រាជធានីភ្នំពេញ៖គិតត្រឹមម៉ោង៦ល្ងាច ថ្ងៃទី១៥ ខែវិច្ឆិកា ឆ្នាំ២០១៦ម្សិលមិញមានប្រជាពលរដ្ឋខ្មែរចំនួន ៧,១៩០,៦៧៨ នាក់ហើយ បានទៅចុះឈ្មោះបោះឆ្នោត។ នេះបើតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប)៕
All posts by មេគង្គ ប៉ុស្តិ៍
គ្រោះថ្នាក់ចរាចរណ៍រយៈពេល៣ថ្ងៃនៃពិធីបុណ្យអុំទូកស្លាប់១៤នាក់ របួស៥០នាក់
រាជធានីភ្នំពេញ៖គ្រោះថ្នាក់ចរាចរណ៍រយៈពេល៣ថ្ងៃក្នុងព្រះរាជពិធីបុណ្យអុំទូកឆ្នាំនេះ កើតឡើងចំនួន៥៥លើក (ឆ្នាំ២០១៥ មាន៣៤លើក) ថយ២១លើក ស្មើ៣៨ភាគរយ ក្នុងនោះអ្នកស្លាប់មានចំនួន១៤នាក់ (ឆ្នាំ២០១៥ មាន២៥នាក់) ថយ១១នាក់ ស្មើ៤៤ភាគរយ ចំណែកអ្នករងរបួសធ្ងន់ មាន៣៣នាក់ (ឆ្នាំ២០១៥ មាន៦១នាក់) ថយ២៨នាក់ ស្មើ៤៦ភាគរយ និងរងរបួសស្រាលមានចំនួន១៧នាក់ (ឆ្នាំ២០១៥ មាន១៦នាក់) មានការកើនឡើងម្នាក់។
មូលហេតុនៃគ្រោះថ្នាក់ចរាចរណ៍ ភាគច្រើនបណ្តាលមកពីបើកបរមិនប្រកាន់ស្តាំ បើកបរដោយសារងងុយដេក មិនគោរពសិទ្ធិស្រវឹងបើកបរលឿន និងមានកត្តាផ្លូវជាដើម។
ចំណែកគ្រោះថ្នាក់ចរាចរណ៍នៅ ថ្ងៃទី១៥ ខែវិច្ឆិកា ឆ្នាំ២០១៦ ប្រៀបធៀបឆ្នាំ២០១៥ មានករណីគ្រោះថ្នាក់ចរាចរណ៍ ចំនួន២៤លើក (ឆ្នាំ២០១៥ មាន១០លើក)ថយ១៤លើក ស្មើ៥៨ភាគរយ ក្នុងនោះអ្នកស្លាប់មានចំនួន៣នាក់ (ឆ្នាំ២០១៥ មាន១៣នាក់) ថយ១០នាក់ ស្មើ៧៧ភាគរយ ចំណែកអ្នករងរបួសធ្ងន់ មាន១១នាក់ (ឆ្នាំ២០១៥ មាន២៦នាក់) ថយ១៥នាក់ ស្មើ៥៨ភាគរយ និងរងរបួសស្រាលមានចំនួន៤នាក់ (ឆ្នាំ២០១៥ មាន៨នាក់) មានការថយចុះ៤នាក់ ស្មើ៥០ភាគរយ៕
ផ្ទះវីងមួយកន្លែងនៅស្រុកគងពិសីត្រូវចោរចូលលួចកាបូប
ខេត្តកំពង់ស្ពឺ៖អធិការនគរបាលស្រុកគងពិសី ខេត្តកំពង់ស្ពឺបានឱ្យដឹងថា មានក្រុមចោរ២នាក់ បានបន្លំខ្លួនចូលទៅផ្ទះលក់ចាប់ហួយ និង Wing មួយកន្លែងរួចហើយឆក់កាបូបលុយរបស់ម្ចាស់ផ្ទះ ដែលមានទឹកប្រាក់ក្នុងនោះប្រហែល ៧,៥០០ដុល្លារ ទៅបាត់តែម្តង។ ។ករណីនេះកើតឡើងនៅម៉ោងប្រមាណ ៤ និង១៥នាទីល្ងាច ថ្ងៃទី១៥ ខែវិច្ឆិកា ឆ្នាំ២០១៦ស្ថិតនៅភូមិម្កាក់ ឃុំស្នំក្រពើ ស្រុកគងពិសី ខេត្តកំពង់ស្ពឺ។
សមត្ថកិច្ចបានបញ្ជាក់ថា ជនរងគ្រោះដែលត្រូវចោរឆក់កាបូបនោះមានឈ្មោះ សូត្រ ស្រីនាង រស់នៅភូមិឃុំកើតហេតុខាងលើ។ ចំណែកជនសង្ស័យ ២នាក់, គេនៅមិនទាន់ស្គាល់អត្តសញ្ញាណ និងភិនភាគនៅឡើយ។
