បាងកក៖សារព័ត៌មាន AFP ចេញផ្សាយថា យ៉ាងហោចណាស់មានក្មេងស្រីចំនួន១៧នាក់បានស្លាប់ នៅក្នុងហេតុការណ៍ឆេះអគារស្នាក់នៅរបស់សិស្សមួយកន្លែងក្នុងប្រទេសថៃកាលពីយប់មិញ។
ប៉ូលិសបានបញ្ជាក់ប្រាប់សារព័ត៌មាន AFP ថា យ៉ាងហោចណាស់មានក្មេងស្រី ១៧នាក់ ដែលជាសិស្សស្នាក់នៅក្នុងអគារមួយ ប៉ុន្តែប៉ូលិសមិនបានបញ្ជាក់ព័ត៌មានបន្ថែមឲ្យលើសពីនេះឡើយ៕
បង់ក្លាដែស៖មនុស្សយ៉ាងហោចណាស់ចំនួន២៤នាក់បានស្លាប់ និងរាប់ពាន់នាក់ផ្សេងទៀតបាត់បង់ផ្ទះសម្បែងបន្ទាប់ពីព្យុះស៊ីក្លូន Roanu បានបោកបក់លើតំបន់ឆ្នេរដ៏ក្រីក្រស្ថិតនៅភាគខាងត្បូងប្រទេសនេះកាលពីថ្ងៃទីអាទិត្យម្សិលមិញ។ នេះបើយោងតាមសារព័ត៌មាន AFP ។
អាជ្ញាធរបង់ក្លាដែសបាននិយាយថា ព្យុះនោះបានបោកបក់កាលពីថ្ងៃសៅរ៍សប្ដាហ៍មុនកាត់ភូមិនានានៅតំបន់ Chittagong និង Barisal ជាទីដែលប្រជាពលរដ្ឋរស់នៅខាងក្នុងកំពែងការពារទឹកសមុទ្រ។ទន្ទឹមនោះអាជ្ញាធរក៏បានជម្លៀសមនុស្សជាង៥សែននាក់ទៅកាន់ជម្រកសុវត្ថិភាពនៅមុនការមកដល់នៃព្យុះស៊ីក្លូននោះដែលបោកបក់ក្នុងល្បឿន៨៨គីឡូម៉ែត្រក្នុងមួយម៉ោង។
លោក Reaz Amhed ប្រធានផ្នែកគ្រប់គ្រងគ្រោះមហន្តរាយបាននិយាយថាអ្នកស្លាប់ប្រហែលពាក់កណ្ដាលគឺជាប្រជាជននៅតំបន់ Chittagong ខណៈផ្ទះសម្បែងប្រហែល៨ម៉ឺនខ្នងបានរងការខូចខាត៕
ឱសថបុរាណខ្មែរសញ្ញា “រុក្ខជាតិ”
ជាឱសថដែលផ្សំឡើងពី ដើម និងមើម រុក្ខជាតិពិតៗ
ឱសថមានសណ្ឋានជាគ្រាប់. ទឹក. និងក្រមួន មានប្រសិទ្ធភាពព្យាបាលជំងឺដូចជា ៖
១.ជំងឺទូទៅ ៖ * ឫសដូងបាត *ឫសដូងច្រមុះ *មហារីកដោះ *ដុះសាច់បំពង់ក
២. ជំងឺប្រព័ន្ធរំលាយអាហារ និងចង្កេះ ៖ *ក្រពះពោះវៀន *ខ្សោយក្រលៀន *ឈឺចង្កេះ *ក្រួសក្នុងតម្រងនោម *ឈឺសន្លាក់ដៃជើង *ឈឺសរសៃ *កប់សរសៃ *ឈឺរោយខ្នងចង្កេះ*ទឹកនោមផ្អែម *លើសឈាម
៣. ជំងឺសរសៃឈាម ៖ *សម្រួលដំណើរឈាម *កែលម្អឈាម *ជាំស្បែកមុខ *ទាស់កូនខ្ចី និងទាស់សរសៃ និងរោគស្ត្រី ច្រើនមុខទៀត
៤. ជំងឺសើរស្បែក ៖ *សក់ជ្រុះដុះឡើងវិញ *របួសស្បែក *មុនដំរី *បូស *ស្រែង *រមាស់ *តាអក *រើម *ឈឺក្នុងត្រចៀក
៥. ជំងឺមាត់ ធ្មេញ ៖ *ឈឺធ្មេញ *រាក់ធ្មេញ *ស្អុយមាត់ *សង្កៀរធ្មេញ។
បាល់ទាត់៖ក្រុម Paris Saint-Germain កំពុងតែត្រៀមកញ្ចប់ទឹកប្រាក់យ៉ាងច្រើនមហាសាលក្នុងទិញយកខ្សែប្រយុទ្ធ Gonzalo Higuain ពីក្រុម Napoli ប្រទេសអ៊ីតាលី។នេះបើយោងតាមការចុះផ្សាយរបស់ The sport mole ។
