នីហ្សេរីយ៉ា ៖ អ្នកនាំពាក្យប៉ូលិសរដ្ឋ Adamawa បានថ្លែងប្រាប់ក្រុមអ្នកសារព័ត៌មានថា មនុស្ស៥០នាក់បានស្លាប់ ដោយសារករណីបំផ្ទុះគ្រាប់បែកអត្តឃាតមួយនៅព្រះវិហារមួយកន្លែងក្នុងក្រុង Mubi ភាគឦសាននៃប្រទេសនីហ្សេរីយ៉ា។ នេះបើតាមទីភ្នាក់ងារព័ត៌មានចិន ស៊ីនហួរ។
អ្នកនាំពាក្យរូបនោះបញ្ជាក់ថា «ពួកយើងទទួលដំណឹងថា មានហេតុការណ៍បំផ្ទុះគ្រាប់នៅឯព្រះវិហារមួយកន្លែង ក្នុងក្រុង Mubi ហើយមនុស្ស៥០នាក់បានបាត់បង់ជីវិត។ ក្មេងប្រុសជំទង់ម្នាក់វ័យខ្ទង់១៧ឆ្នាំ មានពាក់អាវបង្កៃគ្រាប់បៃ បានបន្លំខ្លួនចូលទៅក្នុងព្រះវិហារ ជាមួយនិងអ្នកប្រតិបត្តិសាសនាដទៃទៀត។ ភ្លាមៗក្រោយពីបួងសួងរួចយុវជនរូបនោះ ក៏បានបំផ្ទុះគ្រាប់បែកនៅជាប់ខ្លួន»។
ទោះបីយ៉ាងណា តួលេខអ្នកស្លាប់អាចនឹងកើនឡើងថែមទៀត ខណៈមនុស្សជាច្រើននាក់ ដែលបានរងរបួស ក្នុងហេតុការណ៍ដ៏អាក្រក់នេះ កំពុងទទួលការព្យាបាលនៅឯមន្ទីរពេទ្យនានា នៅភាគខាងជើងក្រុង Mubi ជាទីដែលការវាយប្រហារ បានកើតឡើងនៅក្នុងបរិវេណនៃតំបន់ Kunu Araha៕
រាជធានីភ្នំពេញ ៖ តុលាការកំពូល គ្រោងនឹងជំនុំជម្រះក្តីលោកហេង ពៅ នៅថ្ងៃទី២៩ ខែវិច្ឆិកា ឆ្នាំ២០១៧នេះ ពាក់ព័ន្ធសំណុំរឿងប៉ុនប៉ងបាញ់សម្លាប់ឧកញ៉ាថុង អ៊ុយប៉ាង ចាងហ្វាងកាសែតកោះសន្តិភាព កាលពីឆ្នាំ១៩៩៨កន្លងទៅ ។
សូមជម្រាបថា សាលាដំបូងរាជធានីភ្នំពេញ និង សាលាឧទ្ធរណ៍កន្លងទៅបានសម្រេចផ្តន្ទាទោសក្រុមលោក ហេង ពៅ , លោក លី រ៉ាស៊ី និងលោក ផេង ផៃ ដាក់ពន្ធនាគារចន្លោះពី១៦ឆ្នាំទៅ១៨ឆ្នាំនិងសងសំណងជំងឺចិត្តដល់ដើមបណ្ដឹងរាប់ម៉ឺនដុល្លារអាមេរិក ក្រោមបទចោទ ប៉ុនប៉ងសមគំនិតឃាតកម្មគិតទុកជាមុន ៕
រាជធានីភ្នំពេញ ៖ តាមសារព័ត៌មានក្នុងស្រុកចុះផ្សាយថា កាលពីរសៀលថ្ងៃអង្គារ៍ម្សិលមិញនេះ រដ្ឋសភាបានដកហូតរថយន្តស៊េរីចំនួន៥គ្រឿងរបស់ ប្រធានគណៈកម្មការរដ្ឋសភាចំនួន៥រូប មកពីគណបក្សសង្គ្រោះជាតិ ដើម្បីយកមកទុកជា សម្បត្តិរដ្ឋវិញ ។
