រាជធានីភ្នំពេញ ៖ នៅវេលាម៉ោង០៩ព្រឹកថ្ងៃទី៣០ ខែសីហា ឆ្នាំ២០១៧នេះ កម្មការិនីនៅក្នុងរោងចក្រ «ប៊ីរី» ស្ថិតក្នុងភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យជាង៣០នាក់បានដួលសន្លប់ជាបន្ដបន្ទាប់ដោយមិនដឹងមូលហេតុ។
ប៉ុន្ដែទោះជាយ៉ាងណាកម្មការិនីទាំងអស់នោះត្រូវបានបញ្ជូនទៅសង្គ្រោះនៅឃ្លីនីកឯកជន និងខ្លះទៀតបញ្ជូនទៅសង្គ្រោះនៅមន្ទីរពេទ្យផងដែរ៕
តូក្យូ ៖ លោក Itsunori Onodera រដ្ឋមន្ត្រីការពារជាតិជប៉ុនបានអះអាងថា មីស៊ីលផ្លោងដែលកូរ៉េខាងជើងបាញ់សាកល្បងរំលងពីលើប្រទេសជប៉ុនកាលពីព្រឹកម្សិលមិញអាចរត់ដល់កោះហ្គាំ ដែលជាទឹកដីរបស់សហរដ្ឋអាមេរិកបានយ៉ាងងាយ។ នេះបើតាមការចេញផ្សាយដោយសារព័ត៌មានរុស្ស៊ី Sputnik។
លោក Onodera បន្តថា ប្រភេទរបស់មីស៊ីលដែលត្រូវបានបាញ់ដោយទីក្រុងព្យុងយ៉ាងកាលពីព្រឹកថ្ងៃអង្គារនោះមានសក្តានុពលដែលអាចហោះបានឆ្ងាយរហូតដល់កោះហ្គាំរបស់សហរដ្ឋអាមេរិក ដែលស្ថិតនៅភាគខាងលិចមហាសមុទ្រប៉ាស៊ីហ្វិក ដោយសារចម្ងាយរត់របស់មីស៊ីលនេះ អាចដល់៥,០០០គីឡូម៉ែត្រ ដូច្នេះហើយវាជាក់ច្បាស់ណាស់ថា វាគឺជាប្រភេទ មីស៊ីលដែលអាចរត់ដល់កោះហ្គាំ។ លោកបញ្ជាក់ថា មីស៊ីលកូរ៉េខាងជើងដែលទើបសាកល្បងមួយគ្រាប់នេះ ទំនងជាប្រភេទ Hawsong-12 ដែលមានរយៈចម្ងាយចន្លោះពី៣,៧០០គីឡូម៉ែត្រដល់៦,០០០គីឡូម៉ែត្រ ខណៈកោះហ្គាំរបស់សហរដ្ឋអាមេរិក ស្ថិតនៅចម្ងាយតែ៣,៤៣០គីឡូម៉ែត្រប៉ុណ្ណោះ ពីប្រទេសកូរ៉េខាងជើង
គួររម្លឹកថា កាលព្រឹកថ្ងៃអង្គារនេះ កូរ៉េខាងជើងបានបាញ់សាកល្បងមីស៊ីលផ្លោង០១គ្រាប់ ដែលបានហោះរំលងប្រទេសជប៉ុន មុនធ្លាក់ចូលទៅក្នុងមហាសាគរ ប៉ាស៊ីហ្វិកនៅចម្ងាយ១,១៨០គីឡូម៉ែត្រ ភាគខាងកើតកោះហុកកៃដូ ហើយធ្វើដំណើរបានជាង២,៧០០គីឡូម៉ែត្រ៕
ភ្នំពេញ ៖ ដើម្បីការងារ កម្ពុជាត្រូវបន្តកិច្ចខិតខំប្រឹងប្រែងការពារផលប្រយោជន៍ និងសិទ្ធរបស់បងប្អូនកម្មករ និយោជិត ដោយចេះស្រលាញ់គ្នា ទុកដូចជាបងប្អូន ជួយការពារ ថែទាំពួកគាត់ឱ្យបានល្អបំផុត តាមតែអាចធ្វើទៅបាន។
ការផ្តាំផ្ញើនេះបានធ្វើឡើងក្នុងពេល ដែលលោក ឃួង ស្រេង បានអនុញ្ញាតិឱ្យក្រុមការងារ សហភាពស្មារតី យុវជន ដើម្បីការងារកម្ពុជា ដឹកនាំដោយ លោក មុំ សៀក ប្រធានសហភាពស្មារតី យុវជន ដើម្បីការងារកម្ពុជា ចូលជួបសំដែងការគួសម និងពិភាក្សាការងារកាលពីរសៀលថ្ងៃទី២៩សីហានេះ នៅសាលារាជធានីភ្នំពេញ ។
នៅក្នុងជំនួបនោះលោកអភិបាល បានលើកឡើងពីការខិតខំប្រឹងប្រែងអភិវឌ្ឍរាជធានីភ្នំពេញ ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្តេច តេជោ ហ៊ុន សែន នាយករដ្ឋមន្រ្តី តាមរយៈការបង្ខិតសេវាសាធារណៈឱ្យទៅគៀក ជាមួយប្រជាពលរដ្ឋ និងទីកន្លែងធ្វើការ ដោយជួយបំពេញតម្រូវការគ្រប់បែបយ៉ាង ធ្វើយ៉ាងដើម្បីកាត់បន្ថយភាពក្រីក្រជូនប្រជាពលរដ្ឋ។
រដ្ឋបាលរាជធានីភ្នំពេញ បានចូលរួមយ៉ាងសកម្ម ក្នុងការអភិវឌ្ឍហេដ្ឋរចនាសម្ព័ន្ធ និងការការពារ សុខដុមនីយកម្ម រក្សាសុវត្ថិភាពសណ្តាប់ធ្នាប់សាធារណៈ របស់រាជធានីភ្នំពេញ ក៏ដូចជាគ្រប់គ្រងនូវរាល់សភាពការមួយចំនួនដែលបានកើតឡើង បានល្អប្រសើរ ដោយទទួលបានការសាទរ ពីប្រជាពលរដ្ឋក្នុងរាជធានីទាំងមូល។
លោក មុំ សៀក ប្រធានសហភាពស្មារតីយុវជន ដើម្បីការងារកម្ពុជា បានថ្លែងឱ្យដឹងនៅក្រោយជំនួបនោះថា ថ្ងៃនេះក្នុងនាមថ្នាក់ដឹកនាំ សហភាព ស្មារតី យុវជន ដើម្បីការងារកម្ពុជា ក៏ដូចជាក្នុងមានកម្មករ កម្មការិនី ជាង៩ម៉ឺននាក់ ដែលជាសមាជិករបស់ខ្លួនមកសម្តែងការអបអរសាទរ និងអរគុណចំពោះរដ្ឋបាលរាជធានីភ្នំពេញ ដែលកន្លងមកតែងតែបានដាក់ក្រុមការងារ ចុះទៅជួយអន្តរាគមន៍ និងដោះស្រាយនូវរាល់បញ្ហា ដែលកើតមានឡើង នៅតាមបណ្តារោងចក្រសហគ្រាសបានទាន់ពេលវេលា ដូចជា ការណី បាតុកម្ម កូដកម្ម និងការងារពាក់ព័ន្ធជាមួយក្រសួងការងារជាដើម។
