រាជធានីភ្នំពេញ៖តារាសម្ដែង ប៉ែន ចំរ៉ុង និង ភិន សុដាលីស បានចូលខ្លួនមកបំភ្លឺ នៅសាលាដំបូងរាជធានីភ្នំពេញ នៅព្រឹកថ្ងៃទី១២ ខែឧសភា ឆ្នាំ២០១៦នេះ តាមពាក្យបណ្ដឹង របស់ខ្លួនដែលបានប្ដឹងសុំ លែងលះរបស់ពួកគេទាំងពីរ។
លោក ប៉ែន ចំរុង ដែលជាដើមបណ្ដឹងលែងលះនេះ បានប្រាប់ក្រុមអ្នកសារព័ត៌មានបន្ទាប់ពីចេញពីសាលជំនុំជម្រះវិញថា បណ្ដឹងរបស់លោកអត់ទាន់ចេញលទ្ធផលផ្លូវការដូចដែលក្នុងបណ្ដឹងរបស់លោកចង់បាននោះទេ។ លោកបញ្ជាក់ថា គឺតុលាការកំពុងតែសម្រុះសម្រួល…អីចឹងអត់ទាន់មានលទ្ធផលអីទេ។
គួរបញ្ជាក់ថា ប៉ែន ចំរុង បានដាក់ពាក្យសុំលែងលះជាមួយភរិយាអត់ទាន់រៀបការរបស់លោក នាង ភិន សុដាលីស កាលពីថ្ងៃទី ២៩ មេសា។ នៅក្នុងបណ្ដឹងលែងលះនោះ គឺលោកលើកហេតុផលថា មិនអាចរស់នៅចុះសម្រុងនឹងគ្នា៕
ខេត្តបាត់ដំបង៖សមត្ថកិច្ចបានឃាត់ខ្លួនបុរសម្នាក់ក្រោមការអនុវត្តន៍ដីកាបង្គាប់ចាប់ខ្លួនលើករណីប្លន់នៅក្នុងភូមិអញ្ចាញ សង្កាត់អូរចាកាលពីឆ្នាំ២០០៧។ ក្រុមនគរបាលនៃស្នងការខេត្តបាត់ដំបងបានអោយដឹងថា ប្រតិបត្តិការឃាត់ខ្លួនជនបង្ករក្នុងអំពើប្លន់នេះធ្វើឡើងនៅថ្ងៃទី១១ ខែឧសភា ឆ្នាំ២០១៦ នៅចំណុចភូមិអញ្ចាញ សង្កាត់អូរចា ក្រុងបាត់ដំបង ខេត្តបាត់ដំបងក្រោមការបង្គាប់អោយចាប់ខ្លួនរបស់ចៅក្រមស៊ើបសួរនៃសាលាដំបូងខេត្ត។
ជនល្មើសមានឈ្មោះនូវ ផានិត ហៅ វិត ភេទប្រុស អាយុ២០ឆ្នាំ មុខរបរមិនពិតប្រាកដមានទៅលំនៅក្នុងភូមិអញ្ចាញ សង្កាត់អូរចា ក្រុងបាត់ដំបង ខេត្តបាត់ដំបង ដែលបានប្រព្រឹត្តអំពើប្លន់កាលពីថ្ងៃទី១២ ខែឧសភា ឆ្នាំ២០០៧កន្លងមក។ បច្ចុប្បន្នជនល្មើសត្រូវបានកម្លាំងនគរបាលជំនាញរៀបចំសំណុំរឿងបញ្ជូនទៅកាន់តុលាកាដើម្បីចាត់ការបន្ដរតាមនីតិរវិធី៕
បាល់ទាត់៖អ្នកចាំទី Gianluigi Buffon បានបន្តកុងត្រាថ្មីបន្ថែមទៀជាមួយក្រុមសេះបង្កង់ Juventus ដែលកុងត្រានេះនិងមានសពុលភាពរហូតដល់ឆ្នាំ ២០១៨។
