រាជធានីភ្នំពេញ៖ក្រសួងធនធានទឹក និងឧតុនិយមបានចេញសេចក្តីជូនដំណឹងបន្ថែម ស្តីពីស្ថានភាពអាកាសធាតុនៅកម្ពុជាដោយបានអំពាវនាវសូមឲ្យបងប្អូនប្រជាពលរដ្ឋ បន្តបង្កើនការប្រុងប្រយ័ត្នខ្ពស់បំផុត ចំពោះបាតុភូតរន្ទះ និងខ្យល់កន្ត្រាក់ ជាពិសេស នាថ្ងៃទី ២៨ ទី ២៩ និងទី ៣០ ខែមេសា ២០១៧ ខណៈភ្លៀងនឹងបន្តធ្លាក់រាយប៉ាយ ក្នុងក្របខ័ណ្ឌស្ទើរទូទាំងប្រទេស រហូតដល់ថ្ងៃទី០៦ ខែឧសភា ឆ្នាំ២០១៧៕
ដោយ៖ប៉ែន សុផល
បាត់ដំបង៖ខ្យល់កន្ត្រាក់លាយឡំជាមួយភ្លៀងផ្គរ និងរន្ទះបានបោកបក់លើឃុំចំនួន២ក្នុងស្រុកមោងឫស្សីបណ្តាលអោយផ្ទះសំបែងរបស់ប្រជាពលរដ្ឋចំនួន១៩ខ្នងរងការបំផ្លាញយ៉ាងធ្ងន់ធ្ងរ។
កម្លាំងកងរាជអាវុធហត្ថខេត្តបាត់ដំបងបានអោយដឹងថា នៅវេលាម៉ោង២ និង៣៥នាទី ថ្ងៃទី២៤ ខែមេសា ឆ្នាំ២០១៧កន្លងមកនេះគ្រោះធម្មជាតិ និងភ្លៀងផ្គផងដែរបានបោកបក់ទៅលើឃុំតាលាស់ និងឃុំកកោះ ក្នុងស្រុកមោងឫស្សី ខេត្តបាត់ដំបងបណ្តាលអោយផ្ទះសំបែងទាំងធំទាំងតូចចំនួន១៩ខ្នងរងការបំផ្លាញយ៉ាងដំណំ។
នៅក្នុងចំណោមផ្ទះដែលរងការខូចខាតខាងលើនេះមានប្រភេទផ្ទះឈើប្រក់សង្ក័សីចំនួនចំនួន៥ខ្នងផ្ទះរងការបំផ្លាញអស់ខ្ទេចខ្ទីទាំងស្រុងនិងចំនួន១៤ខ្នងផ្ទះទៀតរងការប៉ះពាល់ពី២០ទៅ៣០ភាគរយដែលក្នុងនោះកើតមានលើឃុំកកោះចំនួន១៦ខ្នងនិងលើឃុំតាលាស់ចំនួន៣ខ្នង
គួរបញ្ជាក់ថា រយៈពេល១សប្តាហ៍កន្លងមកនេះ មានស្រុកចំនួន៦ហើយក្នុងខេត្តបាត់ដំបងដែលបណ្តាលអោយខូចខាតផ្ទះរបស់ប្រជាពលរដ្ឋដោយសារខ្យល់កន្ត្រាក់ ភ្លៀងដែលការប៉ះពាល់ធ្ងន់និងស្រាលសរុបចំនួន១១២ខ្នងផ្ទះជាមួយគ្នានេះក្រុមការងារកាកបាតក្រហមសាខាខេត្តបាត់ដំបងកំពុងជំរុញយុទ្ធនាការផ្តល់អំណោយដើម្បីចែករំលេក និងសង្គ្រោះបន្ទាន់ជាបន្តបន្ទាប់ផងដែរ៕
ខេត្តស្វាយរៀង៖យ៉ាងហោចណាស់ផ្ទះក្បឿងចំនួន២ខ្នងត្រូវបានដួលរលំនិងមនុស្សប្រុសស្រី៣នាក់រងរបួសស្រាលនិងធ្ងន់ ខណៈមេឃភ្លៀងស្រិចៗលាយឡំនិងខ្យល់កន្ត្រាក់ខ្លាំងៗបណ្តាលឲ្យដួលរលំសង្កត់ពីលើតែម្តង។ ហេតុការណ៍នេះកើតឡើងកាលពីវេលាម៉ោង១៤ និង៣០នាទីថ្ងៃទី២៥ ខែមេសា ឆ្នាំ២០១៧ ស្ថិតនៅក្នុងភូមិម្រាមខាងជើង ឃុំម្រាម ស្រុករមាសហែក ខេត្តស្វាយរៀង។
