ខេត្តពោធិ៍សាត់៖មនុស្សយ៉ាងហោចណាស់ចំនួន៧នាក់បានរងរបួសធ្ងន់ស្រាល ក្នុងហេតុការណ៍គ្រោះថ្នាក់ចរាចរណ៍ ដែលបង្កដោយរថយន្តតួរីសទេសចរណ៍ បុកជាមួយរថយន្តដឹកទំនិញពេញទំហឹង ក្រឡាប់ធ្លាក់ប្រឡាយ។ ហេតុការណ៍នេះកើតឡើងនៅវេលាម៉ោង២រំលងអធ្រាត្រ ឈានចូលថ្ងៃទី០៣ ខែកញ្ញា ឆ្នាំ២០១៦នេះ នៅលើកំណាត់ផ្លូវជាតិលេខ៥ ស្ថិតក្នុងភូមិអូរស្តៅ សង្កាត់ស្វាយអាត់ ក្រុងពោធិ៍សាត់ ខេត្តពោធិ៍សាត់។
អធិការនគរបាលក្រុងពោធិ៍សាត់ លោក ឈន រិទ្ធ បានឲ្យដឹងថា រថយន្តតួរីសទេសចរណ៍ ពាក់ស្លាកលេខ ភ្នំពេញ 2A-6204 បើកពីកើតទៅលិចដោយសារអ្នកបើកបរងងុយដេកបានជ្រុលទៅបុករថយន្តដឹកទំនិញមួយគ្រឿង ក្នុងទិសដៅបញ្ច្រាស់ទិសគ្នា បណ្តាលឲ្យមានមនុស្សរបួសធ្ងន់ស្រាល៧នាក់ ក្នុងនោះមានប្រុស៣នាក់ ស្រី៣នាក់ និងក្មេងតូចម្នាក់ ដែលជិះនៅក្នុងរថយន្តតួរីសទេសចរណ៍នោះ។លោកអធិការបានបន្តថា មកដល់ពេលនេះ យើងមិនទាន់ដឹងពី អត្តសញ្ញាណជនរងគ្រោះនៅឡើយទេ។
បច្ចុប្បន្នជងរងគ្រោះទាំង៧នាក់ ត្រូវបានបញ្ជូនទៅសង្គ្រោះបន្ទាន់ នៅមន្ទីរពេទ្យបង្អែកខេត្តពោធិ៍សាត់ ដោយឡែកវត្ថុតាងយកមករក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្ត រងចាំដោះស្រាយគ្នានាពេលក្រោយ៕
ដោយ៖ប្រុញ វិធិន
ខេត្តក្រចេះ៖លោក អ៊ុង ស៊ីយឿង ប្រធានលេខាធិការដ្ឋាននៃគណៈកម្មាធិការជាតិរៀបចំការបោះឆ្នោតក្នុងខេត្តក្រចេះ នាថ្ងៃទី០២ ខែកញ្ញា ឆ្នាំ២០១៦ បានបញ្ជាក់ថា ប្រជាពលរដ្ឋកម្ពុជា អាចចុះឈ្មោះបោះឆ្នោត តាមកន្លែងដែលខ្លួនស្នាក់នៅ ដោយគ្រាន់តែធ្វើលិខិតបញ្ជាក់ការស្នាក់នៅពីអាជ្ញាធរនៅមូលដ្ឋាននោះជាការស្រេច។
លោកប្រធានលេខាធិការដ្ឋានបានបញ្ជាក់បន្តថា ជាក់ស្តែងចាប់ពីថ្ងៃទី០១ខែកញ្ញាឆ្នាំ២០១៦ ប្រជាពលរដ្ឋទូទាំងប្រទេស បានទៅចុះឈ្មោះបោះឆ្នោត ដោយឡែកក្នុងខេត្តក្រចេះ ក៏មានប្រជាពលរដ្ឋគ្រប់ស្រទាប់វណ្ណៈ សម្រុកនាំគ្នាទៅចុះឈ្មោះបោះឆ្នោត តាមបណ្តាសាលាឃុំ សង្កាត់ យ៉ាងច្រើនកុះករ រហូតដល់មន្ត្រីដែលបំរើការងារធ្វើមិនទាន់ និងមន្ត្រីខ្លះខ្យល់គរ ហើយបញ្ហាសុខភាពចំនួន២នាក់បន្ថែមទៀត។
ពាក់ព័ន្ធនឹងការងារចុះឈ្មោះបោះឆ្នោតរបស់ប្រជាពលរដ្ឋកម្ពុជានេះទៀតសោត លោក អ៊ុង ស៊ីយឿង មានលើកឡើងបន្ថែមថា តាមគោលការណ៍ច្បាប់ណែនាំពីថ្នាក់លើតម្រូវឲ្យសាលាឃុំ សង្កាត់ និងមន្ត្រីបំរើការងារការចុះឈ្មោះបោះឆ្នោតប្រចាំការ និងបោះស្នាក់ការអចិន្ត្រៃយ៍២៥ថ្ងៃតាមទីតាំងមូលដ្ឋានសាលា ឃុំ សង្កាត់នីមួយៗគ្រប់ទាំងអស់ ប៉ុន្តែតាមស្ថានភាពភូមិសាស្ត្រនៅតាមបណ្តាឃុំ ស្រុក មួយចំនួន មានភាពស្មុគ្រស្មាញ ចាំបាច់ត្រូវឲ្យមានការចល័តស្នាក់ការចុះឈ្មោះបោះឆ្នោត ទៅតាមភូមិ ដើម្បីសម្រួលឲ្យបងប្អូនប្រជាពលរដ្ឋទៅចុះឈ្មោះបោះឆ្នោតបានគ្រប់ៗគ្នាៗ
