រាជធានីភ្នំពេញ ៖ ព្រឹកថ្ងៃទី១១ ខែសីហា ឆ្នាំ២០១៧នេះ សាលាឧទ្ធរណ៍នឹងបើកសវនាការរឿងក្ដីលោក សម រង្ស៊ី ពាក់ព័ន្ធការចោទប្រកាន់រាជរដ្ឋាភិបាលកម្ពុជាថា នៅពីក្រោយខ្នងនៃអំពើឃាតកម្មលោក កែម ឡី ។ នេះបើយោងតាមការឲ្យដឹងរបស់មេធាវីការពារក្តីរបស់សម្តេចនាយករដ្ឋមន្ត្រី៕
រាជធានីភ្នំពេញ ៖ សាលាដំបូងរាជធានីភ្នំពេញបានប្រកាសសាលក្រមដោយសម្រេចផ្តន្ទាទោស លោកគឹម សុខ អ្នកឃ្លាំមើលបញ្ហាសង្គមនិងនយោបាយ ឲ្យជាប់ពន្ធនាគាររយៈពេល១៨ខែ ពិន័យ៨លានរៀលចូលថវិការដ្ឋ និងសងជំងឺចិត្តដល់ដើមបណ្ដឹងចំនួន៨០០លានរៀល ក្នុងសំណុំរឿងដែលលោក គឹម សុខ ចោទថា គណបក្សប្រជាជនកម្ពុជា ជាអ្នកសម្លាប់បណ្ឌិតកែម ឡី ។
តាមមន្ត្រីតុលាការបញ្ជាក់ថា លោក គឹម សុខ ត្រូវបានចោទប្រកាន់ចំនួនពីរបទល្មើស គឺ ញុះញុងឲ្យប្រព្រឹត្តបទឧក្រិដ្ឋជាអាទិ៍ និង បទបរិហារកេរ្តិ៍ជាសាធារណៈ ហើយត្រូវបានតុលាការឃុំខ្លួន កាលពីថ្ងៃទី១៧ ខែកុម្ភៈ ឆ្នាំ២០១៧ ៕
រាជធានីភ្នំពេញ ៖ សាលាឧទ្ធរណ៍សម្រេចលើកពេលប្រកាសសាលដីកាសំណុំរឿងក្ដីលោកស្រី ថាក់ ឡានី ដែលចោទប្រកាន់សម្តេចតេជោ ហ៊ុន សែន ថា ជាអ្នកសម្លាប់លោកបណ្ឌិត កែម ឡី ទៅព្រឹកថ្ងៃទី២៩ ខែសីហា ឆ្នាំ២០១៧ ខាងមុខនេះវិញ។ ការប្រកាសបែបនេះធ្វើឡើងក្រោយបញ្ចប់សវនាការនៅថ្ងៃទី១០ ខែសីហា ឆ្នាំ២០១៧នេះ។
គួររំលឹកថា លោកស្រី ថាក់ ឡានី ត្រូវបានសាលាដំបូងរាជធានីភ្នំពេញ កាលពីរសៀលថ្ងៃទី១៧ ខែវិច្ឆិកា ឆ្នាំ២០១៦ ផ្តន្ទាទោសដាក់ពន្ធនាគាររយៈពេល១ឆ្នាំនិងពិន័យ៨លានរៀល ព្រមទាំងសងសំណងជំងឺចិត្តដល់សម្ដេចតេជោនាយករដ្ឋមន្ត្រី ចំនួន១០០រៀល៕
ដោយ ៖ ប៉ែន សុផល
បាត់ដំបង ៖ កាលពីរសៀលម្សិលមិញមានករណីរន្ទះបាញ់ឈ្មោះ សឿន ចាន់ ភេទប្រុស អាយុ៥៤ឆ្នាំនៅក្រុមទី៧ ភូមិអូរពងមាន់ ឃុំតាគ្រាម ស្រុកបាណន់ បណ្តាលឲ្យស្លាប់ ខណៈកំពុងឃ្វាលគោនៅឯវាលស្រែ ពេលមេឃកំពុងនៅចំណុចវាលឆ្កែលិតក្រោយភូមិព្រៃផ្តៅ ឃុំតាគ្រាម។
សមត្ថកិច្ចបានឲ្យដឹងថា លោកតាដែលត្រូវរន្ទះបាញ់ស្លាប់ដោយមានស្លាកស្នាមរបួសពីចង្កេះមកដល់ ក និងបែកក្បាលត្រង់ត្រចៀកខាងឆ្វេង ហើយត្រូវបានឈ្មោះ អាន សុភ័ក្រ ភេទប្រុស អាយុ៣៤ឆ្នាំបានឃើញ ហើយបានមកហៅឈ្មោះ ដាំ គឹមហួរ ភេទប្រុស អាយុ៤១ឆ្នាំ ដែលនៅស្រែជាមួយគ្នានិងប្រជាពលរដ្ឋនៅភូមិជាមួយគ្នាបានជួយយកសពមកផ្ទះជនរងគ្រោះធ្វើបុណ្យទៅតាមប្រពៃណី៕
