ខេត្តកំពត៖បុរសម្នាក់ត្រូវរថភ្លើងកិនដាច់ខាងឆ្វេង ខណៈដែលស្រវឹងទៅដេកគងលើដែកផ្លូវរថភ្លើងភ្លេចខ្លួន ក៏ត្រូវរថភ្លើងមកដល់កិនដាច់ជើងតែម្តង ដែលហេតុការណ៍នេះកើតឡើងនៅយប់ថ្ងៃទី២១ ខែសីហា ឆ្នាំ២០១៦ ចំណុចផ្លូវរថភ្លើង ត្រង់បង្គោលលេខ១០២ ស្ថិតក្នុងភូមិប្រាល ឃុំតានី ស្រុកអង្គរជ័យ ខេត្តកំពត។
មន្ត្រីនគរបាលមូលដ្ឋាន បានឲ្យដឹងថា មុនពេលកើតហេតុ ជនរងគ្រោះ ឈ្មោះ វ៉ែន សំណាង អាយុ២៥ឆ្នាំ រស់នៅភូមិត្រពាំងរុន ឃុំតានី ស្រុកអង្គរជ័យ បានផឹកស្រាស្រវឹង ហើយបានមកដេកនៅលើផ្លូវដែក ស្រាប់តែត្រូវរថភ្លើងចេញពីខេត្តព្រះសីហនុ ឆ្ពោះទៅក្រុងភ្នំពេញ បានកិនដាច់ជើងខាងឆ្វេង រងរបួសធ្ងន់។
ក្រោយហេតុ អ្នកបើកបររថភ្លើងដឹងភ្លាម ក៏បានបញ្ឈប់រថភ្លើង ហើយជួយសង្គ្រោះ ដល់ជនរងគ្រោះ ឲ្យគេដឹកនាំយកទៅមន្ទីរពេទ្យដើម្បីសង្គ្រោះជីវិតផងដែរ៕
អ៊ីស្រាអែល៖កងទ័ព និងប៉ូលិសបាននិយាយថា ពួកសកម្មប្រយុទ្ធប៉ាឡេស្ទីននៅតំបន់ហ្គាហ្សាស្ទ្រីបបានបាញ់រ៉ុក្កែតមួយគ្រាប់ដែលធ្លាក់នៅក្នុងតំបន់ព្រំដែនអ៊ីស្រាអែល Sderot កាលពីថ្ងៃអាទិត្យហើយយន្តហោះនិងរថក្រោះអ៊ីស្រាអែលបានឆ្លើយតបវិញដោយបាញ់គ្រាប់ផ្លោងដាក់តំបន់ Beit Hanoun របស់ហ្គាហ្សា។
ប៉ូលិសបាននិយាយថា រ៉ុក្កែតនេះមិនបណ្តាលឲ្យមានមនុស្សរងរបួសឬខូចខាតអ្វីនោះទេក្នុងតំបន់ Sderot ដែលជាកន្លែងវាបានធ្លាក់ក្នុងតំបន់លំនៅដ្ឋាន។
ក្រោយមក ការវាយប្រហារផ្លូវអាកាសជាច្រើនលើកនៅពេលល្ងាចបានវាយប្រហារតំបន់ផ្សេងគ្នាយ៉ាងហោចណាស់៣០នៅតំបន់ហ្គាហ្សាស្ទ្រីបដែលជាកម្មសិទ្ធិរបស់ក្រុមហាម៉ាសហើយមានមនុស្សពីរនាក់របួសស្រាល។ នេះបើតាមការលើកឡើងរបស់មន្ត្រីសុខាភិបាល ហ្គាហ្សា។
យោធាអ៊ីស្រាអែលនិយាយថា យន្តហោះបានវាយប្រហារគោលដៅនៅភាគខាងជើងតំបន់ហ្គាហ្សាស្ទ្រីបហើយបានបន្ថែមថា ចាប់តាំងពីដើមឆ្នាំនេះមក មានរ៉ុក្កែតរបស់ហ្គាហ្សាចំនួន១៤គ្រាប់បានធ្លាក់នៅអ៊ីស្រាអែល។
