ភ្នំពេញ ៖ នៅថ្ងៃទី៣ ខែមករា ឆ្នាំ២០១៨ នេះ បណ្ដាស្ថានីយ៍ទូរទស្សន៍ឯកជនមួយចំនួន នឹងធ្វើការផ្សាយបន្ដផ្ទាល់ពីស្ថានីយ៍ទូរទស្សន៍ជាតិកម្ពុជា នូវភាពយន្តឯកសារដ៏មានសារៈបំផុត និងមានអត្ថន័យ ជាប្រវត្ដិសាសន៍ ក្រោមចំណងជើង ថា”ដំណើរឆ្ពោះទៅរកការសង្គ្រោះជាតិ”។
ចង់ជ្រាបច្បាស់ សូមអញ្ជើញទស្សនាវីដេអូផ្សព្វផ្សាយ អំពីការផ្សាយបន្ដផ្ទាល់នូវភាពយន្ត ឯកសារក្រោមចំណង ជើង ថា”ដំណើរឆ្ពោះទៅរកការសង្គ្រោះជាតិ” ដែលផលិតដោយអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី ដែលទូរទស្សន៍ក្នងស្រុក មួយចំនួន នឹងផ្សព្ធផ្សាយបន្តឯកសារនេះ ពីទូរទស្សន៍ចជាតិកម្ពុជា ចាប់ពីថ្ងៃទី៣ ខេមករា នេះតទៅ៕
ភ្នំពេញ ៖ ក្នុងអំឡុងពេលពេញ១ឆ្នាំ២០១៧ កន្លងទៅនេះ គ្រោះថ្នាក់ចរាចរណ៍នៅទូទាំងប្រទេសកម្ពុជា បាន បណ្ដាលឲ្យមនុស្សស្លាប់ជាង១ពាន់៧រយនាក់ ខណៈករណីគ្រោះថ្នាក់ចរាចរណ៍កើតឡើងចំនួនជាង៊៣.៥០០លើក។
យោងតាមរបាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈដែលផ្សព្វផ្សាយនៅថ្ងៃទី២ ខែមករា ឆ្នាំ២០១៨នេះ បានបង្ហាញថា ចាប់ពីខែមករា ដល់ខែធ្នូ ឆ្នាំ២០១៧ គ្រោះថ្នាចរាចរណ៍បានកើតឡើងចំនួន៣.៥៣១លើក មានការថយចុះចំនួន១៦៩លើក ស្មើនឹង៤ភាគរយ បើប្រៀបធៀបនឹងឆ្នាំ២០១៦ រីឯអ្នកស្លាប់មានចំនួន១.៧៨០នាក់ មានការកើនឡើង ចំនួន៦៣នាក់ ស្មើនឹង៤ភាគរយ បើប្រៀបធៀបនឹងឆ្នាំ២០១៦។
ចំណែកអ្នករបួសមានចំនួន៥.៥៣៩នាក់ មានការថយចុះចំនួន១.០៦៨នាក់ ស្មើនឹង ១៦ភាគរយ បើ ធៀបនឹងរយៈពេលដូចគ្នាឆ្នាំ២០១៦កន្លងទៅនេះ។
របាយការណ៍ដដែលបានបញ្ជាក់ថា ខេត្តដែលមានអ្នកស្លាប់ដោយសារគ្រោះថ្នាក់ចរាចរណ៍កើនឡើងមាន គឺខេត្តកណ្តាល ព្រះវិហារ កំពង់ចាម កំពត ស្ទឹងត្រែង សៀមរាប កំពង់ធំ ស្វាយរៀង ព្រះសីហនុ កោះកុង មណ្ឌលគិរី កំពង់ស្ពឺ ពោធិ៍សាត់ និងខេត្តប៉ៃលិន៕
ភ្នំពេញ៖ បុរសម្នាក់ត្រូវខ្មាន់កាំភ្លើងបាញ់ប្រហារចំនួន២គ្រាប់ បណ្ដាលឲ្យស្លាប់ភ្លាមៗ នៅម្ដុំស្ពានលីយ៉ុងផាត់ ក្នុងខណ្ឌឫស្សីកែវ សមត្ថកិច្ចបានដាក់ការសង្ស័យជំហានដំបូងថា ជារឿងគំនុំ។
នៅវេលាម៉ោងជិត២១យប់ ថ្ងៃទី០១ ខែមករា ឆ្នាំ២០១៨នេះ មានករណីបាញ់ប្រហារមួយបានកើតឡើង នៅម្ដុំស្ពានលីយ៉ុងផាត់ ដោយខ្មាន់កាំភ្លើងមានគ្នា២នាក់ជិះម៉ូតូម៉ាក CPX ពណ៍ស បានបាញ់ប្រហារទៅលើជនរងគ្រោះចំនួន២គ្រាប់ ចំកណ្ដាលក្បាល បណ្ដាលឲ្យដួលស្លាប់នៅនឹងកន្លែង។
ករណីបាញ់ប្រហារនេះ បានកើតឡើង នៅពេលដែលជនរងគ្រោះកំពុងតែបណ្ដើរម៉ូតូ ម៉ាក NEX ពណ៌ស ពាក់ស្លាកលេខភ្នំពេញ 1CB-4808 នៅក្បែរស្ពានលីយ៉ុងផាត់ ស្រាប់ តែជនសង្ស័យដកកាំភ្លើងបាញ់សម្លាប់តែម្ដង។ បន្ទាប់ពីបាញ់ប្រហារជនរងគ្រោះរួចហើយ ជនសង្ស័យបានគេចខ្លួនបាត់ស្រមោល ។ក្រោយពេលទទួលបានព័ត៌មាននេះ សមត្ថកិច្ចបានបើកការស្រាវជ្រាវភ្លាមៗដែរ ប៉ុន្តែមិនទាន់រកឃើញជនដៃដល់នៅឡើយទេ ៕ 
ស្របពេលដែលរាជរដ្ឋាភិបាលកំពុងជម្រុញអោយផលិតផលកសិកម្មរបស់កម្ពុជា ប្រែក្លាយជាផលិតផលនាំចេញនោះ ក្រុមហ៊ុនចំនួនបីបានចុះកិច្ចព្រមព្រៀងជាមួយគ្នា កាលពីសប្តាហ៌មុន ដើម្បីប្រមូលទិញផលិតផលកសិកម្មកម្ពុជា ដូចជាផ្លែស្វាយ ចេក និងម្រេច ដើម្បីកែច្នៃ និងវេចខ្ចបសម្រាប់នាំចេញទៅកាន់ទីផ្សារអន្តរជាតិ ដូចជា ជប៉ុន និងចិន ជាដើម ៖ V.O៖ នៅក្នុងការចុះហត្ថលេខាលើកិច្ចព្រមព្រៀងរួមគ្នាមួយ កាលពីថ្ងៃទី២៩ ខែធ្នូ ឆ្នាំ២០១៧ កន្លងទៅ ក្រុមហ៊ុនចំនួនបី រួមមាន ក្រុមហ៊ុន Digital Agriculture Exchange របស់ប្រទេសចិន, ក្រុមហ៊ុន Chaintope របស់ប្រទេសជប៉ុន និងក្រុមហ៊ុន Cambodia golf and country club co.ltd របស់កម្ពុជា បានបញ្ជាក់ថា នៅឆ្នាំ២០១៨ ក្រុមហ៊ុននឹងរៀបចំរោងចក្រសម្រាប់ក្លាសេ រួមនិងនាំចូលម៉ាស៊ីនសម្លាប់មេរោគ ម៉ាស៊ីនសម្រាប់វេចខ្ចប់ ចុះបញ្ជីម៉ាកយីហោ ព្រមទាំងបង្កើតធនាគារកសិកម្ម ដើម្បីផ្តល់កម្ចីដល់កសិករ ។ កន្លងមកផលិតផលផ្លែឈើកម្ពុជា ដូចជា ស្វាយ ចេក និងស្វាយចន្ទីជាដើមនោះ បានត្រឹមតែលក់នៅក្នុងប្រទេសថៃ វៀតណាមប៉ុណ្ណោះ ហេតុនេះទើបក្រុមហ៊ុនទាំងបីសហការគ្នាក្នុងការកែច្នៃ ដើម្បីឈាននាំចេញទៅប្រទេសអាមេរិក អឺរ៉ុប ចិន និងជប៉ុន ក៏ដូចដូចជាប្រទេសផ្សេងទៀត ។ ក្រុមហ៊ុន Cambodia golf and country club co.ltd របស់កម្ពុជា បញ្ជាក់ថា បន្ទាប់ពីមានការសហការពីក្រុមហ៊ុនចិន និងជប៉ុននេះ នឹងធ្វើឱ្យកសិផលរបស់កម្ពុជា មានការកើនឡើង និងមានទីផ្សារធំធេងនៅក្នុងសកលលោក ។ ចំណែក ក្រុមហ៊ុន Digital Agriculture Exchange របស់ប្រទេសចិន ក៏បានបញ្ជាក់ដែរថា ផលិតផលកសិកម្មរបស់កម្ពុជាមានគុណភាពល្អ គ្រាន់តែគ្មានម៉ាកផលិតផលដែលពិភពលោកទទួលស្គាល់។ ដូច្នេះហើយទើបក្រុមហ៊ុននឹងជួយដល់អោយផលិតផលកសិកម្មកម្ពុជាមានការទទួលស្គាល់ក្នុងទីផ្សារអន្តរជាតិ ។ ជំហានដំបូង គម្រោងប្រមូលទិញផលិតផលកសិកម្មរបស់កម្ពុជា នឹងនាំចេញទៅប្រទេសជប៉ុន និងចិន បន្ទាប់មកនឹងធ្វើការនាំចេញទៅបណ្តាប្រទេសផ្សេងៗទៀត ដោយប្រមូលទិញពីខេត្តកំពង់ស្ពឺក្នុងដំណាក់កាលដំបូងនេះ ។ ទន្ទឹមនេះក្រសួងកសិកម្ម រុក្ខាប្រមាញ់ និងនេសាទ បានបង្ហាញថា នឹងជួយគាំទ្រ ក្នុងគម្រោងអភិវឌ្ឍន៌ និងការនាំចេញ ផលិតផលកសិកម្មកម្ពុជានេះ។ ក្រសួងកសិកម្មបានស្នើអោយ អ្នកទិញ ឬអ្នកកែច្នៃ ត្រូវមានភាពស្មោះត្រង់នឹងគ្នា ទើបអាចឈានទៅរកភាពជោគជ័យរួមគ្នា៕
ភ្នំពេញ ៖ វិស័យសំណង់ដែលកំពុងរីក បានផ្តល់ការងារដល់ប្រជាពលរដ្ឋកម្ពុជាប្រមាណជាង២០ម៉ឺននាក់ក្នុង១ថ្ងៃ កើនឡើងជាង៤០% បើធៀបនឹងឆ្នាំមុន ដោយនេះមិនទាន់រាប់បញ្ចូលពលករជំនាញបរទេសនៅឡើយ ៖ V.O៖ យោងតាមរបាយការណ៍បូកសរុបលទ្ធផលការងារប្រចាំឆ្នាំរបស់ក្រសួងដែនដី នគរូបនីយកម្ម និងសំណង់ បានឲ្យដឹងថា ក្នុងឆ្នាំ២០១៧ តម្លៃពលកម្មសម្រាប់កម្មករគ្មានជំនាញទទួលបានកម្រៃចាប់ពីជាង៣ម៉ឺន ដល់៤ម៉ឺនរៀលក្នុង១ថ្ងៃ ។ ចំពោះកម្មករជំនាញ និងមេជាងវិញ ទទួលបានចាប់ពី៥ម៉ឺន ទៅជិត៨ម៉ឺនរៀលក្នុង១ថ្ងៃ ។ ចំណែកវិស្វករ ស្ថាបត្យករ និងអ្នកជំនាញផ្សេងៗទៀត ទទួលបានប្រាក់បៀវត្សចន្លោះពី៤០០ ទៅ២៥០០ដុល្លារក្នុង១ខែ ។ ក្រសួងដែនដី នគរូបនីយកម្ម និងសំណង់ បានបង្ហាញថា ក្នុងឆ្នាំ២០១៧ ទុនវិនិយោគសរុបក្នុងវិស័យសំណង់ មានទឹកប្រាក់ជាង៦ពាន់លានដុល្លារ ក្នុងនោះមានគម្រោងសរុបចំនួន៣០៥២គម្រោង ដែលមានផ្ទៃក្រឡាសំណង់សរុបជាង១០លានម៉ែត្រការ៉េ ខណៈឆ្នាំ២០១៦ ក្រសួងបានអនុម័តគម្រោង២៤០៥គម្រោង មានផ្ទៃក្រឡាសំណង់ជាង១១លានម៉ែត្រការ៉េ និងទឹកប្រាក់វិនិយោគជាង៥ពាន់លានដុល្លារអាមេរិក ។ ក្រុមហ៊ុនជាច្រើនដែលក្នុងវិនិយោគក្នុងវិស័យសំណង់នៅកម្ពុជា មើលឃើញថា ក្នុងរយៈពេល២ទសវត្សរ៍ចុងក្រោយនេះ វិស័យសំណង់បានដើរតួនាទីដ៏សំខាន់ក្នុងការជំរុញកំណើនសេដ្ឋកិច្ចជាតិ ផ្តល់ការងារដល់ប្រជាពលរដ្ឋ ធ្វើឲ្យគុណភាពជីវិតប្រជាពលរដ្ឋកម្ពុជាកាន់តែប្រសើរឡើង ហើយគម្រោងវិនិយោគវិស័យសំណង់ធំៗនៅកម្ពុជាមួយចំនួនក៏ត្រូវបានយកទៅដាក់លក់នៅបរទេសផងដែរ ។ ទន្ទឹមនេះ អ្នកជំនាញក្នុងវិស័យអចលនទ្រព្យ យល់ឃើញថា កម្ពុជាក៏បានបាត់បង់ផលប្រយោជន៍ច្រើនពីកំណើននៃការវិនិយោគក្នុងវិស័យសំណង់ផងដែរ ដោយសារកម្ពុជាបាននាំចូលវត្ថុធាតុដើមភាគច្រើនពីបរទេស។ ដូចនេះបើមានការវិនិយោគវត្ថុធាតុដើមក្នុងប្រទេសឲ្យបានច្រើន នឹងធ្វើអោយកម្ពុជាទទួលបានផលប្រយោជន៌កាន់តែច្រើន ពីវិស័យសំណង់។ គួរបញ្ជាក់ថា តាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ ក៏បានបង្ហាញផងដែរថា ក្រសួងបានអនុញ្ញាតផ្តល់លិខិតសាងសង់ វិស័យសំណង់នៅទូទាំងប្រទេស ចាប់ពីឆ្នាំ២០០០ ដល់ឆ្នាំ២០១៧ មានចំនួន៣ម៉ឺន៩៩០៣ គម្រោង មានផ្ទៃក្រឡាសរុបជាង១០២លានម៉ែត្រក្រឡា និងមានតម្លៃទុនវិនិយោគសរុបជាង៣៧ពាន់លានដុល្លារអាមេរិក ៕