សូមបញ្ជាក់ផងដែរ សហភាព ស្មារតីវ យុវជន ដើម្បីការងារកម្ពុជា ធ្វើការងារផ្តោតជាសំខាន់លើការងារការពារសិទ្ធិ កម្មករ និយោជិត ក្នុងវិស័យកាត់ដេរ និងស្បែកជើង ជាពិសេស ការងារត្រួតពិនិត្យទៅលើក្រុមរថយន្តដឹកជញ្ជូនកម្មករ កម្មការិនី នៅតាមរោងចក្រកាត់ដេរ ដែលមាន អង្គការ សមាគម ជាច្រើនជាសមាជិក៕
ភ្នំពេញ ៖ នៅឆ្នាំ២០១៧នេះ ក្រសួងផែនការ នឹងអនុម័តលើគោលដៅ អភិវឌ្ឍន៍ប្រកបដោយចីរភាពហៅកាត់ថា(SDGs)ទៅក្នុងគោលដៅអភិវឌ្ឍន៍ប្រកបដោយចីរភាពរបស់កម្ពុជាហៅកាត់ថា (CSDGs) ដែលនឹងចាប់ផ្តើមអនុវត្តន៍គោលដៅអភិវឌ្ឍន៍ទាំងនេះពីឆ្នាំនេះតទៅ ដើម្បីធានាបានថា ការអភិវឌ្ឍប្រកបដោយចិរភាព ក្នុងប្រទេសកម្ពុជាមាននិរន្តរភាព។
ស្របពេលគ្នានេះ អង្គការសីលការ អង្គការវេទិកានៃអង្គការមិនមែនរដ្ឋាភិបាល ស្តីពីកម្ពុជា និងអង្គការគណៈកម្មាធិការសហប្រតិបត្តិការដើម្បីកម្ពុជា នៅថ្ងៃទី២៩ខែសីហានេះ បានរៀបចំកិច្ចពិគ្រោះយោបល់ ស្តីពី ទស្សនៈវិស័យរបស់អង្គការសង្កមស៊ីវិល ទៅលើគោលដៅអភិវឌ្ឍន៍ប្រកបដោយចីរភាពរបស់កម្ពុជាដោយផ្តោតលើការបង្ហាញពីបច្ចុប្បន្នកម្មលើ SDGs និង CSDGs ដោយធ្វើការពន្យល់ពីយន្តការរបស់អង្គការសង្គមស៊ីវិលដែលមានស្រាប់ក្នុងការផ្សារភ្ជាប់រវាង គោលដៅអភិវឌ្ឍនិងការបញ្ជ្រាបចំណេះដឹងយេនឌ័រទៅក្នុងអន្តរវិស័យរបស់អង្គការសង្គមស៊ីវិល។
លោក តឹក វណ្ណរ៉ា នាយកប្រតិ្តបតិ្តនៃវេទិការនៃអង្គការមិនមែនរដ្ឋាភិបាលស្តីពីកម្ពុជា បានលើកឡើងថា ការអភិវឌ្ឍប្រកបដោយចីរភាពជាការអភិវឌ្ឍមួយដែលបំពេញនូវតម្រូវការរបស់មនុស្សនាពេលបច្ចុប្បន្នហើយមិនធ្វើអោយប៉ះពាល់ដល់លទ្ធភាពប្រើប្រាស់អ្នកជំនាន់ក្រោយ។ ដូច្នេះការចូលរួមពីគ្រប់ភាគីពាក់ពន្ធ័ ទាំងរដ្ឋាភិបាល វិស័យឯកជន និង អង្គការសង្គមស៊ីវិលគឺជារឿងសំខាន់មួយ ដើម្បីធ្វើឱ្យប្រទេសមានការរីកចម្រើន។
នាយកប្រតិបត្តិរូបនេះបន្តថា គោលដៅអភិវឌ្ឍន៏ដែលប្រកបទៅដោយនិរន្តរភាពឬគោលដៅជាសកលគឺជារបៀបវារៈឆ្នាំ២០៣០ សម្រាប់ការអភិវឌ្ឍប្រកបទៅដោយនិរន្តរភាពដែលបានអនុម័តដោយមេដឹកនាំពិភពលោកនៅកិច្ចប្រជុំកំពូលរបស់អង្គការសហប្រជាជាតិកាលពីខែកញ្ញា ឆ្នាំ២០១៥កន្លងទៅនោះ។ ក្នុងរយៈពេល១៥ឆ្នាំបន្ទាប់ គោលដៅថ្មីទាំងនេះ ដែលអនុវត្តចំពោះប្រទេសទាំងអស់នៅលើសកលលោក នឹងខំប្រឹងប្រែងបញ្ចប់គ្រប់ទម្រង់នៃភាពក្រីក្រ ការប្រយុទ្ធប្រឆាំងនឹងវិសមភាព និងការដោះស្រាយបញ្ហាអាកាសធាតុជាដើម។
លោកបញ្ជាក់ថា គោលដៅអភិវឌ្ឍន៏ដែលប្រកបទៅដោយនិរន្តរភាពដាក់ចេញជា១៧ គោលដៅដើម្បីសម្រាប់ការអនុវត្តពីឆ្នាំ២០១៥ ដល់ឆ្នាំ២០៣០ ដែលគោលដៅទាំងនោះនឹងបញ្ចប់ភាពក្រីក្រគ្រប់ទម្រង់ បញ្ចប់ភាពស្រេកឃ្លាន សម្រេចសន្តិសុខស្បៀង ធ្វើឲ្យប្រសើរនូវចំណីអាហារ លើកកម្ពស់វិស័យកសិកម្មលើកកម្ពស់សុខភាពប្រព័ន្ធអប់រំធ្វើឲ្យសម្រេចនូវសមភាពយេនឌ័រ លើកកម្ពស់កំណើនសេដ្ឋកិច្ចកសាងហេដ្ឋារចនាសម្ព័ន្ធរឹងមាំ លើកកម្ពស់ឧស្សាហូបនីកម្ម និងគាំទ្រការច្នៃប្រឌិតជាដើម។
លោកស្រី ធីតា ឃឹះ នាយិការអង្គការ សីលការ បានលើកឡើងថា បញ្ហាយេនឌ័រ បានធ្លាក់ចូលទៅគ្រប់គោលដៅ ពិសេស ភាពក្រីក្រ។ យ៉ាងណាលោកស្រីមើលឃើញថា ការយល់ដឹងនៃការធ្វើសុច្ចនាករ និងការធ្វើឱ្យសុច្ចនាករមានទិសដៅនិមួយៗ នៅមានភាពរអាករអួលច្រើន សម្រាប់រដ្ឋាភិបាលកម្ពុជា ដែលធ្វើឱ្យផែនការដាក់ចេញមានការយឺតយ៉ាវ ធ្វើឱ្យសង្គមស៊ីវិលមានការព្រួយបារម្ភ និងទាមទារឱ្យមានការចូលរួមពិភាក្សាគ្នាឱ្យបានគ្រប់ភាគី។ ប៉ុន្តែសង្គមស៊ីវិលបានមើលឃើញថា រដ្ឋាភិបាល បាននិងកំពុងប្តេជ្ញាចិត្ត ក្នុងការអនុវត្តគោលដៅអភិវឌ្ឍន៍ប្រកបដោយចីរភាពយ៉ាងយកចិត្តទុកដាក់ ដើម្បីឱ្យសម្រេចបានតាមផែនការ របស់អង្គការសហប្រជាជាតិ សម្រាប់ឆ្នាំ២០៣០៕
ក្រចេះ ៖ ទីបំផុតស្រ្តីជាប្រពន្ឋបានសម្រេចប្តឹងទៅនគរបាលឲ្យចាប់ខ្លួនបុរសជាប្តីដៃ ឆៅដែលបានប្រើហិង្សា ដោយយកកូនកាំបិតចៀរលើប្រដាប់ភេទរហូតដាច់រយៈជាង១០ថ្នេរ ដោយសារតែស្រ្តីរងគ្រោះ ខ្លាចភាពអសន្តិសុខបែបនេះ នៅបន្តលើខ្លួន និងកូនដោយមិនអាចទ្រាំនិងការគំរាមរបស់ជនដៃដល់ជាប្តីតទៅទៀត។
