ភ្នំពេញ ៖ សាកសពបុរសម្នាក់ដែលមានសភាពហើមស្អុយទៅហើយនោះ ត្រូវបានក្មេងៗទៅរកចាប់ខ្យងក្ដាម ប្រទះឃើញនៅក្នុងទឹកប្រឡាយនាវាលស្រែមួយកន្លែង បង្កឲ្យមានការភ្ញាក់ផ្អើលកាលពីវេលាម៉ោង៩និង២០ នាទីព្រឹកថ្ងៃទី២១ ខែកក្កដា ឆ្នាំ២០១៧ ស្ថិតនៅក្នុងភូមិក្រាំងស្វាយ សង្កាត់ព្រែកកំពឹស ខណ្ឌដង្កោ រាជធានីភ្នំពេញ។
សាកសពបុរសខាងលើនោះមិនត្រូវបានគេស្គាល់អត្តសញ្ញាណនោះឡើយ ហើយក៏មិនអាចប៉ាន់ស្មានអាយុ បានដែរ ព្រោះមានសភាពហើមស្អុយមើលលេងស្គាល់ទៅហើយ ដែលសង្ស័យថាបានស្លាប់ក្នុងរយៈពេល ប្រហែលជា៤ទៅ៥ថ្ងៃកន្លងមកហើយ និងក្នុងស្ថានភាពអាក្រាតកាយននលគកតែម្ដង ដោយមានតែត្រកួន វ័ណ្ឌបិទបាំងពីលើតែប៉ុណ្ណោះ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតមានការភ្ញាក់ផ្អើលនោះ មានក្មេងៗមួយ ក្រុមបានាំគ្នាទៅរកចាប់ខ្យងនិងក្ដាមនៅវាលស្រែនោះ លុះពេលទៅដល់ត្រង់ចំណុចកើតហេតុខាងលើ បាន ធំក្លិនស្អុយចម្លែកខុសពីធម្មតា ខណៈនោះក្មេងៗខាងលើបានរកមើល ហើយស្រាប់តែបានប្រទះឃើញសាក សពបុរសនោះនៅក្នុងទឹកប្រឡាយ។បន្ទាប់មកក្មេងៗខាងលើបាននាំគ្នារត់ទៅប្រាប់អ្នកភូមិ នាំគ្នាទៅចោម រោមមើលគ្រប់ៗគ្នា ប៉ុន្តែមិនមាននរណាម្នាក់បានស្គាល់ថា សាកសពនោះជានរណាឡើយ ដែលសង្ស័យថា អាចជាអ្នកមកពីចម្ងាយ មិនមែនជាអ្នកភូមិនោះទេ ក្រោយមកបានរាយការណ៏ជូនទៅនគរបាលប៉ុស្ដិ៍ព្រែក កំពឹសនិងខណ្ឌដដង្កោឲ្យចុះទៅពិនិត្យមើល។
នគរបាលបានឲ្យដឹងថា ក្រោយពេលទទួលព័ត៌មានពីប្រជាពលរដ្ឋកម្លាំងនគរបាលប៉ុស្ដិ៍ព្រែកកំពឹស និងនគរបានខណ្ឌដង្កោ បានចុះទៅកាន់ទីនោះ ហើយបានឃើញសាកសពបុរសម្នាក់មែន ដែលមានសភាព ហើមស្អុយទៅហើយ ដែលមិនទាន់ដឹងថាការស្លាប់នោះជាករណីអ្វីពិតប្រាកដនៅឡើយទេ។ខណៈនោះ កម្លាំងបានរាយការបន្តទៅកាន់ការិយាល័យ នគរបាលបច្ចេកទេសនៃស្នងការនគរបាលរាជធានីភ្នំពេញ ដើម្បីចុះទៅពិនិត្យនិងធ្វើកោសល្យវិច័យតាមជំនាញ និងកសាងសំណុំរឿងតាមច្បាប់ ព្រមទាំងកំណត់ថា ជនរងគ្រោះស្លាប់ដោយសារមូលហេតុអ្វីនោះ៕
