ខេត្តកណ្តាល៖ប្រជាពលរដ្ឋ១គ្រួសារបានរងគ្រោះដោយសារភ្លៀងលាយឡំនឹងខ្យល់កន្ត្រាក់ធ្វើអោយផ្ទះរបស់រលំសង្កត់បណ្តាលអោយរងរបួសធ្ងន-ស្រាលចំនួន៨នាក់វេលាម៉ោង២នឹង២០នាទីរលងអាធ្រាតថ្ងៃទី៦ខែវិច្ឆកាឆ្នាំ២០១៦នៅចំណុចភូមិ៥ ឃុំស្វាយរលំ ស្រុកស្អាង ខេត្តកណ្តាល។
ផ្ទះប្រជាពលរដ្ឋដែលរលំនេះមានទំហំ៧ម៉ែត្រគុណ៩ម៉ែត្រធ្វើអំពីឈើប្រកក្បឿងនឹងម្ចាស់ផ្ទះឈ្មោះ អិច អឿន ភេទប្រុស អាយុ៧៨ឆ្នាំ និងប្រពន្ធឈ្មោះ មាច អុស អាយុ៧៦ឆ្នាំ មានសមាជិកគ្រួសារចំនួន១១នាក់ស្នាក់នៅជាមួយ។ ក្នុងនោះធ្វើអោយរបួសធ្ងន២នាក់ស្រី និងរបួសស្រាល៦នាក់នៅពេលមានហេតុការកើតឡើងក៍បានអ្នកជិតខាងមកជួយ ហើយក៍បានដឹកទៅសង្គ្រោះនៅមន្ទីរពេទ្យជំនះខេត្តកណ្តាលផងដែរ៕
សេអ៊ូល៖កាលពីម្សិលមិញតុលាការក្នុងទីក្រុងសេអ៊ូលបានចេញដីកាចាប់ខ្លួនអតីតទីប្រឹក្សាពីររូប របស់ប្រធានាធិបតីកូរ៉េខាងត្បូង លោកស្រី ផាក គឺនហេ នៅក្នុងក្របខណ្ឌ នៃការស៊ើបអង្កេតជុំវិញរឿងអាស្រូវពាក់ព័ន្ធនឹងស្ត្រីឈ្មោះ ឆយ ស៊ូនស៊ីល។
យោងតាមសេចក្ដីប្រកាសព័ត៌មានមួយរបស់តុលាការទីក្រុងសេអ៊ូលបានបញ្ជាក់ថា ដីកាត្រូវបានដល់ក្រុមរដ្ឋអាជ្ញា ដើម្បីចាប់ខ្លួនអតីតទីប្រឹក្សាពីររូប របស់លោកស្រី ផាក គឺនហេ គឺលោក អាន់ ឈុងប៊ុម និង លោក ជុង ហូស៊ុង ដោយក្រុមរដ្ឋអាជ្ញាបានដាក់ការសង្ស័យលើ លោក អាន់ ថាបានសហការជាមួយស្ត្រីឈ្មោះ ឆយ ស៊ូនស៊ីល ក្នុងការបង្ខំឱ្យបណ្ដាក្រុមហ៊ុនមួយចំនួនបង់ប្រាក់ដល់ទៅជិត៧០លានដុល្លារអាមេរិកដល់មូលនិធិសប្បុរសធម៌ចំនួនពីរ ដែលគ្រប់គ្រងដោយស្ត្រី ឆយ ស៊ូនស៊ីល។ លោក លោក អាន់ ឈុងប៊ុម និងលោក ជុង ហូស៊ុង សុទ្ធតែបានលាលែងពីតំណែងហើយ កាលពីខែតុលា ក្រោយរឿងស្រូវ លោកស្រី ផាក ផ្ទុះឡើង។
គួរបញ្ជាក់ថា ការចាប់ខ្លួននេះធ្វើឡើងតែមួយថ្ងៃប៉ុណ្ណោះ នៅបន្ទាប់ពី ប្រជាជនក្នុងទីក្រុងសេអ៊ូលរាប់ពាន់នាក់បាននាំគ្នាធ្វើបាតុកម្មតវ៉ាទាមទារឱ្យលោកស្រី ផាក គឺនហេ ចុះចេញពីមុខតំណែង៕