អ្នកចាំទីសញ្ជាតិអ៊ីតាលីវ័យ៣៨ឆ្នាំរូបនេះ បានចូលរួមជាមួយ Juventus កាលពីឆ្នាំ ២០០១ ក្នុងតម្លៃកំណត់ត្រាពិភពលោក ៥១.៦៤៥.៦៩០ យូរ៉ូពីក្លឹប Parma និងបន្ទាប់មកគាត់បានក្លាយជាវីរៈបុរសប្រចាំក្លឹបតែម្តង ដោយបង្ហាញខ្លួនជិត ៦០០ ដងនិងឈ្នះពានលីកកំពូលចំនួន ៧។ ស្របពេលនេះដែរ គាត់បានបង្ហាញខ្លួនចំនួន ១៥២ លើកឱ្យជម្រើសជាតិអ៊ីតាលីនិងបានលើកពាន World Cup កាលពីឆ្នាំ ២០០៦។
គួរបញ្ជាក់ថា អតីតអ្នកចាំទី Parma រូបនេះនៅតែរក្សាតំណែងអ្នកចាំទីដៃទីមួយរបស់ខ្លួន។ Buffon បានប្រាប់ថា “បើទោះជាស្ថិតនៅអាយុនេះក្តី ខ្ញុំនៅតែអាចពង្រឹងសមត្ថភាពដដែល ហើយទីនេះគឺជាកន្លែងពិសេសបំផុតសម្រាប់ខ្ញុំ”៕
រាជធានីភ្នំពេញ៖ជនជាតិវៀតណាមចំនួន១៨នាក់ ក្នុងនោះស្រី១២នាក់ ស្នាក់នៅ និងធ្វើការគ្មានលិខិតស្នាមត្រឹមត្រូវ ត្រូវបានកម្លាំងនគរបាល អគ្គនាយកដ្ឋានអន្តោប្រវេសន៍ នៃក្រសួងមហាផ្ទៃឃាត់ខ្លួនគ្រាដែលចុះបង្ក្រាបទីតាំងហាងកាហ្វេចំនួន២កន្លែង នៅតាមបណ្តោយផ្លូវ៣៣៦ និង២២៣ ស្ថិតក្នុងសង្កាត់ផ្សារដើមគរ ខណ្ឌទួលគោកកាលពីរសៀលម្សិលមិញ។
ប្រធាននាយកដ្ឋានអន្តោប្រវេសន៍ លោកឧត្តមសេនីយ៍ទោ អ៊ុក ហៃសីឡា បានបញ្ជាក់ថា ពួកគេទាំងនេះ កំពុងតែបម្រើការងារ នៅហាងកាហ្វេ «ហ្វីនសៃហ្គន» តែគ្មានលិខិតស្នាមនោះទេ។ ក្រោយការត្រួតពិនិត្យរួចមក ពួកគេទាំង១៨នាក់ ត្រូវបាននាំខ្លួនទៅសួរនាំបន្តទៀត នៅនាយកដ្ឋានដើម្បីបន្តការសួរនាំ និងចាត់ការតាមនីតិវិធី៕
រាជធានីភ្នំពេញ៖ជនសង្ស័យពាក់ព័ន្ធគ្រឿងញៀនចំនួន១៩នាក់ត្រូវបានកម្លាំងអាវុធហត្ថជំនាញរាជធានីភ្នំពេញ និងកម្លាំងអាវុធហត្ថខណ្ឌទួលគោក ខណ្ឌដូនពេញ សហការជាមួយកម្លាំងគណៈបញ្ជាការឯកភាពខណ្ឌដូនពេញឃាត់ខ្លួន។ ការឃាត់នេះធ្វើឡើងនៅព្រឹកថ្ងៃទី១២ ខែឧសភា ឆ្នាំ២០១៦នេះគ្រាដែលចុះបង្ក្រាបករណីជួញដូរ និងចែកចាយគ្រឿងញៀន នៅផ្ទះសំណាក់ យីហោ «O’ Yes» ស្ថិតនៅផ្ទះលេខលេខ១៧ ក្រុម២០ ភូមិ២ ផ្លូវ១៣២ សង្កាត់ស្រះចក ខណ្ឌដូនពេញ។