ខេត្តក្រចេះ ៖ មនុស្សប្រុសស្រី២នាក់ស្លាប់ភ្លាមៗនៅនឹងកន្លែងកើតហេតុ ដោយជិះម៉ូតូបញ្ច្រាស់ទិសគ្នាទៅបុកចំពីមុខរថយន្តសាំងយ៉ុងដឹកចេកយ៉ាងពេញទំហឹង កាលពីវេលាម៉ោង២២ និង២៥នាទី នៅយប់ថ្ងៃទី២០ ខែកក្កដា ឆ្នាំ២០១៧ ។
ករណីគ្រោះថ្នាក់ចរាចរណ៍កើតឡើងនៅចំណុចមុខគ្រុឌ ក្នុងភូមិអូរឬស្សី១ សង្កាត់អូរឬស្សី ក្រុងក្រចេះ រវាងរថយន្តបុកម៉ូតូក្នុងដំណើរស្របទិសគ្នា បង្កឡើងដោយរថយន្តម៉ាកសាំងយ៉ុង ពណ៌ខៀវ ពាក់ស្លាកលេខ ភ្នំពេញ2AI.9960 អ្នកបើកបរមិនស្គាល់អត្តសញ្ញាណ (រត់គេចខ្លួនបាត់) ពីទិសខាងកើតមកលិច ដល់ចំណុចខាងលើបានបុកនិងម៉ូតូម៉ាកវេវ ពណ៍ខ្មៅ គ្មានស្លាក លេខ បណ្តាលឲ្យស្លាប់យ៉ាងអណោចអធមនិងកន្លែង ។
មន្ត្រីនគរបាល បានឲ្យដឹងថា អ្នកបើកបរម៉ូតូ ឈ្មោះ ខៃ ខន ភេទប្រុស អាយុ35ឆ្នាំ (ស្លាប់ កន្លែងកើតហេតុ) ទីលំនៅភូមិ អូរឬស្សី១ សង្កាត់អូរឬស្សី អ្នករួមដំណើរជាមួយឈ្មោះ ស្រី សំស៊ីណន់ ភេទស្រី អាយុ30ឆ្នាំ (ស្លាប់កន្លែងកើតហេតុ) ទីលំនៅ ភូមិក្បាលកោះ សង្កាត់កោះទ្រង់ សាកសពទាំង០២នាក់ ត្រូវបានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី ចំណែកមធ្យោបាយទាំងពីរបានយកមករក្សាទុកនៅអធិការដ្ឋាននគរបាលក្រុងក្រចេះជាបណ្តោះអាសន្នដើម្បីកសាងសំណុំតាមនីតិវិធី ៕
ខេត្តឧត្តរមានជ័យ ៖ អ្នកទោសចូលកាប់ឈើគ្រញូងក្នុងដីថៃចំនួន៣នាក់ ត្រូវបានអាជ្ញាធរថៃចាប់បញ្ជូនមកកម្ពុជាវិញ កាលពីថ្ងៃទី២០ ខែកក្កដា ឆ្នាំ២០១៧ តាមច្រកអន្តរជាតិជាំសាងុំ ស្ថិតក្នុងភូមជាំ ឃុំត្រពាំងប្រិយ៍ ស្រុកអន្លង់វែង ខេត្តឧត្តរមានជ័យ ។
ពលរដ្ឋខ្មែរទាំង៣នាក់នោះត្រូវបានគេស្គាល់ ទី១. ឈ្មោះ ឆេង គឿន ភេទប្រុស ៦៣ឆ្នាំ រស់នៅភូមិត្រពាំងប្រិយ៍ ឃុំពាមសង្កែ ស្រុកសូទ្រនិគមន៍ ខេត្តសៀមរាប, ទី២. ឈ្មោះ ប៉ាក់ ចិន ភេទប្រុស អាយុ៤៤ឆ្នាំ រស់នៅភូមិដូនឡី ឃុំពាមសង្កែ និងទី៣. ឈ្មោះ ងួន ឃន ភេទប្រុស អាយុ៤៣ឆ្នាំ រស់នៅភូមិត្នោតម្ហូ ឃុំរបៀប ស្រុករវៀង ខេត្តព្រះវិហារ ។
