គុយបា៖តាមទូរទស្សន៍រដ្ឋគុយបាផ្សាយនៅព្រឹកថ្ងៃសៅរ៍ ទី២៦ ខែវិច្ឆិកា ឆ្នាំ២០១៦នេះបានឲ្យដឹងថា អតីតមេដឹកនាំកំពូលគុយបាលោក ហ្វីឌែល កាស្ត្រូ ទទួលមរណភាពហើយកាលពីវេលាម៉ោង២២ និង២៩នាទីយប់ថ្ងៃទី២៥ ខែវិច្ឆិកា (ម៉ោងនៅទីក្រុងឡាហាវ៉ាន់) ក្នុងអាយុ៩០ឆ្នាំ។
គួរបញ្ជាក់ថាលោក ហ្វីឌែល កាស្ត្រូ គឺជាមេដឹកនាំបដិវត្តន៍គុយបាដ៏ល្បីល្បាញមួយរូប ដែលជាសម្ព័ន្ធមិត្តដ៏ជិតស្និតបំផុតរបស់ប្រទេសរុស្ស៊ី ប្រឆាំងនឹងសហរដ្ឋអាមេរិក ហើយក៏ជាមូលហេតុដែលធ្វើឲ្យប្រទេសដីកោះ ស្ថិតនៅក្នុងដែនសមុទ្រការីបៀនមួយនេះ ធ្លាក់ទៅក្នុងទណ្ឌកម្មសហរដ្ឋអាមេរិកជិត ៦ទសវត្សរ៍ផងដែរ៕
រាជធានីភ្នំពេញ៖គណៈកម្មាធិការជាតិរៀបចំការបោះឆ្នោត (គ.ជ.ប) បានចេញសេចក្តីប្រកាសព័ត៌មានផ្លូវការជុំវិញជំនួបរវាង លោក ស៊ិន ប៊ុនហុក ប្រធាន គ.ជ.ប ជាមួយតំណាងរាស្ត្រគណបក្សសង្គ្រោះជាតិ នៅថ្ងៃទី២៥ ខែវិច្ឆិកា ឆ្នាំ២០១៦ ពិភាក្សាពីការចុះឈ្មោះបោះឆ្នោតថ្មីឆ្នាំ២០១៦៕
រាជធានីភ្នំពេញ៖កំលាំងប៉ូលិសព្រហ្មទណ្ឌខណ្ឌឫស្សីកែវចុះបង្ក្រាបទីតាំងបើកល្បែងស៊ីសងខុសច្បាប់(ហ្គេមបាញ់ត្រី)ចំនួន៣ទីតាំងឃាត់ខ្លួនមនុស្សចំនួន៦នាក់ព្រមធ្វើការដកហូតវត្ថុតាងទូហ្គេមបាញ់ត្រីចំនួន៣គ្រឿងរួមនិងសម្ភារៈមួយចំនួន។
ប្រតិបត្តិការនេះធ្វើឡើងកាលពីវេលាម៉ោង១១ និង៣០នាទីយប់ថ្ងៃទី២៥ ខែវិច្ឆិកា ឆ្នាំ២០១៦ នៅក្នុងតាំងទី១ក្នុងបន្ទប់ជួលក្រុមទី១០ ភូមិសាមគ្គី សង្កាត់ឫស្សីកែវ ដកហូតបានទូហ្គេមចំនួន១គ្រឿងឃាត់ខ្លួនមនុស្ស២នាក់១/ឈ្មោះ ស៊ឺង ស្រីល័ក្ខ ភេទស្រី អាយុ១៤ឆ្នាំ។ ២/ឈ្មោះ ស៊ឺង កុសល ភេទស្រីអាយុ១៨ឆ្នាំ អ្នកទាំងពីរមានទីលំនៅផ្ទះជួលភូមិសាមគ្គី សង្កាត់ឫស្សីកែវ។ ទីតាំងទី២បន្ទប់ជួលក្រុមទី១០ ភូមិសាមគ្គី សង្កាត់ឫស្សីកែវ ដកហូតបានទូហ្គេមបាញ់ត្រីចំនួន១គ្រឿងឃាត់ខ្លួនមនុស្សម្នាក់១/ឈ្មោះ ពេញ វិច្ឆិកា ភេទប្រុស អាយុ១៨ឆ្នាំមុខរបរកម្មករ មានទីលំនៅផ្ទះជួលភូមិសាមគ្គី សង្កាត់ឫស្សីកែវ និងទីតាំងទីបី ផ្ទះជួលផ្លូវរថភ្លើងក្រុមទី៩ ភូមិបឹងសាឡាង សង្កាត់ឫស្សីកែវ ដកហូតបានវត្ថុតាងទូហ្គេមបាញ់ត្រីចំនួន១គ្រឿង ឃាត់មនុស្ស២នាក់ ១/ឈ្មោះ វង្ស ចាន់សុភក្រ ភេទប្រុស អាយុ២០ឆ្នាំ មុខរបរមិនពិតប្រាកដ មានទីលំនៅភូមិទួលសង្កែ សង្កាត់ទួលសង្កែ ២/ឈ្មោះ អ៊ុយ ហាល វិច្ឆ័យ ភេទប្រុស អាយុ៣០ឆ្នាំ ទីលំនៅសង្កាត់បឹងទំពន់ មុខរបរសន្តិសុខ។ សមត្ថកិច្ចបន្តថា នៅក្នុង ប្រតិបត្ដិការខាងលើនេះ កម្លាំងសមត្ថកិច្ចយើងធ្វើការដកហូតបានវត្ថុតាងទូហ្កេមបាញ់ត្រីចំនួន៣គ្រឿងរួមនិងសម្ភារៈមួយចំនួននាំមកកាន់អធិការដ្ឋាននគរបាលខណ្ឌឫស្សីកែវ។
បច្ចុប្បន្នមនុស្សទាំង៦នាក់រួមនិងវត្ថុតាង ត្រូវបានឃាត់ខ្លួននិងរក្សារទុកជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវដើម្បីធ្វើការសាកសួរនិងកសាងសំណុំរឿងបញ្ជូនខ្លួនពួកគេទៅកាន់តុលាការរាជធានីភ្នំពេញចាត់ការបន្ត៕
រាជធានីភ្នំពេញ៖សង្វៀនបញ្ជល់មាន់២កន្លែងដែលមានទីតាំងនៅក្រោយរោងចក្រSL ស្ថិតក្នុងភូមិឬស្សី សង្កាត់ស្ទឹងមានជ័យត្រូវបានកម្លាំងសមត្ថកិច្ចចម្រុះខណ្ឌមានជ័យចុះបង្ក្រាបដោយបានឃាត់ខ្លួនមនុស្ស៥នាក់ និងម៉ូតូគ្រឿង ព្រមទាំងសម្ភារៈមួយចំនួនទៀតនៅព្រឹកថ្ងៃទី២៦ ខែវិច្ឆិកា ឆ្នាំ២០១៦នេះ។
អភិបាលរងខណ្ឌមានជ័យលោក ឌី រ័ត្នខេមរុណ បានឲ្យដឹងថា ប្រតិបត្តិការនេះបានធ្វើឡើងរួមមានកម្លាំងនគរបាលមូលដ្ឋាន អាវុធហត្ថ លោកអធិការង ហួរ ម៉េងវ៉ា លោក ម៉េង វិមានតារា និងក្រោមការសម្របសម្រួលពីព្រះរាជអាជ្ញារង សេង ហៀង។ លោកអភិបាលបញ្ជក់ថា ក្រោយឃាត់ខ្លួនក្រុមជនលេងល្បែងទាំងនោះ រួមជាមួយវត្ថុតាង ត្រូវបានបញ្ជូនទៅសួរនាំនៅ ប៉ុស្ដិ៍រដ្ឋបាលស្ទឹងមានជ័យ។
លោក ឌី រ័ត្នខេមរុណ សន្យាថា តទៅនេះលោក នឹងដឹកនាំកម្លាំងជំនាញទាំងអស់ បើកប្រតិបតិ្តការបង្ក្រាបល្បែងស៊ីសងទាំងអស់នៅក្នុងមូលដ្ឋាន ឲ្យដូចភ្លៀងរលឹម ដោយមិនឲ្យកើតមានទៀតឡើយ៕
ដោយ៖ប៉ែនសុផល
បាត់ដំបង៖កម្លាំងអធិការដ្ឋាននគរបាលស្រុកសំឡូតក្របួចជនសង្ស័យករណីប្រើប្រាស់គ្រឿងញៀនចំនួន២នាក់ក្នុងបទល្មើសជាក់ស្ដែងកាលពីវេលាម៉ោង២១ និង០០នាទី ថ្ងៃទី២៤ ខែវិច្ឆិកា ឆ្នាំ២០១៦នៅចំណុចចំការកៅស៊ូក្រុមហ៊ុនរតន៍សម្បតិ ស្ថិតក្នុងក្រុមទី៥ ភូមិអូរតាទៀក ឃុំតាតោក ស្រុកសំឡូត ខេត្តបាត់ដំបង។