ក្រោម បានបើកប្រតិបត្តិការ មន្ត្រីអាវុធហត្ថបានប្រាប់ថា សម្រាប់ប្រតិបត្តិការ បង្ក្រាបករណីជួញដូរ និងប្រើប្រាស់គ្រឿងញៀនយ៉ាងអនាធិបតេយ្យខាងលើនេះស្ថិតក្រោមការសម្របសម្រួលពីតំណាងអយ្យការ។ ប្រភពបន្តថា ក្នុងប្រតិបត្តិការនេះកម្លាំងសមត្ថកិច្ចបានចាប់ខ្លួនជនសង្ស័យចំនួន១៩នាក់ មានស្រី៦នាក់ ដែលជាក្រុមយុវជន នាំគ្នាទៅសម្ងំជក់គ្រឿងញៀនក្នុងផ្ទះសំណាក់ខាងលើ។ ក្រៅពីការចាប់ខ្លួនជនសង្ស័យនោះ កម្លាំងអាវុធហត្ថ ក៏បានដកហូតថ្នាំញៀនមួយចំនួនធំ ហើយសមម្ភារសម្រាប់ជក់ និងប្រើប្រាស់ជាច្រើនផងដែរ។ ជាមួយគ្នានោះសម្រាប់ទីតាំផ្ទះសំណាក់ខាងលើ មិនមានអាជ្ញាប័ណ្ណមន្ទីទេសចរណ៍នោះឡើយ ហេតុដូច្នេះហើយ ព្រះរាជអាជ្ញាបានបញ្ជាឲ្យបិទតែម្តង៕
រាជធានីភ្នំពេញ៖យោងតាមរបាយការណ៍នាយកដ្ឋាននគរបាលចរាចរណ៍បានឲ្យដឹងថា នៅថ្ងៃទី១១ ខែឧសភា ឆ្នាំ២០១៦ម្សិលមិញនេះមានករណី គ្រោះថ្នាក់ចរាចរណ៍ នៅទូទាំងប្រទេស កើតឡើងចំនួន ៨លើក ក្នុងនោះយប់ ២លើក បណ្តាលឲ្យមនុស្សស្លាប់ ៦នាក់ រងរបួសធ្ងន់ ១២នាក់ (ស្រី៣នាក់) និងរបួសស្រាល ៣នាក់ (ស្រី១នាក់) ។
ប្រភពដដែលបន្តថា ក្នុងគ្រោះថ្នាក់ចរាចរណ៍ទាំង៨លើកនេះ បណ្តាលឲ្យខូចខាតយានយន្ត សរុប ចំនួន ១៤គ្រឿង រួមមាន ម៉ូតូចំនួន ៧គ្រឿង, រថយន្តធុនតូច ៥គ្រឿង, រថយន្តធុនធំ ១គ្រឿង, យានផ្សេងៗ ១គ្រឿង ។ ប្រភពខាងលើបញ្ជាក់ថា មូលហេតុ ដែលបណ្តាលឲ្យកើតមានករណីគ្រោះថ្នាក់ចរាចរណ៍ រួមមាន ល្មើសល្បឿន ៤លើក (ស្លាប់ ៣នាក់) , មិនប្រកាន់ស្តាំ ៣លើក (ស្លាប់ ៣នាក់) ,មិនគោរពសិទ្ធិ១លើក ក្នុងនោះមិនពាក់មួកពេលគ្រោះថ្នាក់៧នាក់យប់៤នាក់។
ជាមួយគ្នានោះលទ្ធផលត្រួតពិនិត្យការអនុវត្តច្បាប់ ចរាចរណ៍ផ្លូវគោក មធ្យោបាយល្មើស ៥.៤៦៩ គ្រឿង, អប់រំ ២.២២១ គ្រឿង, ពិន័យ ៣.២៤៨ គ្រឿង ៕
ខេត្តកំពង់ស្ពឺ៖ស្ត្រីវ័យចំណាស់ពិការជើងម្នាក់បានស្លាប់ក្នុងភ្លក់ភ្លើងយ៉ាងអាណោចអាធ័ម ដោយសាររន្ទះបាញ់ចំផ្ទះរបស់គាត់បណ្តាលឱ្យឆេះខ្ទេចគ្មានសល់។ ហេតុការណ៍នេះកើតឡើងនៅល្ងាចថ្ងៃទី១១ ខែឧសភា ឆ្នាំ២០១៦ ស្ថិតក្នុងភូមិឫស្សី ឃុំជាំសង្កែ ស្រុកភ្នំស្រួច ខេត្តកំពង់ស្ពឺ។
