All posts by មេគង្គ ប៉ុស្តិ៍

ភ្លើងឆេះឃ្លាំងលក់រថយន្តលេខ៥៨៨ តាមផ្លូវ២០០៤

January 18, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ឃ្លាំងលក់រថយន្ត យីហោ ៥៨៨ ស្ថិតនៅតាមផ្លូវ២០០៤ ក្នុងភូមិទ្រុងមាន់ សង្កាត់អូរបែកក្អម ខណ្ឌសែនសុខត្រូវបានអគ្គីភ័យ ឆាបឆេះបណ្តាលអោយ សម្ភារះ ចាស់ ៗ ដែលកាសសំណល់ ត្រូវភ្លើង ឆេះរងការខូចខាត ។ទោះបីជាយ៉ាង ណា រថយន្ត ដែលដាក់តាំងលកនៅផ្នែកខាងមុខ ពុំត្រូវភ្លើង ឆេះឡើយ ។

អគ្គីភ័យ នេះបង្កអោយមានការភ្ញាក់ផ្អើលកាលពីវេលាម៉ោង ប្រមាណ៣និង៣០នាទីរសៀលថ្ងៃទី១៨ខែមករា ឆ្នាំ ២០១៨ នេះ ហើយ រថយន្តទឹកជាច្រើនគ្រឿងបានទៅអន្តរាគមន៍ ពន្លត ់ទាន់ពុំបណ្តាលអោយ ឆេះរាលដាល់ឡើយ ។

តាមព័ត៌មានអោយដឹងថា នៅវេលា មុនពេលកើតហេតុគេឃើញបានឆេះចេញពីផ្នែកខាងក្រោយ នៅឃ្លាំង ផ្សែងហុយ ទ្រលោម និងអណ្តាត់ភ្លើង យ៉ាង សន្ធោសន្ឌៅ បង្កអោយមានការភ្ញាក់ផ្អើល ។

តាមនគរបាល បានអោយដឹងថា នៅក្នុងហេតុការណ៍នេះរថយន្តពន្លត់អគ្គីភ័យចំនួន១២គ្រឿងទៅអន្តរាគមន៍បាញ់ពន្លត់បាញ់ទឹកអស់៥រថយន្ត ពុំបណ្តាលអោយឆេះរាលដាលរថយន្តឡើយ។
តាមនគរបាល បានអោយដឹងថា អគ្គីភ័យនេះបណ្តាលអោយកាកសំណល់ចាស់ៗ ក្នុងឃ្លាំងផ្នែកខាងក្រោយដូចជា ទ្រុងរថយន្ត កៅអី ពូករថយន្តចាស់ៗជាដើម ទុកគរ ជាមួយខ្មៅដុះទ្រុប នោះត្រូវភ្លើង ឆេះរងការខូច។

ទាក់ទិនកាកើតមានអគ្គីភ័យ នេះ គេមានការសង្ស័យថាបណ្តាលមកពីកន្ទុយបារី ដែលគេបោះចោល ហើយ ក្លាយជាអគ្គីភ័យ តែម្តង ៕

ជប៉ុន បើកវិទ្យាស្ថានបណ្តុះបណ្តាលជំនាញថែទាំមនុស្សចាស់នៅកម្ពុជាចំណាយទុនជាង៣លានដុល្លារ

January 18, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ ស្របទៅនឹងព្រឹត្តិការណ៍ ដែលប្រមុខរាជរដ្ឋាភិបាល បានប្រកាសនូវគោលនយោបាយជាតិស្តីពី មនុស្សចាស់នៅកម្ពុជា មានក្រុមហ៊ុន មកពីប្រទេសជប៉ុនមួយឈ្មោះថា(ProcastCAMBODIA Co., Ltd.)បានចំណាយទុនជាង៣លានដុល្លារ បង្កើតវិទ្យាស្ថានបណ្តុះបណ្តាល សេវាថែទាំមនុស្សចាស់នៅក្នុងប្រទេសកម្ពុជា ដែលគ្រោងនឹងបើកឱ្យដំណើរក្នុងពេលដ៏ខ្លីខាងមុខនេះ។

លោក បណ្ឌិត អ៊ិត សំហេង រដ្ឋមន្ត្រីក្រសួងការងារ បានប្រាប់ក្រុមអ្នកសារព័ត៌មាននៅក្រោយជំនួបជាមួយ លោកKondo Yoshio ប្រធានក្រុមហ៊ុនProcast CAMBODIA Co., Ltd. នៅព្រឹកថ្ងៃទី១៨ខែមករា នាទីស្តីការក្រសួងថា កម្ពុជានឹងមានការបណ្តុះបណ្តាលសេវាថែទាំមនុស្សចាស់ ដំបូងបំផុត ដែលពុំធ្លាប់មាន។ អគារវិទ្យាស្ថានសេវាថែទាំមនុស្សចាស់ បានដំណើរការសាងសង់រួចរាល់ ហើយបាននិងកំពុងកសាងហេដ្ឋារចនាសម្ព័ន្ធនានា និងបំពាក់សម្ភារៈផ្សេងៗដើម្បីចាប់ផ្តើមដំណើរការដែលមានអ្នកឯកទេស បង្រៀនមកពីប្រទេសជប៉ុន ។ វិទ្យាស្ថានមួយនេះ គ្រោងនឹងដាក់ឱ្យដំណើរការនៅអំឡុងខែមេសាឆ្នាំ២០១៨ខាងមុខនេះ។

លោក រដ្ឋមន្ត្រីបញ្ជាក់ថា សេវាមួយនេះពិតជាត្រូវការ បណ្តុះបណ្តាជំនាញច្បាស់លាស់អាចនិយាយបានថា មានសមត្ថភាពប្រហាក់ប្រហែលនិងគិលានុប្បថ គិលានុប្បយិកា ព្រោះថាការថែទាំមនុស្សចាស់គឺត្រូវការមានចិត្តសាស្ត្រ វិទ្យាសាស្ត្រ ក្រមសីលធម៌ និងជំនាញជាចាំបាច់។ ការបញ្ជូនកម្មសិក្សាការីទៅធ្វើសេវានេះនៅប្រទេសជប៉ុនជារឿងមួយ ប៉ុន្តែកម្ពុជាក៏មានតម្រូវការសេវាបែបនេះចាំបាច់ផងដែរ ដោយសារអត្រាមនុស្សចាស់នៅកម្ពុជាកាន់តែច្រើន ហើយក្រុមគ្រួសារ កូនចៅ រវល់ ពិសេសកំណើនសេដ្ឋកិច្ចនិងសុខមាលភាពរបស់ប្រជាជនកម្ពុជា មានភាពល្អប្រសើរ ទាមទារឱ្យមានសេវាថែទាំ មនុស្សចាស់ឱ្យបានល្អនៅពេលខាងមុខនេះ។

ជាមួយគ្នានោះដែរ លោក Kondo Yoshioបានបញ្ជាក់តាមរយៈការបកប្រែឱ្យដឹងថា ក្រុមហ៊ុនបានចំណាយទុនប្រមាណ៣លានដុល្លារអាមេរិក ក្នុងការកសាងមជ្ឈមណ្ឌលដែលមានកំពស់៥ជាន់ ស្ថិតនៅតាមបណ្តោយផ្លូវឧកញ៉ាម៉ុងឬទ្ធី ក្នុងរាជធានីភ្នំពេញ។ នៅឆ្នាំដំបូងនេះ ក្រុមហ៊ុនគ្រោងនឹងបណ្តុះបណ្តាលមនុស្សប្រមាណ១៨០នាក់នៅកម្ពុជា។ ចំពោះសេវាថ្លៃសិក្សាក្រុមហ៊ុននឹងរកដៃគូរនៅប្រទេសជប៉ុនដើម្បីផ្តល់ថ្លៃសិក្សាជូននិស្សិតកម្ពុជា ដែលមានបំណងរៀនជំនាញនេះ។ នៅពេលរៀនចប់ពួកគេនឹងទៅធ្វើការនៅប្រទេសជប៉ុន។

លោកបញ្ជាក់ទៀតថាសាលាមួយនេះ នឹងបង្រៀនកម្រិតបរិញ្ញាបត្ររង ដែលមាន៣មហាវិទ្យាល័យគឺ មហាវិទ្យាល័យ ថែទាំ ចាស់ជរា មហាវិទ្យាល័យ អក្សរសាស្ត្រភាសារជប៉ុន និងមហាវិទ្យាល័យ អាយធី ដែលត្រូវប្រើពេល២ឆ្នាំ ដោយមិនកំណត់ពីអាយុនោះទេ ពោលគឺតាមតម្រូវការជាក់ស្តែង និងចាំបាច់៕

