ប៉េកាំង ៖ អ្នកនាំពាក្យឲ្យក្រសួងការបរទេសចិនបាននិយាយកាលពីថ្ងៃពុធថា ប្រទេសចិនប្រឆាំងដាច់ខាតចំពោះរាល់ការដាក់ទណ្ឌកម្មឯតោភាគីមកលើពលរដ្ឋ ឬអង្គភាពរបស់ខ្លួនដោយរដ្ឋាភិបាលប្រទេសដទៃ។
ថ្លែងនៅក្នុងសន្និសីទសារព័ត៌មានក្នុងទីក្រុងប៉េកាំង លោក លូ កាង (Lu Kang) អ្នកនាំពាក្យឲ្យក្រសួងការបរទេសចិនបានលើកឡើងម្តងហើយម្តងទៀតចំពោះគោលជំហររបស់ប្រទេសចិនប្រឆាំងទៅនឹងការដាក់ទណ្ឌកម្មឯកតោភាគីរបស់សហរដ្ឋអាមេរិក។ លោក លូ បានបន្ថែមថា បណ្តាប្រទេសផ្សេងទៀតអាចដោះស្រាយបញ្ហាពាក់ព័ន្ធតាមរយៈការចែករំលែកព័ត៌មាន និងសហប្រតិបត្តិការជាមួយប្រទេសចិន។
ការថ្លែងបែបនេះរបស់អ្នកនាំពាក្យរូបនេះធ្វើឡើងបន្ទាប់ពីរតនាគារអាមេរិកកាលពីថ្ងៃអង្គារម្សិលមិញបានសម្រេចចិត្តនៅក្នុងការដាក់ទណ្ឌកម្មថ្មីប្រឆាំងទៅនឹងក្រុមហ៊ុនដឹកជញ្ជូនតាមផ្លូវសមុទ្ររបស់កូរ៉េខាងជើង ព្រមទាំងរូបវ័ន្តបុគ្គល និងក្រុមហ៊ុនចិនដែលធ្វើពាណិជ្ជកម្មជាមួយកូរ៉េខាងជើង។
លោកអះអាងថា ការដាក់ទណ្ឌកម្មនោះគឺជាចំណាត់ការថ្មីមួយរបស់សហរដ្ឋអាមេរិកដើម្បីធ្វើឲ្យកូរ៉េខាងជើងក្លាយជាប្រទេសឯកោដោយសារតែការអភិវឌ្ឍកម្មវិធីអាវុធនុយក្លេអ៊ែររបស់គេ និងដើម្បីបង្អាក់ប្រាក់ចំណូលរបស់គេផងដែរ៕
រាជធានីភ្នំពេញ ៖ កម្មករ-កម្មការិនីចំនួនជិត២០នាក់មប្រើការងារនៅរោងចក្រយ័នស៊ីហ្គាមិននៅតំបន់ឧស្សាហកម្មកាណាឌីយ៉ា ស្ថិតនៅក្នុងអគារលេខ១២ ស្ថិតនៅក្នុងភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យបានដួលសន្លប់ជាបន្ដបន្ទាប់នៅវេលាម៉ោង៩ និង២៥ព្រឹក ថ្ងៃទី២៣ ខែវិច្ឆិកា ឆ្នាំ២០១៧នេះ។
បើតាមសេចក្ដីរាយការណ៍បានឲ្យដឹងថា មូលហេតុដែលបណ្ដាលឲ្យកម្មករ កម្មការិនីដួលសន្លប់នេះ មកពីថ្នាំសេឡិចដែលជាងធ្វើបានភាយនៅក្នុងរោងចក្រនោះ។ ក្រោយមានហេតុការណ៍នេះ ជនរងគ្រោះត្រូវបានបញ្ជូនទៅសង្គ្រោះភ្លាមៗ នៅមន្ទីរពេទ្យបង្អែក ខណ្ឌពោធិ៍សែនជ័យ៕
ស្ស៊ីមបាវ៉េ ៖ កាលពីថ្ងៃពុធអតីតអនុប្រធានាធិបតីស្ស៊ីមបាវ៉េលោក អេមមឺសុន ណាង៉ាវ៉ា (Emmerson Mnagagwa) បានវិលត្រឡប់មកកាន់រដ្ឋធានីហារ៉ារ៉េ (Harare) វិញជាមួយនឹងការស្វាគមន៍យ៉ាងកក់ក្តៅ ខណៈដែលនៅថ្ងៃទី២៤ ខែវិច្ឆិកានេះលោកនឹងត្រូវស្បថចូលកាន់តំណែងជាប្រធានាធិបតីថ្មីរបស់មួយនេះ។
