វ៉ាស៊ីនតោន៖យោងតាមទីភ្នាក់ងារសារព័ត៌មាន Reuters ចេញផ្សាយមុននេះបានឲ្យថា លោក Rick Perry ត្រូវបានសភាព្រឹទ្ធសភាអាមេរិកបោះឆ្នោតអនុម័តទទួលស្គាល់ជារដ្ឋមន្ត្រីក្រសួងថាមពលរបស់ ប្រធានាធិបតីលោក ដូណាល់ ត្រាំ ជាផ្លូវការហើយ។
លោក Rick Perry ស្ថិតក្នុងវ័យ៦៦ឆ្នាំដែលបានបំពេញតួនាទីជាអភិបាលនៃរដ្ឋតិចសាស់ចាប់ពីឆ្នាំ២០០០ ដល់ឆ្នាំ២០១៥ ត្រូវបានព្រឹទ្ធសភាអាមេរិកធ្វើការបោះឆ្នោតគាំទ្រក្នុងសំឡេង៦២ ទល់នឹង៣៧សំឡេង៕
រាជធានីភ្នំពេញ៖នៅព្រឹកថ្ងៃទី០៣ ខែមីនា ឆ្នាំ២០១៧នេះព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងព្រះមាតារបស់ព្រះអង្គ សម្ដេចព្រះមហាក្សត្រី មុននិនាថ សីហនុ បានចាក់ចេញពីព្រះរាជាណាចក្រកម្ពុជាយាងទៅទីក្រុងប៉េកាំង ប្រទេសចិន ដើម្បីពិនិត្យព្រះរាជសុខភាព។
អញ្ជើញយាងព្រះរាជដំណើររបស់ព្រះមហាក្សត្រ និងព្រះមហាក្សត្រិយឡើងយន្តហោះនាព្រឹកនេះ រួមមានវត្តមាន សម្តេច សាយ ឈុំ ប្រធានព្រឹទ្ធសភា សម្តេច ហេង សំរិន ប្រធានរដ្ឋសភា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ព្រមទាំងមន្ត្រីជាន់ខ្ពស់រាជរដ្ឋា ភិបាលកម្ពុជា និង ព្រះញាតិវង្សានុវង្សជាច្រើនអង្គទៀត។
សូមបញ្ជាក់ថា ព្រះមហាក្សត្រខ្មែរ និងសម្តេចព្រះមហាក្សត្រិយ តែងតែយាងទៅពិនិត្យព្រះរាជសុខភាពយ៉ាងទៀងទាត់នៅទីក្រុងប៉េកាំង ប្រទេសចិន គឺក្នុងមួយឆ្នាំពីរដង។ ការយាងចេញទៅពិនិត្យព្រះរាជសុខភាពលើកនេះ មិនទាន់មានការបញ្ជាក់ព័ត៌មានថា ព្រះអង្គទាំងទ្វេ នឹងយាងត្រឡប់មកកម្ពុជាវិញនាពេលណានោះទេ។
ក្នុងអំឡុងព្រះអវត្តមានព្រះមហាក្សត្រខ្មែរនេះ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នឹងទទួលភារៈជាប្រមុខរដ្ឋស្តីទី ដើម្បីធ្វើការសម្រេចលើការងារផ្សេងៗជំនួសព្រះមហាក្សត្រខ្មែរ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី៕
ម៉ាឡេស៊ី៖ទីភ្នាក់ងារព័ត៌មានរដ្ឋម៉ាឡេស៊ី Bernama បានចុះផ្សាយថា ម៉ាឡេស៊ីសម្រេចលុបចោលទិដ្ឋការមិនបង់ប្រាក់ឲ្យប្រជាពលរដ្ឋកូរ៉េខាងជើងចូលក្នុងប្រទេសម៉ាឡេស៊ី ដែលអនុញ្ញាតកាលពីពេលកន្លងទៅ ដោយសារបញ្ហាទាក់ទងនឹងជម្លោះនៃការសម្លាប់បងប្រុសលោក គីម ជុងអ៊ុន។