ក្រុមម្ចាស់ជើងឯករបស់បារាំងត្រូវបានគេរំពឹងថានឹងមានខ្សែប្រយុទ្ធថ្មីនៅរដូវក្តៅនេះខណៈពេលដែល តារាស៊ុតបាល់បញ្ចូលទីបានច្រើនជាងគេ Zlatan Ibrahimovic បានរៀបចំដើម្បីចាកចេញនៅពេលបញ្ចប់រដូវកាលនោះ ។
Higuain បច្ចុប្បន្ននេះគឺកំពុងតែមានទំនាក់ទំនងយ៉ាងស្អិតរមួតជាមួយនឹងការផ្លាស់ប្តូរទៅកាន់ក្របខ័ណ្ឌ Premier League ប៉ុន្តែកីឡាកររូបនេះ បានសម្រេចបន្តកិច្ចសន្យាថ្មីជាមួយកក្រុមនៅក្របខ័ណ្ឌ Serie A ហើយក៏ជាអ្នកស៊ុតបញ្ចូលទីបានច្រើនជាងគេឲ្យក្រុម Napoli ៕
រាជធានីភ្នំពេញ៖ក្រសួងសុខាភិបាលបានសម្រេចបិទមន្ទីរសម្រាកព្យាបាលជំងឺ«ឃឹម រ៉ានី» ដែលមានទីតាំងស្ថិតនៅផ្ទះលេខ១៤ ផ្លូវលេខ៣១៥ សង្កាត់បឹងកក់១ ខណ្ឌទួលគោក។ ជាការកត់សម្គាល់ការបិទគ្លីនិក«ឃឹម រ៉ានី»នេះដែរ បានធ្វើឡើងបន្ទាបពីបុរសម្នាក់បានប្រកាច់បែកពពុះមាត់ស្លាប់ ក្រោយពេល បញ្ចូនទៅសង្គ្រោះនៅមន្ទីរពេទ្យកាល់ម៉ែត្រ កាលពីព្រឹកថ្ងៃទី២២ ខែឧសភា ឆ្នាំ២០១៦។
បើតាមសេចក្តីសម្រេចរបស់ក្រសួងសុខាភិបាលដែលចុះហត្ថលេខាដោយលោករដ្ឋមន្ត្រី ម៉ម ប៊ុនហេង នៅថ្ងៃទី២៣ ឧសភា ២០១៦នេះ បានបញ្ជាក់ពីមូលហេតុថា ដោយសារគ្លីនិក«ឃឹម រ៉ានី» បង្កឲ្យមានបញ្ហាជាច្រើនលើកច្រើនសារ ដោយមិនគោរពទៅតាមកិច្ចសន្យារបស់ខ្លួនពេលសុំបើកមន្ទីរសម្រាកព្យាបាល ឃឹម រ៉ានី និងមិនគោរពទៅតាមការណែនាំរបស់ក្រសួងសុខាភិបាល៕
រាជធានីភ្នំពេញ៖សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញសេចក្តីសម្រេចដាក់ឲ្យនាយនគរបាលជាន់ខ្ពស់ ក្រសួងមហាផ្ទៃចំនួន ៥៥នាក់ ចាប់ពីឋានន្តរស័ក្តិថ្នាក់វរសេនីយ៍ឯក ដល់ឧត្តមសេនីយ៍ឯកឲ្យចូលនិវត្តន៍ ចាប់ពីខែធ្នូ ឆ្នាំ២០១៦ តទៅ ៕
អេហ្ស៊ីប៖ប្រធានាធិបតីអេហ្ស៊ីបលោក Abdel Fattah al-Sisi បានចេញបញ្ជាឲ្យបញ្ជូននាវាទឹកមួយគ្រឿងចូលរួមស្វែងរកប្រអប់ខ្មៅ Airbus 320 ដែលបានធ្លាក់ក្នុងសមុទ្រមេឌីរ៉ាណេ រយៈពេល៤ថ្ងៃមកហើយ។ នេះបើយោងតាមសារព័ត៌មានស៊ិនហួរ។
ការសម្រេចបញ្ជូននាវាមុជទឹកនេះ ដោយសារតែប្រតិបត្តិការរុករកនៅលើទឹក ជួបប្រទះបញ្ហាប្រឈមនានា ពាក់ព័ន្ធនឹងអាកាសធាតុអាក្រក់។ នាវាខាងលើនេះ នឹងបំពេញប្រតិបត្តិការ តាមចាប់សញ្ញារបស់ប្រអប់ខ្មៅ របស់យន្តហោះ Airbus 320 អមដោយការជួយជ្រោមជ្រែងពីបុគ្គលិករបស់ ក្រុមហ៊ុនរុករកប្រេង។