ថ្លែងទៅដល់ប្រជាពលរដ្ឋស្ស៊ីមបាវ៉េ នៅទីស្នាក់ការកណ្តាលគណបក្សកាន់អំណាចកាលពីរសៀលថ្ងៃពុធម្សិលមិញ អនគតប្រធានាធិបតីរូបនេះបានថ្លែងអំណរគុណទៅដល់ប្រជាពលរដ្ឋចំពោះការជឿជាក់ និងការគាំទ្ររបស់ពួកគេ និងកោតសរសើរចំពោះសកម្មភាពរបស់យោធា។ លោក ណាង៉ាវ៉ា (Mnangagwa) បានប្តេជ្ញាឆន្ទៈរបស់លោក និងជំរុញឲ្យពលរដ្ឋស្ស៊ីមបាវ៉េទាំងអស់ចូលរួមចំណែកនៅក្នុងការបង្កើតការងារ និងកែប្រែសេដ្ឋកិច្ចជាតិឡើងវិញ ក្នុងអំឡុងពេលលោកបម្រើការនៅក្នុងអាណត្តិរបស់លោក មូហ្គាបេ ដែលនៅសល់រហូតដល់ការបោះឆ្នោតប្រធានាធិបតីឆ្នាំ២០១៨។
សូមបញ្ជាក់ថា បន្ទាប់ពីការលាលែងពីតំណែងរបស់លោក រ៉ូបឺត មូហ្គាបេ (Robert Mugabe) កាលពីថ្ងៃអង្គារ, លោក ណាង៉ាវ៉ា (Mnangagwa) ត្រូវបានគណបក្សកំពុងកាន់អំណាចជ្រើសរើសឲ្យឈរឈ្មោះជាប្រធានាធិបតីស្ស៊ីមបាវ៉េថ្មី ដែលនឹងត្រូវបានតែងតាំងដោយសភា។ លោក ណាង៉ាវ៉ា (Mnangagwa) នឹងក្លាយជាប្រធានាធិបតីស៊ីមបាវ៉េទី៣ចាប់តាំងពីប្រទេសមួយនេះបានទទួលឯករាជ្យកាលពីឆ្នាំ១៩៨០មក៕
រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានអំពាវនាវឲ្យពលរដ្ឋ ដែលបានចុះឈ្មោះបោះឆ្នោតរួចហើយ សូមទៅពិនិត្យមើលឈ្មោះ និងទិន្នន័យរបស់ខ្លួន នៅលើបញ្ជីបោះឆ្នោតដំបូង និងបញ្ជីឈ្មោះអ្នកដែលនឹងត្រូវលុបចេញពីបញ្ជីបោះឆ្នោត ដែលត្រូវបិទផ្សាយនៅសាលាឃុំ សង្កាត់ និងទីតាំងណាមួយក្នុងឃុំ សង្កាត់ ចាប់ពីថ្ងៃទី១៤ដល់ថ្ងៃទី២៤ ខែធ្នូ ឆ្នាំ២០១៧ខាងមុខនេះ។
បើតាម គ.ជ.ប ការចុះឈ្មោះបោះឆ្នោតថ្មី ឆ្នាំ២០១៧ រយៈពេល៧០ថ្ងៃ ចាប់ពីថ្ងៃទី១ ខែកញ្ញា ដល់ថ្ងៃទី០៩ ខែវិច្ឆិកា ឆ្នាំ២០១៧ មានអ្នកចុះឈ្មោះសរុបចំនួន៥៣៦,៦៧៤នាក់។ ចំនួនឈ្មោះអ្នកបោះឆ្នោត ដែលត្រូវលុបចេញពីបញ្ជីបោះឆ្នោតមាន ចំនួន២១,៦៧១នាក់ និងប្រជាពលរដ្ឋដែលស្នើសុំធ្វើការកែតម្រូវឈ្មោះ និងទិន្នន័យមានចំនួន៥,៥៧២នាក់។ សរុបជាលទ្ធផលបណ្ដោះអាសន្ន អ្នកមានឈ្មោះក្នុងបញ្ជីបោះឆ្នោតឆ្នាំ២០១៧ សរុមមានចំនួន៨,៣៨០,២៤០នាក់ ស្មើនឹង៨៤,៨០% បើធៀបទៅនឹងចំនួនប៉ាន់ស្មាន អ្នកមានអាយុចាប់ពី១៨ឆ្នាំឡើងមានចំនួន៩,៨៨២,៧៤៦នាក់។
