ខេត្តរតនគិរី៖សមត្ថកិច្ចស្រុកកូនមុំបានធ្វើការឃាត់ខ្លួនឪពុកចុងចិត្តតិរច្ឆានម្នាក់ បន្ទាប់ធ្វើសកម្មភាពចាប់រំលោភកូនស្រីអាយុ១១ឆ្នាំ ដែលរកណីចាប់រំលោភនេះបានប្រព្រឹត្តឡើងនៅវេលាម៉ោង៤ និង៣០នាទីល្ងាចថ្ងៃទី២៦ ខែកុម្ភៈ ឆ្នាំ២០១៧ ស្ថិតនៅភូមិ១ ឃុំត្រពាំងច្រេស ស្រុកកូនមុំ ខេត្តរតនគិរី។
ប្រភពពីនគរបាលស្រុកកូនមុំបានអោយដឹងថា ក្មេងស្រីរងគ្រោះឈ្មោះ ញ.ស.ខ អាយុ១១ឆ្នាំ ជនជាតិខ្មែរ ត្រូវជាកូនចុងជនសង្ស័យឈ្មោះ រុំ វិត ភេទប្រុស អាយុ៣០ឆ្នាំ ជនជាតិខ្មែរ មានទីលំនៅភូមិ១ ឃុំត្រពាំងច្រេស ស្រុកកូនមុំ ខេត្តរតនគិរី។
បច្ចុប្បន្ននគរបាលបានឃាត់ខ្លួននៅអធិការដ្ឋានស្រុកកូនមុំ កំពុងធ្វើសំណុំបែបបទបញ្ជូនទៅតុលាការចាត់ការបន្តតាមនីតិវិធីច្បាប់៕
រាជធានីភ្នំពេញ៖នៅព្រឹកថ្ងៃទី២៧ ខែកុម្ភៈ ឆ្នាំ២០១៧នេះ សាលាឧទ្ធរណ៍បានកំណត់ឲ្យមានទោសលើស្ត្រីបឹងកក់៤នាក់តាមសាលក្រមសាលាដំបូងរាជធានីភ្នំពេញ ដដែលពាក់ព័ន្ធបទល្មើស «ជេរប្រមាថអ្នករាជការសាធារណៈ និងបទប្រឆាំងនឹងអ្នករាជការសាធារណៈមានស្ថានទម្ងន់ទោស»។
គួរបញ្ជាក់ថា ជនជាប់ចោទទាំ៤នាក់រួមមាន៖ ឈ្មោះ ទេព វន្នី ,ឈ្មោះ បូ ឆវី, ឈ្មោះ គង់ ចន្ថា និងឈ្មោះ ហេង មុំ ត្រូវបានសាលាដំបូងរាជធានីភ្នំពេញផ្តន្ទាទោសដាក់ពន្ធនាគាររយៈពេល៦ខែ បន្ទាប់ពីពួកគេបានជេរប្រមាថ និងប្រឆាំងនឹងអាជ្ញាធរសាលារាជធានីភ្នំពេញ កាលពីចុងឆ្នាំ២០១១ ខណៈដែលពួកគេបានដាក់ញត្តិទៅដាក់នៅស្ថាប័ននេះ ដើម្បីសំណូមពរជួយដោះស្រាយបញ្ហាដីធ្លី៕
ម៉ាឡេស៊ី៖អាជ្ញាធរម៉ាឡេស៊ីបាននិយាយថា ស្ត្រីឥណ្ឌូណេស៊ី និងវៀតណាម ដែលជាប់សង្ស័យបាញ់សារធាតុពុលសម្លាប់លោក គីម ជុងណាម អះអាងថា រូបនាងត្រូវបានគេជួលក្នុងតម្លៃលុយ៩០ដុល្លារ ដោយពួកគេមិនស្គាល់លោក គីម ជុងណាម និងគិតស្មានថា បានចូលរួមសំដែងក្នុងកម្មវិធីកំសាន្តរបស់ទូរទស្សន៍។
រដ្ឋមន្ត្រីក្រសួងសុខាភិបាលម៉ាឡេស៊ីបាននិយាយថា លោក គីម ជុងណាមបានស្លាប់ យ៉ាងវេទនា នៅ២០នាទីក្រោយរងសារធាតុពុល VX ដែលជាអាវុធគីមីសម្លាប់មនុស្សដ៏កាចសាហាវ និងដែលហាមបិទខ្ទប់ដោយអង្គការសហប្រជាជាតិ។
តាមរូបភាពវីដេអូរបស់កាម៉េរ៉ាសុវត្ថិភាពនៅព្រលានយន្តហោះគូឡាឡាំពួរបានបង្ហាញថា លោក គីម ជុងណាម ដែលកំពុងរង់ចាំប្តូរយន្តហោះ ទៅម៉ាកាវ ត្រូវបានស្ត្រីពីររូប បាញ់វត្ថុរាវនៅលើមុខ។ គីម ជុងណាមបានដាក់ខ្យល់ស្លាប់ក្នុងរថយន្ត ដឹកទៅមន្ទីរពេទ្យនៅគូឡាំឡាំពួរ។