អធិការនគរបាលស្រុកភ្នំស្រួច លោកវរសេនីយ៍ទោសាយ ប៊ុនថន បានប្រាប់អ្នកសារព័ត៌មានថា ស្ត្រីរងគ្រោះដែលស្លាប់ ឈ្មោះ មែង ឡុង អាយុ៦៩ឆ្នាំ ភេទស្រី នៅភូមិ ព្រៃឫស្សី ឃុំជាំសង្កែ បណ្តាលឲ្យស្លាប់ និងឆេះផ្ទះអស់១ខ្នង ទំហំ៤ម៉ែត្រគុណ៥ម៉ែត្រ ធ្វើអំពីឈើ ប្រក់សង្ក័សី ជញ្ជាំងបាំងស្បូវ។ លោកបន្តថា ពេលកំពុងភ្លៀងធ្លាក់មានផ្លេកបន្ទោលពេលនោះជនរងគ្រោះ នៅក្នុងផ្ទះស្រាប់មានរន្ទះបាញ់ចំផ្ទះរបស់គាត់បណ្តាលឱ្យយ៉ាងសន្ធោសន្ធៅ បណ្តាលឲ្យគាត់ត្រូវភ្លើងឆេះស្លាប់ ក្នុងភ្នក់ភ្លើងយ៉ាងវេទនាជាទីបំផុត។ បច្ចុប្បន្នសាកសពត្រូវបានក្រុមគ្រួសារ រៀបចំធ្វើបុណ្យតាមប្រពៃណី៕
រាជធានីភ្នំពេញ៖នៅព្រឹកថ្ងៃទី១២ ខែឧសភា ឆ្នាំ២០១៦នេះ លោក អ៊ូ វីរៈ ប្រធានវេទិកាអនាគ ចូលបំភ្លឺ នៅសាលាដំបូងរាជធានីភ្នំពេញ ជុំវិញបណ្តឹងបរិហារកេរ្តិ៍របស់គណបក្សប្រជាជនកម្ពុជា តាមដីកាកោះហៅដែលចេញដោយលោក សៀង សុខ ព្រះរាជអាជ្ញារង អមសាលាដំបូងរាជធានីភ្នំពេញ។
កាលពីថ្ងៃទី២៥ ខែមេសា ឆ្នាំ២០១៦ គណបក្សប្រជាជនកម្ពុជា តំណាងដោយលោក សុខ ឥសាន បានដាក់ពាក្យប្តឹង លោក អ៊ូ វីរៈ ប្រធានវេទិកា អនាគត ទៅសាលាដំបូងរាជធានីភ្នំពេញ ពីបទបរិហារកេរ្តិ៍ជាសាធារណៈ។ ជាមួយគ្នានេះគណបក្សដ៏ធំជាងគេនៅកម្ពុជា បានទាមទារសំណង ដែលធ្វើប៉ះពាល់ដល់គណបក្ស ចំនួន៤០០លានរៀល។
គួរបញ្ជាក់ថា ការដាក់ពាក្យប្តឹងនេះ បានធ្វើឡើងបន្ទាប់ លោក អ៊ូ វីរៈ បានលើកឡើងតាមរយៈ វិទ្យុអាស៊ីសេរី កាលពីថ្ងៃទី២៤ ខែមេសា ឆ្នាំ២០២១៦ ដោយចោទគណបក្សប្រជាជនថា ជាអ្នកនៅពីក្រោយនៃដំណើររឿង លោក កឹម សុខា និងកញ្ញា ខុម ចាន់តារ៉ាទី៕
រាជធានីភ្នំពេញ៖ជនសង្ស័យត្រូវបានប្រជាពលរដ្ឋចាប់វាយស្ទើរក្ស័យ បន្ទាប់ពីធ្វើសកម្មភាពឆក់កាបូបពីនារីម្នាក់បានសំរេច តែរត់មិនរួច។ ករណីនេះកើតឡើងកាលពីម៉ោង៨ និង០០នាទីយប់ថ្ងៃទី១១ ខែឧសភា ឆ្នាំ២០១៦នេះ នៅខាងក្រោយមន្ទីរពេទ្យលោកសង្ឃ ស្ថិតក្នុងសង្កាត់ទឹកល្អក់ទី២ ខណ្ឌទួលគោក។
