ភ្នំពេញ ៖ ជនជាតិចិនចំនួន៩១នាក់ ក្នុងនោះមានស្រីចំនួន២១នាក់ ត្រូវបានអគ្គនាយកដ្ឋានអន្តោប្រវេសន៍ ក្រសួងមហាផ្ទៃ រួមសហការជាមួយសមត្ថកិច្ចប្រទេសចិន ចាប់បញ្ជូនឲ្យវិលត្រឡប់ទៅប្រទេសដើមវិញ នាព្រឹកថ្ងៃទី១៥ ខែតុលា ឆ្នាំ២០១៨នេះ បន្ទាប់ពីរកឃើញថា ជនជាតិចិនទាំងនោះចូលមកស្នាក់នៅដោយខុសច្បាប់ និងមួយចំនួនទៀតប្រព្រឹត្តបទល្មើស រកស៊ីដោយខុសច្បាប់ ហើយត្រូវបានសមត្ថកិច្ចបង្ក្រាបចាប់ខ្លួនបានកន្លងមក ។
ពិធីនេះបានប្រព្រឹត្តទៅនៅព្រឹកថ្ងៃទី១៥ ខែតុលា ឆ្នាំ២០១៨នេះ ក្រោមការចាត់ចែងដោយកម្លាំងនគរបាល នៃអគ្គនាយកដ្ឋានអន្តោប្រវេសន៍ដែលធ្វើឡើងនៅអគ្គនាយកដ្ឋានអន្តោប្រវេសន៍ បន្ទាប់ពីជនជាតិចិនទាំងនោះ ប្រព្រឹត្តបទល្មើស មករកស៊ីនៅកម្ពុជាដោយខុសច្បាប់ ជំរឹតទារប្រាក់ ហើយត្រូវបានសមត្ថកិច្ចចាប់ឃាត់ខ្លួន កាលពីពេលថ្មីៗនេះ ។
លោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ បានថ្លែងប្រាប់ក្រុមអ្នកយកព័ត៌មាន នៅអាកាសយានដ្ឋានអន្តរជាតិភ្នំពេញថា ជនជាតិចិនទាំង៩១នាក់ ស្រី២១នាក់ ដែលត្រូវបណ្តេញចេញនៅថ្ងៃនេះ គឺពួកគេជាប់ពាក់ព័ន្ធករណី គម្រាមកំហែង ជំរឹតទារប្រាក់ ប្រព្រឹត្តបទល្មើសផ្ទុយពីច្បាប់នៅព្រះរាជាណាចក្រកម្ពុជា ហើយត្រូវបាន សមត្ថកិច្ចជំនាញបង្ក្រាបចាប់ខ្លួនកន្លងមកនៅក្នុងខេត្តកំពត ។
លោកប្រធាននាយកដ្ឋានបញ្ជាក់ថា យើងបានសហការគ្នាជាមួយសមត្ថកិច្ចចិនក្នុងការ បញ្ជូនជនល្មើសឲ្យត្រឡប់ទៅស្រុកកំណើតវិញ ស្របតាមច្បាប់អន្តរជាតិ និងកិច្ចព្រមព្រៀង ជាមួយប្រទេសទាំងពីរ តាមជើងយន្តហោះ របស់ប្រទេសចិន នាព្រឹកថ្ងៃទី១៥ ខែតុលា ឆ្នាំ២០១៨នេះ សរុបចំនួន៩១នាក់ ស្រី២១នាក់ ៕ ដោយ ៖ សាវី
ភ្នំពេញ ៖ កម្ពុជា នឹងរៀបចំសមយុទ្ធទ្រង់ទ្រាយធំ ដើម្បីធ្វើលំហាត់សង្គ្រោះ ក្នុងករណីយន្តហោះជួបឧបទ្ទវហេតុផ្សេងៗ នៅដើមខែវិច្ឆិកា ឆ្នាំ២០១៨ ខាងមុខនេះ នៅអាកាសយានដ្ឋានអន្តរជាតិ កងកេង ខេត្តព្រះសីហនុ។ ជាមួយនេះ រដ្ឋលេខាធិការដ្ឋានអាកាសចរស៊ីវិល បានអំពាវនាវសូមកុំឲ្យប្រជាពលរដ្ឋមានការព្រួយបារម្ភ និងភ័នច្រឡំទៅនឹងសភាពការណ៍អសន្តិសុខ។
រដ្ឋលេខាធិការដ្ឋានអាកាសចរស៊ីវិល បានបញ្ជាក់ថា អាកាសចរស៊ីវិល និងសហការជាមួយអាជ្ញាធរខេត្តព្រះសីហនុ នឹងរៀបចំធ្វើសមយុទ្ធទ្រង់ទ្រាយធំលើកទី២ ដើម្បីសង្គ្រោះយន្តហោះពេលមានជួបឧបទ្ទវហេតុ នៅព្រលានយន្តហោះអន្តរជាតិ (កងកេង) ខេត្តព្រះសីហនុ ។ ការរៀបចំធ្វើសមយុទ្ធជាទ្រង់ទ្រាយធំនេះ អាកាសចរណ៍ស៊ីវិលសំណូមពរឲ្យគ្រប់ស្ថាប័ន អង្គភាពជំនាញនៅទូទាំងខេត្តព្រះសីហនុ ចូលរួមសហការគ្នា ដើម្បីជួយសង្គ្រោះក្នុងករណីកើតមានឧបទ្ទវហេតុយន្តហោះធ្លាក់ជាយថាហេតុ។
