ខេត្តប៉ៃលិន ៖ នេះជាលើកទីមួយ ដែលពលរដ្ឋខ្មែរម្នាក់ បានសហការជាមួយជនជាតិចិន ក្នុងការដាំដំណាំប្រភេទថ្មី លើទឹកដីត្បូងពេជ្រ ជាប្រភេទដំណាំក្រចៅចិន ដោយគេយកគ្រាប់ពួជមកពីប្រទេសចិន ដែលដាំលើផ្ទែដីជាង២០ហិកតា ស្ថិតតាមបណ្តោយផ្លូវជាតិលេខ៥៩ ក្នុងភូមិចំនួនពីរគឺភូមិវាល និងភូមិភ្នំស្ពង់ ក្នុងឃុំសាលាក្រៅ ស្រុកសាលាក្រៅ ខេត្តប៉ៃលិន ។
បើតាមបុរសម្នាក់ឈ្មោះ ប៊ុន ទី អាយុ៣៣ឆ្នាំ ជាពលរដ្ឋខ្មែរ រស់នៅភូមិ/ឃុំខាងលើ បានរៀបរាប់ថា៖ នៅដើមឆ្នាំ២០១៨នេះ រូបគាត់ បានសហការជាមួយជនជាតិចិនមួយក្រុម ដែលមានគ្នា១០នាក់ នាំគ្នាជួលដីប្រជាពលរដ្ឋចំនួនពីរកន្លែង សម្រាប់ធ្វើការដំដុះ ប្រភេទដំណាំថ្មី ដែលអ្នកខេត្តប៉ៃលិន មិនធ្លាប់ឃើញគឺដំណាំក្រចៅចិន ដែលយកគ្រាប់ពួជមកពីប្រទេសចិន ហើយដំណាំប្រភេទនេះ មិនត្រូវការទឹកជោកជាំពេកទេ ប៉ុន្តែបើផ្ទៃដីមានការដក់ទឹក គឺដំណាំប្រភេទនេះ ក៍មិនទទួលបានផលល្អនោះដែរ ។ លោកបានបន្តថា៖ នេះការដាំសាកល្បងលើកដំបូង ដោយយើងធ្វើផ្ទៃឲ្យបានល្អ មានការជីកប្រឡាយទឹក សម្រាប់នៅពេល មានភ្លៀងធ្លាក់ខ្លាំង អាចឲ្យទឹកហូរចូលប្រឡាយ ការពារបាននូវការដក់ជោគជាំ ក្នុងចម្ការ ដែលនាំឱ្យខូចខាតដល់ដំណាំក្រចៅចិននេះ ។ លោកបន្តទៀតថា៖ ការដាំដំណាំក្រចៅចិននេះ ក៍ត្រូវការថែទាំ ដោយបោចស្មៅ ដាក់ជី និងស្រោចទឹក ពេលដែលមេឃរាំង គ្មានភ្លៀង ហើយម្យ៉ាងវិញទៀត ដំណាំក្រចៅមួយនេះ មិនត្រូវការទឹក ច្រើនប៉ុន្មាននោះទេ ត្រូវការដីស្រឡះល្អ គ្មានស្មៅ ដើម្បីឱ្យដើមវាលូតលាស់បានល្អ ។ លោកបានបញ្ជាក់ថា៖ ប្រហែលរយ:ពេល១ឆ្នាំ ដំណាំប្រភេទនេះ និងទទួលផល ដោយគេ ធ្វើការកាត់ដើម ថ្លឹងលក់ ឱ្យឈ្មួញជនជាតិចិន ដឹកយកទៅលក់នៅស្រុកចិនផងដែរ ។
តំណាងក្រុមហ៊ុនជនជាតិចិនឈ្មោះ ម៉ៃកែល ភេទប្រុស អាយុ៣៥ឆ្នាំ បានរៀបរាប់ឱ្យដឹងថា៖ ដំណាំក្រចៅចិននេះ គេតែងតែដាំដុះនៅប្រទេសចិន តែដោយសារនៅទីនោះមានផ្ទៃដីតូច ហើយចង្អៀត ទើបខាងក្រុមហ៊ុន មកជួលដីប្រជាពលរដ្ឋនៅស្រុកសាលាក្រៅ ខេត្តប៉ៃលិនជាង២០ហិកតា