ដោយលែកការបកស្រាយរបស់ជនសង្ស័យស្ត្រីទាំងពីរ ផ្ទុយស្រឡះ រូបភាពវីដេអូ និងការអះអាងរបស់ប៉ូលិសម៉ាឡេស៊ី ដែលបាននិយាយប្រាប់អ្នកកាសែតថា ស្ត្រីទាំងពីរបានស្គាល់ច្បាស់ពីគ្រោះថ្នាក់នៃវត្ថុរាវ ព្រោះថា នៅក្រោយបាញ់ទៅលើមុខ គីម ជុងណាម ស្ត្រីម្នាក់បានរត់ទៅលាងដៃ នៅក្នុងបន្ទប់ទឹកក្នុងព្រលានយន្តហោះ។ តាមប៉ូលិស ស្ត្រីជាប់សង្ស័យម្នាក់ក្អួតចង្អោរដោយសារឥទ្ធិពលសារធាតុគីមី ក្នុងពេលមន្ត្រីទូតឥណ្ឌូណេស៊ី និងវៀតណាមបញ្ជាក់រៀងៗខ្លួនជនជាតិរបស់ខ្លួន មានសុខភាពល្អក្នុងមន្ទីរឃុំខ្លួនរបស់ប៉ូលិស។
គួរបញ្ជាក់ថា ក្រៅតែពីចាប់ឃុំខ្លួនជនសង្ស័យស្ត្រីពីររូប និងជនជាតិកូរ៉េខាជើងម្នាក់ ប៉ូលិសម៉ាឡេស៊ីកំពុងតាមរកចាប់ជនសង្ស័យ៧រូបផ្សេងទៀត ដែលទាំងអស់គ្នាសុទ្ធតែជាជនជាតិកូរ៉េខាងជើង។ ជាមួយគ្នានេះមេប៉ូលិសម៉ាឡេស៊ី បានប្រកាសពីបំណងចង់ឲ្យមានដីកាចាប់ខ្លួន មន្ត្រីជាន់ខ្ពស់របស់ទូតកូរ៉េខាងជើង នៅម៉ាឡេស៊ី ដែលគេជឿថា មានជាប់ពាក់ព័ន្ធក្នុងការប្រព្រឹត្តឃាតកម្មលើលោក គីម ជុងណាម ផងដែរ៕
រាជធានីភ្នំពេញ៖មន្ត្រីជាន់ខ្ពស់គណបក្សសង្គ្រោះជាតិ ដែលសុំមិនឲ្យបញ្ចេញឈ្មោះបានខ្សឹបប្រាប់ថា មានបេក្ខភាពយ៉ាងតិច២រូបសម្រាប់តំណែងប្រធានគណបក្សសម្រាប់ដាក់ជូនសមាជអនុម័តជ្រើសរើសជាប្រធានគណបក្ស គ្រាដែលសមាជនោះគ្រាងបើកជាផ្លូវការនៅថ្ងៃទី២ ខែមិនា ឆ្នាំ២០១៧ ខាងមុខនេះនៅទីស្នាក់ការកណ្តាលគណបក្សសង្គ្រោះជាតិ។
យោងតាមការឲ្យដឹងរបស់មន្ត្រីជាន់ខ្ពស់គណបក្សសង្គ្រោះជាតិរូបនោះបញ្ជាក់ថា បេក្ខភាពទាំង២រូបនោះគឺ លោក កឹម សុខា និង អ្នកស្រី ជូឡុង ស៊ូម៉ារ៉ា ដែលនិងត្រូវប្រកួតប្រជែងធ្វើជាប្រធានគណបក្សសង្គ្រោះជាតិជំនួសលោក សម រង្ស៊ី ដែលបានលាលែងការពីពេលថ្មីៗនេះ។
ចំណែក បេក្ខភាពអនុប្រធានគណបក្សរួមមានលោក គង់ គាំ លោក យឹម សុវណ្ណ លោក ប៉ុល ហំម ប៉ុន្តែបេក្ខភាពនេះមិនទាន់សម្រេចជាផ្លូវការនៅឡើយទេ ព្រោះនៅមានការប្រទាញប្រទង់គ្នារវាងអ្នកគាំទ្រលោក សម រង្ស៊ី និងលោក កឹម សុខា៕
ខេត្តពោធិ៍សាត់៖បុរសពោះម៉ាយល្មោភកាមម្នាក់ត្រូវសមត្ថកិច្ចឃាត់ខ្លួនតាមពាក្យបណ្តឹងនារីរងគ្រោះ ករណីចាប់រំលោភរហូតបានសម្រេច ដែលការឃាត់ខ្លួននេះធ្វើឡើងកាលពីថ្ងៃទី២៣ ខែកុម្ភៈ ឆ្នាំ២០១៧ នៅភូមិកំពង់ប្រាក់ ឃុំស្នារអន្សា ស្រុកក្រគរ ខេត្តពោធិសាត់។ បុរសល្មោភកាមមានឈ្មោះ អ៊ឹម កុសល ភេទប្រុស អាយុ៣៥ឆ្នាំ ចំណែកឯនារីរងគ្រោះអាយុ២១ឆ្នាំ ហើយអ្នកទាំង២រស់នៅក្នុងភូមិ-ឃុំកើតហេតុខាងលើ។
