ដោយ៖ប៉ែន សុផល
បាត់ដំបង៖មានករណីគ្រោះថ្នាក់ចរាចរមួយបានកើតឡើង បង្កដោយរថយន្តម៉ាកកាមរីពណ៌ស្ករ ពាក់ស្លាកលេខភ្នំពេញ 2Q:6874 អ្នកបើកបរដោយជនមិនស្គាល់ឈ្មោះ (បានរត់គេចខ្លួនបាត់) បុកម៉ូតូ១គ្រឿងម៉ាកស៊ុយសូគីបណ្តាលឲ្យស្ត្រីម្នាក់ស្លាប់នៅនឹងកន្លែង និងម្នាក់ទៀតរងរបួសធ្ងន់។ ហេតុការណ៍នេះកើតឡើងថ្ងៃទី១៣ខែតុលា ឆ្នាំ២០១៦ វេលាម៉ោង១៧ និង២០នាទី នៅចំណុចខាងលិចវត្តអូរស្បៃកព្រើស ស្ថិតក្នុងភូមិស្ពានទំនាប ឃុំបួរ ស្រុកភ្នំព្រឹក ខេត្តបាត់ដំបង។
តាមប្រភពព័ត៌មានបានឲ្យដឹងថា មុនពេលកើតហេតុរថយន្តបង្កបើកបរពីទិសខាងកើតមក ទិសខាងលិចបានគេចពីម៉ូតូមួយគ្រឿងដែលបើកបរស្របទិសគ្នារួចក៏បុកម៉ូតូ១គ្រឿងទៀតនៅខាងមុខដែលមានម៉ាកស៊ុយសូគី គ្មានស្លាកលេខ បើកបរពីទិសខាងលិចទៅកើតបណ្ដាលអោយស្លាប់ជនរងគ្រោះជិះម៉ូតូម្នាក់ស្លាប់ និងរបួសធ្ងន់ម្នាក់។ ប្រភពបញ្ជាក់ថា នារីរងគ្រោះទី ១.ឈ្មោះ ព្រឿង ហ៊ីង ភេទស្រី អាយុ២៧ឆ្នាំស្លាប់។ ទី២. ឈ្មោះ ជា មុំ ភេទស្រី អាយុ២៣ឆ្នាំ រងរបួសធ្ងន់ បញ្ជូនទៅដល់មន្ទីរពេទ្យបានស្លាប់ ជនរងគ្រោះទាំង២នាក់ រស់នៅភូមិ-ឃុំកើតហេតុខាងលើ ។
ក្រោយពីសមត្ថកិច្ចជំនាញបានធ្វើការវាស់វែងកន្លែងកើតហេតុនិងរៀបចំសំណំឯកសាក្នុងហេតុកាណ៍រួចបានយករថយន្តបង្ករនិងម៉ូតូមករក្សាទុកនៅប៉ុស្តិ៍នគរបាលរដ្ឋបាលបួររងចាំធ្វើការដោះស្រាយតាមនីតិវិធីច្បាប់ និងបន្តស្រាវជ្រាវរកអ្នកបើកបររថ្តយន្តជាជនបង្កដើម្បីយកមកផ្តន្ទាទោសតាមផ្លូវច្បាប់ ចំណែកសាកសពជនរងគ្រោះបានប្រគល់ឲ្យសាច់ញាតិទទួល យកទៅធ្វើបុណ្យតាមប្រពៃណី៕
រាជធានីភ្នំពេញ៖គិតត្រឹមម៉ោង៦ល្ងាច ថ្ងៃទី១៣ ខែតុលា ឆ្នាំ២០១៦ ម្សិលមិញនេះមានប្រជាពលរដ្ឋខ្មែរចំនួន៥,៤៥៣,០៥៧នាក់ហើយ បានទៅចុះឈ្មោះបោះឆ្នោត។ នេះបើតាមសេចក្តី ប្រកាសព័ត៌មាន គណៈកម្មាធិការជាតិរៀបចំការបោះឆ្នោត គ.ជ.ប៕
ដោយ៖ប៉ែន សុផល
បាត់ដំបង៖កម្លាំងជំនាញកងរាជអាវុធខេត្តបាត់ដំបងបានចុះប្រតិបត្តិការបង្ក្រាបករណីរក្សាទុកនិងជួញដូរថ្នាំញៀនដោយខុសច្បាប់ពីរករណីផ្សេងគ្នាក្នុងបទល្មើសជាក់ស្ដែងឃាត់ខ្លួនជនសង្ស័យ២នាក់និងថ្នាំញៀនចំនួន៣កញ្ចប់បញ្ជូនទៅតុលាការ។
ហេតុការណ៍បង្ក្រាបករណីរក្សាទុកនិងជួញដូរថ្នាំញៀនខាងលើនេះធ្វើឡើងកាលពីវេលាម៉ោង ១៤ និង ០០ នាទី ថ្ងៃទី ១២ ខែ តុលា ឆ្នាំ ២០១៦ នៅចំណុចភូមិ អូរចារ សង្កាត់អូរចារ ក្រុងបាត់ដំបង ។
ជនសង្ស័យត្រូវបានឃាត់ខ្លួនឈ្មោះ ស៊ិន ស៊ីណាល់ ភេទ ប្រុស អាយុ ២៩ ឆ្នាំ មុខរបរ រត់ម៉ូតូឌុប ទីលំនៅភូមិ អណ្តូងចេញ សង្កាត់ អូរចារ ក្រុងបាត់ដំបង ។
និងមួយករណីទៀតឃាត់ខ្លួនកាលពីវេលាម៉ោង១០និង៣០នាទីថ្ងៃទី១៣ ខែតុលា ឆ្នាំ២០១៦នៅចំណុចភូមិពពាលខែ ឃុំអូរតាគី ស្រុកថ្មគោល ខេត្តបាត់ដំបង។
ជនសង្ស័យឈ្មោះនង់ បូណា ហៅមាំង ភេទប្រុស អាយុ២៧ឆ្នាំរស់នៅ ភូមិពពាលខែ ឃុំអូរតាគី ស្រុកថ្មគោល។
វត្ថុតាងដកហូតបានរួមមាន៖១-គ្រឿងញៀនប្រភេទមេតំហ្វេតាមីន(ម៉ាទឹកកក )ចំនួន ៣ កញ្ចប់ ទម្ងន់ស្មើ ៤៥,៩៧ ក្រាម។ ២-ទូរស័ព្ទដៃ ចំនួន២ គ្រឿង។៣-ម៉ូតូ ចំនួន២គ្រឿងម៉ាកហុដាឌ្រីម សេ១២៥ ពណ៌ខ្មៅ សេរី ឆ្នាំ ២០១៤ពាក់ស្លាកលេខ បាត់ដំបង 1Q 6555 និងមួយគ្រឿងម៉ាកវេវសេរីចាស់ ពណ៌ក្រហមគ្មានស្លាកលេខ។
បច្ចុប្បន្នជនសង្ស័យខាងលើរួមនិងវត្ថុតាងត្រូវបានការិយាល័យជំនាញអាវុធហត្ថខេត្តបាត់ដំបង បានកសាងសំណុំ រឿងបញ្ចូនទៅតុលាការនៅរសៀលថ្ងៃទី១៣ ខែតុលា ឆ្នាំ២០១៦នេះដើម្បីចាត់ការបន្តទៅតាមផ្លូវច្បាប់៕
