រាជធានីភ្នំពេញ៖ព្រឹត្តិបត្រព័ត៌មាន និងការព្យាករណ៍ពីកម្ពស់ទឹកជំនន់ ប្រចាំថ្ងៃទី២៥ ខែកក្កដា ឆ្នាំ២០១៦នេះ ដោយបញ្ជាក់ពីស្ថានភាពកម្ពស់ទឹក នៅតាមបណ្តាស្ថានីយជលសាស្ត្រនានា រួមមានស្ថានីយទន្លេមេគង្គ-ស្ទឹងត្រែង, ស្ថានីយទន្លេមេគង្គ-ក្រចេះ, ស្ថានីយទន្លេ មេគង្គ-កំពង់ចាម, ស្ថានីយបាសាក់-ចតុមុខ, ស្ថានីយមេគង្គ-អ្នកលឿង, ស្ថានីយបាសាក់-កោះខែល និងស្ថានីយទន្លេសាប-ព្រែកក្តាម៕ សូមអានព្រឹត្តិបត្រព័ត៌មានរបស់ក្រសួងធនធានទឹកទាំងស្រុង៖
រាជធានីភ្នំពេញ៖កាលពីវេលាម៉ោង១២ និង៤០នាទីរំលងអធ្រាត្រមានករណីអគ្គិភ័យមួយបានឆេះតូបលក់បន្លែ ស្ថិតនៅក្រោយផ្សារសុវណ្ណាជិត១០តូប ស្ថិតនៅក្នុង សង្កាតទំនប់ទឹក ខណ្ឌចំការមន រាជធានីភ្នំពេញ។
ប្រជាពលរដ្ឋដែលរស់នៅជិតផ្សារបានប្រាប់ថា ការឆេះនេះ គឺបណ្តាលមកពីទុស្សេខ្សែភ្លើង ចំណែកសម្ភារៈដែលរងការខូចខាតនោះ គឺឆេះតែគ្រែសម្រាប់ដាក់លក់បន្លែ សាច់តែប៉ុណ្ណោះ។ ប្រភពបន្តថា បន្ទាប់ពីឆេះបានបន្តិច គេបានឃើញរថយន្តពន្លត់អគ្គិភ័យ របស់ស្នងការដ្ឋាននគរបាលរាជធានីភ្នំពេញ ចំនួន៤គ្រឿងចេញ ជួយបាញ់ពន្លត់ត្រឹមតែអស់៣គ្រឿង អាចគ្រប់គ្រងសភាពការណ៍បាន គឺមិនបណ្តាលឲ្យឆេះរាលដាល់តទៅទៀតទេ៕
រាជធានីភ្នំពេញ៖នៅថ្ងៃទី២៤ ខែកក្កដា ឆ្នាំ២០១៦ កម្លាំងនគរបាលជាតិបានបង្ក្រាបបទល្មើសជួញដូរ រក្សាទុក និងប្រើប្រាស់ ៤ករណី ឃាត់មនុស្ស៧នាក់ ក្នុងនោះមុខសញ្ញាជួញដូរ៥នាក់ និងមុខសញ្ញាប្រើប្រាស់២នាក់ រឹមអូសមេតំហ្វេតាមីន(ice) ១០.៤១ក្រាម, ១កញ្ចប់ធំ និង៨កញ្ចប់តូច។
បើតាមរបាយការណ៍របស់អគ្គស្នងការនគរបាលជាតិបានបញ្ជាក់ថា ជនសង្ស័យទាំងនោះត្រូវបានឃាត់ខ្លួននៅ៖ រាជធានីភ្នំពេញ បង្ក្រាប១ករណីឃាត់ខ្លួន២នាក់, ខេត្តកណ្ដាល បង្ក្រាប១ករណី ឃាត់ខ្លួន ៣នាក់(ប្រុស), ខេត្តបន្ទាយមានជ័យ បង្ក្រាប១ករណីឃាត់ខ្លួនម្នាក់ និងខេត្តបាត់ដំបង បង្ក្រាប១ករណីឃាត់ខ្លួនម្នាក់៕
ដោយ៖ប្រុញ វិធិន
