ក្រចេះ៖ប្រជាពលរដ្ឋនៅឃុំរលួសស្រុកសំបូរខេត្តក្រចេះប្រមាណជិត១០០នាក់បានលើកគ្នាមករដោះគោយន្តកន្ត្រៃបីគ្រឿងនៅសង្កាត់រដ្ឋបាលព្រៃឈើអូរគ្រៀងស្រុកសំបូរខេត្តក្រចេះកាលពីថ្ងៃទី២២ខែមករាឆ្នាំ២០១៧ដែលកម្លាំងកងរាជអាវុធហត្ថលើផ្ទៃប្រទេសសហការជាមួយរដ្ឋបាលព្រៃឈើសង្កាត់រសួលឃាត់ទុកកាលយប់ពីថ្ងៃទី១៩ខែមករាឆ្នាំ២០១៧។
លោក សេង ស៊ីចាន់ដារុន នាយសង្កាត់រដ្ឋបាលព្រៃឈើអូរគ្រៀងបានឲ្យដឹងថា គោយន្តកន្ត្រៃចំនួន៣គ្រឿងដឹកឈើប្រណីតប្រភេទធ្នង់ដែលកម្លាំងអាវុធហត្ថលើផ្ទៃប្រទេសចាប់យកទៅផ្ញើនៅសង្កាត់រដ្ឋបាលព្រៃឈើអូរគ្រៀងកាលពីយប់ថ្ងៃទី១៩ ខែមករា ឆ្នាំ២០១៧នេះស្រាប់តែនៅថ្ងៃទី២២ ខែមករា ឆ្នាំ២០១៧នេះមានប្រជាពលជិត១០០នាក់ជិះម៉ូតូមកឈប់នៅមុខសង្កាត់រដ្ឋបាលព្រៃឈើអូរគ្រៀង ហើយនាំគ្នាចូលទៅក្នុងសង្កាត់រុញរថយន្ដម៉ាកតាកូម៉ាចេញ និងរំដោះយកគោយន្តកន្ត្រៃចំនួនបីគ្រឿងទៅដោយសុវត្តិភាព។
លោកបានបន្តទៀតថា ករណីប្រជាពលរដ្ឋបានទៅរំដោះវត្ថុតាងដោយមិនគោរពច្បាប់ទំលាប់នោះ លោកកំពុងកសាងសុំរឿងបញ្ថ្នូនទៅថ្នាក់លើរបស់លោកដើម្បីចាត់ការបន្ត។
សូមបញ្ជាក់ថា សំរាប់ខេត្តក្រចេះករណីប្រជាពលរដ្ឋទៅរំដោះវត្ថុតាងគ្រោយពីសមត្ថកិច្ចបង្គ្រាបបាននោះជាច្រើនលើកហើយ៕
ខេត្តកំពង់ស្ពឺ៖យោងតាមសេចក្តីរាយការណ៍បានឲ្យដឹងថា នៅព្រឹកព្រលឹមថ្ងៃទី២៣ ខែមករា ឆ្នាំ២០១៧នេះរថយន្តដឹកកម្មករមួយគ្រឿង បានក្រឡាប់ខណៈកំពុងធ្វើដំណើរទៅរោងចក្រ បណ្តាលឲ្យរងរបួសជាច្រើននាក់ ស្ថិតនៅភូមិកែវមុនី ឃុំ-ស្រុកសំរោងទង ខេត្តកំពង់ស្ពឺ។
សេចក្តីរាយការណ៍ដដែលបន្តថា ករណីនេះកើតឡើងដោយសារតែ រថយន្តគាំងចង្កូត តែមិនទៅប៉ះពារជាមួយគេនោះទេ ហើយរថយន្តក៏ក្រឡាប់តែម្តង។ ទោះយ៉ាងណាមិនទាន់អាចបញ្ជាក់បានថា តើជនរងគ្រោះប៉ុន្មាននាក់ រងរបួសនោះឡើយ ដោយនៅពេលនេះ កម្លាំងសមត្ថកិច្ចកំពុងចេញជួយអន្តរាគមន៍ ដឹកយកទៅមន្ទីរពេទ្យ៕