ដោយ៖ប៉ែន សុផល
ខេត្តបាត់ដំបង៖បើតាមសេចក្ដីរាយការណ៍ ពីកំលាំងកងរាជអវុធហត្ថខេត្តបាត់ដំបង បានអោយដឹងថា មានករណី អគ្គីភ័យមួយបានកើតឡើង វេលាម៉ោង២០ និង៣០នាទី ថ្ងៃទី១២ ខែតុលា ឆ្នាំ២០១៦ អគ្គីភ័យនេះបានឆេះ នៅក្នុងរោងឡសំងួតពោត មួយកន្លែង ដែលស្ថិតនៅភូមិស្ដៅ ឃុំស្ដៅ ស្រុករតនៈមណ្ឌល ខេត្តបាត់ដំបង។
ប្រភពពីម្ចាស់ផ្ទះឡសំងួតពោត មានឈ្មោះ កាំង ឡៃគីម ភេទស្រី អាយុ៣៧ឆ្នាំ រស់នៅភូមិស្ដៅ ឃុំស្ដៅ ស្រុករតនៈមណ្ឌល ខេត្តបាត់ដំបង បានអោយដឹងថា មុនពេលកើតហេតុគាត់ជាម្ចាស់បានទៅដុតភ្លើងបម្រុង និងសំងួតពោត ធ្វេសប្រហេសក៏បណ្ដាលឲ្យមានអណ្ដាតភ្លើងឆាបឆេះតែម្ដង តែមិនបណ្ដាលអោយមានអ្នករងរបួសឡើយ។
សម្ភារៈដែលបានឆេះខូចខាតរួមមាន៖ឡសំងួត ០១ (៦គុណ១២) គ្រាប់ពោតចំនួន២០តោន
សរុបជាទឹកប្រាក់ទាំងអស់ចំនួន ៦០០០ដុល្លារ៕
រាជធានីភ្នំពេញ៖ទាំងលោក សម រង្ស៊ី ទាំងលោក កឹម សុខា មេដឹកបក្សប្រឆាំងសុទ្ធតែ បានចេញលិខិតសាទរជូនចំពោះដំណើរទស្សនកិច្ច របស់ លោក ស៊ី ជិនពីង ប្រធានាធិបតីចិន ខណៈដែលនៅក្នុងលិខិតសាទរនោះមេដឹកនាំទាំងពីរបានលើកឡើងុថា ដំណើរទស្សនកិច្ចរបស់លោក ស៊ី ជិនពីង ប្រធានាធិបតីចិនពេលនេះ គឺជាដំណើរទស្សនកិច្ច ប្រវត្ថិសាស្ត្រ និងជាការពង្រឹងថែមទៀត នូវទំនាក់ទំនងមិត្តភាព កម្ពុជា-ចិន ដែលបានបង្កើតឡើង តាំងពីឆ្នាំ១៩៥៨ ហើយចំណង ទំនាក់ទំនងការទូត និងមិត្តភាពជាប្រពៃណីរវាងប្រទេសកម្ពុជា និងប្រទេសចិនផងដែរ៕
វ៉ាស៊ីនតោន៖លោក ដូណាល់ ត្រាំ បេក្ខភាពប្រធានាធិបតីអាមេរិក នៃគណបក្សសាធារណ ត្រូវស្ត្រី២នាក់ចោទប្រកាន់ថា បានរំលោភបំពានលើផ្លូវភេទពួកនាង។ នេះបើយោងតាមការចុះផ្សាយ របស់ស្ថានីយ៍ទូរទស្សន៍ CNN នៅរសៀលថ្ងៃព្រហស្បតិ៍ ទី១៣ ខែតុលា ឆ្នាំ២០១៦នេះ។
តាមរយៈបទសម្ភាសន៍ជាមួយ New York Times នាង Jessica Leeds និង នាង Rachel Crooks និយាយជាសាធារណៈថា មហាសេដ្ឋីអាចលនាទ្រព្យរូបនេះបានលូកលាន់រូបនាង នៅពេលដែលនាងអង្គុយជិតលោក នៅលើយន្ដហោះ កាលពីជាង៣០ឆ្នាំមុន ចំណែកឯនាង Rachel ក៏បានអះអាងដែរថា បេក្ខភាពប្រធានាធិបតីរូបនេះ បានអោបថើបរូបនាងដោយគ្មានការយល់ព្រម នៅអំឡុងពេលនាង បំពេញការងារជាអ្នកទទួលភ្ញៀវនៅក្នុងអាគារ Trump Tower របស់លោក កាលពីឆ្នាំ២០០៥។ ប៉ុន្តែទោះជាយ៉ាងណា ក្រុមការងារយុទ្ធធាការបោះឆ្នោតរបស់លោក Trump បានបដិសេធការ ចោទប្រកាន់ទាំងនេះ ដោយសំអាងថាមិនមែនជាការពិត និងគ្មានភស្តុតាងច្បាស់លាស់៕
សេអ៊ូល៖ជនជាតិកូរ៉េខាងត្បូង ០៣នាក់ ក្នុងនោះមានបុរសពីរនាក់ និងស្ត្រីម្នាក់ ដែលអ្នកទាំងនេះ មានអាយុខ្ទង់៤០ឆ្នាំ ត្រូវបានគេបាញ់សម្លាប់កាលពីថ្ងៃអង្គារនៅក្នុងទីក្រុង Bacolod ស្ថិតនៅក្បែររដ្ឋធានីម៉ានីលប្រទេសហ្វីលីពីន។ នេះបើយោងតាមមន្ត្រីមួយរូបនៃក្រសួងការបរទេសកូរ៉េខាងត្បូង។
យោងតាមការចុះផ្សាយរបស់សារព័ត៌មាន Channel News Asia នៅថ្ងៃព្រហស្បតិ៍ ទី១៣ ខែតុលា ឆ្នាំ២០១៦នេះ ដោយដកស្រុងសម្តីមន្ត្រីស្ថានកុងស៊ុលកូរ៉េខាងត្បូង ប្រចាំទីក្រុង ម៉ានីល បានឲ្យដឹងថា ជនរងគ្រោះទាំងអស់ត្រូវបាន គេបាញ់សម្លាប់នៅត្រង់ក្បាល ហើយក្នុងចំណោមពួកគេមានម្នាក់ដៃជាប់ ចំណង។ មន្ត្រីរូបនេះបានបញ្ជាក់ថា រាប់ទាំងជនរងគ្រោះទាំង០៣នាក់ខាងលើ ចំនួនពលរដ្ឋ កូរ៉េខាងត្បូង ដែលត្រូវបានសម្លាប់នៅ ហ្វីលីពីន ក្នុងឆ្នាំ២០១៦នេះ កើនឡើងដល់ ០៦នាក់ បើធៀបទៅនឹងឆ្នាំ២០១៥ ជនជាតិ កូរ៉េខាងត្បូង សរុប១១នាក់ត្រូវបានសម្លាប់ នៅក្នុងប្រទេសនៃតំបន់អាស៊ីអាគ្នេយ៍មួយនេះ។
