖ទី១ឈ្មោះ ឈិន វិត ភេទប្រុស អាយុ៣២ឆ្នាំ រស់នៅភូមិត្រាំខ្នា ឃុំកំពង់ស្វាយ ខេត្តកំពង់ធំ ថៃចាប់ខ្លួនកាលពីថ្ងៃទី៥ ខែមីនា ឆ្នាំ២០១៥។ ទី២ឈ្មោះ ចាន់ សុខា ភេទប្រុស អាយុ៣៨ឆ្នាំ រស់នៅភូមិប្រវង្ស ឃុំតាផេន ស្រុកត្រាំកក់ ខេត្តតាកែវ ថៃចាប់ខ្លួនកាលពីថ្ងៃទី៥ ខែឧសភា ឆ្នាំ២០១៥។ ទី៣ឈ្មោះ ស៊ើង ធួន ភេទប្រុស អាយុ៣៨ឆ្នាំ រស់នៅភូមិត្រពាំងក្រៅ ឃុំប្រាំបីមុំ ស្រុកថ្ពង ខេត្តកំពង់ស្ពឺ ថៃចាប់ខ្លួននៅថ្ងៃទី៥ ខែកុម្ភៈ ឆ្នាំ២០១៥។ ទី៤ ឈ្មោះ នឹម វង្ស ភេទប្រុស អាយុ៣៨ឆ្នាំរស់នៅភូមិថ្មី ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ ថៃចាប់ខ្លួននៅថ្ងៃទី៤ ខែឧសភា ឆ្នាំ២០១៥ និងទី៥ ឈ្មោះ ជួប វុន ភេទប្រុស អាយុ៥៣ឆ្នាំ រស់នៅភូមិសាលាទំនប់ ឃុំករកោះ ស្រុកជីក្រែង ខេត្តកំពុងធំ។ ទាំង៥នាក់នេះឆ្លងដែនចូលតាមច្រកក្បាលអូរស្វាយ ភូមិឃុំអូរស្វាយ ស្រុកត្រពាំងប្រាសាទខេត្តឧត្តរមានជ័យ ជាប់គុកនៅខេត្តស៊ីសាកេតប្រទេសថៃ។
មន្ត្រីដែលបម្រើការងារនៅមាត់ច្រកទ្វារអន្តរជាតិជាំបានឱ្យដឹងថា អ្នកទោសខ្មែរទាំង៥នាក់បន្ទាប់ពីបានទទួលពីក្រុមអាជ្ញាធរថៃនោះ ខាងសមត្តកិច្ចកម្ពុជាបានធ្វើការអប់រុំណែនាំរួចឱ្យវឹលត្រឡប់ទៅជួបជុំក្រុមគ្រួសារវិញនាថ្ងៃដដែល។គួរំលឹកថា នាពេលសព្វថ្ងៃនេះក្រុមអាជ្ញាធរថៃបានធ្វើការដោះលេងអ្នកទោសខ្មែរដែលឆ្លងដែនកាប់ឈើគ្រញួងជាបន្តបន្ទាប់ ដោយឡែកក្រុមអាជ្ញាធរ និងសមត្តកិច្ច កងកំលាំងកម្ពុជាដែលការពារតាមបន្ទាត់ព្រំដែនកម្ពុជា ថៃហាក់បីដូចជាគ្មានប្រសិទ្ធភាពក្នុងការបង្ក្រាប និងទប់ស្កាត់ ខណៈដែលពលរដ្ឋខ្មែរលួចឆ្លងដែនកាប់ឈើគ្រញូងនៅតែកើតមានយ៉ាងគគ្រឹកគគ្រេងដដែល៕
ម៉ានីល៖ឯកអគ្គរដ្ឋទូតរុស្ស៊ីប្រចាំនៅប្រទេសហ្វីលីពីនបានថ្លែងថា ប្រទេសរុស្ស៉ីត្រៀមខ្លួនរួចជាស្រេច ក្នុងការផ្គត់ផ្គង់អាវុធធុនតូច រួមមានកាំភ្លើងខ្លី និងវែងជាដើម ព្រមទាំង យន្តហោះ, ឧទ្ធម្ភាគចក្រ, និងនាវាមុជទឹកមួយចំនួន ហើយនិងសព្វាវុធដទៃៗជាច្រើនប្រភេទទៀតដល់រដ្ឋាភិបាលក្រុងម៉ានីល។ នេះបើយោងតាមទីភ្នាក់ងារព័ត៌មានស៊ិនហួរ ផ្សាយនាព្រឹកថ្ងៃព្រហស្បតិ៍ ទី០៥ ខែមករា ឆ្នាំ២០១៧នេះ។
លោកថ្លែងបែបនេះនៅក្នុងសន្និសីទសារព័ត៌មាននៅលើនាវាពិឃាត Admiral Tributs របស់ប្រទេសរុស្ស៉ីដែលបានចូលចតនៅកំពង់ផែនៃរដ្ឋធានីម៉ានីលសម្រាប់ដំណើរទស្សនកិច្ចសុច្ឆន្ទៈចាប់ពីថ្ងៃទី០២-០៧ ខែមករា។
លោកឯកអគ្គរដ្ឋទូតបានគូសបញ្ជាក់ថា រុស្ស៉ីមានសម្ភារៈយោធាយ៉ាងច្រើនសន្ធឹកសន្ធាប់ដើម្បីផ្តល់ឲ្យហ្វីលីពីន ប៉ុន្តែអ្វីៗទាំងអស់ត្រូវធ្វើឡើងដោយអនុលោមតាមច្បាប់អន្តរជាតិទាំងស្រុង៕