បើតាមពីកន្លែងកើតហេតុបានឲ្យដឹងថា៖នៅមុនពេលកើតហេតុនោះគឺមានពពកខ្មៅពេញផ្ទៃមេឃហើយមានភ្លៀងធ្លាក់ស្រិចលាយឡំនិងខ្យល់កន្ត្រាក់បោកបក់ខ្លាំងៗមួយសន្ទុះក្រោយមកឃើញផ្ទះរងគ្រោះខាងលើដួលរលំនិងមនុស្សនៅក្នុងផ្ទះបណ្តាលឲ្យសង្កត់តែម្តង។ ប្រភពដដែរបានឲ្យដឹងទៀតថា មានករណីខ្យល់កន្ត្រាក់បណ្តាលអោយដួលរលំផ្ទះ២ខ្នងសង់ពីឈើប្រក់ក្បឿងទំហំ៧ម៉ែត្រគុណ៧ម៉ែត្រដែលមានម្ចាស់ផ្ទះឈ្មោះងយ សុភាព ប្រុសអាយុ៣៧ឆ្នាំនៅភូមិឃុំកើតហេតុខាងលើ។ ប្រភពបញ្ជាក់ថា ករណីខាងលើនេះដែរបណ្ដាលអោយមនុស្សរងគ្រោះចំនួន៣នាក់ស្រី១នាក់រងរបួសធ្ងន់២នាក់ហើយអ្នករងគ្រោះទាំង៣នាក់នោះទី១មានឈ្មោះ ព្រំ សាវន់ ភេទប្រុស អាយុ៤៧ឆ្នាំរស់នៅ ភូមិ ម្រាមខាងជើង ឃុំម្រាម ស្រុករមាសហែក ខេត្តស្វាយរៀង រងរបួសបាក់កជើងខាងស្ដាំបែកក្បាលដេរ៤ថ្នេរបួសធ្ងន់។ ទី២.ឈ្មោះ គង់ សារឿន ភេទប្រុស អាយុ៤៤ឆ្នាំ នៅភូមិអណ្ដូងខ្មត់ ឃុំសំបួរ ស្រុករមាសហែក រងរបួសបាក់ចង្កេះរបួសធ្ងន់ និងទី៣.ឈ្មោះ កាន សុធីតា ភេទស្រី អាយុ៥ឆ្នាំ កូនម្ចាស់ផ្ទះរបួសពកចិញ្ចើមរបួសស្រាល រួមនិងខូចខាតសម្ភារះមួយចំនួនផងដែររួមមាន៖ម៉ូតូ២គ្រឿង អង្ករ១០តៅ ស្រូវ៨បាវ និងសម្ភារះមួយចំនួនទៀត។
ក្រោយពីកើតហេតុការណ៍គ្រោះធម្មជាតិនេះឃើញមានអាជ្ញាធរដែនដីប្រជាពលរដ្ឋមកជួយរុសរើផ្ទះដែលត្រូវរងគ្រោះ និងគ្រូពេទ្យយករថយន្តសង្គ្រោះដឹកជនរងគ្រោះទៅសង្គ្រោះនៅមន្ទីរពេទ្យនៅជិតមូលដ្ឋានផងដែរ៕
រាជធានីភ្នំពេញ៖ទីបំផុតសមាជរបស់គណបក្សសង្គ្រោះជាតិ នៅព្រឹកនេះបានសម្រេចកែប្រការ៤៧ថ្មីនៃលក្ខន្តិកៈរបស់ខ្លួន ស្តីពីការជ្រើសរើសអនុប្រធានគណបក្ស ។
លោក អេង ឆៃអ៊ាង មន្ត្រីជាន់ខ្ពស់របស់គណបក្សសង្គ្រោះជាតិ បានប្រាប់អ្នកសារព័ត៌មានថា ឡូវប្រការ៤៧ថ្មី នេះត្រូវបានធ្វើវិសោធនកម្មហើយ ដោយចាប់ពីពេលនេះតទៅ ការជ្រើសរើសអនុប្រធាន មិនត្រូវកំណត់រយៈពេលនោះឡើយ៕
ភ្នំពេញ៖រថយន្តបាឡែនដឹកឈើប្រណីតជាច្រើនដុំប្រុងលោតឆ័ត្រចូលភ្នំពេញតែត្រូវជួបគ្រោះចរាចរណ៍ជាមួយម៉ូតូដោះស្រាយគ្នាមិនចេញ ម្ចាស់រថយន្តដាក់មេព្រូច ពេលដែលសមត្ថកិច្ចចុះទៅ ហេតុការណ៍នេះកើតឡើងវេលាម៉ោង៧ និង៣០នាទីព្រឹកថ្ងៃទី២៥ ខែមេសា ឆ្នាំ២០១៧នៅចំណុចសាលារៀនជម្ពូវ័ន្តសង្កាត់ចោមចៅខណ្ឌពោធិ៍សែនជ័យ៕ ព័ត៌មានលំអិតបន្តិចទៀត