ដាំសាកល្បងលើដំណាំមួយនេះ លុះប្រសិនជាបានជោគជ័យ នៅឆ្នាំក្រោយៗទៀត នឹងជួលដី រហូតដល់៧០ទៅ៨០ហិកតា សម្រាប់ដាក់ដាំក្រចៅចិន ស្របតាមតម្រូវការទីផ្សារផងដែរ ។ លោកបន្តទៀតថា៖ ការដាំដំណាំក្រចៅតែម្តង គឺអាចប្រមូលផលបាន រហូតដល់១៥ទៅ២០ឆ្នាំ ដោយគ្រាន់តែកាត់ដើមចាស់ រួចមានដុះកូនថ្មី ដែលចេញពីគល់ ដោយយើងគ្រាន់តែស្រោចទឹក នោះវានិងដុះសារជាថ្មីឡើងវិញ ក្នុងរយ:ពេល១ឆ្នាំ គឺអាចកាត់លក់បាន ។
លោកក៍បានបញ្ជាក់ឲ្យដឹងដែរថា៖ ដំណាំក្រចៅចិននេះ មានសារៈសំខាន់បំផុត គឺគេយកដើមវាទៅផលិតជាសំលៀកបំពាក់ (ខោអាវ) និងរបស់របរប្រើប្រាស់មួយចំនួនទៀត ចំណែកការលក់ដំណាំក្រចៅចិននេះ គឺគេកាត់យកតែដើមថ្លឹងប៉ុណ្ណោះ ដើម្បីលក់ឱ្យក្រុមហ៊ុន ចំណែកស្លឹក និងផ្កាគឺមិនត្រូវការឡើយ ដោយលក់ ក្នុង១គីឡូក្រាម អាចបានតម្លៃពី៤៥០០រៀល ទៅ៥០០០រៀល ហើយបច្ចុប្បន្នខាងក្រុម ហ៊ុន កំពុងតែឈូសឆាយដីព្រៃ ឱ្យរាបស្មើ ,បង្កើតជាប្រឡាយទឹក ដោយត្រូវការជួលកម្មករក្នុង១ថ្ងៃៗ ពី៣០នាក់ ទៅ៤០នាក់ ដោយឲ្យថ្លៃឈ្នួលកម្មករម្នាក់៣ម៉ឺនរៀល ផងដែរ។
ពាក់ព័ន្ធបញ្ហាខាងលើ លោក សាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន មានប្រសាសន៍ឲ្យដឹងតាមទូរស័ព្ទកាលពីព្រឹកថ្ងៃទី២៥ ខែកក្តដានេះថា៖ ករណីពលរដ្ឋសហការជាមួយជនជាតិដាំដំណាំប្រភេទនេះ គឺខាងមន្ទីរមិនដឹងនៅឡើយទេ ស្របពេលភា្នក់ងារព័ត៌មានសួរនាំទើបដឹង ហើយលោកក៍បានឲ្យមន្ត្រីស្រុកចុះទៅមើល គេបញ្ជាក់មកថាជាដើមម៉នទៅវិញ មិនដើមក្រចៅទេ ដូច្នោះខាងលោក និងចុះទៅពិនិត្យថាតើដើមអ្វីឲ្យពិតប្រាកដ ៕
ភ្នំពេញ ៖ មន្ទីរពេទ្យជោរី ភ្នំពេញបានសហការជាមួយក្រុមហ៊ុនឱសថ DHG Pharma ( ឌីអេចជី ហ្វាម៉ា ) ប្រចាំកម្ពុជា ពិនិត្យនិងព្យាបាលជំងឺឥតគិតថ្លៃ ជូនប្រជាពលរដ្ឋកម្ពុជាប្រមាណ១ពាន់នាក់ ។ កម្មវិធីពិនិត្យនិងព្យាបាលជំងឺដល់ពលរដ្ឋកម្ពុជា បានធ្វើឡើងកាលពីព្រឹកថ្ងៃទី ២៤ កក្កដា ឆ្នាំ ២០១៨ នៅមន្ទីរពេទ្យជោរីរាជធានីភ្នំពេញ ដោយមានប្រជាពលរដ្ឋជាច្រើននាក់បានចូលរួមមកពិនិត្យជាបន្តបន្ទាប់ ។
