All posts by មេគង្គ ប៉ុស្តិ៍

ឯកឧត្តម គន់ គីម ស្នើឲ្យអាជ្ញាធរ និងស្ថាប័នពាក់ព័ន្ធគិតគូរសុខទុក្ខរបស់អតីតយុទ្ធជន

May 18, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តក្រចេះ៖ឯកឧត្តម នាយឧត្តមសេនីយ៍បណ្ឌិត គន់ គីម អគ្គមេបញ្ជាការរង និងជានាយសេនាធិការចម្រុះ នៃកងយោធពលខេមរភូមិន្ទ និងជាអគ្គលេខាធិការនៃគណៈអចិន្ត្រៃយ៍គណៈកម្មាធិការកណ្ដាលសមាគមអតីតយុទ្ធកម្ពុជា បានស្នើឲ្យអាជ្ញាធរ មន្ទីរ អង្គភាព និងស្ថាប័នពាក់ព័ន្ធគ្រប់លំដាប់ថ្នាក់ ត្រូវយកចិត្តទុកដាក់គិតគូចំពោះសុខទុក្ខ និងការរស់នៅប្រចាំថ្ងៃរបស់បងប្អូនអតីតយុទ្ធ ដោយមិនត្រូវបោះបង់ ឬ ទុកពួកគាត់ចោលឡើយ។
ឯកឧត្តម បានថ្លែងយ៉ាងដូច្នេះ គឺធ្វើឡើងនៅក្នុងពិធីជួបសំណេះសំណាលជាមួយសមាជិកអតីតយុទ្ធកម្ពុជា ខេត្តក្រចេះ ប្រមាណជា ២រយនាក់ នៅសាលបហោស្រពខេត្តកាលពីរសៀលថ្ងៃទី១៧ ខែឧសភា ឆ្នាំ២០១៦ ដោយមានការអញ្ចើញចូលរួមជាគណអធិបតីពីឯកឧត្តម នូ ភឿង ប្រធានក្រុមប្រឹក្សាខេត្តក្រចេះ លោក អភិបាលរងខេត្តស្ដីទី ព្រមទាំងមន្ត្រីរាជការ កងកម្លាំងប្រដាប់អាវុធ និងអាជ្ញាធរមូលដ្ឋានគ្រប់លំដាប់ថ្នាក់។
ឯកឧត្តម នាយឧត្តមសេនីយ៍បណ្ឌិត គន់ គីម បានមានប្រសាសន៍បន្តថា កិច្ចដំណើរការ នៃការបង្កើតសមាគមនអតីតយុទ្ធជនកម្ពុជានេះ បានចាប់ផ្ដើមរយៈពេល៦ខែមកហើយ ដោយកងយោធពលខេមរភូមិន្ទ ជាអគ្គលេខាធិការនៃគណៈអចិន្ត្រៃយ៍គណៈកម្មាធិការកណ្ដាលសមាគមអតីតយុទ្ធកម្ពុជា ព្រោះវាមានភាពងាយស្រួលក្នុងការគ្រប់គ្រង និងនៅជិតបំផុតតាំងពីថ្នាក់ខេត្តរហូតដល់ថ្នាក់មូលដ្ឋាន។
ជាមួយគ្នានោះ ឯកឧត្តម ក៏បានពាំនាំនូវប្រសាសន៍ផ្ដាំផ្ញើរសាកសួរសុខទុក្ខពីសំណាក់សម្ដេចអគ្គមហាសេនាបតីតេជោ ហ៊ុន សែន ប្រធានសមាគមន អតីតយុទ្ធកម្ពុជា ដែលជានិច្ចកាល សម្ដេចតែងតែនឹករលឹក និងគិតគូយកចិត្តទុក្ខដាក់ខ្ពស់ចំពោះសុខទុក្ខរបស់ប្រជាពលរដ្ឋ ដោយមិនទុកឲ្យប្រជាជនណាកម្នាក់ដេកស្លាប់ដោយអត់អាហារនោះឡើយ។
ឯកឧត្តម ក៏បានធ្វើកោតសរសើរដល់ សមាគមនអតីតយុទ្ធជនកម្ពុជា ខេត្តក្រចេះ ដែលមានឯកឧត្តម អភិបាលខេត្តជាប្រធាន មន្ទីរសង្គមកិច្ច មេបញ្ជាការកងរាជអាវុធហត្ថខេត្ត ស្នងការនគរបាលខេត្ត មេបញ្ជាការប្រតិបត្តិការសឹករងខេត្ត ជាលេខាធិការ ក្នុងរយៈពេលកន្លងទៅ បានជួយដោះស្រាយ និងជួយសម្រួលដល់ជីវភាពរបស់សមាជិកសមាគមនអតីតយុទ្ធ ដែលមានជីវភាពខ្វះខាតទីទល់ក្រ និងជួបការលំបាកបានទាន់ពេលវេលា។
ឯកឧត្តម នាយឧត្តមសេនីយ៍បណ្ឌិត គន់ គីម បានមានប្រសាសន៍សង្កត់ធ្ងន់ថា អាជ្ញាធរ មន្ទីរ អង្គភាព និងស្ថាប័នពាក់ព័ន្ធគ្រប់លំដាប់ថ្នាក់ ត្រូវធ្វើឲ្យបាននូវប័ណ្ណក្រីក្រជូនក្រុមគ្រួសារអតីតយុទ្ធកម្ពុជាឲ្យបានគ្រប់ៗគ្នា ជាពិសេសមន្ទីរពេទ្យបង្អែកខេត្ត ស្រុក និងប៉ុស្ដិ៍មណ្ឌលសុខភាពទាំងអស់ ត្រូវយកចិត្តទុកដាក់ពិនិត្យ និងព្យាបាលជំងឺ ជូនអតីតយុទ្ធជន និងគ្រួសារអតីតយុទ្ធជន ដោយមិនបាប់យកប្រាក់។
ជាមួយគ្នានោះដែរ ឯកឧត្តម នាយឧត្តមសេនីយ៍បណ្ឌិត គន់ គីម អគ្គមេបញ្ជាការរង និងជានាយសេនាធិការចម្រុះ នៃកងយោធពលខេមរភូមិន្ទ និងជាអគ្គលេខាធិការនៃគណៈអចិន្ត្រៃយ៍គណៈកម្មាធិការកណ្ដាលសមាគមអតីតយុទ្ធកម្ពុជា បានអញ្ចើញប្រគល់អំណោយជានិមិត្តរូបដល់អតីតយុទ្ធជន ចំនួន២០០នាក់ ក្នុងម្នាក់ៗទទួលបានថវិការ៥ម៉ឺនរៀល សារ៉ុង១ និងមី ១កេសផងដែរ៕ដោយ ប្រុស វិធិន