គួរបញ្ជាក់ថា ក្នុងយុទ្ធនាការប្រយុទ្ធប្រឆាំងនឹង គ្រឿងញៀនរបស់ប្រធានាធិបតីហ្វីលីពីនបានបណ្ដាលឱ្យមនុស្សជាង ៣,៦០០ នាក់បាត់បង់ជីវិត គិតចាប់តាំងពីខែកក្កដាមក៕ ជាមួយគ្នានេះបើតាមភាគីកូរ៉េខាងត្បូង៕
ក្រុងមូស្គូ៖មន្ត្រីក្រសួងការពារជាតិរុស្ស៊ីបានឲ្យដឹងថា ការបាញ់សាកល្បងមីស៊ីលផ្លោងចំនួន៣គ្រាប់នេះ ត្រូវបានធ្វើឡើងដែលជាផ្នែកមួយនៃសមយុទ្ធយោធាដើម្បីត្រៀមខ្លួនប្រយុទ្ធ ហើយតេស្តទាំងបីលើកនេះបានបាញ់ចំគោលដៅដែលត្រូវបានកំណត់ទុកដោយជោគជ័យ។ នេះបើតាមសារព័ត៌មាន Russia Today ផ្សាយនាព្រឹកថ្ងៃព្រហស្បតិ៍ ទី១៣ ខែតុលា ឆ្នាំ២០១៦នេះ។
មន្ត្រីដដែលបញ្ជាក់ថា ការបាញ់សាកល្បងដោយ ជោគជ័យនូវមីស៊ីលផ្លោងចំនួនបីគ្រាប់នេះគឺធ្វើឡើង ស្ថិតនៅទីតាំងខុសៗគ្នា ដោយការធ្វើតេស្តចំនួនពីរត្រូវបានធ្វើ ឡើងដោយនាវាមុជទឹក មកពីអង្គភាពប្រចាំភាគខាងជើង និងប្រចាំមហាសមុទ្រប៉ាស៊ីហ្វិក រីឯការធ្វើ តេស្តសាកល្បងមួយទៀត ត្រូវបានបាញ់ចេញពីស្ថានីយអាវកាស Plesetsk របស់រុស្ស៊ី។ ទន្ទឹមគ្នានេះដែរ ក៏មានការបាញ់សាកល្បងមីស៊ីលផ្លោងចំនួនមួយគ្រាប់ នៅឯសមុទ្រ Barents ដោយការបាញ់នេះត្រូវបានធ្វើឡើងដោយ បាញ់ចេញពីនាវាមុជទឹក និងត្រូវចំគោលដៅ ដូចគ្នាទៅនឹង ការធ្វើតេស្តនៅឯសមុទ្រ Okhotsk៕
រាជធានីភ្នំពេញ៖គិតត្រឹមម៉ោង៦ល្ងាច ថ្ងៃទី១២ ខែតុលា ឆ្នាំ២០១៦ម្សិលមិញនេះមានប្រជាពលរដ្ឋខ្មែរចំនួន ៥,៣៥៤,១៣៥នាក់ហើយ បានទៅចុះឈ្មោះបោះឆ្នោត។ នេះបើតាមសេចក្តីប្រកាសព័ត៌មានគណៈកម្មាធិការជាតិរៀបចំ ការបោះឆ្នោត គ.ជ.ប។
គួរបញ្ជាក់ថា ប្រជាពលរដ្ឋដែលមាន អាយុ១៨ឆ្នាំឡើង ហើយមានសិទ្ធិចុះឈ្មោះបោះឆ្នោត មានចំនួនជាង៩.៦លាននាក់៕
ខេត្តស្ទឹងត្រែង៖កម្លាំងក្រុមស្រាវជ្រាវព័ត៌មាន និងបង្ក្រាបបទល្មើសព្រៃឈើរបស់កងរាជអាវុធហត្ថលើផ្ទៃប្រទេសបានឃាត់ខ្លួនយាយព្រឿង ជនជាតិវៀតណាម ដែលជាឈ្មួញឈើដ៏ធំប្រចាំភូមិភាគឦសាន្ត និងមានទីតាំងស្តុកឈើជាច្រើនកន្លែងនៅក្នុងខេត្តស្ទឹងត្រែង។ ការឃាត់ខ្លួននេះធ្វើឡើងកាលពីវេលាម៉ោង៤ទៀបភ្លឺថ្ងៃទី១៣ ខែតុលា ឆ្នាំ២០១៦ នៅក្នុងបរិវេណសង្កាត់រដ្ឋបាលព្រៃឈើអូរពងមាន់ ខេត្តស្ទឹងត្រែង បន្ទាប់ពីមេឈ្មួញដ៏ធំរូបនេះ បានយករថយន្ត២គ្រឿង និងកម្មករ៧នាក់ មករំដោះឈើ ដែលសមត្ថកិច្ចបង្ក្រាបចាប់ ហើយនាំយកមករក្សាទុកនៅក្នុងសង្កាត់រដ្ឋបាលព្រៃឈើអូរពងមាន់នោះ ។
គួរបញ្ជាក់ថា កាលពីវេលាម៉ោង១២និង៣០នាទីព្រឹកថ្ងៃទី១២ ខែតុលា ឆ្នាំ២០១៦ កម្លាំងក្រុមការងារ ស្រាវជ្រាវ ព័ត៌មាន និងបង្ក្រាបព្រៃឈើ របស់កងរាជអាវុធហត្ថលើផ្ទៃប្រទេស បានស្រាវជ្រាវ រកឃើញគំនរឈើដ៏ច្រើន ត្រូវបានគេយកទៅលាក់ទុកនៅក្នុងដីចម្ការ ស្ថិតក្នុងភូមិ ឃុំ ស្រែក្រសាំង ស្រុកសៀមបូក ខេត្តស្ទឹងត្រែង ។
សមត្ថកិច្ចបានឲ្យដឹងថា ឈើទាំងនោះ ជាប្រភេទឈើប្រណីត ដែលមានចំនួនដ៏ច្រើន ត្រូវបានក្រុមការងារស្រាវជ្រាវព័ត៌មាន និងបង្ក្រាបបទល្មើសព្រៃឈើ សហការជាមួយរដ្ឋបាលព្រៃឈើ ដឹកជញ្ជូនឈើទាំងនោះ យកទៅរក្សាទុកនៅសង្កាត់រដ្ឋបាលព្រៃឈើអូរពងមាន់តាំងពីរសៀលថ្ងៃទី១២ ខែតុលា រហូតដល់រំលងអធ្រាត្រ ឈានចូលថ្ងៃទី១៣ ខែតុលា ឆ្នាំ២០១៦ ទើបរួចរាល់ ដែលឈើទាំងនោះ មានចំនួន៦ឡានសាំយ៉ុង និង៦ឡានបែន ។