សៀមរាប ៖ មេបញ្ជាការងកងរាជអាវុធហត្ថស្រុកវ៉ារិន និងជាមេស្នាក់ការលេខ៦៧២ប្រចាំស្រុកវ៉ារិន ខេត្តសៀមរាប ពីរនាក់ឪពុកកូន បានថយឡានចុះមកវាយយុវជនម្នាក់ បណ្តាលឲ្យរងរបួសធ្ងន់ ខណៈដែលលោកបើករថយន្តដោហើយចុចស៊ីផ្លេសុំវ៉ាមិនបានតាមបំណង។
ហេតុការណ៍ដែលធ្វើឲ្យភ្ញាក់ផ្អើល រហូតពលរខាងលើ បានកើតឡើងកាលពីម៉ោង៣និង៣០នាទីរសៀលថ្ងៃទី៣១ខែធ្នូឆ្នាំ២០១៧ នៅលើដងផ្លូវជាតិលេខ៦៧ (ផ្លូវហាយវេ)ត្រង់ចំណុចមុខសាលាឃុំស្រែណូយ ក្នុងភូមិវត្ត ឃុំស្រែណូយ ស្រុកវ៉ារិន។ សៀមរាប។
មេបញ្ជាការង និងជាមេស្នាក់ការលេខ៦៧២ នៃអាវុធហត្ថស្រុកវ៉ារិនត្រូវគេស្គាល់ឈ្មោះ ហេ យ៉ែម( ហៅដូ) មានឋានៈជាវរសេនីយ៍ត្រី (ស័ក្តិ៤) ចំណែកជនដៃដល់ជាកូនប្រុសរបស់លោកដូ ពុំត្រូវបានស្គាល់ឈ្មោះទេ ។
ប្រភពពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញលោកហេ យ៉ែម ហៅដូ និងកូនប្រុស បើកឡានម៉ាកវីហ្គោពណ៌ស្ករពាក់ស្លាកលេខសៀមរាប2B2122 ក្នុងទិសដៅពីជើងទៅត្បូង ដោយជនដៃដល់ជាអ្នកបើក។ លុះមកដល់ចំណុចកើតហេតុ អ្នកបើករថយន្តបានចុចស៊ីផ្លេសុំវ៉ាយុវជនដែលជាជនរងគ្រោះមានឈ្មោះឃឹម បូទី អាយុ១៧ឆ្នាំ ក្នុងដំណើរស្របទិសគ្នា តែទំនងជាវ៉ាមិនបានដូចចិត្ត ពួកគេបានឈប់រថយន្តមកវាយយុវជនរងគ្រោះតែម្តង ។
ថ្លែងតាមទូរសព្ទ័ នាព្រឹកថ្ងៃទី១ខែមករាឆ្នាំ២០១៨ ស្ត្រីសុំមិនបញ្ចេញឈ្មោះដែលត្រូវជាបងបង្កើតរបស់យុវជនរងគ្រោះ បានបញ្ជាក់ថា រឿងនេះពួកគាត់បានបញ្ចប់ហើយ ដោយមិនប្តឹងតតាំងអីទេ ។ ខ្ញុំសុខចិត្តនាំប្អូនប្រុសទៅចាក់ថ្នាំ ដោយចំណាយលុយខ្លួនឯង។ ខ្ញុំអ្នកចំណូលថ្មី ខ្ញុំរស់នៅតែពីរនាក់បងប្អូនខ្ញុំខ្លាច។ ព្រោះគេជាសមត្ថកិច្ច មានស័ក្តិ។ខ្ញុំត្រឹមតែចង់រស់នៅមានសេចក្តីសុខប៉ុណ្ណោះ។ ប៉ុន្តែខ្ញុំក៏ចង់ឲ្យនគរបាលប៉ុស្តិ៏ ចាត់វិធានការជនបង្កខាងលើតាមផ្លូវច្បាប់ដែរ។
ស្ត្រីដដែលបន្តថា រឿងហេតុដំបូងប្អូនប្រុសគាត់បានជិះម៉ូតូពីជើងទៅត្បូង ហើយកាច់ស៊ីញ៉ូបំរ៉ុងបត់ ស្របពេលនោះឡានជនបង្កបានមកដល់ក៏ស៊ីផ្លេមិនឲ្យបត់។ ពេលនោះម៉ូតូក៏មិនបានបត់ដែរ គឺឈប់ តែត្រូវឡាននោះឈប់ពីមុខហើយចុចកញ្ចក់ស្រែកស្តីបន្ទោស រឿងបំរ៉ុងបត់មិនមើល។ ភ្លាមនោះប្អូនប្រុសតបវិញថា ខ្លួនមិនទាន់បានបត់ទេ។ ឆ្លើយតបពាក្យចឹង ក៏ស្រាប់តែកូនប្រុសលោកស័ក្តិ៤ ថយឡានមកក្រោយបើកទ្វារចុះមកវាយ រហូតជាង១០ដៃទើបឈប់ បណ្តាលឲ្យប្អូនប្រុសរងរបួសទន់ខ្លួន ។ ក្រោយពេលវ៉ៃហើយ នាំខ្លួនប្អូនប្រុសយកទៅកាន់ស្នាក់ការលេខ៦៧២ សម្រួលបញ្ចប់រឿង ដោយមិនសង សូម្បីតែ១០០រៀល។ ក្នុងពេលដែលកូនប្រុសរបស់ខ្លួនវាយជនរងគ្រោះ លោក ហេ យ៉ែម ហៅដូ មិនបានចុះឃាត់ទេ។ នេះបើតាមការអះអាងរបស់បងស្រីជនរងគ្រោះ។
មន្ត្រីនគរបាលប៉ុស្តិ៏រដ្ឋបាលឃុំស្រែណូយ ក៏បានបញ្ជាក់ប្រហាក់ប្រហែលស្ត្រីខាងលើដែរថា ជាការពិតណាស់មានករណីសមត្ថកិច្ច ថយឡានមកវ៉ៃពលរដ្ឋម្នាក់ឲ្យរងរបួស ដោយសារឿងស៊ីផ្លេឡានសុំវ៉ាមិនបាន។ តែខាងប៉ុស្តិ៏ទៅមិនទាន់ ព្រោះក្រោយកើតហេតុគេនាំខ្លួនជនរងគ្រោះ យកទៅកាន់ស្នាក់ការរបស់គេបាត់ទៅហើយ។ ចឹងទេខាងខ្ញុំមិនបានស្គាល់ឈ្មោះជនដៃដល់នៅឡើយ តែដឹងថា ជាកូនប្រុសលោកស័ក្តិ៤ ហេ យ៉ែម ហៅដូ មេស្នាក់ការ៦៧២ អាវុធហត្ថស្រុកវ៉ារិន ម្យ៉ាងទៀតខាងរងគ្រោះមិនប្តឹងចឹង ខាងប៉ុស្តិ៍ពិបាកចាត់ការ។ មន្ត្រីនគរបាលដែលសុំលាក់ឈ្មោះបន្តថា តាមការសាកសួរពលរដ្ឋក្បែរខាងដែលឃើញហេតុការណ៍ ក្នុងគ្រានោះលោកស័ក្តិ៤មិនបានចុះឃាត់កូននោះទេ ថែមទាំងបញ្ជាឲ្យវាយចាំខ្លួនជាអ្នកដោះស្រាយ។
នៅរសៀលថ្ងៃទី១ ខែមករាឆ្នាំ២០១៨ នេះ លោកវរសេនីយ៍ត្រី ហេ យ៉ែម ហៅដូ មេបញ្ជាការង និងជាមេស្នាក់ការសន្តិសុខលេខ៦៧២ កងរាជអាវុធហត្ថស្រុកវ៉ារិន បានឆ្លើយយ៉ាងខ្លីតាមទូរសព្ទ័ថា រឿងនេះក្មេងៗបានបញ្ចប់គ្នាហើយ តើលោកឯង (អ្នកកាសែត) ចង់បានអីទៀត? ។
លោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប បានមានប្រសាសន៍តាមទូរស័ព្ទថា លោកពុំទាន់ទទួលបានបណ្តឹងនេះទេ។ ពេលនេះលោកកំពុងចាំរបាយការណ៍ពីសមត្ថកិច្ច។ លោកព្រះរាជអាជ្ញាបញ្ជាក់ថា រឿងនេះមិនអាចបញ្ចប់បាននោះទេ។
យោងតាមប្រសាសន៍របស់ ព្រះរាជអាជ្ញាអមសាលាដំបូងខេត្តសៀមរាប គេរំពឹងថាជនដៃដល់ត្រូវតែប្រឈមតាមផ្លូវច្បាប់។ ចំណែកឪពុកក៏អាចចាប់ពាក់ពន្ធ័ ប្រសិនបើរកឃើញថា ញ៉ុះឲ្យកូនវ៉ៃគេដូចមហាជនដែលឃើញហេតុការណ៏អះអាង។ ពីព្រោះថាកាដូរឆ្លងឆ្នាំមួយនេះ ពិតជាធ្វើឲ្យពលរដ្ឋក្នុងមូលដ្ឋាននោះភ័យខ្លាច និងញាក់សាច់៕
សៀមរាប ៖ ពលរដ្ឋខ្មែរមកពីគ្រប់ទិសទី និងអ្នកទេសចរអន្តរជាតិ ប្រមាណជាង30ម៉ឺននាក់ បានមកចូលរួមក្នុងរាត្រីឆ្លងឆ្នាំសកល នារាត្រី ថ្ងៃទី៣១ ឆ្នាំ២០១៧ ចូលឆ្នាំ២០១៨ ក្នុងក្រុងសៀមរាប។
តាមរបាយការណ៍របស់មន្ទីរទេសចរណ៍ខេត្តសៀមរាប ឲ្យដឹងថាចំនួនភ្ញៀវសរុបដែលចូលមកកំសាន្តក្នុងយប់ឆ្លងឆ្នាំសកលមានចំនួនជាង33មឺុននាក់ ដែលចំនួននេះមានការកើនឡើងជិត80ភាគរយ បើធៀបនឹងឆ្នាំ2016ដែលមានចំនួនភ្ញៀវជា19ម៉ឺននាក់ ។ របាយការណ៍បង្ហាញថា ភ្ញៀវជាជនជាតិខ្មែរមានការកើនឡើងរហូតដល់76.46ភាគរយ បើធៀបនឹងឆ្នាំ2016។
អភិបាលខេត្តសៀមរាប ឯកឧត្តមឃឹម ប៊ុន សុង បានថ្លែងថា ក្នុងឱកាសនៃរាត្រីថ្ងៃឆ្លងឆ្នាំថ្មី២០១៨នេះ បានបង្ហាញអោយឃើញថា សៀមរាប ជាសក្កានុពលវិស័យទេសចរណ៍ធំបំផុត បន្ទាប់ពីទីក្រុងភ្នំពេញ នឹងធ្វើអោយកំណើនភ្ញៀវ ទេសចរណ៍ជាតិ និងអន្តរជាតិ មានការកើនឡើងជាងឆ្នាំមុន។ឯកឧត្តមបានបន្ដថា ចំពោះការងារសន្តិសុខ សណ្តាប់ធ្នាប់ អាជ្ញាធរខេត្តបានយកចិត្តទុកដាក់ខ្ពស់ ព្រមទាំងធានានូវសុវត្ថិភាពជូនដល់ភ្ញៀវជាតិ អន្តរជាតិ ក្នុងឱកាសបុណ្យឆ្លងឆ្នាំសកលនេះផងដែរ។ វត្តមានរបស់ភ្ញៀវទេសចរបរទេស ដែលធ្វើដំណើរឆ្លងទ្វីប ដើម្បីប្រារព្វពិធីឆ្លងឆ្នាំនៅលើដែនដីប្រវត្តិសាស្ត្រ នៃព្រះរាជាណាចក្រកម្ពុជា គឺពិតជាមិនធម្មតានោះទេ សម្រាប់ការវាស់ជម្រៅ មនោសញ្ចេតនាដែលប្រកបទៅដោយការស្រឡាញ់រាប់អានចំពោះ វប្បធម៌ខ្មែរនោះ។ ជាមួយនឹងការផ្តល់នូវតម្លៃជាមោទនភាពដ៏ខ្ពង់ខ្ពស់នេះ ទោះបីរដ្ឋធម្មនុញ្ញ នៃព្រះរាជាណាចក្រកម្ពុជា បានកំណត់ច្បាស់ថា ព្រះពុទ្ធសាសនាគឺជាសាសនារបស់រដ្ឋ ហើយបុណ្យឆ្លងឆ្នាំសាកលនេះ ជាប្រពៃណីបែប បស្ចឹមប្រទេស និងជាប្រពៃណីរបស់គ្រីស្គបរិស័ទយ៉ាងណាក៏ដោយ ក៏មានប្រជាពលរដ្ឋកម្ពុជា ទាំងអ្នកកាន់ព្រះពុទ្វ សាសនា ឬក៏ដូចអ្នកកាន់សាសនាគ្រីស្គ ត្រូវបានចូលរួមអបអរសាទរ សប្បាយរីករាយចូលឆ្នាំថ្មីទាំងអស់គ្នាដែរ។ ប្រការដ៏ជាក់ច្បាស់ខាងលើ គឺជាកត្តាបង្ហាញថា ពីសុខសន្តិភាពនៅកម្ពុជា ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខ បានបង្កើតឡើងនូវបរិយាកាសសង្គមមួយ ដែលជាជោគជ័យនៃការរើបម្រះរបស់មនុស្សជាតិ ចាកចេញពីការប្រកាន់ពូជសាសន៍ ពណ៌សម្បុរ នៃពិភពលោក ហើយក៏ជាការកត់សម្គាល់កាន់ តែប្រសើរថែមទៀតនោះ គឺការបង្ហាញ ពិភពលោកឲ្យឃើញថា ព្រះរាជាណាចក្រកម្ពុជា គឺជាសមុទ្របេះដូង គ្មានការរើសអើងពូជសាសន៍ និងសាសនា ព្រមទាំងជាពិភពដ៏សុខក្សេម ក្សាន្តនៃមនុស្សជាតិ ហើយក៏ជាការបង្ហាញពីសិទ្ធិប្រជាធិបតេយ្យនៅកម្ពុជា ក្រោមដំបូលសន្តិភាព៕
នាយកដ្ឋានប្រឆាំងបទល្មើសបច្ចេកវិទ្យា នៃអគ្គស្នងការនគរបាលជាតិ បានបង្ហាញរបាយ ការណ៍នាពេលថ្មីៗនេះថា នាយកដ្ឋានប្រឆាំងបទល្មើសបច្ចេកវិទ្យាបានទទួលពាក្យបណ្តឹងជាច្រើន តែក្នុងនោះ មានពាក្យបណ្តឹងខ្លះ ត្រឹមត្រូវតាមទម្រង់ច្បាប់ ពាក់ព័ន្ធនឹងការឆបោករបស់ជនល្មើសតាមរយៈការភូតភរឱ្យប្រជាពលរដ្ឋវេលុយជាមួយនឹងភ្នាក់ងារវេរលុយមួយចំនួន ដែលគិតជាទឹក ប្រាក់រាប់ម៉ឺនដុល្លារ។