សាលាឧទ្ធរណ៍ដោះលែងមេធាវី អ៊ិត ពិសិដ្ឋរង្សី ដែលបាញ់គេរបួស

ភ្នំពេញ ៖ មេធាវី អ៊ិត ពិសិដ្ឋរង្សី ដែលបាញ់គេរបួសឥឡូវនេះ ត្រូវបានសភាស៊ើបសួរសាលាឧទ្ធរណ៍ដោះលែងឱ្យនៅក្រៅឃុំបណ្តោះអាសន្នហើយ។

ប្រភពព័ត៌មានច្បាស់ការណ៍មួយបង្ហើបឱ្យដឹងនៅថ្ងៃទី១៨ ខែមករា ថា មេធាវី អ៊ិត ពិសិដ្ឋរង្សី ត្រូវបានចៅក្រមស៊ើបសួរសាលាដំបូងរាជធានីភ្នំពេញបដិសេធការសុំនៅក្រៅឃុំបណ្តោះអាសន្ន រួចបានប្តឹងបន្តទៅសភាស៊ើបសួរសាលាឧទ្ធរណ៍ ហើយត្រូវសភាស៊ើបសួរសាលាឧទ្ធរណ៍ ដោះលែងឱ្យនៅក្រៅតែម្ដង។

ដោយឡែកមន្ត្រីពន្ធនាគារប៉េហ្ស៊ី ឱ្យដឹងថា ពេលនេះមេធាវី អ៊ិត ពិសិដ្ឋរង្ស៊ី នៅក្នុងឃុំដដែល ដោយពុំទាន់ទទួលបានដីកាសម្រេចពីខាងសាលាឧទ្ធរណ៍ដូចការលើកឡើងនោះទេ ។

សូមជម្រាបថា លោក អ៊ិត ពិសិដ្ឋរង្សី អាយុ៣៥ឆ្នាំ ត្រូវបានចៅក្រមស៊ើបសួរ បង្គាប់ឱ្យយកទៅឃុំខ្លួន ជាបណ្តោះអាសន្ននៅពន្ធនាគារព្រៃ ស ក្រោមការចោទប្រកាន់ពីបទហិង្សាដោយចេតនា។

គួររំឭកថា តាមរបាយការណ៍របស់នគរបាលខណ្ឌ៧មករា បានឲ្យដឹងថា មុនកើតហេតុ ជនសង្ស័យបានចេញពីហូបការរួចជិះរថយន្តរបស់ខ្លួនម៉ាកLexus470ពណ៌សពាក់ស្លាកលេខភ្នំពេញ2AP-8254តែម្នាក់ឯងមកផឹកបន្តជាមួយមិត្តភក្តិនៅចំណុចកើតហេតុផ្លូវលេខ២១១ កែងផ្លូវ២១៧ ក្នុងសង្កាត់វាលវង់ ខណ្ឌ៧មករា។ ពេលកំពុងផឹកស៊ីនោះ ស្រាប់តែពួកគេមានជម្លោះជាមួយគ្នា ហើយជនសង្ស័យបានទៅយកកាំភ្លើងនៅក្នុងរថយន្តមកបាញ់ជនរងគ្រោឈ្មោះ លី តុលា អាយុ២២ឆ្នាំ បណ្តាលឲ្យរងរបួសជើង និងបាញ់ឡើងលើមួយគ្រាប់។ បន្ទាប់មក ជនសង្ស័យក៏បានយកកាំភ្លើងទៅភ្ជង់ក្បាលជនរងគ្រោះម្នាក់ឈ្មោះ ខុន បញ្ចាសិទ្ធិ អាយុ២០ឆ្នាំ នាំឲ្យភ័យឡើងព្រលឹងចុងសក់។

ដោយឡែកតាមព័ត៌មានដែលភ្នាក់ងារព័ត៌មានបានទទួលនៅកន្លែងកើតហេតុនាពេលនោះ បានឲ្យដឹងថា ដំបូងឡើងលោកមេធាវីបង្កនិងជនរងគ្រោះទាំង២នាក់ជាមនុស្សស្គាល់គ្នា ហើយបានញ៉ាំការជាមួយគ្នា នៅយប់កើតហេតុ។ តែពេលហូបការរួចជនបង្កចេញមកមុនហើយបានទូរស័ព្ទហៅជនរងគ្រោះទៅទទួលទានបន្តនៅហាងទាខ្វៃ នៅជិតផ្ទះអគ្គស្នងការនគរបាលជាតិស្ថិតនៅតាមផ្លូវ២១១ ក្នុងសង្កាត់វាលវង់ ខណ្ឌ៧មករា ស្រាប់តែមានទំនាស់ក៏បាញ់តែម្តង។ ក្រោយបាញ់ជនរងគ្រោះហើយ ស្រាប់តែលោកមេធាវី បានប្រើពាក្យសំដីថា «ហ្អែង កុំចេះប្រយ័ត្នអញបាញ់ងាប់»៕

សំណុំរឿងបាត់បច្ច័យបុណ្យសពលោក កែម ឡី តុលាការសម្រេចចោទប្រកាន់មនុស្សបីនាក់

January 18, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ ព្រះរាជអាជ្ញារង នៃអយ្យការអមសាលា ដំបូងរាជធានីភ្នំពេញ លោក គុជ គីមឡុង បានសម្រេចចោទប្រកាន់ និងដាក់ព្រះតេជគុណប៊ុត ប៊ុនតិញ លោក មឿន តុលា និងលោក ប៉ា ងួនទៀង ដែលជាសមាជិកគណៈកម្មការ បុណ្យសពលោក កែម ឡី ឲ្យស្ថិត នៅក្រោមការ ឃុំខ្លួនបណ្តោះអាសន្ន ដើម្បីបង្ការ ឬបញ្ចប់បទល្មើសកុំឲ្យកើតមានឡើងជា ថ្មី ។

ការដាក់ក្រោមការឃុំខ្លួនបណ្តោះអាសន្ននេះ បន្ទាប់ពីលោក ពេជ្រ ស្រស់ ប្រធាន គណ បក្សយុវជនកម្ពុជា បានដាក់ពាក្យបណ្តឹងទៅតុលាការ ដោយអះអាងថា គណៈកម្ម ការ បុណ្យសពលោក កែម ឡី បានធ្វើឲ្យបាត់លុយបច្ច័យបុណ្យ ហើយមិនឃើញប្រគល់ ថវិកាដែលប្រមូលបានពីសប្បុរសជននានា ជូនក្រុមគ្រួសារសព លោក កែម ឡី នោះទេ។

យោងតាមដីកាសន្និដ្ឋាន បញ្ជូនរឿងឲ្យស៊ើបសួររបស់ លោក គុជ គីមឡុង នៅថ្ងៃទី ៤ ខែមករា ឆ្នាំ២០១៨ ចេញផ្សាយនៅថ្ងៃ១៨ ខែមករា នេះ បានឲ្យដឹងថា “បទល្មើសនេះ គឺរំលោភលលើទំនុកចិត្ត ប្រព្រឹត្តនៅចំណុចនៅរាជធានីភ្នំពេញ កាលពីអំឡុងឆ្នាំ២០១៦ តាមបទបញ្ញត្តិមាត្រា ៣៩១, ៣៩២ ក្រមព្រហ្មទណ្ឌនៃព្រះរាជាណាចក្រកម្ពុជា។ ដាក់ឲ្យ ស្ថិតនៅក្រោមការឃុំខ្លួនបណ្តោះអាសន្ន លើឈ្មោះខាងលើ ដើម្បីបង្ការ ឬបញ្ចប់បទ ល្មើស កុំឲ្យកើតមានឡើងជាថ្មី និងធានារក្សាជនត្រូវចោទ ទុកឲ្យតុលាការ ចាត់ការតាម នីតិវិធី” ។

គួររំលឹកថា កាលពីថ្ងៃទី០៨ ខែកញ្ញា ឆ្នាំ២០១៧លោក ពេជ្រ ស្រស់ បានសម្រេចប្តឹងព្រះតេជគុណ ប៊ុត ប៊ុនតិញ លោក ប៉ា ងួនទៀង និងលោក មឿន តុលា ដោយស្នើឲ្យអយ្យការអមសាលាដំបូងរាជធានីភ្នំពេញស៊ើបអង្កេតស្វែងរកការពិតលើគណៈកម្មការចំពោះថវិកាដែលបងប្អូនប្រជាពលរដ្ឋ ទាំងក្នុងនិងក្រៅប្រទេស ចូលបុណ្យសពលោកបណ្ឌិត កែម ឡី។