ឧបនាយករដ្ឋមន្ត្រីរបស់ម៉ាឡេស៊ី លោក Ahmad Zahid Hamidi បានថ្លែងថា គម្រោងនៃការលុបចោលទិដ្ឋការមិនគិតថ្លៃដល់ប្រជាពលរដ្ឋកូរ៉េខាងជើងនេះ នឹងចាប់ផ្តើមពីថ្ងៃទី៦ខែមីនា ព្រោះហេតុផលដើម្បីពង្រឹងសន្តិសុខរបស់ជាតិ។
ការប្រកាសនេះធ្វើឡើងបន្ទាប់ពីមានការខ្វែងគំនិត និងមានជម្លោះពាក្យសម្តីខ្លាំងរវាងកូរ៉េខាងជើង និង ម៉ាឡេស៊ីជុំវិញករណីឃាត់កម្មសម្លាប់លោក គីម ជុងណាម បងប្រុសលោកគីមជុង អ៊ុន នៅក្នុងព្រលានយន្តហោះម៉ាឡេស៊ីកាលពីថ្ងៃទី១៣ខែកុម្ភៈ។ ជុំវិញករណីឃាតកម្មនេះ កូរ៉េខាងត្បូង និងអាមេរិកអះអាងថា ឃាតកម្មនោះបង្កឡើងដោយរដ្ឋអំណាចកូរ៉េខាងជើងដោយខ្លួនឯង៕
រាជធានីភ្នំពេញ៖ចៅក្រមសាលាដំបូងរាជធានីភ្នំពេញ លោក ពេជ្រ វិជ្ជាធរ បានសម្រេចឃុំខ្លួនបណ្តោះអាសន្ន មន្ត្រីសាលារាជធានីភ្នំពេញ២នាក់ ដែល ACU ឃាត់ខ្លួនករណីពុករលួយ នៅល្ងាចថ្ងៃទី០២ ខែមីនា ឆ្នាំ២០១៧ម្សិលមិញនេះ ដោយចោទប្រកាន់ពីបទវិតិក្រម តាមមាត្រា៥៩២ និង៥៩៣នៃក្រមព្រហ្មទណ្ឌ និងមាត្រា៣២ ច្បាប់ស្តីពីការប្រឆាំងអំពើពុករលួយ។ នេះបើយោងតាមការឲ្យដឹងពីអ្នកនាំពាក្យសាលាដំបូងរាជធានីភ្នំពេញ លោក លី សុផាណា ។
ការប្រកាសសម្រេចឃុំខ្លួនបណ្តោះអាសន្ននាពេលនេះ បានធ្វើឡើងក្រោយពីមន្ត្រីតុលាការ បានបំពេញនីតិវិធីសាកសួរ មន្ត្រីសាលារាជធានីភ្នំពេញទាំង២នាក់ ចំនួន២លើករួមមកហើយ ពោលគឺលើកទី១ នៅថ្ងៃទី០១ ខែមីនា និងលើកទី២ នៅថ្ងៃទី០២ ខែមីនា ឆ្នាំ២០១៧នេះ។
គួរបញ្ជាក់ថា មន្ត្រីសាលារាជធានីភ្នំពេញ២នាក់នោះ រួមមានទី១.ឈ្មោះ រ័ត្ន បុរី មុខងារប្រធានការិយាល័យវិនិយោគសាលារាជធានីភ្នំពេញ និងទី២. ឈ្មោះ ម៉ៃ វ៉ាន់ណារុំ មុខងារបុគ្គលិកការិយាល័យវិនិយោគសាលារាជធានីភ្នំពេញ៕
ខេត្ដស្ទឹងត្រែង៖មន្ដ្រីយោធាការពារព្រំដែនកម្ពុជា បានរាយការណ៍ថា ទាហានឡាវចំនួន៥៥នាក់ ដែលបានដាក់ពង្រាយនៅលើទឹកដីកម្ពុជាបានដកថយទៅវិញយ៉ាងស្ងាត់ៗ ដោយបន្សល់ទុករណ្តៅត្រង់លេណដ្ឋានចំនួន៣៣នៅលើដីកម្ពុជា និងក្រដាសផែនទីគូសរៀបរាប់ពីគោលដៅយុទ្ធសាស្ត្ររបស់ខ្លួន ។ ដោយឡែក ទាហានឡាវនៅតាមខ្សែបន្ទាត់ព្រំដែនលើដីរបស់ខ្លួន នៅបន្តឈរជើងត្រៀមរារាំងដដែលទេ។
