កូរ៉េខាងជើង៖កូរ៉េខាងជើងបានបាញ់មីស៊ីលរយៈចម្ងាយមធ្យមលើកទី២ ប្រកបដោយជោគជ័យ នៅព្រឹកថ្ងៃពុធនេះ ដោយមិនខ្វល់ពីការគំរាមរបស់អន្តរជាតិ នោះឡើយ។
មន្ត្រីយោធាកូរ៉េខាងត្បូងបានឲ្យដឹងថា ការបាញ់គ្រាប់មីស៊ីលលើកទី១ ចេញពីតំបន់ឆ្នេរសមុទ្រនៃក្រុង Wonsan របស់កូរ៉េខាងជើង ហើយចំពោះគ្រាប់ទី២ ក៏ស្ថិតនៅតំបន់ដដែលនោះដែរ៕
ខេត្តបាត់ដំបង៖កាលពីថ្ងៃទី២១ ខែមិថុនា ឆ្នាំ២០១៦ ម្សិលមិញនេះ លើភូមិសាស្ត្រច្រកទ្វាអន្តរជាតិបានឡែម ស្រុកកំរៀងនិងច្រកតំបន់ភ្នំដីគីឡូ១៣ ក្នុងស្រុកសំពៅលូន ខេត្តបាត់ដំបងអាជ្ញាធរថៃបានបញ្ជូនពលករខ្មែរចំនួន១៤៩នាក់ដែលនៅធ្វើការងាររ៉ាយប៉ាយដោយខុសច្បាប់នៅក្នុងទឹកដីថៃ។
លោកអនុសេនីយ៍ឯក សៀក សានិត មេបញ្ជាការរងកងរាជអាវុធហត្ថស្រុកកំរៀងបានអោយដឹងនៅថ្ងៃទី២២ ខែមិថុនានេះថា: នៅរសៀលម៉ោង៣:៤០រសៀល ថ្ងៃទី១៩ ខែមិថុនាកន្លងមកនេះសមត្ថកិច្ចថៃបានបញ្ជូនពលករខ្មែរដែលឆ្លងដែនខុសច្បាប់ចំនួន១៤៩នាក់ក្នុងនោះបានបញ្ជូនកាត់តាមច្រកអន្តរជាតិបានឡែមចំនួន១៣៥នាក់និងតាមច្រកគីឡូ១៣ ចំនួន១៤នាក់មកកាន់ស្រុកកំណើតវិញបន្ទាប់អប់រំនិងធ្វើកិច្ចសន្យាបញ្ឍប់។
លោកមេបញ្ជាការរងកងរាជអាវុធហត្ថស្រុកកំរៀងបានអោយដឹងបន្តរថា: ពលករខ្មែរដែលសមត្ថកិច្ចថៃឃាត់ខ្លួនបញ្ជូនត្រឡប់មកស្រុកវិញនេះភាគច្រើនជាពលករមកពីបណ្តាខេត្តព្រៃវែង ស្វាយរៀង តាកែវនិងបណ្តាខេត្តខាងកើតដទៃទៀត ពលករទាំងអស់នេះធ្វើចំណាកស្រុកឆ្លងដែនចូលទៅកាន់ប្រទេសថៃតាមច្រកក្នុងស្រុកម៉ាឡៃ អូរបីជាន់ជាដើម៕
រាជធានីភ្នំពេញ៖ប្រធានក្រុមប្រឹក្សាជំនុំជម្រះតុលាការកំពូល លោក សឹង បញ្ញាវុឌ្ឈ នៅព្រឹកថ្ងៃទី២២ ខែមិថុនា នេះបានសម្រេចបន្តឃុំខ្លួនលោក ហុង សុខហួរ សមាជិកព្រឹទ្ធសភាគណបក្ស សម រង្ស៊ី ក្នុងពន្ធនាគារ និងតម្រូវឲ្យ ប្រគល់កុំព្យូទ័រដែលជាឧបករណ៍សម្រាប់ស្រាវជ្រាវផែនទី សន្ធិសញ្ញាព្រំដែនកម្ពុជាវៀតណាមក្លែងក្លាយ ជូនតុលាការជាកំហិត។ ការប្រកាសសាលដីកានេះធ្វើឡើងនៅចំពោះមុខលោក ហុង សុខហួរ និងមេធាវីការពារក្តីរបស់លោកផងដែរ។
គួរបញ្ជាក់ថា នៅព្រឹកមិញនេះចៅក្រមជំនុំជម្រះនៃតុលាការកំពូល ប្រកាសសាលដីកាក្នុងសំណុំរឿងលោក ហុង សុខហួរ អតីតសមាជិព្រឹទ្ធសភាគណបក្ស សម រង្ស៊ី។ ជាសាលដីកាដែលនឹងចេញក្នុងរយៈពេល ១៤ថ្ងៃខាងមុខទៀតនេះ គឺពាក់ព័ន្ធនឹងបណ្ដឹងតវ៉ាការឃុំខ្លួនលោក ហុង សុខហួរ ខុសនីតិវិធី និងបណ្ដឹងប្រឆាំងសាលក្រម ចាត់របៀបរបស់តុលាការក្រុងភ្នំពេញ៕