រាជធានីភ្នំពេញ៖យោងតាមមន្ត្រីតុលាការរាជធានីភ្នំពេញបានឲ្យដឹងថា នៅរសៀល ថ្ងៃទី០៧ ខែវិច្ឆិកា ឆ្នាំ២០១៦នេះតុលាការនឹងប្រកាសសាលក្រមនៃសំណុំរឿង លោក ហុង សុខហួរ អតីតសមាជិកព្រឹទ្ធសភាគណបក្សសមរង្ស៉ី ពាក់ព័ន្ធការបង្ហោះឯកសារក្លែងនៅលើបណ្តាញសង្គម Facebook របស់លោក សម រង្ស៉ី។
គួរម្លឹកថា កាលពីថ្ងៃទី២៦ ខែតុលា ឆ្នាំ២០១៦នេះ សាលាដំបូងរាជធានីភ្នំពេញ បានបើកសវនាការចំពោះរឿងនេះរួចទៅហើយ។ ក្នុងករណីដែលតុលាការរកឃើញថា លោក ហុង សុខហួរ ពិតជាបានប្រព្រឹត្តដូចការចោទប្រកាន់មែននោះ លោក ហុង សុខហួរ អាចប្រឈមមុខនឹងការជាប់ពន្ធនាគារចន្លោះពី៥ឆ្នាំ ទៅ១០ឆ្នាំផងដែរ
គួរបញ្ជាក់ថា លោក ហុង សុខហួរ ដែលកំពុងជាប់ឃុំនៅពន្ធនាគារព្រៃស ត្រូវបានតុលាការចោទប្រកាន់ចំនួន៣បទល្មើស ក្នុងនោះមាន៖ បទក្លែងបន្លំឯកសារសាធារណៈ បទប្រើប្រាស់ឯកសារសាធារណៈក្លែង និងបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គមតាមមាត្រា៦២៩ មាត្រា៦៣០ និងមាត្រា៤៩៥ នៃក្រមព្រហ្មទណ្ឌ៕
ដោយ៖ប់ែន សុផល
បាត់ដំបង៖នៅវេលាម៉ោង ១០ និង២០នាទី ថ្ងៃទី០៥ ខែវិច្ឆិកា ឆ្នាំ២០១៦ លោក វ៉ាន់ ពិសិទ្ធ ការិយាល័យជំនាញ បានចុះអនុវត្តតាមដីកាចាប់ឃាត់ខ្លួន របស់លោក ជា វណ្ណៈ ចៅក្រមសើបសួរសាលាដំបូងខេត្តបាត់ដំបង ចុះថ្ងៃទី ២៩ ខែសីហា ឆ្នាំ២០១៦។
បើតាមសេចក្ដីរាយការណ៍ របស់កម្លាំងកងរាជអវុធហត្ថ ខេត្តបាត់ដំបងបានឲ្យដឹងថា៖ក្រោយទទួលបាននូវ ដីការបស់តុលាការ រយៈពេលជាងបី ខែទើបឈានទៅដល់ ការឃាត់ខ្លួន ជនសង្ស័យ០១នាក់ ឈ្មោះ គង់ ប៊ុនចំរើន ហៅ ញ៉ក់ ភេទប្រុស អាយុ២៧ ឆ្នាំ មុខរបរមិនពិតប្រាកដ រស់នៅភូមិ បួរ ឃុំក្ដុលតាហែន ស្រុក បវេល ខេត្តបាត់ដំបង នៅពេលចាប់ខ្លួន កម្លាំងការិយាល័យជំនាញ បានរកឃើញនូវសម្ភារៈ ប្រើប្រាស់គ្រឿងញៀន និង ជញ្ជីងសម្រាប់ថ្លឹងគ្រឿងញៀន ចំនួន០១ គ្រឿង ក្នុងបន្ទប់របស់ ឈ្មោះ គង់ ប៊ុនចំរើន។
