បាងកក៖យោងតាមសារព័ត៌មានផ្សាយថា រដ្ឋាភិបាលយោធាថៃបានព្រមានថា ប្រសិនបើសេចក្តីព្រាងនៅរដ្ឋធម្មនុញ្ញថ្មីដាក់ធ្វើប្រជាមតិនៅថ្ងៃទី៧ខែសីហាខាងមុខមិនទទួលបានការគាំទ្រនោះ កាលបរិច្ឆេទនៃការបោះឆ្នោតថ្នាក់ជាតិសម្រាប់ឆ្នាំក្រោយអាចនឹងត្រូវលុបចោលវិញ។
ឧបនាយករដ្ឋមន្ត្រី លោក Prawit Wongsuwan ថ្លែងថា បើសិនជាសេចក្តីព្រាងរដ្ឋធម្មនុញ្ញមិនទទួលការគាំទ្រពេលធ្វើប្រជាមតិនោះ នាយករដ្ឋមន្ត្រី Prayut Chan-o-cha នឹងមិនដាក់ចេញកាលបរិច្ឆេទថ្ងៃបោះឆ្នោតទេ ហើយក្រុមយោធានៅតែបន្តគ្រប់គ្រងអំណាច ដើម្បីបន្តរៀបចំរដ្ឋធម្មនុញ្ញមួយឲ្យបាន។
លោក Prawit ថ្លែងថា នៅពេលដែលសេចក្តីព្រាងរដ្ឋធម្មនុញ្ញនៅពេលបោះឆ្នោតប្រជាមតិមិនទទួលបានការគាំទ្រនោះ នាយករដ្ឋមន្ត្រី Prayut នឹងប្រគល់អំណាចរបស់លោកជាប្រធានក្រុមប្រឹក្សាជាតិដើម្បីសន្តិភាព និងសណ្តាប់ធ្នាប់ ដើម្បីកំណត់គណៈកម្មការថ្មីព្រាងរដ្ឋធម្មនុញ្ញមួយទៀត។
គួរបញ្ជាក់ថា តាមគម្រោងរដ្ឋាភិបាលយោធាថៃធ្លាប់សន្យាថានឹងរៀបចំការបោះឆ្នោតថ្នាក់ជាតិនៅខែកញ្ញាឆ្នាំ២០១៧ ប៉ុន្តែដោយសារភាពចម្រូងចម្រាស់នៃសេចក្តីព្រាងរដ្ឋធម្មនុញ្ញនោះកាលបរិច្ឆេទនៃការបោះឆ្នោតថ្មីនៅមិនទាន់អាចយកជាការបាននៅឡើយ៕
រាជធានីភ្នំពេញ៖យោងតាមការចុះផ្សាយរបស់គេហទំព័រអគ្គស្នងការនគរបាលជាតិបានឲ្យដឹងថា នៅថ្ងៃទី១៨ ខែឧសភា ឆ្នាំ២០១៦ម្សិលមិញ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន៦លើក(យប់១លើក) បណ្តាលឲ្យមនុស្សស្លាប់ម្នាក់ រងរបួសធ្ងន់៤នាក់ និងរបួសស្រាល៦នាក់។
ប្រភពដដែលបន្តថា នៅក្នុងហេតុការណ៍គ្រោះថ្នាក់ចរាចរណ៍៦លើកនេះ បណ្តាលឲ្យខូចខាតយានយន្ត សរុបចំនួន១២គ្រឿង រួមមានម៉ូតូចំនួន៩គ្រឿង, រថយន្តធុនតូចចំនួន៣គ្រឿង។ ប្រភខាងលើបញ្ជាក់ថា មូលហេតុដែលបណ្តាលឲ្យកើត មានករណីគ្រោះថ្នាក់ចរាចរណ៍ រួមមាន ល្មើសល្បឿន១លើក, ស្រវឹង២លើក, មិនប្រកាន់ស្តាំ៣លើក។ ក្នុងនោះអ្នកមិនពាក់មួកសុវត្ថិភាព ពេលគ្រោះថ្នាក់ចរាចរណ៍ ៥នាក់។
