All posts by មេគង្គ ប៉ុស្តិ៍

ផ្សារទំនើបចំនួន១៣ទៀត នឹងបង្កើតនៅកម្ពុជាក្នុងឆ្នាំនេះ

June 11, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ភ្នំពេញ ៖ ស្របទៅនឹងចក្ខុវិស័យរបស់រាជរដ្ឋាភិបាលកម្ពុជា ដែលចង់ប្រែក្លាយក្រុងភ្នំពេញអោយទៅជាបណ្តុំទីផ្សារដ៏ពេញនិយមមួយក្នុងតំបន់នោះ បើតាមគម្រោងក្នុងឆ្នាំ២០១៨នេះ នឹងមានវត្តមានផ្សារទំនើបចំនួន១៣ទៀត បង្កើតឡើងក្នុងរាជធានីភ្នំពេញ! ដូចនេះនឹងធ្វើអោយទំហំទីផ្សារទំនើប កើនឡើងដល់ជិត៣៧ម៉ឺនម៉ែត្រក្រឡា បើគិតក្រឡាផ្ទៃសរុបរួមបញ្ចូលគ្នា នៃផ្សារទំនើបទាំងអស់ ។

កាលពីពេលថ្មីៗនេះ សម្តេចតេជោ នាយករដ្ឋមន្ត្រីនៃប្រទេសកម្ពុជា បានថ្លែងថា បច្ចុប្បន្នមានប្រជាពលរដ្ឋកម្ពុជាមួយចំនួនបានចេញទៅទិញទំនិញនៅក្រៅប្រទេស ដូចជានៅទីក្រុងហុងកុង និង ប្រទេសសិង្ហបុរីជាដើម ដោយសារ នៅទីនោះមានឈ្មោះល្បីថាជាបណ្តុំទីផ្សារដែលមានលក់ផលិតផល ម៉ាកល្បីរបស់ពិភពលោក ដ៏សំបូរបែប។

ខណៈដែលកំរិតជីវភាពរបស់ប្រជាពលរដ្ឋកម្ពុជាមានភាពល្អប្រសើរ និងដើម្បីទាក់យកចំណូលបន្ថែមទៀត ពី អ្នកទេសចរមកពីក្រៅប្រទេសផងនោះ រាជរដ្ឋាភិបាលកម្ពុជា ក៏ចង់អោយទីក្រុងភ្នំពេញ ក្លាយជាបណ្តុំទីផ្សារដ៏ពេញនិយមមួយផងដែរ សម្រាប់ការដើរទិញទំនិញដែលផ្តោតទាំងលើគុណភាព និងបរិមាណ ដូចជានៅក្នុងផ្សារទំនើបនៃអគារចក្កវាឡ៏ប្លែកគេ ដែលមានសុទ្ធតែហាងលក់ទំនិញម៉ាកល្បីៗរបស់ពិភពលោក ជាដើម ។
ទន្ទឹមនេះ បើយោងតាមគម្រោងក្នុងឆ្នាំ២០១៨នេះ ចំនួនផ្សារទំនើបថ្មីៗចំនួន១៣ ទៀត កំពុងត្រៀមខ្លួនបង្កើតនៅក្នុងរាជធានីភ្នំពេញ ដោយទំហំផ្ទៃក្រឡា សរុប នៃផ្សារទំនើបទាំងនេះ មានជាង ១៤ម៉ឺន៧ពាន់ម៉ែត្រក្រឡា ខណៈដែល ទំហំផ្សារទំនើបសរុបដែលកំពុងដំណើរការ និងបានបញ្ចប់ការសាងសង់ហើយនោះ មានប្រមាណ២២ម៉ឺនម៉ែត្រក្រឡា។ ដូចនេះការវិនិយោគ ផ្សារទំនើបនៅកម្ពុជា នឹងកើនទំហំផ្ទៃក្រឡាសរុប ដល់ជិត៣៧ម៉ឺនម៉ែត្រក្រឡា។

តាមការចេញផ្សាយរបស់គេហទំព័រ Propertyarea.asia បានបញ្ជាក់ថា ទីតាំងផ្សារទំនើប ដែលគ្រោងនឹងបើកដំណើរការនៅក្នុងឆ្នាំនេះ រួមមាន ដូចជា Midtown Community Mall, The Bridge Commercial, Downtown 93, The Park, Noro Mall, Prince Central Plaza, ជាដើម។ ចំណែកគម្រោងសាងសង់ ទីតាំងលក់រាយជាច្រើនដែលកំពុងស្ថិតក្នុងដំណាក់កាលសាងសង់ មានដូចជា PH Eco Mall និង Diamond Peng Hourt Mall ជាដើម។

តាមការសិក្សារបស់ក្រុមហ៊ុន CBRE Cambodia បង្ហាញថា បច្ចុប្បន្ននេះ ការវិនិយោគទៅលើទីតាំង លក់រាយនៅកម្ពុជា បានកើនឡើងជាបន្តបន្ទាប់ដោយក្នុងឆ្នាំនេះ និងមានទីតាំងលក់រាយប្រហែល១១នឹងបើកដំណើរការ ក្នុងចំណោមផ្សារទំនើបចំនួន១៣ទីតាំង។

យោងតាមរបាយការណ៍របស់ ក្រុមហ៊ុន CBRE Cambodia នេះ ក៏បានបង្ហាញដែរថា គិតត្រឹមដំណាច់ឆ្នាំនេះ នៅកម្ពុជានឹងមានទីតាំងលក់រាយប្រហែល២៩ ភាគរយស្ថិតក្នុងខណ្ឌសែនសុខ! ២៦ភាគរយ ក្នុងខណ្ឌចំការមន! ១៩ ភាគរយក្នុងខណ្ឌទួលគោក! ១៣ភាគរយក្នុងខណ្ឌច្បារអំពៅ! ៦ភាគរយ ក្នុងខណ្ឌដូនពេញ និងខណ្ឌមានជ័យ និង១ភាគរយក្នុងខណ្ឌ៧មករា៕

លើកគ្នាជិត៤០នាក់ទៅប្តឹងពីករណីរដ្ឋបាលរោងចក្រឆបោកលុយធានាឲ្យចូលធ្វើការ

June 11, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ ក្រុមប្រជាពលរដ្ឋប្រមាណ៤០នាក់ តំណាងអោយកម្មករ២០០នាក់ បាននាំគ្នាធ្វើដំណើរមកសាលាសង្កាត់ចោមចៅ៣ ខណ្ឌពោធិ៍សែនជ័យ សុំការអន្តរាគមន៍កាលពីវេលាម៉ោង២ និង២០នាទីរសៀលថ្ងៃទី១១ ខែមិថុនា ឆ្នាំ២០១៨ បន្ទាប់ពីបុរសម្នាក់និងនារីម្នាក់ បានអះអាងថា ជាបុគ្គលិករដ្ឋបាលរោងចក្រមួយកន្លែង និងប្រកាសជ្រើសរើសបុគ្គលិកជាច្រើននាក់ ដោយតម្រូវអោយពួកគាត់បង់លុយជាមុនហើយសន្យាថា នាំចូលធ្វើការ។

