ខេត្តរតនគិរី៖ស្នងការរងទទួលបន្ទុកព្រហ្មទណ្ឌ លោកឧត្តមសេនីយ៍ត្រី ផែន ឌីណា បានឲ្យដឹងថា កម្លាំងសមត្ថកិច្ចបានធ្វើការស្រាវជ្រាវឃាត់ខ្លួនជនសង្ស័យម្នាក់ពាក់ព័ន្ធករណីមនុស្សឃាតកាលពីថ្ងៃទី០៨ ខែមីនា ឆ្នាំ២០០៩នៅចំណុចភូមិអូរតាប៉ាង ឃុំឧកញ៉ាហេង ស្រុកព្រៃនប់ ខេត្តព្រះសីហនុ។
លោកឧត្តមសេនីយ៍ត្រីបន្តថា ការឃាត់ខ្លួននេះធ្វើឡើងនៅចំណុចភូមិកាទៀង ឃុំល្បាំង១ ស្រុកលំផាត់ដោយមានកិច្ចសហការរវាងម្លាំងនគរបាលខេត្តព្រះសីហនុ និងកម្លាំងនគរបាលខេត្តរតនគិរី។ លោកស្នងការរងបញ្ជាក់ថា ជនសង្ស័យដែលឃាត់ខ្លួនខាងលើនេះឈ្មោះ ថាច់ យ៉ាង អាយុ៣២ឆ្នាំ។ លោកបញ្ជាក់ថា ការស្រាវជ្រាវឃាត់ខ្លួនជនសង្ស័យខាងលើ ដោយអនុវត្តតាមដីកាបង្គាប់ឲ្យចាប់ខ្លួនលេខ៣៣ ចុះថ្ងៃទី២៥ ខែមីនា ឆ្នាំ២០០៩ ដោយចៅក្រមស៊ើបសួរ គឹម អេង នៃសាលាដំបូងខេត្តព្រះសីហនុ ពីបទមនុស្សឃាតដោយចេតនា។
បច្ចុប្បន្នជនសង្ស័យត្រូវសមត្ថកិច្ចឃុំខ្លួនបណ្តោះអាសន្ននៅស្នងការដ្ឋាននគរបាលខេត្តរតនគិរី រង់ចាំកម្លាំងជំនាញខេត្តព្រះសីហនុមកទទួលយកទៅចាត់ការតាមនីតិវិធី៕
ប៉េកាំង៖ក្រសួងការពារជាតិចិនបានចេញមុខច្រានចោលភ្លាមៗ ចំសេចក្តីរាយការណ៍ព័ត៌មានរបស់ CNN ដែលថា រដ្ឋាភិបាលទីក្រុងប៉េកាំង បានបញ្ជាឲ្យកងយន្តហោះចម្បាំង រួមទាំងទម្លាក់គ្រាប់បែក-មីស៊ីល ត្រៀមប្រុងជើងការក្នុងកម្រិតខ្ពស់បំផុតចំពោះភាពតានតឹងនៅកូរ៉េខាងជើងនោះ។ នេះបើយោងតាមសារព័ត៌មាន Channel News Asia។
គួរបញ្ជាក់ថា កាលពីម្សិលមិញទូរទស្សន៍ CNN បានផ្សាយដោយដកស្រង់សម្តីមន្ត្រីក្រសួងការពារជាតិអាមេរិកថា កងទ័ពអាកាសជួរមុខ អមដោយយន្តហោះចម្បាំង និងយន្តហោះទម្លាក់គ្រាប់បែក-មីស៊ីលរបស់ប្រទេសចិន ត្រូវបានទទួលបានបញ្ជាឲ្យស្ថិតនៅក្នុងការប្រុងជើងការកម្រិតខ្ពស់បំផុត ត្រៀមខ្លួនឆ្លើយតបនឹងស្ថានការណ៍នៅកូរ៉េខាងជើង ក្នុងករណីមានការផ្ទុះសង្គ្រាមឡើង។
ជុំវិញព័ត៌មានខាងលើនេះក្រសួងការពារចិនបានចេញមុខច្រានចោលភ្លាមៗ ដោយអះអាងថា ការចល័តទ័ព និងសកម្មភាពយោធាផ្សេងទៀតនៅតំបន់ព្រំដែនចិន និងកូរ៉េខាងជើងនោះគឺជារឿងធម្មតា ដែលយោធាតែងតែរៀបចំការបង្វឹក និងត្រៀមលក្ខណៈនានា ទៅតាមអ្វីដែលខ្លួនធ្លាប់ធ្វើតែប៉ុណ្ណោះ៕