ប្រភពព័ត៌មានបានឲ្យដឹងថា កាលពីយប់ថ្ងៃទី២០ ខែកុម្ភៈ នារីរងគ្រោះបានអុំទូកទៅបត់ជើងធំនៅព្រៃលិចទឹកក្រោយផ្ទះ ខណៈកំពុងតែបត់ជើង ស្រាប់តែជនសង្ស័យបានមកចាប់នាងក្រៀកឡើងលើកាណូត បន្ទាប់មកធ្វើសកម្មភាពចាប់រំលោភនាងរហូតបានសម្រេចតែម្តង។ ក្រោយពីចាប់រំលោភនាងរួច ជនសង្ស័យបានគំរាមនាងមិនឲ្យប្រាប់អ្នកណា ហើយក៏បើកកាណូតទៅបាត់តែម្តង។ ដោយសារតែខ្លាចជនសង្ស័យ ទើបនារីរងគ្រោះមិនហ៊ានប្រាប់អ្នកណា រហូតដល់ថ្ងៃទី២៣ ខែកុម្ភៈ ទើបនាងដាច់ចិត្តដាក់ពាក្យបណ្តឹង ហើយសមត្ថកិច្ចក៏ធ្វើសកម្មភាពឃាត់ខ្លួនជនសង្ស័យតែម្តង៕
បាកដាដ៖នាយករដ្ឋមន្ត្រីអ៊ីរ៉ាក់ លោក Haider al-Abadi បានថ្លែងថា កងទ័ពអាកាសរបស់អ៊ីរ៉ាក់បានទៅលើតំបន់ព្រំដែនរវាងស៊ីរី និងអ៊ីរ៉ាក់ដែលជាកន្លែងលាក់ខ្លួនរបស់ក្រុមសកម្មប្រយុទ្ធរដ្ឋអ៊ីស្លាម ISIS ដោយមានកិច្ចសហការជាមួយទីក្រុងដាម៉ាស់ផងដែរ។ នេះបើយោងតាមទីភ្នាក់ងារសារព័ត៌មាន Reuters។
ជាមួយគ្នានេះទីក្រុងម៉ូស៊ុល ដែលជាមូលដ្ឋានស្នូលរបស់ក្រុម ISIS វិញក៏កំពុងតែត្រូវបានកងទ័ពអ៊ីរ៉ាក់វាយរំដោះជាបណ្តើរផងដែរ តាមរយៈការវាយកាន់កាប់មកវិញនូវតំបន់សំខាន់ៗ ដូចជាព្រលានយន្តហោះ និងមូលដ្ឋានទ័ពជាដើម។
នាយករដ្ឋមន្ត្រីអ៊ីរ៉ាក់លោក al-Abadi បានថ្លែងបញ្ជាក់ថា «វីរៈបុរសលើដែនអាកាសរបស់យើងបានបើកការវាយប្រហារសងសឹកទៅលើក្រុមភេរវករ ដោយទទួលបាននូវជោគជ័យដ៏គួរឲ្យភ្ញាក់ផ្អើល»។ លោកបន្ថែមថា ការវាយប្រហារត្រូវបានកងទ័ពអ៊ីរ៉ាក់អះអាងថា ធ្វើឡើងទៅលើមូលដ្ឋានផលិតគ្រាប់បែកសម្រាប់បំផ្ទុះលើរថយន្តរបស់ក្រុម ISIS នៅតាមខ្សែបន្ទាត់ព្រំដែន ដោយប្រើប្រាស់យន្តហោះទំនើប F16 ក្នុងប្រតិបត្តិការ ខណៈអាមេរិកក៏បានជួយក្នុងរឿងនេះដែរ តាមរយៈការផ្តល់ព័ត៌មានសម្ងាត់។
គួរបញ្ជាក់ថា ការវាយប្រហារនេះគឺជាលើកដំបូងដើម្បីជាការសងសឹកទៅនឹងការវាយប្រហារដោយបំផ្ទុះគ្រាប់បែកកាលពីសប្តាហ៍មុននៅទីក្រុងបាកដាដដែលបានសម្លាប់ប្រជាជនអ៊ីរ៉ាក់ជាច្រើននាក់ស្លាប់ និងរងរបួស៕
បន្ទាយមានជ័យ៖ពលករខ្មែរ២រូបបានស្លាប់បាត់បង់ជីវិតភ្លាមៗដោយសារធ្លាក់ពីលើអគារកំពស់៣៩ជាន់ នៅក្នុងប្រទេសថៃ ដែលហេតុការណ៍នេះកើតឡើងកាលពីម្សិលមិញ ស្ថិតនៅទីតាំងខនដូមីនៀម មួយកន្លែងនៅក្នុង ស្រុកបាងយ៉ៃ ខេត្តណុនថៈបុរី ប្រទេសថៃ។