សូមជម្រាបថា បន្ទាប់បីមានការរារាំងពីកងទ័ពភាគីឡាវរឿងស្ថាបនាផ្លូវតាមព្រំដែននោះមកភាគីទាំង២បានជួបគ្នារកដំណោះស្រាយពីបញ្ហាព្រំដែន កាលពីថ្ងៃទី២៧ ខែកុម្ភៈ នៅសេពៀន ក្នុងទឹកដីឡាវ ដែលភាគីកម្ពុជាតំណាងដោយលោក ដួង ពៅ អភិបាលរងខេត្ត រួមជាមួយមេបញ្ជាការរងតំបន់ប្រតិបត្តិការសឹងរងស្ទឹងត្រែង និងកងកម្លាំងមួយចំនួនទៀត ដោយឡែកភាគីឡាវតំណាងដោយអាជ្ញាធរខេត្តអត្តពឺ ។
នៅក្នុងជំនួបនោះ អាជ្ញាធរ និងទាហានឡាវបានស្នើឱ្យកម្ពុជាបញ្ឈប់ការឈូសឆាយរង់ចាំជជែកគ្នាបន្ត តែភាគីកម្ពុជាឆ្លើយតបថា កម្ពុជាមិនអាចបញ្ឈប់បានទេព្រោះការស្ថាបនាផ្លូវយុទ្ធសាស្ត្រក្រវាត់ព្រំដែនគឺស្ថិតនៅលើទឹកដីកម្ពុជា ។
ទោះជាយ៉ាងណា ជំនួបនោះមិនបានលទ្ធផលល្អប្រសើរឡើយ តែបច្ចុប្បន្នស្ថានការណ៍បញ្ហាព្រំដែនបានស្ងប់ស្ងាត់បន្តិច ខណៈទាហានឡាវបានដកចេញពីដីកម្ពុជា ឯទាហានកម្ពុជាបន្តការពារបូរណទឹកកម្ពុជាតាមបន្ទាត់ព្រំដែនដដែល៕
បាល់ទាត់៖FFC បានប្រកាសសមាសភាពគ្រូបង្វឹកថ្មីរបស់ក្រុមបាល់ទាត់ជម្រើសជាតិកម្ពុ គឺលោក ឡេអូណាដូ ល្វីស អតីតគ្រូបង្គោលរបស់ក្លឹបឡាវ LANEXANG UNITED មកជំនួសតំណែងលោក Lee Tae Hoon ផ្លូវការហើយ។
ការតែងតាំងគ្រូបង្វឹកថ្មីនេះបានធ្វើឡើងក្នុងសន្និសីទសារព័ត៌មាន នារសៀលថ្ងៃទី២ ខែមីនា ឆ្នាំ២០១៧នេះនៅសណ្ឋាគារភ្នំពេញ។
សូមជម្រាបថា គ្រូបង្វឹកសញ្ជាតិប្រេស៊ីលវ័យ៤៤ ឆ្នាំនេះ ធ្លាប់បានដឹកនាំ Buriram United របស់ប្រទេសថៃនៅឆ្នាំ២០១៤ រហូតដល់ឆ្នាំ២០១៦ មុននឹងប្តូរមកដឹកនាំក្លឹប Lanexang United វិញក្នុងអំឡុងខែឧសភា ឆ្នាំ២០១៦៕
ភ្នំពេញ៖បុរសម្នាក់ជាបុគ្គលិកគ្រឹះស្ថានមីក្រូហិរញ្ញវត្ថុអភិវឌ្ឍជំនាន់ថ្មីហៅកាត់”NPG”ត្រូវបានចោរ១កហរុមធ្វើសកម្មភាពឆក់យកកាបូបលុយអស់ជាង១ម៉ឺននដុល្លាររួមជាមួយឯកសារមួយចំនួនទៀតផងដែរ។ កាលពីវេលាម៉ោង៣ និង៣០នាទីរសៀលថ្ងៃទី២ខែមីនាឆ្នាំ២០១៧ ក្នុងខណៈពេលកំពុងឈប់នោមតាមមហាវិថីសហព័ន្ធរុស្ស៊ី ស្ថិតនៅក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ។
