សេអ៊ូល ៖ អតីតបេក្ខភាពប្រធានាធិបតីអាមេរិកលោកស្រី ហ៊ីលឡារី គ្លីនតុន (Hillary Clinton) បាននិយាយថា ការគំរាមដើម្បីចាប់ផ្តើមសង្គ្រាមនៅលើឧបទ្វីបកូរ៉េគឺជារឿងគ្រោះថ្នាក់ និងការគិតខ្លី ហើយបានជំរុញឲ្យសហរដ្ឋអាមេរិកអំពាវនាវដល់ភាគីទាំងអស់ឲ្យងាកទៅរកតុចរចា។ ការលើកឡើងរបស់លោកស្រីបែបនេះធ្វើឡើង ខណៈដែលលោកស្រីចូលរួមវេទិកាចំណេះដឹងពិភពលោកនៅក្នុងទីក្រុងសេអ៊ូល ប្រទេសកូរ៉េខាងត្បូង។
លោកស្រីបន្តថា សម្ព័ន្ធមិត្តរបស់សហរដ្ឋអាមេរិកកំពុងតែបង្ហាញការព្រួយបារម្ភកាន់តែខ្លាំងឡើងទៅលើភាពជឿជាក់របស់សហរដ្ឋអាមេរិក។ ចំណែកឯតួនាទីរបស់ប្រទេសចិននៅក្នុងការទប់ស្កាត់កូរ៉េខាងជើង, លោកស្រី គ្លីនតុន បាននិយាយថា ប្រទេសចិនត្រូវតែធ្វើអ្វីដែលគេអាចធ្វើបានដើម្បីរឹតបន្តឹងការដាក់សម្ពាធសេដ្ឋកិច្ចទៅលើប្រទេសកូរ៉េខាងជើង ហើយស្របពេលជាមួយគ្នានោះគឺធ្វើឲ្យការគំរាមកំហែងដែលប្រទេសកូរ៉េខាងត្បូងកំពុងតែប្រឈមមុខមានការធ្លាក់ចុះ ប៉ុន្តែប្រទេសចិនមិនអាចធ្វើបានទាំង២ទេ។
សូមបញ្ជាក់ថា ភាពតានតឹងរវាងកូរ៉េខាងជើង និងសហរដ្ឋអាមេរិកបានកើនឡើងខ្លាំងបន្ទាប់ពីកូរ៉េខាងជើងបានបាញ់សាកល្បងមីស៊ីល និងនុយក្លេអ៊ែររបស់គេជាហូរហែ ហើយនិងការកើនឡើងនូវចំណង់ចំណូលចិត្តធ្វើសង្គ្រាមទៅវិញទៅមករវាងប្រធានាធិបតីអាមេរិកលោក ដូណាល់ ត្រាំ និងមេដឹកនាំកូរ៉េខាងជើងលោក គីម ជុងអ៊ុន៕
ប៉េកាំង ៖ ថ្លែងនៅក្នុងពិធីបើកសមាជបក្សកុម្មុយនិស្តចិនកាលពីម្សិលមិញ ប្រធានាធិបតីចិនលោក ហ្ស៊ី ជីនពីង (Xi Jinping) ថា ប្រទេសចិននឹងមិនលើកលែងចំពោះរាល់ផែនការផ្តាច់ខ្លួនណាមួយរបស់កោះតៃវ៉ាន់ឡើយ រាល់ការប៉ុនប៉ងណាមួយដើម្បីឯករាជ្យភាពរបស់កោះតៃវ៉ាន់នឹងត្រូវជួបជាមួយការប្រឆាំង។
លោកបញ្ជាក់ថា នៅចំពោះមុខប្រតិភូជាង២ពាន់នាក់ដែលបានចូលរួមក្នុងសមាជថា ប្រទេសចិនមានទំនុកចិត្ត និងសមត្ថភាពគ្រប់គ្រាន់ក្នុងការបំបែកការប៉ុនប៉ងផ្តាច់ខ្លួនរបស់កោះតៃវ៉ាន់នៅគ្រប់ទំរង់ទាំងអស់។ លោកអះអាងថា កោះតៃវ៉ាន់គឺជាផ្នែកមួយនៃប្រទេសចិន ហើយរដ្ឋាភិបាលកុម្មុយនិស្តនៅក្នុងទីក្រុងប៉េកាំងគឺជារដ្ឋាភិបាលស្របច្បាប់តែមួយគត់របស់ប្រទេសចិន។
សូមបញ្ជាក់ថា លោក ហ្ស៊ី ដែលបានក្លាយជាមេដឹកនាំប្រទេសចិនក្នុងឆ្នាំ២០១២នោះបាននឹងកំពុងពង្រឹងអំណាច ហើយត្រូវបានគេរំពឹងថានឹងនៅបន្តធ្វើជាប្រធានបក្សកុម្មុយនិស្តចិនដដែល៕
អាមេរិក ៖ បញ្ជីឈ្មោះជនជាតិអាមេរិកដែលមានទ្រព្យសម្បត្តិច្រើនជាងគេរបស់ទស្សនាវដ្ដីហ្វប (Forbes) បានបង្ហាញថា ទ្រព្យសម្បត្តិរបស់លោក ដូណាល់ ត្រាំ ប្រធានាធិបតីអាមេរិកបានថយចុះអស់ជាង៦០០លានដុល្លារអាមេរិកមកនៅត្រឹម៣,១ពាន់លានដុល្លារអាមេរិក ដែលជាលទ្ធផល លោក ត្រាំ បានធ្លាក់មកនៅចំណាត់ថ្នាក់ទី២៤៨នៅក្នុងបញ្ជីឈ្មោះនោះបន្ទាប់ពីជាប់ចំណាត់ថ្នាក់ទី១៥៦កាលពីឆ្នាំទៅ។