ក្រុមហាម៉ាសបានគ្រប់គ្រងតំបន់ហ្គាហ្សាស្ទ្រីប និងបានគោរពបទឈប់បាញ់ជាមួយអ៊ីស្រាអែលចាប់តាំងពីសង្គ្រាមឆ្នាំ២០១៤មកប៉ុន្តែក្រុមប្រដាប់អាវុធតូចៗមួយចំនួននៃពួកជីហាដសាឡាហ្វីសបានផ្គើននឹងកិច្ចព្រមព្រៀងនេះហើយបន្តការវាយប្រហារគ្រាប់រ៉ុក្កែតម្តងម្កាលលើអ៊ីស្រាអែល ។
គួរបញ្ជាក់ថា ពលរដ្ឋប៉ាឡេស្ទីនជាង២.១០០នាក់ដែលភាគច្រើនជាជនស៊ីវិលត្រូវបានសម្លាប់ក្នុងអំឡុងជម្លោះតំបន់ហ្គាហ្សាឆ្នាំ២០១៤។ ទាហានអ៊ីស្រាអែល៦៧នាក់និងជនស៊ីវិលប្រាំមួយនាក់ក្នុងប្រទេសអ៊ីស្រាអែលត្រូវបានសម្លាប់ដោយគ្រាប់រ៉ុក្កែតនិងការវាយប្រហារដោយក្រុមហាម៉ាសឬក្រុមសកម្មប្រយុទ្ធដទៃទៀត៕
បរទេស៖កូនប្រុសរបស់មេភេរវករ Osama Bin Laden ឈ្មោះ Hamza Bin Laden កាលពីពេលថ្មីៗនេះបានចេញមុខប្រកាសថា ខ្លួនគេនឹងចូលស្នងតំណែងពីឪពុក ដើម្បីដឹកនាំក្រុមអ៊ីស្លាមរបស់ខ្លួនទៅកម្ទេចបណ្ដាប្រទេសពួកលោកខាងលិច។
ជាមួយគ្នានេះកូនប្រុសរូបនេះបាននិងកំពុងប្រមូលក្រុមសាសនាអ៊ីស្លាមរបស់ខ្លួនឲ្យរួបរួមគ្នា និងឈប់ឈ្លោះគ្នាតទៅទៀត។ ទន្ទឹមនោះរូបគេបានសម្ដែងការមិនពេញចិត្ត ចំពោះប្រទេសអារ៉ាប់ ដែលបានទម្លាក់គ្រាប់បែកទៅលើប្រទេសអាល់កៃដា នៅក្នុងសង្គ្រាមស៊ីវិលកាលពីលើកមុន។ ម្យ៉ាងទៀតរូបគេបានអំពាវនាវឲ្យឈប់ឈ្លោះគ្នា ហើយងាកមកចាប់ដៃគ្នាវិញ ព្រោះសុទ្ធតែជាសាសនាអ៊ីស្លាមដូចគ្នានោះទេ។
លើសពីនេះទៀត គេបានប្រាប់ទៅអ្នកទាំងនោះថា រូបគេនឹងស្នងតំណែង ហើយដឹកនាំក្រុមដើម្បីទៅកំចាត់សត្រូវពិតប្រាកដរបស់ពួកគេគឺបណ្ដាប្រទេសទ្វីបអ៊ឺរ៉ុបនោះឯង៕
រាជធានីភ្នំពេញ៖មន្ត្រីក្រសួងអប់រំបានធ្វើការវាយតម្លៃថា នៅព្រឹកថ្ងៃដំបូងនេះ ការប្រឡងបាក់ឌុបមានសភាពស្ងប់ស្ងាត់ល្អ នៅតាមមណ្ឌលមួយចំនួនក្នុងរាជធានីភ្នំពេញ។ បេក្ខជនមកប្រលងពុំបានដាក់វិញ្ញាសាតាមខ្លួនដូចមុនៗ ហើយបេក្ខជនហាក់មានទំនុកចិត្តជាងមុន។
