ដោយ៖ បញា
ភ្នំពេញ៖បុរសកំសត់ម្នាក់បានកាន់រូបថតប្រពន្ធ២សន្លឹកខំស្វែងរកពេញទីក្រុងភ្នំពេញនៅតែរកមិនទាន់ឃើញរហូតបានមកដល់ប៉ុស្តិ៍នគរបាលចោមចៅកាលពីវេលាម៉ោង២រសៀលថ្ងៃទី២៣ ខែធ្នូ ឆ្នាំ ដើម្បីសុំការជួយអន្តរាគមន៍ពីបងប៉ូលិសឱ្យតាមរកនាងដែលបានបាត់ខ្លួន ដោយមិនបានឃើញនាងត្រឡប់ទៅផ្ទះវិញទេ។
ប្រភពឱ្យដឹងថាបុរសខាងលើឈ្មោះ ចែម ចាន់ អាយុ២៦ឆ្នាំ មានស្រុកកំណើតនៅភូមិសំរោង ឃុំជីភុច ស្រុកមេសាង ខេត្តព្រៃវែង។ ចំណែកឯនាងជាប្រពន្ធឈ្មោះ យ៉ាន់ អៀង អាយុ២៣ឆ្នាំ ស្នាក់នៅភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ ជាកម្មការិនីរោងចក្រក្នុងសួនវឌ្ឍនៈ មានស្រុកកំណើតនៅភូមិគោកគង់ ឃុំគោកគង់ខាងលិច ស្រុកកញ្ជ្រៀច ខេត្តព្រៃវែង ។
បើតាមការរៀបរាប់បុរសជាប្តីថា រូបខ្លួនបានទៅធ្វើការនៅខេត្តព្រះវិហារ ហើយបានរៀបការជាមួយគ្នា (នារីបាត់ខ្លួន) ជាងមួយឆ្នាំហើយហើយក៏បាននាំនាងទៅរស់នៅនិងធ្វើការនៅឯខេត្តព្រះវិហារដែរ ។ ក្រោយមក នាងអត់ចេះរស់នៅទីនោះទេ ក៏បានសុំគាត់មកស្រុកកំណើតវិញ គាត់ក៏យល់ព្រម ។ លុះប្រពន្ធមកស្រុកកំណើតហើយ ក៏បានសុំគាត់ថា ចង់ទៅធ្វើការរោងចក្រនៅភ្នំពេញ គាត់ជាប្តីក៏មិនជំទាស់ដែរ ក៏ព្រមឱ្យទៅទៀត ហើយដែរនាងបានធ្វើការមួយរយ: នាងបានទៅលេងគាត់ពេលដែលឈប់សម្រាកបុណ្យ ។
ប៉ុន្តែចាប់តាំងពីបុណ្យភ្ជុំរួចមកនេះ ស្រាប់តែប្រពន្ធគាត់បាត់ដំណឹងសូន្យឈឹង សូម្បីការទំនាក់ទំនងក៏មិនបាន ហើយក៏អត់ដែលទៅលេងគាត់ទៀត ទើបគាត់ក៏សម្រេចចិត្តនាំទាំងគ្រួសារមកតាមរកនាងនៅភ្នំពេញនេះតែម្តងអស់ជាច្រើនថ្ងៃខែ ក៏បានប្រទះឃើញនាងនៅម្តុំរោងចក្រសួនវឌ្ឍនៈ តែអ្វីដែលចម្លែកនោះពេលប្រពន្ធគាត់ និងក្រុមគ្រួសារ ទៅដល់នាងបែររត់គេចខ្លួនទៅវិញរហូតមកដល់ពេលនេះ ដោយមិនអស់ចិត្តគាត់នៅតែបន្តតាមរកទៀតដើម្បីអោយដឹងមូលហេតុច្បាស់៕
ខេត្តកំពង់ស្ពឺ៖ប្រតិបត្តិការរយៈពេល២ថ្ងៃរបស់សមត្ថកិច្ចជំនាញបានបញ្ចប់ក្រោយវាស់វែងឈើប្រណីតនៅផ្ទះឈ្មួញឈើ ជឿង ថេង ដោយលទ្ធផលបានរកឃើញឈើប្រណីតប្រភេទធ្នង់ និងម្រិញ ព្រមទាំងឈ្លីកជាច្រើនម៉ែត្រគូប ។ ក្រោយវាស់វែងរួចសមត្ថកិច្ចបានដឹកយកទៅរក្សាទុកនៅរដ្ឋបាលព្រៃឈើសំរោងទង ដើម្បីបន្តនីតិវិធីឲ្យម្ចាស់ឈើចូលមកបង់ពិន័យតាមច្បាប់ព្រៃឈើ ។
មន្ត្រីរដ្ឋបាលព្រៃឈើបញ្ជាក់ថា ប្រតិបត្តិការវាស់វែងត្រូវបានបញ្ចប់កាលពីព្រលប់ថ្ងៃទី២២ ធ្នូ ដោយបានដឹកឈើតាមរថយន្តធំចំនួន៤គ្រឿងយកទៅរក្សាទុកដើម្បីចាត់ការបន្តទៀត ។ ករណីនេះម្ចាស់ឈើ (ជឿង ថេង)អាចចូលខ្លួនបង់ពិន័យតាមច្បាប់ស្តីពីព្រៃឈើ ហើយបើមិនចូលខ្លួនមកទេ ខាងតុលាការនឹងចាត់វិធានការបន្ត ចំណែកឈើត្រូវរឹបអូសជាសម្បត្តិរដ្ឋ ។
មន្ត្រីដដែលបន្តថា ឈើសរុបមានធ្នង់២៩៨ដុំ ស្មើនឹង១៥,៥៣១ម៉ែត្រគូប ឈើឈ្លីក២១ដុំ ស្មើនឹង១,១២៩ម៉ែត្រគូប និងឈើម្រិញ(រាជកុល)៥១ដុំ ស្មើនឹង៤១,១៧៧ម៉ែត្រគូប ដូច្នេះឈើសរុបទាំងអស់ស្មើនឹង៥៧,៨៣៧មែត្រគូប បើសរុបជាទឹកប្រាក់បង់ពិន័យវិញមានចំនួនរាប់ម៉ឺនដុល្លារឯណោះ មិនដឹងថា តើឈ្មួញឈើរូបនេះហ៊ានចូលមកបង់ពិន័យឬក៏អត់នោះទេ ព្រោះពេលនេះកំពុងរត់គេចខ្លួន ខណៈដែលខាងប៉េអឹមលើផ្ទៃប្រទេសតាមរកចាប់ខ្លួនដូចគ្នា ។
ការចាប់បង្ក្រាបឈ្មួញឈើដ៏ធំប្រចាំស្រុកឱរ៉ាល់នេះ មហាជនបានសម្តែងការគាំទ្រដល់កម្លាំងកងរាជអាវុធហត្ថយ៉ាងខ្លាំង ព្រោះពីមុនមកមិនដែលមានសមត្ថកិច្ចណាមួយហ៊ានបង្ក្រាបឡើយ ។ និយាយរួមអស់លោកសមត្ថកិច្ចទាំងនោះបានត្រឹមអង្គុយចាំទទួលលាភសក្ការៈប៉ុណ្ណោះពីឈ្មួញឈើរូបនេះ ដោយអ្នកខ្លះបានទទួលក្នុង១ជើងចាប់ពី២០០ដុល្លារទៅ២៥០ដុល្លាក្នុង១ឡាន ចំណែកអ្នកខ្លះទៀតបានទទួលសេវាប្រវាំខែ ចាប់ពី១៥០០ដុល្លារទៅ២០០០ដុល្លារពីឈ្មួញម្នាក់នេះ ៕
ភ្នំពេញ៖ទីបំផុតចៅក្រមតុលាការសាលាឧទ្ធរណ៍ បានប្រកាសតម្កល់សេចក្តីសម្រេចរបស់តុលាការសាលាដំបូងរាជធានីភ្នំពេញក្នុងការផ្តន្ទាទោសដាក់ពន្ធនាគារលើលោក អ៊ុំ សំអាន អ្នកតំណាងរាស្ត្រគណបក្សសង្គ្រោះជាតិ ឲ្យជាប់ពន្ធនាគារ ២ឆ្នាំ ៦ខែដដែលពាក់ព័ន្ធនឹងការផ្សព្វផ្សាយផែនទី តាមហ្វេសប៊ុក។
ការសម្រេចរបស់ចៅក្រមតុលាការសាលាឧទ្ធរណ៍ដូច្នេះ បានធ្វើឡើង បន្ទាប់ពីសវនាការជំនុំជម្រះ ដោយគ្មានវត្តមានរបស់លោកអ៊ុំ សំអាន កាលពីព្រឹកថ្ងៃទី២៣ ខែធ្នូ ឆ្នាំ២០១៦។ ក៏ប៉ុន្តែមេធាវី ៤ រូបរបស់លោកតំណាងរាស្ត្រអ៊ុំ សំអាន បានចូលរួមសវនាការនោះ៕