យោងរបាយការណ៍ដដែលបានបញ្ជាក់ថា “ភ្នាក់ងារវេប្រាក់ដែលជនល្មើសប្រើជាមធ្យោបាយប្រព្រឹត្តបទល្មើសរួមមានៈ វីង អ៊ីម៉ាន់នី ទ្រូម៉ាន់នី លីហួរ វេលុយ អាស៊ីវេលុយ និងមីក្រូហិរញ្ញវត្ថុ អេអឹមខេ” ហើយជនល្មើសបានឆបោកប្រជាពលរដ្ឋតាមគ្រប់រូបភាពដូចជា ដើរតួជាមន្ត្រីគយ ការត្រូវរង្វាន់ឆ្នោត យកគណនីហ្វេសប៊ុកទៅខ្ចីលុយគេ (លួចគណនីហ្វេសប៊ុក) …។ល។
ក្នុងរបាយការណ៍របស់សមត្ថកិច្ច ក៏បានលើកឡើងពីភាពស្មុគស្មាញក្នុងការស៊ើបអង្កេតដោយសារលេខទូរស័ព្ទរបស់ជនល្មើសដែលប្រើប្រាស់ធ្វើសកម្មភាពឆបោក គ្មានភាពត្រឹមត្រូវ សម្រាប់សម្គាល់អត្តសញ្ញាណ ម្យ៉ាងវិញទៀត នៅតាមបញ្ជរវេលុយភាគច្រើន បានអនុញ្ញាតឲ្យអ្នកដកលុយពាក់មួក ពាក់ម៉ាស់ ដែលមិនអាចឱ្យកាមេរ៉ាសុវត្ថិភាព ថតចាប់យករូបភាពជនល្មើសបាន ច្បាស់ ដើម្បីងាយស្រួលសម្រាប់ឱ្យសមត្ថកិច្ចបន្តស៊ើបអង្កេត ឬតាមចាប់ខ្លួនជនល្មើសក្នុងករណី មានបទល្មើសកើតឡើងនោះទេ។
សូមជម្រាបថា ក្រុមហ៊ុនបម្រើសេវាកម្មផ្ទេរ និងទូទាត់ប្រាក់ ដែលកំពុងតែដំណើរការនៅកម្ពុជា មានចំនួន១០ រួមមាន៖ ក្រុមហ៊ុន វីង ,ក្រុមហ៊ុន ទ្រូ ម៉ាន់នី, ក្រុមហ៊ុន លី ហួរ ,ក្រុមហ៊ុនស្មាត, ក្រុមហ៊ុន អ៊ី ម៉ាន់នី , មីក្រូហិរញ្ញវត្ថុ អេអឹមខេ , មីក្រូហិរញ្ញវត្ថុ អាស៊ីវេរលុយ , មីក្រូហិរញ្ញវត្ថុ ប្រាសាក់ , ក្រុមហ៊ុនស្ពីតផេរ និងក្រុមហ៊ុន ដារ៉ាផេរ ៕ 
ភ្នំពេញ ៖ ការបោះឆ្នោតជ្រើសរើសតាំងសមាជិកព្រឹទ្ធសភាកម្ពុជា នីតិកាលទី៤ ដែលនឹងប្រព្រឹត្តទៅនៅថ្ងៃទី២៥ ខែកុម្ភៈ ឆ្នាំ២០១៨ ខាងមុខនេះ មានការិយាល័យបោះឆ្នោតចំនួន ៣៣ នៅក្នុង ២៥រាជធានី-ខេត្ត និងមានអង្គបោះឆ្នោត (អ្នកបោះឆ្នោត) សរុបចំនួន ១១,៦៩៥នាក់។ នេះបើតាមសេចក្ដីប្រកាសព័ត៌មានរបស់គណៈកម្មាធិការជាតិរបចំការបោះឆ្នោត គ.ជ.ប ដែលបាន បិទផ្សាយនៅថ្ងៃទី ៣០ ខែធ្នូ ឆ្នាំ២០១៧ ។
សេចក្ដីប្រកាសព័ត៌មាន ដដែលបានឲ្យដឹងថា គ.ជ.ប បានបញ្ជូនបញ្ជីបោះឆ្នោតដំបូងសម្រាប់ ការបោះឆ្នោតជ្រើសរើសតាំងសមាជិកព្រឹទ្ធសភា នីតិកាលទី៤ ទៅកាន់គណៈកម្មការ រាជធានី-ខេត្ត រៀបចំការបោះឆ្នោត (គធ.ខប) ទាំង២៥ រួចរាល់អស់ហើយ។
គ ជ ប ក៏បានបញ្ជាក់ដែរថា បញ្ជីបោះឆ្នោតដំបូងត្រូវបានបិទផ្សាយជាសាធារណៈរយៈពេល ១០ថ្ងៃ។ ក្នុងរយៈពេលកំណត់នេះ ជនណាក៏ដោយ មានសិទ្ធិប្ដឹងតវ៉ា ឬប្ដឹងជំទាស់ ទាក់ទងទៅនឹងបញ្ជីបោះឆ្នោតដំបូងនេះដែរ។
គ.ជ.ប បានអំពាវនាវ ដល់អង្គបោះឆ្នោត ឬមន្ត្រីក្នុងមុខតំណែងទាំងអស់ ទៅពិនិត្យមើលឈ្មោះ និងទិន្នន័យពាក់ព័ន្ធក្នុងបញ្ជីបោះឆ្នោតដំបូងនេះ នៅតាមការិយាល័យបោះឆ្នោត ឬ អាចចូលមើលទិន្នន័យ ក្នុងគេហទំព័រ www.voterist.org.kh។
សូមបញ្ជាក់ថា អង្គបោះឆ្នោត គឺក្រុមប្រឹក្សាឃុំ សង្កាត់ និងតំណាងរាស្ត្រ ក្នុងតំណែងដែល នៅទូទាំងកម្ពុជាមាន ក្រុមប្រឹក្សាឃុំ-សង្កាត់ មានចំនួន ១១,៥៧២នាក់ និងតំណាងរាស្ត្រ មានចំនួន ១២៣នាក់ ដែលនឹងត្រូវចូលរួមបោះឆ្នោតជ្រើសតាំងសមាជិកព្រឹទ្ធសភានីតិកាលទី៤ ឆ្នាំ ២០១៨ នេះ៕
ភ្នំពេញ ៖ រាជរដ្ឋាភិបាលកម្ពុជា សម្រេចដំឡើងអត្រាកំណើន១២% នៃប្រាក់បៀវត្សមូលដ្ឋានលើកទី១ នៅចាប់ពីខែមករា ឆ្នាំ២០១៨ តទៅ និងដំឡើងដំណាក់កាលទី២ នៅខែមេសាមុនចូលឆ្នាំប្រពៃណី ខ្មែរ។
សេចក្តីសម្រេចឲ្យមានការដំឡើងប្រាក់បៀវត្សជូនមន្ត្រីរាជការនេះ ត្រូវបានធ្វើឡើង ២ដង ក្នុង១ឆ្នាំ ដោយរាជរដ្ឋាភិបាលបានអះអាងថា ដើម្បីចូលរួមលើកកម្ពស់កម្រិត ជីវភាពរបស់មន្ត្រី រាជ ការ គ្រូពេទ្យ គ្រូបង្រៀន និងកម្លាំងប្រដាប់អាវុធគ្រប់ប្រភេទ ដូចជា យោធា នគរបាល និងអាវុធ ហត្ថ ឲ្យកាន់តែមានជីវភាពធូរធា ឆ្លើយតបនឹងតម្រូវការចាំបាច់ក្នុងជីវភាពប្រចាំថ្ងៃ។
