All posts by មេគង្គ ប៉ុស្តិ៍

មិនទាន់មានការអះអាងជាក់លាក់ពីតួលេខលម្អៀងស្មើនឹង៧៥០លានដុល្លារ ក្នុងការនាំខ្សាច់ខ្មែរទៅបរទេស

December 15, 2016ព័ត៌មានគួរចាប់អារម្មណ៍, ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ៖របាយការណ៍តួលេខលម្អៀងស្មើនឹងទឹកប្រាក់ប្រមាណ ៧៥០លានដុល្លារអាមេរិក ដែលដកស្រង់ចេញពីទិន្នន័យនៃការនាំខ្សាច់ចេញទៅបរទេសរបស់ក្រសួងរ៉ែកម្ពុជា និងតួលេខស្ថិតិពាណិជ្ជកម្មរដ្ឋាភិបាលប្រទេសសិង្ហបុរី បង្កឲ្យមានការចាប់អារម្មណ៍យ៉ាងខ្លាំង ដែលគេគិតថា ជាអំពើពុករលួយយ៉ាងធ្ងន់ធ្ងរដែលគួរតែមានការស៊ើបអង្កេតឲ្យបានពេញលេញ និងត្រឹមត្រូវ។
តួលេខដែលបង្ហាញដោយរាជរដ្ឋាភិបាលកម្ពុជាតាមរយៈក្រសួងពាណិជ្ជកម្ម ពាក់ព័ន្ធនឹងការនាំចេញខ្សាច់ទៅកាន់ប្រទេសសិង្ហបុរីរយៈពេល៨ឆ្នាំ ក្នុងចន្លោះឆ្នាំ២០០៧ដល់ឆ្នាំ២០១៥កន្លងទៅ គឺមានប្រមាណ២,៨លានតោន ពោលមានការខុសគ្នាទៅនឹងទិន្នន័យស្ថិតិពាណិជ្ជកម្មលើទំនិញរបស់អង្គការសហប្រជាជាតិ ដែលស្រង់ពីតួលេខរបស់នាយកដ្ឋានស្ថិតិពាណិជ្ជកម្មរដ្ឋាភិបាលប្រទេសសិង្ហបុរី ដែលបង្ហាញថា សម្រាប់រយៈពេលដូចគ្នាការនាំចេញខ្សាច់ពីកម្ពុជាចូលប្រទេសសិង្ហបុរីមានចំនួនប្រមាណ៧២,៨លានតោន ។ ករណីលម្អៀងនេះ ជាហេតុធ្វើឲ្យអង្គការសង្គមស៊ីវិលជិត៥០បានទាមទារឲ្យក្រសួងរ៉ែ និងថាមពល បង្ហាញទិន្នន័យជាក់លាក់ជាសាធារណៈ ហើយនៅថ្ងៃទី១៥ ខែធ្នូនេះ ឯកឧត្តមរដ្ឋមន្ត្រី ស៊ុយ សែម បានចូលបំភ្លឺជូនសភាតាមការគ្រោងទុក ប៉ុន្តែព័ត៌មានលម្អិត យ៉ាងណានោះ មិនទាន់ត្រូវបានទម្លាយឲ្យដឹងជាសាធារណៈនៅឡើយទេ។
គួររំឭកថា ទិន្នន័យនៃការនាំចេញខ្សាច់ពីកម្ពុជាទៅកាន់ប្រទេសសិង្ហបុរីដែលមានតួលេខលម្អៀងស្មើនឹងទឹកប្រាក់ប្រមាណ ៧៥០លានដុល្លារអាមេរិកនោះ មិនត្រូវបានឯកឧត្តម ស៊ុយ សែម សមាជិកគណៈកម្មាធិការកណ្តាលគណបក្សប្រជាជនកម្ពុជា និងជារដ្ឋមន្ត្រីក្រសួងរ៉ែ និងថាមពល ដាក់បង្ហាញជាសាធារណៈឲ្យដូច្នេះហើយ ទើបកាលពីថ្ងៃទី២៥ ខែវិច្ឆិកា ឆ្នាំ២០១៦កន្លងទៅ ឯកឧត្តម ហូរ វ៉ាន់ អ្នកតំណាងរាស្ត្រមណ្ឌលរាជធានីភ្នំពេញ មកពីណបក្សសង្គ្រោះជាតិ និងជាប្រធានគណៈកម្មការទី១០នៃរដ្ឋសភានីតិកាលទី៥ បានស្នើសុំឲ្យរាជរដ្ឋាភិបាលចាត់បញ្ជូនឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ព្រមទាំងសហការី ឲ្យចូលខ្លួនមកឆ្លើយបំភ្លឺរដ្ឋសភា នៅថ្ងៃទី១៥ ខែធ្នូ ឆ្នាំ២០១៦នេះ ។
មជ្ឈដ្ឋានទូទៅ បាន និងកំពុងផ្តោតការយកចិត្តទុកដាក់យ៉ាងខ្លាំង ចំពោះភាពលម្អៀងតួលេខនៃការនាំចេញខ្សាច់ពីប្រទេសកម្ពុជាទៅកាន់ប្រទេសសិង្ហបុរីក្នុងទំហំដ៏ច្រើនសន្ធឹកសន្ធាប់នេះ គឺអាច បង្កប់នូវអំពើពុករលួយជាប្រព័ន្ធយ៉ាងរឹងមាំ ដែលទាមទារឲ្យមានការស៊ើបអង្កេតស្រាវជ្រាវឲ្យបានជាក់លាក់៕

របាយការណ៍វិទ្យាស្ថានអាមេរិកបង្ហាញថាចិនកំពុងដំឡើងប្រព័ន្ធអាវុធលើកោះសិប្បនិម្មិត

December 15, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ចិន៖វិទ្យាស្ថានរបស់សហរដ្ឋអាមេរិកមួយបានរាយការណ៍កាលពីថ្ងៃពុធដោយលើកឡើងពីរូបភាពថ្មីនៃផ្កាយរណបថា ប្រទេសចិនហាក់ដូចជាបានដំឡើងអាវុធជាច្រើនដោយរួមបញ្ចូលទាំងប្រព័ន្ធប្រឆាំងយន្តហោះនិងប្រឆាំងមីស៊ីលផងដែរនៅលើកោះសិប្បនិម្មិតទាំងប្រាំពីរដែលខ្លួនបានសាងសង់នៅក្នុងសមុទ្រចិនខាងត្បូង។
វិទ្យាស្ថាន Asia Maritime Transparency Initiative (AMTI) នៅឯមជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិបានឲ្យដឹងថា ការរកឃើញរបស់ខ្លួននេះបានកើតឡើងបើទោះបីជាសេចក្តីថ្លែងការណ៍របស់ថ្នាក់ដឹកនាំចិនលើកឡើងថា ទីក្រុងប៉េកាំងគ្មានបំណងបង្កើនយោធានៅលើកោះទាំងនោះដែលជាកន្លែងទឹកដីត្រូវបានទាមទារដោយប្រទេសមួយចំនួនក៏ដោយ។
AMTI បានលើកឡើងថា ខ្លួនកំពុងតាមដានការសាងសង់រចនាសម្ព័ន្ធដែលមានរាងប្រាំមួយជ្រុងនៅលើថ្មប៉ប្រះទឹក Fiery Cross, Mischief និង Subi នៅក្នុងប្រជុំកោះ Spratly ចាប់តាំងពីខែមិថុនានិងកក្កដាមក។ ចិនបានសាងសង់វាលយន្តហោះយោធាប្រវែងវែងរួចទៅហើយនៅលើប្រជុំកោះទាំងនេះ។
AMTI បានឲ្យដឹងទៀតថា រូបភាពផ្កាយរណបនៃថ្មប៉ប្រះទឹក Hughes និង Gaven បានបង្ហាញពីអ្វីដែលហាក់ដូចជាកាំភ្លើងប្រឆាំងយន្តហោះនិងអ្វីដែលទំនងជាប្រព័ន្ធអាវុធ (CIWS) ដើម្បីការពារប្រឆាំងនឹងការវាយប្រហារដោយមីស៊ីលផ្លោង។ រូបភាពពីថ្មប៉ប្រះទឹក Fiery Cross បានបង្ហាញពីប៉មដែលទំនងជាផ្ទុករ៉ាដាកំណត់គោលដៅ។
ទោះបីជាយ៉ាងណាក៏ដោយ ប្រទេសចិនបានអះអាងថា ការសាងសង់ផ្នែកយោធានៅលើកោះទាំងនេះនឹងត្រូវបានកំណត់ទៅតាមតម្រូវការចាំបាច់ផ្នែកការពារ។
ប្រធានាធិបតីជាប់ឆ្នោតសហរដ្ឋអាមេរិកលោក Donald Trump ដែលនឹងចូលកាន់តំណែងនៅថ្ងៃទី២០ខែមករាខាងមុខនេះក៏បានរិះគន់ផងដែរចំពោះឥរិយាបថរបស់ចិននៅក្នុងសមុទ្រចិនខាងត្បូងខណៈពេលដែលលោកបានបង្ហាញជាសញ្ញាថាលោកអាចចាត់វិធីសាស្ត្រនិងឥរិយាបថតានតឹងជាងមុនលើប្រទេសចិន៕

ឧទ្ធរណ៍សម្រេចតម្កល់សាលក្រមសាលាដំបូងលោកនី ចរិយា

December 15, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖នៅរសៀលម្សិលមិញសាលាឧទ្ធរណ៍បានសម្រេចតម្កល់សាលក្រមសាលាដំបូងរាជធានីភ្នំពេញ ទុកជាបានការ ករណីសំណុំរឿងលោក នី ចរិយា ដែលប្តឹងដោយមន្ត្រីតុលាការខេត្តសៀមរាបពីបទបរិហារកេរ្តិ៍។
យ៉ាងណាក៏ដោយ លោក សំ សុគង់ មេធាវីការពារក្តីឲ្យ លោក នី ចរិយា ចាត់ទុក សេចក្តីសម្រេចនេះ មិនបានផ្តល់ភាពយុត្តិធម៌ ឬមិនអាចទទួលយកបាននោះទេ។
សូមជម្រាបថា សាលាដំបូងរាជធានីភ្នំពេញកាលពីខែកញ្ញាកន្លងទៅ បានសម្រេចផ្តន្ទាទោស លោក នី ចរិយា អតីតប្រធានផ្នែកស៊ើបអង្កេតរបស់សមាគមអាដហុក ឲ្យជាប់ពន្ធនាគារចំនួន៦ខែ និងពិន័យជាប្រាក់ចំនួន៦លានរៀល ពាក់ព័ន្ធនឹងបណ្តឹងរបស់មន្ត្រីតុលាការខេត្តសៀមរាប ដែលប្តឹងលោកពីបទបរិហារកេរ្តិ៍៕