ដោយ៖ប៉ែន សុផល
បាត់ដំបង៖បុរសជាជនជាតិវៀតណាមម្នាក់បាត់ខ្លួនរយះពេលបីថ្ងៃត្រូវបានពលរដ្ឋប្រទះឃើញសាកសពអណ្តែតក្នុងទឹកបឹង។
លោក ណាប់ ស៊ីថា មេបញ្ជារការមូលដ្ឋានកងរាជអាវុធហត្ថស្រុកឯកភ្នំបាននិយាយបញ្ជាក់អោយដឹងថាបុរសជាជនជាតិវៀតណាមម្នាក់បានបាត់ខ្លួនកាលពីថ្ងៃទី១៧ ខែមករា ឆ្នាំ២០១៧ត្រូវបានពលរដ្ឋប្រទះឃើញសពអណ្តែតក្នុងទឹកបឹងកាលពីវេលាម៉ោង១៦ និង៣០នាទីថ្ងៃទី២០ខែមករា ឆ្នាំ២០១៧ នៅចំណុចក្នុង(ឡូត៍បំរ៉ុងបាត់ដំបង) ស្ថិតនៅភូមិក្បាលតោល ឃុំកោះជីវាំង ស្រុកឯកភ្នំខេត្តបាត់ដំបង។
ជនរងគ្រោះឈ្មោះ ដាង យាំងចូក(ជនជាតិវៀតណាម) ភេទប្រុសអាយុ៣០ឆ្នាំមុខរបរនេសាទរស់នៅភូមិចុងឃ្នាស់ សង្កាត់ចុងឃ្នាស់ ក្រុងសៀមរាប ខេត្តសៀមរាប។ បច្ចុប្បន្នសាកសពត្រូវបានក្រុមគ្រួសារយកទៅធ្វើបុណ្យតាមប្រពៃណី៕
ខេត្តព្រះសីហនុ៖ទូរស័ព្ទ iPhone គេចពន្ធចំនួន១៣កេស និងគ្រឿងអេឡិចត្រូនិចជាច្រើនត្រូវបានកងរាជអាវុធហត្ថខេត្តព្រះសីហនុសហការជាមួយគយចល័ត និងគយមូលដ្ឋានឆ្មក់ចាប់បាន កាលពីវេលាម៉ោង០២ និង៣០នាទីរសៀលថ្ងៃទី២០ ខែមករា ឆ្នាំ២០១៧ ស្ថិតនៅចំណុចក្នុងផែគមនាគមន៍ (ផែឡើងទំនិញទំនប់រលក) ក្រុងព្រះសីហនុ នៅលើទូកដឹកទំនិញ (សាឡង់) ពីប្រទេសថៃ។
សមត្ថកិច្ចអោយដឹងថា សម្ភារៈដែលដកហូតបានរួមមាន iPhone 7 Plus (128GB) ពណ៌ខ្មៅចំនួន១០០គ្រឿង, iPhone 6 Plus (16GB) ចំនួន៨០គ្រឿង, iPhone 6 (16GB) ចំនួន១០គ្រឿង និងសម្ភារៈជាច្រើនទៀត។ មន្ត្រីគយបានឲ្យដឹងថា ទំនិញគេចពន្ធទាំងអស់នេះត្រូវបានបញ្ជូនទៅសាខាគយ និងរដ្ឋាករខេត្តព្រះសីហនុ ដើម្បីអនុវត្តន៍តាមនីតិវិធីច្បាប់៕
ដោយ៖ប៉ែន សុផល