ពលករខ្មែរទាំង២រូបត្រូវបានគេរាយការណ៍ថា មានឈ្មោះ ភឿន ស៊ិន ភេទប្រុស និងម្នាក់ទៀតឈ្មោះ មូល កុសល ភេទប្រុស មានអាយុ២២ឆ្នាំដូចគ្នា ហើយពួកគេទាំង២នាក់ធ្វើការជាជាងឈើនៅទីតាំងកើតហេតុ។ ប្រភពព័ត៌មានបានឲ្យដឹងថា មុនពេលកើតហេតុជនរងគ្រោះទាំង២នាក់បានឡើងទៅធ្វើការនៅជាន់ទី៣៩ ដើម្បីតុបតែងគ្រឿងសង្ការរឹមធ្វើពីឈើ លុះក្រោយមកជនរងគ្រោះក៏បានធ្លាក់ពីលើអាគារនោះស្លាប់ ដោយមិនដឹងមូលហេតុតែម្តង។
ក្រោយកើតហេតុ កំលាំងតម្រួតថៃបានចុះមកធ្វើការពិនិត្យទីតាំងកើតហេតុ ដើម្បីរកមូលហេតុនៃការធ្លាក់ ហើយបច្ចុប្បន្នសពពលករទាំងពីរនាក់ត្រូវបានរៀបចំចាត់ចែងតាមផ្លូវច្បាប់ ដើម្បីធ្វើការបញ្ជូនមកកាន់ស្រុកកំណើតរបស់គេវិញ៕
សេអ៊ូល៖អ្នកវិភាគស្តីពីវិស័យការពារជាតិរបស់កូរ៉េខាងត្បូងលោក Lee Il-Woo បានអះអាងថា រដ្ឋាភិបាលទីក្រុងព្យុងយ៉ាងមានអាវុធគីមីជាង៥,០០០តោនសម្រាប់ផលិតអាវុធគីមីដោយក្នុងនោះរួមបញ្ចូលទាំងសារធាធាតុគីមីពុល ដែលត្រូវបានប្រើប្រាស់ក្នុងការលួចធ្វើឃាតលោក គីម ជុងណាំ ថែមទៀតផង។ នេះបើតាមការចេញផ្សាយដោយសារព័ត៌មាន Channel News Asia។
យោងតាមរបាយការណ៍កាលពីឆ្នាំ២០១៤របស់ក្រសួងការពារជាតិកូរ៉េខាងត្បូងបានឲ្យដឹងថា កូរ៉េខាងជើងបានចាប់ផ្តើមផលិតអាវុធគីមីតាំងពីទសវត្សរ៍ឆ្នាំ១៩៨០មក ហើយបានប៉ាន់ស្មានថា ទីក្រុងព្យុងយ៉ាងអាចមានស្តុកអាវុធដ៏គ្រោះថ្នាក់បំផុតនេះពីចំនួនប្រហែល២,៥០០តោនទៅដល់៥,០០០តោននៅក្នុងឃ្លាំង។ ម្យ៉ាងវិញទៀតយោងតាមរបាយការណ៍ឆ្នាំ២០១២របស់ក្រសួងដដែលនេះ កូរ៉េខាងជើងមានរោងចក្រផលិតអាវុធនុយក្លេអ៊ែរនៅក្នុងទីតាំងចំនួន០៨ បូករួមទាំងកំពង់ផែ Chongjin ដែលស្ថិតនៅភាគឦសាន និងទីក្រុង Sunuiju ដែលស្ថិតនៅភាគពាយ័ព្យនៃផ្ទៃប្រទេស៕
ដាម៉ាស៖មនុស្ស៦១នាក់បានស្លាប់បាត់បង់ជីវិត ខណៈដែលជាច្រើននាក់ផ្សេងទៀតរបួសក្នុងករណីបំផ្ទុះរថយន្តដ៏កក្រើកនៅក្នុងភូមិមួយកន្លែងក្បែរទីក្រុង al-Bab នៃប្រទេសស៊ីរីកាលពីម្សិលមិញ។ នេះបើយោងតាមទីភ្នាក់ងារសារព័ត៌មាន Reuters ។
ក្រុមអ្នកឃ្លាំមើលសិទ្ធិមនុស្សប្រចាំនៅស៊ីរីបាននិយាយថា ហេតុការណ៍បំផ្ទុះរថយន្តខាងលើបានវាយប្រហារចំលើកម្លាំងសន្តិសុខ និងយោធានៅក្នុងភូមិ Sousian ដែលស្ថិតនៅប្រមាណ ០៨គីឡូម៉ែត្រភាគពាយ័ព្យនៃទីក្រុង al-Bab របស់ប្រទេសស៊ីរី និងបានបណ្តាលឲ្យមនុស្សស្លាប់សរុប៦១នាក់ក្នុងនោះ៥៥នាក់ជាជនស៊ីវិល និង០៦នាក់ជាក្រុមឧទ្ទាម ខណៈដែលជាច្រើននាក់ផ្សេងទៀតបានទទួលរងរបួស។