ឃាត់ខ្លួនជនសង្ស័យ២នាក់ និងថ្នាំញៀនជាង១ពានគ្រាប់

May 18, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តស្ទឹងត្រែង៖កំលាំងជំនាញកងរាជអាវុធហត្ថខេត្តស្ទឹងត្រែងបានបង្ក្រាបករណីជួញដូរគ្រឿងញៀន ដោយឃាត់ខ្លួនជនសង្ស័យ២នាក់ ដកហូតថ្នាំញៀនចំនួន១៩៩៧គ្រាប់។ ការបង្ក្រាបនេះធ្វើឡើងនៅម៉ោង១៦ និង១៥នាទីរសៀលថ្ងៃទី១៧ ខែឧសភា ឆ្នាំ២០១៦ ត្រង់ចំណុចភូមិខាំផាន់ សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង។
មន្ត្រីអាវុធហត្ថខេត្តស្ទឹងត្រែងបានបញ្ជាក់ថា ជនសង្ស័យទាំង២នាក់ រួមានទី១-ឈ្មោះឡយហួង ហានសឹគ ភេទប្រុស អាយុ១៨ជាតិឡាវ មុខរបរធ្វើស្រែ និង២-ឈ្មោះ ស៊ុផន វង់សាឡាត ភេទប្រុសអាយុ១៨ ជាតិឡាវ មុខរបរទាហ៊ានព្រំដែន ដោយអ្នកទាំង២នាក់ រស់នៅភូមិហួយផៃ ស្រុកស៊ូភូម៉ាក ខេត្តចំប៉ាសាក់ ប្រទេសឡាវ។
មន្ត្រីអាវុធហត្ថដដែលបានញ្ជាក់ទៀតថា វត្ថុតាងដែលចាប់បានរួមមាន ថ្នាំញៀន wy ១៩៩៧គ្រាប់ ម៉ូតូ១ ទូរស័ព្ទ១ ក្បាលគ្រាប់ AK47 ចំនួន១៦គ្រាប់ និងរំសេវកន្លះកូនដប។ បច្ចុប្បន្នកម្លាំងជំនាញកំពុងកសាងសំណុំរឿង បញ្ជូនតាមនីតិវិធី៕