សូមជម្រាបថា ក្នុងលំហាត់សមយុទ្ធនេះ នឹងមានសកម្មភាពដូចជាការចេញដំណើររបស់រថយន្តពេទ្យសង្គ្រោះមានបន្លឺសម្លេងស៊ីរ៉ែនខ្លាំង ពីគ្រប់មន្ទីរពេទ្យរដ្ឋ គ្លីនិកឯកជន មណ្ឌលសុខភាព និងពីគ្រប់ទីបញ្ជាការកងកម្លាំងប្រដាប់អាវុធ ដែលមានទីតាំងនៅជិតកន្លែងកើតហេតុ, ការចេញដំណើររបស់រថយន្តកងទ័ពដឹកជញ្ជូនកម្លាំងសង្គ្រោះ និងសកម្មភាពដឹកជញ្ជូនជនរងគ្រោះ (សិប្បនិម្មិត) ទៅកាន់គោលដៅសង្គ្រោះ..។ល។
ដោយសារ មានសកម្មភាពដូចនេះ អាជ្ញាធរ បានប្រកាសអំពាវនាវ សូមកុំឲ្យបងប្អូនប្រជាពលរដ្ឋភ្ញាក់ផ្អើល ឬយល់ច្រឡំចំពោះព្រឹត្តិការណ៍សមយុទ្ធនេះ៕ ដោយ ៖ ភិរ៉ាន
ខេត្តកំពង់ចាម ៖ បុរស៣នាក់ដែលត្រូវជាឳពុក និងកូន ត្រូវបានបុរសម្នាក់កាប់ស្លាប់ជាបន្តបន្ទាប់ ដោយសារទាស់ពាក្យសំដីពេលផឹកស៊ីជុំគ្នានៅក្នុងផ្ទះរបស់ជនដៃដល់ កាលពីវេលាម៉ោង១៧ និង៣០នាទី ព្រលប់ថ្ងៃទី១៤ ខែតុលា ឆ្នាំ២០១៨ នៅចំណុចភូមិថ្មកែវ ឃុំត្រប់ ស្រុកបាធាយ ខេត្តកំពង់ចាម។
តាមរបាយការណ៍សមត្ថកិច្ចបានឲ្យដឹងថា ជនដៃដល់ត្រូវបាននគរបាលឃាត់ខ្លួនភ្លាមៗ នៅក្រោយពេលកើតហេតុ មានឈ្មោះ ឯម ភឿង ភេទប្រុស អាយុ៤១ឆ្នាំ មានទីលំនៅភូមិថ្មកែវ ឃុំត្រប់ ស្រុកបាធាយ ខេត្តកំពង់ចាម (កន្លែងកើតហេតុ) រួមនឹងវត្ថុតាងកាំបិតខ្វែវមួយ ។ ចំណែក ជនរងគ្រោះ រួមមានទី១ ឈ្មោះ នី ណុន ភេទប្រុស អាយុ ៥៣ឆ្នាំ។ ទី២ ឈ្មោះ ណុន ឆវ័ន ភេទប្រុស អាយុ ១៩ឆ្នាំ និងទី៣ ឈ្មោះ ណុន វី ភេទប្រុស អាយុ ២២ឆ្នាំ មានទីលំនៅជាមួយ គ្នានឹងជនសង្ស័យដែរ។
តាមព័ត៌មានដែលទទួលបានពីសមត្ថកិច្ច ឲ្យដឹងថា នៅមុនពេលកើតហេតុជនដៃដល់ឈ្មោះ ឯម ភឿង និងជនរងគ្រោះឈ្មោះ ណុន វី បានផឹកស៊ីជាមួយគ្នានៅនឹងផ្ទះឈ្មោះ ឯម ភឿង ។ មួយសន្ទុះក្រោយមក ក៏មានទំនាស់ពាក្យសំដី តែមិនដឹងថាបណ្តាលមកពីរឿងហេតុអ្វីនោះទេ ហើយឈ្មោះ ឯម ភឿង ក៏ស្ទុះចូលទៅក្នុងផ្ទះយកកាបិតខ្វែវរបស់ខ្លួនមកកាប់ឈ្មោះ ណុន វី បណ្តាលឲ្យរងរបួស តែតិចតួចទេ។ ភ្លាមនោះជនរងគ្រោះឈ្មោះ ណុន វី ក៏និយាយថា មិនអីទេប៉ុណ្ណឹង ហើយក៏ដើរចេញទៅផ្ទះរបស់ខ្លួនបាត់។
ប្រភពដដែលបន្តថា មួយសន្ទុះក្រោយមកក្រុមជនរងគ្រោះឈ្មោះ ណុន វី ក៏ត្រឡប់មកវិញរួមនិង ឈ្មោះ នី ណុន និងឈ្មោះ ណុន ឆវ័ន ដែលត្រូវជាឪពុក និងប្អូនរបស់ខ្លួន មកផ្ទះឈ្មោះ ឯម ភឿង ម្តងទៀត ដោយមានកាន់ពូថៅ និងដំបងជាប់នឹងដៃមកជាមួយផង។ ពេលនោះការឈ្លោះប្រកែកបានផ្ទុះឡើង ហើយឈ្មោះ ឯម ភឿង ក៏យកកាំបិតខ្វែវកាប់ទៅលើអ្នកទាំងបីបណ្តាលឲ្យរងរបួសដេកដួល ហើយស្លាប់នៅហ្នឹកន្លែងកើតហេតុចំនួនពីរនាក់ គឺឈ្មោះ នី ណុន និងឈ្មោះ ណុន ឆវ័ន ចំណែកឈ្មោះ ណុន វី បានស្លាប់ពេលដឹកដល់មន្ទីរពេទ្យស្រុកបាធាយ។
ជនសង្ស័យឈ្មោះ ឯម ភឿង ត្រូវបានសមត្ថកិច្ចឃាត់ខ្លួននាំមកកាន់អធិការដ្ឋាននគរបាល និងបានបំពេញសំណុំឯកសារ ដើម្បីបញ្ជូនបន្តទៅតុលាការតាមនីតិវិធី៕
