ប៉ោយប៉ែត ៖ សមត្ថកិច្ចថៃ ឃាត់ខ្លួនពលរដ្ឋខ្មែរចំនួន៥នាក់ ក្នុងនោះមានស្រីម្នាក់ផងដែរ កាលពីថ្ងៃទី15 ខែធ្នូឆ្នាំ២០១៧ នេះ ខណៈដែលពួកគេទាំង៥នាក់ កំពុងលូនចេញពីរន្ធក្រោមដី មួយកន្លែង ដើម្បីឆ្លងដែនដោយខុសច្បាប់ តាមរយៈមេខ្សល់។ ករណីឃាត់ខ្លួននេះ ធ្វើឡើងដោយ កំលាំងអន្តោប្រវេសន៍ និងកំលាំងតម្រួតថៃ ប្រចាំតំបន់ ខ្លងលឹក ស្រុកអារញ្ញ ខេត្តស្រះកែវ ដោយ បានចុះទៅកាន់ចំណុចរបងថ្មមួយកន្លែង ដែលបានសាងសង់ឡើងជាប់នឹងមាត់អូរព្រំដែនកម្ពុជា ថៃ នៅទិសខាងត្បូងនៃទីលានផ្ញើរថយន្តរបស់ក្រុមហ៊ុន ហ្គោលដិនកេត ស្ថិតក្នុងឃុំអារញ្ញ ស្រុក អារញ្ញប្រាថេត ខេត្តស្រះកែវ ប្រទេសថៃ ។
នៅទីនោះមានរន្ធមួយដែលមានទំហំ ០,៥០ម៉ែត្រ ដែលក្រុមជនខិលខូចបានជីករូង ក្រោមដី សម្រាប់លូនឆ្លងចេញ ចូល ពី ប្រទេសកម្ពុជា ទៅកាន់ប្រទេសថៃ តាមក្រោមរបងថ្មនៃខ្សែបន្ទាត់ ព្រំដែន។ ដោយឃើញបែបនេះ កំលាំងថៃ ក៏បានអង្គុយចាំឃ្លាំមើលមួយសន្ទុះ ក៏បានឃើញ ពលករ ខ្មែរចំនួន៥នាក់ បានលូនចេញពីរន្ធបន្តបន្ទាប់ ទើបកំលាំងតម្រួតថៃ ឃាត់ខ្លួនដោយបានចាប់ ទាញ ចេញពីរន្ធ ព្រមទាំងបានសាកសួរបឋម គឺពលករខ្មែរទាំងនោះបានសារភាពថា រូង ក្រោមដីនេះ គឺជាស្នាដៃរបស់ក្រុមមេខ្យល់ សម្រាប់អោយពលករខ្មែរលូនឆ្លងចូល ទៅធ្វើការដោយខុសច្បាប់ នៅក្នុងប្រទេសថៃ ដោយបង់អោយពួកគេក្នុងម្នាក់៧០០បាត ។
ក្រោយពេលឃាត់ខ្លួនភ្លាមៗ ក្រុមតម្រួតថៃបាននាំខ្លួនជនទាំង៥នាក់ នោះទៅកាន់ស្នងការ ដ្ឋានខេត្តស្រះកែវជាបណ្តោះអាសន្ន ដើម្បីធ្វើការសាកសួរបន្ត រកមុខសញ្ញាមេក្លោងធំ ដែលនៅពី ក្រោយខ្នង ក្នុងរឿងនេះ។
សូមបញ្ជាក់ថា នេះមិនមែនជាករណីទិ១ទេ គឺធ្លាប់កើតឡើងជាញឹកញាប់ ហើយកាលពី រសៀលថ្ងៃទី១៦ ខែធ្នូ ម្សិលមិញនេះ ពលករខ្មែរទាំអស់នោះ ត្រូវបានសមត្ថកិច្ចថៃ សាកសួររួច រាល់ និងបានបញ្ជូនមកកម្ពុជា តាមច្រកទ្វារព្រំដែនអន្តជាតិ ប៉ោយប៉ែត វិញរួចហើយ៕
ភ្នំពេញ ៖ រដ្ឋមន្ត្រីក្រសួងការងារ និងបណ្ដុះបណ្ដាល វិជ្ជាជីវៈ ឯកឧត្តម អ៊ិត សំហេង បានអះអាងថា ក្នុងមួយឆ្នាំៗពលករខ្មែរដែលកំពុងបម្រើការងារនៅក្រៅប្រទេសចំនួន១លាន២សែននាក់ ពួកគេ បាន ផ្ញើរប្រាក់ដែលធ្វើការបាន មកឲ្យក្រុមគ្រួសារនៅក្នុងប្រទេសកម្ពុជាវិញប្រមាណជា ៣.៨០០ លានដុល្លារ អាមេរិក។
