រាជធានីភ្នំពេញ៖នាព្រឹកថ្ងៃទី២២ ខែវិច្ឆិកា ឆ្នាំ២០១៦នេះក្រុមតំណាងរាស្ត្រគណបក្សប្រឆាំងបានបង្ហាញវត្តមានលើកដំបូង នៅក្នុងកិច្ចប្រជុំសភាពេញអង្គ បន្ទាប់ពីធ្វើពហិកា មិនចូលប្រជុំអស់រយៈពេល៦ខែមកនេះ។ ប៉ុន្តែលោក កឹម សុខា ប្រធានស្តីទី CNRP ពុំមានវត្តមាននៅក្នុងកិច្ចប្រជុំលើកនេះនៅឡើយទេ។
នៅក្នុងកិច្ចប្រជុំពេញអង្គនៅថ្ងៃនេះ គេឃើញមានសមាជិកសភាមកពីគណបក្សប្រជាជនកម្ពុជា ចំនួន៦៧រូប និងសមាជិកមកពីគណបក្សសង្រោះជាតិ ៣៧រូប។
គួរបញ្ជាក់ព្រឹកនេះសភានឹងពិភាក្សា និងអនុម័តលើរបៀបវារៈចំនួន៣ រួមមាន៖ ការពិភាក្សាលើច្បាប់ស្តីពីការប្រែប្រួលអាកាសធាតុ នៃកិច្ចព្រមព្រៀងទីក្រុងប៉ារីស របស់អង្គការសហប្រជាជាតិ, សេចក្តីព្រាងច្បាប់ទូទាត់ថវិកាឆ្នាំ២០១៥ និងច្បាប់ស្តីពីការគ្រប់គ្រងថវិកាជាតិឆ្នាំ២០១៧ និងរបៀបវារៈផ្សេងៗមួយចំនួនទៀត៕
រាជធានីភ្នំពេញ៖បុរសជនជាតិចិនម្នាក់វ័យជាង៥០ឆ្នាំ ត្រូវបានគេប្រទះឃើញដេកស្លាប់នៅក្នុងបន្ទប់ជាន់ទី១ នៃក្រុមហ៊ុន ជីងថាវ ដែលជាក្រុមហ៊ុន វិស្វកម្មតុបតែង និងសាងសង់ ស្ថិតនៅសង្កាត់កន្ទោក ខណ្ឌពោធិសែនជ័យ នៅយប់ថ្ងៃទី២១ ខែវិច្ឆិកា ឆ្នាំ២០១៦នេះ ដោយមិនទាន់ដឹងមូលហេតុ។
ក្រោយប្រទះឃើញសពជនរងគ្រោះ កម្លាំងសមត្ថកិច្ចជំនាញ បានចុះទៅដល់កន្លែងកើតហេតុ ដើម្បីធ្វើការស្រាវជ្រាវរកមូលហេតុ នៃការស្លាប់របស់ជនរងគ្រោះ។ ទោះយ៉ាងណាក៏ដោយការស្លាប់របស់ជនរងគ្រោះ មិនទាន់ដឹងថា ជាអំពើឃាតកម្ម ឫយ៉ាងណានោះនៅឡើយទេ៕
តៃវ៉ាន់៖ទីភ្នាក់ងារសារព័ត៌មានរ៉យទ័រចេញផ្សាយថា កងទ័ពជើងទឹករបស់តៃវ៉ាន់នឹងរៀបចំធ្វើសមយុទ្ធពីរបៀបជួយសង្គ្រោះនៅជុំវិញទីក្រុងតៃប៉ិក ដែលសមយុទ្ធនេះគ្រោងធ្វើឡើងនៅក្នុងតំបន់មានជម្លោះនៅសមុទ្រចិនខាងត្បូងចុងខែនេះ។
ឆ្មាំសមុទ្ររបស់តៃវ៉ាន់បានថ្លែងថា សមយុទ្ធនេះនឹងធ្វើឡើងនៅកោះ Itu Aba ជាកោះមួយស្ថិតនៅក្នុងកម្រងកោះស្ព្រាតលី ស្ថិតនៅសមុទ្រចិនខាងត្បូង។ ពួកគេថា ការធ្វើសមយុទ្ធនេះ គឺដើម្បីរៀនពីរបៀបនៃការការពារ និងសង្គ្រោះដោយខ្លួនឯង។ ជាមួយគ្នានេះកងទ័ពជើងទឹកតៃវ៉ាន់ក៏បានិងកំពុងយាមល្បាតនៅក្បែរៗកោះនោះ។
គួរបញ្ជាក់ថា ចិន ហ្វីលីពីន វៀតណាម ម៉ាឡេស៊ី និងប្រុយណេ សុទ្ធតែអះអាងថា ពួកគេមានចំណែកនៅក្នុងតំបន់មានជម្លោះនៅសមុទ្រចិនខាងត្បូង ជាតំបន់សំខាន់ដែលនានាឆ្លងកាត់ក្នុង១ឆ្នាំៗ ទទួលបានទឹកប្រាក់ប្រមាណ៥ពាន់លានដុល្លារ៕