ភ្នំពេញ ៖ ក្នុងរយៈ ពេល៩ខែ ឆ្នាំ២០១៨ កម្ពុជាមានជំងឺឆ្លងផ្តាសាយបក្សី A (H1N1) ចំនួន៤ករណី គឺនៅក្នុងខេត្តមណ្ឌលគីរី ព្រៃវែង ត្បូងឃ្មុំ និងរាជធានីភ្នំពេញ ដែលក្នុងនេះមានសត្វមាន់ និងទាបានងាប់ និងបានកម្ទេចចោល ដោយមានកិច្ចសហការទាន់ពេលវេលាពីក្រសួងកសិកម្ម រុក្ខាប្រមាញ់ និងនេសាទ ក្រសួងសុខាភិបាល និងអាជ្ញាធរមូលដ្ឋានរងគ្រោះរួមមាន ការបាញ់ថ្នាំសម្លាប់មេរោគតាមកសិដ្ឋាន និងលំនៅដ្ឋាន ការផ្សព្វផ្សាយអប់រំ ការបិទ និងចែក ប័ណ្ណផ្សព្វផ្សាយ អំពីការការពារជំងឺផ្តាសាយបក្សីផងដែរ។ នេះបើតាមកការបញ្ជាក់ របស់គណៈកម្មាធិការជាតិគ្រប់គ្រងគ្រោះមហន្តរាយ។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានគូសបញ្ជាក់ថា វិធានការដើម្បីការពារជំងឺគ្រុនឈាម ត្រូវបានក្រសួងសុខាភិបាល ដាក់ចេញចាប់តាំងពីដើម ឆ្នាំ២០១៨ មក ដោយសារឆ្នាំនេះជាវដ្តនៃការផ្ទុះជំងឺរាតត្បាត នឹងកើតមានទៅលើមនុស្សគ្រប់វ័យ និងតម្រូវឲ្យមានកិច្ចសហការទាំងក្នុងគ្រួសារ និងសហគមន៍ក្នុងការកំចាត់ដង្កូវទឹក មូសខ្លា តាមរយៈការបំបាត់ចោលនូវវត្ថុដែលអាចដក់ទឹក និងការដាក់ថ្នាំ អាបេត នៅតាមអាង និងពាងទឹកក្នុងគ្រួសារនីមួយៗ ដែលក្នុងនោះ ក្រសួងសុខាភិបាលបានធ្វើការចែកចាយថ្នាំ អាបេត ទៅតាមបណ្តាខេត្តទូទាំងប្រទេសចំនួន ៣៥០តោន និងថ្នាំបាញ់មូសចំនួន ៥.៦០៩លីត្រ។
ក្នុងរបាយការណ៍ដដែលបានឲ្យដឹងថា គិតត្រឹមថ្ងៃទី១៥ ខែសីហា ឆ្នាំ២០១៨ អត្រាឈឺដោយជំងឺ គ្រុនឈាមមាន ៧.១២៣ ករណី និងការទទួលរងគ្រោះដល់ស្លាប់ចំនួន១១នាក់៕
ភ្នំពេញ ៖ រដ្ឋបាលរាជធានីភ្នំពេញ បានប្រកាសពីការរៀបចំការប្រកួតរចនាម៉ូតខ្លោងរបារកាត់ទទឹងផ្លូវ ដើម្បីដាក់តាំងអបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០១៨ ត្រូវនឹងថ្ងៃទី២១ ២២ និង២៣ ខែវិច្ឆិកា ខាងមុខនេះ។
លើទំព័រហ្វេសប៊ុករបស់រដ្ឋបាលរាជធានីភ្នំពេញ ឲ្យដឹងថា ការៀបចំការប្រកួតនេះ ធ្វើឡើងដើម្បីផ្តល់ឱកាសឱ្យអ្នកជំនាញខាងរចនាទាំងអស់ ជាពិសេសនិស្សិតនៃសកលវិទ្យា ល័យភូមិន្ទវិចិត្រសិល្បៈ បានចូលរួមចំណែកបង្ហាញស្នាដៃរបស់ខ្លួន ដែលចាប់ផ្តើមទទួលរូបភាព ចាប់ពីថ្ងៃជូនដំណឹងនេះ រហូតដល់ថ្ងៃទី២២ ខែតុលា ឆ្នាំ២០១៨។
អាជ្ញាធរបន្តថា ខ្លោងដែលទទួលបានការគាំទ្រច្រើនជាងគេតាមរយៈការចុច Like នឹងទទួល បានរង្វាន់លើកទឹកចិត្ត ហើយនឹងត្រូវដាក់ដំឡើងនៅតាមទីតាំង ចំនួន៤ រួមមាន មុខវិមានឯករាជ្យ, រមណីយដ្ឋានវត្តភ្នំ, ខាងលិចរង្វង់មូលសម្ដេចជួនណាត និងចំណុចសួនព្រះគន្លុង៕
ភ្នំពេញ ៖ សម្តេចនាយករដ្ឋមន្ដ្រីតេជោ ហ៊ុន សែន យល់ព្រមឲ្យអាមេរិកបន្តរុករកអដ្ឋិធាតុទាហានអាមេរិកដែលបាត់ខ្លួននៅកម្ពុជាឡើងវិញ។
