All posts by មេគង្គ ប៉ុស្តិ៍

ទទួលទានទឹកការ៉ុតរាល់ថ្ងៃជួយឲ្យស្បែកមានសុខភាពល្អ

February 22, 2016សុខភាពមេគង្គ ប៉ុស្តិ៍

ការ៉ុតគឺជាបន្លែម្យ៉ាងដែលសម្បូរទៅដោយវីតាមីន A និងសារជាតិប្រឆាំងអុកស៊ីតកម្ម។ យើងទាំងអស់គ្នាបានដឹងហើយថា ការ៉ុតមានគុណប្រយោជន៍សម្រាប់ភ្នែក, ការរំលាយអាហារ, ស្បែក និងធ្មេញ។ ជាការពិតណាស់ការ៉ុតត្រូវគេបានយកទៅព្យាបាលជំងឺមួយចំនួនផងដែរ។

1 . កាត់បន្ថយស្លាកស្នាម
ប្រសិនបើអ្នកចង់កម្ចាត់ស្លាកស្នាម និងចង់ឲ្យស្បែកមានសុខភាពល្អ សូមផឹកទឹកការ៉ុតជារៀងរាល់។ ទន្ទឹមនឹងនេះ អ្នកអាចចិតយកសាច់ការ៉ុតមកបិតលើស្លាកស្នាមក៏អាចជួយកាត់បន្ថយស្នាមនៅលើរាងកាយផងដែរ។
2. ជួយឲ្យស្បែកមានការលូតលាស់
អ្នកអាចរក្សាស្បែករបស់អ្នកឲ្យមានសុខភាពល្អ និងមានភាពទន់ល្មើយដោយសារការផឹកទឹកការ៉ុតជាប្រចាំ។ សារធាតុប្រឆាំងអុកស៊ីតកម្ម និងវីតាមីន C នៅក្នុងការ៉ុតអាចជំនួសដល់ស្បែកឲ្យមានសុខភាពល្អ។ អ្នកក៏អាចប្រើប្រាស់ការ៉ុតធ្វើជាម៉ាសបិតលើផ្ទៃមុខក៏បាន។ ចំពោះការសូតលាស់នៃស្បែក អ្នកអាចព្យាយាមលាយការ៉ុតជាមួយនឹងទឹកឃ្មុំមកបិទលើផ្ទៃមុខ។ ការប្រើប្រាស់ការ៉ុតដើម្បីធ្វើសំយោគនៃស្បែក មានភាពល្អប្រសើរជាងប្រើប្រាស់គ្រឿងសំអាង។
3. អត្ថប្រយោជន៍នៃការប្រឆាំង
វីតាមីន C ដែលមានវត្តមាននៅក្នុងការ៉ុតដើរតួនាទីយ៉ាងសំខាន់ក្នុងការផលិត collagen (សសៃទឹកប្រូតេអ៊ីន) នៅក្នុងរាងកាយ។ តួនាទីដ៏សំខាន់នៃ collagen គឺអាចរក្សាភាពបត់បែននៃស្បែករបស់អ្នក។ ដូចគ្នានេះផងដែរលក្ខណៈសម្បត្តិប្រឆាំងអុកស៊ីតកម្មអាចជួយក្នុងការផ្លាស់ប្តូរពណ៌នៃស្បែក និងស្នាមជ្រីវជ្រួញនៅលើស្បែក។
4. ការពារពីពន្លឺព្រះអាទិត្យ
រឿងដ៏ល្អគឺការទទួលទានទឹកការ៉ុតក្នុងអំឡុងរដូវក្តៅ ព្រោះវាអាចជួយឲ្យស្បែករបស់អ្នកការពារពីកាំរស្មីព្រះអាទិត្យ។ ដូច្នេះអ្នកពឹងផ្អែកលើទឹកការ៉ុតដើម្បីការពារពន្លឺព្រះអាទិត្យ ដោយមិនចាំបាច់ប្រើឡេជំនួសក៏បាន។
5. ព្យាបាលបញ្ហានៅលើស្បែក
ការ៉ុតដើរតួនាទីយ៉ាងសំខាន់ក្នុងការព្យាបាលបញ្ហាជាច្រើននៅលើស្បែក។ ប្រសិនបើអ្នកមានបញ្ហាដូចជា រលាកស្បែក, កន្ទួល, កើតមុនអាចធ្វើការព្យាបាលបានដោយប្រើការ៉ុត។ ជាការពិតណាស់ឥទ្ធិពលនៃទឹកការ៉ុតអាចជួយលើកកម្ពស់ស្បែករបស់អ្នកមានសុខភាពល្អ៕

អ្នកស្លាប់កើនដល់១៤២នាក់ករណីបំផ្ទុះគ្រាប់បែកអត្តឃាតនៅស៊ីរី

February 22, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ស៊ីរី៖រហូតមកដល់ពេលនេះការបំផ្ទុះគ្រាប់បែកជាបន្ដបន្ទាប់កាលពីម្សិលមិញនៅជ្រាយក្រុងដាណឺម៉ាកនិងនៅទីក្រុងហូមប្រទេសស៊ីរីចំនួនអ្នកស្លាប់កើនដល់១៤២នាក់ហើយ ខណៈដែលក្រុមឧទ្ទាមសកម្មប្រយុទ្ធ ឥស្លាមនិយមបាន អះអាងថា ខ្លួនពិតជាបាន វាយប្រហារប្រាកដមែន។

យោងតាមទីភ្នាក់ងារសារព័ត៌មាន ក្យូដូជប៉ុន ចេញផ្សាយថ្ងៃទី២២ ខែកុម្ភៈ ឆ្នាំ២០១៦ នេះដោយដកស្រង់ប្រភពពីសារ ព័ត៌មាន ស៊ីរីអារ៉ាប់ បន្ដទៀតថា យ៉ាងហោចណាស់ មនុស្សចំនួន ៨៣នាក់ត្រូវបានសម្លាប់ និង១៧០នាក់ ផ្សេងទៀត រងរបួស ក្នុងករណីបំផ្ទុះគ្រាប់បែក ជាស៊េរី នៅរដ្ឋធានីស៊ីរី។
ដោយឡែកក្រុមអ្នកអង្កេតការណ៍ ស៊ីរី ក្នុងការងារសិទ្ធិមនុស្ស បានឲ្យដឹងថា ក្នុងករណីបំផ្ទុះគ្រាប់បែក ក្នុងរថយន្ដសម្លាប់មនុស្ស ៥៩នាក់ ស្ថិតនៅទីក្រុងហូម ភាគកណ្ដាលស៊ីរី ហើយការវាយប្រហារ ជាយក្រុងដាណឺម៉ាក បានផ្ទុះឡើងក្នុងតំបន់ ជាច្រើនទៀត ដែលជាការប្រយុទ្ធ គ្នាជាមួយនឹងក្រុមអ្នកគាំទ្រ រដ្ឋាភិបាលប្រធានាធិបតីលោក បាសា អាល់អាសាដ៕

អ្នកគាំទ្រថា ខេមរៈភារុណ មិនគួរលាក់បាំងរឿង ខេមរៈ ស្រីពៅ មានជំងឺ

February 22, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជា, សិល្បៈ / កម្សាន្តមេគង្គ ប៉ុស្តិ៍