រាជធានីភ្នំពេញ៖បុរសជនជាតិចិនម្នាក់ និងស្ត្រីខ្មែរម្នាក់ត្រូវបានចៅក្រមស៊ើបសួរសាលាដំបូងរាជធានីភ្នំពេញលោក សេង រិទ្ធី កាលពីនៅរសៀលថ្ងៃទី២១ ខែមេសា ឆ្នាំ២០១៧ បានចេញដីកាបង្គាប់ឲ្យឃុំខ្លួនជាបណ្ដោះអាសន្នពាក់ព័ន្ធករណីនាំស្ត្រីខ្មែរទៅរៀបការនៅប្រទេសចិនខុសច្បាប់។
សមត្ថកិច្ចបានឲ្យដឹងថា ជនជាប់ចោទទី១ជាបុរសជនជាតិចិន (មិនស្គាល់ឈ្មោះ) និងទី២ ឈ្មោះ ស្រាប លីអេង ភេទស្រី អាយុ៣៤ឆ្នាំ ជនជាតិខ្មែរ ត្រូវបានតំណាងអយ្យការអមសាលាដំបូងរាជធានីភ្នំពេញ លោក រៀល សុភិន ចោទប្រកាន់ពីបទនាំមនុស្សចេញទៅក្រៅប្រទេសដោយមិនស្របច្បាប់ដោយមានគោលដៅ ប្រព្រឹត្តនៅរាជធានីភ្នំពេញអំឡុងឆ្នាំ២០១៥ ដល់២០១៧ យោងតាមមាត្រា ១០នៃច្បាប់ បង្ក្រាបអំពើជួញដូរមនុស្ស និងអំពើអាជីវកម្មផ្លូវភេទ។
សមត្ថកិច្ចបានបញ្ជាក់ថា ជនជាប់ចោទទាំង២នាក់ត្រូវបានសមត្ថកិច្ចនាយកដ្ឋាន ប្រឆាំងការជួញដូរមនុស្ស និងការពារអនីតិជន នៃក្រសួងមហាផ្ទៃ ឃាត់ខ្លួនកាលពីព្រឹកថ្ងៃទី២០ ខែមេសា ឆ្នាំ២០១៧ នៅបន្ទប់ជួលលេខ២៦ ផ្លូវលំក្បែរសួនកាណាឌីយ៉ា ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ខណៈរៀបចំគម្រោងនាំស្រី្តខ្មែរជាច្រើននាក់ទៅរៀបការជាមួយបុរសជនជាតិចិន នៅប្រទេសចិន៕
រាជធានីភ្នំពេញ៖កម្លាំងនគរបាលនាយកដ្ឋានស៊ើបអង្កេត និងអនុវត្តនិតិវិធី នៃអគ្គនាយកដ្ឋានអន្តោប្រវេសន៍ សហការជាមួយកម្លាំងនគរបាលរាជធានីភ្នំពេញ ក្រោមការសម្របសម្រួលពីលោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញបានឃាត់ខ្លួនជនជាតិវៀតណាម២៧នាក់ឆ្លងដែនចូលមករស់នៅដោយគ្មានឯកសារត្រឹមត្រូវ។
ការឃាត់ជនជាតិវៀតណាមទាំង២៧នាក់នេះធ្វើឡើងហាងលក់កាហ្វេ និងផ្ទះជួល នៅផ្លូវ២២៣ ស្ថិតក្នុងភូមិ១០ សង្កាត់ផ្សារដើមគរ ខណ្ឌទួលគោក កាលពីនៅថ្ងៃទី២១ ខែមេសា ឆ្នាំ២០១៦ម្សិលមិញនេះ។