ខេត្តក្រចេះ៖លោកឧត្តមសេនីយ៍ សាន្ត ប៊ុនថាន មេបញ្ជាការកងរាជអាវុធហត្ថខេត្ត និងជាអនុប្រធានគណកម្មាធិការសមាគមអតីតយុទ្ឋជនកម្ពុជាខេត្តក្រចេះ បាននាំយកប្រាក់មរណៈសង្គ្រោះ ព្រមទាំងគ្រឿងឧបភោគបរិភោគ ជូនដល់គ្រួសារសព សមាជិកអតីតយុទ្ធជនកម្ពុជា នៅស្រុកព្រែកប្រសព្វ ។
ពិធីនេះធ្វើឡើងនៅព្រឹកថ្ងៃទី២៤ ខែកក្កដា ឆ្នាំ២០១៦ ដោយមានការចូលរួមពីលោកឧត្តមសេនីយ៍ ហ៊ន ពូច ស្នងការរងនគរបាលខេត្ត និងជាសមាជិកគណកម្មាធិការសមាគមអតីតយុទ្ឋជនកម្ពុជាខេត្ត បានដឹកនាំក្រុមការងារសមាគមនអតីតយុទ្ធជនកម្ពុជាថ្នាក់ខេត្ត នៅភូមិក្រហមក ឃុំតាម៉ៅ ស្រុកព្រែកប្រសព្វ ខេត្តក្រចេះ ។
អំណោយដែលយកទៅប្រគល់ជូនក្រុមគ្រួសារអតីតយុទ្ធជនសពនៅព្រឹកនោះ រួមមាន ថវិកាចំនួន ៤លានរៀល ព្រមទាំងគ្រឿងឧបភោគបរិភោគរួមមាន អង្ករ មី ត្រីខ ទឹកត្រីទឹកស៊ីអ៊ីវ ជាច្រើនសំរាប់ទៀត ប្រគល់ជូនដល់គ្រួសាររបស់លោកស្រី ក្រៃ ខូយ អាយុ ៨៣ឆ្នាំ ជាសមាជិកសមាគមនអតីតយុទ្ធកម្ពុជា និងបានទទួលមរណភាពកាលពីថ្ងៃទី៧ ខែកក្កដាកន្លងទៅ ដោយរោគគាពាធ។
ក្នុងពិធីប្រគល់ថវិកាជូនគ្រួសារសពដល់លំនៅឋាននៅក្នុងស្រុកព្រែកប្រសព្វ លោកឧត្តមសេនីយ៍ សាន្ត ប៊ុនថាន មេបញ្ជាការកងរាជអាវុធហត្ថខេត្ត បានសម្តែងការចូលរួមរំលែកទុក្ខ និងពាំនាំការផ្តាំផ្ញើរសួរសុខទុក្ខពីសំណាក់ ឯកឧត្តមអភិបាលខេត្ត ដល់គ្រួសារសពផងដែរ។ លោក បានបន្តថា ដោយមានការជម្រុញ និងមានការយកចិត្តទុកដាក់ពីឯកឧត្តម នាយឧត្តមសេនីយ៍ គន់ គីម ប្រធានសមាគមនអតីតយុទ្ធជនកម្ពុជា និងឯកឧត្តម សរ ចំរុង អភិបាលនៃគណៈអភិបាលខេត្តក្រចេះ និងបន្ទាប់ពីទទួលបានពត៌មានពីអាជ្ញធរមូលដ្ឋាន ក្រុមការងារសមាគមនអតីតយុទ្ធជនកម្ពុជាខេត្តក្រចេះ ក៏បាននាំយកប្រាក់មរណៈសង្គ្រោះជូនដល់ក្រុមគ្រួសារសព សមាគមនអតីតយុទ្ធជនកម្ពុជា ឲ្យបានទាន់ពេលវេលាផងដែរ។