លោក ញ៉ែម សាវើយ អគ្គលេខាធិការរងរដ្ឋសភាបានប្រាប់អ្នកសារព័ត៌មានថា ក្រៅពីអតីតប្រធានគណៈកម្មាការរដ្ឋសភាទាំង៥នោះ អគ្គលេខាធិការរងរដ្ឋសភាចំនួន៣រូប មកពីគណបក្សសង្គ្រោះជាតិ ក៏ត្រូវដកហូតរថយន្តរដ្ឋត្រឡប់មកវិញដែរ ប៉ុន្តែពេលនេះ មិនទាន់ប្រមូលអស់នៅឡើយទេ។ ដោយឡែក សម្ភារផ្សេងៗទៀត ក៏ត្រូវបានអតីតតំណាងរាស្ត្ររបស់គណបក្សសង្គ្រោះជាតិ ប្រគល់ជូនរដ្ឋសភាជាបន្តបន្ទាប់ ផងដែរ ៕
ហ្ស៊ីមបាវ៉េ ៖ ទីបំផុតប្រធានាធិបតីហ្ស៊ីមបាវ៉េ លោក Robert Mugabe បានសម្រេចចិត្តដាក់លិខិតលាលែងចេញពីមុខតំណែងហើយ ក្រោយកាន់អំណាចជាង៣៧ឆ្នាំមកនេះ ខណៈសភាកំពុងបើកសម័យប្រជុំរបស់ខ្លួនដើម្បីត្រួតពិនិត្យលើសំណើដកតំណែងពីរូបលោក។ នេះបើយោងតាមសារព័ត៌មាន AP ។
ការសម្រេចចិត្តបែបនេះរបស់លោក Mugabe នៅឡើងនៅចំពេលសភាកំពុងបើកសម័យប្រជុំ បន្ទាប់ពីលោកបានបដិសេធមិនព្រមប្រកាសលាលែងពីតំណែងជាប្រធានាធិបតី ដោយថែមទាំងសន្យាទៀតថាលោកនឹងបន្តធ្វើជាប្រធានបក្សរហូតដល់ថ្ងៃសមាជបក្ស ដែលនឹងត្រូវប្រព្រឹត្តទៅនៅខែធ្នូខាងមុខ បើទោះជាសមាជិកគណបក្សកាន់អំណាច Zanu-PF នៅក្នុងប្រទេសហ្ស៊ីមបាវេ បានអំពាវនាវ និងទុកពេលឱ្យលោកត្រឹមថ្ងៃចន្ទ លាលែងពីតំណែងដោយខ្លួនឯងក៏ដោយ។
សូមបញ្ជាក់ថា វិបត្តិនៅហ្ស៊ីមបាវ៉េ ផ្ទុះឡើងនៅក្រោយពេល លោក Mugabe បណ្ដេញលោក Mnangagwa ពីតំណែងអនុប្រធានាធិបតី និងមានបំណងចង់ឱ្យប្រពន្ធរបស់លោកកាន់តំណែងជាអនុប្រធានាធិបតី៕
អាមេរិក ៖ ប្រធានាធិបតីអាមេរិកលោក ដូណាល់ ត្រាំ បានប្រកាសកាលពីថ្ងៃចន្ទម្សិលមិញថា សហរដ្ឋអាមេរិកបានសម្រេចចិត្តជ្រើសរើសប្រទេសកូរ៉េខាងជើងដាក់ជារដ្ឋមួយដែលគាំទ្រក្រុមភេរវករចំពេលដែលភាពតានតឹងនុយក្លេអ៊ែរកំពុងកើនឡើងខ្លាំងនៅលើឧបទ្វីបកូរ៉េ។
លោក ត្រាំ បាននិយាយថា ការជ្រើសរើសនេះនឹងដាក់ទណ្ឌកម្មបន្ថែមទៀតទៅលើប្រទេសកូរ៉េខាងជើង ដែលនេះគឺជាផ្នែកមួយនៃយុទ្ធនាការរបស់អាមេរិកក្នុងការដាក់សម្ពាធអតិបរិមាប្រឆាំងទៅនឹងប្រទេសឯកោមួយនេះ។ លោក ត្រាំ បាននិយាយនៅក្នុងអំឡុងកិច្ចប្រជុំគណៈរដ្ឋមន្ត្រីថា បន្ថែមពីលើការគំរាមកំហែងដល់ពិភពលោកដោយកម្មវិធីនុយក្លេអ៊ែរ, កូរ៉េខាងជើងបានគាំទ្រម្តងហើយម្តងទៀតចំពោះសកម្មភាពភេរវកម្មអន្តរជាតិរួមទាំងឃាតកម្មនៅលើទឹកដីបរទេស។