សូមបញ្ជាក់ថា ប្រសិនបើពលរដ្ឋខកខានមិនបាន ទៅពិនិត្យឈ្មោះដោយផ្ទាល់ លើបញ្ជីដែលត្រូវបិទផ្សាយនៅសាលាឃុំ សង្កាត់ទេនោះ ពលរដ្ឋអាចពិនិត្យមើលឈ្មោះរបស់ខ្លួនឯង នៅលើគេហទំព័រ www.voterlist.org.kh ក៏បាន៕
ឥណ្ឌា ៖ កងកម្លាំងអាកាសប្រទេសឥណ្ឌាកាលពីថ្ងៃពុធម្សិលមិញបានបាញ់បង្ហោះដោយជោគជ័យនូវមីស៊ីលដែលមានល្បឿនលឿនបំផុតក្នុងពិភពលោកនៅឈូងសមុទ្របេនហ្គាល់។
ក្នុងសេចក្តីថ្លែងការណ៍របស់រដ្ឋាភិបាលប្រទេសឥណ្ឌាបាននិយាយថា មីស៊ីលនេះត្រូវបានទម្លាក់ចេញពីយន្តហោះស៊ូខូ-៣០ (Sukhoi-30) ហើយថា ម៉ាស៊ីនមីស៊ីលដំណាក់កាលទាំងពីរបានបាញ់ចេញត្រង់ៗឆ្ពោះទៅកាន់គោលដៅឈូងសមុទ្របេនហ្គាល់។ ចំណែកក្រសួងការពារជាតិឥណ្ឌាបាននិយាយថា ប្រទេសឥណ្ឌាបង្កើតបានមីស៊ីលទប់ទល់នឹងនាវាចម្បាំងដោយបាញ់សាកល្បងជោគជ័យចេញពីយន្តហោះចម្បាំងស៊ូខូ-៣០របស់កងទ័ពអាកាស។
ការបាញ់សាកល្បងដោយជោគជ័យនូវមីស៊ីលប្រឆាំងនាវាចម្បាំងនេះនឹងបង្កើនប្រតិបត្តិការប្រយុទ្ធរបស់កងកម្លាំងទ័ពអាកាសជាមួយនឹងក្រុមទាហានទ័ពព្រៃ។ មីស៊ីលប្រាម៉ូស ALCM មានទម្ងន់២,៥តោននិងជាអាវុធដែលមានទម្ងន់ធ្ងន់បំផុតដែលត្រូវបានផ្ទុកនៅលើយន្តហោះចម្បាំង Sukhoi-30៕
ខេត្តបាត់ដំបង ៖ ជើងងខ្លាំងពីរនាក់ជំនាញខាងឆក់កាបូបប្រចាំខេត្តត្រូវបានក្រុមអន្តរាគមន៍បង្ការ បង្ក្រាបនៃស្នងការដ្ឋាននគរបាលខេត្តបាត់ដំបងដឹកនាំចុះប្រត្តិបត្តិការផ្ទាល់ដោយលោកអនុសេនីយ៍ឯក ឈឿង គឹមសុងបង្ក្រាបកាលពីថ្ងៃទី២២ វិច្ឆិកា ឆ្នាំ២០១៧ វេលាម៉ោង១២ និង៤០នាទី នៅចំណុចសណ្ឋាគារផាក ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង។
សមត្ថកិច្ចបានឲ្យដឹងថា ជនសង្ស័យចំនួន២នាក់ ដែលបានធ្វើសកម្មភាពឆក់កាបូបយ៉ាងសកម្មនៅក្នុងខេត្តបាត់ដំបងត្រូវបានឃាត់ខ្លួននោះ ទី១. ឈ្មោះ សឺម សីហា ហៅ ង៉ា ភេទប្រុស អាយុ២២ឆ្នាំ មានទីលំនៅភូមិវត្តតាមឹម ឃុំអូរដំបង១ ស្រុកសង្កែ ខេត្តបាត់ដំបង។ ទី២. ឈ្មោះ អេង ឆៃ ភេទប្រុស អាយុ ២៥ឆ្នាំ មានទីលំនៅភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។ ចំណែកជនរងគ្រោះមានឈ្មោះ សែ លីដា ភេទស្រី អាយុ១៧ឆ្នាំ រស់នៅភូមិជ្រៃកោង សង្កាត់ស្លាកែត ក្រុងបាត់ដំបង ខេត្តបាត់ដំបង។ រីឯវត្ថុតាងដកហូតរួមមាន ៖ កាបូបស្បែកកាន់ដៃចំនួន០១ និងសំភារៈសម្រាប់ប្រើប្រាស់គ្រឿងញៀនមួយចំនួន។