បើតាមយុវជនម្នាក់ឈ្មោះ ផេង ចាន់ថូ ភេទប្រុស អាយុ២៤ឆ្នាំ មានស្រុកកំណើតនៅ ភូមិស្ពានតោ ឃុំរឡាំងគ្រើល ស្រុកសំរោងទង ខេត្តកំពង់ស្ពឺ បានអោយដឹងថា មុនពេលកើតហេតុរូបគាត់បានឃើញក្រដាសដែលគេ បិទតាមបង្គោលភ្លើងនិងជញ្ជាំងតាមផ្លូវថា ត្រូវការជ្រើសរើសបុគ្គលិកជាច្រើននាក់និងមិនត្រូវការបទពិសោធនទេ ទើបរូបគាត់ទំនាក់ទំនងតាមទូរស័ព្ទ និងណាត់ជួបបុរសម្នាក់ឈ្មោះ តុលា ។លុះនៅថ្ងៃ២០ ខែឧសភា ឆ្នាំដដែលរូបគាត់ក៏មកជួបបុរសម្នាក់ឈ្មោះ តុលា ដែលអះអាងថា ជារដ្ឋបាលបានតម្រូវអោយបង់លុយមុនចំនួន៥០ដុល្លារ ដោយសន្យាថា នៅថ្ងៃទី១១ ខែមិថុនា ឆ្នាំ២០១៨ នេះ នឹងនាំចូលធ្វើការ។

តាមព័ត៌មានបន្តទៀតថារហូតមកដល់ថ្ងៃកើតហេតុរូបគាត់និងក្រុមកម្មករជាច្រើននាក់ទៀតបាននាំគ្នាមកចូលធ្វើការតាមអ្វីដែលបុរសរដ្ឋបាលនោះសន្យា។ តែអ្វីដែលហួសចិត្តនោះខណះដែលក្រុមកម្មករជាង២០០នាក់បានមកធ្វើការបែរជាកន្លែងរោងចក្រឆ្លើងថាមិនមានរើសបុគ្គលិកនោះទេហើយក៏មិនស្គាល់ឈ្មោះតុលា ដែលអះអាងថារដ្ឋបាលដែរទើបនាំគ្នាភ្ញាក់ខ្លួនថាចាញ់បោកគេហើយបាននាំគ្នាទៅសាលាសង្កាត់ចោមចៅ៣សុំការអន្តរាគមន៍។

ជនរងគ្រោះបានបញ្ជាក់ថារោងចក្រដែលបុរសឆបោកប្រាប់យកមកធ្វើការនោះឈ្មោះរោងចក្រ វីន សាន់ ដែលបានទីតាំងនៅក្នុងដំបន់សេដ្ឋកិច្ចពិសេស ស្ថិតក្នុងសង្កាត់កន្ទោក ខណ្ឌពោធិ៍សែនជ័យ តែពួកគេមកប្រគល់លុយនៅក្នុងបុរី ញ៉ូថោន សង្កាត់ចោមចៅ៣។

ជនរងគ្រោះបានបញ្ជាក់ថាពាក់ព័ន្ធនឹងករណីខាងលើនេះក្រុមប្រជាពលរដ្ឋខ្លះបង់រហូត១០០ដុល្លារ ឬលើសពីនេះទៅទៀតក៏មាន។យ៉ាងណាក៏ដោយ សមត្ថកិច្ចនៅមិនទាន់ចាត់ការបែបណា ចំពោះការតវ៉ានោះនៅឡើយទេ៕

ផ្ទុះកំប៉ុងហ្គាសពេលចម្អិនអាហាររបួសធ្ងន់ ២នាក់ប្តីប្រពន្ធ

June 11, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ៖ ប្តី និងប្រពន្ធ បានរងរបួសធ្ងន់ក្នុងករណីផ្ទុះកំប៉ុងហ្គាសរលាកពេញខ្លួន ខណៈដែលកំពុងចំអិនអាហារ ហេតុការណ៍នេះបានកើតឡើងនៅវេលាម៉ោង១៣ និង២៥នាទីរសៀលថ្ងៃទី១១ ខែមិថុនា ឆ្នាំ២០១៨ នៅបន្ទប់ជួលមួយកន្លែង នៅជាន់ផ្ទាល់ដី ច្រកចូលទី៥ នៃអាគារបុរីកីឡា ដែលស្ថិតនៅក្នុងសង្កាត់វាលវង់ ខណ្ឌ៧មករា រាជធានីភ្នំពេញ។

២នាក់ប្តីប្រពន្ធនេះ មិនត្រូវបានស្គាល់អត្តសញ្ញាណទេ គ្រាន់តែដឹងថាជាអ្នកលក់មីឆា និងបបរតាមរ៉ុម៉ក់រទេះ ស្នាក់នៅបន្ទប់ជួលកើតហេតុខាងលើ។

ប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុអ្នកទាំងពីរ បានចំអិនម្ហូបអាហារដូចសព្វមួយដង ដោយប្រើប្រភេទកំពុងហ្គាសតូចៗ ក៏ស្រាប់តែផ្ទុះលាន់ដូចស្នូរកាំភ្លើង និងមានភ្លើងឆាបបណ្តាលប្តីរងរបួសធ្ងន់ ស្ត្រីដែលជាប្រពន្ធត្រូវបានដឹកតាមរ៉ឺម៉ក់កង់បីបញ្ជូនទៅកាន់មន្ទីរពេទ្យភ្លាមៗ ចំណែកបុរសដែលជាប្តី នៅដឹងស្មារតីនិងបានបញ្ជូនទៅមន្ទីរតាមក្រោយ។

ក្រោយពេលមានហេតុការណ៍នេះកើតឡើង គេមិនឃើញមានមន្ត្រីអាជ្ញាធរមូលដ្ឋានចុះមកត្រួតពិនិត្យក្នុងហេតុខាងនោះទេ៕

កូនប្រុសបែកថ្នាំ កាប់ម្តាយស្លាប់ និងប្អូនបង្កើត២នាក៎របួសធ្ងន់

June 10, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តប៉ៃលិន ៖ រឿងរ៉ាវដ៍រន្ធត់មួយ បានកើតឡើងកាលពីវេលាម៉ោង០៦និង១៥នាទីព្រឹកថ្ងៃទី១០ ខែមិថុនា ឆ្នាំ២០១៨ ដោយសារតែកូនប្រុសបង្កើតម្នាក់ បានលើកដៃទាញពូថៅសម្លាប់ម្តាយខ្លូនឯង បណ្តាលឲ្យស្លាប់ និងប្អូនបង្កើតប្រុសស្រី ចំនួនពីរនាក់ទៀត ឲ្យរងរបួសធ្ងន់ ត្រូវបានគេបញ្ជូនទៅសង្គ្រោះបឋមនៅមណ្ទលសុខាភាពភ្នំព្រាល ព្រោះតែរឿងរ៉ាវក្នុងគ្រួសារបន្តិចបន្តួច និងការបែកថ្នាំរបស់ជនសង្ស័យ ។