ទន្ទឹមនឹងនោះ លោកឧត្តមសេនីយ៍ សាន្ត ប៊ុនថាន អនុប្រធានគណកម្មាធិការសមាគមអតីតយុទ្ឋជនកម្ពុជាខេត្តក្រចេះ ក៏បានជម្រុញលើកទឹកចិត្តដល់អាជ្ញាធរឃុំ ប៉ុស្ដិ៍នគរបាល អាជ្ញាធរស្រុក អធិការនគរបាលស្រុក និងទីបញ្ជាការមូលដ្ឋានកងរាជអាវុធហត្ថស្រុក ត្រូវជ្រោមជ្រែងយកចិត្តទុកដាក់ ជួយដល់ក្រុមគ្រួសារអតីតយុទ្ធជន ក៏ដូចជាសមាជិកសមាគមនអតីតយុទ្ធជន នៅពេលដែលពួកគាត់ជួបប្រទះនូវបញ្ហាការលំបាកផ្សេងៗ និងជួយផ្ដល់ព័ត៌មានឲ្យសមាគមនបានដឹង ដើម្បីរួមគ្នាជួយដោះស្រាយជូនពួកគាត់បានទាន់ពេលវេលា៕
ប៉េកាំង៖យោងតាមរបាយការណ៍គណៈកម្មការវិន័យនិងអធិការកិច្ចនៃអង្គភាពប្រឆាំងអំពើពុករលួយចិនបានឲ្យដឹងថា ក្នុងរយៈពេល៦ខែដើមឆ្នាំ២០១៦នេះ មន្ដ្រីចំនួន២៦,៩០០នាក់ត្រូវបានអង្គភាពប្រឆាំងអំពើពុករលួយនៃបក្សកុម្មុនីស្ដចិនដាក់ទោសពីបទរំលោភច្បាប់រឹតបន្ដឹងការប្រើប្រាស់ថវិកាពាក់ព័ន្ធនឹង១៩,១៦០ករណី។
របាយការណ៍ដដែលបញ្ជាក់ថា ការរំលោភច្បាប់រឹតត្បិតការប្រើប្រាស់ថវិកាផងដែរ ក៏រួមបញ្ចូលការប្រើប្រាស់មូលនិធិសាធារណៈសម្រាប់ការធ្វើដំណើរ សម្រាប់របបអាហារ សម្រាប់ពិធីរៀបអាពាហ៍ពិពាហ៍ និងពិធីបុណ្យសព ដែលទាំងនេះជាការប្រើប្រាស់ថវិកាខ្ជះខ្ជាយ។ របាយការណ៍បន្ថែមថា បើគិតជាករណីវិញមានពីលំដាប់ខ្ពស់មកទាប គឺពី៤,៧៩៣ករណី ៣,៤៤៩ករណី និង៣,៣៧០ករណី។នេះជាការបញ្ជាក់បន្ថែមពីរបាយការណ៍គណៈកម្មការវិន័យ និងអធិការកិច្ចនៃអង្គភាពប្រឆាំងអំពើពុករលួយ។
គួរបញ្ជាក់ថា អង្គភាពប្រឆាំងអំពើពុករលួយនៃបក្សកុម្មុនីស្ដចិន បានចេញច្បាប់រឹតត្បិតការប្រើប្រាស់ថវិកា៨ចំណុច កាលពីចុងឆ្នាំ២០១២ ដើម្បីកាត់បន្ថយភាពហ៊ឺហារបស់មន្ដ្រី និងការអនុវត្ដការខុសប្រក្រតី រួមទាំងទង្វើមិនសមរម្យនានា។ រយៈពេលពាក់កណ្ដាលឆ្នាំ២០១៦នេះ ក្នុងចំណោមមន្ដ្រីទទួលទោស ក៏មានមន្ដ្រីជាន់ខ្ពស់ជាច្រើននាក់ផងដែរ៕