ពលរដ្ឋនៅខេត្តក្រចេះ ដែលបានទៅចុះឈ្មោះបោះឆ្នោតនៅតាមសាលាឃុំ សង្កាត់ បានសម្តែងការពេញចិត្តពេលដែលបានបំពេញកាតព្វកិច្ចទៅចុះឈ្មោះបោះឆ្នោត ដោយនិយាយថា ការទៅចុះឈ្មោះបោះឆ្នោតវាជាតួនាទី និងកាតព្វកិច្ចរបស់ពលរដ្ឋ ដែលជាម្ចាស់សន្លឹកឆ្នោត ហេតុនេះពលរដ្ឋចាំបាច់ត្រូវទៅចុះឈ្មោះបោះឆ្នោតកុំបីខាន់។
ម្យ៉ាងវិញទៀតរយ:ពេលនៃការចុះឈ្មោះបោះឆ្នោតចាប់ផ្តើមពីថ្ងៃទី០១ខែកញ្ញាឆ្នាំ២០១៦ រហូតដល់ថ្ងៃទី២៩ខែវិច្ឆិកាឆ្នាំ២០១៦ អីចឹងយើងជាប្រជាពលរដ្ឋត្រូវប្រញ៉ាប់ប្រញ៉ាលទៅចូលរួមចុះឈ្មោះបោះឆ្នោតទាំងអស់គ្នា ដើម្បីមានឈ្មោះបោះឆ្នោតសកលឆ្នាំ២០១៨នាពេលខាងមុខ ក្នុងការជ្រើសរើសរាជរដ្ឋាភិបាលអាណត្តិថ្មីទៀត។
គួរបញ្ជាក់បន្ថែមផងដែរថា រហូតមកទល់ថ្ងៃទី០២ ខែ កញ្ញា ឆ្នាំ២០១៦ ស្ថិតិនៃការចូលរួមចុះឈ្មោះបោះឆ្នោតរបស់ប្រជាពលរដ្ឋនៅខេត្តក្រចេះ មិនទាន់មានចំនួនពិតប្រាកដប៉ុន្មាននាក់នៅឡើយ ប៉ុន្តែអត្រានៃអ្នកទៅចូលរួមចុះឈ្មោះបោះឆ្នោតមានច្រើនកុះករតាមបណ្តាភូមិ ឃុំ សង្កាត់ ទូទាំងខេត្តក្រចេះ៕
រាជធានីភ្នំពេញ៖មន្ត្រីជាន់ខ្ពស់បក្សប្រឆាំងលោក អេង ឆៃអ៊ាង បានចេញមុខប្រកាសថា យើងទទួលយន្តការចុះឈ្មោះបោះឆ្នោតថ្មីដែលកំពុងដំណើរការ ប៉ុន្តែយើងនឹងរង់ចាំមើលយន្តការនៃការឃោសនា បោះឆ្នោត និងការបោះឆ្នោតបន្តបន្ទាប់ទៀត។
លោក អេង ឆៃអ៊ាង បញ្ជាក់ថា យើងចង់បានបរិយាកាសនយោបាយ នៅពេលចុះបោះឆ្នោត រហូតរាប់សន្លឹកឆ្នោត មានដំណើរការល្អ។ ប៉ុន្តែលោកសង្កត់ធ្ងន់ថា បរិយាកាសនយោបាយ មុនពេលបោះឆ្នោត មិនអំណោយផលនោះទេព្រោះថា មានការចាប់ចងសកម្មជន គណបក្ស សង្គ្រោះជាតិដាក់ពន្ធនាគារ មេបក្សគណបក្សមិនបាន ចុះឈ្មោះបោះឆ្នោត និងធ្វើសកម្មភាពនយោបាយបានជាដើម។
សម្តេច ហ៊ុន សែន កាលពីម្សិលមិញ អំឡុងពេលអញ្ជើញទៅចុះឈ្មោះបោះឆ្នោត បានថ្លែងថា យន្តការនៃការចុះឈ្មោះបោះឆ្នោតថ្មីនេះ រំពឹងថា គ្រប់គណបក្សនយោបាយនឹងទទួលយកបាន ហើយនឹងពុំមានការតវ៉ាណាមួយកើតឡើងបន្ទាប់ពីការប្រកាសលទ្ធផលបោះឆ្នោត៕