ហេតុការណ៍ដ៍រន្ធត់ខាងលើ បានកើតឡើងនៅចំណុចភូមិដីស ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។

បើតាមលោក ហុង ហេង នាយប៉ុស្ត៍រដ្ឋបាលឃុំស្ទឹងត្រង់ ស្រុកសាលាក្រៅ បានឲ្យដឹងថា៖ មុនពេលកើតហេតុចំនួន៣ថ្ងៃ ជនសង្ស័យជាកូន បានមកសុំកូនរបស់ខ្លូន ដែលផ្ញើទុកឲ្យម្តាយ(ជនរងគ្រោះ) ជាចិញ្ចឹម យកទៅមើលថែខ្លូនឯងវិញ ប៉ុន្តែត្រូវម្តាយ ដែលជាជនរងគ្រោះមិនឲ្យ ព្រោះតែជនសង្ស័យជាមនុស្សចិញ្ចឹមខ្លូនឯងមិនរស់ និងជាមនុស្សដែលញៀនថ្នាំខ្លាំងផងដែរ ។ លោកនាយប៉ុស្ត៍ បានបន្តថា៖លុះនៅថ្ងៃកើតហេតុ ប្រហែលជាជនសង្ស័យមានគំនុំ រឿងកាលពីថ្ងៃមុន បានជាប្រើអំពើហិង្សាទៅម្តាយ ដោយកាប់និងពូថៅ បណ្តាលឲ្យចំក្បាលធ្ងន់ធ្ងររហូតដល់ស្លាប់និងកន្លែង ចំណែកប្អូនៗ បានឃើញហេតុការណ៍ក៍នាំគ្នាទៅជួយ ប៉ុន្តែត្រូវបានជនសង្ស័យដេញកាប់ដូចគ្នា បណ្តាលឲ្យរងរបួសធ្ងន់ធ្ងរ ត្រូវបានបញ្ជូនទៅសង្គ្រោះនៅមណ្ទលសុខភាពផងដែរ ។

បើតាមលោកអនុសេនីយ៍ទោ រី តារ៉ា អធិការរង នៃអធិការដ្ឋានស្រុកសាលាក្រៅ ដែលដឹកនាំកម្លាំងចុះអន្តរាគមន៍ករណីខាងលើនេះ បានឲ្យដឹងថា៖ ជនសង្ស័យឈ្មោះ ធុង នាង ភេទប្រុស អាយុ៣១ឆ្នាំ រស់ភូមិឃុំកើតខាងលើ ចំណែកជនរងគ្រោះទីមួយឈ្មោះ សុខ ស្រីម ភេទស្រី អាយុ៥៥ឆ្នាំ ត្រូវជាម្តាយបង្កើត របស់ជនសង្ស័យ ដោយស្លាប់និងកន្លែង ដែលជនសង្ស័យជាកូនកាប់នឹងពូថៅ , ទីពីរឈ្មោះ ធុង ថូ ភេទប្រុស អាយុ២២ឆ្នាំ ត្រូវជាប្អូនបង្កើតជនសង្ស័យ រងរបួសក្បាលផ្នែកខាងមុខធ្ងន់ធ្ងរ និងទីបីឈ្មោះ ធុង សារី ភេទស្រី អាយុ២០ឆ្នាំ ត្រូវជាប្អូនស្រីបង្កើតជនសង្ស័យ រងរបួសក្បាលផ្នែកខាងក្រោយធ្ងន់ធ្ងរ ។

លោក បានបន្តថា៖ ករណីនេះគឺបណ្តាលមកពីជនសង្ស័យ ដែលត្រូវជាកូនបង្កើតបានឈ្លោះទាស់ទែងគ្នាជាមួយម្តាយខ្លួនឯងកាលពីបីថ្ងៃមុន រួចមានការគុំគួន លុះរហូតមកដល់វេលា កើតហេតុខាងលើ ជនសង្ស័យបានសម្រេចចិត្តបង្ករហឹង្សា ដោយចេតនាលើជនរងគ្រោះតែម្តង។ បច្ចុប្បន្នជនសង្ស័យ ត្រូវសមត្ថកិច្ចនៃអធិការនគរបាលស្រុកសាលាក្រៅ ធ្វើការឃាត់ខ្លូន និងរៀបចំសំណុំរឿងបញ្ជូនបន្តមកស្នងការនគរបាលខេត្ត ដើម្បីចាត់ការបន្ត ចំណែកអ្នករងរបួស ត្រូវបានបញ្ជូនមកសង្គ្រោះនៅមន្ទីរបង្អែកខេត្តប៉ៃលិន ដោយសពជនរងគ្រោះជាម្តាយ ត្រូវបានសាច់ញាតិ ចាត់ចែងធ្វើបុណ្យតាមប្រពៃណីផងដែរ ៕

មន្ត្រីមន្ទីរបរិស្ថានខេត្តម្នាក់ក្រឡាប់រថយន្តចូលទឹកប្រឡាយស្លាប់

June 10, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

បាត់ដំបង៖ មន្ត្រីនៃមន្ទីរបរិស្ថានខេត្តបាត់ដំបងដែលមានតួនាទីជាអនុប្រធានក្រឡាប់រថយន្តធ្លាក់ចូលក្នុងទឹកប្រឡាយបណ្តាលអោយស្លាប់។

ហេតុការណ៍នេះបានកើតឡើងនៅវេលាម៉ោង៤និង១០នាទីល្ងាចថ្ងៃទី០៩ ខែមិថុនា ឆ្នាំ២០១៨ ត្រង់ចំនុចភូមិត្រពាំងដងទឹក ឃុំហប់ ស្រុកគាស់ក្រឡ ខេត្តបាត់ដំបង។

ជនរងគ្រោះមានឈ្មោះ ឯម វិចិត្រ អាយុ៥៥ឆ្នាំ ជាអនុប្រធានមន្ទីបរិស្ថានខេត្តបាត់ដំបង រស់នៅភូមិនរា២ ឃុំនរា ស្រុកសង្កែ ។

ករណីគ្រោះថ្នាក់ចរាចរណ៍ខាងលើនេះ នៅមិនទាន់ដឹងពីមូលហេតុពិតដែលនាំឲ្យ ក្រឡាប់រថយន្តផ្ងារជើងនៅឡើយទេ៕

កំពុងឆក់ត្រី រអិលជើងធ្លាក់ចូលប្រឡាយឆក់ខ្លួនឯងស្លាប់

ភ្នំពេញ ៖ យុវជនជាជាងដែកម្នាក់បានស្លាប់ភ្លាមៗនៅកន្លែងកើតហេតុ បន្ទាប់ពីត ខ្សែភ្លើង សម្រាប់ឆក់ត្រី តែបានរអិលជើងធ្លាក់ចូលប្រឡាយឆក់ខ្លួនឯងស្លាប់យ៉ាងអណោចអធម៌ ។