រាជធានីភ្នំពេញ៖សិស្សសាលាម្នាក់បានខ្ទេចក្បាលស្លាប់ក្នុងថ្លុកឈាម ឯម្នាក់របួស ខណៈកំពុងជិះម៉ូតូសុខៗត្រូវរថយន្តដឹកសំរាមក្រុមហ៊ុនស៊ីនទ្រីបុកពីក្រោយផ្ទប់ជាមួយរថយន្ត១គ្រឿងទៀតបណ្ដាលឲ្យដួល និងជ្រុលទៅកិនពីលើតែម្តង ។ ហេតុការណ៍ដ៏គួរឲ្យរន្ធត់នេះកើតឡើងកាលពីវេលាម៉ោង១២ និង៥០នាទីថ្ងៃត្រង់ ថ្ងៃទី២១ ខែវិច្ឆិកា ឆ្នាំ២០១៦ តាមបណ្ដោយផ្លូវលេខ២១១ ម្តុំបុរីកីឡា ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ។
ជនរងគ្រោះដែលស្លាប់ឈ្មោះ រិទ្ធ អាយុ១៦ឆ្នាំ ជាសិស្សសាលាបាក់ទូក ស្នាក់នៅម្ដុំផ្សារដេប៉ូ ជាអ្នកជិះពីក្រោយ រីឯម្នាក់ទៀតឈ្មោះ ពេជ្រ ប៊ុនឃាន ភេទប្រុស អាយុ១៨ឆ្នាំ អ្នកបើកបរម៉ូតូ មិនបានរងរបួសធ្ងន់ធ្ងរឡើយ ។
ប្រភពនៅកន្លែងកើតហេតុបានឲ្យដឹងថា មុនពេលកើតហេតុជនរងគ្រោះទាំង២នាក់ជិះម៉ូតូ១គ្រឿងម៉ាកហុងដា ស្កុបពី ពាក់ស្លាកលេខ ភ្នំពេញ 1FK-3023 តាមបណ្ដោយផ្លូវលេខ២១១ លុះមកដល់ចំណុចកើតហេតុស្រាប់តែរថយន្តស៊ីនទ្រីមកបុកម៉ូតូពីក្រោយផ្ទប់ជាមួយរថយន្ត១គ្រឿងពីមុខបណ្តាលឲ្យដួល ហើយភ្លាមនោះរថយន្តស៊ីនទ្រីក៏ជ្រុលមកកិនក្បាលជនរងគ្រោះដែលអង្គុយខាងក្រោយបណ្ដាលឲ្យខ្ទេចក្បាលស្លាប់ក្នុងថ្លុកឈាម ចំណែកអ្នកបើកម៉ូតូបានរងរបួសដែរ៕
រាជធានីភ្នំពេញ៖នៅព្រឹកថ្ងៃទី២១ ខែវិច្ឆិកា ឆ្នាំ២០១៦នេះ គ្លីនិកដឺបូតេ ត្រូវបានកម្លាំងសមត្ថកិច្ចចំរុះរួមនិងអាជ្ញាធរមូលដ្ឋានសម្រេច បិទគ្លីនិកជាស្ថាពរបន្ទាប់ពីគ្លីនិកនេះ បានធ្វើឲ្យស្ត្រីម្នាក់ស្លាប់ ខណៈកែសុដន់(ពង្រីកដើមទ្រូង ឲ្យធំមូលស្អាត)ក្នុងតំលៃ៣០០០ដុល្លារ។ ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង៤ និង៤០នាទីល្ងាច ថ្ងៃទី២០ ខែវិច្ឆិកា នៅក្នងមន្ទីរព្យាបាល អាស៊ីយូ ផ្ទះលេខ៥ ផ្លូវ៤០២ សង្កាត់ទំន់បទឹក ខណ្ឌចំការមន។
ជនរងគ្រោះមានឈ្មោះ រស់ សុខនី ភេទស្រី អាយុ៣៦ឆ្នាំ មុខរបរលក់ទូរទស្សន៍ ស្នាក់នៅ ភូមិក្រចេះ ស្រុកក្រចេះ ខេត្តក្រចេះ មានប្តីឈ្មោះ ផៃ វាសនា អាយុ៣៦ឆ្នាំ មុខរបរលក់ដូរ មានកូន៤នាក់ ប្រុស៣នាក់និងស្រីម្នាក់ ។