គួរបញ្ជាក់ថា នាវាមុជទឹកខាងលើនេះ អាចចុះក្នុងទឹកបានជម្រៅ ៣គីឡូម៉ែត្រ ហើយប្រតិបត្តិការ រុករកនឹងបញ្ជូនទៅកាន់កន្លែង ដែលយន្តហោះធ្លាក់តែម្តង។ ពាក់ព័ន្ធនឹងការធ្លាក់យន្តខាងលើនេះមិនទានមានក្រុមណាមួយចេញមុខអះអាងទទួលខុសត្រូវនៅឡើយ៕
ដោយ៖ 032 MKP
ក្រចេះ ៖ បទល្មើសព្រៃឈើ ក្នុងភូមិសាស្ដ្រទឹកដីនៃស្រុកព្រែកប្រសព្វ កំពុងតែធ្វើសកម្មភាពកាប់ និងដឹកជញ្ជូនតាមរថយន្តកែច្នៃ យ៉ាងអនាធិបតេយ្យពេញទំហឹងពីសំណាក់ពួកក្រុមឈ្មួញ ដែលត្រូវបានរាជរដ្ឋាភិបាលចាត់ទុកថាជាឧក្រិដ្ឋព្រៃឈើ បង្កឡើងដោយអ្នកមានប្រាក់ ទិញមន្ត្រីមានអំណាច ដើម្បីជួយកាង និងបិទបាំងបទល្មើសរបស់ពួកគេ។
បើទោះបីជាថ្មីៗក្នលងមកនេះ រាជរដ្ឋាភិបាលបានដាក់ចេញនូវវិធានការទប់ស្កាត់យ៉ាងក្ដៅកគុកយ៉ាងណាក៏ដោយ ការកាប់បំផ្លាញ និងការនាំចេញនូវអនុផល ឬឈើប្រណីតខុសច្បាប់ ដឹកជញ្ជូនតាមរថយន្តកែច្នៃ នៅតែបន្តកើតមានយ៉ាងគគ្រឹកគ្រេង ដោយគ្មានសមត្ថកិច្ចណាមួយមើលឃើញឡើយ ។ករណីមិនអើពើចំពោះបទល្មើសទាំងនោះ ត្រូវគេទម្លាក់កំហុសទៅលើមន្ត្រីជំនាញរដ្ឋបាលព្រៃឈើ និងសមត្ថកិច្ចពាក់ព័ន្ធថា ត្រូវបានប្រាក់ដុល្លារបិទភ្នែក បិទមាត់ជិតអស់ហើយ ទើបបានជាសកម្មភាពដឹកជញ្ជូនផលអនុផលព្រៃឈើនេះ នៅតែធ្វើការដឹកជញ្ជូនឥតឈប់ឈរ នៅក្នុងភូមិសាស្ដ្រទឹកដីស្រុកព្រែកប្រសព្វ ចេញទៅលក់នៅខេត្តត្បូងឃ្មុំ ប្រកដោយរលូន និងមានសុវត្ថិភាព។
ប្រភពផ្តល់ព័ត៌មាន ដោយសុំមិនបញ្ចេញឈ្មោះ បានបង្ហើបឲ្យដឹងថា សកម្មភាពរថយន្តដឹកឈើខុសច្បាប់ ស្ថិតក្នុងភូមិសាស្ត្រស្រុកព្រែកប្រសព្វ ខេត្តក្រចេះ តាមរថយន្តកែច្នៃ ជារៀងរាល់ថ្ងៃយប់ ឆ្លងកាត់តាមមុខសង្កាត់រដ្ឋបាលព្រៃឈើជ្រោយបន្ទាយ ដែលមានលោក ប៉ុក វណ្ណា ជានាយសង្កាត់ និងផ្នែករដ្ឋបាលព្រៃឈើព្រែកប្រសព្វ ដែលមានលោក អ៊ីង ស៊ីណាង ជានាយផ្នែក ប៉ុន្តែមន្ត្រីជំនាញព្រៃឈើទាំងនោះ គឺគ្មានចំណាត់ការទប់ស្កាត់ និងចុះបង្ក្រាបអ្វីទាល់តែសោះ បែរជាបណ្ដែតបណ្ដោយបើកដៃឲ្យពួកក្រុមឈ្មួញទាំងនោះ ធ្វើសកម្មភាពដឹកជញ្ជូនផលអនុផលព្រៃឈើខុសច្បាប់រាប់រយម៉ែត្រគូប ចេញពីតំបន់គំរបព្រៃឡង់យ៉ាងគគ្រឹកគ្រេង ឥតឈប់ឈរ ឆ្ពោះទៅកាន់ស្រុកក្រូចឆ្មារ ខេត្តត្បូងឃ្មុំ បានដោយសុវត្ថិភាព។
ប្រភពដដែល បន្តឲ្យដឹងថា សព្វថ្ងៃនេះ គេសង្កេតឃើញថា លោក អ៊ីង ស៊ីណាង ដែលជានាយផ្នែករដ្ឋបាលព្រៃឈើស្រុកព្រែកប្រសព្វ ហាក់បីដូចជាធ្វើការងារផ្ទុយស្រឡះពីជំនាញ ដោយចាប់បង្ក្រាបបានតែឈើអារកំប៉ិកកំប៉ុករបស់ប្រជាពលរដ្ឋ ចំណែកឯឈើប្រណីតដែលលួចអារខុសច្បាប់រាប់រយម៉ែត្រគូប ដែលដឹកជញ្ជូនតាមរថយន្តកែច្នៃ របស់ឈ្មួញមានប្រាក់ មានអំណាចវិញនោះ គឺលោក អ៊ីង ស៊ីណាង មិនដែលចុះធ្វើការបង្ក្រាបចាប់បានម្ដងណាឡើយ។