ជនរងគ្រោះខាងលើឈ្មោះ ចន ចំរើន អាយុ៣០ឆ្នាំជាបុគ្គលិកគ្រឹះស្ថានមីក្រូហិរញ្ញវត្ថុ”NPG”ដែលមានស្នាក់នៅក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។នៅក្នុងកាបូបនោះមានលុយជាង១ម៉ឺនដុល្លារ ប្លង់ដីចំនួន៣ច្បាប់ កាតគ្រីរថយន្ត១សន្លឹក និងកាតគ្រីម៉ូតូ១សន្លឹក។
បុរសរងគ្រោះបានឲ្យដឹងថា នៅមុនពេលកើតហេតុខ្លួនបានឈប់ម៉ូតូបត់ជើងតូច ដោយបានដាក់កាបូបនៅលើរានកណ្ដាលម៉ូតូ ហើយនៅក្នុងខណៈពេលកំពុងនោម ស្រាប់តែមានជនសង្ស័យជិះម៉ូតូទៅជិត ធ្វើសកម្មភាពឆក់យកកាបូបទៅបាត់។ប៉ុន្តែពេលនោះខ្លួនមិនបានដឹងថាចោរនានគ្នាប៉ុន្មាននាក់ហើយជិះម៉ូតូម៉ាកអ្វីនោះឡើយ ព្រោះក្រោពេលនោមរួចមើលទៅម៉ូតូស្រាប់តែបាត់កាបូបទើប ធ្វើដំណើរទៅប្ដឹងនគរបាលឲ្យជួយអន្តរាគមន៏តែម្ដង៕
ហ្វីលីពីន៖សភាហ្វីលីពីនបានអនុម័តសំណើមួយកាលពីថ្ងៃពុធក្នុងការយកទោសប្រហារជីវិតមកប្រើវិញដែលនេះជាការត្រួសត្រាយផ្លូវសម្រាប់ការយកទោសនេះមកប្រើវិញក្នុងរយៈពេលជាងមួយទសវត្សរ៍មកនេះបន្ទាប់ពីវាត្រូវបានលុបចោល។
សេចក្តីព្រាងច្បាប់នេះដែលនឹងអនុញ្ញាតជាចម្បងឲ្យបទល្មើសទាក់ទងនឹងគ្រឿងញៀនត្រូវផ្តន្ទាទោសប្រហារជីវិតនោះគឺបានឆ្លុះបញ្ចាំងពីការសន្យានៃយុទ្ធនាការរបស់លោកប្រធានាធិបតី Rodrigo Duterte ក្នុងការបញ្ចប់ឧក្រិដ្ឋកម្មនិងអំពើពុករលួយ។
ចាប់តាំងពីពេលលោក Duterte ចូលកាន់តំណែងក្នុងខែមិថុនាឆ្នាំមុនមក មនុស្សរាប់ពាន់នាក់ដែលគេសង្ស័យថាជាអ្នកញៀនថ្នាំឬអ្នកចែកចាយត្រូវបានសម្លាប់ដោយមន្ត្រីប៉ូលិសឬអ្នកការពារច្បាប់ដែលជាផ្នែកមួយនៃការសន្យានោះ។
ដើម្បីក្លាយទៅជាច្បាប់មួយ សេចក្តីព្រាងច្បាប់ប្រហារជីវិតនេះត្រូវតែប្រឈមនឹងការបកស្រាយលើកទីបីនៅក្នុងសភាដែលគ្រប់គ្រងដោយសម្ព័ន្ធភាពរបស់លោកប្រធានាធិបតីមុនពេលឆ្លងទៅព្រឹទ្ធសភាដែលក៏គ្រប់គ្រងដោយអ្នកជិតស្និទ្ធិនឹងលោក Duterte ដូចគ្នា។ បន្ទាប់មក សេចក្តីព្រាងច្បាប់នេះនឹងត្រូវចុះហត្ថលេខាដោយប្រធានាធិបតី។
ក្រោមសំណើនេះ ឧក្រិដ្ឋកម្មដែលគេចាត់ទុកថាសាហាវយង់ឃ្នងនឹងត្រូវទទួលទោសប្រហារជីវិត។ ទាំងនោះរួមមានទម្រង់មួយចំនួននៃការចាប់រំលោភនិងសម្លាប់ព្រមទាំងបទល្មើសគ្រឿងញៀននានាដូចជាការនាំចូល លក់ ផលិត នាំយកនិងចែកចាយគ្រឿងញៀន។