បន្ទាប់ពីកម្លាំងសមត្ថកិច្ចកងរាជអាវុធហត្ថលើផ្ទៃប្រទេសយកទៅរក្សាទុកនៅសង្កាត់រដ្ឋបាលព្រៃឈើអូរពងមាន់ ស្រាប់តែនៅវេលាម៉ោង៤ព្រឹកថ្ងៃទី១៣ ខែតុលា ឆ្នាំ២០១៦ ក៏មានវត្តមានយាយព្រឿង ថៅកែឈ្មួញឈើល្មើសច្បាប់ ជាមួយកម្មករ៧នាក់ និងរថយន្ត២គ្រឿង ១គ្រឿងម៉ាកបាឡែន ពណ៌ស និងមួយគ្រឿងទៀតម៉ាកសាំយ៉ុង ចូលមករំដោះឈើ និងឡោមព័ទ្ធមកលើកងកម្លាំង ដែលកំពុងយាមឈើនៅក្នុងទីតាំងនោះថែមទៀត ។
សមត្ថកិច្ចបានឃាត់ខ្លួន យាយ ព្រឿង ក្នុងបទល្មើសជាក់ស្តែង មករំដោះឈើនៅក្នុងបរិវេណរដ្ឋបាលព្រៃឈើសង្កាត់អូរពងមាន់ ។ ដោយឡែក កម្មករ៧នាក់ ត្រូវបានរត់គេចខ្លួនពីកន្លែងកើតហេតុ ។
ពាក់ព័ន្ធទៅនឹងករណីយាយ ព្រឿង ចូលមករំដោះឈើ សង្ស័យមានអំពើឃុបឃិតគ្នាណាមួយ រវាងរដ្ឋបាលព្រៃឈើ ជាមួយនឹងយាយព្រឿង ខណៈឈើត្រូវបានរក្សាទុកនៅក្នុងសង្កាត់រដ្ឋបាលព្រៃឈើរួចរាល់ រួមទាំងចាក់សោ តែមានវត្តមានយាយ ព្រឿង ចូលទៅក្នុងបរិវេណជាមួយនឹងកម្មករ៧នាក់ ដើម្បីរំដោះឈើ ចំណុចនេះ មានន័យថា មន្ត្រីរដ្ឋបាលព្រៃឈើប្រចាំការនៅទីនោះ អាចចាក់សោឲ្យក្រុមយាយព្រឿងចូល រួចខ្លួនបែរជាទៅសម្ងំដេក ដើម្បីបំភ័ន្តសមត្ថកិច្ច ។
មួយរយៈកន្លងទៅនេះ ក្រុមការងារស្រាវជ្រាវព័ត៌មាន និងបង្ក្រាបបទល្មើសព្រៃឈើរបស់កងរាជអាវុធហត្ថលើផ្ទៃប្រទេស បានបំពេញការងារដ៏សស្រាក់សស្រាំ ចុះស្រាវជ្រាវព័ត៌មាន និងបង្ក្រាបបទល្មើសព្រៃឈើ ដូចជាករណី ឈើជាច្រើនកំណាត់នៅក្នុងដីចម្ការ ស្ថិតនៅក្នុងភូមិ ឃុំ ស្រែក្រសាំង ស្រុកសៀមបូក គឺឈ្មួញយាយ ព្រឿង នេះតែម្តង បានយកទៅលាក់ទុកស្ទើរតែគ្រប់ទីកន្លែង ដែលធ្វើឲ្យសមត្ថកិច្ចពិបាកក្នុងការរុករក ។
ពាក់ព័ន្ធទៅនឹងករណី ដែលយាយព្រឿង នាំកម្មករទៅរំដោះឈើនៅក្នុងបរិវេណសង្កាត់រដ្ឋបាលព្រៃឈើអូរពងមាន់ មិនត្រឹមតែសង្ស័យថា ជំនាញរដ្ឋបាលព្រៃឈើរបស់លោក ឆៀង តុលា មានករណីឃុបឃិតគ្នាជាមួយយាយព្រឿង ប៉ុណ្ណោះទេ សូម្បីតែករណី រដ្ឋបាលព្រៃឈើ ប្រើប្រាស់រថយន្ត និងកម្មករ មកដឹកជញ្ជូនឈើនៅក្នុងដីចម្ការខាងលើ ដែលក្រុមការងារស្រាវជ្រាវព័ត៌មាន និងបង្ក្រាបបទល្មើសព្រៃឈើប្រគល់ឲ្យ ក៏ត្រូវបានគេដឹងថា ជំនាញរដ្ឋបាលព្រៃឈើ បានយករថយន្ត និងកម្មកររបស់យាយព្រឿង មកធ្វើជាមធ្យោបាយដឹកជញ្ជូនឈើទាំងនេះ យកទៅរក្សាទុក និងសង្កាត់រដ្ឋបាលព្រៃឈើអូរពងមាន់ទៀតផង ។
ការបង្ក្រាបបទល្មើសព្រៃឈើ និងឈានដល់ឃាត់ខ្លួនយាយ ព្រឿង ដែលជាឈ្មួញល្មើសច្បាប់ដ៏ធំនៅភូមិភាគឦសាន្ត ត្រូវបានមជ្ឈដ្ឋានទូទៅមានការគាំទ្រចំពោះចំណាត់ការរបស់កម្លាំងកងរាជអាវុធហត្ថលើផ្ទៃប្រទេស ដែលខិតខំបំពេញការងាររបស់ខ្លួន ទទួលបានលទ្ធផលជោគជ័យ ទន្ទឹមនឹងករណីនេះផងដែរ សមត្ថកិច្ចក៏បន្តនីតិវិធី បើកការស្រាវជ្រាវពីបញ្ហាមន្ត្រីរដ្ឋបាលព្រៃឈើ ហេតុអ្វីក៏មានការពាក់ព័ន្ធជាមួយនឹងយាយព្រឿង ឈានដល់ការឃុបឃិត រំដោះឈើនៅក្នុងបរិវេណដែលខ្លួនគ្រប់គ្រងថែមទៀត៕
រាជធានីភ្នំពេញ៖យោងតាមសេចក្តីប្រកាសព័ត៌មានរបស់ក្រសួងធនធានទឹក និងឧតុនិយម បានបញ្ជាក់នៅថ្ងៃទី១២ ខែតុលានេះថា ដោយសារតែឥទ្ធិពលនៃសម្ពាធទាប និងប្រព័ន្ធសម្ពាធទាប បាននឹងកំពុងធ្វើឲ្យមានភ្លៀងធ្លាក់ច្រើន ស្ទើរទូទាំងប្រទេស និងបានបង្កជាជំនន់ទឹកភ្លៀងជាបន្ដបន្ទាប់ នៅខេត្តចំនួន៦គឺ ខេត្តត្បូងឃ្មុំ ខេត្តព្រៃវែង ខេត្តស្វាយរៀង ខេត្តកណ្ដាល ខេត្តកំពង់ស្ពឺ និងខេត្តព្រះសីហនុ៕
ខេត្តកណ្តាល៖បុរសម្នាក់ដោយសារខឹងម្តាយក្មេករឿងប្រពន្ធរត់ចោលក៏ជះកំហឹងមកលើ ស្លាកគណបក្ស។ ហើយវាយស្លាកសញ្ញាគណបក្សនេះកម្ចេកចោលតែម្តង។ ហេតុការណ៍នេះកើតឡើងនៅរសៀលថ្ងៃទី១២ ខែតុលា ឆ្នាំ២០១៦ នៅចំណុចផ្ទះរបស់ឈ្មោះ គុន នារី ក្នុងភូមិទួលស្វាយ ឃុំឈើខ្មៅ ស្រុកកោះធំ ខេត្តកណ្ដាល។