បើតាមលិខិតរបស់សម្តេចតេជោ ហ៊ុន សែន ចុះថ្ងៃទី១២ ខែតុលា ផ្ញើជូនសមាជិកព្រឺទ្ធសភាអាមេរិក និងតំណាងរាស្ត្រអាមេរិក បានពន្យល់ថា ការសម្រេចនេះ ជាការឆ្លើយតបក្នុងស្មារតី«មេត្តា ករុណា» ចំពោះសំណើរបស់សមាជិកព្រឹទ្ធសភាអាមេរិក និងតំណាងរាស្ត្រអាមេរិក ព្រមទាំងអង្គការពាក់ព័ន្ធដទៃទៀតនៅសហរដ្ឋអាមេរិក។
សូមជម្រាបថា ក្នុងអំឡុងសង្គ្រាមនៅកម្ពុជា មានទាហានអាមេរិកចំនួន ៩០នាក់ ដែលបាន បាត់ខ្លួននៅកម្ពុជា ហើយរហូតមកទល់ពេលនេះ នៅសល់អដ្ឋិធាតុទាហានអាមេរិក៤៩នាក់ទៀត ដែលមិនទាន់រកឃើញនៅឡើយ៕
ភ្នំពេញ ៖ រដ្ឋាភិបាលកូរ៉េខាងត្បូង បានផ្តល់កម្ចីចំនួន ៦៦,៥៧លានដុល្លារ ដើម្បីបង្កើតវិទ្យាស្ថានបណ្តុះបណ្តាលវិទ្យាសាស្ត្រសុខាភិបាល នៃសាកលវិទ្យាល័យកម្ពុជា(UHS) តាមរយៈមូលនិធិកិច្ច សហប្រតិបត្តិការអភិវឌ្ឍន៍សេដ្ឋកិច្ច (EDCF)។
សេចក្តីប្រកាសដដែលបញ្ជាក់ថា គម្រោងនេះ មានបំណងគាំពារបុគ្គលិកសុខាភិបាលប្រកប ដោយវិជ្ជាជីវៈ ដែលមានគុណភាពអប់រំខ្ពស់ ព្រមទាំងផ្តល់សេវាសុខភាពស្តង់ដារខ្ពស់ ដោយបង្កើតមន្ទីរពេទ្យបង្រៀនមាន២០០គ្រែ ជាមួយនឹងឧបករណ៍វេជ្ជសាស្ត្រ និងប្រព័ន្ធព័ត៌មានសុខាភិបាលល្អៗ។
សូមជម្រាបថា ចាប់តាំងពីឆ្នាំ២០០១ មក រដ្ឋាភិបាលកូរ៉េខាងត្បូង បានផ្តល់ប្រាក់កម្ចីសរុបចំនួន ៧៦៦លានដុល្លារ អាមេរិក ក្នុងកម្ចី EDCF នេះ ដើម្បីគាំទ្រដល់គម្រោងចំនួន២២ នៅកម្ពុជា៕
ភ្នំពេញ ៖ សម្តេចតេជោ ហ៊ុន សែន នឹងដឹកនាំប្រតិភូជាន់ខ្ពស់ទៅចូលរួម កិច្ចប្រជុំកំពូលអាស៊ី-អឺរ៉ុប (ASEM)លើកទី១២ដែលរៀបចំនៅទីក្រុងប្រ៊ុចសែល ប្រទេសប៊ែលហ្ស៊ិក ពីថ្ងៃទី១៨ដល់ថ្ងៃទី១៩ ខែតុលា។
តាមសេចក្តីប្រកាសព័ត៌មានរបស់ក្រសួងការបរទេសកម្ពុជា បានឲ្យដឹងថា កិច្ចប្រជុំកំពូលអាស៊ី-អឺរ៉ុប(ASEM) លើកទី១២ នេះ នឹងប្រព្រឹត្តទៅក្រោមមូលបទ«អឺរ៉ុប និងអាស៊ី៖ ដៃគូសកលសម្រាប់បញ្ហាប្រឈមសកល» ក្នុងបំណងពង្រឹងកិច្ចសន្ទនា និងកិច្ចសហប្រតិបត្តិការរវាងតំបន់អាស៊ី និងអឺរ៉ុប។
ក្នុងឱកាសស្នាក់នៅប្រទេសបែលហ្ស៊ិក សម្តេចនាយករដ្ឋមន្ត្រីកម្ពុជា នឹងមានជំនួបទ្វេភាគីជាច្រើដូចជា ជំនួបជាមួយនាយករដ្ឋមន្ត្រីរុស្ស៊ី, នាយករដ្ឋមន្ត្រីនៃប្រទេសហុងហ្គ្រី,នាយករដ្ឋមន្ត្រីន័រ វេស, នាយករដ្ឋមន្ត្រីនៃប្រទេសឆែក និងក៏មានការជួបសំណេះសំណាលជាមួយសមាជិកសហគមន៍ខ្មែរ និងសិស្ស និស្សិតខ្មែរ ដែលកំពុងរស់នៅ និងសិក្សានៅប្រទេសបែលហ្ស៊ិកផងដែរ៕
ភ្នំពេញ ៖ នៅថ្ងៃទី១៥ ខែតុលា ឆ្នាំ២០១៨ នេះ កម្ពុជា បានប្រារព្ធខួប៦ឆ្នាំ នៃការយាងសោយទិវង្គត របស់ព្រះករុណាព្រះបាទ សម្តេចព្រះនរោត្តម ស៊ីហនុ ព្រះបរមរតនកោដ្ឋ។ ព្រះរាជពិធីនេះ បាន ប្រព្រឹត្តទៅចាប់ពីម៉ោង ៧កន្លះព្រឹក តទៅ នាសួនច្បារខាងកើត វិមានឯករាជ្យ។