អាជ្ញាធរថៃបានបញ្ជាក់ថា អ្នកទោសឈើគ្រញូងទាំង៣នាក់នោះត្រូវទាហានថៃ ចាប់ខ្លួនថ្ងៃទី៣ ខែកញ្ញា ឆ្នាំ២០១៦ ពីបទឆ្លងដែនខុសច្បាប់ និងកាប់ឈើគ្រញូងក្នុងទឹកដីថៃ ដោយលួចចូលតាមច្រកភូមិសាស្ត្រក្បាលអូរស្វាយ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ៕
រាជធានីភ្នំពេញ ៖ ក្រសួងការងារ និងណ្តុះបណ្តាលវិជ្ជាជីវៈ បានព្រមានឲ្យក្រុមហ៊ុនជ្រើសរើស និងគ្រប់គ្រងពលករទៅធ្វើការនៅក្រៅប្រទេសទាំងអស់ អនុវត្តការងារស្របទៅតាមនីតិវិធីច្បាប់កម្ពុជា និងប្រទេសទទួលពលករ ជៀសវាងការជួញដូរមនុស្សការរំលោភបំពាន និងដើម្បីការពារសិទ្ធិប្រយោជន៍របស់ពលករ ។
ការព្រមាន ឬ ដាក់កំហិតនេះធ្វើឡើងនៅក្នុងកិច្ចប្រជុំមួយកាលពីម្សិលមិញ ក្រោមវត្តមាន លោកបណ្ឌិត អ៉ិត សំហេង រដ្ឋមន្ត្រីក្រសួងការងារ ជាមួយតំណាងទីភ្នាក់ងារជ្រើសរើសពលករឯកជន ប្រចាំប្រទេសថៃ នៅស្ថានទូតកម្ពុជាប្រចាំទីក្រុងបាងកក ។
លោក អិត សំហេង រដ្ឋមន្ត្រីក្រសួងកាងារក៏បានថ្លែងទាក់ទងទៅនឹងពលករខ្មែរនៅប្រទេសថៃ ជាពិសេសពលករខុសច្បាប់ ខណដែលអាជ្ញាធរថៃបានកែទម្រង់ច្បាប់រឹតបន្តឹងដល់និយោជក និងកម្មករខុសច្បាប់ ។ លោកបន្តថា បញ្ហានាំឲ្យពលករ និងក្រុមគ្រួសាររបស់ពលករមានការព្រួយបារម្ភខ្លាំង ចំពោះសុវត្ថិភាព និងជីវភាពរបស់ពួកគាត់ ជាពិសេសការបណ្តេញចេញពលករខុសច្បាប់ពីប្រទេសថៃ ដែលធ្លាប់បានកើតឡើងម្តងរួចមកហើយ កាលពីឆ្នាំ២០១៤។
លោករដ្ឋមន្ត្រីបានជំរុញឱ្យក្រុមហ៊ុននាំពលករមកធ្វើការនៅប្រទេសថៃទាំងអស់ ត្រូវយកចិត្តទុកដាក់គ្រប់គ្រង ការពារសិទ្ធិ និងផលប្រយោជន៍ស្របច្បាប់របស់ពលករ ជៀសវាងការប្រព្រឹត្តអំពើល្មើសច្បាប់ផ្សេងៗរបស់ប្រទេសថៃ ដែលនាំទៅដល់ការចាប់ខ្លួនបញ្ជូនទៅកម្ពុជាវិញ។ ទន្ទឹមនោះ ក្រសួងនឹងចាត់វិធានការតឹងរឹង ចំពោះក្រុមហ៊ុនណាដែលអនុវត្តខុសច្បាប់ ឬប្រព្រឹត្តអំពើផ្សេងៗប៉ះពាល់ដល់ផលប្រយោជន៍ពលករ ៕
អង់ការ៉ា ៖ សារព័ត៌មានរុស្ស៊ី Sputnik ចេញផ្សាយនៅព្រឹកនេះថា គ្រោះរញ្ជួយដីកម្រិតធ្ងន់មួយ បានវាយប្រហារភាគនីរតីនៃប្រទេសតួកគី និងបណ្តាកោះមួយចំនួនរបស់ប្រទេសក្រិច ដោយបណ្តាលឲ្យមនុស្ស២នាក់ នៅលើកោះក្រិច Kos បានបាត់បង់ជីវិត និងច្រើននាក់ទៀតរងរបួស ខណៈដែលផ្លូវថ្នល់និងអគារមួយចំនួន ក៏ទទួលរងការខូចខាតផងដែរ។