តាមសម្តីប្តីរបស់ស្ត្រីរងគ្រោះរហូតស្លាប់ដោយសារតែកែសុដន់ឲ្យធំល្អនោះឲ្យដឹងថា មុនពេលកើតហេតុប្រពន្ធរបស់គាត់បានឃើញតាមរយៈហ្វេសប៊ុក បានផ្សព្វផ្សាយរបស់គ្លីនិកយីហោ ដឺបូតេ ស្ថិតនៅផ្លូវចូលបុរីកាំកូស៊ីធី ក្នុងសង្កាត់ទួលសង្កែ ខណ្ឌឫស្សីកែវ ដែលមានសេវាកែសុដន់ឲ្យធំមូលក្អំស្អាត ឃើញដូចនេះប្រពន្ធរបស់គាត់បានឆាតសួរតម្លៃនិង បានពិភាក្សាគ្នាកាលពីមុនថ្ងៃបុណ្យអុំទូកកន្លងមកថ្មីនេះ ដោយខាងគ្លីនិកយកតម្លៃ៣៥០០ដុល្លារ តែជនរងគ្រោះបានតថ្លៃចុះព្រមព្រៀងគ្នាត្រឹម៣០០០ដុល្លារ ។
ប្រភពដដែលបន្តទៀតថា នៅថ្ងៃទី១៧ ខែវិច្ឆិកា ឆ្នាំ២០១៦ រូបគាត់បានជូនប្រពន្ធរបស់គាត់ទៅវះកាត់កែសុដន់នៅគ្លីនិកឯកជន ដឺបូតេ ស្ថិតនៅផ្លូវចូលបុរីកាំកូស៊ីធី ក្នុងសង្កាត់ទួលសង្កែ ខណ្ឌឫស្សីកែវ ដើម្បីធ្វើការវះកាត់ក្នុងតម្លៃព្រមព្រៀងគ្នា៣០០០ដុល្លារ លុះដល់វះកាត់រួចបានរយះពេល២ថ្ងៃស្រាប់តែប្រពន្ធរបស់គាត់មានអាការៈឈឺធ្ងន់ធ្ងរទៅ ពេលនោះដែរគ្រូពេទ្យបានប្រាប់អោយរូបលោកយកប្រពន្ធទៅព្យាបាលបន្តទៀតនៅមន្ទីរព្យាបាល អាស៊ីយូ ដែលស្ថិតនៅផ្ទះលេខ៥ ផ្លូវ៤០២ សង្កាត់ទំនប់ទឹក ខណ្ឌចំការមន ពេលនោះរូបគាត់បានដឹកប្រពន្ធរបស់គាត់តាមរថយន្តផ្ទាល់ខ្លួនយកទៅសង្គ្រោះនៅមន្ទីរព្យាបាល អាយស៊ីយូ បានរយះពេល១ថ្ងៃកន្លះ ស្រាប់តែប្រពន្ធរបស់មានអាការៈធ្ងន់ធ្ងរទៅៗ ដោយគ្រូពេទ្យប្រាប់ថាគ្មានសង្ឃឹមនោះទេ ព្រោះខាងពេទ្យដឺបូតេបានប្រើថ្នាំលើសកំរិតធ្វើអោយស៊ីសួតស៊ីថ្លើមនិងតំរងនោមអស់ហើយរហូតដល់ម៉ោង៤និង៤០នាទីល្ងាចថ្ងៃទី២០ ខែវិច្ឆិកា ប្រពន្ធរបស់គាត់បានដាច់ខ្យល់ស្លាប់បាត់ទៅ ។ បន្ទាប់ពីប្រពន្ធស្លាប់ភ្លាមបុរសជាប្តីបានទូរស័ព្ទទៅប្រាប់បងប្អូននិងសមត្ថកិច្ចមូលដ្ឋានអោយចុះមកពិនិត្យ លុះសមត្ថកិច្ចមូលដ្ឋានបានចុះទៅដល់ រួចបានទំនាក់ទំនង់ទៅដល់ខាងជំនាញកោសល្យវិច័យអោយមកពិនិត្យ ។
ក្រោយពេលកើតហេតុ ប្តីជនរងគ្រោះបានដាក់ពាក្យបណ្ដឹង អោយសមត្ថកិច្ចនិងក្រសួងសុខាភិបាលជួយរកភាពយុត្តិធម៌អោយក្រុមគ្រួសារគាត់ផង ។ ចំណែកសពជនរងគ្រោះត្រូវសមត្ថកិច្ចធ្វើកំណត់ហេតុរួចបានបានប្រគល់អោយក្រុមគ្រួសារយកទៅធ្វើបុណ្យនៅស្រុកកំណើត ។ ដោយឡែកជំនាញកោសល្យវិច្ច័យបន្ទាប់ពីពិនិត្យរួចហើយមិនទាន់បាន សន្និដ្ឋានប្រាប់ពីមូលហេតុអ្វីពិតប្រាកដនៅឡើយទេ ។
ទាក់ទិននឹងករណីខាងលើនេះ ខាងមន្ទីរព្យាបាល ដឺបូតេ មិនទាន់មានការបកស្រាយ នេះទេ គឺបានបិទទ្វារជិតឈឹង បន្ទាប់ពីដឹងថាស្ត្រីរងគ្រោះធ្វើការវះកាត់សុដន់ហើយស្លាប់ ។ សមត្ថកិច្ចជំនាញបានឲ្យដឹងថានៅវេលាម៉ោង៩ព្រឹកថ្ងៃទី២១ ខែវិច្ឆិកានេះនឹងចុះទៅធ្វើ ការពិនិត្យនិងសួរនាំនៅទីនោះ៕