ជាមួយគ្នានោះម្សិលមិញនេះលទ្ធិផលត្រួតពិនិត្យអនុវត្តច្បាប់ចរាចរណ៍ផ្លូវគោកឃើញថា យានយន្តដែលល្មើសសរុបទូទាំងប្រទេសមាន ចំនួន ៤,៣១៨គ្រឿង ក្នុងនោះបានធ្វើការអប់រំចំនួន ១,៧១៩គ្រឿង និងពិន័យសរុប ២,៥៩៩គ្រឿង៕
ហាណូយ៖តាមសារព័ត៌មានចិនស៊ិនហួរបានផ្សាយថា ក្រុមអ្នកជំនាញវៀតណាមបានបាញ់បង្ហោះផ្កាយរណបដែលផលិតឡើងដោយក្រុមវិស្វករវៀតណាមសុទ្ធសាធជាលើកដំបូងនៅទីក្រុង Alice Springs ប្រទេសអូស្ត្រាលីប្រកកដោយជោគជ័យយ៉ាងធំធេង។
ផ្កាយរណបដំបូងរបស់វៀតណាមបានហោះឡើងទៅកាន់រយៈកម្ពស់ ២៥ គីឡូម៉ែត្រ ដែលវានឹងដើរតួនាទីជា ផ្កាយរណបគាំទ្រប្រព័ន្ធទូរគមនាគមន៍។ លោកបណ្ឌិត Vu Quoc Huy នៃសកលវិទ្យាល័យវិទ្យាសាស្ត្រ និងបច្ចេកវិទ្យាវៀតណាមបានថ្លែងដូច្នេះថា វាជាលើកដំបូង ហើយដែលវៀតណាមមានវត្ថុអវកាសដែលអាចហោះ ក្នុងរយៈកម្ពស់ ២៥គីឡូម៉ែត្រ។ វាគឺជាជោគជ័យធំធេងណាស់សម្រាប់ឧស្សាកម្មផ្នែកទីអវកាសរបស់វៀតណាម។ ជាមួយគ្នានោះលោកបណ្ឌិតបានលើកឡើងថា នេះគឺជាជំហានឆ្ពោះទៅមុខដ៏ធំធេងសម្រាប់ការឈានជើងប្រឡូកក្នុងវិស័យឧស្សាហកម្មផ្នែកអវកាសរបស់ប្រទេសអាស៊ានមួយនេះ៕
រាជធានីភ្នំពេញ៖ជនជាតិវៀតណាម៩នាក់បន្ថែមទៀតត្រូវបានកម្លាំងនគរបាលអន្ដោប្រវេសន៍នាយកដ្ឋានស៊ើបអង្កេត និងអនុវត្តនីតិវិធីឃាត់ខ្លួនពីបទលួចឆ្លងដែនចូលមកស្នាក់នៅខុសច្បាប់។ ការឃាត់នេះខ្លួននេះធ្វើឡើងនៅរសៀលថ្ងៃទី១៨ ខែឧសភា ឆ្នាំ២០១៦នេះ នៅក្នុងសង្កាត់ឃ្មួញ ខណ្ឌពោធិ៍សែនជ័យ។
ឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី បានឲ្យដឹងថា ការចុះត្រួតពិនិត្យដោយមានការសហការ ជាមួយការិយាល័យអន្តោប្រវេសន៍ នៃស្នងការដ្ឋាននគរបាលរាជធានីភ្នំពេញ។ លោកបន្តថា ក្នុងនោះកម្លាំងរបស់យើងបានឃាត់ខ្លូនជនជាតិវៀតណាម៩នាក់ ក្នុងនោះស្រី៣នាក់ ពីបទលួចឆ្លងដែនចូលមកស្នាក់នៅខុសច្បាប់។
លោកឧត្តមសេនីយ៍បញ្ជាក់ថា ក្រោយពីធ្វើការឃាត់ខ្លួន ជនជាតិវៀតណាមទាំងអស់នេះ ត្រូវបានបញ្ជូនខ្លូនទៅកាន់ នាយកដ្ឋានអន្ដោប្រវេសន៍ ដើម្បីចាត់ការតាមនីតិវិធី៕