ជាក់ស្ដែង កាលពីថ្ងៃទី១៩ ខែឧសភា ឆ្នាំ២០១៦នេះ នៅចំនុចភូមិអន្លង់ព្រះគោ ឃុំវឌ្ឍនៈ ករណីចាប់ទូកដឹកឈើ៣គ្រឿងរបស់កូនស្រី តា ម៉ាន នោះជាដើម ដែលត្រូវបានគេដឹងថា ជាក្រុមឈ្មួញជើងខ្លាំងខាងរកស៊ីដឹកផលអនុផលព្រៃឈើខុសច្បាប់តាមទូកយូរឆ្នាំ ហើយបើសិនជា កម្លាំងកងអាវុធហត្ថខេត្តក្រចេះ មិនចុះទៅបង្ក្រាបទេនោះ ប្រហែលជាទូកឈើទាំងនោះច្បាស់ណាស់ គឺធ្វើចរាចណ៍ឆ្លងកាត់ដែនដីក្រោមការគ្រប់គ្រងរបស់លោក អ៊ីង ស៊ីណាង ដែលជានាយផ្នែករដ្ឋបាលព្រៃឈើព្រែកប្រសព្វនោះ ទៅដោយរលូនទៀតជាក់ជាមិនខានឡើយ ។នេះបើយោងតាមប្រភពរាយកាណ៍បានឲ្យដឹង។
ដោយឡែកចំពោះបទល្មើសព្រៃឈើខាងផ្លូវគោកវិញម្ដង នៅក្នុងស្រុកព្រែកប្រសព្វ ដដែល ប្រភពពីប្រជាពលរដ្ឋ សុំមិនបញ្ចេញឈ្មោះ ដោយសារពួកគាត់មានការភ័យខ្លាច ព្រោះពួកឈ្មួញរកស៊ីដឹកឈើទាំងនោះ សុទ្ធសឹងតែជាប៉ូលីស ប៉េអឹម ។ ប្រភពរាយការណ៍ បានលួចបង្ហើបប្រាប់ថា ក្រុមឈ្មួញទុច្ចរិត មានប្រាក់ មានអំណាច ដែលកំពុងធ្វើសកម្មភាពដឹកជញ្ជូនផលអនុផលព្រៃឈើសព្វថ្ងៃនេះ ចេញពីតំបន់គំរបព្រៃឡង់នោះ គឺត្រូវបានគេស្គាល់ឈ្មោះថា ទី១, ឈ្មោះ គង់ ទេង ហៅ រ៉ុន មានតួនាទីជាប៉ូលីសសេដ្ឋកិច្ចខេត្តក្រចេះ ២, ឈ្មោះ ជាម ចាន់ពីនី ហៅ ពី មានតួនាទីជាប៉ូលីសសេដ្ឋកិច្ចស្រុកព្រែកប្រសព្វ ៣, ឈ្មោះ រស់ សុធា ហៅ សម្បត្តិ ជាប៉េអឹមស្រុកព្រែកប្រសព្វ ៤, ឈ្មោះ ហាក់ រចនា ហៅ ចាន់ ណា ជាឈ្មួញរស់នៅភូមិកែង ឃុំជ្រោយបន្ទាយ ស្រុកព្រែកប្រសព្វ និងទី៥, ឈ្មោះ យ៉ា រស់នៅស្រុកតំបែរ ខេត្តត្បូងឃ្មុំ។
ប្រភពស្និទ្ធនឹងមន្ត្រីប៉េអឹម បានប្រាប់ថា ក្រុមពួកឈ្មួញទាំងនេះ កំពុងធ្វើសកម្មភាពកាប់បំផ្លាញ ធនធានសម្បត្តិព្រៃឈើ និងនាំផលអនុផលព្រៃឈើខុសច្បាប់ ចេញពីតំបន់គំរបព្រៃឡង់ឆ្ពោះទៅខេត្តត្បូងឃ្មុំ។ ប៉ុន្តែមន្ត្រីជំនាញផ្នែករដ្ឋបាលព្រៃឈើព្រែកប្រសព្វ ដែលមានលោក អ៊ឹងង ស៊ីណាង ជានាយផ្នែក គេសង្កេតឃើញថា មិនមានចំណាត់ការក្ដៅណាមួយចុះធ្វើការបង្ក្រាបបទល្មើសព្រៃឈើឡើយ ឬមួយក៏លោក ដែលជាមន្ត្រីជំនាញ រដ្ឋបាលព្រៃឈើ អង្គុយរង់ចាំតែទទួលពេលយកបទល្មើសពេលគេបង្ក្រាបហើយនាំយកមកប្រគល់អោយ ឬក៏រង់ចាំអោយប៉េអឹមខេត្តចុះបង្ក្រាបម្ដងទៀត ទើបលោកមានចំណាត់ការចុះបង្ក្រាប ឬមួយក៏យ៉ាងមេច ?