ភ្នំពេញ ៖ លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា នាព្រឹកថ្ងៃទី៨ ខែសីហានេះ បានទទួលជួបលោកស្រីរ៉ូណា ស្មីត អ្នករាយការណ៍ពិសេស របស់អង្គការសហប្រជាជាតិទទួលបន្ទុកផ្នែកសិទ្ធិមនុស្ស ខណៈលោកស្រីកំពុងបំពេញទស្សនកិច្ចនៅប្រទេសកម្ពុជា។ លោក កែវ រ៉េមី បានថ្លែងប្រាប់អ្នកយកព័ត៌មានក្រោយជំនួបនេះ ថា លោកស្រីរ៉ូណា ស្មីត បានសម្ដែងការក្ដីបារម្ភចំពោះការលើកឡើងរបស់លោក វង សូត រដ្ឋមន្ដ្រីក្រសួងសង្គមកិច្ច អតីតយុទ្ធជន និងយុវនីតិសម្បទា ដែលថា អ្នកណាមិនទទួលស្គាល់លទ្ធផលបោះឆ្នោត ជ្រើសតាំងតំណាងរាស្ដ្រនីតិកាលទី នាឆ្នាំ២០១៨ខាងមុខ នឹងត្រូវក្បាលគល់ឫស្ស៊ី។
លោក កែវ រ៉េមី បានថ្លែងប្រាប់លោកស្រីរ៉ូណា ស្មីត ថា អ្វីដែលជាការលើកឡើងរបស់ឯកឧត្ដមវង សូត មិនមែនជាការគម្រាមនោះទេ ប៉ុន្ដែជាការអប់រំមួយទៅតាមផ្លូវច្បាប់ ព្រោះកន្លងមកគណបក្សប្រឆាំង និងអ្នកគាំទ្រតែងតែមិនទទួលស្គាល់លទ្ធផលបោះឆ្នោត។ តែប្រធានគណៈកម្មាធិការសិទ្ធិមនុស្សកម្ពុជា អាចនិយាយបាន ថា ការប្រើប្រាស់ពាក្យសម្ដីរបស់រដ្ឋមន្ដ្រីក្រសួងសង្គមកិច្ច អតីតយុទ្ធជន និងយុវនីតិសម្បទា ប្រាកដជានាំឲ្យមានប្រតិកម្មក្នុងវិស័យសិទ្ធិមនុស្ស។
លោក កែវ រ៉េមី បានថ្លែងបន្ត ថា គណៈកម្មាធិការសិទ្ធិមនុស្សកម្ពុជា ទទួលស្គាល់នូវអ្វីដែលជាព្រួយបារម្ភរបស់លោកស្រីរ៉ូណា ស្មីត ព្រោះជារឿងធម្មតា និងជាតួនាទីរបស់លោកស្រី ដែលធ្វើការក្នុងវិស័យសិទ្ធិមនុស្ស។ យ៉ាងណាក៏ដោយ លោក កែវ រ៉េមី បានថ្លែងបញ្ជាក់ ថា លោក វត សូត រដ្ឋមន្ដ្រីក្រសួងសង្គមកិច្ច អតីតយុទ្ធជន និងយុវនីតិសម្បទា គឺជាមនុស្សស្លូតបូត មិនមែនជាមនុស្សកាចសាហាវអ្វីនោះទេ។
ជាមួយគ្នានេះ ប្រធានគណៈកម្មាធិការសិទ្ធិមនុស្សកម្ពុជា បានជម្រាបលោកស្រីរ៉ូណា ស្មីត ថា នៅប្រទេសកម្ពុជា មានការធ្វើវិសោធនកម្មច្បាប់បោះឆ្នោតជាច្រើនលើកច្រើនសារ ហើយមានការឯកភាពីគណបក្សនយោបាយនៅក្នុងរដ្ឋសភា។ ដូច្នេះការបោះឆ្នោតរួចហើយ ត្រូវតែទទួលស្គាល់លទ្ធផល បោះឆ្នោត ព្រោះក្នុងច្បាប់មានចែង ថា បើមិនទទួលស្គាល់ទេ នឹងដាក់ទោសទណ្ឌទៅលើគណបក្សនយោបាយនោះ។
សូមជម្រាប ថា គណបក្សប្រឆាំងតែងតែប្រកាស មិនទទួលស្គាល់លទ្ធផលបោះឆ្នោត បន្ទាប់ពីគណបក្សរបស់ខ្លួនមិនទាន់ឈ្នះការបោះឆ្នោត បើទោះបីជាអ្នកសង្កេតការណ៍ជាតិ-អន្ដរជាតិ និងបណ្ដាអង្គទូតនានាប្រចាំកម្ពុជា បានស្វាគមន៍ និងទទួលស្គាល់ការបោះឆ្នោត ថា សេរី ត្រឹមត្រូវ និងយុត្ដិធម៌យ៉ាងណាក៏ដោយ។ ជាក់ស្ដែងការបោះឆ្នោតជ្រើសតំណាងរាស្ដ្រនីតិកាលទី៥ ឆ្នាំ២០១៣កន្លងទៅនេះ គឺគណបក្សប្រឆាំង បានដឹកនាំអ្នកគាំទ្រធ្វើបាតុកម្មតវ៉ាអស់ជាច្រើនខែ មុននឹងសម្រេចចូលបំពេញការងារនៅក្នុងរដ្ឋសភាវិញ៕
រាជធានីភ្នំពេញ ៖ អនុប្រធានសាលាដំបូងរាជធានីភ្នំពេញ និងជាប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ លោក គី ឫទ្ធី បានឲ្យដឹងថា នៅរសៀលថ្ងៃទី១០ ខែសីហា នេះនឹងប្រកាសសាលក្រមរឿងក្ដីលោក គឹម សុខ អ្នកឃ្លាំមើលបញ្ហាសង្គម និងនយោបាយ ដែលចោទប្រកាន់ថា គណបក្សប្រជាជនកម្ពុជា ជាអ្នកសម្លាប់បណ្ឌិតកែម ឡី។
