ខេត្តស្ទឹងត្រែង៖គំនរឈើប្រណីតប្រភេទឆ្នង់ជាច្រើនដុំ និងច្រើនម៉ែត្រគីបត្រូវបានក្រុមឈ្មួញដឹកយកមកគរទុកនៅត្រង់ចំណុចភូមិអន្លង់ស្អំ ឃុំអន្លង់ជ្រៃ ស្រុកថាឡាបរិ វ៉ាត់ ខេត្តស្ទឹងត្រែង ខណៈដែលឈើទាំងនោះត្រូវបានប្រជាពលរដ្ឋរាយការណ៍ថា ក្រុមឈ្មួញបានកាប់ និងដឹកចេញពីតំបន់ព្រៃឡង់។ ប៉ុន្តែអភិបាលខេត្តស្ទឹងត្រែងលោក កុល សំអុល និងមេខណ្ឌរដ្ឋបាលព្រៃឈើលោក ឈាង តុលា ហាក់ដូចជាមិនមានវិធានការទប់ស្កាត់ធ្វើឲ្យព្រៃឈើក្នុងខេត្តស្ទឹងត្រែងទាំងមូលរងការកាប់បំផ្លាញជារៀងរាល់ថ្ងៃ ហើយលោក កុល សំអុល និងលោក ឈាង តុលា គឺជាអ្នកទទួលខុសត្រូវនៃវិនាសកម្មក្នុងការកាប់បំផ្លាញព្រៃឈើខាងលើនេះ។
ប្រជាពលរដ្ឋបានឲ្យដឹងថា ទីតាំងខាងលើនេះគ្រាន់តែជាកន្លែងស្ដុកឈើប៉ុណ្ណោះ មុននឹងគេដាក់រថយន្តចេញទៅលក់នៅប្រទេសវៀតណាម ។ ឈើទាំងនោះត្រូវក្រុមឈ្មួញបញ្ជូនកម្លាំងកម្មករទៅកាប់ផង និងទិញពីប្រជាពលរដ្ឋដែលនាំគ្នាចូលកាប់ឈើប្រណិតក្នុងតំបន់ព្រៃ ឡង់ផងដែលគេដឹងថាឈើរាប់សិបម៉ែត្រគីបសុទ្ធសឹងជាប្រភេទឈើធ្នង់ ត្រូវបានគេដឹកចេញជារៀងរាល់ថ្ងៃពីទីតាំងខាងលើឆ្ពោះទៅប្រទេសវៀតណាម ។
យ៉ាងណាក៏ដោយ ប្រជាពលរដ្ឋអះអាងថា ការដឹកជញ្ជូនឈើប្រណីតជារៀងរាល់ថ្ងៃរបស់ក្រុមឈ្មួញគឺមិនបង្កការរំខានដល់សមត្ថកិច្ចនោះឡើយ ព្រោះក្រុមឈ្មួញមានអ្នករត់ការដ៏ល្បីល្បាញម្នាក់ដែលគេស្គាល់ឈ្មោះ ប៉ូលី គ្រាដែលអ្នករត់ការមា្នក់នេះមិនដែលធ្វើឲ្យមានការថ្លោះធ្លោយត្រូវសមត្ថកិច្ច ឬមន្ត្រីជំនាញបង្ក្រាបបាននោះឡើយ ។
តាមព័ត៌មានដែលទទួលបានឈើប្រណីតរាប់រយម៉ែត្រគីបដែលកំពុងស្ដុកនៅចំណុចភូមិអន្លង់ស្អំនេះជារបស់លោកឧកញ៉ាម្នាក់ឈ្មោះ អ៊ុក គឹមសាន ដែលល្បីខាងរកស៊ីឈើនៅខេត្តស្ទឹងត្រែងច្រើនឆ្នាំមកហើយ ។
ប្រភព ដដែលបញ្ជាក់ថា តំបន់ព្រៃនៅខេត្តស្ទឹងត្រែងពុំមានឈើប្រណីតនៅសេសសល់នោះទេគឺមានតែ តំបន់ព្រៃឡង់ប៉ុណ្ណោះដែលអាចនៅសេសសល់ឈើប្រណិតខ្លះ ។ ប៉ុន្តែមកដល់ពេលនេះក្រុមឈ្មួញបាននឹងកំពុងសម្រុកកាប់បំផ្លាញ ឈើប្រណិតនៅតំបន់ព្រៃឡង់ដែលអាចនាំដល់ការអន្តរាយធ្ងន់ធ្ងរសម្រាប់ ព្រៃឡង់នៅស្រុកថាឡាបរិវ៉ាត់ ខេត្តស្ទឹងត្រែង ។
លោក ឈាង តុលា នាយខណ្ឌរដ្ឋបាលព្រៃឈើខេត្តស្ទឹងត្រែងបានសម្ដែងនូវការភ្ញាក់ផ្អើល ពេលអ្នកកាសែតបានផ្ដល់ព័ត៌មានទាក់ទងគំនរឈើរាប់រយម៉ែត្រគីបដែលគេ គរទុកនៅចំណុចខាងលើ ។ លោកអះអាងប្រាប់អ្នកកាសែតថា នឹងដឹកនាំកម្លាំងចុះទៅតំបន់នោះដើម្បីពិនិត្យជាកស្ដែង ។ ប៉ុន្តែរហូតមកដល់ពេលនេះគេពុំទាន់ឃើញមានកម្លាំងសមត្ថកិច្ច ឬមន្ត្រីជំនាញណាចុះទៅពិនិត្យ និងចាត់វិធានការនោះឡើយ ។ ចំណែកមន្ត្រីជំនាញរដ្ឋបាលព្រៃឈើមា្នក់ដែលសុំមិនឲ្យបញ្ចេញឈ្មោះ បានខ្សឹបប្រាប់ថា មិនអាចបង្ក្រាបនោះទេ ព្រោះឧកញ៉ាដែលជាម្ចាស់ឈើនោះបានរត់ការបិទមាត់គ្រប់ច្រកល្ហកអស់ហើយ ។
ប្រជាពលរដ្ឋ សម្ដែងការព្រួយបារម្ភចំពោះសកម្មភាពបន្តកាប់បំផ្លាញព្រៃឈើតំបន់ព្រៃ ឡង់ក្នុងស្រុកថាឡាបរិវ៉ាត់ គ្រាដែលមន្ត្រីជំនាញហាក់មិនអើពើក្នុងការបង្ក្រាបដែលអាចនឹងឲ្យ ឈើព្រៃឡង់រងការបំផ្លាញអស់គ្មានសល់មិនខាន។
ពាក់ព័ន្ធករណីនេះ មេគង្គប៉ុស្តិ៍ បានព្យាយាមទំនាក់ទំនងសុំការបំភ្លឺពីលោកឧកញ៉ា អ៊ុក គឹមសាន និងមេការផងដែរ ប៉ុន្តែពុំអាចទំនាក់ទំនងបាននៅឡើយ៕