រាជធានីភ្នំពេញ៖យុវជនម្នាក់ដែលជាពលករខ្មែរ ទៅបម្រើការ ងារជាកម្មករសាងសង់នៅឯខេត្តប៉ាក់ធុមថានី ត្រូវបានក្រុម តម្រួតថៃតាមចាប់ខ្លួនរហូតដល់ស្រុកអារញ្ញប្រាក់ថេតបន្ទាប់ពីយុវជនរូបនេះ បានសម្លាប់ស្ត្រីម្នាក់ដែលជាថៅកែស្រីរបស់ ខ្លួន ដោយសារតែគំនុំផង និងចង់បានទ្រព្យសម្បត្តិរបស់ស្ត្រី នោះផង ។ យោងតាមរបាយការណ៍ដែលយើងទទួលបានគឺបានបញ្ជាក់ថា នៅថ្ងៃទី២៣ ខែមេសា ឆ្នាំ២០១៧ វេលាម៉ោង៣ ទៀបភ្លឺ មានករណីឃាតកម្មមួយបានកើតឡើងធ្វើអោយមានការច្រួលច្របល់ពីសំណាក់ប្រជាពលរដ្ឋដោយពួកគេមានការភ័យខ្លាច គឺហេតុការណ៍នេះបានកើតនៅក្នុងស្រុកខ្លងហ្លួង ខេត្ត ប៉ាក់ធុមថានី ប្រទេសថៃ ។
ក្រោយពីមានការចុះត្រួតពិនិត្យរបស់ក្រុមតម្រួតថៃរួចមក គេ បានអះអាងថា ជនរងគ្រោះគឺជាស្ត្រីដែលមាននាទីគ្រប់ គ្រងការងារកសាងផង និងត្រូវជាភរិយារបស់អនុប្រធាន ស្ថានីយ៍អយៈស្ម័យានខេត្ត ប៉ាក់ធុមថានីផងដែរ ។ ដោយឡែកមុខសញ្ញាសង្ស័យ ក៏ត្រូវបានកំណត់រួចជាស្រេច ហើយក្រុមតម្រួតក៏បានផ្តល់ជាសញ្ញាទៅកាន់ស្ថានីយ៍តម្រួតនៅឯស្រុកខ្លងលឹក និងស្រុកអារញ្ញប្រាក់ថេត ដើម្បីត្រៀម ស្កាត់ចាប់មុខសញ្ញាដែលអាចធ្វើដំណើររត់គេចខ្លួនវិលទៅរកស្រុកកំណើតរបស់គេវិញ ។
ទីបំផុតនៅវេលាម៉ោង១០ យប់ ថ្ងៃទី២៣ ខែមេសា ឆ្នាំ ២០១៧ កំលាំងតម្រួតបានចាប់ខ្លួនឃាតករនៅត្រង់ចំណុច ចំណតរថយន្តក្រុងអារញ្ញប្រាក់ថេត ខណៈដែលគេកំពុងចុះ ពីរថយន្តក្រុងខ្សែបាងកក អារញ្ញ ដោយជននេះមានឈ្មោះ ធី ភេទប្រុសអាយុ២៩ឆ្នាំ ជាកម្មករកសាងនៅក្នុងទីតាំងថៅកែ ស្រីដែលគេសំលាប់នោះតែម្តង ។
ក្រោយពីបាននាំខ្លួនយកទៅសាកសួរ ជនសង្ស័យដែលជា ពលករខ្មែរបានសារភាពថា ផ្ទះរបស់ថៅកែស្រីនោះខ្លួនធ្លាប់ បានចេញ ចូល ដូចផ្ទះខ្លួនឯងប្រមាណ៣ឆ្នាំមកហើយ ដោយ សារតែខ្លួនជាកម្មករកសាងអោយថៅកែស្រីរូបនោះ ។
ប៉ុន្តែ នៅពេល៣ថ្ងៃមុននេះខ្លួនត្រូវបានថៅកែស្រីបណ្តេញឲ្យឈប់ធ្វើការដោយសារតែគាត់បានដឹងថាខ្លួន ប្រើប្រាស់ថ្នាំញៀន ដោយសារបញ្ហានេះ ហើយទើបធ្វើអោយខ្លួនមានគំនុំ ព្រម ទាំងមានគំនិតលោភលន់ ចង់បានទ្រព្យសម្បត្តិរបស់គាត់ផង ទើបបានជាខ្លួនលបចូលទៅក្នុងបន្ទប់សំលាប់ថៅកែស្រី ហើយប្រមូលទ្រព្យសម្បត្តិទាំងនោះឡើងរថយន្តក្រុង ដើម្បីត្រឡប់ទៅកម្ពុជាវិញ តែត្រូវចាប់ខ្លួនបាន ។ បច្ចុប្បន្នជនសង្ស័យត្រូវបានញ្ជូនទៅកាន់ខេត្តប៉ាក់ធុមថានីវិញហើយដែលជាកន្លែងកើតហេតុ ដើម្បីធ្វើការសាកសួរបន្ត ព្រម ទាំងអោយធ្វើត្រាប់ឡើងវិញផង ហើយទុកអោយច្បាប់ជាអ្នកសម្រេច៕(ប្រភពអគ្គស្នងការដ្ឋាននគរបាលជាតិ )