ដោយ៖រតនា

ភ្នំពេញ៖ដំណឹងដែលលេចឮថា តារាចម្រៀងប្រចាំផលិតកម្មសាន់ដេ កញ្ញា ខេមរៈ ស្រីពៅមានជំងឺប្រតិកម្មនឹងថ្នាដែរក្សាសម្រស់រហូតធ្លាក់ខ្លួនឈឺដេកនឹងកន្ទេលត្រូវបានល្បីសុះសាយពេញផ្ទៃប្រទេស។ ប៉ុន្តែបងប្រុសរបស់នាងបានបញ្ជាក់ប្រាប់បណ្តាញព័ត៌មានក្នុងស្រុកថា គឺជាដំណឹងមិនពិតទៅវិញខណៈដែលអ្នករស់នៅភូមិផងរបងជាមួយទម្លាយថា ខេមរៈ ស្រីពៅ គឺពិតជាប្រតិកម្មថ្នាំថែរក្សាសម្រស់ និងកំពុងសម្រាកព្យាបាលនៅស្រុកកំណើតមែន។

ប្រភពពីប្រជាពលរដ្ឋរស់នៅក្នុងស្រុកព្រៃឈរខេត្តកំពុងចាមបានបញ្ជាក់ថា ខេរៈស្រីពៅ មានជំងឺប្រតិតកម្មថ្នាំរក្សារសម្រស់កំពុងសំងំរក្សាសុខភាពនិងព្យាបាលនៅផ្ទះឯស្រុកកំណើត។ ប្រភពបញ្ជាក់ថា នាងបានប្រតិកម្មថ្នាំជាច្រើនខែមកហើយហើយស្ថានភាពជំងឺនៅតែបន្តតាមដានខណៈដែលនាងត្រូវចេញទៅពិនិត្យតាមដាននៅប្រទេសថៃជាបន្តបន្ទាប់។

តបនឹងដំណឹងអកុសល្យនេះត្រូវបានបដិសេធដោយបងប្រុសរបស់នាង គឺលោក ខេមរៈ ភិរុណ។លោកអះអាងថាប្អូនស្រីរបស់ខ្លួនស្ថិតនៅភ្នំពេញនិងកំពុងរស់នៅជាមួយគ្រួសារនៅម្ដុំចម្ការព្រីងនៅភ្នំពេញជាធម្មតានោះទេ ។ លោកបញ្ជាក់ថា ប្អូនស្រីរបស់លោកគឺនៅតែមានសុខភាពធម្មតា និងមិនមានបញ្ហាកើតឡើងដូចគ្នានឹងអ្វីដែលបានលេចធ្លាយនោះឡើយ បើទោះជាតារាចម្រៀងខេមរៈ ស្រីពៅ មិនមានសកម្មភាពឡើងឆាកឬចេញមុខក្នុងកម្មវិធីសិល្បៈនាពេលចុងក្រោយនេះក្តី។

ទោះជាដំណឹងអកុសល្យនេះកាន់តែសុះសាយក្តីក៏លោកមិនមានគម្រោងបង្ហាញមុខប្អូនស្រីជាសាធារណៈដែរដែលលោកចាត់ទុកថាដំណឹងអកុសល្យបែបនេះតែងកើតមានចំណោះតារាល្បីដែរ។

មានការលើកឡើងថា ការបញ្ជាក់របស់បងប្រុសនាងគឺជាការលាក់បាំងប៉ុណ្ណោះហើយវាគឺជាការបិទបាំងមួយបែបលាក់លៀមជាសាធារណៈ ។

នៅគេហទំព័របណ្តាញទំនាក់ទំនងសង្គមFacebook ផ្លូវការរបស់នាងក៏គេមិនបានឃើញនាងបញ្ចេញរូបថតថ្មីៗនិងបង្ហាញពីស្ថានភាពរស់នៅពិតជាក់ស្តែងរបស់នាងដែរក្រៅពីរូបថតចាស់ៗជាច្រើនសន្លឹងត្រូវបានបង្ហោះជាថ្មីដែលនៅក្រោមរូបថតគេឃើញមានការបញ្ចេញយោបល់និងសាកសួរសុខទុក្ខចំពោះស្ថានភាពជំងឺរបស់នាង ប៉ុន្តែមិនបានឃើញការឆ្លើយតបរបស់នាងអ្វីនោះដែរ។

អ្នកគាំទ្រនាងម្នាក់សរសេរលើហ្វេសប៊ុកដែលនាងបង្ហោះរូបចាស់នៅថា ប្រសិនបើនាងប្រតិកម្មថ្នាំពិតមែនគួរតែលាតត្រដាងដើម្បីជាបទពិសោធន៍សម្រាប់អ្នកចង់ថែរក្សាសម្រស់ទូទៅឲ្យបានដឹងហើយនាងគួរបង្ហាញពីស្ថានភាពរស់នៅនិងស្ថានភាពជំងឺពិតដល់អ្នកគាំទ្រហើយនាងក៏ទទួលបានការអាណិតកាន់តែច្រើននិងមិនមានការរិះគន់អ្វីទេ។

អ្វីដែលគេកាន់តែសង្ស័យថា ខេមរៈស្រីពៅ ពិតជាមានជំងឺធ្ងន់ធ្ងរនោះគឺ កាលពីថ្ងៃទី២២ខែធ្នូឆ្នាំ២០១៥ ក្រុមគ្រួសារតារាចម្រៀង ខេមរៈ សិរីមន្ត បានរៀបចំពិធីមង្គលការ ជូនប្អូនស្រីរបស់ខ្លួនម្នាក់ ឈ្មោះ ខេមរៈ ស្រីពេជ្រ ដោយបានអញ្ជើញតារាល្បីៗ និងចាងហ្វាងផលិតកម្ម សាន់ដេ ចូលរួមអបអរសាទរផងដែរ ។

ប៉ុន្តែគេមិនបានឃើញវត្តមានតារាចម្រៀង ខេរៈ ស្រីពៅ ចេញមកទទួលស្វាគមន៍ភ្ញៀវកិត្តិយសដែលជាអ្នករួមអាជីព និងក្រុមការងារក្នុងផលិតកម្មជាមួយគ្នានោះទេ។អ្វីដែល ខេមរៈ ស្រីពៅ មិនបានមកទទួលរាក់ទាក់អ្នកសិល្បៈដូចគ្នាដោយសារតែសភាពជំងឺរបស់នាងកំពុងធ្វើទុក្ខខ្លាំង និងស្បែកមានសភាពប្រែប្រួលពេលត្រូវកម្ដៅ។

នៅពេលដ៏ខ្លីខាងមុខនេះក្រុមតារាចម្រៀងប្រចាំផលិតកម្មសាន់ដេទាំងអស់នឹងចាប់ផ្តើមផលិតបទចម្រៀងថ្មីសម្រាប់ពិធីបុណ្យចូលឆ្នាំថ្មីប្រពៃណីជាតិប៉ុន្តែ មិនមានបទចម្រៀងរបស់ខេមរៈស្រីពៅចេញច្រៀងដូចឆ្នាំកន្លងទៅនោះទេ។បទចម្រៀងចុងក្រោយរបស់នាង គឺបទ”លើសពីFanបានអត់?”ដែលត្រូវបានដាក់លក់ចុងក្រោយនៅអំឡុងខែមិថុនាឆ្នាំ២០១៥។

អ្នកចាត់ការទូទៅរបស់ផលិតកម្មសាន់ដេលោក ឡាយ សុខចំរើន បានបញ្ជាក់ថាដំណឹងខាងលើប្រហែលជាគ្រាន់តែជាពាក្យចចាមអារ៉ាមច្រើនជាងរឿងពិត។ទោះជាយ៉ាងណា លោកទទួលស្គាល់ថាតារាចម្រៀង ខេមរៈ ស្រីពៅ មិនមានវត្តមានចេញថតបទចម្រៀងសម្រាប់ចូលឆ្នាំនៅថ្ងៃទី២៤ កុម្ភៈខាងមុខនោះទេ ៕

