ខេត្តកំពង់ស្ពឺ ៖ ករណីឃាតកម្មដ៏កម្រមួយបានកើតឡើង ដោយជនសង្ស័យ ធ្វើសកម្មភាពឡើងចាប់រំលោភសេពសន្ថៈវៈបានសម្រេចលើស្ត្រីពិការ គ ថ្លង់ ម្នាក់ ហើយសម្លាប់យកសពដេកឱប បង្កឲ្យភ្ញាក់ផ្អើល កាលពីវេលាម៉ោង ១២រំលងអាធ្រាត្រ ចូលថ្ងៃទីខែធ្នូ ឆ្នាំ២០១៨ នៅភូមិក្រាំងឈើនាង ឃុំមហាឫស្សី ស្រុកគងពិសី ខេត្តកំពង់ស្ពឺ ។
អ្នកស្រុកបានឲ្យដឹងថា ស្ត្រីរងគ្រោះជាមនុស្សកំព្រាគ្មានឪពុកម្តាយរស់នៅម្នាក់ឯង ជីវភាពខ្វះខាត មិនតែប៉ុណ្ណោះ ជាមនុស្សពិការ គ ថ្លង់ និយាយមិនកើត ស្ដាប់អ្វីមិនឮ ទៀតផង ។
សមត្ថកិច្ចបានឲ្យដឹងថា ជនសង្ស័យឈ្មោះ យ៉ុក សារ៉ាត់ ភេទប្រុស អាយុ៣៣ឆ្នាំ មានទីលំនៅភូមិព្រៃអន្ទាវ ឃុំស្តុក ស្រុកគងពិសី ខេត្តកំពង់ស្ពឺ ។ ចំណែកស្ត្រីរងគ្រោះ យ៉ា សាវរី ហៅតី អាយុ៣៣ឆ្នាំ ជាមនុស្សពិការ គ ថ្លង់ រស់នៅភូមិ ឃុំខាងលើ ។
ប្រភពដដែលបានរំលឹកហេតុការណ៍ ថា ខណៈដែលជនរងគ្រោះកំពុងតែនៅផ្ទះម្នាក់ឯង ជនសង្ស័យខាងលើ បានលបលួចឡើងទៅលើផ្ទះស្ត្រីរងគ្រោះហើយធ្វើសកម្មភាពចាប់រំលោភ រួចសម្លាប់ស្ត្រីរងគ្រោះតែម្តង តែដំណឹងនេះបានបង្កឲ្យមានការភ្ញាក់ផ្អើលដល់ប្រជាពលរដ្ឋក្នុងភូមិ ជនសង្ស័យគេចទៅណាមិនរួច ក៏សំងំនៅលើផ្ទះយកសាកសពដេកឱប រហូតដល់កម្លាំងសមត្ថកិច្ចឡោមព័ទ្ធចាប់ខ្លួនបាន និងនាំទៅសាកសួរនៅផ្នែកជំនាញអធិការដ្ឋាននគរបាលស្រុកគងពិសី ដើម្បីបន្តតាមនីតិវិធី៕
ភ្នំពេញ ៖ កីឡាករគុនខ្មែរ ចាន់ រតនា បានផ្តួលកីឡាករឥណ្ឌូនេស៊ី ដែលមិនធ្លាប់ចាញ់ Abro Fernandes ក្នុងទឹកទី២ នៅកម្មវិធី ONE: Destiny of Champions របស់ស្ថាប័ន ONE Championship នៅទីក្រុងកូឡាឡាំពួរ ប្រទេសម៉ាឡេស៊ី នាល្ងាចថ្ងៃទី៧ ខែធ្នូ ឆ្នាំ២០១៨ ។
ដោយឡែកកីឡាការិនីខ្មែរ-អាមេរិកាំង ឯម សុវណ្ណារី បានបន្តកំណត់ត្រាឈ្នះក្នុងអាជីព MMA ក្រោយយកឈ្នះកីឡាការិនី អ៊ុយក្រែន IRYNA KYSELOVA ក្នុងទឹកទី១ នៅក្នុងកម្មវិធី ONE: Destiny of Champions របស់ស្ថាប័ន ONE Championship នៅទីក្រុងកូឡាឡាំពួរ ប្រទេសម៉ាឡេស៊ី នាល្ងាចថ្ងៃទី៧ ខែធ្នូនេះដូចគ្នា។