អភិបាលកោះ Kos របស់ប្រទេសក្រិច បានឲ្យដឹងថា មនុស្សដែលបានបាត់បង់ជីវិតតាំងពីរនាក់គឺស្ថិតនៅទីនោះ ដែលជាគោលដៅទេសចរណ៍ដ៏សំខាន់មួយរបស់ក្រិច ហើយមនុស្សមួយចំនួនទៀត នៅលើកោះ Kos ក៏បានរងរបួសផងដែរ។ ទន្ទឹមនោះកោះរបស់ក្រិចមួយផ្សេងទៀតឈ្មោះថា Rhoades ក៏បានទទួលរងផលប៉ះពាល់ផងដែរ។
គួរបញ្ជាក់ថា គ្រោះរញ្ជួយដីកម្រិត៦.៧រ៉ិចទ័រជាមួយជម្រៅប្រមាណ១០គីឡូម៉ែត្រនេះ បានបង្កការខូចខាតក៏ដូចជាបំផ្លិចបំផ្លាញទាំងនៅប្រទេសតួកគី និងក្រិច៕
ខេត្តតាកែវ ៖ យោងតាមសេចក្តីរាយការណ៍បានឲ្យដឹងថា កម្មករ២៤នាក់រងរបួសធ្ងន់ស្រាល ក្នុងហេតុការណ៍ក្រឡាប់រថយន្ដ នៅព្រឹកថ្ងៃទី២១ ខែកក្កដា ឆ្នាំ២០១៧នេះ នៅតាមបណ្ដោយផ្លូវជាតិលេខ៣ ចន្លោះគីឡូម៉ែត្រលេខ៤៩-៥០ ស្ថិតក្នុងភូមិរូង ឃុំក្រាំងលាវ ស្រុកបាទី ខេត្តតាកែវ។
ភ្នាក់ងាររាយការណ៍បន្តថា ក្នុងហេតុការណ៍ក្រឡាប់រថយន្ដនេះ បណ្ដាលឲ្យកម្មករ០៧នាក់រងរបួសធ្ងន់ និង១៧នាក់រងរបួសស្រាល ហើយត្រូវបានបញ្ជូនទៅមន្ទីរពេទ្យ ដើម្បីជួយសង្គ្រោះ ៕
រាជធានីភ្នំពេញ ៖ យ៉ាងហោចណាស់មន្ត្រីស្និទ្ធនឹងលោក ញ៉ឹក ប៊ុនឆៃ ប្រធានគណបក្សខ្មែររួបរួម ជាតិ ចំនួន១២នាក់ទៀតត្រូវបាន ព្រះមហាក្សត្រ នៃព្រះរាជាណាចក្រកម្ពុជាចេញព្រះរាជក្រឹត្យត្រាស់បង្គាប់ បញ្ចប់មុខតំណែងទីប្រឹក្សា រាជរដ្ឋាភិបាល បន្ទាប់ពីមន្ត្រីស្និទ្ធមួយចំនួនទៀតត្រូវបានដកតំណែងជាបន្តបន្ទាប់ ។
យោងតាមព្រះរាជក្រឹត្យចុះថ្ងៃទី១៨ ខែកក្កដា ឆ្នាំ២០១៧បានឲ្យដឹងថា ទីប្រឹក្សារាជរដ្ឋាភិបាល ចំនួន១២រូប ដែលត្រូវបានបញ្ចប់មុខតំណែងនោះរួមមាន៖ លោក គុជ ម៉ូលី , លោក ញឹក គិមឈុន ,និងលោក កែវ រដ្ឋាមានឋានៈស្មើរដ្ឋមន្ត្រី , លោក ម៉ៅ សុវណ្ណារិទ្ធិ, លោក ជា បំរុង,និងលោក សុខ រុន មានឋានៈស្មើរដ្ឋលេខាធិការ, លោក ភួង វិន័យ ,លោក ហែម ឈិន .លោកស្រី សំ ប៉ូរ័ត្ន ,លោក ប៉េង សុសេង , លោក ឈួយ ចាន់រ៉ុង ,និង លោក ចិន ពៀន មានឋានៈស្មើអនុរដ្ឋលេខាធិការ៕