បាត់ដំបង៖សាមណេមួយព្រះអង្គបានសុគតភ្លាមៗគ្រាដែលលោកទៅលេងទឹកនៅក្រោមស្ពាននាសួនច្បារក្នុងបរិវេណវត្តត្រូវម៉ូទ័របូមទឹកបណ្តាលអោយឆក់ធ្ងន់ធ្ងរមិនអាចជួយអន្តរាគមន៍ទាន់ ដែលករណីនេះកើតឡើងនៅវេលាម៉ោង១០ និង៥១នាទីព្រឹក ថ្ងៃទី២០ ខែមករា ឆ្នាំ២០១៧ត្រង់ចំណុចវត្តសូរិយា ឋិតនៅក្នុងភូមិគា៣ ឃុំគា ស្រុកមោងឫស្សី ខេត្តបាត់ដំបង។
កម្លាំងកងរាជអាវុធហត្ថនៃទីបញ្ជការខេត្តបាត់ដំបងបានបញ្ជាក់អោយដឹងថា ព្រះសង្ឃដែលសុគតមានព្រះនាម ឆយ រី ព្រះជន្ម១៨ព្រះវស្សា គង់នៅក្នុងវត្តសូរិយាកន្លែងកើតហេតុនេះតែម្តង បន្ទាប់ពីលោកបាននិមន្តទៅលេងទឹកដែលកំហូរនៅក្រោមស្ពាននាសួនច្បារក្នុងបរិវេណវត្ត។
ព្រះសពក្រោយពេលជួបហេតុការណ៍អាក្រក់ខាងលើនេះញោមជាឪពុកម្តាយ និងក្រុមគ្រួសារដែលជាញាតិញោមចំណុះជើងមកទទួលប្រារព្វពិធីបុណ្យតាមប្រពៃណី៕
ដោយ៖សុខ ណាត
ខេត្តមណ្ឌលគិរី៖ក្មេងស្រីអាយុ៥ឆ្នាំម្នាក់ ត្រូវបានកម្មករចំការកៅស៊ូរបស់ក្រុមហ៊ុន DTC ចាប់រំលោភបានសំរេច កាលពីវេលាម៉ោង៦ល្ងាចថ្ងៃទី១៩ ខែមករា ឆ្នាំ២០១៧ នៅក្នុងបរិវេណក្រុមហ៊ុន DTCដែលមានទីតាំងនៅ ភូមិពូតាងឃុំពូជ្រៃស្រុកពេជ្រាដា ខេត្តមណ្ឌលគិរី។
ស្នងការរងខេត្តមណ្ឌលគិរីលោក សូ សុវណ្ណ បានអោយដឹងថា ជនសង្ស័យត្រូវបានធ្វើការឃាត់ខ្លួនភ្លាមៗ ក្រោយពេលធ្វើសកម្មភាពរំលោភ។ លោកបន្តថា ក្មេងរងគ្រោះ និងជនសង្ស័យត្រូវជាបងប្អូនជាដូនមួយនឹងគ្នា ។
បច្ចុប្បន្នជនរងគ្រោះត្រូវបានបញ្ជូនមកដល់ស្នងការរដ្ឋានខេត្តមណ្ឌលគិរីដើម្បីចាត់ការតាមច្បាប់ ជនរងគ្រោះមានឈ្មោះ ហ.ស.អ អាយុ៥ឆ្នាំស្នាក់នៅជាមួយឪពុកម្ដាយក្នុងក្រុមហ៊ុន DTC ។ ចំណែកជនសង្ស័យមានឈ្មោះ ឃីម វុទ្ធី ជាកម្មករជៀរជ័រ មានស្រុកកំណើតនៅភូមិឆ្លូង២ ស្រុកមេមត់ខេត្តត្បូងឃ្មុំ៕
ហ្វីលីពីន៖ខណៈពេលដែលទំនាក់ទំនងរវាងប្រទេសចិននិងហ្វីលីពីនកំពុងត្រូវបានពង្រឹងនោះ បញ្ហាសមុទ្រចិនខាងត្បូងបានក្លាយទៅជាផ្នែកមួយដ៏តូចក្នុងទំនាក់ទំនងរបស់ពួកគេ និងគួរតែត្រូវបានដោះស្រាយដោយសន្តិវិធីដោយការបន្តសន្ទនានិងពិគ្រោះយោបល់គ្នា។ នេះបើតាមការលើកឡើងកាលពីថ្ងៃព្រហស្បតិ៍របស់អ្នកនាំពាក្យក្រសួងការបរទេសចិនលោកស្រី Hua Chunying ។