ប្រភពដដែលអះអាងថា ចំពោះផ្លូវ ដែលក្រុមឈ្មួញ ធ្វើសកម្មភាពដឹកជញ្ជូនផលអនុផលព្រៃឈើចេញពីតំបន់គំរបព្រៃឡង់នោះវិញ គឺឆ្លងកាត់តាមមុខសង្កាត់ និងផ្នែករដ្ឋបាលព្រៃឈើផង និងតាមខាងផ្លូវខាងក្រោយផង តែវាមិនមែនជារឿងពិបាកទេសម្រាប់អស់លោកជាមន្ត្រីជំនាញ ព្រោះអស់លោកស្គាល់ទីតាំង និងភូមិសាស្ត្រហើយ នៅក្នុងដែនសមត្ថកិច្ចរបស់ខ្លួននោះ មិនបាច់ចាំគេបង្អុលប្រាប់ទៀតនោះទេ ប៉ុន្តែអ្វីដែលធ្វើឲ្យមជ្ឍដ្ឋានមួយចំនួនរិះគន់នោះគឺ មន្ត្រីរដ្ឋបាលព្រៃឈើមិនបង្ក្រាបសោះ។
ប្រភពដដែល បានបន្តទៀតថា សកម្មភាពទាំងនោះ បានបញ្ជាក់ឲ្យឃើញពីភាពធូរលុង របស់សមត្ថកិច្ច ពុំមានសមត្ថភាពឃាត់ រឺធ្វើការបង្ក្រាបនោះឡើយ ឬមួយក៏ឈ្មួយទាំងនោះ អស្ចារ្យ ចេះវិជ្ជាគុណបំបាំងកាយពិតមែន បានជាចេះតែបណ្ដែតបណ្ដោយឲ្យរថយន្តកែច្នៃដឹកផលអនុផលព្រៃឈើទាំងនោះ ឆ្លងកាត់មុខទីស្នាក់ការរបស់លោកប្រកបដោយសុវត្ថិភាពបែបនេះ។
ប្រជាពលរដ្ឋ ស្នើសុំឲ្យរដ្ឋបាលព្រៃឈើ គ្រប់លំដាប់ថ្នាក់ ជាពិសេស លោកនាយផ្នែក សង្កាត់រដ្ឋបាលព្រៃឈើប្រចាំការនៅតាមដងផ្លូវម៉ាត់ទន្លេស្រុកព្រែកប្រសព្វ សូមឲ្យលោកបើកភ្នែកមើលបទល្មើសព្រៃឈើផង ប្រយ័ត្នជាប់ឈ្មោះក្នុងបញ្ជីខ្មៅរបសគណកម្មការត្រួតពិនិត្យ និងបង្ក្រាបបទល្មើសព្រៃឈើដែលបង្កើតឡើងដោយរាជរដ្ឋាភបាល។
សូមរំលឹកថា តំបន់គំរបព្រៃឡង់ គឺជាតំបន់ដែលសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដាក់បញ្ជាយ៉ាងតឹងរ៉ឹង និងម៉ឺងមាត់បំផុតក្នុងការ ការពារអភិរក្ស ទប់ស្កាត់ និងបង្ក្រាបនូវរាល់បទល្មើសព្រៃឈើដែលកើតមាននៅតំបន់នោះ៕
បាល់ទាត់៖យោងតាមសេចក្តីរាយការណ៍មួយបានឲ្យដឹងថា ក្រុមមេឃខៀវ Manchester City គ្រោងនឹងបញ្ចប់កិច្ចសន្យាក្នុងការទិញយកបម្រើ Ilkay Gundogan ពីក្រុម Borussia Dortmund នៅចុងសប្តាហ៍នេះ។
ខ្សែបម្រើក្លិប Borussia Dortmund ត្រូវបានគេភ្ជាប់ជាមួយនឹងការផ្លាស់ប្តូរទៅកាន់កីឡដ្ឋាន Etihad ប៉ុន្តែការរំពឹងទុកត្រូវមាន ស្ងប់ទៅវិញហើយលោកបានជួបបញ្ហារបួសជង្គង់ដែលនឹងអវត្តមានរហូតដល់ខែកញ្ញា។
យ៉ាងណាមិញបើយោងតាមកាសែត The Telegraph លោក Pep Guardiola អ្នកចាត់ការទូទៅក្រុមនេះនៅរដូវកាលបានប្រាប់នៅកន្លែងសន្និសិទថាលោក នឹងព្យាយាមដើម្បីឈានទៅដល់កិច្ចព្រមព្រៀងមួយនេះ។
របាយការណ៍នេះបានបន្ថែមថាខ្សែបម្រើសញ្ជាតិ អាល្លឺម៉ង់រូបនេះ ត្រូវបានខកខានចំពោះព្រឺត្តិការណ៍ Euro 2016 ហើយនឹងមកចូលរួមជាមួយក្រុម Man City នារដូវកាលក្រោយនេះក្នុងតម្លៃជាង ២០លានផោន។