តាមប្រភពព័ត៌មានបានឲ្យដឹងថា នៅម៉ោងកើតហេតុខាងលើ គឺមាននារីម្នាក់ជាជនរងគ្រោះជិះម៉ូតូមួយគ្រឿង តាមណ្តោយផ្លូវកម្ពុជាក្រោម លុះជិះមកដល់មុខមន្ទីរពេទ្យអង្គរធំ ក៏មានជនល្មើស២នាក់ជិះម៉ូតូមួយគ្រឿងមកតាមក្រោយ ស្រាប់តែជិះមកក្បែរនាងជនសង្ស័យទាំង២រូបនោះ បានធ្វើសកម្មភាពឆក់កាបូបស្ពាយបានតែម្តង បន្ទាប់ពីឆក់បានហើយនារីរងគ្រោះស្រែកថា ចោរៗ ក៏បានអ្នកដំណើរក្បែរនោះជួយជិះម៉ូតូដេញតាមពីក្រោយ ជនសង្ស័យទាំង២នាក់នោះ រហូតមកដល់ក្រោយមន្ទីរពេទ្យលោកសង្ឃ ដោយជនសង្ស័យជាអ្នកឌុបមានការភិតភ័យ បានទម្លាក់ជនសង្ស័យម្នាក់ រួមជាមួយកាបូបដៃរបស់នារីរងគ្រោះផងដែរ រួចជិះគេចខ្លួនបាត់។
ដោយឡែក ជនសង្ស័យដែលធ្លាក់នោះត្រូវបានប្រជាពលរដ្ឋ រាប់សិបនាក់ ព្រួតវាយស្ទើរស្លាប់ តែសំណាងល្អត្រូវបានសមត្ថកិច្ច ខណ្ឌទួលគោក មកទាន់កុំអីជនសង្ស័យរូបនោះត្រូវប្រជាពលរដ្ឋ វាយស្លាប់បាត់ទៅហើយ។ បន្ទាប់មកជនសង្ស័យត្រូវបានសមត្ថកិច្ចខណ្ឌទួលគោកយកចេញពីកន្លែងកើតហេតុទៅសួរនាំនៅប៉ុស្តិដើម្បីបញ្ជៀសកុំអោយប្រជាពលរដ្ឋវាយ តទៅទៀត៕
ខេត្តបន្ទាយមានជ័យ៖ពលករខ្មែរប្រុសស្រីចំនួន៨១នាក់ដែលបានលួចឆ្លងដែនខុសច្បាប់តាមច្រកររបៀង ដឹកនាំដោយមេខ្យល់ ដើម្បីទៅរកការងារធ្វើនៅប្រទេសថៃ តែត្រូវបានសមត្ថកិច្ចថៃឃាត់ខ្លួន និងបានបញ្ជូនមកកម្ពុជាវិញចំនួន៣០នាក់ហើយ ពីព្រោះតែគ្មានឯកសារធ្វើការនៅទីនោះ។
លោក ប៊ុន សុខវិបុល កុងស៊ុលកម្ពុជា ប្រចាំខេត្តស្រះកែវប្រទេសថៃ បានឲ្យភ្នាក់ងារយកព័ត៌មានដឹងកាលពីយប់ថ្ងៃទី១១ ខែឧសភា ថាក្រោយពីមន្ត្រីយើងបានទទួលព័ត៌មានថា សមត្ថកិច្ចថៃធ្វើការឃាត់ខ្លួនពលករខ្មែរ ប្រុសស្រីចំនួន៨១នាក់ ខណៈដែលពួកគេលួចឆ្លងដែនខុសច្បាប់ ចូលមកដីថៃតាមច្រករបៀង ក្នុងភូមិសាស្ត្រខេត្តបន្ទាយមានជ័យ ទៅ ក្នុងស្រុកខ្លងហាត ខេត្តស្រះកែវ ប្រទេសថៃ យើងបានចុះទៅសួរនាំ ដើម្បីជួយអន្តរាគមន៍។