សមត្ថកិច្ចបានបញ្ជាក់ថា ជនបង្កមានឈ្មោះ ញឹម សុជាតិ ភេទប្រុស អាយុ៣០ឆ្នាំ ជនជាតិខ្មែរ មានទីលំនៅភូមិចុងកោះគរ ឃុំស្វាយប្រទាល ស្រុកស្អាង ខេត្តកណ្ដាល មុខរបរកសិករ។ ចំណែកជនរងគ្រោះ ឈ្មោះ ទែន សុខ ភេទប្រុស អាយុ៥៦ឆ្នាំ ជនជាតិខ្មែរ មានទីលំនៅភូមិក្បាលជ្រោយ ឃុំឈើខ្មៅ ស្រុកកោះធំ មុខរបរ កសិករ និងជាជំទប់ទី១ គណៈបក្សសង្គ្រោះជាតិឃុំឈើខ្មៅ និងឈ្មោះ គុន នារី ភេទស្រី អាយុ៥៥ឆ្នាំ ជនជាតិខ្មែរ ត្រូវជាម្ដាយក្មេកជនសង្ស័យ និងមានទីលំនៅ ភូមិឃុំកើតហេតុ មុខរបរកសិករ៕
រាជធានីភ្នំពេញ៖ប្រធានាធិបតីចិន ស៊ី ជីនភីង នឹងមកដល់ទឹកដីកម្ពុជា នាវេលាម៉ោង១២៖៣០នាទីថ្ងៃត្រង់ នេះក្នុងដំណើរទស្សនកិច្ចផ្លូវការរយៈពេល២ថ្ងៃនៅកម្ពុជា នាថ្ងៃទី១៣-១៤ ខែតុលា ឆ្នាំ២០១៦។
មន្ត្រីរាជរដ្ឋាភិបាលបញ្ជាក់ថា ក្នុងដំណើរបំពេញទស្សនកិច្ចនេះ រាជរដ្ឋាភិបាលកម្ពុជា-ចិន នឹងចុះកិច្ចព្រមព្រៀង និងពិធីសារសំខាន់ៗយ៉ាងតិចចំនួន២៨។ នេះគឺជាគម្រោងទស្សនកិច្ចជាផ្លូវរដ្ឋលើកដំបូងសម្រាប់ លោក ស៊ី ជីនភីង ក្នុងនាមលោកជាប្រធានាធិបតីចិន។
សូមអាននូវប្រវត្តិសង្ខេបរបស់លោក ស៊ី ជីនភីង ៖
ឯកឧត្តម ស៊ី ជីនភីង (Xi Jinping) ត្រូវបានជ្រើសតាំងជាអគ្គមគ្គុទ្ទេស ក៍កំពូលរបស់ប្រទេសចិន កាលពីថ្ងៃទី១៥ខែវិច្ឆិកា ឆ្នាំ២០១២ ។ កាលនោះ ឯកឧត្តម ស៊ី ជីនភីង (Xi Jinping) ដែលមានវ័យ៥៩ឆ្នាំ ត្រូវបានជ្រើសតាំងជាអគ្គលេខាធិការ មជ្ឈិមបក្សកុម្មុយនិស្តចិន នៅក្នុងសន្និសីទពេញអង្គលើកទី១ នៃសមាជបក្សកុម្មុយនិស្តចិន លើកទី១៨ ហើយឯកឧត្តមក៏បាន កាន់មុខតំណែងជាប្រធានគណៈកម្មាធិការ យោធានៃគណៈកម្មាធិការ មជ្ឈិមបក្សកុម្មុយនិស្តចិនផងដែរ ។
នៅខែមីនាឆ្នាំ២០១៣ ឯកឧត្តមត្រូវបានជ្រើសតាំង ជាប្រធានរដ្ឋនៃសាធារណរដ្ឋ ប្រជាមានិតចិននិង ជាប្រធានគណៈកម្មាធិការយោធាមជ្ឈិមរបស់ ប្រទេសចិននៅក្នុងសន្និសីទ លើកទី១នៃសភាតំណាង ប្រជាជនចិនទូទាំងប្រទេសនីតិកាលទី១២ ។
ជីវិតក្រលំបាកក្នុងយុវ័យ
ឯកឧត្តម ស៊ី ជីនភី (Xi Jinping)កើតនៅខែមិថុនា ឆ្នាំ១៩៥៣ នៅស្រុក Fuping ខេត្ត Shanxi ភាគកណ្តាលប្រទេសចិន ។ ឪពុករបស់ឯកឧត្តមឈ្មោះ Xi Zhongxun។ លោក Xi Zhongxun ជាអ្នកនយោបាយជាន់ខ្ពស់ របស់បក្សកុម្មុយនិស្តចិន ធ្លាប់កាន់មុខតំណែងជាឧបនាយករដ្ឋមន្ត្រីចិន ។ លោក Xi Zhongxun បានរងភាពអយុត្តិធម៌អស់រយៈពេល១៦ឆ្នាំ ចាប់ពីឆ្នាំ១៩៦២ ។ ឯកឧត្តម ស៊ី ជីនភីង (Xi Jinping) ធ្លាប់ត្រូវបានគេប្រមាថមើល ងាយនិងរើសអើងដោយសាររឿង អយុត្តិធម៌របស់ឪពុកឯកឧត្តម ហើយឯកឧត្តមក៏ធ្លាប់ ត្រូវបានគេរិះគន់ជាសាធារណៈ ធ្លាប់រងភាពអត់ឃ្លាន ធ្លាប់ជាមនុស្សដើរអនាថា រហូតដល់ធ្លាប់ត្រូវចាប់ ឃុំទៀតផង ។
នៅដើមឆ្នាំ១៩៦៩ ឯកឧត្តម ស៊ី ជីនភីង (Xi Jinping) ដែលមានវ័យមិនទាន់គ្រប់១៦ឆ្នាំផង បានផ្លាស់ប្តូរទីលំនៅទៅកាន់ តំបន់ជនបទនៃភាគខាងជើងខេត្ត Shanxi និងធ្វើកសិកម្មនៅទីនោះ ។ ឯកឧត្តមបានធ្វើស្រែចម្ការ អូសធ្យូងថ្ម វាយទំនប់ រែកលាមក ពោលគឺការងារអ្វីក៏ដោយក៏ ឯកឧត្តមធ្លាប់ធ្វើ ការលំបាកអ្វីក៏ ឯកឧត្តមធ្លាប់ជួបប្រទះដែរ ។ នាឆ្នាំ១៩៧៥ ឯកឧត្តមត្រូវបានជ្រើសរើស ឱ្យទៅបន្តការសិក្សានៅសកលវិទ្យាល័យ ឈីងហួ ។ នៅថ្ងៃចាកចេញ អ្នកភូមិបាននាំគ្នា ឈរអមតាមផ្លូវដើម្បី ជូនដំណើរឯកឧត្តម ។
