រាជធានីភ្នំពេញ៖កម្លាំងល្បាតរបស់នគរបាលមូលដ្ឋានប៉ុស្ដិ៍ជ្រោយចង្វាសហការជាមួយកម្លាំងនគរបាលខណ្ឌ បានឃាត់ខ្លួនជនសង្ស័យ២នាក់ដកហូតថ្នាំញៀនជាប្រភេទម៉ាទឹកកក៣កញ្ចប់ធំ ដែលជននេះបានរក្សាទុកនៅជាប់នឹងខ្លួន ព្រមទាំងម៉ូតូ១គ្រឿងម៉ាក CBR។
ក្នុងប្រតិបត្តិការបង្ក្រាប និងឃាត់ខ្លួនជនត្រូវជាប់សង្ស័យទាំង២នាក់ ខាងលើត្រូវបានធ្វើឡើងនៅល្ងាច ថ្ងៃទី១២ ខែឧសភា ឆ្នាំ២០១៦ នៅចំណុច ក្បែរវត្តគៀនឃ្លាំង តាមបណ្ដោយផ្លូវជាតិលេខ៦ ស្ថិតក្នុង ភូមិគៀនឃ្លាំង សង្កាត់ជ្រោយចង្វា ខណ្ឌជ្រោយចង្វា។
អធិការរងទទួល ផែនព្រហ្មទណ្ឌខណ្ឌជ្រោយចង្វា លោកវរសេនីយ៍ត្រី ឯក សេរីវុធ បានប្រាប់អ្នកកាសែតថា ជនត្រូវឃាត់ខ្លួនពាក់ព័ន្ធករណីជួញដូរនូវសារធាតុញៀនខាងលើនេះ មានឈ្មោះឈិន ប្រណី អាយុ២១ឆ្នាំ ជាជនជាតិ ខ្មែរឥស្លាម មានមុខរបរធ្វើស្រែ ស្នាក់នៅ ភូមិសំពោងជ័យ ឃុំសំពងជ័យ ស្រុកជើងព្រៃ ខេត្តកំពង់ចាម និងម្នាក់ទៀត ឈ្មោះជា ធុយ អាយុ១៩ឆ្នាំ មានមុខរបរលក់ដូរស្នាក់នៅភូមិជ្រលង ឃុំត្រពាំងត្នោត ស្រុកបារាយណ៍ ខេត្តកំពង់ធំ។
លោកលោកវរសេនីយ៍ត្រីបញ្ជាក់ថា កម្លាំងសមត្ថកិច្ច បានធ្វើការបញ្ជូនខ្លួនជន សង្ស័យទាំង២នាក់រួមជាមួយវត្ថុតាងទៅឃុំខ្លួនស្រាវជ្រាវបន្ត នៅអធិការដ្ឋាននគរបាលខណ្ឌជ្រោយចង្វាដើម្បីរៀបចំចាត់តាមនិតិវិធីនៃផ្លូវច្បាប់៕
តៃវ៉ាន់៖រញ្ជួយដីកម្រិត ៥.៦រ៉ិចទ័រមួយបានវាយប្រហារភាគឦសានកោះតៃវ៉ាន់ នៅថ្ងៃព្រហស្បតិ៍ម្សិលមិញនេះ ស្ថិតនៅឆ្ងាយពីទីក្រុងតៃប៉ិ។ នេះបើភ្នាក់ងារភូមិសាស្ត្រអាមេរិកដែលដកស្រង់បកផ្សាយដោយសារព័ត៌មាន AFP។
ទីភ្នាក់ងារដដែលបាននិយាយថា រញ្ជួយដីនេះ មានអង្កត់ផ្ចិត១៤គីឡូម៉ែត្រ ស្ថិតនៅឆ្នេរភាគឦសាននៃទីប្រជុំជនស៊ូអ៊ៅ។ ប្រភពបញ្ជាក់ថា រញ្ជួយដីនៅថ្ងៃនេះ បានវាយប្រហារទៅលើអគារខ្ពស់ៗ ខណៈប្រព័ន្ធផ្សព្វផ្សាយក្នុងស្រុក ក៏បានរាយការណ៍ផងដែរអំពីការកាត់ផ្ដាច់ប្រព័ន្ធអគ្គិសនី ហើយមនុស្សជាប់នៅក្នុងជណ្ដើរយន្ត។