តុលាការកាត់ទោសអតីតអភិបាលក្រុងណានជីងដាក់ពន្ធនាគារ១២ឆ្នាំ

December 15, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ប៉េកាំង៖អតីតអភិបាលក្រុងណានជីងលោក លោក Yang Weize ត្រូវបានតុលាការថ្នាក់តំបន់នៅភាគខាងកើតប្រទេសចិនសម្រេចផ្តន្ទាទោសដាក់ពន្ធនាគាររយៈពេល១២ឆ្នាំ និង០៦ខែ ក្រោយពេលដែលរូបលោកត្រូវបានគេរកឃើញថាបានប្រព្រឹត្តអំពើពុករលួយប្រឆាំងនឹងច្បាប់។
យោងតាមទីភ្នាក់ងារសារព័ត៌មាន Channel News Asia បានផ្សាយថា លោក Yang Weize ត្រូវបានដាក់ឲ្យស្ថិតនៅក្រោមការស៊ើបអង្កេតតាំងពីឆ្នាំ២០១៥មកម្ល៉េះ ដោយអង្គភាពប្រឆាំង អំពើពុករលួយរបស់គណបក្សកុម្មុនិស្តចិនផ្ទាល់ ហើយតុលាការក្រុង Ningbo បានរកឃើញថា លោកបានទទួលសំណូកដោយផ្ទាល់ ឬតាមរយៈភរិយារបស់លោក ដែលសរុបជាទឹកប្រាក់ចំនួន១៦.៤លានយ័នស្មើនឹង២.៣៨លានដុល្លារ កាលពីចន្លោះឆ្នាំ២០០៥ និង២០១៤។
សារព័ត៌មានដដែលផ្សាយថា អតីតអភិបាលក្រុងណានជីងរូបនេះបានសារភាពកំហុស និងបានបង្ហាញពីការសោកស្តាយចំពោះទង្វើរបស់ខ្លួន ហើយបានសន្យាថា នឹងចូលរួមសហការក្នុងការយកលុយកខ្វក់ទាំងប៉ុន្មានត្រឡប់ទៅវិញ ដែលប្រការនេះនាំលោក Yang ទទួលទម្ងន់ទោសស្រាលជាងមុន៕

Oscar អាចនឹងផ្លាស់ទៅលេងនៅចិននាខែមករាខាងមុខនេះ

December 15, 2016កីឡាមេគង្គ ប៉ុស្តិ៍

បាល់ទាត់៖សេចក្តីរាយការណ៍ពីកក្រុមតោខៀវ Chelsea បានឲ្យដឹងថា កីឡាករ Oscar អាចនឹងពិចារណាចំពោះការចាកចេញពីក្រុមមួយនេះ បន្ទាប់ពីក្រុមមហាសេដ្ឋី Shanghai SiPG បានដាក់សំណើ៦០លានផោនក្នុងការនាំយកកីឡាកររូបនេះមកកាន់ក្រុមក្របខ័ណ្ឌ Chinese Super League នាខែមករាខាងមុខនេះ។
ខ្សែបម្រើសញ្ជាតិប្រេស៊ីលវ័យ២៥ឆ្នាំរូបនេះ មូលហេតុដែលបណ្តាលឲ្យរូបគេមានបំណងចង់ចាកចេញនោះ ពីព្រោះរូបគេមិនសប្បាយចិត្ត បន្ទាប់ពីមិនបានទទួលកៅអីក្នុងក្រុមជម្រើសដំបូងទេ ក្រោមការដឹកនាំរបស់លោក Antonio Conte នោះ។
យោងតាមការចេញផ្សាយរបស់កាសែត The sport mole បានអះអាងថា អតីតគ្រូបង្វឹកក្លឹប Chelsea លោក Andre Villas Boas បានដាក់សំណើសុំផ្ទេរកីឡាកររូបនេះ ក្នុងតម្លៃខ្លួន៦០លានផោន បន្ទាប់ពីបានដឹងថា Oscar មិនមិនសប្បាយចិត្ត ជាមួយនិងក្រុមនេះ ហើយ ក្រុមដែលកំពុងនាំមុខគេក្នុងក្របខ័ណ្ឌ PLនេះបានត្រៀមខ្លួនបំបែកឯតទគ្គកម្មនិងបានត្រៀមខ្លួនទទួលយកប្រាក់យ៉ាងច្រើនសន្ធឹកសន្ធាប់ បន្ទាប់ពីទទួលសំណើពីក្លឹប Shanghai SiPG ។
គួរបញ្ជាក់ថា Oscar អាចនឹងក្លាយជាកីឡាករ Chelsea ទី២ដែលផ្ទេរទៅចិននៅក្នុងរយៈពេល១២ខែចុងក្រោយ បន្ទាប់ពីកីឡាករ Ramires ដែលបានទៅចូលរួមជាមួយក្រុម Jiangsu Suning របស់ចិនកាលពីខែមករា៕