ទោះជាយ៉ាងណា សមត្ថកិច្ចបានបញ្ជាក់ថា ពេលនេះកម្លាំងនគរបាលកំពុងស្រាវជ្រាវបន្តទៀត ដើម្បីឈានទៅដល់ការចាប់ខ្លួន ជនដៃឆៅទាំងពីរនាក់ខាងលើ៕
រថយន្តដឹកឈើប្រណីត១គ្រឿងត្រូវអាវុធហត្ថបង្រ្កាបនៅក្នុងក្រុងស្ទឹងត្រែង
ខេត្តស្ទឹងត្រែង៖រថយន្តដឹកឈើប្រណីតមួយគ្រឿងត្រូវបានបង្ក្រាបដោយកម្លាំងអាវុធហត្ថខេត្តស្ទឹងត្រែង ក្រោមបទបញ្ជារបស់មេ បញ្ជាការអាវុធហត្ថខេត្ត ដោយសារមានសេចក្តីរាយការណ៍ថា រថយន្តមួយគ្រឿងនោះបានលួចដឹកឈើប្រណីត ឆ្ពោះទៅកាន់ទីផ្សារគោលដៅ នៅវេលាម៉ោង៧ និង២០នាទីយប់ ក្នុងថ្ងៃទី១៤វិច្ឆិ នៅលើផ្លូវជាតិលេខ៧Aត្រង់ចំណុចប្រសព្វ និងផ្លូវជាតិលេខ៩ថ្មី ស្ថិតក្នុងភូមិរាជានុកូល សង្កាត់/ក្រុងស្ទឹងត្រែង ។
ក្រោយការបង្ក្រាបបានរថយន្តដឹកឈើប្រណិតមួយគ្រឿងនោះរួចមក សមត្ថកិច្ចអាវុធហត្ថបានយកទៅកាន់ទីបញ្ជាការដ្ឋានអាវុធ ហត្ថខេត្តទាំងយប់ផងដែររួមទាំងអ្នកបើកបរ ។ ឯនៅព្រឹកថ្ងៃទី១៥នេះទើបកម្លាំងអាវុធហត្ថធ្វើការប្រគល់រថយន្តដឹកបទល្មើសនិងឈើប្រណិតរួមនិងអ្នកបើកបរជូនទៅឲ្យជំនាញរដ្ឋបាលព្រៃឈើខេត្តដើម្បីចាត់ការបន្ត ។
មន្ត្រីរដ្ឋបាលព្រៃឈើជំនាញបានឲ្យដឹងថា រថយន្តដែលដឹកឈើប្រណិតត្រូវបានបង្ក្រាបនេះជាប្រភេទរថយន្តសាំយ៉ុងពណ៌សំបក ឪឡឹក ពាក់ស្លាកលេខភ្នំពេញ2W.0847 ហើយអ្នកបើកបរមានឈ្មោះហួ ជៀប អាយុ២៥ឆ្នាំ រស់នៅភូមិព្រែកតាថឹង ឃុំបុសលាវ ស្រុក ចិត្របុរី ខេត្តក្រចេះ ។ រីឯឈើប្រណិតដែលផ្ទុកក្នុងរថយន្តខាងលើនោះជាប្រភេទឈើធ្នង់មានចំនួន៥៣ដុំ ។
តាមសេចក្តីរាយការណ៍បានឲ្យដឹងថា រថយន្តដឹកឈើមួយគ្រឿងនេះចេញពីក្នុងក្រុងស្ទឹងត្រែងឆ្ពោះទៅកាន់ប្រទេសវៀតណាម រី ឯម្ចាស់ឈើត្រូវបានគេស្គាល់ថាឈ្មោះវ៉េត ហើយសេចក្តីរាយការណ៍បានឲ្យដឹងទៀតថារថយន្តដឹកឈើខាងលើនេះ បំរុងលោតឆ័ត្រតែដោយមានសេចក្តីរាយការណ៍ទៅដល់សមត្ថកិច្ច ទើបត្រូវអាវុធហត្ថបង្ក្រាបបានតែម្តង ។
បច្ចុប្បន្ន រថយន្តដឹកឈើនិងវត្ថុតាងឈើប្រណិតរួមទាំងអ្នកបើកបរនិងជាម្ចាស់រថយន្តត្រូវបានកម្លាំងជំនាញរដ្ឋបាលព្រៃឈើកំពុងកសាងសំណុំរឿងត្រៀមនិងបញ្ជូនទៅកាន់តុលាការ ដើម្បីចាត់ការទៅតាមនីតិវិធី៕
ថៃចាប់ពលករខ្មែរច្រើននាក់បញ្ជូនមកស្រុកកំណើតវិញ
ដោយ៖ប៉ែន សុផល