រាជធានីភ្នំពេញ៖ក្រសួងសុខាភិបាលបានចេញសេចក្តីប្រកាសព័ត៌មាន ឆ្លើយតបនឹងការរីករាលដាល វីរុស Zika នៅតំបន់អាស៊ី សំខាន់នៅប្រទេសសឹង្ហបុរីដែលកើតមានករណីនេះ រហូតដល់ចំនួន១៥១, ប្រទេសឡាវ២ករណី, ប្រទេសវៀតណាម២ករណី, ថៃ៩៧ករណី និងម៉ាឡេស៊ី១ករណី។
ក្រសួងសុខាភិបាល បានអះអាងថា នៅកម្ពុជាចាប់ពីឆ្នាំ២០០៧ រហូតដល់ ២០១០ រកឃើញជំងឺ Zika មានចំនួន៧ករណី សុទ្ធតែជាសះស្បើយ និងពុំរកឃើញមានករណីកុមារមានក្បាលតូច ប៉ុន្តែរហូតដល់បច្ចុប្បន្ននេះវីរុស Zika ពុំរកឃើញករណីនេះទៀតទេ៕
ខេត្តបន្ទាយមានជ័យ៖មនុស្ស២០នាក់បានរងរបួសធ្ងន់ស្រាលករណីគ្រោះថ្នាក់ចរាចរមួយកើតឡើងរវាងរថយន្តកាមរីបុករថយន្តនីសាន់ពីក្រោយ ដែលករណីនេះកើតឡើងនៅវេលាម៉ោង៩ និង២០នាទីយប់ ថ្ងៃទី៣១ ខែសីហា ឆ្នាំ២០១៦ នៅចំណុច មុខសាលាបឋមសិក្សាសាលាក្រហម លើកំណាត់ផ្លូវជាតិលេខ៥ ស្ថិតក្នុងភូមិថ្មី ឃុំសំរោង ស្រុកអូរជ្រៅ ខេត្តបន្ទាយមានជ័យ។
លោក ជា ពិសី មេបញ្ជាការមូលដ្ឋានកងរាជអាវុធហត្ថស្រុកអូរជ្រៅ បានអោយដឹងថា គ្រោះថ្នាក់ចរាចរនេះកើតឡើងរវាងរថយន្តកាមរី ពណ៌ខ្មៅ អត់ស្លាកលេខ តែមានស្លាកលេខទុកនៅក្នុងរថយន្តភ្នំពេញ2E.9892 អ្នកបើកបរមិនស្គាល់អត្តសញ្ញាណ ដែលបើកបរពីទិសខាងលិចទៅទិសខាងកើត បានបុករថយន្តនីសាន់ ពាក់ស្លាកលេខបាត់ដំបង 2A .2151 ពីក្រោយ ដែលមានទិសដៅស្របគ្នាបណ្តាលឲ្យរបួសមនុស្សដែលជិះលើ រថយន្តនីសាន់ចំនួន២០នាក់ ក្នុងនោះរបួសធ្ងន់៣នាក់ ស្រាល១៧នាក់។
លោក ជា ពិសី បានអោយដឹងទៀតថា អ្នករងរបួសទាំងអស់ត្រូវបានបញ្ជូនទៅមន្ទីរពេទ្យបង្អែកក្រុងសិរីសោភ័ណ ហើយចំណែករថយន្ដកាមេរី និងរថយន្តនីសាន់បានយកមករក្សាទុកនៅអធិការដ្ឋាននគរបាលស្រុកអូរជ្រៅ រងចាំដោះស្រាយតាមផ្លូវច្បាប់៕
ប៉េកាំង៖អគ្គមេបញ្ជាការកងទ័ពអាកាសចិនលោក Ma Xiaotian បាននិយាយថា កងទ័ពអាកាសចិន កំពុងតែធ្វើការអភិវឌ្ឍន៍យន្តហោះចម្បាំងទម្លាក់គ្រាប់បែក ប្រភេទថ្មី long-rang bomber ដើម្បីបង្កើនសមត្ថភាពការពារជាតិ និងមហិច្ឆិតាដែលខ្លួនចង់ធ្វើឲ្យយោធាមានភាពទំនើបប្រកបដោយប្រសិទ្ធភាព។
ថ្លែងក្នុងពិធីបើកសម្ពោធមួយនៅក្នុងមូលដ្ឋានទ័ពអាកាសចិនលោក Ma Xiaotian បានបញ្ជាក់ថា ប្រទេសចិនបានត្រៀមខ្លួនជានិច្ច នៅក្នុងការអភិវឌ្ឍ សមត្ថភាព របស់ខ្លួន ដើម្បីធ្វើការវាយប្រហារនៅតាមទីតាំងនានា ដែលស្ថិតនៅឆ្ងាយពីប្រទេសនេះ ហើយការអភិវឌ្ឍនានា នឹងចេះតែបន្តទៅមុខជាដរាប។ នៅពេលនេះយើងកំពុងតែ ធ្វើការអភិវឌ្ឍ យន្តហោះទម្លាក់គ្រាប់បែក ចម្ងាយឆ្ងាយប្រភេទថ្មី long-rang bomber ដែលអ្នកនឹងឃើញវានៅថ្ងៃអនាគត៕ (ប្រភពទីភ្នាក់ងារសារព័ត៌ចិនស៊ិនហួ)
