ភ្នំពេញ ៖ មេបញ្ជាការ មេបញ្ជាការង នៃកងពលតូចលេខ៧០ បានអះអាងថា អនុវត្តតាមអនុសាសន៍របស់ប្រមុខរាជរដ្ឋាភិបាល ដែលបានលើកឡើងថា” ក្នុងស្ថាប័នរដ្ឋ កងកម្លាំងប្រដាប់អាវុធ គឺមិនត្រូវមានគ្រឿងញៀននោះទេ។ តាមរយៈនេះ កងពលតូចលេខ៧០ គឺមិនអនុញ្ញាតិឱ្យមានបញ្ហាគ្រឿងញៀន កើតមាននៅក្នុងអង្គភាពជាដាច់ខាត ហើយក៏មិនមានការលើកលែង បើសិនជារកឃើញថា មានយោធិនណា ប្រព្រឹត្តិគ្រឿងញៀននៅក្នុងអង្គភាព”។
កញ្ញា វរសេនីយ៍ទោ យុង ខេមរា នាយរងសេនាធិការ និងជានាយការិយាល័យទី៥ ទទួលការងារ អប់រំ ផ្សព្វផ្សាយ និងនយោបាយ នៃកងពលតូចលេខ៧០ បានឱ្យដឹងបែបនេះ នៅក្រោយពិធីបើកយុទ្ធនាការ ប្រយុត្តិប្រឆាំងគ្រឿងញៀន ក្រោមប្រធានបទ “កងពលតូចលេខ៧០ គ្មានគ្រឿងញៀន” ដែលបានប្រារពធ្វើនៅ ទីបញ្ជាការកងពលតូចលេខ៧០ កាលពីព្រឹកថ្ងៃទី០១ ខែមីនា ឆ្នាំ២០១៨នេះ។
នាយរងសេនាធិការរូបនេះបន្តថា ដោយមើលឃើញថា អ្នកសេបគ្រឿងញៀន និងអ្នករងគ្រោះដោយគ្រឿងញៀន បាននិងកំពុងរីករាយដាលគួរឱ្យកត់សម្គាល់ បើទោះជាមានការអន្តរាគមន៍ ទប់ស្កាត់ ពីស្ថាប័នជំនាញ និងសមត្ថកិច្ចពាក់ព័ន្ធយ៉ាងណាក៏ដោយ ។ ដូច្នេះហើយបានជា លោកឧត្តមសេនីយ៍ឯក ម៉ៅ សុផាន់ មេបញ្ជាការកងពលតូចលេខ៧០ មានការព្រួយបារម្ភយ៉ាងខ្លាំង ខ្លាចក្រែងគ្រឿងញៀនជ្រៀតចូលទៅតាមអង្គភាព ជាពិសេសនៅក្នុងជួរយោធិន នៃកងពលតូចលេខ៧០នេះ ទើបស្នើសុំកិច្ចសហការពីអាជ្ញាធរជាតិប្រយុទ្ធប្រឆាំងគ្រឿងញៀន ដើម្បីផ្សព្វផ្សាយអំពីបញ្ហាគ្រឿងញៀន និងផលប៉ះពាល់ពីគ្រឿងញៀន ដល់យោធិន ឱ្យបានយល់ដឹងកាន់តែច្បាស់ និងចៀសឱ្យឆ្ងាយពីក្រឿងញៀន។
ចំណែក លោក ឧត្តមសេនីយ៍ឯក ថោង សុគន្ធា អគ្គលេខាធិការរង នៃអាជ្ញាធរជាតិ ប្រយុទ្ធប្រឆាំងគ្រឿងញៀន បានលើកឡើងនៅក្នុងពិធី បើកយុទ្ធនាការនេះថា អាជ្ញាធរជាតិ ពិតជាមានមោទនភាព ចំពោះ កងពលតូចលេខ៧០ ដែលបានចូលរួមបង្កើតឱ្យមានយុទ្ធនាការផ្សព្វផ្សាយ អប់រំ អំពី បញ្ហាគ្រឿងញៀន ដល់យោធិន ឱ្យបានយល់ និង ចៀសឱ្យឆ្ងាយពីគ្រឿងញៀន។
លោកបញ្ជាក់ថា រហូតមកទល់ពេលនេះ បញ្ហាគ្រឿងញៀននៅក្នុងកម្រិតអន្តរជាតិ មិនទាន់មានការថយចុះនៅឡើយទេ ។ សម្រាប់កម្ពុជា បើទោះជារាជរដ្ឋាភិបាលកម្ពុជា បើកយុទ្ធនាការប្រយុទ្ធប្រឆាំងគ្រឿងញៀន ក្នុងឆ្នាំកន្លងទៅ នឹងកំពុងបន្តក្នុងឆ្នាំ២០១៨ យ៉ាងណាក៏ដោយ ក៏បញ្ហានេះ កំពុងកក្រើក នឹងបន្តកើតមានឡើង ហើយនៅក្នុងបណ្តាប្រទេសជិតៗខាងកម្ពុជាក៏បន្តការកើនឡើងផងដែរ។
លោកបញ្ជាក់ថា តាមរយៈការបូកសរុបយុទ្ធនាការក្នុងឆ្នាំកន្លងទៅ ឃើញថា មានការថយចុះ ប៉ុន្តែជាបទពិសោធន៍នៅលើសកលលោក បើប្រទេសណាមានការវាយលុកដោយគ្រឿងញៀនហើយ មិនងាយនិងលុបបំបាត់បញ្ហានោះឱ្យមកសេរ៉ូវិញបានទេ។ សំខាន់បំផុតគឺរកយន្តការទប់ស្កាត់ កំឱ្យរីករាយដាលបន្ថែមទៀត ទៅដល់សុខមាលភាពរបស់ប្រជាពលរដ្ឋនិងមិនធ្វើឱ្យប៉ះពាល់ដល់សន្តិសុខសណ្តាប់ធ្នាប់សង្គម និងការអភិវឌ្ឍន៍ប្រទេសជាតិ នោះគឺជាជោគជ័យដែលត្រូវដោះស្រាយចំបោះមុខ។
លោកឧត្តមសេនីយ៍ ហែម ថា មេបញ្ជាការរង និងជានាយសេនាធិការកងពលតូចថ្មើជើងលេខ៧០ មានប្រសាសន៍ថា ដោយសារតែឃើញបញ្ហាគ្រោះថ្នាក់ដោយសារគ្រឿងញៀន ថ្នាក់ដឹកនាំក្នុងអង្គភាព មានការព្រួយបារម្ភខ្លាចគ្រឿងញៀន ជ្រាបចូលមកក្នុងអង្គភាព។ ព្រោះថា កន្លងមកនេះ បានរកឃើញយោធិន ដែលសេបគ្រឿងញៀន និងបានបណ្តេញចេញភ្លាមៗ ដើម្បី ចៀសវាងការអូសទាញ យោធិនដទៃទៀតឱ្យប្រព្រឹត្តតាមអំពើខុសច្បាប់នេះ។ ក្រៅពីនេះ យើងបានបំផុសឱ្យ មានការហ្វឹកហាត់ លេងកីឡា លេងល្បែងកំសាន្ត ការរាំរែក និងកម្មវិធីអប់រំផ្សព្វផ្សាយ នានា ដល់យោធិន ដើម្បីជៀសវាងចំនាយពេលវេលាប្រព្រឹត្តអមពើខុសឆ្គងក្នុងសង្គម៕