គួរបញ្ជាក់ថា កាលពីខែកុម្ភៈកន្លងមក រញ្ជួយដីទំហំ ៦.៤រ៉ិចទ័រ បានវាយប្រហារផ្ដួលរំលំអគារធំមួយនៅភាគខាងត្បូងកោះតៃវ៉ាន់ ដោយបានសម្លាប់មនុស្សជាង១០០នាក់។ ហេតុការណ៍រញ្ជួយដីដ៏អាក្រក់បំផុតនៅកោះតៃវ៉ាន់ បានកើតឡើងកាលពីខែកញ្ញា ឆ្នាំ១៩៩៩ នៅពេលរញ្ជួយដីទំហំ ៧.៦រ៉ិចទ័រ បានសម្លាប់មនុស្សប្រហែល ២៤០០នាក់៕
ខេត្តព្រៃវែង៖បុរសវ័យ២៤ឆ្នាំម្នាក់បានបបួលស្ត្រីម្នាក់ជិះម៉ូតូជាមួយលុះដល់កន្លែងស្ងាត់ចាប់រំលោភបានសម្រេចបានមួយថ្ងៃត្រូវស្ត្រីរងគ្រោះប្តឹងសមត្ថកិច្ចចាប់ខ្លួន។ ហេតុការណ៍នេះកើតឡើងកាលពីថ្ងៃទី១១ ខែឧសភា ឆ្នាំ២០១៦ វេលាម៉ោងប្រហែល១៩ និង៥៥ នាទីយប់ នៅចំណុចស្រះតាហមចម្ងាយ២០០ម៉ែត្រ ខាងលិចភូមិជ្រៃ ឃុំព្រៃស្រឡិត ស្រុកពារាំង។
ជនសង្ស័យខាងលើឈ្មោះ ថា ភាព ភេទប្រុស អាយុ២៤ឆ្នាំរស់នៅភូមិជ្រៃ ឃុំព្រៃ ស្រឡឹតបានចាប់រំលោភសេព្វសន្ថវៈលើជនរងគ្រោះឈ្មោះ អ.ឌ.ណ ភេទស្រី អាយុ២៤ឆ្នាំ មានទីលំនៅភូមិក្រាំង ឃុំព្រៃស្រឡិត បានសម្រេច ។
សមត្ថកិច្ចបានឲ្យអ្នកយកព័ត៌មានយើងដឹងថា នៅមុនពេលកើតហេតុជនសង្ស័យ និងជនរងគ្រោះបានទៅស៊ីការនៅក្នុងភូមិក្រាំងបន្ទាបមក ជនសង្ស័យបានបបួលជនរងគ្រោះជិះម៉ូតូចេញពីកន្លែងរោងការភូមិខាងលើក្នុងទិសដៅ សំដៅមកភូមិជ្រៃពេលមកដល់កន្លែងកើតហេតុ ជនសង្ស័យបានធ្វើសកម្មភាពចាប់រំលោភលើជនរងគ្រោះរហូតបានសម្រេច។
ក្រោយពេលកើតហេតុដល់ថ្ងៃទី១២ ខែឧសភា ឆ្នាំ២០១៦ ទើបជនរងគ្រោះមករាយការណ៍ជូនសមត្ថកិច្ច។ ក្រោយពីបានទទួលពាក្យបណ្តឹងពីជនរងគ្រោះសមត្ថកិច្ចយើងបានធ្វើការឃាត់ខ្លួនជនសង្ស័យខាងលើ។
បច្ចុប្បន្នជនសង្ស័យត្រូវបានសមត្ថកិច្ចកំពុងតែកសាងសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធីនៃច្បាប់៕