បាល់ទាត់៖កីឡាករ Danny Simpson បានសម្រេចចិត្តបន្តកុងត្រាថ្មីជាមួយក្រុមម្ចាស់ជើងឯកក្របខ័ណ្ឌ Premier League គឺក្រុមកញ្ជ្រោងព្រៃ Leicester City។
កីឡាករវ័យ២៩ឆ្នាំរូបនេះបានធ្លាប់លេងឲ្យក្រុមបិសាចក្រហម Manchester United បានរយៈពេល១ឆ្នាំហើយបានចាកចេញមុនតំណត់ប៉ុន្តែឥឡូវនេះ Simpson ប្តេជ្ញាចិត្តនៅជាមួយ Leicester រហូតដល់ឆ្នាំ ២០១៩ ។
បន្ទាប់ពីបានទទួលជ័យជម្នះលើក្រុម Swansea City កាលពីថ្ងៃសៅរ៍នោះ Simpson បាននិយាយថា”មនុស្សគ្រប់គ្នាដឹងថាខ្ញុំស្រឡាញ់ក្រុម Leicester”«ខ្ញុំចង់ស្នាក់នៅទីនេះ។ វាគឺជាក្រុមល្អ, ខ្ញុំគិតថាយើងនឹងអាចរក្សាតំណែងជើងឯកនេះបាន» ។
គួរបញ្ជាក់ថា Simpson បានផ្ទេរចេញពីក្រុម Queens Park Rangers មកកាន់ Leicester ក្នុងឆ្នាំ ២០១៤ ដើម្បីមកចាប់ដៃគួជាមួយ Riyad Mahrez, Jamie Vardy និង Wes Morgan ក្រោយការដឹកនាំរបស់គ្រូបង្វឹក Claudio Ranieri ៕
ឥណ្ឌា៖យោងតាមទីភ្នាក់ងារ ចិន ស៊ិនហួ បានឲ្យដឹងថា ភ្លៀងធ្លាក់យ៉ាងគំហុគ នៅតំបន់ភាគខាងជើងប្រទេស ឥណ្ឌា បានឆក់យកអាយុជិវិតមនុស្សយ៉ាងហោចណាស់ ៧នាក់និងជាច្រើនទៀតរងរបួស។
អាជ្ញាធរប្រចាំទីនៅទីនោះបាននិយាថា ប្រជាពលរដ្ឋកំពុងធ្វើដំណើរឆ្លងកាត់លើដងផ្លូវដែលរងការ ប្រហារ ដោយគ្រោះទឹកជំនន់ បន្ទាប់ពីមានភ្លៀងធ្លាក់ខ្លាំងរយៈពេល ៣ម៉ោងជាប់គ្នា នៅរដ្ឋតាឡេនហ្គាណាប្រទេសឥណ្ឌាកាលពីម្សិលមិញនេះ៕
រាជធានីភ្នំពេញ៖ប្រធានគណបក្សប្រឆាំងដែលកំពុងគេចខ្លួនទៅរស់នៅក្រៅប្រទេស លោក សម រង្ស៊ី ហៅការប្រើកម្លាំងទ័ពជើងទឹក ជើងគោក និងជើងអាកាស នាប៉ុន្មានថ្ងៃនេះ នៅក្បែរៗ ស្នាក់ការបក្សប្រឆាំងថា ជាសកម្មភាពរបស់មនុស្សតិរច្ឆាន។ ការថ្លែងដូច្នេះរបស់លោក សម រង្ស៊ី បានធ្វើឲ្យគេយល់ថា លោកបានប្រើពាក្យតិរច្ឆានទៅលើកងទ័ពជាតិ ។
គួរបញ្ជាក់ថា ប៉ុន្មានថ្ងៃមុននេះ មាននាវាជើងទឹក រថយន្ត និងឧទ្ធម្ភាចក្របាន បើកឆ្វែលចុះឆ្វែលឡើងជិតបរិវេណស្នាក់ការកណ្តាលគណបក្សសង្គ្រោះជាតិ នៅសង្កាត់ចាក់អង្រែលើប្រមាណ៤០នាទី។ ចលនារបស់កម្លាំងទ័ពនេះ នាំឲ្យមន្ត្រីគណបក្សសង្គ្រោះជាតិ ប្រជាពលរដ្ឋនៅជុំវិញនោះមានការភ្ញាក់ផ្អើល ហើយសារព័ត៌មានជាតិនិងអន្តរជាតិចាប់អារម្មណ៍ចុះផ្សាយហេតុការណ៍នេះផងដែរ ។