ឃាត់ខ្លួនជនបរទេស៧៧នាក់នៅការដ្ឋានសំណង់ចិនក្នុងខណ្ឌ៧មករា

May 18, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖កម្លាំងនគរបាលនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍បានឃាត់ខ្លួនបរទេសចំនួន៧៧នាក់ គ្រាដែលចុះត្រួតពិនិត្យក្នុងការដ្ឋានសំណង់ចិនឈ្មោះ Hong Lien Group ។ ការចុះធ្វើរដ្ឋបាលនេះធ្វើឡើងកាលពីរសៀលថ្ងៃទី១៧ ខែឧសភា ឆ្នាំ២០១៦ ស្ថិតនៅដីឡូដ៍មួយតាមបណ្ដោយផ្លួវ១៣៤ សង្កាត់មិត្តភាព ខណ្ឌ៧មករា រាជធានីភ្នំពេញ។
ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍លោកឧត្តមសេនីយ៍ទោ អ៊ុក ហៃសីឡា បានឱ្យដឹងថា ប្រតិបត្តិចុះត្រួតពិនិត្យនេះធ្វើឡើងដោយមានការសហការជាមួយ កម្លាំងនគរបាលនៃស្នងការដ្ឋាននគរបាលរាជធានីភ្នំពេញ និងមានសម្របសម្រួលពី លោក មាស ច័ន្ទពិសិដ្ឋ ព្រះរាជអាជ្ញារងអមសាលាដំបូងរាជធានីភ្នំពេញ។
លោកឧត្តមសេនីយ៍ បានបន្ដថា ការចុះត្រួតពិនិត្យនៅក្នុងការដ្ឋានសំណង់នេះ ជាបឋមរកឃើញជនជាតិចិន៧៧នាក់ ស្រី២នាក់ និងកម្មករវៀតណាម ប្រមាណ៤០នាក់ ដែលភាគច្រើនគ្មានលិខិតឆ្លងដែន និងប័ណ្ណការងារ។ លោកបញ្ជាក់ថា ក្រោយពីធ្វើការត្រួតពិនិត្យរួចមក ចំពោះជនជាតិចិន និងវៀតណាម ដែលមិនមានលិខិតឆ្លងដែន ត្រូវបានបញ្ជូនខ្លួនទៅកាន់អគ្គនាយកដ្ឋានអន្ដោប្រវេសន៍ ដើម្បីចាត់ការតាមនីតិវិធី៕

អាជ្ញាធរហ្វីលីពីនចាប់ឃុំខ្លួនអ្នកនេសាទចិន២៥នាក់ពីបទចូលនេសាទខុសច្បាប់

May 18, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ម៉ានីល៖ឆ្មាំការពារដែនសមុទ្រហ្វីលពីន បានចាប់អ្នកនេសាទចិន ២៥នាក់ឃុំខ្លួន រួមទាំងទូកនេសាទរបស់ពួកគេពីរគ្រឿងផងដែរ ពីបទចូល នេសាទខុសច្បាប់កាលពីម្សិលមិញ គ្រាដែលទំនាក់ទំនង ប្រទេសទាំងពីរនៅមិនទាន់ប្រសើរឡើងនៅឡើយ។ នេះបើយោងតាមសារព័ត៌មាន Channel News Asia ។
ប្រភពដដែលបញ្ជាក់ថា ឆ្មាំការពារដែនសមុទ្រ រួមទាំងក្រុមអ្នកការពារធនធានជលផលហ្វីលពីន (BFAR) បានចាប់ខ្លួនក្រុម អ្នកនេសាទចិនខាងលើនេះ តាំងពីថ្ងៃចន្ទមកម្ល៉េះ ដោយសារតែពួកគេបានចូលនេសាទត្រី ក្នុងដែន ទឹកហ្វីលពីនក្បែរខេត្ត Babuyan និង Batanes ដោយមិនមាន ការសូមអនុញ្ញាតជាមុន ដែលនេះត្រូវបានអាជ្ញាធរចាត់ទុកជាទង្វើខុសច្បាប់។
អាជ្ញាធរហ្វីលីពីនបានអះអាងថា ដែនទឹកដែលក្រុមអ្នកនេសាទចិន បានចូលមកនេសាទនោះគឺស្ថិតក្រោមអធិបតេយ្យភាពរបស់ហ្វីលពីនសុទ្ធសាធ ដោយមិនមានជាប់ ពាក់ព័ន្ធនឹងតំបន់ជម្លោះសមុទ្រចិនខាងត្បូងនោះឡើយ៕