ហេតុការណ៍នេះបានកើតឡើង នៅថ្ងៃទី០៩ ខែមិថុនា ឆ្នាំ២០១៨ វេលាម៉ោង១៤នឹង ១៥ នាទី ចំណុច ដីឡូដ៍គ្មានលេខ ផ្លូវលំក្នុងបុរីខាំខូស៊ីធី ក្រុមទី១ ភូមិពោងពាយ សង្កាត់ទួលសង្កែទី២ ខណ្ឌឫស្សីកែវ ។

ជនរងគ្រោះឈ្មោះ ហៀង សំរ៉ុង ភេទប្រុស អាយុ២៦ឆ្នាំ មុខរបរ ជាងផ្សារដែក ស្នាក់នៅក្នុង ការដ្ឋានសំណង់ ក្នុងបុរីខាំខូសុីធី មានស្រុកបារាយ៍ខេត្តកំពង់ធំ ។
សមត្ថកិច្ចឱ្យដឹងថាមុនពេលកើតហេតុជនររងគ្រោះនិងបក្ខពួក២នាក់បានលា ខ្សែភ្លើងពី កន្លែង ស្នាក់នៅទៅកន្លែងកើតហេតុ(ប្រហែល៣០ម៉ែត្រ) ដើម្បីឆក់ត្រី។ ពេលកំពុងដាក់ឆក់ត្រី ក៏រអិលជើងធ្លាក់ចូលក្នុងប្រឡាយ បណ្តាលអោយឆក់ខ្លួងឯងស្លាប់ ហើយ២នាក់ដែលនៅខាងលើ គោក ក៏បានរត់ទៅដកឌុយចេញហើយក៏មកលើកជនរងគ្រោះដឹកតាមម៉ូតូទៅមន្ទីរពេទ្យព្រះកុសុមៈ (មន្ទីរពេទ្យលោក សង្ឃ) ដើម្បីសង្គ្រោះបន្ទាន់ដែរ តែជាអកុសលជនរងគ្រោះបានដាច់ខ្យល់ ស្លាប់ បាត់ទៅហើយ ។

ចំពោះមុខជំនាញខណ្ឌប៉ុស្តិ៍បានសហការជាមួយការិយាល័យបច្ចេកទេសវិទ្យាសាស្ត្រ បាន ពិនត្យសាកសព បញ្ជាក់ថា ពិតបានឆក់ដោយចរន្តអគិ្គសនីស្លាប់ប្រាកដមែន រួចប្រគល់សព ទៅ អោយក្រុមគ្រួសារ យកទៅធ្វើបុណ្យតាមគន្លងប្រពៃណីនៅកំណើត ស្ថិតនៅស្រុកបារាយ៍ ខេត្ត កំពង់ធំ ៕

ភ្លៀង និងខ្យល់កន្ត្រាក់បោករំលំដើមឈើនិងប៉ាណូ៣ផ្ទាំង នៅក្រុងភ្នំពេញ

June 9, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ ភ្លៀងលាយលំនឹងខ្យល់កន្ត្រាក់បណ្តាលឲ្យបាក់មែកឈើដ៏ធំសង្កត់លើម៉ូតូអ្នកដំណើរ និងម៉ូតូសណ្តោងរ៉ឺម៉កបណ្តាលឲ្យបុរសម្នាក់រងរបួស។ហេតុការណ៍នេះបានកើតឡើងកាលពីម៉ោងជាង១រសៀល ថ្ងៃទី០៩ ខែមិថុនា ឆ្នាំ២០១៨ នៅតាមបណ្តោយផ្លូវលេខ ១៦៩ ខាងមុខវិទ្យាល័យបាក់ទូក ស្ថិតក្នុងសង្កាត់វាលវង់ ខណ្ឌ៧មករា។

ប្រភពពត៌មាននៅកន្លែងកើតហេតុបានឲ្យដឹងថា មុនពេលកើតហេតុគឺមានម៉ូតូសណ្តោងរ៉ឺម៉ងលក់ភេសជ្ជៈនៅចតលក់នៅខាងក្រោមដើមអំពិលបារាំងដ៏ធំមួយដើនៅខាងមុខវិទ្យាល័យបាក់ទូក ហើយក៏មានអ្នកធ្វើដំណើរជាច្រើនផងដែរ ខណៈមេឃភ្លៀងមួយមេលាយលំនឹងខ្យល់កន្ត្រាក់ បណ្តាលឲ្យមែកដើមអំពិលបារាំដ៏ធំមួយដើមនេះរលំសង្កត់ពីលើម៉ូតូសណ្តោងរ៉ឺម៉កលក់ភេសជ្ជៈ៣គ្រឿង និងម៉ូតូអ្នកធ្វើដំណើរមួយគ្រឿងបណ្តាលឲ្យបុរសម្នាក់រងរបួសធ្ងន់ ត្រូវបានរថយន្តសង្គ្រោះដឹកទៅព្យាបាលនៅមន្ទីរពេទ្យ។ បន្ទាប់ពីកើតហេតុហើយភ្លៀងបានរាំង សមត្ថកិច្ចមូលដ្ឋានបានចុះមកកន្លែងកើតហេតុដើម្បីជួយសម្រួលចរាចរ ហើយទាក់ទងទៅខាងមន្ទីរសាធារណៈការមកកាត់យកមែកឈើចេញកុំឲ្យមានការកកស្ទះចរាចរនៅតំបន់នេះ និងយកម៉ូតូជនរងគ្រោះទៅរក្សាទុកនៅអធិការដ្ឋាននគរបាលខណ្ឌ៧មករា។

ជាមួយគ្នានោះដែរ នៅខណ្ឌដូនពេញ ក៏មានករណីបាក់ប៉ាណូ សង្កត់លើម៉ូតូ១គ្រឿង ម៉ាកសងើកូរ៉េផង ដែរសំណាងល្អមិនបង្កអោយមានអ្នករបួសឡើយ ហេតុការណ៍នេះកើតឡើងនៅតាមបណ្ដោយផ្លូវព្រះស៉ីសុវត្ថិចំណុចក្បែរប៉ុស្តិ៍ចតុមុខ ខណ្ឌដូនពេញ។និងមួយករណីទៀត ប៉ាន់ណូបានបាក់ធ្លាក់ចុះដីសង្កាត់រថយន្ត១គ្រឿង នៅចំណុច សកលវិទ្យាល័យពាណិជ្ចសាស្ត្រជិតផ្សារស្ទឹងមានជ័យថ្មីផងដែរ៕

ប្រយ័ត្ន ! រកឃើញគ្រឿងសម្អាងក្លែងក្លាយជាង១តោននៅស្ទឹងមានជ័យ

June 9, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ គ្រឿងសម្អាងជាច្រើនប្រភេទ ចំនួនជាងមួយតោន ត្រូវបានសមត្ថកិច្ចចម្រុះរក ឃើញនៅទីតាំងមួយកន្លែងនៅក្នុងសង្កាត់ស្ទឹងមានជ័យ ខណ្ឌមានជ័យ និងត្រូវបានសមត្ថកិច្ច តុលាការបញ្ជាឲ្យដកហូតជាបណ្តោះអាសន្ន ដើម្បីទុកសម្រាប់ជាវត្ថុតាងបន្តនីតិវិធី បន្ថែមទៀត។

