ខេត្តកំពង់ធំ៖បុរសម្នាក់បានបញ្ចប់ជីវិតខ្លួនឯងដោយផឹកថ្នាំសម្លាប់សត្វល្អិតបង្កការភ្ញាក់ផ្អើលដល់ប្រជាពលរដ្ឋនៅក្បែរខាង។ ហេតុការណ៍នេះកើតឡើងកាលពីយប់ថ្ងៃទី៣០ ខែកក្កដា ឆ្នាំ២០១៦ ស្ថិតនៅភូមិស្វាយអៀ ឃុំចំណាក្រោម ស្រុកស្ទោង ខេត្តកំពង់ធំ។
ប្រភពព័ត៌មានពីសាច់ញាតិបានឲ្យដឹងថា ជនរងគ្រោះដែលស្លាប់ឈ្មោះ ណេន ណុល ភេទប្រុស អាយុ២២ឆ្នាំ ទើបតែសែនព្រេនជាប្តីប្រពន្ធជាមួយនារីម្នាក់ឈ្មោះ ជីង ឈៀង អាយុ១៩ឆ្នាំ រស់ក្នុងភូមិឃុំកើតហេតុខាងលើ រយៈពេល៣ខែប៉ុណ្ណោះ។
ប្រភពដដែលបញ្ជាក់ថា មុនពេលកើតហេតុប្តី-ប្រពន្ធទាំង២នាក់កាន់ទូរស័ព្ទ១គ្រឿងចុចលេងយ៉ាងសប្បាយរីករាយ។ លុះមួយសន្ទុះមិនដឹងយ៉ាងម៉េចក៏ដណ្តើមទូរស័ព្ទគ្នាទៅវិញទៅមក គ្រានោះបុរសជាប្តីកើតក្តីខឹង ក៏ដណ្តើមទូរស័ព្ទបានយកគប់ចោល រួចដើរទៅផឹកស្រាបាត់។ ប្រភពបន្ថែមថា បន្ទាប់ពេលត្រឡប់មកពីផឹកស្រា ប្តីក៏ដើរទៅខាងក្រោយផ្ទះ ហើយយកថ្នាំសម្លាប់សត្វល្អិត មកផឹកសម្លាប់ខ្លួនតែម្តងទៅ។
ក្រោយមក ទើបប្រពន្ធនិងសាច់ញាតិដឹងនាំគ្នាដឹកទៅកាន់មន្ទីរពេទ្យបង្អែកស្រុកស្ទោង ឱ្យជួយសង្គ្រោះ តែឥទ្ធិពលនៃថ្នាំពុលបានជ្រាបពេញរាងកាយបាត់ទៅហើយ ធ្វើឱ្យគ្រូពេទ្យមិនអាចជួយសង្គ្រោះបានក៏ស្លាប់តែម្តង ។
បន្ទាប់ពីសមត្ថកិច្ចធ្វើកោសល្យវិច័យរួច ក៏ប្រគល់សាកសពទៅឱ្យសាច់ញាត់យកធ្វើបុណ្យតាមប្រពៃណី ៕
រាជធានីភ្នំពេញ៖ចោរប្រដាប់អាវុធ២នាក់បានធ្វើសកម្មភាពបាញ់ប្លន់យកកាបូបលុយពីស្ត្រីម្នាក់ ហើយគេចខ្លួនដោយសុវត្ថិភាព ដែលករណីនេះកើតឡើងនៅវេលាម៉ោង៨ និង៣០នាទីយប់ ថ្ងៃទី៣១ ខែកក្កដា ឆ្នាំ២០១៦ ស្ថិតនៅមុខផ្ទះលេខ១២៥អេ ផ្លូវលេខ១៤៦ សង្កាត់ទឹកល្អក់២ ខណ្ឌទួលគោក។
ប្រភពពីកន្លែងកើតហេតុបានឲ្យដឹងថា នារីរងគ្រោះបានចូលរួមក្នុងកម្មវិធីជប់លៀង នៅផ្ទះកើតហេតុ ពេលចេញពីកម្មវិធីត្រឡប់ទៅផ្ទះ ខណៈបញ្ជាតេឡេបើកទ្វារបម្រុងចូលរថយន្ត ស្រាប់តែមានបុរស២នាក់ ជិះម៉ូតូស្គូពី ប្រដាប់ដោយអាវុធ បានបាញ់ប្រហារស្ត្រីរងគ្រោះ ហើយឆក់យកកាបូបលុយ បើកម៉ូតូចេញទៅដោយសុវត្ថិភាព។