លោកស្រីHuaបានលើកឡើងបែបនេះនៅពេលឆ្លើយតបទៅនឹងសំណួរនៅសន្និសីទកាសែតមួយអំឡុងការធ្វើទស្សនកិច្ចនៅប្រទេសហ្វីលីពីនរបស់អនុរដ្ឋមន្ត្រីការបរទេសចិន Liu Zhenmin។
បើយោងតាមលោកស្រី Hua បានឲ្យដឹងថា លោក Liu បានបំពេញទស្សនកិច្ចប្រទេសហ្វីលីពីនពីថ្ងៃអង្គារដល់ថ្ងៃពុធហើយក្នុងអំឡុងដំណើរទស្សនកិច្ចរបស់លោក ភាគីទាំងពីរបានធ្វើការផ្លាស់ប្តូរទស្សនៈគ្នាដោយស្មោះត្រង់និងស៊ីជម្រៅលើបញ្ហាសមុទ្រចិនខាងត្បូងនិងបានឈានដល់ការមូលមតិគ្នាដ៏ទូលំទូលាយ។
ភាគីទាំងពីរបានព្រមព្រៀងគ្នាថា បើប្រៀបធៀបទៅនឹងទំនាក់ទំនងរវាងចិននិងហ្វីលីពីនដែលកំពុងពង្រឹងនោះ បញ្ហាសមុទ្រចិនខាងត្បូងគឺគ្រាន់តែជាផ្នែកតូចមួយប៉ុណ្ណោះនៃទំនាក់ទំនងរបស់យើងហើយត្រូវដោះស្រាយដោយសន្តិវិធីដោយការបន្តកិច្ចសន្ទនានិងការពិគ្រោះយោបល់គ្នា។
លោកស្រី Hua បាននិយាយទៀតថា ទោះបីជាយ៉ាងណាក៏ដោយ មុននឹងបញ្ហាដែលពាក់ព័ន្ធត្រូវបានដោះស្រាយនោះ ចិននិងហ្វីលីពីនគួរតែគ្រប់គ្រងភាពខុសគ្នានិងលើកកម្ពស់កិច្ចសហប្រតិបត្តិការតាមសមុទ្រក្នុងគោលបំណងដើម្បីបង្កើតបរិយាកាសអំណោយផលសម្រាប់ការអភិវឌ្ឍទំនាក់ទំនងទ្វេភាគីក្នុងលក្ខណៈដែលមានសន្តិសុខល្អនិងមានស្ថិរភាព។
លោកស្រី Hua បានកត់សម្គាល់ថា ប្រទេសចិននិងហ្វីលីពីនបានព្រមព្រៀងគ្នាដើម្បីធ្វើការរួមគ្នាជាមួយបណ្តាប្រទេសផ្សេងទៀតនៃសមាគមប្រជាជាតិអាស៊ីអាគ្នេយ៍ (អាស៊ាន) ដើម្បីអនុវត្តន៍ឲ្យបានពេញលេញនិងមានប្រសិទ្ធភាពនៃសេចក្តីប្រកាសស្តីពីការអនុវត្តន៍ (DOC) របស់ភាគីនានានៅក្នុងសមុទ្រចិនខាងត្បូងដើម្បីលើកកម្ពស់យ៉ាងសកម្មលើការពិគ្រោះយោបល់ស្តីពីក្រមប្រតិបត្តិ (COC) ក្នុងសមុទ្រចិនខាងត្បូង។