ការប្តឹងរបស់លោក ពេជ្រ ស្រស់ បានធ្វើឡើងបន្ទាប់ពីម្តាយ និងប្អូនប្រុសសពលោក កែម ឡី បានលើកឡើងពីការបាត់បង់ថវិកា និងមិនទទួលបានថវិកាពីពិធីបុណ្យសពដែល មានប្រជាពលរដ្ឋបានចូលបុណ្យយ៉ាងច្រើននោះ។

សូមបញ្ជាក់ថា លោក កែម ឡីត្រូវបានឃាតកបាញ់សម្លាប់ កាលពីថ្ងៃទី១០ ខែកក្កដា ឆ្នាំ ២០១៦ ក្នុងហាងលក់ទំនិញរបស់ស្ថានីយ៍ប្រេងមួយកន្លែង នៅជិតស្តុបបូកគោ ខណ្ឌចំការ មន៕

ដំរីព្រៃ១ក្បាលឆ្លងដែនពីថៃ ជាន់ស្ត្រីស៊ីឈ្នួលដកដំឡូងម្នាក់ស្ទើរស្លាប់

January 18, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ប៉ោយប៉ែត ៖ ស្ត្រីម្នាក់រងរបួសធ្ងន់បន្ទាប់ពីការវាយប្រហាពីដំរីព្រៃឈ្មោលមួយក្បាល បានជាន់ទាំងកម្រោល កាលពីវេលារំលងអាធ្រាត្រឈានចូលព្រឹកថ្ងៃទី១៨ ខែមករា ឆ្នាំ ២០១៨ នៅភូមិដំណាក់ក្សាន ឃុំបួរ ស្រុកភ្នំព្រឹក ខេត្តបាត់ដំបង។ ជនរងគ្រោះក្នុងហេតុការណ៍នេះ ឈ្នោះ ចក់ គឹមណៃ អាយុ៣២ឆ្នាំ ស្នាក់នៅកន្លែងកើតហេតុ និងមានទីលំនៅភូមិទួលពង្រឃុំទំនប់ដាច់ ស្រុកត្រពាំងប្រាសាទ ខេត្តឧត្តរមានជ័យ។

ស្ត្រីរងគ្រោះរងរបួសធ្ងន់បាក់ឆ្អឹងជំនីខាងស្តាំខ្ទេចតែម្តងខណៈកំពុងដេកមនិដឹហខ្លួន ហើយត្រូវដំរីខាងលើធាក់មួយជើង និងយកប្រមោយទាញសំពត់តង់កៅស៊ូដំពូលរោងស្នាក់នៅកម្ទេចចោលថែមទៀត។

តាមបុរសជាប្តីស្ត្រីរងគ្រោះឈ្មោះ តក់ ស្រស់ អាយុ៣១ឆ្នាំ និយាយថា គាត់ និងគ្រួសារមកពីខេត្តឧត្តរមានជ័យ មកចំណុចកើតហេតុកាលពីថ្ងៃទី២ ខែមករា ឆ្នាំ២០១៨ ប៉ុន្តែទើបរកការងារបានធ្វើ(កាប់ដំឡូង)រយៈពេល៧ថ្ងៃ លុះព្រឹកថ្ងៃទី១៨ នេះ ក៏ជួបរឿងអកុសលកំពុងដោយដេកលង់លក់ត្រូវសត្វដំរីព្រៃដ៌ធំមួយក្បាលខាងលើ ធ្វើការវាយប្រហារបង្ករបួសធ្ងន់ធ្ងរតែម្តង។ក្រោយកើ
តហេតុ ជនរងគ្រោះត្រូវបានគេបញ្ជូនទៅកាន់មន្ទីរពេទ្យបង្អែកសំពៅលូន ក្នុងស្រុកសំពៅលូន ដើម្បីជួយសង្គ្រោះបឋមបន្ទាប់មកក៏ត្រូវក្រុមគ្រូពេទ្យបញ្ជូនបន្តទៅមន្ទីរពេទ្យខេត្តបាត់ដំបង។

តាមប្តីជនរងគ្រោះអះអាថា គ្រួសារគាត់ក្រីក្រណាស់មានកូនស្រីតូចៗ៣នាក់ ផ្ញើនៅជាមួយប្អូនស្រីឱ្យជួយមើលថែទាំនៅឯស្រុកកំណើត សូម្បីតែទូរស័ព្ទកញ្ចាស់មួយក៏គ្មានប្រើដែរ និងសំណូមពរដល់សប្បុរសជនក្នុងនិងក្រៅប្រទេសមេត្តាជួយដល់គ្រួសារគាត់ផង។
សួមបញ្ជាក់ផងដែរថា ថ្មីនេះ ដំរីព្រៃឈ្មោលមួយក្បាលនេះ បានទៅឈនៅមុខសាលារៀនបឋមសិក្សាថ្មបាំង ឋិតក្នុងឃុំបឹងបេង ស្រុកម៉ាឡៃ ខេត្តបន្ទាយមានជ័យ រំខានដល់សិស្សមិនបានទៅសិក្សាអស់មួយរយៈ លុះពេលយប់ដំរីនេះបានទៅដេកនៅព្រៃបរិថាពេលថ្ងៃទើបវាចេញមកអុកឡុកអ្នកស្រុកវិញ៕

ភ្លើងឆេះផ្ទះឈើ១ខ្នង និងសម្ភារៈសរុបជាង៧០លានរៀល

January 18, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ព្រៃវែង ៖ ផ្ទះឈើ១ខ្នងរួមជាមួយសម្ភារៈជាច្រើនត្រូវអគ្គីភ័យលេបត្របាក់អស់ទាំងស្រុង។ហេតុការណ៍នេះបង្កឲ្យមានការភ្ញាក់ផ្អើលឡើងកាលវេលាម៉ោង១០និង៣០នាទីយប់ថ្ងៃទី១៦ខែមករាឆ្នាំ២០១៨ស្ថិតក្នុងភូមិព្រៃស្នួល.ឃុំគោខ្ទក.ស្រុកកំពង់ត្របែក.ខេត្តព្រៃវែង។

បើតាមរបាយការណ៍របស់សមត្ថកិច្ចបានឲ្យដឹងថា ផ្ទះដែលត្រូវអគ្គីភ័យឆាបឆេះអស់ទាំងស្រុងនេះមានទំហំ៨×៧ម៉ែត្រធ្វើអំពីឈើសរសរបេតុង.ប្រក់ក្បឿង.ជញ្ជាំងដែកម្ចាស់ឈ្មោះខៀវ.សូភេទស្រីអាយុ៦៧ឆ្នាំ។

តាមរបាយការណ៍ឲ្យដឹងបន្តថាហេតុការណ៍នេះមិនបណ្តាលឲ្យមានមនុស្សគ្រោះថ្នាក់ និងប៉ះពាល់ដល់ផ្ទះពលរដ្ឋជិតខាងនោះទេ គឺគ្រាន់តែបាត់បង់នូវសម្ភារៈដែលអគ្គីភ័យលេបត្របាក់រួមមានស្រូវចំនួន៤តោន.ម៉ាស៊ីនកិនស្រូវ១គ្រឿង.ម៉ាស៊ីនបូបទឹក១គ្រឿង.មាស៣តម្លឹង៥ជី.ប្រាក់រៀល៣លានរៀល.ប្រាក់ដុល្លារ៣.៥០០ដុល្លារ.កង់១គ្រឿង.កង្ហា៤គ្រឿង.ទូដាក់ខោអាវ២.ជង្រុកស្រូវទំហំ៤×៥ម៉ែត្រសង់អំពីឈើប្រក់ដែក១ខ្នង.ទូរទស្សន៍កូល័រ១គ្រឿង.បន្ទះសូឡាអាគុយ១កំប្ល៉េរ.ប្លង់ដី.សំបុត្រកំណើត និងឯកសារសំខាន់ៗជាច្រើនទៀតសរុបជាទឹកប្រាក់ប្រហែលជាង៧៤លានរៀល។

ករណីនេះសមត្ថកិច្ចបានសន្និដ្ឋានថាមូលហេតុមកពីឆ្លងចរន្តអគ្គីសនីផ្ទុះស្សេខ្សែភ្លើងទើបបណ្ដាលឲ្យឆាបឆេះបែបនេះ៕