រាជធានីភ្នំពេញ៖សមត្ថកិច្ចជំនាញនៃកងរាជអាវុធហត្ថរាជធានីភ្នំពេញ នៅព្រឹកថ្ងៃទី២១ ខែវិច្ឆិកា ឆ្នាំ២០១៦នេះបានបញ្ជូនឃាតកដែលសម្លាប់នារីបយគ្គលិក «ក្លឹប៥៥» យកសពមកបោះចោលក្នុងគំនរសំរាមដោយរុំក្រណាត់ជិត ឃើញតែជើង នៅចំណុចគំនរសំរាម តាមបណ្ដោយផ្លូវលេខ១០០៣ ស្ថិតក្នុងក្រុមទី៤ សង្កាត់ភ្នំពេញថ្មី ខណ្ឌសែនសុខ ទៅកាន់តុលាការរាជធានីភ្នំពេញដើម្បីផ្តន្ទាទោសតាមច្បាប់។
ជនល្មើសឈ្មោះ យ៉េន សុបញ្ញា អាយុ២០ឆ្នាំ ចំណែកនារីរងគ្រោះឈ្មោះ កែវ កញ្ញា អាយុ១៩ឆ្នាំជាបុគ្គលិក «ក្លឹប៥៥» ។
គួរបញ្ជាក់ថា ហេតុការណ៍បង្កឲ្យមានការភ្ញាក់ផ្អើលនេះកើតឡើងនៅវេលាម៉ោង១០ និង០០នាទីព្រឹក ថ្ងៃទី១៦ ខែវិច្ឆិកា ឆ្នាំ២០១៦ គ្រាដែអ្នករើសអេតចាយមួយក្រុម បានប្រទះឃើញសាកសពមួយ ដែលត្រូវបានគេយកមកបោះចោលនៅចំណុចគំនរសំរាម តាមបណ្ដោយផ្លូវលេខ១០០៣ ស្ថិតក្នុងក្រុមទី៤ សង្កាត់ភ្នំពេញថ្មី ខណ្ឌសែនសុខ។
កម្លាំងកងរាជអាវុធហត្ថរាជធានីភ្នំពេញ សហការជាមួយកម្លាំងអាវុធហត្ថខេត្តកណ្ដាល បានបើកប្រតិបត្តិការស្រាវជ្រាវ និងចាប់បានឃាតកសម្លាប់ ស្ដ្រីម្នាក់ជាបុគ្គលិក «ក្លឹប៥៥» បានហើយនៅរសៀលថ្ងៃទី១៧ ខែវិច្ឆិកា ឆ្នាំ២០១៦៕
ខេត្តកណ្តាល៖មានអំពើឃាតកម្មមួយបានបង្កឲ្យភ្ញាក់ផ្អើល ទាំងព្រឹកថ្ងៃទី២១ខែវិច្ឆិកា ឆ្នាំ២០១៦ នៅក្នុងភូមិព្រែករុនក្រោម ឃុំព្រែកគយ ស្រុកស្អាង ខេត្តកណ្តាល គ្រាដែលបុរសមានជំងឺសសៃប្រសាទប្រចាំកាយ៤ឆ្នាំម្នាក់ ពេលជំងឺធ្វើទុក្ខបានទៅទាញកាំបិតបុ័ងតោ មកចិញ្ច្រាំកាប់ម្តាយកំពុងសម្រាន នៅលើគ្រែបណ្តាលឲ្យ រងរបួសធ្ងន់ គួរឲ្យអាណិតយ៉ាងពន់ពេក។ ភ្លាមៗនោះ ពេលប្អូនប្រុសឃើញទ្រាំមិនបាន ក៏ចូលទៅជួយម្តាយយកដំបង វាយជនបង្កជាបងប្រុសរហូតដល់ស្លាប់។
នគរបាលបានឲ្យដឹងថា បុរសសសៃប្រសាទឈ្មោះ ហួត ហេង អាយុ៤៩ ឆ្នាំ និងស្ត្រីរងគ្រោះជាម្តាយឈ្មោះ ឃី ញ៉ អាយុ ៦៦ ឆ្នាំ និងមានប្តីឈ្មោះ គឹម ឡេងហ៊ួត អាយុ 75 រីឯជនដៃដល់ឈ្មោះ ហ៊ួត សំតិច អាយុ ២៦ ឆ្នាំ មុខរបរកម្មកររោងចក្រ ។