លោកស្រី Hua បានបញ្ជាក់ថា “លើសពីនេះទៀត ភាគីទាំងពីរបានព្រមព្រៀងគ្នាបង្កើតយន្តការពិគ្រោះយោបល់ទ្វេភាគីលើបញ្ហាសមុទ្រចិនខាងត្បូងហើយបើកការពិភាក្សានិងពិគ្រោះយោបល់លើការចែករំលែកក្តីព្រួយបារម្ភនិងលើកកម្ពស់សុវត្ថិភាពនិងកិច្ចសហប្រតិបត្តិការតាមសមុទ្រ”៕
កូរ៉េខាងត្បូង៖រដ្ឋមន្ត្រីក្រសួងវប្បធម៌កូរ៉េខាងត្បូង លោកស្រី Cho Yoon-sun ត្រូវបានឃាត់ខ្លួន ក្រោមចោទប្រកាន់ បង្កើតសិល្បៈជិត១០០០ ដែលស្ថិតក្នុងបញ្ជីខ្មៅ សម្រាប់សម្តែងរិះគន់ការបោះឆ្នោតដកសេចក្តីទុកចិត្តប្រធានាធិបតីប៉ាក ឃឿន ហេ។ នេះបើតាមទីភ្នាក់ងារព័ត៌មានយ៉ុងហាប់។
តុលាការកណ្តាលរបស់ទីក្រុងសេអ៊ូលបានបញ្ជាក់ថា ការចេញដីកាចាប់ខ្លួនលោកស្រី Cho ដោយសារមានសំណើពីរដ្ឋអាជ្ញាដែលចោទថា លោកស្រីបានរំលោភអំណាចរដ្ឋ និងមិនសហការជាមួយតុលាការ។
លោកស្រី Cho Yoon-sun រងការចោទថា ធ្វើជារូបកាតាឡុកដែលបង្ហាញពីការធ្លាក់ចុះរដ្ឋាភិបាល និង ចោទថា សកម្មភាពក្រុមអ្នកវិនិយោគឯកជន ស្ថិតនៅក្រោមការត្រួតត្រាពីរដ្ឋ។ វិធានការនេះ នាំឲ្យមានការខឹងសម្បាពីប្រជាពលរដ្ឋ ដែលពួកគេថា ហាក់ដូចជា ទាញទីក្រុងសេអ៊ូលទៅរកទសវត្សរ៍ឆ្នាំ ១៩៦០ និង១៩៨០ ក្រោមការដឹកនាំរបស់ពួកយោធា រួមបញ្ជូលទាំងការដឹកនាំផ្តាច់ការរបស់លោក ប៉ាក ឈុនហ៊ី ជា ឪពុករបស់លោក ប៉ាក ឃឿនហេ ដែលត្រូវបានបោះឆ្នោតដកសេចក្តីទុកចិត្ត។ កំហឹងមហាជននេះ កើតឡើង នៅពេលដែល ប្រព័ន្ធផ្សព្វផ្សាយសិល្បៈ និង ការកំសាន្តត្រូវបានរឹតបន្តឹងខ្លាំងក្លា៕
ខេត្តកោះកុង៖នៅវេលាម៉ោង១២ និង៣០នាទី ថ្ងៃទី២០ ខែមករានេះ ហេតុការណ៍ភ្ញាក់ផ្អើលមួយបានកើតឡើង ខណដែលចោរថ្លើមធំម្នាក់លួចម៉ូតូពីប្រទេសថៃ ហើយជិះចូលមកដីខ្មែរ តាមច្រកអន្តរជាតិចាំយាម ហើយព្យាយាមបើកលឿនដូចព្យុះជ្រុលទៅបុកឡានសេរ៉ែន របស់ប៉ូលីសស្រុកកោះកុង ដាច់គូថទៀត ។ ហេតុការណ៍នោះកើតឡើងក្នុងឃុំត្រពាំងរូង ស្រុកកោះកុង ខេត្តកោះកុង។