បាក់ពិដានកាស៊ីណូ ក្រេនទីង នៅប៉ោយប៉ែតរបួសមនុស្ស៥នាក់

February 22, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយ៖ស សាម

ប៉ោយប៉ែត៖យ៉ាងហោចណាស់មានមនុស្សប្រុសស្រីប្រមាណ៥នាក់បានរងរបួសយ៉ាងដំណំដោយសារពិដានកាស៊ីណូ ក្រេនទីង បាក់ធ្លាក់សង្កត់មកលើភ្ញៀវដែលមកលែង និងបុគ្គលិកជាច្រើននាក់ទៀត។

កាលពីវេលាម៉ោង២ះ០០នាទីយប់ ក្នុងថ្ងៃទី២១ ខែកុម្ភះ នៅក្នុងកាស៊ីណូ ក្រេនទីង មានករណីបាក់ពិដានជាច្រើនកន្លែងធ្លាក់សង្កត់មកលើភ្ញៀវ និងបុគ្គលិកជាច្រើននាក់ទៀតបណ្តាលឲ្យមានរបួសយ៉ាងធ្ងន់ធ្ងរ។

សមត្ថកិច្ចមិនទាន់ធ្វើសេចក្តីរាយការណ៍ស្តីពីស្ថានភាពនៃអ្នករបួស និងទំហំនៃការខូចខាតនៅឡើយទេ៕

ស្ត្រីថៃម្នាក់ប្រកាសរកប្តីដែលបាត់ខ្លួនពេលចូលលេងល្បែងនៅកាស៊ីណូប៉ោយប៉ែត

February 21, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយ៖ ស សាម

ប្រទេសថៃ៖ស្ត្រីជាភរិយាជនជាតិថៃម្នាក់បានប្រកាស ស្វែងរកស្វាមីដែលបានបាត់ខ្លួនជាច្រើនថ្ងៃ ខណៈរួមដំណើរជាមួយមិត្តភ័ក្តិចូល មកលេងល្បែងកាស៊ីណូក្នុងក្រុងប៉ោយប៉ែត ប្រទេសកម្ពុជា ។

មានសេចក្ដីរាយការណ៍ព័ត៌មានពីប្រទេសថៃ បានឲ្យដឹងថា÷ នៅថ្ងៃទី២០ ខែកុម្ភៈ ឆ្នាំ២០១៦នេះ មានអ្នកជំនួញជនជាតិថៃម្នាក់ត្រូវបានគេចាប់ជម្រិតនៅក្នុងកាស៊ីណូឡៃលីង ប្លាមីងកូ នៅក្រុងប៉ោយប៉ែត នៃប្រទេសកម្ពុជា នៅមិនទាន់ដឹងជោគវាសនាយ៉ាងណា នោះនៅឡើយទេ ។

នៅវេលាម៉ោង ១០;៣០នាទី ព្រឹកថ្ងៃទី២០ ខែកុម្ភៈ លោក និវឌ្ឍន៍ ហាប្រាសព ក្រុមប្រឹក្សា ឃុំតាបផាយ៉ា ខេត្តស្រះកែវ ប្រទេសថៃ បានទទួលការពឹងពាក់ពីស្ត្រីថៃឈ្មោះ វរ៉ាផន នូចម្រើន កុល ជាភរិយា របស់លោក សំនឹក ចាក់រុន ជីនសៀ ដែលសង្ស័យមានគេចាប់ជម្រិតនៅក្នុងកាស៊ីណូ ក្រុងប៉ោយប៉ែត ប្រទេសកម្ពុជា និងបានទំនាក់ទំនងមកអ្នកសារព័ត៌មាន អាស៊ាន ដោយបញ្ជាក់ឲ្យដឹងថា÷ កាលពីថ្ងៃទី១៣ ឥខែកុម្ភៈ ឆ្នាំ២០១៦ វេលាម៉ោង ១៩;៣០នាទី លោកសំនឹក បានចាកចេញពីកាស៊ីណូ ឡៃលីង ប្លាមីងកូ ដោយជិះម៉ូតូ ទៅទទួលទាន អាហារនៅ ភោជនីដ្ឋាន ចេកវ៉ាន់។ ដោយទទួលព័ត៍មានថា លោក អារុន វង់សាក់ បានទូរស័ព្ទឲ្យទៅទទួលទានអាហារនៅទីនោះ បន្ទាប់មកមាននារី២នាក់បាននាំលោក សំនឹក ពីភោជនីយដ្ឋានខាងលើជិះរថយន្តម៉ាកកាម៉ារីមួយគ្រឿង ពណ៌ខៀវចាស់ ចេញទៅដោយមិនដឹងគោលដៅ ។

ពេលនោះភរិយាបានព្យាយាមទូរស័ព្ធតាមរយៈលេខ ០៨១ ៧៨ ១៧ ៥៣៤ តែគ្មានអ្នកទទួល រហូតមកដល់ ម៉ោង០១;00នាទី រសៀលថ្ងៃទី ១៤ ខែកុម្ភៈ ឆ្នាំ២០១៦ ភរិយាលោក សំនឹក បានទូរសព្ទ័ទាក់ទងម្ដងទៀត ឮសម្លេងនារីខ្មែរជាអ្នកទទួលទូរស័ព្ទដោយប្រាប់ថា លោក សំនឹក មិនទំនេរទេ បន្ទាប់មកឮសម្លេងស្រែកថាឲ្យបិទទូរស័ព្ទ ចាប់តាំងពីពេលនោះមកមិនអាច ទាក់ទងបាន ។

ក្រោយការ ត្រួតពិនិត្ត តាមប្រពន្ធ័ AIS ដឹងថា បរិវេណដែល ទទួលទូរសព្ទ័នៅ ហ្គោដិន ផាក់ឃីង ក្នុងកាស៊ីណូ ក្រុងប៉ោយប៉ែត ។ដោយខ្លាច ស្វាម៉ីមានគ្រោះថ្នាក់ទើបមកទាក់ទង សហពន្ធ័ផ្សព្វផ្សាយព័ត៌មាន អាស៊ាន ប្រចាំខេត្ត ស្រះកែវ នឹងអ្នកសាព័ត៍មានកម្ពុជាឲ្យជួយចុះផ្សាយបើសិនជាជួប ឬក៏ដឹងដំណឹងនេះ សូមជួយផ្ដល់ដំណឹងទៅភរិយាលោក សំនឹក ផង ។

ប្រធានក្រុម ប្រឹក្សាឃុំ តាបផាយ៉ា ខេត្តស្រះកែវ បាននិយាយថា ការបាត់ខ្លួនរបស់លោក សំនឹក ពេលនេះ សង្ស័យថា លោក សំនឹក រួមដំណើរ ជាមួយលោក អារុនវង់សាក់ មានទីលំនៅ ផ្ទះលេខ១០៩ ផ្លូវបាងមាត្រា២៣ ខណ្ឌបាងណា ទីក្រុងបាងកក ។ ពីព្រោះលោក អារុនវង់សាក់ នឹងលោក សំនឹក មានភាគហ៊ុនជួលតុល្បែងក្នុងកាស៊ីណូ ប្លាមីងកូ ជាមួយគ្នាដោយលោក សំនឹក មានភាគហ៊ុន ៤០% ។

បន្ទាប់មកទៀតភរិយារបស់លោក សំនឹក បានដាក់ពាក្យបណ្ដឹង ទៅសមត្ថកិច្ច ពោងណាំរ៉ន ក្នុងខេត្តចាន់បុរី ប៉ុន្តែសំណុំរឿងមិនត្រូវបានគេជួយចាត់ការឲ្យទេ ។