ករណីចុះត្រួតពិនិត្យ និងដកហូតផលិតផលគ្រឿងសម្អាងខាងលើនេះ ត្រូវបានធ្វើឡើង ដោយកម្លាំងសមត្ថកិច្ចចម្រុះ រួមមានកម្លាំងនគរបាលប្រឆាំងបទល្មើសសេដ្ឋកិច្ច សហការ ជាមួយ មន្ត្រីសុខាភិបាល សាខាកាំកុងត្រូល និងអាជ្ញាធរមូលដ្ឋាន បានទៅដល់ទីតាំងវេចខ្ចប់និងចែកចាយ ផលិតផលគ្រឿងសម្អាងគ្មានច្បាប់អនុញ្ញាត១កន្លែង ស្ថិតនៅតាមផ្លូវវេងស្រេង សង្កាត់ ស្ទឹងមាន ជ័យ១ ខណ្ឌមានជ័យ ដោយបានរកឃើញគ្រឿង សម្អាងក្លែងក្លាយជាង ១ពាន់ គីឡូក្រាម។

មន្ត្រីនគរបាលក្នុងប្រតិបត្តិការបានបញ្ជាក់ថា ការចុះត្រួតពិនិត្យរកបទល្មើសនេះ ធ្វើឡើង ក្រោមការបញ្ជាផ្ទាល់ពីលោកឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំង បទល្មើសសេដ្ឋកិច្ច នៃក្រសួងមហាផ្ទៃ និងក្រោមការសម្របសម្រួលនីតិវិធីពីលោក ហ៊ឹង ប៊ុនថន ព្រះរាជអាជ្ញារងអមសាលាដំបូងរាជធានីភ្នំពេញ។

មន្ត្រីដដែលបានបន្តថា ក្នុងប្រតិបត្តិការនេះ កម្លាំងសមត្ថកិច្ចបានរកឃើញថា ទីតាំងវេចខ្ចប់ និងចែកចាយផលិតផលគ្រឿងសម្អាងមួយនេះ ពុំមានច្បាប់អនុញ្ញាតពីក្រសួងស្ថាប័នពាក់ព័ន្ធនោះ ឡើយ ក្នុងនោះវត្ថុតាងគ្រឿងសម្អាងចម្រុះដែលលាយរួច សំបកវេចខ្ចប់ វត្ថុធាតុផ្សំសម្រាប់លាយ ចេញជាគ្រឿងសម្អាង និងគ្រឿងសម្អាងចម្រុះជាច្រើនប្រភេទសរុប ១,១៤៣គីឡូក្រាម។

ក្រោយត្រួតពិនិត្យក្នុងទីតាំងខាងលើរួចហើយ លោកព្រះរាជអាជ្ញារង ហ៊ឹង ប៊ុនថន បានបញ្ជា ឱ្យកម្លាំងសមត្ថកិច្ចដកហូតវត្ថុតាងទាំងអស់យកទៅរក្សាទុកនៅនាយកដ្ឋាននគរបាលប្រឆាំងបទល្មើសសេដ្ឋកិច្ច និងបាននាំម្ចាស់ទីតាំងឈ្មោះ គឹម ហ៊ង ភេទស្រី អាយុ២៤ឆ្នាំ មកសាកសួរបំភ្លឺ នៅ នាយកដ្ឋានដើម្បីបន្តនីតិវិធី។

សូមជម្រាបថា ពាក់ព័ន្ធនឹងករណីនេះ សមត្ថកិច្ចជំនាញ តែងបានធ្វើការផ្សព្វផ្សាយក្រើន រំលឹកជាបន្តបន្ទាប់ចំពោះប្រជាពលរដ្ឋ ពិសេសចំពោះបងប្អូនស្ត្រីដែលនិយមប្រើប្រាស់គ្រឿង សម្អាងឲ្យមានការប្រុងប្រយ័ត្ន រាល់ការប្រើប្រាស់ផលិតផលគ្រឿងសម្អាង ដែលគ្មានបញ្ជាក់ពី ប្រភព ច្បាស់លាស់ ដែលបង្កផលប៉ះពាល់ដល់សុខភាព៕

ស្ថានីយផលិតទឹកពិសា O-We ៥កន្លែង ក្រោមជំនួយអាមេរិក សម្ពោធដាក់ឲ្យប្រើប្រាស់

June 9, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ពោធិ៍សាត់ ៖ ស្ថានីយ៍ផលិតទឹកស្អាត O-We ៥កន្លែង ក្នុងខេត្តពោធិ៍សាត់ត្រូវបាន សម្ពោធ ដាក់ឲ្យប្រើប្រាស់ដើម្បី ផ្គត់ផ្គង់ទឹកស្អាតជូនប្រជាពលរដ្ឋ ។

ស្ថានីយ៍ផលិតទឹកស្អាតទាំង៥ កន្លែងនេះជាគម្រោង (World Fish) ក្រោមជំនួយថវិកាពី (Feed the future) និងទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិហៅកាត់ថា យូ. អេស.អេ.អាយ.ឌី (USAID) តាមរយៈអង្គការ (World Fish) និងអនុវត្តដោយអង្គការ ទឹកស្អាត ១០០១។

ស្ថានីយ៍ផលិតទឹកស្អាតទាំង៥នោះរួមមាន៖ នៅស្រុកក្រគរ១កន្លែង ស្រុកបាកាន២កន្លែង និង ស្រុកភ្នំក្រវាញ២កន្លែង។ ពិធីនេះប្រារព្ធឡើងកាលពីម្សិលម៉ិញនេះ នៅបរិវេណដីវាល ស្ថិត ក្នុងភូមិបឹងព្រះពន្លៃ ឃុំ ផ្ទះរុង ស្រុកភ្នំក្រវាញ ខេត្តពោធិ៍សាត់ ។

លោក Frederic នាយកអង្គការទឹកស្អាត១០០១, មានប្រសាសន៍ថាស្ថានីយ៍ទឹកស្អាត ទាំង៥ កន្លែងនេះ ជាផ្នែកមួយនៃគម្រោងធនធានជលផលតាមវាលស្រែ នៃកម្មវិធីសន្តិសុខស្បៀង សម្រាប់អនាគតដំណាក់កាលទី២ ដែលផ្តោតការយកចិត្តទុកដាក់ លើការបង្កើនការផ្គត់ផ្គង់ ត្រីល្អប្រសើរជាងមុន មានជីវៈជាតិ និងអាហាររូបត្ថម្ភ ដល់មនុស្សជាង ៩ម៉ឺននាក់។

អង្គការទឹកស្អាត១០០១ ដែលមានឯកទេស ក្នុងការផ្គត់ផ្គង់ទឹកស្អាត នឹងគ្រោងបង្កើតស្ថានីយ៍ ទឹកស្អាត១០កន្លែងបន្ថែមទៀត លើខេត្តគោលដៅចំនួន៣ នាពេលអនាគត។