ជនដៃដល់ជាប្តីឈ្មោះ អ៊ន ឆាយ អាយុ៥៤ឆ្នាំ ត្រូវបាននគរបាលឃាត់ខ្លួនបានកាលពីថ្ងៃទី២៨ខែសីហាហើយបានបញ្ជូនខ្លួនទៅតុលាការនៅថ្ងៃទី២៩ ខែសីហានេះ ដើម្បីបន្តនីតិវិធី។ នេះបើតាមការបញ្ជាក់ពីមន្រ្តីនគរបាល ប្រឆាំងការជួញដូរមនុស្ស។
នាយរងការិយាល័យប្រឆាំងការជួញដូរមនុស្សលោកវរសេនីយ៍ត្រី ឌុច អ៊ុច បាន បញ្ជាក់ថា ការចាប់ឃាត់ខ្លួនបុរសដៃដល់ជាប្តី គឺបានធ្វើឡើងទៅតាមពាក្យបណ្តឹង របស់ ស្រ្តីរងគ្រោះជាប្រពន្ឋឈ្មោះ ឈុំ ច្រឹប អាយុ៣៤ឆ្នាំ។ លោកបញ្ជាក់ថា ភ្លាមៗបន្ទាប់ពីបង្ក ហេតុស្រ្តីរងគ្រោះមិនហ៊ានដាក់ពាក្យបណ្តឹងមកនគរបាលនោះទេ ដោយខ្លាចការគំរាម របស់ប្តី។ ក្រោយពីរងការបង្កហិង្សាពីជនដៃដល់ជាប្តីដែលបានយកកូនកាំបិតចៀរលើ ប្រដាប់ភេទបណ្តាលឲ្យដាច់រយៈជាង១០ថ្នេរ និងបានព្យាបាលមានរយៈពេលជិត ១ខែមក នេះស្ថានភាពរបួសរបស់ស្រ្តីជាប្រពន្ឋនៅមិនទាន់បានធូរស្បើយនៅឡើយទេ។
នគរបាលស្រុកព្រែកប្រសព្វបាននិយាយថា អំពើហិង្សាមួយនេះ គឺបានកើតឡើងតាំង ពីចុងខែកក្កដា មកម្លេះ ទៅលើគ្រួសារក្រីក្រ នៅតំបន់ដាច់ស្រយ៉ាលក្នុងឃុំចំបក់ ស្រុកព្រែកប្រសព្វ តែពេលកើតហេតុភា្លមៗ ស្រ្តីរងគ្រោះជាប្រពន្ឋមិនប្តឹងផ្តល់ឲ្យនគរបាលចាប់ខ្លួនបុរសជាប្តីដើម្បីអនុវត្តតាមច្បាប់នោះទេ ហើយក៏ថែមទាំងអង្វរមកនគរបាលមិនឲ្យចាប់ចងជនដៃដល់ជាប្តីមកដាក់ទោសទៀតផង ដោយសារអាណិត និងគ្មាននណាជួយមើលចិញ្ចឹមថែទាំកូន។
អំពើហិង្សាមួយនេះ ត្រូវបាននគរបាលសន្និដ្ឋានថា គឺអាចផ្តើមចេញពីភ្លើងប្រចណ្ឌ ដោយបុរសដៃដល់ជាប្តី មានការខឹងសម្បារនៅពេលស្រ្តីជាប្រពន្ឋដែលមានប្រើទូរសព្ទដៃ និងចោទថា ទូរសព្ទនេះ ទុកទាក់ទងជាមួយប្រុស។ មិនតែប៉ុណ្ណោះជនដៃដល់ជាប្តី បានចាប់ ស្រ្តីជាប្រពន្ឋសម្រាតខោ និងបានយកកូនកាំបិតចាប់ចៀរលើប្រដាប់ភេទបណ្តាលឲ្យរងរបួសធ្ងន់ធ្ងរ។ ភ្លាមៗក្រោយពីបង្កហេតុ បុរសជាប្តីដៃដល់ ក៏ បានជួយដឹកស្រ្តីរងគ្រោះជាប្រពន្ឋមកសង្រ្គោះព្យាបាលនៅមណ្ឌលសុខភាពដែរ។
អ្នកស្រុកបានឲ្យដឹងថា កន្លងគ្រួសារនេះតែងតែកើតមានទំនាស់ក្នុងគ្រួសារជាបន្ត បន្ទាប់ នៅពេលដែលពួកគេទាំងពីរនាក់តែងតែស្រវឹងស្រាដូចគ្នា ហើយមួយរយៈនេះដែរស្រ្តីជាប្រពន្ឋ និងកូនក៏មិនហ៊ានទៅស្នាក់នៅផ្ទះនោះទេ ព្រោះតែខ្លាចប្តីធ្វើបាបម្តងទៀត និងបានដើរសុំផ្ទះអ្នកស្រុកស្គាល់គ្នា ស្នាក់នៅបណ្តោះអាសន្ន ៕
ខេត្តស្ទឹងត្រែង ៖ បុរសជនជាតិឡាវម្នាក់ ដែលជាមេខ្លោងគ្រឿងញៀន ហើយត្រូវបានកម្លាំងនគរបាលខេត្តស្ទឹងត្រែង បង្ក្រាបនិងដកហូតគ្រឿងញៀនប្រមាណ២គីឡូក្រាម កាលពីប៉ុន្មានថ្ងៃមុននោះ ឥឡូវនេះបានស្លាប់ពេលបញ្ជូនទៅមន្ទីរពេទ្យដោយសារជំងឺបេះដូង ។ មេខ្លោងរូបនោះត្រូវបានគេរាយការណ៍ថា បានស្លាប់កាលពីព្រឹកម្សិលមិញ ។
សូមបញ្ជាក់ថា កម្លាំងនៃស្នងការដ្ឋាននគរបាលខេត្តស្ទឹងត្រែង នៅយប់ថ្ងៃទី២៤ ខែសីហា ឆ្នាំ២០១៧ បានបង្ក្រាបមេខ្លោងជួញដូរគ្រឿងញៀន ជនជាតិឡាវម្នាក់ ដោយដកហូតគ្រឿងញៀន២កញ្ចប់ធំ នៅចំណុចបង្គោលលេខ០៣៥-០៣៦ ភូមិសំរោង ឃុំស្រែសំបូរ ស្រុកសៀមប៉ាង ។ មេខ្លោងជនជាតិឡាវនោះ ឈ្មោះ ផែង ផាន់ណាង៉ោ អាយុ៥០ឆ្នាំ រស់នៅភូមិណាចាន ស្រុកកូម៉ា ខេត្តចំប៉ាសាក់ ៕
រាជធានីភ្នំពេញ ៖ បន្ទាប់ពីមានអន្តរាគមន៍ពីរាជរដ្ឋាភិបាលកម្ពុជា ក្រោមការសហការសម្របសម្រួលដោយលោក អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ដ្រី និងជារដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ កម្មការិនីខ្មែរម្នាក់ដែលរងគ្រោះជិត១៣ឆ្នាំនៅប្រទេសអារ៉ាប់ប៊ីសាអូឌីត នោះឥឡូវនេះបានមកដល់កម្ពុជាហើយ ។ ស្ត្រីរងគ្រោះបានធ្វើដំណើរមកដល់មាតុភូមិកម្ពុជាវិញ នៅយប់ថ្ងៃទី២៨ ខែសីហា ឆ្នាំ២០១៧ នេះ ។