នេះជាជ័យជម្នះលើកទី៣ ក្នុងអាជីពរបស់សុវណ្ណារី ហើយក៏ជាជ័យជម្នះលើកដំបូង ក្នុងការឈានជើងចូលប្រឡូកនៅក្នុងទ្រុង ONE Championship ផងដែរ។ ២ប្រកួតកន្លងមក សុវណ្ណារី បានយកឈ្នះគូប្រកួត ក្នុងការប្រកួតនៅលើទឹកដីសហរដ្ឋអាមេរិក៕
ភ្នំពេញ ៖ នៅថ្ងៃសុក្រទី៧ ខែធ្នូ ឆ្នាំ២០១៨ មន្ត្រីសាខាកាំកុងត្រូលផែស្ងួតចុងទីភ្នំពេញ សាខាកាំកុងត្រូលកំពង់ផែអន្តរជាតិភ្នំពេញ សាខាកាំកុងត្រូលតំបន់សេដ្ឋកិច្ចពិសេសភ្នំពេញ សាខាកាំកុងត្រូលតំបន់សេដ្ឋកិច្ចពិសេសភ្នំពេញ Kerry World Bridge Logistic និងសាខាកាំកុងត្រូលរាជធានីភ្នំពេញ ដោយទទួលបានការចូលរួមសហការពីមន្ត្រីមន្ទីរពិសោធន៍ និងគណៈកម្មការផ្សារ បានចុះធ្វើសកម្មភាពនៅតាមបណ្តាផ្សារសំខាន់ៗ ចំនួន ០៨ នៅរាជធានីភ្នំពេញមានដូចជា ៖ ផ្សារច្បារអំពៅ ផ្សារជម្ពូវ័ន ផ្សារអូរឡាំពិក ផ្សារអូរឬស្សី ផ្សារដើមគរ ផ្សារស្ទឹងមានជ័យ ផ្សារធំថ្មី និងផ្សារទួលទំពូង។ គោលដៅសំខាន់នៃការត្រួតពិនិត្យគឺដើម្បី ស្រាវជ្រាវ ទប់ស្កាត់ការចរាចរណ៍ទំនិញខូចគុណភាព ក្លែងបន្លំស្លាកសញ្ញា ផុតកំណត់កាលបរិច្ឆេទប្រើប្រាស់ និងមានសារធាតុគីមីហាមឃាត់ ។
ក្នុងសកម្មភាពនេះ មន្ត្រីជំនាញបានធ្វើតេស្តបឋមទៅលើផលិតផលម្ហូបអាហារមួយចំនួន ដូចជា ៖ ម៉ាំល្ហុង សាច់ក្រកសាច់គោ យ៉ាហឺផាត់ បង្គាក្រៀម ស្លឹកគ្រៃបុក ខ្ញីហាន់ គ្រឿងសមុទ្រ គុយទាវសរសៃតូច លត បាញ់កាញ់ មីគ្រប់មុខ ទឹកខ្មេះគ្រប់ប្រភេទ ប្រហិតគ្រប់មុខ ជ្រក់គ្រប់មុខ សាច់ក្រក ត្រីងៀតគ្រប់មុខ និងទំនិញវេចខ្ចប់ស្រាប់ ដើម្បីរកសារធាតុគីមីហាមឃាត់ដែលអាចធ្វើឱ្យប៉ះពាល់ដល់សុខភាពប្រជាពលរដ្ឋ ។ ជាមួយគ្នានោះ មន្ត្រីជំនាញ បានធ្វើការត្រួតពិនិត្យរកភាពមិនអនុលោមនៅលើសំបកវេចខ្ចប់ផលិតផលម្ហូបអាហារផងដែរ ។
ជាលទ្ធផលមន្ត្រីជំនាញ បានរកឃើញភាពមិនប្រក្រតីលើគំរូ នំស្លឹកស្រស់ និងនំស្រួយ មានផ្ទុកសារធាតុគីមីហាមឃាត់បូរ៉ាក់ ប្រមាណ ១២ គីឡូក្រាម នៅផ្សារអូរឬស្សី ហើយមន្ត្រីកាំកុងត្រូលបានធ្វើកំណត់ហេតុដកហូតទៅតាមនិតិវិធី និងធ្វើការកម្ទេចចោលនៅនឹងកន្លែង ព្រមទាំងអញ្ជើញអាជីវករមកធ្វើកិច្ចសន្យាបញ្ចប់ការទទួលលក់រហូតដល់កែប្រែគុណភាពហើយ។