លោកឧត្តមសេនីយ៍ទោ អ៊ុក ឡៃស៊ា បានអោយដឹងថា ក្នុងកិច្ចប្រតិបត្តិការខាងលើ សមត្ថកិច្ចបានធ្វើការឃាត់ខ្លួនជនជាតិវៀតណាមចំនួន២៧នាក់ ស្រី៨នាក់ ដោយសារឆ្លងដែនចូលមករស់នៅដោយគ្មានឯកសារត្រឹមត្រូវ។ លោកបញ្ជាក់ថា ក្រោយឃាត់ខ្លួន ជនជាតិៀតណាមទាំង២៧នាក់ត្រូវសមត្ថកិច្ចបញ្ជូនទៅអគ្គនាយកដ្ឋានអន្តោប្រវេសន៍ដើម្បីត្រួតពិនិត្យឯកសាជាថ្មី៕
រាជធានីភ្នំពេញ៖មានករណីអគ្គិភ័យមួយបានឆាបឆេះនៅក្នុងព្រះវិហារក្នុងវត្តសន្សំកុសលបង្កឲ្យមានការភ្ញាក់ផ្អើលទាំងព្រឹក ដែលហេតុការណ៍នេះបានកើតឡើងកាលពីព្រឹកថ្ងៃទី២២ ខែមេសា ឆ្នាំ២០១៧ ស្ថិតនៅវត្តសន្សំកុសល ក្នុងសង្កាត់បឹងទំពុន ខណ្ឌមានជ័យ រាជធានីភ្នំពេញ។
គ្រោះអគ្គិភ័យនេះកើតឡើងដោយសារតែរលំទៀនមកលើកំរាលព្រំ ទើបបង្កជាអគ្គិភ័យតែម្តង តែសំណាងល្អមិនបង្កគ្រោះថ្នាក់ធ្ងន់ធ្ងរអ្វីឡើយ។ សមត្ថកិច្ចជំនាញបានឲ្យដឹងថា គ្រោះអគ្គិភ័យបានរលត់ទៅវិញ ដោយប្រើប្រាស់រថយន្តពន្លត់អគ្គិភ័យអស់៣គ្រឿង៕
បាងកក៖ឧបនាយករដ្ឋមន្ត្រីថៃលោក Wissanu Krea-ngam បានប្រកាសកាលពីម្សិលមិញថា ព្រះរាជពិធីឡើងគ្រងរាជ្យសម្បត្តិជាផ្លូវការរបស់ស្តេចអង្គថ្មី ព្រះបាទមហា វិច្ចិរ៉ាឡុងកន នឹងប្រារព្ធធ្វើឡើងនៅអំឡុងចុងឆ្នាំ២០១៧ខាងមុខនេះ ប៉ុន្តែលោកមិនបានពីការបរិច្ឆេទច្បាស់លាស់នោះទេ។
ការប្រកាសបែនេះធ្វើឡើងបន្ទាប់ពីបានចេញសេចក្តីប្រកាស អំពីពេលវេលានៃព្រះរាជពិធីបូជាព្រះសពអតីតព្រះមហាក្សត្រថៃ ព្រះបាទ ភូមិបុល អាប់ឌុលយ៉ាដេត។ នេះបើតាមការផ្សាយរបស់ Channel News Asia ។
អតីតព្រះមហាក្សត្រថៃ ព្រះបាទ ភូមិបុល អាប់ឌុលយ៉ាដេត បានសោយព្រះទិវង្គតក្នុងជន្មាយុ ៨៨ព្រះវស្សានៅថ្ងៃទី១៣ ខែតុលា ឆ្នាំ២០១៦ ក្រោយពីទទួលរងអការៈរោគរុំារ៉ៃអស់ជាច្រើនឆ្នាំ ប៉ុន្តែព្រះអង្គមិនដែលបានយាងទៅព្យាបាលនៅបរទេសនោះឡើយ។ ក្រោយព្រះអង្គសោយទិវង្គត រាជទាយាទព្រះនាម មហា វិច្ចិរ៉ាឡុងកន បានឡើងគ្រងរាជ្យសម្បត្តិបន្តនៅដើមខែធ្នូ ឆ្នាំ២០១៦។
ព្រះសពរបស់អតីតព្រះមហាក្សត្រថៃ ព្រះបាទ ភូមិបុល អាប់ឌុលយ៉ាដេត នឹងត្រូវប្រារព្ធព្រះរាជពិធីបូជា នៅថ្ងៃទី២៦ ខែតុលា ឆ្នាំ២០១៧ ខាងមុខនេះ ដែលវាមានរយៈមួយឆ្នាំ និង១៣ថ្ងៃ បន្ទាប់ពីព្រះអង្គសោយទិវង្គតនៅក្នុងមន្ទីរពេទ្យទីក្រុងបាងកកប្រទេសថៃ ដែលនឹងប្រារព្ធទៅរយៈពេល ០៥ថ្ងៃ ចាប់ផ្តើមពីថ្ងៃទី២៦ ខែតុលា ឆ្នាំ២០១៧នោះ៕