ស្របពេលជាមួយគ្នានោះ ក្រុមមន្ត្រីអាមេរិកបានលើកឡើងថា ការសម្លាប់លោក គីម ជុងណាម ដែលជាបងប្រុសម្តាយផ្សេងគ្នារបស់មេដឹកនាំកូរ៉េខាងជើងលោក គីម ជុងអ៊ុន នៅក្នុងព្រលានយន្តហោះអន្តរជាតិទីក្រុងគូឡាឡាំពួរ ប្រទេសម៉ាឡេស៊ីកាលពីដើមឆ្នាំនេះថាជាសកម្មភាពភេរវកម្ម។
សូមបញ្ជាក់ថា កូរ៉េខាងជើងត្រូវបានដាក់បញ្ចូលសាជាថ្មីក្នុងបញ្ជីរដ្ឋដែលគាំទ្រក្រុមភេរវករជាមួយប្រទេសអ៊ីរ៉ង់, ស៊ូដង់ និងស៊ីរី បន្ទាប់ពីប្រទេសដ៏សម្ងាត់មួយនេះត្រូវបានដកចេញពីបញ្ជីកាលពី៩ឆ្នាំមុន៕
រាជធានីភ្នំពេញ ៖ រដ្ឋសភាបានសម្រេចលុប ឈ្មោះ តំណាងរាស្ត្រគណបក្សសង្គ្រោះជាតិទាំង៥៥រូប និងទីប្រឹក្សា ជំនួយការ អ្នកបើករថយន្ត សរុបជាង១០០នាក់ ចេញពីបញ្ជីក្របខណ្ឌ ហើយពួកគេត្រូវបានបញ្ចប់មុខងារ និងប្រាក់ខែចាប់ពីខែវិច្ឆិកា ឆ្នាំ២០១៧នេះតទៅ ។ នេះបើយោងតាមការឲ្យដឹងពីលោក ឡេង ប៉េងឡុង អ្នកនាំពាក្យរដ្ឋសភា ហើយត្រូវបានសារព័ត៌មានដកស្រង់យកមកចុះផ្សាយនៅថ្ងៃនេះ ។
ទន្ទឹមនោះរដ្ឋសភាក៏បានស្នើសុំឲ្យឯកឧត្តម លោកជំទាវ ទាំងអស់នោះមេត្តាប្រគល់សម្ភារៈរបស់ រដ្ឋឲ្យអគ្គលេខាធិការដ្ឋានសភាវិញចាប់ពីថ្ងៃនេះ រហូតដល់ថ្ងៃទី២៤ ខែវិច្ឆិកា ឆ្នាំ២០១៧ ខាងមុខនេះ៕
ភ្នំពេញ ៖ កុមារាម្នាក់ត្រូវបានជនសង្ស័យម្នាក់ធ្វើសកម្មភាពវៃសម្លាប់នៅវាលស្រែក្បែរស្រះទឹកយ៉ាងអាណោចអាធ័ម ហេតុការណ៍នេះកើតឡើងកាលពីវេលាម៉ោង៣ និង៤០នាទីថ្ងៃទី២០ ខែវិច្ឆិកា ឆ្នាំ២០១៧ស្ថិតនៅកណ្តាលវាលស្រែក្នុងភូមិអន្លង់គងចាស់សង្កាត់ព្រៃសខណ្ឌដង្កោរាជធានីភ្នំពេញ។
កុមារាដែលត្រូវជនសង្ស័យវាយសម្លាប់ឈ្មោះ លន រុន ភេទប្រុសអាយុ១៣ឆ្នាំស្នាក់នៅក្នុងភូមិកើតហេតុខាងលើកំពុងតែដើរខ្វាលគោនៅកន្លេងកើតហេតុជនសង្សយ័ត្រូវបានឃាត់ខ្លួនបានភ្លាមៗ ឈ្មោះ វ៉ា រដ្ឋា ភេទប្រុសអាយុ៣៣ឆ្នាំមុខរបរមិនពិតប្រាកដស្នាក់នោក្នុងភូមិកើតហេតុជាជនដៃដល់។