លោក ស៊ាន សុណាល់ នាយការិយាល័យប្រឆាំងគ្រឿងញៀនខេត្តបានបញ្ជាក់អោយដឹងថា ជនសង្ស័យត្រូវបានឃាត់ខ្លួនរួមមាន៖ទី១ឈ្មោះ គង់ រតនា ហៅទី ភេទប្រុស អាយុ២១ឆ្នាំ។ ទី២ ឈ្មោះ ចាន់ បូរ៉ា ហៅអូន ភេទប្រុស អាយុ៣១ឆ្នាំទាំងពីរនាក់រស់នៅភូមិអូរតាគាំ១ សង្កាត់ទួលតាឯក ក្រុងបាត់ដំបង។
សមត្ថកិច្ចបញ្ជាក់ថា វត្ថុតាងដកហូតបានរួមមាន៖ ថ្នាំញៀនប្រភេទមេតំហ្វេតាមីន(ម៉ាទឹកកក)ចំនួន៤កញ្ចប់តូចទម្ងន់០,៧៧ក្រាម។ ទូរស័ព្ទដៃចំនួន៣គ្រឿង,ដែកកេះចំនួន៣,កាបូបដាក់ទូរស័ព្ទ១។ ប្រាក់រៀលចំនួន១០០,០០០រៀល(ដប់ម៉ឺនរៀល)។ រថយន្តម៉ាកNISSAN MARCHចំនួន ១គ្រឿង។
បច្ចុប្បន្នជនសង្ស័យខាងលើរួមនិងវត្ថុតាងត្រូវបានសមត្ថកិច្ចនិងកំពុងកសាងសំណុំរឿងដើម្បីបញ្ជូនទៅតុលាការ៕
ខេត្តរតនគិរី៖រថយន្ដ CRV មួយគ្រឿងដែលផ្ទុកឈើគ្រញូងជាច្រើនដុំ និងជនសង្ស័យ២នាក់ត្រូវបានកម្លាំងសមត្ថកិច្ចចម្រុះ រដ្ឋបាលក្រុងបានលុងដឹកនាំដោយលោក អ៊ុន ស៊ីដេត អភិបាលរងក្រុង ចាប់បាន និងឃាត់ខ្លួន។ ប្រតិបត្តិការនេះធ្វើឡើងនៅវេលាម៉ោង១ និង៣០នាទីអធ្រាត្រឈានចូល ថ្ងៃទី២៦ ខែវិច្ឆិកា ឆ្នាំ២០១៦នេះ លើកំណាត់ផ្លូវជាតិលេខ៧៨ ត្រង់ចំណុចភូមិ១ សង្កាត់កាចាញ ក្រុងបានលុង ខេត្តរតនគិរី។
សមត្ថកិច្ចក្រុងបានលុងដែលស្ថិតក្នុងប្រតិត្តិការនេះបានឲ្យដឹងថា រថយន្តនេះឃាត់ត្រួតពិនិត្យនេះម៉ាកCRV ពណ៌ខ្មៅ ពាក់ស្លាកលេខភ្នំពេញ2D-9519 និងជនសង្ស័យទាំង២នាក់ ទី១៖ឈ្មោះ នុត ឌឿន អាយុ៤២ឆ្នាំ មានទីលំនៅភូមិថាឡា ឃុំថាឡា ស្រុកថឡាបរិវ៉ាត់ ខេត្តស្ទឹងត្រែង។ ទី២៖ឈ្មោះ សារី ជា អាយុ៤៥ឆ្នាំ មានទីលំនៅភូមិអូរឬស្សី ឃុំស្រែស្តៅ ស្រុកចិត្របូរី ខេត្តក្រចេះ។
សមត្ថកិច្ចបញ្ជាក់ថា រថយន្តលួចដឹកឈើក្រញ៉ូងនេះ ដឹកចេញពីទឹកដីខេត្តស្ទឹងត្រែង ហើយមន្ដ្រីជំនាញដកហូតបានឈើក្រញូងជាច្រើនដុំដាក់ ដែលបង្កប់ក្រោមសាកស៊ី រួចនាំមករក្សាទុកនៅអធិការដ្ឋាននគរបាល ក្រុងបានលុង។