បច្ចុប្បន្នក្រុមបង្ការ បង្ក្រាបបានប្រគល់ឲ្យទៅការិយាល័យជំនាញដើម្បីចាត់ការតាមនីតិវិធីច្បាប់៕
រាជធានីភ្នំពេញ ៖ អគ្គិសនីកម្ពុជា EDC ប្រកាសផ្អាកផ្គត់ផ្គង់ចរន្ដអគ្គិសនីចំនួន៤ថ្ងៃ ចាប់ពីថ្ងៃទី២៣នេះរហូតដល់ថ្ងៃទី២៦ ខែវិច្ឆិកា ឆ្នាំ២០១៧ តាមតំបន់មួយចំនួន ក្នុងរាជធានីភ្នំពេញ និងខេត្តកណ្ដាល ដោយមូលហេតុជួសជុល ផ្លាស់ប្ដូរ ដំឡើងបរិក្ខារ និងរុះរើគន្លងខ្សែបណ្ដាញ ដើម្បីពង្រីកផ្លូវ៕
សម្រាប់ព័ត៌មានលម្អិត សូមអានសេចក្ដីជូនដំណឹង របស់អគ្គិសនីកម្ពុជាទាំងស្រុង៖
រាជធានីភ្នំពេញ ៖ នៅព្រឹកព្រលឹមថ្ងៃទី២៣ ខែវិច្ឆិកា ឆ្នាំ២០១៧នេះ មានគ្រោះថ្នាក់ចរាចរណ៍ ដ៏រន្ធត់មួយបានកើតឡើង នៅលើមហាវិថីព្រះសីហនុ ជិតសួនច្បារវិមានឯករាជ្យ ដោយមានជនជាតិបរទេស២នាក់ បើកម៉ូតូធំឌុបគ្នាយ៉ាងបោះពួយយ៉ាងលឿន ទៅបុកនឹងអ្នកដើរហាត់ប្រាណជនជាតិខ្មែរ បណ្តាលឲ្យស្លាប់ភ្លាមៗ នៅកន្លែងកើតហេតុ។
ប្រភពបញ្ជាក់ថា បន្ទាប់ពីបុកអ្នកដើរឆ្លងផ្លូវហើយ នេះម៉ូតូ របស់ជនបរទេស បានរេចង្កូតជ្រុលទៅបុកនិងរថយន្ត ម៉ាក់ ហាយឡែនឌឺ ពណ៌ទឹកមាស ពាក់ស្លាកលេខ ភ្នំពេញ 2P-2816 មួយគ្រឿង ដែលចតទុកស្ងៀម នៅលើក្នុងទិសដៅស្របគ្នា ចំពីក្រោយពេញទំហឹង បណ្តាលអោយ បុរសជនជាតិបរទេសជិះម៉ូតូទាំងពីរនាក់ ហោះផ្លោងខ្ទាតចេញពីគ្នារៀងៗខ្លួននិងបណ្តាលអោយ បាក់កស្លាប់ នៅនិងកន្លែងទាំងពីរនាក់ ថែមទៀត
ភ្លាមៗនេះចំពោះជនរងគ្រោះទាំង៣នាក់ គេមិនទាន់ស្គាល់អត្តសញ្ញាណ នៅឡើយទេ៕
អាមេរិក ៖ កាលពីថ្ងៃអង្គារ សហរដ្ឋអាមេរិកបានដាក់ទណ្ឌកម្មប្រឆាំងនឹងអង្គការចំនួន១៣របស់ចិននិងកូរ៉េខាងជើងដែលក្រុងវ៉ាស៊ីនតោនបានចោទប្រកាន់ថា បានជួយរារាំងការរឹតត្បិតនុយក្លេអ៊ែរប្រឆាំងនឹងទីក្រុងព្យុងយ៉ាងនិងគាំទ្រដល់ប្រទេសតាមរយៈការធ្វើពាណិជ្ជកម្ម។
ក្រសួងរតនាគារសហរដ្ឋអាមេរិកបានប្រកាសសកម្មភាពនេះមួយថ្ងៃបន្ទាប់ពីលោកប្រធានាធិបតី Donald Trump បានដាក់ប្រទេសកូរ៉េខាងជើងចូលក្នុងបញ្ជីរដ្ឋឧបត្ថម្ភអំពើភេរវកម្មវិញ។