ក្នុងឱកាសអញ្ជើញចូលរួមខួប១០ឆ្នាំ របស់សមាគមជ្រើសរើសពលករកម្ពុជា អាក្រា កាលពី ល្ងាចថ្ងៃទី១៥ខែធ្នូ ឆ្នាំ២០១៧ នៅភោជនីយដ្ឋាន តាវ៉ាន់ដេង ក្នុងរាជធានីភ្នំពេញ ឯកឧត្តមបណ្ឌិត អ៊ិត សំហេង បានមានប្រសាសន៍ថា សរុបពលករខ្មែរដែលកំពុងធ្វើការនៅក្រៅប្រទេស រហូតមក ដល់ពេលនេះ មានចំនួន ១លាន២សែននាក់ ក្នុងចំនួនពលករទាំងអស់នេះ បានផ្ដល់នូវអំណោយ ផលច្រើនមកដល់សង្គមជាតិ ទោះបីទៅដោយស្របច្បាប់ ឬមិនស្របច្បាប់ តែអាចពួកគេរកការ ងារបានធ្វើនៅឯក្រៅប្រទេស និងបានផ្ញើរប្រាក់មកក្រុមគ្រួសារជារៀងរាល់ឆ្នាំ។
ឯកឧត្តមបណ្ឌិតបានលើកឡើងថា “ពេលខ្ញុំផ្ទាល់បានទៅជួបសំណេះសំណាល ជាមួយ បង ប្អូននៅតាមរោងចក្រមួយចំនួន ខ្ញុំបានសួរមើលទៅថាក្នុងចំណោមទាំងអស់គ្នា អ្នកណាខ្លះផ្ញើប្រាក់ មកផ្ទះវិញមួយខែ២០០ដុល្លារ ឲ្យលើកដៃមើលទៅសឹងតែមួយរយភាគរយ ដោយយ៉ាងតិចណាស់ ក៏១៥០ដុល្លារដែរ”។
ឯកឧត្តមបណ្ឌិតរដ្ឋមន្ត្រីបន្ថែមថា បើសរុបពលករខ្មែរកំពុងធ្វើការនៅថៃ១លាននាក់ ដោយ ក្នុង ម្នាក់ផ្ញើមក១៥០ដុល្លារ ក្នុងមួយខែៗ បូកសរុបទាំងអស់ក្នុងមួយឆ្នាំៗ មានចំនួន១៨០០ លាន ដុល្លារ ហើយសម្រាប់ពលករដែលបម្រើការងារនៅកូរ៉េ ជប៉ុន ម៉ាឡេ យ៉ាងតិចណាស់ក៏២ពាន់លាន ដុល្លារទៀតដែរ ។
ឯកឧត្តមបណ្ឌិត អ៊ិត សំហេង បានលើកឡើងទៀតថា សម្រាប់ពលករដែលបានទៅ ធ្វើការ នៅក្រៅប្រទេស ទីភ្នាក់ជ្រើសរើសពលករទាំងអស់ គឺមានភារកិច្ចមួយត្រូវប្រើ សម្តីឲ្យឯកភាពគ្នា បានន័យថា ត្រូវតែគោរពនូវពលករដែលធ្វើការនៅក្រៅប្រទេស ដោយពួកគាត់មិនមែនទៅ ធ្វើជា ខ្ញុំគេ ទៅធ្វើ ជាកញ្ជះគេដាច់ថ្លៃ ដូចពួកប្រឆាំងនិយាយនោះទេ ដោយគ្រប់សមាគមភ្នាក់ទាំងអស់ ត្រូវចេះលើកទឹកចិត្តដល់ពលករ ទៅបម្រើការងារដោយសមត្ថភាពនិងមានជំនាញច្បាស់លាស់។
សូមបញ្ជាក់ថា បច្ចុប្បន្នមានក្រុមហ៊ុនចំនួន៨៥ បាននាំពលករខ្មែរទៅធ្វើនៅប្រទេសរួមមាន៖ ប្រទេសថៃ ជប៉ុន ម៉ាឡេស៊ី ហុងកុង សិង្ហបុរីនិងប្រទេសតំបន់អារ៉ាប់មួយចំនួនទៀត។ ដោយឡែកពលករទៅបម្រើការងារនៅប្រទេសកូរ៉េខាងត្បូង មិនមែនទៅតាមរយៈក្រុមហ៊ុននោះទេ គឺកើតឡើងដោយមានកិច្ចព្រមព្រៀងរវាងក្រសួងការងារកម្ពុជានិងកូរ៉េ។
លោកស្រី អ៊ឹង សៀឫទ្ធី ប្រធានសមាគមជ្រើសរើសពលករកម្ពុជា អាក្រា បានលើកឡើងថា ក្នុងចំណោមក្រុមហ៊ុនទាំង៨៥ ដែលនាំពលករទៅក្រៅប្រទេសនេះ គឺមានចំនួន៤៧ក្រុមហ៊ុន ជា សមាជិករបស់សមាគមអាក្រា៕
ភ្នំពេញ ៖ សាធារណរដ្ឋឆែកដែលជាសមាជិករបស់សហភាពអឺរ៉ុបបានប្រកាសរឹតចំណងមិត្តភាពជាមួយកម្ពុជាឲ្យកាន់តែខ្លាំងក្លា និងមិនលូកដៃជ្រៀតជ្រែកកិច្ចការផ្ទៃក្នុងរបស់កម្ពុជា លើរឿង រំលាយគណបក្សសង្គ្រោះជាតិ ដែលជាការសម្រេចរបស់តុលាការកំពូលនោះឡើយ។