គួរបញ្ជាក់ថា ការវាយប្រហារនេះធ្វើឡើង បន្ទាប់ពីថ្ងៃព្រហស្បតិ៍សប្តាហ៍នេះដែលក្រុមឧទ្ទាមគាំទ្រដោយតួកគី បានវាយបណ្តេញក្រុម ISIS ចេញពីទីក្រុង al-Bab ដែលជាមូលដ្ឋានឈរជើងចុងក្រោយរបស់ក្រុមសកម្មប្រយុទ្ធមួយនេះ រួមជាមួយក្រុងតូចៗមួយចំនួនផ្សេងទៀតរួមមាន Qabasin និង al-Bezah ជាដើមនៅក្រោយការប្រយុទ្ធគ្នាអស់រយៈពេលជាច្រើនសប្តាហ៍កន្លងទៅ៕
ដោយ៖ប៉ែនសុផល
បាត់ដំបង៖ជនដៃដល់ចំនួន៣នាក់ត្រូវបានកម្លាំងនៃអធិការដ្ឋាននគរបាលក្រុងបាត់ដំបងកសាងសំណុំរឿងបញ្ជូនទៅតុលាកាពាក់ព័ន្ធករណីហិង្សាដោយចេតនាមានស្ថានទម្ងន់ទោសដោយប្រើកាំបិតកាប់ទៅលើក្បាលជនរងគ្រោះបណ្តាលអោយរងរបួសធ្ងន់។
លោកវរសេនីយ៍ត្រី ប៉ាង ហៀង អធិការនគរបាល ក្រុងបាត់ដំបងបានបញ្ជាក់អោយដឹង ថា៖ក្រោយពីទទួលបានព័ត៌មាន ពាក់ព័ន្ធទៅនិងករណីអំពើហិង្សាដោយជនដៃដល់មានគ្នាបីនាក់បានប្រើប្រាស់កាំបិតកាប់និងវៃទៅលើជនរងគ្រោះបណ្តាលអោយរងរបួសធ្ងន់ធ្ងរភ្លាមៗនោះ លោកបានដឹកនាំកម្លាំងនគរបាលចុះប្រតិបត្តិការស្រាវជ្រាវ រហូតឈានដល់ការចាប់ឃាត់ខ្លួនកាលពីថ្ងៃទី២៣ ខែកុម្ភៈ ឆ្នាំ២០១៧។
លោកបន្តថា ករណីហិង្សាខាងលើនេះបានកើតឡើងនៅវេលាម៉ោង១ និង៥នាទី រំលងអធ្រាត្រឈានចូលថ្ងៃទី២២ ខែកុម្ភៈឆ្នាំ២០១៧នៅចំណុច ខាងមុខក្លិបស្តារឡាយ ឋិតក្នុងក្រុមទី១៤ ភូមិរំចេក៤ សង្កាត់រតនះ ក្រុងបាត់ដំបង។ បង្កដោយជនសង្ស័យមានគ្នា៣នាក់ក្នុងនោះមាន៖ទី១.ឈ្មោះនឿន សូនិច ភេទប្រុសអាយុ២០ឆ្នាំ មុខរបរ ជាងផ្សាដែករសនៅក្រុមទី១៨ភូមិកំពង់ឆ្លង ឃុំវត្តតាមិម ស្រុកសង្កែ ខេត្តបាត់ដំបង (ជនដៃដល់)។ ទី២.ឈ្មោះ ឡាត់ ចាន់រិទ្ធ ហៅ តន្ត្រី ភេទប្រុស អាយុ២២ឆ្នាំ ទីលំនៅក្រុមទី២២ភូមិកំពង់ឆ្លង ឃុំវត្តតាមិម ស្រុកសង្កែ ខេត្តបាត់ដំបង(ជាបក្ខពួក ) និងទី៣.ឈ្មោះ ឈួន តុលា ភេទប្រុស អាយុ១៧ឆ្នាំ ទីលំ នៅភូមិរំចេក៤ សង្កាត់រតនះ ក្រុងបាត់ដំបង(ជាជនដៃដល់យកកាំបិតកាប់) ។ ចំណែកជនរងគ្រោះឈ្មោះ សរ ពិរស់ ភេទប្រុស អាយុ១៨ឆ្នាំ រស់នៅ ភូមិដង្កោទាប សង្កាត់ទួលតាឯ កក្រុងបាត់ដំបង(រងរបួលធ្ងន់)។
ក្រោយពីឃាត់ខ្លួនសាកសួរជនសង្ស័យទាំង៣នាក់បានឆ្លើយសារភាពថា ខ្លួននិងបក្ខពួក ពិតជាបានធ្វើសកម្មភាពយកកាំបិតកាប់និងវាយទៅលើជនរងគ្រោះពិតប្រាកដមែនដោយសាររឿងស្រី ហើយបានទំនាស់ពាក្យសម្តីគ្នានៅក្នុងកន្លែងផឹកស៊ី។
បច្ចុប្បន្នជនសង្ស័យទាំង៣នាក់ត្រូវបានសមត្ថកិច្ចជំនាញកសាងសំណុំរឿងបញ្ជូនទៅតុលាការនៅរសៀលថ្ងៃទី២៤ ខែកុម្ភៈ ឆ្នាំ២០១៧នេះដើម្បីចាត់ការតាមនីតិវិធី៕