ខេត្តព្រៃវែង៖លោក ឃ្លោក ពិសិដ្ឋ ចៅក្រមសើបសួរសាលាដំបូងខេត្តព្រៃវែងបានចេញដីកាបង្កាប់ឱ្យចាប់ខ្លួន ឈ្មោះ ឡុច វិរៈ ភេទប្រុស អាយុ៣១ឆ្នាំ មុខរបរបុគ្គលិកក្រុមហ៊ុនខូថែលរស់នៅភូមិ៥ សង្កាត់កំពង់លាវ ក្រុងព្រៃវែង ខេត្តព្រៃវែង ដាក់ពន្ធនាគារខេត្តព្រៃវែង តាមមាត្រា៣៥៣.៣៥៦.នៃក្រមព្រហ្មទណ្ឌ ត្រូវបានឈ្មោះ ម៉ៅ សេរីវឌ្ឍនា ភេទប្រុស អាយុ២៥ឆ្នាំរស់នៅភូមិត្រពាំងឈូក សង្កាតទឹកថ្លា ខណ្ឌសែនសុខ រាជធានីភ្នំពេញ បានប្តឹងចោទថាជាចោរលួចអាគុយ របស់ក្រុមហ៊ុនស្មាតកាលពីថ្ងៃទី១៧ ខែកក្កដា ឆ្នាំ២០១៦ ពេលយប់នៅចំណុច បង្គោលអង់តែន ភូមិព្រៃកំពែង ឃុំ ព្រៃកណ្តៀង ស្រុកពាមរក៍ ខេត្តព្រៃវែងនៅពេលយប់បាត់អស់ចំនួន៤៨គ្រាប់។
បើតាមគំណត់ហេតុសមត្ថកិច្ចបញ្ចាក់ថា ឈ្មោះ លុច្យ វិរៈ បានបើរថយន្តដឹកអាគុយទាំងអស់នោះយកទៅលក់ឱ្យឈ្មោះ មាន អាយុ ៥២ឆ្នាំនៅភូមិ ៥សង្កាត់កំពង់លាវ មុខរបរទិញលក់អេតចាយតែពេលនោះគាក់មិនមានលុយទិញទេ តែឈ្មោះវិរះនិងក៏បានផ្ញើអាគុយនៅទីនោះមិនបានប៉ុន្មានម៉ោងផងម្ចាស់អេតចាយបានតេទូរស័ព្ទហៅឱ្យវិរះដឹកចេញពីកន្លែងរបស់ខ្លួន ហើយឈ្មោះវិរះបានដឹកតាមរថយន្ត ម៉ាក ហ៊ីយ៉ាន់ដាយពណ៌ទឹកប៊ិច ពាក់ស្លាកលេខភ្នំពេញ ២AH ៧៩២៥ ត្រូវបានដឹកយកទៅលាក់ទុក វ៉ឺង ថុល អាយុ៣៨ឆ្នាំ នៅភូមិស្គរដាច ឃុំតាកោ ស្រុកពោធិ៍រៀង សមត្ថកិច្ចស្រាវជ្រាវរកឃើញយកមករក្សាទុកនៅអធិការក្រុងព្រៃវែង ។
បច្ចុប្បន្នឈ្មោះ លុច្យ វិរៈ ត្រូវបានឃុំខ្លួននៅពន្ធនាគារខេត្តព្រៃវែងវេលាម៉ោង១០ថ្ងៃទី២១ខែកក្កដា ឆ្នាំ២០១៦នេះរួចហើយ ខណៈជនជាប់ចោទម្នាក់ទៀត ឈ្មោះ បារាំងមានស្រុក កំណើតនៅខេត្តតាកែវ ជានកម្មករ ឈ្មោះលុច្យ វិរៈ កំពុងរត់គេចខ្លួនបាត់រួមនិងបក្សពួក២នាក់ទៀត៕
ខេត្តកំពង់ស្ពឺ៖កម្លាំងនគរបាលនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ បានសហការជាមួយការិយាល័យអន្តោប្រវេសន៍ នៃស្នងការដ្ឋាននគរបាលខេត្តកំពង់ស្ពឺ បានឃាត់ខ្លួនជនជាតិវៀតណាមចំនួន១៣នាក់ (ស្រីម្នាក់) ពីបទជិះម៉ូតូពាក់ស្លាកលេខវៀតណាមចំនួន១១គ្រឿង ដើរលក់តង់ និងប្រើប្រាស់ទិដ្ឋាការខុសទិសដៅ។
