សៀមរាប ៖ ក្រោយបញ្ចប់កិច្ចប្រជុំកំពូលគណៈកម្មកាទន្លេមេគង្គ លើកទី៣ ប្រទេសកម្ពុជា ថៃ ឡាវ និង វៀតណាម បានសម្រេចចេញសេចក្តីថ្លែងការណ៌ ក្រុងសៀមរាប ដែលរកឃើញទាំងសក្តានុពល និងការដោះស្រាយបញ្ហាប្រឈមនានា ដើម្បីពន្លឿនកិច្ចសហប្រតិបត្តិការ ក្នុងយុទ្ធសាស្ត្រ អភិវឌ្ឍប្រកបដោយចីរភាព ក្នុងអាងទន្លេមេគង្គ។
កិច្ចប្រជុំកំពូលគណៈកម្មាការទន្លេមេគង្គលើកទី៣ ក្រោមទិសស្លោក ទន្លេមេគង្គតែមួយ ស្មារតីតែមួយ ដែលត្រូវបានរៀបចំធ្វើនៅសណ្ឋាគារ សុខា ក្រុងសៀមរាប នាព្រឹកថ្ងៃទី៥ ខែមេសា ឆ្នាំ២០១៨នេះ បានបញ្ចប់ដោយភាពជោគជ័យ ជាមួយសេចក្តីថ្លែងការណ៌ ក្រុងសៀមរាប ។
កិច្ចប្រជុំកំពូលលើកទី៣នេះ បានបង្ហាញនូវការចូលរួមយ៉ាងសកម្ម ក្នុងកិច្ចសហប្រតិបត្តិការជាយុទ្ធសាស្ត្រនៃក្របខណ្ឌទន្លេមេគង្គ រវាងប្រទេសជាសមាជិកនៅតំបន់ទន្លេមេគង្គផ្នែខាងក្រោម រួមមាន ប្រទេសកម្ពុជា ថៃ ឡាវ វៀតណាម រួមនិង វត្តមាននៃប្រទេសជាដៃគូសន្ទនាដែលស្ថិតក្នុងតំបន់ទន្លេមេគង្គផ្នែកខាងលើ គឺ ចិន និង មីយ៉ានម៉ា ក៏ដូចជាដៃអភិវឌ្ឍន៌ជាច្រើនប្រទេសទៀត។
ទន្លេមេគង្គ ត្រូវបានចាត់ទុកថា ជាតំបន់អាម៉ាហ្សូននៃតំបន់អាស៊ី ដែលសំបូរដោយប្រព័ន្ធអេកូឡូស៊ី និង ធនធានជីវចម្រុះ ហើយទន្លេមេគង្គ ក៏ជាប្រធានបទដ៏សំខាន់សម្រាប់តំបន់អាស៊ីផងដែរ ដែលគិតចាប់ពីដើមខែមករា ឆ្នាំ២០១៨ មកដល់ពេលនេះ មានកិច្ចប្រជុំកំពូលចំនួន៣ ស្តីពីទន្លេមេគង្គ ត្រូវបានរៀបចំធ្វើ គឺ កិច្ចប្រជុំកំពូល មេគង្គឡានឆាង នៅទីក្រុងភ្នំពេញ! កិច្ចប្រជុំកំពូល មហាអនុតំបន់មេគង្គលើកទី៦ ក្នុងទីក្រុងហាណូយ! និង កិច្ចប្រជុំគណៈកម្មកាទន្លេមេគង្គ លើកទី៣ ក្នុងក្រុងសៀមរាប នាពលលនេះ ។ គួរកត់សំគាល់ថា នៅក្នុងកិច្ចប្រជុំកំពូលគណៈកម្មការទន្លេមេគង្គលើកទី៣នេះ ប្រមុខរដ្ឋាភិបាលនៃប្រទេសជាសមាជិកទាំង៤ គឺ សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃកម្ពុជា! ឯកឧត្តម ប្រាយុទ្ធ ចាន់អូចារ នាយករដ្ឋមន្ត្រីថៃ! ឯកឧត្តម បណ្ឌីត ថងលូន ស៊ីសូលីត នាករដ្ឋមន្ត្រីឡាវ! និង ឯកឧត្តម ង្វៀន ស៊ុនហ្វុក នាយករដ្ឋមន្ត្រីវៀតណាម បានលើកឡើងនូវសក្តានុពល និង ប្រយោជន៌ដ៏សំខាន់នៃអាងទន្លមេគង្គ ចំពោះការចូលរួមក្នុងការអភិវឌ្ឍសេដ្ឋកិច្ច សង្គម វប្បធម៌ ក្នុងតំបន់។