ការកាន់កាប់គ្រឿងញៀននឹងត្រូវជាប់ពន្ធនាគារអស់មួយជីវិត។បើយោងតាមសេចក្តីព្រាងច្បាប់នេះបានឲ្យដឹងថា ការផ្តន្ទាទោសប្រហារជីវិតនឹងជាធម្មតាត្រូវបានអនុវត្តដោយការព្យួរក ការបាញ់ប្រហារឬការចាក់ថ្នាំផ្តាច់ជីវិត។នៅពេលដែលវិធានការនេះទៅដល់ព្រឹទ្ធសភា សមាជិកសភាត្រូវបានគេរំពឹងថានឹងត្រូវរង់ចាំការសម្រេចរបស់ក្រសួងយុត្តិធម៌ថាតើវាផ្ទុយពីការប្តេជ្ញាចិត្តរបស់ប្រទេសនេះចំពោះអនុសញ្ញាអន្តរជាតិដែរឬក៏អត់។
គួរបញ្ជាក់ថា ទោសប្រហារជីវិតត្រូវបានលុបបំបាត់ក្នុងឆ្នាំ១៩៨៧ប៉ុន្តែលោកប្រធានាធិបតី Fidel Ramos បានយកវាមកប្រើវិញនៅក្នុងឆ្នាំ១៩៩៣ដោយលើកឡើងពី “ការគ្រប់គ្រងបទល្មើស”។ ប្រធានាធិបតី Gloria Macapagal Arroyo បានផ្អាកទោសប្រហារជីវិតក្នុងឆ្នាំ២០០៦៕
ដោយ៖ប៉ែន សុផល
បាត់ដំបង៖រយៈពេល១ខែកុម្ភៈមកនេះអាជ្ញាធរថៃបានបញ្ជូនពលករខ្មែរដែលឆ្លងដែនខុសច្បាប់មកស្រុកកំណើតវិញ៤០០០នាក់តាមច្រកទ្វារអន្តរជាតិដូង ស្រុកកំរៀង។
យោងតាមការបញ្ជាក់ពីលោកប្រធានច្រកអន្តរជាតិដូង នៃស្រុកកំរៀងបានអោយដឹងនៅរសៀលថ្ងៃទី២ ខែមីនា នេះថា ក្នុងរយៈពេល២ថ្ងៃ ចាប់ពីថ្ងៃទី១រហូតដល់ថ្ងៃទី២ ខែមីនាឆ្នាំ២០១៧នេះសមត្ថកិច្ចថៃបានបញ្ជូនពលករខ្មែរឆ្លងដែនខុសច្បាប់មានចំនួនប្រហែល២០០០នាក់ ហើយបើគិតចាប់ពីដើមខែចុងខែកុម្ភៈ ឆ្នាំ២០១៧កន្លងមកនេះមានពលករខ្មែរចំនួន ៤០០០នាក់ហើយដែលអាជ្ញាធរ និងទាហានថៃបានបញ្ជូនអោយត្រឡប់មកកាន់ស្រុកកំណើតវិញដោយសារតែពលករខ្មែរទាំងនោះបានឆ្លងដែនចូលក្នុងទឹកដីថៃដោយខុសច្បាប់។
លោកបន្តថា ពលករខ្មែរដែលធ្វើចំណាកស្រុកខុសច្បាប់នេះភាគច្រើនជាបុរសដែលពួកគេបានធ្វើដំណើរពីតាមបណ្តាខេត្តនានាពិសេសប្រជាពលរដ្ឋដែលរស់នៅតាមតំបន់បណ្តោយព្រំដែនកម្ពុជា ថៃតែម្តង៕
បារាំង៖លោក ហ្វ្រង់ស័រ ហ្វីយ៉ុង ដែលជាបេក្ខជនប្រធានាធិបតីបារាំង បានបញ្ជាក់នៅក្នុងសន្និសីទសារព័ត៌មាននៅថ្ងៃពុធម្សិលមិញថា តុលាការនឹងចោទប្រកាន់រូបលោក នៅថ្ងៃទី១៥មីនាខាងមុខនេះពាក់ព័ន្ធរឿងអាស្រូវកេងបន្លំលុយរដ្ឋជាង១លានអឺរូ។