រាជធានីភ្នំពេញ៖ក្រសួងពាណិជ្ជកម្មបានចេញផ្សាយតារាងតម្លៃប្រេងឥន្ធនៈ ដែលត្រូវលក់រាយ តាមបណ្តាស្ថានីយប្រេងទូទាំងប្រទេសកម្ពុជា ចាប់ពីថ្ងៃទី២២ ខែមេសា ដល់ថ្ងៃទី០១ ខែឧសភា មានដូចជា៖
រាជធានីភ្នំពេញ៖មេធាវីការពារក្ដីជួប សម្លាប់ គឺ លោក យុង ផានិត ថ្លែងប្រាប់នៅព្រឹកថ្ងៃទី២១ ខែមេសា ឆ្នាំ២០១៧ ថា លោកបានដាក់ពាក្យបណ្ដឹងឧទ្ធរណ៍កាលពីថ្ងៃទី២០ ខែមេសា តាមឆន្ទៈរបស់កូនក្តី ។ លោកមេធាវី អះអាងថា មូលហេតុនៃការប្តឹងឧទ្ធរណ៍នេះ ដោយសារ ជួប សម្លាប់ យល់ថា ទោសជាប់ពន្ធនាគារអស់មួយជីវិត គឺ ធ្ងន់ធ្ងរពេកដែលធ្វើឲ្យគេគ្មានឱកាសកែប្រែកំហុស ហើយគេសង្ឃឹមថា សាលាឧទ្ធរណ៍នឹងផ្តល់ស្ថានសម្រាលទោសដល់រូបគេ ។
គួរបញ្ជាក់ថា ជនជាប់ចោទ ត្រូវបានសាលាដំបូងរាជធានីភ្នំពេញ កាលពីថ្ងៃទី២៣ ខែមីនា ឆ្នាំ២០១៧ ផ្តន្ទាទោសអស់មួយជីវិត ពាក់ព័ន្ធឃាតកម្មលើលោកបណ្ឌិត កែម ឡី ក្រោមការចោទប្រកាន់ពីបទឃាតកម្មគិតទុកជាមុន និងបទរក្សាទុកអាវុធខុសច្បាប់ តាមមាត្រា២០០និងមាត្រា៤៩០នៃក្រមព្រហ្មទណ្ឌ ។
លោក យុង ផានិត ធ្លាប់ថ្លែងប្រាប់ក្រុមអ្នកសារព័ត៌មានថា តុលាការសម្រេចបំបែកសំណុំរឿងបន្ថែម ដើម្បីស៊ើបអង្កេតរកអត្តសញ្ញាណអ្នកដែលផ្តល់អាវុធដល់ ជួប សម្លាប់ និង អត្តសញ្ញាណអ្នកដែលនាំជួប សម្លាប់ ឲ្យស្គាល់បណ្ឌិត កែម ឡី ។
នាសវនាការកន្លងទៅ ជនជាប់ចោទ អឿត អាង ហៅជួប សម្លាប់ នៅតែសារភាពថា ខ្លួនពិតជាអ្នកបាញ់សម្លាប់លោកបណ្ឌិត កែម ឡី ពិតប្រាកដមែន ហើយសកម្មភាពនេះ គឺ ខ្លួនធ្វើតែម្នាក់ឯង ពុំមានអ្នកនៅពីក្រោយខ្នងនោះទេ បើទោះបីជាក្រុមគ្រួសារនៃសពមិនជឿក៏ដោយ ។
ជនជាប់ចោទ ជួប សម្លាប់ អះអាងទៀតថា មូលហេតុដែលខ្លួនសម្លាប់លោកបណ្ឌិត កែម ឡី ព្រោះខឹងនឹងជនរងគ្រោះដែលជំពាក់ប្រាក់ចំនួន៣០០០ដុល្លារ មិនព្រមសង ទើបខ្លួនធ្វើសកម្មភាពបែបនេះតែម្តង ។
នៅក្នុងពេលសវនាការ តុលាការក៏បានបង្ហាញកាមេរ៉ាសុវត្ថិភាពនៅបរិវេណក្នុងស្តារម៉ាត រហូតដល់ចំណុចមុខវត្តស្វាយពពែ ដែលបង្ហាញថា ក្នុងអំពើឃាតកម្មនេះ គឺ មានតែជនជាប់ចោទ ជួប សម្លាប់ ម្នាក់ប៉ុណ្ណោះ។ រីឯ ក្រយៅដៃលើកាំភ្លើង ត្រូវបានលទ្ធផលកោសល្យវិច័យបង្ហាញថា ពិតជាក្រយៅដៃរបស់ ជួប សម្លាប់ ពិតប្រាកដមែន។