ការដាក់ទណ្ឌកម្មថ្មីនេះបានបង្ហាញពីការផ្តោតការយកចិត្តទុកដាក់របស់រដ្ឋបាលលោក Trump លើការធ្វើឲ្យខូចពាណិជ្ជកម្មរវាងចិននិងកូរ៉េខាងជើងដែលខ្លួនបាននិយាយថា គឺជាគន្លឹះក្នុងការដាក់សម្ពាធទីក្រុងព្យុងយ៉ាងឲ្យងាកចេញពីមហិច្ឆតារបស់ខ្លួនក្នុងការអភិវឌ្ឍមីស៊ីលដែលមានសមត្ថភាពនុយក្លេអ៊ែរអាចវាយប្រហារសហរដ្ឋអាមេរិក។
លោក Steven T. Mnuchin រដ្ឋមន្ត្រីក្រសួងរតនាគារបាននិយាយថា “ការកំណត់នេះនឹងដាក់ទណ្ឌកម្មបន្ថែមទៀតហើយដាក់ទណ្ឌកម្មលើប្រទេសកូរ៉េខាងជើងនិងមនុស្សដែលពាក់ព័ន្ធហើយវាគាំទ្រដល់យុទ្ធនាការដាក់សម្ពាធអតិបរិមារបស់យើងដើម្បីបំបែករដ្ឋឃាតកម្ម”។
ការដាក់ទណ្ឌកម្មនេះរួមមានការដាក់បញ្ចូលក្នុងបញ្ជីនៃក្រុមហ៊ុនចិនចំនួន៣គឺក្រុមហ៊ុន Dandong Kehua Economy & Trade Co., Dandong Xianghe Trading Co., និង Dandong Hongda Trade Co., ដែលក្រសួងរតនាគារនិយាយថា បានធ្វើពាណិជ្ជកម្មក្នុងចំនួនទឹកប្រាក់ជាង៧៥០លានដុល្លាររួមគ្នាជាមួយកូរ៉េខាងជើង។
ទណ្ឌកម្មទាំងនេះក៏បានដាក់បញ្ចូលលោក Sun Sidong និងក្រុមហ៊ុន Dandong Dongyuan Industrial Co. របស់គាត់នៅក្នុងបញ្ជីខ្មៅផងដែរ។ នៅក្នុងរបាយការណ៍កាលពីខែមិថុនា អង្គការ C4ADS បានឲ្យដឹងថា ក្រុមហ៊ុនរបស់លោក Sun Sidong គឺជាផ្នែកមួយនៃបណ្តាញទំនាក់ទំនងរវាងក្រុមហ៊ុនចិនដែលមានសមាមាត្រពាណិជ្ជកម្មយ៉ាងច្រើនជាមួយកូរ៉េខាងជើង។
ទណ្ឌកម្មថ្មីនេះក៏បានប៉ះពាល់ដល់ក្រុមហ៊ុនកូរ៉េខាងជើងជាច្រើនផងដែរដែលបញ្ជូនកម្មករទៅប្រទេសមួយចំនួនដូចជារុស្ស៊ី ប៉ូឡូញ កម្ពុជានិងចិន។ អាជ្ញាធរអាមេរិកបាននិយាយថា ពួកគេកំពុងស្វែងរកការកាត់ផ្តាច់ប្រាក់ដែលកូរ៉េខាងជើងរកបានពីការនាំចេញពលករ៕
រាជធានីភ្នំពេញ ៖ នាយករដ្ឋមន្ត្រីនៃកម្ពុជា និងជាប្រធានបក្សកាន់អំណាចសម្តេច ហ៊ុន សែន នៅព្រឹកថ្ងៃពុធនេះ បាននឹងកំពុងជួបសំណេះសំណាលជាមួយកម្មករ និយោជិតសរុប ១៣,៥៦៥នាក់ មកពីរោងចក្រចំនួន ២៥ស្ថិតក្នុងតំបន់ភ្នំពេញថ្មី ខណ្ឌសែនសុខ ។
សម្តេច ហ៊ុន សែន មានប្រសាសន៍ថា នៅកម្ពុជាគ្មានវិបត្តនយោបាយទេ ហើយក៏គ្មានអ្នកនយោ បាយដែលមានវិបត្តិ ហើយកម្ពុជាក៏គ្មានអ្នកទោសនយោបាយដែរ មានតែអ្នកនយោបាយដែល ជាប់ទោសព្រហ្មទណ្ឌ ។ សម្តេចបញ្ជាក់ថា ខណដែលគណបក្សប្រឆាំងបានអំពាវនាវឲ្យបរទេស បញ្ឈប់ទិញទំនិញពីកម្ពុជានោះ គឺជាការសម្លាប់កម្មករ កម្មការិនី មិនមែនសម្លាប់ ហ៊ុន សែន នោះទេ ៕