បើតាមមន្ត្រីនគរបាល បានឲ្យដឹងថា ជនសង្ស័យមានឈ្មោះ ខែម បុល ភេទប្រុសអាយុ ២៨ឆ្នាំ មានស្រុកកំណើតនៅឃុំច្រេះ ស្រុកំពង់ត្រឡាច ខេត្តកំពងឆ្នាំង មានមុខកម្មករទូក នៅប្រទេសថៃ។
សមត្ថកិច្ចបានឲ្យទៀតដឹងថា ក្រោយពីទទួលព័ត៌មានថា មានចោរលួចម៉ូតូពីប្រទេសថៃហើយ បើកបុកដាច់ច្រវាក់ប៉ារាស ច្រកទ្វារអន្តរជាតិចាំយាម ឆ្ពោះទៅភ្នំពេញនោះសមត្ថកិច្ច ស្រុកកោះកុង បានដាក់កម្លាំងស្ទាក់ តែជនសង្ស័យពេលឃើញសមត្ថកិច្ចឃាត់ មិនបានបង្អង់លឿនទេ ហើយបើកបុករថយន្តសេរ៉ែន ដាច់គូថថែមទៀត។
យ៉ាងណាក៏ដោយ សមត្ថកិច្ចបានឃាត់ខ្លួនចោរថ្លើមធំម្នាក់នេះ ហើយបានបញ្ជូនទៅស្នងការដ្ឋានខេត្ត ដើម្បីចាត់ការតាំច្បាប់៕
រាជធានីភ្នំពេញ៖ខ្មាន់កាំភ្លើង២នាក់ជិះម៉ូតូដេញបាញ់ប្រហារស្ត្រី២នាក់បណ្តាលឲ្យរងរបួសធ្ងន់ស្រាលខណៈពេលកំពុងបើករថយន្តចេញពីក្លឹប Mango ដែលករណីនេះកើតឡើងជិតធនាគារកាណាឌីយ៉ា កែងចូលទៅផ្សារ អូរឡាំពិក សង្កាត់វាលវង់ ខណ្ឌ៧មករានាយប់រំលងអធ្រាត្រឆ្លងចូលថ្ងៃទី២១ ខែមករា ឆ្នាំ២០១៧។
នារីរងគ្រោះម្នាក់ឈ្មោះ ស៊ន បូលីន អាយុ២៨ឆ្នាំ ដែលរងរបួសស្រាលក្នុងហេតុការណ៍បាញ់ប្រហារខាងលើនេះបាននិយាយថា មុនកើតហេតុ ពួកគេទាំង២នាក់បានបើកឡានមួយគ្រឿងពណ៌ខ្មៅ ពាក់ស្លាកលេខ ភ្នំពេញ 2X-8883 ចេញពីក្លឹបកំសាន្ត Mango នៅក្នុងខណ្ឌចំការមនតាមមហាវិថីព្រះសីហនុ គោលបំណងទៅផ្ទះ។ នារីរងគ្រោះបន្តថា លុះមកដល់ចំណុចកើតហេតុ ក៏មានជនសង្ស័យ២នាក់ជិះម៉ូតូ១គ្រឿង មិនចាំម៉ាកបានធ្វើការបាញ់ប្រហារ មកលើរថយន្តពួកគេខាងលើបណ្តាលរងរបួស ធ្ងន់ម្នាក់ និងស្រាលម្នាក់។ បន្ទាប់ពីជនសង្ស័យចេញទៅបាត់នារីរងគ្រោះទាំង២ខាងលើបានបើករថយន្តទៅមន្ទីរពេទ្យកាល់ម៉ែតដោយខ្លួនឯងដើម្បីឲ្យពេទ្យព្យាបាលរបួស។