រាជធានីភ្នំពេញ៖នៅថ្ងៃទី២១ ខែមិថុនា ឆ្នាំ២០១៦ម្សិលមិញនេះមានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន៦លើក (យប់២លើក) បណ្តាលឲ្យមនុស្សស្លាប់៣នាក់ រងរបួសធ្ងន់៦នាក់ និងរបួសស្រាល៤នាក់។ នេះបើយោងរបាយការណ៍របស់អគ្គស្នងការនគរបាលជាតិ។
ប្រភពដដែលបន្តថា នៅក្នុងហេតុការណ៍គ្រោះថ្នាក់ចរាចរណ៍ ៦លើកនេះ បណ្តាលឲ្យខូចខាតយានយន្ត សរុបចំនួន១០គ្រឿង រួមមានម៉ូតូចំនួន៨គ្រឿង និងរថយន្តធុនតូចចំនួន២គ្រឿង ហើយមូលហេតុដែលបណ្តាលឲ្យកើតមានករណីគ្រោះថ្នាក់ចរាចរណ៍ រួមមានល្មើសល្បឿន៣លើក, ស្រវឹង២លើក និងប្រជែងគ្រោះថ្នាក់១លើក។ ប្រភពខាងលើបញ្ជាក់ថា ក្នុងនោះអ្នកមិនពាក់មួកសុវត្ថិភាព ពេលគ្រោះថ្នាក់ចរាចរណ៍១៣នាក់។
ជាមួយគ្នានោះនៅថ្ងៃទី២១ ខែមិថុនា ឆ្នាំ២០១៦ លទ្ធិផលត្រួតពិនិត្យអនុវត្តច្បាប់ចរាចរណ៍ ផ្លូវគោកឃើញថា យានយន្តដែល្មើសសរុបទូទាំងប្រទេសមាន ចំនួន៤៦០០គ្រឿង ក្នុងនោះបានធ្វើការអប់រំចំនួន២៤១៣គ្រឿង និងពិន័យសរុប២១៨៧គ្រឿង៕
រាជធានីភ្នំពេញ៖នៅព្រឹកនេះតាមគម្រោងតុលាការកំពូល នឹងប្រកាសសាលដីកាលើសំណុំរឿងលោក ហុង សុខហួរ អតីតសមាជិព្រឹទ្ធសភាគណបក្ស សម រង្ស៊ី ដែលសុំនៅក្រៅឃុំ។
គួរបញ្ជាក់ថា មេធាវីការពារក្ដីរបស់លោក ហុង សុខហួរ បានប្ដឹងទាស់ដោយចាត់ទុកថា ការឃុំខ្លួនរបស់សមត្ថកិច្ចប្រឆាំងលោក ហុង សុខហួរ ដោយអះអាងថា បានធ្វើឡើងខុសនីតិវិធី។
យ៉ាងណាក៏ដោយ គេកំពុងរង់ចាំលទ្ធផលនៃការប្រកាសសាលក្រមតុលាការកំពូលព្រឹកនេះ ទាក់ទងជោគវាសនារបស់អតីតសមាជិកព្រឹទ្ធសភារូបនោះ៕
រាជធានីភ្នំពេញ៖កាលពីម្សិលមិញ ក្រសួងមហាផ្ទៃ បានដាក់ចេញនូវការអំពាវនាវ ៤ចំណុចសំខាន់ៗ ទៅដល់អ្នកបើកបររថយន្តដឹកកម្មករ នៅតាមរោងចក្រទូទាំងប្រទេសកម្ពុជា ចូលរួមទប់ស្កាត់គ្រោះថ្នាក់ចរាចរណ៍ ចំពោះកម្មករ កម្មការិនី។
សេចក្តីអំពាវនាវ នោះក៏បានដាក់ចេញនូវការណែនាំចំនួន៤ចំណុច ៖
១- អ្នកប្រកបរបរដឹកកម្មករ កម្មការិនី គប្បីប្រើប្រាស់រថយន្ដដឹក អ្នកដំណើរប្រភេទតូរីស ឬបឺស ដែលមានលក្ខណៈសុវត្ថិភាព ជាប្រភេទយានយន្ដដទៃទៀត ដើម្បីដឹកកម្មករ កម្មការិនី ដោយអង្គុយតាមកៅអី ក្នុងរថយន្ដ និងមិនត្រូវផ្ទុកលើដំបូលជាដាច់ខាត។ គប្បីកាត់បន្ថយឲ្យបានអតិបរមា នូវការដឹកកម្មករ កម្មការនី តាមរថយន្ដដឹកទំនិញ ដោយឈរណែនណាន់ តាន់តាប់លើសចំណុះ ឬតាមទោចក្រយានយន្ដសណ្ដោងរ៉ឺម៉ក ដែលមានហានិភ័យខ្ពស់ ងាយកើតមានគ្រោះថ្នាក់ ដូចដែលពេលកន្លង ទៅករណីគ្រោះថ្នាក់មួយលើកៗ បណ្ដាលឲ្យកម្មករ កម្មការិនី ទទួលរងគ្រោះជាច្រើនឥតគណនា។