នារីរងគ្រោះមានឈ្មោះ ម៉ាត់ សាណាស អាយុ២៨ឆ្នាំ រស់នៅស្រុកកំពង់សិលា ខេត្តព្រះសីហនុ បានទៅបម្រើការងារជាស្ត្រីមេផ្ទះនៅប្រទេសអារ៉ាប៊ីសាអូឌិត តាំងពីអាយុ១៧ឆ្នាំមកម្ល៉េះ តាមរយៈក្រុមហ៊ុនមួយក្នុងប្រទេសកម្ពុជា តែនាងមិនស្គាល់ឈ្មោះក្រុមហ៊ុនបោកប្រាស់នោះទេ។ នារីរងគ្រោះបញ្ជាក់ថា ពេលទៅដល់ប្រទេសអារ៉ាប់ប៊ីសាអូឌិត ក្នុងការងារជាស្ត្រីមេផ្ទះ នាងត្រូវគេប្រើតាមតែអំពើចិត្តហួសកម្លាំងពលកម្ម គ្មានសេរីភាពទេ ម្ចាស់ផ្ទះក៏មិនបើកប្រាក់ខែឲ្យទៀត ឯក្រុមហ៊ុននាំទៅ និងក្រុមហ៊ុនទទួលនោះ ក៏មិនដែលទៅតាមដានមើល យកចិត្តទុកដាក់ និងដោះស្រាយបញ្ហាឲ្យនាងនោះទេ ។
នារីរងគ្រោះបានរៀបរាប់ថា អស់រយៈពេលជិត១៣ឆ្នាំ នាងមិនដែលទទួលបានប្រាក់ឈ្នួលឡើយ លិខិតឆ្លងដែន និងឯកសារពាក់ព័ន្ធត្រូវម្ចាស់ផ្ទះដកហូត និងបំផ្លាញចោលអស់ ។ ប្រឈមការលំបាកនោះរូបនាង ប៉ុន្តែកញ្ញាបានអំពាវនាវសុំកិច្ចអន្តរាគមន៍តាមរយៈ Facebook ក៏មានការផ្សព្វផ្សាយចែកចាយបន្ត រហូតដល់សាយភាយព័ត៌មាននេះដល់រាជរដ្ឋាភិបាលកម្ពុជា ហើយក៏មានការអន្តរាគមន៍ជួយរូបនាងវិលត្រឡប់មកកម្ពុជាវិញ ៕
ភ្នំពេញ ៖ ចេញពីក្លិបឌុបគ្នាចូលចាក់សាំងចេញមកវិញត្រូវក្រុមចោរប្លន់ប្រដាប់ដោយដាវសាំមរ៉ៃកាប់ប្លន់យកមកម៉ូតូសម្លាប់យុវជនម្នាក់ស្លាប់យ៉ាងអាណោចអាធ័ម។ ករណីនេះបានកើតឡើងកាលពីវេលម៉ោង៤ និង២០នាទីទៀបភ្លឺថ្ងៃទី២៩ ខែសីហា ឆ្នាំ២០១៧ស្ថិតនៅតាមបណ្តោយផ្លូវជាតិលេខ៣សង្កាត់ចោមចៅខណ្ឌពោធិសែនជ័យ។
មុនពេលកើតហេតុជនរងគ្រោះបានជិះម៉ូតូមួយគ្រឿងម៉ាក Suzuki Let ពណ៌សលាយទឹកប្រាក់ជាមួយមិត្តភក្តិចេញពីក្លិបកំសាន្តម្តុំស្តុបផ្សារដីហុយផ្លូវសហព័ន្ធរុស្ស៊ីឆ្ពោះទៅកាន់រង្វង់មូលចោមចៅ ខណៈពេលកំពុងតែធ្វើដំណើរដល់កន្លែងស្ងាត់ក៏លេចមុខជនសង្ស័យជិះម៉ូតូប្រហែលប្រាំពីរប្រាំគ្រឿងមានគ្នាប្រហែលជា១០នាក់ប្រដាប់ដោយដាវសាំម៉ារ៉ៃបានដេញតាមពីក្រោយ ហើយកាប់ជនរងគ្រោះជាច្រើនកាបិតត្រូវចំក្បាល និងដាច់ម្រាមដៃខាងស្តាំអស់បណ្តាលអោយស្លាប់យ៉ាងអាណោចអធ័ម។សពយុវជនរងគ្រោះខាងលើមានឈ្មោះ ហេង ហ៊ត អាយុ១៩ឆ្នាំ មុខរបរ Odear នៅហាងម្តុំពេទ្យចិនមានស្រុកកំណើតនៅឯខេត្តកំពត។
សពត្រូវបានតម្កល់ទុកនៅវត្តទឹកថ្លាសង្កាត់ទឹកថ្លាខណ្ឌសែនសុខក្រោយពីប្លន់សម្លាប់បានរយៈពេលពេល២ម៉ោងកម្លាំងនគរបាលខណ្ឌពោធិសែនជយ័ធ្វើការស្រាវជ្រាវនិងឃាត់ខ្លួនជនសង្ស័យបានជាបន្តបន្ទាប់ចំនួន៥នាក់ហើយ។ ចំណែកបក្ខពួកដែលនៅសេសសល់កម្លាំងនគរបាលខណ្ឌពោធិសែនជ័យកំពុងតែស្រាវជ្រាវចាប់បន្តរយកមកផ្តន្ទាទោសតាមផ្លូវច្បាប់៕
សេអ៊ូល ៖ ទីភ្នាក់ងារព័ត៌មានកូរ៉េខាងត្បូង យុនហ៉ាប់ បានរាយការណ៍មុននេះថា ក្រុមប្រឹក្សាសន្តិសុខ អង្គការសហប្រជាជាតិ (UNSC) នឹងបើកកិច្ចប្រជុំជាបន្ទាន់មួយនាថ្ងៃអង្គារនេះ ដើម្បីជជែកពិភាក្សាអំពីការបាញ់សាកល្បងមីស៊ីលផ្លោងយ៉ាងគគ្លើនចុងក្រោយបំផុតរបស់កូរ៉េខាងជើង ដែលបានហោះឆ្លងកាត់ប្រទេសជប៉ុន តបតាមការស្នើសុំពីសំណាក់សហរដ្ឋអាមេរិក កូរ៉េខាងត្បូង និងជប៉ុន។
គួរបញ្ជាក់ថា កាលពីវេលាម៉ោងប្រមាណ៥ និង៥៧នាទីព្រឹកមិញនេះ (ពេលវេលានៅទីក្រុងសេអ៊ូល) កូរ៉េខាងជើងបានបាញ់សាកល្បងស៊ីលមួយគ្រាប់ចេញពីតំបន់ Sunan ក្នុងរដ្ឋធានីព្យុងយ៉ាងឆ្ពោះទៅភាគឦសាន និងបានហោះឆ្លងកាត់ពីលើប្រទេសជប៉ុន មុននឹងធ្លាក់ចូលទៅក្នុងភាគខាងត្បូងមហាសាគរប៉ាស៊ីហ្វិក ដោយរត់បានចម្ងាយជាង ២,៧០០គីឡូម៉ែត្រ ក្នុងរយៈកម្ពស់អតិបរមាប្រមាណ៥៥០គីឡូម៉ែត្រ។
ជាមួយគ្នានេះរដ្ឋាភិបាលជប៉ុនបានឲ្យដឹងថា មីស៊ីលកូរ៉េខាងជើងបានហោះឆ្លងកាត់ពីលើតំបន់ភ្នំ ខេប អ៊ីរីម៉ូ (Cape Erimo) ដែលស្ថិតនៅខាងចុងកោះហុកកៃដូ (Hokkaido) ភាគខាងជើងប្រទេសជប៉ុន ហើយធ្លាក់ចូលទៅក្នុងដែនទឹកចម្ងាយ ១,១៨០គីឡូម៉ែត្រពីទីនោះ៕
រាជធានីភ្នំពេញ ៖ ប្រធានរដ្ឋាករស្វយ័តដឹកជញ្ជូនសាធារណៈរថយន្តក្រុង នៃរដ្ឋបាលរាជធានីភ្នំពេញ បានឲ្យដឹងថា បច្ចុប្បន្នមានប្រជាពលរដ្ឋជិះរថយន្តក្រុងមាន ប្រមាណពី៩,០០០នាក់ ទៅ៩,៥០០នាក់ ក្នុងមួយថ្ងៃៗ ហើយក្រោយពីទទួលបានអនុសាសន៍របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជារួចមក រដ្ឋបាលរាជធានីភ្នំពេញនឹងបន្ថែមខ្សែរត់ចំនួន៥ខ្សែទៀត ដើម្បីកាន់តែគៀកជិតកម្មករនិយោជិត។