លោក គឹម សុខ ត្រូវបានបញ្ជូនទៅឃុំខ្លួនក្នុងពន្ធនាគារព្រៃស កាលពីរសៀលថ្ងៃទី១៧ ខែកុម្ភៈ ឆ្នាំ២០១៧ តាមបណ្តឹងមេធាវីតំណាងដោយអាណត្តិរបស់សម្តេចតេជោនាយករដ្ឋមន្ត្រី ដែលហ៊ានចោទ គណបក្សប្រជាជនកម្ពុជាថា ជាអ្នកសម្លាប់លោក កែម ឡី ។ លោក គឹម សុខ ត្រូវបានព្រះរាជអាជ្ញារង សៀង សុខ សម្រេចចោទប្រកាន់ចំនួនពីរបទល្មើស គឺ ញុះញង់ឲ្យប្រព្រឹត្តបទឧក្រិដ្ឋជាអាទិ៍ និង បទបរិហារកេរ្តិ៍ជាសាធារណៈ តាមមាត្រា៤៩៤ មាត្រា៤៩៥ និង មាត្រា៣០៥ នៃក្រមព្រហ្មទណ្ឌ ។
បច្ចុប្បន្នលោក គឹម សុខ នៅជាប់បណ្តឹងមួយទៀត ដែលប្តឹងដោយសម្តេចតេជោ ដូចគ្នា គឺ ពាក់ព័ន្ធការដែលលោក គឹម សុខ បានចោទប្រកាន់ ថា រាជរដ្ឋាភិបាលកម្ពុជា បានបង្កើតប្រព័ន្ធសម្លាប់មនុស្ស រួចរកឃាតករមិនដែលឃើញ ៕
រាជធានីភ្នំពេញ ៖ រឿងក្ដីលោកស្រី ថាក់ ឡានី អតីតសមាជិកព្រឹទ្ធសភាគណបក្សសម រង្ស៊ី ពាក់ព័ន្ធ បទល្មើសបរិហារកេរ្តិ៍ចោទប្រកាន់សម្តេចតេជោ ហ៊ុន សែន ថា ជាអ្នកសម្លាប់លោក កែម ឡី សាលាឧទ្ធរណ៍នឹងបើកសវនាការនៅព្រឹកថ្ងៃទី១០ ខែសីហា នេះ។ នេះបើយោងតាមការឲ្យដឹងពីលោក ទូច ថារិទ្ធិ អគ្គលេខាធិការរងនិងជាអ្នកនាំពាក្យសាលាឧទ្ធរណ៍។
គួររំលឹកថា លោកស្រី ថាក់ ឡានី ត្រូវបានសាលាដំបូងរាជធានីភ្នំពេញកាលពីរសៀលថ្ងៃទី១៧ ខែវិច្ឆិកា ឆ្នាំ២០១៦ ប្រកាសសាលក្រមផ្តន្ទាទោស ដាក់ពន្ធនាគាររយៈពេល១ឆ្នាំ និងពិន័យ៨លានរៀល ព្រមទាំងសងសំណងជំងឺចិត្តដល់សម្ដេចតេជោនាយករដ្ឋមន្ត្រី ចំនួន១០០រៀល ។
គួរបញ្ជាក់ថា លោកស្រី ថាក់ ឡានី ជាប់ចោទពីបទ បរិហារកេរ្តិ៍ជាសាធារណៈ និងបទញុះញង់ឲ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្តនៅភូមិប៉ាតាង ឃុំប៉ាតាង ស្រុកលំផាត់ ខេត្តរតនគិរី កាលពីថ្ងៃទី២៩ ខែកក្កដា ឆ្នាំ២០១៦ តាមមាត្រា ៣០៥ មាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ៕
ប៉េកាំង ៖ ក្រសួងការពារជាតិចិនបានទាមទារឲ្យទាហានឥណ្ឌាដែលកំពុងរំលោភចូលមកកាន់ទឹកដីរបស់ខ្លួនដកចេញត្រឡប់ទៅកាន់ទឹកដីនៅតំបន់ព្រំដែនឥណ្ឌាវិញភ្លាមៗដើម្បីស្តារឡើងវិញនូវសន្តិភាព និងភាពស្ងប់ស្ងាត់។ នេះបើយោងតាមសារព័ត៌មានចិនស៊ិនហួរ។
អ្នកនាំពាក្យក្រសួងការពារជាតិចិន លោក Ren Guoqiang បានស្នើឲ្យភាគីឥណ្ឌាដោះស្រាយបញ្ហាឲ្យបានឆាប់រហ័សតាមរយៈកាយវិការដ៏ត្រឹមត្រូវ ដើម្បីស្តារឡើងវិញនូវសន្តិភាព និងភាពស្ងប់ស្ងាត់នាតំបន់ព្រំដែន។ អ្នកនាំពាក្យរូបនេះបានបន្តថា កងកម្លាំងប្រដាប់អាវុធចិននឹងការពារយ៉ាងអង់អាចក្លាហាននូវអធិបតេយ្យភាពទឹកដី និងផលប្រយោជន៍ ផ្នែកសន្តិសុខ នៃប្រទេសរបស់ខ្លួន។