អភិបាលរងស្រុកភ្នំក្រវាញលោក ឈាន វាសនា បានថ្លែងអំណរគុណចំពោះម្ចាស់ជំនួយ និង អង្គការដៃគូទាំងអស់ ដែលបានអនុវត្តគម្រោង និងផ្តល់ជំនួយជាសម្ភារៈ វគ្គបណ្តុះបណ្តាល ជំនាញ បង្កើតមុខរបរក្នុងសហគមន៍ ព្រមទាំងសំណូមពរឲ្យបន្តសហការពង្រីក ស្ថានីយ បន្ថែមនៅឃុំព្រងិល ឃុំសន្ទ្រែ ឃុំសំរោង និងឃុំអង្គ្រង ក្នុងស្រុកភ្នំក្រវាញ បន្ថែមទៀតដើម្បីជា ប្រយោជន៍ដល់សហគមន៍ ប្រជាពលរដ្ឋ ព្រមទាំងបានអំពាវនាវ ឲ្យប្រជាពលរដ្ឋចូលរួមថែ រក្សាសមិទ្ធផលនេះ ឲ្យបាន គង់វង់យូរអង្វែងនិងចូលរួមទប់ស្កាត់ការបំផ្លាញប្រភពទឹកដើម្បី ផលប្រយោជន៍កូនចៅយើង ទាំងអស់គ្នាទៅថ្ងៃអនាគត៕

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន អញ្ជើញត្បាញក្រមាវែងជាងគេលើពិភពលោក

June 9, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា អមដោយមន្ត្រីកាកបាទក្រហមកម្ពុជាជាច្រើនរូប នៅវេលាម៉ោង៩ ៖ ០០ព្រឹក ថ្ងៃទី០៩ ខែមិថុនា ឆ្នាំ២០១៨ បាន អញ្ជើញចូលរួមត្បាញក្រមាក្រឡាវែងជាងគេនៅលើកពិភពលោក ដែលរៀបចំនៅលើសួនច្បារព្រះមេរុមុខសារៈមន្ទីរជាតិ ជាប់ព្រះបរមរាជវាំង។

សូមជម្រាបថា យុវជនកម្ពុជាដឹកនាំដោយសហភាពសហព័ន្ធកម្ពុជាក្រោមចលនា «GOGO CAMBODIA» បានរួមគ្នាបង្កើតព្រឹត្តិការណ៍ត្បាញក្រមាវែងជាងគេនៅលើពិភពលោកប្រវែង១០០០ម៉ែត្រ ក្រោមប្រធានបទថា «ជឿថាខ្ញុំធ្វើបាន ជឿថាយើងធ្វើបាន ជឿថាខ្មែរធ្វើបាន»។ ដើម្បីឈានទៅ «បំបែកឯតទកគ្គកម្ម ក្រមាវែងជាងគេលើពិភពលោក» ត្រូវបានបើកធ្វើឡើងជាផ្លូវការកាលពីថ្ងៃទី១៤ ខែកុម្ភៈ ឆ្នាំ២០១៨ ។

នៅព្រឹកថ្ងៃតី៩ ខែមិថុនា នេះ គឺជាលើកទី២ ហើយ ដែលសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានអញ្ជើញចូលរួមត្បាញក្រមាវែងជាងគេលើកពិភពលោក ដែលកិទមកដល់បច្ចុប្បន្ន នេះ សម្តេចកិត្តិព្រឹទ្ធបណ្ឌិត បានអញ្ជើញត្បាញក្រមាដល់ក្រឡាប្រវែង ១.០១១,៧៨ម៉ែត្រ ហើយ។
ក្រមា គឺជាអត្តសញ្ញាណជាតិខ្មែរ ជារបស់ប្រើប្រាស់សម្រាប់ប្រជាពលរដ្ឋខ្មែរគ្រប់និន្នាការ ឋានៈ សង្គម និងសាសនា។ ប្រជាជនខ្មែរគ្រប់រូបសុទ្ធតែស្គាល់ និងប្រើប្រាស់ក្រមាក្នុងជីវភាពប្រចាំថ្ងៃ ហើយវាជារឿងរ៉ាវជីវិត និងប្រវត្តិសាស្ត្រប្រជាជនខ្មែរដែលបានចារឹកជាប់នឹងសរសៃអំបោះ នីមួយៗនៃក្រមា។

ការបង្កើតយុទ្ធនាការត្បាញក្រមាវែងជាងគេនេះ មានគោលបំណងសំខាន់ៗចំនួន៣ រួមមាន ៖ លើកកម្ពស់មោទនភាពជាតិ និងកិត្យានុភាពជាតិនៅលើឆាកអន្តរជាតិ, បង្កើតការចូលរួមចំណែក ពីប្រជាជនកម្ពុជាគ្រប់មជ្ឈដ្ឋានទាំងអស់ ដើម្បីរួមគ្នាថែរក្សា និងលើកស្ទួយមត៌កវប្បធម៌ ប្រពៃណី ខ្មែរ និងជំរុញឲ្យមានសាមគ្គីភាព និងឯកភាពជាតិតាមរយៈ ការរួមគ្នាបង្កើតស្នាដៃដ៏ធំ សម្រាប់ជាតិ

សូមរំលឹកថា ព្រឹត្តិការណ៍ត្បាញក្រមាវែងជាងគេ បានអនុញ្ញាតឲ្យប្រជាពលរដ្ឋខ្មែរគ្រប់រូប ចូលរួមត្បាញក្រមាដោយសេរីចាប់ពីម៉ោង ៨ព្រឹកដល់ម៉ោង៩យប់ ដែលរហូតមកដល់ពេលនេះ មានប្រជាពលរដ្ឋចូលរួមត្បាញរាប់ម៉ឺននាក់ផងដែរ៕

ហ្វីលីពីន បើកសម្ពោធព្រលានយន្តហោះថ្មី ក្នុងក្រុងសេប៊ូ

June 9, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ហ្វីលីពីន ៖ ប្រធានាធិបតីហ្វីលីពីន លោក រ៉ូទ្រីហ្គោឌូទឺតេ បានបើកសម្ពោធស្ថានីយព្រលាន យន្តហោះ ថ្មី ក្នុងខេត្ត សេប៊ូ ភាគកណ្តាលប្រទេសហ្វីលីពីន។ លោកឌូទឺតេ និយាយថា ស្ថានីយ៏ព្រលានយន្តហោះ អន្តរជាតិម៉ាតាន សេប៊ូ ២ និងផ្តល់ឲ្យខេត្ត សេប៊ូ នូវការចែក រំលែកដ៏ប្រសើរ នៃទីផ្សារទេស ចរណ៏ប្រទេសហ្វីលីពីន។ លោកឌូទឺតេ និយាយថា ចំណតថ្មីនេះ ការរចនាក្បូក្បាច់ រៀបចំដោយវិចិត្រករក្នុងស្រុក ប៉ុន្តែស្នាដៃឯកនេះនឹងមិន ត្រឹមតែបន្ថែមលើតម្លៃនៃសាភ័ណភាពសំណង់នោះទេ តែថែមទាំងបង្ហាញដល់ពិភព លោកនូវអារម្មណ៍កក់ក្តៅនិងការស្វាគមន៏របស់យើងក៏ដូចជាបេតិកភណ្ឌវប្បធម៌ដ៏សម្បូរបែប របស់យើង ចំណតថ្មីនេះក៏នឹងលើកកម្ពស់វិស័យទេសចរណ៍ជំរុញពាណិជ្ជកម្ម និងជំរុញសកម្មភាពសេដ្ឋកិច្ចនៅក្នុងតំបន់ Visayas ។