គួរបញ្ជាក់ថា អឿត អាង ហៅជួប សម្លាប់ ត្រូវបានសមត្ថកិច្ចឃាត់ខ្លួនភ្លាមៗ ក្រោយពីបាញ់សម្លាប់លោកបណ្ឌិត កែម ឡី កាលពីវេលាម៉ោង៨៖៥០នាទី ព្រឹកថ្ងៃទី១០ខែកក្កដា ឆ្នាំ២០១៦ នៅចំណុចក្នុងទីតាំង ស្តារម៉ាត នៃស្ថានីយប្រេងឥន្ធនៈកាល់តិច បូកគោ ស្ថិតនៅកាច់ជ្រុងមហាវិថីព្រះមុនីវង្ស និង មហាវិថីម៉ៅសេទុង ក្នុងសង្កាត់ទន្លេបាសាក់ ខណ្ឌចំការមន៕
រាជធានីភ្នំពេញ៖អង្គភាពប្រឆាំងអំពើពុករលួយ (ACU) បានចាប់ខ្លួនមន្ត្រីក្រុមប្រឹក្សាអភិវឌ្ឍន៍កម្ពុជា (CDC) ម្នាក់កាលពីថ្ងៃទី២០ ខែមេសាម្សិលមិញនេះសង្ស័យពាក់ព័ន្ធរឿងពុករលួយ។ នេះបើយោងតាមការឲ្យដឹងពីប្រធានអង្គភាពប្រឆាំងអំពើពុករលួយលោកទេសរដ្ឋមន្ត្រី ឱម យ៉ិនទៀង។
លោកទេសរដ្ឋមន្ត្រីបញ្ជាក់ថា ជនសង្ស័យដែល ACU ចាប់ខ្លួននោះមានឈ្មោះ ឈឹម ពិសិដ្ឋ ភេទប្រុស អាយុ៥២ឆ្នាំ តួនាទីជាជំនួយការអគ្គលេខាធិការរង នៃក្រុមប្រឹក្សាអភិវឌ្ឍន៍កម្ពុជា ហើយការចាប់ខ្លួននេះធ្វើឡើងនៅម៉ោង២រសៀល ថ្ងៃទី២០ ខែមេសាម្សិលមិញនេះ៕
ភ្នំពេញ៖អ្នកនាំពាក្យក្រសួងយុត្តិធម៌ លោក គឹម សន្តិភាព បានលើកឡើងថា អនុប្រធានវិទ្យុអាស៊ីសេរី លោកជុន ច័ន្ទបុត្រ ដែលគេដឹងថា អាចនឹងមានទោសជាប់ពន្ធនាគារ និងពិន័យជាប្រាក់ ប្រសិនបើសមត្ថកិច្ចរកឃើញថា បុគ្គលរូបនេះ ប្រើប្រាស់មធ្យោបាយដែលជាអំពើល្មើសនឹងច្បាប់ព្រហ្មទណ្ឌ ប្រព្រឹត្តល្មើសនឹងមាត្រាណានៃច្បាប់ណា គឺអនុវត្តទណ្ឌកម្មតាមបញ្ញត្តិដែលមានចែងក្នុងមាត្រានោះនៃច្បាប់នោះ»។
កាលពីថ្ងៃទី១៩ ខែមេសា កន្លងទៅនេះតំណាងរាស្ត្រគណបក្សសង្គ្រោះជាតិ ដែលដឹកនាំដោយលោកស្រី មូរ សុខហួរ និងលោក ឡុង រី បាននាំលោក ជុន ច័ន្ទបុត្រ អនុប្រធានវិទ្យុអាស៊ីសេរី ដោយបន្លំខ្លួនជាជំនួយការរបស់ពួកគាត់ ចូលទៅពន្ធនាគារព្រៃស ដើម្បីចុះសួរសុខទុក្ខសកម្មជនរបស់គណបក្សសង្គ្រោះជាតិ ចំនួន១៦នាក់ ដែលកំពុងជាប់ឃុំ នៅក្នុងពន្ធនាគារព្រៃសនោះ។