ការឃាត់ខ្លួននេះធ្វើឡើងនៅរសៀលថ្ងៃទី២២ ខែកក្កដា ឆ្នាំ២០១៦ នៅចំណុចផ្ទះសំណាក់ ថ្មត្រជាក់ ភូមិសំណង់ សង្កាត់រការធំ ក្រុងច្បារមន ខេត្តកំពង់ស្ពឺ។
ប្រធាននាយកដ្ឋាននាយកដ្ឋានស៊ើបអង្កេត និងអន្តវត្តនីតិវិធី នៃអគ្គនាយកដ្ឋានអន្តោប្រវេសន៍ លោកឧត្តមសេនីយ៍ អ៊ុក ហៃសិលា បានបញ្ជាក់ថា ជនសង្ស័យទាំងអស់ត្រូវបានបញ្ជូនមក អគ្គនាយកដ្ឋានអន្តោប្រវេសន៍ ដើម្បីធ្វើការសាកសួរ និងធ្វើការបណ្តេញចេញឲ្យទៅ ប្រទេសរបស់ខ្លួនវិញ។
គួរបញ្ជាក់ថា ជនបរទេសទាំងឡាយ ដែលប្រើប្រាស់ មធ្យោបាយធ្វើដំណើរ មិនមែនជាស្លាកលេខរបស់កម្ពុជា ត្រូវធ្វើការទាក់ទងទៅមន្ត្រីគយ និងសមត្ថកិច្ចពាក់ព័ន្ធ តាមបណ្តាច្រកទ្វារអន្តរជាតិនៃកម្ពុជា ឲ្យបានត្រឹមត្រូវតាមច្បាប់ និងប្រើប្រាស់ទិដ្ឋាការឲ្យចំទិសដៅ៕
អាល្លឺម៉ង់៖មនុស្សយ៉ាងហោចណាស់៩នាក់បានស្លាប់បាត់បង់ជីវិត និងជាង២០នាក់ផ្សេងទៀតរបរបួសក្នុងករណីបាញ់ប្រហារនៅកណ្តាលទីក្រុង Munich ប្រទេសអាល្លឺម៉ង់។ យោងតាមព័ត៌មាន BBC ចេញផ្សាយនៅព្រឹកថ្ងៃទី២៣ កក្កដា នេះ។
យោងតាមប៉ូលិសបាននិយាយថា ខ្មាន់កាំភ្លើងម្នាក់នៅក្នុងហេតុការណ៍នោះបានបាញ់សម្លាប់ខ្លួនឯងមានអាយុ១៨ឆ្នាំ ជនជាតិអាល្លឺម៉ង់កាត់អីរ៉ុង រស់នៅទីក្រុង Munich តែម្តង។ ប៉ូលិសបន្តថា បន្ទាប់ពីករណីបាញ់នៅទីប្រជុំមជ្ឈមណ្ឌលពាណិជ្ជកម្ម (Olympia Shopping Center) កណ្តាលទីក្រុង Munich ជុំវិញបរិវេណនៃការបាញ់ប្រហារត្រូវបានប៉ូលិសបិទមិនឲ្យចេញចូល។ រាល់ការធ្វើចរាចរណ៍ផ្សេងៗដូចជា រថយន្តក្រុង និងរថភ្លើងក្រោមដី ត្រូវបានផ្អាកទាំងអស់សម្រាប់នៅទីក្រុង Munich៕
រាជធានីភ្នំពេញ៖ព្រឹត្តិបត្រព័ត៌មាន និងការព្យាករណ៍ពីកម្ពស់ទឹកជំនន់ ប្រចាំថ្ងៃទី២៣ ខែកក្កដា ឆ្នាំ២០១៦នេះ ដោយបញ្ជាក់ពីស្ថានភាពកម្ពស់ទឹក នៅតាមបណ្តាស្ថានីយជលសាស្ត្រនានា រួមមានស្ថានីយទន្លេមេគង្គ-ស្ទឹងត្រែង, ស្ថានីយទន្លេមេគង្គ-ក្រចេះ, ស្ថានីយទន្លេ មេគង្គ-កំពង់ចាម, ស្ថានីយបាសាក់-ចតុមុខ,ស្ថានីយមេគង្គ-អ្នកលឿង, ស្ថានីយបាសាក់-កោះខែល និងស្ថានីយទន្លេសាប-ព្រែកក្តាម៕ សូមអានព្រឹត្តិបត្រព័ត៌មាន របស់ក្រសួងធនធានទឹកទាំងស្រុង៖