រាជធានីភ្នំពេញ៖នៅថ្ងៃទី១៨ ខែឧសភា ឆ្នាំ២០១៦នេះ សមត្ថកិច្ចបានដីកាលើកទី២កោះហៅ លោក កឹម សុខា ប្រធានស្តីទីគណបក្សសង្គ្រោះជាតិ ទៅបិទដល់មុខផ្ទះរបស់លោកស្ថិតនៅផ្ទះលេខ៩៧ ផ្លូវ៣១៣ សង្កាត់បឹងកក់២ ខណ្ឌទួលគោក តែម្តង។
គួរបញ្ជាក់ថា ព្រះរាជអាជ្ញារង លោក សៀង សុខ នៅថ្ងៃទី១៨ ខែឧសភា ឆ្នាំ២០១៦នេះ បានចេញដីកាលើកទី២កោះហៅលោក កឹម សុខា ប្រធានស្តីទីគណបក្សសង្គ្រោះជាតិឲ្យចូលបំភ្លឺនៅថ្ងៃទី២៦ ខែ ឧសភា ឆ្នាំ២០១៦ ខាងមុខ ក្រោមបទចោទប្រកាន់ពីបទសញ្ចារកម្ម៕
ខេត្តបាត់ដំបង៖សាកសពបុរសម្នាក់ដែលគេប្រទះឃើញកាលពីម៉ោង៦ និង៥០នាទីថ្ងៃទី១៨ ខែឧសភា ឆ្នាំ២០១៦នេះ ត្រង់ចំណុចក្នុងបរិវេណវត្តគរ សង្កាត់វត្តគរ ក្រុងបាត់ដំបង ខេត្តបាត់ដំបងនៅមិនទាន់មានការអះអាងនៅឡើយពីក្រុមគ្រួសារសាច់ញាតិ។ អ្នកស្រុកអះអាងថា ជនរងគ្រោះជាមនុស្សមិនស្គាល់អត្តសញ្ញាណ ភេទប្រុស មានអាយុប្រហាក់ប្រហែល៣០ឆ្នាំ។
ឆ្លងតាមការពិនិត្យរបស់សមត្ថកិច្ចបានអោយដឹងថា នៅលើដងខ្លួនសាកសពមានស្លាកស្នាមរបួសចាស់ចំនួន៦កន្លែង និងមានស្នាមដេរនៅលើកំភួនដៃខាងឆ្វេង រីឯត្រង់រន្ធច្រមុះទាំងសងខាងមានហូរឈាមយ៉ាងច្រើន ប៉ុន្តែការស្លាប់នេះយោងតាមការសន្និដ្ឋានជំហានដំបូងជនរងគ្រោះមានជំងឺប្រចាំកាយផឹកស្រាទើបបណ្តាលអោយស្លាប់៕
សុខភាព៖តែគឺជាដំណាំរុក្ខជាតិម្យ៉ាងដែលមានរសជាតិឈ្ងុយឆ្ងាញ់ ផឹកទៅជួយឲ្យយើងមានអារម្មណ៍ស្រស់ថ្លា បំបាត់ភាពងងុយដែក និងធ្វើឲ្យយើងមានសុខភាពល្អផងដែរ។ ប៉ុន្ដែតាមការស្រាវជ្រាវមួយបានឲ្យដឹងថា បុរសផឹកទឹកតែក្នុងមួយថ្ងៃចាប់ពី ៧ កែវឡើងទៅ អាចប្រឈមមុខ រហូតដល់ ៥០ ភាគរយនៃការកើតជម្ងឺមហារីកក្រពេញ (ឈ្មោល)។
តាមការសិក្សាស្រាវជ្រាវរបស់អ្នកវិទ្យាសាស្ដ្រ បានបង្ហាញថាមានបុរសច្រើនជាង ៦,០០០ នាក់បានកើតជម្ងឺមហារីកបន្ទាប់ពីការស្រាវជ្រាវឃើញថា ភាគច្រើននៃបុរសទាំនោះបានផឹកតែ យ៉ាងហោចណាស់ ៧ កែវក្នុងមួយថ្ងៃ។