នគរបាលបានបន្តថា មុនពេលកើតហេតុជនរងគ្រោះនិងម្តាយនៅក្នុងផ្ទះជាមួយគ្នាចំណែកលោក តាជាប្តីស្ត្រីរងគ្រោះបានទៅហូបកាហ្វេបាត់ ក្រោយមកជនបង្ក បានទៅទាញកាំបុ័តោ១មកកាប់ម្តាយកំពុងតែសម្រាននៅលើគ្រែម្នាក់ឯង គឺកាប់ក្បាលខាងក្រោយ១កាំបិត ក១កាំបិត ដៃ១កាំបិត និងក្បាលពោះ១កាំបិត។ ពេលនោះ ប្អូនប្រុសឃើញដូច្នេះ បានស្ទះទៅជួយម្តាយដោយទាញបានដំបងឈើមួយដើមទៅវាយសំពងលើបងប្រុសបណ្តាលឲ្យស្លាប់នៅនិងកន្លែងតែម្តង។
បើយោងតាមសម្តីអ្នកជិតខាងបាននិយាយថា ជនរងគ្រោះស្លាប់នេះ គឺជាកូនបងបង្អស់ក្នុងចំណោមកូន១០នាក់ស្រីម្នាក់ ហើយគេមានជំងឺប្រចាំកាយ រយៈពេល៤ឆ្នាំមកហើយ ដោយកន្លងមកគេធ្លាប់ព្យាយាមសម្លាប់ ខ្លួនជាបន្តបន្ទាប់តែត្រូវក្រុមគ្រួសារជួយទាន់៕
ខេត្តកណ្តាល៖បុរសដែលខ្លួនធ្លាប់បានឈ្លោះគ្នាជាមួយប្រពន្ធ និងបានប្រើអំពើហិង្សាលើប្រពន្ធបានតាមសុំការអភយ័ទោសពីប្រពន្ធមិនព្រមក៏សម្រេចចិត្តចងកនិងខ្សែគោសម្លាប់ខ្លួននិងធ្នឹមផ្ទះកាលពីវេលាម៉ោង១៨និង៣០នាទី ថ្ងៃទី២០ ខែវិច្ឆិកា ឆ្នាំ២០១៦ នៅក្នុងភូមិស្តៅកន្លែង៤ ឃុំដីឥដ្ឋ ស្រុកកៀនស្វាយ ខេត្តកណ្តាល ។ ជនរងគ្រោះមានឈ្មោះ ឈុំ ប៊ុនណារា ហៅងុយ ភេទប្រុស អាយុ៤៥ឆ្នាំ (ខ្មែរ) មានទីលំនៅភូមិនិងឃុំកើតហេតុខាងលើ ។
តាមប្រភពពីបងស្រីរបស់ជនរងគ្រោះឈ្មោះ ជុំ សាវឿន ភេទស្រី អាយុ៥១ឆ្នាំ មានទីលំនៅក្បែរផ្ទះជនរងគ្រោះបានឲ្យដឹងថានៅមុនពេលកើតហេតុរូបគាត់(បងស្រីជនរងគ្រោះ)បានអង្គុយលេងនៅខាងក្រោមផ្ទះរបស់ខ្លួនមើលទៅផ្ទះរបស់ប្អូនមិនឃើញមានមនុស្សនៅក៏បានដេញគ្មួយប្រុសឈ្មោះ យន សំណាង ឲ្យទៅមើលតែគ្មួយមិនព្រមទៅមួយសន្ទុះក្រោយមកគាត់ក៍បានដើរទៅមើលដោយខ្លួនឯងពេលនោះឃើញផ្ទះប្អូនបិទភ្លើងងងឹតហើយបិទទ្វារជិតតែមិនចាក់គន្លឹះខាងក្នុងទេពេលនោះគាត់ក៍បានច្រានទ្វារផ្ទះរួចច្របាច់ភ្លើងពិលមើលខាងក្នុងផ្ទះក៍ប្រទះឃើញប្អូនប្រុសបានចងកនៅនឹងធ្នឹមផ្ទះស្លាប់បាត់ទៅហើយរួចរូបគាត់ក៍បានរាយការណ៍ប្រាប់សមត្ថកិច្ចប៉ុស្តិនគរបាលរដ្ឋបាលឃុំដីឥដ្ឋ។
លោក អ៊ុង ស៊ីឡាក់ នាយប៉ុស្តិ៍នគរបាលរដ្ឋបាលឃុំដីឥដ្ឋបានឲ្យដឹងថាក្រោយពីទទួលបានពត៌មានកំលាំងប៉ុស្តិសហការណ៍ជាមួយកំលាំងជំនាញអាជ្ញាធរមូលដ្ឋានគ្រូពេទ្យប្រចាំឃុំដីឥដ្ឋនិងក្រុមគ្រួសារបានចុះពិនិត្យសាកសពជំនាញបានបញ្ចាក់ថាជនរងគ្រោះពិតជាស្លាប់ដោយសារចងកប្រាកដមែនដោយខ្សែគោពណ៍ខ្មៅប្រវែង០.៨០ម៉ែត្រចងជាប់និងធ្នឹមផ្ទះ។