លោកបញ្ជាក់ថា ចាប់តាំងពីឧប្បវទ្ទហេតុបានកើតឡើង ចិនបានបង្ហាញនូវសុច្ឆន្ទៈល្អបំផុត ហើយបានព្យាយាមទាក់ទងជាមួយភាគីឥណ្ឌា តាមរយៈបណ្តាញការទូត ដើម្បីដោះស្រាយឧប្បទ្ទវហេតុនេះ។ កងកម្លាំងប្រដាប់អាវុធរបស់ចិន ក៏បានធ្វើការអត់ធ្មត់កម្រិតខ្ពស់ ជាមួយនឹងការមើលឃើញពីទំនាក់ទំនងទ្វេរភាគី និងសន្តិភាព និងស្ថេរភាពក្នុងតំបន់។
គួរបញ្ជាក់ថា កាលពីថ្ងៃទី១៨ ខែមិថុនាកន្លងទៅ ចិនបានប្រកាសថា ទាហានការពារព្រំដែនរបស់ឥណ្ឌា បានឆ្លងព្រំដែនខុសច្បាប់ ចូលទៅកាន់ទឹកដីរបស់ចិន ហើយបានរារាំងការងារ សាងសង់ផ្លូវរបស់ចិន នៅលើទឹកដីរបស់ចិន ប៉ុន្តែចំណុចត្រូវបានខាងភាគីឥណ្ឌាប្រកាសជាទឹកដីរបស់ខ្លួន៕
ភ្នំពេញ ៖ លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៅព្រឹកថ្ងៃទី០៩ ខែសីហា ឆ្នាំ២០១៧នេះ បានបើកសន្និសីទព័ត៌មានមួយបង្ហាញពីលទ្ធផលនៃកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ពាក់ព័ន្ធ ដែលបាន ធ្វើឡើងនៅទីក្រម៉ានីល ប្រទេសហ្វីលីពីន ចាប់ពីថ្ងៃទី០៤ ដល់ថ្ងៃទី០៨ ខែសីហា ឆ្នាំ២០១៧។
បើតាមលោក ប្រាក់ សុខុន បានឲ្យដឹងថា កិច្ចប្រជុំរយៈពេល៥ថ្ងៃ ដែលធ្វើឡើងចំខួប ៥០ឆ្នាំនៃកំណើតសមាគមអាស៊ាន ត្រូវបានធ្វើឡើងក្រោមប្រធានបទ «រួមគ្នាជាដៃគូ ដើម្បីធ្វើការផ្លាស់ប្តូររួមចំណែកជាមួយពិភពលោក» ហើយ កិច្ចប្រជុំរដ្ឋមន្ត្រីមន្ត្រីការបរទេសអាស៊ាន និងកិច្ចប្រជុំពាក់ព័ន្ធជាច្រើននេះ ទទួលបាននូវលទ្ធផលដ៏គាប់ប្រសើរ ជាច្រើន។
ប្រមុខការទូតកម្ពុជា បានលើកឡើងថា ក្នុងចំណោមបញ្ហាជាច្រើនដែលបានលើកយកពិភាក្សាក្នុងកិច្ចប្រជុំនៅទីក្រុងម៉ានីល ប្រទេសហ្វីលីពីននេះ បញ្ហាជម្លោះសមុទ្រចិនខាងត្បូង និងបញ្ហាឧបទ្វីបកូរ៉េ គឺជាប្រធានបទដ៏សំខាន់មួយត្រូវបានលើកយកពិភាក្សាយ៉ាងផុលផុស។
ពាក់ព័ន្ធបញ្ហាឧបទ្វីបកូរ៉េ លោក ប្រាក់ សុខុន បានបញ្ជាក់ថា ប្រទេសសមាជិកអាស៊ាន ក៏ដូចជាកម្ពុជា បានស្នើដល់កូរ៉េខាងជើងឲ្យឈប់បាញ់អាវុធនុយក្លេអ៊ែរបស់ខ្លួន។ បើតាមលោក ប្រាក់ សុខុន ប្រទេសកម្ពុជានិងអាស៊ានបានចេញលិខិតដោយឡែកមួយទៅកូរ៉េខាងជើង ដើម្បីបញ្ឈប់សកម្មភាពរបស់ខ្លួន ហើយក៏បានស្នើគ្រប់ភាគីអត់ធ្មត់ជៀសវាងការកើតមានសង្គ្រាមក្នុងតំបន់ធ្ងន់ធ្ងរ។
នៅក្នុងសន្និសីទព័ត៌មាននាព្រឹកមិញនេះ លោកទេសរដ្ឋមន្ត្រី បានលើកឡើងថា ក្នុងនាមប្រទេសធ្លាប់ឆ្លងកាត់សង្គ្រាមច្រើនឆ្នាំគឺមានតែកាចរចាទើបអាចដោះស្រាយបាន។ ឯកឧត្តមប្រមុខការទូតកម្ពុជា បានថ្លែងប្រាប់អ្នកសារព័ត៌មានថាគ្រប់ភាគីទាំងអស់ត្រូវអត់ធ្មត់ចំពោះបញ្ហាកូរ៉េខាងជើង។