ទស្សនាវដ្ដីហ្វប (Forbes) បាននិយាយថាការធ្លាក់ចុះទ្រព្យសម្បត្តិរបស់លោក ត្រាំ គឺដោយសារទីផ្សារអចលនទ្រព្យនៅក្នុងទីក្រុងញូវយ៉កដែលកំពុងតែយ៉ាប់យ៉ឺនជាពិសេសទីតាំងលក់រាយ, ការចំណាយទៅលើបណ្ដឹង និងការចំណាយដ៏ច្រើនទៅលើយុទ្ធនាការឃោសនាស្វែងរកសំឡេងឆ្នោត។
ស្ថាបនិកក្រុមហ៊ុនម៉ៃក្រូសូហ្វ (Microsoft) លោក ប៊ីល ហ្គេត (Bill Gates) បានស្ថិតនៅចំណាត់ថ្នាក់ទី១ក្នុងបញ្ជីឈ្មោះនោះ២៤ឆ្នាំជាប់គ្នាជាមួយទ្រព្យសម្បត្តិ៨៩ពាន់លានដុល្លារអាមេរិក ខណៈដែលស្ថាបនិកក្រុមហ៊ុនហ្វេសប៊ុក (Facebook) លោក ម៉ាក ហ្សាក់ឃឺប៊ឺក (Mark Zuckerberg) ស្ថិតនៅចំណាត់ថ្នាក់ទី៤ជាមួយទ្រព្យសម្បត្តិ៧១ពាន់លានដុល្លារអាមេរិក។
សម្រាប់ឆ្នាំនេះទ្រព្យសម្បត្តិសរុបរបស់ជនជាតិអាមេរិកដែលមានទ្រព្យសម្បត្តិច្រើនជាងគេបំផុតទាំង៤០០នាក់មានចំនួន២,៧ពាន់លានលានដុល្លារអាមេរិកកើនឡើងជាងឆ្នាំទៅដែលមានចំនួនសរុបតែ២,៤ពាន់លានលានដុល្លារអាមេរិកប៉ុណ្ណោះ៕
រាជធានីភ្នំពេញ ៖ គិតត្រឹមម៉ោង៦ល្ងាចថ្ងៃទី១៧ ខែតុលា ឆ្នាំ២០១៧ ដំណើរការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោតថ្មីឆ្នាំ២០១៧ មានប្រជាពលរដ្ឋខ្មែរចំនួន ៤០៣,២០៨នាក់ហើយបានទៅចុះឈ្មោះ ខណៈអ្នកដែលត្រូវលុបឈ្មោះចេញមានចំនួនជាង ៥ពាន់នាក់ និងអ្នកខុសកែតម្រូវមានចំនួនជិត៤ពាន់នាក់។ នេះបើយោងតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប)។
តាមការប៉ាន់ស្មានរបស់ គ.ជ.ប ប្រជាពលរដ្ឋខ្មែរដែលត្រូវមកចុះបោះឆ្នោត ក្នុងបញ្ជីចុះឈ្មោះបោះឆ្នោតថ្មី ឆ្នាំ២០១៧ មានជាង១.៦លាននាក់ ខណៈប្រជាពលរដ្ឋខ្មែរដែលមានអាយុ១៨ឆ្នាំឡើងទៅ ត្រូវបានប៉ាន់ស្មានថា មានប្រមាណ៩.៨លាននាក់៕
ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ ក្រោមកិច្ចសហការជាមួយសហភាពសហព័ន្ធយុវជនកម្ពុជា រាជធានីភ្នំពេញ និងសមាគមរោងចក្រកាត់ដេរនៅកម្ពុជា នឹងរៀបចំព្រឹត្តការណ៍ដ៏ធំប្រចាំឆ្នាំ គឺ ពិព័រណ៍ការងារ និងផលិតភាពជាតិ ឆ្នាំ២០១៧ នៅថ្ងៃទី២៧ និង២៨ខែតុលា ខាងមុខនេះ នៅអគារកោះពេជ្រ ដើម្បីផ្តល់នូវទីកន្លែងជួបជុំគ្នាដោយងាយស្រួលសម្រាប់និយោជក អ្នកផ្តល់ការអប់រំ បណ្តុះបណ្តាល អ្នកស្វែងរកការងារធ្វើ និងកម្មករនិយោជិត ក្នុងការចែករំលែកព័ត៌មានទីផ្សារការងារ។
លោក ហៃ ប៊ុនឡេង អនុប្រធានទីភ្នាក់ងារជាតិ មុខរបរ និងការងារ បានលើកឡើងនៅក្នុងសន្និសីទសារព័ត៌មានមួយ ស្តីពី ពិព័រណ៍ការងារ និងផលិតផលជាតិឆ្នាំ២០១៧ ដែលបានធ្វើនៅថ្ងៃទី១៨ខែតុលានេះថា ពិព័រណ៌ការងារឆ្នាំនេះ មានក្រុមហ៊ុនធំៗជាង១២០ មកពីវិស័យសំខាន់ៗ ដូចជា ធនាគារ គ្រឹះស្ថានមីក្រូហិរញ្ញវត្ថុ សំណង់ សណ្ឋាគារ បដិសណ្ឋារកិច្ច ទូរគមនាគមន៍ អប់រំនិងបណ្តុះបណ្តាលវិជ្ជាជីវៈជាដើម ដែលនឹងត្រូវតាំងបង្ហាញនៅក្នុងបញ្ជរសរុបចំនួន២១៦។