ជិតដល់ថ្ងៃរៀបការ បែរជាត្រូវប៉ូលិសចាប់កូនកម្លោះដោយសារគ្រឿងញៀន

ភ្នំពេញ ៖ បុគ្គលិកក្រុមហ៊ុនស្មាតហ្វូនម្នាក់ជាប់អន្ទាក់សមត្ថកិច្ចខណ្ឌដង្កោ ខណៈសមត្ថកិច្ចកំពុងដាក់គោលដៅឆែកអាវុធជាតិផ្ទុះ និងបានឆែកឆេររកឃើញថ្នាំញៀនចំនួន១០កញ្ចប់តូច និងលុយចំនួន១.០០០ដុល្លារ កាលពីវេលាម៉ោង៧ និង៣០នាទី ថ្ងៃទី១៧ ខែមករា ឆ្នាំ២០១៧ នៅតាមបណ្តោយផ្លូវ២១៧ ភូមិមល័ សង្កាត់ដង្កោ ខណ្ឌដង្កោ។

សមត្ថកិច្ចបានអោយដឹងថា ជនសង្សយ័ខាងលើនេះ មានឈ្មោះ ឆាយ ប៊ុនថា អាយុ៣៤ឆ្នាំ មុខរបរបុគ្គលិកក្រុមហ៊ុនស្មាតហ្វូន ស្នាក់នៅសង្កាត់បឹងកេងកង ខណ្ឌចំការមន។ ជនសង្ស័យបានប្រាប់សមត្ថកិច្ចថា រូបគេនឹងរៀបមង្គលការនាពេលដ៏ខ្លីខាងមុខនេះ។

នៅចំពោះមុខសមត្ថកិច្ចជនសង្សយ័បានសារភាពថា ថ្នាំញៀនខាងលើនេះ រូបគេបានយកទៅផ្ញើតាមឡានអោយម៉ូយនៅឯខេត្តកំពង់ចាម។

បច្ចុប្បន្នជនសង្ស័យខាងលើ ត្រូវបានឃុំខ្លួនបណ្តោះអាសន្ននៅអធិការដ្ឋានខណ្ឌដង្កោ ដើម្បីកសាងសុំណុំរឿងបញ្ជូនទៅតុលាការចាត់ការតាមនីតិវិធិ៕

កម្ពុជាចាប់ផ្តើមអនុវត្តគោលនយោបាយ ទ្រទ្រង់មនុស្សវ័យចាស់

January 18, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គម, សេដ្ឋកិច្ចមេគង្គ ប៉ុស្តិ៍

ភ្នំពេញ ៖ នាយករដ្ឋមន្ត្រីកម្ពុជា បានយល់ព្រមទទួលធ្វើជាប្រធានមូលនិធិទ្រទ្រង់មនុស្សចាស់ ដែលនឹងជួយគាំទ្រកាន់តែខ្លាំងដល់ការអនុវត្តសកម្មភាពនៃគោលនយោបាយជាតិស្តីពីមនុស្សចាស់ ឆ្នាំ២០១៧-២០៣០។

នាព្រឹកថ្ងៃទី១៨ ខែមករា ឆ្នាំ២០១៨ រាជរដ្ឋាភិបាលកម្ពុជា បានប្រកាសដាក់អោយចាប់ផ្តើមអនុវត្តគោលនយោបាយជាតិ ស្ដីពីមនុស្សវ័យចាស់ឆ្នាំ២០១៧-២០៣០ ដោយប្រគល់ភារកិច្ច នៃការអនុវត្តគោលនយោបាយនេះ ទៅអោយក្រសួងសង្គមកិច្ច អតីតយុទ្ធជន និងយុវនិតិសម្បទា។

គោលនយោបាយជាតិថ្មីនេះ បង្កើតប្រព័ន្ធគាំពារសុខុមាលភាពរយៈពេលវែងសម្រាប់មនុស្សវ័យចាស់នៅកម្ពុជា អោយទទួលបាននូវគុណភាពជីវិត និងការគាំពារយ៉ាងពេញលេញ ខណៈដែលកាលពីក្នុងឆ្នាំ២០១៣ កម្ពុជាមានមនុស្សវ័យចាស់ អាយុពី៦០ឆ្នាំឡើង ប្រមាណ១លាន២សែននាក់ គឺស្មើនឹង៨%នៃចំនួនប្រជាជនសរុប១៥លាននាក់។ ហើយចំនួនមនុស្សវ័យចាស់នៅកម្ពុជា ត្រូវបានព្យាករណ៍ថានឹងកើនឡើងដល់ប្រមាណ ២លាននាក់ នៅឆ្នាំ២០៣០ ស្មើនឹង ១១% នៃប្រជាជនសរុប១៨លាននាក់ នាពេលនោះ។

តាមការបញ្ជាក់របស់ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនិតិសម្បទា បង្ហាញថា គោលនយោបាយជាតិ ស្តីពីមនុស្សវ័យចាស់ឆ្នាំ២០១៧-២០៣០ ត្រូវបានអនុម័តពីរាជរដ្ឋាភិបាល នៅក្នុងកិច្ចប្រជុំពេញអង្គគណៈរដ្ឋមន្ដ្រី នាថ្ងៃទី២៥ ខែសីហា ឆ្នាំ២០១៧ កន្លងទៅ។ គោលនយោបាយនេះ ត្រូវបានរៀបចំយ៉ាងយកចិត្តទុកដាក់ដោយមានកិច្ចសហការរវាងក្រសួងស្ថាប័នពាក់ព័ន្ធ និងដៃគូអភិវឌ្ឍន៍នានា ដូចជាអង្គការមនុស្សចាស់កម្ពុជា (HELP AGE CAMBODIA) និង អង្គការសហប្រជាជាតិសម្រាប់ការអភិវឌ្ឍប្រជាជន ហៅថា(UNFPA) ។ លោក វង សូត ក៏បានបញ្ជាក់ដែរថា ការរៀបចំគោលនយោបាយជាតិស្ដីពីមនុស្សវ័យចាស់ ឆ្នាំ២០១៧-២០៣០នេះ ក៏ធ្វើឡើងស្របតាមយុទ្ធសាស្ដ្រចតុកោណដំណាក់កាលទី៣! ផែនការយុទ្ធសាស្ដ្រអភិវឌ្ឍន៍ជាតិ២០១៤-២០១៨! ក្របខ័ណ្ឌគោលនយោបាយជាតិគាំពារសង្គម ២០១៦-២០២៥ ផងដែរ។

នៅក្នុងពិធីប្រកាសផ្សព្វផ្សាយគោលនយោបាយជាតិ ស្ដីពីមនុស្សវ័យចាស់ឆ្នាំ២០១៧-២០៣០នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានយល់ព្រមទទួលធ្វើជា ប្រធានមូលនិធិទ្រទ្រង់មនុស្សចាស់នៅកម្ពុជា ដោយសម្តេចបាន កត់សំគាល់ថា បើទោះបីជា តាមប្រពៃណីទំនៀមទម្លាប់របស់កម្ពុជា មនុស្សវ័យចាស់ ត្រូវបានមើលថែទាំដោយកូនចៅ ក្រុមគ្រួសារក្តី ប៉ុន្តែជារួមមនុស្សវ័យចាស់ក៏ត្រូវតែទទួលបាននូវការគាំពារសុខមាលភាព និងការយកចិត្តទុកដាក់ ពីគោលនយោបាយរបស់រាជរដ្ឋាភិបាលផងដែរ។
សម្តេចនាយករដ្ឋមន្ត្រី បានចាត់ទុកថា ការបង្កើតគោលនយោបាយ គាំពារសុខមាលភាពដល់ប្រជាពលរដ្ឋ គឺជារៀងចាំបាច់បំផុត នាពេលនេះ។

សូមបញ្ជាក់ថា គោលនយោបាយជាតិស្តីពីមនុស្សវ័យចំណាស់ឆ្នាំ២០១៧-២០៣០ នឹងផ្តោតលើសកម្មភាពនិងការងារអាទិភាពចំនួន៩ សម្រាប់មនុស្សវ័យចាស់ រួមមាន៖ សន្ដិសុខហិរញ្ញវត្ថុ, សុខភាព និងសុខុមាលភាព, របៀបរបបការរស់នៅ, បរិស្ថានដែលអំណោយផល, សមាគមមនុស្សចាស់ និងវ័យចាស់, ទំនាក់ទំនងអន្ដរជំនាន់, ការរំលោភបំពាន និងអំពើហិង្សាលើមនុស្សចាស់, ស្ថានភាពមានអាសន្ន និង ការត្រៀមខ្លួនមនុស្សវ័យក្មេងសម្រាប់ឈានចូលវ័យចាស់។