បើតាមឯកឧត្តម ប្រាក់ សុខុន បញ្ហាជម្លោះឧបទ្វីបកូរ៉េនេះ រដ្ឋមន្ត្រីការបរទេសកូរ៉េខាងជើងបានលើកឡើងថា វាជារឿងអយុត្តិធម៌ណាស់សម្រាប់ប្រទេសគាត់ ហើយការខិតខំរបស់កូរ៉េជើង គឺដើម្បីប្រឆាំងអាមេរិក។ រដ្ឋមន្ត្រីការបរទេសកូរ៉េខាងជើងថែមទាំងបញ្ជាក់ទៀតថា ពេលនេះកូរ៉េខាងជងើមានអាវុធអាចបាញ់ដល់អាមេរិក។
រដ្ឋមន្ត្រីការបរទេសកូរ៉េខាងជើងបានលើកឡើងថា កូរ៉េខាងជើងខំបំពាក់អាវុធនុយក្លេអ៊ែនេះ ដើម្បីប្រឆាំងអាមេរិកនិងប្រទេសដែលចូលដៃជាមួយអាមេរិកកូរ៉េខាងជើងនិងរាប់ប្រទេសនោះចូលដែរ។
ក្រៅពីបញ្ហានៅឧបទ្វីកូរ៉េ បញ្ហាសមុទ្រខាងត្បូង ក៏ជាបញ្ហាសំខាន់មួយផងដែរ ត្រូវបានលើកយកមកជជែក។ តែបញ្ហាសមុទ្រចិនខាងត្បូង ហាក់មិនមែនជាប្រធានបទក្តៅសម្រាប់អាស៊ានទៀតនោះឡើយ។
រដ្ឋមន្ត្រីការបរទេសអាស៊ាន និងចិន សុទ្ធតែបានទទួលស្គាល់ថា បញ្ហាសមុទ្រចិនខាងត្បូងឆ្នាំនេះមានការវិវឌ្ឍន៍ល្អទៅមុខ បើធៀបទៅនឹងឆ្នាំកន្លងទៅ។
សូមបញ្ជាក់ថា ក្នុងអំឡុងពេលចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥០ លោក ប្រាក់ សុខុន ក៏មានជំនួបទ្វេភាគីដោយឡែកពីគ្នា ជាមួយឯកឧត្តម MevlutCavusogluរដ្ឋមន្ត្រីការបរទេសទួរគី ឯកឧត្តម VasanthaSenanayakeអនុរដ្ឋមន្ត្រីការបរទេសស្រីលង្កា លោក Wang Yi រដ្ឋមន្ត្រីការបរទេសចិន និងលោកជំទាវ Kang Kyung-wha រដ្ឋមន្ត្រីការបរទេសសាធារណរដ្ឋកូរ៉េ។ នៅក្នុងជំនួបទេ្វភាគីនេះ ការពិភាក្សា និងការផ្លាស់ប្តូរទស្សនៈ ផ្តោតទៅលើទំនាក់ទំនងទ្វេភាគី និងបញ្ហាតំបន់ និងអន្តរជាតិផ្សេងទៀត៕
ភ្នំពេញ ៖ រាជរដ្ឋាភិបាលកម្ពុជា ចេញសេចក្ដីប្រកាសព័ត៌មានផ្លូវការ ពីការផ្ដល់ភាពស្របច្បាប់ដល់ពលករកម្ពុជា ដែលកំពុងស្នាក់នៅ និងធ្វើការនៅប្រទេសថៃ ចន្លោះពីថ្ងៃទី២៤ ខែកក្កដា រហូតដល់ថ្ងៃទី០៧ ខែសីហា ឆ្នាំ២០១៧នេះ។
ភ្នំពេញ ៖ ប្រធានគណៈកម្មាធិការសិទ្ធិមនុស្សកម្ពុជា បានទទួលជួបពិភាក្សាជាមួយឯកអគ្គរាជទូតស៊ុយអ៊ែតប្រចាំប្រទេសកម្ពុជា ដើម្បីត្រៀមរៀបចំកិច្ចពិគ្រោះយោបល់ស្ដីពី”បញ្ហាសិទ្ធមនុស្ស”ចាប់ពីថ្ងៃទី១៦ ដល់ថ្ងៃទី១៨ ខែតុលា ឆ្នាំ២០១៨ខាងមុខនេះ។
លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា នៅព្រឹកថ្ងៃទី៩ ខែសីហានេះ បានទទួជួបលោកលោកស្រីម៉ារៀ សាគ្រីន(Maria Sargren)ឯកអគ្គរាជទូតស៊ុយអ៊ែតប្រចាំប្រទេសកម្ពុជាដើម្បីពិភាក្សាអំពីការរៀបចំកិច្ចពិគ្រោះយោបល់ស្ដីពី”បញ្ហាសិទ្ធមនុស្សរវាងកម្ពុជា និងស៊ុយអ៊ែត”។
លោក ជេត ជាលី អនុប្រធានគណៈកម្មាធិការសិទ្ធិមនុស្សកម្ពុជា បានថ្លែងប្រាប់អ្នកសារព័ត៌មាន ថា ជំនួបរវាងប្រធានគណៈកម្មាធិការសិទ្ធិមនុស្សកម្ពុជា ជាមួយឯកអគ្គរាជទូតស៊ុយអ៊ែតប្រចាំកម្ពុជា គឺដើម្បីត្រៀមរៀបចំកិច្ចពិភាក្សាពិគ្រោះយោបល់ស្ដីពីបញ្ហាសិទ្ធិមនុស្សរវាងប្រទេសកម្ពុជា និងប្រទេសស៊ុយអ៊ែត នៅថ្ងៃទី១៦ដល់ថ្ងៃទី១៨ ខែតុលា ឆ្នាំ២០១៧ខាងមុខនេះ។