តាមកាសិក្សាកន្លងមកបានឲ្យដឹងថា បុរសមានអាយុចាប់ពី ២១- ៧៥ ឆ្នាំអាចប្រឈមមុខនឹងកើតជម្ងឺមហារីក បេះដូង ទឹកនោមផ្អែម និងជម្ងឺផ្សេងៗទៀតប្រសិនបើពួកគេមានទំលាប់ ផឹកតែ កាហ្វេ ជាតិអាល់កុល និងពិសារបារីច្រើនហួសកំណត់៕
រាជធានីភ្នំពេញ៖សាលាដំបូងរាជធានីបានចេញដីកាលើកទី២កោះហៅលោក កឹម សុខា ប្រធានស្តីទីគណបក្សសង្គ្រោះជាតិឲ្យចូលទៅបំភ្លឺលើដំណើររឿងពាក់ព័ន្ធនឹងអំពើសញ្ចាកម្ម នៅថ្ងៃទី២៦ ខែឧសភា ឆ្នាំ២០១៦ វេលាម៉ោង ៩ និង០០នាទីព្រឹក។
គួរបញ្ជាក់ថា សាលាដំបូងរាជធានីភ្នំពេញបានចេញដីកាកោះហៅលោក កឹម សុខា ម្តងរួចមកហើយកាលពីថ្ងៃទី០៦ ខែឧសភា ឲ្យចូលទៅបំភ្លឺលើសំណុំរឿងសញ្ចាកម្មនៅថ្ងៃទី១៧ ខែឧសភា ម្សិលមិញនេះ តែលោក កឹម សុខា មិនបានចូលខ្លួនតាមដីកាកោះនេះឡើយ៕
បាល់ទាត់៖តាមប្រភពព័ត៌មានមួយបានឲ្យដឹងថា ក្រុម Lyon បានបដិសេធចំពោះការដេញថ្លៃរបស់ក្រុម West Ham United ទៅលើខ្សែប្រយុទ្ធសញ្ជាតិបារាំង Alexandre Lacazette ក្នុងតម្លៃខ្លួន៣១លានផោននោះ។
យោងតាមការផ្សាយរបស់ទូរទស្សន៍ Sky Sports News បានឲ្យដឹងថា ក្លិប Lyon បានច្រានចោលនូវសំណើសរបស់ក្រុមញញួរធំ West Ham សម្រាប់ការចង់បានកីឡាករសញ្ជាតិបារាំងរូបនេះ ខណៈពេលដែល Lacazette ត្រូវបានផ្សារភ្ជាប់ជាមួយនឹងក្លិប Tottenham Hotspur អស់រយៈពេលជាហូរណាស់មកហើយនោះ។Lacazette បានក្លាយជា ខ្សែប្រយុទ្ធ ជាងគេបំផុតនៅក្នុងប្រទេសបារាំងក្នុងការបង្ហាញខ្លួន ២០លើសម្រាប់ក្លិបរបស់គាត់នៅរដូវកាលនេះ ។
លោក Jean-Michel Aulas ប្រធានក្លិបរបស់ Lyon បានបញ្ជាក់ថា ពីមុនគាត់ចង់រក្សាកីឡាកររូបនេះឲ្យនៅក្នុងក្លិបរហូត ប៉ុន្តែបច្ចុប្បន្ននេះ កំពុងតែមានក្រុមជាច្រើនដូចជា Liverpool និង Everton កំពុងតែបើកការ ស៊ើបការណ៍ចំពោះកីឡាកររូបនេះ ក្លិបប្រហែលអាចនឹងលក់ ខ្សែប្រយុទ្ធមួយនេះនៅពេលទីផ្សារកីឡាករបើកនារដូវក្តៅខាងមុខនេះ ៕