ខេត្តត្បូងឃ្មុំ៖កម្លាំងនគរបាលបានចាប់ខ្លួនបុរសម្នាក់កាលពីយប់ម្សិលមិញ បន្ទាប់ពីជនសង្ស័យ រូបនេះ បានយកកាំបិតចាក់ឪពុកក្មេក បណ្តាលឲ្យស្លាប់ ព្រោះតែខឹងប្រពន្ធឲ្យលុយម្តាយខ្ចី ១០ម៉ឺនរៀល ប៉ុណ្ណោះ។
ករណីឃាតកម្មនេះ កើតឡើង នៅភូមិយាយស ឃុំទន្លេបិទ ស្រុកត្បូងឃ្មុំ ។ ចំណែក ជនសង្ស័យឈ្មោះ ប៉េង រ៉ានី អាយុ២៧ឆ្នាំ ត្រូវជាកូនប្រសារ។ រីឯជនរងគ្រោះ ឈ្មោះ អ៊ុត ឃីម អាយុ៤៨ឆ្នាំ ត្រូវជនសង្ស័យ ចាក់១កាំបិត បណ្តាលឲ្យរងរបួសធ្ងន់ ត្រង់ចំណុច បោះដៃផុតខាងស្តាំ ហើយបានដាច់ខ្យល់ស្លាប់ ក្រោយពីក្រុមគ្រួសារ ដឹកយកទៅសង្គ្រោះ នៅមន្ទីរពេទ្យបង្អែក ខេត្តកំពង់ចាម៕
ខេត្តបាត់ដំបង៖ស្ត្រីមានផ្ទៃពោះគ្រប់ខែម្នាក់បានសម្រាលកូននៅក្នុងព្រៃ កាលពីរសៀលថ្ងៃទី១២ ខែឧសភា ២០១៦ ស្ថិតនៅចំណុចភូមិសាមគ្គី ឃុំពេជ្រចិន្តា ស្រុកភ្នំព្រឹក។ តាមព័ត៌មានទទួលបានករណីខាងលើនេះ ក៏ព្រោះតែប្រពន្ធបានធ្វើដំណើរចំណាកស្រុកជាមួយស្វាមី ដើម្បីស្វែងរកការងារធ្វើនៅតាមតំបន់ព្រំដែនខ្មែរ-ថៃ។ ស្ត្រីរូបនោះ ឈ្មោះ ឆូយ វន អាយុ៣៣ឆ្នាំ រស់នៅស្រុកសំឡូត។
តាមព័ត៌មានគឺ ស្ត្រីរូបនេះមានផ្ទៃពោះជិតគ្រប់ខែទៅហើយ តែគាត់បានសុំស្វាមីទៅជាមួយ ពេលស្វាមីត្រូវចាកចេញពីផ្ទះ ដើម្បីស្វែងរកការងារធ្វើ។ ប៉ុន្តែការសម្រេចធ្វើចំណាកស្រុកចោលកូនប្រុស-ស្រី៥នាក់នៅចាំផ្ទះនេះ មិនទាន់បានប៉ុន្មានថ្ងៃ និងមិនទាន់បានការងារធ្វើផង ស្រាប់តែប្រពន្ធសម្រាលកូនឆ្លងទន្លេនៅក្នុងព្រៃជាប់ព្រំដែនថៃ តែម្តង។
បើតាមអ្នកស្រុកថា ក្រោយពីដឹងរឿងនេះ ត្រូវប្រជាពលរដ្ឋបាននាំគ្នាជួយជ្រោមជ្រែងយ៉ាងខ្លាំង ទាំងការទំនាក់ទំនងហៅគ្រូពេទ្យ ទាំងការជួយឧបត្ថម្ភជាថវិកា ដោយសារតែឃើញគ្រួសារប្ដីប្រពន្ធនេះ ក្រីក្រនិងកំសត់ខ្លាំងពេក។
ប្រជាពលរដ្ឋបញ្ជាក់ថា បន្ទាប់ពីទទួលបានព័ត៌មាននេះ ក្រុមគ្រូពេទ្យបានចុះទៅជួយសង្គ្រោះស្ត្រីខាងលើនេះភ្លាមៗដែរ ហើយបានប្រឹងប្រែងជួយស្ត្រីរងគ្រោះឱ្យរួចផុតពីគ្រោះថ្នាក់។ បើតាមគ្រូពេទ្យថា ស្ត្រីរូបនេះ សម្រាលបានកូនស្រី ដែលមានសុខភាពល្អទាំងម្ដាយទាំងកូន ដែលពេលនេះកំពុងស្ថិតក្រោមការព្យាបាលរបស់គ្រូពេទ្យនៅឡើយ៕