បាត់ដំបង៖កម្លាំងយោធារបស់ថៃនៅថ្ងៃទី១៥ ខែវិច្ឆកា ឆ្នាំ២០១៦បានចាប់បញ្ជូនពលករខ្មែរដែលលួចឆ្លងដែនខុសច្បាប់ចំនួន១៦៥នាក់មកកាន់ស្រុកកំណើតវិញកាត់តាមច្រកអន្តរជាតិដូង ស្រុកកំរៀង ខេត្តបាត់ដំបង។
លោក សៅ ប៊ុនរឹទ្ធ ប្រធាននគរបាលអន្តោប្រវេសន៍ប្រចាំច្រកទ្វារអន្តរជាតិដូងបានអោយដឹងថា ពលករខ្មែរដែលឆ្លងដែនចូលក្នុងទឹកដីថៃទាំងអស់ខាងលើជាការលួចចូលខុសច្បាប់ក្រៅពីច្រកអន្តរជាតិក្នុងគោលបំណងទៅធ្វើការងារនៅក្នុងប្រទេសថៃ ស្របពេលដែលសមត្ថកិច្ចថៃត្រួតពិនិត្យស្វែងរកពលករធ្វើចំណាកស្រុកគ្មានច្បាប់អនុញ្ញាតទើបមានការឃាត់ខ្លួនបញ្ជូនមកស្រុកកំណើតវិញតែម្តង។
ពលករខ្មែរទាំងអស់ដែលសមត្ថកិច្ចថៃបញ្ជូនតាមច្រកទ្វារអន្តរជាតិដូងវិញនេះសរុបចំនួន១៦៥នាក់ មានស្រីចំនួន៦៥នាក់និងក្មេង១៧នាក់ភាគច្រើនរស់តាមតំបន់ព្រំដែន ក្រោយពីការបញ្ជួនដល់ទីតាំងមាត់ច្រកកម្លាំងនគរបាលអន្តោប្រវសន៍មានវិធានការណែនាំ អប់រំហើយធ្វើកិច្ចសន្យាអោយបញ្ឈប់ ហើយអោយពួកគាត់វិលត្រឡប់ទៅកាន់លំនៅដ្ឋានរៀងៗខ្លួនវិញ។
ប្រភពព័ត៌មានពីមជ្ឈដ្ឋានជុំវិញហេតុការណ៍ខាងលើបានរិះគន់អង្គភាពនគរបាលអន្តោប្រវេសន៍ប្រចាំច្រកទ្វារអន្តរជាតិដូង និងសមត្ថកិច្ចតាមច្រករបៀងតំបន់ព្រំដែនមិនបានយកចិត្តទុកដាក់រឹតបណ្តឹងការចេញចូលដោយប្រថុយប្រថានជាហេតុបង្ករការគ្រោះថ្នាក់របស់ពលករឡើយអោយតែទទួលលាភសក្ការៈមិនខ្វល់៕
តុលាការឧក្រិដ្ឋកម្មអន្តរជាតិ៖ អាមេរិកអាចប្រព្រឹត្តឧក្រិដ្ឋកម្មសង្គ្រាមនៅអាហ្វហ្គានីស្ថាន
អាហ្វហ្គានីស្ថាន៖ប្រធានព្រះរាជអាជ្ញានៃតុលាការឧក្រិដ្ឋកម្មអន្តរជាតិបានឲ្យដឹងកាលពីថ្ងៃចន្ទថា កងកម្លាំងសហរដ្ឋអាមេរិកអាចនឹងប្រព្រឹត្តឧក្រិដ្ឋកម្មសង្គ្រាមនៅក្នុងប្រទេសអាហ្វហ្គានីស្ថានតាមរយៈការសួរចម្លើយឃោរឃៅឬប្រើហឹង្សាលើអ្នកទោសដែលភាគច្រើននៅចន្លោះឆ្នាំ ២០០៣-២០០៤។
ខណៈពេលកំពុងបង្ហាញលទ្ធផលនៃការស៊ើបអង្កេតចូលទៅក្នុងអំពើឃោរឃៅដែលប្រព្រឹត្តឡើងនៅក្នុងប្រទេសអាហ្វហ្គានីស្ថាន ព្រះរាជអាជ្ញា Fatou Bensouda បាននិយាយថា ពួកសកម្មប្រយុទ្ធតាលីបង់ កងកម្លាំងរដ្ឋាភិបាលអាហ្វហ្គានីស្ថាននិងកងទ័ពអាមេរិកព្រមទាំង CIA សុទ្ធតែហាក់ដូចជាបានប្រព្រឹត្តឧក្រិដ្ឋកម្មសង្គ្រាម។