ការរស់នៅតំបន់ ជនបទរយៈពេល៧ឆ្នាំ មិនត្រឹមតែបានញ៉ាំងឱ្យឯកឧត្តម ស៊ី ជីនភីង បង្កើតនូវចំណងមិត្តភាព យ៉ាងជ្រាលជ្រៅជាមួយ ប្រជាជនក្នុងតំបន់នោះប៉ុណ្ណោះទេ ប៉ុន្តែថែមទាំងបានធ្វើឱ្យឯកឧត្តម យល់ដឹងកាន់តែស៊ីជម្រៅអំពី តំបន់ជនបទរបស់ប្រទេសចិន និងស្ថានភាពពិតប្រាកដនៅតាមមូលដ្ឋាន របស់ប្រទេសចិនទៀតផង ដែលចំណុចទាំងអស់នេះហើយ បានរួមបញ្ចូលយ៉ាងស៊ីជម្រៅទៅក្នុង ការស្វែងរកនៃឆាកជីវិត របស់ឯកឧត្តម ហើយការធ្វើការងារជាក់ស្តែង ដើម្បីប្រជាជនបានក្លាយជាគោលដៅ ដ៏មុតមាំរបស់ឯកឧត្តម ។
មាគ៌ាចូលបម្រើនយោបាយ
នាឆ្នាំ១៩៧៩ ក្រោយពីបញ្ចប់ការសិក្សា នៅសកលវិទ្យាល័យឈីងហួ ឯកឧត្តម ស៊ី ជីនភីង (Xi Jinping) បានចូលបំពេញការងារជាលេខាធិការ នៅខុទ្ទកាល័យនៃក្រុមប្រឹក្សា កិច្ចការរដ្ឋនិងខុទ្ទកាល័យនៃគណៈកម្មាធិការ យោធាមជ្ឈិម ។ ចាប់ពីឆ្នាំ១៩៨២មក ជាបន្តបន្ទាប់ ឯកឧត្តម ស៊ី ជិនភីង (Xi Jinping) បានកាន់មុខតំណែងជា លេខាធិការនៃគណៈកម្មការ បក្សស្រុកZhengding ខេត្ត Hebei, អភិបាលរងក្រុង Xiamen ខេត្ត Fujian, លេខាធិការនៃគណៈកម្មការ បក្សក្រុង Ningde ខេត្តFujian, លេខាធិការនៃគណៈកម្មការ បក្សក្រុង Fuzhouខេត្តFujian, លេខាធិការនៃគណៈកម្មការបក្សខេត្ត Fujian, អភិបាលខេត្ត Fujian, លេខាធិការនៃគណៈកម្មការ បក្សខេត្ត Zhejiang, លេខាធិការនៃគណៈកម្មការ ក្រុងShanghai, សមាជិកអចិន្ត្រៃយ៍នៃការិយាល័យ នយោបាយមជ្ឈិម, លេខាធិការនៃលេខាធិការដ្ឋាន មជ្ឈិម, អនុប្រធានរដ្ឋចិន និងជាអនុប្រធានគណៈកម្មាធិការ យោធានៃគណៈកម្មាធិការមជ្ឈិមបក្សកុម្មុយនិស្ត ចិនជាដើម រហូតដល់កាន់មុខតំណែង ជាអគ្គមគ្គុទ្ទេសក៍កំពូលរបស់ ប្រទេសចិន ។
ចាប់ពីខេត្តShanxiរហូតដល់ក្រុងប៉េកាំង ពីខេត្តHebeiរហូតដល់ខេត្ត Fujian ពីខេត្តZhejiang រហូតដល់ក្រុងShanghai ពីតំបន់ក្រីក្រនៅភាគខាងលិចរហូតដល់ មជ្ឈមណ្ឌលនយោបាយនិងវប្បធម៌ជាតិ ពីតំបន់មិនសូវអភិវឌ្ឍន៍ នៅភាគខាងកើតដល់តំបន់រីកចម្រើន តាមឆ្នេរសមុទ្រ ឯកឧត្តម ស៊ី ជីនភីង (Xi Jinping) បានកាន់តួនាទីនយោបាយ តាមភូមិ ស្រុក ក្រុង ខេត្ត និងកាន់មុខតំណែងសំខាន់ៗ នៃនយោបាយបក្សនិងយោធាមជ្ឈិម ។ ក្នុងអំឡុងពេលនោះ ឯកឧត្តម ស៊ី ជីនភីង (Xi Jinping) បានឆ្លៀតពេលបន្តវិជ្ជានៅថ្នាក់ អនុបណ្ឌិតនៅវិទ្យាស្ថាននរសាស្ត្រនិង សង្គមសាស្ត្រនៃសកលវិទ្យាល័យឈីងហួ ពីឆ្នាំ១៩៩៨ ដល់២០០២ រហូតបានទទួលសញ្ញាបត្រថ្នាក់ បរិញ្ញាបត្រជាន់ខ្ពស់ផ្នែកច្បាប់ ។
ឯកឧត្តម ស៊ី ជីនភីង (Xi Jinping) តែងនិយាយថា ពេលកាន់មុខតំណែងមួយ នៅតំបន់មួយ ត្រូវតែផ្តល់សុភមង្គលដល់តំបន់នោះ ត្រូវស្រឡាញ់ប្រជាជនដូចជា ស្រឡាញ់ឪពុកម្តាយរបស់ខ្លួន ។ ជានិច្ចកាល ឯកឧត្តមបានចាត់ទុកក្តីសុបិន របស់ប្រជាជនជាក្តីសុបិនរបស់ខ្លួន ។ ឯកឧត្តម បានថ្លែងថា ការរំពឹងចង់បានជីវភាព រស់នៅដ៏ល្អប្រសើររបស់ប្រជាជនគឺជា គោលដៅខិតខំប្រឹងប្រែងរបស់យើង ។ ឯកឧត្តមបានគូសបញ្ជាក់ថា កម្មាភិបាលនិងអ្នកដឹកនាំត្រូវតែបំពេញការងារជាក់ស្តែង និងដើរនៅជួរមុខ ។
ពេលកាន់មុខតំណែងនៅស្រុក Zhengding ឯកឧត្តមបានចុះទៅត្រួតពិនិត្យ នៅគ្រប់ភូមិទាំងអស់ នៅតំបន់Ningde ឯកឧត្តមបានទៅដល់ភូមិស្រុក ស្ទើរទាំងអស់ បន្ទាប់ពីកាន់មុខតំណែង នៅខេត្ត Zhejiang ឯកឧត្តមបានទៅកាន់គ្រប់ស្រុក និងក្រុងចំនួន៩០ នៃខេត្តទាំងមូល ។
