ភ្នំពេញ៖ « បងស្រឡាញ់អូនអត់មានលេងសើចទេ បើសិនជាអាចបងចង់ឲ្យគ្រប់យ៉ាងក្លាយជាការពិតដូចយើងនិយាយ គ្នា! បើទោះបីជាបងអត់មានទ្រព្យសម្បត្តិច្រើនដូចគេ បងអត់ពូកែរកស៊ីដូចគេ ប៉ុន្តែបងនឹងឲ្យអូនសើចច្រើនជាងយំនិងមានក្ដីសុខច្រើនជាងកើតទុក្ខ »។ លោក ប៉ែន ចំរ៉ុង និយាយបែបនេះនៅក្នុងកម្មវិធី សើចម្មង របស់ទូរទស្សន៍ ភីអ៊ិនអ៊ិន កាល ពីថ្ងៃសៅរ៍ ខណៈនាង ភិន សុដាលិស ចូលរួមជាតារាកិត្តិយស។
ជាថ្មីម្តងទៀត លោក ប៉ែន ចំរ៉ុង បានបញ្ជាក់ដោយផ្ទាល់មាត់ពីក្ដីស្រឡាញ់របស់លោកចំពោះ ភិន សុដាលីស ដែលថាមិនមែនជាការស្រឡាញ់បែបលេងសើចនោះទេ ហើយលោកក៏នឹងប្ដេជ្ញាទទួលយកនាងដោយគ្មានលក្ខណ្ឌដែរ បើទោះជាត្រូវលោក អ៊ិន សុភិន ជាឪពុក និងក្រុមគ្រួសារកាត់កាលចោល ដែលមិនខុសពីនារីមានតែសម្បកខ្លួនក៏ដោយ។ ចំណែកក្រុមគ្រួសាររបស់លោក ប៉ែន ចំរ៉ុង ក៏បានអះអាងដូចគ្នានេះដែរ។
គួរជម្រាបថា នៅក្នុងកម្មវិធី សើចម្មង របស់ទូរទស្សន៍ ភីអ៊ិនអ៊ិន កាលពីថ្ងៃសៅរ៍ កន្លងមកនេះ លោក ប៉ែន ចំរ៉ុង ដែលជាពិធីករបានឆ្លៀតលាតត្រដាងពីជីវិតស្នេហាជាសាធារណៈខណៈនាង ភិន សុដាលីស ដែលជាមួយគូស្នេហ៍របស់ខ្លួនចូលរួមជាតារាកិត្តិយស។
លោក ប៉ែន ចំរ៉ុង បានលត់ជង្គង់ជូនផ្កាទៅនាង និងបាននិយាយថា៖ “បងស្រឡាញ់អូនអត់មានលេងសើចទេ បើសិនជាអាចបងចង់ឲ្យគ្រប់យ៉ាងក្លាយជាការពិតដូចយើងនិយាយ គ្នា! បើទោះបីជាបងអត់មានទ្រព្យសម្បត្តិច្រើនដូចគ្នា បងអត់ពូកែរកស៊ីដូចគេ ប៉ុន្តែបងនឹងឲ្យអូនសើចច្រើនជាងយំនិងមានក្ដីសុខច្រើនជាងកើត ទុក្ខ!។ បងនឹងឲ្យអូនទទួលគ្រប់យ៉ាងដែលអូនប្រាថ្នា… បងនឹងព្យាយាមឲ្យអស់ពីលទ្ធភាព!”។
លោក ប៉ែន ចំរ៉ុង ថ្លែងដោយមោទនភាពថា លោកគឺជាមនុស្សប្រុសតែម្នាក់គត់ដែលមានសំណាងជាងគេលើលោក ដោយសារតែបាន ភិន សុដាលីស ស្រឡាញ់ពេញចិត្ត។ លោកបានប្រកាសជាសាធារណៈថានឹងរួមរស់ជាមួយនាងជាប្ដីប្រពន្ធ បើទោះជា ភិន សុដាលីស មិនត្រូវបានឪពុកម្ដាយ និងក្រុមគ្រួសាររាប់រកដែលមានន័យថា នាងគឺមានតែសម្បកខ្លួននោះក៏ដោយ។
ពាក្យពេចន៍ជាសាធារណៈរបស់លោកមានន័យគ្រប់គ្រាន់ប្រឆាំង នឹងការបដិសេធរបស់លោកអ៊ិន សុភិន និងគ្រួសារដែលធ្លាប់លើកឡើងថាមិនអាចទទួលយកប៉ែន ចំរ៉ុង គឺដោយសារតែយល់ថាលោកមិនបានស្រលាញ់កូនស្រីខ្លួនដោយស្មោះត្រង់។
កញ្ញា ភិន សុដាលីស ធ្លាប់បានអះអាងប្រាប់បណ្តាញព័ត៌មានក្នុងស្រុកថា នាង និងប៉ែន ចំរ៉ុង ពិតជាបានសម្រេចចិត្តរួមរស់ជាមួយគ្នា បើទោះជាឪពុករបស់នាងមិនគាំទ្រក៏ពិតមែន។ នាងថា នាងនឹងវេចបង្វេចទៅរស់នៅជាមួយលោក ប៉ែន ចំរ៉ុង ក្រោយពីឯកសារអេតាស៊ីវិលធ្លាក់មកពីឃុំសង្កាត់ ហើយប្ដេជ្ញារកស៊ីចិញ្ចឹមគ្នាដោយមិនខ្វល់រឿងផ្ចង់ផ្ដើមពីឪពុក និងក្រុមគ្រួសារនោះទេ។