កងរាជអវុធហត្ថខេត្ត បានឲ្យដឹងទៀតថា កម្លាំងការិយាល័យ ជំនាញ បានសុំគោលការណ៍ លោក ហេង លុយ ព្រះរាជអាជ្ញារងអមសាលាដំបូង ខេត្តបាត់ដំបង និងបានចុះមកដល់ផ្ទាល់ ដើម្បីបន្តចាប់ខ្លួន ជនសង្ស័យ ០១នាក់ បន្ថែមទៀតឈ្មោះ ( លី គឹមជា ហៅកុង) ភេទប្រុស អាយុ៣៣ ឆ្នាំ មុខរបរ មិនពិតប្រាកដ មានទីលំនៅចំណុចខាងលើ នៅវេលាម៉ោង ១១និង០៣នាទី ថ្ងៃ ខែ ឆ្នាំ ដដែល និងបានឆែកឆេរបន្ទប់របស់ជនសង្ស័យ ខាងលើ រកឃើញនូវ៖គ្រឿងញៀនប្រភេទម៉ាទឹកកកចំនួន ០៥ កញ្ចប់ មានទម្ងន់ ១០៨,៧៦ក្រាម។ គ្រឿងញៀនប្រភេទម្សៅពណ៌ ស (ខេ) ចំនួន ០៥ កញ្ចប់ មានទម្ងន់ ២,៥២ក្រាម។ រថយន្ត ០១ គ្រឿងម៉ាក ព្រូស ពណ៌ទឹកប្រាក់ ពាក់ផ្លាកលេខ បាត់ដំបង 2A :៧៩៦៣។
ម៉ូតូ០២ គ្រឿង ម៉ាក ហុងដាឃ្លីច ពណ៌ស ពាក់ស្លាកលេខ ភ្នំពេញ 2BS :៦៤៤០ និង ម៉ាក វីវ៉ា ពណ៌ ខ្មៅស្លាកលេខ បាត់ដំបង 1H:៥៧៧៧។ ប្រាក់ ចំនួន ១០,០០០,០០០រៀល(ដប់លានរៀល)។
ជញ្ជីញថ្លឹងគ្រឿងញៀនចំនួន ០២ គ្រឿង។ ទូរស័ព្ទដៃ ចំនួន០៥គ្រឿង។
បច្ចុប្បន្ន ជនសង្ស័យ និងវត្ថុតាង កំពុងឃាត់ខ្លួន នៅការិយាល័យបទល្មើសគ្រឿងញៀនខេត្ត ដើម្បីចាត់ការបន្តតាមនិតិវិធី៕
ខេត្តកំពត៖ស្នងការនគរបាលខេត្តកំពតលោកឧត្តមសេនីយ៍ទោ ម៉ៅ ច័ន្ទមធុរិទ្ធ បានឲ្យដឹងថា សពបុរសដែលគេប្រទះឃើញនៅព្រឹកមិញនេះមានឈ្មោះ ឃឹម នី ហៅលក អាយុ២៨ឆ្នាំ មុខរបរជាអ្នករត់តាក់ស៊ីពីកំពត-ភ្នំពេញ រស់នៅភូមិវត្តអង្គ ឃុំព្រៃឃ្មុំ ស្រុកទឹកឈូ ខេត្តកំពត។
ស្នងការបានបញ្ជាក់ថា បុរសរងគ្រោះជាអ្នករត់តាក់ស៊ី ពីកំពត-ភ្នំពេញ ហើយត្រូវបានគេប្លន់សម្លាប់យករថយន្ដមួយគ្រឿងម៉ាកកាមរីហើម ពណ៌សំបកឪឡឹក ពាក់ស្លាកលេខភ្នំពេញ 2C-9811។
លោកបន្ថែមថា ឪពុកម្ដាយរបស់សាកសព បានប្រាប់សមត្ថកិច្ចថា កូនរបស់គាត់រត់តាក់ស៊ីរាល់ថ្ងៃ ប៉ុន្ដែ២-៣ថ្ងៃមុន ជនរងគ្រោះទូរស័ព្ទប្រាប់ថា មកដល់កំពតវិញ និងដឹកម៉ូយទៅភ្នំពេញវិញ (ថ្ងៃតែមួយ) លុះចេញទៅវិញ គឺបាត់មិនឃើញចូលផ្ទះទេ ហើយទូរស័ព្ទតេចូលតែមិនលើក ដោយគាត់ (ឪពុកម្ដាយ) ស្មានតែជនរងគ្រោះ ទៅជួបអតីតប្រពន្ធដែលលែងលះគ្នាជាង១ឆ្នាំហើយ នៅឯខេត្តព្រៃវែង ទើបពួកគាត់មិនចាប់អារម្មណ៍។
គួរបញ្ជាក់ថា នៅព្រឹកថ្ងៃទី០៤ ខែវិច្ឆិកា ឆ្នាំ២០១៦នេះសពបុរសម្នាក់ក្នុងសភាពហើមរលួយ ត្រូវបានក្មេងឃ្លាលគោ ប្រទះឃើញនៅជិតស្ពានអូរក្រសារ ក្នុងស្រុកទឹកឈូ ខេត្តកំពត៕