គួរបញ្ជាក់ថា នាពេលកន្លងមក រាជរដ្ឋាភិបាលកម្ពុជា ក៏បានដាក់ចេញនិងកំពុងអនុវត្ត នូវក្របខណ្ឌគោលនយោបាយគាំពារសង្គមមួយចំនួនរួចមកហើយ ដើម្បីលើកកម្ពស់ជីវភាព សុខមាលភាពនិងកាត់បន្ថយភាពក្រីក្រ របស់ប្រជាពលរដ្ឋ ក្នុងនោះមានដូចជា ៖ គោលនយោបាយជាតិគាំពារសង្គម ឆ្នាំ២០១៦-២០២៥! បេឡាជាតិរបបសន្តិសុខសង្គម (ប.ស.ស) បេឡាជាតិសន្តិសុខសង្គមសម្រាប់មន្ត្រីរាជការស៊ីវិល (ប.ជ.ស) បេឡាជាតិអតីតយុទ្ធជន (ប.ជ.អ) មូលនិធិជនពិការ(ម.ជ.ព) មូលនិធិគាំពារសុខុមាលភាព សម្រាប់មន្ត្រីរាជការ កងកម្លាំងប្រដាប់អាវុធ អតីតយុទ្ធជន ក្រុមប្រឹក្សាឃុំសង្កាត់ មូលនិធិគាំពារសង្គមសម្រាប់កម្មករក្នុងប្រព័ន្ធនិងក្រៅប្រព័ន្ធ! មូលនិធិមន្ទីរពេទ្រគន្ធបុប្ផា និងមូលនិធិត្រីចក្រយានកម្ពុជា រឺមូលនិធិសីក្លូ ជាដើម៕

ប្រាក់ខែមន្ត្រីរាជការ នឹងត្រូវដំឡើង២ដង ក្នុងឆ្នាំ២០១៨នេះ

January 17, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ភ្នំពេញ ៖ រដ្ឋាភិបាលកម្ពុជា បានចាប់ផ្តើមអនុវត្តគោលនយោបាយថ្មីចំនួនពីរ នាដើមឆ្នាំ២០១៨ ដើម្បីលើកកម្ពស់ជីវភាពប្រជាពលរដ្ឋ ដែលកំពុងបំពេញការងារក្នុងវិស្ថាប័នរដ្ឋ និងស័យឯកជន ក្នុងនោះរួមមាន ការដំឡើងប្រាក់បៀវត្ស២ដងក្នុង១ឆ្នាំ សម្រាប់មន្ត្រីរាជការ។ ការកំណត់ដំឡើងប្រាក់បៀវតអប្បរមា ដែលលើសពី១លាន២សែនរៀលទើបជាប់កាតព្វកិច្ចបង់ពន្ធ ។

ដូចទៅនឹងការប្រកាសនាពេលកន្លងមក រាជរដ្ឋាភិបាលកម្ពុជា បានចាប់ផ្តើមអនុវត្តគោលនយោបាយដំឡើងប្រាក់បៀវត្សចំនួនពីរលើក ចាប់ពីដើមឆ្នាំ២០១៨ តទៅ សម្រាប់មន្ត្រីរាជការ គ្រូពេទ្យ គ្រូបង្រៀន នគរបាលជាតិ និងយោធិន។ លើកទី១ ត្រូវធ្វើឡើងនៅអំឡុងខែមករា និងលើកទី២ នៅអំឡុងខែមេសា មុនពិធីបុណ្យចូលឆ្នាំខ្មែរ។ ការដំឡើងប្រាក់បៀវត្ស នៅក្នុងឆ្នាំ២០១៨នេះ គឺត្រូវបានដំឡើង ក្នុងអត្រាកំណើនជាង១០% នៃមូលដ្ឋានប្រាក់បៀវត្សឆ្នាំចាស់ និងជាការដំឡើងប្រាក់ បំណាច់មុខងារ។

យោងតាមតារាងប្រាក់បៀវត្ស ទាបបំផុត សម្រាប់ឆ្នាំ២០១៨នេះ ត្រូវបានបែងចែក ដូចជា ៖ ១៖ ប្រាក់បៀវត្សមន្ត្រីរាជការស៊ីវិល ផ្នែករដ្ឋបាល ថ្នាក់ទាបបំផុត ដែល មុនខែមករា ឆ្នាំ២០១៨ មានចំនួន៨៥ម៉ឺន៣,៥០០រៀល ត្រូវតម្លើងដល់៩១ម៉ឺន៤.៤៥០រៀលក្នុងដំណាក់កាលទី១ និងឡើងដល់ ១លាន១៤,៤៥០រៀល ក្នុងដំណាក់កាលទី២។ ២៖ ប្រាក់បៀវត្សគ្រូបង្រៀន កម្រិតទាបបំផុត ដែលមុនខែមករា ឆ្នាំ២០១៨ មានចំនួន៩៥ម៉ឺន៣.៥០០រៀល ត្រូវតម្លើងដល់ ១លាន១ម៉ឺន៤,៤៥០រៀល ក្នុងដំណាក់កាលទី១ និងកើនឡើងដល់ ១លាន១សែន១ម៉ឺន៤.៤៥០រៀល ក្នុងដំណាក់កាលទី២ ។ ៣៖ ប្រាក់បៀវត្សគ្រូពេទ្យ កម្រិតទាបបំផុត ដែលមុនខែមករា ឆ្នាំ២០១៨ មានចំនួន៩៥ម៉ឺន៣,.៥០០រៀល ត្រូវតម្លើងដល់ ១លាន១ម៉ឺន៤.៤៥០រៀល ក្នុងដំណាក់កាលទី១ និងកើនដល់ ១លាន១សែន១៤.៤៥០រៀល ក្នុងដំណាក់កាលទី២ ។ ៤៖ ប្រាក់បៀវត្សនគរបាលជាតិ ថ្នាក់ទាបបំផុត ដែលមុនខែមករា ឆ្នាំ២០១៨ មានចំនួន៩៣ម៉ឺន៧.៩៧៨រៀល ត្រូវតម្លើងដល់ ៩៩ម៉ឺន៨៩២៨រៀលក្នុងដំណាក់កាលទី១ និងកើនដល់១លាន៩ម៉ឺន៨.៩២៨រៀល ក្នុងដំណាក់កាលទី២។ ៥៖ ប្រាក់បៀវត្សយោធិន (កងទ័ព) ថ្នាក់ទាបបំផុត ដែលមុនខែមករា ឆ្នាំ២០១៨ មានចំនួន៨៨ម៉ឺន៩៧៨រៀល ត្រូវតម្លើងដល់ ៩៣ម៉ឺន៥.០២៨រៀល ក្នុងដំណាក់កាលទី១ និងកើនដល់១លាន៣ម៉ឺន៥០២៨រៀល ។ បើតាមការបញ្ជាក់របស់ក្រសួងមុខងារសាធារណៈ បានបង្ហាញថា សម្រាប់ការដំឡើងប្រាក់ប្រៀវត្សអប្បបរមារបស់យោធិន និង មន្ត្រីនគរបាលជាតិ គឺគិតបញ្ចូលទាំង ប្រាក់ហូបប្រចាំថ្ងៃ និងរបបអង្ករប្រចាំខែគិតជាសាច់ប្រាក់។

ដោយឡែកចាប់ពីខែមករាឆ្នាំ២០១៨ តទៅ រាជរដ្ឋាភិបាលកម្ពុជា ក៏បានចាប់ផ្តើមអនុវត្តគោលនយោបាយថ្មីមួយទៀត គឺ ការបង់ពន្ធលើប្រាក់បៀវត្ស របស់មន្ត្រី បុគ្គលិក កម្មករ ទាំងក្នុងស្ថាប័នរដ្ឋ និងឯកជនទូទៅផងដែរ ។

យោងតាម សេចក្តីជូនដំណឹងរបស់ក្រសួងសេដ្ឋកិច្ច និងហិរញ្ញវត្ថុ ស្តីពីការការ អនុវត្តអាត្រាពន្ធលើប្រាក់បៀវត្សថ្មី បានបង្ហាញថា ចំនួនប្រាក់បៀវត្សចាប់ពី០រៀល ទៅដល់១លាន២សែនរៀល មិនត្រូវបានជាប់ពន្ធនោះទេ។