រហូតមកដល់ថ្ងៃទី១៨ ខែកុម្ភៈ ឆ្នាំ២០១៦ ទើបមកដាក់ពាក្យបណ្ដឹង មត្ថកិច្ចខ្លងលឹកស្រុកអារញ្ញ ខេត្តស្រះកែវ ដើម្បីជួយស្វែងរកស្វាម៉ីរបស់នាងផង ។

ទោះជាយ៉ាងណាក៏ដោយ ក៏មកដល់ថ្ងៃទី២១ ខែកុម្ភៈ នេះស្ត្រីជនជាតិថៃដែលស្វះស្វែង តាមរកប្តីនោះ នៅមិនទាន់ទទួល បាននូវព័ត៌មានពីប្តីរបស់ខ្លួននៅឡើយទេ៕

ចាប់ទណ្ឌិត៤នាក់ក្នុងពន្ធនាគារត្រពាំងផ្លុងដែលលួចរកស៊ីគ្រឿងញៀន

February 21, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយ ៖ស សាម

ត្បូងឃ្មុំ៖ ទណ្ឌិតចំនួន៤នាក់ ដែលជាប់ទោសពី១៥ឆ្នាំ ដល់៥៥ឆ្នាំ នៅក្នុងពន្ធនាគារមណ្ឌលអប់រំកែប្រែទី៣ត្រពាំងផ្លុង ស្ថិតក្នុងឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ ត្រូវបាន កម្លាំងសមត្ថកិច្ចចេញប្រតិបត្តិការបង្ក្រាបករណីគ្រឿងញៀនទ្រង់ទ្រាយធំ។

ប្រតិបត្តិការនេះដោយមានការឯកភាពពីលោក ហៀង សុភក្ត្រ ព្រះរាជអាជ្ញាអមសាលាដំបូងខេត្តត្បូងឃ្មុំ បានចាប់ផ្តើមពីថ្ងៃទី១៣ រហូតដល់ព្រឹកថ្ងៃទី១៩ កុម្ភៈ ២០១៦។

លោកវរសេនីយ៍ទោ ជួន ផលលី ប្រធានមន្ទីរយុត្តិធម៌នៃអាវុធហត្ថខេត្តត្បូងឃ្មុំ បានឲ្យដឹងថា ក្រោយពីមានសេចក្តីរាយការណ៍ពីក្នុងមណ្ឌលកែប្រែទី៣ត្រពាំងផ្លុងមកថា មានទណ្ឌិតមួយចំនួនបានកំពុងធ្វើសកម្មភាពចែកចាយថ្នាំញៀន ហើយត្រូវបានលោកមេបញ្ជាការកងរាជអាវុធហត្ថខេត្តចាត់ឲ្យរូបលោក និងកម្លាំងជាច្រើននាក់ទៀត ចុះទៅស្រាវជ្រាវជាបន្ទាន់នៅថ្ងៃទី១៣ កុម្ភៈ ដោយឃាត់ទណ្ឌិត២នាក់បញ្ជូនមកកាន់ទីបញ្ជាការអាវុធហត្ថខេត្ត ព្រមទាំងដកហូតបានថ្នាំញៀនមេតំហ្វេតាមីនក្រាមពណ៌សចំនួន១៣កញ្ចប់ ក្នុងនោះធំ៩កញ្ចប់នៅជាប់នឹងខ្លួនទណ្ឌិតឈ្មោះ ឯក ប៊ុនលី ភេទប្រុស អាយុ៥៥ឆ្នាំ ។

លោកវរសេនីយ៍ទោ ជួន ផលលី ប្រាប់បន្តឲ្យដឹងទៀតថា តាមរយៈការឆ្លើយសារភាព អាវុធហត្ថបានសហការជាមួយប្រធានមណ្ឌលកែប្រែទី៣រហូតមកដល់ថ្ងៃទី១៥កុម្ភៈក៏ឃាត់បានទណ្ឌិត២នាក់ទៀតសរុបបាន៤នាក់ ក្នុងនោះមាន ១-មេខ្លោងឈ្មោះ ប៊ុន លី ២-ឈ្មោះ ប៊ុន ទ្រី ភេទប្រុស អាយុ៤៥ឆ្នាំ ៣-ឈ្មោះ កែវ រ៉ែន ភេទប្រុស អាយុ៣៣ឆ្នាំ និង ៤-ឈ្មោះ កែវ ជីន ភេទប្រុស អាយុ៤០ឆ្នាំ ជនជាតិវៀតណាម ដែលក្រុមទាំងនេះគឺសុទ្ធសឹងតែមានទោសបទឧក្រិដ្ឋត្រូវជាប់ពន្ធនាគារចាប់ពី១៥ឆ្នាំឡើងទៅដល់៥៥ឆ្នាំ ។

សកម្មភាពចែកចាយថ្នាំញៀននៅក្នុងមណ្ឌលកែប្រែទី៣ខាងលើត្រូវបានមេខ្លោងទណ្ឌិតឈ្មោះ ប៊ុន លី បានត្រូវរ៉ូវជាមួយមន្ត្រីអនុរក្សពន្ធនាគារម្នាក់ឲ្យយកថ្នាំញៀនដើរទៅចែកចាយដល់អ្នកទោសដែលកំពុងតែជាប់ឃុំនោះ ។

លោកវរសេនីយ៍ទោ ជួន ផលលី ប្រធានមន្ទីរយុត្តិធម៌អាវុធហត្ថខេត្តត្បូងឃ្មុំ បានបញ្ជាក់ថា ក្រុមទណ្ឌិតដែលជាប់ពាក់ព័ន្ធនឹងសកម្មភាពជួញដូរ ចែកចាយ និងប្រើប្រាស់គ្រឿងញៀនទាំង៤នាក់ ត្រូវបានអាវុធហត្ថខេត្តបញ្ជូនទៅសាលាដំបូងខេត្តហើយដែរ ព្រមទាំងចេញដីកាឃុំខ្លួន ដោយបាននាំទៅដាក់នៅពន្ធនាគារផ្សេងពីកន្លែងខាងលើ ហើយសន្តិសុខត្រូវបានរឹតបន្តឹងជាងមុន ៕

ចំណាកស្រុកខ្មែរធ្វើការនៅថៃម្នាក់ស្លាប់ដោយដាច់ខ្សែរ៉កបេតុងសង្កត់លើ

February 21, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយ៖ ឈ ល

ថៃ ៖ យុវជនចំណាកស្រុកខ្មែរម្នាក់ កាលពីថ្ងៃទី ១៩ ខែកុម្ភៈ ឆ្នាំ២០១៦ វេលាម៉ោង១៥.០០នាទីបានរងគ្រោះថ្នាក់ស្លាប់ដោយសារដាច់ខ្សែយោងល្បាយបេតុងធ្លាក់សង្កត់ក្នុងការដ្ឋានសំណង់មួយកន្លែងក្នុងខេត្ត សាក់ស៊ីសៅ ប្រទេសថៃ។