បើទោះបីជាកាន់មុខតំណែងនៅក្រុង Shanghai ត្រឹមតែរយៈពេល៧ខែប៉ុណ្ណោះក្តី ក៏ឯកឧត្តមបានធ្វើដំណើរទៅកាន់ខណ្ឌទាំង១៩ នៃក្រុងShanghaiទាំងមូលផងដែរ ។ បន្ទាប់ពីចូលបំពេញការងារ នៅមជ្ឈិម ឯកឧត្តម ស៊ី ជីនភីង (Xi Jinping) បានធ្វើដំណើរទៅកាន់ខេត្ត ភូមិភាគស្វយ័តនិងទីក្រុងចំនួន៣១ ។ ឯកឧត្តម ស៊ី ជីនភីង (Xi Jinping) បានគូសបញ្ជាក់ថាក្នុងពេលបំពេញការងារ នៅស្ថាប័នបក្សនិងនយោបាយ គឺគប្បីចាត់ទុកការផ្តល់ភាព ងាយស្រួលដល់ប្រជាជនជារឿងសំខាន់ ជាងគេ ដើម្បីធ្វើជារដ្ឋាភិបាលដែលបម្រើប្រជាជន ។ ឯកឧត្តម ស៊ី ជីនភីង (Xi Jinping) បានកត់សម្គាល់ឃើញថា ក្នុងនាមជាអ្នកដឹកនាំ ត្រូវតែឈរលើមូលដ្ឋាននៃបច្ចុប្បន្នភាព ហើយក៏ត្រូវតែមានចក្ខុវិស័យវែងឆ្ងាយផងដែរ ។ ដូច្នេះហើយបានជាក្នុងក្រសែភ្នែករបស់កម្មាភិបាល និងមហាជនជាច្រើន ឯកឧត្តម ស៊ី ជីនភីង (Xi Jinping) ជាអ្នកដឹកនាំមួយរូបដែលមានស្មារតីកំណែទម្រង់ ដែលប្រកបដោយចក្ខុវិស័យវែងឆ្ងាយ និងមានភាពច្នៃប្រឌិតថ្មី ។
បន្ទាប់ពីឯកឧត្តម ស៊ី ជីនភីង (Xi Jinping) ឡើងកាន់មុខតំណែង ប្រទេសចិនបានចាប់ផ្តើមនូវដំណើរថ្មី នៃការធ្វើកំណែទម្រង់ដោយស៊ីជម្រៅ និងបើកចំហដោយគ្រប់ ជ្រុងជ្រោយ ។ បច្ចុប្បន្ន កំណែទម្រង់របស់ប្រទេសចិន បានឈានចូលដល់ដំណាក់កាលពុះពារ ការលំបាក និងដំណាក់កាលគន្លឹះ ដែលពាក់ព័ន្ធដល់ទំនាក់ទំនង និងទំនាស់ផ្នែកផលប្រយោជន៍ ក្នុងស្រទាប់ថ្នាក់ជ្រៅ ។
ឯកឧត្តម ស៊ី ជីនភីង (Xi Jinping) បានប្រើវិធានការជំរុញសេដ្ឋកិច្ច ឱ្យអភិវឌ្ឍដោយបរិសុទ្ធនិងជានិរន្តរភាព កែលម្អជីវភាពរស់នៅរបស់ប្រជាជន ជំរុញបុព្វហេតុនៃការរំដោះខ្លួនចេញពីភាពក្រីក្រ និងកាត់បន្ថយភាពក្រីក្រ ជំរុញកិច្ចកសាងអេកូ-អរិយាធម៌ ជំរុញការប្រឆាំងអំពើពុករលួយ និងផ្តួចផ្តើមភាពស្អាតស្អំ គ្រប់គ្រងបក្សយ៉ាងម៉ឺងម៉ាត់ និងលើកកម្ពស់សមត្ថភាពដឹកនាំ របស់បក្សកាន់អំណាចជាដើម ។ នាឆ្នាំ២០១៣ ឯកឧត្តមស៊ី ជីនភីង (Xi Jinping) បានលើកពីគំនិតផ្តួចផ្តើមស្តីពីការរួមគ្នា កសាងយុទ្ធសាស្ត្រខ្សែក្រវាត់មួយនិងផ្លូវមួយ និងបង្កើតធនាគារវិនិយោគហេដ្ឋា រចនាសម្ព័ន្ធអាស៊ី ដែលទទួលបានការគាំទ្រ និងចូលរួមយ៉ាងសកម្ម ។
រយៈពេល៣ឆ្នាំកន្លងមកនេះ ដំណើរវិវឌ្ឍនិងសមិទ្ធផល នៃកិច្ចកសាងយុទ្ធសាស្ត្រខ្សែក្រវាត់ មួយនិងផ្លូវមួយទទួលបាន ផលជាផ្លែផ្កាលើសពីការរំពឹងទុក រីឯសេចក្តីផ្តួចផ្តើមស្តីពីការ បង្កើតធនាគារវិនិយោគហេដ្ឋារចនាសម្ព័ន្ធ អាស៊ីក៏បានសម្រេចនា ខែធ្នូឆ្នាំ២០១៥ផងដែរ ។ មិនថាការបំពេញការងារនៅតាមតំបន់ ឬនៅមជ្ឈិម ឯកឧត្តម ស៊ី ជីនភីង (Xi Jinping) សុទ្ធតែផ្តោតការយកចិត្តទុកដាក់ ខ្ពស់ដល់ការងារការទូត និងរាប់អានជាមួយមិត្តភក្តិអន្តរជាតិ យ៉ាងទូលំទូលាយ ។
ពេលបម្រើការងារនៅរដ្ឋបាលតំបន់ ឯកឧត្តមបានទៅបំពេញទស្សនកិច្ចនៅប្រទេស និងតំបន់ជាង៦០ក្នុងទ្វីបទាំង៥ និងបានទទួលជួបជាមួយ ភ្ញៀវបរទេសជាច្រើនរូប ។ ក្រោយពីចូលបំពេញការងារនៅមជ្ឈិម ឯកឧត្តមក៏បានស្វាគមន៍ភ្ញៀវបរទេសដែលមកបំពេញទស្សនកិច្ចនៅក្នុងប្រទេសចិនជាច្រើនរូបផងដែរ មិនត្រឹមតែប៉ុណ្ណោះទេ ឯកឧត្តមក៏បានធ្វើការ ប្រាស្រ័យទាក់ទងយ៉ាងទូលំទូលាយ និងប្រកបដោយមេត្រីភាព ជាមួយឥស្សរជនគ្រប់មជ្ឈដ្ឋាន នៃបណ្តាប្រទេសលើពិភពលោក ។