រាជធានីភ្នំពេញ៖នៅថ្ងៃទី២២ ខែកក្កដា ឆ្នាំ២០១៦ម្សិលមិញនេះកម្លាំងនគរបាលបានបង្ក្រាបបទល្មើសជួញដូរ រក្សាទុក និងប្រើប្រាស់៨ករណី ឃាត់ខ្លួនមនុស្ស១៣នាក់ ក្នុងនោះមុខសញ្ញាជួញដូរ១២នាក់ មុខសញ្ញាប្រើប្រាស់ម្នាក់ ដកហូតថ្នាំញៀន មេតំហ្វេតាមីន (ice) ១០.៦៨ក្រាម ២កញ្ចប់ធំនិង ២១កញ្ចប់តូច។ នេះបើតាមរបាយការណ៍របស់អគ្គស្នងការនគរបាលជាតិ។
របាយការណ៍ដដែលបញ្ជាក់ថា ជនសង្ស័យទាំងនោះត្រូវបាន បង្ក្រាបនៅក្នុងរាជធានីភ្នំពេញ និងតាមបណ្ដាលខេត្តមួយចំនួន៖ រាជធានីភ្នំពេញ បង្ក្រាប២ករណីឃាត់ខ្លួន៣នាក់, ខេត្តកណ្ដាល បង្ក្រាប១ករណីឃាត់ខ្លួន៣នាក់, ខេត្តព្រៃវែង ង្ក្រាប២ករណីឃាត់ខ្លួន៣នាក់, ខេត្តក្រចេះ បង្ក្រាប១ករណីឃាត់ខ្លួនម្នាក់, ខេត្តត្បូងឃ្មុំ បង្ក្រាប១ករណីឃាត់ខ្លួន២នាក់៕
រាជធានីភ្នំពេញ៖នៅថ្ងៃទី២១ ខែកក្កដា ឆ្នាំ២០១៦ មានករណីគ្រោះថ្នាក់ចរាចរណ៍ ទូទាំងប្រទេសកើតឡើងចំនួន១០លើក (យប់៤លើក) បណ្តាលឲ្យមនុស្សស្លាប់៥នាក់ រងរបួសធ្ងន់៩នាក់ និងរបួសស្រាល៥នាក់។ នេះបើតាមរបាយការណ៍របស់អគ្គស្នងការនគរបាលជាតិ។
ប្រភពដដែលបន្តថា នៅក្នុងហេតុការណ៍គ្រោះថ្នាក់ចរាចរណ៍ ១០លើកនេះ បណ្តាលឲ្យខូតខាតយានយន្ដសរុបចំនួន ១៧គ្រឿង រួមមាន ម៉ូតូចំនួន១១គ្រឿង រថយន្តធុនតូច ចំនួន៤គ្រឿង, រថយន្តធុនធំ២គ្រឿង និងអ្នកថ្មើជើងម្នាក់។ ប្រភពខាងលើបញ្ជាក់ថា មូលហេតុដែលបណ្ដាលឲ្យកើតមាន គ្រោះថ្នាក់ចរាចរណ៍នេះរួមមាន ល្មើសល្បឿន៤លើក, ប្រជែងគ្រោះថ្នាក់២លើក មិនគោរពសិទ្ធិ២លើក, បត់គ្រោះថ្នាក់១លើក, កត្តាយាយន្ដ១លើក។ ក្នុងនោះអ្នកមិនពាក់មួកសុវត្ថិភាព ពេលគ្រោះថ្នាក់ចរាចរណ៍ចំនួន១២នាក់។