គួរបញ្ជាក់ថា ខ្សែបម្រើវ័យ ២៥ ឆ្នាំរូបនេះ បានបង្ហាញខ្លួន ៤០ ប្រកួតឲ្យក្រុម Dortmund នៅរដូវកាលនេះ៕
ខេត្តកណ្តាល៖ក្មេងប្រុសអាយុ៦ឆ្នាំម្នាក់ ត្រូវបានរថយន្តដឹកដីមួយគ្រឿងបើកបុកហើយកិនចំពីលើ បណ្តាលឲ្យស្លាប់ភ្លាមៗ យ៉ាងអាណោចអាធម៌កាលពីវេលាម៉ោង១១ និង១០នាទី ថ្ងៃទី២២ ខែឧសភា ឆ្នាំ២០១៦ នៅចំណុចលើផ្លូវលេខ១១០ ក្នុងភូមិឫស្សីស្រុក ឃុំឈើទាល ស្រុកកៀនស្វាយ ខេត្តកណ្តាល។
ជនរងគ្រោះមានឈ្មោះពៅ លីហួភេទប្រុសអាយុ៦ឆ្នាំ សិស្ស មានទីលំនៅភូមិនិងឃុំកើតហេតុខាង។
ចំណែកអ្នកបើករថយន្តមិនស្គាល់អត្តសញ្ញាណ(រត់បាត់)បើករថយន្តម៉ាកNISSAN-DIESELពណ៍ខៀវ ពាក់ស្លាកលេខ3A-8743បើកបរពីឃំុឈើទាលទៅខណ្ឌ័ច្បារអំពៅ។
សមត្ថកិច្ចប៉ូលិសចរាចរបានឲ្យដឹងថាមុនកើតហេតុខាងលើក្មេងប្រុស(ជនរងគ្រោះ)បានជិះកង់ឆ្លងផ្លូវពីស្តាំទៅឆ្វេងក្នុងទិសដៅច្រាសទិសជាមួយរថយន្ត ខណៈពេលមកដល់ចំណុចកើតហេតុរថយន្តបើកលឿនចាប់ហ្វ្រាងមិនទាន់ក៍បានបុកទៅលើកង់របស់ជនរងគ្រោះដែលកំពុងជិះបណ្តាលឲ្យដួលទៅលើថ្នល់ហើយរថយន្តក៍កិនជនរងគ្រោះបណ្តាលឲ្យស្លាប់នៅនិងកន្លែងកើតហេតុតែម្តង។ចំណែកអ្នកបើកបរក្រោយជួបហេតុការណ៍គ្រោះថ្នាក់ចរាចររួចបើករថយន្តហួសបានប្រហែលមួយគីឡូម៉ែត្រក៍ឈប់រថយន្តចុះពីលើរថយន្តរត់គេចខ្លួនបាត់។
ក្រោយកើតហេតុកំលាំងជំនាញចរាចរចុះដល់កន្លែងកើតហេតុនាំយកមធ្យោបាយមកកាន់អធិការដ្ឋានបន្តនីតិវិធី៕
រាជធានីភ្នំពេញ៖យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយមបានឲ្យដឹងថា ភ្លៀងនឹងបន្តធ្លាក់ក្នុងកម្រិតពីមធ្យមទៅច្រើន ស្ទើរទូទាំងប្រទេសកម្ពុជាចាប់ពីថ្ងៃទី២៣ ដល់ ២៨ ខែឧសភា ឆ្នាំ២០១៦។ ទន្ទឹមនោះក្រសួងធនធានទឹកបានឲ្យដឹងថា នៅក្នុងអំឡុងពេលខាងលើនេះ រាជធានីភ្នំពេញ ក៏អាចទទួលទឹកភ្លៀង ពីមធ្យមទៅច្រើនផងដែរ ហើយសូមប្រជាពលរដ្ឋប្រុងប្រយ័ត្នបាតុភូតផ្គរ រន្ទះ និងខ្យល់កន្ត្រាក់៕ ខាងក្រោមសេចក្តីជូនដំណឹង របស់ក្រសួងធនធានទឹក៖
លោក ប៉ែនសុផល
បាត់ដំបងះ លោក ម៉េង លាង នាយការិយាល័យព្រហ្មទណ្ឌ័កំរិតស្រាលបានអោយដឹងថា ដោយអនុវត្តន៍តាមបទបញ្ជារបស់អគ្គស្នងការនគរបាលជាតិ កម្លាំងបង្ការបង្ក្រាបរបស់ស្នងការនគរបាលខេត្តបាត់ដំបងនៅយប់ថ្ងៃទី២២ ខែឧសភា ឆ្នាំ២០១៦នេះបានចុះប្រតិបត្តិការប្រមូលក្មេងទំនើងដើរលេងយប់ចំនួន៤១នាក់ដែលបង្កភាពស្មុគស្មាញដល់សង្គម។