ឃាត់ខ្លួនមុខសញ្ញាចោរប្លន់ម្នាក់តាមដីកាបង្គាប់របស់តុលាការ

December 15, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖អនុវត្តតាមដីកាបង្គាប់ចាប់ខ្លួនសមត្ថកិច្ចអាវុធហត្ថបានឃាត់ខ្លួនមុខសញ្ញាចោរប្លន់ម្នាក់ដើម្បីបញ្ជូនទៅតុលាការ។
លោក ម៉ែន វិចិត្រ កងកម្លាំងមូលដ្ឋានកងរាជអាវុធហត្ថស្រុកមោងឫស្សីបានប្រាប់អោយដឹងថា នៅម៉ោង១០ និង០០នាទីយប់ថ្ងៃទី១៣ ខែធ្នូ ឆ្នាំ២០១៦ នៅចំណុចអូរតាមៀវ ឋិតនៅភូមិកកោះ ឃុំកកោះ ស្រុកមោងឫស្សី ខេត្តបាត់ដំបង កម្លាំងការិយាល័យជំនាញបានចុះអនុវត្តដីកាឈានដល់ការឃាត់ខ្លួនជនសង្ស័យម្នាក់ឈ្មោះ តុក ណា ហៅតុក តឿ ភេទប្រុស អាយុ២៩ឆ្នាំ មានមុខរបរព្រូឡានរស់នៅភូមិកន្សៃបន្ទាយ ឃុំមោង ស្រុកមោងឫស្សី។
សំណុំរឿងពាក់ពន្ធ័ជនជាប់ចោទខាងលើត្រូវបានចៅក្រមស៊ើបសួរលោក គឹម រ៉ាវី ដាក់បន្ទុកពីបទលួចមានស្ថានទម្ងន់ទោស និងប្រើប្រាស់ឯកសណ្ឋានក្លែងក្លាយនៅលើទីតាំងខ្នងប្រឡាយ១៧មេសា ក្នុងភូមិចាមរអា ឃុំព្រៃស្វាយ ស្រុកមោងឫស្សី ខេត្តបាត់ដំបង កាលពីថ្ងៃទី១០ ខែមីនា ឆ្នាំ២០១៣។
បន្ទាប់ពីការឃាត់ខ្លួនកម្លាំងជំនាញបានបំពេញបែបបទបញ្ជូនជនជាប់ចោទទៅកាន់តុលាកាអនុវត្តតាមនីតិវិធី៕

បាត់ប្រពន្ធ៣ថ្ងៃស្រាប់តែឮដំណឹងថារត់តាមប្រុសមកសម្ងំជក់គ្រឿងញៀន

December 15, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ៖នៅព្រឹក ថ្ងៃទី១៥ ខែធ្នូ ឆ្នាំ២០១៦ វេលាម៉ោង៨ និង១៥នាទីបុរសម្នាក់រត់មកប្តឹងនគរបាលប៉ុស្តិ៍ស្ទឹងមានជ័យ ខណៈបានឮដំណឹងថា ប្រពន្ធរបស់ខ្លួនរត់តាមប្រុសថ្មីមកសម្ងំលាកខ្លួននៅម្តុំវត្តស្ទឹងមានជ័យ។
បុរសជាប្តីខាងលើបានរៀបរាប់ទាំងទឹកភ្នែករលីងរលោងថា រូបគាត់ហួសចិត្តដែលគិតមកថា ចិត្តនិមលស្រាលជាងសំឡីដោយសារតែ (facebook) បានមកបំបែករូបគាត់ និងកូនប្រុសដែលទើបតែមានអាយុ៣ឆ្នាំ ហើយសុខចិត្តមកលួចមានសហាយស្មន់ជាមួយប្រុសស្ទាវដែលប្រើប្រាស់គ្រឿងញៀនស្ថិតនៅម្តុំវត្តស្ទឹងមានជ័យ សង្កាត់ស្ទឹងមានជ័យ ខណ្ខមានជ័យ រាជធានីភ្នំពេញ។
បុរសខាងលើមានឈ្មោះ ញាន ប៊ុនឌី អាយុ២៨ឆ្នាំ មុខរបរអ្នកបើកបរ ស្នាក់នៅភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ បានប្រាប់អោយដឹងថា ប្រពន្ធរបស់គាត់ជាអ្នកស្រុកល្វាឯម ខេត្តកណ្តាល ហើយពួកគាត់ទាំង២នាក់បានរៀបការតាមប្រពៃណីអស់រយៈពេល៥ឆ្នាំមកហើយដែលបានបន្សល់នូវចំណងដៃកូនប្រុសម្នាក់ដែលមានអាយុទើបតែ៣ខួប។ បុរសរូបនេះបន្តថា ដោយសារតែជីវភាពខ្វះខាតលោកក៏បានចាកចេញពីស្រុកកំណើតមកធ្វើការនៅភ្នំពេញ ហើយបានចូលបំរើការនៅក្រុមហ៊ុន(កូកាកូឡា) ចំណែកប្រពន្ឋរបស់គាត់លក់ដូរខោអាវបន្តិចបន្តួចនៅឯស្រុកភូមិ។
គាត់បញ្ជាក់ថា នៅរយៈពេល៣ខែចុងក្រោយនេះប្រពន្ធរបស់គាត់បានទិញទូរស្ទ័សេរីទំនើប ហើយបានបង្កើត (facebook )ដែលបានដាក់ឈ្មោះ Acount .socheata ហើយចូលចិត្តបង្ហោះរូបលេង និង chat លេងជាមួយប្រុសៗ ហើយនៅថ្ងៃ១២ខែធ្នូ ឆ្នាំ២០១៦ថ្មីៗ នេះ ប្រពន្ធរបស់គាត់បានលេង chat ជាមួយម្ចាស់ Acount មានឈ្មោះ គឹម ហេងែល មានរហស្សនាម (កំពូលអ្នកញ៉ែស្រី) បានទាក់ទងយកប្រពន្ធរបស់គាត់បានសំរេចដោយសុវត្ថិភាពដោយបាននាំយកម៉ូតូ១គ្រឿងមកម៉ាកគុបមកជាមួយដែលជាកេរ្តិ៍ក្នុងចំណងដៃតាំងពីបានរៀបកាមក។
គាត់បន្ថែមទៀតថា ក្នុងមានគាត់ជាប្តីគាត់មិនបានគិតអ្វីវែងធ្ងាយ ឬចងកម្មពារប្រើហិង្សាលើប្រពន្ធនោះទេ តែអ្វីដែលគាត់បារម្ភនោះគឺខ្លាចប្រពន្ធរបស់គាត់ធ្លាក់ខ្លួនចូលក្នុងសង្គមគ្រឿងញៀន។ គាត់បន្តទៀតថា គាត់មិនរករឿងប្រពន្ធដែលឆោតល្ងង់ចាញ់បោកគេនោះទេ សំខាន់គឺគាត់ចង់អោយប្រពន្ធរបស់គាត់ត្រឡប់ទៅផ្ទះវិញដើម្បីមើលថែកូនវិញ៕

កងទ័ពកម្ពុជា និងកងទ័ពចិនធ្វើសមទុយ្ធនៅខេត្តកំពងស្ពឺ

December 15, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តកំពង់ស្ពឺ៖ការធ្វើសមយុទ្ធយោធារួមគ្នារវាងកងយោធពលខេមរភូមិន្ទកម្ពុជា ជាមួយកងទ័ពប្រជាជនចិនដែលមានឈ្មោះថា «លំហាត់នាគមាសឆ្នាំ២០១៦» បានចាប់ផ្តើមនៅខេត្តកំពង់ស្ពឺ នាព្រឹកថ្ងៃទី១៥ ខែធ្នូ ឆ្នាំ២០១៦ក្រោមវត្តមាននាយឧត្តមសេនីយ៍ ប៉ុល សារឿន អគ្គមេបញ្ជាការនៃកងយោធពលខេមរភូមិន្ទ៕

ជីតាតិរច្ឆានចាប់រំលោភចៅស្រីបង្កើតខ្លួនឯង

December 15, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តបាត់ដំបង៖សមត្ថកិច្ចបានឃាត់ខ្លួនជនសង្ស័យម្នាក់តាមពាក្យបណ្តឹងរបស់ប្រពន្ធពីបទរំលោភចៅស្រីបង្កើតបានសម្រេច រហូតដល់ទៅ២ដងទើបបែកការណ៍។ ការឃាត់ខ្លួននេះធ្វើឡើងនៅព្រឹកថ្ងៃទី១៤ ខែធ្នូ ឆ្នាំ២០១៦ម្សិលមិញនៅភូមិដូង ឃុំចែងមានជ័យ ស្រុកបានណន់ ខេត្តបាត់ដំបង។
សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនមានឈ្មោះ យ៉ាវ ផា ភេទប្រុស អាយុ៧១ឆ្នាំ នៅភូមិ ឃុំខាងលើ ក្រោយពីបានទទួលពាក្យបណ្តឹងពីឈ្មោះ ទូច សារឿន ហៅវិញ ភេទស្រី អាយុ៥៧ឆ្នាំ ប្តឹងជនសង្ស័យជាប្តីរបស់ខ្លួនពីបទរំលោភចៅស្រីបង្កើតបានសម្រេច កាលពីថ្ងៃទី១៣ ខែធ្នូ ឆ្នាំ២០១៦។ ចំណែកកក្មេងស្រីរងគ្រោះមានឈ្មោះ ន.ស.ន អាយុ៧ឆ្នាំ ស្នាក់នៅកន្លែងកើតហេតុ ត្រូវជីតាបង្កើតចាប់រំលោភក្នុងផ្ទះរបស់ខ្លួន។
តាមការសាកសួររបស់សមត្ថកិច្ចជនសង្ស័យបានឆ្លើយសារភាពថា ខ្លួនពិតជាបានរំលោភចៅស្រីបង្កើតរបស់ខ្លួនមែនគឺរំលោភបាន២ដង ពេលដែលប្រពន្ធរបស់ខ្លួនមិននៅផ្ទះ។
ក្រោយពីបានធ្វើការសាកសួរសមត្ថកិច្ចកំពុងរៀបចំសំនុំរឿងបញ្ជូនទៅតុលាការ ដើម្បីចាត់ការជីតាតិរិច្ឆាននេះតាមនីតិវិធី៕