តារាចម្រៀងល្បីមួយរូបក្នុងផលិតកម្មថោនជួបគ្រោះថ្នាក់ចរាចរណ៍យប់មិញ

May 18, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖បុរសម្នាក់ដែលគេស្គាល់ថាជាតារាចម្រៀងដ៏ល្បីមួយរូបរួមនិងស្រីស្រស់ស្អាតម្នាក់បានបើករថយន្តស៊េរីទំនើប១គ្រឿងទៀតម៉ាក RANGE ROVER បុកចំពីមុខពេញទំហឹងជាមួយ១គ្រឿងទៀត ម៉ាក Celica បណ្តាលឲ្យបុរសម្នាក់បានស្លាប់ដោយគៀបជាប់នៅក្នុងរថយន្ត។
ហេតុការណ៍នេះកើតឡើង នៅម៉ោង១២ និង៤០នាទីរំលងអធ្រាត្រឈានចូលថ្ងៃទី១៨ ខែឧសភា ឆ្នាំ២០១៦ នៅចំណុចមុខឃ្លាំង ស្ថាននីយប្រេងសូគីម៉ិច តាមបណ្តោយផ្លូវជាតិលេខ៥ ស្ថិតក្នុងសង្កាត់ឫស្សីកែវ ខណ្ឌឫស្សីកែវ។ បុរសជាជនរងគ្រោះមានឈ្មោះ លី ការីម អាយុ៣១ឆ្នាំ ជាបុគ្គលិកធនាគារអម្រិត ស្នាក់នៅក្នុងភូមិគីឡូម៉ែត្រលេខ៨ សង្កាត់ច្រាំងចំរេះ១ ខណ្ឌឫស្សីកែវ។
ប្រភពព័ត៌មានជុំវិញកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញរថយន្តសេរីទំនើបមួយគ្រឿងម៉ាក Range Rover ពណ៌ស ពាក់ស្លាកលេខ ភ្នំពេញ 2X-9987 បើកតាមបណ្តោយផ្លូវជាតិលេខ៥ ក្នុងល្បឿនលឿនទិសដៅពីជើងទៅត្បូង និងមានរថយន្ត១គ្រឿងទៀត ម៉ាក Celica ពណ៌ខ្មៅ ពាក់ស្លាកលេខ ភ្នំពេញ 2M-5575 បើកក្នុងល្បឿនលឿនដូចគ្នាទិសដៅបញ្ច្រាសគ្នា ពេលមកដល់ចំណុចកើតហេតុបានបុកគ្នា ចំពីមុខពេញទំហឹង បណ្តាលឱ្យបុរសម្នាក់ដែលជាម្ចាស់ Celica ស្លាប់គៀបជាប់ក្នុងរថយន្ត។
ប្រជាពលរដ្ឋឃើញហេតុការណ៍បាននិយាយថា អ្នកបើករថយន្ត Range Rover ត្រូវបានគេស្គាល់ថា ជាតារាចំរៀងមួយរូបក្នុងផលតកម្មថោន និងរួមដំណើរដោយនារីស្រស់ស្អាតម្នាក់ទៀត បានចុះមកពីលើរថយន្តរួចគេចខ្លួនបាត់ រីឯរថយន្តទាំង២គ្រឿង រងការខូចខាតផ្នែកខាងមុខយ៉ាងដំណំ។
ក្រោយមកសមត្ថកិច្ចមូលដ្ឋានបានទៅដល់កន្លែងកើតហេតុ និងសហការជាមួយជំនាញធ្វើការវាស់វែងស្ទូចយករថយន្តទាំង២គ្រឿង ទៅរក្សាទុកនៅការិយាល័យចរាចរណ៍ជើងគោក រាជធានីភ្នំពេញ រង់ចាំដោះស្រាយតាមផ្លូវច្បាប់៕

ស្លាប់២នាក់ របួស២៣នាក់ដោយសារគ្រោះថ្នាក់ចរាចរណ៍ថ្ងៃទី១៧ឧសភាម្សិលមិញ

May 18, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖យោងតាមរបាយការណ៍នាយកដ្ឋាន នគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានឲ្យដឹងថា នៅថ្ងៃទី១៧ ខែឧសភា ឆ្នាំ២០១៦ម្សិលមិញ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន ១២លើក (យប់ ៥លើក) បណ្តាលឲ្យមនុស្សស្លាប់ ២នាក់ (ស្រី ១នាក់) រងរបួសធ្ងន់ ១៧នាក់ (ស្រី ៤នាក់) និងរបួសស្រាល ៦នាក់ (ស្រី ១នាក់)។
ប្រភពដដែលបន្តថា នៅក្នុងហេតុការណ៍គ្រោះថ្នាក់ចរាចរណ៍ ១២លើកនេះ បណ្តាលឲ្យខូចខាតយានយន្ត សរុប ចំនួន ២០គ្រឿង រួមមាន ម៉ូតូចំនួន ១២គ្រឿង, រថយន្តធុនតូច ចំនួន ៦គ្រឿង,រថយន្តធុនធំ ២គ្រឿង ។ ប្រភពខាងលើបញ្ជាក់ថា មូលហេតុ ដែលបណ្តាល ឲ្យកើតមានករណីគ្រោះថ្នាក់ចរាចរណ៍ រួមមាន ល្មើសល្បឿន ៥លើក, មិនគោរពសិទ្ធ ១លើក, ស្រវឹង ១លើក, មិនប្រកាន់ស្តាំ ១លើក, បត់គ្រោះថ្នាក់ ២លើក, ងងុយដេក ១លើក, កត្តាយានយន្ត ១លើកស្លាប់។ ក្នុងនោះអ្នកមិនពាក់មួកសុវត្ថិភាព ពេលគ្រោះថ្នាក់ចរាចរណ៍ ១៩នាក់ ( យប់ ៦នាក់ )។
ជាមួយគ្នានោះលទ្ធិផលត្រួតពិនិត្យអនុវត្តច្បាប់ចរាចរណ៍ផ្លូវគោកឃើញថា យានយន្តដែលល្មើសសរុប ទូទាំងប្រទេសមានចំនួន ៤.៦៣៤គ្រឿង ក្នុងនោះបានធ្វើការអប់រំចំនួន១.៨៣១គ្រឿង និងពិន័យសរុប ២.៨០៣គ្រឿង៕

