ដោយ៖សហការី
ខេត្តព្រះវិហារ ៖ បុរសជនជាតិចិន២នាក់ជាបុគ្គលិកក្រុមហ៊ុនចិន ដាំអំពៅ បានស្លាប់បាត់បង់ជីវិត នៅពេលដឹកទៅដល់មន្ទីរពេទ្យបង្អែកខេត្ត និងបុគ្គលិកខ្មែរម្នាក់ទៀតរងរបួសធ្ងន់ក្នុងជម្លោះហិង្សាដ៏សាហាវមួយដោយ សាររឿងគំនុំចាស់ដណ្តើមស្រីស្នេហ៍ខារ៉ាអូខេម្នាក់។
ករណីនេះ បានកើតទ្បើងនៅវេលា ម៉ោង១២ និង០៥នាទីយប់ឈានចូលថ្ងៃទី២២ ខែកុម្ភៈ ឆ្នាំ២០១៦ ស្ថិតនៅភូមិពោធិ៍ទាប ឃុំម្លូរព្រៃ២ ស្រុកឆែប ក្បែររដ្ឋបាល ក្រុមហ៊ុនដាំអំពៅ។
ប្រភពព័ត៌មានផ្សេងទៀតបានអោយដឹងថា មុនកើតជម្លោះរវាងភាគីខ្មែរ និងជនជាតិចិន គឺនៅយប់ថ្ងៃទី២១ ខែកុម្ភៈ ឆ្នាំ២០១៦ ជនជាតិចិនមកពីក្រុមហ៊ុនដាំអំពៅ២នាក់ និងបុគ្គលិកខ្មែរម្នាក់ចូលទៅច្រៀងខារ៉ាអូខេ ក្នុងហាងសាមញ្ញមួយកន្លែងមានយីហោឈ្មោះ ផ្កាយរាត្រី។ពួកគេកម្សាន្តនៅទីនោះរហូតមកដល់ម៉ោង១២ និង០៥នាទីយប់ ឈានចូលថ្ងៃទី២២ ខែកុម្ភៈ ម្នាក់ៗស្រវឹងរៀងៗខ្លួនក៏មានរឿងជម្លោះហិង្សាកាប់ចាក់គ្នាយ៉ាងសាហាវមួយបានកើតទ្បើង នៅតាមដងផ្លូវក្រៅកន្លែងកម្សាន្ត ត្រង់ចំណុចច្រកចូលទៅរដ្ឋបាលក្រុមហ៊ុនចិនទល់មុខស្ថានីយ សាំងការដ្ឋានចិនដែលនៅឆ្ងាយផុត ពីហាងខារ៉ាអូខេ ប្រមាណ១គីទ្បូម៉ែត្រ។
តាមសេចក្តីរាយការណ៍បានឲ្យដឹងថា ស្ថានភាពមុខរបួសជនជាតិចិនម្នាក់ ត្រូវគូជម្លោះជនជាតិខ្មែរម្ខាងទៀត ប្រើកាំបិតមុខស្រួចប្រវែងកន្លះម៉ែត្រ ចាក់ត្រូវចំក្រលៀនក្បែរចង្កេះចំនួន២កាំបិត ជនជាតិចិនម្នាក់ទៀត ចាក់ត្រូវស្មា និងខ្នងសុះពេញខ្លួន រីឯបុគ្គលិកខ្មែរម្នាក់ត្រូវខ្នងច្រើនកាំបិតរងរបួសធ្ងន់។ទីតាំងកើតហេតុការណ៍ឃើញមានឈាមរបស់ជនរងគ្រោះទាំង៣នាក់ កកជោកជាំនៅលើថ្នល់។
ម្ចាស់ហាងខារ៉ាអូខេដែលមិនប្រាប់ឈ្មោះ បានអោយក្រុមអ្នកសារព័ត៌មានក្នុងស្រុកដឹងនៅព្រឹកថ្ងៃទី២២ ខែកុម្ភៈ នេះថា ជម្លោះកាប់ចាក់សម្លាប់គ្នាបណ្តាលអោយជនជាតិចិន២នាក់ ស្លាប់ និងបុគ្គលិកខ្មែរម្នាក់ទៀតរបួសធ្ងន់មិនពាក់ព័ន្ធកន្លែងខារ៉ាអូខេ របស់គាត់ទេ គឺហាង ខារ៉ាអូខេរបស់គាត់បានបិទទ្វារ ឈប់អោយច្រៀងកម្សាន្ត តាំងពីម៉ោង១១ យប់ម្ល៉េះ។រហូតដល់ព្រឹកថ្ងៃទី២២ ខែកុម្ភៈ ទើបគាត់ដឹងថា ទីតាំងជម្លោះ កើតទ្បើងនៅទល់មុខស្ថានីយសាំងក្រុមហ៊ុនចិន នៅឆ្ងាយពីហាងខារ៉ាអូខេរបស់គាត់ ។
អាជ្ញាធរស្រុកឆែប បានអោយដឹងយ៉ាងខ្លីថា ករណីជម្លោះហិង្សាបណ្តាល អោយជនជាតិចិន២នាក់ស្លាប់ និងខ្មែរម្នាក់របួសធ្ងន់បណ្តាលមកពីប្រកែកគ្នារឿងអាប់លុយកាក់ខុស។