ដោយ៖វិធិន
ក្រចេះ៖ករណីឃាតកម្មមួយដែលសមត្ថកិច្ចបានសន្និដ្ឋានថា ជាអំពើសម្លាប់គិតទុកជាមុនដោយក្រោយពីជនរងគ្រោះបានស្លាប់ ជនដែលស្នាក់នៅជិតក៏រត់គេចខ្លួនបាត់ ។ហេតុការណ៍បានកើតឡើងនៅភូមិអូរគ្រៀងឃុំអូរគ្រៀងស្រុកសំបូខេត្តក្រចេះកាលពីវេលាម៉ោង១២ថ្ងៃទី២៤ ខែកុម្ភៈ ឆ្នាំ២០១៧។
មន្ត្រីនគរបាលបានឲ្យដឹងថា កម្លាំងនគរបាលប៉ុស្តិ៍អូរគ្រៀងបានទទួលព័ត៌មានថាមានមនុស្សស្លាប់នៅក្នុងផ្ទះ។ បន្ទាប់ពីទទួលបានដំណឹងភ្លាម កម្លាំងជំនាញស្រុក និង កម្លាំងប៉ុស្តិ៍អូរគ្រៀង បានចុះទៅដល់កន្លែងកើតហេតុហើយពិនិត្យឃើញថាជនរងគ្រោះបាត់បង់ជីវិតឈ្មោះអេង មេងជាភេទស្រីអាយុ៤៣ឆ្នាំជាតិខ្មែររស់នៅភូមិអូរគ្រៀងឃុំអូរគ្រៀង ស្រុកសំបូខេត្តក្រចេះ។
កន្លែងកើតហេតុសមត្ថកិច្ចពិនិត្យមើលសាកសពដែលដេកស្លាប់នៅក្នុងបន្ទប់ទឹក គឺបាក់.ក និងមានស្នាមចាក់ដោយប្រើវត្ថុរឹងចំគុម្ពត្រចៀក។កម្លាំងសមត្ថកិច្ចបានសន្និដ្ឋានថា ជាករណីឃាតកម្មគិតទុកជាមុន ។
ក្រោយពីពិនិត្យសាកសពទីកន្លែងហេតុនិងសាកសួរ ប្រមូល ព័ត៌មាន ជុំវិញរឿងហេតុខាងលើកម្លាំងបានកំណត់មុខសញ្ញាគឺ ជនសង្ស័យ ទៅលើឈ្មោះ កាន់ វណ្ណៈ ភេទប្រុស អាយុ៣៧ឆ្នាំ ទីលំនៅភូមិអូរគ្រៀង ឃុំអូរគ្រៀង ស្រុកសំបូរ។ ព្រោះក្រោយពីកើតហេតុជនសង្ស័យខាងលើបាននាំប្រពន្ធ កូន និងរើយកអ៊ីវ៉ាន់ចេញពីផ្ទះដែលគេជួលនៅជិតផ្ទះជនរងគ្រោះឡើងរថយន្តចេញពីចំណុចកើតហេតុទៅបាត់។
បច្ចុប្បន្នកម្លាំងនគរបាលស្រុកកំពុងកសាងសំណុំរឿងបញ្ជូនទៅការិយាល័យជំនាញខេត្តនឹងបន្តស្រាវជ្រាវតាមចាប់ជនដៃដល់យកផ្តន្ទាទោសតាមច្បាប់៕
ភ្នំពេញ៖មានការភ្ញាក់ផ្អើលមួយបានកើតឡើង កាលពីវេលាម៉ោង១០ព្រឹកថ្ងៃទី២៤ ខែកុម្ភៈ ឆ្នាំ២០១៧ ខណៈពេលដែលនគរបាលបានទទួលព័ត៌មានពី លោកតែអាចារ្យនិងអ្នកភ្លុកថា មានស្ត្រីម្នាក់បានយកសព កូនស្រីរបស់ខ្លួនទៅដាក់នៅឈាបនដ្ឋានវត្តតាំងកសាងខាងត្បូង ស្ថិតនៅក្នុងភូមិចំការឪឡឹក សង្កាត់កាកាប ខណ្ឌពោធិ៍សែនជ័យ។
ប៉ុន្តែពេលនោះពួកគាត់សួររកលិខិតស្នាមអត់មាន ទើបឃាត់មិនឲ្យបូជាហើយបាន ផ្ដល់ព័ត៌មានជូននគរបាលតែម្ដង បន្ទាប់ពីទទួលបានព័ត៌មាននោះភ្លាម កម្លាំងនគរបាលប៉ុស្ដិ៍ចោមចៅ និងកាកាបបានចុះទៅកាន់ វត្តតាំងកសាងខាងត្បូងនិងបន្ទប់ដែលស្ត្រីរូបនោះស្នាក់នៅ ស្ថិតក្នុងភូមិព្រៃទា សង្កាត់ចោមចៅភ្លាមៗ ដើម្បីធ្វើការស្រាវជ្រាវទើបដឹងរឿងផ្សេងទៀត។