មន្ត្រីដដែលបញ្ជាក់ថា រហូតមកដល់ពេលនេះ តាមរបាយការណ៍មកថា ស្ថានភាពគឺស្ងប់ស្ងាត់ ដោយអ្នកត្រួតពិនិត្យ មិនបានរកឃើញសំណៅឯកសារណាមួយនៅតាមខ្លួននោះទេ ដែលខុសពីឆ្នាំមុនៗ សំណៅឯកសារចាប់បាននៅអំឡុងពេលត្រួតពិនិត្យ។
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និង កីឡា នៅព្រឹកមិញនេះក៏បានប្រាប់ក្រុមអ្នកសារព័ត៌មានដែរថា ឆ្នាំនេះ បេក្ខជនប្រលងគោរពបានតាមទិសស្លោក “អ្នកចេះ គឺជាប់”។ ឆ្នាំនេះ សិស្សានុសិស្ស ហាក់បានត្រៀមលក្ខណៈបានល្អ ដោយពុំទាន់រកឃើញមានបាតុភាពអ្វីនៅឡើយទេ នៅព្រឹកនេះ៕
ខេត្តបន្ទាយមានជ័យ៖ករណីហិង្សាក្នុងគ្រួសារដ៏រន្ធត់មួយបានកើតឡើងបង្កឲ្យមានការភ្ញាក់ផ្អើល បន្ទាប់ស្ត្រីជាប្រពន្ធ បានយកកូនកាំបិតចុងស្រួចទៅចាក់ប្តីជាច្រើនកាំបិត រួចចាក់ខ្លួនឯងបណ្តាលឲ្យរងរបួសធ្ងន់ទាំង២នាក់កាលពីវេលាម៉ោង៨យប់ ថ្ងៃទី១៩ ខែសីហា ឆ្នាំ២០១៦ នៅភូមិបឹងស្នោរ ឃុំស្លក្រាម ស្រុកស្វាយចេក ខេត្តបន្ទាយមានជ័យ ។
លោកវរសេនីយ៍ត្រី ជា ស្លូញ អធិការនគរបាលស្រុកស្វាយចេក បានឲ្យដឹងថា មុនពេលកើតហេតុប្តីប្រពន្ធនេះ បានផឹកស្រាជុំគ្នារហូតស្រវឹងរៀងខ្លួន តែមិនដឹងថាប្រពន្ធខឹងប្តីដោយសាររឿងអ្វីទេ ក៏ស្រាប់តែឈ្មោះ ផូ សុធន អាយុ២២ឆ្នាំ ជាប្រពន្ធ បានស្ទុះទៅយកកូនកាំបិតចុងស្រួចចាក់ប្តីឈ្មោះ ពៅ សានិត អាយុ៣២ឆ្នាំ បណ្តាលឲ្យរបួសពេញខ្លួន ក្រោយមកប្តីក៏បាននិយាយថា អញឈប់យកនាងឯងធ្វើជាប្រពន្ធ ហើយភ្លាមៗនោះស្ត្រីជាប្រពន្ធក៏បានចាក់ខ្លួនឯងដោតកាំបិតជាប់នឹងពោះរងរបួសធ្ងន់ទាំងអស់គ្នា ។
លោកអធិការ បញ្ជាក់ថា ក្រោយពីកើតហេតុ ប្តីប្រពន្ធ២នាក់នេះត្រូវបានបងប្អូនដឹកយកទៅសង្គ្រោះនៅមណ្ឌលសុខភាពឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
បើតាមការសាកសួរ ក្នុងពេលផឹកនោះប្តីនិយាយលេងថា បើបានប្រពន្ធចេះផឹកស្រាអញមិនយកទេ ទៅយកស្រីក្មេងជាងនេះហើយមិនចេះផឹកវិញល្អជាង ។ ប្រហែលដោយសារការនិយាយលេងនេះហើយទើបធ្វើឲ្យប្រពន្ធខឹង យកកូនកាំបិតមកចាក់ប្តីតែម្តងទៅ ៕