លោក ជេត ជាលី បានឲ្យដឹងបន្ត ថា កិច្ចពិភាក្សាពិគ្រោះយោបល់ទៅលើបញ្ហាសិទ្ធិមនុស្សរវាងកម្ពុជា និងស៊ុយអ៊ែត ត្រូវបានរៀបចំធ្វើឡើងជារៀងរាល់ឆ្នាំ ហើយផ្លាស់ប្ដូរត្រូវគ្នាធ្វើជាម្ចាស់ផ្ទះ ដោយឆ្នាំនេះប្រទេសកម្ពុជា នឹងត្រូវធ្វើជាម្ចាស់ផ្ទះរៀបចំកិច្ចពិភាក្សានេះ។ ប្រធានបទសំខាន់ៗចំនួន៥នឹងត្រូវលើកយកទៅពិភាក្សា ក្នុងកិច្ចពិគ្រោះយោបល់នេះ ដូចជា៖ទី១.ភាពស្មើគ្នានៃសិទ្ធិរបស់ស្ដ្រី និងសិទ្ធិរបស់ភេទទី៣,ទី២.សិទ្ធិទទួលបានព័ត៌មាន,ទី៣.ការសរសេររបាយការណ៍ត្រួតពិនិត្យមានការកំណត់របស់អង្គការសហប្រជាជាតិ,ទី៤.ការបង្កើតគណៈកម្មាធិការសិទ្ធិមនុស្សជាតិ,និងទី៥.សិទ្ធិរបស់កម្មករ និងពលករ។
អនុប្រធានគណៈកម្មាធិការសិទ្ធិមនុស្សកម្ពុជា បានបញ្ជាក់ ថា ប្រទេសកម្ពុជា និងស៊ុយអ៊ែត នឹងទទួលបានផលប្រយោជន៍មួយចំនួន អំពីកិច្ចពិភាក្សាពិគ្រោះយោបល់នេះ ជាពិសេសការផ្លាស់ប្ដូរបទពិសោធន៍គ្នាទៅវិញទៅមក លើប្រធានបទសំខាន់ៗទាំង៥ខាងលើនេះ។
សូមជម្រាប ថា លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា និងឯកអគ្គរាជទូតស៊ុយអ៊ែតប្រចាំកម្ពុជាបានឯកភាពគ្នារៀបចំកិច្ចពិគ្រោះយោបល់ស្ដីពី”បញ្ហាសិទ្ធមនុស្សរវាងកម្ពុជា និងស៊ុយអ៊ែត”នាឆ្នាំ២០១៨នេះ នៅសកលវិទ្យាល័យភូមិន្ទភ្នំពេញ ចាប់ពីថ្ងៃទី១៦ ដល់ថ្ងៃទី១៨ ខែតុលា៕
ភ្នំពេញ ៖ រាជរដ្ឋាភិបាលកម្ពុជាបានផ្ដល់សិទ្ធិឲ្យក្រុមហ៊ុន និងទីភ្នាក់ងារជ្រើសរើសកម្ពុជាចំនួន៦ដំបូងបង្អស់ប្រតិ បត្តិការជ្រើសរើស បណ្ដុះបណ្ដាល បញ្ជូន និងគ្រប់គ្រងពលការិនីទៅបម្រើការជំនួយការផ្ទះ នៅតំបន់រដ្ឋបាលពិសេសហុងកុង។
លោក បណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ បានថ្លែងក្នុងពីធីបើកសិក្ខាសាលាស្ដីពីការផ្សព្វផ្សាយ និងនីតិវិធីនៃការជ្រើសរើស បណ្ដុះបណ្ដាល គ្រប់គ្រង និងបញ្ជូនពលការិនីជំនួយការផ្ទះទៅធ្វើការនៅតំបន់រដ្ឋបាលពិសេសហុងកុង នាសណ្ឋាគារសាន់វ៉េ កាលពីព្រឹកថ្ងៃទី០៩ខែសីហាឆ្នាំ២០១៧។
លោកបានមានប្រសាសន៍ថា ដើម្បីឲ្យការបញ្ជូនពលការិនីជំនួយការផ្ទះទៅធ្វើការនៅតំបន់រដ្ឋបាលពិសេសហុងកុងទទួលបានជោគជ័យ សម្រាប់ដំណាក់កាលសាកល្បងដំបូង រាជរដ្ឋាភិបាលបានអនុញ្ញាតឲ្យទីភ្នាក់ជ្រើសរើសកម្ពុជាចំនួន៦រួមមាន៖ ក្រុមហ៊ុនសុខលាភ មេត្រី, ក្រុមហ៊ុន ថប មេនផៅវ័រ, ក្រុមហ៊ុន អានីរីតា បេសមេនផៅវ័រ, ក្រុមហ៊ុន អ៊ឹង វិទ្ធីគ្រុប, ក្រុមហ៊ុន អេលីត មេនផៅវ័រ អេនជេនស៊ី និងក្រុមហ៊ុន វីនវីន មេនផៅវ័រ។ មានទីភ្នាក់ងារខ្លះ មានបទពិសោធន៍ក្នុងការជ្រើសរើស បណ្ដុះបណ្ដាល បញ្ជូន និងគ្រប់គ្រងពលការិនីជំនួយការផ្ទះនៅប្រទេសសិង្ហបុរី នាពេលកន្លងមក និងមានមួយចំនួនទៀត ជាទីភ្នាក់ងារមានការគ្រប់គ្រងបានល្អ និងពុំសូវមានវិវាទជាមួយពលករ»។