ភ្លាមៗនោះធ្វើឲ្យមានកាតភ្ញាក់ផ្អើលយ៉ាងខ្លាំង ពីសំណាក់មនុស្សម្នា នៅកន្លែងកើតហេតុ ហើយប្រជាពលរដ្ឋនៅក្នុងហេតុការណ៍នោះ បានជួយបញ្ជូនស្ត្រីរងគ្រោះ ទៅកាន់មន្ទីរពេទ្យវ៉ាន់ដា តែដោយសារសភាពរបួសស្ត្រីរងគ្រោះធ្ងន់ធ្ងរពេក ក៏បញ្ជូនបន្តទៅកាន់មន្ទីរពេទ្យកាល់ម៉ែត ដើម្បីធ្វើការសង្គ្រោះ៕
ភ្នំពេញ៖ក្រោយពីទទួលបានព័ត៌មានតាមបណ្តេញសង្គមហ្វេសបុកបុរសម្នាក់បានប្រគល់កង់១គ្រឿងដែលបានទិញពីជនមិនស្គាល់មុខមួយក្រុមអោយទៅសមត្ថកិច្ចដែលហេតុការណ៍នេះកើតឡើងកាលម៉ោង១០ និង៣០នាទីព្រឹកថ្ងៃទី៣១ ខែកក្កដា ឆ្នាំ២០១៦នេះ សង្កាត់ស្ទឹងមានជ័យ ខណ្ឌមានជ័យ។
បុរសដែលទទួលទិញកង់ឈ្មោះ លី ងួន អាយុ៥០ឆ្នាំ មុខរបរជាចុងភៅស្នាក់នៅផ្ទះគ្មានលេខ ក្រុមទី៤ ភូមិទ្ទ្រា៣ សង្កាត់ស្ទឹងមានជ័យ ខណ្ឌមានជ័យ។
គួររំលឹកផងដែរថា បុរសជនជាតិជប៉ុនម្នាក់ បានជិះកង់ចេញពីប្រទេសរបស់ខ្លួន ដោយបានធ្វើដំណើរឆ្លងកាត់ ជាច្រើនប្រទេសមកហើយ លុះជិះមកដល់ប្រទេសកម្ពុជា បានចតនៅកន្លែងចំណត របស់សណ្ឋាគារមួយកន្លែង ក្នុងរាជធានីភ្នំពេញ កាលពីវេលាម៉ោង ៧យប់ថ្ងៃទី១៨ កក្កដា លុះនៅម៉ោង០៨ និង៣០នាទីព្រឹកថ្ងៃទី១៩ កក្កដា ពេលលោកចេញមក ស្រាប់តែរកកង់មិនឃើញ ទើបលោកមកដាក់ពាក្យបណ្ដឹងដើម្បីអោយសមត្ថកិច្ចជួយស្វែងរក។
សមត្ថកិច្ចបានសន្និដ្ឋានថាកង់នេះពិតជារបស់ជនជាតិជប៉ុន ដែលបាត់នោះ ឥលូវរកឃើញវិញហើយ ពេលនេះកំពុងរក្សាទុករងចាំម្ចាស់មកទទួលយកទៅវិញ៕
ដោយ៖ប្រុញ វិធិន
ក្រចេះ៖សាកសពសត្វផ្សោត១ក្បាល ត្រូវបានប្រជាពលរដ្ឋ ប្រទះឃើញងាប់អណ្តែតទឹកទន្លេជាថ្មីទៀតហើយ កាលពីវេលាម៉ោងទៀបភ្លីថ្ងៃទី៣១ ខែកក្ដដាឆ្នាំ២០១៦ នៅចំនុចភូមិបុសលាវ ឃុំបុសលាវ ស្រុកចិត្របុរី ខេត្តក្រចេះ ។ ករណីសត្វផ្សោតងាប់ក្នុងខេត្តក្រចេះ គេនៅពុំទាន់មានការបញ្ជាក់ពីជំនាញរដ្ឋបាលជលផលឬមន្ត្រីអភិរក្សសត្វផ្សោតទន្លេមេគង្គនៅឡើយទេ ប៉ុន្តែបើតាមការអះអាងរបស់ពលរដ្ឋ បានឃេីញហេតុការណ៍សត្វផ្សោត១ក្បាលនេះ មានប្រវែងប្រមាណជាង ១ម៉ែត្រ និងមានទំងន់ជិត១០០គីឡូគ្រាម ស្ថិតក្នុងវយ័បន្តពូជ ថែមទាំងមានកូនតូចមួយស្លាបអណ្ដែតនៅជិតនោះទៀតផង ។ ពលរដ្ឋ បានសន្និដ្ឋានថា សត្វផ្សោត១ក្បាលនេះ ជាផ្សោតញី បានងាប់រយះពេលប្រហែលជិត២ថ្ងៃមកហើយ រហូតអណ្ដែតទឹកចុះមកក្រោមនៅទីតាំងដែលគេប្រទះឃើញខាងលើ។ ករណីនេះគេសង្ស័យបណ្ដាលមកពីត្រូវដែកឆក់ ឬមានជំងឺទើបបណ្ដាលឲ្យងាប់ ។
ក្រោយពីពលរដ្ឋប្រទះឃើញបង្កឲ្យមានការភ្ញាក់ផ្អើលទើបគេឃើញវត្តមានរបស់មន្ត្រីអង្កការ wwf មកនាំទៅទីស្នាក់ការ ដើម្បីត្រួតពិនិត្យរកមូលហេតុ។ លោក ឡោ គឹមសាន មន្ត្រីអង្គការWWFខេត្តក្រចេះ បានបញ្ជាក់ថា ការងាប់ផ្សោតនោះនៅមិនទាន់ដឹងពីមូលហេតុច្បាស់លាស់នោះទេ។ ដោយកម្លាំងរបស់លោកកំពុងវេជក្ចប់យកទៅស្នាក់ការរអង្គការWWF ដើម្បីធ្វើការពិសោធន៍ ហើយជំហ៊ានដំបូងលោកដាក់ការសង្ស័យថា ផ្សោតមួយនេះ អាចងាប់ ដោយសាររលូតកូន ព្រោះនៅជិតផ្សោតងាប់នោះ មានកូនផ្សោតមួយក្បាលងាប់នៅក្បែរ ហើយកូនផ្សោតនោះ នៅតូចណាស់ គឺមិនទាន់គ្រប់ខែនោះទេដូច្នេះទើបលោកសន្និដ្ឋានថា បណ្ដាលមកពីរលូតកូនតែម្តង៕
រាជធានីភ្នំពេញ៖កម្ពស់ទឹកសម្រាប់ថ្ងៃទី០១ ខែសីហា ឆ្នាំ២០១៦នេះ នៅតាមបណ្តាស្ថានីយជលសាស្ត្រនានា រួមមានស្ថានីយទន្លេមេគង្គ-ស្ទឹងត្រែង, ស្ថានីយទន្លេមេគង្គ-ក្រចេះ, ស្ថានីយទន្លេ មេគង្គ-កំពង់ចាម, ស្ថានីយបាសាក់-ចតុមុខ, ស្ថានីយមេគង្គ-អ្នកលឿង, ស្ថានីយបាសាក់-កោះខែល និងស្ថានីយទន្លេសាប-ព្រែកក្តាម៕
ភ្នំពេញ៖កូនប្រុសលោកឧត្តមសេនីយ៍ផ្កាយ២យោធាម្នាក់ត្រូវបានកម្លាំងនគរបាលខណ្ឌចំការមនឃាត់ខ្លួនតាមដីការរបស់តុលាការពីបទល្មើសប្លន់ ដែលការឃាត់ខ្លួននេះធ្វើឡើងកាលពីវេលាម៉ោង១ និង៣០នាទីរសៀល ថ្ងៃទី២៨ ខែកក្កដា ឆ្នាំ២០១៦ នៅប៉ុស្តិ៍នគរបាលផ្សារដើមថ្កូវ ដែលមានទីតាំងនៅតាមបណ្តោយផ្លូវលេខ៤៣០ សង្កាត់ផ្សារដើមថ្កូវ ខណ្ឌចំការមន ខណៈជនសង្ស័យរូបនេះមកធ្វើលិខិតបញ្ជាក់ផ្ទេរកម្មសិទ្ធិរថយន្ត ។