លោកបានបន្តថា ក្នុងចំណោមពលករទាំងអស់នោះ គឺមានពលករខ្លះ មានឯកសារស្នាក់នៅ ចំណែកពលករប្រុសស្រី៣០នាក់ ពុំមានឯកសារ ទើបគេបញ្ជូនមកកម្ពុជាវិញហើយ រីឯពលករខ្មែរនៅសល់ទៅធ្វើការងារ នៅក្នុងទឹកដីធម្មតាវិញដែរ។
តែទោះបីជាយ៉ាងណា គ្មានការអះអាងពីសមត្ថកិច្ច ខេត្តបន្ទាយមានជ័យ ថាតើពួកគេមកពីស្រុកណាឡើយ៕
ខេត្តបន្ទាយមានជ័យ៖បុរសម្នាក់ត្រូវជនមិនស្គាល់មុខកាប់មួយកំបិតហូរឈាមស្រោចពេញខ្លួនដ៏គួរអោយរន្ធត់នេះបង្កការភ្នាក់ផ្អើលទាំងយប់ ហេតុការណ៍នេះកើតឡើងនៅវេលាម៉ោង១០និង០០នាទីយប់ថ្ងៃទី ១១ ខែ ឧសភាឆ្នាំ២០១៦ ស្ថិតនៅ ភូមិបាលិលេយ្យ១ សង្កាត់/ក្រុងប៉ោយប៉ែត។
តាមប្រភពបានប្រាប់ថា មុនពេលកើតហេតុគេឃើញជនរងគ្រោះ ឈ្មោះនិក ភឿន ភេទប្រុស អាយុ៣៣ឆ្នាំ ជាជនអនាថា ដើរនៅម្តុំកើតហេតុខាងលើ ស្រាប់តែមានជនមិនស្គាល់មុខមួយក្រុមមានគ្នា២ទៅ៣នាក់កាប់ ជនរងគ្រោះមួយកំបិតចំលើសៀតផ្កា ដេរចំនួន៣ថ្នេរ ហូរឈាមស្រោចពេញខ្លួនហើយក៏រត់គេចខ្លួនបាត់ស្រមោល។
ក្រោយពេលកើតហេតុត្រូវបានប្រជាពលរដ្ឋរុំរបួសឃាត់ឈាមនិងសមត្ថកិច្ចជួយធ្វើអន្តរាគមន៍ខោលហៅរថយន្តសង្គ្រោះដឹកបញ្ជូនទៅកាន់មន្ទីពេទ្យបង្អែកប៉ោយប៉ែតII(ពេទ្យបង្អែកដីថ្មី)ដើម្បីព្យាបាល៕
ហ្វីលីនពីន៖យោងតាមការប្រកាសលទ្ធផលនៃការបោះឆ្នោតកាលពីថ្ងៃអង្គារម្សិលមិញនេះបានឲ្យដឹថា កំពូលអ្នកប្រដាល់ហ្វីលីពីន Manny Pacquiao បានឈ្នះកៅអីមួយក្នុងព្រឹទ្ធសភា ជាន់ខ្ពស់ដែលធ្វើឲ្យរូបគេបោះជំហានកាន់តែកៀកឆ្ពោះទៅកាន់ការសម្រេចក្តីសុបិនរបស់គេក្នុងការក្លាយជាប្រធានាធិបតីហ្វីលីពីន។
អ្នកប្រដាល់វ័យ៣៧ឆ្នាំរូបនេះ ការពីមុនគឺជាក្មេងតាមដងវិថីហើយបានក្លាយជាអ្នកប្រដាល់ដ៏ឆ្នើមរបស់ប្រទេសហ្វីលីពីនហើយកីឡារូបនេះបានចូលនិវត្តន៍ពីអ្នកប្រដាល់កាលពីខែមុនដើម្បីប្រលូកក្នុងឆាក់នយោបាយពេញលេញ ។
គួរបញ្ជាក់ថា សំឡេងឆ្នោតប្រមាណជា ៩១ ភាគរយត្រូវបានរាប់ហើយកាលពីថ្ងៃចន្ទ គឺមានន័យថា អ្នកប្រដាល់ Pacquiao ទទួលសំឡេងឆ្នោត ១៤,៩៤ លានសំឡេង ដែលគ្រប់គ្រាន់ក្នុងការទទួលតួនាទីក្នុងព្រឹទ្ធសភា៕