ជាមួយគ្នានោះម្សិលមិញលទ្ធិផលត្រួតពិនិត្យអនុវត្តច្បាប់ចរាចរណ៍ផ្លូវគោកឃើញថា យានយន្តដែល្មើសសរុបទូទាំងប្រទេសមាន ចំនួន៣៣៣៦គ្រឿង ក្នុងនោះបានធ្វើការអប់រំចំនួន ១៣៦៧គ្រឿង និងពិន័យសរុប១៩៦៩គ្រឿង ៕
រាជធានីភ្នំពេញ៖លោក អ៊ូ វីរៈ បានសរសេរលើ face book នាពេលថ្មីៗ នេះ ដោយបានរិះគន់និងមិនគាំទ្រ លោក សម រង្ស៊ី ដែលបានទាមទារឲ្យសហគមន៍អឺរ៉ុបបិទទីផ្សារនាំចេញសម្លៀកបំពាក់ពីកម្ពុជា។ ទន្ទឹមនោះលោកក៏បានរិះគន់ការលើកឡើងរបស់លោក សម រង្ស៊ី ដែលចោទប្រកាន់គណបក្សកាន់អំណាច នៅពីខ្នងក្រោយការសម្លាប់លោក កែម ឡី ជារឿងខុសឆ្គង។
លោក អ៊ូ វីរៈ បានសរសេរថា គណបក្សប្រឆាំងក្រោមការដឹកនាំរបស់ លោក សម រង្ស៊ី [គ្មានលក្ខណៈប្រជាធិបតេយ្យ] ហើយត្រូវតែធ្វើការកែទម្រង់តាមប្រជាធិបតេយ្យ ពិតប្រាកដ ដោយមិនត្រូវបន្តដឹកនាំ តាមវប្បធម៌អត្តនោម័តនោះទេ។ លោក សម រង្ស៊ី ខ្វះភាពជាអ្នកដឹកនាំ ហេតុដូច្នេះហើយ ទើបកម្លាំងប្រឆាំងមិនអាចរួបរួមបាន។ លោកបានបន្តនិយាយថា សូម្បីខ្លួនលោកផ្ទាល់ក៏រងគ្រោះ ដោយសារការចោទលាបពណ៌ពីលោក សម រង្ស៊ី នេះដែរ៕
ខេត្តពោធិ៍សាត់៖យោងតាមប្រភពព័ត៌មានពីកម្លាំងសមត្ថកិច្ចវរៈការពារព្រំដែន៨២៥ នៅព្រឹកនេះបានឲ្យដឹងថា សាកសពពលរដ្ឋខ្មែរម្នាក់ ដែលទាហានឈុតខ្មៅថៃបាញ់សម្លាប់ត្រូវត្រូវបានមន្ទីរពេទ្យថៃ មិនអនុញ្ញាតឲ្យយកសពមកស្រុកកំណើតវិញទេ លុះត្រាមានការបញ្ជាក់ពីអាជ្ញាធរមូលដ្ឋានថាពិតជាគ្រួសារសពទើបគេប្រគល់ឲ្យ។
គួរបញ្ជាក់ថា កាលពីថ្ងៃទី២០ ខែកក្កដា ឆ្នាំ២០១៦ ទាហានឈុតខ្មៅថៃបានបាញ់សម្លាប់បុរសម្នាក់ខ្មែរម្នាក់ ខណៈដែលឆ្លងដែនចូលកាប់ឈើខុសច្បាប់ក្នុងទឹកដីថៃបុរស៦នាក់ទៀត ដោយជនរងគ្រោះត្រូវ២គ្រាប់ ចំជើង១គ្រាប់ ចំកន្លែងបោះដៃផុត១គ្រាប់នោះ មានឈ្មោះ តេង សល់ ភេទប្រុស អាយុ ៣៥ឆ្នាំ រស់ភូមិភ្នំប្រាំពីរ ឃុំប៊ួ ស្រុកភ្នំព្រឹក ខេត្តបាត់ដំបង៕
រាជធានីភ្នំពេញ៖នៅមុខសាលាដំបូងរាជធានីភ្នំពេញ នាព្រឹកនេះ មានកម្មកររោងចក្រជិត១០០នាក់ បានប្រមូលផ្តុំគ្នាលើកបដាស្រែកតវ៉ា សុំឱ្យតុលាការជួយអន្តរាគមន៍ចេញដីការក្សាការពាររោងចក្រយីហោ «ជុងហ្វៃ នីត វៀរ អេហ្វធីវ៉ាយអិលធីឌី» ដែលក្ស័យធុន ដោយមិនបើកប្រាក់ខែជូនពួកគាត់ ។