រាជធានីភ្នំពេញ៖សាលាដំបូងរាជធានីភ្នំពេញបានសម្រេចថា នឹងប្រកាសសាលក្រមលើសំណុំរឿង លោក ស៊ុត ឌីណា អតីតឯកអគ្គរាជទូតខ្មែរប្រចាំនៅប្រទេសកូរ៉េខាងត្បូងនៅថ្ងៃទី១ ខែធ្នូ ឆ្នាំ២០១៦ខាងមុខនេះ។ បន្ទាប់ពីបើកសវនាការ នៅព្រឹកថ្ងៃទី០៤ ខែវិច្ឆិកា ឆ្នាំ២០១៦នេះ
តុលាការបានសម្រេចចោទប្រកាន់ លោក ស៊ុត ឌីណា ចំនួន២បទល្មើស រួមមានបទកេងយកប្រយោជន៍ដោយខុសច្បាប់ តាមមាត្រា៥៩៧ និង៥៩៨ នៃក្រមព្រហ្មទណ្ឌ និងបទរំលោភអំណាច តាមមាត្រា៣៥ ច្បាប់ស្ដីពីការប្រឆាំងអំពើពុករលួយ។
គួររម្លឹកលោក ស៊ុត ឌីណា ត្រូវបានអង្គភាពប្រឆាំងអំពើពុករលួយឃាត់ខ្លួនកាលពីថ្ងៃចន្ទ ទី០៤ ខែមេសា ឆ្នាំ២០១៦ កន្លងទៅ ហើយបានរកឃើញថា លោកមានការពាក់ព័ន្ធភាពមិនប្រក្រតី ក្នុងការអនុវត្តការងារនៅប្រទេសកូរ៉េ ដោយមានលុយរហូតដល់ ៧,២លានដុល្លារអាមេរិក និងមាស៣៣៩តម្លឹង បន្ទាប់ពីកាន់តំណែងបាន៣ឆ្នាំ។
គួរបញ្ជាក់ថា កាលពីព្រឹកមិញតុលាការបានបើកសវនាការកាត់ទោសលោក ស៊ុត ឌីណា អតីតឯកអគ្គរាជទូតខ្មែរប្រចាំនៅប្រទេសកូរ៉េខាងត្បូងដែលពាក់ព័ន្ធនឹងរឿងមិនប្រក្រតីក្នុងការបំពេញការងារកន្លងមកនោះ ដែលសនាវការនេះដឹកនាំដោយលោក កោ វណ្ឌី អនុប្រធានសាលាដំបូងរាជធានីភ្នំពេញ៕
រាជធានីភ្នំពេញ៖សភាព្រហ្មទណ្ឌសាលាឧទ្ធរណ៍បានសម្រេចតម្កល់សាលក្រមសាលាដំបូងរាជធានីភ្នំពេញ ទុកជាបានការដដែល ពោលគឺផ្តន្ទាទោសលោក កឹម សុខា ប្រធានស្តីទីគណបក្សសង្គ្រោះជាតិ រយៈពេល៥ខែ និងពិន័យ៨០ម៉ឺនរៀល។
គួរបញ្ជាក់ថា នៅព្រឹកថ្ងៃទី៤ ខែវិច្ឆិកា ឆ្នាំ២០១៦នេះសាលាឧទ្ធរណ៍ចាប់ផ្ដើមបើកសវនាការជំនុំជម្រះលើសំណុំរឿងលោក កឹម សុខា ប្រធានស្តីទីគណបក្សសង្គ្រោះជាតិ ក្រោមការចោទប្រកាន់ពីបទបដិសេធក្នុងការចូលខ្លួនក្នុងនាមជាសាក្សីពាក់ព័ន្ធបទល្មើសសញ្ចារកម្មដែលមានអ្នកនាង ខុម ចាន់តារាទី ហៅស្រីមុំ ដែលតុលាការចាត់ទុកថាជាបទល្មើសព្រហ្មទណ្ឌជាក់ស្តែង។