ប៉ុន្តែជាដំបូងលោកស្រីបានគូសបញ្ជាក់អំពីការចោទប្រកាន់ពីឧក្រិដ្ឋកម្មសង្គ្រាមនៃការធ្វើទារុណកម្មនិងការព្យាបាលជំងឺដែលទាក់ទងដោយកងទ័ពអាមេរិកដែលបានដាក់ពង្រាយទៅកាន់ប្រទេសអាហ្វហ្គានីស្ថាន និងនៅក្នុងមន្ទីរឃុំឃាំងសម្ងាត់ដែលដំណើរការដោយទីភ្នាក់ងារស៊ើបការណ៍សម្ងាត់អាមេរិក៕
ធ្លាក់ពីលើដំបូលផ្ទះជុងរបងដែកស្លាប់គួរអោយរន្ធត់
រាជធានីភ្នំពេញ៖បុរសម្នាក់បានស្លាប់យ៉ាងអណោចអាធ័មដោយសារជុងនឹងរបងដែក ខណៈរត់ឡើងលើដំបូលផ្ទះអ្នកដទៃ រួចធ្លាក់មកវិញ។ ហេតុការណ៍ដ៏រន្ធត់នេះកើតឡើងកាលពីវេលាម៉ោង៦ និង២០នាទីព្រឹកថ្ងៃទី១៥ ខែវិច្ឆិកា ឆ្នាំ២០១៦ ស្ថិតនៅចំណុចក្រុមទី៥ ភូមិរោងចក្រ សង្កាត់ភ្នំពេញថ្មី ខណ្ឌសែនសុខ ភ្នំពេញ។
សមត្ថកិច្ចអះអាងថា បុរសរងគ្រោះសង្ស័យបែកថ្នាំ និងមិនទាន់ស្គាល់អត្តសញ្ញាណនៅឡើយទេ រង់ចាំសមត្ថកិច្ចជំនាញផ្នែកកោសល្យវិច្ច័យនិងសមត្ថកិច្ច អាជ្ញាធរមូលដ្ឋានចុះមកពិនិត្យនៅពេលបន្តិចទៀតនេះ៕
លោក អូបាម៉ា ទទួលស្គាល់បរាជ័យចំពោះដំណោះស្រាយនៅស៊ីរី
វ៉ាស៊ីនតោន៖ប្រធានាធិបតីជិតផុតអាណត្តិរបស់សហរដ្ឋអាមេរិកលោក បារ៉ាក់ អូបាម៉ា បានទទួលស្គាល់ថា យុទ្ធសាស្ត្ររបស់លោកនៅក្នុងប្រទេសស៊ីរី មិនបានទទួលផ្លែផ្កាអ្វីឡើយ គ្រាដែលប្រធានាធិបតីអាមេរិកទើបជាប់ឆ្នោត លោក ដូណាល់ ត្រាំ ត្រូវបានគេរំពឹងទុកថានឹងផ្លាស់ប្ដូរគោលនយោបាយអាមេរិក ៣៦០ដឺក្រេចំពោះសំណុំរឿងស៊ីរី។ នេះបើតាមការចេញផ្សាយ ដោយសារព័ត៌មាន Russian Today នៅព្រឹកថ្ងៃអង្គារ ទី១៥ ខែវិច្ឆិកា ឆ្នាំ២០១៦នេះ។
ឆ្លើយតបទៅនឹងសំណួរនៅក្នុងសន្និសីទសារព័ត៌មាន ស្ដីពីយុទ្ធសាស្ត្ររបស់លោកសម្រាប់ស៊ីរី ក្នុងរយៈពេល២ អាណត្តិមកនេះក្នុងនាមជាប្រធានាធិបតីអាមេរិក លោក បារ៉ាក់ អូបាម៉ា បានលើកឡើងថា «ខ្ញុំទទួលស្គាល់ថាយុទ្ធសាស្ត្ររបស់ខ្ញុំនៅស៊ីរី មិនបានទទួលផ្លែផ្កាជាដុំកំភួននោះទេ ហើយនេះគឺអ្វីដែលខ្ញុំកំពុងបន្តគិតជារៀងរាល់ថ្ងៃ»៕
រំលោភបានសម្រេចក្នុងខ្ទមចាំចម្ការ
ខេត្តស្ទឹងត្រែង៖ជនសង្ស័យម្នាក់ត្រូវបានកម្លាំងនគរបាលស្រុកេសសាន្តឃាត់ខ្លួនពាក់ព័ន្ធករណីចាប់រំលោភសេពសន្ថវៈលើស្ត្រីម្នាក់កាលពីវេលាម៉ោង០៦ និង០៤នាទីយប់ថ្ងៃទី១៣ វិច្ឆិកា នៅក្នុងខ្ទមចាំចម្ការ គ្រាដែលប្តីនារីរងគ្រោះមិននៅ។