ជាមួយគ្នានោះមន្ត្រីអគ្គនាយកដ្ឋានកាំកុងត្រូលក៏បានធ្វើការណែនាំដល់អាជីវករឲ្យយល់ដឹង និងអនុវត្តទៅតាមច្បាប់ ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា ជៀសវាងបង្កផលប៉ះពាល់ដល់សុខភាពប្រជាពលរដ្ឋ និងអាចប្រឈមចំពោះមុខច្បាប់ថែមទៀត ៕
ភ្នំពេញ ៖ សម្ដេច ហ៊ុន សែន និងក្រុមមេដឹកនាំប្រទេសឡាវ បានឯកភាពគ្នា បន្តស្វែងរកដំណោះស្រាយបញ្ចប់បញ្ហាព្រំដែនដែលនៅសេសសល់ ដោយស្នើឲ្យរដ្ឋាភិបាលបារាំង ផ្ញើឯកសារព្រំដែន និងផែនទីរវាងប្រទេសទាំងពីររួមទាំងអ្នកជំនាញ ដើម្បីសម្រួលដល់ការដោះស្រាយបញ្ចប់ការខ្វែងគំនិតគ្នាលើការកំណត់ខណ្ឌសីមានៃប្រទេសទាំងពីរ។
សម្ដេច ហ៊ុន សែន បានលើកឡើងថា នៅមានសេសសល់ប្រមាណ ១៤% ទៀតនៃបញ្ហាព្រំដែន ដែលត្រូវដោះស្រាយបញ្ចប់ ជាពិសេសនៅក្នុងតំបន់អូរតាង៉ាវ ដែលប្រទេសទាំងពីរនៅមិនទាន់ដោះស្រាយនៅឡើយ។ សម្ដេចនាយករដ្ឋមន្ត្រី ក៏បានឲ្យដឹងពីបំណងក្នុងការចង់ប្រែក្លាយតំបន់ព្រំដែនទាំងអស់នៅជាប់ប្រទេសកម្ពុជា ក្លាយទៅជាព្រំដែនសន្តិភាព មិត្តភាព និងសហប្រតិបត្តិការ សម្រាប់មនុស្សជំនាន់ក្រោយៗ។
សម្ដេច ហ៊ុន សែន បានបញ្ជាក់ឲ្យដឹងថា ប្រទេសទាំងពីរបានចាត់ទុកតំបន់អូរតាង៉ាវ ជាតំបន់ដែលមិនទាន់បានដោះស្រាយ ដោយផ្តោតទៅលើលក្ខខណ្ឌចំនួនប៣ ៖ ទី១ គឺគ្មានវត្តមានកងទ័ពនៃប្រទេសទាំងពីរនៅតំបន់នោះ។ ទី២ គឺគ្មានប្រជាជនធ្វើអាជីវកម្មនៅទីនោះ និងទី៣ នៅពេលចុះត្រួតពិនិត្យ គឺភាគីទាំងពីរត្រូវតែធ្វើរួមគ្នា រួមទាំងលើគោក ផ្លូវទឹក និងផ្លូវអាកាស៕
ភ្នំពេញ ៖ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានអំពាវនាវឲ្យវិស័យឯកជនកម្ពុជា-វៀតណាម បង្កើនការវិនិយោគទៅវិញទៅមក ដើម្បីឈានទៅសម្រេចបាននូវទំហំពាណិជ្ជកម្មទ្វេភាគីចំនួន ៥ពាន់លានដុល្លារ ដែលបានកំណត់កាលពីឆ្នាំ២០១៥ និងកំណើនសេដ្ឋកិច្ចសម្រាប់ប្រជាជននៃប្រទេសទាំងពីរ។