បាល់ទាត់៖យោងតាមសេចក្តីរាយការណ៍មួយបាបឲ្យដឹងថា ក្រុម ទូកក្តោង Everton បានប្រកាសបណ្តេញលោក Roberto Martinez ចេញពីអ្នកចាត់ការទូទៅរបសើក្រុមទូកក្តោង កាលពីយប់មិញនេះ។
គ្រូបង្វឹកសញ្ជាតិអេស្ប៉ាញវ័យ៤២ឆ្នាំរូបនេះ ត្រូវបាន ក្រុមប្រឹក្សារបស់ក្លឹបបានសម្រេចចិត្តបញ្ចប់ទំនាក់ទំនងជាមួយគ្រូបង្វឹក រូបនេះបន្ទាប់ពីរួមរស់ជាមួយគ្នាអស់រយៈពេលបីឆ្នាំ ហើយវីរៈបុរសរបស់ក្លឹប លោក Joe Royle នឹងជាអ្នកដឹកនាំ Everton ដើម្បីលេងជាមួយក្រុម ដែលបានធ្លាក់ទៅក្របខ័ណ្ឌលំដាប់ទីពីរបស់អង់គ្លេស នៅថ្ងៃអាទិត្យនេះគឺ Norwich ប៉ុន្តែដំណើរនៃការស្វែងរកគ្រូបង្វឹកថ្មីកំពុងត្រូវបានចាប់ផ្តើម។
គួរបញ្ជាក់ថា Martinez បានផ្លាស់ចេញពីក្រុម Wigan Athletic មកកាន់ក្រុមទូកក្តោង Everton កាលពីឆ្នាំ២០១៣៕
ប្រេស៊ីល៖ប្រធានាធិបតីប្រេស៊ីល លោកស្រី Dilma Rousseff ត្រូវបានព្រឹទ្ធសភាប្រេស៊ីល បោះឆ្នោតដកហូតតំណែងជាប្រធានាធិបតីកាលពីម្សិលមិញដោយលទ្ធផលនៃការបោះឆ្នោតគឺ ៥៥-២២ សំឡេង ដោយត្រូវបញ្ឈរជើង៦ខែ។ នេះបើយោងតាមរបស់សារព័ត៌មាន BBC។
ក្រោយពីចំណាយពេលអស់ ២០ម៉ោង ព្រឹទ្ធសភាប្រេស៊ីល បានសម្រេចដកហូតតំណែងលោកស្រី Rousseff ពីប្រធានាធិបតី ចំនួន ៦ខែ (១៨០ថ្ងៃ) ចាប់ពីថ្ងៃទី០៥ ខែសីហា ដើម្បីធ្វើការស៊ើបអង្កេតករណីពុករលួយបន្តទៀត ទៅលើបណ្ដឹងចោទប្រកាន់ជាច្រើន ដែលទាក់ទងនឹងរូបលោកស្រី កាលពីឆ្នាំ២០១៤ នៅក្នុងពេលឃោសនាបោះឆ្នោត។
ប្រភពបញ្ជាក់ថា អំឡុងពេលបញ្ឈរជើងលោកស្រី Dilma Rousseff នេះផងដែរ ព្រឹទ្ធសភាប្រេស៊ីល បានតែងតាំងលោក Michel Temer បច្ចុប្បន្នជាអនុប្រធានាធិបតី ឲ្យឡើងកាន់តំណែងជាប្រធានាធិបតីប្រេស៊ីលបណ្ដោះអាសន្ន។