ប្រភពព័ត៌មានពីមន្ត្រីនគរបាលបានប្រាប់ឱ្យដឹងថា បុរសដែលបានឃាត់ខ្លួនមានឈ្មោះ សុង សុវណ្ណ ហៅណូ អាយុ២៧ឆ្នាំ មុខងារជាមន្ត្រីយោធាមានឋានន្តរសក្តិ ថា្នក់អនុសេនីយ៍ឯក (សក្តិ៣) ហើយក៏ជាកូនប្រុសរបស់ឧត្តមសេនីយ៍ផ្កាយ២យោធាមួយរូប ស្នាក់នៅផ្ទះលេខ២៤៣ ផ្លូវព្រះមុនីវង្ស ក្រុមទី៣០ ភូមិ៤ សង្កាត់ផ្សាដើមថ្កូវ ខណ្ឌចំការមន រាជធានីភ្នំពេញ ។ ខណៈពេលជនសង្ស័យរូបនេះមកធ្វើលិខិតបញ្ជាក់ផ្ទេរប័ណ្ណកម្មសិទ្ធិរថយន្តនៅក្នុងប៉ុស្តិ៍នគរបាលផ្សារដើមថ្កូវ ម្យ៉ាងដោយសារតែមានតម្កល់ដីការបង្គាប់តាមរកចាប់ខ្លួនរបស់គេមួយច្បាប់ពីសាលាដំបូងរាជធានីភ្នំពេញពីបទល្មើសប្លន់កាលពីថ្ងៃទី ១១ ខែខែកុម្ភៈ ឆ្នាំ២០០៤កន្លងមក និងបានរត់គេចខ្លួននោះ ក៏ត្រូវសមត្ថកិច្ចធ្វើការឃាត់ខ្លួនភ្លាមៗតែម្តង ។
ប្រភពដែលបានប្រាប់ឱ្យដឹងថា ក្រោយពេលដែលកម្លាំងប៉ុស្តិ៍ធ្វើការឃាត់ខ្លួនមន្ត្រីយោធាជាប់ចោទរូបនោះបានហើយ ក៏បានធ្វើការបញ្ជូនខ្លួនទៅកាន់អធិការដ្ឋាននគរបាលខណ្ឌចំការមន តែភ្លាមនោះត្រូវបានក្រុមគ្រួសារធ្វើការតវ៉ាទៅនឹងការឃាត់ខ្លួននេះ ដោយអះអាងថា រូបគេទទួលបាននូវលិខិតលើកលែងទោសពីពន្ធនាគារមួយច្បាប់រួចហើយ និងកំពុងតែធ្វើការរស្រាវជ្រាវរក ។
ក្រោយពីការតវ៉ារបស់ក្រុមគ្រួសារជនជាប់ចោទជាមន្ត្រីយោធាខាងលើ ហើយមិនមានលិខិតលើកលែងទោសទៅតាមការអះអាងរបស់ក្រុមគ្រួសារខាងលើ លុះមកដល់ព្រឹកថ្ងៃទី២៩ ខែកក្កដា ឆ្នាំ២០១៦នេះ កម្លាំងនគរបាលខណ្ឌចំការមនក៏ស្រេចបញ្ជូនខ្លួនទៅកាន់សាលាដំបូងរាជធានីភ្នំពេញ ដើម្បីចាត់ការទៅតាមផ្លូវច្បាប់ជាបន្តទៅទៀត ៕
ដោយ៖ប៉ែន សុផល