ការអំពាវនាវរបស់លោករដ្ឋមន្ត្រី បានធ្វើឡើងកាលពីរសៀលថ្ងៃព្រហស្បតិ៍ទី៦ ខែធ្នូ ឆ្នាំ២០១៨ នេះ ក្នុងឱកាសចូលរួមបិទវេទិកាធុរកិច្ចវៀតណាម-កម្ពុជា ដែលរៀបចំឡើងនៅរដ្ឋធានីហាណូយ នៃសាធារណរដ្ឋសង្គមនិយមវៀតណាម ក្រោមអធិបតីភាព សម្ដេច ហ៊ុន សែន នាយករដ្ឋមន្ត្រីកម្ពុជា និងលោក ង្វៀង សួនហ្វ៊ុក (Nguyen Xuan Phuc) នាយករដ្ឋមន្ដ្រីវៀតណាម។
បច្ចុប្បន្នវៀតណាម គឺជាដៃគូវិនិយោគធំបំផុតទី៥ របស់កម្ពុជា។ ការវិនិយោគរបស់ក្រុមហ៊ុនវៀតណាម នៅប្រទេសកម្ពុជា មានប្រមាណ ២០៦គម្រោង ស្មើនឹងទឹកប្រាក់ ៣,០២ ពាន់លានដុល្លារ ខណៈក្រុមហ៊ុនរបស់កម្ពុជា វិនិយោគនៅប្រទេសវៀតណាម មានត្រឹមតែ ១៨គម្រោង ស្មើនឹងទឹកប្រាក់ ៥៨,១លានដុល្លារប៉ុណ្ណោះ៕
កោះកុង ៖ រដ្ឋបាលខេត្តកោះកុង នៅថ្ងៃទី៧ ខែធ្នូ នេះ បានជូនដំណឹងថា រថយន្តដឹកដី រថយន្តដឹកទំនិញធុនធ្ងន់ នឹងត្រូវធ្វើការផ្អាកការដឹកជញ្ជូនចេញ-ចូល ឆ្លងកាត់ក្រុង និងនៅក្នុងក្រុងខេមរភូមិន្ទ ខេត្តកោះកុង ដើម្បីចូលរួមការពារសណ្ដាប់ធ្នាប់ របៀបរៀបរយ សន្តិសុខ សុវត្ថិភាព និងដើម្បីជៀសវាងការកកស្ទះចរាចរណ៍ក្នុងពិធីបុណ្យសមុទ្រ និងលើកកម្ពស់សោភណ្ឌភាពក្នុងខេត្ត។
សូមជម្រាបថា រដ្ឋបាលខេត្តកោះកុង សហការជាមួយក្រសួងទេសចរណ៍ និងក្រសួង ស្ថាប័នពាក់ព័ន្ធ នឹងរៀបចំពិធីបុណ្យសមុទ្រ លើកទី៧ ជុំទី២ ចាប់ពីថ្ងៃទី១៤ ដល់ ១៦ ខែធ្នូ ឆ្នាំ២០១៨ ក្រោមអធិបតីភាព សម្ដេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេច ប៊ុន រ៉ានី ហ៊ុនសែន។
រដ្ឋបាលខេត្តកោះកុង បន្តថា រថយន្តដែលមានចំណុះទម្ងន់ចាប់ពី ៥តោនឡើងទៅ ត្រូវបញ្ឈប់ការធ្វើចរាចរណ៍ ចាប់ពីថ្ងៃទី១៣ ដល់ ទី១៦ ខែធ្នូ ឆ្នាំ២០១៨ ជាពិសេសថ្ងៃទី១៥ធ្នូ ចាប់ពីម៉ោង ៣រសៀលតទៅ៕
ភ្នំពេញ ៖ បុគ្គលិកក្រុមហ៊ុន Bhip Globol Cambodia បានលើកគ្នាប្រមាណជាង៣០០នាក់ បានធ្វើដំណើរមកដល់មុខភូមិគ្រឹះសម្តេច ហ៊ុន សែន ដើម្បីធ្វើការទាមទារលក្ខខណ្ឌការងារ៣ចំណុចធំៗ ហើយក៏ត្រូវបានរារាំងពីកម្លាំងអន្តរាគមន៍ចំរុះខណ្ឌដូនពេញ។ ហេតុការណ៍នេះធ្វើឡើងនៅវេលាម៉ោង១២និង៣០នាទីថ្ងៃត្រង់ទី៧ ខែធ្នូ ឆ្នាំ២០១៨ នៅមុខភូមិគ្រឹះសម្តេចតេជោ ហ៊ុន សែន ដែលស្ថិតក្នុងសង្កាត់ជ័យជំនះ ខណ្ឌដូនពេញ ។