បក្សកាន់អំណាច និងបក្សប្រឆាំងគ្រោងជួបគ្នាក្នុងពេលឆាប់ៗនេះ

May 18, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖ប្រភពព័ត៌មានក្រៅផ្លូវការមួយបានឲ្យដឹងថា គណបក្សកាន់អំណាច ( CPP ) និងគណបក្សប្រឆាំង ( CNRP ) គ្រោងជួបគ្នាក្នុងពេលឆាប់ៗនេះ ដើម្បីបន្តនៅវប្បធម៌សន្ទនា ប៉ុន្តែខ្លឹមសារសំខាន់ៗ ដែលគ្រោងយកទៅពិភាក្សាក្នុងជំនួបនោះមិនទាន់បានដឹងច្បាស់នៅឡើយ ។
ទាក់ទងព័ត៌មានខាងលើនេះ លោក សុខ ឥសាន អ្នកនាំពាក្យ CPP បានអះអាងប្រាប់អ្នកសារព័ត៌មានថា ទ្វារចរចាររបស់គណបក្សប្រជាជននៅតែបើកជំហរ សម្រាប់ជំនួបជាមួយគណបក្សប្រឆាំង ។ ប៉ុន្តែការចរចារណាមួយត្រូវធ្វើឡើងដោយស្មោះត្រង់និងក្នុងរង្វង់នៃវប្បធម៌សន្ទនា ដែលភាគីទាំងពីរធ្លាប់ធ្វើកន្លងមក ។
គួរបញ្ជាក់ថា លោក សុខ ឥសាន្ត ក៏ធ្លាប់ថ្លែងប្រាប់អ្នកសារព័ត៌មានថា បើគណបក្សប្រឆាំងចុងជួបចរចារជាមួយគណបក្សប្រជាជនកម្ពុជា ត្រូវទាក់ទងតាមរយះលោក ឡេង ប៊េងឡុង អគ្គលេខាធិការរដ្ឋសភា ។ ប៉ុន្តែបន្ទាប់ពីការលើកឡើងដូច្នេះ គេមិនទាន់ទទួលបានការឆ្លើយតបណាមួយពីគណបក្សសង្គ្រោះជាតិនៅឡើយ ខណដែលអ្នកនាំពាក្យគណបក្សនេះ បានលើកឡើងថា គណបក្សប្រឆាំងនៅមិនទាន់បានទាក់ទងជាផ្លូវការណាមួយទៅកាន់គណបក្សកាន់អំណាចនោះទេ ដោយរង់ចាំពិភាក្សាជាមួយថ្នាក់ដឹកនាំជាមុនសិន ។
យោងតាមព័ត៌មានទាំងអស់នេះ គេគិតថា គណបក្សកាន់អំណាចនិងគណបក្សប្រឆាំងអាចនឹងជួបគ្នានាពេលខាងមុខ ព្រោះស្ថានភាពនយោបាយសព្វថ្ងៃនេះ និងជំរុញគណបក្សទាំងពីរ ជួបគ្នា ដើម្បីពិភាក្សារកច្រកចេញ បើទោះជាភាគីម្ខាងសំអាងលើផ្លូវច្បាប់ ហើយភាគីម្ខាងទៀតចាត់ទុកជារឿងនយោបាយក៏ដោយ ។
ពាក់ព័ន្ធបញ្ហាខាងលើនេះ គេទើបទទួលបានព័ត៌មានថា គណបក្សប្រឆាំងកំពុងតែរកច្រក ដើម្បីជួបចរចារជាមួយគណបក្សកាន់អំណាច ដើម្បីបន្ធូបន្ថយភាពតានតឹងខាងនយោបាយ ដែលភាគច្រើនបង្កឡើងដោយគណបក្សប្រឆាំង ។ ប៉ុន្តែគេកំពុងមើលឃើញថា គណបក្សទាំងពីរកំពុងតែមានរបៀបវរៈផ្ទុយគ្នាអំពីការចរចារក្នុងពេលដែលគណបក្សកាន់អំណាចកំរិតការចរចារត្រឹមរង្វង់វប្បធម៌សន្ទនា ។ ចំណែកគណបក្សប្រឆាំងចាត់ទុករបៀបវរៈស្តីពីការឃុំឃាំងសកម្មជនរបស់ខ្លួនជារឿងអទិភាព ៕