ឯកឧត្តម ស៊ី ជីនភីង (Xi Jinping) បានបង្ហាញយ៉ាងស្មោះចំពោះ ឥស្សរជនគ្រប់មជ្ឈដ្ឋាននៅក្រៅប្រទេស អំពីការយល់ឃើញរបស់ប្រជានជន ចិនចំពោះប្រទេសរបស់ខ្លួន និងពិភពលោកបច្ចុប្បន្ន ជាមួយគ្នានេះដែរ ឯកឧត្តមក៏រីករាយស្តាប់ នូវមតិយោបល់របស់សមភាគី និងស្វែងយល់ពីគំនិត របស់ពួកគេផងដែរ ។ អ្នកនយោបាយបរទេសសំខាន់ៗ ជាច្រើនដែលធ្លាប់ប្រាស្រ័យទាក់ទង ជាមួយឯកឧត្តម ស៊ី ជីនភីង (Xi Jinping) សុទ្ធតែកត់សម្គាល់ឃើញថា ឯកឧត្តម ស៊ី ជីនភីង (Xi Jinping)ជាអ្នកដឹកនាំ ដែលមានជំនឿចិត្ត មានភាពប្រាកដប្រជា ប្រកបដោយគតិបណ្ឌិត និងមានមេត្រីភាព ។
គ្រួសារដ៏មានសុភមង្គល
ឯកឧត្តម ស៊ី ជីនភីង (Xi Jinping) មានគ្រួសារមួយដ៏មាន សុភមង្គលនិងពេញបរិបូរណ៍ ។ ភរិយារបស់ឯកឧត្តមមានឈ្មោះថាPeng Liyuan ឯកឧត្តមនិងភរិយាជួបគ្នា ជាលើកដំបូងនៅឆ្នាំ១៩៨៦ ហើយបន្ទាប់មក អ្នកទាំងពីរក៏បានជាប់ ចិត្តជាប់និស្ស័យជាមួយគ្នា ។ ក្រោយពីរៀបការ ឯកឧត្តមនិងភរិយា មានកូនស្រីដ៏គួរឱ្យស្រឡាញ់ម្នាក់ ។
លោកស្រី Peng Liyuan មានដើមកំណើតនៅ ខេត្ត Shandong លោកស្រីគឺជាតារាចម្រៀង ដ៏ល្បីល្បាញដែលប្រជាជនចិន អ្នកណាៗក៏សុទ្ធតែស្គាល់ឈ្មោះ របស់លោកស្រីដែរ ។ លោកស្រីធ្លាប់តំណាងប្រទេសចិន ទៅបំពេញទស្សនកិច្ច និងធ្វើការសម្តែងនៅប្រទេស និងតំបន់ជាង៥០លើពិភពលោក ។ បច្ចុប្បន្ននេះ លោកស្រី Peng Liyuan បានផ្តោតការយកចិត្តទុកដាក់លើ ការអប់រំផ្នែកសិល្បៈ ខិតខំបណ្តុះបណ្តាលយុវវ័យឆ្នើម ដែលមានទេពកោសល្យខ្ពស់ និងធ្វើការណែនាំដល់ការផលិត ស្នាដៃសិល្បៈប្រណីតៗ ។
ក្រៅពីវិស័យសិល្បៈ លោកស្រី Peng Liyuan ក៏បានខិតខំប្រឹងប្រែងសម្រាប់ បុព្វហេតុដើម្បីផលប្រយោជន៍ សាធារណៈក្នុងរយៈពេល ជាយូរមកផងដែរ លោកស្រីជាឯកអគ្គរដ្ឋទូតសប្បុរសផ្នែកជំងឺរបេង និងជំងឺអេដស៍របស់អង្គការ សុខភាពពិភពលោក ជាអ្នកផ្សព្វផ្សាយផ្នែកអប់រំអំពី ការបង្ការជំងឺអេដស៍ ជាឯកអគ្គរដ្ឋទូតសម្រាប់ ការគ្រប់គ្រងការជក់បារី និងជាឯកអគ្គរដ្ឋទូតសប្បុរសដើម្បីថ្ងៃស្អែក ស្តីពីការបង្ការបទឧក្រិដ្ឋរបស់ យុវវ័យនៃប្រទេសចិនផងដែរ ។
ក្នុងកែវភ្នែករបស់លោកស្រី Peng Liyuan ស្វាមីរបស់គាត់ជាមនុស្សម្នាក់ ដែលខុសពីមនុស្សទូទៅផង ហើយក៏ជាមនុស្ស យ៉ាងសាមញ្ញផងដែរ ។ ឯកឧត្តម ស៊ី ជីនភីង (Xi Jinping) ចូលចិត្តបរិភោគម្ហូបShanxi និង Shandong ពេលជួបជុំជាមួយ មិត្តភក្តិចូលចិត្ត ពិសាស្រាបន្តិចបន្តួច ដើម្បីបន្ថែមបិរយាកាសសប្បាយរីករាយ។ ឯកឧត្តមចូលចិត្តហែលទឹក ឡើងភ្នំ មើលការប្រកួតបាលបោះ បាល់ទាត់និងប្រដាល់ ហើយជួនកាលលោក ក៏ទស្សនាកម្មវិធី កីឡាដែលផ្សាយបន្តផ្ទាល់ តាមកញ្ចក់ទូរទស្សន៍នៅពេល យប់ជ្រៅផងដែរ ។
ឯកឧត្តម ស៊ី ជីនភីង (Xi Jinping) និងភរិយាបានដាក់ឈ្មោះឱ្យកូនស្រីថា Mingze ដែលមានន័យថាធ្វើជាមនុស្សស្អាតស្អំ និងមានប្រយោជន៍ដល់សង្គម ។ នេះគឺជាក្តីសង្ឃឹមរបស់ពួកគាត់ ចំពោះកូនស្រីផង ហើយក៏ជាការឆ្លុះបញ្ចាំងពីឥរិយាបថ គ្រួសារដ៏សាមញ្ញរបស់ពួកគាត់ផងដែរ៕
ខេត្តព្រះសីហនុ៖កម្មករ-កម្មការនីយ៉ាងហោចណាស់ចំនួន២០នាក់បានរងរបួសធ្ងន់-ស្រាលក្រោយរថយន្តដឹកកម្មកររោចក្រមួយគ្រឿងបានបើកក្រឡាប់ធ្លាក់ផ្លូវ។ ហេតុការណ៍នេះបានកើតឡើងកាលពីវេលាម៉ោង៧ព្រឹក ថ្ងៃទី១៣ ខែតុលា ឆ្នាំ២០១៦ ស្ថិតនៅលើផ្លូវជាតិលេខ៤នៅម្តុំ ឃុំអូរឧកញ៉ហេង ស្រុកព្រៃនប់ ខេត្តព្រះសីហនុ។
តាមការរាយការណ៍បានជំហានដំបូងបានឲ្យដឹងថា គ្រោះថ្នាក់នេះបានកើតឡើង ដោយសារតែរថយន្តដឹកកម្មករបានបើកគេចរថយន្ត CRV មួយគ្រឿង ដែលបែកកង់បើកបញ្ច្រាសទិសគ្នា ទើបបង្កគ្រោះថ្នាក់តែម្តង៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