ការអះអាងបែបនេះ បានធ្វើឡើងក្នុងជំនួបពិភាក្សាការងាររវាងឯកឧត្តម អ៊ុច បូររិទ្ធ រដ្ឋលេខា ធិការក្រសួងការបរទេស និងសហប្រតិបត្តិការអន្តរជាតិ ជាមួយគណៈប្រតិភូ នៃគណៈកម្មាធិការ សុខភាព និងគោលនយោបាយសង្គម នៃព្រឹទ្ធសភាសាធារណរដ្ឋឆែក ដឹកនាំដោយឯកឧត្តម Ivo Barekអនុប្រធានព្រឹទ្ធសភា នៃសាធារណរដ្ឋឆែកនៅទីស្តីការក្រសួងការបរទេសកម្ពុជា នាព្រឹកថ្ងៃទី ១៥ ខែធ្នូ ឆ្នាំ២០១៧នេះ។
ថ្លែងប្រាប់ក្រុមអ្នកព័ត៌មានក្រោយជំនួបឯកឧត្តម អ៊ុច បូរិទ្ធ បានបញ្ជាក់ថា ក្នុងជំនួបនេះ គណៈប្រតិភូព្រឹទ្ធសភាឆែក និងរូបលោក បានពិភាក្សាក្រោយបរិយាកាស ដ៏ស្និទ្ធស្នាលបំផុត ពាក់ ព័ន្ធនឹងចំណងមិត្តភាពរវាងកម្ពុជា និងសាធារណរដ្ឋឆែក ដែលផ្តួចផ្តើមបង្កើតឡើងដោយ សម្តេច ព្រះបរមរតនកោដ្ឋ នរោត្តម សីហនុ ជាមួយថ្នាក់ដឹកនាំសាធារណរដ្ឋឆែក។
ក្នុងជំនួបនោះឯកឧត្តមអ៊ុចបូរិទ្ធក៏បានថ្លែងអំណរគុណដល់រដ្ឋាភិបាលឆែកដែលបានផ្តល់ជំនួយសម្រាប់ការអភិវឌ្ឍនៅកម្ពុជា តាំងពីកម្ពុជារំដោះខ្លួនចេញពីរបបប្រល័យពូជសាសន៍ ប៉ុល ពត មកដល់ពេលបច្ចុប្បន្ន។ ឯកឧត្តម អ៊ុច បូរិទ្ធ និងគណៈប្រតិភូព្រឹទ្ធសភាឆែក ក៏បានពិភាក្សាទៅលើ ការផ្តល់ជំនួយសម្រាប់កម្មវិធីអភិវឌ្ឍន៍ឆ្នាំ២០១៨-២០២០ ទៅលើវិស័យសិក្សាធិការ សុខាភិបាល និងកសិកម្មជាដើម។
បើតាមឯកឧត្តម អ៊ុច បូរិទ្ធ គម្រោងនេះ នឹងត្រូវចុះហត្ថលេខារវាងមន្ត្រី ផ្នែកអភិវឌ្ឍន៍របស់ កម្ពុជា និងសាធារណរដ្ឋឆែកក្នុងពេលឆាប់ៗខាងមុខនេះ។ ក្រៅពីការពិភាក្សាទៅការរឹតចំណង មិត្តភាព និងកិច្ចអភិវឌ្ឍន៍ហើយ ឯកឧត្តម អ៊ុច បូរិទ្ធិ ក៏បានឆ្លៀតរៀបរាប់ពីស្ថានការណ៍ នយោបាយ នៅកម្ពុជា ជាពិសេសរឿងរំលាយគណបក្សសង្គ្រោះជាតិ ជូនទៅគណៈប្រតិភូព្រឹទ្ធសភារបស់ឆែក ដែលជាប្រទេសសមាជិករបស់សហភាពអឺរ៉ុបផងដែរ។
ឯកឧត្តម អ៊ុច បូរិទ្ធ បានគូសបញ្ជាក់ថា ក្រោយពីបានស្តាប់អំពីស្ថានការណ៍នយោបាយ នៅ កម្ពុជា ហើយនោះគណៈប្រតិភូរបស់ឆែក បានឆ្លើយតបថាឆែកមានគោល នយោបាយច្បាស់លាស់ ដោយមិនជ្រៀតជ្រែកគោលនយោបាយរបស់ប្រទេសដទៃនោះទេ ហើយគោរពការសម្រេចចិត្ត របស់កម្ពុជា។
សូមបញ្ជាក់ថា គណបក្សសង្គ្រោះជាតិ ត្រូវបានតុលាការកំពូលរបស់កម្ពុជា កាត់រំលាយ ចោល នៅថ្ងៃទី១៦ ខែវិច្ឆិកា ឆ្នាំ២០១៧ ក្រោមបទចោទថាបានប្រព្រឹត្តទង្វើក្បត់ជាតិ ដោយឃុប ឃិត ជាមួយបរទេស ដើម្បីផ្តួលរំលំរាជរដ្ឋាភិបាលស្របច្បាប់។ ក្រៅពីការរំលាយគណបក្ស នយោបាយមួយនេះហើយ តុលាការកំពូល ក៏បានហាមឃាត់ថ្នាក់ដឹកនាំគណបក្សមួយនេះ ១១៨ រូបមិនឲ្យធ្វើសកម្មភាពនយោបាយរយៈពេល៥ឆ្នាំផងដែរ។