បង្ក្រាបរថយន្តដឹកឈើ១គ្រឿង ឃាត់ខ្លួនមនុស្ស២នាក់ និងឈើធ្នង់៩៨ដុំ

December 15, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយ៖ប៉ែន សុផល
បាត់ដំបង៖អាវុធហត្ថក្រុងបាត់ដំបងសហការជាមួយមន្ត្រីខណ្ឌរដ្ឋបាលព្រៃឈើចុះប្រតិបត្តិការបង្ក្រាបរថយន្តយោធាដឹកជញ្ជូនឈើខុសច្បាប់ចំនួន១គ្រឿងឃាត់ខ្លួនមនុស្ស២នាក់និងដកហូតបានប្រភេទឈើធ្នង់ចំនួន៩៨ដុំ។ ហេតុការណ៍បង្ក្រាបនេះធ្វើឡើងនៅវេលាម៉ោង១៥ និង០០នាទី ថ្ងៃទី១៤ ខែធ្នូ ឆ្នាំ២០១៦ នៅត្រង់ចំណុចភូមិច្រាបវាល ឃុំអន្លង់វិល ស្រុកសង្កែ ខេត្តបាត់ដំបង។
សមត្ថកិច្ចបានអោយដឹងថា ក្នុងកិច្ចប្រតិបត្តិការខាងលើនេះសមត្ថកិច្ចជំនាញបានធ្វើការឃាត់ខ្លួនជនសង្ស័យ ចំនួន២នាក់រួមមាន៖ ទី១-ឈ្មោះ ងឿម សំណាង ភេទប្រុស អាយុ២៦ ឆ្នាំ មុខរបរ យោធា កងទ័ពជើងគោក ទិសទី៤ រស់នៅភូមិជើងភ្លើង ឃុំស្នាមព្រះ ស្រុកបាកាន ខេត្តពោធិ៍សាត់។ ទី២-ឈ្មោះ ស្វាយ ញឿន ភេទប្រុស អាយុ៤៤ ឆ្នាំ មុខរបរយោធាកងទ័ពជើងគោកទិសទី៤ រស់នៅផ្ទះលេខ ១៧៦ ក្រុមទី១២ ភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង។ ចំពោះវត្ថុតាងដកហូតរួមមាន៖
១-ប្រភេទឈើធ្នង់ ចំនួន ៩៨ ដុំ ។ ២-រថយន្តយោធា ០១ គ្រឿង ។
បច្ចុប្បន្នជនសង្ស័យរួមនិងវត្ថុតាងខាងលើត្រូវបានរក្សាទុកនៅខណ្ឌរដ្ឋបាលព្រៃឈើខេត្តបាត់ដំបងដើម្បីចាត់ការតាមនីតិវិធី៕

ទីតាំងអាជីវកម្មដុតយកមាសមួយកន្លែងកំពុងបង្កផលប៉ះពាល់ និងរំខានការរស់នៅរបស់ប្រជាពលរដ្ឋ

December 14, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ដោយ៖ប៉ែន សុផល
បាត់ដំបង៖ប្រជាពលរដ្ឋតំណាងអោយ១០គ្រួសាររស់នៅក្នុងភូមិដាំស្ពៃ សង្កាត់ ស្លាកែត ក្រុងបាត់ដំបង សំណូមពរដល់អាជ្ញាធរខេត្តជួយត្រួតពិនិត្យនិងដោះស្រាយទៅលើទីតាំងធ្វើអាជីវកម្មដុតយកមាសមួយកន្លែងថាបានបង្កផលប៉ះពាល់និងរំខានការរស់នៅយ៉ាងធ្ងន់ធ្ងរដល់ពួកគាត់។
ប្រភពបានលើកឡើងថា ទីតាំងធ្វើអាជីវកម្មដុតយកមាសមួយកន្លែងខាងលើនេះមានទីតាំងស្ថិតក្នុងភូមិដាំស្ពៃ សង្កាត់ស្លាកែត ក្រុងនិងខេត្តបាត់ដំបង ។
លោក ផាន់ថង ដារិទ្ធនិងលោកសាមុត ស៊ីរីវណ្ណតំណាងអោយប្រជាពលរដ្ឋចំនួន១០គ្រួសារបានលើកឡើងថា ជាច្រើនឆ្នាំកន្លងមកហើយដែលទីតាំងធ្វើអាជីវកម្មដុតយកមាសខាងលើបានបង្ហុយផ្សែង អាស៊ីតគីមីមកលើលំនៅដ្ឋានរបស់ពួកគាត់ពេលដកដង្ហើមម្តងៗធ្វើអោយប៉ះពាល់យ៉ាងធ្ងន់ធ្ងរទៅលើសុខភាព និងផ្លូវដកដង្ហើម ។
ប្រភពផ្សេងទៀតបានលើកឡើងថា នៅពេលដែលទីតាំងធ្វើអាជីវកម្មដុតយកមាសបង្ហុយផ្សែងមកម្តងៗពួកគាត់មិនដែលហ៊ាននៅផ្ទះទេ តែងជិះម៉ូតូចេញឆ្ងាយទៅឆ្ងាយស្ទើររាល់ថ្ងៃ ព្រោះខ្លាចប៉ះពាល់ដល់សុខភាព និងផ្លូវដកដង្ហើម។
ហើយក្នុងនោះដែរពួកគាត់សំណូមពរស្នើសុំអោយអាជ្ញាធរពាក់ព័ន្ធជាពិសេសមន្ទីរបរិស្ថានជួយចុះត្រួតពិនិត្យនិងដោះស្រាយទៅលើទីតាំងធ្វើអាជីវកម្មដុតយកមាសដែលកំពុងបង្ករបញ្ហាទៅលើសុខភាពរបស់ពួកគាត់ផង។
ពាក់ព័ន្ធការចោទប្រកាន់នេះដែរ លោក មុត បូរិន ម្ចាស់ទីតាំងធ្វើអាជីវកម្មដុតយកមាសខាងលើបានប្រាប់សារពត៌មានយើងនៅថ្ងៃទី១៤ធ្នូនេះថា លោកបើកធ្វើអាជីវកម្មនេះជាង២០ឆ្នាំមកហើយ លោកទទួលស្គាល់ថាមានផ្សែងហ៊ុយទៅលើលំនៅឋានពួកគាត់មែន ប៉ុន្តែផ្សែងនោះមិនមែនជាផ្សែងអាស៊ីតគីមីពុលដូចការលើកឡើងខាងលើនោះទេ។
ពាក់ព័ន្ធទៅការលើកឡើងរបស់ប្រជាពលរដ្ឋ លោក អែល សាលែស ចៅសង្កាត់ស្លាកែតបានប្រាប់សារព័ត៌មានយើងនៅរសៀលថ្ងៃទី១៤ ខែធ្នូ ឆ្នាំ២០១៦នេះថា បញ្ហាទីតាំងធ្វើអាជីវកម្មដុតយកមាសបង្ករផលប៉ះពាល់ដល់សុខភាពប្រជាពលរដ្ឋខាងលើនេះលោកបានទទួលហើយ ហើយលោកនិងកំពុងរៀបចំដើម្បីចុះទៅធ្វើកិច្ចការនេះ។
ចំណែកលោក ជួប សារុន ប្រធានមន្ទីរបរិស្ថានខេត្តបាត់ដំបងជំវិញទៅនិងបញ្ហាខាងលើនេះលោកបានប្រាប់ថា នៅមិនទាន់ទទួលបានព័ត៌មាននេះទេលោកនឹងចាត់អោយមន្ត្រីរបស់លោកចុះទៅពិនិត្យមើល៕