រាជធានីភ្នំពេញ៖អ្នកនាំពាក្យក្រសួងមហាផ្ទៃ លោក ខៀវ សុភ័គ បានឲ្យដឹងថា នាយកដ្ឋានព័ត៌មានវិទ្យានៃក្រសួងមហាផ្ទៃបាននិងកំពុងស៊ើបចំពោះ Facebook ដែលបានកាត់តរូបភាពបង្ហោះប្រមាថដល់ព្រះមហាក្សត្រខ្មែរ។
គួររម្លឹកថា កាលពីពេលថ្មីៗនេះមាន Facebook មួយត្រូវបានគេឃើញថា បានបង្ហោះរូបភាពអាសអាភាសដោយប្រមាថដល់ព្រះមហាក្សត្រខ្មែរ។ គណនី Facebook នោះក៏ទទួលបានការរិះគន់យ៉ាងខ្លាំង ពីសំណាក់ប្រជាពលរដ្ឋកម្ពុជាផងដែរ៕
ខេត្តបាត់ដំបង៖សមត្ថកិច្ចបានឃាត់ខ្លួនបុរសជាជនសង្ស័យម្នាក់ក្រោយពីជាប់ពាក់ព័ន្ធនឹងករណីអំពើហិង្សា និងបៀតបៀនផ្លូវភេទលើកូនស្រីបង្កើតខ្លួនឯង២នាក់កាលពីថ្ងៃទី២២ ខែធ្នូ ឆ្នាំ២០១៦ ។
សមត្ថកិច្ចបានអោយដឹងថា ជនសង្ស័យមានឈ្មោះ ព្រឿង វ៉ាន់ អាយុ៣៧ឆ្នាំ មានប្រពន្ធឈ្មោះ ជួយ សុខជា អាយុ៣៥ឆ្នាំ មានកូន៥នាក់ រស់នៅភូមិស្វាយជ្រុំ ឃុំអូរដំបង២ ស្រុកសង្កែ ខេត្តបាត់ដំបង។ ប្រភពដដែលបានបន្តថា ជនសង្ស័យនេះតែងតែផឹកស្រវឹងវាយធ្វើបាបប្រពន្ធកូន រហូតដល់ប្រពន្ធអស់ទ្រាំពុំបានក៍បានចេញពីផ្ទះបន្សល់ទុកកូនៗទាំង៥នាក់នៅជាមួយជនសង្ស័យជាប្តី។
ចំណែកជនរងគ្រោះមានឈ្មោះ វ.ស.ណ និង ឈ្មោះ វ.ច.ន ជាកូនស្រីបង្កើតរបស់ជនសង្ស័យបានអោយដឹងថាកាលពីថ្ងៃទី១២ ខែធ្នូ ឆ្នាំ២០១៦ ជនសង្ស័យបានផឹកស្រាស្រវឹងរួចបានធ្វើការប្រើអំពើហិង្សា មិនត្រឹមតែប៉ុណ្ណោះថែមទាំងបង្ខំអោយពួកនាងដោះសម្លៀកបំពាក់ចេញ រួចស្ទាបច្របាច់ អោបថើបនាងទៀតផង លុះដល់ទ្រាំនឹងទង្វើដ៏ថោកទាបនេះមិនបានពួកនាងក៍សម្រេចចិត្តប្រាប់រឿងនេះទៅម្តាយ។
ក្រោយពីការឃាត់ខ្លួនជនសង្ស័យរួចមកសមត្ថកិច្ចបានធ្វើការសាកសួរ និងកសាងសំណុំរឿងដើម្បីចាត់ការតាមនីតិវិធី៕
តួកគី៖ក្រុមជីហាដនិយមរដ្ឋឥស្លាមបានចេញវីដេអូមួយបង្ហាញពីទាហានតួកគីពីរនាក់ដែលត្រូវចាប់បានកំពុងត្រូវបានដុតទាំងរស់បន្ទាប់ពីរដ្ឋាភិបាលក្រុងអង់ការ៉ាប្តេជ្ញាប្រយុទ្ធប្រឆាំងនឹង “ពួកភេរវករ” នៅក្នុងប្រទេសស៊ីរីដើម្បីឆ្លើយតបទៅនឹងការសម្លាប់ទាហានរបស់ខ្លួនចំនួន១៦នាក់នៅក្នុងការប្រយុទ្ធមួយ។