ខេត្តបាត់ដំបង៖ប្រជាពលរដ្ឋក្នុងសង្កាត់ក្ដុលដូនទាវក្រុង និងខេត្តបាត់ដំបង បានរិះគន់ដល់នាយប៉ុស្ដិ៍នគរបាលរដ្ឋបាលស្លាកែតស្ដីទីបន្ទាប់ពីរកឃើញថ្នាំញៀនហើយសម្រួល យកលុយរួចដោះលែងមនុស្សវិញ។ស្រទាប់មហាជននៅក្នុងសង្កាត់ក្ដុលដូនទាវបានបង្ហើបអោយដឹងនៅថ្ងៃទី២៩ ខែកក្កដា ឆ្នាំ២០១៦នេះថា៖ នៅក្នុងការល្បាតវេលាម៉ោងប្រមាណជិត១០.០០យប់ថ្ងៃទី២៨ ខែកក្កដា ឆ្នាំ២០១៦កន្លងមកនេះ ក្រោមការដឹកនាំដោយលោកវ៉ាស៊ី ថារ៉ុត នាយប៉ុស្តិ៍នគរបាលស្លាកែតស្ដីទីបានរកឃើញថ្នាំញៀនប្រភេទម្សៅហៅម៉ាទឹកកកចំនួន១ថង់តូចពីយុវជនចំនួន៣នាក់ដែលកំពុងធ្វើដំណើរពីស្លាកែតទៅកាន់ទីប្រជុំជនក្រុងបាត់ដំបង។ នៅក្នុងការរកឃើញនេះកម្លាំងសមត្ថកិច្ចប៉ុស្ដិ៍ស្លាកែតបាននាំខ្លួនយុវជនដែលពាក់ពន្ធ័នេះទៅកាន់មូលដ្ឋានប៉ុស្ដិ៍រយះពេលជាង១ម៉ោងហើយបានឯកភាពគ្នាក្នុងការសម្រួលតម្រូវអោយុវជនទាំង៣នាក់បង់អោយក្នុងម្នាក់ចំនួន១០០ដុល្លាទើបដោះលែង។
ប្រភពខាងលើបន្ដរថា៖ សកម្មភាពការងារល្បាតរបស់សមត្ថកិច្ចនេះហាក់មិនមានផលប្រយោជន៍ដល់មូលដ្ឋាននិងសង្គមឡើយ ផ្ទុយទៅវិញសកម្មភាពការងារនេះវាជាការធ្វើអាជីកម្មរកប្រាក់ចំណូលចូលក្នុងហោប៉ៅសុទ្ធសាតដោយគ្រាន់តែរកឃើញបទល្មើសហើយចចារសម្រួលគ្នាជាថ្នូរនិងផលប្រយោជន៍ទូរទាត់អោយលុយជាមួយការដោះអោយរួចខ្លួនពុំនោះត្រូវបញ្ជូនមកខាងតុលាការ។
ចំណែកយុវជនម្នាក់ក្នុងចំណោមការឃាត់ខ្លួននេះបានឡើកឡើងថា៖ ពួកខ្លួនទាំង៣នាក់បានជិះម៉ូតូក្នុងបំណងទៅច្រៀងការ៉ាអូខេលុះដល់ចំនុចផ្លូវស្រែ១០០ក៍ត្រូវនគរបាលប៉ុស្ដិ៍ស្លាកែតកាក់សួរនាំហើយឆែកឆេរតែម្ដង បន្ទាប់ពីរកឃើញថ្នាំញៀន១ថង់តូចបានបញ្ជូនពួកខ្លួនទៅកាន់ប៉ុស្ដិ៍ហើយបានសួរនាំទាក់ទងការសម្រួលយកលុយក្នុងម្នាក់ចំនួន១០០ដុល្លាជាថ្នូរនិងការដោះលែងពុំនោះទេនិងត្រូវបញ្ជូនទៅថ្នាក់លើអាចនិងអស់លុយច្រើន។ដោយសារឱពុកម្ដាយយុវជនខាងលើមិនមានលុយ ការតថ្លៃហាងឆេងធ្លាក់មកនៅត្រឹម១០០ដុល្លាជាថ្នូរនិងការដោះលេងទាំងអស់គ្នា ប៉ុន្ដែជាក់ស្ដែងលុយដែលពួកគាត់រត់ទៅខ្ចីគេទាំងយប់បានត្រឹមតែ២៣ម៉ឺនរៀលប៉ុណ្ណោះបានប្រគល់ជូនដល់នគរបាលនៅសល់២០ម៉ឺនរៀលទៀតប្រគល់ជូននៅម៉ោង១ .០០រសៀលថ្ងៃទី២៩ ខែកក្កដានេះ។