រាជធានីភ្នំពេញ ៖ កញ្ញា នី មុន្នីនាថ តារាសម្តែងភាពយន្តដ៏ល្បីម្នាក់នឹងត្រូវចូលបំភ្លឺតុលាការ ពាក់ព័ន្ធនឹងពាក្យបណ្តឹងទាមទារប្រាក់ របស់អតីតគូដណ្តឹង ដែលជាអាណិកជនខ្មែរ នៅអាមេរិក នៅរសៀលថ្ងៃទី២២ ខែវិច្ឆិកា ឆ្នាំ២០១៧នេះ ។ នេះបើយោងតាមដីការបស់តុលាការក្រុងភ្នំពេញ ។
សូមរម្លឹកថា អតីតគូដណ្តឹងនាង នី មុន្នីនាថ គឺលោក អ៊ឹង សូឡាង បានដាក់ពាក្យបណ្តឹងដោយទាមទារឱ្យនាងសងជំងឺចិត្ត ដល់ខ្លួនចំនួន៥ម៉ឺនដុល្លារ បន្ទាប់ពីអ្នកទាំងពីរកាត់ផ្តាច់ការទាក់ទងគ្នា។ តាមពាក្យបណ្តឹងលោក អ៊ឹង សូឡាង បានចាត់ទុក នី មុន្នីនាថ ថា បោកយកប្រាក់របស់ខ្លួនក្នុងពេលទាក់ទងជាមួយគ្នា ដោយនៅក្នុងនោះ លោកបានទិញរបស់របរមានតម្លៃមួយចំនួនឱ្យនាង តែដល់ពេលធ្លាក់វីសាទៅនៅអាមេរិកជាមួយគ្នានោះ ត្រូវនាងបដិសេធទៅវិញ។
យ៉ាងណាក៏ដោយ កាលពីពេលថ្មីៗកន្លងមកនៅលើហ្វេសប៊ុករបស់ នី មុន្នីនាថ បានបង្ហោះសារគួរឲ្យចាប់អារម្មណ៍ថា «ចង់និយាយច្រើនណាស់ តាមចិត្តខឹងតាមចិត្តក្ដៅ ប៉ុនែ្តពាក្យចាស់ពោលថាបើចង់ឈ្នះសត្រូវ ត្រូវធ្វើចិត្តឱ្យត្រជាក់» ៕
អ៊ីរ៉ាក់ ៖ ក្រុមមន្ត្រីនៅប្រទេសអ៊ីរ៉ាក់និយាយថា មនុស្សចំនួន៣២នាក់បានស្លាប់បាត់បង់ជីវិត បន្ទាប់ពីជនមិនស្គាល់អត្តសញ្ញាណម្នាក់បានបំផ្ទុះគ្រាប់បែកធ្វើអត្តឃាតនៅក្នុងរថយន្តធំមួយគ្រឿងដែលផ្ទុកដោយគ្រឿងផ្ទុះ នៅទីផ្សារមួយនៅក្នុងទីក្រុងមួយដែលកំពុងតែប្រទាញប្រទុងគ្នារវាងប្រទេសអ៊ីរ៉ាក់និងតំបន់ឃើដនៅប្រទេសនេះ។
ប៉ូលិសនិងមន្ត្រីមន្ទីរពេទ្យនៅប្រទេសអ៊ីរ៉ាក់និយាយថា ការផ្ទុះយ៉ាងខ្លាំងដែលបានកើតឡើងនៅទីក្រុងទូសខូម៉ាតូ (Tuz Khormato) នៅតំបន់ឃើដកាលពីល្ងាចថ្ងៃអង្គារនោះបានធ្វើឲ្យមនុស្សចំនួន៣២នាក់បានស្លាប់ និងយ៉ាងតិច៧៥នាក់ទៀតរងរបួស។ មន្ត្រីមូលដ្ឋានបានបញ្ជាក់ថា ក្នុងចំណោមអ្នកស្លាប់ទាំងនេះក៏មានកងកម្លាំងសន្តិសុខនៅប្រទេសអ៊ីរ៉ាក់យ៉ាងតិច៦នាក់ផងដែរ។