ខេត្តកណ្តាល៖បុរសម្នាក់បានស្លាប់បាត់បង់ជីវិតភ្លាមៗ ដោយសារគ្រោះថ្នាក់ចរាចរណ៍រថយន្តធុនធំកិនចំក្បាលកាលពីវេលាម៉ោង១៧និង០០នាទីថ្ងៃទី២១ ខែសីហា ឆ្នាំ២០១៦ នៅតាមបណ្តោយផ្លូវជាតិលេខ១ចន្លោះគីឡូម៉ែត្រលេខ២៦-២៧ ស្ថិតនៅក្នុងភូមិស្តៅកន្លែង៤.ឃុំដីឥដ្ឋ.ស្រុកកៀនស្វាយ.ខេត្តកណ្តាល។
ជនរងគ្រោះមានឈ្មោះកែម.សុខលាងភេទប្រុសអាយុ២៩ឆ្នាំ(ខ្មែរ)មានទីលំនៅភូមិស្តៅកន្លែង២.ឃំុដីឥដ្ឋ.ស្រុកកៀនស្វាយ(ស្លាប់)ជិះម៉ូតូម៉ាកHONDAC125ពណ៍ខ្មៅស៊េរី2016ពាក់ស្លាកលេខភ្នំពេញ1FW.5013។
ចំណែករថយន្តបង្កធុនធំសណ្តោងរឺុម៉ក(ផ្ទុកដែក)ពណ៍សពាក់ស្លាកលេខកំពង់ធំ3A.1569(អ្នកបើកបរក្រោយជួបហេតុការណ៍គ្រោះថ្នាក់ចរាចរណ៍រួចរត់គេចខ្លួនបាត់)។
សមត្ថកិច្ចប៉ូលិសបានឲ្យដឹងថា មុនកើតហេតុម៉ូតូជនរងគ្រោះបានបើកក្នុងទិសដៅភ្នំពេញ.អ្នកលឿងដោយប្រើល្បឿនលឿនមកដល់ចំណុកើតហេតុក៍វ៉ាក់និងរថយន្ត១គ្រឿងកំពុងបើកបរនៅខាងមុខ(ក្នុងទិសដៅស្រប)ក៍ជាន់ប្រាំងម៉ូតូបង្ខំបណ្តាលឲ្យដួលផ្លាតទាំងម៉ូតូនិងមនុស្សចូលទៅក្រោមកង់រថយន្តកំពុងបើកបរ(ក្នុងទិសដៅច្រាសគ្នា)បណ្តាលឲ្យកិនម៉ូតូនិងអ្នកបើកម៉ូតូចំក្បាលបែកធ្លាយខួរស្លាប់យ៉ាងអណោចអធម៌នៅកណ្តាលថ្នល់តែម្នាកឯងទៅ៕
រាជធានីភ្នំពេញ៖នៅព្រឹកថ្ងៃទី២២ ខែសីហា នេះសាលាដំបូងរាជធានីភ្នំពេញបើកសវនាការកាត់ទោសស្ត្រីបឹងកក់ពីរនាក់គឺ ឈ្មោះ ទេព វន្នី និងឈ្មោះ ប៊ូវ សោភា ដែលធ្វើយុទ្ធនាការថ្ងៃចន្ទពណ៌ខ្មៅ ហើយរាជរដ្ឋាភិបាលកម្ពុជា ចាត់ទុកថាជាចលនាបដិវត្តន៍ពណ៌ ក្រោមការចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍។
សកម្មជនបឹងកក់ទាំង២នាក់នេះត្រូវបានលោក កែវ សុជាតិ ព្រះរាជអាជ្ញារងអមសាលាដំបូងរាជធានីភ្នំពេញ សម្រេចចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា៤៩៥នៃក្រមព្រហ្មទណ្ឌ។ បទល្មើសនេះ កំណត់ការផ្តន្ទាទោសដាក់ពន្ធនាគារពី៦ខែទៅ២ឆ្នាំ និងពិន័យជាប្រាក់ពី១លានរៀលទៅ៤លានរៀល។