ជាមួយគ្នានោះ លោករដ្ឋមន្ត្រីបានស្នើឱ្យទីភ្នាក់ងារជ្រើសរើស បណ្ដុះបណ្ដាល បញ្ជូន និងគ្រប់គ្រងពលការិនីជំនួយការផ្ទះមួយចំនួនដូចជា៖ ស្នើឲ្យក្រសួង ស្ថាប័នពាក់ព័ន្ធបង្កើនកិច្ចសហប្រតិបត្តិការ ដើម្បីទប់ស្កាត់ និងចាត់វិធានការតឹងរឹងចំពោះមេខ្យល់ខុសច្បាប់ ឬក្រុមហ៊ុនដែលគ្មានអាជ្ញាប័ណ្ណក្នុងការជ្រើសរើស បណ្ដុះបណ្ដា បញ្ជូន និងគ្រប់គ្រងពលការិនីជំនួយការផ្ទះ ធ្វើយ៉ាងណាកុំឲ្យប្រជាពលរដ្ឋខាតបង់ចាញ់បោកជនខិលខូចទាំងនេះ។
ស្នើឲ្យទីភ្នាក់ងារទាំង៦ ដែលទទួលបានអាជ្ញាប័ណ្ណពីក្រសួងយកចិត្តទុកដាក់លើការបណ្ដុះបណ្ដាលធ្វើយ៉ាងណាត្រូវផ្ដត់ផ្ដង់ធនធានមនុស្សដែលមានគុណភាពដល់និយោជកហុងកុង។ ក្រៅពីនេះក៏បានជំរុញឲ្យទីភ្នាក់ងារមុខរបរហុងកុងដែលជាដៃគូរបស់ខ្លួន ស្វែរក និងជ្រើសរើសតែនិយោជកណាដែលមានលក្ខខណ្ឌការងារល្អ អាចផ្ដល់កន្លែងស្នាក់នៅសមរម្យ និងគោរពសិទ្ធិសេរីភាពរបស់ពលការិនី។
ស្នើដល់អង្គភាពសង្គមស៊ីវិល សហជីព បន្តតាមដាន និងសហការជាមួយក្រសួងការងារ និងបណ្ដុះបណ្ដាលវិជ្ជាជីវៈ ក្នុងការគាំទ្រសុខសុវត្ថិភាព និងផ្ដល់ការគាំទ្រប្រឹក្សាផ្នែកច្បាប់ដល់ពលការិនី សំដៅធ្វើយ៉ាងណាផ្ដល់ការអន្តរាគមន៍ទាន់ពេលវេលា ក្នុងករណីចាំបាច់។
សូមជម្រាបថា មកពេលបច្ចុប្បន្ននេះ ពលករ-ពលការិនីកម្ពុជាដែលកំពុងស្នាក់នៅ និងបម្រើការងារនៅក្រៅប្រទេសមានចំនួន ១,១៥០,០០០នាក់ ក្នុងនោះមាននៅព្រះរាជាណាចក្រថៃ សាធារណរដ្ឋកូរ៉េ សហព័ន្ធម៉ាឡេស៊ី ព្រះរាជាណាចក្រជប៉ុន និងសាធារណរដ្ឋសិង្ហបុរី៕
ខេត្តតាកែវ ៖ លោក ខៀវ កាញារីទ្ធរដ្ឋមន្ត្រីក្រសួងព័ត៌មាន និងលោកស្រី ទេព រង្សី ព្រមទាំងមន្ត្រីក្រសួង នៅព្រឹកថ្ងៃទី០៩ ខែសីហា ឆ្នាំ២០១៧បានចុះប្រគល់ផ្ទះមួយខ្នង ដល់លោកព្រឹទ្ធភិរម្យ ប្រាជ្ញ ឈួន វីរៈសិល្បចាប៉ីដងវែង ស្ថិតនៅឃុំខ្វាវ ស្រុកទ្រាំង ខេត្តតាកែវ ។
តាមព័ត៌មានពីមន្ត្រីក្រសួងបញ្ជាក់ ផ្ទះមួយខ្នងនេះមានទទឹង៥ម៉ែត្រ បណ្ដោយ៧ម៉ែត្រ ដែលចំណាយថវិកាសាងសង់អស់ជិត១ម៉ឺន ដុល្លារនេះ ជាអំណោយផ្ទាល់របស់លោក ខៀវ កាញារីទ្ធ និងលោកស្រី។ លោករដ្ឋមន្ត្រីក៏បាននាំយកសម្ភារមួយចំនួន ប្រគល់លោកតាប្រាជ្ញ ឈួន មានថវិកា៥០០ដុល្លារ, ទូរទស្សន៍៤០អ៊ីង បំពាក់ឌីធីវី និងសម្ភារៈជាច្រើនទៀត។
លោក ខៀវ កាញារីទ្ធ នាឱកាសនោះបាននាំនូវការសាកសួរសុខទុក្ខពីសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានផ្ដាំផ្ញើឲ្យលោក តាមដានយកចិត្តទុកដាក់ដល់ លោកតា ប្រាជ្ញ ឈួន និងឲ្យបង្កើតសមាគមមនុស្សចាស់ងាយស្រួល ក្នុងការជួយពួកគាត់៕