រាជធានីភ្នំពេញ ៖ ជនសង្ស័យជាខ្មាន់កាំភ្លើងបាញ់បុរសអ្នករត់តាក់ស៊ីម្នាក់នៅស្រុករលាប្អៀ ខេត្តកំពង់ឆ្នាំង ប្លន់យករថយន្ដ Highlander កាលពីយប់ថ្ងៃទី១៦ ខែកក្កដា ឆ្នាំ២០១៧នោះត្រូវបានសមត្ថកិច្ចចាប់ខ្លួនបានហើយ។
លោកឧត្តមសេនីយ៍ ឡុច សុវណ្ណរ៉ា ស្នងការនគរបាលខេត្តកំពង់ឆ្នាំងបានឲ្យដឹងថា នៅយប់ថ្ងៃទី២០ ខែកក្កដានេះថា ជនសង្ស័យ៣នាក់ក្នុងករណីបាញ់សម្លាប់បុរសអ្នករត់តាក់ស៊ីម្នាក់ នៅស្រុករលាប្អៀ ត្រូវបានកម្លាំងនគរបាលនាយកដ្ឋានព្រហ្មទណ្ឌ ក្រសួងមហាផ្ទៃ សហការជាមួយកម្លាំង នគរបាលខេត្តកំពង់ឆ្នាំង ឃាត់ខ្លួននៅរាជធានីភ្នំពេញ។
គួរបញ្ជាក់ថា បុរសជាជនរងគ្រោះ ដែលជាអ្នករត់តាក់ស៊ី ឈ្មោះ អៀង ចិត្រា ហៅចិត្ត អាយុ៤៣ឆ្នាំ មានទីលំភូមិចំការចេកខាងជើង សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ ត្រូវខ្មាន់កាំភ្លើងបាញ់សម្លាប់ធ្លាយក្បាល នៅត្រង់ចំណុចផ្លូវអាលុងចូលទៅគោកស្តៅ ស្ថិតក្នុងភូមិគោកស្តៅ ឃុំទឹកហូត ស្រុករលាប្អៀរ ខេត្តកំពង់ឆ្នាំង។ រថយន្ដរបស់ជនរងគ្រោះ ដែលត្រូវបានជនសង្ស័យយកទៅនោះ ម៉ាក Highlander ពណ៌ខ្មៅ ពាក់ស្លាកលេខភ្នំពេញ 2J-1125។ ក្រោយបាញ់សម្លាប់បុរសរត់តាក់ស៊ី ខ្មាន់កាំភ្លើងបានអូសជនរងគ្រោះ ទម្លាក់ចោលនៅលើដងផ្លូវ រួចជិះរថយន្តគេចខ្លួនបាត់ ប៉ុន្តែពេលនេះ ត្រូវបានសមត្ថកិច្ចចាប់ខ្លួនបាន៕
ខេត្តក្រចេះ ៖ ថ្លែងក្នុងបាឋកថាថ្នាក់ខេត្តស្តីអំពីសិទ្ធិក្រោយការចាប់ខ្លួន ឬឃាត់ខ្លួន តាមក្រមនីតិវិធីព្រហ្មទណ្ឌ ធ្វើឡើងនៅព្រឹកថ្ងៃទី២០ កក្កដា នៅខេត្តក្រចះ ព្រះរាជអាជ្ញាអមសាលាដំបូងខេត្ត លោក កែវ សុជាតិ បានលើកឡើងថា មន្ត្រីនគរបាលយុត្តិធម៌ ដែលអនុវត្តការងារទៅតាមនីតិវិធីក្រមព្រហ្មទណ្ឌ គឺជាការគោរពច្បាប់ ក៏ដូចជាការគោរពនូវសិទ្ឋិមនុស្សនៅព្រះរាជាណាចក្រកម្ពុជា។