គួរបញ្ជាក់ថា ស្ត្រីបឹងកក់ទាំងពីររូបនេះត្រូវបាននគរបាលខណ្ឌដូនពេញ ឃាត់ខ្លួនកាលពីថ្ងៃទី១៥ ខែសីហា ខណៈពួកគេប្រមូលផ្ដុំគ្នា ធ្វើយុទ្ធនាការថ្ងៃច័ន្ទពណ៌ខ្មៅ ដែលរាជរដ្ឋាភិបាលចាត់ទុកថា ជាចលនាបដិវត្តន៍ពណ៌៕
ខេត្តសៀមរាប៖ក្មេង៣នាក់បានស្លាប់នៅហ្នឹងកន្លែងកើតហេតុ គ្រាដែលក្មេង០២នាក់ទៀតត្រូវបានជួយសង្គ្រោះភ្លាមៗ ដោយសារលង់ទឹកប្រឡាយជម្រៅ៤ម៉ែត្រកន្លះ ដែលករណីនេះកើតឡើងនៅវេលាម៉ោង១៦ និង៣០នាទីល្ងាចថ្ងៃអាទិត្យទី២១ ខែសីហា ឆ្នាំ២០១៦ នៅត្រង់ចំណុចប្រឡាយ ទំនប់ចាល់ ស្ថិតក្នុងទឹកដីភូមិប្រដាក់ ឃុំព្រៃជ្រូក ស្រុកពួក ខេត្តសៀមរាប ។
អធិការនគរបាលស្រុកពួកលោកវរសេនីយ៍ត្រី ទេព ពុំសែន បានឲ្យដឹងថា ជនរងគ្រោះទាំង០៥នាក់ខាងលើនេះមានឈ្មោះ ទី១-ឈ្មោះ កែវពេជ្រ ចរណៃ ភេទស្រី អាយុ១៦ឆ្នាំ មុខរបរជាសិស្ស (ជួយសង្គ្រោះបាន)។ ទី២-ឈ្មោះ កែវពេជ្រ រង្សី ភេទស្រី អាយុ១៤ឆ្នាំ មុខរបរសិស្ស (ស្លាប់)។ ទី៣-ឈ្មោះ កែវពេជ្រ រក្សា ភេទស្រី អាយុ០៨ឆ្នាំ មុខរបរសិស្ស (ស្លាប់)។ ទី៤-ឈ្មោះ កែវពេជ្រ សុវណ្ណបញ្ញា ភេទប្រុស អាយុ០៥ឆ្នាំ( រស់នៅក្នុងបន្ទុក) និង ទី៥-ឈ្មោះ វី វិច្ឆិការ ភេទស្រី អាយុ០៧ឆ្នាំ មុខរបរសិស្ស (ជួយសង្គ្រោះបាន)។
លោកអធិការបានបន្តថា ជនរងគ្រោះទាំង០៥នាក់នេះ មាន០៤នាក់ជាបងប្អូនបង្កើត ដែលមានឪពុក ឈ្មោះ កែវ ផល្លី អាយុ ៤៦ឆ្នាំ មុខរបរ ប្រធាន មណ្ឌលសុខភាព សសរស្ដម្ភ ម្ដាយឈ្មោះ រ័ត្ន រ៉ាដា អាយុ ៤៤ឆ្នាំ មុខរបរ លក់ថ្នាំពេទ្យ ហើយត្រូវបានឈ្មោះ កែវពេជ្រ ចរណៃ ជាបងស្រីបង្កើតជិះម៉ូតូដឹកប្អូនៗទៅលេងទឹកនៅកន្លែងកើតហេតុ និងម្នាក់ទៀតទៅជាមួយ ឪពុកម្ដាយរបស់គេត្រូវបាន ជួយសង្គ្រោះ។
ក្រោយពេលកើតហេតុកម្លាំងសមត្ថកិច្ចនគរបាលបានចុះទៅដល់ទីតាំងខាងលើ ហើយបានជួយស្រង់ ក្មេងរងគ្រោះ និងជួយដឹកសពយកមកលំនៅដ្ឋាន របស់ពួកគេស្ថិតនៅភូមិសសរស្តម្ភ ឃុំសសរស្តម្ភ ស្រុកពួក ខេត្តសៀមរាប ដើម្បីឲ្យក្រុមគ្រួសាររៀបចំធ្វើបុណ្យ ទៅតាមទំនៀមទំលាប់ប្រពៃណី៕