បណ្តាញព័ត៌មានថៃបានរាយការណ៍ថា តម្រួត បាងប៉ាកុង ក្នុងខេត្ត សាក់សីនសៅ ប្រទេសថៃ បានចុះ ក្នុងក្រុមហ៑ុនឧស្សាហកម្មលីមីតធីត (wellgrow)ក្រុម០២ ឃុំភីមផា ដើម្បីពិនិត្យសាកសពយុវជនម្នាក់(កម្ពុជា)ដែល បានស្លាប់ ឈ្មោះ មិន ឌីណា ភេទប្រុស
អាយុ២៦ឆ្នាំ ក្នុងសភាពអង្គុយលត់ជង្គង់ បត់ករ ស្លាប់លើធ្នឹមដែក បែកលលាក្បាល បាក់ក ចង្កេះ និងទ្រូងខាងធ្វេងត្រូវបានបុកធ្លាយមកឆ្អឹងជំនីខាងធ្វេងដោយដែកសរសៃស្លាប់នៅនឹងកន្លែង។

ចំណែកម្នាក់ទៀតជាបើករថយន្ត(ម៉ៃខូ) ឈ្មោះ ស្រី ចិន្តា ភេទប្រុស រងរបួសត្រូវបញ្ជូនទៅសង្រោះនៅមន្ទីរពេទ្យ បាននិយាយថា ខណៈពេលដែលខ្លួនកំពង់បើកលើកសុីម៉ង់ទម្ងន់០១តោន ដោយប្រើខ្សែ(រ៉ត) យោងស៊ីម៉ង់ដ៍ឡើងទៅខាងលើ ដើម្បីចាក់ធ្វើពិដាននៃអាគារមួយកន្លែង ខណៈនោះខ្សែរ៉កយោងស៊ីម៉ង់ដ៍បានដាច់ទំពក់ធ្លាក់សង្កត់ឈ្មោះ មិន ឌីណា ដែលកំពង់ធ្វើការខាងក្រោមបណ្តាលឲ្យស្លាប់នៅនឹងកន្លែងតែម្តង។

មិនទាន់មានរបាយការណ៍ស្តីពីកាធានារ៉ាប់រងអាយុជីវិតចំពោះកម្មករចំណាកស្រុកខ្មែរខាងលើនេះនៅឡើយទេ។

បច្ចុប្បន្នសមត្ថកិច្ចបាននិងកំពុងកសាងឯកសារបញ្ជូនសាកសពកម្ពុជាមកប្រទេសវិញ យើងមិនទាន់ដឹងថាសាកសពនោះត្រូវបញ្ជូនតាមច្រកណានោះទេចំណែកឯស្រុកកំណើតជនរង្រោះក៏មិនទាន់ដឹងថានៅឯណាដែរ៕

បុរសម្នាក់ត្រូវស្ត្រីស្មារតីមិនគ្រប់វាយបែកក្បាលក្រោយពេលចាប់នាងរំលោភ

February 21, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ត្បូងឃ្មុំៈ បុរសម្នាក់ត្រូវស្ត្រីមានស្មារតីមិនគ្រប់វ័យ៣១ឆ្នាំទាញព្រនង់វាយបែកក្បាលក្រោយពេលបុរសរូបនោះចាប់នាងរំលោភសេពសន្ថវៈបានសម្រេច។

ករណីបុរសតណ្ហាឡើងដល់កទប់មិនបានបង្ខំចិត្តចាប់រំលោកស្ត្រីមានស្មារតីមិនគ្រប់នេះកើតឡើងកាលពីវេលាម៉ោង ម៉ោង20:30នាទីថ្ងៃទី20/2/2016 នៅភូមិត្រាច ឃុំអញ្ចើម ស្រុកពញាក្រែក ។ តែស៊យសែនមហាស៊យ រំលោភរួចភ្លាមខាងស្រីទាញ ព្រនង់សំពងចំកណ្តាលក្បាលបែកចេញឈាមឈុល។

សមត្ថកិច្ចបានអោយដឹងថាៈ ជនល្មើសឈ្មោះ វន់ វិន ភេទប្រុស អាយុ 28ឆ្នាំ នៅភូមិរូង ឃុំអញ្ចើម (នៅលីវ) បានធ្វើសកម្មភាព ចាប់រំលោភ ឈ្មោះ ចាន់ រស់ ភេទស្រី អាយុ31ឆ្នាំ (នៅលីវ) មានជំងឺសរសៃប្រសាទ រស់នៅភូមិកើតហេតុ ក្នុងខណៈជនរងគ្រោះ ដេកនៅម្នាក់ឯងក្នុងខ្ទម ក្រោយពេលរំលោភ ភ្លាមៗ ជនរងគ្រោះ បានវាយជនល្មើសមួយព្រនង់ឬស្សីបណ្តាលឲ្យរបួសក្បាលជាទម្ងន់។
បច្ចុប្បន្នជនល្មើសសមត្ថកិច្ចបានឃាត់ខ្លួន ចាត់ការតាមនីតិវិធី៕

មន្ត្រីសូរិយោដី និងមន្ត្រីពន្ធដារ ស្រុកដងទង់រងការចោទប្រកាន់ពីសំណាក់ប្រជាពលរដ្ឋ

February 19, 2016ព័ត៌មានគួរចាប់អារម្មណ៍, ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយ៖សហការី

ខេត្តកំពត៖ មន្ត្រីសូរិយោដី និងមន្ត្រីពន្ធដារស្រុកដងទង់រងការចោទប្រកាន់ពីសំណាក់ប្រជាពលរដ្ឋថា មកគាប់សង្កត់អោយពួកគាត់បង់ពន្ធថ្លៃសាងសង់ផ្ទះរាប់ពាន់ដុល្លារដោយគ្មានលិខិតស្នាមណាមួយសម្រាប់សម្គាល់បន្តិចសោះ ប៉ុន្តែមន្រ្តីសូរិយោដីបដិសេធថា មិនបាន ធ្វើដូចការចោទប្រកាន់នោះទេ។

បងស្រី អ៊ូច លីន អាយុ៥៧ឆ្នាំ រស់នៅភូមិព្រែឃ្មុំ ឃុំខ្ជាយខាងជើង ស្រុកដងទង់ខេត្តកំពត បានអោយដឹងថា “មានមន្ត្រីសូរិយោដីមកយកលុយពីគាត់អស់ចំនួន ១លានរៀល ក្នុងការបង់ពន្ធថ្លៃសាងសង់ផ្ទះ ។ពេលដែលពួកមន្ត្រីសូរិយោដីមកយកលុយពីគាត់ គ្មានលិខិតស្នាមណាមួយសម្គាល់ថាបង់ពន្ធនោះទេ “។

លោក ឡាយ វិបុល ម្ចាស់សំណង់ នៅភូមិព្រៃឃ្មុំ ឃុំខ្ជាយខាងជើង បានប្រាប់អ្នកយកព័ត៌មាន មេគង្គប៉ុស្តិ៍ ថា “មានមន្ត្រីសូរិយោដី ២នាក់មកដាក់គំនៀបអោយខ្ញុំបង់លុយបង់លុយចំនួន ១ពាន់ដុលា្លរ តាមរបៀបពុករលួយ ពេលនោះខ្ញុំមិនបង់អោយទេ ភ្លាមៗនោះ ស្រាប់តែគេបង្ហាញលិខិតដែលមានហត្ថលេខា ចេញពីលោកអភិបាលស្រុកមួយច្បាប់ បញ្ឈប់ និងផ្អាក់ការសាងសង់ “។លោក ឡាយ វិបុល បន្តទៀតថា ” មន្ត្រីសូរិយោដីរូបនោះបាននិយាយថា បើមិនឈប់ការសាងសង់ទេ ខ្ញុំនឹងហៅសមត្ថកិច្ចមកចាប់ជាងចង និងមកវាយផ្ទះនេះចោល ” ។