លោកព្រះរាជអាជ្ញារអមសាលាដំបូងខេត្តបានលើកឡើងទៀតថា ពិធីធ្វើបាឋកថាថ្នាក់ខេត្តនេះ គឺក្នុងគោលបំណងដើម្បីផ្សព្វផ្សាយនិងពង្រឹង បន្ថែមលើក្រមនីតិវិធីព្រហ្មទណ្ឌ ដើម្បីបង្ការការធ្វើទារុណកម្ម ដែលផ្តោតសំខាន់លើ អង្គភាពកងកម្លាំងប្រដាប់អាវុធ ដែលជាមន្ត្រីនគរបាលយុត្តិធម៌ រួមមាន កម្លាំងនគរបាល កងរាជអាវុធហត្ថ មន្ត្រីអនុរក្ស័ពន្ធនាគារដែលជាអ្នកចាំបាច់សំរាប់អនុវត្តនីតិវិធីនោះ។
លោក ព្រះរាជអាជ្ញាបានធ្វើបទបង្ហាញដោយបញ្ជាក់ថា ការអនុវត្តការងារដោយមិនគោរពទៅតាមក្រមព្រហ្មទណ្ឌ គឺធ្វើឲ្យនគរបាលប្រឈម និងមោឃៈភាពនីតិវិធី ពោល គឺជនត្រូវចាប់ខ្លួន រឺឃាត់ខ្លួននោះ គឺត្រូវរួចខ្លួនវិញ ចំណែកឯកការធ្វើទារុណកម្មទៅលើជនសង្ស័យ ដើម្បីយកចម្លើយ គឺមន្ត្រីនគរបាលយុត្តិធម៌ដែលជាអ្នកអនុវត្តនោះ គឺនឹងត្រូវទទួលទោសទណ្ឌតាមផ្លូវច្បាប់។
ព្រះរាជអាជ្ញារអមសាលាដំបូខេត្ត លោកបានជម្រុញឲ្យមន្ត្រីនគរបាលយុត្តិធម៌ទាំងអស់ ត្រូវពង្រឹងសមត្ថភាពក្នុងការអនុវត្តនិតិវិធីក្រមព្រហ្មទណ្ឌឲ្យបានត្រឹមត្រូវ ដើម្បីទប់ស្កាត់និងបង្ក្រាបរាល់បទល្មើសគ្រប់ប្រភេទឲ្យកាន់តែមានប្រសិទ្ធភាព ក៏ដូចជា ការគោរពនូវសិទ្ឋិមនុស្សនៅកម្ពុជា។
គួរបញ្ជាក់ថា នេះជាលើកទី១ហើយសំរាប់ខេត្តក្រេះ បានធ្វើនូវបាឋកថាថ្នាក់ខេត្ត ដើម្បីពង្រឹងដល់នគបាលយុត្តធម៌ ដែលរៀបចំដោយក្រសួងយុត្តិធម៌ និងសហការជាមួយការិយាល័យឧត្តមស្នងការទទួលបន្ទុកសិទ្ធិមនុស្ស មានរយៈពេលពេញមួយថ្ងៃ៕
ប៉ារីស ៖ ប្រធានសេនាធិការយោធាបារាំងលោកឧត្តមសេនីយ៍ Pierre de Villiers បានសុំលាលែងពីមុខតំណែងកាលពីព្រឹកថ្ងៃពុធម្សិលមិញ បន្ទាប់ពីមានការខ្វែងគំនិតគ្នា ជាមួយប្រធានាធិបតីបារាំង លោក អែមម៉ានុយអែល ម៉ាក្រុង ជុំវិញគំរោងកាត់បន្ថយបញ្ចប់ថវិការយោធា។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters។
លោកឧត្តមសេនីយ៍ Pierre de Villiers បានប្រកាសក្នុងសេចក្តីថ្លែងការណ៍ថា ការកាត់ថវិកានេះនឹងមិនអាចធានាភាពគំរូនៃយោធាក្នុងការការពារជាតិបារាំងបានទៀតទេ។ កាលពីសប្តាហ៍មុនរដ្ឋាភិបាលបារាំង បានប្រកាសពីការកាត់ថវិកា តាមការធ្លាក់ចុះនៃកម្រិតថវិកាក្នុងសហភាពអឺរ៉ុប។