តាមប្រភពព័ត៌មានពីសមត្ថកិច្ចបានឲ្យដឹងថា ជនសង្ស័យឈ្មោះ ញ៉ុត អឿន អាយុ៣០ឆ្នាំ ទីលំនៅក្នុងភូមិស្រែតាប៉ាន ឃុំសាមឃួយ ស្រុកសេសាន្ត (ចាប់បានភ្លាមៗ) ឯនារីរងគ្រោះមានអាយុ១៩ឆ្នាំ។
ប្រភពឱ្យដឹងថា ជនសង្ស័យបានចាប់នាងរំលោភរហូតបានសម្រេច នៅលើខ្ទមចម្ការមួយកន្លែង ខណៈដែលប្តីនាងមិននៅ ជាប់រវល់ទៅលេងបុណ្យក្នុងភូមិ ។ ដោយឡែក វត្ថុតាងបន្សល់ទុកនៅកន្លែងកើតហេតុ គឺមានទូរស័ព្ទដៃមួយគ្រឿង និងអាវជនសង្ស័យ ។
បច្ចុប្បន្នជនសង្ស័យត្រូវកម្លាំងអធិការដ្ឋាននគរបាលស្រុកសេសាន្តសាកសួរ ដើម្បីចាត់ការតាមច្បាប់៕
គ្រោងឆ្អឹងសាកសពម្នាក់ប្រទះឃើញកន្លងមកត្រូវបានស្គាល់សាវតារហើយ
ដោយ៖ប៉ែន សុផល
បាត់ដំបង៖យោងតាមសមត្ថកិច្ចបានអោយដឹងថា គ្រោងឆ្អឹងសាកសពមនុស្សម្នាក់ត្រូវបានគេប្រទះឃើញកាលពីវេលាម៉ោង១១ និង០០នាទីថ្ងៃទី១២ ខែវិច្ឆិកា ឆ្នាំ២០១៦កន្លងមកត្រូវបានស្គាល់សាវតារហើយបន្ទាប់ពីសមត្ថកិច្ចធ្វើការស្រាវជ្រាវអស់រយះពេល២ថ្ងៃកន្លងមក។
គួរបញ្ជាក់ថា គ្រោងឆ្អឹងសាកសពមិនស្គាល់សាវតារម្នាក់ត្រូវបានគេប្រទះឃើញកាលពីវេលាម៉ោង១១ និង០០នាទីថ្ងៃទី១២ ខែវិច្ឆិកា ឆ្នាំ២០១៦ នៅចំណុចដីឡូត៍មួយកន្លែងដែលជារបស់ ឈ្មោះ វ៉ាន់.សឹ៑មវ៉ាភេទប្រុសអាយុ30ឆ្នាំស្ថិតក្នុងក្រុមទី01ភូមិជ្រៃកោងសង្កាត់ស្លាកែតក្រុងបាត់ដំបងខណះពេលដែលម្ចាស់ដីឡូយកត្រាក់ទរ័មកឈូសឆាយស្មៅ ។
លោកប៉ាងហៀងអធិការនគរបាលក្រុងបាត់ដំបងបានបញ្ជាក់ថា បន្ទាប់ពីសមត្ថកិច្ចជំនាញបានធ្វើការស្រាវជ្រាវអស់រយះពេល២ថ្ងៃត្រូវបានស្គាល់អត្តសញ្ញាណសាកសពនោះហើយ មានឈ្មោះ ខន ឃឿន ភេទ ប្រុស អាយុ២៩ឆ្នាំ។
យោងតាមការបំភ្លឺរបស់ឈ្មោះ យ៉ាន សុខន ភេទ ស្រី អាយុ៥៤ឆ្នាំ(ត្រូវជាម្តាយបង្កើតរបស់សព)បានឆ្លើយបញ្ជាក់ប្រាប់សមត្ថកិច្ចនៅរសៀលថ្ងៃទី១៤ វិច្ឆិកាថា កាលពីថ្ងៃទី១២ ខែតុលា ឆ្នាំ២០១៦ វេលាម៉ោង១០ និង១០នាទី កូនប្រុសឈ្មោះ ខន សុឃឿន បានឲ្យគាត់កោសខ្យល់អោយព្រោះវាថាអត់ស្រួលខ្លួនពេលនោះរូបគាត់ក៏បានកោសខ្យល់ឲ្យពេលកោសខ្យល់ហើយវាចេះតែដើរនិយាយប្រាប់អ្នកភូមិថា មានគេមកយកវាទៅហើយ ។
លុះដល់ម៉ោង១៥ និង០០នាទី ថ្ងៃ.ខែ.ឆ្នាំដដែលកូនប្រុសរបស់គាត់បានដូរសម្លៀកបំពាក់ចេញ ដោយស្លៀកពាក់អាវយឺតដៃខ្លី ពណ៌លឿង ខោពណ៌ទឹកប៊ិច ជើងវែងនិងមានពាក់ខ្សែរដៃចាក់ពណ៌ផ្កាឈូកមានអង្កាំ ដើរចេញពីផ្ទះដោយនិយាយប្រាប់ថាមានគេមកយកវាហើយ ហើយចេញពីផ្ទះបាត់រហូតមិនដឹងទៅទីណាទេ ។