អ្នកយកព័ត៌មានមិនអាចទាក់ទងលោកអធិការ ស្រុកឆែបបានទេ ដើម្បីសាកសួរពីជម្លោះហិង្សា ដ៏សាហាវខាងលើនេះដោយទូរស័ព្ទលោកទាក់ទងមិនបានទេនៅថ្ងៃនេះព្រឹកម៉ិញនេះ ។
បើយោងតាមប្រភពពីប្រជាពលរដ្ឋដែលដឹងហេតុការណ៍បានអោយដឹងថា ក្រោយកើតហេតុការណ៍ឃើញកំលាំងនគរបាលស្រុកខេត្ត បានចុះទៅឃាត់ខ្លួនមនុស្សសង្ស័យចំនួន៦នាក់ នាំខ្លួនទៅសាកសួរនៅស្នងការដ្ឋាននគរបាលខេត្តព្រះវិហារ ។ក្នុងយប់នោះ ក្រោយកើតហេតុការណ៍បន្តិច ជនជាតិប្រមាណ១០០នាក់នាំគ្នាចេញមកពីការដ្ឋានក្រុមហ៊ុនចិនកេណ្ឌគ្នា មកជួយគ្នារបស់គេប៉ុន្តែ ជនដៃដល់បានសំងំក្នុងផ្ទះក្បែរៗនោះហើយជនជាតិចិនបានយកដំថ្មគប់ ទៅលើដំបូលផ្ទះរបស់ឈ្មោះ ថា ភេទប្រុសដែលគាត់មានកូនប្រុស២នាក់ ដែលពួគេសង្ស័យជាជនដៃដល់។
ព័ត៌មានទទួលបាននៅវេលាម៉ោង ១២រសៀល ថ្ងៃទី២២ ខែកុម្ភៈ នេះបានអោយដឹងថា ស្ដ្រីម្ចាស់ហាងខារ៉ាអូខេម្នាក់ និងពលរដ្ឋម្នាក់ទៀតត្រូវបាននគរបាលជំនាញ អនុញ្ញាតអោយទៅផ្ទះវិញក្រោយពីសាកសួររួច។ រីឯបុរសជាជនសង្ស័យ៤នាក់ ក្នុងនោះជនសង្ស័យម្នាក់ឈ្មោះ ថា និងកូនប្រុសរបស់ខ្លួន២នាក់ រួមទាំងជនសង្ស័យ ទៀតទៀតកំពុងស្ថិតក្នុងស្នងការដ្ឋាន នគរបាលនៅទ្បើយ។រីឯអត្តសញ្ញាណជនរងគ្រោះ និងជនសង្ស័យមិនទាន់បានដឹងច្បាស់ នោះទេដោយសារ សមត្ថកិច្ចមិនបានផ្ដល់ព័ត៌មានដល់អ្នកសារព័ត៌មានឲ្យបានដឹងលំអិតពីករណីនេះឡើយ ។
យោងតាមប្រភពពីក្រុមអ្នកកាសែតប្រចាំខេត្តព្រះវិហារបាននាំគ្នាលើកឡើងថា ករណីហិង្សារវាងជនជាតិចិន និងខ្មែរខាងលើនេះ សមត្ថកិច្ចហាក់ដូចជាព្យាយាមលាក់បាំងជាមួយក្រុមអ្នកកាសែតដោយមិនដឹងថាមានមូលហេតុអ្វីនោះទេ។
គួរជម្រាបថា នគរបាលជំនាញមិន អនុញ្ញាតអោយអ្នកសារព័ត៌មាន ប្រចាំខេត្តព្រះវិហារចូលទៅក្នុងស្នងការដ្ឋាននគរបាលខេត្តដើម្បីយកព័ត៌មាន និងថតរូបជនសង្ស័យទាំង៤នាក់ នោះទ្បើយ។មិនមែនតែរឿងនេះទេ គឺមានច្រើនករណីរួចមកហើយដែលសមត្ថកិច្ចក្នុងខេត្តព្រះវិហារ នៅតែមានអាថ៌កំបាំងជានិច្ចមិនផ្តល់ព័ត៌មានជាក់លាក់ដល់អ្នកសារព័ត៌មាន នោះឡើយ។ការលាក់លៀមមិនក្លាហានក្នុងការផ្តល់ព័ត៌មានដល់អ្នកកាសែតត្រូវគេមើលឃើញថា ដើម្បីបិទបាំងភាពកំសោយក្នុងការគ្រប់គ្រងសុវត្ថិភាពអាណាចក្រដែលខ្លួនគ្រប់គ្រង។
ទោះបីជាយ៉ាងណាក្តី ក៍អ្នកយកព័ត៌មាននឹងព្យាយាមសុំការពន្យល់ពីសមត្ថកិច្ចពីករណីជម្លោះនៅហាងខារ៉ាអូខេខាងលើនេះនៅពេលក្រោយជាបន្តទៀត៕