ប្រតិកម្មតបការរំលាយនេះ សភាអាមេរិក និងសភាសហភាពអឺរ៉ុបផងដែរ បានព្រមានក្នុងការ ដាក់ទណ្ឌកម្មដល់កម្ពុជា។ ឯកឧត្តម អ៊ុច បូរិទ្ធ បានអះអាងថា ការសម្រេចរបស់សភាអឺរ៉ុប មិនមែន ចេះតែអាចធ្វើទៅបាននោះទេ ព្រោះការអនុម័តទាំងឡាយស្ថិតនៅលើគណៈកម្មការអឺរ៉ុប។
បើតាមឯកឧត្តម អ៊ុច បូរិទ្ធ សភាសហភាពអឺរ៉ុប ធ្លាប់បានប្រតិកម្មច្រើនលើកច្រើនសារមក ហើយ តាមការអំពាវនាវរបស់លោក សម រង្ស៊ី និងបក្ខពួក តែទីបំផុតសហភាពអឺរ៉ុប មិនដែលបាន អនុម័ត តាមនោះឡើយ។
ក្នុងជំនួបនោះឯកឧត្តម អ៊ុច បូរិទ្ធ ក៏បានវាយប្រហារទៅលោក សម រង្ស៊ី ផងដែរថា ជាបុគ្គល ដែលតែងតែប្រឆាំងប្រយោជន៍ជាតិ និងបំផ្លាញប្រទេសជាតិ៕
ស្វាយរៀង ៖ លោកឧត្តមសេនីយ៍ឯក កេ ដា អគ្គលេខាធិការរងអាជ្ញាធរអាវុធគីមី ក្រសួងការពារជាតិ បានបញ្ជាក់នៅព្រឹកថ្ងៃទី១៥ ខែធ្នូ ឆ្នាំ២០១៧ នេះថា ក្រុមបច្ចេកទេសអង្គការហាមឃាត់អាវុធគីមី នៃអង្គការសហប្រជាជាតិ នឹងបន្តចុះពិនិត្យទីតាំង និងវាយតម្លៃសារធាតុគីមី ក្នុងគ្រាប់បែកគីមីដែលទម្លាក់ដោយសហរដ្ឋអាមេរិក នៅឃុំគគីរ ស្រុករមាសហែក ខេត្តស្វាយរៀង ដែលជាខេត្តចុងក្រោយ ក្នុងគោលដៅនៃប្រតិបត្តិការនេះ ដើម្បីបន្តប្រតិបត្តិការពិនិត្យ និងពិសោធន៍វាយតម្លៃ គ្រាប់បែកគីមីទាំងនោះ»តបតាមការស្នើសុំរបស់រាជរដ្ឋាភិបាលកម្ពុជា។
សូមជម្រាបថា ក្រុមបច្ចេកទេសរបស់អង្គការ OPCW មានចំនួន៤នាក់ បានមកដល់កម្ពុជា នៅយប់ថ្ងៃទី១០ ខែធ្នូ ឆ្នាំ២០១៧ បំពាក់ដោយម៉ាស៊ីនធ្វើតេស្តពិសោធន៍ ដែលដឹកមកពីប្រទេសហូឡង់ បានចុះប្រតិបត្តិការរួចរាល់ហើយ នៅខេត្តដែលរកឃើញគ្រាប់បែកគីមី ទម្លាក់ដោយអាមេរិក គឺនៅខេត្តមណ្ឌលគិរី ចំនួន ១០ទីតាំង និងខេត្តត្បូងឃ្មុំ ចំនួន២ទីតាំង ចំណែកនៅខេត្តស្វាយរៀង ដែលជាខេត្តចុងក្រោយនៃប្រតិបត្តិការនេះ នឹងត្រូវបន្តចុះនៅថ្ងៃទី១៥ ខែធ្នូ នេះ បន្ទាប់ពីបញ្ចប់ប្រតិបត្តិការ នៅខេត្តស្វាយរៀង ដែលជាខេត្តប្រតិបត្តិការចុងក្រោយ ក្រុមបច្ចេកទេសរបស់អង្គការ OPCW នឹងត្រឡប់មកភ្នំពេញវិញ ដើម្បីសរុបការវាយតម្លៃបញ្ចប់ អំពីលទ្ធផលធ្វើពិសោធន៍ លើគ្រាប់បែកគីមី របស់អាមេរិក នៅខេត្តទាំង៣ខាងលើនេះ។