ចំណែក បៀវត្សចាប់ ១លាន២សែន១រៀល ដល់ ២លានរៀល ត្រូវជាប់កាតព្វកិច្ចបង់ពន្ធ៥ភាគរយ ។ បៀវត្សចាប់ពី ២លាន១រៀល ដល់៨លាន៥សែនរៀល ត្រូវជាប់កាតព្វកិច្ចបង់ពន្ធ ១០ភាគរយ។ បៀវត្សចាប់ពី ៨លាន៥សែន១រៀល ដល់ ១២លាន៥សែនរៀល ត្រូវជាប់កាតព្វកិច្ចបង់ពន្ធ ១៥ភាគរយ។ និងបៀវត្ស លើសពី១២លាន៥សែនរៀល ត្រូវជាប់កាតព្វបង់ពន្ធ២០ភាគរយ៕

ប្រទេសថៃត្រៀមធ្វើជាម្ចាស់ផ្ទះវេទិកាទេសចរណ៍អាស៊ាន ២០១៨ ក្នុងខេត្តឈាងម៉ៃ

January 17, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ថៃ ៖ ប្រទេសថៃ បានប្រកាសត្រៀមរួចជាស្រេចសម្រាប់វេទិការទេសចរអាស៊ាន 2018 ដែលនឹងធ្វើឡើងក្នុងខេត្ត ឈាងម៉ៃ ពីថ្ងៃទី 22 ដល់ 26 ខែ មករា នៅឯមជ្ឈមណ្ឌលតាំងពិពណ៌ និងសន្និសីទខេត្ត ឈាងម៉ៃ ក្រោមប្រធានបទ ការភ្ជាប់គ្នាជានិរន្តរ៍ និងវិបុលភាពគ្មានព្រំដែននៃអាស៊ាន ។

រហូតមកដល់ពេលនេះ ប្រទេស ថៃ ទទួលធ្វើជាម្ចាស់ផ្ទះសម្រាប់ពិធីនេះចំនួន 6 លើក ហើយនេះជាលើកដំបូង ដែលប្រទេស ថៃ ទទួលពិធីនេះក្នុងខេត្ត ឈាងម៉ៃ ។ ប្រទេស ថៃ មានគំរោងលើកកម្ពស់គោលដៅទេសចរទីពីរ បន្ទាប់ពីរាជធានី បាងកក និងបង្កើតការងារនៅតំបន់ជនបទ បង្កើនការចែកចាយចំណូលពីទេសចរណ៍ដល់តំបន់ផ្សេងៗ និងបង្ហាញពីការភ្ជាប់ទំនាក់ទំនងជិតស្និតរបស់ប្រទេស ថៃ ជាមួយបណ្ដាប្រទេសនៅអនុតំបន់ទន្លេមេគង្គ ។ សូមបញ្ជាក់ថា សមាជិក អាស៊ាន ទាំង 10 ប្រទេស ទទួលធ្វើជាម្ចាស់ផ្ទះឆ្លាស់វេនគ្នា សម្រាប់វេទិការទសេចរណ៍អាស៊ាន ។

ព្រឹត្តិការណ៍មួយសប្ដាហ៍នេះ នឹងផ្ដល់ឱកាសដល់ផ្នែកឯកជន និង សាធារណៈ ក្នុងនោះមានសេវាធ្វើដំណើរ និង ទេសចរណ៍ ដោយមានមន្ត្រីតំណាងប្រទេសទាំង 10 ជួបជុំគ្នាពិភាក្សាលើបញ្ហាជាច្រើនដែលអាស៊ានត្រូវប្រឈម ពិសេសវិស័យទេសចរណ៍ ។

រដ្ឋមន្ត្រីទេសចរណ៍ អាស៊ាន ទាំង 10 រូប នឹងជួប្រជុំជាមួយអង្គការទេសចរណ៍ក្នុងតំបន់ ព្រមទាំងក្រុមហ៊ុនឯកជន ដែលមានសណ្ឋាគារ ភោជនីយដ្ឋាន ភ្នាក់ងារផ្ដល់សេវាធ្វើដំណើរ ក្រុមហ៊ុនទេសចរ និងក្រុមហ៊ុនអាកាសចរណ៍ ។ មិនតែប៉ុណ្ណោះ រដ្ឋមន្ត្រីទេសចរអាស៊ាន នឹងជួបទ្វេភាគីជាមួយដៃគូរមកពីប្រទេស រុស្ស៊ី ចិន ជប៉ុន ឥណ្ឌា និង កូរ៉េខាងត្បូង៕

ក្រសួងពាណិជ្ជកម្មស្វះស្វែងរកទីផ្សារនាំចេញដំឡូងមីបន្ថែមទៀត

ភ្នំពេញ ៖ ក្រសួងពាណិជ្ជកម្ម បានបង្ហាញថា ក្រសួងកំពុងចរចារ ស្វែងរកទីផ្សារថ្មីៗបន្ថែមទៀត ដើម្បីជម្រុញនិងអភិវឌ្ឍឧស្សហកម្មដំឡូងមីរបស់កម្ពុជា ។

នៅក្នុងឱកាសចុះសិក្សា និងស្វែងយល់ពីបញ្ហាប្រឈមចំពោះសហគ្រាសផលិតម្សៅដំឡូងមី ក្នុងភូមិកៀនរ៉ូង សង្កាត់វិហារហ្លួង ក្រុងសួង ខេត្តត្បូងឃ្មុំ កាលពីរសៀលថ្ងៃទី១៦ ខែមករា ឆ្នាំ២០១៨ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានបញ្ជាក់ថា ក្រសួងកំពុងខិតខំប្រឹងប្រែង ក្នុងការជំរុញនិងអភិវឌ្ឍឧស្សហកម្មដំឡូងមី តាមរយៈមធ្យោបាយជាច្រើន ដូចជា ការចរចាស្វែងរកទីផ្សារថ្មីៗ, ការចងក្រងគោលនយោបាយដំឡូងមី, ការរៀបចំទិវាដំឡូងមីប្រចាំឆ្នាំ និងការអនុវត្តគម្រោងពង្រីក និងធ្វើពិពិធកម្ម ការនាំចេញ របស់កម្ពុជាដំណាក់កាលទី២ ព្រមទាំងគម្រោងជំរុញទីផ្សារខ្នាតតូច ដែលផ្តោតសំខាន់លើការពង្រឹងសមត្ថភាព

ប្រជាកសិករដាំដំឡូងមីជាដើម។ នៅក្នុងឱកាសនោះ លោករដ្ឋមន្ត្រីពាណិជ្ជកម្មបានធ្វើការពិនិត្យមើលដំឡូងមីស្រស់ ដែលសហគ្រាសក្នុងខេត្តត្បូងឃ្មុំនេះ ប្រមូលទិញពីប្រជាកសិករនៅក្នុងមូលដ្ឋាន និងតាមបណ្តាខេត្តនានា ព្រមទាំងទស្សនាខ្សែសង្វាក់ផលិតកម្មម្សៅដំឡូងមីផងដែរ។ បន្ទាប់ពីស្វែងយល់កាន់តែច្បាស់អំពីចង្វាក់ផលិតកម្មម្សៅដំឡូងមី និងបញ្ហាប្រឈមនានា ដែលរាំងស្ទះដល់ការនាំចេញម្សៅដំឡូងមីកម្ពុជា ជាពិសេសក្នុងខេត្តត្បូងឃ្មុំហើយនោះ ឯកឧត្តមរដ្ឋមន្ត្រី ក៏បានលើកទឹកចិត្តដល់ លោក សុង ហេង ដែលជាម្ចាស់សហគ្រាសសញ្ញាហង្សពីរ សូមអោយបន្តពង្រឹងចង្វាក់ ផលិតកម្មរបស់ខ្លួនបន្ថែមទៀត ហើយក្រសួងនឹងចូលរួមដោះស្រាយ បញ្ហាប្រឈមដែលសហគ្រាសកំពុងជួបប្រទះ ។

គួរបញ្ជាក់ថា កម្ពុជាគឺជាប្រទេសផលិតដំឡូងមីលំដាប់ទី៨ នៅលើពិភពលោក និងលំដាប់ទី៤ នៅក្នុងតំបន់ ។ ការនាំចេញផលិតផលដំឡូងមីរបស់កម្ពុជា បានកើនឡើងពី ២២ម៉ឺនតោន ក្នុងឆ្នាំ ២០១២ ដល់ជាង ៣លាន៦សែនតោន ក្នុងឆ្នាំ២០១៦ ។ ការនាំចេញផលិតផលដំឡូងមីរបស់កម្ពុជា ត្រូវបានបែងចែកចេញជា ប្រភេទផ្សេងៗគ្នា រួមមាន ចំណិតដំឡូងមីក្រៀម ដំឡូងមីស្រស់ ម្ស៉ៅដំឡូងមី និងកាកសំណល់ដំឡូងមី។ ទីផ្សារធំដែលនាំចូលផលិតផលដំឡូងមីរបស់កម្ពុជា មានដូចជា ប្រទេសថៃ វៀតណាម និងចិន៕