ខេត្តកណ្តាល៖ជនដៃដល់ម្នាក់បាន ចូលទៅកាប់សម្លាប់ឪពុក-ម្តាយខាងស្រី បណ្តាលឲ្យស្លាប់ឪពុក និងម្តាយរងរបួសធ្ងន់ ខណៈខឹងចូលស្តីកូនក្រមុំមិនបាន។ ហេតុការណ៍ដ៏តក់ស្លុតនេះ បានបង្កឲ្យមានការភ្ញាក់ផ្អើល នៅយប់ថ្ងៃទី២៣ ខែមេសា ឆ្នាំ២០១៧ ស្ថិតនៅក្នុងរោងក្រោយផ្ទះជនរងគ្រោះ ស្ថិតក្នុងភូមិរកា ឃុំរកា ស្រុកកណ្តាលស្ទឹង ខេត្តកណ្តាល។
អាវុធហត្ថស្រុកកណ្តាលស្ទឹងបានប្រាប់ដឹងថា ជនរងគ្រោះជាឪពុកឈ្មោះ ឡូញ លុន អាយុ៦២ឆ្នាំ មុខរបរកសិករ ស្លាប់ខណៈកំពុងដេកលើអង្រឹងលង់លក់ ក៏ត្រូវបានជនសង្ស័យកាប់ត្រូវចំនួន៤ដាវ ចំក្បាលចំនួន១ដាវ កាប់ត្រូវពោះ១ដាវធ្លាយពោះវៀន កាប់ត្រូវដើមទ្រូងចំនួន១ដាវ និងកាប់ត្រូវកដៃចំនួន១ដា បណ្តាលឲ្យស្លាប់នៅកន្លែងកើតហេតុភ្លាមៗតែម្តង។
ចំណែក ស្ត្រីជាម្តាយឈ្មោះ វ័រ រ៉ៃ អាយុ៦០ឆ្នាំ មុខរបរកសិករ។ ខណៈកំពុងដេកលក់លើជាមួយប្តី ក៏ត្រូវជនសង្ស័យកាប់ត្រូវចំនួន២ដាវ (កាប់ត្រូវពោះខាងឆ្វេង ចំនួន១ដាវ បណ្តាលឲ្យធ្លាយពោះវៀន កាប់ត្រូវស្មាខាងស្តាំចំនួន១ដាវ និងត្រូវត្រចៀកស្តាំ១ដាវ(រងរបួសធ្ងន់)
អាវុធហត្ថបន្តទៀតថា ឃាតករឈ្មោះ សួន ឧត្តរា អាយុ៣៥ឆ្នាំ ស្រុកកំណើត ឃុំដីឥដ្ឋ ស្រុកកៀនស្វាយ ខេត្តកណ្តាល បច្ចុប្បន្នរស់នៅផ្ទះលេខ៤៩ ផ្លូវលំ ភូមិទ្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។លោកបានបញ្ជាក់ថាជនសង្ស័យស្រឡាញ់ និងចូលស្តីដណ្តឹងកូនស្រី ជនរងគ្រោះមិនបាន ដោយជនសង្ស័ យមានប្រពន្ធរួចមកហើយ។ ជនរងគ្រោះក៏ធ្លាប់មកប្តឹង (ផ្ទាល់មាត់)នៅសមត្ថកិច្ចប៉ុស្តិ៍ឃុំរការួចហើយដែរ។
បច្ចុប្បន្នសពជនរងគ្រោះ ត្រូវបានប្រគល់ឲ្យបងប្អូនធ្វើបុណ្យតាមប្រពៃណី ខណៈម្តាយរងរបួសធ្ងន់ត្រូវបានបញ្ជូនទៅ មន្ទីរពេទ្យភ្នំពេញ(ពេទ្យរុស្សី) ដោយឡែកជនសង្ស័យសមត្ថកិច្ច អ.ហ និងន.ប កំពុងចាត់ការតាមនីតិវិធី៕
អាហ្គានីស្ថាន៖យោងតាមបណ្តាញសារព័ត៌មាន ប៊ីប៊ីស៊ី ផ្សាយថា រដ្ឋមន្ត្រីក្រសួងការពារជាតិអាហ្គានីស្ថាន និងមេបញ្ជាការមួយចំនួនទៀតបានប្រកាសលាលែងពីតំណែង បន្ទាប់ពីការវាយប្រហារលើបន្ទាយយោធាពីសំណាកពួកតាលីបង់បណ្តាលឲ្យស្លាប់និង របួសទាហានជាង១០០នាក់។
ការប្រកាសលាលែងពីតំណែងរបស់រដ្ឋមន្ត្រីការពារជាតិអាហ្គានីស្ថានលោក Abdullah Habibi និងមេបញ្ជការយោធាលោក Qadam Shah Shaheem នេះធ្វើឡើងស្របពេលដែលរដ្ឋមន្ត្រីការពារជាតិអាមេរិកលោក Jim Mattis ធ្វើដំណើរទៅបំពេញទស្សនកិច្ចនៅរដ្ឋធានីកាប៊ុលដោយមិនបានប្រកាសជាសាធារណៈ។