សមត្ថកិច្ចបានអោយដឹងថា ជនសង្ស័យដែលបានសម្លាប់ក្មេងប្រុសខ្វាលគោជាមនុស្សដែលប្រប្រាស់ថ្នាំញៀននិងផឹកស្រាស្រវឹងប្រហែលជាបែកថ្នាំទើបមកដល់ជួបចំណុចកើតហេតុស្រាប់តែបានជួបនិងកុមារាខាងលើកំពុងតែដើរខ្វាលគោបានស្ទុះទៅចាប់វៃនិងច្របាច់កហើយជ្រលក់ទៅក្នុងទឹកទុំបធ្វើអោយក្មេងប្រុសនោះឈ្លោះទឹកស្លាប់ ចំណែកជនសង្ស័យភ្លាមៗនោះបំរុងតែរតលគេចខ្លួនត្រូវបានប្រជាពលរដ្ឋនិងសមត្ថកិច្ចឃាត់បានយកទៅសាកសួរនៅប៉ុស្តិនគរបាលព្រៃស។
តាមប្រភពពីកន្លែងកើតហេតុបានអោយដឹងទៀតថាជនសង្ស័យនិងកុមារាជាមនុស្ស័មិនដែលស្គាល់គ្នាតែជនសង្ស័យជាមនុស្សដែលប្រើប្រាស់ថ្នាំញៀនច្រើនទើបធ្វើអោយជនសង្ស័យអាចបែកទើបឃើញក្មេងដើរស្មានតែជាសត្រូវទើបសម្លាប់។
បច្ចុន្នប្បជនសង្ស័យកំពុងតែសាកសួរនៅប៉ុស្តិនគរបាលព្រៃសដើម្បីកសាងសំណុំរឿងបញ្ជូនទៅអធិការដ្ឋាននគរបាលខណ្ឌដង្កោចាត់កាតាមភូវច្បាប់៕
រាជធានីភ្នំពេញ ៖ កាលពីម្សិលមិញ រដ្ឋាភិបាលនៃប្រទេសចិន បានផ្តល់សំភារៈដែលជាជំនួយគ្មានសំណងដល់ប្រទេសកម្ពុជា ខណដែលសម្ភារៈទាំងនោះមាន ម៉ូតូ តង់ចល័តស្នាក់នៅ ឧបករណ៍រាវមីនជាដើម ។
កម្មវិធីទទូលសម្ភារៈនេះធ្វើឡើងក្រោមអធិបតីភាព លោកទេសរដ្ឋមន្ត្រី សេរីកុសល និងឯកអគ្គរដ្ឋទូតចិន ប្រចាំព្រះរាជាណាចក្រកម្ពុជា ៕
ប៉េកាំង ៖ ឈ្មួយជួញដូរគ្រឿងញៀន០២នាក់ ត្រូវបានតុលាការប្រជាជនកម្រិតមធ្យម ក្រុង Mianyang នៃខេត្ត Sichuan ភាគនិរតីប្រទេសចិនផ្តន្ទាទោសប្រហារជីវិត ជាមួយនិងការព្យួរទោសរយៈពេល០២ឆ្នាំ ដោយតុលាការ។ នេះបើតាមទីភ្នាក់ងារព័ត៌មានចិន ស៊ីនហួរ។ សាលក្រមកាត់ទោសខាងលើត្រូវបានប្រកាសនាថ្ងៃចន្ទម្សិលមិញនេះ។
ជុំវិញរឿងក្តីនេះបុគ្គល ០២នាក់ ផ្សេងទៀតមកពីក្រុមជាមួយគ្នា ត្រូវបានផ្តន្ទាទោសអស់មួយជីវិត ដោយម្នាក់ត្រូវជាប់ពន្ធនាគាររយៈពេល ១៥ឆ្នាំ និងម្នាក់ទៀត ០១ឆ្នាំ នៅក្នុងពន្ធនាគារ។ ដោយឡែកអ្នកដទៃទៀតក្នុងក្រុមឧក្រិដ្ឋជននេះ ត្រូវបានពិន័យដោយការឃុំឃាំង ឬក៏បញ្ជូនទៅកាន់កន្លែងស្តារនីតិសម្បទា។