បើតាមការបញ្ជាក់ពីសមត្ថកិច្ចនៅកន្លែងកើតហេតុ ករណីនេះអាចផ្តើមចេញពីរឿងគំនុំ ក៏ដោយសារតែក្រុមខ្មាន់កាំភ្លើង ក្រោយបាញ់ប្រហារហើយ បានបើកម៉ូតូគេចខ្លួនបាត់ មិនបានប្លន់យកទ្រព្យសម្បត្តិនោះទេ៕
ដោយ៖បញ្ញា
ភ្នំពេញ៖ជនសង្ស័យ២នាក់បានធ្វើសកម្មភាពបើកទ្វាររថយន្តលួចយកកាបូបបានសម្រេចហើយនាំគ្នាជិះម៉ូតូរត់គេចខ្លួន តែត្រូវម្ចាស់ឃើញទាន់បានស្រែកថា ចោរៗផ្អើលដល់ប្រជាការពារភូមិ និងសមត្ថកិច្ចប៉ុស្តិ៍នាំគ្នាឡោមព័ទ្ធដេញចាប់ធ្វើអោយចោរភ័យស្លន់ស្លោបោះកាបូបចោលរួចរត់គេចខ្លួនបាត់ស្រមោល។
ហេតុការណ៍នេះបង្កអោយមានការភ្ញាក់ផ្អើលនៅវេលាម៉ោង១០ព្រឹកថ្ងៃទី២០ខែមករាឆ្នាំ២០១៧នៅចំណុចរោងចក្រក្រោន ផ្លូវវែងស្រេង ទល់មុខវត្តគោកបញ្ជាន់ ភូមិថ្មគោល សង្កាត់ចោមចៅ ខណ្ឌពោធិ៍សែនជ័យ។
ប្រភពពីម្ចាស់រថយន្តបានអោយដឹងថា មុនពេលកើតហេតុរូបគាត់២នាក់ប្តីប្រពន្ធបានជិះរថយន្តដឹកអង្ករបានឈប់ញុំអីនៅចំណុចខាងលើ ក៏ស្រាប់តែលេចមុខជនសង្ស័យ២នាក់ជិះម៉ូតូអាសងកូរ៉េពណ៍ក្រហមអត់មានស្លាកលេខ មកឈប់នៅជិតនោះហើយអោយបក្សពួកម្នាក់បើកទ្វារចូលយកកាបូបលុយរួចជិះចេញ ហើយខ្លួនឃើញក៏ស្រែកថាចោរៗ ធ្វើអោយមានការដេញតាមយ៉ាងប្រផិតប្រផិងធ្វើអោយជនសង្ស័យភ័យស្លន់ស្លោបោះកាបូបចោលជិះរត់យករួចខ្លួន។
សមត្ថកិច្ចបានអោយអោយដឹងថាក្នុងកាបូបលុយនោះមានលុយចំនួន៤៥០ ០០០ម៉ឺនរៀល ខ្សែ.ក២ខ្សែ និងមានកាតគ្រីម៉ូតូ និងសំភារៈមួយចំនួនទៀត។
ក្រោយពេលកើតហេតុសមត្ថកិច្ចបានរក្សាទុកសំភារៈទាំងនោះដើម្បីជូនម្ចាស់ដើមវិញ រីឯជនសង្ស័យសមត្ថកិច្ចកំពុងបន្តស្រាវជ្រាវ ព្រោះជាមុខសញ្ញាយ៉ាងសកម្មនៅខណ្ឌពោធិ៍សែនជ័យនេះ៕
ខេត្តកំពង់ឆ្នាំង៖កម្លាំងអាវុធហត្ថខេត្តកំពង់ឆ្នាំងឃាត់ខ្លួន ព្រះសង្ឃ៣នាក់ រួមទាំងបក្ខពួកក្មេងស្ទាវ៤នាក់ បន្ទាប់ពីប្រទះឃើញដើរលេងយប់អាធ្រាត្រ នៅតាមសួនច្បារ និងចូលក្លឹប។ ការឃាត់ខ្លួននេះធ្វើឡើងនៅម៉ោង០១៖៣០នាទីរំលងអធ្រាត្រ ឈានចូលថ្ងៃទី២០ ខែមករា ឆ្នាំ២០១៧ នៅចំណុចសួនច្បារដើមពោធិ៍ ស្ថិតក្នុងក្រុងកំពង់ឆ្នាំង។ នេះបើតាមរបាយកាណ៍មន្ត្រីអាវុធ។