លោកបន្តថា តាមការបំភ្លឺរបស់បងស្រីសាកសពមុនពេលកើតហេតុគឺកាលពីថ្ងៃទី១១ខែវិច្ឆិកាឆ្នាំ២០១៦កន្លងទៅប្អូនប្រុសរបស់គាត់ឈ្មោះ ឈុំ ប៊ុណារ៉ា ហៅងុយ បានឈ្លោះគ្នាជាមួយប្រពន្ធឈ្មោះ ហែម សុភ័ណ្ឌ និងបានប្រើអំពើហីង្សាលើប្រពន្ធបន្តិចបន្តួច រួចហើយប្រពន្ធបានចុះចេញពីផ្ទះរហូតទៅនៅផ្ទះម្តាយខាងស្រី ហើយប្អូនប្រុសរបស់គាត់បានតាមសុំការអភ័យទោសពីប្រពន្ធត្រូវរ៉ូវគ្នាវិញ តែប្រពន្ធមិនព្រមលុះដល់ថ្ងៃកើតហេតុប្អូនប្រុសរបស់គាត់ក៏សំរេចចិត្តចងកសំលាប់ខ្លួនតែម្តងទៅ ៕
រាជធានីភ្នំពេញ៖គិតត្រឹមម៉ោង៦ល្ងាច ថ្ងៃទី២០ ខែវិច្ឆិកា ឆ្នាំ២០១៦ម្សិលិញនេះមានប្រជាពលរដ្ឋខ្មែរចំនួន ៧,៣៨១,៣១៥នាក់ហើយបានទៅចុះឈ្មោះបោះឆ្នោត។ នេះបើតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប)៕
ដោយ៖សផៃ
ខេត្តរតនគិរី៖កម្លាំងនគរបាលប្រឆាំងបទល្មើសសេដ្ឋកិច្ចខេត្តរតនគិរីសហការជាមួយកម្លាំងនគរបាលនាយកដ្ឋានប្រឆាំងបទល្មើសនៃក្រសួងមហាផ្ទៃនៅវេលាម៉ោង២និង៣០អាធ្រាត្រថ្ងៃទី២០ខែវច្ឆិកាឆ្នាំ២០១៦នេះបានស្ទាក់ចាប់រថយន្តធុនធំ១គ្រឿងលួចដឹកឈើប្រណិតប្រភេទធ្នង់បំរុងឆ្ពោះទៅប្រទេសវៀតណាមតាមច្រកទ្វារអន្តរជាតិអូយ៉ាដាវ។លើកំណាត់ផ្លូវជាតិលេខ៧៨ទិសដៅពីលិចទៅកើតត្រង់ចំណុចភូមិសោមត្រកឃុំសោមធំស្រុកអូរយ៉ាដាវ។
បើតាមលោកវរសេនីយ៍ឯកនូវដារ៉ានាយការិយាល័យប្រឆាំងបទល្មើសសេដ្ឋកិច្ចនៃស្នងការនគរបាលខេត្តរតនគិរីប្រាប់ឲ្យដឹងថាដោយទទួលបទបញ្ជាពីលោកស្នងការនិងស្នងការរងទទួលបន្ទុកនោះមករូបលោកបានដឹកនាំកម្លាំងស្រាវជ្រាវក្រុមរកស៊ីបទល្មើសដឹកជញ្ជូនឈើដោយខុសច្បាប់។
ទើបទទួលបានព៌តមានពីកម្លាំងសម្ងាត់សង្ស័យរថយន្តខាងលើដឹកឈើក៏សុំយោបល់ពីថ្នាក់លើនិងមានការឯកភាពពីតំណាងអធ្យការអមសាលាដំបូងផងនោះក៏បានស្ទាក់ចាប់និងត្រួតពិនិត្យរថយន្ត១គ្រឿងដែលមានស្លាកលេខក្រចេះ3A-0410ពណ៌សលាយក្រហម។
លោកបន្តថាបន្ទាប់ពីឃាត់រថយន្តនោះអ្នកបើករថយន្តបានចុះរត់គេចខ្លួនបាត់ភ្លាមៗដែរហើយសមត្ថកិចកក្ច៏បាននាំយកវត្ថុតាងមករក្សាទុកនៅការិយាលយ័នគបាលសេដ្ឋកិច្ចនៃស្នងការនគរបាលខេត្តរតនគិរី។
មតិមហានជនមួយចំនួនបានលើកឡើងស្រដៀងគ្នាថារថយន្តប្រភេទ៥តោនដឹកឈើប្រណិតពេញប្រៀបនេះជារបស់មេឈ្មួញចូលចិត្តដឹកផលអនុផលព្រៃឈើលោតឆ័័ត្រចេញទៅប្រទេសវៀតណាមញឹកញាប់ណាស់មកហើយមិនដឹងអាងខ្នងអ្នកធំណាទេ។