ប្រភពបន្តទៀតថា ដោយនាងមិនបានប្តឹងប៉ូលីសពីព្រោះកន្លងមកកូនប្រុសរបស់គាត់ធ្លាប់ដើរចេញពីផ្ទះបាត់១ខែ ទៅ២ខែ ទើបវាត្រឡប់មកផ្ទះវិញហើយវា មិនដែលមានទំនាស់ជាមួយអ្នកជិតខាងឬអ្នកផ្សេងណាម្នាក់នោះទេតែវាតែងតែផឹកស្រាស្រវឹងជាប្រចាំមិនដែលលុះថ្ងៃឡើយ។
បច្ចុប្បន្នគ្រោងឆ្អឹងសាកសពខាងលើត្រូវបានម្តាយនិងសាច់ញាតស្នើសុំយកទៅធ្វើបុណ្យតាមប្រពៃណី៕
ពលរដ្ឋខ្មែរចំនួន ៧,១៣៩,៣៤២នាក់បានទៅចុះឈ្មោះបោះឆ្នោត
រាជធានីភ្នំពេញ៖គិតត្រឹមម៉ោង៦ល្ងាច ថ្ងៃទី១៤ ខែវិច្ឆិកា ឆ្នាំ២០១៦ម្សិលមិញមានប្រជាពលរដ្ឋខ្មែរចំនួន ៧,១៣៩,៣៤២នាក់ហើយ បានទៅចុះឈ្មោះបោះឆ្នោត។ នេះបើតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប)៕
Messi បដិសេធចំពោះការបន្តកុងត្រាថ្មីជាមួយ Barcelona
បាល់ទាត់៖យោងតាមសេចក្តីរាយរបស់សារព័ត៌មាន Marca បានឲ្យដឹងថា Lionel Messi បានបដិសេធមិនព្រមបន្តកុងត្រាថ្មីជាមួយក្រុមអ្នកមានបុណ្យ Barcelona ទេ ហើយថែមទាំងចង់ចាកចេញពីក្រុមនេះ មុនចប់កិច្ចសន្យាទៀតផង។
តាមប្រភពសារព័ត៌មានខាងលើបានអះអាងថា កីឡាករវ័យ២៩ឆ្នាំរូបនេះ បានបដិសេធមិនព្រមបន្តកុងត្រាជាមួយ Barcelona តាំងពីពាក់កណ្ដាលខែកក្កដា អំឡុងពេលរូបគេធ្វើដំណើរសម្រាកលំហែកាយជាមួយក្រុមគ្រួសារ។ ម្ចាស់ពាន Ballon d’Or ៥សម័យកាលរូបនេះក៏បានពិចារណា ចង់ចាកចេញពីក្រុម យក្សអេស្ប៉ាញ មុនចប់កុងត្រានៅឆ្នាំ២០១៨ផងដែរ។
ហេតុផលដែលធ្វើឲ្យ Messi រារែកមិនចង់តកុងត្រាជាមួយ Barcelona គឺព្រោះតែរូបគេធុញថប់នឹងរឿងពន្ធនៅអេស្ប៉ាញ។ ប្រធានក្រុមជម្រើសជាតិអាហ្សង់ទីនរូបនេះ ត្រូវបានតុលាការកាត់ក្ដីឲ្យជាប់ពន្ធនាគារ ២១ខែម្ដងហើយ ហើយកន្លងមកក៏បានឡើងតុលាការតវ៉ាជាច្រើនដងបន្តបន្ទាប់។
យ៉ាងណាមិញតាមពាក្យចចាមអារ៉ាមជាច្រើនថា Messi អាចនឹងវិលទៅក្រុមចាស់របស់គេនៅស្រុកកំណើត Newell’s Old Boys វិញ៕
សមត្ថកិច្ចក្របួចជនសង្ស័យម្នាក់រួមនិងថ្នាំញៀន៤កញ្ចប់
ដោយ៖ប៉ែន សុផល