ក្រោយពីឃើញសកម្មភាពបន្លំរបស់ក្រុមតំណាងរាស្ត្របក្សសង្គ្រោះជាតិបែបនេះ អ្នកនាំពាក្យក្រសួងមហាផ្ទៃ ឯកឧត្ដម ខៀវ សុភ័គបានថ្លែងប្រាប់ប្រពន្ធផ្សព្វផ្សាយក្នុងស្រុកដោយបានចាត់ទុកថា តំណាងរាស្ត្រគណបក្សសង្គ្រោះជាតិ លោកស្រី មូរ សុខហួរ និង លោក ឡុង រី មានចេតនាអសីលធម៌ ដោយបន្លំសមត្ថកិច្ចដើម្បីនាំ លោក ជុន ច័ន្ទបុត្រ មេវិទ្យុអាស៊ីសេរី ចូលទៅពន្ធនាគារព្រៃស ដែលនេះគឺជាកំហុសសីលធម៌មួយ។ ទន្ទឹមនោះអ្នកនាំពាក្យរូបនេះក៏បានបញ្ជាក់ថា ក្រសួងមហាផ្ទៃនឹងមិនអនុញ្ញាតឲ្យក្រុមតំណាងរាស្ត្រចូលសួរសុខទុក្ខដល់ពិរុទ្ធជននៅក្នុងពន្ធនាគារបន្តទៀតនោះឡើយ៕
ខេត្តបន្ទាយមានជ័យ៖ពលករចំណាកស្រុករាប់រយនាក់ក្នុងមួយថ្ងៃៗ បានស្ទះដំណើរតាមមាត់ច្រករបៀងមួយចំនួនក្នុងស្រុកអូរជ្រៅ ដើម្បីឆ្លងដែនចូលទៅដីថៃ ហើយបាននាំគ្នាដេករដូករណែលក្នុងព្រៃអត់បាយក្រហាយទឹកខ្លះមានទាំងកូនតូចដេកហាលទឹកសន្សើម ទឹកភ្លៀងមើលទៅគួរឲ្យសង្វែគណាស់។
បើតាមការសាកសួរទៅពលករខាងលើគឺ៩០ភាគរយអះអាងថា ធ្លាប់មានការងារធ្វើតាមបណ្តាខេត្តក្នុងប្រទេសថៃ ប៉ុន្តែពួកគេវិលត្រឡប់មកកម្ពុជាមុនពិធីបុណ្យចូលឆ្នាំថ្មី ដោយគ្មានលិខិតអនុញ្ញាតពីមន្ទីរការងារ ដែលស្នើសុំដោយថៅកែរបស់ពួកគេទេ ទើបវិលត្រឡប់ចូលតាមច្រករបៀងនានាតាមបន្ទាត់ព្រំដែន ដោយលួចលាក់បែបនេះ ទៅដល់កន្លែងធ្វើការថៅកែគេនឹងទទួលយកឲ្យធ្វើការ។
ក្រុមពលករមួយចំនួននិយាយថា មកដល់ព្រំដែន២ទៅ៣យប់ហើយអត់មានទឹកងូតទេ ត្រូវក្រុមមេខ្យល់ដាក់ឲ្យដេក រង់ចាំរថយន្តថៃមកទទួលខណៈពលករខ្លះនិយាយថា ដំបូងបានទៅច្រកព្រំដែនក្នុងខេត្តបាត់ដំបង ជាកន្លែងដែលពួកគេឆ្លងដែនមកពីដីថៃ ។ លុះក្រោយបញ្ចប់ពិធីបុណ្យចូលឆ្នាំថ្មី ត្រឡប់ទៅតាមច្រករបៀងដដែលនេះបែរជាគេហាមឃាត់ ទើបនាំគ្នាសម្រុកមករកច្រករបៀងក្នុងស្រុកអូរជ្រៅវិញម្តងក្រែងស្រួលជាង ។