ទោះជាយ៉ាងណាលោក ហែម សុជាតិ មេធាវីមួយរូបក្នុងចំណោម៥រូប បញ្ជាក់ប្រាប់ក្រុមអ្នកសារព័ត៌មាន ថា ការសម្រេចនេះមិនត្រឹមត្រូវនោះទេ ហើយក្រុមមេធាវីនឹងដាក់ពាក្យបណ្ដឹងសាទុក្ខទៅតុលាការកំពូលបន្តទៀត៕
បាល់ទាត់៖យោងតាមសេចក្តីរាយការណ៍បានឲ្យដឹងថា ខ្សែការពាររបស់កីឡាករ Atletico Madrid គឺកីឡាករ Jose Gimenez បានក្លាយគោលដៅជាសំខាន់សម្រាប់ក្រុមបិសាចក្រហម Man Utd ក្នុងការនាំយកខ្សែការពាររូបនេះដើម្បីពង្រឹងក្រុមនៅកីឡដ្ឋាន Old Trafford។
កីឡាករវ័យ២១ឆ្នាំរូបនេះ ត្រូវបានក្រុម Man Utd គ្រោងនិងចំណាយទឹកប្រាក់៥០លានផោនសម្រាប់ផ្ទេរកីឡាកររូបនេះ ដើម្បីដោះស្រាយបញ្ហាខ្សែការពាររបស់ខ្លួន ។ Mourinho ដឹងថា ក្រុមរបស់លោកត្រូវការពង្រឹងប្រព័ន្ធខ្សែការពារដែលកំពុងតែលេងមិនស៊ីសង្វាក់គ្នា។
យ៉ាងណាមិញកិច្ចព្រមព្រៀងនេះប្រហែលជាមិនអាចនឹងធ្វើបាននៅខែមករានេះទេ ដូច្នេះលោក Mourinho ត្រូវតែរង់ចាំរហូតដល់រដូវក្តៅឆ្នាំក្រោយ ទើបអាចចុះកិច្ចព្រមព្រៀងផ្ទេរបាន៕
ខេត្តកំពត៖មានករណីភ្ញាក់មួយកើតឡើងនៅព្រឹកថ្ងៃទី៤ ខែវិច្ឆិកា ឆ្នាំ២០១៦នេះ បន្ទាប់ពីក្មេងឃ្វាលគោបានប្រទះឃើញសាកសពបុរសម្នាក់មានសភាពហើម ស្អុយរលួយ នៅចំណុចខាងត្បូងស្ពានអូរក្រសារ ផ្លូវជាតិលេខ៣ ស្ថិតក្នុងភូមិទ្វាថ្មី ឃុំព្រៃថ្នង ស្រុកទឹកឈូ ខេត្តកំពត។
មន្ដ្រីនគរបាលមូលដ្ឋាន បានឲ្យដឹងថា សាកសពរងគ្រោះ ជាបុរសជនជាតិខ្មែរ ពាក់អាវយឺតដៃខ្លី បង្កង់ពណ៌ឈាមជ្រូកលាយខ្មៅ, ពាក់ខោលីអូ ពណ៌ជ្រូក សាកសពមិនស្គាល់អត្តសញ្ញាណ។ បន្ទាប់ពីពិនិត្យរួចរាល់ សមត្ថកិច្ចសន្និដ្ឋាន ជាបឋមថា ជនរងគ្រោះស្លាប់ ដោយសារអំពើឃាតកម្ម ព្រោះនៅលើមុខសាកសព ត្រូវជនដៃដល់ វាយខ្ទេចមុខមើលលែងស្គាល់ ហើយជនរងគ្រោះសម្លាប់រយៈពេល៣ថ្ងៃ។
បច្ចុប្បន្នមន្ដ្រីនគរបាលជំនាញ កំពុងតែធ្វើការស្រាវជ្រាវដើម្បីវែកមុខជនសង្ស័យ យកមកផ្តន្ទាទោសតាមច្បាប់ឲ្យខានតែបាន៕
រាជធានីភ្នំពេញ៖គិតត្រឹមម៉ោង៦ល្ងាច ថ្ងៃទី០៣ ខែវិច្ឆិកា ឆ្នាំ២០១៦ម្សិលមិញនេះមានប្រជាពលរដ្ឋខ្មែរចំនួន ៦,៧៨៤,៧០៨នាក់ ហើយស្មើជាង៧០.២០ភាគរយបានទៅចុះឈ្មោះបោះឆ្នោត។ នេះបើតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត គ.ជ.ប៕