គួរបញ្ជាក់ផងដែរថា លោកស្រី Rousseff ត្រូវបានគេចោទប្រកាន់ថាបានចុះហត្ថលេខាលើឯកសារពាក់ព័ន្ធនឹង ការប្រើប្រាស់ថវិកាជាតិ ដោយគ្មានការ ពិនិត្យនិងទទួលស្គាល់ជាក់លាក់ ហើយក៏មានទាំងការ ពន្យាពេលបង់ថវិកាទៅកាន់ធនាគាររដ្ឋថែមទៀត។ បន្ថែមពីនេះលោកស្រី ក៏ត្រូវបានគេចោទ ប្រកាន់រឿង ភាពមិនច្បាស់លាស់នៃការគ្រប់គ្រង់ហិរញ្ញវត្ថុរបស់រដ្ឋាភិបាលផងដែរ៕
បាល់ទាត់៖តាមេសចក្តីរាយការណ៍មួយបានឲ្យដឹងថា ក្រុមកាំភ្លើងធំ Arsenal នឹងបន្ថែមប្រាក់តម្លៃពលកម្មសម្រាប់ខ្សែប្រយុទ្ធដ៏ឆ្នើម Mesut Ozil ក្នុងមួយសប្តាហ៍ ២០០,០០០ផោន នេះគឹជាតម្លៃមួយដែលថ្លៃក្នុងប្រវត្តិសាស្ត្ររបស់ក្រុម។
ខ្សែប្រយុទ្ធសញ្ជាតិអាល្លឹម៉ង់វ័យ២៧ឆ្នាំរូបនេះ ត្រូវបានគេជឿថានឹងអាចកើននៃប្រាក់ឈ្នួលបន្ថែម ៦០,០០០ទៀត ប្រសិនបើរូបគេបន្តនៅក្នុងក្រុមមួយនេះ។
យោងតាមការចុះផ្សាយរបស់កាសែត Daily Mail បានឲ្យដឹងថា ក្រុមកាំភ្លើធំ Arsenal បន្ថែមប្រាក់ឈ្នួលខ្ពស់បែបនេះគឺដើម្បីកុំឲ្យក្រុមមួយណាចាប់អារម្មណ៍ចង់នាំយកកីឡាកររូបនេះទៅរួមនៅរដួវកាលក្រោយ។
គួរបញ្ជាក់ថា Ozil ស៊ុតបញ្ចូលទីបាន៦ គ្រាប់នឹងបញ្ជូនឲ្យដៃគួស៊ុបញ្ចូលទីបានចំនួន១៨លើក ក្នុងការបង្ហាញ៣៤ប្រកួតក្នុងក្របខ័ណ្ឌ Premier League នៅរដូវកាលនេះ៕
រាជធានីភ្នំពេញ៖កម្លាំងសមត្ថកិច្ចនគរបាលជាតិ កាលពីម្សិលមិញ បានបង្ក្រាបបទល្មើសជួញដូរ រក្សាទុក និងប្រើប្រាស់ ៧ករណី ឃាត់ មនុស្ស ១០នាក់ (ស្រី២នាក់) ក្នុងនោះមុខសញ្ញាជួញដូរ ៨នាក់ និងមុខសញ្ញាប្រើប្រាស់ ២នាក់ និងរឹបអូសគ្រឿងញៀនប្រភេទ មេតំហ្វេតាមីន (ice) ១៨,៩៨ក្រាម និង ២កញ្ចប់តូច កាកូអ៊ីន ១២៧៧ក្រាម។
យោងតាមរបាយការណ៍នគរបាលជាតិ បានឲ្យដឹងថា ទីតាំងបង្ក្រាប ទី១. មន្ទី បង្រា្កប ១ករណី ឃាត់ខ្លួន ២នាក់ (ប្រុស) កាកូអ៊ីន ១២៧៧ក្រាម៤១, ទី២. កណ្ដាល បង្រា្កប ២ករណី ឃាត់ខ្លួន ២នាក់ (ប្រុស), ទី៣. កំពង់ស្ពឺ បង្រា្កប ១ករណី ឃាត់ខ្លួន ១នាក់ (ប្រុស), ទី៤. កំពង់ចាម បង្រា្កប ១ករណី ឃាត់ខ្លួន ២នាក់ (ស្រី១នាក់), មេតំហ្វេតាមីន (ice) ២កញ្ចប់តូច និងទី៥. ត្បូងឃ្មុំ បង្រា្កប ២ករណី -ឃាត់ខ្លួន ៣នាក់ (ស្រី១នាក់) មេតំហ្វេតាមីន (ice) ១៨,៩៨ក្រាម៕