ការប្រកាសលាលែងពីតំណែងធ្វើឡើងតាមសេចក្តីថ្លែងការណ៍របស់ការិយាល័យប្រធានាធិបតី ក្រោយការវាយប្រហារនោះមានការមិនពេញចិត្តជាច្រើនពីប្រជាពលរដ្ឋអាហ្គានីស្ថាន ដោយពួកគេចោទសួរពីសមត្ថភាពរបស់រដ្ឋាភិបាល ក្នុងការទប់ទល់ជាមួយពួកក្រុមឧទ្ទាមតាលីបង់។
គួរបញ្ជាក់ថា ការវាយប្រហារមួយបានកើតឡើងកាលពីថ្ងៃសុក្រលើបន្ទាយយោធាមួយកន្លែងនៅក្បែរទីក្រុង Mazar-e Sharif ដោយពួកបះបោរបើកការវាយប្រហារគោលដៅលើកងទ័ព៕
រាជធានីភ្នំពេញ៖កាលពីថ្ងៃទី២៤ ខែមេសា ឆ្នាំ២០១៧ម្សិលមិញនេះក្រសួងធនធានទឹក និងឧតុនិយម បានចេញមកបញ្ជាក់ពីមូលហេតុដែលភ្លៀងធ្លាក់លាយឡំជាមួយទឹកកក បានបង្អោចុះមកក្នុងទឹកដីក្រុងបានលុង ខេត្តរតនគិរី ជូនសាធារណជនឲ្យបានជ្រាប។
ព័ត៌មានលម្អិតសូមអានសេចក្តីជូនដំណឹងរបស់ក្រសួងធនធានទឹក និងឧតុនិយម ខាងក្រោយនេះ៖
ព្យុងយ៉ាង៖រដ្ឋាភិបាលកូរ៉េខាងជើងបានអះអាងថា នឹងនៅតែបន្តអភិវឌ្ឍន៍អាវុធនុយក្លេអ៊ែរទៅមុខទៀត ដើម្បីការពារខ្លួនប្រឆាំងនឹងការគំរាមកំហែងផ្នែកយោធា ពីសំណាក់សហរដ្ឋអាមេរិក។ នេះបើតាមការ ទីភ្នាក់ងារព័ត៌មានចិន ស៊ិនហួរ។
សារព័ត៌មានផ្លូវការរបស់រដ្ឋាភិបាលទីក្រុងព្យុងយ៉ាងឈ្មោះ Rodong Sinmum បានលើកឡើងនៅក្នុងសេចក្តីអត្ថាធិប្បាយរបស់ខ្លួនថា ការបោះជំហានរបស់អាមេរិក ក្នុងការបញ្ជូននាវាផ្ទុកយន្តហោះចម្បាំង និងនាវាចម្បាំងប៉ុន្មានគ្រឿងមកកាន់ឧបទ្វីបកូរ៉េ ជាទង្វើគ្រោះថ្នាក់ជាទីបំផុត។
Rodong Sinmunm បានបញ្ជាក់យ៉ាងដូច្នេះថា «ការគំរាមកំហែងដោយបើកចំហប្រឆាំងនឹងកូរ៉េខាងជើង គឺជាសកម្មភាពដ៏គ្រោះថ្នាក់មួយ ដែលកំពុងរុញច្រានឧបទ្វីបកូរ៉េឲ្យធ្លាក់ទៅក្នុងភាពមិនច្បាស់លាស់។ ប៉ុន្តែជំហរយ៉ាងរឹងមាំឥតងារេនោះគឺឆន្ទៈដ៏មុះមុត របស់កងទ័ពព្រមទាំងប្រជាពលរដ្ឋកូរ៉េខាងជើង រួមជាមួយការតាំងចិត្ត ដើម្បីកម្ចាត់ពួកឈ្លានពានឲ្យអស់មិនឲ្យមានសល់សូម្បីតែម្នាក់ ក៏ដូចជាតទល់ជាមួយសហរដ្ឋអាមេរិក តាមរយៈពេលបង្កើនសមត្ថភាពនុយក្លេអ៊ែរសម្រាប់ការពារខ្លួន»៕