បើតាមផែនការណែនាំ ក្រសួងព្រះបរមរាជវាំង ត្រូវរៀបចំពិធីគោរពព្រះវិញ្ញាណក្ខន្ធ ព្រះ ករុណា «ព្រះបរមរតនកោដ្ឋ» តាមប្រពៃណីជាតិ និងសាសនា។ ចំណែកនៅតាមវត្តអារាមនានានៅ ទូទាំងប្រទេស ត្រូវរៀបចំព្រះរាជពិធីគោរព និងឧទ្ទិសថ្វាយព្រះរាជកុសលដល់ព្រះវិញ្ញាណក្ខន្ធ «ព្រះបរមរតនកោដ្ឋ» និងដាក់តាំងព្រះបរមឆាយាល័ក្ខណ៍ របស់ព្រះករុណាផងដែរ។
ដោយឡែក វិទ្យុ ទូរទស្សន៍ជាតិ និងឯកជន ត្រូវផ្សព្វផ្សាយអំពីព្រះរាជជីវប្រវត្តិ ព្រះរាជសកម្មភាព និងស្នាព្រះហស្តរបស់ព្រះករុណា «ព្រះបរមរតនកោដ្ឋ»ឲ្យបានទូលំទូលាយ៕
ភ្នំពេញ ៖ សំណុំរឿងមន្ត្រីអាវុធហត្ថលើផ្ទៃប្រទេសម្នាក់ ដែលបានបាញ់ត្រូវជើងស្តាំប្រជាការពារម្នាក់ ឱ្យរបួសធ្ងន់ នៅទួលសង្កែ ខណ្ឌឫស្សីកែវ ត្រូវបានបញ្ជូនទៅដល់សាលាដំបូង រាជធានីភ្នំពេញ ហើយ កាលពីថ្ងៃទី១៤ ខែតុលា ឆ្នាំ២០១៨ នេះ ។
មន្ត្រីអាវុធហត្ថរូបនេះឈ្មោះ ឡាយ អ៊ីងឃីង អាយុ ២៧ឆ្នាំ អាសយដ្ឋាននៅភូមិ គង្គារផុស សង្កាត់ទួលសង្កែ២ ខណ្ឌឫស្សីកែវ។ ចំណែកជនរង គ្រោះឈ្មោះ លី រតនៈ អាយុ៣៩ឆ្នាំ មុខរបរ ជាប្រជាការពារ ស្នាក់នៅភូមិក្រោលគោ សង្កាត់គីឡូ ម៉ែត្រលេខ៦ ខណ្ឌឫស្សីកែវ។
សូមរំលឹកថា ពេលរំលងអធ្រាត្រឈានចូលថ្ងៃទី១២ ខែតុលា ឆ្នាំ២០១៨ មន្ត្រីប៉េអឹមរូបនេះ បានបាញ់ជាច្រើនគ្រាប់ ខណៈសមត្ថកិច្ចសង្កាត់ទួលសង្កែ និងខណ្ឌឫស្សីកែវ កំពុងបង្ក្រាបក្រុម ក្មេងទំនើងឈ្លោះប្រកែកគ្នា បណ្តាលឲ្យគ្រាប់កាំភ្លើងខ្ទាតទៅត្រូវជើងស្តាំរបស់កម្លាំងប្រជាការពារ ម្នាក់ រងរបួសធ្ងន់តែម្តង៕
ភ្នំពេញ ៖ ស្រីស្អាតម្នាក់រស់នៅខេត្តឧត្តរមានជ័យ ទំនងជាមិនអាចទ្រាំនឹងការឈឺចាប់បន្តទៀតបាន បន្ទាប់លង់នឹងការឆបោករបស់បុរសកូនបីម្នាក់ ក៏បានសម្រេចចិត្តកាត់កេរ្តិ៍កាត់ខ្មាសបញ្ចេញនូវវីដេអូឃ្លីប ដើម្បីបង្ហាញមុខមាត់ពិត និងលាតត្រដាងពីចរិតជនឆបោកម្នាក់(កម្លោះកូនបី) រស់នៅក្នុងស្រុកព្រៃឈរ ខេត្តកំពង់ចាម ដែលបានឆក់យកចិត្ត និងខ្លួនប្រាណរបស់ នាងរហូតបង្កើតបានកូនស្រីម្នាក់បន្សល់ទុកជាភ័ស្តុតាង មុនពេលបុរសរូបនេះ គេចខ្លួនមិនទទួលខុសត្រូវ។
តាមរយៈគណនីហ្វេសប៊ុករបស់ស្ត្រីរូបនេះ បានបង្ហាញថា នាងមានឈ្មោះ រី យ៉ា «Re Ya» បានទម្លាយចេញអត្តសញ្ញាណបុរសម្នាក់ដែលនាងអះអាងថា «ជាប្តីគេ» គឺជាជនឆបោករូបនាង ថា បុរសម្នាក់នោះមានឈ្មោះ ឈឿង ហ៊ុន មានស្រុកកំណើតនៅស្រុកព្រៃឈរ ខេត្តកំពង់ចាម តែចេញចូលទៅនៅខេត្តឧត្តរមានជ័យ ដោយដាក់ឈ្មោះថ្មីហៅថា ឈឿង ស័ក្ត ។
ក្នុងវីដេអូឃ្លីបនោះ នាងបានរៀបផ្តាំផ្ញើទៅកាន់មិត្តនារីៗទាំងឡាយថា បុរសឈ្មោះ ឈឿង ស័ក្ក រូបនេះ គឺជាមនុស្សប្រុសម្នាក់ពូកែប្រើល្បិចឆបោក លួងលោម អូសទាញទឹកចិត្តស្ត្រីមែនទែន ។ ហើយអ្វីដែលធ្វើឲ្យនាងលង់ចិត្តស្រលាញ់បំផុតនោះ គឺត្រង់ថា បុរសរូបនេះហ៊ានស្បថស្បែនៅចំពោះមុខទីកន្លែងសក្ការៈនៃវត្ថុស័ក្ខិសិទ្ធិនៅលើទឹកដីខេត្តឧត្តរមានជ័យ ថា គេនឹងធ្វើជាប្តីដ៏ល្អគ្រប់យ៉ាងនៅក្រោយពេលរៀបការរួចទៀតផង ។