ស្ត្រីដែលបានយកសពកូនទៅបូជានោះឈ្មោះ ណុប ស្រីពៅ អាយុ២៣ឆ្នាំ មុខរបរកម្មការិនីរោងចក្រកាត់ដេរ មានស្រុកកំណើតនៅក្នុងភូមិស្ទោង ឃុំស្ទោង ស្រុកស្ទោង ខេត្តកំពង់ធំ និងស្នាក់នៅបន្ទប់លេខ២ជាន់ផ្ទាល់ ដីផ្ទះជួលក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ។ ចំណែកកូនស្រីដែលស្លាប់នោះឈ្មោះ ណុប ស្រីពេជ្រ អាយុ៣ខែ ហើយការស្លាប់នោះនៅមិនទាន់ដឹងពីមូលហេតុនៅឡើយទេ ប៉ុន្តែដឹងស្លាប់ក្រោយពេល ដែលស្ត្រីរូបនោះនិងស្ត្រីម្នាក់ទៀត ដែលជាប្រពន្ធម្នាក់ទៀតរបស់ប្ដីនាងដែរ មានទំនាស់វាយតប់គ្នារួចមក។ ពេលនេះបុរសជាប្ដី និងស្ត្រីម្នាក់ដែលអះអាងថាជាប្រពន្ធដែរនោះ បានគេចខ្លួនបាត់ស្រមោលផងដែរ ដោយមិនទាន់ដឹងថា ការស្លាប់របស់ក្មេងស្រីខាងលើ មានជាប់ពាក់ព័ន្ធទៅនឹងពួកគេឬអត់នោះទេ។
ក្រោយពេលដែលកម្លាំងនគរបាលចុះសួរនាំ ស្រីរូបនោះបាននិយាយថា នាងបានយកបុរសម្នាក់ធ្វើជាប្ដី កាលពីជា១ឆ្នាំមុន ដោយមិនបានរៀបការតាមប្រពៃណីនោះឡើយ ហើយនាងក៏មិន បានដឹងថាប្ដីមាននាម ត្រកូលអ្វីនិងមានទីលំនៅក្នុងភូមិនិងឃុំណាដែរ គ្រាន់តែដឹងថាគាត់ឈ្មោះយ៉ា អាយុ៣៦ឆ្នាំ រស់នៅក្នុង ស្រុកកៀនស្វាយ ខេត្តកណ្ដាលប៉ុណ្ណោះ។
ក្រោយពេលសាងស្នេហ៍ រស់នៅជាមួយគ្នាបានរយៈពេលជាង ១ខែ នាងបានមានផ្ទៃពោះ១ខែនោះតែម្ដង ចំណែកឯលោកប្ដីវិញ បន្ទាប់ពីបានដឹងថានាងមានផ្ទៃពោះ ក៏បានចាកចេញទៅមានស្រីថ្មីម្នាក់ទៀតចោលនាងបាត់គ្មានអាល័យ ខណៈនោះនាងបានពរពោះឆ្លងកាត់ ការលំបាកគ្រប់បែបយ៉ាង រហូតកូនក្នុងផ្ទៃសម្រាលមក ដែលរហូតពេលនេះមានអាយុ៣ខែទៅហើយ ស្រាប់ តែនៅមុនពេលកើតហេតុ២ថ្ងៃ ស្រាប់តែលេចមុខប្ដីត្រឡប់មកវិញ និងបានសុំនាងរួមរស់ជាមួយគ្នាវិញ ហើយនាងក៏បានយល់ព្រម។
ស្ត្រីនោះបានបន្តថា នាងនិងប្ដីបានរួមរស់ជាមួយគ្នាបានរយៈពេល២ថ្ងៃ រហូតដល់វេលាយប់ថ្ងៃទី២៣ ខែកុម្ភៈ ឆ្នាំ២០១៧ ប្ដីបានប្រើឲ្យនាងទីរកទិញស្រាឲ្យផឹក នាងក៏បានទៅទិញឲ្យហើយក្រោយពេលប្ដីផឹកអស់ ក៏បានប្រើនាងទៅទិញម្ដងទៀត ខណៈនោះនាងក៏បានទៅទិញ។ លុះពេលត្រឡប់មកវិញ បានឃើញស្ត្រីម្នាក់ ដែលជាប្រពន្ធចុងប្ដីកំពុងស្ថិតនៅក្នុងបន្ទប់នោះដែរ ចំណែកកូននាងនៅមានជីវិតធម្មតាទេ ហើយខណៈ បានជួបមុខគ្នានាងនិងប្រពន្ធចុងប្ដី ក៏បានមានទំនាស់គ្នារហូតឈានដល់ ការវាយតប់គ្នានៅក្រៅបន្ទប់ជួល មួយប្រាវ។ ប៉ុន្តែពេលនោះមានការស្ងប់ស្ងាត់ទៅវិញ ដោយបានអ្នកជិតខាងឃាត់ ហើយនាងក៏បានចូលទៅ ក្នុងបន្ទប់វិញ និងមើលកូននៅរស់ដដែលទេ ចំណែកប្រពន្ធចុងប្ដីស្ថិតនៅក្រៅបន្ទប់ បន្ទាប់មកនាងបានចូល ទៅក្នុងបន្ទប់ទឹកមួយសន្ទុះ លុះពេលចេញមកវិញ មើលកូនមិនឃើញកម្រើក នាងក៏បានសួរបុរសជាប្ដីថា ម៉េចបានកូនអត់កម្រើកត្រូវប្ដីប្រាប់ថា កូនដេកលក់ហើយពេលនោះនាងក៏បាន យកកូនទៅដេកឱបនិងបាន ដេកលក់រហូតដល់វេលាម៉ោង២យប់រំលងអាធ្រាត្រ ឈានចូលថ្ងៃទី២៤ ខែកុម្ភៈ ទើបមើលកូនម្ដងទៀត ហើយឃើញអត់កម្រើកដដែល ទើបហៅឲ្យអ្នកជិតខាងជួយមើល ទើបដឹងថាកូនស្លាប់បាត់ហើយ ចំណែកឯ បុរសជាប្ដីនិងប្រពន្ធចុងក៏គេចបាត់ទៀត មិនដឹងថាកូននាងត្រូវអ្នកទាំងពីរនោះសម្លាប់ឬបែបណាទេ ហើយក៏មិនដឹងថាគេចបាត់តាំងពីពេលណានោះឡើយ។លុះព្រឹក ឡើងនាងបានយកសពកូនទៅបូជា ប៉ុន្តែត្រូវបានលោកតាអាចារ្យឃាត់ និងរាយការណ៏ជូននគរបាល ឲ្យទៅមើលទើបមានការភ្ញាក់ផ្អើលបែបនេះ៕
ខេត្តបន្ទាយមានជ័យ៖នៅព្រឹកថ្ងៃសុក្រនេះ ក្រុមអាជីវករខ្មែរ បានបន្តបិទច្រកទ្វារ ព្រំដែនអន្តរជាតិប៉ោយប៉ែត ដោយសារតែ អាជ្ញាធរថៃនៅមិនព្រមទទួលយកការទាមទារឲ្យមានការបញ្ចុះតម្លៃភាស៊ីនាំចូលត្រីទៅលក់ក្នុងទឹកដីថៃ ។
តាមសេចក្តីរាយការណ៍បានឲ្យដឹងថា នៅព្រឹកថ្ងៃទី២៤ ខែកុម្ភៈ ឆ្នាំ២០១៧នេះថា ចរាចរណ៍ចាប់ផ្តើលស្ទះ នៅម៉ោងប្រមាណ៨ព្រឹក នៅច្រកទ្វារព្រំដែនអន្តរជាតិប៉ោយប៉ែត ហើយមធ្យោបាយធ្វើដំណើរ មិនអាច ចេញចូលបាននោះទេ អាចឆ្លងកាត់តែអ្នកដំណើរថ្មើរជើងប៉ុណ្ណោះត្រង់ចំណុចស្ពានមិត្តភាពខ្មែរ-ថៃ៕
ម៉ានីល៖សមាជិកព្រឹទ្ធសភាហ្វីលីពីន លោកស្រីLeila De Lima ដែលតែងតែរិះគន់មិនសំចៃមាត់លើប្រតិបត្តិការបង្ក្រាបគ្រឿងញៀនដោយបង្ហូរឈាមរបស់ប្រធានាធិបតីហ្វីលីពីនលោក រ៉ូឌ្រីហ្គោ ឌូតឺតេ ត្រូវបានប៉ូលិសចាប់ខ្លួនតាមដីកាបង្គាប់របស់តុលាការទីក្រុងម៉ានីល ក្រោមបទចោទប្រកាន់ពាក់ព័ន្ធការជួញដួរគ្រឿងញៀន។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ។
លោកស្រី លៃឡា ដឺលីម៉ា វ័យ៥៧ឆ្នាំ ត្រូវគេចោទប្រកាន់ថា ធ្លាប់ផ្សំគំនិត និងប្រឡូកប្រឡាក់ជាមួយការជួញដូរគ្រឿងញៀនខុសច្បាប់ អំឡុងពេលដែលលោកស្រីកាន់មុខតំណែងជារដ្ឋមន្ត្រីនៃក្រសួងយុត្តិធម៌កាលពីឆ្នាំ២០១០រហូតដល់ឆ្នាំ២០១៥។
លោក លៃឡា ដឺលីម៉ា ត្រូវបានប៉ូលិសចាប់ខ្លួននៅឯការិយាល័យរបស់ស្រីផ្ទាល់ក្នុងព្រឹទ្ធសភាហ្វីលីពីនដោយគ្មានការប្រឆាំងតបតនោះឡើយ។ ទន្ទឹមនោះមេធាវីលោកស្រីកំពុងតែចោទសួរដេញដោលអំពីដីកាចាប់ខ្លួននេះថា វាពិតជាមានភាពមិនប្រក្រតីខ្លាំងណាស់៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