អ្នកទាំង៧នាក់នោះ រួមមាន ទី១.ឈ្មោះ ថន ពិសាល អាយុ១៧ឆ្នាំ ទី២.ឈ្មោះ ម៉ាត សុមិត អាយុ១៦ឆ្នាំ ទី៣.ឈ្មោះ ណៃ ចំណាន (ទាំង៣នាក់នេះ គឺជាសង្ឃដែលគង់នៅវត្តសង្វររង្សី ស្ថិតនៅឃុំផ្សារស្រុកបរិបូរណ៍ ខេត្តកំពង់ឆ្នាំង)។ ចំណែកទី៤.ប៉ុន មឿន អាយុ ២០ឆ្នាំ ទី៥.ឈ្មោះ ឈឿន វណ្ណា អាយុ២០ឆ្នាំ ទី៦.ឈ្មោះប៉ិន វណ្ណៈ និង ទី៧.ឈ្មោះ ធឿង ថាង អាយុ២២ឆ្នាំ។ អ្នកទាំងនោះ ត្រូវឃាត់ខ្លួនក្រោយពីសមត្ថកិច្ចសាកសួរ និងធ្វើតេស ឃើញថា ឈ្មោះ ធឿង ថាង មានផ្ទុកសារធាតុញៀន៕
រាជធានីភ្នំពេញ៖ជនរងគ្រោះរួម និងមិត្តភក្តិពីរបីនាក់បាននាំគ្នាឡើងមកប្តឹងប៉ូលិសប៉ុស្តិ៍ទួលសង្កែទាំងព្រឹក ក្រោយពីមានចោរគាស់បន្ទប់ផ្ទះជួលលួចយកម៉ូតូមួយគ្រឿងរួម និងសម្ភារៈ។ ករណីនេះកើតឡើងកាលពីយប់រំលងអធ្រាត្រឆ្លងចូលថ្ងៃទី២០ ខែមករា ឆ្នាំ២០១៧ នៅចំណុចបន្ទប់ជួលផ្លូវបេតុងភូមិទួលសង្កែ សង្កាត់ទួលសង្កែ ខណ្ឌឫស្សីកែវ។ ជនរងគ្រោះមានឈ្មោះ ភាព វិនណា ភេទប្រុស អាយុ២០ ឆ្នាំ ស្នាក់នៅផ្ទះ កើតហេតុខាងលើ។
ប្រភពពីជនរងគ្រោះបានឲ្យដឹងថា នៅមុនកើតហេតុម៉ោង១០យប់ខ្លួនគេបានបិទទ្វារចាក់សោរួចនាំគ្នាចេញទៅដើរលេងអស់ លុះត្រឡប់មកដល់ផ្ទះវិញនៅវេលម៉ោងប្រហែល៣ និង៥០នាទីទៀបស្រាប់តែ ឃើញទ្វារបន្ទប់ចំហ ខណៈនោះគេ ដើរចូលដល់ក្នុងបន្ទប់ ស្រាប់តែមិនឃើញម៉ូតូម៉ាកហុងដា(ZOOMER.X)ពាក់ស្លាកលេខភ្នំពេញ1FZ0157 រួមនិងសម្ភរៈមួយចំនួនត្រូវចោរលួចយកទៅបាត់អស់។ លុះព្រឹកឡើងជនរងគ្រោះរួមនិងមិត្តភក្តិពីរបីនាក់ បាននាំគ្នាមកដាក់ពាក្យបណ្តឹងនៅប៉ុស្តិ៍រដ្ឋបាលសង្កាត់ទួលសង្កែដើម្បីឲ្យសមត្ថកិច្ចជួយអន្តរាគមន៍តែម្តងទៅ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