យោងតាមតារាងប្រាក់បៀវត្ស ដែលចេញដោយក្រសួងមុខងារសាធារណៈ បានបង្ហាញថា នៅចាប់ពីខែមករា ដល់ខែមីនា ឆ្នាំ២០១៨ ប្រាក់បៀវត្សទាបបំផុតរបស់មន្ត្រីរាជការ កម្លាំងប្រដាប់ អាវុធ រួមមាន ៖
១៖ ប្រាក់បៀវត្សមន្ត្រីរាជការស៊ីវិល ផ្នែករដ្ឋបាល ថ្នាក់ទាបបំផុត ដែលបច្ចុប្បន្ន (មុនខែមករា ឆ្នាំ ២០១៨) ចំនួន៨៥៣.៥០០រៀល ត្រូវកើនដល់៩១៤.៤៥០រៀល ចាប់ពីខែមករា ដល់ ខែមីនា ឆ្នាំ២០១៨ ។
២៖ ប្រាក់បៀវត្សគ្រូបង្រៀន កម្រិតទាបបំផុត ដែលបច្ចុប្បន្ន (មុនខែមករា ២០១៨) ចំនួន ៩៥៣,៥០០រៀល ត្រូវកើនដល់ ១.០១៤.៤៥០រៀល ចាប់ពីខែមករា ដល់ ខែមីនា ឆ្នាំ២០១៨។
៣៖ ប្រាក់បៀវត្សគ្រូពេទ្យ កម្រិតទាបបំផុត ដែលបច្ចុប្បន្ន (មុនខែមករា ២០១៨) ចំនួន ៩៥៣,៥០០រៀល ត្រូវកើនដល់ ១.០១៤.៤៥០រៀល ចាប់ពីខែមករា ដល់ ខែមីនា ឆ្នាំ២០១៨។
៤៖ ប្រាក់បៀវត្សនគរបាលជាតិ ថ្នាក់ទាបបំផុត ដែលបច្ចុប្បន្ន (មុនខែមករា ២០១៨) ចំនួន ៩៣៧.៩៧៨រៀល ត្រូវកើនដល់ ៩៩៨.៩២៨រៀល ចាប់ពីខែមករា ដល់ ខែមីនា ឆ្នាំ២០១៨។
៥៖ ប្រាក់បៀវត្ស កងទ័ព ថ្នាក់ទាបបំផុត ដែលបច្ចុប្បន្ន (មុនខែមករា ២០១៨) ចំនួន ៨៨០.៩៧៨រៀល ត្រូវកើនដល់ ៩៣៥.០២៨រៀល ចាប់ពីខែមករា ដល់ ខែមីនា ឆ្នាំ២០១៨។
ចំពោះការដំឡើងប្រាក់ប្រៀវត្សជូនមន្ត្រីរាជការ កម្លាំងប្រដាប់អាវុធ លើកទី២ ចាប់ពីខែ មេសា មុនចូលឆ្នាំខ្មែរ តទៅ រួមមាន ៖
១៖ ប្រាក់បៀវត្សមន្ត្រីរាជការស៊ីវិល ផ្នែករដ្ឋបាលថ្នាក់ទាបបំផុត នឹងត្រូវកើនឡើងដល់ ១.០១៤.៤៥០រៀល ចាប់ពីខែមេសា ឆ្នាំ២០១៨។
២៖ ប្រាក់បៀវត្សគ្រូបង្រៀន កម្រិតទាបបំផុត នឹងត្រូវកើនឡើងដល់ ១,១១៤,៤៥០រៀល ចាប់ពីខែមេសា ឆ្នាំ២០១៨។
៣៖ ប្រាក់បៀវត្សគ្រូពេទ្យ កម្រិតទាបបំផុត នឹងត្រូវកើនឡើងដល់ ១.១១៤.៤៥០រៀល ចាប់ ពីខែមេសា ឆ្នាំ២០១៨ ។
៤៖ ប្រាក់បៀវត្សនគរបាលជាតិ ថ្នាក់ទាបបំផុត នឹងត្រូវកើនឡើងដល់ ១.០៩៨.៩២៨រៀល ចាប់ពីខែមេសា ឆ្នាំ២០១៨។
៥៖ ប្រាក់បៀវត្សយោធា (កងទ័ព) ថ្នាក់ទាបបំផុត នឹងត្រូវកើនឡើងដល់ ១.០៣៥.០២៨រៀល ចាប់ពីខែមេសា ឆ្នាំ២០១៨។
ដោយឡែកបៀវត្សអប្បបរមារបស់យោធិន និង មន្ត្រីនគរបាលជាតិ គឺគិតបញ្ចូលទាំង ប្រាក់ ហូបប្រចាំថ្ងៃ និងរបបអង្ករប្រចាំខែគិតជាសាច់ប្រាក់។
គួរបញ្ជាក់ថា ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ធ្លាប់បាន អះអាង ជា ញឹក ញាប់នៅចំពោះមន្ត្រីរាជការ កម្លាំងប្រដាប់អាវុធថា នៅឆ្នាំ២០១៨ មន្ត្រីរាជការ គ្រូបង្រៀន គ្រូពេទ្យ និងកម្លាំងប្រដាប់អាវុធគ្រប់ប្រភេទ នឹងមានប្រាក់បៀវត្សទាបបំផុត១លានរៀន៕
ភ្នំពេញ ៖ អនុក្រឹត្យលេខ ១៦៨អនក្រ បកចុះថ្ងៃទី១០ខែតុលាឆ្នាំ២០១៧ ស្តីពីការគ្រប់គ្រងថង់ប្លាស្ទីក ត្រូវបានក្រសួងបរិស្ថាន ជូនដំណឹង កាលពីថ្ងៃទី២៨ ខែធ្នូឆ្នាំ២០១៧ អំពីការអនុវត្តអនុក្រឹត្យ ស្តីពី ការគ្រប់គ្រងថង់ប្លាស្ទីកស្តើងមានដៃយួរនេះ ដើម្បីឲ្យក្រុមហ៊ុននាំចូល និងក្រុមហ៊ុន ផលិតថង់ ប្លាស្ទីក និងអាជីវករ អ្នកប្រើប្រាស់ថង់ប្លាស្ទីកស្តើង មានដៃយូរ ក្នុងការវេចខ្ចប់ឥវ៉ាន់ត្រូវគោរព តាម លក្ខខណ្ឌ ក្នុងអនុក្រឹត្យនោះ រួមមាន៖
ថង់ប្លាស្ទីកស្តើងមានដៃយួរ អាចឲ្យនាំចូលប្រើប្រាស់បាន ត្រូវមានកម្រាស់ចាប់ពី០,០៣មីល្លីម៉ែត្រ ឡើងទៅ និងមានទទឹងបាតក្រោម ចាប់ពី២៥សង់ទីម៉ែត្រ ឬ១០អ៊ីងឡើងទៅ។ ការនាំចូល ថង់ ប្លាស្ទីក ស្តើងមានដៃយួរ និងការផលិតក្នុងស្រុកត្រូវគោរពតាមលក្ខខណ្ឌ ក្នុងអនុក្រឹត្យ នេះឲ្យបានទាំងកម្រាស និងទទឹងបាតក្រោម។ការផលិតក្នុងស្រុក ឬនាំចូល ថង់ប្លាស្ទីកស្តើងមានដៃយួរ ដែល គោរពតាមលក្ខខណ្ឌ ក្នុងអនុក្រឹត្យ១៦៨អនក្រ បក ហើយត្រូវសុំការអនុញ្ញាតពីក្រសួងបរិស្ថាន។ ប៉ុន្តែអាចអនុញ្ញាតឲ្យនាំចូល មិនបាច់ការអនុញ្ញាតពីក្រសួងបរិស្ថានបាន គឺបរិមាណតិច ជា១០០ គីឡូក្រាម។