ធី សុវណ្ណថា ប្រកាសផេកfacebookថ្មី បន្ទាប់ពីផេកចាស់ត្រូវគេ Reported Block

May 17, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖កញ្ញា ធី សុវណ្ណថា សកម្មជនគណបក្សសង្គ្រោះជាតិដ៏មានប្រជាប្រិយភាព និងជាអ្នកលេង facebook ដ៏ល្បីល្បាញម្នាក់ បានប្រកាសផេក facebook ថ្មី បន្ទាប់ពីផេក facebook ចាស់ត្រូវគេ Reported Block នឹងត្រូវឆេះរយៈពេល២៤ម៉ោង។
នាង ធី សុវណ្ណថា បានប្រកាសតាមផេក facebook ថ្មីរបស់នាងដែលមានឈ្មោះ(Thy Sovantha New Page)ថា «សូមពុកម៉ែប្អូនបងទាំងក្នុងស្រុក និងក្រៅស្រុកមេត្តាជួយបន្តការគាំទ្រនាងខ្ញុំផង នេះជាផេកថ្មីរបស់នាងខ្ញុំ ផេកចាស់ត្រូវបានជនមិនស្គាល់មុខរីផតខូចបិទបាត់ហើយ សូមពុកម៉ែបងប្អូនមេត្តាទទួលព័ត៌មានថ្មីៗរបស់សង្គមខ្មែរពីនាងខ្ញុំដោយភាពវៃឆ្លាតផង… សូមអរគុណ »៕

ហ្វីលីពីនចាប់ដៃជាមួយចិនវិញ ក្រោយមានភាពល្អក់កករកាលពីរដ្ឋាភិបាលមុន

May 17, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ម៉ានីល៖យោងតាមសារព័ត៌មានចិនស៊ិនហួរបានចេញផ្សាយថា អនាគតប្រធានាធិបតីហ្វីលីពីនដែលទើបជាប់ឆ្នោត លោក Rodrigo Duterte បានបើកកិច្ចសន្ទនាមួយជាមួយនឹងឯកអគ្គរដ្ឋទូតចិនប្រចាំទីក្រុង ម៉ានីល ជុំវិញគំរោងរៀបចំកិច្ចពិភាក្សាទ្វេភាគីជាមួយនឹងរដ្ឋាភិបាលចិនឡើងវិញ ពាក់ព័ន្ធបញ្ហាសមុទ្រចិនខាងត្បូង។
ឯកអគ្គរដ្ឋទូតចិនលោក Zhao Jianhua បានថ្លែងបន្ទាប់ពីកិច្ចប្រជុំនោះថា លោកពិតជាមាន សេចក្តីរីករាយ និងសង្ឃឹមថាចិនជាមួយហ្វីលីពីន អាចស្វែងរកដំណោះស្រាយលើការខ្វែងគំនិតគ្នា ព្រមទាំងព្យាយាមលើកស្ទួយទំនាក់ទំនងមិត្តភាព ឲ្យកាន់តែស៊ីជម្រៅ និងបង្កើនកិច្ច សហប្រតិបត្តិការលើគ្រប់វិស័យ រវាងប្រទេសទាំងពីរឡើងវិញ៕

បង្កាត់ភ្លើងដាំបាយចោលចេញទៅដងទឹកបណ្តាលឲ្យឆេះផ្ទះម៉ត់

May 17, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តពោធិ៍សាត់៖ផ្ទះប្រជាពលរដ្ឋមួយគ្រួសារទំហំ៤ម៉ែត្រគុណ៦ម៉ែត្រ ជញ្ជាំងធ្វើពីឈើ និងប្រក់ស័ង្កសី សង់ផ្ទាល់ដី ត្រូវអគ្គិភ័យឆាបឆេះអស់ទាំស្រុង ខណៈបង្កាត់ភ្លើងដាក់ដាំបាយចោល រួចចេញទៅដងទឹកអូរនៅក្រោយផ្ទះ។ ករណីនេះកើតឡើងនៅរសៀលថ្ងៃទី១៦ ខែឧសភា ឆ្នាំ២០១៦ ត្រង់ចំណុចអូរ១៧ ឃុំអន្លង់រាប ស្រុកវាលវែង ខេត្តពោធិ៍សាត់។
មេបញ្ជាការរង អាវុធហត្ថខេត្តពោធិ៍សាត់ លោកវរសេនីយ៍ទោ ញឹម នី បាននិយាយថា ម្ចាស់ផ្ទះមានឈ្មោះ ទឹម ធី ភេទប្រុស អាយុ៣៧ឆ្នាំ រស់នៅភូមិឃុំកើតហេតុខាងលើ ហើយករណីនេះ កើតឡើងដោយសារតែ ម្ចាស់ផ្ទះបង្កាត់ភ្លើងដាក់ដាំបាយចោល បណ្តាលឲ្យអណ្តាតភ្លើងរាលឆេះផ្ទះម៉ត់តែម្តង ខណៈចេញទៅដងទឹកនៅអូរនៅក្រោយផ្ទះ។ លោកមេបញ្ជាការរងបានបន្តថា ផ្ទះដែលអគ្គីភ័យលេបត្របាក់អស់ទាំងស្រុងនោះ មានទំហំ ៤ម៉ែត្រគុណ៦ម៉ែត្រ ជញ្ជាំងធ្វើពីឈើ និងប្រក់ស័ង្កសី សង់ផ្ទាល់ដី។ លោកបញ្ជាក់ថា ទំហំនៃការខូចខាតក្នុងផ្ទះទាំងស្រុងរួមមាន ៖ ម៉ាស៊ីនកាត់ស្មៅ ០១គ្រឿង និង សម្ភារៈប្រើប្រាស់មួយចំនួនទៀត៕