ពលរដ្ឋនៅក្បែរសំណង់នោះបាននិយាយថា តើមន្ត្រីសូរិយោដីសុ្រកដងទង់ឈ្មោះ លាង និងឈ្មោះ វុធ និងមន្ត្រីពន្ធដារឈ្មោះ ហិល នេះមានអំណាចប៉ុនណាបានជាហ៊ានប្រើពាក្យសម្តីថា ចាប់ជាងចង និងវាយផ្ទះគេចោល។

លោក វុធ មន្ត្រីសូរិយោដីសុ្រកដងទង់បានអោយដឹងថា” ខ្ញុំមិនប្រើពាក្យសម្តីយ៉ាងនេះទេ គ្រាន់តែនិយាយថា អោយទៅសុំច្បាប់ទៅ ហើយម្យ៉ាងទៀតក៏មិនបានទារលុយពីម្ចាស់សំណង់នេះមួយពាន់ដុល្លារ ដូចពាក្យគាត់ថានោះទេ “ ។

ភ្នាក់ងារព័ត៌មានបានព្យាយាមភ្ជាប់ទូរស័ព្ទទៅលោក ស៊ីវ ជេង ដើម្បីសុំការបំភ្លឺដែរ តែទូរស័ព្ទរបស់លោកពុំមានអ្នកទទួល។

សូមបញ្ជាក់ផងដែរថា សំណង់អត់ច្បាប់នៅស្រុកដងទង់ កំពុងតែកើតមានជាបន្តបន្ទាប់ ដែលគួរតែអាជ្ញាធរមានវិធានការសមស្របបែបណាដើម្បីឲ្យប្រជាពលរដ្ឋមានជំនឿទុកចិត្ត ចៀសវាងមានមន្ត្រីខិលខូចឆ្លៀតឱកាសដូចពាក្យចាស់ពោលថា កន្ទេលធំបន្លំដេក៕

តួកគីចាប់ផ្តើមបើកការវាយប្រហារតាមអាកាសលើក្រុម PKK

February 19, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

តួកគី៖កងទ័ពអាកាសរបស់តួកគីបានចាប់ផ្តើមបើកការវាយប្រហារតាមអាកាសលើទីតាំងក្រុមសកម្មប្រយុទ្ធPKK ដែលមានទំនាក់ទំនងជាមួយក្រុមYPG បន្ទាប់ពីរងការបំផ្ទុះគ្រាប់បែកកណ្តាលទីក្រុងអង់ការ៉ា។
ការវាយប្រហារនេះបានធ្វើឡើងនៅភាគខាងជើងប្រទេសអ៊ីរ៉ាក់ កាលពីយប់ថ្ងៃទី១៧ កុម្ភៈដើម្បីឆ្លើយតបទៅនឹងទង្វើរបស់ក្រុមសកម្មប្រយុទ្ធនេះបន្ទាប់ពីបានបំផ្ទុះគ្រាប់បែក។ ទន្ទឹមនោះតួកគីបានចាត់ទុកថា ការវាយប្រហារនេះ ជាសកម្មភាពរបស់ក្រុមសកម្មប្រយុទ្ធជាសមាជិកក្រុមYPG ជាក្រុមអ្នកប្រយុទ្ធឃឺដក្នុងប្រទេសស៊ីរី និងជាសកម្មភាពសមាជិកក្រុមសកម្មប្រយុទ្ធPKK មានមូលដ្ឋាននៅក្នុងប្រទេសតួកគី។
គួរបញ្ជាក់ថា កាលពីថ្ងៃទី១៧កុម្ភៈ មានហេតុការណ៍វាយប្រហារដោយបំផ្ទុះគ្រាប់បែកមួយបានកើតឡើងនៅក្នុងទីក្រុងអង់ការ៉ាក្នុងប្រទេសតួកគី ដោយបានសម្លាប់មនុស្ស២៨នាក់ និងជាង៦០នាក់ផ្សេងទៀតរងរបួសផងដែរ៕

ISIS គំរាមសម្លាប់មនុស្សទ្រង់ទ្រាយធំដោយដាក់គីមីពុលក្នុងចំណីអាហារ

February 19, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ឥណ្ឌូនេស៊ី៖មេសន្តិសុខឥណ្ឌូនេស៊ីបានឱ្យដឹងថាពួកភេរវជនរបស់ISISក្នុងប្រទេសឥណ្ឌូនេស៊ីមានផែនការវាយប្រហារសម្លាប់មនុស្សទ្រង់ទ្រាយធំតាមរយៈដាក់ជាតិគីមីពុលឈ្មោះថាសាយណៃ (Cyanide) ក្នុងចំណីហារ។
រដ្ឋមន្ត្រីក្រសួងការពារជាតិ លោក Luhut Pandjaitan បានព្រមានថា ពួកភេរវជនអ៊ីស្លាមចង់វាយប្រហារដោយផ្តោតគោលដៅពិសេសទៅលើខ្សែបណ្តាញផ្គត់ផ្គង់ចំណីអាហារនិងទឹកស្អាតរបស់ប៉ូលិស និងយោធាក្នុងការប្រឹងប្រែងដើម្បីធ្វើឱ្យប្រទេសនេះអស្ថេរភាព។
ថ្លែងទៅកាន់អ្នកកាសែត លោក ផេនចៃតាន់ បានអះអាងថា “IS ឥឡូវកំពុងប្រើប្រាស់ជាតិគីមីសាយណៃដើម្បីធ្វើភេរវកម្ម។ ពួកវាកំពុងប្រើប្រាស់ជាតិគីមីពុលសាយណៃដើម្បីបំពុលចំណីអាហារ”។ លោកបានបន្តថា “យើងបានពិចារណាអំពីទម្រង់នៃការគំរាមកំហែងជាច្រើន ហើយយើងបានត្រៀមខ្លួនរួចជាស្រេចដើម្បីប្រឈមលទ្ធភាពបែបនេះ (ការបំពុលអាហារដោយជាតិគីមីសាយណៃ)”។ ប្រទេសឥណ្ឌូនេស៊ីបានកំពុងព្យាយាមបង្ក្រាបជនជ្រុលនិយមអ៊ីស្លាមជាច្រើន ក្នុងនោះរួមទាំងក្រុមភេរវករ ដែលបានចងសម្ព័ន្ធភាពជាមួយពួកអាយស៊ីស។
យោងតាមវេបសាយ IBT.com មេប៉ូលិសឥណ្ឌូនេស៊ី លោក បាដ្រូឌីន ហៃទី (Badrodin Haiti) បានអះអាងថា ពួកអាយស៊ីសបានយកគំនិតនេះពីករណីឃាតកម្មថ្មីៗនេះនៅក្នុងទីក្រុងហ្សាការតា ទីដែលជនរងគ្រោះបានផឹកកាហ្វេលាយជាមួយជាតិគីមីពុលសាយណៃ៕