ដោយ៖ប៉ែន សុផល
បាត់ដំបង៖ជនសង្ស័យ២នាក់ត្រូវបានកម្លាំងមូលដ្ឋានកងរាជអាវុធហត្ថក្រុងបាត់ដំបងឃាត់ខ្លួនពាក់ព័ន្ធករណីហឹង្សាដោយចេតនាមានស្ថានទំងន់ទោសដោយយកកាំបិតសាំម៉ូរ៉ៃកាប់បំផ្លាញទៅលើម៉ូតូអ្នកដ៏ទៃកាលពីវេលាម៉ោង៨ និង០០ នាទី ថ្ងៃទី០៣ ខែវិច្ឆិកា ឆ្នាំ២០១៦នៅចំណុចភូមិចំការសំរោង១ សង្កាត់ចំការសំរោង ក្រុ ងបាត់ដំបង។
លោក សំ វិឡុង មេបញ្ជាការមូលដ្ឋានកងរាជអាវុធហត្ថក្រុងបាត់ដំបងបានអោយដឹងថា៖ជនសង្ស័យត្រូវបានឃាត់ខ្លួនរួមមាន៖
ទី១-ឈ្មោះ មិន ញក់ ហៅ ញក់ ភេទប្រុស អាយុ៣២ ឆ្នាំ មុខរបរ កម្មករសំណង់រស់នៅភូមិចំការសំរោង១ សង្កាត់ចំការសំរោង ក្រុងបាត់ដំបង។ ទី២-ឈ្មោះ លេង ណាំឈីវ ហៅ ឈីវ ភេទប្រុស អាយុ២២ ឆ្នាំមុខរបរ ចាក់ធុងបាស់រស់នៅភូមិចំការសំរោង១ សង្កាត់ចំការសំរោង ក្រុងបាត់ដំបង។
លោកបន្តថា ជនសង្ស័យខាងលើបានធ្វើសកម្មភាពយកកាំបិតសាំម៉ូរ៉ៃកាប់ទៅលើម៉ូតូម៉ាកហុងដាឌ្រីមពណ៌ខ្មៅ សេរីឆ្នាំ២០១៤ ពាក់ស្លាកលេខ បាត់ដំបង1B-2430របស់ជនរងគ្រោះឈ្មោះ ផាន ឡាយ ភេទប្រុស អាយុ១៨ ឆ្នាំ មុខរបរ ជាងពិដាន រស់នៅចំណុចកើតហេតុខាងលើ បណ្តាលឲ្យខូចខាត បែកកុងទ័រម៉ូតូ, បែកអាវម៉ូតូ, បែកក្បាលម៉ូតូ និងបែកស៊ីញ៉ូខាងឆ្វេង។
វត្ថុតាងដកហូតបានកាំបិតសាំម៉ូរ៉ៃ ចំនួន ០២ ដើម ។
បច្ចុប្បន្នជនសង្ស័យរួមនិងវត្ថុតាងត្រូវបានឃាន់ខ្លួនបញ្ជូនទៅការិយាល័យបទល្មើសព្រហ្មទណ្ឌអាវុធហត្ថ ខេត្តដើម្បីសាកសួរ និងកសាងសំណុំរឿងចាត់ការបន្តទៅតាមនីតិវិធី៕
ម៉ានីល៖យោងតាមទីភ្នាក់ងារព័ត៌មាន Reuters ផ្សាយថា មេដឹកនាំហ្វីលីពីនលោកប្រធានាធិបតី រ៉ូឌ្រីហ្គោ ឌូធើតេ បានជួបពិភាក្សាជាមួយនឹងមេដឹកនាំកំពូលរបស់ពួកឧទ្ទាមមូស្លីម MNLF នៅឯវិមានប្រធានាធិបតីកាលពីម្សិលមិញ។
ជំនួបនេះធ្វើឡើងបន្ទាប់តុលាការទីក្រុងម៉ានីលបានដកដីកាចាប់ខ្លួនមេដឹកនាំមួយរូបនេះជាបណ្តោះអាសន្ន លើបទចោទប្រកាន់ជាអ្នកដឹកនាំការបះបោរដ៏បង្ហូរឈាម។