លោក អនុប្រធាន បន្តថា ក្រៅពីទទួលបានឱកាសការងាររាប់ម៉ឺនកន្លែង អ្នកចូលរួមនឹងទទួលបានព័តមានពីផែនការ តម្រូវការ និងគោលនយោបាយក្នុងការជ្រើសរើសកម្លាំងពលកម្មនាពេលបច្ចុប្បន្ន និងអនាគត កម្មវិធីសិក្សាអាហារូបករណ៍ វគ្គសិក្សា និងកម្មវិធីអភិវឌ្ឍន៍ជំនាញជាច្រើនទៀត។ បន្ថែមពីលើនោះព័ពរណ៍ការងារនេះ នឹងចូលរួមលើកកម្ពស់ការយល់ដឹងពីផលិតភាពរបស់កម្មករនិយោជិតតាមរយៈការបង្ហាញអំពីវិធីសាស្ត្របំពេញ ការងារ គំនិតច្នៃប្រឌិតថ្មីៗ ជំនាញបច្ចេកវិទ្យានិងឧបករណ៍ដែលជំរុញដល់ការបង្កើនប្រសិទ្ធិភាព និងស័ក្តសិទ្ធភាពក្នុងការងារ ឬអាជីវកម្មឲ្យកាន់តែប្រសើរ។ នាឱកាសនោះដែរ ក៏មានវាគ្មិនជាតិ និងអន្តរជាតិល្បីៗ ចូលរួមចែករំលែកចំណេះដឹង បទពិសោធន៍ ជំនាញ និងការអនុវត្តល្អៗ លើប្រធានបទពាក់ព័ន្ធការបង្កើនផលិតភាព ប្រកដោយភាពជោគជ័យកន្លងមក និងមាននិរន្តរភាព។
លោក នួន សុភៈ តំណាងសហភាពសហព័ន្ធយុវជនកម្ពុជា បានលើកឡើងថា ពិព័រណ៍ការងារ និងផលិតភាពជាតិឆ្នាំ២០១៧ គឺជាការជំរុញយន្តការ វេទិកាការងាររបស់រដ្ឋាភិបាលកម្ពុជា ដែលបានចែងក្នុងយុទ្ធសាស្ត្រចតុកោណដំណាក់កាលទី៣ ដើម្បីលើកកម្ពស់វិស័យការងារ និងព័តមានទីផ្សារការងារនៅកម្ពុជា ជាពិសេសសំដៅផ្តល់ឱកាសទូលំទូលាយដល់កម្លាំងពលកម្មទាំងមានជំនាញ និងមិនមានជំនាញឲ្យទទួលបានការងារកាន់តែប្រសើរ ចំណេញពេលវេលា កាត់បន្ថយ ចំណាយ និងទទួលបានប្រាក់ចំណូលខ្ពស់។
លោក កាំង មូនីកា តំណាងសមាគមរោងចក្រកាត់ដេរ ហៅកាត់ថា GMAC បានលើកឡើងថា តាមរយៈព្រឹត្តិការប្រចាំឆ្នាំនេះ កម្មករ និយោជិត អ្នកស្វែរកការងារធ្វើ ក៏ដូចជាយុវជនកម្ពុជាទាំងអស់ នឹងបានដឹងកាន់តែច្បាស់ពីព័ត៌មានទីផ្សារងារ និងឱកាសការងារសមរម្យ ដែលយើងនឹងយកទៅផ្សព្វផ្សាយក្នុងពិព័រណ៌ការងារនោះ។
សូមបញ្ជាក់ថា ពិព័រណ៌ការងារខាងមុខនេះត្រូវបានរំពឹងថាមានអ្នកចូលរួមទស្សនាជាង៣ម៉ឺននាក់ដែលភាគច្រើនជាសិស្សនិស្សិត យុវជន អ្នកស្វែងរកការងារ និងកម្មករ និយោជិត មកពីគ្រប់វិស័យ៕
ភ្នំពេញ ៖ ដោយសារប្រទេសមានសុខសន្តិភាព និងមានការអភិវឌ្ឍន៍ ការធ្វើដំណើរឆ្លងកាត់ពីតំបន់មួយទៅតំបន់មួយពិតជាសំខាន់ណាស់ រាជរដ្ឋាភិបាលក៏បានសម្រេចចិត្តសាងសង់ស្ពានឆ្លងកាត់ទន្លេសាបថ្មីមួយទៀតទុកជូនប្រជាពលរដ្ឋ និងអ្នកធ្វើដំណើរទៅមកឆ្លងកាត់ពីតំបន់ជ្រោយចង្វារផ្លូវជាតិលេខ៦ មកតំបន់ឬស្សីកែវផ្លូវជាតិលេខ៥។
កាលពីរសៀលថ្ងៃទី១៧ ខែតុលា ឆ្នាំ២០១៧ លោក ឃួង ស្រេង អភិបាលរាជធានីភ្នំពេញ បានដឹកនាំកិច្ចប្រជុំត្រៀមរៀបចំពិធីបើកការដ្ឋានសាងសង់ស្ពានឆ្លងកាត់ទន្លេសាបក្រោមអធិបតីភាពដ៏ខ្ពង់ខ្ពស់ សម្ដេចតេជោនាយករដ្ឋមន្ត្រី នៃព្រះរាជាណាចក្រកម្ពុជា និងសម្តេច កិត្តិព្រឹទ្ធបណ្ឌិត ដែលត្រៀមបើកការដ្ឋាននៅថ្ងៃទី២៣ ខែតុលា ឆ្នាំ២០១៧ខាងមុននេះ។ ស្ពានថ្មីមួយនេះ ពិតជាមានសារៈសំខាន់ណាស់ក្នុងការចូលរួមបញ្ជៀសចរាចរណ៍ពីផ្លូវជាតិលេខ៦ ឆ្លងចូលផ្លូវជាតិលេខ៥។