ខេត្តបន្ទាយមានជ័យ៖យោងតាមសេចក្តីរាយការណ៍បានឲ្យដឹងថា គិតត្រឹមម៉ោង ៩ និង៥៨នាទីព្រឹកថ្ងៃទី០៥ ខែមករា ឆ្នាំ២០១៧នេះ អគ្គិភ័យដែលឆាបឆេះតូបលក់ដូររបស់ប្រជាពលរដ្ឋខ្មែរនៅក្នុងផ្សាររ៉ុងគ្លឿ ឃុំខ្លងលឹក ស្រុកអារញ្ញ ខេត្តស្រះកែវ ប្រទេសថៃ ស្ថិតនៅជាប់ច្រកទ្វាអន្តរជាតិប៉ោយប៉ែត ត្រូវបានអន្តរាគមន៍បាញ់ទឹកពន្លត់ទៅវិញទាំងស្រុងហើយ។
យោងតាមសេចក្តីរាយការណ៍បញ្ជាក់ថា អគ្គិភ័យនេះបានឆេះបំផ្លាញតូបលក់ដូរនៅជួរអក្សរស៊ីអស់ចំនួនពីរតូប។ ទោះជាយ៉ាងណាទំហំនៃការខូចខាតទំនិញលក់ដូរវិញនៅមិនទាន់មានការបញ្ជាក់នៅឡើយនោះទេ៕
ខេត្តបន្ទាយមានជ័យ៖យោងតាមសេចក្តីរាយការណ៍បានឲ្យដឹងថា តូបលក់ដូររបស់ប្រជាពលរដ្ឋខ្មែរជាច្រើនតូបនៅក្នុងផ្សាររ៉ុងគ្លឿ ឃុំខ្លងលឹក ស្រុកអារញ្ញ ខេត្តស្រះកែវ ប្រទេសថៃ ស្ថិតនៅជាប់ច្រកទ្វាអន្តរជាតិប៉ោយប៉ែត កំពុងរងការឆាបឆេះយ៉ាងសន្ធោសន្ធៅ។
យោងតាមសេចក្តីរាយការណ៍ដដែលបញ្ជាក់ថា អគ្គិភ័យនេះ បានឆាប់ឆេះឡើងនៅម៉ោងប្រមាណ ៩ និង១៥នាទីព្រឹកថ្ងៃទី០៥ ខែមករា ឆ្នាំ២០១៧នេះ។
ទោះជាយ៉ាងណាមិនទាន់មានការបញ្ជាក់ពីមូលហេតុផ្តើមឲ្យមានអគ្គិភ័យនៅឡើយទេ៕
រាជធានីភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) នៅព្រឹកថ្ងៃទី០៥ ខែមករា ឆ្នាំ២០១៧នេះបានរៀបចំបើកកិច្ចពិភាក្សាពិគ្រោះយោបល់ លើសេចក្ដីព្រាងបទបញ្ជា និងនីតិវិធីសម្រាប់ការបោះឆ្នោត ជ្រើសរើសក្រុមប្រឹក្សាឃុំ-សង្កាត់ ឆ្នាំ២០១៧ ជាមួយភាគីពាក់ព័ន្ធនានា នៅភោជនីយដ្ឋានទន្លេបាសាក់២។
កិច្ចប្រជុំនេះក្រោមវត្តមាន លោក ស៊ិក ប៊ុនហុក ប្រធាន គ.ជ.ប និងមានការចូលរួមពីថ្នាក់ដឹកនាំ គ.ជ.ប មន្ត្រីអគ្គលេខាធិការដ្ឋាន គ.ជ.ប តំណាងគណបក្សនយោបាយ អង្គការមិនមែនរដ្ឋាភិបាល ស្ថានទូតជំនាញការជប៉ុន ជំនាញការសហភាពអឺរ៉ុប សរុបប្រមាណជាង៣០០នាក់៕
បាងកក៖យោងតាមរបាយការណ៍គ្រោះថ្នាក់ចរាចរណ៍របស់អាជ្ញាថៃបានឲ្យដឹងថា មនុស្សជាង ៤០០នាក់បានស្លាប់នៅក្នុងគ្រោះថ្នាក់ចរាចរណ៍នៅក្នុងប្រទេសថៃអំឡុងបុណ្យចូលឆ្នាំថ្មី។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters។
នាយកដ្ឋានដឹកជញ្ជូនផ្លូវគោកបាននិយាយថា មនុស្ស៤២៦នាក់បានស្លាប់នៅក្នុងគ្រោះថ្នាក់ចរាចរណ៍ ៣៣២៧ករណី នៅចន្លោះថ្ងៃទី២៩ ខែធ្នូ ដល់ថ្ងៃទី៣ ខែមករានេះ ពោលគឺបានកើនឡើងពីចំនួន ៣៤០នាក់ កាលពីឆ្នាំមុន។ ជាមួយគ្នាយោងតាមរបាយការណ៍របស់អង្គការសុខភាពពិភពលោកកាលពីឆ្នាំ២០១៥បានឲ្យដឹងថា អត្រាគ្រោះថ្នាក់ចរាចរណ៍នៅក្នុងប្រទេសថៃ ស្ថិតនៅកម្រិតខ្ពស់បំផុតនៅលើពិភពលោក។
តួលេខគ្រោះថ្នាក់ចរាចរណ៍នៅក្នុងប្រទេសថៃ បានកើនឡើង បើទោះបីជារដ្ឋាភិបាលបានធ្វើយុទ្ធនាការសុវត្ថិភាពចរាចរណ៍តាមរយៈការបង្កើនចំនួនវត្តមានតម្រួត និងយុទ្ធនការផ្សព្វផ្សាយព័ត៌មានក៏ដោយ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