ទាក់ទិនសកម្មភាពនោះ លោក សម រង្ស៊ី បានផ្តល់បទសម្ភាសន៍ជាមួយវិទ្យុអាស៊ីសេរី ដោយហៅការចល័តកម្លាំងទ័ពនៅក្បែរៗ ទីស្នាក់ការគណបក្សសង្គ្រោះជាតិ នាតំបន់ចាក់អង្រែថា ជាការបំភិតបំភ័យពលរដ្ឋ។ លោកហៅសកម្មភាពនេះថាធ្វើឡើងដោយមនុស្សតិរច្ឆានមានន័យថា កងទ័ពដែលចូលរួមក្នុងសកម្មភាពនោះជាមនុស្សតិរិច្ឆាន ។ លោកថ្លែងថា ខណៈពេលបោះឆ្នោតជិតមកដល់ ហើយគេដឹងថា ពិតជាចាញ់ឆ្នោត ព្រោះប្រជាពលរដ្ឋទូទាំងប្រទេសគេចង់ផ្លាស់ប្តូរ ហើយអត់មានមធ្យោបាយទប់ស្តាត់ ធ្វើការបំភិតបំភ័យ មិនចង់ឲ្យមានការបោះឆ្នោតដោយសេរី ដោយរលូន ដោយត្រជាក់ គេបង្កើតតែវិធានការក្តៅ។លោកបញ្ជាក់ថា ខ្ញុំហៅថាមានតែមនុស្សពាល មនុស្សតិច្ឆានទេ ដែលប្រើមធ្យោបាយបែបនេះមកសម្លុតប្រជាពលរដ្ឋខ្មែរគ្នាឯង ។
ក្រៅពីលោក សម រង្ស៊ី ក៏មានមន្ត្រីបក្សប្រឆាំងមួយចំនួនទៀតបានហៅសកម្មភាពចល័តទ័ពនោះជាការគំរាមកំហែងបក្សប្រឆាំងផងដែរ ។ ប៉ុន្តែមន្ត្រីក្រសួងការពារជាតិនិង អ្នកនាំពាក្យរដ្ឋាភិបាលបកស្រាយថា នេះមិនមែនជាការគំរាមកំហែងបក្សប្រឆាំងឬពលរដ្ឋទេ គឺជាការធ្វើសមយុទ្ធ១ឆ្នាំម្តង ដើម្បីការពារសន្តិសុខសណ្តាប់ធ្នាប់របស់ជាតិ ។
មន្ត្រីជាន់ខ្ពស់រាជរដ្ឋាភិបាល ប្រតិកម្មថា ការប្រមាថរបស់ទណ្ឌិត សម រង្ស៊ី មកលើរាជរដ្ឋាភិបាល មន្ត្រីយុត្តិធម៌និងកងខេមរភូមិន្ទកម្ពុជា គឺពុំអាចទទួលយកបានឡើយ ហើយពាក្យសំដីទណ្ឌិត សម រង្ស៊ី ជាពាក្យ ពាល ញុះញង់ និងបំផ្លាញសេចក្តីថ្លៃថ្នូររបស់ស្ថាប័នរដ្ឋ ៕
ខេត្តកណ្តាល៖ដោយសារតែភ្លើងប្រចណ្ឌក្រោយដឹងថា ប្រពន្ធបណ្តូលចិត្តលួចមានប្រុសថ្មី ក្បត់ចិត្តខ្លួន ធ្វើឲ្យបុរសម្នាក់សម្រេចចិត្តចងកសម្លាប់ខ្លួនចោលកូន និងប្រពន្ធ ដែលហេតុការណ៍ភ្ញាក់ផ្អើលនេះកើតឡើងនៅយប់ថ្ងៃទី០២ ខែកញ្ញា ឆ្នាំ២០១៦ ចំណុចភូមិព្រែកអំពិល ឃុំព្រែកអំពិល ស្រុកខ្សាច់កណ្តាល ខេត្តកណ្តាល។
មន្ដ្រីនគរបាល បានឲ្យដឹងថា ជនរងគ្រោះ ឈ្មោះ ម៉ុន ប៊ុនធឿន អាយុ៣៥ឆ្នាំ មានប្រពន្ធឈ្មោះ ម៉ូត ស៊ីណេត អាយុ៣៤ឆ្នាំ មានកូន៣នាក់ ប្រុស២នាក់។ មន្ដ្រីដដែលបន្ដថា បើតាមការឲ្យដឹងពីសាច់ញាតិជនរងគ្រោះបញ្ជាក់ថា ដោយសារតែជនរងគ្រោះមានការសង្ស័យថា ប្រពន្ធ ផិតក្បត់ខ្លួន ទើបចេះផឹកស្រាស្រវឹងជោកជាំរាល់ថ្ងៃ ហើយកន្លងមកជនរងគ្រោះធ្លាប់លេបថ្នាំ សម្លាប់ខ្លួន២ដងមកហើយ តែត្រូវបានបងប្អូនយកទៅសង្គ្រោះទាន់ លុះដល់ថ្ងៃកើតហេតុជនរងគ្រោះ បានទៅផឹកស្រាស្រវឹង ហើយក៏មានទំនាស់ពាក្យសំដីជាមួយប្រពន្ធដោយ ប្រចណ្ឌប្រពន្ធថា មានប្រុសថ្មី ព្រមទាំងបោះសម្ដីថា ទុកកូនឲ្យនៅផ្ទះ ហើយប្រយ័ត្នមិនទាន់ដង្ហើមអញ។