សារព័ត៌មានដដែលបញ្ជាក់ថា ជំនួបពិភាក្សាគ្នានេះត្រូវបានធ្វើឡើងក្នុងគោលបំណងលើកស្ទួយដំណើរការ នៃការផ្តល់សន្តិភាពនៅទូទាំងប្រទេស របស់លោកប្រធានាធិបតី។ ជំនួបក៏ទទួលស្វាគមន៍យ៉ាងកក់ក្តៅពីសំណាក់ប្រធានាធិបតីហ្វីលីពីន បន្ទាប់ពីលោក រ៉ូឌ្រីហ្គោ ឌូធើតេ បានបញ្ជាឲ្យតុលាការ ដកដីកាចាប់ខ្លួនលោក Misuari ជាបណ្តោះអាសន្នសិន ដើម្បីលោកទាំងពីរអាចជួបពិភាក្សាគ្នារកដំណោះស្រាយ ដើម្បីបញ្ចប់ការបះបោរនៅភាគខាងត្បូងប្រទេស ដែលបានអូសបន្លាយអស់រយៈពេលជិតប្រាំឆ្នាំមកហើយនោះ។
គួរបញ្ជាក់ថា រដ្ឋាភិបាលហ្វីលីពីនក៏ធ្លាប់បានចុះកិច្ចព្រមព្រៀង ជាមួយក្រុមប្រឆាំង MNLF ផងដែរ ប៉ុន្តែមិនត្រូវបានគោរពអនុវត្តន៍តាម ដោយសារតែសភាក្នុងរដ្ឋបាលអាណត្តិមុន មិនអាចអនុម័តចេញនូវច្បាប់ ដើម្បីបង្កើតតំបន់មូស្លីមស្វយ័តមួយ នៅភាគខាងត្បូងប្រទេស៕
រាជធានីភ្នំពេញ៖បុរសជាសន្តិសុខម្នាក់ត្រូវបានសមត្ថកិច្ចឃាត់ខ្លួនតាមពាក្យបណ្តឹងម្តាយក្មេងស្រីរងគ្រោះពីបទរំលោភសេពសន្ថវៈ ដែលការឃាត់ខ្លួនកើតឡើងនាវេលាម៉ោងកាលពីម្សិលមិញនៅមុខមន្ទីរសម្រាកព្យាបាលដេប៉ូ ឡុង ហ៊ួរ ដែលមានទីតាំងផ្ទះលេខ១៥១ ផ្លូវលេខ២១៥ ក្រុមទី៤៥ ភូមិ១០ សង្កាត់ផ្សារដេប៉ូទី១ ខណ្ឌទួលគោក។
សមត្ថកិច្ចបានអោយដឹងថា ជនសង្ស័យមានឈ្មោះ វ៉ា ឆៃ អាយុ២៤ឆ្នាំ មុខរបរជាសន្តិសុខក្រុមហ៊ុន IPS មានស្រុកកំណើតនៅស្រុកកោះសូទិន ខេត្តកំពង់ចាម ចំណែកឯក្មេងស្រីអនីតិជនជាជនរងគ្រោះ មានឈ្មោះ ម ស អ អាយុ១២ឆ្នាំ មានទីកន្លែងស្នាក់នៅសង្កាត់ផ្សារដើមគរ ខណ្ឌទួលគោក។
ជនសង្ស័យបានឲ្យដឹងថា ខ្លួន និងក្មេងស្រីបានស្គាល់គ្នារយៈពេល១ខែ ដោយសារតែងតែអង្គុយជជែកគ្នាលេងជាញឹកញយនៅមុខមន្ទីរសម្រាកព្យាបាលដេប៉ូ ឡុង ហ៊ួរ ហើយក៏បានកើតចិត្តស្រលាញ់គ្នាទៅមក។ លុះដល់ថ្ងៃកើតហេតុ ពេលចេញពីធ្វើការទៅផ្ទះម្តាយមីង ខ្លួននិងក្មេងស្រីនោះបាននិយាយត្រូវរ៉ូវគ្នា ក៏បានទៅរួមរ័កដោយបានសម្រេចតែម្តង។