រាជធានីភ្នំពេញ៖នៅថ្ងៃទី២២ ខែសីហា ឆ្នាំ២០១៦នេះ ក្រសួងធនធានទឹក និងឧតុនិយម បានចេញព្រឹត្តិបត្រព័ត៌មាន និងការព្យាករណ៍ដោយបញ្ជាក់ពីស្ថានភាពកម្ពស់ទឹក នៅតាមបណ្តាស្ថានីយជលសាស្ត្រនានា រួមមានស្ថានីយទន្លេមេគង្គ-ស្ទឹងត្រែង, ស្ថានីយទន្លេមេគង្គ-ក្រចេះ, ស្ថានីយទន្លេ មេគង្គ-កំពង់ចាម, ស្ថានីយបាសាក់-ចតុមុខ, ស្ថានីយមេគង្គ-អ្នកលឿង, ស្ថានីយបាសាក់-កោះខែល និងស្ថានីយទន្លេសាប-ព្រែកក្តាម៕
រាជធានីភ្នំពេញ៖យោងតាមរបាយការណ៍របស់អគ្គស្នងការនគរបាលជាតិបានឲ្យដឹងថា នៅថ្ងៃទី២១ ខែសីហា ឆ្នាំ២០១៦ ម្សិលមិញកម្លាំងនគរបាលជាតិ បានបង្ក្រាបបទល្មើសជួញដូរ រក្សាទុក និងប្រើប្រាស់១០ករណី ឃាត់មនុស្ស១៨នាក់ (ស្រី៤នាក់) ក្នុងនោះមុខសញ្ញាជួញដូរ១៣នាក់ និងមុខសញ្ញាប្រើប្រាស់៥នាក់ ដកហូតមេតំហ្វេតាមីន (ice) ២៣.៥៧ក្រាម, ៣កញ្ចប់ធំនិង៤៨កញ្ចប់តូច មេតំហ្វេតាមីន (wy) ១កញ្ចប់តូច។
ប្រភពដដែលបញ្ជាក់ថា ជនសង្ស័យទាំងនោះត្រូវបានឃាត់ខ្លួននៅ៖ ភ្នំពេញ បង្ក្រាប២ករណីឃាត់ខ្លួន២នាក់, កណ្ដាល បង្ក្រាប៣ករណីឃាត់ខ្លួន៦នាក់, ព្រះសីហនុ បង្ក្រាប១ករណីឃាត់ខ្លួនម្នាក់, សៀមរាប បង្ក្រាប២ករណីឃាត់ខ្លួន៦នាក់, ត្បូងឃ្មុំ បង្ក្រាប១ករណីឃាត់ខ្លួនម្នាក់ និង រតនគីរីបង្ក្រាប១ករណីឃាត់ខ្លួន២នាក់៕
រាជធានីភ្នំពេញ៖នៅថ្ងៃទី២១ ខែសីហា ឆ្នាំ២០១៦ ម្សិលមិញនេះមានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន១២លើក (យប់៨លើក) បណ្តាលឲ្យមនុស្សស្លាប់៧នាក់ (ប្រុស៧នាក់) រងរបួសធ្ងន់ ១០នាក់ និងរបួសស្រាល៣នាក់។ នេះបើតាមរបាយការណ៍របស់អគ្គស្នងការនគរបាលជាតិ។
ប្រភពដដែលបន្តថា គ្រោះថ្នាក់ចរាចរណ៍ទាំង៣លើកនេះ បណ្តាលឲ្យខូចខាតយានយន្ត សរុបចំនួន២៣គ្រឿង រួមមានម៉ូតូចំនួន១២គ្រឿង រថយន្តធុនតូចចំនួន៧គ្រឿង និងរថយន្តធុនធំចំនួន៣គ្រឿង, យានផ្សេងៗ១គ្រឿង, ថ្មើរជើង១នាក់។ ប្រភពបញ្ជាក់ថា មូលហេតុដែលបណ្តាលឲ្យកើត មានករណីគ្រោះថ្នាក់ចរាចរណ៍ រួមមានល្មើសល្បឿន១លើក, បត់គ្រោះថ្នាក់២លើក ក្នុងនោះអ្នកមិនពាក់មួកសុវត្ថិភាព ពេលគ្រោះថ្នាក់ចរាចរណ៍ ៤នាក់ (យប់៣នាក់)។