លោក អ៊ាន សុឃីម ប្រធានរដ្ឋាករស្វយ័តដឹកជញ្ជូនសាធារណនៃរដ្ឋបាលសាលារាជធានីភ្នំពេញថ្លែងបែបនេះនៅក្នុងកិច្ចប្រជុំត្រួតពិនិត្យស្ថានភាព នៃការគ្រប់គ្រងស្ថាប័នរដ្ឋាករស្វយ័តដឹកជញ្ជូនសាធារណៈរថយន្តក្រុង នាព្រឹកថ្ងៃទី២៨ ខែសីហា ឆ្នាំ២០១៧ ក្រោមអធិបតីភាពលោក ឃួង ស្រេង អភិបាលរាជធានីភ្នំពេញ។
លោក អ៊ាន សុឃីម បានឲ្យដឹងថា សព្វថ្ងៃរដ្ឋាករស្វយ័តដឹកជញ្ជូនសាធារណៈរថយន្តក្រុង មានបុគ្គលិកបម្រើការងារចំនួន ២៩៣នាក់ អ្នកបើកបរ ១២០នាក់ អ្នកលក់សំបុត្រ ១២០នាក់។ ក្នុងឆ្នាំ២០១៦ កន្លងទៅ មានអ្នកធ្វើដំណើរតាមរថយន្តក្រុងចំនួន ២,៣៤០,៧៧៧នាក់ គឺស្មើនឹង ៦,០៨០នាក់ ក្នុងមួយថ្ងៃ។ ដោយឡែក ក្នុងឆ្នាំ២០១៧នេះ អ្នកធ្វើដំណើរតាមរថយន្តក្រុងកើនឡើងពី ៩,០០០ ទៅ ៩,៥០០នាក់ ក្នុងមួយថ្ងៃ។
លោកបន្តថា ខ្សែរត់ចំនួន៥ខ្សែបន្ថែមទៀត នឹងដាក់ឲ្យដំណើរការជាបន្តបន្ទាប់ នាពេលខាងមុខ ក្នុងនោះខ្សែទី៤ និងទី៥ នឹងចាប់ផ្តើមនៅថ្ងៃទី០១ ខែកញ្ញា ឆ្នាំ២០១៧ ហើយខ្សែទី៦ ទី៧ និងទី៨ នឹងដាក់ឲ្យដំណើរការនៅថ្ងៃទី០៨ ខែកញ្ញា ខាងមុខ។ ខ្សែរត់ថ្មីនេះ នឹងទៅដល់តំបន់សេដ្ឋកិច្ចពិសេសភ្នំពេញ គឺទៅឲ្យដល់គៀកជិតនឹងបងប្អូនកម្មករ-កម្មការិនី។
លោក ឃួង ស្រេង អភិបាលរាជធានីភ្នំពេញ បានថ្លែងថា ការបង្កើតឲ្យមានសេវាដឹកជញ្ជូនសាធារណៈរថយន្តក្រុងនេះ គឺជាការឆ្លើយតប និងគិតគូរពីស្ថានភាពវិវត្ត នៃសេដ្ឋកិច្ចកម្ពុជា ដែលមានការរីកចម្រើន និងដើម្បីលើកកម្ពស់សោភ័ណភាព សណ្តាប់ធ្នាប់ កាត់បន្ថយការកកស្ទះចរាចរណ៍ និងគ្រោះថ្នាក់ចរាចរណ៍ក្នុងទីក្រុង លើកកម្ពស់ផាសុកភាព និងរួមចំណែកកាត់បន្ថយភាពក្រីក្ររបស់ប្រជាពលរដ្ឋ ហើយក៏ចង់ឲ្យមានការកែទម្លាប់ពីការប្រើប្រាស់មធ្យោបាយធ្វើដំណើរផ្ទាល់ខ្លួន មកប្រើសេវាដឹកជញ្ជូនសាធារណៈរថយន្តក្រុងនេះវិញ។
លោកក៏បានណែនាំឲ្យមន្ត្រីទទួលបន្ទុក ក្នុងស្ថាប័នរដ្ឋាករស្វយ័តដឹកជញ្ជូនសាធារណៈរថយន្តក្រុង ត្រូវបន្តយកចិត្តទុកដាក់លើការរៀបចំទីតាំងចំណត និងរោងជាងសម្រាប់រថយន្តក្រុង រួមទាំងត្រូវមានជាងទទួលប្រាក់ខែសម្រាប់ជួសជុលរថយន្តផងដែរ។ ត្រូវមានការទទួលខុសត្រូវ និងចេះច្នៃប្រឌិត កុំចេះត្រឹមតែរាយការណ៍មករដ្ឋបាលរាជធានីភ្នំពេញឲ្យដោះស្រាយនោះ។ ចំណែក អាជ្ញាធរខណ្ឌ/សង្កាត់ ក៏ត្រូវរួមសហការរៀបចំសណ្តាប់ធ្នាប់នៅតាមចំណតរថយន្តក្រុងឲ្យបានល្អប្រសើរផងដែរ។
ទន្ទឹមនោះលោក ឃួង ស្រេង ក៏បានក្រើនរំឭកដល់អ្នកបើកបររថយន្តក្រុងសាធារណៈទាំងអស់ ត្រូវមានក្រមសីលធម៌វជ្ជាជីវៈជាអ្នកបើកបរ មានការយោគយល់ គោរពច្បាប់ចរាចណ៍ ដើម្បីបញ្ជៀសនៅគ្រោះថ្នាក់ចរាចរណ៍ផ្សេងៗ រដ្ឋបាលរាជធានីគ្រោងបង្កើតឱ្យមានលេខទូរស័ព្ទហតឡាញ (Hot Line) និងបង្ហាញនៅក្នុងរថយន្តក្រុងផ្ទាល់ ដើម្បីឱ្យប្រជាពលរដ្ឋងាយស្រួលផ្តល់ដំណឹងជូនអាជ្ញាធរ ងាយស្រួលរកដំណោះស្រាយជូនប្រជាពលរដ្ឋ ដែលទទួលសេវាកម្មរថយន្តក្រុងផងដែរ ៕
រាជធានីភ្នំពេញ ៖ សាលាឧទ្ធរណ៍សម្រេចតម្កល់សាលក្រមសាលាដំបូងរាជធានីភ្នំពេញទុកជាបានការដដែល ពោលគឺផ្តន្ទាទោសអ្នកស្រី ថាក់ ឡានី អតីតសមាជិកព្រឹទ្ធសភាគណបក្សសម រង្ស៊ី ដាក់ពន្ធនាគារ១ឆ្នាំកន្លះដែល រឿងចោទប្រកាន់សម្តេចតេជោថា ជាអ្នកសម្លាប់លោក កែម ឡី។
លោក ប្លង់ សំណាង អនុប្រធានសាលាឧទ្ធរណ៍ និងជាប្រធានក្រុមប្រឹក្សាជំនុំជម្រះ ថ្លែងប្រាប់អ្នកសារព័ត៌មានក្នុងសវនាការនៅព្រឹកថ្ងៃទី២៩ ខែសីហានេះថា សាលដីកានេះត្រូវបានប្រកាសដោយកំបាំងមុខជនជាប់ចោទ មេធាវីការពារជនជាប់ចោទ និងមេធាវីតំណាងដោយអាណត្តិរបស់សម្តេចតេជោនាយករដ្ឋមន្ត្រី តែចាត់ទុកជាចំពោះមុខ។