អាមេរិក បង្កើនអំណាចយោធាក្នុងឧបទ្វីបកូរ៉េ អំឡុងការប្រកួតអូឡាំពិករដូវរងារ

January 17, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អាមេរិក ៖ សហរដ្ឋអាមេរិក បង្កើនកម្លាំងជុំវិញឧបទ្វីបកូរ៉េ អំឡុងការប្រកួតអូឡាំពិចរដូវរងារក្នុងប្រទេស កូរ៉េខាងត្បូង ពីថ្ងៃទី 9 ដល់ 25 ខែកុម្ភៈ ដោយបញ្ជូននាវាផ្ទុកយន្តហោះ និង នាវាពិឃាតបន្ថែមទៀត ទៅកាន់ដែនទឹកឧបទ្វីបកូរ៉េ ។ សកម្មភាពនេះធ្វើឡើងស្របពេលដែលមន្ត្រីកូរ៉េទាំងពីរ ជួបគ្នាជាច្រើនលើក និង បន្ទាប់ពី សហរដ្ឋអាមេរិក ព្រមព្រៀងផ្អាកសមយុទ្ធយោធាជាមួយ កូរ៉េខាងត្បូង រហូតដល់បញ្ចប់កីឡាអូឡាំពិច ។

មន្ត្រី សហរដ្ឋអាមេរិក និយាយថា ទោះជាមន្ត្រីកូរ៉េទាំងពីរបានជួបគ្នា ប៉ុន្តែស្ថានភាពនៅតែតានតឹង ទាមទារឲ្យមានការប្រុងប្រយ័ត្ន ។ កងទ័ពអាកាស អាមេរិក ប្រចាំមហាសមុទ្រប៉ាស៊ីហ្វិក បានបញ្ជូននាវា រួមជាមួយនឹងយន្តហោះទម្លាក់គ្រាប់បែក B-2 “Spirit” និងយន្តហោះចម្បាំងជំនាន់ថ្មី F-35 ជាច្រើនគ្រឿង ទៅកាន់មូលដ្ឋានយោធាក្នុងមហាសមុទ្រប៉ាស៊ីហ្វិក ។ អ្វីដែលថ្មីគឺមានការបន្ថែមយន្តហោះទម្លាក់គ្រាប់បែក នុយក្លេអ៊ែរ B-2 ដែលមានអនុភាពខ្លាំងជាង B-1B ព្រោះវាអាចនាំយកគ្រាប់បែកនុយក្លេអ៊ែរ អាចជ្រៀតចូលទៅក្នុងដី បំផ្លាញរូងក្រោមដី និងសំណង់ក្រោមដី ដែលគេជឿថា កូរ៉េខាងជើង បានសាងសង់ដើម្បីផលិតគ្រាប់បែកនុយក្លេអ៊ែរ ។

នាវាផ្ទុកយន្តហោះ USS Ronald Reagan ចេញពីមូលដ្ឋាន Yokosuka ប្រទេស ជប៉ុន បានទៅដល់ដែនទឹកក្បែរឧបទ្វីបកូរ៉េ មុនពេលនាវាផ្ទុកយន្តហោះ USS Carl Vinson ចេញដំណើរពីមូលដ្ឋានយោធារដ្ឋ វ៉ាស៊ីងតុន ។ ចំណែកនាវាប្រយុទ្ធ USS Wasp មានសមត្ថភាពប្រយុទ្ធ និងផ្ទុកយន្តហោះជំនាន់ក្រោយ F-35B បានទៅដល់ដែនទឹកភាគខាងត្បូងប្រទេស ជប៉ុន ជាមួយនឹងយន្តហោះ F-35 ច្រើនជាង 30 គ្រឿង ។ គណបក្សកាន់អំណាច កូរ៉េខាងជើង ចេញសេចក្ដីថ្លែងការណ៍ថា ទង្វើរបស់ សហរដ្ឋអាមេរិក មានបំណងញុះញ៉ង់ដល់កិច្ចប្រឹងប្រែងធ្វើឲ្យប្រសើរដល់ទំនាក់ទំនងរវាងកូរ៉េទាំងពីរ ហើយជាការបង្កហេតុយោធាដែលមិនអាចអត់ឱនឲ្យបាន ៕

ក្រុមរដ្ឋមន្ត្រី20ប្រទេសពិចារណាបន្ថែមទណ្ឌកម្មពហុភាគីទៅលើកូរ៉េខាងជើង

January 17, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

កូរ៉េ ៖ រដ្ឋមន្ត្រីនៃប្រទេសទាំង 20 របស់សម្ព័ន្ធមិត្តសហរដ្ឋអាមេរិក ព្រមព្រៀងក្នុងកិច្ចប្រជុំទីក្រុង Vancouver ប្រទេស កាណាដា ថានឹងពិចារណាដាក់ទណ្ឌកម្មពហុភាគី ចំពោះប្រទេស កូរ៉េខាងជើង បន្ថែមទៅលើទណ្ឌកម្មអង្គការសហប្រជាជាតិ ។

សេចក្ដីថ្លែងការណ៍រួមគ្នាបញ្ជាក់ថា អ្នកចូលរួមក្នុងកិច្ចប្រជុំ នឹងពិចារណាវិធានការជាច្រើនចំពោះមហិច្ឆតាអវុធនុយក្លេអ៊ែរ កូរ៉េខាងជើង ក្នុងនោះមាន ទណ្ឌកម្មពហុភាគី និងកិច្ចការការទូត បន្ថែមទៅលើដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ។ ទោះយ៉ាងណា កិច្ចប្រជុំ គាំទ្រទៅលើការសន្ទនារវាងមន្ត្រីកូរ៉េទាំងពីរ ដែលនាំទៅរកការបន្ធូរបន្ថយភាពតាមតឹង ។

សូមបញ្ជាក់ថា កិច្ចប្រជុំរដ្ឋមន្ត្រី 20 ប្រទេស ក្នុងទីក្រុង Vancouver ប្រទេស កាណាដា ជាកិច្ចប្រជុំក្រុមប្រទេសសម្ព័ន្ធមិត្ត សហរដ្ឋអាមេរិក ដែលធ្លាប់គាំទ្រ កូរ៉េខាងត្បូង អំឡុងសម័យសង្គ្រាមកូរ៉េ ធ្វើឡើងស្របពេលដែលមន្ត្រីកូរ៉េទាំងពីរ ជួបគ្នាដើម្បីពិភាក្សាអំពីការបញ្ជូនប្រតិភូ កូរ៉េខាងជើង ទៅចូលរួមក្នុងការប្រកួតកីឡាអូឡាំពិចរដូវរងារឆ្នាំ 2018 ក្នុងទីក្រុង ព្យេអុងចាង ប្រទេស កូរ៉េខាងត្បូង ដែលនឹងធ្វើឡើងនៅថ្ងៃទី 9 ដល់ថ្ងៃទី 25 ខែ កុម្ភៈ ។ ប្រទេស កូរ៉េខាងជើង ទើបតែឆ្លើយតបចំពោះការបញ្ជូនអត្តពលិក នៅដើមខែ មករា ឆ្នាំ 2018 នេះ ប៉ុណ្ណោះ ៕

សមត្ថកិច្ចចុះបិទគ្លីនីកអត់ច្បាប់២កន្លែងនៅក្រុងបាវិត

January 17, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ស្វាយរៀង ៖ លេខាធិការដ្ឋានលុបបំបាត់ឱសថក្លែងក្លាយ និងសេវាសុខាភិបាល ខុសច្បាប់ខេត្តស្វាយរៀង ដឹកនាំដោយលោកវេជ្ជបណ្ឌិត វន វិណារ៉ា អនុប្រធានមន្ទីរសុខាភិបាល សហការជាមួយនឹងអនុគណៈកម្មាការ លុបបំបាត់ឱសថក្លែងក្លាយ និងសេវាសុខាភិបាល ខុសច្បាប់ក្រុងបាវិត ដឹកនាំដោយលោក អ៊ុង សា អភិបាលរងក្រុងបាវិត ដោយមានការចូលរួមពីលោកព្រះរាជអាជ្ញា នគរបាល និងកងរាជអាវុធហត្ថ បានចុះបិទគ្លីនិកចិនគ្មានច្បាប់មួយកន្លែង យីហោឈ្មោះ «ថ្នាំប្រទេសចិន» នៅភូមិបាវិតកណ្តាល សង្កាត់បាវិត ក្រុងបាវិត និងដកហូតអាជ្ញាប័ណ្ណបន្ទប់ថែទាំជំងឺ មួយកន្លែងទៀត ឈ្មោះ «បន្ទប់ពិគ្រោះនិងព្យាបាលជំងឺ សន្តិភាពថ្មី» នៅសង្កាត់បាវិត ក្រុងបាវិត។