ខេត្តកំពង់ស្ពឺ៖យោងតាមសេក្តីរាយការណ៍បានឲ្យដឹងថា ខណៈនេះអគ្គិភ័យដ៏សន្ធោសន្ធៅមួយបានឆាបឆេះរោងចក្រកាត់ដេរសម្លៀកមួយកន្លែង នៅក្នុងសង្កាត់កណ្តោលដុំ ក្រុងច្បារមន ខេត្តកំពង់ស្ពឺ។ អគ្គិភ័យនេះបានកើតឡើងនៅម៉ោងប្រមាណ ១១៖៤០នាទីព្រឹកថ្ងៃទី១៨ ខែឧសភា ឆ្នាំ២០១៦។
សេចក្តីរាយការណ៍ពីកន្លែងកើតហេតុ បានឲ្យដឹងថា អាជ្ញាធរ រួមនិងកម្លាំងពន្លត់អគ្គិភ័យ បាននិងកំពុងជួយអន្តរាគមន៍បាញ់ទឹកពន្លត់។ មិនទាន់មានការបញ្ជាក់ឈ្មោះរោងចក្រ ដែលកំពុងឆាបឆេះនេះនៅឡើយទេ៕
ញូវយ៉ក៖បេក្ខជនប្រធានាធិបតីដ៏លេចធ្លោមកពីគណបក្សសាធារណរដ្ឋ លោក Donald Trump បាននិយាយថា លោកមានឆន្ទៈជួបជាមួយមេដឹកនាំកូរ៉េខាងជើង ដើម្បីពិភាក្សាពីកម្មវិធីនុយក្លេអ៊ែររបស់ក្រុងព្យុងយ៉ាង។ នេះបើយោងតាមការផ្សាយរបស់សារព័ត៌មាន BBC។
មហាសេដ្ឋីអាមេរិករូបនេះនិយាយថា លោកនឹងនិយាយទៅមេដឹកនាំកូរ៉េខាងជើងលោក គីម ជុងអ៊ុន ហើយលោកនឹងមិនមានបញ្ហាអ្វីក្នុងការនិយាយទៅលោក គីម នោះឡើយ។ ជាមួយគ្នានោះលោកក៏មានបំណងលើកយកបញ្ហានៃការប្រែប្រួលអាកាសធាតុ មកពិភាក្សាជាមួយលោក គីម ជុងអ៊ុន ប្រសិនបើលោកជាប់ឆ្នោតក្លាយជាប្រធានាធិបតីអាមេរិក។ ការថ្លែងរបស់លោក Trump ខាងលើនេះបានធ្វើឡើងនៅក្នុងបទសម្ភាសន៍ជាមួយ Reuters។
បន្ថែមពីនេះទៀត លោក Trump ក៏មានបំណងលុបចោលការយល់ព្រមរបស់អាមេរិក ដែលបានឲ្យរុស្ស៊ី គ្រប់គ្រងតំបន់ភាគខាងកើត អ៊ុយក្រែននោះផងដែរ ព្រោះវាបានបង្កផលប៉ះពាល់ខ្លាំងណាស់ដល់កំណែទម្រង់ លើវិស័យហិរញ្ញវត្ថុរបស់អាមេរិក៕
បាល់ទាត់៖ខ្សែបម្រើរបស់ក្រុម Schalke 04 គឺកីឡាករ Leroy Sane ត្រូវបានគេរំពឹងទុកថា គឺជាគោលដៅដ៏ធំសម្រាប់លោក Pep Guardiola ក្នុងការទិញយកមករូមក្រុមពេលដែលគាត់មកដឹកនាំក្រុមមេឃខៀវ Manchester City នារដូវកាលក្រោយនេះ។
យោងតាមការចុះផ្សាយរបស់ The Mirror បានឲ្យដឹងថា បច្ចុប្បន្ននេះក្រុមបិសាចក្រហម Manchester United ក៏កំពុងការមនាចាប់អារម្មណ៍ទៅលើខ្សែបម្រើសញ្ជាតិអាល្លឺម៉ង់ ខណៈដែលក្រុមមេខខៀវ Man City កពុងតែខិតខំប្រឹងប្រែងក្នុងការចុះកិច្ចស្យាជាមួយ កីឡាកររូបនេះដើម្បីមករួមក្រុមនារដូវក្តៅខាងមុខនេះ។