គួរបញ្ជាក់ថា បើតាមរបាយការណ៍របស់ស៊ីម៉ាក់ បានបង្ហាញថា យន្តហោះកងទ័ពអាមេរិកបានទំលាក់គ្រាប់បែកនៅកម្ពុជា មានកាកសំណល់ជាតិផ្ទុះសង្គ្រាមច្រើនឥតគណនា បានបន្តសម្លាប់កូនចៅខែ្មរទាំងក្នុង និងក្រោយសង្គ្រាមបានបញ្ចប់។ តាមទិន្នន័យមិនទាន់ពេញលេញ គឺមានចំនួន១១៥,២៧៥ទីតាំង មានការហោះហើរទំលាក់ចំនួន ២៣ម៉ឺន ៥៤៤លើក មានចំនួនជាង ២លាន ៥៩ម៉ឺនគ្រាប់ មានទំងន់ជាង ២លាន៨ សែនតោន (២,៨០៣,៨៦៨,១៥២គីឡូក្រាម) ក្នុងនោះមានគ្រាប់បែកចង្កោម គិតជាកូនគ្រាប់បែកចង្កោមចំនួនជាង ២៧លាន ៩សែនគ្រាប់។ ក្នុងរបាយការណ៍ដដែល បានបញ្ជាក់ថា គ្រាប់បែកដែលជាអាវុធគីមី ប្រភេទពណ៌ទឹកក្រូច និងប្រភេទអាវុធគីមី មួយចំនួនទៀត មិនសិ្ថតក្នុងទិន្នន័យរបស់ស៊ីម៉ាក់ នេះទេ៕
ខេត្តកណ្ដាល ៖ នាព្រឹកថ្ងៃទី១៤ ខែធ្នូ ឆ្នាំ២០១៧នេះ កម្មករ-កម្មការិនីរោងចក្រ «ហ្គាវ័ន្ដ» ជាង២០០នាក់បាននាំគ្នាបិទផ្លូវជាតិលេខ២១បេ នៅភូមិដីថ្មី១ សង្កាត់តាខ្មៅ ក្រុងតាខ្មៅ ដើម្បីទាមទារឲ្យថៅកែរោងចក្របើកលុយជូនពួកគាត់។
តាមសេចក្ដីរាយការណ៍បានឲ្យដងឹថា នៅពេលក្រុមកម្មករ បានធ្វើការបិទផ្លូវជាតិ២១បេនេះបណ្ដាលឲ្យមានការកក់ស្ទះចរាចរណ៍យ៉ាងខ្លាំងផងដែរ ប៉ុន្ដែក្រោយមកអាជ្ញាធរ និងសមត្ថកិច្ចមូលដ្ឋានចេញជួយអន្ដរាគមន៍ ដើម្បីបញ្ជៀសចរាចរណ៍ដោយឲ្យទៅតាមផ្លូវមាត់ទន្លេ និងផ្លូវក្នុងក្រុងតាខ្មៅ។
ក្រោយមានការបិទផ្លូវនេះផងដែរ អភិបាលរងក្រុងតាខ្មៅម្នាក់ បានដឹកនាំមន្ត្រីចុះទៅជួបជាមួយតំណាងរោងចក្រដើម្បីធ្វើការដោះស្រាយ ប៉ុន្ដែគិតមកដល់ពេលនេះ មិនទាន់មានដំណោះស្រាយណាមួយនោះទេ៕
ខេត្តកែប ៖ ជនជាតិរុស្ស៊ីម្នាក់ត្រូវបានកម្លាំងនគរបាលឃាត់ខ្លួនពាក់ព័ន្ធពីបទប្រើប្រាស់ឯកសណ្ឋានយោធា ប្រើ ប្រាស់ខ្នោះ ដៃនឹងវទ្យុទាក់ទងខុសច្បាប់នឹងសង្ស័យប្រើកញ្ឆាខុសច្បាប់នៅផ្ទះជួល ខណៈដែលការឃាត់ខ្លួននេះធ្វើឡើងកាលពីម្សិលមិញ។
សមត្ថកិច្ចមូលដ្ឋានបានឲ្យដឹងថា ជនសង្ស័យខាងលើជាជនជាតិរុស្ស៊ី ឈ្មោះ Vlasovilya ភេទប្រុស អាយុ៣៧ឆ្នាំ កាន់លិខិតឆ្លង ដែនលេខ 714309033 ជាអ្នកទេសចរ ស្នាក់នៅផ្ទះជួលក្នុងភូមិកែប សង្កាត់ក្រុងកែប។ ចំណែកវត្ថុតាងដកហូតបានរួមមាន ៖ ខ្នោះដៃមួយគូរ, វិទ្យុទាក់ទង២គ្រឿង, ស្រោមកាំបិតស្នៀតមួយ, អាវក្រោះមួយ៥, ខោប៉ារ៉ាមួយ, សាំងតេរ៉ុងមួយ, ទ្រនាប់ក្បាលជង្គង់មួយគូ និងទ្រនាប់កែងដៃមួយគូ។ ក្រៅពីនោះឆែកឆេរក្រៅ ផ្ទះ(ចំងាយ៣-៤ម៉ែត្រ) រកឃើញកាំភ្លើងខ្លីជ័រមួយដើមនិងកញ្ឆាក្រៀមមួយកញ្ចប់ទំងន់ជាងមួយខាំ។