ខេត្តពោធិ៍សាត់៖ប្តីប្រពន្ធមួយគូដែលទើបរៀបការបានជាងមួយឆ្នាំ ត្រូវរន្ទះបាញ់ប្រល័យជីវិតប្តីនៅនឹងកន្លែងកើតហេតុ ចំណែកប្រពន្ធរងរបួសធ្ងន់ គ្រាដែលកំពុងដើរត្រឡប់មកពីផ្លាស់ក្របីវិញ។ ហេតុការណ៍នេះកើតឡើង នៅវេលាម៉ោង៣ និង៣០នាទីរសៀល ថ្ងៃទី១២ ខែឧសភា ឆ្នាំ២០១៦ នៅចំណុចការដ្ឋានទី៧ ភូមិព្រៃឱម៉ាល់ សង្កាត់រលាប ក្រុងពោធិ៍សាត់់ ខេត្តពោធិ៍សាត់។
មេប៉ុស្តិ៍នគរបាលរដ្ឋបាលសង្កាត់រលាបលោកអនុសេនីយ៍ទោ អ៊ុន ហូ បាននិយាយថា ជនរងគ្រោះ ដែលជាប្តី មានឈ្មោះ មឿន សុភ័ក្ត្រ អាយុ២៦ឆ្នាំ ស្លាប់នៅកន្លែងកើតហេតុ និង ប្រពន្ធមានឈ្មោះ មូល ស្រីតូច អាយុ២៣ឆ្នាំ ពួកគេទាំង២នាក់ប្តីប្រពន្ធរស់នៅភូមិព្រៃឱម៉ាល់ សង្កាត់រលាប ក្រុងពោធិ៍សាត់ ខេត្តពោធិ៍សាត់។ លោកបន្តថា មុនពេលកើតហេតុជនរងគ្រោះពីរនាក់ប្តីប្រពន្ធបានទៅកាច់ទំពាំងជាមួយក្មួយស្រី និងភ្លាមនោះមានមេឃស្រទុំរកភ្លៀង លាយឡំដោយសូររន្ទះពេញផ្ទៃមេឃ ក៏នាំគ្នាស្រូតទៅផ្លាស់ក្របីនៅខាងក្រោយផ្ទះ ស្រាប់តែរន្ទះបាញ់ស្លាប់នៅកន្លែងកើតហេតុ រីឯប្រពន្ធរងរបួសធ្ងន់តែម្តង ត្រូវបានគេបញ្ជូនទៅសង្គ្រោះនៅមន្ទីរពេទ្យបង្អែក ខេត្តពោធិ៍សាត់៕
ខេត្តត្បូងឃ្មុំ៖ស្ត្រីវ័យ៤៨ឆ្នាំម្នាក់បានស្លាប់បាត់ជីវិតយ៉ាងអាណោចអាធ័មក្នុងថ្លុកឈាមដោយសារកូនស្រីបង្កើតរបស់ខ្លួនកាប់នឹងកណ្តៀវព្រោះតែខឹងរឿងស្តីបន្ទោសបន្តិចបន្តួច។ ករណីនេះកើតឡើងនៅល្ងាចថ្ងៃទី១២ ខែឧសភា ឆ្នាំ២០១៦ ស្ថិតនៅភូមិសំរោង ឃុំក្រូចឆ្មារ ស្រុកក្រូចឆ្មារ ខេត្តត្បូងឃ្មុំ។