រីឯលោកវ៉ាស៊ី ថារ៉ុត នាយប៉ុស្តិ៍នគរបាលស្លាកែតស្ដីទីបានបដិសេដ្ឋថា៖ មិនបានទទួលលុយទាំងអស់នោះទេគឺទទួលបានតែបួន ដប់ម៉ឺនប៉ុណ្ណោះជាការជូនដល់កងកម្លាំងក្នុងការចុះបំពេញការងាររបស់មន្ដ្រីគយក្នុងខេត្តម្នាក់ដែលមានកូននៅក្នុងចំណោមក្មេងទាំង៣នាក់នោះដោយសន្យាថាសុំយកទៅអប់រំបន្ថែមទៀតនៅផ្ទះ ម្យ៉ាងទៀតវាជាការមួលបង្កាច់ការពិតព្រោះកាលពីថ្មីៗនេះលោកបានដឹកនាំកម្លាំងចុះបង្ក្រាបវង់ល្បែងមួយកន្លែងក្នុងមូលដ្ឋាននេះទើបអាចមកពីពួកគេស្អប់និងគុំគួនប៉ុណ្ណោះ៕
ខេត្តកណ្ដាល៖នគរបាលមូលដ្ឋានបានឲ្យដឹងថា កាលពីថ្ងៃទី២៩ ខែកក្កដា ឆ្នាំ២០១៦ ប្រជាពលរដ្ឋបានប្រទះឃើញសាកសពម្នាក់បណ្ដែតទឹកខ្លួនទទេគ្មានសំលៀកបំពាក់ជាប់ខ្លួនមិនស្គាល់អត្តសញ្ញាណ ភេទប្រុស អាយុប្រហែលជាង៣០ឆ្នាំ នៅត្រង់ចំណុចស្ទឹងព្រែកត្នោត ក្នុងភូមិសាស្ត្រភូមិត្រាញ់ឃុំរកា ស្រុកកណ្ដាលស្ទឹង ខេត្តកណ្ដាល( ជាប់ព្រុំប្រទល់ឃុំក្រាំងម្កាក់ស្រុកអង្គស្នួល)។
ប្រភពដដែលបញ្ជាក់ថា សាកសពមានសភាពហើមស្អុយដង្កូវចុះរបបស្បែកស្ទើរជ្រុះអស់ សក់រង្គោះអស់មួយចំនួនធំ។ ប្រភពបន្ថែមថា ក្រៅពីនេះពុំមានស្លាកស្នាមអ្វីគួរឲ្យកត់សំគាល់ឡើយ យើងបានផ្ដិតយកក្រយ៉ៅដៃខាងធ្វេងសពបានប្រគល់ឲ្យ អាជា្ញធរឃុំរកាកប់រក្សាទុករង់ចាំក្រុមគ្រួសារ៕
ខេត្តបាត់បង៖ក្មេងប្រុសម្នាក់ត្រូវបានរថយន្តPAJERO បណ្តាលឲ្យស្លាប់យ៉ាងអាណោចអាធ័ម គ្រាដែលរត់តាមឪពុកមកមើលមនុស្សខ្យល់គរ ដែលហេតុការណ៍នេះកើតឡើងកាលពីវេលាម៉ោង០៦ និង០០នាទីល្ងាចថ្ងៃទី២៩ ខែកក្កដា ឆ្នាំ២០១៦ នៅចំណុចភូមិមុសឃ្លាំង ចែ ពៅ ស្ថិតក្នុងភូមិអូរ ឃុំពេជ្រចិន្តា ស្រុកភ្នំព្រឹក ខេត្តបាត់ដំបង។