បច្ចុប្បន្នកម្លាំងជំនាញកំពុងកសាងសំណុំរឿងបន្តនីតិវិធីទៅតុលាការខេត្តកំពតដើម្បីចាត់ការបន្តតាមច្បាប់៕
ហ្វីលីពីន ៖ កាលពីថ្ងៃពុធក្រុមសមាជិកសភាប្រទេសហ្វីលីពីនបានគាំទ្រទាំងស្រុងនូវផែនការរបស់ប្រធានាធិបតី លោក រ៉ូឌ្រីហ្គោ ឌូធឺតេ ក្នុងការបន្តអនុវត្តច្បាប់អាជ្ញាសឹករយៈពេលមួយឆ្នាំទៀតនៅលើកោះមីនដាណាវនៅភាគខាងត្បូងប្រទេស ដើម្បីបំផ្លាញក្រុមអ៊ីស្លាមនិយម និងក្រុមឧទ្ទាមកុម្មុយនិស្ត។
ការបន្តអនុវត្តច្បាប់អាជ្ញាសឹករហូតដល់ថ្ងៃទី៣១ ខែធ្នូ ឆ្នាំ២០១៨ខាងមុខនេះគឺជារយៈពេលមួយយូរជាងគេបំផុតក្នុងចំណោមច្បាប់អាជ្ញាសឹក ដែលបុរសខ្លាំងប្រទេសហ្វីលីពីនគឺលោក ហ្វេឌីណាន ម៉ាកូស ធ្លាប់បានប្រើតាំងពីទសវត្សរ៍ឆ្នាំ១៩៧០។
ក្នុងសម័យប្រជុំពេញអង្គនៃសភាជាតិពីថ្ងៃម្សិលមិញនេះ សមាជិកសភាចំនួន២៤០រូបក្នុងចំណោម២៦៧រូបបានបោះឆ្នោតគាំទ្រលោក ឌូធឺតេ ដើម្បីចាត់វិធានការតឹងរ៉ឹងបញ្ឈប់ក្រុមសកម្មប្រយុទ្ធគាំទ្ររដ្ឋអ៊ីស្លាមដែលកំពុងជ្រើសរើសយុទ្ធជន និងត្រៀមខ្លួនធ្វើការវាយប្រហារថ្មីៗទៀត។
សូមបញ្ជាក់ថា ក្នុងការអនុវត្តច្បាប់អាជ្ញាសឹកនៅភាគខាងត្បូងប្រទេសហ្វីលីពីនកន្លងមកនេះ កងកម្លាំងប្រដាប់អាវុធប្រទេសហ្វីលីពីនបានសម្លាប់មនុស្សជាង១១០០នាក់ភាគច្រើនជាក្រុមសកម្មប្រយុទ្ធ និងបានធ្វើឲ្យប្រជាពលរដ្ឋមូលដ្ឋានជាង២០ម៉ឺននាក់រត់ចេញពីទីក្រុងម៉ារ៉ាវី៕
តួកគី ៖ បណ្ដាប្រទេសមូស្លីមបានថ្កោលទោសប្រធានាធិបតីអាមេរិកលោក ដូណាល់ ត្រាំ ដែលបានទទួលស្គាល់ទីក្រុងហ្សេរុយសាឡឹមជារដ្ឋធានីរបស់ប្រទេសអ៊ីស្រាអែល ហើយបានអំពាវនាវឲ្យពិភពលោកទទួលស្គាល់តំបន់ខាងកើតទីក្រុងហ្សេរុយសាឡឹមជារដ្ឋធានីរបស់រដ្ឋប៉ាឡេស្ទីន។
អគ្គលេខាធិការអង្គការនៃកិច្ចសហប្រតិបត្តិការអ៊ីស្លាមបាននិយាយថា សមាជិកដែលបានចូលរួមកិច្ចប្រជុំនៃអង្គការនេះបានព្រមព្រៀងគ្នា១០០ភាគរយដោយបានថ្កោលទោសចំពោះការប្រកាសទទួលស្គាល់របស់លោក ត្រាំ។
ប្រធានាធិបតីប្រទេសតួកគីលោក រ៉េស៊ីប តាយីប អេដូហ្គេន បាននិយាយថា ដំណើរការសន្តិភាពនៅមជ្ឈិមបូព៌ាដឹកនាំដោយសហរដ្ឋអាមេរិកត្រូវបានបញ្ចប់ហើយដោយសារតែទង្វើរបស់លោក ត្រាំ នេះឯង។
លោកបានបញ្ជាក់នៅចុងបញ្ចប់នៃកិច្ចប្រជុំរបស់អង្គការដែលមានសមាជិក៥៧ប្រទេសនេះថា វាដល់ពេលដែលក្រុមដឹកនាំមូស្លីមទាំងអស់ត្រូវពិភាក្សាគ្នាថា តើអ្នកណាជាអ្នកយកតួនាទីរបស់រដ្ឋាភិបាលក្រុងវ៉ាស៊ីនតោន ហើយអ្នកណាជាអ្នកគិតគូរយកបញ្ហានេះទៅពិភាក្សាជាមួយសហប្រជាជាតិ៕