បាត់ដំបង៖កម្លាំងអន្តរាគមន៍បង្ការបង្ក្រាបនៃស្នងការដ្ឋាននគរបាលខេត្តបាត់ដំបងបានចុះប្រតិបត្តិការចាប់ឃាត់ខ្លួនជនសង្ស័យករណីជួញដូរថ្នាំញៀនម្នាក់កាលពីវេលាម៉ោង ២០ និង ៤០ នាទី ថ្ងៃទី ១៣ ខែ វិច្ឆិកា ឆ្នាំ ២០១៦នៅចំណុចក្បែរហាងស៊ុំគោភ្នំធំ ស្ថិតក្នុងភូមិ ព្រែកមហាទេព សង្កាត់ស្វាយប៉ោ ក្រុងបាត់ដំបង។
លោកស៊ាន សុណាល់នាយការិយាល័យប្រឆាំងគ្រឿងញៀនខេត្តបានអោយដឹងថា៖ក្នុងកិច្ចប្រតិបត្តិការបង្ក្រាបចាប់ឃាត់ខ្លួនជនសង្ស័យករណីរក្សាទុកនិងជួញដូរថ្នាំញៀនខាងលើនេះជាលទ្ធិផលជាក់ស្ដែងកម្លាំងជំនាញបានធ្វើការឃាត់ខ្លួនជនសង្ស័យម្នាក់រួមនិងវត្ថុតាងថ្នាំញៀនចំនួន៤កញ្ចប់ផងដែរ។
លោកបន្តថា៖ជនសង្ស័យត្រូវបានឃាត់ខ្លួនឈ្មោះ សុថង ម៉ាឡៃថន ភេទ ប្រុស អាយុ ១៧ ឆ្នាំ មានទីលំនៅភូមិ នរា២ ឃុំនរា ស្រុកសង្កែ ខេត្តបាត់ដំបង ។
វត្ថុតាងដកហូតបានរួមមាន៖ថ្នាំញៀនប្រភេទមេតំហ្វេតាមីន(ម៉ាទឹកកក)ចំនួន៤កញ្ចប់ទម្ងន់០,៩៧ក្រាម ។ ម៉ូតូចាស់កែច្នៃចំនួន១គ្រឿង។ ទូរស័ព្ទដៃចំនួន ០១ គ្រឿង ។ អំពូលទែរម៉ូម៉ែត្រកែច្នៃសំរាប់ជក់ថ្នាំញៀនចំនួន១។ ដែកកេះចំនួន១។ អំពូលទែរម៉ូម៉ែត្រមិនទាន់កែច្នៃចំនួន១ និងកាបូបដាក់លុយចំនួន១។
បច្ចុប្បន្នជនសង្ស័យខាងលើរួម និង វត្ថុតាងត្រូវបានកម្លាំងជំនាញ ការិយាល័យប្រឆាំងគ្រឿងញៀនខេត្តកំពុងកសាងសំណុំរឿងដើម្បីចាត់ការបន្តទៅតាមផ្លូវច្បាប់ ៕
ក្មេងអាយុ៧ឆ្នាំម្នាក់រងគ្រោះថ្នាក់ធ្ងន់ ខណៈពេលរត់ឆ្លងថ្នល់
ដោយ៖ប៉ែន សុផល
បាត់ដំបង៖ថ្ងៃទី១៤ ខែវិច្ឆិកា ឆ្នាំ២០១៦ វេលាម៉ោង១៥ និង៣០នាទី នៅចំណុចភូមិស្នួល ឃុំពេជ្រចិន្តា ស្រុកភ្នំព្រឹក មានករណីគ្រោះថ្នាក់ចរាចរណ៍កើតឡើង០១លើក បង្កឡើងដោយរថយន្តមិនស្គាល់ម៉ាកបន្ទាប់ ពេលកើតហេតុកើតឡើងអ្នកបានបើករត់គេចបាត់។
បានបុកកូនក្មេង ឈ្មោះ ថន ខៃ ភេទប្រុស អាយុ០៧ឆ្នាំរងរបួសធ្ងន់ពេលបញ្ជូនដល់មន្ទីពេទ្យបានស្លាប់ មានទីលំនៅភូមិអ្នកតាភា ឃុំឫស្សីគ្រាំង ស្រុកម៉ោងឫស្សី ខេត្តបាត់ដំបង មកស្នាក់នៅភូមិ-ឃុំខាងលើជាមួយឪពុកម្តាយ ធ្វើជាកម្មករគេ ខណៈពេលក្មេងរងគ្រោះរត់ឆ្លងផ្លូវពីត្បួងទៅជើង បណ្តាលឲ្យរថយន្តបុកចំពេញទំហឹងតែម្តង និងនៅពេលនោះស្ងាត់មនុស្ស គ្មានសាក្សីបានឃើញនិងស្គាល់ម៉ាករថយន្តនោះឡើយធ្វើឲ្យសមត្ថកិច្ចយើងពិបាកក្នុងការជួយអន្តាគមន៍ ឃាត់រថយន្ត និងចាប់អ្នកបើកបរមិនទាន់បាន ប៉ុន្តែសមត្ថកិច្ចយើងនៅតែខិតខំស្រាវជ្រាវរករថយន្តបង្កនិងចាប់ឃាត់ខ្លួនអ្នកបើកបរយកមកផ្តន្ទាទោសតាមផ្លូវច្បាប់។