ក្មេងទំនើងមុខសញ្ញាឃាត់ខ្លួននេះទាំងចំនួន៤១នាក់ មានប្រុស២៩នាក់ ស្រី៨នាក់និងខ្ទើយចំនួន៤នាក់ផងដែរជាក្មេងដើរយប់ដែលប្រមូលផ្តុះគ្នានៅតាមសួនច្បារបង្កអសន្តិសុខ ផឹកស៊ី ប្រើប្រាស់គ្រឿងញៀននិងបំរើផ្លូវភេទ។
នាយការិយាល័យព្រហ្មទណ្ឌកំរិតស្រាលបន្តថា ក្មេងទំនើងទាំង៤១នាក់នេះសុទ្ធសឹងជាកូន ចៅអ្នករស់នៅជុំវិញក្រុងបាត់ដំបង បន្ទាប់ពីការឃាត់ខ្លួនត្រូវបានអប់រំ សាកសួរនិងពិនិត្យសារធាតុញៀន ធ្វើកិច្ចសន្យាឈប់ប្រព្រឹត្តិហើយតម្រូវអោយអាណាព្យាបាលមកធានាអោយវិលត្រឡប់ទៅផ្ទះវិញ។
ក្នុងប្រតិបត្តិការខាងលើចាប់ផ្តើមនៅវេលាម៉ោង២ះ០០រំលងអាធ្រាត្រដល់ម៉ោង៤ះ០០ទៀបភ្លឺចូលរួមផ្ទាល់ដោយលោក នួន សាន ព្រះរាជអាជ្ញាអមសាលាដំបូងខេត្ត លោកស ថេត ស្នងការនគរបាលខេត្ត លោកស្នងការរង ជេត វណ្ណនី លោក ម៉េង លាង នាយការិ យាល័យព្រហ្មទណ្ឌ័កំរិតស្រាល និងលោក ឈឿង គឹមសុង ប្រធានក្រុមបង្ករបង្ក្រាបនៃស្នងការនគរបាលខេត្ត៕
អាមេរិក៖ប្រធានាធិបតីសហរដ្ឋអាមេរិក លោក ប៉ារ៉ាក់ អូបាម៉ា បានទៅដល់ទឹកដីប្រទេសវៀតណាមហើយ ដើម្បីបំពេញទស្សនកិច្ចរយៈពេល៣ថ្ងៃក្នុងប្រទេសកុម្មុយនីស្តមួយនេះ។ នេះបើយោងសារព័ត៌មាន CNN។
ប្រភពដដែលបញ្ជាក់ថា ការបំពេញទស្សនកិច្ចរបស់ប្រមុខដឹកនាំកំពូលអាមេរិកលើកនេះ ក្នុងគោលដៅពង្រឹងទំនាក់ទំនងជាមួយប្រទេសនៅអាស៊ី ទាំងសេដ្ឋកិច្ច និងពាណិជ្ជកម្ម៕
រាជធានីភ្នំពេញ៖បើតាមការចុះផ្សាយរបស់គេហទំព័រអគ្គស្នងការនគរបាលជាតិបានឲ្យដឹងថា នៅថ្ងៃទី២២ ខែឧសភា ឆ្នាំ២០១៦ម្សិលមិញនេះ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន១១លើក (យប់៨លើក) បណ្តាលឲ្យមនុស្សស្លាប់៣នាក់ រងរបួសធ្ងន់៩នាក់ និងរបួសស្រាល៣នាក់។
ប្រភពដដែលបន្តថា នៅក្នុងហេតុការណ៍គ្រោះថ្នាក់ចរាចរណ៍១១លើកនេះ បណ្តាលឲ្យខូចខាតយានយន្ត សរុបចំនួន២១គ្រឿង រួមមានម៉ូតូចំនួន១៦គ្រឿង, រថយន្តធុនតូចចំនួន៥គ្រឿង។ប្រភពបញ្ជាក់ថា មូលហេតុដែលបណ្តាលឲ្យ កើតមានករណីគ្រោះថ្នាក់ចរាចរណ៍ រួមមានល្មើសល្បឿន៥លើក, ស្រវឹង១លើក, មិនគោរពសិទ្ធិ២លើក, បត់គ្រោះថ្នាក់៣លើក ។ ក្នុងនោះអ្នកមិនពាក់មួកសុវត្ថិភាព ពេលគ្រោះថ្នាក់ចរាចរណ៍១១នាក់។
ជាមួយគ្នានោះនៅថ្ងៃទី២២ ខែឧសភា ឆ្នាំ២០១៦ម្សិលមិញនេះផងដែរលទ្ធិផលត្រួតពិនិត្យអនុវត្តច្បាប់ចរាចរណ៍ផ្លូវគោកឃើញថា យានយន្តដែលល្មើសសរុបទូទាំងប្រទេសមានចំនួន ២,៣៩៦គ្រឿង ក្នុងនោះបានធ្វើការអប់រំចំនួន ១,១៤៦គ្រឿង និងពិន័យសរុប ១,២៥០គ្រឿង៕