រាជធានីភ្នំពេញ ៖ យោងតាមការព្យាករណ៍អាកាសធាតុរបស់ក្រសួងធនធានទឹក និងឧតុនិយម បានឲ្យដឹងថា អាកាធាតុនៅប្រទេសកម្ពុជានឹងចុះត្រជាក់ជាលើកទី២ ចាប់ថ្ងៃទី១៩ដល់ថ្ងៃទី២២ ខែធ្នូ ឆ្នាំ២០១៧ ខាងមុខនេះ ដោយសម្ពាធខ្ពស់ពីប្រទេសចិន នឹងរំកិលមកគ្របដណ្ដប់លើជ្រោយឥណ្ឌូចិន។ ក្នុងពេលជាមួយគ្នានេះ ខ្យល់មូសុងព្ឍសានខ្លាំង ក៏បង្កើតឥទ្ធិពលមកលលកម្ពូជា។
លក្ខណៈបែបនេះ និងធ្វើឲ្យសីតុណ្ហភាពអប្បបរមានៅកម្ពុជា ថងចុះខ្លាំង ឯល្បឿនខ្យល់ជំនោរបក់ពីទិសខាងជើង ក៏មានឥទ្ធិពលខ្លាំង ក្នុងមាន ខេត្តឧត្តរមានជ័យ , ព្រះវិហារ, ស្ទឹងត្រែង, រតនគិរី,មណ្ឌលគិរីនិងប៉ែលិន និងមានសីតុណ្ហភាពអប្បរមាមានពី ១៦-១៧ អង្គស្សាសេ៕
ព័ត៌មានលម្អិតសូមអានសេចក្តីប្រកាសរបស់ក្រសួងខាងក្រោមនេះ ៖
រាជធានីភ្នំពេញ ៖ តាមលិខិតអញ្ជើញមេធាវីរបស់សាលាដំបូងរាជធានីភ្នំពេញបានឲ្យដឹងថា នៅព្រឹកថ្ងៃទី១៤ ខែធ្នូ ឆ្នាំ២០១៧នេះ ចៅក្រស៊ើបសួរសាលាដំបូងរាជធានីភ្នំពេញ លោក គី ឫទ្ធី នឹងបន្តសួរចម្លើយលោក កឹម សុខា អតីតប្រធានគណបក្សសង្គ្រោះជាតិដែលកំពុងជាប់ឃុំក្នុងពន្ធនាគារត្រពាំងផ្លុង នៃខេត្តត្បូងឃ្មុំបន្ថែមទៀត ពាក់ព័ន្ធបទល្មើសក្បត់ជាតិ។ លិខិតដដែលបញ្ជាក់ថា ការសាកសួរនេះនឹងធ្វើឡើងនៅបន្ទប់សាកសួរ នៃមណ្ឌលអប់រំកែប្រែទី៣ «ម៣» (ពន្ធនាគារត្រពាំងផ្លុង) ខេត្តត្បូងឃ្មុំ ដែលជាកន្លែងឃុំខ្លួន លោក កឹម សុខា៕
រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី១៣ ខែធ្នូ ឆ្នាំ២០១៧នេះ បានចេញសេចក្តីថ្លែងការណ៍ចំនួន៣ចំណុច ឆ្លើយតបទៅនឹងការប្រកាសព្យួរជំនួយរបស់សហគមន៍អឺរ៉ុប មកលើការរៀបចំការបោះឆ្នោតនៅក្នុងប្រទេសកម្ពុជា៕
យ៉េមែន ៖ សារព័ត៌មាន BBC ចេញផ្សាយថា មនុស្សយ៉ាងហោចណាស់៣០នាក់បានស្លាប់បាត់បង់ជីវិត នៅក្នុងការវាយប្រហារផ្លូវអាកាសរបស់ក្រុមចំរុះអារ៉ាប់ដឹកនាំដោយ អារ៉ាប៊ីសាអូឌីតលើពន្ធនាគារមួយកន្លែងនៃក្រុមឧទ្ទាមហ៊ូទី ក្នុងរដ្ឋធានីសាណាអា ប្រទេសយ៉េមែន។
បើតាមប្រព័ន្ធផ្សព្វផ្សាយនៅក្នុងតំបន់ អ្នកស្លាប់ភាគច្រើនជាអ្នកជាប់ឃុំឃាំង នៅឯពន្ធនាគារមួយក្នុងមូលដ្ឋានយោធារបស់ក្រុមឧទ្ទាមហ៊ូទី។ ចំណែកឯឆ្មាំពន្ធនាគារម្នាក់ក៏បានឱ្យដឹងដែរថា ការវាយប្រហារលើកដំបូងបានបំផ្លាញផ្នែកខ្លះនៃពន្ធនាគារ ដោយជំរុញឱ្យអ្នកទោសមួយចំនួនព្យាយាមរត់គេចខ្លួន ខណៈការវាយប្រហារមួយផ្សេងទៀតបានបំផ្លាញអគារមួយស្ទើរតែទាំងស្រុង។