បើតាមសម្តីរបស់មន្ត្រីប៉ូលិសខេត្ត Sichuan រឿងក្តីផលិត និងជួញដូរគ្រឿងញៀននេះ ដែលមានជាប់ពាក់ព័ន្ធជាមួយមនុស្សសរុបចំនួន ៨២នាក់ គឺជាករណីគ្រឿងញៀនធំបំផុតពុំធ្លាប់មានឡើង នៅក្នុងខេត្តភាគនិរតីនេះឡើយ។ ប៉ូលិសបញ្ជាក់ថា ក្រោយចំណាយពេលធ្វើការស៊ើបអង្កេតអស់ ០៤ខែ កងកម្លាំងសមត្ថកិច្ចចិនបានសម្រុកចូលទៅក្នុងសំបុករបស់ក្រុមឧក្រិដ្ឋជនគ្រឿងញៀននេះ ដែលស្ថិតក្នុងក្រុង Mianyang កាលពីថ្ងៃទី០៥ ខែកក្កដា ឆ្នាំ២០១៦។ នាពេលនេះ ថ្នាំញៀនមេតាំហ្វេតាមីនទម្ងន់ពីរគីឡូក្រាម, មេតាំហ្វេតាមីនជិតផលិតរួចរាល់ទម្ងន់ ៣.២គីឡូម៉ែត្រ, និងថ្នាំ Magu ដែលផ្សំឡើងពីមេតាំហ្វេតាមីន និងកាហ្វេអ៊ីនចំនួន ២,០០០គ្រាប់ ត្រូវបានរឹបអូស។ ជាមួយគ្នានេះ យានជំនិះ ០៥គ្រឿង ក៏ត្រូវបានរឹបអូសដូចគ្នាផងដែរ រួមជាមួយនិងលុយជាង ១.៣លានយ័ន ស្មើនឹង ១៩៥,០០០ដុល្លារអាមេរិក ត្រូវបានបង្កក៕
សេអ៊ូល ៖ ភ្នាក់ងារស៊ើបការណ៍សំងាត់កូរ៉េខាងត្បូង (NIS) បានអះអាងថា កូរ៉េខាងជើងអាចនឹងបាញ់សាកល្បងមីស៊ីលផ្លោងជាថ្មីម្ដងទៀតនៅមុនដំណាច់ឆ្នាំ២០១៧ នេះ គ្រាដែលសកម្មភាពនៅមជ្ឈមណ្ឌលស្រាវជ្រាវមីស៊ីលមានកាន់តែច្រើនឡើង។ នេះបើតាមទីភ្នាក់ងារសារព័ត៌មានកូរ៉េខាងត្បូងយ៉ុនហាប់។
តាមរបាយការណ៍របស់ NIS ដាក់ជូនសភាកូរ៉េខាងត្បូងបានបញ្ជាក់ថា «ខណៈសកម្មភាពយានយន្ដមានកាន់តែច្រើនឡើង នៅឯមជ្ឈមណ្ឌលស្រាវជ្រាវមីស៊ីលមួយ របស់កូរ៉េខាងជើង ការធ្វើតេស្ដម៉ូទ័រមួយទំនងជាត្រូវបានធ្វើឡើងរួចទៅហើយ…ដូច្នេះថា វាមានអាចទៅរួចថាកូរ៉េខាងជើងនឹងបាញ់សាកល្បងមីស៊ីលផ្លោងជាថ្មីម្ដងទៀតនៅមុនដំណាច់ ឆ្នាំ២០១៧នេះ ដោយសំអាងលើការគំរាមកំហែង ពីសំណាក់សហរដ្ឋអាមេរិកជាលេសបង្កើនសមត្ថភាពមីស៊ីល និងអភិវឌ្ឍបច្ចេកវិទ្យាទីអវកាសដោយសន្តិវិធី»។ ទន្ទឹមនោះ NIS បានបន្ថែមថា រ៉ូងក្រោមដីលេខ០៣ នៃទីតាំងធ្វើតេស្ដអាវុធនុយក្លេអ៊ែរ Punggye-ri ទំនងជាបានត្រៀមរួចជាស្រេចសម្រាប់ការធ្វើតេស្ដនុយក្លេអ៊ែរ ដោយរង់ចាំតែបញ្ជា ពីមេដឹកនាំកូរ៉េខាងជើង លោក គីម ជុងអ៊ុន តែប៉ុណ្ណោះ៕
រាជធានីភ្នំពេញ ៖ អគ្គលេខាធិការ នៃអគ្គលេខាធិការដ្ឋានរដ្ឋសភា លោក ឡេង ប៉េងឡុង បានចេញលិខិតមួយច្បាប់ប្រាប់ឲ្យអតីតតំណាងរាស្ត្រ នៃអតីតគណបក្សសង្គ្រោះជាតិ ដែលទើបតែត្រូវបានរំលាយ ដោយអំណាចសាលដីកាតុលាការកំពូល ប្រគល់សម្ភារៈរបស់រដ្ឋ ជូនអគ្គលេខាធិការដ្ឋានរដ្ឋសភាវិញ៕ ព័ត៌មានលម្អិតសូមមេត្តាអានលិខិតខាងក្រោម៖
