អត្ថបទ៖ លោក វិធិន
ក្រចេះ ៖ កម្លាំងកងរាជអាវុធហត្ថខេត្តក្រចេះ ដឹកនាំដោយបញ្ជាដោយផ្ទាល់ពីលោកឧត្តមសេនីយ៍ត្រី សាន ប៊ុនថាន មេបញ្ជាការកងរាជអាវុហត្ថខេត្ត ចុះបង្ក្រាបឃាត់រថយន្តយីឌុបដឹកឈើប្រណីតចំនួន ២គ្រឿង និងឃាត់ខ្លួនមនុស្សចំនួន ៥នាក់។ ខណៈដែលរថយន្តទាំងនោះកំពុងធ្វើចរាចរណ៍ដឹកជញ្ជូនបម្រុងលោតឆត្រ័ពីខេត្តស្ទឹងត្រែងឆ្លងកាត់ខេត្តក្រចេះ ឆ្ពោះទៅខេត្តត្បូងឃ្មុំ និងប្រទេសវៀតណាម។
កិច្ចប្រតិបត្តិការចុះបង្ក្រាបរថយន្តដឹកឈើខាងលើនេះ គឺត្រូវបានកម្លាំសមត្ថកិច្ចអាវុធហត្ថខេត្ត ធ្វើឡើងកាលពីវេលាម៉ោង យប់ថ្ងៃទី២២ ខែឧសភា ឆ្នាំ២០១៦ នៅចំណុចថ្មបាំង តាមបណ្ដោយផ្លូវជាតិលេខ៧A ឋិតក្នុងភូមិបន្ទាយ ឃុំគោលាប់ ស្រុកចិត្របុរី ខេត្តក្រចេះ រួចក៍បានបញ្ចូនទៅបញ្ចាការដ្ឋានកងរាជអាវុតហត្ថខេត្ត។
លោកវរសេនីយ៍ទោ ឡុង យឹង ប្រធានមន្ទីរយុត្តិធម៌ បានឲ្យដឹងថា ដោយទទួលបានបទបញ្ជាពី នាយឧត្តមសេនីយ៍ សៅ សុខា ជាប្រធានគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសព្រៃឈើ និងក្រោមការដឹកនាំបញ្ជាដោយផ្ទាល់ពីលោកឧត្តមសេនីយ៍ត្រី សាន ប៊ុនថាន មេបញ្ចាការកងរាជអាវុធហត្ថខេត្តក្រចេះ កម្លាំងអាវុធហត្ថខេត្ត ក្រុងក្រចេះ និងកម្លាំងអាវុធហត្ថស្រុកចិត្របុរី បានបើកប្រតិបត្តិការចុះបង្ក្រាប ចាប់ឃាត់រថយន្ដយីឌុបដឹកឈើប្រណីតចំនួន ២គ្រឿង និងមនុស្សចំនួន ៥នាក់។
លោកវរសេនីយ៍ទោ ឡុង យឹង បានបន្តឲ្យដឹងថា ជនសង្ស័យទាំង ៥នាក់ គឺជាអ្នកបើកបរ និងព្រួរថយន្ត ក្នុងមានជនជាតិវៀតណាមម្នាក់ ដោយទី១,ឈ្មោះ ប្រាជ្ញ ចាន់ ភេទប្រុស អាយុ ៣៣ឆ្នាំ មានទីលំនៅភូមិត្រពាំងត្នោត ឃុំសូរសែន ស្រុកព្រៃឈរ ខេត្តកំពង់ចាម ជាអ្នកបើករថយន្ត ទី២,ឈ្មោះ ហេង ហ៊ាប ភេទប្រុស អាយុ ៣៤ឆ្នាំ មានទីលំនៅភូមិអំពិល ឃុំអំពិលតាមពក ស្រុកអូរាំងឳ ខេត្តត្បូងឃ្មុំ ជាអ្នកបើករថយន្ត ទី៣,ឈ្មោះ នី ដួង ភេទប្រុស អាយុ ១៩ឆ្នាំ មានទីលំនៅភូមិអំពិល ឃុំអំពិលតាមពក ស្រុកអូរាំងឳ ខេត្តត្បូងឃ្មុំ ជាព្រូរថយន្ត ទី៤, ឈ្មោះ ង៉ូ វ៉ាងវី ភេទប្រុស អាយុ ៣០ឆ្នាំ ជនជាតិវៀតណាម ជាព្រួរថយន្ត និងទី៥, ឈ្មោះ វេង សាវី ភេទប្រុស អាយុ ២៩ឆ្នាំ មានទីលំនៅភូមិល្វាលើ ឃុំស្ដៅ ស្រុកកងមាស ខេត្តកំពង់ចាម ជាព្រូរថយន្ត។