មន្ត្រីសាលារាជធានីភ្នំពេញ បានឲ្យដឹងថា គម្រោងសាងសង់ស្ពានបេតុងអារមេខ្សែកាបឆ្លងកាត់ទន្លេសាប មានទីតាំងឆ្លងទន្លេសាប លើតម្រង់ផ្លូវសាលាដែក ក្នុងខណ្ឌឫស្សីកែវ និងខណ្ឌជ្រោយចង្វាប្រវែង៩២២ម៉ែត្រ ទទឹង ២០,៥ម៉ែត្រ ចិញ្ចើមស្ពានសម្រាប់ថ្មើរជើង ១,២៥ម៉ែត្រសងខាង កម្ពស់សសរស្ពានសម្រាប់ព្យួរខ្សែកាបធៀបនឹងកម្រាលស្ពាន ៣៤ម៉ែត្រ សសរសម្រាប់ព្យួរខ្សែកាបមានចំនួន ៤សសរ គម្លាតពីគ្នា ១២០ម៉ែត្រ គន្លងខ្សែយានយន្តទទឹង ៣,៧៥ម៉ែត្រ គន្លងធ្វើចរាចរចំនួន ២ខ្សែទៅ ២ខ្សែមក ល្បឿនសុវត្ថិភាព ៤០គីឡូម៉ែត្រក្នុង១ម៉ោង កម្ពស់នាវាចរក្រោមស្ពាន អតិបរមានៅរដូវវស្សា ១០,៥ម៉ែត្រ កម្ពស់នាវាចរក្រោមស្ពាន អប្បបរមានៅរដូវប្រាំង ២០,៥ម៉ែត្រ បំពាក់បង្គោលភ្លើងបំភ្លឺ ដាក់ស្លាកសញ្ញាចរាចរ។
សូមបញ្ជាក់ថា មុនពេលវត្តមានស្ពានថ្មប្រណីតថ្មីនេះកើតឡើង ក៏មានការសាងសង់ស្ពាន បាឡេមួយខ្សែ ស្របគ្នានឹងស្ពានថ្មថ្មីនេះដែរ ដើម្បីបញ្ជៀសចរាចរ ខណៈស្ពាន មិត្តភាព កម្ពុជា-ជប៉ុន ត្រូវបានបិទការធ្វើចរាចរ ដើម្បីជួសជុលឡើងវិញដែលមានរយៈពេលរហូតដល់ទៅ២ឆ្នាំនោះ។ ស្ពានបាឡេនេះ នឹងរំដោះការកកស្ទះចរាចរ ពីរាជធានីភ្នំពេញ ទៅផ្លូវជាតិលេខ៦ និងផ្លូវជាតិលេខ៥ បន្ទាប់ពីសាងសង់ហើយនៅប៉ុន្មានខែខាងមុខនេះ៕
ភ្នំពេញ ៖ អភិបាលរងរាជធានីភ្នំពេញលោក នួន សុផារ័ត្ន ស្នើឱ្យអាជ្ញាធរមូលដ្ឋានគ្រប់ជាន់ថ្នាក់ រួមគ្នាដោះស្រាយបញ្ហាជូនប្រជាពលរដ្ឋ និងព្រះសង្ឃនៅក្នុងមូលដ្ឋាន ដែលខ្លួនគ្រប់គ្រងឱ្យបានល្អ ជៀងវៀងទុកបញ្ហាចោល ដែលនាំឱ្យប្រជាពលរដ្ឋមានការថ្នាក់ថ្នាំងចិត្ត ដោយសារ ការមិនអើពើរបស់អាជ្ញាធរដែលជាម៉ែឪផ្ទាល់។
ការស្នើនេះបានធ្វើឡើងនៅក្នុងវេទិការផ្សព្វផ្សាយ និងពិគ្រោះយោបល់ របស់ក្រុមប្រឹក្សារាជធានីភ្នំពេញអាណត្តិទី២នៅខណ្ឌ៧មករា នាព្រឹកថ្ងៃទី១៧ ខែតុលា នៅពហុកីឡាដ្ឋានជាតិអូឡាំពិក រាជធានីភ្នំពេញ។ លោកអភិបាលរងបានលើកឡើងថា តាមរយៈវេទិការនៅថ្ងៃនេះ ទទួលបានសំនួរ សំណើរ និងសំណូមពរផ្ទាល់មាត់ចំនួន៨ និងជាលាយលក្ខអក្សរចំនួន១៥ ដើម្បីធ្វើការដោះស្រាយជូនពលរដ្ឋ ។ វេទិការនេះមានសារសំខាន់ណាស់ ដែលជាការទទួលខុសត្រូវមួយរបស់រដ្ឋបាលដែនដី នៅចំពោះមុខប្រជាពលរដ្ឋដោយត្រង់ៗ។
លោកបញ្ជាក់ថា ការចូលរួមមតិយោបល់របស់ប្រជាពលរដ្ឋ និងព្រះសង្ឃ បង្ហាញថា កម្ពុជាបានអភិវឌ្ឍន៍ខ្លួនមកឆ្ងាយហើយ ពោលគឺប្រទេសមានការរីកចំរើន មានសន្តិភាពពេញលេញ មានសន្តិសុខ សុវត្ថិភាពយ៉ាងល្អប្រសើរ ហើយប្រជាជនមានសិទ្ធិបញ្ចេញមតិយោបល់ពីកង្វល់រួមក្នុងមូលដ្ឋាន ដើម្បីឱ្យអាជ្ញាធរយកទៅពិនិត្យនិងដោះស្រាយជូន។ ប៉ុន្តែអ្វីដែលត្រូវដោះស្រាយនៅចំពោះមុខគឺសណ្តាប់ធ្នាប់ បរិស្ថាន អនាម័យ និងសេចក្តីសុខក្នុងការរស់នៅប្រចាំថ្ងៃរបស់ប្រជាពលរដ្ឋក្នុងមូលដ្ឋាន”។ បញ្ហាទាំងនេះ ទាមទាឱ្យមានការចូលរួមសហការគ្នាយ៉ាងស្អិតរមួត រវាងប្រជាពលរដ្ឋ និងអាជ្ញាធរថ្នាក់មូលដ្ឋាន ដែលនៅផ្ទាល់ជាមួយប្រជាពលរដ្ឋ។