ក្រុមហ៊ុន និងអាជីវករ ដែលចង់នាំចូលថង់ប្លាស្ទីកស្តើងមានដៃយួរ សម្រាប់វេចខ្ចប់សម្ភារៈដែល មាន ទាំងកម្រាសនិងទទឹងបាតក្រោមដូចក្នុងអនុក្រឹត្យណែនាំ ត្រូវដាក់ពាក្យស្នើសុំមក ក្រសួងបរិ ស្ថាន ដោយមានភ្ជាប់ឯកសារថតចម្លង បោះត្រាក្រុមហ៊ុនផង មានវិញ្ញាបនបត្រ បញ្ជាក់ការ ចុះ បញ្ជីពាណិជ្ជកម្ម វិញ្ញាបនបត្រចុះបញ្ជីពន្ធដារ(អាករលើតម្លៃបន្ថែម) ប័ណ្ណពន្ធ ប៉ាតង់ វិក័យបត្រ និង បញ្ចីវេចខ្ចប់ ដែលបញ្ជាក់ពីកម្រាស់ និង ទំហំទទឹងបាតថង់ប្លាស្ទីក។ក្រុមអ្នកលក់ដូរអាហារ ភេសជ្ជៈ និងម្ចាស់ភោជនីយដ្ឋានខ្លះ បានថ្លែងស្រដៀងគ្នាថាពួកគេគាំទ្រ នឹងការអនុវត្តអនុក្រឹត្យ លេខ១៦៨ អនក្រ បក របស់ក្រសួងបរិស្ថាន។ ព្រោះពួកគេ ជាអ្នកវេចខ្ចប់ ច្រកអាហារ ភេសជ្ជៈ បានប្រើប្រាស់ច្រើន នូវថង់ប្លាស្ទីក កំប៉ុងប្លាស្ទីក ប្រអប់ស្នោរ ដបជ័រ ទុយោបឺត ក្នុង១ថ្ងៃៗច្រើន គីឡូក្រាម។ ពួកគេបានស្នើសុំ ឲ្យក្រសួងបរិស្ថាន បង្ហាញកន្លែងលក់ថង់ ប្រភេទថ្មីដែលប្រើទៅ មិនសូវប៉ះពាល់បរិស្ថាន ឲ្យពួកគេ បានស្គាល់ងាយស្រួលទៅទិញយកមកប្រើប្រាស់ ដើម្បីចួលរួម ថែរក្សាបរិស្ថាន ទាំងអស់គ្នា។
ក្រសួងបរិស្ថាន ក៏បានណែនាំទៅក្រុមហ៊ុននិងអាជីវករ បន្តទៀតថា ការផ្តល់ថង់ប្លាស្ទីកស្តើងមាន ដៃយួរ ដល់អតិថិជននៅតាមមជ្ឈមណ្ឌល ពាណិជ្ជកម្មនិងផ្សារទំនើប នឹងត្រូវគិតកម្រៃបន្ថែមចាប់ ពីថ្ងៃទី១០ ខែមេសាឆ្នាំ២០១៨តទៅ៕
ភ្នំពេញ ៖ កងកម្លាំងមួកខៀវកម្ពជាចំនួន១៨៤នាក់ ដែលត្រៀមចេញទៅបំពេញបេសកកម្មសន្តិភាព របស់អង្គការសហប្រជាជាតិ នៅសាធារណរដ្ឋលីបង់ នាពាក់កណ្តាលខែមករា ឆ្នាំ២០១៨ ខាងមុខ នេះ បានបើកការហ្វឹកហ្វឺនបាញ់គ្រាប់ពិតនៅសាលាហ្វឹកហ្វឺនកងកម្លាំងរក្សាសន្តិភាព ពហុជាតិ ខេត្តកំពង់ស្ពឺ។
ឧត្តមសេនីយ៍ទោ ហ៊ួត គីមសាន្ត អគ្គនាយករងមជ្ឈមណ្ឌលជាតិរក្សាសន្តិភាព និងជា នាយក សាលាហ្វឹកហ្វឺនកងកម្លាំងរក្សាសន្តិភាពពហុកជាតិ ថ្លែងថា ពាក់កណ្តាលខែមករា ឆ្នាំ ២០១៨ ខាងមុខនេះ កម្ពុជានឹងបញ្ជូនកម្លាំងមួកខៀវកម្ពុជាចំនួន១៨៤នាក់ ដែលកំពុងហ្វឹក ហាត់ នេះ ត្រៀមទៅបំពេញបេសកកម្ម នៅសាធារណរដ្ឋលីបង់។
លោក ហ៊ួត គឹមសាន្ត បន្តថា កម្លាំងមួកខៀវ១៨៤នាក់ នេះ ក្រៅពីហ្វឹកហ្វឺនបាញ់គ្រាប់ពិត ក៏បានហ្វឹកហ្វឺនលើជំនាញ ជំនាញវិស្វកម្ម មានសំណង់ផ្តេក និងសំណង់បញ្ឈរ, ជំនាញបោស សំអាត មីន,ជំនាញកម្ទេចយុទ្ធភ័ណ្ឌមិនទាន់ផ្ទុះ និងគ្រាប់កែច្នៃ, ជំនាញសុខាភិបាលសង្គ្រោះបឋម ការសិក្សាផ្នែកច្បាប់ជាតិ និងច្បាប់អន្តរជាតិ ច្បាប់សិទ្ធិមនុស្ស ច្បាប់ព្រហ្មទណ្ឌ ច្បាប់សង្គ្រាម អប់រំ ចិត្តសាស្ត្រ។ល។
លោក ហ៊ួត គឹមសាន្ត បន្ថែមថា កម្លាំងមួកខៀវកម្ពុជាដែលត្រៀមខ្លួនដើម្បីចូលរួមបំពេញ បេសកកម្មក្រោមឆ័ត្រអង្គការសហប្រជាជាតិនេះ គឺមានសមត្ថភាពគ្រប់គ្រាន់ និងមានជំនាញ ច្បាស់លាស់ ដោយសារបានឆ្លងកាត់វគ្គហ្វឹកហ្វឺនត្រឹមត្រូវ ដែលមានយោធាជាតិ និងអន្តរជាតិដែល មានមកពីសហរដ្ឋអាមេរិក ចិន ឥណ្ឌា បារាំង ជប៉ុន មន្ត្រី UNMASS របស់អង្គការសហប្រជាជាតិ និងបណ្តាប្រទេសជាមិត្ត កម្ពុជា ជាច្រើននាក់ទៀត។
សូមបញ្ជាក់ថា ចាប់តាំងពីឆ្នាំ២០០៦មក កម្ពុជាបានបញ្ជូនកម្លាំង ចំនួនសរុបជិត៥០០០នាក់ ក្នុង នោះមានស្ត្រីជាង២០០នាក់ ទៅចូលរួមបេសកកម្មរបស់អង្គការសហប្រជាជាតិ ខណៈបច្ចុប្បន្ន កម្ពុជាមានកម្លាំងចំនួន១០០០នាក់ ដែលកំពុងបំពេញបេសកកម្មនៅប្រទេសចំនួន៨ រួមមាន៖ ប្រទេសស៊ូដង់ ស៊ូដង់ខាងត្បូង អាហ្វ្រិកកណ្តាល ឆាដ សាយប្រឹស ស៊ីរី លីបង់ និងម៉ាលី។ កម្លាំង មួកខៀវទាំងអស់នេះ ដែលធ្វើអោយប្រទេសកម្ពុជា ជាប្រទេសបរិច្ចាគកម្លាំងរក្សាសន្តិភាពច្រើន ជាងគេលំដាប់ទី២ នៅក្នុងតំបន់អាស៊ាន៕
ប៉ោយប៉ែត៖ បុរសម្នាក់បានរងរបួសធ្ងន់ រីឯស្ត្រីម្នាក់ទៀតរងរបួសស្រាល ដោយសារត្រូវ អណ្តាតភ្លើងឆាបឆេះក្នុងករណីទុស្សេចរន្ទអគ្គិសនីឆេះទីតាំងលក់ហ្គាស មួយកន្លែង បង្កឱ្យមាន ការភ្ញាក់ផ្អើល និងជួយអន្តរាគមន៍សង្គ្រោះជនរងគ្រោះភ្លាមៗដែរ។