ចំណែកប្រពន្ធជនរងគ្រោះក៏ មិនបានចាប់អារម្មណ៍ទេ បាននាំកូនទាំងបីនាក់ ជិះម៉ូតូចេញពីផ្ទះទៅមើលប្អូនថ្លៃឆ្លងទន្លេនៅមណ្ឌលសុខភាព ព្រែកអំពិលលុះដល់ម៉ោង ២០ និង០០នាទីថ្ងៃដដែលត្រឡប់មកផ្ទះវិញ ឃើញប្តីចងកសម្លាប់ខ្លួន ដោយយកខ្សែគោពណ៌ខ្មៅចងក ភ្ជាប់នឹង មែកស្វាយនៅមុខផ្ទះ ទើបបង្កឲ្យភ្ញាក់ផ្អើលដល់អ្នកជិតខាង ទៅជួយអន្តរាគមន៍ ជួយប៉ុន្តែជនរងគ្រោះ បានស្លាប់បាត់ទៅហើយ។
ក្រោយកើតហេតុ នគរបាលជំនាញបានចុះពិនិត្យ ដោយឃើញថាពុំមានស្នាមអ្វីកត់សំគាល់ឡើយ រួចសន្និដ្ឋានថា ជនរងគ្រោះពិតជាស្លាប់ ដោយការចងក ពិប្រាកដមែន៕
រាជធានីភ្នំពេញ៖នៅព្រឹកនេះតុលាការកំពូលបានបើកសវនាការលើបណ្តឹងសារទុករបស់លោក កឹម សុខា និងមេធាវី ដែលប្តឹងចៅក្រមស៊ើបសួរនៃសាលាដំបូងក្រុងភ្នំពេញថា មិនបានបំពេញកិច្ចការក្នុងការស៊ើបសួរមួយចំនួន ។ ប៉ុន្តែសវនាការព្រឹមនេះមិនមានវត្តមានលោក កឹម សុខា និងមេធាវីរបស់លោកនោះទេ ។
សូមជម្រាបថា កាលពីថ្ងៃទី២៩ ខែសីហា ឆ្នាំ២០១៦ មហាអយ្យការអមតុលាការកំពូល បានចេញដីកាមួយ កោះហៅ លោក កឹម សុខា ឱ្យចូលខ្លួនក្នុងសវនាការ នៅថ្ងៃទី០២ ខែកញ្ញា ឆ្នាំ២០១៦នេះ ក្នុងនាមជាម្ចាស់បណ្តឹងសារទុក្ខ ដែលលោក កឹម សុខា និង មេធាវី ប្តឹងចៅក្រមស៊ើបសួរនៃតុលាការក្រុងភ្នំពេញថា មិនបានបំពេញកិច្ចក្នុងការស៊ើបសួរមួយចំនួន។
យ៉ាងណាក៏ដោយ មេធាវីលោក កឹម សុខា បញ្ជាក់ថា ការមិនចូលសវនាកានោះគឺ ដោយសារតែការកោះហៅហ្នឹង បើយើងពិនិត្យមើលទៅលើគតិច្បាប់ទៅ អត់ទាន់ត្រឹមត្រូវផ្លូវច្បាប់ ដោយសារខាងក្រុមមេធាវី ក៏ដូចជាកូនក្តីបានទទួល ដីការកោះនេះមានរយៈពេលខ្លី ហើយកាលពី២-៣ ថ្ងៃមុននេះ មេធាវីបានដាក់ពាក្យសុំពន្យារពេលសវនាកំពូលនៅថ្ងៃនេះ អញ្ចឹងថ្ងៃនេះក្រុមមេធាវីទាំងអស់ និងកូនក្តី មិនទៅចូលរួមសវនាការទេ៕
រាជធានីភ្នំពេញ៖មន្ត្រីសាលាឧទ្ធរណ៍បានចេញមុខបញ្ជាក់ថា សភាស៊ើបសួរសាលាឧទ្ធរណ៍ រកឃើញថា នីតិវិធីរបស់សមត្ថកិច្ចអង្គភាព ប្រឆាំងអំពើពុករលួយចំពោះមន្ត្រី អាដហុក ដែលកំពុងជាប់ឃុំ៤រូប គឺត្រឹមត្រូវ ។ ដូច្នេះក្រុមប្រឹក្សាជំនុំជម្រះ នៃសភាស៊ើបសួរសាលាឧទ្ធរណ៍ សម្រេចបដិសេធចោលបណ្តឹង របស់មន្ត្រីអាដហុក៤រូប ដែលប្តឹងសុំមោឃភាព នីតិវិធីរបស់ ACU ៕
ដោយ៖ប៉ែន សុផល