នៅព្រឹកថ្ងៃទី២០ខែវិច្ឆិកាឆ្នាំ២០១៦នេះនគរបាលជំនាញនៃស្នងការនគរបាលខេត្តរតនគិរីបានប្រគល់រថយន្តដឹកឈើប្រណិតប្រភេទធ្នង់ជាច្រើនដុំឲ្យមន្ត្រីរដ្ឋបាលព្រៃឈើខណ្ឌរតនគិរីចាត់ការតាមនីច្បាប់ព្រៃឈើ។មជ្ឈដ្ឋានជុំវិញខេត្តបានដាក់ចំងល់ថានៅពេលដែលបង្ក្រាប់បានរថយន្តធន់ធំដឹកឈើពេញប្រៀបបែបនេះទៅហើយតើរកម្ចាស់មកចូលខ្លួនដោះស្រាយបានដែរឬទេ។ ហើយក្នុងខណៈពេលនោះគេឃើញថៅកែឈើកំពុងប៉ាវសម្ថកិច្ចច្រកទ្វារផឹកស៊ីនៅព្រុំដែនយ៉ាងសប្បាយរីករាយទំនងមានការត្រូវរូវឃុបឃិតមេៗនៅតែច្រកទ្វារប៉ុណ្ណោះមិនមានការរត់ការសមត្ថកិច្ចជំនាញៗក្នុងខេត្តនោះទេទើបឈានដល់ការបង្ក្រាបបែបនេះ៕
ញូដេលី៖យោងតាមសារព័ត៌មាន Bloomberg បានផ្សាយថា រថភ្លើងដឹកអ្នកដំណើរមួយគ្រឿងរអិលធ្លាក់ផ្លូវនៅភាគខាងជើងនៃ រដ្ឋអ៊ូតាប្រាដែស ប្រទេសឥណ្ឌាបានសម្លាប់មនុស្ស១០៤នាក់ ខណៈដែលអ្នករបួសច្រើនជាង១៥០នាក់។
ក្រុមអាជ្ញាធរនៅក្នុងតំបន់បានឱ្យដឹងថាគ្រោះថ្នាក់រថភ្លើងរអិលធ្លាក់ផ្លូវនេះ បានកើតឡើងនៅចំពេលអ្នកដំណើរ ភាគច្រើនកំពុងដេកលក់ អំឡុងពេលធ្វើដំណើរ ឆ្លងកាត់ផ្លូវរថភ្លើង Indore-Patna Express នៅម៉ោងប្រមាណជា៣ និង០០នាទី ទាបភ្លឺម្សិលមិញ (ម៉ោងនៅក្នុងតំបន់) នៅឯទីក្រុងកាន់ពួរ (Kanpur) នៃភាគខាងជើងរដ្ឋ អ៊ូតាប្រាដែស។ តែព្រមពេលជាមួយគ្នា មូលហេតុនៃបង្កឱ្យមានគ្រោះថ្នាក់ពុំទាន់ត្រូវបានគេឱ្យដឹងនៅឡើយទេ៕
ដោយ៖ប៉ែន សុផល
បាត់ដំបង៖យោងតាមសមត្ថកិច្ចបានអោយដឹងថា មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តម៉ាកហ៊ីយ៉ាន់ដាយមួយគ្រឿងបានបុកម៉ូតូពេញទំហឹងបណ្តាលអោយអ្នកបើកបរម៉ូតូម្នាក់បានស្លាប់ភ្លាមៗនៅនិងកន្លែង។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១៩ និង០០នាទីថ្ងៃទី១៩ខែវិច្ឆិកា ឆ្នាំ២០១៦ នៅចំណុចភូមិគីឡូ៣៨ ឃុំផ្លូវមាស ស្រុករតនះមណ្ឌល ខេត្តបាត់ដំបង។
សមត្ថកិច្ចនៅកន្លែងកើតហេតុបានប្រាប់អោយដឹងថា រថយន្តដឹកដីបង្ករម៉ាកហ៊ីយ៉ាន់ដាយពណ៌សពាក់ស្លាកលេខកំពង់ចាម 3A.1358 បើកបរដោយបុរសមិនស្គាល់ឈ្មោះទៅបុកនិងម៉ូតូមួយគ្រឿងម៉ាកវ៉េវអាល់ហ្វាពណ៌ខ្មៅពាក់ស្លាកលេខពោធិ៍សាត់1C.0807បើកបរដោយឈ្មោះអន លើនភេទប្រុសអាយុ53ឆ្នាំរស់នៅភូមិទឹកសាប ឃុំផ្លូវមាស ស្រុករតនះមណ្ឌលខេត្តបាត់ដំបង(ស្លាប់)។