នៅព្រឹកថ្ងែទី២៦ ខែវិច្ឆិកានេះ វត្ថុតាង និងជនសង្ស័យ២នាក់ត្រូវបានកម្លាំងសមត្ថកិច្ច ប្រគល់ឲ្យផ្នែករដ្ឋបាលព្រៃឈើលំផាត់ ចាត់ការបន្តតាមនីតិវិធី៕
ភ្នំពេញ៖គិតត្រឹមម៉ោង៦ល្ងាច ថ្ងៃទី២៥ ខែវិច្ឆិកា ឆ្នាំ២០១៦ម្សិលមិញនេះមានប្រជាពលរដ្ឋខ្មែរចំនួន ៧,៥៨២,៦២៤នាក់ហើយ បានទៅចុះឈ្មោះបោះឆ្នោត។ នេះបើតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប) បញ្ជាក់នៅថ្ងៃទី២៦ ខែវិច្ឆិកា ឆ្នាំ២០១៦នេះ៕
បាល់ទាត់៖អតីតខ្សែបម្រើកណ្តាលដ៏ឆ្នើមរបស់ក្រុមហង្សក្រហម Liverpool និងប្រធានក្រុមជម្រើសជាតិអង់គ្លេសកីឡាករ Steven Gerrard បានប្រកាសចូលនិវត្តន៍ពីបាល់ទាត់ ក្រោយពីបានប្រកបអាជីពមួយអស់រយៈពេល១៩ឆ្នាំ។
កីឡាករវ័យ៣៦ឆ្នាំរូបនេះបាននិយាយថា៖ «ខ្ញុំពិតជាសំណាងណាស់ដែលមានបទពិសោធន៍ច្រើនដ៏អស្ចារ្យនៅក្នុងអាជីពរបស់ខ្ញុំ។ ខ្ញុំមានអាជីពស្ទើរមិនគួរឲ្យជឿមួយ ហើយសូមអរគុណដល់អ្នករាល់គ្នា និងគ្រប់ពេលវេលាដែលខ្ញុំនៅក្លឹប Liverpool ក្រុមជម្រើសជាតិអង់គ្លេស និងក្លឹប LA Galaxy»។
គួរបញ្ជាក់ថា Gerrard ធ្លាប់បានលេងចំនួន៧១០ដង និងធ្លាប់ឈ្នះពានរង្វាន់ធំៗចំនួន៨ផ្សេងគ្នា មុនពេលរូបគេចូលរួមជាមួយក្លឹបរបស់អាមេរិក LA Galaxy កាលពីឆ្នាំ២០១៥។ រូបគេជាកីឡាករជម្រើសជាតិអង់គ្លេសដែលបានបង្ហាញខ្លួនឲ្យជម្រើសជាតិបានច្រើនជាងគេលំដាប់ទី៤គឺបង្ហាញខ្លួនឲ្យជម្រើសជាតិបាន១១៤ដង និងធ្លាប់ទទួលងារជាប្រធានក្រុមក្នុងព្រឹត្តិការណ៍ធំៗ៣ដងក្នុងចំណោមព្រឹត្តិការណ៍ធំចំនួន៦៕
រាជធានីភ្នំពេញ៖លោក សម រង្ស៊ី បានបង្ហាញបំណងចង់វិលចូលស្រុកវិញ ដើម្បីគោរពសពម្តាយក្មេកជាលើកចុងក្រោយ ក្នុងពេលដែលលោកជាប់បណ្តឹងជាច្រើនរួមទាំងសាលក្រមផ្តន្ទាទោសផងដែរ ។
លោក អេង ឆៃអ៊ាង មន្ត្រីជាន់ខ្ពស់គណបក្សប្រឆាំង ថ្លែងថា បន្ទាប់ពីម្តាយក្មេកទទួលមរណភាព លោក សម រង្ស៊ី មានបំណងមកកាន់ប្រទេសកម្ពុជាវិញ ដើម្បីគោរពសពម្តាយក្មេកជាលើកចុងក្រោយ ។ ប៉ុន្តែមិនដឹងថា តើរដ្ឋអំណាចកម្ពុជា អាចនឹងបើកច្រកឲ្យលោកចូលស្រុក ដើម្បីគោរពសពម្តាយក្មេករបស់លោក ឬយ៉ាងណានោះទេ។