ជាមួយគ្នានេះនៅថ្ងៃទី២១ ខែសីហា ឆ្នាំ២០១៦ លទ្ធិផលត្រួតពិនិត្យអនុវត្តច្បាប់ចរាចរណ៍ផ្លូវគោកឃើញថា យានយន្តដែលល្មើសសរុបទូទាំងប្រទេសមាន ចំនួន ២,៦៨៣គ្រឿង ក្នុងនោះបានធ្វើការអប់រំចំនួន ១,១៧១គ្រឿង និងពិន័យសរុប ចំនួន ១,៥១២គ្រឿង៕
រាជធានីភ្នំពេញ៖នៅថ្ងៃទី១៩ ខែសីហា ឆ្នាំ២០១៦ម្សិលមិញនេះកម្លាំងនគរបាលបានបង្ក្រាបបទល្មើសជួញដូរ រក្សាទុក និងប្រើប្រាស់១០ករណី ឃាត់មនុស្ស១២នាក់ (ស្រី១នាក់) ក្នុងនោះមុខសញ្ញាជួញដូរ៦នាក់ និងមុខសញ្ញាប្រើប្រាស់១៣នាក់ និងដកហូតមេតំហ្វេតាមីន (ice) ០,៥៣ក្រាម, ២កញ្ចប់ធំនិង២៨កញ្ចប់តូច មេតំហ្វេតាមីន(wy)៧.៨៨ក្រាម និង១៥គ្រាប់។
យោងតាមរបាយការណ៍របស់អគ្គស្នងការនគរបាលជាតិបានបញ្ជាក់ថា ជនសង្ស័យទាំងនោះត្រូវបានឃាត់ខ្លួនដោយ៖ នគរបាលរាជធានីភ្នំពេញ បង្ក្រាប២ករណីឃាត់៣នាក់, កណ្ដាល បង្ក្រាប២ករណី ឃាត់ខ្លួន៤នាក់, បន្ទាយមានជ័យ បង្ក្រាប១ករណីឃាត់ខ្លួនម្នាក់, កំពង់ចាម បង្ក្រាប១ករណី ឃាត់ខ្លួន៥នាក់, កំពង់ស្ពឺ បង្ក្រាប៣ករណី ឃាត់ខ្លួន៤នាក់ និងបាត់ដំបង បង្ក្រាប១ករណីឃាត់ខ្លួនម្នាក់៕
ខេត្តស្ទឹងត្រែង៖កម្លាំងកងរាជអាវុធហត្ថបានចាប់ខ្លួនឃាត់មន្ត្រីយោធាម្នាក់ រួមទាំងថ្នាំញៀនប្រភេទមេតំហ្វេតាមីន (ម៉ាទឹកកក) ប្រមាណជា១គីឡូក្រាម ខណៈកំពុងចរាចណ៍ឆ្លងដែនពីប្រទេសឡាវ មកកាន់ស្ទឹងត្រែង កាលពីរសៀលថ្ងៃទី១៩ សីហា ២០១៦ ស្ថិតត្រង់ចំណុចផ្លូវជាតិលេខ៩ ក្នុងភូមិស្រែប្ញស្សី ឃុំស្រែប្ញស្សី ស្រុកថាឡាបរិវ៉ាត់ ខេត្តស្ទឹងត្រែង ។
សមត្ថកិច្ចបានឲ្យដឹងថា ជនសង្ស័យឈ្មោះ លី សេត ភេទប្រុស អាយុ៤៥ឆ្នាំ ជានាយទាហានវរលេខ៣៩៤ កងពលលេខ៩ខេត្តព្រះវិហារ រស់នៅភូមិសែនរុងរឿង ឃុំមរតក ស្រុកជាំក្សាន្ត ខេត្តព្រះវិហារ ដកហូតថ្នាំញៀនមួយកញ្ចប់ធំ ម៉ូតូមួយគ្រឿង ព្រមទាំងទំពាំងស្ងោរ៥កញ្ចប់ ។