Man Utd តាមប្រមាញ់ Zlatan Ibrahimovic សាជាថ្មី

May 17, 2016កីឡាមេគង្គ ប៉ុស្តិ៍

បាល់ទាត់៖តាមប្រភពព័ត៌មានពីគេហទំព័រ Daily Mail បានឲ្យដឹងថា ក្រុមបិសាចក្រហម Manchester United បន្ទាប់ពីបានខកខានការប្រមាញ់លើកមួយឥឡូវនេះ ក្រុមមូយនេះកំពុងតែរៀបចំកញ្ចប់ថវិកានឹងកិច្ចពិភាក្សាក្នុងក្រុមដើម្បីនាំយកខ្សែប្រយុទ្ធដែលពពេញដោយបទពិសោធន៍ Zlatan Ibrahimovic មករួមក្រុមឲ្យបាននៅរដូវកាលក្រោយនេះ។
ខ្សែប្រយុទ្ធសញ្ជាតិស៊ុយអែត វ័យ៣៤ ឆ្នាំរូបនេះ បច្ចុប្បន្ននេះគឺមិនទាំន់បានសម្រេចថានឹងទៅក្រុមមួយណាទៅឡើយទេ ចាប់តាំងពីសម្រេចចិត្តចាកចេញពីក្លឹប PSG នៅពេលបញ្ជាប់នៅរដូវកាលនេះ ហើយគាត់បានបញ្ជាក់ថា គាត់ចង់លេងនៅក្របខ័ណ្ឌ Premier League។
ក្រុម Man Utd បានបញ្ជូនភា្នក់ងារទៅតាមដាន់ កីឡាកររូបនេះ នៅក្នុងការប្រកួត ១-១ ជាមួយ Bordeaux កាលពីសប្តាហ៍មុន ដែលធ្វើឲ្យ Man Utd រឹតតែចង់បានកីឡាកររូបនេះជាខ្លាំង។
យោងតាមការចុះផ្សាយសារព័ត៌មានរបស់បារាំងកាលពីថ្ងៃចន្ទនេះ បានអះអាងថា ក្រុម Man Utd មានការស្នើកីឡាករអន្តរជាតិស៊ុយអែតរូបនេះពីទឹកដី Old Trafford ដែលគាត់នឹងលេងការប្រកួតចុងក្រោយឱ្យក្លឹប PSG សម្រាប់ពានរង្វាន់ French Cup វគ្គផ្តាច់ព្រ័ត្រជាមួយ Marseille នៅថ្ងៃសៅរ៍នេះ។
គួរបញ្ជាកើថា Man Utd កំពុងតែចង់បានខ្សែប្រយុទ្ធរូបនេះដើម្បីយកពព្រឹងតំបន់របស់ខ្លួននារដូវកាលក្រោយនេះ ខណៈដែលមានក្លឹបនៅអាមេរិកជាច្រើនក៏ចង់បានគាត់ដែរ ជាពិសេសគឺក្រុមរបស់លោក David Beckham តែម្តង៕