អ្នកស្រី ថាក់ ឡានី ជាប់ចោទពីបទ បរិហារកេរ្តិ៍ជាសាធារណៈ និងបទញុះញង់ឲ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្តនៅភូមិប៉ាតាង ឃុំប៉ាតាង ស្រុកលំផាត់ ខេត្តរតនគិរី កាលពីថ្ងៃទី២៩ ខែកក្កដា ឆ្នាំ២០១៦ តាមមាត្រា ៣០៥ មាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ ។
នៅក្នុងវេទិកាសាធារណៈនៅខេត្តរតនគិរី អ្នកស្រី ថាក់ ឡានី បានចោទប្រកាន់សម្តេចតេជោថា ជាអ្នកសម្លាប់បណ្ឌិត កែម ឡី ។
គួរបញ្ជាក់ថា សាលាដំបូងរាជធានីភ្នំពេញកាលពីរសៀលថ្ងៃទី១៧ ខែវិច្ឆិកា ឆ្នាំ២០១៦ ប្រកាសសាលក្រមផ្តន្ទាទោសអ្នកស្រី ថាក់ ឡានី ដាក់ពន្ធនាគាររយៈពេល១ឆ្នាំ និងពិន័យ៨លានរៀល ព្រមទាំងសងសំណងជំងឺចិត្តដល់សម្ដេចតេជោនាយករដ្ឋមន្ត្រី ចំនួន១០០រៀល៕
សេអ៊ូល ៖ ទីភ្នាក់ងារព័ត៌មានកូរ៉េខាងត្បូង យុនហ៉ាប់ បានចេញផ្សាយថា នៅព្រឹកព្រលឹមថ្ងៃអង្គានេះ កូរ៉េខាងជើងបានធ្វើតេស្តមីស៊ីលសាជាថ្មីម្តងទៀត បន្ទាប់ពីមីស៊ីលរយៈចម្ងាយខ្លីរបស់ខ្លួន ចំនួនបីគ្រាប់ បានទទួលបរាជ័យក្នុងការសាកល្បងកាលពីចុងសប្តាហ៍មុន។
យោងតាមយោធាកូរ៉េត្បូងបាននិយាយថា មីស៊ីលមួយគ្រាប់ខាងលើត្រូវបានបាញ់ចេញពីតំបន់ Sunan ក្នុងរដ្ឋធានីព្យុងយ៉ាងរបស់កូរ៉េខាងដោយរំលងប្រទេសជប៉ុនទៅធ្លាក់ក្នុងភាគខាងត្បូងមហាសមុទ្រប៉ាស៊ីហ្វិកតែម្តងដោយរត់បានចម្ងាយជាង២,៧០០គីឡូម៉ែត្រ ក្នុងរយៈចម្ងាតកម្ពស់អតិរមាប្រមាណ៥៥០គីឡូម៉ែត្រ។ ។ ប្រភពបញ្ជាក់ថា ការបាញ់នេះបានធ្វើឡើងនៅវេលាម៉ោងប្រមាណជា៥ និង៥៧នាទីព្រឹកនេះ (ពេលវេលានៅទីក្រុងសេអ៊ូល) ។
ដោយឡែករដ្ឋាភិបាលជប៉ុនបានឲ្យដឹងថា មីស៊ីលកូរ៉េខាងជើង បានហោះឆ្លងកាត់ពីលើតំបន់ភ្នំ Cape Erimo ដែលស្ថិតនៅខាងចុងកោះហុកកៃដូ (Hokkaido) ភាគខាងជើងប្រទេសជប៉ុន ហើយធ្លាក់ចូលទៅក្នុងដែនទឹកចម្ងាយ១,១៨០គីឡូម៉ែត្រពីទីនោះ៕
រាជធានីភ្នំពេញ ៖ អគ្គនាយកមជ្ឈមណ្ឌលកម្ចាត់មីនកម្ពុជា ហៅកាត់ CMAC បានសរសេរ អត្ថបទមួយ នៅក្រោមចំណងជើងថា «អ្វីទៅដែលហៅថា បដិវត្តន៍ពណ៌? តើបដិវត្តន៍ពណ៌ កើតឡើងតាមរបៀបណា និងមានគោលបំណងអ្វី? what is color revolution? How can it happen and serves what purpose?» បង្ហោះនៅលើ Facebook ផ្លូវការរបស់ខ្លួន។
លោក ហេង រតនា អគ្គនាយក CMAC បានអះអាងថា បដិវត្តន៍ពណ៌ច្រើនតែកើតឡើង នៅពេលបោះឆ្នោត ជាក់ស្តែងដូចកាលពីឆ្នាំ២០១៣-២០១៤ជាដើម។
អគ្គនាយក CMAC បានសរសេរថា តាមអ្នកជំនាញខាងយោធាបានលើកឡើងថា បដិវត្តន៍ពណ៌ជាចលនា សង្គ្រាមមនោគមវិជ្ជា តាមរយៈបាតុកម្មអហឹង្សា កូដកម្ម និងអន្តរាគមន៍ ដើម្បីផ្លាស់ប្តូររបបដឹកនាំមួយ! តាមការសង្កេតឃើញថា បដិវត្តន៍ពណ៌ មានឱកាសកកើតឡើង ពីរឱកាសសំខាន់គឺ៖
១៖ ឱកាសនៅពេលបក្សកាន់អំណាចនោះ មានលេចចេញបាតុភាពអាក្រក់អ្វីមួយកើតឡើង ដូចជាការចោទប្រកាន់ទាក់ទងអំពើពុករលួយ អស្ថិរភាពសេដ្ឋកិច្ច បញ្ហាជាតិនិយមលើការប្រកាន់ពូជសាសន៍ បូរណភាពទឹកដី និងបញ្ហាបរិស្ថានជាដើម និង ២៖ ឱកាសនៅពេលបោះឆ្នោត។
អ្នកដឹកនាំអនុវត្តបដិវត្តន៍ពណ៌ ភាគច្រើនជាបក្សប្រឆាំងរដ្ឋាភិបាល អង្គការក្រៅរដ្ឋាភិបាល (NGOs) ហើយកំលាំងចូលរួម គឺមហាជន និងពិសេសយុវជន។ តាមអ្នកជំនាញសង្កេតឃើញថា របៀបនៃការដំណើរការបដិវត្តន៍ពណ៌មានប្រាំ (៥) ជំហ៊ានសំខាន់គឺ៖
១៖ ការចលនាបាតុកម្មទ្រង់ទ្រាយធំ ដោយអហឹង្សា (peaceful mass protests)
២៖ ការញុះញង់ និងការធ្វើឲ្យបាត់ជំនឿ ចំពោះរដ្ឋាភិបាលកំពុងកាន់អំណាច (provocation and discrediting the government in power)
៣៖ ការបន្សាបអំណាច (the neutralization of power)
៤៖ ការបង្កចលាចលសង្គម និងនយោបាយ (Social and Political chaos)
៥៖ ការឡើងដណ្តើមអំណាច (a takeover power)
ការបកស្រាយងាយយល់ ចំពោះបដិត្តន៍ពណ៌នេះ គឺជារដ្ឋប្រហារដោយប្រើប្រាស់កំលាំង (ស៉ីវិល) ប្រជាជនដោយអហឹង្សា! ហើយអ្នកនៅ ក្រោយបដិវត្តន៍ពណ៌ ដើម្បីទាញយកនូវផលប្រយោជន៍ និងឥទ្ធិពលមនោគមវិជ្ជាសំរាប់រដ្ឋរបស់ពួកគេ!! បដិវត្តន៍ពណ៌ដោយសន្មត់ យកចលនានោះជាពណ៌ ជាប្រភេទផ្កា ជាក្លិន ដើម្បីងាយចំណាំ និងយល់ដឹង!!