២- អ្នកបើករថយន្ដដឹកកម្មករ កម្មការិនីគ្រប់រូប ត្រូវមានប័ណ្ណបើកបរ ព្រមទាំងរថយន្ដទាំងអស់ មានប័ណ្ណសម្គាល់យានយន្ដ ស្លាកលេខ និងវិញ្ញាបនបត្រត្រួតពិនិត្យលក្ខណៈបចេ្ចកទេស ដែលមានសុពលភាព។
៣- ក្នុងការដឹកកម្មករ កម្មការិនីតាមរថយន្ដដឹកទំនិញ ត្រូវអនុវត្តវិធានការសុវត្ថិភាពដូចខាងក្រោម៖
– ត្រូវរៀបចំកៅអីឲ្យបានត្រឹមត្រូវ ហាមមិនឲ្យឈរដាច់ខាត
– ត្រូវមានរនាំងដែកបាំងជុំវិញ មិនឲ្យដាក់ដៃចេញក្រៅ
– ហាមផ្ទុកលើសចំណុះ
– ត្រូវធានាលក្ខណៈបច្ចេកទេស រថយន្ដឲ្យមានសុវត្ថិភាព ពិសេសចំពោះកង់ ភ្លើង ហ្វ្រាំង ចង្គូត ។ល។
– ត្រូវបើកបរដោយគោរពច្បាប់ចរាចរណ៍គ្រប់ពេល គ្រប់ទីកន្លែងពិសេស ត្រូវបើកបរគោរពល្បឿនកំណត់ គោរពសញ្ញាចរាចរណ៍ គោរពសិទ្ធិអាទិភាព ប្រកាន់ស្ដាំ ធានាសុវត្ថិភាព ក្នុងការជែង ការបត់ ការឈប់ និងការចត មិនបើកបរក្នុងស្ថានភាពស្រវឹង ។ល។
៤- នៅតាមគោលដៅរោចក្រ សហគ្រាស អ្នកបើកបររថយន្ដដឹកកម្មករ កម្មការិនីត្រូវឈប់ ឬចត ឲ្យមានសណ្ដាប់ធ្នាប់ និងមិនមានការកកស្ទះចរាចរណ៍។
សេចក្តីអំពាវនានាដដែលបន្ថែមថា «គណៈកម្មាធិការជាតិ សុវត្ថិភាពចរាចរណ៍ផ្លូវគោក សង្ឃឹមថា អ្នកបើកបររថយន្ដដឹកកម្មករ កម្មការិនីគ្រប់រូប និងចូលរួមអនុវត្តតាមការអំពាវនាវនេះ ដែលផ្ដល់គុណប្រយោជន៍ ក្នុងការរក្សារសុវត្ថិភាព ជូនកម្មករ កម្មការិនី ជាកម្លាំងផលិតកម្មដ៏សំខាន់ ឲ្យបានជៀសផុតពីគ្រោះថ្នាក់ ចរាចរណ៍ផ្លូវគោក»៕
ដោយ៖ប៉ែន សុផល
បាត់ដំបង៖បុរសម្នាក់បានបញ្ចប់ជីវិត ដោយចង ក.សម្លាប់ខ្លួន ព្រោះតែខូចចិត្តនឹងការបំផ្លាញអស់ ទ្រព្យសម្បត្តិជាច្រើន ដោយសារការលុះលង់ ប្រព្រឹត្តល្បែងស៊ីសងហ្គេមបាញ់ត្រីក្នុងកាស៊ីណូឃ្វីន ឋិតនៅស្រុកកំរៀង ខេត្តបាត់ដំបង។
ប្រភពព័ត៌មានជុំវិញកន្លែងកើតហេតុបានអោយដឹងថា ហេតុការណ៍ខាងលើ បានកើតឡើងនៅ វេលាម៉ោង៣និង៣០នាទីទៀបភ្លឺ ឈានចូល ថ្ងៃទី១៩ ខែមិថុនា ឆ្នាំ២០១៦ នៅក្នុងចំនុចក្រុមទី៥ ភូមិស្វាយ ឃុំបឹងរាំង ស្រុកកំរៀង ខេត្តបាត់ដំបង។
ជនរងគ្រោះមានឈ្មោះ វេត វណ្ណៈ អាយុ២៤ឆ្នាំ មានប្រពន្ធឈ្មោះ ថន រស្មី អាយុ២៣ឆ្នាំ រស់នៅភូមិគោកឃ្មុំ ឃុំតាម៉ឺន ស្រុកថ្មគោល ខេត្តបាត់ដំបង។ទាំងពីរនាក់បានមកជួលផ្ទះនៅលើទីតាំងកន្លែងកើតហេតុដើម្បីលក់ដូរស៊ីមកាតទូរស័ព្ទ នៅក្នុងផ្សារបានឡែម ប្រទេសថៃ។