សូមជម្រាបថា ឧបាសិកា ញឹក ជូឡុង -មាសកេត សមភ័ក្រ ជាម្តាយក្មេកឯកឧត្តម សម រង្ស៊ី បានទទួលរមណភាព កាលពីថ្ងៃទី ២៤ វិច្ឆិកា ម្សិលមិញ ។ សម្តេច ហ៊ុន សែន ភ្លាមៗ បានផ្ញើសាររំលែកទុក្ខ លោកជំទាវ ជូឡុង សូមូរ៉ា ប្រពន្ធរបស់លោក សម រង្ស៊ី ។ ក្នុងលិខិតនោះ សម្តេចបញ្ជាក់ថា ការផ្ញើសាររំលែកទុក្ខនេះ ក្នុងនាមជាខ្មែរដូចគ្នា។ ប៉ុន្តែក្នុងលិខិតមិនបានរំលេចឈ្មោះលោក សម រង្ស៊ី ទេ។
យ៉ាងណាក៏ដោយ នៅព្រឹកថ្ងៃ ទី ២៥ វិច្ឆិកា នេះ លោក ហ៊ុន ម៉ានី កូនប្រុសទី២របស់សម្តេចក៏បានអញ្ជើញទៅគោរពវិញ្ញាណក្ខន្ធ័សពម្តាយក្មេកលោក សម រង្ស៊ី ផងដែរ ។ ក្នុងឱកាសនោះ លោក កឹម សុខា ប្រធានស្តីទីបក្សប្រឆាំង និងមន្ត្រីជាន់ខ្ពស់បក្សនេះ ក៏បានចេញមកស្វាគមន៍លោក ហ៊ុន ម៉ានី យ៉ាងកក់ក្តៅផងដែរ។
ទាក់ទិនលោក សម រង្ស៊ី នេះ អ្នកនាំពាក្យគណបក្សប្រជាពលរដ្ឋកម្ពុជា សុខ ឥសាន្ត បានអះអាងថា តាមផ្លូវច្បាប់បើលោក សម រង្ស៊ី មកមានតែមកដើរចូលគុកតែម្តងបានត្រូវ ព្រោះអ្នកទោសគ្មានសិទ្ធិធ្វើអ្វីលើសពីនេះទេ៕
រាជធានីភ្នំពេញ៖ប្រធានស្តីទីគណបក្សសង្គ្រោះជាតិ បានបង្ហាញនូវការមិនសប្បាយចិត្តចំពោះបញ្ជីឈ្មោះបោះឆ្នោតថ្មី ដោយសារតែនៅសល់ប្រជាពលរដ្ឋរាប់លាននាក់ទៀត មិនបានចុះឈ្មោះបោះឆ្នោត ខណដែលការចុះឈ្មោះបោះឆ្នោតរបស់ គ.ជ.ប គឺនៅសល់តែ៥ទៀតប៉ុណ្ណោះ។
លោក កឹម សុខា នៅព្រឹកថ្ងៃនេះ បានបញ្ជាក់ថា បើមិនអាចជួយសម្រួលប្រជាពលរដ្ឋរាប់លាននាក់ ឲ្យចុះឈ្មោះបោះឆ្នោតបានទេ លោកមិនអាចវាយតម្លៃបានថា ការរៀបចំចុះឈ្មោះបោះឆ្នោតដើម្បីរៀបចំបញ្ជីបោះឆ្នោតថ្មីនេះ ល្អប្រសើរ ឬជោគជ័យនោះឡើយ។ ទន្ទឹមនោះលោកក៏បានអំពាវនាវទៅភាគីពាក់ព័ន្ធនានា ឲ្យពិចារណាឡើងវិញ ចំពោះដំណើរការនៃការចុះឈ្មោះបោះឆ្នោតនេះ៕
ដោយ៖ប៉ែន សុផល