ស្នងការនគរបាលខេត្តត្បូងឃ្មុំ លោកឧត្តមសេនីយ៍ត្រី ម៉ៅ ពៅ បានបញ្ជាក់ថា អំពើឃាតកម្ម កូនស្រីសម្លាប់ម្តាយបង្កើតខ្លួនឯងជនសង្ស័យឈ្មោះ ហេង ម៉ាលី ភេទស្រីអាយុ៣១ឆ្នាំជាតិខ្មែរ (មនុស្សវិកលចរឹក) បានយកកណ្តៀវទៅកាប់ម្តាយបង្កើតរបស់ខ្លួន ឈ្មោះ ហួត អូន អាយុ៤៨ឆ្នាំ ចំកណ្តាលដើមទ្រូង បណ្តាលឲ្យស្លាប់ភ្លាមៗ នៅលើផ្ទះរបស់ខ្លួនតែម្តងដោយសារខឹង ជនរងគ្រោះជាម្តាយស្តីបន្ទោសឲ្យបន្តិបន្តួច៕
រាជធានីភ្នំពេញ៖នៅថ្ងៃទី១២ ខែឧសភា ឆ្នាំ២០១៦ម្សិលមិញនេះ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន៧លើក ក្នុងនោះយប់៥លើក បណ្តាលឲ្យមនុស្សស្លាប់៣នាក់ រងរបួសធ្ងន់៥នាក់និងរបួសស្រាល៣នាក់។ នេះបើតាមការចុះផ្សាយរបស់គេហទំព័រអគ្គស្នងការនគរបាលជាតិ។
ប្រភពព័ត៌មានដដែលបញ្ជាក់ថា នៅក្នុងហេតុការណ៍គ្រោះថ្នាក់ចរាចរណ៍ទាំង៧លើកនេះ បណ្តាលឲ្យខូចខាតយានយន្តសរុបចំនួន១១គ្រឿង រួមមានម៉ូតូចំនួន៦គ្រឿង, រថយន្តធុនតូច២គ្រឿង, រថយន្តធុនធំ២គ្រឿង, យានផ្សេងៗ១គ្រឿង ហើយមូលហេតុដែលបណ្តាល ឲ្យកើតមានករណីគ្រោះថ្នាក់ចរាចរណ៍ រួមមាន ល្មើសល្បឿន២លើក, ស្រវឹង១លើក, ប្រជែង១លើក, មិនប្រកាន់ស្តាំ១លើក ,មិនគោរពសិទ្ធិ១លើក, កត្តាយានយន្ត១លើក ក្នុងនោះមិនពាក់មួកពេលគ្រោះថ្នាក់៧នាក់យប់។ ជាមួយគ្នាលទ្ធផលត្រួតពិនិត្យការអនុវត្តច្បាប់ចរាចរណ៍ផ្លូវគោក មធ្យោបាយល្មើស ៤,៣៥២ គ្រឿង, អប់រំ ១,៩៣២ គ្រឿង, ពិន័យ ២,៤២០ គ្រឿង៕
រាជធានីភ្នំពេញ៖លើទំព័រ Face book របស់លោក ពេជ្រ ស្រស់ ប្រធានគណបក្សយុវជនកម្ពុជា បានឲ្យដឹងថា ប្រធានយុវជន គណបក្សសង្គ្រោះជាតិ ប្រចាំស្រុកដំបែ បានលាលែងមកចូលរួម ជាមួយ គណបក្សយុវជនកម្ពុជាវិញ។
យ៉ាងណាក៏ដោយ លោក ពេជ្រ ស្រស់ មិនបានបញ្ជាក់ថា ការចាក់ចេញរបស់ប្រធានយុវជន CNRP ប្រចាំស្រុកតំបែ ខេត្តកំពង់ចាម នោះ ដោយមូលហេតុអ្វីច្បាស់លាស់នៅឡើយ៕