គម្រោងនេះនឹងក្លាយជាកាតាលីករ សម្រាប់ការអភិវឌ្ឍន៍ នៅក្នុងតំបន់ផងដែរ។ លោក ឌូទឺតេ និយាយថារដ្ឋបាលរបស់ លោក និងសាងសង់ព្រលានយន្តហោះ បន្ថែមទៀត និងគំរោងហេត្ថារចនាសម្ព័ន្ធផ្សេងៗ ឆ្លងកាត់ប្រជុំកោះ ជាផ្នែកមួយនៃ កម្មវិធីក៏សាងដ៏មានមហិច្ឆិតា។ នេះគឺតំណាងឲ្យ ការប្តេ ជ្ញាចិត្តរបស់យើង ក្នុងការលើកកម្ពស់ ភាពចល័ត និងទំនាក់ទំនង ដូច្នេះយើងអាចផ្តល់ ការដឹកជញ្ជូន ដែលអាចទុកចិត្តបាន សមរម្យ និងសុវត្ថិភាពសំរាប់ប្រជាជន និងការឆ្លង កាត់ ដ៏ប្រសើរ នៅតាមប្រជុំកោះ។ អ្នកនាំពាក្យប្រធានាធិបតីលោក Harry Roque បាន និយាយថាព្រលានយន្តហោះថ្មីនេះមានទំហំប្រមាណ 65,500 ម៉ែត្រការ៉េត្រូវបានរចនា ឡើងដើម្បីកាត់បន្ថយចរាចរណ៍ផ្លូវអាកាសនៅខេត្តសេប៊ូ។ ខេត្ត Cebu ដែនដីកោះគឺជា គោលដៅទេសចរណ៍កំពូលសម្រាប់អ្នកទេសចរក្នុងនិងក្រៅស្រុកដោយសារអាកាសធាតុដ៏ស្រស់ស្អាត ឆ្នេរដ៏ស្អាត ទឹកថ្លាគ្រីស្តាល់ រមណីយដ្ឋានប្រណីត ផ្សារទំនើប កាស៊ីណូ និងសួនច្បារ៕

រថយន្តរីវ៉ូ បើកបុកក្បាលព្រួញពុះចែកទ្រូងផ្លូវក្រឡាប់ផ្ងារជើង

June 9, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ បុរសម្នាក់ទំនងស្រវឹងស្រារបើកបររថយន្តមួយគ្រឿងក្នុងល្បឿនយ៉ាងលឿនរួចក៏ ចង្កូត ទៅបុកក្បាលព្រួញពុះចែកទ្រូងផ្លូវ បាក់វាចអស់មួយកង់ ចំណែកឯរថយន្តក្រឡាប់ផ្ងារជើង ទៅមុខលែងរួច។

ហេតុការណ៍នេះបង្កឲ្យមានការភ្ញាក់ផ្អើលឡើងកាលពីវេលាម៉ោង៩និង១០នាទីយប់ ថ្ងៃទី៨ ខែមិថុនា ឆ្នាំ២០១៨ត្រង់ចំណុចខាងត្បូងមន្ទីរពេទ្យព្រះកុសុមៈប្រមាណ១០០ម៉ែត្រ តាមបណ្តោយ ផ្លូវ២៧១ ស្ថិតក្នុងសង្កាត់ទឹកថ្លា ខណ្ឌសែនសុខ។

តាមប្រភពព័ត៌មានពីកន្លែងកើតហេតុបានឲ្យដឹងថានៅមុនពេលកើតហេតុ គេឃើញបុរស ម្នាក់ បើកបររថយន្តសេរីទំនើបមួយគ្រឿងម៉ាក តូយូតារីវ៉ូ ពណ៌ស ពាក់ស្លាកលេខ ភ្នំពេញ2AL-0581 ដោយធ្វើដំណើរតាមបណ្តោយផ្លូវ២៧១ ក្និងទិសដៅពីជើងទៅត្បូង និងក្នុងល្បឿនយ៉ាងលឿន។

លុះមកដល់ចំណុចកើតហេតុរថយន្តបង្កខាងលើស្រាប់រេចង្កូតទៅខាងឆ្វេងទៅបុកក្បាលព្រួញពុះចែកទ្រូងផ្លូវយ៉ាងពេញទំហឹងបណ្តាលអោយក្បាលព្រួញពុះចែកទ្រូងផ្លូវបាក់វាចអស់មួយកង់ ចំណែកឯរថយន្តបង្កបានក្រឡាប់ផ្ងារជើងទៅមុខលែងរួចជាប់អ្នកបើកបរនៅក្នុងរថយន្ត។

ភ្លាមៗនោះក៏មានប្រជាពលរដ្ឋដែលនៅក្បែរកន្លែងកើតហេតុបាននាំគ្នាវាយបំបែកកញ្ចក់រថយន្តដើម្បីយកអ្នកបើកបរចេញមកខាងក្រៅ បន្ទាប់មកអ្នកបើករថយន្តបង្ក ត្រូវបានបក្សពួកនាំខ្លួន គេច ចេញពីកន្លែងកើតហេតុបាត់បន្សល់ទុកតែរថយន្តនៅកន្លែងកើតហេតុ។

ក្រោយពេលកើតហេតុសមត្ថកិច្ចមូលដ្ឋានបានចុះមកដល់ចំណុចកើតហេតុហើយបានធ្វើការទាក់ទងទៅសមត្ថកិច្ចជំនាញឲ្យចុះមកធ្វើការស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋានរាជធានីភ្នំពេញដើម្បីរងចាំម្ចាស់ចូលខ្លួនមកធ្វើការដោះស្រាយទៅតាមផ្លូវច្បាប់៕

ព្រះបរមរាជវាំង បកស្រាយរឿងដែលថាព្រះរាជសារព្រះមហាក្សត្រក្លែងក្លាយ

June 9, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ ក្រសួងព្រះបរមរាជវាំងបញ្ជាក់ថា ព្រះរាជសាររបស់ព្រះមហាក្សត្រ មិនមានការក្លែងក្លាយ និងមិនមានការគំរាមកំហែងឡើយ គឺជាព្រះរាជសារពិតប្រាកដ។