បាត់ដំបង៖សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានជំរុញអោយអភិបាលខេត្តចាត់ការរឿងបទល្មើសនេសាទនិងល្បែងស៊ីសងខុសច្បាប់គ្រប់ប្រភេទកើតមានក្នុងខេត្តបាត់ដំបង។ សម្តេចក្រឡាហោមថ្លែងបែបនេះនៅក្នុងពិធីផ្ទេរប្រគល់សមិទ្ធផលបោសសម្អាតមីនរួចនិងបើកគម្រោងថ្មីដំណាក់កាលទី៣សមាហរណកម្មការបោសសំអាតមីននិងជួយជនរងគ្រោះដោយសារមីន គាំទ្រថវិការដោយរដ្ឋាភិបាលជប៉ុន កាលពីថ្ងៃទី២៤ ខែវិច្ឆិកា ឆ្នាំ២០១៦ នៅក្នុងភូមិឬស្សីរោទិ៍ ឃុំតាគ្រាម ស្រុកបាណន់ ខេត្តបាត់ដំបង។
ឆ្លៀតក្នុងឱកាសនោះផងដែរ លោក ច័ន្ទ សុផល អភិបាលខេត្តបាត់ដំបង និងលោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ បានថ្លែងអំណរគុណយ៉ាងជ្រាលជ្រៅចំពោះលោក ហូរិនូឈិ ហិដេហិសា ឯកអគ្គរដ្ឋទូតប្រទេសជប៉ុនប្រចាំព្រះរាជាណាចក្រកម្ពុជាដែលតែងតែយកចិត្តទុកដាក់ខ្ពស់ក្នុងការផ្តល់ជំនួយមកកម្ពុជាក្នុងការអភិវឌ្ឍន៍គ្រប់វិស័យ ពិសេសវិស័យកំចាត់ម៉ីន។
និងបានលើកសម្រាប់គម្រោងថ្មីដែលតាមផែនការប្រតិបត្តិការមានរយៈពេល៣ឆ្នាំចាប់ពីខែវិច្ឆិកា ២០១៦ដល់ខែតុលា២០១៩ដែលត្រូវធ្វើការបោសសម្អាតផ្ទៃដីមីនចំនួន៧,០៣៨ហិកតាស្មើរនិងផ្ទៃដី៤០%នៃផ្ទៃដីចំការមីន នៅក្នុងស្រុកគោលដៅចំនួន៤ដែលជាស្រុកដែលមានគ្រាប់មីនច្រើនជាងគេគឺសំឡូត បាណន់ រតនះមណ្ឌល និងបវេល ព្រោះបាត់ដំបងជាសមរភូមិជួរមុខដែលជួបប្រទះសង្គ្រាមស៊ីវិលដ៍ជូចត់ជិត៣ទសវត្ស។
ក្នុងឱកាសនោះដែរ សម្តេចក្រឡាហោមស ខេង បានថ្លែងថា ករណីស្លាប់ដោយសាធ្វើសង្គ្រាមនិងគ្រាប់មីន មិនស្មើរនិងករណីស្លាប់ដោយសាគ្រោះថ្នាក់ចរាចរណ៍នោះទេ ពីព្រោះសម័យសង្គ្រាមគេធ្វើក្នុង១ខែ ២ខែ ឬ៣ខែម្តង ប៉ុន្តែគ្រោះថ្នាក់ចរាចរណ៍វិញគឺកើតមានជារៀងរាល់ថ្ងៃ ហើយស្លាប់គិតជាមធ្យមភាគក្នុង១ថ្ងៃស្លាប់៦នាក់។ ហើយសម្តេចជម្រុញអោយអភិបាលខេត្តបាត់ដំបងចាត់ការរឿងបទល្មើសនេសាទនិងល្បែងស៊ីសងខុសច្បាប់គ្រប់ប្រភេទដែលកើតមានក្នុងទឹកដីខេត្តបាត់ដំបងដើម្បីធានាអោយបាននូវគោលនយោបាយភូមិឃុំមានសុវត្ថិភាព៕
រាជធានីភ្នំពេញ៖តុលាការក្រុងភ្នំពេញកាលពីព្រឹកថ្ងៃទី២៥ ខែវិច្ឆិកា ឆ្នាំ២០១៦នេះ បានសម្រេចលើកពេល បើកសវនាការកាត់ទោស លោក សម រង្ស៊ី និង ជំនួយការរបស់គាត់ពីរនាក់ទៀត ពាកព័ន្ធនឹង ករណីសមគំនិតក្លែងសន្ធិសញ្ញាផែនទីព្រំដែនកម្ពុជាវៀតណាម ទៅថ្ងៃទី៩ ខែធ្នូ ឆ្នាំ២០១៦ ខាងមុខនេះវិញ៕