ក្នុងឃ្លីបដដែល បន្តថា នាងសុខចិត្តប្រគល់ខ្លួនប្រាណ ទៅតាមការលត់ជង្គង់សុំអង្វរក របស់បុរសរូបនេះ ក៏ដោយសារតែនាងមានទំនុកចិត្តខ្លាំងថា រូបគេខំធ្វើល្អដាក់យើងប៉ុណ្ណឹង ដល់ថ្នាក់យកម្តាយ (ក្លែងក្លាយ) មកចូលស្តីដណ្តឹង, បង្ហាញលិខិតលែងលះ (មិនដឹងបានមកពីខាងណា), នាំយើងទៅកាន់ផ្ទះគេ ខណៈប្រពន្ធមិននៅ ដើម្បីដេញវេលាការដែលនៅសល់តែ២ខែទៀតផង ។
ទោះយ៉ាងណា អ្វីៗក្រោយមក ត្រូវបានបែកធ្លាយ បន្ទាប់ពីនាងទាមទាររក លិខិតបញ្ជាក់ភាពពោះម៉ាយ ស្របច្បាប់ ធ្វើទៅតាមការស្នើសុំរបស់ភូមិ ឃុំ ដើម្បីបញ្ជាក់លើឯកសារបែបបទសុំច្បាប់រៀបការ ។ ដោយសារតែលេស មិនប្រគល់លិខិតបញ្ជាក់ភាពពោះម៉ាយនេះជាច្រើនលើកច្រើនសារ ទីបំផុត នាងក៏បានដឹងថា បុរសឈ្មោះ ឈឿង ស័ក្ខ នេះ មានប្រពន្ធ និងកូនរហូតដល់៣នាក់ឯណោះ ទើបនាងបាក់ទឹកចិត្តស្ទើរវង្វេងវង្វាន់តែម្តង ។
នាងបន្តថា ទោះបីនាងបានជ្រុលជ្រួសមុនពេលរៀបការមកដល់ រហូតមានផ្ទៃពោះក៏ដោយចុះ តែនាងបានសម្រេចចិត្តមិនយកកូនចេញទេ និងខំប្រឹងតស៊ូពពោះរស់ឯកោទាំងក្តីអាម៉ាស់ រហូតសម្រាលបានកូនស្រីម្នាក់ទាំងក្តីវេទនាបំផុតតែម្នាក់ឯង គឺគ្មានការផ្តល់អ្វីទាំងអស់ពីបុរសខាងលើនោះទេ ដែលនាងបានចាត់ទុកថា បុរសរូបនោះ មិនស្មើនឹងសត្វតិរច្ឆាននោះឡើយ ។ មិនតែប៉ុណ្ណោះ បុរសរូបនេះ នៅថែមបោះពាក្យបោះសំដីដាក់នាងថា «ចង់ប្តឹងផ្តល់អញ្ជើញតាមចិត្តចុះ ព្រោះថា ត្រឹមទឹកដីខេត្តឧត្តរមានជ័យ និងខេត្តសៀមរាប ចង់ធ្វើ ស-ខ្មៅ បែបណាគេធ្វើបានទាំងអស់»។
ទំនងជាបារម្ភពីសុវត្ថិភាពផ្ទាល់ខ្លួន ស្ត្រីរូបនេះ បានអំពាវនាវដល់បងប្អូនតាមបណ្តាញសង្គម ឲ្យជួយចំណាំមុខមាត់បុរសរូបនេះផង ព្រោះនាងគិតថា អាចប្រឈមនឹងហានិភ័យចំពោះខ្លួនផ្ទាល់ និងក្រុមគ្រួសារ ក្រោយពេលឃ្លីបវីដេអូ ដែលបានលាតត្រដាងពីការឆបោករបស់បុរសខាងលើនេះ៕
សូមស្តាប់ការរៀបរាប់របស់ស្ត្រី រីយ៉ា ក្នុងវីដេអូឃ្លីបទាំងស្រុង ដូចខាងក្រោមនេះ ៖
ស្ទឹងត្រែង ៖ ក្រុមហ៊ុនធ្វើអាជីវកម្មបូមគ្រួសជាកល្ខណៈទ្រុងទ្រាយខ្នាតធំមួយកន្លែង បានធ្វើឲ្យ ប្រជា ពលរដ្ឋ ក៍ដូចមន្ត្រីរាជការមួយចំនួន រិះគន់ជាច្រើនខែមកហើយ បាននិយាយដូចៗគ្នាថាៈ ការបូមគ្រួស មួយកន្លែងខាងលើនោះ មិនដឹងជាមានច្បាប់ ឫយ៉ាងណានោះទេ ដោយឃើញ ដើរបូមយកគ្រួស តាម ច្រាំងទន្លេសេសាន រាប់គីឡូដីម៉ែត្រហើយុកទៅស្តុកទុកនៅចំណុចកំពង់ ដ ស្ថិតនៅឃុំស្តៅ ក្នុងស្រុក សេសាន ខេត្តសឹ្ទងត្រែង ។