បុរសម្នាក់ដែលអះអាងថាធ្លាប់ស្គាល់បុរសរងគ្រោះបានឲ្យដឹងថា ជាញឹកញាប់គេឃើញបុរសរងគ្រោះបានចូលលែងល្បែងហ្គែមបាញ់ត្រីក្នុងកាស៊ីណូឃ្វីនដើម្បីផ្សងរកលាភធំ។ប្រភពនេះបន្តថា ស្ទើររៀងរាល់ថ្ងៃ គេឃើញបុរសរងគ្រោះបានចូលទៅសំងំលេងល្បែងក្នុងកាស៊ីណូ ឃ្វីន ប៉ុន្តែការប៉ងប្រាថ្នាផ្សង រកលាភតាមរយៈល្បែងស៊ីសងបានធ្វើឲ្យបុរសរូបនោះ ញៀនងប់ងុលវក់នឹងល្បែង ភ្លេចបាយ ភ្លេចទឹក ភ្លេចការរកស៊ី ហើយជាបន្តបន្ទាប់ ក៏ត្រូវផុងខ្លួនចាញ់អស់ទាំងលុយ ទាំងម៉ូតូរហូតចំនួន០៦គ្រឿង និងអស់ទ្រព្យសម្បត្តិពីខ្លួន។ប្រភពបន្តទៀតថា ការធ្វើអត្តឃាតនេះ គឺគ្មានអ្វីក្រៅពីការ ឈឺចាប់ និងតូចចិត្តស្តាយក្រោយ អាណិតប្រពន្ធកូនក៏សម្រេចចិត្តបញ្ចប់ជីវិតខ្លួនឯងដោយចងក.ភ្ជាប់នឹងធ្នឹមផ្ទះជួលស្លាប់តែម្តង។
ស្ត្រីជាប្រពន្ធឈ្មោះ ថន រស្មី បានរៀបរាប់ ទាំងទឹកមុខស្រងូតស្រងាត់ថា ទោះបីជាប្តីរបស់ខ្លួនញៀនល្បែងបំផ្លាញអស់លុយកាក់ និងអស់ម៉ូតូជាច្រើនគ្រឿងក្តី ក៏ខ្លួនមិនដែលស្តីបន្ទោសអោយប្តីធ្ងន់ធ្ងរទេ។
អ្នកស្រី រស្មី បន្តថា នៅថ្ងៃកើតហេតុទី១៩ ខែមិថុនា ប្រហែលម៉ោងជិត៣ និង០០ទៀបភ្លឺ ខ្លួនបានទូរស័ព្ទមកប្តី ហើយប្តីបានពោល ពាក្យថា ប្តីខុសហើយ កែខ្លួនលែងបានហើយ អូនយកប្តីទៀតចុះ ព្រោះប្តីបំផ្លាញអូនអស់ច្រើន ណាស់។ពេលឮដូច្នេះ អ្នកស្រីបានឆ្លើយតបដោយការលួងលោមថា ឯងកុំគិតច្រើន ប្រាក់យើងអាចរកបានទៀត ភ្លាមនោះប្តីក៏បានបិទទូរស័ព្ទតែម្តង។ ជាអកុសលរហូតដល់វេលាម៉ោងជាង៣ និង០០ក៏ទទួលបានដំណឹងថា ប្តីចងករសំលាប់ខ្លួនបាត់ទៅហើយ។
សាច់ញាតិជនរងគ្រោះបានប្រាប់ឲ្យដឹងថា កន្កងមក វេត វណ្ណះ បានលង់នឹងល្បែងក្នុងកាស៊ីណូ ឃ្វីន នោះខ្លាំងណាស់ បងប្អូនប្រពន្ធកូនឧស្សាហ៍ប្រាប់ដែរ ប៉ុន្តែគេនៅតែទៅលេងក្នុងកាស៊ីណូនោះដដែល ។ទីបំផុត ប្រហែលជាគេអស់សង្ឃឹមក្នុងជីវិត នឹកស្តាយក្រោយក៏កើតមាននូវអំពើអត្តឃាតបែបនេះ។
បន្ទាប់ពីកើតហេតុកម្លាំងនគរបាលបានចុះដល់កន្លែងកើតហេតុហើយពិនិត្យធ្វើកោសល្យវិច្ច័យសន្និដ្ធានថា ជនរង គ្រោះពិតជាចងកពិតប្រាកដ មែន ហើយក៏បានប្រគល់សាកសពជនរង គ្រោះទៅអោយគ្រួសារសាច់ញាតិយកទៅធ្វើបុណ្យតាមប្រពៃណី។
ល្បែងស៊ីសងបានបង្កបញ្ហាច្រើនណាស់ ក្នុងសង្គមជាតិ ក៏ដូចជាសង្គមគ្រួសារ ហេតុដូច្នេះហើយ ទើបរាជរដ្ឋាភិបាលបានសម្រេចមិនអនុញ្ញាតឲ្យប្រជាពលរដ្ឋខ្មែរចូលលែងល្បែងគ្រប់កាស៊ីណូទាំងអស់នៅទូទាំងប្រទេស ប៉ុន្តែថៅកែកាស៊ីណូមួយចំនួននៅតែផ្គើនចំពោះច្បាប់ហាមឃាត់នេះ និងប្រព្រឹត្តផ្ទុយពីលក្ខខណ្ឌក្នុងកិច្ចសន្យាជាមួយក្រសួងដូចជាកាស៊ីណូ ឃ្វីន នេះជាដើម ដែលគេឃើញថា បានអនុញ្ញាតឲ្យពលរដ្ឋខ្មែរចូលលេងយ៉ាងអនាធិបតេយ្យ ហើយបុរសដែលធ្វើអត្តឃាតខាងលើនេះ ក៏ត្រូវបានគេបញ្ជាក់ថា ឃើញចូលលេងល្បែងក្នុងនោះជាញឹកញាប់ រហូតដល់ថ្ងៃដែលគេបានបញ្ចប់ជីវិតគួរឲ្យភ្ញាក់ផ្អើលនេះ៕