យោងតាមការរៀបរាប់ពីក្រុមបុគ្គលិកក្រុមហ៊ុន Bhip Globol Cambodia បានលើកឡើងថា ក្រុមហ៊ុននេះមានទីតាំងស្ថិតនៅតាមបណ្តោយផ្លូវ ២៧១ ទល់មុខពេទ្យរ៉ុស្ស៊ី ហើយការមូលហេតុនៃការប្រមូលផ្តុំគ្នាមកភូមិគ្រឹះសម្តេចនេះ ដោយសារតែក្រសួងការងារបណ្តុះបណ្តាលវិជ្ជាជីវៈមិនមានដំណោះស្រាយការងារតាមសំណើរជូនពួកគាត់ មាន៣ចំណុចធំៗដូចជាចំណុចទី១៖ ត្រូវការឲ្យមានថ្នាក់ដឹកនាំពួកគាត់ដូចដើមវិញគឺឈ្មោះ ចន ប្រុស ទី២៖ទាមទារសិទ្ធិស៊េរីភាព ជាមួយក្រុមហ៊ុន ទី៣៖ ទាមទារអោយដក Maneger ចេញ។
ទោះយ៉ាងណាការទាមទាររបស់ក្រុមបុគ្គលិកប្រមាណជាង៣០០នាក់នៅមុខភូមិគ្រឹះរបស់សម្តេចតេជោ ហ៊ុន សែន ត្រូវបានរារាំងពីកងកម្លាំងអន្តគមន៍ចំរុះខណ្ឌដូនពេញ និងមានវត្តមានលោក សុខ ពេញវុធ អភិបាលខណ្ឌដូនពេញ ដោយបានអនុញ្ញាតអោយមានតំណាងក្រុមហ៊ុនចូលរួមដោះស្រាយបញ្ហានៅលើតុ ដោយមិនបណ្តោយឈរទាមទារយ៉ាងអនាធិបតេយ្យនៅតាមដងផ្លូវ តែចំពោះលទ្ធផលយ៉ាងណានោះ មិនទាន់ដឹងនៅឡើយទេ៕
ព្រះសីហនុ ៖ នៅថ្ងៃទី៦ ខែធ្នូ ឆ្នាំ២០១៨ មន្ត្រីសាខាកាំកុងត្រូលខេត្តព្រះសីហនុ បានការសហការពីអាជ្ញាធរដែន ដី បានចុះត្រួតពិនិត្យ និងតេស្តបឋមរកឃើញមានសារធាតុគីមីហាមឃាត់នៅក្នុងមឹកក្រៀម និង ងៀតត្រីបបែល ប្រមាណ១៨,៥០ គីឡូក្រាម ដែលដាក់លក់ក្នុងផ្សារលើ ក្រុងព្រះសីហនុ ។
អាជីវករដែលពាក់ព័ន្ធនឹរឿងនេះ ត្រូវបានអោយធ្វើកិច្ចសន្យាបញ្ឈប់ការដាក់លក់ ផលិតផលម្ហូប អាហារដែលមានដាក់លាយសារធាតុគីមីហាមឃាត់ដាច់ខាត ករណីរកឃើញជាលើកទីពីរទៀត នឹងត្រូវចាត់វិធានការតាមផ្លូវច្បាប់។
លោក ជា ប៉ិច អនុប្រធានសាខាកាំកុងត្រូលខេត្តព្រះសីហនុ ក៏បានផ្ដាំផ្ញើឱ្យបងប្អូនអាជីវករ និង ប្រជាពលរដ្ឋ ត្រូវយកចិត្តទុកដាក់បន្ថែមទៀត អំពីបញ្ហាគុណភាពទំនិញមុន និងដាក់លក់ ឬទិញ យកទៅបរិភោគ៕
ភ្នំពេញ ៖ តាមការគ្រោងទុក សាលាដំបូងរាជធានីភ្នំពេញ នឹងបើកសវនាការជំនុំជម្រុះលើសំណុំរឿងប្រធាន សហជីពធំៗ ចំនួន៦រូប នៅថ្ងៃទី៧ ខែធ្នូ ឆ្នាំ២០១៨ នេះ។
តាមលិខិតរបស់លោក លី សុផាណា តំណាងអយ្យការអមសាលាដំបូងរាជធានីភ្នំពេញ ដែលកោះ អញ្ជើញលោក ជួង ជូងី មេធាវីការពារសិទ្ធិឱ្យសហជីព២រូបក្នុងចំណោម៦រូប បានឱ្យដឹងថា ប្រធាន សហជីពទាំងនោះគឺ លោក អាត់ ធន់, លោក ម៉ម ញឹម, លោក ប៉ាវ ស៊ីណា, លោក ជា មុនី, លោក រ៉ុង ឈុន និងលោកស្រី យ៉ាង សោភ័ណ្ឌ។