សូមបញ្ជាក់ថា បើតាមអង្គការសហប្រជាជាតិ មនុស្សច្រើនជាង៨,៦៧០នាក់ ត្រូវបានសម្លាប់ និង៤៩,៩៦០នាក់ បានរងរបួសគិតចាប់តាំងពីក្រុមចំរុះអារ៉ាប់ធ្វើអន្តរាគមន៍ យោធាក្នុងប្រទេសយ៉េមែន កាលពីឆ្នាំ២០១៥មក ហើយមនុស្ស២០.៧លាននាក់ កំពុងត្រូវការជំនួយមនុស្សធម៌ជាបន្ទាន់៕
ខេត្តបាត់ដំបង ៖ កម្លាំងចម្រុះនៃស្នងការដ្ឋាននគរបាលខេត្តបាត់ដំបងបានចុះបង្ក្រាបទីតាំងកត់កន្ទុយលេខមួយកន្លែងនៅក្នុងសង្កាត់ស្វាយប៉ោ ក្រុងបាត់ដំបង ខេត្តបាត់ដំបង នៅថ្ងៃទី១២ ខែធ្នូ ឆ្នាំ២០១៧ ដោយបានឃាត់ខ្លួនស្ត្រីជាមេឆ្នោតម្នាក់ រួមនិងវត្ថុតាងមួយចំនួន។
តាមសមត្ថកិច្ចបានឲ្យដឹងថា ស្ត្រីជាមេឆ្នោតដែលឃាត់ខ្លួននោះ ឈ្មោះ សូ ភីរម្យ អាយុ២៣ឆ្នាំ រស់នៅភូមិសំរោងក្នុង ឃុំសំរោងក្នុង ស្រុកឯកភ្នំ មុខរបរលក់សំបុត្ររថយន្តក្រុង នៅផ្សារបឹងឈូក។ ចំណែកវត្ថុតាងដែលដកហូតរួមមាន ៖ ទូរស័ព្ទ iPhone ០៣គ្រឿង ទូរសារ iPaid០១គ្រឿង ប្រាក់រៀល ២លាន ៧៤ម៉ឺនរៀល ប្រាក់ដុល្លារ១៨០ដុល្លារ ប្រាក់បាត១ពាន់បាត ក្រដាសកត់កន្ទុយលេខប្រចាំថ្ងៃ មួយចំនួន។ អ្នកប្រព្រឹត្តិជាមេឆ្នោត រួមទាំងវត្ថុតាងបានរៀបចំសំណុំរឿងបញ្ជូនទៅសាលាដំបូងខេត្តដើម្បីចាត់ការតាមផ្លូវច្បាប់៕
វ៉ាស៊ីងតោន ៖ រដ្ឋមន្ត្រីការបរទេសសហរដ្ឋអាមេរិកលោក រ៉ិក ធីល័រសុន បាននិយាយថា សហរដ្ឋអាមេរិកបានត្រៀមខ្លួនរួចហើយក្នុងការពិភាក្សាជាមួយប្រទេសកូរ៉េខាងជើងនៅពេលណាក៏បានប៉ុន្តែរដ្ឋាភិបាលក្រុងព្យុងយ៉ាងត្រូវតែត្រៀមខ្លួនក្នុងការផ្លាស់ប្ដូរមាគ៌ាទៅរកកម្មវិធីផលិតមីស៊ីល និងនុយក្លេអ៊ែរ។
ទន្ទឹមនេះដែរលោក ធីល័រសុន បាននិយាយក្នុងកិច្ចពិភាក្សាជាមួយក្រុមអ្នកវិភាគក្នុងទីក្រុងវ៉ាស៊ីងតោនសហរដ្ឋអាមេរិកថា ការត្រៀមខ្លួនរបស់យោធាសហរដ្ឋអាមេរិកក្នុងការឆ្លើយតបនឹងការគំរាមកំហែងណាមួយពីប្រទេសកូរ៉េខាងជើងក៏មានលក្ខណៈមួយខ្លាំងផងដែរ។
ពេលនេះកងកម្លាំងប្រដាប់អាវុធសហរដ្ឋអាមេរិកកំពុងទទួលការបញ្ជាឲ្យត្រៀមលក្ខណៈនៅគ្រប់អង្គភាពទាំងអស់។
សូមបញ្ជាក់ថា កន្លងមកនេះលោក ធីល័រសុន ក៏ធ្លាប់បានជជែកជាមួយប្រធានាធិបតីសហរដ្ឋអាមេរិកលោក ដូណាល់ ត្រាំ ពីការប្រើបណ្ដាញទំនាក់ទំនងជាមួយរដ្ឋាភិបាលក្រុងព្យុងយ៉ាងដែរ ប៉ុន្តែលោក ត្រាំ បាននិយាយថា វាគឺជាការចំណាយពេលវេលាឥតប្រយោជន៍៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