ខេត្តស្វាយរៀង៖បុរសម្នាក់កំពុងតែជិះម៉ូតូទាំងមេឃភ្លៀងរលឹមផងនោះក៏ត្រូវរន្ទះបាញ់បណ្តាលអោយស្លាប់ភ្លាមៗនៅកន្លែង ដែលហេតុការណ៍នេះបានកើតឡើងកាលពីវេលាម៉ោង៣ និង១៥នាទីរសៀលថ្ងៃទី២៣ ខែមេសា ឆ្នាំ២០១៧នៅកណ្តាលវាលចន្លោះពី ភូមិរោទ៌ និងភូមិព្រៃចំណា ស្ថិតក្នុង ឃុំខ្សែត្រ ស្រុកកំពង់រោទិ៍ ខេត្តស្វាយរៀង។
បើយោងតាមសេចក្តីរាយការណ៍ពីប្រជាពលរដ្ឋបានអោយដឹងថា នៅមុនពេលកើតហេតុគេឃើញបុរសរងគ្រោះខាងលើជិះម៉ូតូតែម្នាក់ឯងដោយមានភ្លៀងធ្លាក់ស្រាប់តែមានផ្លេកបន្ទោលបែកផ្កាភ្លើងចង់រយះមេឃមួយសន្ទុះភ្លាមនោះលឺសំឡេងរន្ទះបាញ់និងផ្កាភ្លើងចំបុរសខាងលើដួលម៉ូតូដាច់ខ្យល់ស្លាប់ភ្លាមៗតែម្តង។ សមត្ថកិច្ចមូលដ្ឋានបានបញ្ជាក់ថា បុរសរងគ្រោះដែលស្លាប់ដោយរន្ទះបាញ់នេះមានឈ្មោះ ពៅ សំអុល រស់នៅ ភូមិត្រពាំងស្មាច់ ឃុំខ្សែត្រ ស្រុកកំពង់ទោទិ៍ ខេត្តស្វាយរៀង។
ក្រោយពីរន្ទះបាញ់ចំបុរសខាងលើដួលជាប់ជាមួយម៉ូតូនោះប្រជាពលរដ្ឋរស់នៅជិតកន្លែងកើតហេតុបាននាំគ្នាមកលើកនិងជួយធ្វើចលនាអោយក៏ប៉ុន្តែអកុសល្យជនរងគ្រោះបានស្លាប់បាត់បង់ជីវិតបាត់ទៅហើយ។ សពជនរងគ្រោះត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី៕
សេអ៊ូល៖ទីភ្នាក់សារព័ត៌មានយ៉ុនហាប់ បានឲ្យដឹងថាកាលពីថ្ងៃទី២១ ខែមេសា ពលរដ្ឋអាមេរិកទី០៣ម្នាក់ត្រូវបានអាជ្ញាធរកូរ៉េខាងជើងចាប់ខ្លួននៅឯអាកាសយានដ្ឋានអន្តរជាតិ ទីក្រុងព្យុងយ៉ាង នៅអំឡុងពេលត្រៀមចាកចេញពីប្រទេស កុម្មុយនីស្ដមួយនេះ។
ការចាប់ខ្លួនបុរស៣នាក់ខាងលើនេះ មិនទាន់ត្រូវបានទម្លាយ ឱ្យដឹងនៅឡើយទេ ប៉ុន្តែតាមអះអាងរបស់សារព័ត៌មានដដែលបានបញ្ជាក់ថា ពលរដ្ឋអាមេរិកដើមកំណើតកូរ៉េ មាននាមត្រកូលគីម ដែលធ្វើការងារជាគ្រូបង្រៀននៅឯសកលវិទ្យាល័យ បច្ចេកវិទ្យានិងវិទ្យាសាស្ត្រ Yanbian ក្នុងប្រទេសចិន ព្រមទាំងជាអ្នកដឹកនាំសកម្មភាពជំនួយមនុស្សធម៌សម្រាប់កូរ៉េខាងជើង។
គួរបញ្ជាក់ថា លោក គីម ជាពលរដ្ឋអាមេរិក ទី០៣ហើយ ត្រូវបានចាប់ឃុំខ្លួននៅកូរ៉េខាងជើង បន្ទាប់ពីលោក Kim Dong-chul និងនិស្សិតអាមេរិកម្នាក់ទៀតឈ្មោះ Otto Warmbier ដែលត្រូវបានកាត់ ទោស និងឃុំខ្លួនពីបទចោទប្រកាន់ថា បានធ្វើសកម្មភាពប្រឆាំងនឹងរដ្ឋាភិបាលលោក គីម ជុងអ៊ុន៕
អូស្រាលី៖អនុប្រធានាធិបតីអាមេរិក លោក Mike Pence បានថ្លែងកាលពីថ្ងៃម្សិលមិញថា នាវាដឹកយន្តហោះចម្បាំងដ៏ធំរបស់អាមេរិកឈ្មោះ Carl Vinson នឹងធ្វើដំណើរទៅដល់សមុទ្រជប៉ុននៅប៉ុន្មានថ្ងៃទៀតនេះ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន AFP។