សូមរំលឹកថា មេសហជីពទាំងនេះ ត្រូវបានចោទប្រកាន់ ពាក់ព័ន្ធនឹងការប្រព្រឹត្តបាតុកម្មហិង្សាដែល ប្រព្រឹត្តនៅចំណុចមុខសួនឧស្សាហកម្មកាណាឌីយ៉ាល់ ផ្លូវវ៉េងស្រេង កាលពីអំឡុងថ្ងៃទី២៥ ខែធ្នូ ឆ្នាំ២០១៣ រហូតដល់ថ្ងៃទី១៣ ខែមករា ឆ្នាំ២០១៤៕
ភ្នំពេញ ៖ លោក រ៉ុង ឈុន ប្រធានសហភាពសហជីពការងារ កាលពីថ្ងៃទី ៤ ខែធ្នូ បានសរសេរលិខិត ១ច្បាប់ ស្នើសុំសម្តេចនាយករដ្ឋមន្ត្រីតេជោ ហ៊ុន សែន ឲ្យទទួលរូបលោក និងគ្រូបង្រៀនសរុប១០នាក់ផ្សេងទៀត ឱ្យចូលបម្រើការងារវិញក្រោយពួកគាត់ត្រូវក្រសួងអប់រំបញ្ឈប់ពីការងារកាលពីខែមករា ឆ្នាំ ២០១៨។
គ្រូបង្រៀនចំនួន១០នាក់នោះ មកពីខេត្តកំពង់ចាម ព្រះសីហនុ ព្រៃវែង សៀមរាប កំពត និងបាត់ដំបង ដើម្បីបានចូលបម្រើការងារវិញ ។ លោកបញ្ជាក់ថា រូបលោក និងបុគ្គលិកអប់រំទាំង ១០ នាក់ត្រូវបានបញ្ឈប់ក្រោមការចោទប្រកាន់ថា បានឈប់ពីការងារដោយមិនមានការអនុញ្ញាត និងបោះបង់ការងារ។
លោក ឌី ខាំបូលី អ្នកនាំពាក្យក្រសួងអប់រំ យុវជន និងកីឡា មិនធ្វើអត្ថាធិប្បាយលម្អិតទេ ដោយគ្រាន់តែបញ្ជាក់ថា ក្រសួងមិនទាន់បានទទួលលិខិតនោះទេ ប៉ុន្តែលោកថា លិខិតនោះគឺសរសេរទៅកាន់លោកនាយករដ្ឋមន្ត្រី៕
ហាណូយ ៖ កាលពីល្ងាចថ្ងៃទី៦ ខែធ្នូ ឆ្នាំ២០១៨ ម្សិលមិញនេះ បន្ទាប់ពីបានអញ្ជើញមកដល់ប្រទេសវៀតណាមភ្លាម សម្ដេចតេជោ ហ៊ុន សែន បានអញ្ជើញចូលរួមក្នុងវេទិកាធុរកិច្ចវៀតណាម-កម្ពុជា ដែលធ្វើនៅរដ្ឋធានីហាណូយ ប្រទេសវៀតណាម មានការអញ្ជើញចូលរួមពីលោកនាយកលរដ្ឋមន្ត្រីវៀតណាម ង្វៀន សួនហ្វុក និងពាណិជ្ជករ អ្នកធុរកិច្ចវៀតណាមជាច្រើន រួមជាមួយនឹងសភាពាណិជ្ជកម្មកម្ពុជា និងវៀតណាមជាច្រើនរូបផងដែរ។
នៅក្នុងឱកាសនោះ សម្ដេចតេជោ ហ៊ុន សែន បានអញ្ជើញថ្លែងសុន្ទរថាគន្លឹះអំពីការរីកចម្រើនរបស់កម្ពុជានាពេលបច្ចុប្បន្ន ព្រមទាំងកាលានុវត្តភាព និងសក្ដានុពលវិនិយោគនៅកម្ពុជា។