វីដេអូរយៈពេល១៩នាទីដែលបង្ហាញពីបុរសឯកសណ្ឋានពីរនាក់ត្រូវបានអូសចេញពីទ្រុងមួយមុនពេលត្រូវបានគេចងនិងដុតគឺត្រូវបានបង្ហោះលើគេហទំព័ររបស់ក្រុមជីហាដនេះ។ និយាយជាភាសាទួរគី ឃាតករដែលបានសម្លាប់បុរសទាំងពីរនាក់នោះបានរិះគន់លោកប្រធានាធិបតីតួកគីRecep Tayyip Erdogan និងអំពាវនាវឲ្យមានការបំផ្លិចបំផ្លាញនៅក្នុងប្រទេសតួកគី។
ទីភ្នាក់ងារព័ត៌មាន Amaq ដែលមានទំនាក់ទំនងជាមួយក្រុម IS បានចុះផ្សាយកាលពីខែមុនថា ក្រុមជីហាដបានចាប់ទាហានតួកគីចំនួនពីរនាក់ ខណៈដែលកងទ័ពតួកគីនិយាយថា ខ្លួនបានបាត់ការទាក់ទងជាមួយទាហានរបស់ខ្លួនទាំងពីរនេះ។
គួរបញ្ជាក់ថា ការចេញផ្សាយវីដេអូនេះគឺបានកើតឡើងមួយថ្ងៃបន្ទាប់ពីទាហានទួរគីចំនួន១៦នាក់ត្រូវបានសម្លាប់ដោយក្រុមយុទ្ធជន IS នៅក្នុងការចាញ់បង់ដ៏ធំបំផុតរបស់រដ្ឋាភិបាលក្រុងអង់ការ៉ាក្នុងការលុកលុយមិនធ្លាប់មានពីមុនមករបស់ខ្លួនចូលទៅក្នុងប្រទេសស៊ីរី៕
ស៊ីរី៖កាលពីថ្ងៃព្រហស្បតិ៍រដ្ឋាភិបាលស៊ីរីបានដាក់ការគ្រប់គ្រងទាំងស្រុងនៃទីក្រុងអាឡេប៉ូជាលើកដំបូងនៅក្នុងរយៈពេលបួនឆ្នាំបន្ទាប់ពីយុទ្ធជនក្រុមប្រឆាំងនិងជនស៊ីវិលចុងក្រោយត្រូវបានដឹកចេញពីសង្កាត់ភាគខាងកើតដែលត្រូវបំផ្លាញដោយសង្គ្រាម។
ការជម្លៀសនេះបានបញ្ចប់ជំពូកឃោរឃៅនៅក្នុងសង្គ្រាមស៊ីវិលរយៈពេលជិតប្រាំមួយឆ្នាំរបស់ប្រទេសស៊ីរីដោយបានអនុញ្ញាតឲ្យប្រធានាធិបតីបាសាអាល់អាសាដទទួលបានអំណាចពេញលេញលើទីក្រុងធំបំផុតរបស់ប្រទេសមួយនេះនិងជាអតីតតំបន់ពាណិជ្ជកម្មមួយ។ វាបានសម្គាល់ជាជ័យជម្នះសំខាន់បំផុតចាប់តាំងពីការងើបបះបោរប្រឆាំងនឹងការគ្រប់គ្រងរយៈពេលបួនទសវត្សរ៍របស់គ្រួសារគាត់ដែលបានចាប់ផ្តើមក្នុងឆ្នាំ២០១១។
សេចក្តីប្រកាសនេះត្រូវបានធ្វើឡើងតាមរយៈសេចក្តីថ្លែងការណ៍របស់កងទ័ពមួយដែលផ្សាយ លើទូរទស្សន៍រដ្ឋស៊ីរីមិនយូរប៉ុន្មានបន្ទាប់ពីរថយន្តក្រុងបួនគ្រឿងចុងក្រោយដែលដឹកយុទ្ធជនបានចាកចេញពីច្រក Ramousseh ។
កងទ័ពបាននិយាយក្នុងសេចក្តីថ្លែងការណ៍មួយថា “សូមអរគុណដល់ឈាមនៃវីរបុរសរបស់យើងដែលបានលះបង់ប្រយោជន៍របស់កងកម្លាំងប្រដាប់អាវុធនិងកងកម្លាំងសម្ព័ន្ធមិត្តរបស់យើងព្រមទាំងជំហរដ៏រឹងមាំរបស់ប្រជាជនរបស់យើង”។