ខេត្តបាត់ដំបង៖សមត្ថកិច្ចមូលដ្ឋានបានអោយថា ករណីគ្រោះថ្នាក់ចរាចរណ៍បណ្តាលអោយស្លាប់បុរសម្នាក់ បានកើតឡើងនៅវេលាម៉ោង១ និង៣០រសៀលថ្ងៃទី១០ ខែឧសភា នៅលើកំណាត់ផ្លូវជាតិលេខ៥ ក្នុងក្រុមទី៣ ភូមិប៉ោយយង់ ឃុំតាពូង ស្រុកថ្មគោល ខេត្តបាត់ដំបង។
ហេតុការណ៍នេះកើតឡើងស្របគ្នាដែលរថយន្តក្រុងបើកបរក្នុងទិសដៅពីគ្បូងឆ្ពោះទៅកាន់ទិសខាងជើងក៏ពើបប្រទះជាមួយនិងម៉ូតូកំពុងឆ្លងផ្លូវពីកើតទៅលិចបណ្តាលអោយបុកស្លាប់ភ្លាមៗតែម្តង។
ជនរងគ្រោះភាគីម៉ូតូឈ្មោះ នូ លឿម ភេទប្រុស អាយុ៧៤ឆ្នាំរសស់នៅភូមិ ឃុំកន្លែងកើតហេតុ រីឯអ្នកបើកបររថយន្តក្រោយពេលកើតហេតុគេចខ្លួនបាត់។ករណីខាងលើរវាងរថយន្តក្រុង ម៉ាកហីយ៉ាន់ដាយ ពណ៌ផ្កាឈូក ពាក់ស្លាកលេខភ្នំពេញ ៣c -៧៩៤៨ ចំពោះម៉ូតូហុងដាដ្រីម ស៊េរី២០០៩ពាក់ស្លាកលេខ១E-៣៨៧៥បើកបរដោយជនរងគ្រោះស្លាប់៕ ប៉ែនសុផល
រាជធានីភ្នំពេញ៖លោក William A. Heidt អគ្គរដ្ឋទូតសហរដ្ឋអាមេរិក ប្រចាំនៅកម្ពុជា បានប្រាប់រដ្ឋមន្ត្រីក្រសួងការបរទេសកម្ពុជាថា សហរដ្ឋអាមេរិក ពុំមានការពាក់ព័ន្ធទៅនឹងគម្រោងធ្វើបដិវត្តន៍ពណ៌ នៅក្នុងប្រទេសកម្ពុជានោះទេ។ នេះបើតាមការថ្លែងពីអ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក ជុំ សុន្ទរី នៅព្រឹកថ្ងៃទី១១ ខែឧសភា ឆ្នាំ២០១៦នេះ ក្រោយបញ្ចប់ជំនួបរវាង លោក William A. Heidt អគ្គរដ្ឋទូតសហរដ្ឋអាមេរិក ប្រចាំនៅកម្ពុជា ជាមួយ លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការកម្ពុជា នៅទីស្តីការក្រសួងការបរទេស នៅព្រឹកមិញនេះ។
លោក ជុំ សុន្ទរី បានបញ្ជាក់ថា លោកអគ្គរដ្ឋទូតអាមេរិក បានអះអាងនៅចំពោះមុខលោកទេសរដ្ឋមន្ត្រី ប្រាក់ សុខុន ថាសហរដ្ឋអាមេរិកបានយល់យ៉ាងច្បាស់ថា អ្វីខ្លះដែលខ្លួនគួរធ្វើ អ្វីខ្លះដែលខ្លួនមិនគួរធ្វើ។