គេឃើញថា បដិវត្តន៍ពណ៌នេះច្រើនតែជាប់ផុង ក្នុងដំណាក់កាលទី៤ គឺចលាចលសង្គម និងនយោបាយ នៅពេលដែលបក្សកាន់អំណាច មិនព្រមចុះចាញ់ ពេលនោះនឹងប្រែក្លាយ ទៅជាសង្គ្រាមស៉ីវិលតែម្តង ដូចករណីនៅប្រទេស ស៉ីរី និងលីបីជាដើម។
បដិវត្តន៍ពណ៌ច្រើនកើតឡើង នៅពេលឱកាសបោះឆ្នោត! ព្រោះថា នៅក្នុងឱកាសបោះឆ្នោតនេះ ងាយស្រួលក្នុងការបង្កើនសន្ទុះទឹកចិត្ត មហាជន និងយុវជនឲ្យប្រឆាំងបក្សកាន់អំណាច។ ជាកលល្បិច និងយុទ្ធសាស្ត្រយ៉ាងសំខាន់ នៅពេលមុនបោះឆ្នោតពួកគេខិតខំពង្វក់ ស្មារតី និងអូសទាញជំនឿទុកចិត្តមហាជនថា ពួកគេដាច់ខាតនឹងឈ្នះក្នុងការបោះឆ្នោត នៅពេលចាញ់ឆ្នោតគេត្រូវលើមូលហេតុថា មកពីការបោះឆ្នោតមិនតម្លាភាព កេងបន្លំសន្លឹកឆ្នោត លួចសន្លឹកឆ្នោត បំផ្លាញសន្លឹកឆ្នោត ទាមទារការបោះឆ្នោតឡើងវិញទាមទាររាប់ សន្លឹកឆ្នោតឡើងវិញ ចោទប្រកាន់បក្សកាន់អំណាច និងគណកម្មការបោះឆ្នោត ជាក្រុមតែមួយជាដើម។
នោះជាឱកាសនៃការចាប់ផ្តើម និងទាញយកស្មារតីយ៉ាងមុតស្រួច ជាឆន្ទះគ្មានរួញរាក្នុងការចលនា តស៊ូតវ៉ាប្រឆាំងរដ្ឋាភិបាល! ឱកាសនេះងាយស្រួល ក្នុងការអនុវត្តយុទ្ធវិធីទី២ នៃកលល្បិចក្នុងការធ្វើបដិវត្តន៍ពណ៍ គឺការញុះញុង និងការធ្វើឲ្យបាត់ជំនឿ ចំពោះបក្សកំពុងកាន់អំណាច! គេបានបង្កើតក្រុមជំនាញការងារធ្វើបដិវត្តន៍ពណ៌នេះ ដែលហៅថាមជ្ឈមណ្ឌល សំរាប់អនុវត្តសកម្មភាព និងយុទ្ធសាស្ត្រដោយអហឹង្សា (the Centre for Applied Nonviolation Action and Strategies = CANVAS)!
នៅកម្ពុជាឆ្នាំ២០១៣-២០១៤ ពិតជាមានកើតបដិវត្តន៍ពណ៌នេះ ពិតប្រាកដមែន ហើយឥឡូវនេះ គេឃើញមានក្រុមជំនាញមកជាច្រើន អង្គការបានជាប់ពាក់ព័ន្ធ! តើអ្នកដឹកនាំ បដិវត្តន៍ពណ៌ត្រូវទទួលខុសត្រូវយ៉ាងណា?៕
រាជធានីភ្នំពេញ ៖ នារសៀលថ្ងៃទី២៨ ខែសីហា ឆ្នាំ២០១៧ម្សិលមិញនេះ នគរបាលនាយកដ្ឋានប្រយុទ្ធប្រឆាំង ផលិតផលក្លែងក្លាយ នៃក្រសួងមហាផ្ទៃ បានបញ្ជូនតារាលក់ឡេលាបស្បែកតាម Facebook ទៅអយ្យការអមសាលាដំបូងខេត្តកណ្ដាល ដើម្បីសាកសួរករណីលក់ផលិតផលក្លែងក្លាយ នាំឲ្យប៉ះពាល់ធ្ងន់ធ្ងរដល់សុខភាពអ្នកប្រើប្រាស់ ។
គួរម្លឹកថា ប្រតិបត្តិការបង្ក្រាបផលិតផលក្លែងក្លាយនោះធ្វើឡើងនៅគេហដ្ឋាន របស់ស្ត្រីឈ្មោះ ឆេង ស្រីរ័ត្ន ដែលជាជនសង្ស័យផ្ទាល់តែម្តង ស្ថិតនៅក្នុងសង្កាត់ដើមមៀន ក្រុងតាខ្មៅ ខេត្តកណ្តាល ។
មន្ត្រីជំនាញបញ្ជាក់ថា ការឃាត់ខ្លួននេះធ្វើឡើង បន្ទាប់ពីស្ត្រីរូបនេះបានលក់ផលិតផល ដែលគ្មានការចុះបញ្ជី ឬត្រួតពិនិត្យគុណភាព ឲ្យបានច្បាស់លាស់ពីស្ថាប័នពាក់ព័ន្ធនោះឡើយ។ ម្យ៉ាងទៀតផលិតផលឡេ ដែលស្ត្រីរូបនេះលក់នោះវាបានធ្វើឲ្យប៉ះពាល់ធ្ងន់ធ្ងរដល់សុខភាព ស្បែករបស់អ្នកប្រើប្រាស់។
ចុងក្រោយលោក សាយ សម្ផស្សសេរី ចៅក្រមស៊ើបសួរសាលាដំបូងខេត្តកណ្ដាល បាន សម្រេចបញ្ជូនតារាលក់ឡេលាបស្បែកតាម Facebook ទៅឃុំខ្លួនដាក់ពន្ធនា គារបណ្តោះអាសន្នហើយ ដោយជាប់ពាក់ព័ន្ធការលក់ផលិតផលក្លែងក្លាយនាំឲ្យប៉ះពាល់ធ្ងន់ធ្ងរដល់សុខភាពស្បែករបស់អ្នកប្រើប្រាស់។
ស្ត្រីដ៏ស៊ិចស៊ីរូបនេះ ត្រូវបានលោក ឯក ស៊ុនរស្មី ព្រះរាជអាជ្ញារងនៃអយ្យការអមសាលាដំបូងខេត្តកណ្ដាល ចោទប្រកាន់បញ្ជូនឲ្យសើមសួរតាមមាត្រា១៧ និងមាត្រា៦៣ នៃច្បាប់ស្ដីពីការគ្រប់គ្រងគុណភាព និងសេវា។