ដោយសារបាត់កូនស្រីមិនឃើញ ម្តាយក្មេងស្រីរងគ្រោះបានទៅដាក់ពាក្យបណ្តឹង លុះមកដល់ព្រឹកថ្ងៃទី០៣ ខែវិច្ឆិកានេះ ជនសង្ស័យត្រូវបានសមត្ថកិច្ចចាប់ខ្លួនតែម្តង។ បន្ទាប់ពីធ្វើការសាកសួររួចមក សមត្ថកិច្ចបានបន្តធ្វើការស្រាវជ្រាវនិង បានធ្វើសំណុំរឿងដើម្បីចាត់ការតាមនីតិវិធី៕
រាជធានីភ្នំពេញ៖នៅព្រឹកថ្ងៃទី៤ ខែវិច្ឆិកា ឆ្នាំ២០១៦នេះសាលាឧទ្ធរណ៍ចាប់ផ្ដើមបើកសវនាការជំនុំជម្រះលើសំណុំរឿងលោក កឹម សុខា ប្រធានស្តីទីគណបក្សសង្គ្រោះជាតិ ក្រោមការចោទប្រកាន់ពីបទបដិសេធក្នុងការចូលខ្លួនក្នុងនាមជាសាក្សីពាក់ព័ន្ធបទល្មើសសញ្ចារកម្មដែលមានអ្នកនាង ខុម ចាន់តារាទី ហៅស្រីមុំ ដែលតុលាការចាត់ទុកថាជាបទល្មើសព្រហ្មទណ្ឌជាក់ស្តែង។
គួររំលឹកថា លោក កែវ មុនី ចៅក្រមជំនុំជម្រះសាលាដំបូងរាជធានីភ្នំពេញ កាលពីរសៀលថ្ងៃទី៩ ខែកញ្ញា ឆ្នាំ២០១៦ ប្រកាសសាលក្រមផ្តន្ទាទោសលោក កឹម សុខា ផ្តន្ទាទោស៥ខែនិងពិន័យជាប្រាក់ចំនួន៨សែនរៀល ក្រោមការចោទប្រកាន់ពីបទ ” បដិសេធក្នុងការចូលខ្លួន ” តាមមាត្រា៥៣៨ នៃក្រមព្រហ្មទណ្ឌ ដែលតុលាការចាត់ទុកថា ជាបទល្មើសព្រហ្មទណ្ឌជាក់ស្តែង៕
រាជធានីភ្នំពេញ៖សំណុំរឿងអតីតឯកអគ្គរាជទូតខ្មែរប្រចាំនៅប្រទេសកូរ៉េខាងត្បូង លោក ស៊ុត ឌីណា ដែលពាក់ព័ន្ធនឹងរឿងមិនប្រក្រតីក្នុងការបំពេញការងារកន្លងមកនោះ តុលាការក្រុងភ្នំពេញនឹងបើកសវនាការកាត់ទោសនៅព្រឹកថ្ងៃទី០៤ ខែវិច្ឆិកា ឆ្នាំ២០១៦នេះ។
គួរបញ្ជាក់ថា តុលាការបានចោទសម្រេចចោទប្រកាន់ លោក ស៊ុត ឌីណា ចំនួន២បទល្មើស រួមមានបទកេងយកប្រយោជន៍ដោយខុសច្បាប់ តាមមាត្រា៥៩៧ និង៥៩៨ នៃក្រមព្រហ្មទណ្ឌ និងបទរំលោភអំណាច តាមមាត្រា៣៥ ច្បាប់ស្ដីពីការប្រឆាំងអំពើពុករលួយ
គួររម្លឹកថា លោក ស៊ុត ឌីណា ត្រូវបានអង្គភាពប្រឆាំងអំពើពុករលួយឃាត់ខ្លួន កាលពីថ្ងៃចន្ទ ទី០៤ ខែមេសា ឆ្នាំ២០១៦ កន្លងទៅ បន្ទាប់ពីរកឃើញថា លោកមានការពាក់ព័ន្ធភាពមិនប្រក្រតី ក្នុងការអនុវត្តការងារនៅប្រទេសកូរ៉េ ដោយមានលុយរហូតដល់ ៧,២លានដុល្លារអាមេរិក និងមាស៣៣៩តម្លឹង បន្ទាប់ពីកាន់តំណែងបាន៣ឆ្នាំ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