ការបាញ់កាំភ្លើងអបអរដ៏ធំមួយបានផ្ទុះឡើងនៅភាគខាងលិចទីក្រុងអាឡេប៉ូខណៈដែលទូរទស្សន៍ស៊ីរីបង្ហាញពីទាហានឯកសណ្ឋាននិងជនស៊ីវិលកំពុងស្រែកថា “អាឡេប៉ូ! អាឡេប៉ូ!” និង “ព្រះជាម្ចាស់ ស៊ីរីនិង មានតែ Bashar ទេ”។ អ្នកឆ្លើយឆ្លងទូរទស្សន៍ស៊ីរីបាននិយាយថា “គ្មានទៀតទេនៅភាគខាងលិច គ្មានទៀតទេនៅភាគខាងកើត អាឡេប៉ូបានត្រឡប់មកវិញហើយ”។
ទីក្រុងបុរាណមួយនេះត្រូវបានបែងចែកទៅជាផ្នែករបស់ក្រុមឧទ្ទាមនិងរដ្ឋាភិបាលចាប់តាំងពីឆ្នាំ២០១២មកនៅពេលដែលពួកឧទ្ទាមមកពីជនបទបានវាយប្រហារនិងចាប់យកសង្កាត់ភាគខាងកើត។
សេចក្តីថ្លែងការណ៍របស់កងទ័ពបានលើកឡើងថា ការទទួលជ័យជម្នះក្នុងទីក្រុងអាឡេប៉ូគឺជា ការផ្លាស់ប្តូរជាយុទ្ធសាស្ត្រនិងជាចំណុចរបត់មួយនៅក្នុងសង្គ្រាមប្រឆាំងភេរវកម្មនិងជាការខកចិត្តចំពោះគម្រោងសម្លាប់មនុស្សរបស់ក្រុមភេរវកម្មនិងអ្នកគាំទ្ររបស់ខ្លួន៕
រាជធានីភ្នំពេញ៖តុលាការកំពូលនៅព្រឹកមិញនេះ បានបើកសវនាការលើបណ្តឹងជំទាស់របស់ យុវជន គង់ រ៉ៃយ៉ា ដែលជាប់ចោទពាក់ព័ន្ធនឹងការអំពាវនាវធ្វើបដិវត្តន៍ពណ៌ កាលពីខែសីហា ឆ្នាំ២០១៥ កន្លងទៅ។
គួរបញ្ជាក់ថា តុលាការឧទ្ធរណ៍ បានសម្រេចតម្កល់សាលក្រមសាលដំបូងរាជធានីភ្នំពេញ ដែលកាត់ទោសឱ្យយុវជន គង់ រ៉ៃយ៉ា ជាប់ពន្ធនាគារ១ឆ្នាំ៦ខែ ក្រោមការចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋ ខណយុវជនរូបនោះបង្ហោះនៅក្នុងប្រព័ន្ធហ្វេសប៊ុក Soriya Koko ថា «តើមានអ្នកណាហ៊ានធ្វើបដិវត្តពណ៌ជាមួយខ្ញុំទេ? ថ្ងៃណាមួយនៅពេលខាងមុខនេះ ខ្ញុំនឹងធ្វើបដិវត្តពណ៌ដើម្បីផ្លាស់ប្តូររបបមួយនេះចេញពីសង្គមខ្មែរ ទោះបីជាត្រូវជាប់គុក ឬស្លាប់ ក៏ដោយ ក៏ខ្ញុំត្រូវតែធ្វើដែរ»៕
រាជធានីភ្នំពេញ៖ក្រុមតំណាងរាស្ត្រគណបក្សប្រឆាំងបានបន្តកោះហៅរដ្ឋមន្ត្រីក្រសួងធម្មការ និងសាសនា លោក ហ៊ឹម ឆែម ឱ្យបំភ្លឺនៅរដ្ឋសភានាថ្ងៃទី២៩ ខែធ្នូ ឆ្នាំ២០១៦ខាងមុខនេះ បន្ទាប់ពីមានការកោះហៅរដ្ឋមន្ត្រីក្រសួងរ៉ែ និងរដ្ឋមន្ត្រីក្រសួងសុខាភិបាលរួចមក។
ការកោះហៅនេះធ្វើឡើងដោយ លោក យ៉ែម បុញ្ញឫទ្ធិ ប្រធានគណៈកម្មការទី៧នៃរដ្ឋសភា និងជាតំណាងរាស្ត្រមកពីគណបក្សសង្គ្រោះជាតិ៕