ករណីនេះបានកើតឡើងនៅវេលាម៉ោង ៩និង៣៥នាទីយប់ ថ្ងៃទី២៩ ខែធ្នូ ឆ្នាំ២០១៧ ស្ថិត នៅភូមិបាលិលេយ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
សមត្ថកិច្ចប្រាប់ថា:ជនរងគ្រោះជាម្ចាស់ផ្ទះឈ្មោះ គ្រូច កែវ ភេទប្រុស អាយុជាង48ឆ្នាំ រង របួសធ្ងន់ ចំណែកប្រពន្ធឈ្មោះ រ៉េត ចាន់ដារ៉ា ហៅណេត អាយុ46ឆ្នាំ ។ អ្នកទាំង2 រស់នៅកន្លែង កើតហេតុ។សមត្ថកិច្ចបញ្ជាក់ថា ការឆាប់ឆេះទីតាំខាងលេីនេះ បណ្ដាលមកពីឆ្លងចរន្តអគ្គីសនី បង្ករជាអណ្តាតភ្លេីងឆាបឆេះទីតាំងកន្លែងលក់ហ្គាស បណ្តាលឩ្យម្ចាស់ផ្ទះប្ដីប្រពន្ធរងរបួសទាំង2 នាក់តែម្ដង។នៅក្នុងហេតុការណ៏នេះដែរត្រូវបានសមត្ថកិច្ចក្រុង និងអាជ្ញាធរជួយអន្តរាគន៏ហៅ រថយន្តពន្លត់អគ្គីយចំនួន5គ្រឿង ទាំងរបស់អាជ្ញាធរ និងរបស់ឯកជនដើម្បីមកជួយពន្លត់ទប់ ស្កាត់មិ នឩ្យឆេះឆ្លងរាលដាលដល់ផ្ទះអ្នកជិតខាង ។
អគ្គីភ័យត្រូវបានសមត្ថកិច្ច និងអាជ្ញាធរជួយអន្តរាគមន៏គ្រប់គ្រងស្ថានការ បាននៅម៉ោង10 យប់ ក្នុងថ្ងៃដដែល ហើយការឆាប់ឆេះទីតាំខាងលើនេះ សមត្ថកិច្ចនៅមិនទាន់បានកំណត់ទំហំនៃ ការខាត់បង់នៅឡើយទេ។ ចំពោះជនរង្រោះដែលជាម្ចាស់ទីតាំង ត្រូវបានសាច់ញ្ញាតដឹកបញ្ជូន ទៅសង្គ្រោះនៅមន្ទីរពេទ្យប្រទសថៃទាំងយប់។
ជុវិញករណីខាងលើនេះលោក សាន ស៊ានហូ អភិបាលក្រុងប៉ោយប៉ែត មានប្រសាសន៏ថា លោកនិងរៀបចំឩ្យអ្នកលក់ហ្គាសនៅអោយឆ្ងាយពីទីប្រជុំជួន ដើម្បីការពាររសុវត្តិភាព មិនឩ្យកើត ជាលើកទិ2 នៅបញ្ហាផ្ទុះទីតាំលក់ហ្គាសនៅកណ្ដាលទីក្រុងទៀតឡើយ៕ 
ភ្នំពេញ ៖ កាលពីរសៀលថ្ងៃទី២៩ ខែធ្នូ ឆ្នាំ២០១៧ ក្រសួងព័ត៍មាន បានរៀបចំការប្រកាសផ្ទេរតំណែង អគ្គនាយក នៃអគ្គនាយកដ្ឋានរដ្ឋបាល និងហិរញ្ញវត្ថុរបស់ក្រសួង ដោយឯកឧត្តម លី វ៉ាន់ហុង ត្រូវ បានតែងតាំងជាអគ្គនាយក នៃអគ្គនាយកដ្ឋានរដ្ឋបាល និងហិរញ្ញវត្ថុក្រសួងព័ត៍មាន បន្ថែមលើមុខ តំណែងអនុរដ្ឋលេខាធិការក្រសួងព័ត៍មាន នាពេលបច្ចុប្បន្ន ជំនួសលោកជំទាវ លឹម មុំ ដែលត្រូវ ចូល និវត្តន៍។
ក្នុងឱកាសនេះឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៍មានបានសម្តែងនូវការកោត សសើរ ចំពោះលោកជំទាវ លឹម មុំ អតីតអគ្គនាយិកា នៃអគ្គនាយកដ្ឋានរដ្ឋបាល និងហិរញ្ញវត្ថុ ក្រសួងព័ត៌ មាន ដែលបានខិតខំក្នុងការបំរើការងារជាច្រើនឆ្នាំកន្លងទៅនេះ ដែលស្នាដៃរបស់ លោកជំទាវ ត្រូវ បានកត់ត្រា និងក្លាយជាមេរៀនដល់អ្នកបន្តវេនរៀនសូត្រតាម។ ជាមួយគ្នានេះ ឯកឧត្តមរដ្ឋមន្ត្រីក៏ បានជំរុញដល់មន្ត្រីគ្រប់បណ្តាអង្គភាពក្រោមឱវាទក្រសួងព័ត៍មានត្រូវមាន សាមគ្គីភាពជាធ្លុងមួយ ធ្វើការបំរើដល់ផលប្រយោជន៍ប្រទេសជាតិជាធំ ជាពិសេសត្រូវធ្វើ យ៉ាងណារួមចំណែកជំរុញ វិស័យព័ត៍មាននៅកម្ពុជាអោយឈានឡើងបន្ថែមទៀត។
លោកជំទាវ លឹម មុំ មានប្រសាសន៍ថា ថ្ងៃនេះ ជាថ្ងៃដែលលោកជំទាវត្រូវដាក់អោយចូល និវត្តន៍ ក្រោយពីបានបំពេញការងារជូនជាតិអស់រយៈពេល ៣៨ឆ្នាំកន្លងមក ហើយថា សំរាប់រូប លោក ជំទាវ ផ្ទាល់មានមោទនភាពខ្ពង់ខ្ពស់បំផុតដែលបានចំណាយពេលវេលាស្ទើរ ពាក់កណ្តាល នៃជីវិត ក្នុងការបំរើប្រទេសជាតិ ដោយគិតចាប់តាំងពីឆ្នាំ១៩៧៩ រហូតដល់ឆ្នាំ ២០១៧នេះ។
ដោយឡែកឯកឧត្តម លី វ៉ាន់ហុង ដែលត្រូវចូលមកទទួលភារថ្មីជាអគ្គនាយក នៃអគ្គ នាយក ដ្ឋានរដ្ឋបាល និងហិរញ្ញវត្ថុក្រសួងព័ត៍មានមានប្រសាសន៍ថា ឯកឧត្តមសូមតម្កល់រាល់ ស្នាដៃរបស់ អតីតអគ្គនាយិកាទុកជាមេរៀនក្នុងការបំពេញការងារបន្តធ្វើអោយការងាររដ្ឋបាល និងហិរញ្ញវត្ថុ ក្រសួងព័ត៍មានទទួលបានសមិទ្ធផលថ្មីៗធំធេងបន្ថែមទៀត និងបានប្តេជ្ញាក្នុងការ បំពេញការងារ ដោយការទទួលខុសត្រូវខ្ពស់បំផុត៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