ចិនអះអាងថាពិតជាបានដាក់ពង្រាយអាវុធនៅតំបន់ជម្លោះក្នុងសមុទ្រចិនខាងត្បូង

February 19, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ប៉េកាំង៖រដ្ឋាភិបាលក្រុងប៉េកាំងអះអាងថា ខ្លួនបានដាក់ពង្រាយអាវុធនៅតំបន់កោះមួយដែលកំពុងមានជម្លោះ ក្នុងតំបន់សមុទ្រចិនភាគខាងត្បូង ខណៈរដ្ឋមន្ត្រីការបរទេសសហរដ្ឋអាមេរិក លោក John Kerry ថ្លែងថា ការប្រើប្រាស់កម្លាំងយោធាអាចឲ្យមានមនុស្សស្លាប់នៅក្នុងតំបន់នោះ។ នេះបើតាមទីភ្នាក់ងារសារព័ត៌មានចិនស៊ិនហួ។
ទាំងសហរដ្ឋអាមេរិក និងតៃវ៉ាន់ បានលើកឡើងថា ចិនបានដាក់ពង្រាយគ្រាប់មីស៊ីល ទៅកាន់កោះ Woody ជាប់ទៅនឹងកោះ Paracels បន្ទាប់ពី មានសេចក្តីរាយការណ៍ថា អាវុធបាញ់ពីផ្ទៃដីទៅកាន់អាកាស ត្រូវបានបញ្ជូនទៅដល់ទីនោះ កាលពីសប្តាហ៍មុន។ រដ្ឋាភិបាលទីក្រុងប៉េកាំង បានអះអាងថា គ្រប់ផ្នែកទាំងអស់ នៃកោះ Paracels ជាដែនដីរបស់ខ្លួន ទោះបីទីក្រុង Hanoi និង Taipei បានអះអាងថាវាជាតំបន់ត្រួតស៊ីគ្នាក្តី។
ក្រសួងការពារជាតិចិនបានអះអាងថា ចិនបានដាក់ពង្រាយអាវុធ ទៅកាន់ដែនកោះ អស់រយៈពេលយូរមកហើយ ប៉ុន្តែមិនបានបញ្ជាក់ឲ្យច្បាស់ថា អាវុធប្រភេទអ្វីនោះទេ។ ទន្ទឹមនោះលោករដ្ឋមន្ត្រីបានអះអាងថា ប្រទេសចិនបានសិទ្ធិស្របច្បាប់ក្នុងការដាក់ពង្រាយអាវុធការពារជាតិ នៅលើទឹកដីផ្ទាល់របស់ខ្លួន។
គួរបញ្ជាក់ថា ភាពតានតឹងនៅតំបន់សមុទ្រចិនភាគខាងត្បូង បានកើនឡើងយ៉ាងខ្លាំងនៅប៉ុន្មានខែថ្មីៗនេះ ចាប់តាំងពីចិនអះអាងយកតំបន់កោះ Spratly នៅភាគខាងត្បូងបន្ថែមទៀត៕

គណៈកម្មការសិទ្ធិមនុស្សសហភាពអន្តរសភា ស្នើសុំឱ្យលោក ហុង សុខហួរ នៅក្រៅឃុំ

February 18, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយ៖បូរា

ភ្នំពេញ៖គណៈកម្មការសិទ្ធិមនុស្សរបស់នៃសហភាពអន្តរសភា(IPU) នៅក្នុងជំនួបជាមួយក្រុមតំណាងរាស្ត្រគណបក្សប្រជាជនកម្ពុជាដែលដឹកនាំដោយលោក ងួន ញ៉ិល អនុប្រធានទី២រដ្ឋសភាកម្ពុជានៅថ្ងៃទី ១៧ ខែកុម្ភៈ នេះ បានស្នើឱ្យរដ្ឋសភាអនុញ្ញាតឱ្យលោក ហុង សុខហួរ អតីតសមាជិកព្រឹទ្ធសភាខាងគណបក្សប្រឆាំងបាននៅក្រៅឃុំ ប៉ុន្តែលោក ឈាង វុន ថាជាករណីតុលាការ។

ក្នុងកិច្ចប្រជុំនៅវិមានរដ្ឋសភានេះ បានផ្សាយសំឡេងចេញមកក្រៅបន្ទប់ប្រជុំនោះ គណៈកម្មការសិទ្ធិមនុស្សរបស់សភាពិភពលោក បានលើកឡើងថា រដ្ឋសភា ឬព្រឹទ្ធសភាអាចបញ្ឈប់យុត្ថាធិការរបស់តុលាការបានលើសំណុំរឿងលោក ហុង សុខហួរ។ប៉ុន្តែលោក ឈាង វុន តំណាងរាស្ត្រគណបក្សកាន់អំណាចដែលបានចូលរួមបានពន្យល់ថា ការឃុំខ្លួនតំណាងរាស្ត្រព្រឹទ្ធសភាគណបក្សសម រង្ស៊ីរូបនេះថា ជាករណីរបស់តុលាការដែលសមាជិកសភាមិនអាចលូកលាន់បាននោះទេ។ករណីដែលអាចធ្វើបានល្គឹកណាសមាជិកព្រឹទ្ធសភា៣ភាគ៤ យល់ព្រមលើកដៃដើម្បីបង្អាក់នូវយុត្ថាធិការរបស់តុលាការ។

សូមបញ្ជាក់ថា គណៈកម្មការសិទ្ធមនុស្សរបស់សហភាពអន្តរសភានេះ បានមកបំពេញទស្សនៈកិច្ចរយៈពេល៣ថ្ងៃនៅកម្ពុជាតាំងពីថ្ងៃចន្ទមក។ គណៈកម្មការនេះ បានជួបពិភាក្សាជាមួយអ្នកនយោបាយធំៗរបស់កម្ពុជា ដូចជាគណបក្សកាន់អំណាច គណបក្សប្រឆាំង ប្រធានព្រឹទ្ធសភា រដ្ឋសភា រដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួងយុត្តិធម៌ និងអគ្គព្រះរាជ អាជ្ញាអមសាលាឧទ្ធរណ៍ជាដើម។

គួររំឭកថា អតីតសមាជិកព្រឹទ្ធសភាមកពីគណបក្សសង្គ្រោះជាតិលោក ហុង សុខហួរ ត្រូវបានសមត្ថកិច្ចចាប់ឃុំខ្លួនដោយចោទប្រកាន់ពីបទផ្សាយឯកសារសន្ធិសញ្ញាកម្ពុជា វៀតណាម ឆ្នាំ១៩៧៩ ក្លែង ៕

លោក ហុង សុខហួរ អតីសមាជិកព្រឹទ្ធសភាពមកពីគណបក្សសមរង្ស៊ី (រូបថត៖RFI)

ចាប់កញ្ឆាស្ងួតតម្លៃជាង១៥លានបាតនៅភាគខាងត្បូងថៃ (មានវីដេអូ)

February 18, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ដោយ៖ស សាម

ប្រទេសថៃ៖គ្រឿងញៀនប្រភេទកញ្ឆាស្ងួតដែលច្បាប់នៅលើពិភពលោកបានហាមឃាត់មានតម្លៃជាង១៥លានបាត ត្រូវបានក្រុមតម្រួតថៃដែលឈរជើងនៅភាគ ខាងត្បូងនៃប្រទេសចាប់បាន រួមជាមួយនឹងមនុស្សចំនួន៧នាក់ រថយន្ត និងអាវុធផងដែរ ដែលបច្ចុប្បន្នជនទាំងអស់នោះត្រូវបានបញ្ជូនខ្លួនទៅកាន់អង្គភាពជំនាញ ដើម្បីចាត់ការតាមនិតិវិធីច្បាប់ ។

យោងតាមប្រភពព័ត៌មានពីប្រទេស ថៃបានអោយដឹងថា នៅវេលាម៉ោង១០ព្រឹកថ្ងៃទី១៦ ខែកុម្ភៈ ឆ្នាំ២០១៦ គឺស្ថិតនៅត្រង់គោលដៅឈរជើងរបស់តម្រួតព្រំដែនក្នុងខេត្តឈុំផន ប្រទេសថៃភាគខាងត្បូង គឺមានរថយន្តមួយគ្រឿងម៉ាកនីសាន់ហ្វត ព៌ណស ពាក់ស្លាកលេខ បាងកក ២កឆ ៦៥៦៨ បានបើកបរយ៉ាងលឿនឆ្លងកាត់គោលដៅត្រួតពិនិត្យរបស់សមត្ថកិច្ច ។