ការចេញដំណើរចូលទៅស្វែងរកការងារធ្វើនៅប្រទេសថៃត្រូវបានកំណត់លើមេខ្យល់មានវគ្គមានលេខរៀងម្តង៤០នាក់ តម្រូវតាមរថយន្តថៃ ដោយមនុស្សដើរតែខ្លួនកាត់ព្រៃទម្រាំរថយន្តមកដឹក ព្រមទាំងមានរថយន្ត pick up ខ្មែរដឹកកាបូប ឬអីវ៉ាន់ទៅតាមក្រោយ ។ ក្រុមពលករខ្លះថា ពួកគេចំណាយម្នាក់២.៣០០បាត ឯខ្លះថា៣.០០០បាត តាមគោលដៅជិតឫឆ្ងាយ។ អ្នកមានកន្លែងដេកត្រឹមត្រូវហាក់ស្ងប់ស្ងាត់ ប៉ុន្តែសម្រាប់អ្នកដេកតាមក្រោមដើមឈើ និងហាលសន្សើមមានទាំងកូនតូចទៅជាមួយផងចាំនៅបរិវេណឈរជើងរបស់យោធាខ្មែរជាប់ខ្សែព្រំដែន ។ គ្រប់គ្នារអ៊ូរទាំថា ពិតជាពិបាកណាស់ហើយថា បើនៅតែមិនមានរថយន្តមកដឹកទេ ពួកគេអះអាងថា នឹងត្រឡប់ទៅស្រុកវិញហើយ។
ជុំវិញករណីខាងលើក្រុមយោធានិយាយថា ពិបាកក្នុងការទប់ស្កាត់ណាស់ ដោយសារមួយរយៈចុងក្រោយនេះសមត្ថកិច្ចថៃពង្រឹងទប់ស្កាត់ពលករឆ្លងដែនខុសច្បាប់ ចូលទៅទឹកដីរបស់គេ ម្យ៉ាងក្រុមពលករ ត្រូវក្រុមមេខ្យល់ដឹកទៅដាក់ចោលតាមបន្ទាត់ព្រំដែន ទើបមានពលករកកស្ទះនៅតាមច្រករបៀងយ៉ាងដូច្នេះ។
ចំពោះបញ្ហានេះហាក់បានក្លាយទៅជាការឆ្លងដែនធម្មតាទៅហើយ សម្រាប់ពលករចំណាកស្រុកខ្មែរដែលតែងសម្រុកចូល ទៅប្រទេសថៃវិញនៅក្រោយពិធីបុណ្យចូលឆ្នាំថ្មី ។មើលឃើញជាក់ស្តែងពិតជាល្ហេមល្ហាមមែនហើយ ដែលពួកគេប្រថុយគ្រោះថ្នាក់បែបនេះ ។
នៅស្រុកខ្មែរយើងមានការដ្ឋានសំណង់ច្រើនណាស់ រកពលករធ្វើការមិនបានគ្រប់គ្រាន់ទេ ទីណាក៏ខ្វះកម្លាំងពលកម្មដែរ មិនគួរធ្វើកម្មបែបនេះសោះរីឯប្រាក់កម្រៃក៏សមរម្យគួរសមផងដែរ ៕
ញូដេលី៖ប្រជាជនឥណ្ឌាយ៉ាងតិចចំនួន៣៧នាក់បានបាត់បង់ជីវិតនៅក្នុងរដ្ឋ Telangana ភាគខាងត្បូងប្រទេសនេះ ដោយសារកម្តៅដ៏សែនក្តៅហួតហែងរហូតដល់៤៥អង្សាសេបាននិងកំពុងតែវាយលុកនៅតំបន់ខ្លះនៃប្រទេស គិតចាប់តាំងពីដើមខែមេសានេះមក។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ។
នាយកដ្ឋានឧតុនិយមឥណ្ឌាបានចេញសេចក្តីថ្លែងការណ៍ឲ្យដឹងថា នៅតាមតំបន់ជាច្រើនក្នុងទីក្រុង រដ្ឋ និងតំបន់មួយចំនួនរួមមាន Punjab, Haryana, Chandigarh, Delhi, Jharkhand, Madhya Pradesh, Madhya Maharashtra និង Uttar Pradesh, Maharashtra, Chandrapur, New Delhi បានកើនឡើងកម្តៅនៅក្នុងកម្រិតធ្ងន់ធ្ងរជាខ្លាំង ដែលមានសីតុណ្ហភាពចន្លោះពី ៤៥ដល់៤៦.២អង្សាសេ។