ការលើកឡើងបែបនេះរបស់លោក Pence គ្រាដែលលោកកំពុងស្ថិតនៅទីក្រុងស៊ីដនី ដែលជាការបកស្រាយនឹងមន្ទិលសង្ស័យ និងការចោទសួរថា តើនាវាផ្ទុកយន្តហោះដ៏ធំមួយនេះ ស្ថិតនៅកន្លែងណា ចាប់តាំងពីវាត្រូវបានគេប្រកាសថា ធ្វើដំណើរទៅជិតឧបទ្វីបកូរ៉េកាលពីសប្ដាហ៍មុន។
ជាមួយគ្នានេះលោក Pence បានអះអាងថា ការរំសាយកម្មវិធីនុយក្លេអ៊ែររបស់កូរ៉េខាងជើង នៅតែអាចសម្រេចទៅបានដោយសន្តិវិធី ដោយសារតែការចូលរួមរបស់ក្រុងវ៉ាស៊ីងតោននាពេលថ្មីៗនេះជាមួយប្រទេសចិន បើទោះបីជាមានក្ដីបារម្ភយ៉ាងខ្លាំងថា កូរ៉េខាងជើងអាចនឹងសាកល្បងគ្រាប់បែកនុយក្លេអ៊ែរជាថ្មីម្ដងទៀតនាពេលឆាប់ៗនេះក៏ដោយ។
លោក Pence បានថ្លែងដូច្នេះថា «លោកជឿជាក់យ៉ាងពិតប្រាកដថា នៅមានឱកាសដែលសម្ព័ន្ធមិត្តនៅក្នុងតំបន់ រួមទាំងប្រទេសចិន អាចសម្រេចនូវគោលដៅជាប្រវត្តិសាស្ត្រ ក្នុងការរំសាយកម្មវិធីនុយក្លេអ៊ែរនៅលើឧបទ្វីបកូរ៉េតាមបែបសន្តិវិធី»៕
រាជធានីភ្នំពេញ៖នៅថ្ងៃចន្ទ ទី២៤ ខែមេសា ឆ្នាំ២០១៧នេះសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោក ង្វៀន សួនហ្វ៊ុក នាយករដ្ឋមន្ត្រីវៀតណាមរួមគ្នាសម្ពោធដាក់ឲ្យប្រើប្រាស់ផ្លូវ និងស្ពានឆ្លងកាត់ព្រំដែនកម្ពុជា-វៀតណាម (ជ្រៃធំ-ឡុងប៊ិញ) តម្លៃជាង៣៦លានដុល្លារអាមេរិក ជាមួយការរំពឹងផ្តល់ប្រយោជន៍ ច្រើនសម្រាប់ប្រជាពលរដ្ឋនៃប្រទេសទាំងពីរ ជាពិសេសប្រជាពលរដ្ឋ នៅជាប់ព្រំដែនតែម្តង។
គម្រោងសាងសង់ស្ពានមិត្តភាពកម្ពុជា-វៀតណាម ជ្រៃធំ-ឡុងប៊ិញ ឆ្លងកាត់ដៃទន្លេបាសាក់ ហៅ ព្រែកជ្រៃធំ ឬ ព្រែកបាក់ដាយ ព្រំប្រទល់កម្ពុជា-វៀតណាម មានចម្ងាយ ១.២២៥ ម៉ែត្រ ពីចំណុចប្រសព្វទន្លេបាសាក់ និងព្រែកជ្រៃធំ ស្ថិតនៅក្នុងភូមិជ្រៃធំ ឃុំសំពៅពូន ស្រុកកោះធំ ខេត្តកណ្តាល តភ្ជាប់ពីផ្លូវជាតិលេខ២១ ក្នុង ខេត្តកណ្តាល ទៅនឹងផ្លូវជាតិលេខ៩៥៦ ក្នុងខេត្តអានយ៉ាង នៃសាធារណរដ្ឋ សង្គមនិយម វៀតណាម។ នេះបើតាមលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។
លោកទេសរដ្ឋមន្ត្រីបន្តថា ស្ពាននេះមានបណ្តោយប្រវែង ៤២៧.៤៤ម៉ែត្រ ក្នុងនោះភាគីកម្ពុជា ទទួលបន្ទុកសាងសង់ប្រវែង ២១៣.៧២ ម៉ែត្រ និងភាគីវៀតណាម ទទួលបន្ទុកសាងសង់ប្រវែង ២១៣.៧២ម៉ែត្រ ជាប្រភេទស្ពានប្រអប់បេតុងអារមេ សរសៃដែកទាញ មានទទឹង ១៣,៥០ម៉ែត្រ ចែកជាពីរគន្លងសម្រាប់ផ្លូវរថយន្ត (មួយទៅមួយមក) ដែលគន្លងនីមួយៗ មានទទឹង ៣,៥០ម៉ែត្រ និង ផ្លូវសម្រាប់ថ្មើរជើង ដែលមានទទឹង ២,៥០ម៉ែត្រ អមដោយបង្កាន់ដៃទទឹង ០,២៥ម៉ៃត្រសងខាង។