សមត្ថកិច្ចបានបន្តថា នៅមុនពេលកើតហេតុគេឃើញម៉ូតូ១គ្រឿងបើកបរក្នុងទិសដៅពីជើងទៅត្បូងលុះទៅដល់ចំណុចកើតហេតុក៍រថយន្តដឹកដីបង្កខាងលើបានបើកចេញពីភ្នំមកបុកម៉ូតូចំពាក់កណ្តាលពេញទំហឹងបណ្តាលអោយស្លាប់ភ្លាមៗនៅនិងកន្លែងតែម្ដង។ ចំណែកអ្នកបើកបររថយន្តរត់គេចខ្លួនបាត់។
ក្រោយពេលកើតហេតុសមត្ថកិច្ចចរាចរណ៍បានចុះទៅដល់ធ្វើការវាស់វែងរួចបានប្រគល់សាកសពអោយទៅក្រុមគ្រួសារយកទៅធ្វើបុណ្យតាមប្រពៃណី។
ចំណែករថយន្តបង្ក និងម៉ូតូត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលស្រុករតនះមណ្ឌលរង់ចាំធ្វើការដោះស្រាយគ្នាជាក្រោយ៕
ភ្នំពេញ៖ប្រភពព័ត៌មានពីនគរបាលខណ្ឌពោធិ៍សែនជ័យបានឲ្យដឹងថា កាលពីវេលាម៉ោង០៧ និង៥០នាទីយប់ថ្ងៃទី១៨វិច្ឆិកា ២០១៦នេះ នៅចំណុចផ្ទះម៉ាស្សាយីហោ (៩៩៩៩) ផ្ទះលេខ៣៧៥ ផ្លូវ២០០៤ ស្ថិតនៅភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
មានហេតុការណ៍ភ្ញាក់ផ្អើលមួយដោយសារតែបុរសម្នាក់អាចថា តាមស្រឡាញ់ស្ដ្រីម៉ាស្សាម្នាក់ ដែលបម្រើការនៅផ្ទះម៉ាស្សាយីហោ (៩៩៩៩) មិនបាន ហើយហៅទៅនៅផ្ទះជាមួយមិនព្រមទៀត មានកំហឹងចងអាឃាត រកវិធី ដុតកន្លែងធ្វើការម៉ាស្សារនោះចោល តែត្រូវម្ចាស់ផ្ទះពន្លត់ទាន់ពេលវេលា ក្រោយមកជនសង្ស័យត្រូវបានកម្លាំងកងរាជអាវុធហត្ថខណ្ឌពោធិ៍សែនជ័យ(ឃាត់ខ្លួន)។
បើយោងតាម មន្ដ្រីកងរាជអាវុធហត្ថខណ្ឌ បានឲ្យដឹងថា ជនសង្ស័យបានស្រឡាញ់ស្ដ្រីម៉ាស្សាម្នាក់ ឈ្មោះ ជា ស្រីអូន អាយុ២៥ឆ្នាំ បម្រើការនៅផ្ទះខាងលើរយៈពេលជាង២ខែមកហើយ ដោយជនសង្ស័យបានហៅស្រីមុំ ឲ្យទៅនៅផ្ទះជាមួយប៉ុន្ដែត្រូវនាងប្រកែកព្រោះមិនទាន់ស្គាល់ជនសង្ស័យច្បាស់។ លុះនៅថ្ងៃកើតហេតុ ជនសង្ស័យឈ្មោះ អៀម រដ្ឋា អាយុ២៤ឆ្នាំ មុខរបររត់កង់បី បានមករកឈ្មោះជាស្រីមុំ នៅកន្លែងម៉ាស្សាហើយមានកាន់ថង់មួយ ដាក់ដបសាំងប្រហែល៣លីត្រ និងកាន់ដែកកេះមួយក្នុងដៃ ពេលឃើញ
ដូច្នោះស្រីមុំ បានរត់ចូលក្នុងផ្ទះ ហើយជនសង្ស័យបានដេញតាម និងចាក់សាំងដុតក្នុងផ្ទះតែម្តង ប៉ុន្តែត្រូវបានម្ចាស់ផ្ទះពន្លត់ទាន់ពេល។ មន្ដ្រីដដែលបន្ថែមថា ក្នុងហេតុការនេះ បណ្ដាលឲ្យមនុស្ស២នាក់របួសស្រាល និងខូចខាតសម្ភារៈក្នុងផ្ទះបន្ដិចបន្ទួច ហើយជនសង្ស័យត្រូវបានកម្លាំងល្បាត អាវុធហត្ថខណ្ឌពោធិ៍សែនជ័យឃាត់ខ្លួនបានភ្លាមៗតែម្តង។
ក្រោយឃាត់ខ្លួនជនសង្ស័យត្រូវបានបញ្ជូនទៅសួរនាំ ដើម្បីកសាងសំណុំរឿងចាត់ការបន្ដ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