ពួកឧទ្ទាមដកខ្លួនចេញពីទីក្រុងអាឡេប៉ូនៃប្រទេសស៊ីរី

December 14, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ស៊ីរី៖ការតស៊ូរបស់ពួកឧទ្ទាមនៅក្នុងទីក្រុងអាឡេប៉ូនៃប្រទេសស៊ីរីបានបញ្ចប់កាលពីថ្ងៃអង្គារបន្ទាប់ពីការប្រយុទ្ធគ្នាជាច្រើនឆ្នាំព្រមទាំងការឡោមព័ទ្ធនិងការទម្លាក់គ្រាប់បែកជាច្រើនខែ ខណៈដែលពួកឧទ្ទាមបានយល់ព្រមដើម្បីដកខ្លួននៅក្នុងបទឈប់បាញ់មួយ។
សមរភូមិនៃទីក្រុងអាឡេប៉ូដែលជាសង្គ្រាមស៊ីវិលអាក្រក់បំផុតមួយដែលបាននាំឲ្យប្រទេសមហាអំណាចពិភពលោកនិងក្នុងតំបន់ចូលរួមគឺបានបញ្ចប់ជាមួយនឹងការទទួលជ័យជម្នះសម្រាប់លោកប្រធានាធិបតីស៊ីរីបាសារអាល់អាសាដនិងក្រុមចម្រុះយោធារបស់លោកនៃប្រទេសរុស្ស៊ី អ៊ីរ៉ង់និងកងជីវពលនិកាយស៊ីអ៊ីតក្នុងតំបន់។
ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិលោក Vitaly Churkin បានប្រាប់កិច្ចប្រជុំនៃក្រុមប្រឹក្សាសន្តិសុខ UN ថា “ប៉ុន្មានម៉ោងចុងក្រោយនេះ យើងបានទទួលព័ត៌មានថា សកម្មភាពយោធានៅភាគខាងកើតទីក្រុងអាឡេប៉ូបានបញ្ឈប់ វាបានបញ្ឈប់ហើយ។ រដ្ឋាភិបាលស៊ីរីបានបង្កើតការត្រួតពិនិត្យនៅភាគខាងកើតទីក្រុងអាឡេប៉ូ”។
មន្ត្រីក្រុមឧទ្ទាមបាននិយាយថា ការប្រយុទ្ធគ្នាបានបញ្ចប់នៅយប់ថ្ងៃអង្គារចំណែកប្រភពនៃសម្ព័ន្ធភាពយោធាគាំទ្រលោកអាសាដបានឲ្យដឹងថា ការជម្លៀសអ្នកប្រយុទ្ធបានចាប់ផ្តើមនៅព្រឹកព្រលឹមថ្ងៃពុធ។ សេចក្តីរាយការណ៍មួយរបស់ Reuters នៅក្នុងទីក្រុងអាឡេប៉ូបានបង្ហាញកាលពីថ្ងៃអង្គារថា ស្នូរផ្ទុះនៃការទម្លាក់គ្រាប់បែកលែងត្រូវបានគេឮទៀតហើយ។
ប្រភពពីរដ្ឋាភិបាលទួរគីបានលើកឡើងថា ក្រុមអ្នកប្រយុទ្ធនិងគ្រួសាររបស់ពួកគេរួមជាមួយនឹងជនស៊ីវិលនឹងមានពេលរហូតដល់ល្ងាចថ្ងៃពុធដើម្បីចាកចេញពីទីក្រុងនេះ។ បទឈប់បាញ់នេះត្រូវបានចរចាដោយប្រទេសទួរគីនិងរុស្ស៊ីដោយគ្មានការចូលរួមរបស់សហរដ្ឋអាមេរិក។
មេបញ្ជាការម្នាក់នៃក្រុមឧទ្ទាម Jabha Shamiya បាននិយាយថា អាឡេប៉ូគឺជាការទទួលជ័យជម្នះផ្នែកស្មារតីសម្រាប់ក្រុមបះបោរ។ មេបញ្ជាការដែលសុំមិនបញ្ចេញឈ្មោះរូបនេះបានប្រាប់ Reuters ថា “ខ្ញុំសង្ឃឹមថា គ្រប់យ៉ាងនឹងដំណើរការទៅយ៉ាងរលូន”។
គួរបញ្ជាក់ថា ស្ថានភាពនៃជនស៊ីវិលបានបង្កឲ្យមានកំហឹងជាសកលបន្ទាប់ពីការវាយលុកដោយកងទ័ពស៊ីរីនិងសម្ព័ន្ធមិត្តរបស់ខ្លួននៅទូទាំងទឹកដីរបស់ក្រុមឧទ្ទាមក្នុងរយៈពេលជាងពីរសប្តាហ៍មកនេះ។
កាលពីថ្ងៃអង្គារ អង្គការសហប្រជាជាតិបានសម្តែងក្តីព្រួយបារម្ភយ៉ាងខ្លាំងអំពីរបាយការណ៍ដែលខ្លួនបានទទួលដែលថា ទាហានស៊ីរីនិងពួកយុទ្ធជនសម្ព័ន្ធមិត្តអ៊ីរ៉ាក់បានបាញ់សម្លាប់មនុស្ស ចំនួន៨២នាក់នៅក្នុងសង្កាត់កាន់កាប់ឡើងវិញនៃភាគខាងកើតទីក្រុងអាឡេប៉ូ៕