រាជធានីភ្នំពេញ ៖ អនុប្រធាន និងសមាជិកចំនួន៣រូបរបស់គណៈកម្មាធិការជាតិរៀបចំការបោះឆ្នោត គ.ជ.ប មកពីអតីតគណបក្សសង្គ្រោះជាតិបានដាក់ពាក្យលាលែងពីតួនាទី និងមុខតំណែង។ នេះបបើយោងលិខិតសុំលាលែងរបស់ពួកគេទាំង៣នាក់ ដែលបានដាក់ចូលទៅរដ្ឋសភាកាលពីម្សិលមិញ។
សមាជិក គ.ជ.ប ដែលបានដាក់ពាក្យលាលែងពីតំណែងនោះរួមមាន លោក គួយ ប៊ុនរឿង អនុប្រធានគ.ជ.ប, លោក រ៉ុង ឈុន សមាជិកគ.ជ.ប និងលោកស្រី តែ ម៉ានីរ៉ុង សមាជិកគ.ជ.ប។ ការលាលែងនេះ បានកើតឡើងក្រោយពីតុលាការកំពូល នៃប្រទេសកម្ពុជា សម្រេចរំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧ ពាក់ព័ន្ធទៅនឹងអំពើក្បត់ជាតិ។ ចំណែកលោក ហ៊ីង ធីឫទ្ធិ សមាជិកគ.ជ.ប កូតាអតីតគណបក្សសង្គ្រោះជាតិដែរនោះ បានប្រកាសថា លោកមិនលាលែងពីតំណែង របស់លោកឡើយ។ លោកបានថ្លែងបញ្ជាក់តាមលិខិតរបស់លោកថា គ.ជ.ប ជាស្ថាប័នឯករាជ្យ ហើយលោកនឹងបម្រើស្ថាប័ននេះតទៅមុខទៀត៕
រាជធានីភ្នំពេញ ៖ អតីតមន្ត្រីមូលដ្ឋាន ឃុំ/សង្កាត់ ស្រុក/ខេត្ត របស់ CNRP នៅមានរយៈពេល៤ថ្ងៃទៀត សម្រាប់ការពិចារណាចូលរួមជាមួយគណបក្សប្រជាជនកម្ពុជា ។ នេះបើយោងតាម ការចុះផ្សាយរបស់សារព័ត៌មានហ្វ្រេស៍ញូស៍ ដែលបានដកស្រង់សំដីរបស់សម្តេចនាយករដ្ឋមន្ត្រី ហ៊ុន សែន នៅព្រឹកថ្ងៃច័ន្ទនេះ ។
បណ្តាញព័ត៌មានហ្វ្រេសញូស៍បានចុះផ្សាយថា នាយករដ្ឋមន្ត្រីកម្ពុជា និងជាប្រមុខដឹកនាំ គណបក្សប្រជាជនកម្ពុជា បានប្រកាសតាមបណ្តាញ Fresh News ឲ្យដឹងថា ការស្ម័គ្រចិត្តចុះចូលពី សំណាក់អតីតមន្ត្រីរបស់គណបក្សសង្គ្រោះជាតិ ចូលគណបក្សប្រជាជនកម្ពុជា មានឱសានវាទត្រឹមថ្ងៃទី២៤ ខែវិច្ឆិកាប៉ុណ្ណោះ។