ខេត្តបន្ទាយមានជ័យ៖កូនអកតញ្ញូម្នាក់បែកថ្នាំ បានច្របាច់ ក ម្តាយបង្កើតគំរាមយកលុយ និងវាយទ្រព្យសម្បត្តិនៅក្នុងផ្ទះខ្ទេចខ្ទី ត្រូវបានកម្លាំងអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី ជា ដា មេបញ្ជាការមូលដ្ឋានកងរាជអាវុធហត្ថក្រុង ធ្វើការឃាត់ខ្លួននៅវេលាម៉ោង៦ព្រឹក ថ្ងៃទី២១ ខែធ្នូ ឆ្នាំ២០១៦ នៅចំណុចក្នុងផ្ទះក្បែរបេនឡានចាស់ ស្ថិតក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ក្រោយពីឃាត់ខ្លួនបានហើយជនសង្ស័យត្រូវអាវុធហត្ថក្រុងប៉ោយប៉ែត បញ្ជូនមកបញ្ជាការដ្ឋានកងរាជអាវុធហត្ថខេត្ត ដើម្បីធ្វើការសាកសួរ។
លោកវរសេនីយ៍ត្រី ព្រហ្ម ថេង ប្រធានមន្ទីរយុត្តិធម៌បានអោយដឹងថា ជនសង្ស័យឈ្មោះ សេង ចាន់សេរីរ័ត្ន (ហៅរ៉ូម៉ា) ភេទប្រុស អាយុ២៩ឆ្នាំ ចំណែកម្តាយ ឈ្មោះឃួន សុខឃាង អាយុ៥៥ មុខរបរលក់ដូរ អ្នកទាំងពីរនាក់រស់នៅក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ត្រី ព្រហ្ម ថេង បានបញ្ជាក់ទៀតថា បើតាមការអះអាងរបស់ម្តាយថា កូនរបស់ខ្លួនសព្វថ្ងៃនេះតែងតែផឹកស្រានិងជក់គ្រឿងញៀនរហូតដល់បែកថ្នាំ ហើយកន្លងមកធ្លាប់វាយធ្វើបាបម្តាយដើម្បីយកលុយទៅទិញថ្នាំញៀនជក់។ ដោយស៊ូទ្រាំក្នុងការធ្វើបាបរបស់កូនមិនបានក៍បានមកដាក់ពាក្យបណ្ដឹងនៅបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតអោយចាប់ខ្លួនតែម្ដង។
លោកវរសេនីយ៍ត្រីព្រហ្ម ថេង បានបញ្ជាក់អោយដឹងទៀតថា ជនសង្ស័យខាងលើធ្លាប់សមិត្ថកិច្ចចាប់ដាក់ក្នុងមណ្ឌលកែប្រែម្តងរួចមកហើយ តែមិនរៀងចាល។ក្រោយចេញពីមណ្ឌលកែប្រែវិញស្រាប់តែធ្វើបាបម្តាយលើសដើម។ លោកវរសេនីយ៍ត្រី ព្រហ្ម ថេង បានបញ្ជាក់អោយដឹងទៀតថា ក្រោយពីសមត្ថកិច្ចធ្វើការសួររួចមក ជនសង្ស័យបានឆ្លើយសារភាពថា ខ្លួនពិតជាបានប្រើអំពើហិង្សាលើម្តាយខ្លួនពិតប្រាកដមែន។ជនសង្ស័យត្រូវបានកម្លាំងជំនាញកសាងសំណុំរឿងបញ្ជូនទៅតុលាការដើម្បីដាក់ទោលទៅតាមផ្លូវច្បាប់៕
បាល់ទាត់៖ក្រុមឥន្ត្រីខៀវ Crystal Palace បានប្រកាសបណ្តេញលោក Alan Pardew ចេញពីអ្នកចាត់ការទូទៅកាលពីថ្ងៃព្រហស្បត៍ម្សិលមិញនេះបន្ទាប់ពីដឹកនាំក្រុមកអស់រយៈពេល២ឆ្នាំកន្លងមកមិនសូវទទួលបានជោគជ័យនោះ ។
Crystal Palace កំពុងស្ថិតនៅលំដាប់ទី១៧ នៃក្របខណ្ឌ Premier League និង ឈរលើតំបន់កាត់ចោលត្រឹមមួយពិន្ទុ ក្រោយឈ្នះតែមួយលើកក្នុងចំណោម១១ប្រកួត។