ចំណែកឯរថយន្តយីឌុបទាំង ២គ្រឿងនោះ មួយគ្រឿង ម៉ាកនីសាន់ ពណ៌ខៀវប្រាំភ្លៅ ពាក់ស្លាកលេខ ព្រះសីហនុ 3A-0079 ដឹកឈើប្រណិត ប្រភេទឈើធ្នង់ពេញប្រៀប និងរថយន្តយីឌុបមួយគ្រឿងទៀត ម៉ាក ហ៊ីណូ ពណ៌ខៀវប្រាំភ្លៅ ពាក់ស្លាកលេខ ភ្នំពេញ 3A-8602 ដឹកឈើប្រណីត ប្រភេទឈើធ្នង់ពេញប្រៀបដូចគ្នា។
តាមការសន្និដ្ឋានជំហានដំបូងរបស់សមត្ថកិច្ច បានឲ្យដឹងថា ឈើប្រណីតទាំងពីររថយន្តនេះ មានចំនួនប្រមាណជា ៧០ម៉ែត្រគូប និងសុទ្ធសឹងតែជាប្រភេទឈើធ្នង់ នេះបើតាមការសន្និដ្ឋានជំហ៊ានដំបូងមិនទាន់បានរើ និងវាស់វែង។ យោងតាមចម្លើយសារភាពរបស់អ្នកបើកបររថយន្ត និងព្រួរថយន្តទាំង៥នាក់នោះ បានឲ្យដឹងថា ឈើប្រណីតប្រភេទធ្នង់ទាំងនោះ ជាកម្មសិទ្ធិរបស់ឈ្មួញរកស៊ីឈើម្នាក់ ឈ្មោះ ហេង សំនាង ហៅ យាយព្រឿង ដែលជាជនជាតិវៀតណាម ជាឈ្មួញរកស៊ីដឹកជញ្ជូនបទល្មើសព្រៃឈើ និងគ្រឿងសង្ហារឹមដុះស្លែយូរឆ្នាំមកហើយ។
ជនសង្ស័យ និងវត្ថុតាំង ត្រូវបានបញ្ជាការរដ្ឋានកងរាជអាវុធហត្ថខេត្ត កសាងសំនុំរឿងប្រគល់ជូនផ្នែករដ្ឋបាលព្រៃឈើក្រចេះ ដើម្បីចាត់វិធានការបន្តតាមនីតិវិធី ដោយមានការចូលរួមសម្របសម្រួលពីលោក បញ្ច សន្តិភាព ព្រះរាជអាជ្ញារងអមសាលាដំបូងខេត្តក្រចេះ ។
លោក ប៊ុយ រតនា នាយផ្នែករដ្ឋបាលព្រៃឈើក្រចេះ បានឲ្យដឹងថា ក្រោយពេលដែលអាវុធហត្ថខេត្ត ធ្វើសំនុំរឿងប្រគល់ជូនផ្នែករដ្ឋបាលព្រៃឈើហើយ រថយន្តដឹកឈើទាំង ២គ្រឿងនោះ មន្ត្រីជំនាញរដ្ឋបាលព្រៃឈើនឹងនាំយកទៅស្ថានីយ៍បណ្ដុះកូនឈើខ្សារ ដើម្បីធ្វើការរើ និងវាស់វែង។
លោក បន្តទៀតថា ចំណែកឯជនសង្ស័យទាំង ៥នាក់នោះវិញ ក្រោយពេលដែលរកឃើញចំនួនម៉ែត្រគូបឈើហើយនោះ លោកនឹងមកធ្វើការសាកសួរនាំជនសង្ស័យបន្ថែមទៀត តាមនីតិវិធីច្បាប់ ដើម្បីស្រាវជ្រាវរកម្ចាស់បទល្មើសមកផ្ដន្ទាទោស និងកសាងសំនុំរឿងបញ្ជូនជនសង្ស័យទាំង ៥នាក់នោះ ទៅកាន់សាលាដំបូងខេត្ត ដើម្បីផ្ដន្ទាទោសតាមផ្លូវច្បាប់ដូចគ្នាដែរ។
ប្រភពពត៌មាន បានរាយកាណ៍ឲ្យដឹងថា ខណៈពេលនេះ ឈ្មួញឈើឈ្មោះ ហេង សំនាង ហៅ យាយ ព្រឿង ដែលម្ចាស់ឈើប្រណីតខុសច្បាប់ទាំងនោះ បានរត់គេចខ្លួនទៅប្រទេសវៀតណាមបាត់ហើយ៕