តាមហ្វ្រេសញូស៍ឲ្យដឹងថា នៅព្រឹកថ្ងៃទី២០ ខែវិច្ឆិកា ឆ្នាំ២០១៧នេះ សម្តេចតេជោ ហ៊ុន សែន បានផ្តល់កិច្ចសម្ភាសន៍ដ៏ពិសេសមួយជាមួយលោក លឹម ជាវុត្ថា នាយកប្រតិបត្តិបណ្តាញព័ត៌មាន Fresh News ឲ្យដឹងថា៖ «ការស្ម័គ្រចិត្តចុះជាមួយគណបក្សប្រជាជនកម្ពុជា មានត្រឹមថ្ងៃទី២៤ ខែវិច្ឆិកាប៉ុណ្ណោះ ព្រោះការរៀបចំបញ្ជីក្រុមប្រឹក្សាឃុំសង្កាត់ថ្មី ដើម្បីបញ្ជូនទៅកាន់ គជប នឹងត្រូវបិទត្រឹមថ្ងៃទី២៤ ខែវិច្ឆិកា, ប្រសិនបើចាប់ពីថ្ងៃទី២៥ ខែវិច្ឆិកាទៅ ការចុះចូលនៅតែបន្តដដែល ប៉ុន្តែមិនផ្តល់តួនាទីអ្វីនោះទេ»។
សម្តេចតេជោ ហ៊ុន សែន បានប្រសាសន៍អំពាវនាវឲ្យអតីតមន្ត្រីគណបក្សសង្គ្រោះជាតិ ដែលត្រូវបានតុលាការកំពូលកាត់រំលាយ សូមប្រញាប់ប្រញាល់ចុះចូលជាមួយ គណបក្សប្រជាជនកម្ពុជា ដើម្បីទទួលបាននូវតួនាទីឋានៈអ្វីៗដដែល ព្រោះការកំណត់ពេលវេលាត្រឹមថ្ងៃទី២៤នេះធ្វើឡើងតាមលក្ខខ័ណ្ឌរបស់គជប ៕
រាជធានីភ្នំពេញ ៖ សាលារាជធានីភ្នំពេញ បានចេញនូវសេចក្តីជូនដំណឹងមួយស្តីពីការ ប្រារពពិធីសូត្រមន្ត បង្សុកូល និងរាប់បាត្រ ឧទ្ទិសកុសលជូនវិញ្ញាណក្ខន្ធជនរងគ្រោះក្នុងឧបទ្ទវហេតុលើអតីតស្ពានពេជ្រនៃទីក្រុងកោះពេជ្រ ។
តាមសេចក្តីជូនដំណឹងពិធីនេះនឹងរៀបចំធ្វើនៅវេលាម៉ោង៧ និង០០នាទី ថ្ងៃទី២២ ខែវិច្ឆិកា ឆ្នាំ២០១៧ ខាងមុខនេះ នៅស្តូបក្បែរស្ពាននាគនៃទីក្រុងកោះពេជ្រ៕
ឥណ្ឌា ៖ សត្វដំរីអាស៊ីជិតផុតពូជចំនួន២ក្បាលត្រូវបានរថភ្លើងដឹកអ្នកដំណើរមួយគ្រឿងបុកបណ្ដាលឲ្យស្លាប់នៅជិតទីក្រុងហ្គូវ៉ាហាទីនៅភាគឦសានប្រទេសឥណ្ឌា។
មន្ត្រីអភិរក្សសត្វព្រៃលោក ប្រូឌីបតា បារូ បាននិយាយថា សត្វដំរីដែលស្លាប់ទាំង២ក្បាលនេះគឺស្ថិតនៅចំណោមហ្វូងដំរីចំនួន១៥ក្បាលដែលបានដើរផ្សងព្រេងឆ្លងទៅចូលក្នុងតំបន់នេះដើម្បីរកចំណីនៅមុនពេលព្រះអាទិត្យរះកាលពីថ្ងៃអាទិត្យ។ មន្ត្រីអភិរក្សរូបនេះបានបញ្ជាក់ថា ហ្វូងដំរីទាំងនេះបាននាំគ្នាដើរឆ្លងកាត់ផ្លូវរថភ្លើង ហើយដំរី២ក្បាលដែលស្លាប់នេះបានដើរក្រោយគេដែលត្រូវបានរថភ្លើងបុកបណ្ដាលឲ្យស្លាប់តែម្ដង។
គ្រោះថ្នាក់នេះបានកើតឡើងនៅរដ្ឋអាស្សាមជាតំបន់ដែលមានសត្វដំរីអាស៊ីរាប់ពាន់ក្បាលតាំងជម្រកនៅទីនោះ ហើយក៏តែងតែរងគ្រោះដោយសាររថភ្លើងបុកបណ្ដាលឲ្យស្លាប់ឬរបួសជាប្រចាំផងដែរ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