គែរ៖យោងតាមសារព័ត៌មាន BBC ផ្សាយថា ក្រុមហ៊ុនអាកាសចរណ៍ជាតិអេហ្ស៊ីប EgyptAir បានសម្រេចកិច្ចព្រមព្រៀង ជាមួយក្រុមហ៊ុនធានារ៉ាប់រងរួចហើយ ក្នុងការផ្តល់ប្រាក់សំណងបណ្តោះអាសន្ន ចំនួន២៥,០០០ដុល្លារអាមេរិក ដល់ក្រុមគ្រួសារជនរងគ្រោះម្នាក់ៗ។
គួរបញ្ជាក់ថា ជើងហោះហើរ EgyptAir Flight MS804 បានធ្លាក់ទៅក្នុងសមុទ្រមេឌីទែរ៉ាណេ អំឡុងពេលធ្វើដំណើរពីទីក្រុងប៉ារីស ទៅប្រទេសអេហ្សីប កាលពីថ្ងៃទី១៩ ខែឧសភា បានបណ្តាលឲ្យមនុស្ស ៦៦នាក់ នៅលើនោះស្លាប់ទាំងអស់។
ជាមួយគ្នានោះប្រអប់ខ្មៅទាំងពីរត្រូវបានរកឃើញ ហើយក្រុមជំនាញបាននិងកំពុងទាញយកទិន្នន័យពីពួកវា ដើម្បីស្វែងយល់ពីមូលហេតុធ្លាក់៕
រាជធានីភ្នំពេញ៖កម្លាំងសមត្ថកិច្ចខណ្ឌសែនសុខបានឃាត់ខ្លួនបុរសពីរនាក់ រួមនិងថ្នាំញៀនមួយកញ្ចប់ និងម៉ូតូមួយគ្រឿងកាលពីវេលាម៉ោង៩ និង៣០នាទីយប់ថ្ងៃទី២១ ខែមិថុនា ឆ្នាំ២០១៦ នៅចំណុចបុរីហ្គ្រេនភ្នំពេញ ស្ថិតក្នុងសង្កាត់ឃ្មួញ ខណ្ឌសែនសុខ។
បុរសដែលត្រូវឃាត់ខ្លួននោះមានឈ្មោះ សំ ប្រុស អាយុ២៤ឆ្នាំ មុខរបរអ្នកលើកអីវ៉ាន់ ស្នាក់នៅឃ្លាំងទំនិញក្នុងភូមិកៀនឃ្លាំង សង្កាត់ឃ្មួញ ខណ្ឌសែនសុខ មានស្រុកកំណើតភូមិអូរឃ្លង ឃុំត្រពាំងច្រេះ ស្រុកកូនមុំ ខេត្តរតនគិរី ម្នាក់ទៀតមានឈ្មោះ កែវ លី អាយ៣៣ឆ្នាំ មុខរបរកម្មករលើកអីវ៉ាន់ ស្នាក់នៅជាមួយគ្នាមានស្រុកកំណើតភូមផ្សារលិច សង្កាត់ព្រែកព្នៅ ខណ្ឌព្រែកព្នៅ ជិះម៉ូតូម៉ាកស្មាសពណ៌ខ្មៅ ពាក់ស្លាកលេខសៀមរាប 1A-1518 ។
តាមប្រភពពីសមត្ថកិច្ចឲ្យដឹងថា មុនពេលកើតហេតុកម្លាំងខាងលើសហការជាមួយកម្លាំងសមត្ថកិច្ចមូលដ្ឋានបានចុះល្បាតក្នុងភូមិសាស្ដ្ររបស់ខ្លួន លុះមកដល់ចំណុចកើតហេតុស្រាប់តែមានបុរសពីរនាក់ខាងលើមានសភាពគួរឲ្យសង្ស័យ ទើបកម្លាំងបានធ្វើការប្រដេញបម្រុងឃាត់សួរ តែពេលនោះបុរសខាងលើបានទម្លាក់ថ្នាំញៀនចេញពីដៃរបស់អ្នកអង្គុយពីក្រោយទៅលើដី បំណងបំបាត់ភស្ដុតាង តែត្រូវបានសមត្ថកិច្ចមើលឃើញហើយក៏បានប្រដេញឃាត់ខ្លួនយកមកសួរនាំនៅប៉ុស្ដិ៍នគរបាលមូលដ្ឋាន។
ជនសង្ស័យបានសារភាពថា ពួកគេបានទិញថ្នាំញៀនមកពីម្ដុំស្វាយប៉ាកតំលៃ៦ម៉ឺនរៀល បំណងយកទៅជក់នៅកន្លែងស្នាក់នៅរបស់គេ លុះមកដល់ចំណុចខាងលើត្រូវបានសមត្ថកិច្ចឃាត់ខ្លួនតែម្ដង។ ក្រោយពេលកើតហេតុអ្នកទាំងពីរត្រូបានសមត្ថកិច្ចកសាងសំណុំរឿងនៅប៉ុស្ដិ៍នគរបាលរដ្ឋបាលឃ្មួញ និងបញ្ជូនជនសង្ស័យទាំងពីរទៅកាន់អធិការដ្ឋានខណ្ឌសែនសុខរង់ចាំការដោះស្រាយតាមនីតិវិធី៕