សម្តេចក្រុមព្រះចុះជួបសំណេះសំណាលជាមួយពលរដ្ឋនៅស្រុកឈូក

December 14, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តកំពត៖សម្តេចក្រុមព្រះនរោត្តម រណឫទ្ធិ ព្រះប្រធានគណបក្ស ហ្វ៊ុនស៊ិនប៉ិច នៅព្រឹកថ្ងៃទី១៤ ខែធ្នូ ឆ្នាំ២០១៦នេះបានចុះជួបសំណេះសំណាលជាមួយក្រុមប្រជាពលរដ្ឋប្រមាណ៥០០នាក់នៅស្រុកឈូក ខេត្តកំពត។
ការចុះជួបពលរដ្ឋ ដែលជាអ្នកគាំទ្រគណបក្សហ្វ៊ុនស៊ីនប៉ិច របស់សម្តេចក្រុមព្រះនោះគឺជាយុទ្ធនាការនៃការស្វែងរកសម្លេងគាំទ្រមុនពេលបោះឆ្នោតជាតិមកដល់នាពេលខាងមុខ៕

លោក កឹម សុខា ចេញទៅកាន់ប្រទេសថៃជាមួយកូនស្រីព្រឹកមិញ

December 14, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖មន្ត្រីជាន់ខ្ពស់ CNRP បានឲ្យដឹងថា លោក កឹម សុខា ប្រធានស្តីទីគណបក្សសង្គ្រោះជាតិ រួមទាំងកូនស្រីបានចាកចេញពីប្រទេសកម្ពុជា ទៅកាន់ប្រទេសថៃ នៅម៉ោង១០៖២០នាទីព្រឹកថ្ងៃទី១៤ ខែធ្នូ ឆ្នាំ២០១៦ ដើម្បីពិនិត្យសុខាភាពមាត់-ធ្មេញ។
គេពុំទទួលបានព័ត៌មានណាផ្សេងទៀត ទាក់ទងការចាកចេញរបស់មេដឹកនាំបក្សប្រឆាំងទៅប្រទេសថៃនេះទេ ។ ប៉ុន្តែមន្ត្រីមួយចំនួនលួចប្រាប់ក្រៅផ្លូវការថា លោក សម រង្ស៊ី អាចនឹងធ្វើដំណើរស្កាត់ទៅជួបលោក កឹម សុខា នៅប្រទេសថៃផងដែរ៕

ទីបំផុត Messi បានជួបក្មេងប្រុសដែលពាក់អាវធ្វើពីថង់ហើយ

December 14, 2016កីឡាមេគង្គ ប៉ុស្តិ៍

បាល់ទាត់៖កីឡាករ Lionel Messi បានជួបនឹងក្មេងប្រុសអាហ្វហ្គានីស្ថានដែលបានទាក់ចិត្តមនុស្សមួយពិភពលោកនាពេលកន្លងទៅជាមួយនិងអាវឈ្មោះ Messi ធ្វើពីថង់ប្លាស្ទិក ហើយពេលនេះ Murtaza បានជួបនិងនិមិត្តរូបរបស់ខ្លួនហើយកាលពីថ្ងៃអង្គារ។
ក្មេងប្រុស Murtaza អាយុ៦ឆ្នាំរូបនេះ បានថតក្នុងខែមករាដោយពាក់អាវធ្វើពីថង់ប្លាស្ទិកជាមួយស្នាមឆ្នូតខៀវនិងសដែលតំណាងឲ្យប្រទេសអាហ្សង់ទីន និងរួមជាមួយឈ្មោះ និងលេខ ១០ របស់ម្ចាស់ពាន Ballon d’Or ប្រាំលើកកីឡាករ Messi។
ក្រោយរូបភាពនោះបានល្បីរន្ទឺ Messi ក៏បានឆ្លើយតបដោយការផ្ញើអាវទៅឲ្យក្មេងប្រុសម្នាក់នោះជាមួយហត្ថលេខាពីខ្សែប្រយុទ្ធឆ្នើមរូបនេះផងដែរ។ប៉ុន្តែសុបិនរបស់កុមារាម្នាក់នេះដោយចង់ជួបនិមិត្តរូបបាល់ទាត់របស់ខ្លួនផ្ទាល់បានក្លាយជាការពិតកាលពីថ្ងៃអង្គារទី ១៣ ម្សិលមិញនេះខណៈក្រុម Barcelona ធ្វើដំណើរទៅប្រកួតមិត្តភាពជាមួយក្លឹប Al Ahli ដោយ Barcelona ឈ្នះក្នុងលទ្ធផល ៥-៣៕