ខ្សែបម្រើវ័យ២០រូបនេះ បច្ចុប្បន្នកំពុងស្ថិតនៅក្នុងបញ្ជីឈ្មោះរបស់ក្រុមជម្រើសជាតិអាល្លឺម៉ង់សម្រាប់ការប្រកួត Euro 2016 នៅប្រទេសបារាំង ផងដែរ ហើយកីឡាកររូបនេះ កំពុងតែមានឈ្មោះបោសសំលេងនៅក្នុងក្របខ័ណ្ឌ Bundesliga។ក្រុម Schalke ប្រកាសនៅតម្លៃខ្លួនរបស់កីឡាកររូបនេះ ៤០លានផោន បើប្រសិនក្លិបមួយណាចង់បាន។
គួរបញ្ជាក់ថា Leroy Sane ស៊ុតបញ្ចូលទីបានចំនួន៩គ្រាប់នៅក្នុងរដូវកាលនេះ ហើយនិងនៅចុងសប្តាហ៍នេះក៏ឲ្យក្រុមយកឈ្នះ Hoffenheim ដោយលទ្ធ ៤-១ ៕
ខេត្តបាត់ដំបង៖បុរសអ្នកឃ្វាលគោលម្នាក់ត្រូវបានរន្ទះបាញ់ស្លាប់ គ្រាដែលកំពុងឃ្វាលគោលនៅកណ្តាលវាលស្រែ ខណៈមេឃកំពុងធ្លាក់ភ្លៀងខ្លាំង លាយឡំនឹងផ្គររន្ទះ។ ហេតុការណ៍នេះកើតឡើងកាលពីវេលាម៉ោងប្រមាណ៤ និង៣០នាទី ថ្ងៃទី១៧ ខែឧសភា ឆ្នាំ២០១៦ ម្សិលមិញនេះ នៅចំណុចបឹងជីពោរ ក្នុងក្រុមទី០៤ ភូមិស្តីក្រោម ឃុំព្រែកហ្លួង ស្រុកឯកភ្នំ ខេត្តបាត់ដំបង។
ជនរងគ្រោះរន្ទះបាញ់ស្លាប់មានឈ្មោះ សល់ ស្ទាំង ភេទប្រុស អាយុ៥៦ រស់នៅភូមិសាស្ត្រកន្លែងកើតហេតុ។
គួរបញ្ជាក់ថា កាលពីម្សិលមិញតំបន់ជាច្រើនក្នុងខេត្តបាត់ដំបង គ្របដណ្តប់យ៉ាងជោកជាំដោយទឹកភ្លៀង ខ្យល់ និងផ្គររន្ទះគួរអោយភ័យខ្លាច៕
អាមេរិក៖អនុរដ្ឋមន្ត្រីរតនាគារជាតិអាមេរិកលោក Adam Szubin បានថ្លែងថា សហរដ្ឋអាមេរិកនឹងលើកលែងទណ្ឌកម្មសេដ្ឋកិច្ចលើប្រទេសមីយ៉ាន់ម៉ា ដែលដឹកនាំដោយរដ្ឋាភិបាលស៊ីវិលមួយរបស់លោកស្រី អ៊ុង សានស៊ូជី។ នេះបើយោងតាមសារព័ត៌មាន Channel News Asiaនៅមុននេះបន្តិច។
លោក Szubin បន្តថា ការផ្លាស់ប្ដូរអំណាចទៅឲ្យរដ្ឋាភិបាលស៊ីវិលដែលដឹកនាំដោយលោកស្រី អ៊ុង សានស៊ូជី និងគណបក្សរបស់លោកស្រីកាលពីឆ្នាំមុននោះគឺជាចំណុចរបត់ប្រវត្តិសាស្ត្រ។ លោកបញ្ជាក់ថា បច្ចុប្បន្ននេះអាមេរិកក៏បានបង្ហាញនូវការគាំទ្រយ៉ាងខ្លាំងដល់ដំណើររីកចម្រើនខាងនយោបាយ និងសេដ្ឋកិច្ចក្នុងប្រទេសមីយ៉ាន់ម៉ាផងដែរ។