រាជធានីភ្នំពេញ៖តាមរបាយការណ៍របស់អគ្គស្នងការនគរបាលជាតិបានឲ្យដឹងថា នៅថ្ងៃទី២១ ខែមិថុនា ឆ្នាំ២០១៦ កម្លាំងសមត្ថកិច្ចនគរបាលជាតិបង្ក្រាបបទល្មើសជួញដូរ រក្សាទុក និងប្រើប្រាស់គ្រឿងញៀន ឃាត់មនុស្ស១១នាក់ ក្នុងនោះមុខសញ្ញាជួញដូរ១១នាក់ និងរឹបអូសគ្រឿងញៀនប្រភេទ មេតំហ្វេតាមីន (ice) ៤.២ក្រាម, ៣កញ្ចប់តូច។
របាយការណ៍ដដែលបញ្ជាក់ថា ទីតាំងដែលបង្ក្រាបបានរួមមានទី១. មន្ទីរប្រឆាំងគ្រឿងញៀន បង្ក្រាប១ករណី ឃាត់ខ្លួនម្នាក់, ខេត្តកំពង់ចាម បង្ក្រាប២ករណី ឃាត់ខ្លួន៥នាក់, ខេត្តសៀមរាប បង្ក្រាប១ករណី ឃាត់ខ្លួនម្នាក់, ខេត្តក្រចេះ បង្ក្រាប១ករណី ឃាត់ខ្លួនម្នាក់, ខេត្តកំពត បង្ក្រាប១ករណី ឃាត់ខ្លួនម្នាក់, ខេត្តតាកែវ បង្ក្រាប១ករណី ឃាត់ខ្លួនម្នាក់, ខេត្តកំពង់ស្ពឺ បង្ក្រាប១ករណី ឃាត់ខ្លួនម្នាក់៕
រាជធានីភ្នំពេញ៖កម្លាំងនគរបាលខណ្ឌឫស្សីកែវបានបើកការស្រាវជ្រាវ រហូតតាមបង្ក្រាប និងចាប់ខ្លួនមុខសញ្ញាប្លន់២នាក់ ជាបន្តបន្ទាប់ ដែលតែងតែប្រើដាវកាប់គំរាមប្លន់យកទូរស័ព្ទ កាបូបលុយ និងសម្ភារផ្សេងៗ ពីបងប្អូនប្រជាពលរដ្ឋ តាមដងផ្លូវសាធារណៈក្នុងភូមិសាស្ត្រខណ្ឌឫស្សីកែវ។
អធិការនគរបាលខណ្ឌឫស្សីកែវ លោកវរសេនីយ៍ឯក ទៀង ច័ន្ទសារ បានឲ្យដឹងថា កម្លាំងរបស់លោក ក្នុងប្រតិបត្តិការឃាត់ខ្លួន មុខសញ្ញាទាំង២នាក់ខាងលើនេះ ត្រូវបានអនុវត្តន៍ និងធ្វើឡើងជាបន្តបន្ទាប់នារសៀលថ្ងៃទី២១ ខែមិថុនា ឆ្នាំ២០១៦នេះ នៅចំណុចផ្លូវរថភ្លើង ស្ថិតក្នុងភូមិដើមខ្វិត សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។ លោកអធិការបញ្ជាក់ថា មុខសញ្ញាទាំង២នាក់នេះតែងតែធ្វើសកម្មភាព ដោយប្រើដាវកាប់គំរាមប្លន់យកទូរស័ព្ទ កាបូបលុយ រួមនិងសម្ភារផ្សេងៗពីប្រជាពលរដ្ឋតាម ដងផ្លូវសាធារណៈក្នុងភូមិសាស្ត្រខណ្ឌឫស្សីកែវ។
លោកអធិការ បានឲ្យដឹងទៀតថា ក្រោយឃាត់ខ្លួនសួរនាំ មុខសញ្ញាត្រូវជាប់សង្ស័យទាំង២នាក់ បានឆ្លើយសារភាព ប្រាប់សមត្ថកិច្ចថា នៅថ្ងៃទី២០ មិថុនា ឆ្នាំ២០១៦យប់ មិញនេះ ពួកគេទាំង២នាក់ បានធ្វើសកម្មភាពប្រើដាវភ្ជង់ប្លន់ យកបានទូរស័ព្ទដៃចំនួន២គ្រឿង និងប្រាក់ដុល្លារចំនួន២៥០ដុល្លារ ពីជនរងគ្រោះពិតប្រាកដមែន ។
លោកអធិការ បានបន្តថា មុខសញ្ញាត្រូវឃាត់ខ្លួន៖ ឈ្មោះ គង់ វាសនា ភេទប្រុស អាយុ៣០ឆ្នាំ មានមុខរបរមិនពិតប្រាកដ ស្នាក់នៅ ផ្ទះជួល ម្ដុំផ្លូវរថភ្លើង ស្ថិតក្នុង ភូមិដើមខ្វិត សង្កាត់ ទួលសង្កែ ខណ្ឌ ឫស្សីកែវ រាជធានីភ្នំពេញ និងម្នាក់ទៀត ឈ្មោះ បូរី ភេទប្រុស អាយុ៤០ឆ្នាំ មានមុខរបរនិងស្នាក់នៅ មិនពិតប្រាកដ។ រីឯជនរងគ្រោះឈ្មោះ អូន សុ ភក្តិ ភេទ ប្រុស អាយុ១៨ឆ្នាំ មុខរបរលក់ដូរ ស្នាក់នៅក្បែរចំណុចកើត ហេតុខាងលើ។