សូមបញ្ជាក់ថា ទីក្រុងទូសខូម៉ាតូស្ថិតនៅចម្ងាយប្រហែល២១០គីឡូម៉ែត្រខាងជើងទីក្រុងបាកដាដនៅប្រទេសអ៊ីរ៉ាក់ ហើយបច្ចុប្បន្នរដ្ឋាភិបាលប្រទេសអ៊ីរ៉ាក់ និងតំបន់ឃើដកំពុងប្រទាញប្រទូងគ្នាក្នុងការគ្រប់គ្រងទីក្រុងមួយនេះ៕
រាជធានីភ្នំពេញ ៖ តាមរបាយការណ៍របស់បក្សកាន់អំណាចបានឲ្យដឹងថា មកដល់ថ្ងៃទី២១ ខែវិច្ឆិកា ឆ្នាំ២០១៧នេះ អតីតតំណាងរាស្ដ្រ សមាជិកក្រុមប្រឹក្សា មេឃុំ ជំទប់ និងថ្នាក់ដឹកនាំមូលដ្ឋានរបស់ CNRP សរុប៤៣៣នាក់បានសម្រេចចិត្ត សុំចូលរួមរស់ជាមួយគណបក្សប្រជាជនកម្ពុជា។
យ៉ាងណាក៏ដោយ ចំនួននេះ មិនបាន១០%ទេ បើប្រៀបធៀបទៅនឹងចំនួនអតីតមន្ត្រីថ្នាក់មូលដ្ឋាន របស់គណបក្សសង្គ្រោះជាតិ ។ ប៉ុន្តែវាក៏ជាចំនួនមិនតិចនោះដែរ ខណដែលគេរំពឹងថា អតីតមន្ត្រីគណបក្សប្រឆាំងដែលត្រូវបាន រំលាយនឹងបន្តចូលរួមជាមួយបក្សកាន់អំណាចជាបន្តបន្ទាប់ទៀតក្នុងរយះពេល២ថ្ងៃដែលជាឱសានវាទកំណត់ដោយប្រធានគណបក្សកាន់អំណាច ៕
ហ្ស៊ីមបាវ៉េ ៖ កាលពីថ្ងៃអង្គារ ប្រជាពលរដ្ឋបានប្រមូលផ្ដុំគ្នាសម្ដែងការសប្បាយចិត្តយ៉ាងខ្លាំងដោយអ្នកខ្លះស្រែកច្រៀង និងខ្លះទៀតស្រែកហ៊ោលាយឡំដោយការចុចស៊ីផ្លេរថយន្តនៅតាមដងផ្លូវនៅទីក្រុងហារ៉ារ៉េក្រោយពីប្រធានាធិបតីប្រទេសស៊ីមបាវ៉េបានប្រកាសចុះចេញពីតំណែងកាលពីយប់មិញនេះក្រោយពីបានកាន់អំណាចរយៈពេល៣៧ឆ្នាំមកនេះ។
លោកប្រធានាធិបតី រ៉ូប៊ឺត មូហ្គាបេ (Robert Mugabe) បានលាលែងពីតំណែងកាលពីថ្ងៃអង្គារដោយសាររងសម្ពាធខ្លាំងពីយោធាដែលបានឃុំខ្លួនលោកនៅក្នុងផ្ទះ ពីសមាជិកសភានៃគណបក្សកាន់អំណាចនិងគណបក្សប្រឆាំងព្រមទាំងពីប្រជាពលរដ្ឋភាគច្រើនដែលបានជួបជុំគ្នាតាមផ្លូវនិយាយថា ការកាន់អំណាចរយៈពេល៣៧ឆ្នាំគឺល្មមគ្រប់គ្រាន់ហើយ។
លោក មូហ្គាបេ ដែលត្រូវបានគេចាត់ទុកថាជាប្រមុខរដ្ឋចាស់វស្សាជាងគេក្នុងពិភពលោកនោះបាននិយាយក្នុងលិខិតរបស់លោកថា គេគួរតែអនុវត្តតាមនីតិវិធីក្នុងការជ្រើសរើសប្រធានាធិបតីថ្មី គឺមិនត្រូវពន្យារពេលដល់ថ្ងៃស្អែកនោះទេ។
លោកបានបន្ថែមទៀតថា ការសម្រេចចិត្តចុះចេញពីតំណែងរបស់លោកនេះគឺជាធ្វើឡើងដោយស្ម័គ្រចិត្តនិងគិតគូរពីសុខុមាលភាពរបស់ប្រជាពលរដ្ឋជាទីបំផុត ដូច្នេះហើយទើបបានជាលោកសម្រេចចិត្តផ្ទេរអំណាចដោយគ្មានការបង្ហូរឈាមបន្តិចបែបនេះ៕
រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានជួបគ្នាជាលើកទី១ ក្រោយការរំលាយគណបក្សសង្គ្រោះជាតិ ដោយអំណាចតុលាការកំពូល ដើម្បីពិភាក្សាលើបញ្ហាមួយចំនួន សំខាន់ការបន្តពង្រឹងកិច្ច សហប្រតិបត្តិការ ឲ្យកាន់តែប្រសើរថែមទៀត។
តាមគេហទំព័រក្រសួងមហាផ្ទៃ បានឲ្យដឹងថា នារសៀលថ្ងៃទី២១ ខែវិច្ឆិកា ឆ្នាំ២០១៧ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអនុញ្ញាតឱ្យលោក William A.Heidt ឯកអគ្គរដ្ឋទូតសហរដ្ឋអាមេរិក ចូលជួបសំដែងការគួរសម និងពិភាក្សាការងារ នៅទីស្តីការក្រសួងមហាផ្ទៃ។
កិច្ចជំនួបរវាងសម្តេចក្រឡាហោម ស ខេង និងលោក William A.Heidt ឯកអគ្គរដ្ឋទូតសហរដ្ឋអាមេរិក គឺផ្តោត លើប្រធានបទសំខាន់ចំនួន៣ ៖ ១. កិច្ចសហប្រតិបត្តិការរវាងកងកម្លាំងអនុវត្តច្បាប់នៃប្រទេសទាំងពីរ ២.ការងារ ការប្រយុទ្ធប្រឆាំងការជួញដូរមនុស្ស ៣.ការធ្វើមាតុភូមិនិវត្តនរបស់ប្រជាពលរដ្ឋខ្មែរមកពីសហរដ្ឋអាមេរិក។
យោងតាមគេហទំព័រក្រសួងមហាផ្ទៃ បានបញ្ជាក់ថា សម្តេចក្រឡាហោម បានមានប្រសាសន៍ថា កម្ពុជានៅតែឯកភាពនូវអ្វីដែលបានព្រមព្រៀងគ្នា និងចង់ឱ្យ ភាគីអាមេរិកពិចារណា ពន្យាពេលសិន ពិសេសអ្នកមានជម្ងឺធ្ងន់ធ្ងរទុក ឱ្យពួកគាត់ព្យាបាល សះស្បើយសិន។ ចំពោះពលរដ្ឋដែលបានទៅអាមេរិកក្រោយឆ្នាំ១៩៩៤ សម្តេចនិងពិចារណាឱ្យបានច្បាស់លាស់ ហើយបានស្នើឱ្យភាគីអាមេរិកចាត់មន្ត្រីជំនាញរបស់អាមេរិក និងកម្ពុជាធ្វើការសហការគ្នា ធ្វើកិច្ចការនេះ ឱ្យបានល្អបំផុតដែលអាចធ្វើបាន។
លោក William A.Heidt បានថ្លែងអំណរគុណដល់សមត្ថកិច្ចកម្ពុជា ដែលបានទប់ស្កាត់ជនល្មើស ដែលបានប្រព្រឹត្តអំពើ អាណាចារលើកុមារចំនួន ១៣រូប ដែលមិនឱ្យចូលមកកម្ពុជា។ នេះជាការងារល្អមួយប្រសើរ និងកោតសរសើរ ហើយអាមេរិកនិងបន្តការសហការ ជាមួយអាជ្ញាធរសមត្ថកម្ពុជា ថែមទៀតដើម្បីទប់ស្កាត់បទល្មើស ការជួញដូរមនុស្ស។
ជាថ្មីម្តងទៀត សម្តេចក្រឡាហោម បានបញ្ជាក់ថាកិច្ចការផ្សេងៗ ដែលក្រសួងមហាផ្ទៃ មានជាមួយសហរដ្ឋអាមេរិក កម្ពុជា នឹងបន្តពង្រឹងកិច្ចសហប្រតិបត្តិការធ្វើការរួមគ្នា ឱ្យកាន់តែប្រសើរទ្វេរឡើង៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