បើតាមសមត្ថកិច្ចបានបញ្ជាក់ថា ជនសង្ស័យ គឺជាមុខសញ្ញាជួញដូរគ្រឿងញៀនឆ្លងដែនដែលអាវុធហត្ថតាមដាន ក្រោមការកសាងបណ្តាញភ្នាក់ងារ និងប្រើប្រាស់វិធានការឱ្យមានការទិញ និងលក់រហូតឈានដល់ការចាប់ខ្លួន រួមនិងវត្ថុតាងជាក់ស្តែង។
បច្ចុប្បន្ន ជនសង្ស័យត្រូវបានកសាងសំណុំរឿងបញ្ជូនទៅតុលាការ ដើម្បីផ្តន្ទាទោស៕
រាជធានីភ្នំពេញ៖ស្ថានភាពកម្ពស់ទឹកនៅតាមបណ្តាស្ថានីយជលសាស្ត្រនានារួមមាន៖ស្ថានីយទន្លេមេគង្គ-ស្ទឹងត្រែង, ស្ថានីយទន្លេមេគង្គ-ក្រចេះ, ស្ថានីយទន្លេ មេគង្គ-កំពង់ចាម, ស្ថានីយបាសាក់-ចតុមុខ, ស្ថានីយមេគង្គ-អ្នកលឿង, ស្ថានីយបាសាក់-កោះខែល និងស្ថានីយទន្លេសាប-ព្រែកក្តាមសម្រាប់ថ្ងៃទី២០ ខែសីហា ឆ្នាំ២០១៦នេះ៕
រាជធានីភ្នំពេញ៖នៅថ្ងៃទី១៩ ខែសីហា ឆ្នាំ២០១៦ ម្សិលមិញមានករណីគ្រោះថ្នាក់ចរាចរណ៍នៅទូទាំងប្រទេស កើតឡើងចំនួន៨លើក បណ្តាលឲ្យមនុស្សស្លាប់៦នាក់ (ប្រុស៥នាក់) រងរបួសធ្ងន់ ៥នាក់ និងរបួសស្រាល១នាក់ (ប្រុស) ។ យោងតាមនាយកដ្ឋាននគរបាលចរាចរណ៍។
ប្រភពដដែលបន្តថា នៅក្នុងហេតុការណ៍គ្រោះថ្នាក់ ចរាចរណ៍ទាំង៨លើកនេះ បណ្តាលឲ្យខូចខាតយានយន្ត សរុបចំនួន ១១គ្រឿង រួមមានម៉ូតូចំនួន ៣គ្រឿង រថយន្តធុនតូចចំនួន ៦គ្រឿង យានផ្សេងៗ ២គ្រឿង, ថ្មើរជើង ៣នាក់ ។ ប្រភពបញ្ជាក់ថា មូលហេតុ ដែលបណ្តាលឲ្យកើតមានករណីគ្រោះថ្នាក់ ចរាចរណ៍ រួមមាន ល្មើសល្បឿន ៤លើក, ស្រវឹង ១លើក (ស្លាប់២នាក់), មិនគោរពសិទ្ធិ ២លើក(ស្លាប់១នាក់), ប្រជែង ១លើក (ស្លាប់២នាក់) ក្នុងនោះអ្នកមិនពាក់មួកសុវត្ថិភាពពេលគ្រោះថ្នាក់ចរាចរណ៍ ៣នាក់។
ជាមួយគ្នានេះម្សិលមិញលទ្ធិផលត្រួតពិនិត្យអនុវត្តច្បាប់ ចរាចរណ៍ផ្លូវគោកឃើញថា យានយន្តដែលល្មើសសរុបទូទាំងប្រទេសមាន៣៧៣២គ្រឿង ក្នុងនោះបានធ្វើការអប់រំចំនួន១៥២៦គ្រឿង និងពិន័យសរុប២២០៦គ្រឿង៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