ប៉ុន្តែទន្ទឹមនេះ អាងទន្លេមេគង្គ ក៏កំពុងប្រឈមនឹងបញ្ហាមួយចំនួន ដែលអាចរារាំងដល់ផែនការអភិវឌ្ឍរយៈពេលវែង ផងដែរ ក្នុងនោះមានដូចជា បញ្ហាកំណើនប្រជាជនឆាប់រហ័ស! កំណើនតម្រូវការទឹក ស្បៀង និងថាមពល! បរិបទនៃនគរភាវូបនីយកម្ម និងឧស្សាហូបនីយកម្ម! ការបាត់បង់សម្បត្តិបរិស្ថាន ដោយសារការកាប់បំផ្លាញព្រៃឈើ ជាដើម ដែលបញ្ហាទាំងអស់នេះទាមទាអោយ ភាគីពាក់ព័ន្ធទាំងអស់ត្រូវបន្តប្រឹងប្រែង រួមគ្នាដោះស្រាយជាបន្តបន្ត ដើម្បីធានានូវការអភិវឌ្ឍប្រកបដោយចីរភាពសម្រាប់រយៈពេលវែង ក្នុងអាងទន្លេមេគង្គ ។
បើតាមការថ្លែងរបស់សម្តេច តេជោ នាយករដ្ឋមន្ត្រី នៅក្នុងសន្និសីទសារព័ត៌មាន ក្រោយពេលបញ្ចប់កិច្ចប្រជុំកំពូលគណៈកម្មការទន្លេមេគង្គលើកទី៣ បានបង្ហាញថា សេចក្តីថ្លែងការណ៌ក្រុងសៀមរាប ដែលកើតចេញពីកិច្ចប្រជុំកំពូលនេះ គឺជា សមិទ្ធផលដ៏សំខាន់ សម្រាប់ប្រទេសជាសមាជិកគណៈកម្មការទន្លេមេគង្គ រួមនិងដៃគូអភិវឌ្ឍន៌នានា បន្តកិច្ចសហប្រតិបត្តិការអោយកាន់តែខ្លាំងក្លាថែមទៀត ដើម្បីរួមគ្នាដោះស្រាយបញ្ហាប្រឈមទាំងឡាយ និងឈានឆ្ពោះទៅសម្រេចអោយបាន តាមផែនការយុទ្ធសាស្ត្រ ដែលបានដាក់ចេញនៅក្នុងកិច្ចព្រមព្រៀងមេគង្គ កាលពីឆ្នាំ១៩៩៥។ ជាពិសេស ប្រទេសកម្ពុជា ថៃ ឡាវ និង វៀតណាម ដែលជាគណៈកម្មការទន្លេមេគង្គ បានឯកភាពគ្នាលើរូបមន្តថ្មី ក្នុងការចូលរួមវិភាគទានស្មើគ្នា ដើម្បីធានានិរន្តភាពគ្របគ្រងហិរញ្ញវត្ថុ ដោយខ្លួនឯងនាឆ្នាំ២០៣០។
បន្ថែមពីនេះ សេចក្តីថ្លែងការណ៌ក្រុងសៀមរាប ក៏ជម្រុញអោយប្រទេសជាគណៈកម្មការទន្លេមេគង្គ ប្រឹងប្រែង អនុវត្តន៍ប្រកបដោយប្រសិទ្ធភាពនូវផែនការយុទ្ធសាស្ត្រ ឆ្នាំ២០១៦-២០២០ និង ត្រៀមដាក់ចេញនូវទិសដៅអាទិភាពសម្រាប់រយៈពេល៤ឆ្នាំ បន្តទៅមុខទៀត រហូតដល់ឆ្នាំ២០២២ ដែលពេលនោះប្រទេសឡាវ នឹងធ្វើជាម្ចាស់ផ្ទះនៃកិច្ចប្រជុំកំពូលលើកទី៤ ៕