បើតាមលោករដ្ឋមន្ត្រី ស៊ុន ចាន់ថុល ផ្លូវ និងស្ពាននេះ ត្រូវបានសាងសង់ម្នាក់ពាក់កណ្តាល ពោលភាគីកម្ពុជា សាងសង់ផ្លូវតភ្ជាប់ពីគល់ស្ពាន ដល់ផ្លូវជាតិលេខ២១ ប្រវែងសរុប ២,៦៧៤ម៉ែត្រ ទទឹង ១២ម៉ែត្រ រួមទាំងសង់ស្ពានឆ្លងព្រែកតូចៗ ចំនួន ០២កន្លែង និង សង់លូមូល ៥កន្លែង រីឯភាគីវៀតណាម សាងសង់ផ្លូវតភ្ជាប់ស្ពាន ដែលមានប្រវែងសរុប ២.៧០០ម៉ែត្រ និងទទឹង ១២ម៉ែត្រ។
ការសាងសង់នេះចំណាយថវិកាសរុប ៣៦.៥៦លានដុល្លារអាមេរិក ក្នុងនោះកម្ពុជា ចំណាយជិត ១៦លានដុល្លារអាមេរិក។ រីឯភាគីវៀតណាម ចំណាយជិត ១៨លានដុល្លារអាមេរិក។ ការសាងសង់ប្រើរយៈពេល ២៧ខែ ចាប់ពីខែធ្នូ ឆ្នាំ២០១៤ និងបានបញ្ចប់ នៅខែមេសា ឆ្នាំ២០១៧នេះ៕(ប្រភព FN )
ខេត្តពោធិ៍សាត់៖អ្នកដំណើរ១០នាក់រងរបួសធ្ងន់ និង៤នាក់ផ្សេងទៀតរងរបួសស្រាល បន្ទាប់ពីរថយន្តសាំយ៉ុង១គ្រឿង បានជ្រុលទៅបុកគល់ស្ពានប៉ាឡេ គ្រាដែលតៃកុងស្រវឹងធ្លាក់ភ្នែក។ ហេតុការណ៍នេះកើតឡើងនៅរសៀលថ្ងៃទី២៣ ខែមេសា ឆ្នាំ២០១៧ នៅចំណុចស្ពានលេខ១២០ ព្រំប្រទល់ខេត្តពោធិ៍សាត់ និងខេត្តកំពង់ឆ្នាំង ស្ថិតក្នុងភូមិចាមចាស់ ឃុំឈើតុំ ស្រុកក្រគរ ខេត្តពោធិ៍សាត់។
អធិការនគរបាលស្រុកក្រគរ លោក ឯម រុន បានឲ្យដឹងថា រថយន្ត១គ្រឿងខាងលើ ពាក់ស្លាកលេខ ភ្នំពេញ 2AC-5741 បើកបរដោយឈ្មោះ នឹម ផល្លា អាយុ៣២ឆ្នាំ និងអ្នករួមដំណើរ១៣នាក់ទៀត។ ជនរងគ្រោះទាំងអស់ជាប្រជាពលរដ្ឋ រស់នៅភូមិផ្សារ ឃុំផ្សារ ស្រុកបរិបូណ៌ ខេត្តកំពង់ឆ្នាំង។
លោកអធិការបន្តថា មុនពេលកើតហេតុ ជនរងគ្រោះទាំងអស់មកលេងទឹកនៅរមណីយដ្ឋានទឹកធ្លាក់ច្រកល្អៀង ពេលត្រឡប់មកវិញ អ្នកបើកបរខាងលើទំនងជាស្រវឹង ហើយងងុយដេកផងនោះ ក៏ងោកលើរថយន្តលក់មួយភាំង ទើបបណ្តាលឱ្យជួបគ្រោះថ្នាក់បុកគល់ ស្ពានតែម្តង រងរបួសធ្ងន់បាក់ដៃជើងមនុស្ស១០នាក់ និងស្រាល៤នាក់។
ក្រោយពេលកើតហេតុ ជនរងគ្រោះទាំង១៤នាក់ ត្រូវបានរថយន្តសង្គ្រោះដឹកយកទៅសង្គ្រោះបន្ទាន់ នៅមន្ទីរពេទ្យបង្អែកខេត្តកំពង់ឆ្នាំង ដោយឡែករថយន្តបង្កត្រូវបានស្ទូចយកទៅរក្សាទុកនៅប៉ុស្តិ៍នគរបាលឈើទុំ ដើម្បីដោះស្រាយនៅពេលក្រោយ៕