សេចក្ដីប្រកាសនេះ ធ្វើឡើងបន្ទាប់ពីមានជនមួយចំនួនបានចោទប្រកាន់ថា មានការក្លែងព្រះរាជសាររបស់ព្រះមហាក្សត្រ ដែលបានចុះកាលពីថ្ងៃទី១៨ ខែឧសភា ឆ្នាំ២០១៨ ពាក់ព័ន្ធនឹងការអំពាវនាវឲ្យប្រជាជនកម្ពុជាទៅចូលរួមបោះឆ្នោតជ្រើសតាំងតំណាងរាស្ត្រ នីតិកាលទី៦ ថ្ងៃទី២៩ កក្កដា ២០១៨ខាងមុខ។

ដ្បិតមិនសំដៅចំៗទៅកាន់បុគ្គលណាក្តី តែសេចក្តីប្រកាសព័ត៌មានរបស់ក្រសួងព្រះបរមរាជវាំង គឺធ្វើឡើងក្រោយពីលោក សម រង្ស៊ី អតីតប្រធានគណបក្សសង្គ្រោះជាតិ ដែលកំពុងនិរទេស បានសរសេរសារលើទំព័រហ្វេសប៊ុក ដោយអះអាងថា ព្រះរាជសាររបស់ព្រះមហាក្សត្រ គឺជាព្រះរាជសារក្លែងក្លាយ។ លោក ថែមទាំងបកស្រាយថា ទោះជាព្រះរាជសារ ជាការពិតក៏ដោយ ក៏ធ្វើឡើងក្រោមការគំរាមកំហែងដែរ៕

អ្នកស្លាប់ដោយសារផ្ទុះភ្នំភ្លើងនៅ កាតេម៉ាឡា ឡើងដល់ ១០៩នាក់

June 8, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

មន្ត្រីនិយាយថា មកដល់ពេលនេះ យ៉ាងហោចណាស់ មនុស្ស១០៩នាក់ បានស្លាប់ និងជិត ៣០០នាក់ទៀត រងរបួស ដោយការផ្ទុះឡើងដ៏ខ្លាំង ភ្នំភ្លើង ហ្វូហ្គោ ប្រទេសកាតេម៉ាឡា ដែលជាការផ្ទុះចុងក្រោយ អស់រយៈពេលជាង៤ទសវត្សន៏មកនេះ។

ភ្នំភ្លើងហ្វូហ្គោ បានព្រួសកំអែរ ដ៏ក្តៅ ចេញពីមាត់ភ្នំភ្លើង និងបានព្រួសចេញផ្សែងខ្មៅខ្មួល ខ្មាញ់ និងផេះ ធ្លាក់ចូលទៅក្នុងរដ្ឋធានី និងតំបន់ជាច្រើន។ មានសាកសពឆេះរោល របស់ជន រងគ្រោះ ខណៈក្រុមអ្នកសង្គ្រោះ ប្រមូលសាកសព ក្នុងប្រតិបត្តិការសង្គ្រោះ។ អគ្គលេខា ធិកា ទីភ្នាក់ងារគ្រប់គ្រងគ្រោះមហន្តរាយជាតិ ប្រទេសហ្គាតតេម៉ាឡា និយាយ ថា លំហូរ កំអែរភ្នំភ្លើង បានហូហៀលើច្រាំងទន្លេ ដែលធ្វើឲ្យប៉ះពាល់ដល់ភូមិ អែលរ៉ូដេអូ ដែល បានធ្វើឲ្យមានមនុស្សស្លាប់ និងរងរបួស។ កំអែរភ្នំភ្លើងដ៏ក្តៅ បានហូរចូលមកលើផ្លូវ ក្នុងភូមិមួយ ខណៈក្រុមសង្គ្រោះបន្ទាន់ ព្យាយាមចូលទៅតាមខ្នងផ្ទះ ដើម្បីស្វែងរក ប្រជាជនជាប់នៅក្នុងផ្ទះ។ អាជ្ញាធរអាកាសចរណ៏ស៊ីវិល ប្រទេសហ្គាតេម៉ាឡា និយាយថា ការផ្ទុះភ្នំភ្លើង បានបង្ខំឲ្យ ព្រលានយន្តហោះ អន្តរជាតិ ឡាអូរ៉ូរ៉ា ក្នុងទីក្រុង ប្រទេសហ្គា តេម៉ាឡា បិទជើងហោះហើររបស់ខ្លួន ដោយសារតែផេះភ្នំភ្លើង និងដើម្បីធានាពីសុវត្ថិភាព របស់អ្នកដំណើរ និងយន្តហោះ៕

ចំណាយផ្នែកការពារជាតិរបស់អង្គការណាតូនឹងកើនឡើងក្នុងឆ្នាំនេះ

June 8, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

Nato ៖ រដ្ឋមន្ត្រីក្រសួងការពារជាតិអង្គការណាតូ បានជួបពិភក្សា ជុំវិញផែនការចុងក្រោយបង្អស់ ដើម្បីទប់ទល់នឹងប្រទេសរុស្ស៊ី ខណៈពេលមានការខកចិត្ត ចំពោះការតម្លើងពន្ធលើដែកថែប និង អាលុយមីញ៉ូម ដែលប្រធានាធិបតីអាមេរិក លោក ដូណាល់ ត្រាំ អះអាងលើមូលដ្ឋានសន្តិសុខជាតិ។

នៅកិច្ចប្រជុំលើកដំបូង នៅការិយាល័យថ្មីរបស់អង្គការណាតូ លោក ជេន ស្តូធេនបឺក អគ្គលេ ខាធិការអង្គការ បានបង្ហាញពីការប៉ាន់ប្រមាណពីការចំណាយខ្ពស់ សម្រាប់អង្គការណាតូ ក្នុងឆ្នាំ 2018 ទៅកាន់រដ្ឋមន្ត្រីការពារជាតិ។

លោកស្តូធេនប៊ឺក បានប្រាប់ក្រុមអ្នកយកព័ត៌មានថា ការចំណាយរបស់រដ្ឋាភិបាលអឺរ៉ុប តួរគី និងកាណាដា ត្រូវបានគេរំពឹងថា នឹងកើនឡើង 3.82 ភាគរយ នៅក្នុងឆ្នាំ 2018 ជាការកើនឡើង ៤ឆ្នាំជាប់គ្នា និងមានន័យថាមានកើនឡើងជាទឹកប្រាក់ចំនួន 87.3 ពាន់លានដុល្លារ ចាប់តាំងពីឆ្នាំ 2015 ។

ប៉ុន្តែប្រេសិត របស់លោកត្រាំ ប្រចាំអង្គការណាតូ បានព្រមានមុនកិច្ចប្រជុំថាបញ្ហាចំណាយនៅតែជាចំណុចដ៏សំខាន់ សម្រាប់ប្រធានាធិបតី។ គួរបញ្ជាក់ថា បន្ទាប់ពីការបញ្ចូលរបស់ប្រទេសរុស្ស៊ី នូវតំបន់គ្រីមៀ ក្នុងឆ្នាំ 2014 មេដឹកនាំអង្គការណាតូបានសន្យាបង្កើនការចំណាយផ្នែកការពារជាតិ ដល់ 2 ភាគរយ នៃទិន្នផលសេដ្ឋកិច្ច ត្រឹមឆ្នាំ 2024 ៕