សម្តេចតេជោបានមានប្រសាសន៍រំលឹកថា វៀតណាម និងកម្ពុជាបានចាប់ផ្តើមមានទំនាក់ទំនងល្អនឹងគ្នាជាយូរលង់ណាស់មកហើយ ដែលឆ្នាំ ២០១៨ នេះជាខួបលើកទី ៥១ នៃការបង្កើតទំនាក់ទំនងការទូតរវាងប្រទេសយើងទាំងពីរផងដែរ។ ក្នុងទំនាក់ទំនងពាណិជ្ជកម្ម ពាណិជ្ជកម្មសរុបរវាងកម្ពុជា និងវៀតណាម ក្នុងឆ្នាំ២០១៧ សម្រេចបានចំនួនប្រមាណ ២,១៣ ពាន់លានដុល្លារអាមេរិក កើនឡើងប្រមាណ ៣០% ធៀបនឹងឆ្នាំ ២០១៦ ។ ការនាំចេញពីប្រទេសកម្ពុជាទៅប្រទេសវៀតនៅមានទំហំតូចនៅឡើយ។ ជាក់ស្តែង ការនាំចេញរបស់កម្ពុជាទៅប្រទេសវៀតណាមក្នុងឆ្នាំ ២០១៧ មានចំនួន ៣៤២ លានដុល្លារអាមេរិក ធៀបនឹងការនាំចូលរបស់កម្ពុជាពីវៀតណាម ក្នុងឆ្នាំ ២០១៧ មានចំនួនប្រមាណ ១,៨ ពាន់លានដុល្លារអាមេរិក។
សម្តេចតេជោនៅតែបន្តអំពាវនាវ និងធានាជូនផងដែរ ដល់អ្នកវិនិយោគវៀតណាមដែលមិនទាន់បានមកកម្ពុជា អញ្ជើញមកសិក្សាស្វែងយល់ពីសក្ដា-នុពល និងកាលានុវត្តភាពវិនិយោគនៅកម្ពុជា ព្រមទាំងសម្រេចចិត្តបណ្ដាក់ទុនវិនិយោគ ដើម្បីទាញយកប្រយោជន៍ជាអតិបរមាពីកិច្ចសហប្រតិបតិ្តការទ្វេភាគីរវាងវៀតណាម និងកម្ពុជា៕
គណៈប្រតិភូរបស់ធីម៉ាក់ ដឹកនាំដោយ ឧត្តមសេនីយ៍ គ្រីតទីខន រ៉ាតសាមី ពូថានុន អគ្គនាយក រង ធីម៉ាក់ថៃ បានមកទស្សនកិច្ចនៅស៊ីម៉ាក់ ដើម្បីពង្រឹងកិច្ចសហប្រតិបត្តិការនៃស្ថាប័នទាំងពីរ។ អគ្គនាយកស៊ីម៉ាក់ បានស្នើឲ្យ ធីម៉ាក់ថៃ បង្ហាញទីតាំងឲ្យបានច្បាស់លាស់ ពីចំណុចដែលចង់ដោះ មីន នៅតាមតំបន់ព្រំដែន ដើម្បីងាយស្រួលស៊ីម៉ាក់ ដាក់ជូនថ្នាក់ដឹកនាំពិនិត្យ។
នៅក្នុងជំនួបពិភាក្សាគ្នានេះ អគ្គនាយករង ធីម៉ាក់ លោក ឧត្តមសេនីយ៍ គ្រីតទីខន រ៉ាតសាមី ពូថា នុន ចង់អញ្ជើញអគ្គនាយក ស៊ីម៉ាក់ ទៅប្រទេសថៃ ដើម្បីពិភាក្សាគ្នា អំពីតំបន់ណាដែលត្រូវបោស សំអាតមីន នៅតាមបន្ទាត់ ព្រំដែន។ យ៉ាងណា ឯកឧត្ដម ហេង រតនា បានអះអាងថា សំអាតមីន មិនមែនធ្វើរួមគ្នានោះទេ តែធ្វើដំណើរទីតាំងទាំងឡាយណា ដែលបានឯកភាពគ្នាមានបោះ បង្គោល ត្រឹមត្រូវ និងមានការ ឯកភាពពីគណៈកម្មការព្រំដែនទើបមានការបោស សម្អាត៕