ដោយឡែកលោក ម៉ាក្រុន ថ្លែងថា លោកមិនអត់ឱនឲ្យអ្នកដែលប្រឆាំងផែនការយោធានោះទេ។ លោកថា បើសិនជាមេបញ្ជាការយោធាប្រឆាំងឬ មិនពេញចិត្តអ្វីមួយអាចលាឈប់បាន។ ទោះយ៉ាងណាលោក ម៉ាក្រុនថ្លែងថា កន្លងមកលោក Pierre de Villiers បានបំពេញការងារបានយ៉ាងល្អ៕
ខេត្តព្រះសីហនុ ៖ បុគ្គលឈ្មោះ «យូ ណារិន» ដែលតាំងខ្លួនជាឧត្តមសេនីយ៍ផ្កាយ២នៅបញ្ជាការដ្ឋានអង្គរក្សដែលពាក់ព័ន្ធរឿងប្រមូលប្រជាជនទៅសង់ខ្ទមរំលោភបំពានដីកម្មសិទ្ធិរដ្ឋ និងអ្នកដទៃនៅខេត្តព្រះសីហនុ ត្រូវកម្លាំងអាវុធហត្ថចាប់ខ្លួនបានហើយកាលពីរសៀលម្សិលមិញនៅចំណុចភូមិ៣ សង្កាត់៣ ក្រុងព្រះសីហនុ។
លោកឧត្តមសេនីយ៍ត្រី ហេង ប៊ុនទី មេបញ្ជាការអាវុធហត្ថខេត្តព្រះសីហនុបានប្រាប់ឲ្យដឹងថា ប្រតិបត្តិការចាប់ខ្លួននេះដឹកនាំដោយលោកវរសេនីយ៍ទោ ឆេង វុទ្ធី ប្រធានមន្ទីរយុត្តិធម៌នៃកងរាជអាវុធហត្ថខេត្ត ហើយធ្វើឡើងនៅចំណុចភូមិ៣ សង្កាត់៣ ក្រុងព្រះសីហនុ។ លោកបន្តថា ជនសង្ស័យមានឈ្មោះ ង៉ែត សារិន ហៅ យូ ណារិន អាយុ៤៧ឆ្នាំ មុខរបរទិញលក់ដី មានទីលំនៅបច្ចុប្បន្នភូមិ៤ ឃុំទំនប់រលក ស្រុកស្ទឹងហាវ ខេត្តព្រះសីហនុ។
ទោះជាយ៉ាងណាបើតាមលិខិតរបស់បញ្ជាការដ្ឋានអង្គរក្ស ចុះថ្ងៃទី១១ ខែកក្កដា ឆ្នាំ២០១៧ ដែលផ្ញើទៅកាន់ប្រធានគណៈបញ្ជាការឯកភាពខេត្តព្រះសីហនុ បានឲ្យដឹងថា «លោក យូ ណារិន ពុំមានឈ្មោះនៅក្នុងក្របខណ្ឌ និងមិនមែនជាឧត្តមសេនីយ៍ទោ មេបញ្ជាការរង បញ្ជាការអង្គរក្សនោះទេ»៕
រាជធានីភ្នំពេញ ៖ នៅព្រឹកថ្ងៃទី២០ ខែកក្កដា ឆ្នាំ២០១៧ នេះសភាស៊ើបសួរសាលាឧទ្ធរណ៍នឹងបើកសវនាការសំណុំរឿងក្ដីអតីតសង្ឃ ហន សុផាន្នី ដែលសុំនៅក្រៅឃុំបណ្តោះអាសន្ន។ នេះបើតាមការបញ្ជាក់ឲ្យដឹងពីមេធាវីការពារក្តី លោក ជូង ជូងី ។
អតីតសង្ឃ ហន សុផាន្នី ត្រូវបានចៅក្រមស៊ើបសួរសាលាដំបូងខេត្តបាត់ដំបងលោក លី សុខា សម្រេចឃុំខ្លួនដាក់ពន្ធនាគារ ក្រោមការចោទប្រកាន់ចំនួន២លោក លី សុខា បទល្មើសគឺ បទកាន់កាប់និងដឹកជញ្ជូនអាវុធ ដោយគ្មានការអនុញ្ញាត និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា៤៩០ មាត្រា៤៩៤ និងមាត្រា៤៩៥ នៃក្រមព្រហ្មទណ្ឌ កាលពីថ្ងៃទី២២ ខែមិថុនា ឆ្នាំ២០១៧។