តាមប្រភពព័ត៌មានបានឲ្យដឹងថា រថយន្តម៉ាក PAJERO ពណ៌ស្លែរ ពាក់ផ្លាកលេខ ភ្នំពេញ 2G 6848 បើកបរដោយ ឈ្មោះ លាង ប៊ុនធឿន ភេទប្រុស អាយុ៣៦ឆ្នាំ មុខរបរធ្វើចំការ រស់នៅភូមិត្រពាំងព្រលិត ឃុំសន្តិភាព ស្រុកសំពៅលូន រួមដំណើរជាមួយក្រុមគ្រួសារ ដើម្បីមកចូលរួមខួបកំណើតក្មួយ នៅភូមិភ្នំតូច ឃុំពេជ្រចិន្តា ស្រុកភ្នំព្រឹក។ ចំណែកឯក្មេងរងគ្រោះ ឈ្មោះ ហ៊ួ ម៉េងសឺ ភេទប្រុស អាយុ០៣ឆ្នាំ។
ប្រភពបញ្ជាក់ថា មុនពេលកើតហេតុ មានមនុស្សខ្យល់គរ នៅខាងលិចផ្លូវ ឪពុកក្មេងរងគ្រោះ និងប្រជាពលរដ្ឋបានទៅមើល ចំណែកអ្នកបើករថយន្ត ពីជើង មកត្បូងដល់កន្លែងខាងលើបានបន្ថយល្បឿន មើលអ្នកខ្យល់គរ មិនបានមើលទៅមុខក៏បានជាន់ក្មេង នៅពាក់កណ្តាលផ្លូវ ដែលរត់មកតាមឪពុកវា បណ្តាលឲ្យស្លាប់តែម្តង៕
រាជធានីភ្នំពេញ៖នៅរាត្រីថ្ងៃទី២៩ ខែកក្កដា ឆ្នាំ២០១៦ សម្តេច ហ៊ុន សែន នាយករដ្ឋមន្ត្រីនៃកម្ពុជា បានប្រកាសប្តឹងសមាជិកព្រឹទ្ធសភា មកពីគណបក្ស សម រង្ស៊ី ម្នាក់ឈ្មោះ ថាក់ ឡានី ដែលបានចោទប្រកាន់សម្តេច ថា ជាអ្នកសម្លាប់លោក កែម ឡី។
ការប្រកាសប្តឹងរបស់សម្តេច ហ៊ុន សែន នៅពេលនេះ ធ្វើឡើងបន្ទាប់ពីលោកស្រី ថាក់ ឡានី សមាជិកព្រឹទ្ធសភាមកពីគណបក្ស សម រង្ស៊ី បាននិយាយតាមរយៈវិដេអូឃ្លីបមួយ ដែលមានរយៈពេលប្រមាណជិត២នាទីថា សម្តេច ជាអ្នកសម្លាប់លោក កែម ឡី ខណៈដែលវីដេអូឃ្លីបនោះបានរងនូវប្រតិកម្មតបយ៉ាងចាស់ដៃពីសាធារណជន៕
ព្យុងយ៉ាង៖រដ្ឋាភិបាលកូរ៉េខាងជើងបានរិះគន់ខ្លាំងៗ ចំពោះវត្តមានកងយោធារបស់សហរដ្ឋអាមេរិក នៅលើទឹកដីប្រទេសកូរ៉េខាងត្បូង និងជំរុញឲ្យកូរ៉េខាងត្បូងផ្លាស់ប្តូរគោលនយោបាយគាំទ្រដោយសហរដ្ឋអាមេរិករបស់ខ្លួនចេញ។ នេះបើយោងតាមសារព័ត៌មានស៊ិនហួ។
អ្នកនាំពាក្យមួយរូបរបស់គណៈកម្មាធិការសន្តិភាពជាតិកូរ៉េខាងជើងបានថ្លែងថា កងកម្លាំងសហរដ្ឋអាមេរិក ដែលមានតាំងទីនៅកូរ៉េខាងត្បូង អាចជាគោលដៅចម្បងគេ នៃការវាយប្រហារណាមួយ ពីកូរ៉េខាងជើង និងស្នើឲ្យអាមេរិកដកកងកម្លាំងយោធាចេញពីឧបទ្វីបកូរ៉េ។ មន្ត្រីរូបនោះបន្តថា