គួរបញ្ជាក់ថា សេចក្ដីសម្រេចនេះក៏បានលុបចោលទណ្ឌកម្មទៅលើធនាគារបី ដែលបើកផ្លូវឲ្យពលរដ្ឋអាមេរិកអាចធ្វើពាណិជ្ជកម្មតាមធនាគារណាមួយនៅក្នុងប្រទេសនេះ៕
ខេត្តបន្ទាយមានជ័យ៖នេះជាលើកទី១ហើយ ដែលអាជ្ញាធរថៃ ខេត្តឆាក់ឆឺងសៅបានដាក់បញ្ជាឲ្យកម្លាំង នគរបាលខេត្តឆាក់ឆឺងសៅ ប្រមូលពលករខ្មែរដែលខុសច្បាប់ដែលកំពុងធ្វើការនៅទីនោះ យកមកអប់រំនិងត្រៀមបញ្ជូនមកប្រទេសកម្ពុជានាពេលឆាប់ៗនេះ។
កាលពីថ្ងៃទី១៣ ខែឧសភា ឆ្នាំ២០១៦ សមត្ថកិច្ចថៃ បានប្រមូល ពលករខ្មែរខុសច្បាប់ ក្នុងខេត្តឆាក់ឆឺងសៅ ដោយបានដាក់ពង្រាយកម្លាំង ចាប់គ្រប់រថយន្ត ដែលដឹកពលករ ខ្មែរចូលមកក្នុង ប្រទេសថៃ ដោយខុសច្បាប់។ ជាលទ្ធផល សមត្ថកិច្ចថៃ ចាប់បានពលករខ្មែរ ចំនួន៣០០នាក់ និងជនជាតិថៃ ចំនួន១០នាក់ ដែលទិសដៅ របស់ពួកគេគឺ ទៅធ្វើការនៅ ទីក្រុងបាងកក ខេត្តប្រាធុម ថានី និងខេត្តជិតខាង ក្បែរៗនោះផងដែរ។ យ៉ាងណាក៏ដោយ ក្នុងប្រតិបត្តិការ ចាប់ពលករខ្មែរ ខុសច្បាប់នេះ គឺជាបន្ទុកមួយ ដែលអាជ្ញាធរ មានសមត្ថកិច្ចថៃ ត្រូវតែទទួល ដោះស្រាយ បាយទឹក ចំណីអាហារ ឲ្យពួកគេហូបចុក បានត្រឹមត្រូវ និងត្រៀមបញ្ជូនពួកគេ មកកម្ពុជាវិញ ដើម្បីបំពេញ បែបបទឲ្យបានត្រឹមត្រូវតាមច្បាប់ ដោយមិនអនុញ្ញាតឲ្យ ពលករទាំងនោះធ្វើដំណើរតាមច្រករបៀងលួចចូលដីថៃបន្តទៀតឡើយ។
គួរបញ្ជាក់ផងដែរថា ក្រោយពីធ្វើរដ្ឋប្រហារនៅប្រទេសថៃកន្លងទៅ ក្រោមអំណាចររបបទាហានថៃ បានបើកយុទ្ធនាការចាប់បញ្ជូនពលករខ្មែរទាំងស្របច្បាប់ និងខុសមកស្រុកកំណើតវិញរហូតមានចំនួន ជាង ២០ម៉ឺនអ្នកឯណោះ។ ដោយឡែក នៅថ្ងៃទី១៣ ខែឧសភា ឆ្នាំ២០១៦ នេះ គេបានសង្កេតឃើញប្រតិបត្តិការមួយរបស់ទាហានថៃ ដែលបានធ្វើសកម្មភាពចាប់ពលករខ្មែរតាមដងផ្លូវរហូតមានចំនួន៣០០នាក់ឯណោះផងដែរ ហើយត្រៀមបញ្ជូនមកស្រុកកំណើតវិញ បន្ទាប់ពីធ្វើការអប់រំរួចហើយនោះ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