មាត្រា១៧នៃច្បាប់នេះចែងថា «ត្រូវបានហាមឃាត់ដាច់ខាតការក្លែងផលិតផលទំនិញដែលធ្វើជាកម្មវត្ថុពាណិជ្ជកម្មឬទុកសម្រាប់ធ្វើពាណិជ្ជកម្ម ដោយធ្វើការកែច្នៃផលិតផលទំនិញដោយរបៀបណាមួយ ដោយធ្វើការបញ្ចូលបន្ថែមការដកចេញ ឬប្តូរជំនួសនៃភាគណាមួយឬភាគទាំងមូលដែលពុំត្រូវបានអនុញ្ញាតឱ្យធ្វើដោយបទបញ្ញតិឬទម្លាប់ បើពុំមានបទបញ្ញតិឬដែលសមស្របទៅនឹងបទបញ្ញតិ»៕
ភ្នំពេញ ៖ ចាប់ពីថ្ងៃទី០១ខែកញ្ញា ឆ្នាំ២០១៧ រដ្ឋបាលរាជធានី មានការកែសម្រួលតម្រាយផ្លូវនៃខ្សែរត់ចាស់ ខ្សែរត់ទី២៖ ចេញពីចំណតពីអ៊ីអន២( AEON2) តាមផ្លូវឧកញ៉ាមុងឬទ្ធី រង្វង់មូលកាំកូស៊ីធី អង់តែងទួលគោក ផ្លូវលេខ៧០ រង្វង់មូលកួចកាណុង ផ្លូវលេខ៤៧(វត្តភ្នំ) ផ្លូវព្រះនរោត្តម ផ្លូវជាតិលេខ២ ដល់ក្រុងតាខ្មៅ ខេត្តកណ្តាល។ ខ្សែរត់ទី៣៖ ចេញពីចំណតសួនច្បារឬស្សីកែវ តាមផ្លូវជាតិលេខ៥ ដល់រង្វង់មូលគួចកាណុងផ្លូវលេខ៤៧(វត្តភ្នំ)ផ្លូវព្រះនរោត្តម ផ្លូវលេខ១៣០ផ្សារធំថ្មី មហាវិថីកម្ពុជាក្រោមស្ពានអាកាស៧មករា មហាវិថីសហព័ន្ធរុស្សី រង្វង់មូលចោមចៅ ផ្លូវជាតិលេខ៣ ដល់ចំណតបុរីសន្តិភាព២។
ដាក់អោយដំណើរការតម្រាយផ្លូវថ្មី ខ្សែរត់ទី៤A ៖ ចេញពីចំណតសួនច្បារឬស្សីកែវ តាមផ្លូវជាតិលេខ៥ ដល់រង្វង់មូលគួចកាណុង ផ្លូវលេខ៤៧ (វត្តភ្នំ )ផ្លូវព្រះនរោត្តម ផ្លូវលេខ១៣០ ផ្សារធំថ្មី វិថីហ្សាដឺហ្គោល ស្តុបនាងគង្ហីញ ស្តុបអាងទឹកអូឡាំពិក វិថីព្រះមុនីរ៉េត កាត់មុខផ្សារដើមគរ ស្ពានអាកាសស្ទឺងមានជ័យ ផ្លូវវ៉េងស្រេង ស្តុបអាងទឹកកាណាឌីយ៉ា ផ្សារទួលពង្រ ដល់ចំណតបុរីសន្តិភាព២។
ខ្សែរត់ទី៤B ៖ ចេញពីចំណតសួនច្បារឬស្សីកែវ តាមផ្លូវជាតិលេខ៥ ដល់រង្វង់មូលគួចកាណុងផ្លូវលេខ៤៧ (វត្តភ្នំ) ផ្លូវព្រះនរោត្តម ផ្លូវលេខ១៣០ ផ្សារធំថ្មី វិថីហ្សាដឺហ្គោល ស្តុបនាងគង្ហីញ ស្តុបអាងទឹកអូឡាំពិក វិថីព្រះមុនីរ៉េត កាត់មុខផ្សារដើមគរ ស្ពានអាកាសស្ទឺងមានជ័យ ផ្លូវវ៉េងស្រេង រង្វង់មូលចោមចៅ ផ្លូវជាតិលេខ៤ ដល់តំបន់សេដ្ឋកិច្ចពិសេស។
ខ្សែរត់ទី៥៖ ចេញពីចំណតពីអ៊ីអន២ (AEON2 ) តាមផ្លូវ១០០៣ បត់ឆ្វេងតាមផ្លូវ១៩៦៦ ឆ្ពោះទៅផ្លូវលេខ៥៩៨ ផ្លូវលេខ៣៣៧ បត់ស្តាំតាមផ្លូវ៥៦៦ សាលាបឋមសិក្សាពីអ៊ំទួលគោក វិថីគឹមអ៊ីលស៊ុង កាត់ក្រោមស្ពានអាកាស៥មករា មហាវិថីម៉ៅសេទុង ស្តុបបូកគោ ស្តុបជលផល វថីសុធារស ដល់ចំណតផ្សារអ៊ីអន១។
ថ្ងៃទី០១ ខែតុលា ឆ្នាំ២០១៧ ខ្សែរត់ទី៦ ៖ ចេញពីចំណតផ្សារបុរីរុងរឿង ផ្លូវជាតិលេខ៦ ស្ពានជ្រោយចង្វារ រង្វង់មូលគួចកាណុង ផ្លូវលេខ៧០ រង្វង់មូលអង់តែនទួលគោក រង្វង់មូលកាំកូស៊ីធី ផ្លូវឧកញ៉ាម៉ុងឬទ្ធី ផ្លូវសម្តេច ជា ស៊ីម បត់ឆ្វេងតាមផ្លូវឧកញ៉ា ទ្រី ហេង ដល់មហាវិថីសហព័ន្ធរុស្សី បត់ឆ្វេងទៅដល់ចំណតផ្សារសេនជូរីផ្លាហ្សា។ ខ្សែរត់ទី៧A ៖ ចេញពីចំណតគីឡូម៉ែត្រលេខ៩ ផ្លូវជាតិលេខ៥ ផ្លូវលេខ៥៩៨ ស្ពាអាកាស៧មករា ផ្លូវលេខ២៧១ បត់តាមស្ពានអាកាសស្ទឺងមានជ័យ វិថីព្រះមុនីរ៉េត វិថីព្រះសីហនុ វិថីព្រះសុធារសដល់ចំណតផ្សារអ៊ីអន១។ ខ្សែរត់ទី៧B ៖ ចេញពីចំណតគីឡូម៉ែត្រលេខ៩ ផ្លូវជាតិលេខ៥ ផ្លូវលេខ៥៩៨ ស្ពាអាកាស៧មករា ផ្លូវលេខ២៧១ បត់តាមស្ពានអាកាសស្ទឺងមានជ័យ ស្តុបក្បាលថ្នល់ ឆ្លងកាត់ស្ពានព្រះមុនីវង្ស ដល់ចំណតច្បារអំពៅ និងខ្សែរត់ទី៨៖ចេញពីចំណតគីឡូម៉ែត្រលេខ៩ ផ្លូវជាតិលេខ៥ កាត់ស្ពានព្រែកព្នៅ ផ្លូវឧកញ៉ាលី យ៉ុងផាត់ ផ្លូវជាតិលេខ៦អា ដល់ចំណតផ្សារបុរីរុងរឿង៕