បាត់ដំបង៖តាមអនុសាសន៍ណែនាំរបស់ឧត្តមសេនីយ៍ទោ ស ថេត ស្នង ការនៃស្នងការដ្ឋាននគរបាលខេត្តបាត់ដំបងក៏ដូចការចង្អុលបង្ហាញរបស់លោកវរសេនីយ៍ឯក សៅ សាម៉ុន ស្នង ការរងទទួលដឹកនាំអធិការដ្ឋាននគរបាលស្រុថ្មគោលព្រមទាំងអនុវត្តតាមវិធានការជំនាញដែលដាក់ចេញដោយលោកវរសេនីយ៍ឯក កុយ ហៀង ស្នងការរងទទួលផែន ប្រឆាំងបទល្មើស រួមទាំងការិយាល័យជំនាញប្រឆាំងគ្រឿងញៀននៅថ្ងៃទី០១ ខែ កញ្ញា ឆ្នាំ២០១៦ វេលាម៉ោង ១២ និង៣០នាទី លោកវរ សេនីយ៍ត្រី ផង់ សុភាព អធិការនគរបាលស្រុកថ្មគោល បានដឹកនាំកម្លាំងនគរបាល បង្ក្រាករណី( រក្សាទុក ប្រើប្រាស់ និងជួញដូរគ្រឿង ញៀន ) ដោយខុសច្បាប់មួយករណី ក្នុងភូមិពពាលខែ ឃុំអូរតាគីស្រុកថ្មគោល ខេត្តបាត់ដំបង ។
ក្នុងប្រតិបត្តិការ នេះបានឃាត់ខ្លួនជនសង្ស័យចំនួន ០ ៣ នាក់ភេទប្រុសគឺ៖១-ឈ្មោះ ឈុន សុផល អាយុ ៣៥ ឆ្នាំ រស់នៅភូមិចប កាប់ ឃុះអន្លង់រុន ស្រុកថ្មគោល ខេត្តបាត់ដំបង ។ ២-ឈ្មោះ វិន វឌ្ឍនា អាយុ ២៥ ឆ្នាំ រស់នៅភូមិជ្រៃ ឃុំជ្រៃ ស្រុកថ្មគោល ខេត្តបាត់ដំបង។ ៣-តែ ប៊ុនលាង អាយុ ២៥ ឆ្នាំ រស់នៅសង្កាត់ទួលតាឯក ក្រុងបាត់ដំបង។ វត្ថុតាងរឹបអូសបាន៖ថ្នាំញៀនប្រភេទ មេតំហ្វេតាមីន ( ម៉ាទឹកកក ICE ) ទំងន់ ១០៣.២៩ក្រាម ព្រមទាំងសម្ភារៈសម្រាប់ប្រើប្រាស់គ្រឿងញៀននិងសម្ភារៈពាក់ព័ន្ឋមួយចំនួនទៀត ។
សូមជំរាបជូនថា បញ្ហាគ្រឿងញៀនគឺជាក្តីកង្វល់មួយរបស់យើងទាំងអស់គ្នា ហើយក៏ជាភារកិច្ចរួម ដែលទាមទារឲ្យមានការចូលរួមពីគ្រប់ភាគី អាជ្ញាធរ សមត្ថកិច្ចពាក់ព័ន្ឋក៏ដូច ជាប្រជាពលរដ្ឋនៅមូល ដ្ឋាន បន្តសហការ និងហ៊ានរាយការណ៍ទាន់ពេលវេលាដើម្បីសមត្ថកិច្ចមានវិធានការបង្ក្រាប ។
បច្ចុប្បន្នជនសង្ស័យ និងវត្ថុតាងកំពុងរៀបចំសំណុំរឿងបញ្ជូនទៅតុលាការខេត្តបាត់ដំបងដើម្បីចាត់ការ តាមនីតិវិធីច្បាប់៕
ខេត្តបន្ទាយមានជ័យ៖ទីតាំងភ្នាល់បាល់តាមប្រពន្ធ័អនឡាញពីរកន្លែង ដែលបើកលេង បង្កអសន្តិសុខដល់ភូមិ ឃុំមានសុវត្ថិភាព ត្រូវកម្លាំងសមត្ថកិច្ចបង្ក្រាបតែមិនបញ្ជាក់ឈ្មោះម្ចាស់ទាំងពីរនោះ ។ ការចុះបង្ក្រាបទីតាំងអនឡាញពីរកន្លែងនេះធ្វើឡើងកាលពីម៉ោង៥ និង៣៧នាទីល្ងាច ថ្ងៃទី៣១ ខែសីហា ឆ្នាំ២០១៦ ម្សិលមិញនៅក្នុងភូមិក្បាលស្ពាន១ សង្កាត់-ក្រុងប៉ោយប៉ែត ខេត្តបន្ទាយមានជ័យ ។
ប្រភពពីសមត្ថកិច្ចប្រាប់ថា ការចុះបង្ក្រាបទីតាំងខាងលើនេះគឺកម្លាំងនគរបាលនៃស្នងការរដ្ឋានខេត្តបន្ទាយមានជ័យ សហការជាមួយកម្លាំងនគរបាលក្រុងប៉ោយប៉ែត រឹបអូសបានកុំព្យួទរ័ ទីតាំងទីមួយ បានចំនួន៥ឈុត និងទីតាំងទីពីរបានចំនួន៧ឈុត ចាប់ខ្លួនមនុស្ស ប្រុស ស្រី៦នាក់ ស្រីចំនួន៤នាក់ ។