ជាមួយគ្នានោះ លោក ម៉ប់ សារិន ប្រធានក្រុមប្រឹក្សារាជធានីភ្នំពេញ បានលើកឡើងថា បើចង់ឱ្យមូលដ្ឋានឱ្យបានស្អាត ល្អ លឿងគឺទាមទាឱ្យមានការចូលរួមពីប្រជាពលរដ្ឋទាំងអស់ ក្នុងមូលដ្ឋានលើគ្រប់ផ្នែក ដោយសហការជាមួយអាជ្ញាធរមូលដ្ឋាន ដើម្បីឱ្យមូលដ្ឋានរស់នៅមានការអភិវឌ្ឍន៍។
យ៉ាងណា លោកបញ្ជាក់ថា ស្របពេលស្រុកទេស មានសុខសន្តិភាព មានសុវត្ថិភាពគ្រប់គ្រាន់ ប្រជាជនត្រូវការរស់នៅមានសណ្តាប់ធ្នាប់ មានអនាម័យល្អ មានបរិស្ថានស្អាត ជាពិសេសមានការអភិវឌ្ឍន៍ហេដ្ឋារចនាសម្ព័ន្ធតាមមូលដ្ឋានឱ្យបានស្អាតល្អផងដែរ។ ដើម្បីឱ្យការអភិវឌ្ឍមូលដ្ឋានបានអាចប្រព្រឹត្តិទៅបានល្អប្រសើរ គឺត្រូវការចាំបាច់ពីការចូលរួមរបស់ប្រជាជន ហើយប្រជាជនក៏ត្រូវតែមានការយល់ដឹងពីការរស់នៅស្អាត និងផ្តល់ក្តីសុខដល់អ្នកដទៃផងដែរ៕
ភ្នំពេញ ៖ អង្គការសហប្រជាជតិប្រចាំកម្ពុជា និងរាជរដ្ឋាភិបាលកម្ពុជា បានបង្កើតគណៈប្រឹក្សាភិបាលនៃកម្មវិធីរួមគ្នាដើម្បីមុខរបរនិងឱកាសការងារសមរម្យសម្រាប់យុវជននៅកម្ពុជា ដែលគម្រោងនេះត្រូវបានបើកកិច្ចប្រជុំជាលើកទីមួយរបស់ខ្លួន នៅរសៀលថ្ងៃទី១៧ ខែតុលា ឆ្នាំ២០១៧ ដែលដឹកនាំដោយសហប្រធាន មាន ឯកឧត្តមបណ្ឌិតអ៊ិតសំហេងរដ្ឋមន្រី្តក្រសួងការងារនិងបណ្តុះបណ្តាលវិជ្ជាជីវៈ និងលោកជំទាវ Claire Van der Vaerenអ្នកសម្របសម្រួលអង្គការសហប្រជាជាតិប្រចាំប្រទេសកម្ពុជា នៅទីស្តីការក្រសួងការងារ។
លោកបណ្ឌិត អ៊ិត សំហេង បានប្រាប់ក្រុមអ្នកសារព័ត៌មាន នៅក្រោយកិច្ចប្រជុំនោះថា កិច្ចប្រជុំនៅថ្ងៃនេះ មានគោលបំណងដើម្បីឧទ្ទេសនាម សមាជិក-សមាជិការ គណៈប្រឹក្សាភិបាល ដែលមានរបៀបវារៈចំនួនបី បានលើមកពិភាក្សា និងធ្វើការអនុម័ត ក្នុងនោះមាន ៖ និតិវិធីដំណើរការសកម្មភាពរបស់ក្រុមប្រឹក្សាគម្រោង, ការពិនិត្យនិងអនុម័តលើលក្ខខណ្ឌប្រតិបត្តិរបស់គណៈប្រឹក្សាភិបាលពិគ្រោះយោបល់ និង ការពិនិត្យនិងអនុម័តលើផែនការសកម្មភាពប្រចាំឆ្នាំរបស់កម្មវិធីសម្រាប់ឆ្នាំទី១។
នៅឆ្នាំទីមួយនេះ កម្មវិធីរួមគ្នា គ្រោងនឹងចំណាយថវិកាប្រមាណ៤លានដុល្លារ សម្រាប់ដំណើរការកិច្ចការជាច្រើនរបស់គម្រោងលើឱ្យការបណ្តុះបណ្តាលវិជ្ជាជីវៈ ការកសាងសមត្ថភាពយុវជន នឹងការបង្កើតឱកាសការងារសមរម្យដែលនឹងត្រូវចាប់ផ្តើមបន្ទាប់ពីកិច្ចប្រជុំនេះទៅ។ គណៈប្រឹក្សាភិបាល បានទទួលសិទ្ធិប្រទានពីម្ចាស់ជំនួយទីភ្នាក់ងារស្វីសដើម្បីកិច្ចសហប្រតិបត្តិការនិងអភិវឌ្ឍន៍ដើម្បីធ្វើការសម្រេចចិត្តនានា ដោយយោងតាមគោលបំណង អភិក្រម និងវិសាលភាពរបស់គម្រោង ដូចដែលបានកំណត់នៅក្នុងឯកសារគម្រោងជាធរមាន។