គួរបញ្ជាក់ថា នាថ្មីៗនេះ សារព័ត៌មានមួយចំនួន បានផ្សព្វផ្សាយអំពីទស្សនៈមួយ ដែលបានលើកឡើងថា យុទ្ធនាការស្លៀកពាក់ដែលបង្កើតឡើង ដោយក្រុមអង្គការសង្គមស៊ីវិល និងសកម្មជនដីធ្លីមួយចំនួន ដើម្បីឱ្យដោះលែង មន្ត្រីអាដហុក៤រូប និងអគ្គលេខាធិការរង គ.ជ.ប នោះ បានធ្វើឡើងបន្ទាប់ពីពួកគេ បានជួបជាមួយអគ្គរដ្ឋទូតអាមេរិក។ ទស្សនៈមួយចំនួនបានយល់ថា គម្រោងធ្វើយុទ្ធនាការ ថ្ងៃចន្ទពណ៌ខ្មៅ កាលពីថ្ងៃចន្ទនោះ ទំនងជាមានការជំរុញដោយស្ថានទូតអាមេរិក៕
ភ្នំពេញ៖កាលពីព្រឹកថ្ងៃទី១១ ខែឧសភា ឆ្នាំ២០១៦ នេះសាលាខណ្ឌខណ្ឌមានជ័យដែលដឹកនាំ ដោយលោក ពេជ្រ កែវមុន្នី អភិបាលនៃគណៈអភិបាលខណ្ឌ បានធ្វើពិធីវាយកំទ្ទេចទូហ្គេមប្រភេទទូហ្គេមបាញ់ត្រីចំនួន៨ទូដែលគណៈបញ្ជាការចុះប្រតិបត្តិការបង្ក្រាបកន្លងមកនេះ។
លោក ពេជ្រ កែវមុន្នី អភិបាលខណ្ឌមានជ័យបានមានប្រសាសន៍ថា ដើម្បីលុបបំបាត់ល្បែងស៊ីសងក្នុងមូលដ្ឋានស្របតាមគោលនយោបាយភូមិ-សង្កាត់មានសុវត្ថិភាព និងដើម្បីរក្សាសន្ដិសុខ សណ្ដាប់ធ្នាប់ឱ្យបានល្អផងដែរនោះ សាលាខណ្ឌមានជយ័បានវាយកម្ទេចទូហ្គេមប្រភេទល្បែងស៊ីសងប្រភេទហ្គេមបាញ់ត្រីចំនួន៨ទូ ដែលគ្មានច្បាប់អនុញ្ញាត ត្រូវបានវាយកម្ទេច ។
លោក ពេជ្រ កែវមុន្នី អភិបាលខណ្ឌមានជ័យបានមានប្រសាសន៍បន្តថា ទូហេ្គមទាំង៨ទូនេះ ត្រូវបានរឹបអូសពីកន្លែងធើ្វអាជីវកម្មខុសច្បាប់ជាច្រើនកន្លែងនៅក្នុងខណ្ឌមានជ័យ ខណៈដែលពួកគេលួចបើកលេងទាំងយប់ទាំងថ្ងៃ ដោយពុំមានសុំការអនុញ្ញាតពីអាជ្ញាធរដែនដីនោះឡើយ។
គួររំលឹកផងដែរទូហេ្គមទាំងនេះគឺជាប្រភេទហេ្គមល្បែងស៊ីសងដែលធើ្វបង្វក់សិស្សានុសិស្ស និងយុវវ័យមួយចំនួនលះបង់ការសិក្សាចូលទៅលេងហេ្គម ទាំងនោះដែរបំផ្លាញលុយ ឬទ្រព្យសម្បត្ដិរបស់អាណាព្យាបាល ។
លើសពីនេះទៀតវាបានធើ្វឱ្យមានផលប៉ះពាល់ដល់សណ្ដាប់ធ្នាប់សន្ដិសុខសងង្គមតាមរយៈលេងហេ្គមចាញ់អស់លុយ ធើ្វឱ្យសិស្សានុសិស្ស ឬយុវវ័យទាំងនោះអាចប្រព្រឹត្ដ អំពើដូចជា លួច ឆក់ ប្លន់ ដែរបង្កអសន្ដិសុខសង្គមជាដើម៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