ទោះបីយ៉ាងណាបេក្ខជនមកពីគណបក្សស្តាំ និងកណ្តាលនិយមរូបនេះនៅតែអះអាងលោកស្អាតស្អំ និងមិនព្រមដកខ្លួនចេញពីសៃង្វៀនប្រកួត ដណ្តើមតំណែងប្រធានាធិបតីបារាំង ដែលនឹងត្រូវប្រព្រឹត្តទៅនាខែមេសា និងឧសភាខាងមុខនេះ។ ការប្រកាសនេះផ្ទុយស្រឡះនឹងការអះអាងកន្លងមករបស់លោកហ្វីយ៉ុង ដែលថា លោកនឹងដកខ្លួនចេញភ្លាម បើសិនលោករងការចោទប្រកាន់ពីតុលាការ។
នៅថ្ងៃសុក្រចៅក្រមស៊ើបអង្កេត បីរូបត្រូវបានតែងតាំង នៅក្រោយអយ្យការផ្នែកហិរញ្ញវត្ថុរបស់បារាំងបានបញ្ជូនបន្តឲ្យស៊ើបអង្កេត សំណុំរឿងកេងលុយរដ្ឋរបស់លោកហ្វីយ៉ុង។ នៅថ្ងៃពុធម្សិលមិញ លោកហ្វ្រង់ស័រ ហ្វីយ៉ុង បានអះអាងខ្លួនលោកនឹងខ្លួន ទៅតាមការកោះហៅរបស់តុលាការ ដែលលោកចាត់ទុកថា មិនយុត្តិធម៌ និងថា កំពុងសម្លាប់មិនត្រឹមរូបលោក ប៉ុន្តែកំពុងសម្លាប់ផងដែរ ការបោះឆ្នោតប្រធានាធិបតីបារាំងទាំងមូល ព្រោះថា នីតិវិធីធ្វើឡើងនៅតែប៉ុន្មានសប្តាហ៍ប៉ុណ្ណោះ មុនការបោះឆ្នោត៕
រាជធានីភ្នំពេញ៖នៅព្រឹកនេះសមត្ថកិច្ចបាននាំខ្លួន មន្ត្រីសាលារាជធានីភ្នំពេញ២នាក់ ដែល ACU ឃាត់ខ្លួនករណីពុករលួយ មកតុលាការសារជាថ្មីដើម្បីបន្តការសាកសួរ ។
សូមជម្រាបថា មន្ត្រីសាលារាជធានីភ្នំពេញ២នាក់នេះ ត្រូវបានអង្គភាពប្រឆាំងអំពើពុករលួយឃាត់ខ្លួន បញ្ជូនទៅដល់សាលាដំបូងរាជធានីភ្នំពេញ នៅល្ងាចថ្ងៃទី០១ ខែមីនា ឆ្នាំ២០១៧នេះ ពាក់ព័ន្ធនឹងករណីប្រព្រឹត្តអំពើពុករលួយ ហើយព្រឹកនេះបន្តការសាកសួរបន្តទៀត។ នេះបើតាមការបញ្ជាក់របស់មន្ត្រីតុលាការក្រុងភ្នំពេញ។ មន្ត្រីទាំង២នាក់នោះគឺ ទី១.ឈ្មោះ រ័ត្ន បុរី មុខងារប្រធានការិយាល័យវិនិយោគសាលារាជធានីភ្នំពេញ និងទី២. ឈ្មោះ ម៉ៃ វ៉ាន់ណារុំ មុខងារបុគ្គលិកការិយាល័យវិនិយោគសាលារាជធានីភ្នំពេញ៕
រាជធានីភ្នំពេញ៖លោក កឹម សុខា បានឡើងកាន់តំណែងប្រធានគណបក្សសង្គ្រោះជាតិជាផ្លូវការហើយ នៅព្រឹកនេះ បន្ទាប់ពីសមាជិកជាច្រើនបោះឆ្នោតគាំទ្រនៅក្នុង សមាជសមាជវិសាមញ្ញ នៅប៉ុន្មាននាទីមុននេះ។ ចំណែក លោក ប៉ុល ហំម លោកស្រី មូរ សុខហួរ និង លោក អេង ឆៃអ៊ាង ត្រូវបានសមាជបោះឆ្នោតគាំទ្រឱ្យធ្វើជាអនុប្រធានគណបក្សប្រឆាំងផងដែរ៕