កម្មវិធីរួមគ្នារបស់អង្គការសហប្រជាជាតិស្តីពីមុខរបរ និងការងារសម្រាប់យុវជន នៅកម្ពុជានេះ និងកាន់តែជំរុញដល់ការអនុវត្តប្រកបដោយជោគជ័យ នូវគោលដៅនៃគោលនយោបាយជាតិធំៗរបស់រាជរដ្ឋាភិបាលកម្ពុជា ដែលបានដាក់ចេញ កម្មវិធីរួមគ្នានេះ ចាប់ផ្តើមរយៈពេល២ឆ្នាំ ពីខែកញ្ញា ឆ្នាំ២០១៧ ដល់ខែសីហាឆ្នាំ២០១៩ ដើម្បីអភិវឌ្ឍន៍ យុវជន និងស្ត្រីវ័យក្មេងកាន់តែច្រើនឡើងឱ្យទទួលបានឱកាសការងារសមរម្យ និងមានផលិតភាព ហើយអ្វីដែលជាការរំពឹងទុកក្នុងការសម្រេចឱ្យបានគឺ យុវជន និងស្ត្រីវ័យក្មេងទទួលបានការអប់រំក្នុង និងក្រៅប្រព័ន្ធប្រកបដោយគុណភាព និងការស្ម័គ្រចិត្តដើម្បីអភិវឌ្ឍជំនាញវិជ្ជាជីវ: និងបច្ចេកទេស។ ក្រៅពីនេះ យុវជន និងស្ត្រីវ័យក្មេងទាំងក្នុងនិងក្រៅសាលាបានទទួល ជំនាញ អាជីវកម្ម និងសហគ្រាសគ្រប់គ្រាន់ដើម្បីអភិវឌ្ឍសហគ្រាសប្រកបដោយនិរន្តរភាពជាពិសេសយុវជនបានទទួលអត្ថប្រយោជន៏ពីហានិភ័យនៃការរំលោភបំពាននិងការរើសអើងនៅកន្លែងការងារ។
លោកស្រី Claire Van der Vaerenបានលើកឡើងថា ការអនុវត្តកម្មវិធីរួមគ្នានេះកើតឡើង ខណៈពេលដែលឆ្នាំ២០៣០ និងគោលដៅអភិវឌ្ឍន៍ចីរភាពអំពាវនាវឲ្យមានការខិតខំប្រឹងប្រែងបន្ថែមទៀតសម្រាប់ការងារនិយោជិតជាពិសេសគោលដៅទី៨។ ក៏ដូចជាការអំពាវនាវកាត់បន្ថយឲ្យបានច្រើននូវសមាមាត្រនៃយុវជនដែលមិនទាន់ទទួលបានការងារ ការបណ្តុះបណ្តាលឆ្នាំ២០២០ និងអំពាវនាវឲ្យមានការអនុវត្តន៍នៅយុទ្ធសាស្ត្រដើម្បីកាត់បន្ថយភាពគ្មានការងារធ្វើ និងលើកកម្ពស់កញ្ចប់ការងាររបស់អង្គការអន្តរជាតិខាងការងារ ឆ្នាំ២០២០ ហើយកម្មវិធីរួមគ្នានេះនឹងឆ្លើយតបទៅដល់គោលដៅរួមគ្នាផងដែរ។
សូមបញ្ជាក់ថា សមាជិក-សមាជិកាគណៈប្រឹក្សាភិបាលនេះមាន១១រូបក្នុងនោះមកពីតំណាងជាន់ខ្ពស់ក្រសួងការងារនិងបណ្តុះបណ្តាលវិជ្ជាជីវៈក្រសួងអប់រំយុវជននិងកីឡាទីភ្នាក់ងារស្វីសដើម្បីកិច្ចសហប្រតិបត្តិការនិងអភិវឌ្ឍន៍អង្គការអន្តរជាតិខាងការងារកម្មវិធីអភិវឌ្ឍន៍សហប្រជាជាតិអង្គការសហប្រជាជាតិផ្នែកអប់រំវិទ្យាសាស្ត្រនិងវប្បធ៌មមូលនិធិសហប្រជាជាតិសម្រាប់កុមារកម្មវិធីស្ម័គ្រចិត្តសហប្រជាជាតិនិងក្រុមប្រឹក្សាយោបល់យុវជនរបស់អង្គការសហប្រជាជាតិ៕
រាជធានីភ្នំពេញ ៖ សាលាឧទ្ធរណ៍បានសម្រេចតម្កល់សាលក្រមសាលាដំបូងរាជធានីភ្នំពេញទុកជាបានការដដែលករណីលោក សួន សេរីរដ្ឋា អតីតប្រធានគណបក្សអំណាចខ្មែរ ដែលប្រមាថធ្ងន់ធ្ងរដល់កងទ័ព។ ការសម្រេចបែបនេះធ្វើឡើងក្រោយបញ្ចប់ការសួរដេញដោលកាលពីរសៀលម្សិលមិញ។
សូមរំលឹកថា លោក សួន សេរីរដ្ឋា ត្រូវបានចៅក្រមជំនុំជម្រះសាលាដំបូងរាជធានីភ្នំពេញកាលពីរសៀលថ្ងៃទី២៥ ខែសីហា ឆ្នាំ២០១៧ ប្រកាសសាលក្រមផ្តន្ទាទោសដាក់ពន្ធនាគាររយៈពេល៥ឆ្នាំ និង ពិន័យជាប្រាក់ចំនួន១០លានរៀល ពាក់ព័ន្ធការប្រមាថធ្ងន់ធ្ងរដល់កងទ័ពកម្ពុជា។
នៅក្នុងសាររបស់ លោក សួន សេរីរដ្ឋា ដែលបង្ហោះលើ Facebook កាលពីថ្ងៃទី១២ខែ សីហា ឆ្នាំ២០១៧ មានខ្លឹមសារយ៉ាងដូច្នេះថា «ពេលសង្គ្រាម កើតឡើងជាមួយ នឹង ប្រទេសលាវនោះលទ្ធផលវាហ្នឹងមិនខុសពីសង្គ្រាម ដែលកើតឡើងជាមួយ នឹង ប្រទេសសៀមទេ ! គឺកូនខ្មែរ កងទ័ពជាតិ នឹងស្លាប់ក្នុងសមរភូមិយ៉ាងវេទនា… ហើយមេទ័ពចោរ នឹងឡើងបុណ្យសក្តិ ប្រមូលបានលុយកាក់សប្បាយជាមួយស្រីញី យ៉ាងគគ្រឹកគគ្រេង!។ ពីព្រោះកន្លងមកដូចយើងដឹងហើយ សង្គ្រាមដែលកើត ឡើងជាមួយនឹងប្រទេសសៀម គឺស្លាប់តែកូនខ្មែរអ្នកស្នេហាជាតិ ដែលចូលប្រយុទ្ធនៅជួរមុខទេ។ ចំណែកឯពួកមេៗ ពាក់ផ្កាយ និង កូនលោកធំៗ ដែលនៅជួរក្រោយចេញមុខចេញមាត់នោះ ប្រមូលលុយ ប្រមូលលាភ ហើយដេកតែម៉ាស៊ីនត្រជាក់ ជាមួយស្រីកំដរ ក៏ឡើងបុណ្យឡើងផ្កាយដែរ» ។