គួរបញ្ជាក់ថា កម្លាំងនគរបាលខេត្តបាត់ដំបង កាលពីថ្ងៃទី២១ ខែមិថុនា ឆ្នាំ២០១៧ បានចុះចាប់ខ្លួន និងផ្សឹកព្រះសង្ឃមួយអង្គ តាមដីការបស់តុលាការបញ្ជាឲ្យចូលខ្លួនលេខ លេខ៩៥៨ ចុះថ្ងៃទី២១ ខែមិថុនា ឆ្នាំ២០១៧ ចេញដោយលោក កឺ ប៊ុណ្ណារ៉ា ព្រះរាជអាជ្ញាររងអមសាលាដំបូងខេត្តបាត់ដំបង ពីបទធ្វើឲ្យប៉ះពាល់ដល់ព្រះពុទ្ធសាសនាជាតិ និងកាន់កាប់រក្សាទុកអាវុធខុសច្បាប់ ក្នុងវត្តដំរីស សង្កាត់ស្វាយប៉ោ ក្រុងបាត់ដំបង៕
រាជធានីភ្នំពេញ ៖ ក្រោយពីទទួលពាក្យបណ្តឹងពីឪពុកម្តាយទារករងគ្រោះកាលពីព្រឹកថ្ងៃទី១៩ខែកក្កដាឆ្នាំ២០១៧ដោយចោទប្តីប្រពន្ធដែលជាអ្នកមើលថែកូនរបស់គាត់ថាបានលូកប្រដាប់ភេទកូនស្រីគាត់ដែលទើបតែមានអាយុ១២ខែ២០ថ្ងៃបណ្តាលអោយហូរឈាមយ៉ាងខ្លាំង ហើយពេលនេះកូនស្រីរបស់គាត់កំពុងសម្រាកព្យាបាលនៅមន្ទីរពេទ្យគន្ធបុប្ផាដោយមានការយកចិត្តទុកដាក់ពីក្រុមគ្រូពេទ្យ។
សមត្ថកិច្ចប៉ុស្តិ៍ស្ទឹងមានជ័យសហការជាមួយកម្លាំងជំនាញខណ្ឌមានជ័យដោយមានការចូលរួមអង្គការថែទាំកុមារ និងទារកបានបើកគណៈកម្មការចំរុះធ្វើការស្រាវជ្រាវ និងស៊ើបអង្កេតយ៉ាងយកចិត្តទុកដាក់ជៀសវាងការភាន់ច្រឡំរយៈពេល១២ម៉ោង ហើយវេជ្ជបណ្ឌិតនៅមន្ទីរពេទ្យគន្ធបុប្ផាបានប្រាប់ថា ទារកខាងលើត្រូវបានរងគ្រោះដោយវត្ថុរឹងលូកចូលក្នុងប្រដាប់ភេទ ហើយសមត្ថកិច្ចបានសម្រេចឃុំខ្លួនស្ត្រីដែលជាអ្នកមើលថែទាំទារកឈ្មោះ តោ ស្រី អាយុ៣៦ឆ្នាំ។ ដោយស្ត្រីសង្ស័យខាងលើបានសារភាពប្រាប់សមត្ថកិច្ចថា រូបគាត់បានងូតទឹកអោយទារកខាងលើនោះមិនប្រយ័ត្នបានជ្រុលដៃរុកចូលក្នុងប្រដាប់ភេទក្មេងស្រីខាងលើបណ្តាលអោយមុតក្រចកដៃរបស់គាត់។
ដោយឡែកបុរសជាប្តីឈ្មោះ ព្រំ វិរះ ត្រូវបានសមត្ថកិច្ចអនុញ្ញាតអោយត្រលប់ទៅផ្ទះវិញដោយមិនមានការពាក់ពន្ធ័បទល្មើសអ្វីនោះទេ។
បច្ចុប្បន្នស្ត្រីសង្ស័យខាងលើត្រូវបានឃុំបណ្តោះអាសន្ននៅអធិការខណ្ឌមានជ័យ និងកសាងសំណុំរឿងបញ្ជូនទៅតុលាការចាត់ការតាមនីតិវិធី៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