រោងចក្រខាងលើ មានទីតាំងស្ថិតនៅក្នុងភូមិព្រែតាឡុង សង្កាត់ចាក់អង្រែ ខណ្ឌមានជ័យ ហើយសព្វថ្ងៃ គឺមានកម្មករជាច្រើនមកដេកយាមនៅក្នុងរោងចក្រទាំងថ្ងៃទាំងយប់ ដោយសារតែឮដំណឹងថា ភាគីថៅកែ បានកំពុងព្យាយាមរកឱកាសដឹកគ្រឿងបរិក្ខាចេញពីក្នុងរោងចក្រ ដើម្បីគេចវេស ពីការបើកប្រាក់ខែឲ្យកម្មករ។
កម្មករដែលចូលរួមក្នុងការទាមទារក្នុងនោះបានបញ្ជាក់ថា ពួកគាត់មានការម្ភយ៉ាងខ្លាំង ចំពោះស្ថានភាពបច្ចុប្បន្ន ទើបលើកគ្នាមកសុំឱ្យសាលាដំបូង សុំឱ្យចេញដីការក្សាការពាររោងចក្រ ហាមឃាត់ជាបណ្តោះអាសន្ន ការលក់ ការផ្ទេរ ការដឹកជញ្ជូន ការជួល ការបញ្ចាំ ឬការធ្វើអំណោយនូវសម្ភារជាចលនវត្ថុ និងអចលនវត្ថុទាំងអស់របស់រោងចក្រខាងលើ ខណៈថៅកែមិនបើកប្រាក់ខែជូនពួកគាត់ដែលកំពុងប្រឈមការលំបាកខាងជីវភាព៕
អាមេរិក៖រដ្ឋមន្ត្រីក្រសួងការពារជាតិអាមេរិកលោក Ash Carter បាននិយាយថា អាមេរិក និងក្រុមចម្រុះអន្តរជាតិប្រឆាំងក្រុមរដ្ឋអ៊ីស្លាម បានព្រមព្រៀងគ្នា លើយុទ្ធសាស្ត្រកម្ចាត់ក្រុមរដ្ឋអ៊ីស្លាមនៅក្នុងប្រទេសស៊ីរី និងគាស់រម្លើងគ្រឹះដ៏រឹងមាំរបស់ក្រុមសកម្មប្រយុទ្ធ នៅក្នុងទីក្រុង Mosul ប្រទេសអ៊ីរ៉ាក់។
លោក Ash Carter បានអះអាងថា ផែនការប្រយុទ្ធដែលពិភាក្សាគ្នាជាមួយតំណាង ប្រទេសជាង៣០ គឺត្រូវតែឈ្នះ ហើយអាចគ្រប់គ្រងតំបន់ដែលក្រុមសកម្មប្រយុទ្ធកាន់កាប់នាពេលនេះយ៉ាងពេញលេញ។ ប៉ុន្តែលោក ថា មិនអាចលុបបំបាត់មនោគមន៍វិជ្ជា ឬអំពើហិង្សាបង្កដោយក្រុមសកម្មប្រយុទ្ធនៅកន្លែងផ្សេងក្នុងពិភពលោកបានទេ។
គួរបញ្ជាក់ថា បច្ចុប្បន្ន ក្រុមរដ្ឋអ៊ីស្លាមបានបាត់បង់ផ្នែកខ្លះដែលធ្លាប់រឹបអូសបានពីមុន ទាំងនៅក្នុងប្រទេសស៊ីរី និងអ៊ីរ៉ាក់ ប៉ុន្តែពួកគេនៅបន្តគ្រប់គ្រងតំបន់ជាច្រើនទៀតនៅក្នុងប្រទេសទាំងពីរ៕