សាររបស់ លោក សួន សេរីរដ្ឋា បានធ្វើឱ្យមានការប្រតិកម្មយ៉ាងខ្លាំងពីសំណាក់កងទ័ព និងមេបញ្ជាការកងទ័ពនៅទូទាំងប្រទេស ហើយពួកគាត់ចាត់ទុកថា ជាទង្វើមួយដែលមិនអាចអត់ឱនឱ្យបាន៕
កាប៊ុល ៖ អាជ្ញាធរនៅក្នុងតំបន់បាននិយាយកាលពីម្សិលមិញថា មនុស្សយ៉ាងហោចណាស់២០នាក់ត្រូវបានសម្លាប់ និង១៦០នាក់ផ្សេងទៀតរងរបួស នៅក្នុងការវាយប្រហារដោយបំផ្ទុះគ្រាប់បែកអត្តឃាតនៅក្បែរមជ្ឈមណ្ឌលបណ្ដុះបណ្ដាលប៉ូលិស មួយកន្លែងក្នុងទីក្រុង ហ្គាដែស (Gardez) នៃខេត្ត ផាកធា (Paktia) ភាគខាងកើតប្រទេសអាហ្វហ្គានីស្ថាន។ នេះបើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ។
សមាជិកម្នាក់មកពីក្រុមប្រឹក្សា ខេត្ត Paktia លោក អាឡាម ម៉ឺ ប្រាហ៍រ៉ាម (Alam Mir Bahram) បានបញ្ជាក់ថា ក្រុមសកម្មប្រយុទ្ធមានគ្នាប្រហែលជា ០៦នាក់ បានដឹកនាំការបំផ្ទុះគ្រាប់បែកអត្តឃាត ដោយប្រើរថយន្ដពីរគ្រឿង នៅក្បែរមជ្ឈមណ្ឌលបណ្ដុះបណ្ដាលប៉ូលិស និងបង្កជាការខូចខាតធ្ងន់ធ្ងរផងដែរ។ លោកបន្តថា ជនរងគ្រោះ នៅក្នុងការវាយប្រហារដោយបំផ្ទុះគ្រាប់បែកនេះ ភាគច្រើនជាប៉ូលិស និងជនស៊ីវិល។
ទោះបីយ៉ាងណានៅពុំទាន់មានក្រុមណាមួយ ចេញមុខទទួលខុសត្រូវនៅឡើយទេ ខណៈអាជ្ញាធរកំពុងដាក់ការសង្ស័យ លើក្រុមឧទ្ទាមតាលីបង់ ដែលតែងតែដឹកនាំសកម្មភាពវាយប្រហាររបៀបនេះ ប្រឆាំងនឹងកងកម្លាំងសន្តិសុខរដ្ឋាភិបាល៕
ខេត្តស្ទឹងត្រែង ៖ កាលពីល្ងាចថ្ងៃទី១៧ ខែតុលានេះកម្លាំងសមត្ថកិច្ចនគរបាលព្រហ្មទណ្ឌ កំរិតធ្ងន់នៃស្នងការនគបាលខេត្ត បានបង្ហាញមុខជនសង្ស័យ ដែលបានសម្លាប់កុមារាម្នាក់ដែលបានច្របាប់ក រួចហើយច្រកការុងទំលាក់ក្នុងទឹកស្រះស្លាប់នោះ។
បើសម្ដីរបស់លោក វរសេនីយ ឯក ឌួង ស៊ីវត្ថា នាយការិល័យព្រហ្មទណ្ឌកំរិតធ្ងន់បានឲ្យថា ជនសង្ស័យមានឈ្មោះ ម៉ី នាង ភេទស្រី អាយុ៣៣ឆ្នាំ រស់នៅភូមិពងគ្រោល ឃុំព្រែកមាសស្រុកសៀមប៉ាង។
គួររំលឹកផងដែរថា កាលពីថ្ងៃទី១៤ ខែតុលាកន្លងទៅថ្មីៗមានករណីឃាតកម្មមួយកើតឡើងនៅចំណុចទួលវែងស្ថិតនៅភូមិពងគ្រោល ឃុំព្រែក ស្រុកសៀមប៉ាង ដែលជនសង្ស័យបានសម្លាប់កុមារាម្នាក់ឈ្មោះ ម៉ៅ តយ អាយុ៤ឆ្នាំ ដែលជនសង្ស័យធ្វើការសម្លាប់ដោយ ច្របាប់ករួចច្រកចូលការុងយកទៅទំលាក់ក្នុងទឹកស្រះស្លាប់តែម្ដង។ ឪពុកកុមារារងគ្រោះ មានឈ្មោះ ឌី សនម៉ៅ និងម្ដាយឈ្មោះ ចាន់ ថាលី អ្នកទាំងបីរស់នៅភូមិឃុំកើតហេតុខាងលើ។
លោកនាយការិល័យបញ្ជក់ថា ជនសង្ស័យដែលសម្លាប់កុមារានោះអាចបណ្ដាលមកពីមានទំនាស់រវាងក្មេង និងក្មេងដែលឧស្សាឈ្លោះគ្នា (កុមារដូចគ្នា)៕
រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់ឲ្យដឹងថា គិតត្រឹមម៉ោង៦ល្ងាចថ្ងៃទី១៥ ខែតុលា ឆ្នាំ២០១៧ ដំណើរការចុះឈ្មោះបោះឆ្នោតចាប់ពីថ្ងៃទី០១ ខែកញ្ញា ដល់ថ្ងៃទី១៥ ខែតុលា ឆ្នាំ២០១៧ មានប្រជាពលរដ្ឋខ្មែរចំនួន ៣៩៣,៥៩៣នាក់ហើយបានទៅចុះឈ្មោះបោះឆ្នោត ខណៈអ្នកដែលត្រូវលុបឈ្មោះចេញមានចំនួន ៥,០៦១នាក់ និងអ្នកខុសកែតម្រូវមានចំនួន៣,៧៣៧នាក់។
តាមការប៉ាន់ស្មានរបស់ គ.ជ.ប ប្រជាពលរដ្ឋខ្មែរដែលត្រូវមកចុះបោះឆ្នោត ក្នុងបញ្ជីចុះឈ្មោះបោះឆ្នោតថ្មី ឆ្នាំ២០១៧ មានជាង១.៦លាននាក់ ខណៈប្រជាពលរដ្ឋខ្មែរដែលមានអាយុ១៨ឆ្នាំឡើងទៅ ត្រូវបានប៉ាន់ស្មានថា មានប្រមាណ៩.៨លាននាក់៕
ម៉ូស្គូ ៖ ទីភ្នាក់ងារសារព័ត៌មាន Reuters ចេញផ្សាយនៅព្រឹកនេះថា បន្ទាប់ពីប្រទេសចិនបញ្ចេញទណ្ឌកម្មជាច្រើននោះ ពេលនេះប្រធានាធិបតីរុស្ស៊ី លោក វ្ល៉ាឌីមៀ ពូទីន ក៏បានចុះហត្ថលេខាលើក្រិត្យមួយ ដើម្បីដាក់ទណ្ឌកម្មលើប្រទេសកូរ៉េខាងជើង ដើម្បីអនុវត្តន៍ទៅតាមសេចក្តីសម្រេច របស់ក្រុមប្រឹក្សាសន្តិសុខ នៃអង្គការសហប្រជាជាតិ។
សេចក្តីសម្រេចដែលមានការចាត់វិធានការជាពិសេស លើវិស័យសេដ្ឋកិច្ចនេះ ត្រូវបានធ្វើឡើង ដើម្បីឆ្លើយតបទៅនឹង ការបាញ់សាកល្បងគ្រាប់មីស៊ីល របស់រដ្ឋាភិបាលទីក្រុងព្យុងយ៉ាងកាលពីចុងឆ្នាំ២០១៦កន្លងទៅ។ ប្រទេសរុស្ស៊ីត្រូវបានគេមើលឃើញថា មិនបានបញ្ចេញចំណាត់ការធំដុំណាមួយ ដើម្បីដាក់បន្ទុកលើកូរ៉េខាងជើងនោះឡើយ ដោយសារតែមិនចង់ឲ្យប៉ះពាល់ដល់សម្ព័ន្ធមិត្តដ៏សំខាន់បំផុត នៅតំបន់អាស៊ីបូព៌ាមួយនេះ៕
ភ្នំពេញ ៖ ក្រសួងធនធានទឹក និងឧតុនិយម បានបញ្ចេញរបាយការណ៍ ស្តីពីការប្រមូលផលស្រូវរដូវវស្សា ឆ្នាំ២០១៧នេះ ដោយបញ្ជាក់ថា រហូតមកដល់ពេលនេះ ប្រជាកសិករប្រមូលផលបានជាង៤៤៤,៨១២ម៉ឺនហិកតា ស្មើនឹង១៦,៩៣ភាគរយ។ ឆ្នាំ២០១៧នេះ ប្រជាកសិករបង្កបង្កើនផលស្រូវរដូវវស្សាលើផ្ទៃដី ២,៦០១,០៣២ហិកតា។ សូមអានព័ត៌មានលម្អិតដូចខាងក្រោម ៖
ភ្នំពេញ ៖ គណៈកម្មាធិការរៀបចំការបោះឆ្នោត (គ.ជ.ប) នឹងមានរៀបចំកិច្ចប្រជុំផ្សព្វផ្សាយស្តីពី ដំណើរការធ្វើបច្ចុប្បន្នភាពបញ្ជីបោះឆ្នោត និងលទ្ធផលបណ្ដោះអាសន្ននៃការចុះឈ្មោះបោះឆ្នោត នៅថ្ងៃទី២០ ខែតុលា ឆ្នាំ២០១៧ខាងមុខនេះ។
គ.ជ.ប បានបញ្ជាក់ថា កិច្ចប្រជុំផ្សព្វផ្សាយនេះ នឹងរៀបចំកិច្ចប្រជុំផ្សព្វផ្សាយ ក្រោមអធិបតីភាព ឯកឧត្តម ឌុច សុន សមាជិក គ.ជ.ប និងជាប្រធានដឹកនាំអង្គប្រជុំ។
ក្នុងកិច្ចប្រជុំនឹងផ្សព្វផ្សាយនេះរួមមាន៖ ដំណើរការប្រព្រឹត្តទៅនៃករធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោតនៅតាមឃុំ-សង្កាត់, លទ្ធផលបណ្ដោះអាសន្ននៃការចុះឈ្មោះបោះឆ្នោត និងអំពាវនាវប្រជាពលរដ្ឋទៅចុះឈ្មោះបោះឆ្នោត ព្រោះជិតដល់កាលបរិច្ឆេទបញ្ចប់ការចុះឈ្មោះបោះឆ្នោត៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