លោក ភី ធូ
មណ្ឌលគិរី៖ លោក ស្វាយ សំអ៊ាង អភិបាល នៃគណៈអភិបាលខេត្តមណ្ឌលគិរី បានមានប្រសាសន៍ថា បុណ្យវិសាខបូជា គឺជាបុណ្យយ៉ាងធំក្រៃលែង សម្រាប់ជាតិយើង ចំពោះអ្នកកាន់ព្រះពុទ្ធសាសនា ហើយនៅតាមប្រទេសមួយចំនួនលើសកលលោកដូចជាៈប្រទេសស្រីល័ង្កា ឥណ្ឌា នេប៉ាល ថៃ និងប្រទេសឡាវជាដើម ថ្នាក់ដឹកនាំ តែងតែនាំប្រជាពលរដ្ឋ ដែលជាអ្នកកាន់ព្រះពុទ្ធសាសនា ចូលរួមក្នុងបុណ្យវិសាខបូជា ដូចគ្នានេះដែរ។
លោកអភិបាលខេត្តបានថ្លៃងដូច្នេះ នៅក្នុងពិធីបុណ្យវិសាខបូជា នាព្រឹកថ្ងៃទី២០ ខែឧសភា ឆ្នាំ២០១៦នេះ នៅរង្វង់មូលគោព្រៃ ស្ថិតនៅក្នុងក្រុងសែនមនោរម្យ ខេត្តមណ្ឌលគីរី ដែលមានការចូលរួមពីអាជ្ញាធរខេត្ត ព្រះសង្ឃ កងកម្លាំងប្រដាប់អាវុធទាំង៣ប្រភេទ ប្រធាន អនុប្រធានមន្ទីរ អង្គភាពជុំវិញខេត្ត លោកគ្រូ អ្នកគ្រូ សិស្សានុសិស្ស និងប្រជាពលរដ្ឋប្រមាន ២៣០០នាក់។
មានប្រសាសន៍នាឱកាសនោះ លោកអភិបាលបានលើកឡើងថា ៖ពិធីបុណ្យនេះកន្លងមក នៅក្នុងខេត្តមណ្ឌលគីរី ឃើញមានតែព្រះសង្ឃចាស់ព្រឹទ្ធាចារ្យ និងពុទ្ធបរិសទ្ធ័ តែងតែធ្វើនៅតាមវត្តអារាម និងមានការចូលរួមតិចតួចណាស់ ដោយយុវជន និងពុទ្ធបរិសទ្ធ័មួយចំនួនតូច ហាក់បីដូចជាព្រងើយកន្តើយមិនយល់ច្បាស់អំពីខ្លឹមសារសំខាន់ នៃពិធីបុណ្យនេះឡើយ ហើយមិនចាប់អារម្មណ៍ថា ថ្ងៃ១៥កើត ខែពិសាខ គឺជាថ្ងៃបុណ្យវិសាខបូជា ជាអ្វីនោះផងទេ។
លោកអភិបាលខេត្តបានសំណូមពរដល់ប្រជាពលរដ្ឋ លោកគ្រូ អ្នកគ្រូ និងសិស្សានុសិស្ស មេត្តាចូលរួមគោរពប្រតិប្បត្តិ និងលើកស្ទួយនូវវិស័យព្រះពុទ្ធសាសនា ដែលជាសាសនារបស់រដ្ឋ អោយកាន់តែរុងរឿងឡើង សមជាសាសនា ដែលពិភពលោកគេស្ងប់ស្ងែង និងគោរពបូជា ។
លោកអភិបាលខេត្តក៏បានថ្លែង កោតសរសើរដល់ថ្នាក់ដឹកនាំព្រះសង្ឃ មន្ទីរធម្មការ និងសាសនាខេត្តមណ្ឌលគិរី ដែលបានសហការរៀបចំពិធីបុណ្យវិសាខបូជា សម្រាប់ ព.ស២៥៦០ នេះឡើងប្រកបដោយអធិកអធ័ម គួរជាទីមោទនភាព និងជ្រះថ្លានៅក្នុងព្រះពុទ្ធសាសនា ។
នៅក្នុងពិធីបុណ្យនេះដែរថ្នាក់ដឹកនាំខេត្ត ព្រះសង្ឃ កងកម្លាំងប្រដាប់អាវុធទាំង៣ប្រភេទ ប្រធាន អនុប្រធានមន្ទីរ អង្គភាពជុំវិញខេត្ត លោកគ្រូ អ្នកគ្រូ និងសិស្សានុសិស្ស ព្រមទាំងប្រជាពលរដ្ឋ បានធ្វើការដង្ហែចំនួនមួយជុំ និងរាប់បាតដល់ព្រះសង្ឃចំនួន៨៤អង្គ ជាកិច្ចបញ្ចប់កម្មវិធី៕