មេឃុំស្តៅ ស្រុកសេសាន ខេត្តសឹ្ទងត្រែង លោក នួយ ប៊ុនធួយ បានប្រាប់ភ្នាគ់ងារទូរទស្សន៍ អាស៊ីអាគ្នេយ៍ កាលពីរសៀលថ្ងៃទី១២ ខែតុលាថាៈ ទីតាំងបូមគ្រួសតាមដងទន្លេសេសាន ខាងលើនោះ ម្ចាស់គេបានមកស្នើសុំដីមួយកន្លែងសម្រាប់ដាក់គ្រួស ដែលបូមបានពីទន្លេនៅខាងលើក្បាលភូមិនោះ គេហៅឈ្មោះថា ខ្សាច់ ណន រួចយកកមកស្តុកនៅចំណុចកំពង់ ដ នៅជាប់នឹងរបងផ្ទះរបស់ លោកតែ ម្តង។លោកថា ចាប់តាំងពីមានការបូមគ្រួសនោះមក ក៍ឃើញដឹកជញ្ជូនចេញពីរបីជើងដែរ ក៍ប៉ុន្តែមិន ទាន់ដឹងយកទៅ ខាង ណានោះទេ។
លោកបានបញ្ជាក់ថាៈ ក្រុមហ៊ុនបូមគ្រួសខាងលើនោះ គេមានឯកសារត្រឹមត្រូវ ជារបស់កូន សម្តេច ដូច្នេះ ការបូមគ្រួសនេះ ខាងកងវិស្វកម្មជាអ្នកដឹកជញ្ជូនយកទៅសាងសងអាគារ នៅតាម បណ្តាខេត្តនានា។ យ៉ាងណាក៏ដោយ ក៏លោកមិនបានបង្ហាញឯកសារពាក់ព័ន្ធ ខាងលើនោះទេ ដោយ គ្រាន់តែនិយាយថាៈ មានច្បាប់ ហើយបានជំរុញអោយអ្នកយកព័ត៌មាន ទៅសួរខាងសាលាខេត្ត ស្ទឹង ត្រែងវិញ។
រីឯអ្នកនាំពាក្យសាលាខេត្ត ក៍បានឆ្លើយថាៈ បើចង់ដឹងច្បាស់រឿងហ្នឹង ទៅសួរខាងប្រធាន មន្ទីររ៉ែថាមពលទៅ នឹងបានដឹងហើយ ប៉ុន្តែខាងមន្ទីររ៉ែ និងថាមពល មិនអាចទាក់ទងបានទេ កាលពី រសៀលថ្ងៃទី១១ តុលានេះ។
បើតាមគ្រប់មជ្ឈដ្ឋាននានា គេសង្កេតឃើញថាៈ នៅខេត្តសឹ្ទងត្រែង ក៍ដូចនៅតាមជាយខេត្ត បច្ចុប្បន្ននេះ បើចង់កើបគ្រួសខ្សាច់យកមកកសាងអ្វីមួយនោះ គឺមិនអាចធ្វើទៅបានងាយៗនោះទេ? ព្រោះមានថៅកែមកពីតាមបណ្តាខេត្តនានា គេដណ្តើមគ្នាដេញថ្លៃយកអស់ហើយ ព្រោះខ្សាច់ និងគ្រួស នេះ កំពុងត្រូវប៉ាន់សម្បើមណាស់នៅក្នុងខេត្តស្ទឹងត្រែងនេះ៕
ភ្នំពេញ ៖ ក្នុងឆមាសទី២ ឆ្នាំ ២០១៨ អាកាសធាតុមានការប្រែប្រួលច្រើនទាំងក្នុងតំបន់ ទាំងក្នុងភូមិសាស្ត្រប្រទេសកម្ពុជា ដោយសារព្យុះក្នុងតំបន់កើតមានច្រើននៅពាក់កណ្តាលរដូវវស្សាខុសពីធម្មតា និងបង្កឲ្យមាន ជាព្យុះទឹកជំនន់ និងការបាក់ដីនៅតាមបណ្តាប្រទេសជាច្រើនក្នុងតំបន់។ នេះបើតាមរបាយការណ៍ស្តីពីការងារគ្រប់គ្រងគ្រោះមហន្តរាយ រយៈពេល ៩ខែ ឆ្នាំ២០១៨ របស់គណៈកម្មាធិការជាតិគ្រប់គ្រងគ្រោះមហន្តរាយ។
ដោយឡែកកម្ពុជា បានទទួលរងគ្រោះដោយជំនន់ទឹកភ្លៀងជាបន្តបន្ទាប់នៅតាមតំបន់ជាច្រើន ជំនន់ទន្លេមេគង្គ មានចលនាឡើងចុះចំនួន ៣ដង និងឡើងដល់កម្រិតប្រុងប្រយ័ត្ននៅតាមដងទន្លេនេះ រួមទាំង ទន្លេបាសាក់បន្ទាប់ពីបានអាក់ខានអស់រយៈពេល ៤ឆ្នាំចុងក្រោយនេះ។
ក្នុងរបាយការណ៍ដដែលបានបង្ហាញអំពីស្ថានការណ៍គ្រោះមហន្តរាយរួមមានៈ ការខ្វះ ខាតទឹក,ជំនន់ទឹកភ្លៀង និងជំនន់ទន្លេមេគង្គ,ការបាក់ច្រាំងទន្លេ ស្ទឹង,ខ្យល់កន្ត្រាក់,ជំងឺឆ្លង និងអគ្គីភ័យជាដើម។ ជាមួយគ្នានេះគណៈកម្មាធិការជាតិគ្រប់គ្រងគ្រោះមហន្តរាយបានធ្វើ សេចក្តីសន្និដ្ឋានថា ក្នុងរយៈពេល ៩ខែ ឆ្នាំ២០១៨នេះ ព្យុះក្នុងតំបន់បានកើតមានចំនួន ២៥លើក ហើយទោះបីជាមិនទទួលរងឥទ្ធិពលផ្ទាល់ក៏ដោយចុះ ក៏កម្ពុជាបានទទួលរងនូវ ឥទ្ធិពលបន្ទាប់ ដែលធ្វើឲ្យអាកាសធាតុមានការប្រែប្រួលច្រើននៅពាក់កណ្តាលរដូវវស្សា និង បង្កឲ្យមានភ្លៀងធ្លាក់ជោកជាំក្នុងកម្រិតដែលមិនធ្លាប់មាននៅតាមបណ្តាខេត្តមួយចំនួន ។