សិល្បៈ៖បញ្ហាការស្លៀកពាក់របស់នាង ដេនី ខ្វាន់ កាន់តែទទួលបានការរិះគន់ច្រើនឡើងៗ ពីមួយថ្ងៃទៅមួយ មិនថា តែប្រជាពលរដ្ឋធម្មតា សូម្បីតែអ្នកសិល្បះដូចគ្នាក៏ បានរិះគន់នាងផងដែរ ជាក់ស្តែងថ្មីៗនេះ អ្នកនាង ម៉េង កែវពេជ្ជតា បានសរសេរនៅលើគណនីហ្វេសប៊ុករបស់នាង ថាអោយនាង ដេនី ខ្វាន់ ចំៗយ៉ាងចាស់ដៃថា៖ “បើនាងម្នាក់ហ្នឹងមិនបានតាំងខ្លួនជាតារា ឬមិនពាក់ព័ន្ធនឹងសិល្បៈទេ ចង់នាងដើរទៅណាមកណាធ្វើអ្វី ឬថតអ្វីមិនស្លៀកពាក់ខោអាវសោះតែម្តង ក៍គ្មាននណាទៅឆ្កួតខឹងនឹងនាងដែរ ផ្ទុយទៅវិញគឺមានតែអគុណនាងទៅវិញ ដែលនាងចិត្តល្អអោយភ្នែកគ្រប់គ្នា រាប់តាំងពីពូៗម៉ូតូឌុប អ្នកលក់លៀសហាល អ្នកបោសសំរាមផង ក៍អាចមើលរបស់នាង Free Free បាននោះ។
តែសំខាន់ នាងយកឈ្មោះជាតារា ឈ្មោះអ្នកសិល្បះមកលាបដើម្បីទាញការចាប់អារម្មណ៍ និងពង្រីកទីផ្សាររបស់នាងហើយពេលមហាជនទិទៀននាងបែរជានិយាយបែបបន្ទាបបន្ថោកថានាងមិនរស់ដោយសារសិល្បះទៅវិញ។
សំដីក្អេងក្អាង ចំអកដល់ក្រសួងវប្បធម៌ និងជេរបញ្ជោះតបត ដល់អ្នកទិទៀនទាំងបុ៉ន្មានរបស់នាង និងបងប្អូនរបស់នាង គឺវា លើស ពេកហើយ មិនសមណាក្រសួងពាក់ព័ន្ធ ជាពិសេសក្រសួងវប្បធម៌ លោកបិទភ្នែកបិទត្រចៀកទៀតនោះទេ គួរណាស់តែលោកចាត់វិធានការណ៍ ធ្វើការព្រមានចំៗឈ្មោះតែម្តងទៅ មិនដឹងថានៅបិតបាំង លាក់មុខអោយដល់ណាទៀតទេ បើនាងព្រហើនដល់ម្លឹងហើយ ។
ល្មមហើយ ល្មមអាណិតដល់ពួកយើងជាសិល្បះនារីៗដែលខិតខំប្រព្រិទ្ធខ្លួនល្អ ខំតស៊ូដោយសុច្ចរិតទៀងត្រង់ទោះអត់ឃ្លានមានហូបឬគ្មានសម្ភារះទំនើបប្រើប្រាស់ក៍ពួកយើងមិនលក់ឧត្តមគតិដែរដើម្បីរក្សាការពារកិត្តយសជាស្ត្រីខ្មែរ និងសិល្បះ តែបែរជាត្រូវមកស្អុយរលួយឈ្មោះព្រោះតែនាងៗប៉ុន្មាននាក់ហ្នឹងគឺមិនត្រឹមត្រូវ និងមិនយុត្តិធម៌ឡើយ សូមមេត្តាក្រសួងលោកជួយធ្វើចំណាត់ការអោយច្បាស់ផងក្នុងរឿងនេះ ពួកយើងខ្ញុំហត់ហើយ ហត់នឹងធ្វើល្អ ហត់នឹងអំណត់ ហត់នឹងទទួលពាក្យចោទប្រកាន់ ហត់នឹងពន្យល់មហាជនថាមួយណាជាលាមក មួយណាជាផ្កា”៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