នៅពេលនោះដែរ តម្រួតបានអោយសញ្ញាទៅរថយន្តដើម្បីអោយគេបញ្ឈប់យានត្រួតពិនិត្យដោយរថយន្តនេះបើកបរដោយឈ្មោះ ប៉ាន់ ភុត អាយុ៤៩ឆ្នាំ ហើយក៏មានប្រពន្ធឈ្មោះបុណ្យ ហៀង អាយុ៣៧ឆ្នាំ ព្រមទាំងកូនតូចម្នាក់ដែរនៅក្នុងរថយន្តនេះ ដែលពួកគេរស់នៅភូមិ៣ ឃុំផូនសុវណ្ណ ស្រុកផូនសុវណ្ណ ខេត្តនគរភ្នំ ប្រទេសថៃ មានមុខងារជាគ្រូបង្រៀនក្នុងសាលារៀនមួយកន្លែង ស្ថិតក្នុងស្រុកកុសុម៉ាន ខេត្តសកលនគរ ។ប្រភពដដែលបានបន្តថា រាល់ចម្លើយរបស់ប្តី និងប្រពន្ធ គឺហាក់បីដូចជាឆ្លើយខុសគ្នាដែលធ្វើអោយសមត្ថកិច្ចមានការសង្ស័យស្របពេលជាមួយគ្នានោះដែរគឺទូរស័ព្ទដៃរបស់ស្ត្រីជាភរិយា ក៏បានរោទ៍ឡើងជាប់ៗគ្នាប៉ុន្តែស្ត្រីរូបនេះដូចជាមានការលាក់លៀម ដោយមិនហ៊ានទទួលទូរស័ព្ទនេះឡើយ ថែមទាំងធ្វើការចុចបិទ និងបិទភ្លើងថែមទៀត ។

ភ្លាមៗនោះដែរក៏ស្រាប់តែមានរថយន្តចំនួនពីរគ្រឿង ដែលបានធ្វើដំណើរយ៉ាងលឿនបម្រុងឆ្លងកាត់គោលដៅរបស់សមត្ថកិច្ច ពេលនោះកំលាំងបានបញ្ជាអោយរថយន្តទាំងពីរនេះឈប់ដើម្បីត្រួតពិនិត្យ ផ្ទុយទៅវិញគឺមិនត្រឹមតែគេមិនឈប់នោះទេ គឺគេថែមទាំងបានជាន់បន្ថែមល្បឿនដើម្បីរត់គេចពីក្រុមតម្រួតនេះ ទើបធ្វើអោយកំលាំងបានដេញតាម ប្រមាណជា២គីឡូម៉ែត្រក៏ត្រូវចាប់បាន ព្រមទាំងបានធ្វើការឆែកឆេរទៅលើរថយន្តក៏បាន
ប្រទះឃើញគ្រឿងញៀនប្រភេទ កញ្ឆាស្ងួត ដែលគេបានផែជាបន្ទះៗរួចជាស្រេច គឺក្នុងរថយន្តមួយគ្រឿងមានកញ្ឆាស្ងួតនេះ ២០០កញ្ចប់ ដូច្នេះសរុបទាំងអស់មានចំនួន៤០០កញ្ចប់ ស្មើនឹងទម្ងន់៤០០គីឡូក្រាម ។

ចំណែករថយន្តដែលឃាត់បានមុនគេ គឺជាបក្ខពួកតែមួយដែលកំលាំងតម្រួតបានរកឃើញ
អាវុធមួយដើមប្រភេទរ៉ូឡូ ដោយមានបង់មួយ និងគ្រាប់ចំនួន៦គ្រាប់ នៅពេលនោះដែរសមត្ថកិច្ចថៃបានដកហូតរថយន្តចំនួន៣គ្រឿង ព្រមទាំងបាននាំខ្លួនមនុស្សចំនួន៧នាក់ដើម្បីយកទៅសាកសួរនៅអង្គភាពជំនាញ ប្រឆាំងគ្រឿងញៀនខេត្តឈុំផន ដែលកំលាំង
ជំនាញបានធ្វើការវាយតម្លៃថា កញ្ឆាទាំងអស់នេះគឺមានតម្លៃប្រហែល១៥លានបាត ។
ជនសង្ស័យទាំង៧នាក់នោះរួមមាន ១ ធិ សាផន ភេទប្រុស អាយុ៣១ឆ្នាំ ២ ព្រំ លិខិតភេទស្រី អាយុ៣១ឆ្នាំ ៣ ប៉ាន់ ភុត ភេទប្រុស អាយុ៤៩ឆ្នាំ ៤ បុណ្យ ហៀង ភេទស្រីអាយុ៣៧ឆ្នាំ ៥ មិត្ត និយម ភេទប្រុស អាយុ៣៧ឆ្នាំ ៦ ខាំឡា ភេទស្រី អាយុ៣៧ឆ្នាំ៧ អេ ណាមសមុទ្រ ភេទប្រុស អាយុ១៧ឆ្នាំ ។ បច្ចុប្បន្នមុខសញ្ញាទាំងអស់នេះ រួមទាំងវត្ថុតាង និងអាវុធខុសច្បាប់ត្រូវបានកំលាំងរៀបចំឯកសារដើម្បីបញ្ជូនទៅកាន់តុលាការហើយ និងចាត់វិធានការតាមផ្លូវច្បាប់៕

ជនជាតិភ្នងម្នាក់ត្រូវខ្មាន់កាំភ្លើងបាញ់ស្លាប់លើអង្រឹងក្នុងផ្ទះ

February 18, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយ៖សុខណាត

ខេត្តមណ្ឌលគីរី ៖នៅវេលាម៉ោង២១ និង២៦នាទី ថ្ងៃទី១៧ ខែកុម្ភៈ ឆ្នាំ២០១៦ មានករណីឃាតកម្ម បាញ់ស្លាប់មនុស្សម្នាក់នៅចំណុចក្រុមគែរពៅ ភូមិក្លងឡែ ឃុំសុខសាន្ត ស្រុកកោះញែក ខេត្តមណ្ឌលគិរី ដោយមិន ទាន់ដឹងមូលហេតុ។

ជនរងគ្រោះឈ្មោះ ផ្លាល ព្យុ ភេទប្រុស អាយុ២៧ឆ្នាំ ជនជាតិភ្នង ទីលំនៅ ភូមិ ឃុំកើតហេតុ។

សមត្ថកិច្ចបញ្ជាក់ថា មិនទាន់ដឹងថាជនល្មើសបានប្រើកាំភ្លើងអ្វីនោះទេព្រោះមិនទាន់រកឃើញសំបកគ្រាប់ឃើញ។ ជនរងគ្រោះត្រូវគេបាញ់ខណៈ ដែលកំពុងដេកអង្រឹងក្នុងផ្ទះចំនួន១គ្រាប់ចំក្បាលពីខាងក្រោយធ្លាយមកចំកណ្តាលថ្ងាស ក្រោយពីបាញ់រួចជនល្មើសបានរត់គេចខ្លួន ។

សមត្ថកិច្ចនៅមិនទាន់អះអាងពីអត្តសញ្ញាណរបស់ជនល្មើសនៅឡើយទេ ហើយក៏មិនបញ្ជាក់ពីមូលពិតនៃការលបធ្វើឃាតនេះដែរ ប៉ុន្តែបានប្រាប់ថា កំពុងតាមស្រាវជ្រាវតាមចាប់ខ្លួនជនដៃដល់យ៉ាងយកទុកដាក់៕