លោក Steve Parish សហម្ចាស់ក្លិប ឥន្ទ្រីខៀវលើកឡើងថា បទពិសោធដ៏ជោគជាំរបស់បុរសជនជាតិអង់គ្លេសរូបនេះមិនមានប្រសិទ្ធិភាពឡើយ។ ដូច្នេះ ត្រូវតែមានការផ្លាស់ប្ដូរ។
តាមរបាយការណ៍ចុងក្រោយរបស់ក្រុមឥន្ទ្រីខៀវ បានឲ្យដឹងថា ក្រុមអាចនឹងមានទំនាក់ទំនងជាមួយ អតីតអ្នកចាត់ការជម្រើសជាតិអង់គ្លេស Sam Allardyce ដើម្បីមកជំនួសកៅអីលោក Pardew។
គ្រូបង្វឹកវ័យ៦២ឆ្នាំរូបនេះ ពុំទាន់មានកៅអីអង្គុយទេចាប់តាំងពីរបូតតំណែងក្នុងក្រុមជម្រើសជាតិអង់គ្លេស កាលពីប្រមាណ៣ខែមុនដោយសារជាប់ពាក់ព័ន្ធនឹងរឿងអាស្រូវពុករលួយ និង ក្រោយដឹកនាំបានត្រឹមមួយប្រកួត។
គួរបញ្ជាក់ថា អតីតគ្រូបង្វឹក West Ham United និង Newcastle United ខាងលើចូលមកកាន់តំណែងនៅកីឡដ្ឋាន Selhurst Park កាលពីខែមករា ឆ្នាំ២០១៥៕
ខេត្តស្វាយរៀង៖សេចក្តីរាយការណ៍បានឲ្យដឹងថា កម្មករ-កម្មការនី៤៥នាក់បានរងរបួសធ្ងន់-ស្រាល ដោយសាររថយន្តកម្មករមួយគ្រឿងក្រឡាប់ផ្ងារជើងឡើង ដែលករណីនេះកើតឡើងលើកំណាត់ផ្លូវជាតិលេខ១ ត្រង់ចំណុចភូមិព្រៃផ្តៅសង្កាត់ច្រកម្ទេស ក្រុងបាវិត កាលពីវេលាម៉ោង០៧ និង១០នាទីព្រឹកថ្ងៃទី២៣ ខែធ្នូ ឆ្នាំ២០១៦នេះ។
សេចក្តីរាយការណ៍ដដែលបញ្ជាក់ថា ចំពោះមូលហេតុ ត្រូវគេដឹងថា គឺមកពីការបើកជែងគ្នា ទើបជ្រុលចង្កូតក្រឡាប់ផ្ងាជើងឡើងលើចាក់កម្មករកម្មការនីចោលលើចិញ្ចើមថ្នល់ រងរបួសធ្ងន់ធ្ងរ១៥នាក់ ក្នុងនោះ ស្ត្រីមានផ្ទៃពោះម្នាក់ និងស្រាល៣០នាក់ ។
ក្រោយកើតហេតុសមត្ថកិច្ចបានហៅរថយន្តសាមុយដឹកជនរងគ្រោះរបួសធ្ងន់មកមន្ទីរខេត្តស្វាយរៀង និង៣០នាក់ផ្សេងទៀតត្រូវបានដឹកបញ្ជូនមកមន្ទីរពេទ្យបង្អែកស្រុកប្រតិបត្តិជីភូ៕
រាជធានីភ្នំពេញ៖ប្រជាពលរដ្ឋជាច្រើនក៏បាននាំគ្នារត់ចេញមកមើលបន្ទាប់ពីឮសូរប្រាវ ក៏ស្រាប់តែប្រទះឃើញបុរសម្នាក់បែកក្បាលស្លាប់បាត់ទៅហើយ បង្កឲ្យមានការភ្ញាក់ផ្អើលកកស្ទះចរាចរណ៍។ ហេតុការណ៍នេះកើតឡើងកាលពីវេលាម៉ោង៧ និង២០នាទីយប់ ថ្ងៃទី២២ ខែធ្នូ ឆ្នាំ២០១៦ ស្ថិតនៅអគារសាងសង់មួយក្បែរផ្សារទំនើប Pencil ទល់មុខសណ្ឋារគារកាំបូឌីយ៉ាណា ស្ថិតនៅសង្កាត់ចុតុមុខ ខណ្ឌដូនពេញ រាជធានីភ្នំពេញ។