ជាមួយគ្នានេះរដ្ឋាភិបាលឥណ្ឌាបានសម្រេចចិត្តបន្លាយរយៈពេលសម្រាប់វិស្សមកាលនារដូវក្តៅរបស់សិស្សសាលា និងបានចេញសេចក្តីណែនាំក្រើនរំលឹកកុំឲ្យប្រជាពលរដ្ឋ ដើរហើរទៅណាឆ្ងាយពីផ្ទះសម្បែងរៀងៗខ្លួន ជាពិសេសនៅចន្លោះម៉ោង១១ជិតថ្ងៃត្រង់ និងម៉ោង៤រសៀល ដើម្បីជៀសវាងទទួលរងគ្រោះដោយសារតែកម្តៅដ៏ខ្លាំងក្លានេះ។
គួរបញ្ជាក់ថា កាលពីឆ្នាំ២០១៦ប្រជាជនឥណ្ឌាចំនួនជិត៥០០នាក់បានបាត់បង់ជីវិតដោយសារតែការកើនឡើងកម្តៅដល់ទៅ៥១អង្សាសេ និងក្នុងឆ្នាំ២០១៥ មនុស្សមិនតិចជាង២,៥០០នាក់បានស្លាប់ដោយសាររលកកម្តៅដូចគ្នានេះផងដែរ៕
ភ្នំពេញ៖រយៈពេល២ខែកន្លងទៅនេះបទល្មើសជួញដូរចែកចាយនិងប្រើប្រាស់គ្រឿងញៀននៅភូមិសាស្ត្រក្នុងសង្កាត់ចោមចៅ ខណ្ឌពោធិ៍សែនជ័យ បានធ្វើឲ្យពលរដ្ឋក្នុងមូលដ្ឋាននេះភ័យខ្លាចយ៉ាងខ្លាំងពីបញ្ហាអសន្តិសុខសង្គម ព្រោះការបង្ក្រាបរបស់សមត្ថកិច្ចនៅមានកម្រិត ដូចជាករណីប្លន់ប្រដាប់អាវុធ ករណី បាញ់បោះអនាធិបតេយ្យ ចោរឆក់តាមដងផ្លូវ ចោរកាច់សោកម៉ូតូ និងចោរគាស់ផ្ទះប្រជាពលរដ្ឋយកទ្រព្យសម្បត្តិ បានកើតឡើងជាបន្តបន្ទាប់ធ្វើឲ្យប្រជាពលរដ្ឋមានការព្រួយបារម្ភយ៉ាងខ្លាំង។
ប្រជាពលរដ្ឋម្នាក់សុំមិនបញ្ចេញឈ្មោះដែល រស់នៅភូមិព្រៃព្រីងត្បូង សង្កាត់ចោមចៅ ខណ្ឌពោធិ៍សែនជ័យ បានប្រាប់អោយដឹងថា នៅជិតផ្ទះរបស់គាត់មានក្រុមក្មេងស្ទាវជំទងៗទាំងប្រុសទាំងស្រី បានប្រមូលផ្តុំគ្នាសម្ងំប្រើប្រាស់គ្រឿងញៀន និងជួញដូរគ្រឿងញៀន នៅក្នុងបន្ទប់ជួល ហើយគាត់បានលួចរាយការណ៍ទៅសមត្ថកិច្ច២-៣ដងដែរ តែហាក់ដូចជាអត់ប្រយោជន៍ទាល់តែសោះ។
ទន្ទឹមនឹងនេះប្រជាពលរដ្ឋនៅតែព្រួយបារម្ភយ៉ាងខ្លាំងចំពោះបញ្ហាអសន្តិសុខសង្គម ហើយអំពាវនាវឲ្យលោក អនុសេនីយទោ សៅ សារិទ្ធ ស្តីទីប៉ុស្តិ៍នគរបាលចោមចៅ និង អធិការខណ្ឌពោធិ៍សែនជ័យ លោក យឹម សារ៉ាន់ សូមមេត្តាយកចិត្តទុកដាក់ ក្នុងការអនុវត្តគោល នយោបាយភូមិ-ឃុំមានសុវត្ថិភាពទាំង៩ចំណុចដើម្បីពង្រឹងសន្តិសុខសង្គម។ ក្នុងនោះការបង្ក្រាបល្បែងស៊ីសងគ្រប់ប្រភេទ ការបង្ក្រាបបទ ល្មើសចែកចាយជួញដូរប្រើប្រាស់គ្រឿងញៀន និងអំពើចោរកម្មលួចប្លន់ គឺជាបញ្ហាចាំបាច់បំផុត៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