ការបង្កឲ្យកើតមានជំនន់ទឹកភ្លៀង ជំនន់ទន្លេមេគង្គចាប់ពីពាក់កណ្តាលខែកក្កដា មក ក្នុងនោះ តំបន់មួយចំនួនមានបរិមាណទឹកភ្លៀងធ្លាក់ខ្សោយនៅដំណាច់ខែកក្កដា ធ្វើឲ្យផលដំណាំមួយ ចំនួនធំរងផលប៉ះពាល់ និងខូចខាតដូចជានៅខេត្តបាត់ដំបង បន្ទាយមានជ័យ ឧត្តរមានជ័យ ស្វាយរៀង ព្រៃវែងជាដើម ដែលស្ថានភាពបែបនេះធ្វើឲ្យប្រជាកសិករប្រឈមនឹងការខ្វះខាត ទាំងផ្នែកជីវភាព សុខភាពក្នុងគ្រួសារ និងសហគមន៍ ដែលចាំបាច់ត្រូវមានការស្តារឡើងវិញ ក្នុងរយៈពេលវែង ក្នុងវិស័យកសិកម្ម សង្គមកិច្ច និងហេដ្ឋារចនាសម្ព័ន្ធរូបវ័ន្តជាដើម៕
ភ្នំពេញ ៖ អគ្គលេខាធិការរងសមាគមរោងចក្រកាត់ដេរកម្ពុជា GMAC លោក កាំង ម៉ូនីកា បានថ្លែងថា បញ្ហាប្រព័ន្ធអនុគ្រោះពន្ធលើគ្រប់មុខទំនិញលើកលែងតែសព្វាវុធ ឬ EBA នៅកម្ពុជា រដ្ឋាភិបាល និងសហភាពអឺរ៉ុប អាចនឹងស្វែងរកដំណោះស្រាយសមស្របណាមួយ ប្រកបដោយការយោគយល់ និងគោរពគ្នាទៅវិញទៅមក។
លោក កាំង ម៉ូនីកា បានថ្លែងប្រាប់បណ្តាញព័ត៌មានក្នុងស្រុកថា សមាគមរោងចក្រកាត់ដេរកម្ពុជា ក៏បានសម្ដែងការព្រួយបារម្ភអំពីការផ្សាយព័ត៌មានបែបប៉ាន់ស្មានអំពីបញ្ហា EBA ព្រោះអាចនាំទៅដល់ការថយចុះនៃទំនុកចិត្តពីសំណាក់អ្នកបញ្ជាទិញ និងអ្នកវិនិយោគទូទៅនៅកម្ពុជា។ មិនអាចសន្និដ្ឋានជាក់លាក់បានទេ ស្ថានភាពជាក់ស្ដែងអាចមានលក្ខណៈធូរស្រាលជាងការចុះផ្សាយក៏ថាបាន។
អគ្គលេខាធិការរង សមាគមរោងចក្រកាត់ដេរកម្ពុជា (GMAC) លោក កាំង ម៉ូនីកា បានសរសេរនៅ លើទំព័រហ្វេសប៊ុក (Facebook) ផ្ទាល់ខ្លួនថា គ្មាននរណាម្នាក់ដឹងច្បាស់ថា គណៈកម្មាធិការសហភាពអឺរ៉ុប នឹងសម្រេចចិត្តយ៉ាងណាអំពីរឿងប្រព័ន្ធអនុគ្រោះពន្ធនោះទេ ព្រោះនៅរយៈពេលយូរទៀត ដែលនឹងអាចកើតឡើងនៅចុងឆ្នាំនេះ ឬដើមឆ្នាំក្រោយ។ ដូច្នេះការយល់ឃើញទាំងឡាយអំពី លទ្ធផលនៃដំណើរការនេះគឺជាការប៉ាន់ស្មានសុទ្ធសាធ។
លោក កាំង ម៉ូនីកា បញ្ជាក់ថា តាមរយៈការកែលម្អ និងលើកកម្ពស់លក្ខខណ្ឌការងារនិងសិទ្ធិកម្មករជាបន្តបន្ទាប់ កម្ពុជាអាចនឹងមានភាគរយខ្ពស់ក្នុងការចៀសផុតពីការដកប្រព័ន្ធអនុគ្រោះពន្ធ EBA។
គួរជម្រាបថា វិស័យកាត់ដេរ និងវាយនភណ្ឌនៅកម្ពុជា បានផ្ដល់ការងារនិងប្រាក់ចំណូលដោយផ្ទាល់ និងដោយប្រយោល ទៅដល់ប្រជាជនជាង២លាននាក់ ខណៈការនាំចេញសម្លៀកបំពាក់ទៅអឺរ៉ុបក្រោមការអនុគ្រោះពន្ធ EBA ផ្ដល់ប្រាក់ចំណេញដល់វិនិយោគិនប្រមាណ៧០០លានដុល្លារក្នុងមួយឆ្នាំ លើប្រាក់ចំណូលប្រហែល៧ពាន់លានដុល្លារ៕ ខេមរិន្ទ 
( លោក កាំង ម៉ូនីកា អគ្គលេខាធិការរង សមាគមរោងចក្រកាត់ដេរកម្ពុជា (GMAC) )
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