តាមការរៀបរាប់ពីអ្នកនៅក្បែរនោះបានឲ្យដឹងថា មុនពេលកើតហេតុគាត់អង្គុយលក់ដូរដូចធម្មតា មួយសន្ទុះក្រោយមកស្រាប់តែឮសំឡេងលាន់ធ្លាក់អ្វីម្យ៉ាង ហើយគាត់រត់ទៅមើលទើបដឹងថា ជាមនុស្សមានអាយុប្រហែល២៦ឆ្នាំ បានហូរឈាមតាមក្បាលស្លាប់នៅនឹងកន្លែង។
ដោយឡែកសមត្ថកិច្ចបានឲ្យដឹងថា ជនរងគ្រោះធ្លាប់ញៀនថ្នាំ ហើយកន្លងមកខាងសាលាខណ្ឌដូនពេញធ្លាប់ចាប់បានចំនួន២ដងបញ្ជូនទៅមជ្ឈមណ្ឌលឱអាកាសខ្ញុំរួចមកហើយ ហើយមុនពេលកើតហេតុជនបែកថ្នាំនោះបានឡើងលើដំបូងផ្ទះប្រជាពលរដ្ឋ ដោយជាន់លើប្រអប់កាប៊ីនភ្លើង រួចលោតចុះក្រោមបោកក្បាលនឹងស្នួហាលខោអាវក្បែរនោះដួលបោកក្បាលនឹងថ្នល់ស្លាប់តែម្តង។
ក្រោយពេលកើតហេតុ សពជនរងគ្រោះត្រូវសមត្ថកិច្ចយកទៅតម្កល់នៅវត្តសំបួរមាស បើមានបងប្អូនណាស្គាល់ជនរងគ្រោះ ឬសាច់ញាតិបានដឹងមកទទួលសពយកទៅធ្វើបុណ្យតាមប្រពៃណី៕
ខេត្តកំពង់ស្ពឺ៖ការធ្វើសមយុទ្ធ «នាគមាស» ឆ្នាំ២០១៦ រវាងកងទ័ពកម្ពុជា និងកងទ័ពចិននៅក្នុងទឹកដីខេត្តកំពង់ស្ពឺ នឹងត្រូវបិទបញ្ចប់ នៅព្រឹកថ្ងៃទី២៣ ខែធ្នូ ឆ្នាំ២០១៦នេះហើយបន្ទាប់ពីប្រព្រឹត្តទៅអស់រយៈពេល៩ថ្ងៃ។
ពិធីបិទសមយុទ្ធនេះ ធ្វើឡើងនៅវិទ្យាស្ថានយោធាកងទ័ពជើងគោក ខេត្តកំពង់ស្ពឺ ក្រោមវត្តមាន ឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិកម្ពុជា ដោយមានការចូលរួមពីតំណាងមេទ័ពរបស់ចិនផងដែរ។
សូមបញ្ជាក់ថា សមយុទ្ធនាគមាស ឆ្នាំ២០១៦ រយៈពេល៩ថ្ងៃ បានចាប់ផ្តើមពីថ្ងៃទី១៥ ដល់ ២៣ ខែធ្នូ ឆ្នាំ២០១៦។ លំហាត់សមយុទ្ធនេះមានយន្តហោះចំនួន០៤គ្រឿង ឧទ្ធម្ភាគចក្រចំនួន០១គ្រឿង និងកងទ័ពរំដោះប្រជាជានចិន-កម្ពុជា ជិត៤០០នាក់។ សមយុទ្ធមនុស្សធម៌ រវាងកងយោធពលខេមរភូមិន្ទកម្ពុជា ជាមួយកងទ័ពប្រជាជនចិននេះ មានលំហាត់សំខាន់ៗចំនួន៦ ក្នុងនោះរួមមាន ទី១៖សកម្មភាពលំហាត់ធ្វើផ្លូវ ទី២៖លំហាត់រាវមីន និងកម្ទេចគ្រឿងផ្ទុះ ទី៣៖លំហាត់ធ្វើស្ពាន (ស្ពានថ្មើរជើង និងស្ពានអេឡិចត្រូនិច) ទី៤៖លំហាត់ជួយសង្គ្រោះលើទឹក ទី៥៖សាងសង់ទីជម្រកនិងការផលិតទឹកសុទ្ធ និងទី៦៖ សកម្មភាពលំហាត់ទប់ទឹកជំនន់៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