រាជធានីភ្នំពេញ៖ដូចការគ្រោងទុកនៅព្រឹកនេះ គណបក្សសង្គ្រោះជាតិ បានបើកសមាជវិសាមញ្ញ ដ៏ធំមួយដើម្បីបោះឆ្នោត ជ្រើសរើសប្រធាន និងអនុប្រធាន គណបក្ស ឈានទៅរៀបចំ រចនាសម្ព័ន្ធដឹកនាំ បក្សជាថ្មី។
សូមរំលឹកថា កិច្ចប្រជុំគណៈកម្មាធិការ នាយកគណបក្សសង្គ្រោះជាតិ កាលពីថ្ងៃទី១ មីនា បានបោះឆ្នោត គាំទ្របេក្ខភាព លោក កឹម សុខា ជាប្រធានគណបក្ស ,លោកស្រី មូរ សុខហួរ ,លោក ប៉ុល ហំម ,និងលោក អេង ឆៃអ៊ាងជាអនុប្រធាន៕
ម៉ាឡេស៊ី៖តាមច្បាប់របស់ម៉ាឡេស៊ី ករណីសម្លាប់នេះ ស្ត្រីពីរនាក់ដែលម្នាក់ជាជនជាតិវៀតណាម និងម្នាក់ទៀតជាជនជាតិឥណ្ឌូនេស៊ីដែលត្រូវបានតុលាការម៉ាឡេស៊ីចោទប្រកាន់ថា ពាក់ព័ន្ធករណីសម្លាប់លោក គីម ជុងណា អាចនឹងត្រូវទទួលទោសដល់ថ្នាក់ប្រហារជីវិត។
តាមការចុះផ្សាយរបស់សារព័ត៌មាន BBC បានឲ្យដឹងថា ស្ត្រីទាំងពីរនោះគឺម្នាក់ឈ្មោះ Doan Thi Huongជាជនជាតិវៀតណាម និងម្នាក់ទៀតឈ្មោះ Siti Aisyah ជាជនជាតិឥណ្ឌូនេស៊ី រងការចោទថា យកសារធាតុពុល VX ប៉ាតលើមុខលោក គីម ជុងណាម នៅក្នុងព្រលានយន្តហោះម៉ាឡេស៊ី ហើយបានបណ្តាលឲ្យលោក គីម ជុងណាម ស្លាប់កាលពីថ្ងៃទី១៣ ខែកុម្ភៈ៕
វៀតណាម៖អ្នកនាំពាក្យក្រសួងការបរទេសវៀតណាមលោក Le Hai Binh ថ្លែងថា ចិនបានធ្វើសកម្មភាពជាឯកតោភាគីជាច្រើនដែលបំពានដល់ដែនអធិបតេយ្យភាពវៀតណាម ដែលផ្ទុយពីខ្លឹមសារច្បាប់អន្តរជាតិ តាមរយៈការហាមមិនឲ្យអ្នកនេសាទវៀតណាមចូលនេសាទនៅតំបន់ដែលកំពុងមានជម្លោះរួមមាននៅជិតប្រជុំកោះប៉ារ៉ាសែលដែលវៀតណាមថាជារបស់ខ្លួន ប៉ុន្តែពេលនេះ ចិនកំពុងគ្រប់គ្រង។
ជាមួយគ្នានេះរដ្ឋាភិបាលវៀតណាមបានចោទថា ករណីចិនហាមការនេសាទនោះ គឺជាផ្នែកមួយនៃការបង្កជម្លោះនៅសមុទ្រចិនខាងត្បូង ដែលរំលោភបំពានលើដែនអធិបតេយ្យភាពរបស់វៀតណាមនិងធ្វើឲ្យបញ្ហាកាន់តែស្មុគស្មាញបន្ថែមខ្លាំងទៀត។ ទន្ទឹមនោះក្រសួងការបរទេសវៀតណាមបានចេញសេចក្តីថ្លែងការណ៍ថា វៀតណាមប្រឆាំង និងបំរាមនោះ។
អ្នកនាំពាក្យរូបនេះបញ្ជាក់ថា វៀតណាម មានហេតុផលផ្លូវច្បាប់ និងភស្តុតាងប្រវត្តិសាស្ត្រគ្រប់គ្រាន់បញ្ជាក់ថា ទីនោះជាកម្មសិទ្ធិរបស់វៀតណាម។ នេះបើតាមទីភ្នាក់ងារព័ត៌មានAP៕