នាងនិយាយថា៖ “ទោះជាប៉ាគាត់យល់ឃើញយ៉ាងម៉េច ប៉ុន្តែខ្ញុំនឹងពិសោធន៍ឲ្យគាត់ឃើញថាបង ចំរ៉ុង អត់ត្រូវការទ្រព្យសម្បត្តិគាត់ទេ ហើយគ្រួសារគាត់(ប៉ែន ចំរ៉ុង)ក៏មិនដែលខ្វល់រឿងខ្ញុំជាកូនអ្នកមាន ឬសល់តែសំបកខ្លួនអីទេ ត្រង់ហ្នឹងហើយដែលខ្ញុំសុខចិត្តចុះអេតាស៊ីវិលជាមួយគាត់ ហើយទៅរួមរស់ជាមួយគ្នារកស៊ីចិញ្ចឹមគ្នា!”។
បងប្រុសរបស់លោកប៉ែន ចំរ៉ុង គឺលោក ប៉ែន រស់ ត្រូវបានបណ្តាញ ព័ត៌មានក្នុងស្រុក ដកស្រង់សំដីថា ទោះជាលោក អ៊ិន សុភិន ប្រកាន់ជំហរមិនទទួលស្គាល់ ភិន សុដាលីស ជាកូនស្រី ដែលមានន័យមិនគិតគូរនាងសូម្បីតែមួយសេនខ្មែរក៏ដោយ ក៏គ្រួសាររបស់លោកនិងប៉ែន ចំរ៉ុង ប្អូនលោកផ្ទាល់អត់ខ្វល់និងនៅតែគាំទ្រភិន សុដាលីស ជាសាច់ថ្លៃម្នាក់។
លោកនិយាយថា៖ “ទោះជាឲ្យមួយលាន ដុល្លារក៏អត់ដូរដែរ គឺខ្ញុំសុខចិត្តយកប្អូនថ្លៃដែលគ្មានគ្មានមួយសេនអញ្ចឹង ហើយខ្ញុំសូមបញ្ជាក់ ថា គ្រួសារខ្ញុំទាំងអស់នឹងជ្រោមជ្រែងដាលីស និងចំរ៉ុង ឲ្យក្លាយជាប្ដីប្រពន្ធដែលមានសុភមង្គល ទោះជាមួយជីវិតហ្នឹង ដាលីសអត់មានសាច់ញាតិខាងគាត់ទទួលស្គាល់យ៉ាងណាក៏ដោយ!”។ លោកថាសម្រាប់គ្រួសារផ្សេងនឹងទាញខាងប្រុសរបស់ខ្លួន ទៅរកនារីផ្សេង នៅពេលទទួលសម្ពាធកាត់កាលរបស់ក្រុមគ្រួសារខាងស្រី ប៉ុន្តែសម្រាប់ប្អូនលោកនិងក្រុមគ្រួសាររបស់លោកទាំងមូល គឺទទួលយកដាលីសដៃពីរ អត់ខ្វល់រឿងធ្លាក់ខ្លួនគ្មានឪពុកម្ដាយគិតគូរ ឬធ្លាក់ដល់បាតដាលណានោះទេ។
លោកនិយាយថា៖ “ពួកខ្ញុំអត់ចង់ ឲ្យដាលីសមានរឿងអញ្ចឹងទេ ប៉ុន្តែបើគ្នាជ្រុលជាត្រូវឪពុកម្ដាយកាត់កាលអញ្ចឹង គឺកាន់តែផ្ដល់ភាពកក់ក្ដៅឲ្យម្មង ហើយបើទោះជាយកលុយ១លានដុល្លារមកជះឲ្យពួកខ្ញុំស្អប់ខ្ពើម នាងក៏អត់ដែរ!”។
ឆ្លើយតបនឹងការវិវត្តចំពោះរឿងរ៉ាវស្នេហានេះ លោកអ៊ិន សុភិន បានថ្លែងប្រាប់ថា មិនមានការចាប់អារម្មណ៍ឡើយ។ លោកថា៖ “ចង់គេថា ខ្ញុំផ្ដាច់ការជារឿងរបស់គេ ព្រោះវាមិនដែលសុខៗពួកខ្ញុំម៉ាពូជសម្រេចអញ្ចឹងទេ!។ ខ្ញុំនៅតែសុំបញ្ជាក់ថា ចង់គេ(ដាលីស និងប៉ែន ចំរ៉ុង)និយាយយ៉ាងម៉េច ប្ដេជ្ញាយ៉ាងមិចស្រេចតែគេទៅ សម្រាប់ខ្ញុំអត់ខ្វល់!”។ លោកបន្តថា ដាលីស មានសិទ្ធិជ្រើសយក ប៉ែន ចំរ៉ុង មិនស្ដាប់បង្គាប់ឪពុកម្ដាយ ដូច្នេះលោក និងក្រុមគ្រួសារក៏មានសិទ្ធិអត់ខ្វល់ពីស្នេហារបស់ពួកគេដូចគ្នា។
លោកបញ្ជាក់ថា លោកនៅតែប្រកាន់ជំហរមិនបន្ទន់ចិត្តនោះទេ បើទោះជា ប៉ែន ចំរ៉ុង និងក្រុមគ្រួសារប្រកាសទទួលយកដាលីស ទោះជានាងនៅសល់តែសំបកខ្លួនក្តី ប៉ុន្តែលោកបានសម្ដែងការអបអរបើ ប៉ែន ចំរ៉ុង និងក្រុមគ្រួសាររាបស់គេស្រឡាញ់ពេញចិត្តកូនស្រីរបស់លោកបានយូរអង្វែង៕ដោយ៖ រដ្ឋា
លោក ប៉ែន ចំរ៉ុង និងភិន សុដាលីស (រូបថតពីហ្វេសប៊ុក)