បច្ចុប្បន្ន ជនត្រូវសង្ស័យទាំង២នាក់ ត្រូវបញ្ជូនទៅឃុំខ្លួន សាកសួរបណ្ដោះអាសន្ន នៅអធិការដ្ឋាននគរបាលខណ្ឌឫស្សីកែវ ដើម្បីរៀបចំកសាងសំនុំរឿង បញ្ជូនទៅអយ្យការសាលាដំបូងរាជធានីភ្នំពេញ ចាត់ការតាមនីតិវិធី៕
រាជធានីភ្នំពេញ៖សមត្ថកិច្ចខណ្ឌទួលគោកបានឃាត់ខ្លួនបុរសជាអ្នកចែកចាយ និងប្រើប្រាស់ថ្នាំញៀនម្នាក់ ជាមួយថ្នាំញៀន១១កញ្ចប់កាលពីម៉ោង១១ និង៣០នាទីយប់ថ្ងៃទី២១ ខែមិថុនា ឆ្នាំ២០១៦ នៅចំណុចប្លុកផ្លូវរទះភ្លើង ស្ថិតក្នុងសង្កាត់ បឹងកក់ទី២ ខណ្ឌទួលគោក។
តាមសមត្ថកិច្ចបានប្រាប់ថា ជនសង្ស័យឈ្មោះ ឡី កុសល អាយុ២៧ឆ្នាំ មុខរបរមិនពិតប្រាកដ និងមានទីលំនៅ ស្នាក់នៅកន្លែងកើតហេតុខាលើ ក្រោយកើតហេតុជនសង្ស័យរួមជាមួយវត្ថុតាង ត្រូវបានសមត្ថកិច្ចខណ្ឌទួលគោក រៀបចំឯកសារ និងបញ្ជូនទៅកាន់តុលាការកាត់ទោសតាមនីតិវិធីច្បាប់៕
រាជធានីភ្នំពេញ៖កម្លាំងនគរបាលនាយកដ្ឋានស៊ើបអង្កេត និងអនុវត្តនីតិវិធីបានឃាត់ខ្លួនជនជាតិវៀតណាមចំនួន២៣នាក់គ្រាដែលចុះត្រួតពិនិត្យទីតាំងកោសជប់ម៉ាស្សាមួយកន្លែងកាលពីរសៀលម្សិលមិញនៅផ្លូវលេខ២៩២ កែងផ្លូវ១០៥ និងផ្លូវលេខ១១៣ នៅក្នុង សង្កាត់បឹងកេងកង២ ខណ្ឌចំការមន។
លោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី បានឲ្យដឹងថា សម្រាប់ប្រតិបត្តិការនេះ កម្លាំងនគរបាលរបស់លោក បានធ្វើការឃាត់ខ្លួនជនជាតិវៀតណាម ចំនួន២៣នាក់ ប្រុសចំនួន០៦នាក់ ពីបទលួចឆ្លងដែន ស្នាក់នៅ ដោយខុសច្បាប់ គ្មានលិខិតឆ្លងដែន ដែលប្រករប រកស៊ី លក់កាហ្វេ កោសជប់ និងម៉ាស្សា នៅទីតាំងខាងលើ។
មន្ត្រីដដែលនេះបានចាត់ទុកថា ការគ្មានត្រួតពិនិត្យ ចំពោះទីតាំងអាជីវកម្ម ជនបរទេសទាំងនេះ គឺធ្វើឲ្យមានការប៉ះពាល់ ដល់សណ្តាប់ធ្នាប់សង្គម និងវប្បធម៌ប្រពៃណីរបស់ខ្មែរយ៉ាងខ្លាំង ពីព្រោះតាមការស្រាវជ្រាវនោះ ឃើញថា ទីតាំងម៉ាស្សានេះ បានលួចបង្កប់សេវាផ្លូវភេទផងដែរ។
គួរបញ្ជាក់ថា ប្រតិបត្តិការនេះធ្វើឡើងដោយកម្លាំងនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ បានសហការជាមួយស្នងការដ្ឋាន នគរបាលរាជធានីភ្នំពេញ ខណ្ឌចំការមន ក្រោមការសម្របសម្រួលពីលោក មាស ច័ន្ទពិសិដ្ឋ ជាព្រះរាជអាជ្ញារង អមសាលាដំបូងរាជធានីភ្នំពេញ៕
ភ្នំពេញ៖ ផ្ទះថ្មមួយខ្នងបានស្រុតចូលក្នុងដីស្ទើរពាក់កណ្តាល កាលពីវេលាម៉ោង៣ និង៣៥នាទីរសៀលថ្ងៃទី២១ ខែមិថុនា ឆ្នាំ២០១៦ ។ផ្ទះដែលស្រុតចូលក្នុងដីនេះ ជាភោជនីដ្ឋានយីហោ បឹងសំរោង ស្ថិតនៅតាមបណ្តោយផ្លូវជាតិលេខ៦ អា ត្រង់ចំណុចភូមិព្រែកលៀប សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។