ការធ្វើសមយុទ្ធយោធាចេញពីកោះ Okinawa របស់ជប៉ុនទៅកាន់មូលដ្ឋានទ័ពអាកាសមួយ របស់សហរដ្ឋអាមេរិក នៅក្នុងទីក្រុង Kunsan ប្រទេសកូរ៉េខាងត្បូង នៅក្នុងការសម្រេចចិត្តរួមគ្នាមួយ ដោយរដ្ឋាភិបាលទីក្រុង Seoul និង Washington ក្នុងការដាក់ពង្រាយ ប្រព័ន្ធការពារគ្រាប់មីស៊ីល THAAD នៅលើទឹកដីឧបទ្វីបកូរ៉េ។
គួរបញ្ជាក់ថា កាលពីសប្តាហ៍មុន កូរ៉េខាងជើងបានបាញ់គ្រាប់មីស៊ីលចំនួន៣គ្រាប់ ដែលគេជឿជាក់ថា ២គ្រាប់ជាមីស៊ីលរយៈចម្ងាយមធ្យម ឈ្មោះ Rodong និងមួយគ្រាប់ជាមីស៊ីលរយៈចម្ងាយខ្លីឈ្មោះ Scud នៅក្នុងការបង្ហាញសព្វាវុធ ប្រឆាំងនឹងការដាក់ពង្រាយប្រព័ន្ធការពារគ្រាប់មីស៊ីល THAAD នៅកូរ៉េខាងត្បូង៕
រាជធានីភ្នំពេញ៖បុរសម្នាក់បានរងរបួសធ្ងន់ដោយសារជិះម៉ូតូក្នុងស្ថានភាពស្រវឹងជោកបុករថយន្ដក្រឡុកស៊ីម៉ងត៍របស់ក្រុមហ៊ុន ឡូង ម៉េង (LM) ចំពីបុកមុខ បណ្ដាលឱ្យរងរបួស បែកចិញ្ចើម ចំណែកម៉ូតូខូចខាតយ៉ាងដំណំ គៀបជាប់ក្រោមកង់រថយន្ដ។ ហេតុការណ៍នេះកើតឡើងនៅយប់ថ្ងៃទី២៩ ខែកក្កដា ឆ្នាំ២០១៦ តាមបណ្ដោយផ្លូវកម្ពុជាក្រោម សង្កាត់ផ្សារដេប៉ូ២ខណ្ឌទួលគោក រាជធានីភ្នំពេញ។
តាមប្រភពព័ត៌មានបានឱ្យដឹងថា មុនពេកើតហេតុគេឃើញបុរសម្នាក់ស្ថិតក្នុងស្ថានភាពស្រវឹង ជិះម៉ូតូមួយគ្រឿងម៉ាកScoopy ពាក់ស្លាកលេខភ្នំពេញ1FT-2869 បើកបរក្នុងទិសដៅ ពីកើតទៅលិច ចំណែករថយន្ដរបស់ក្រុមហ៊ុនក្រឡុកស៊ីម៉ងត៍ LM Concrete បើកបរច្រាស់ទិសគ្នា លុះដល់ចំណុចខាងលើ ម៉ូតូបានរេចង្កូតចូលផ្លូវរបស់រថយន្ដ ហើយបុកចំពីមុខ បណ្ដាលឲ្យអ្នកបើកបរម៉ូតូ រងរបួសបែកចិញ្ចើម រីឯម៉ូតូគៀបជាប់កង់រថយន្ដខាងឆ្វេង រងការខូតខាតស្ទើរទាំងស្រុង។
ក្រោយពេលកើតហេតុភាគីទាំង២ បានព្យាយាមសម្រួលគ្នាដែរ តែមិនត្រូវ ទើបសមត្ថកិច្ចជំនាញយករថយន្ដ និងម៉ូតូទៅរក្សាទុកដើម្បីដោះស្រាយតាមក្រោយ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