ប្រភពបញ្ជាក់ថា ក្រោយពីការបង្ក្រាបទីតាំងល្បែងភ្នាល់បាល់តាមប្រពន្ធ័អនឡាញទាំងពីរទីតាំងខាងលើនេះ មិនត្រូវបានយកមករក្សាទុកនៅកន្លែងអធិការរដ្ឋាននគរបាលក្រុងប៉ោយប៉ែតឡើយ ដោយបានដឹកជញ្ជូនទាំងមនុស្សប្រុស ស្រី និងគ្រឿងដែលបម្រើឲ្យល្បែងភ្នាល់ខាងលើទៅស្នងការដ្ឋានខេត្តបន្ទាយមានជ័យតែម្ដង ។
ពាក់ពន្ធ័បញ្ហាខាងលើនេះ លោក ធិន ស៊ិនដេត អធិការក្រុងប៉ោយប៉ែតកាលពីព្រឹកថ្ងៃទី០១ ខែកញ្ញា ឆ្នាំ២០១៦ លោកថា មិនទាន់បានទទួលរបាយការណាជាក់លាក់អំពីឈ្មោះម្ចាស់ទីតាំងទាំងពីរខាងលើឡើយ ។
ចំណែកលោក សិទ្ធ ឡោះ ស្នងការរងខេត្តបន្ទាយមានជ័យ ពេលអ្នកសារព័ត៌មានសាកសួរជុំវិញករណីបង្ក្រាបទីតាំងខាងលើនេះសួរអស់សំណួរផង រួចបានបិទទូរសព្ទ័តែម្ដង ។
អ្នកស្រុកបានលើកឡើងថា ចំពោះល្បែងស៊ីសងនៅក្រុងប៉ោយប៉ែតហាក់ដូចជាមានការកើនឡើង ដែលគួរឲ្យប្រជាពលរដ្ឋព្រួយបារម្ម អំពីសុវត្ថិភាពក្នុងមូលដ្ឋានរបស់គាត់ ហើយការបង្ក្រាបល្បែងស៊ីសងរបស់សមត្ថកិច្ចពួកគាត់មានការត្រេកអ តែមាន នៅទីតាំងជាច្រើនកន្លែងទៀត នៅមិនទាន់បង្ក្រាប ហាក់បីដូចជានៅមានកម្រិត បើល្បែងស៊ីសងឆ្នោតវិញ គីកំពុងតែមានច្រើននៅតាមទីផ្សារ ឬតាមគេហដ្ឋានដែលគួរឲ្យព្រួយបារម្មនៅអំពើចោរកម្មគ្រប់ប្រភេទកើតចេញពីការចាញ់ល្បែង៕
រាជធានីភ្នំពេញ៖ខ្មាន់កាំភ្លើងបានបាញ់ប្រហារចំនួន២គ្រាប់ទៅលើសន្តិសុខខារ៉ាអូខេពីរ៉ាមីនបណ្តាលឲ្យរងរបួសធ្ងន់២នាក់ គ្រាដែលសមត្ថកិច្ចជំនាញសង្ស័យថា ផ្តើមចេញពីរឿងគំនុំ ដណ្តើមទ្រព្យសម្បត្តិជាមួយប្រពន្ធដែលកំពុងប្តឹងលែងលះគ្នានៅតុលាការ។ ករណីនេះកើតឡើងនៅវេលាម៉ោង១១ និង០០យប់ ថ្ងៃទី០១ ខែកញ្ញានេះ ស្ថិតនៅសង្កាត់ភ្នំពេញថ្មី ខណ្ឌសែនសុខ។
អធិការខ័ណ្ឌសែនសុខ ថ្លែងបញ្ជាក់ថា ជនរងគ្រោះមានឈ្មោះ លី សុងហេង អាយុជាង៥០ឆ្នាំ រស់នៅផ្ទះវីឡា ភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ។
តាមអ្នកដឹងហេតុការណ៍បញ្ជាក់ថា ជនរងគ្រោះមានកូនប្រុស២នាក់ និងកំពុងតែប្តឹងលែងលះជាមួយប្រពន្ធ រឿងចែកទ្រព្យសម្បត្តិ តែមិនទាន់ដាច់ស្រេច ។ នៅថ្ងៃកើតហេតុនោះជនរងគ្រោះទៅច្រៀងនៅខារ៉ាអូពីរ៉ាមីន ហើយរាល់ដងតែងតែជិះ តាក់ស៊ីទៅផ្ទះ ប៉ុន្តែយប់មិញ អត់មានតាក់ស៊ី ក៏ពឹងសន្តិសុខហាង ឲ្យជួយជូនទៅ ស្រាប់តែកំពុងជិះតាមផ្លូវ ក៏លេចមុខជនបង្ក មកបាញ់២គ្រាប់ បណ្តាលឲ្យចំ៤កន្លែង រួចក៏ផ្លាតត្រូវសន្តិសុខនោះដែរម្នាក់ទៀត ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