មន្ត្រីមូលដ្ឋានមួយរូបបានឲ្យដឹងថា ម្ចាស់ផ្ទះខាងលើ ឈ្មោះ មាស ឆុន ជាមន្ត្រីយោធា ។ផ្ទះនេះសង់ពីបេតុង ប្រក់ក្បឿងមានបណ្តោយ ៨ គុណ ១០ម៉ែត្រ ជាប្រភេទវីឡាកូនកាត់។
ទោះជាយ៉ាងនេះក្តី ក្នុងហេតុការណ៍នេះគ្មាននរណាម្នាក់រងគ្រោះនោះទេ ។សមត្ថកិច្ចកំពុងសិក្សាអំពីការស្រុតផ្ទះដ៏ចម្លែកដែលបង្កឲ្យមានភ្ញាក់ផ្អើលខាងលើនេះ៕
ដោយ៖ លោក វិធិន
ខេត្តក្រចេះ៖កាលពីព្រឹកថ្ងៃទី២១ ខែមិថុនា ឆ្នាំ២០១៦នេះ វេលាម៉ោង១០ និង១៥នាទី កម្លាំងសមត្ថកិច្ចចម្រុះ ដឹកនាំដោយលោក ទេព វាសនា ប្រធានមន្ទីរវប្បធម៌ និងវិចិត្រសិល្បះ ខេត្តក្រចេះ ក្រោមការសម្របសម្រួលដោយលោក សោ វុទ្ធីព្រះរាជអាជ្ញារងសាលាដំបូង ខេត្តក្រចេះ បានចុះបង្គ្រាបទីតាំងថតចម្លងឌីសខុសច្បាប់មួយកន្លែង នៅម្ដុំក្រោយផ្សារសាមគ្គីក្រុងក្រចេះ ឋិតក្នុងក្រុងក្រចេះ។
ក្នុងកិច្ចប្រតិបត្តិការណ៍ចុះបង្ក្រាបទីតាំងខាងលើនោះ សមត្ថកិច្ចចម្រុះ ក៏បានចាប់ឃាត់ខ្លួនម្ចាស់ទីតាំងអាជីវកម្មមួយនេះ ព្រមទាំងរឹបអូសបានសម្ភារៈ ជាគ្រឿងថតចម្លងស៊ីឌីព្រមទាំងស៊ីឌី ចំនួនជិត ២ពាន់បន្ទះ។
ម្ចាស់អាជីវកម្មដែលរងការចោទថា បានលួចធ្វើអាជីវកម្មលក់ជួលស៊ីឌី និងធ្វើអាជីវម្ម ថតចម្លងដោយខុសច្បាប់មានរយះពេលរាប់សិបមកហើយនោះ ឈ្មោះ គីម ម៉ូវ ភេទប្រុស អាយុ ៥០ឆ្នាំ រស់នៅភូមិក្រចេះ សង្កាត់ក្រចេះ ក្រុងក្រចេះ។
បើតាមការលើកឡើងពីសមត្ថកិច្ច បានបង្ហើបប្រាប់ថា ការចុះបង្ក្រាបទីតាំងលក់ ជួល និងថតចម្លងស៊ីឌី ខុសច្បាប់នេះ គឺធ្វើឡើងទៅតាមពាក្យបណ្តឹងរបស់ក្រុមហ៊ុនផលិតកម្ម អាជីវកម្មស៊ីឌីក្នុងស្រុកមួយ។ ការចុះបង្ក្រាបទីតាំងជួល លក់ និងថតចម្លងស៊ីឌី របស់អាជ្ញាធរខេត្តក្រចេះនេះ ត្រូវបានគេមើលឃើញថា ជាសកម្មភាពការចុះចាប់បង្ក្រាបជាលើកទី២ បន្ទាប់ពីមានទីតាំង ជួល លក់ និងថតចម្លងស៊ីឌីក្លែងក្លាយខុសច្បាប់មួយនៅស្រុកឆ្លូង ។ ដែលត្រូវបានសមត្ថកិច្ច ចុះចាប់បង្ក្រាបកាលពីថ្ងៃទី៣ ខែមិថុនាកន្លងទៅ ដោយក្នុងនោះ សមត្ថកិច្ច ក៏បានចាប់ឃាត់ខ្លួន និងនាំខ្លួនម្ចាស់់អាជីវកម្មមួយនេះ មកតុលាការផងដែរ។
នគរបាលប្រឆាំងបទល្មើសសេដ្ឋកិច្ចខេត្ត បានឲ្យដឹងថា ជនជាម្ចាស់ទីតាំងថតចម្លង ស៊ីឌី ខុសច្បាប់មួយកន្លែងនេះឈ្មោះគីម ម៉ូវ គឺក្រោយការឃាត់ខ្លួន ត្រូវបាននគរបាល បញ្ជូនខ្លួនទៅសាលាដំបូងនៅរសៀលថ្ងៃទី២១ ខែមិថុនា នេះដើម្បីបន្តចំណាត់ការ៕