ដោយ ៖ ប៉ែន សុផល
ខេត្តកំពង់ចាម ៖ ទុស្សេខ្សែភ្លើងឆេះផ្ទះ១ខ្នង សងអំពីឈើ ប្រក់ស័ង្កសី មានទំហំ៩,៥ម៉ែត្រ គុណនឹង ទំហុំ៩,៥ម៉ែត្រ និងខូចខាតសម្ភារ: ១ចំនួន ពេលចាស់ផ្ទះចាក់សោរទុកចោល ទៅធ្វើស្រែ នៅម៉ោង១០និង៣០នាទីព្រឹកថ្ងៃទី៩ ខែសីហា ឆ្នាំ២០១៧នៅភូមិគោករវៀង ឃុំគោករវៀង ស្រុកជើងព្រៃ ខេត្តកំពង់ចាម។
ប្រភពពីសមត្ដកិច្ចបានឲ្យដឹងថាផ្ទះដែលឆេះមានម្ចាស់ឈ្មោះឌូ ឌឿន ភេទប្រុស អាយុ៥៧ឆ្នាំ រស់នៅភូមិកើតហេតុ។ការខូចខាតមានផ្ទះ១ខ្នង ហុំ៩,៥ម៉ែត្រ គុណនឹង ទំហុំ៩,៥ម៉ែត ម៉ូតូម៉ាកសងកូរ៉េ១គ្រឿងនិងម៉ូទ័របូមទឹក១គ្រឿង ព្រមទាំងខោរអាវ ចានឆ្នាំងផងដែរ។
សាក្សីបានប្រាប់ថាមុនពេលកើតហេតុគេឃើញផ្ទះតាឌឿនចាក់សោរ(ទៅស្រែដូចសព្វដង) ស្រាប៉តែ នៅវេលាម៉ោងជាង១០ ក៏ឭសម្លេងផ្ទុះខ្ឌូងខ្ឌាំងហើយឃើញផ្សែងនិងអណ្តាតភ្លើងឆេះ ក៏ស្រែកហៅគ្នាជួយពន្លត់ តែពន្លត់មិនទាន់ ទើបឆេះអស់។
សមត្ថកិច្ចនិងអជ្ញាធរជួយប្រឹងប្រែងពន្លត់ដែរតែភ្លើនៅប្រឹងឆេះបំផ្លាញផ្ទះទាល់តែអស់។សមត្ថកិច្ចបានផ្តាំផ្ញើរឲ្យពលរដ្ឋគ្រប់រូប ត្រូវមានការប្រុងប្រយ័ត្ន មុនចាកចេញពីផ្ទះឲ្យបិតគូបភ្លើង ពន្លត់ភ្លើងចង្ក្រាន ភ្លើងទានធូប ជាមុន៕
ភ្នំពេញ ៖ បុរសជាកម្មករសំណង់ម្នាក់បានរអិលជើងធ្លាក់ពីជាន់ទី២ បែកក្បាលហូរឈាមស្រោចពេញដីស្លាប់បាត់បង់ជីវិតយ៉ាងអណោចអធម ខណៈដែលរូបគាត់ជាមួយនិងមិត្តរួមការងារចំនួន ២នាក់ទៀតបានឡើងទៅធ្វើការជួសជុលផ្ទះល្វែងមួយកន្លែងដោយខ្វះការប្រុងប្រយ័ត្ននោះ។ ហេតុការណ៍នេះបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង៨ និង១៥នាទីព្រឹកថ្ងៃទី០៩ ខែសីហា ឆ្នាំ២០១៧ នៅចំណុចផ្ទះលេខ ៩០៧ ផ្លូបបេតុង ក្នុងបុរី ៩៩៩ ភូមិវាលស្បូវ សង្កាត់វាលស្បូវ ខណ្ឌច្បារអំពៅ។
តាមព័ត៌មានពីមន្ត្រីនគរបាលបានប្រាប់ឱ្យដឹងថា បុរសរងគ្រោះមានឈ្មោះ ស៊ុត បឿត អាយុ ៣៧ឆ្នាំ មុខរបរកម្មករសំណង់ មានស្រុកកំណើតនៅភូមិព្រែកកេះ ឃុំដំណាក់កន្ទួតខាងជើង ស្រុកកំពង់ត្រាច ខេត្តកំពត។មុនពេលកើតហេតុ បុរសរងគ្រោះបានឡើងទៅធ្វើការជួសជុលផ្ទះល្វែងកើតហេតុខាងលើនៅជាន់ទី២ ជាមួយនិងមមិត្តរួមការងារចំនួន ២នាក់ទៀត ពេលនោះរូបគាត់ក៏បានកាន់ម៉ូទ័រកាត់ឈើ និងឈើចំនួន ២កំណាត់ទៅធ្វើរ៉តយោងសម្ភារៈ ក៏ស្រាប់តែរអិលជើងធ្លាក់មកក្រោមបណ្តាលអោយបែកក្បាលស្លាប់ភ្លាមៗតែម្តង។
ក្រោយពេលកើតហេតុ កម្លាំងមានសម្ថកិច្ចមូលដ្ឋាន និង ជំនាញបានចុះមកធ្វើលារត្រួតពិនិត្យ និងកោសលវិច្ច័យ នៅកន្លែងកើតហេតុបានឃើញ បុរសរងគ្រោះពិតជាស្លាប់ដោយតែការរអិលជើងធ្លាក់ពីលើជាន់ទី២ បណ្តាលអោយបែកក្បាលស្លាប់ពិតប្រាកដមែន ទើបប្រគល់អោយក្រុមគ្រួសារយកទៅធ្វើបុណ្យទៅតាមប្រពៃណីនៅឯស្រុកកំណើត៕