ភ្នំពេញ ៖ ក្នុងកាលពីថ្ងៃទី៥ធ្នូ នៅទីស្ដីការក្រសួងសាធារណការ និងដឹកជញ្ជូន បានបើកកិច្ចប្រជុំជាមួយ ក្រសួងពាក់ព័ន្ធ ដើម្បីរៀបចំប្រកាសថ្មីមួយ ស្តីពីបែបបទ និងនីតិវិធីផ្ទេរកម្មសិទ្ធិយានយន្តឲ្យកាន់តែមានភាពសាមញ្ញ និងងាយស្រួល។
អន្តរក្រសួងបានឯកភាពថា ដើម្បីផ្ទេរកម្មសិទ្ធិយានយន្តបាន គឺជាម្ចាស់យានយន្ត ត្រូវទៅបំពេញសំណុំបែបបទបង់ពន្ធប្រថាប់ត្រាផ្ទេរកម្មសិទ្ធិ នៅទីតាំងផ្តល់សេវាដែលកំណត់ដោយអគ្គ នាយក ដ្ឋានពន្ធដារជាមុនសិន។ បន្ទាប់មក ត្រូវយកឯកសារនោះ និងឯកសារពាក់ព័ន្ធមកកាន់ ទីតាំងផ្តល់សេវាដែលកំណត់ដោយក្រសួងសាធារណការ និងដឹកជញ្ជូន ដើម្បីស្នើផ្ទេរកម្មសិទ្ធិតែម្តងជាការ ស្រេច។
សំជម្រាបថា អន្តរក្រសួង នឹងបង្កើតក្រុមការងារ តភ្ជាប់ប្រព័ន្ធចែករំលែកទិន្នន័យជាមួយគ្នាទៅវិញ ទៅមក ដើម្បីចូលរួមកាត់បន្ថយពេលវេលាទទួលសេវា និងនីតិវិធីស្មុគស្មាញក្នុងការផ្ទេរកម្មសិទ្ធិយានយន្ត និងដើម្បីលុបបំបាត់ការក្លែងបន្លំឯកសារសាធារណៈផងដែរ៕
ជប៉ុន ៖ ក្រុមមន្ត្រីនៃប្រទេសទាំងពីរបានប្រាប់ AFP ថា ទាហានម៉ារីនអាមេរិក៦នាក់បានបាត់ខ្លួនបន្ទាប់ពីយន្តហោះយោធាអាមេរិក២គ្រឿងបានធ្លាក់នៅថ្ងៃព្រហស្បតិ៍ ទី០៦ ខែធ្នូ ឆ្នាំ២០១៨ ក្នុងអំឡុងពេលប្រតិបត្តិការចុះចាក់សាំងនៅឆ្នេរសមុទ្រជប៉ុន។ នេះបើយោងតាមការចេញផ្សាយរបស់សារព័ត៌មាន channel news asia ។
យោងតាមសេចក្តីថ្លែងការណ៍មួយរបស់កងម៉ារីនសហរដ្ឋអាមេរិកនៅជប៉ុនបានឱ្យដឹងថា យន្តហោះ២គ្រឿងដែលជួបឧបទ្ទវេហតុខាងលើនេះជាប្រភេទយន្តហោះចម្បាំងធុន F-18 និងយន្ដហោះផ្ទុកសាំង C-130 Tanker ត្រូវបានធ្លាក់នៅឆ្នេរប្រទេសជប៉ុននៅម៉ោង២ភ្លឺថ្ងៃព្រហស្បតិ៍ ទី០៦ ខែធ្នូ ឆ្នាំ២០១៨ នេះ (ម៉ោងក្នុងតំបន់)។
មន្ត្រីការពារជាតិអាមេរិកម្នាក់បានប្រាប់ AFP យន្តហោះទាំងពីរគ្រឿងនោះ គឺហោះចេញពីមូលដ្ឋានកងទ័ពអាមេរិក Iwakuni នៅភាគខាងត្បូងប្រទេសជប៉ុន។ ចំណែកអ្នកនាំពាក្យកងកម្លាំងស្វ័យការពារជប៉ុនបាននិយាយថា ម្នាក់ក្នុងចំណោមកងម៉ារីនសហរដ្ឋអាមេរិកត្រូវបានគេជួយសង្គ្រោះ ប៉ុន្ដែសមាជិកផ្សេងទៀតនៃកងម៉ារីនពុំទាន់ត្រូវបានរកឃើញនោះទេ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