ក្រោយពីសមត្ថកិច្ចយើងចុះពិនិត្យសាសពក្មេងរងគ្រោះរួចបានគល់ឲ្យឪពុកម្តាយយកទៅធ្វើបុណ្យតាមប្រពៃណី៕
ភ្ញៀវទេសចរ២នាក់ស្លាប់ និង២នាក់ផ្សេងទៀតកំពុងបាត់ខ្លួន
ខេត្តកំពត៖ករណីទូកទេសចរណ៍ដឹកភ្ញៀវមើលអំពិលអំពែកតាមមាត់សមុទ្រ គឿងជាមួយខ្សាច់ ផ្អើលលោតចូលទឹក ស្លាប់ភ្ញៀវ២នាក់ ខណៈ២នាក់ទៀតរកមិនទាន់ឃើញ។ នេះបើយោងតាមការបញ្ជាក់ពីស្នងការនគរបាលខេត្តកំពត លោកឧត្តមសេនីយ៍ ម៉ៅ ច័ន្ទមធុរិទ្ធ នៅព្រឹកថ្ងៃទី១៥ ខែវិច្ឆិកា ឆ្នាំ២០១៦នេះ។
លោកឧត្តមសេនីយ៍ បានបន្តថា «រហូតពេលនេះសពស្ត្រីម្នាក់ទៀត ជាអ្នករស់នៅភ្នំពេញ ត្រូវបានរកឃើញតែ២នាក់ ម្តាយកូន ជាប្រពន្ធ និងកូនរបស់នាយការិយាល័យសុខាភិបាលនោះ នៅមិនទាន់រកឃើញនៅឡើយទេ តែសង្ស័យថាស្លាប់ហើយ»។
យ៉ាងណាក៏ដោយ សម្រាប់ម្ចាស់ទូកទេសចរណ៍មួយនេះ ត្រូវបានកម្លាំងសមត្ថកិច្ចឃាត់ខ្លួនផងដែរ ដើម្បីចាត់ការតាមច្បាប់។
ស្នងការនគរបាលខេត្តកំពត លោកឧត្តមសេនីយ៍ ម៉ៅ ច័ន្ទមធុរិទ្ធ បានបញ្ជាក់នៅថា ស្ត្រីវ័យចំណាស់ម្នាក់បានស្លាប់ នៅពេលកម្លាំងរបស់លោក បញ្ជូនទៅដល់មន្ទីរពេទ្យ ដោយសារធ្លាក់ចូលទឹក ហើយ២នាក់ទៀត ដែលជាប្រពន្ធ និងកូនរបស់នាយការិយាល័យសុខាភិបាល នៃស្នងការដ្ឋាននគរបាលខេត្ត បានបាត់ខ្លួននៅឡើយ ខណៈក្រុមភ្ញៀវជាច្រើននាក់ផ្សេងទៀត ត្រូវបានជួយសង្គ្រោះទាន់ពេល។
លោកឧត្តមសេនីយ៍ស្នងការ បានបន្តថា មូលហេតុដែលនាំឲ្យមានករណីនេះកើតឡើង ដោយសារតែទូកទេសចរណ៍មួយនេះ ក្រោយត្រឡប់មកពីមើលអំពិលអំពែកតាមមាត់សមុទ្រនោះ បានគឿងខ្សាច់ (ក្រោយទឹកនាច) ស្រាប់តែបណ្តាលឲ្យទូកផ្អៀង ហើយមានអ្នកខ្លះធ្លាក់ចូលទឹក ពេលនោះក៏ម្នាក់ៗឆោឡោយ៉ាងខ្លាំង ដោយគិតថាទូកលិច ទើបម្នាក់ៗនាំគ្នាលោតចេញពីទូក រហូតមានស្លាប់ និងបាត់ខ្លួនតែម្តង។
គួរបញ្ជាក់ថា នៅយប់ថ្ងៃទី១៤ ខែវិច្ឆិកា ឆ្នាំ២០១៦ មានករណីគ្រោះថ្នាក់មួយបានកើតឡើង ស្ថិតនៅតាមមាត់សមុទ្រ ជិតស្ពានថ្មី ក្រុងកំពត ខេត្តកំពត រហូតស្លាប់ស្ត្រីវ័យចំណាស់ម្នាក់ និងបាត់ខ្លួន២នាក់ ក្រោយទូកទេសចរណ៍ដ៏ធំមួយផ្ទុកមនុស្សជាង៧០នាក់ បានគឿងជាមួយខ្សាច់ ហើយផ្អៀងធ្វើឲ្យមានការជ្រួលច្របល់អ្នកនៅលើទូក រហូតលោតចូលទឹកតែម្តង៕