រាជធានីភ្នំពេញ៖យោងសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់នៅថ្ងៃទី២៥ ខែវិច្ឆិកា ឆ្នាំ២០១៦នេះថា គិតត្រឹមម៉ោង៦ល្ងាច ថ្ងៃទី២៤ ខែវិច្ឆិកា ឆ្នាំ២០១៦ម្សិលមិញនេះមានប្រជាពលរដ្ឋខ្មែរចំនួន ៧,៥៣៧,២៦៦នាក់ហើយ បានទៅចុះឈ្មោះបោះឆ្នោត៕
រាជធានីភ្នំពេញ៖នគរបាលខណ្ឌពោធិ៍សែនជ័យសហការជាមួយកម្លាំងនគរបាលក្រុងតាខ្មៅធ្វើការបង្ក្រាប និងចាប់ខ្លួនឧក្រិដ្ឋជនជនជាតិចិន ចាប់ជំរិតបានជាបន្តបន្ទាប់ព្រមទាំងបានរំដោះស្ត្រីរងគ្រោះពីកណ្ដាប់ដៃជនទាំងនោះទៀតផង។ ប្រតិបត្តិការនេះ បានធ្វើឡើងកាលពីវេលាម៉ោង៥ និង៣០នាទីល្ងាច ថ្ងៃទី២៤ ខែវិច្ឆិកា ឆ្នាំ២០១៦ន ក្នុងទីតាំងដែលពួកគេលាក់ខ្លួននិងបង្ខាំងស្ត្រីរងគ្រោះនៅផ្ទះសំណាក់យីហោ ដាល្លាវ៉ាន់ ស្ថិតក្នុងក្រុងតាខ្មៅ ខេត្តកណ្ដាល។
ឧក្រិដ្ឋជនដែលជាក្រុមចាប់ជំរិត ហើយត្រូវបានសមត្ថកិច្ចបង្ក្រាបគឺម្នាក់ឈ្មោះ ទី យ៉ាក់ពីង ភេទប្រុស អាយុ៣៨ឆ្នាំ និងម្នាក់ទៀតឈ្មោះ អ៊ឺ ឈឺសៀន ភេទប្រុស អាយុ៤២ឆ្នាំ ពួកនេះគឺជាអន្តោប្រវេសន៍ជនជាតិចិនឆ្លងដែនដោយខុសច្បាប់ ស្នាក់នៅក្នុងផ្ទះសំណាក់ខាងលើ ។ ចំណែកនារីរងគ្រោះឈ្មោះ ឈីង ពីងយ៊ី ភេទស្រី អាយុ២៤ឆ្នាំ មុខរបរម៉ាស្សា ស្នាក់នៅម្តុំបុរីញ៉ូថោន ជាជនជាតិចិនដូចគ្នា ហើយរវាងក្រុមឧក្រិដ្ឋជនចាប់ជំរិត និងនារីរងគ្រោះ គឺជាមនុស្សស្គាល់គ្នា ដោយសារតែជនសង្ស័យគឺជាម៉ូយដែលឧស្សាហ៍ទៅម៉ាស្សា ធ្វើក្រចក និងកាត់សក់នៅក្នុងហាងដែលនារីរងគ្រោះធ្វើការ ហើយដោយសារតែនារីរងគ្រោះមានរូបសម្រស់ស្រស់ស្អាតផងនោះ ក្រុមជនសង្ស័យតែងតែលេងឆាតហៅនារីរងគ្រោះទៅហូបបាយ និងដើរលេងជាមួយគ្នាញឹកញាប់ថែមទៀតផង។
លោក យឹម សារ៉ាន់ អធិការខ័ណ្ឌពោធិ៍សែនជ័យ បានឲ្យដឹងថា នៅវេលាម៉ោង៣ទៀបភ្លឺឈានចូលថ្ងៃទី២៤ ខែវិច្ឆិកា ឆ្នាំ២០១៦ ជនសង្ស័យបានហៅនារីរងគ្រោះពីបូរីញូថោន ស្ថិតក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ទៅដើរលេង និងហូបបាយជាមួយគ្នា បន្ទាប់មកបាននាំទៅកាន់ផ្ទះសំណាក់យីហោ ដាល្លាវ៉ាន់ ស្ថិតនៅក្នុងក្រុងតាខ្មៅ ខេត្តកណ្ដាល ដែលជាកន្លែងបង្ខាំងនាងទុក ។ លុះរហូតដល់វេលាព្រឹកថ្ងៃដដែលនោះពួកឧក្រិដ្ឋជនបានទូរស័ព្ទទៅគំរាមថៅកែហាងឲ្យផ្ញើរលុយឲ្យពួកគេ១ម៉ឺនដុល្លារជាថ្នូរនឹងការដោះលែងនារីរងគ្រោះ ព្រោះពួកគេគឺជាក្រុមចាប់ជំរិត បើគ្មានលុយឲ្យទេនៅវេលាម៉ោង១២ថ្ងៃត្រង់ ថ្ងៃទី២៤ ខែវិច្ឆិកា ពួកគេនឹងសម្លាប់នារីរងគ្រោះចោលភ្លាម។
លោក យឹម សារ៉ាន់ បញ្ជាក់ថា ពេលទទួលបានដំណឹងភ្លាម ថៅកែហាងម៉ាស្សាបានទៅប្ដឹងនគរបាលខណ្ឌពោធិ៍សែនជ័យឲ្យជួយ ទើបខាងកម្លាំងជំនាញធ្វើការស្រាវជ្រាវរហូតកំណត់បានមុខសញ្ញា ព្រមទាំងទីកន្លែងដែលពួកនោះលាក់ខ្លួននិងលាក់នារីរងគ្រោះ ។ បន្ទាប់ពីកំណត់បានមុខសញ្ញាហើយ កម្លាំងជំនាញបានធ្វើការចរចាពន្យារពេលជាមួយជនសង្ស័យរហូតធ្វើឲ្យជនសង្ស័យផ្លាស់ប្ដូរពេលវេលាប្រគល់លុយពីថ្ងៃត្រង់ទៅម៉ោង៣រសៀលថ្ងៃដដែលវិញ ហើយជនសង្ស័យតម្រូវឲ្យផ្ញើរលុយតាមវីង ។ ក្រោយពីចរចាត្រូវរ៉ូវគ្នាហើយ សមត្ថកិច្ចបានប្រកាសប្រាប់គ្រប់កន្លែងវីងវេតលុយទូទាំងក្រុងតាខ្មៅថា បើមានជនណាមកដកលុយតាមលេខកូដដែលសមត្ថកិច្ចបានប្រាប់នេះគឺត្រូវរាយការណ៍ប្រាប់សមត្ថកិច្ចភ្លាម ព្រោះជនដែលមកដកលុយនោះជាជនចាប់ជំរិត។
ក្រោយពេលបង្ក្រាបបានហើយជនសង្ស័យទាំង២ត្រូវបានសមត្ថកិច្ចខណ្ឌពោធិ៍សែនជ័យធ្វើការឃុំខ្លួន និងកសាងសុំណុំរឿងដើម្បីបញ្ចូនទៅតុលាការចាត់ការតាមច្បាប់៕
រាជធានីភ្នំពេញ៖ម្តាយក្មេករបស់លោក សម រង្ស៊ី គឺឧបាសិកា ញឹក ជូឡុង-មាសកេត សមភ័ត្រ បានទទួលមរណភាព ដោយជរាពាធ ក្នុងជន្មាយុ៩៧ឆ្នាំ នៅម៉ោង២រសៀលថ្ងៃទី២៤ ខែវិច្ឆិកា ឆ្នាំ២០១៦នេះ។ នេះបើយោងតាមការបញ្ជាក់ពីមន្ត្រីជាន់ខ្ពស់របស់គណបក្សសង្គ្រោះជាតិ។
មន្ត្រីដដែលបញ្ជាក់ថា បច្ចុប្បន្នសព ឧបាសិកា ញឹក ជូឡុង-មាសកេត សមភ័ត្រ ដែលជាម្តាយបង្កើតរបស់លោកស្រី ជូឡុង សូមួរ៉ា កំពុងតម្កល់ធ្វើបុណ្យតាមប្រពៃណី ព្រះពុទ្ធសាសនា នៅគេហដ្ឋានលោក សម រង្ស៉ី ផ្ទះលេខ៥៧៦ ផ្លូវជាតិលេខ២ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