ការចុះបិទទីតាំងលក់ឱសថក្លែងក្លាយ និងបន្ទប់ពិគ្រោះជំងឺទាំងពីរខាងលើនេះ ធ្វើឡើងនៅថ្ងៃទី១៥ ខែមករា ឆ្នាំ២០១៨។

អាជ្ញាធរបានឲ្យដឹងថា បន្ទប់ពិគ្រោះនិងព្យាបាលជំងឺ សន្តិភាពថ្មីនេះ អាជ្ញាប័ណ្ណផ្តល់ជូនត្រឹមតែបន្ទប់ថែទាំទេ ប៉ុន្តែម្ចាស់បានលើកស្លាកជាបន្ទប់ពិគ្រោះ និងព្យាបាលជំងឺ និងផ្តល់សេវាជាមន្ទីរសម្រាកព្យាបាលជំងឺ ដែលផ្ទុយទៅនឹងក្រឹត្យក្រមសុខាភិបាល។

អាជ្ញាធរខេត្តបានឲ្យដឹងទៀតថា ក្រោមការណែនាំរបស់គណ:កម្មាធិការអន្តរក្រសួង ដើម្បីទប់ស្កាត់ការជួញដូរឱសថក្លែងក្លាយ និងគ្មានច្បាប់អនុញ្ញាត លេខាធិការដ្ឋានលុបបំបាត់ឱសថក្លែងក្លាយ និងសេវាសុខាភិបាលខេត្តស្វាយរៀង បានធ្វើសកម្មភាពចុះពិនិត្យតាមដានជាប្រចាំ ចំពោះសេវាសុខាភិបាលឯកជន ធ្វើយ៉ាងណាការពារសុខសុវត្ថិភាពដល់ប្រជាពលរដ្ឋ៕

កម្ពុជា-វៀតណាម សង់ផ្សារគំរូក្នុងស្រុកមេមត់ ព្រំដែនខេត្តត្បូងឃ្មុំ និងខេត្តតៃនិញ

ត្បូងឃ្មុំ ៖ ផ្សារគំរូព្រំដែនកម្ពុជា-វៀតណាម លើកដំបូងដែលមានឈ្មោះថា ផ្សារដា មានទីតាំងស្ថិតនៅក្នុងស្រុកមេមត់ ជាប់ព្រំដែនខេត្តត្បូងឃ្មុំ និងខេត្តតៃនិញ ត្រូវបានបើកការដ្ឋានសាងសង់ជាផ្លូវការហើយ កាលពីព្រឹកថ្ងៃទី១៦ ខែមករា ឆ្នាំ២០១៨ ក្រោមគណៈអធិបតីភាព លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និង លោក វ៉ូ ហ្គុងមិញ (Vu Quang Minh) ឯកអគ្គរដ្ឋទូតនៃសាធារណរដ្ឋសង្គមនិយមវៀតណាម ប្រចាំនៅកម្ពុជា។
ផ្សារគំរូព្រំដែនដំបូងគេមួយនេះ នឹងក្លាយជាកន្លែងដោះដូរទំនិញដ៏សំខាន់រវាងកម្ពុជា និងវៀតណាម ហើយវាក៏ជាចំណែកមួយអាចជួយអោយទំហំពាណិជ្ជកម្មរវាងប្រទេសទាំងពីរកាន់តែរីកធំធាត់ឡើង ទៅតាមគោលដៅនៃប្រទេសទាំងពីរ ។

លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា បានថ្លែងថា ផ្សារគំរូព្រំដែននេះនឹងជួយបង្កើនទំហំពាណិជ្ជកម្មនៅតាមព្រំដែន និងលើកកម្ពស់ជីវភាពប្រជាជនកម្ពុជា-វៀតណាមអោយកាន់តែប្រសើរជាងមុន ។ លើសពីនេះ លោករដ្ឋមន្ត្រីក៏បានថ្លែងអំណរគុណដល់រដ្ឋាភិបាលវៀតណាម ជាពិសេសក្រសួងឧស្សាហកម្ម និងពាណិជ្ជកម្ម ព្រមទាំងភាគីពាក់ព័ន្ធ ដែលបានជួយសម្របសម្រួលគម្រោងសាងសង់ផ្សារនេះ ដើម្បីទុកជានិម្មិតរូប និងជាសមិទ្ធផលនៃកិច្ចសហប្រតិបត្តិការល្អរវាងប្រទេសទាំងពីរ។

លោកបន្តថា ការបង្កើតផ្សារគំរូនេះ គឺជាការចាប់ផ្តើមទំព័រសករាជថ្មីមួយទៀត នៃការពង្រឹងកិច្ចសហការ និងសម្រួលពាណិជ្ជកម្មនៅតាមព្រំដែននៃប្រទេសទាំងពីរ ឱ្យកាន់តែមានភាពងាយស្រួល និងជិតប្រជាពលរដ្ឋ ជាពិសេសឈានទៅសម្រេចឲ្យបាននូវទំហំពាណិជ្ជកម្មចំនួន ៥ពាន់លានដុល្លារ តាមផែនការមេដែលបានគ្រោងទុកក្នុងពេលអនាគត។ឯកឧត្តម សង្ឃឹមថាផ្សារនេះ នឹងបម្រើអត្ថប្រយោជន៍ប្រជាពលរដ្ឋកម្ពុជា និងសម្រាប់ដាក់លក់ទំនិញរបស់ប្រជាជននៃប្រទេសទាំងពីរ ជាពិសេសរួមចំណែកដោះស្រាយបញ្ហាប្រឈម និងរបាំងពាណិជ្ជកម្មនានា ដែលតែតែងរាំងស្ទះដល់ការធ្វើចរាចរណ៍ទំនិញ និងផលិតផលនៅតាមព្រំដែនកម្ពុជា និងវៀតណាម។

លោកវ៉ូ ហ្គុងមិញ ឯកអគ្គរដ្ឋទូតវៀតណាមប្រចាំកម្ពុជា បានគូសបញ្ជាក់ថា ការសាង់សង់ផ្សារគំរូមួយនេះ នឹងនាំមកនូវក្តីសង្ឃឹមថ្មីសម្រាប់ប្រជាជនកម្ពុជា និងវៀតណាម ហើយនឹងក្លាយជាគំរូនៃការអភិវឌ្ឍ និងការពង្រីកកិច្ចសហការសេដ្ឋកិច្ច និងពាណិជ្ជកម្មនៅតាមព្រំដែននៃប្រទេសទាំងពីរនៅថ្ងៃអនាគត ប្រកបដោយជោគជ័យ។

គួររំលឹកដែរថា គម្រោងសាងសង់ផ្សារនេះ ត្រូវបានអនុម័តលើកដំបូងកាលពីឆ្នាំ២០១៣ ហើយត្រូវបានបន្តអនុវត្តឡើងវិញនៅឆ្នាំ២០១៦ នៅលើផ្ទែដីទំហំ ១៩.៦២៨ម៉ែត្រការ៉េ ស្ថិតក្នុងតំបន់សេដ្ឋកិច្ចពិសេស ថារីត្បូងឃ្មុំ ជាមួយទុនវិនិយោគសរុបចំនួន ប្រមាណជិត ២ លានដុល្លារអាមេរិក ដែលជាជំនួយរបស់រដ្ឋាភិបាលវៀតណាម។

គួរបញ្ជាក់ផងដែរថា ទំហំពាណិជ្ជកម្មទ្វេភាគីរវាងកម្ពុជា-វៀតណាម មានការកើនឡើងគួរឲ្យកត់សម្គាល់។ តាមរបាយការណ៍របស់ក្រសួងពាណិជ្ជកម្មកម្ពុជា គិតត្រឹមរយ:ពេល១១ខែ នៃឆ្នាំ២០១៧ ប្រទេសទាំងពីរសម្រេចបានទំហំពាណិជ្ជកម្ម ៣.៤៣៨លានដុល្លារ ពោលគឺបានកើនឡើង ៣១,៥% បើធៀបនឹងឆ្នាំ២០១៦ ដែលមានចំនួនត្រឹមតែ ២.៩២៦លានដុល្លារ ប៉ុណ្ណោះ៕