ផឹកទឹកប៉េងប៉ោះពីរកែវក្នុងមួយថ្ងៃជួយធ្វើឲ្យឆ្អឹងរឹងមាំ

May 17, 2016សុខភាពមេគង្គ ប៉ុស្តិ៍

សុខភាព៖ក្រុមអ្នកវិទ្យាសាស្ត្រនៅក្នុងប្រទេសកាណាដាកាលពីពេលថ្មីៗនេះបានប្រកាសពីការរកឃើញនៃការស្រាវជ្រាវរបស់ពួកគេថា ការផឹកទឹកប៉េងប៉ោះពីរកែវជារៀងរាល់ថ្ងៃនឹងអាចធ្វើឲ្យឆ្អឹងរឹងមាំ ហើយអាចទប់ស្កាត់ជំងឺពុកឆ្អឹងដែលជាជំងឺមួយកើតឡើងច្រើនចំពោះស្ត្រី។
សារធាតុសំខាន់នៅក្នុងទឹកប៉េងប៉ោះដែលផ្តល់អត្ថប្រយោជន៍ខាងលើគឺត្រូវបានគេយល់ឃើញថាជា លីកូពីន(Lycopene) ដែលជាសារធាតុប្រឆាំងអុកស៊ីដកម្មម្យ៉ាង ត្រូវបានគេទទួលស្គាល់រួចហើយថា អាចកាត់បន្ថយគ្រោះថ្នាក់នៃការកើតមហារីកប្រូស្តាតចំពោះបុរស និងមានប្រយោជន៍ការពារប្រឆាំងចំពោះជំងឺបេះដូងទៀតផង។
រោគពុកឆ្អឹងត្រូវបានគេរាយការណ៍ថា បានកើតឡើងចំពោះមនុស្សរហូតដល់ទៅ៣លាននាក់នៅក្នុងចក្រភពអង់គ្លេស។ ក្រុមអ្នកស្រាវជ្រាវនៃសាកលវិទ្យាល័យ តូរ៉ុនតូ ក្នុងប្រទេសកាណាដាបានស្នើសុំឲ្យស្ត្រីវ័យអស់រដូវចំនួន៦០នាក់ដែលមានអាយុពី៥០ទៅ៦០ឆ្នាំ ឈប់ទទួលទានអាហារទាំងឡាយដែលធ្វើពីប៉េងប៉ោះរយៈពេលមួយខែ។
ការធ្វើបែបនេះបង្កឲ្យមានការកើនឡើងយ៉ាងខ្លាំងនូវកម្រិត អិន តូឡូប៉ិបទីដ(N-tolopeptide) ដែលជាសារធាតុមួយត្រូវបានបញ្ចេញទៅសរសៃឈាមនៅពេលដែលឆ្អឹងបម្រុងនឹងបាក់។ ក្រោយមកទៀតក្នុងរយៈពេល៤ខែ ស្ត្រីចូលរួមទាំងនោះត្រូវបានគេឲ្យផឹកទឹកប៉េងប៉ោះជារៀងរាល់ថ្ងៃដោយមានសារធាតុ លីកូពីន ១៥មិល្លីក្រាម ឬលេបថ្នាំដែលមានសារធាតុលីកូពីនក្នុងបរិមាណ១៥មិល្លីក្រាមដូចគ្នា។
លទ្ធផលបានបង្ហាញថា បន្ទាប់ពីអ្នកចូលរួមផឹកទឹកប៉េងប៉ោះ ឬលេបថ្នាំដែលមានសារធាតុ លីកូពីន ក្នុងបរិមាណ ១៥មិល្លីក្រាម ជារៀងរាល់ថ្ងៃមកគេសង្កេតឃើញមានការធ្លាក់ចុះនៃកម្រិត អិន តូឡូប៉ិបទីដ ជាច្រើន។ ក្រុមអ្នកស្រាវជ្រាវបាននិយាយថា ទឹកប៉េងប៉ោះដែលគេអាចរកទិញបាននៅតាមផ្សារទំនើបក៏មានសារធាតុ លីកូពីន ល្អដូចគ្នាជាមួយថ្នាំដែលមានជាតិ លីកូពីន ដែរ។
ព្រឹត្តបត្រព័ត៌មាន Journal Osteoporosis International បានរាយការណ៍ថា ការផឹកទឹកប៉េងប៉ោះពីរកែវក្នុងមួយថ្ងៃដែលរួមមានសារធាតុលីកូពីន ស្មើនឹង១៥មិល្លីក្រាមអាចនឹងគ្រប់គ្រាន់ក្នុងការធ្វើឲ្យឆ្អឹងរឹងមាំបានល្អ៕

សំណើសុំនៅក្រៅឃុំរបស់តំណាងរាស្ត្រ CNRP ត្រូវសាលាឧទ្ទរណ៍បដិសេធ

May 17, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖សំណើសុំនៅក្រៅឃុំរបស់ លោក អ៊ុំ សំអាន តំណាងរាស្ត្រគណបក្សសង្គ្រោះជាតិ ត្រូវបានសាលាឧទ្ធរណ៍ នៅព្រឹកថ្ងៃទី១៧ ខែឧសភា ឆ្នាំ២០១៦នេះ បានសម្រេចបដិសេធ បន្ទាប់ពីបានបើកសវនាការជំនុំជម្រះមួយព្រឹក ដោយសាលាឧទ្ធរណ៍បានសម្រេចតម្កល់តាមសាលក្រមរបស់សាលាដំបូងរាជធានីភ្នំពេញ ចំពោះសំណុំរឿងនៅក្រៅឃុំនេះ៕

De Gea អាចនឹងចេញពី Man Utd នៅរដូវកាលក្រោយ

May 17, 2016កីឡាមេគង្គ ប៉ុស្តិ៍

បាល់ទាត់៖សេចក្តីរាយការណ៍បានឲ្យដឹងថា អ្នកចាំទីដៃស្អិត David de Gea អាចនឹងចាកចេញពីក្រុមបិសាចក្រហម Manchester United នៅរដូវក្តៅខាងមុខនេះ ប្រសិនអ្នកចាត់ការទូទៅនាបច្ចុប្បន្នលោក Louis van Gaal នៅតែបន្តជាគ្រូបង្វឹកនោះ។
អ្នកចាំទីសញ្ជាតិអេស្ប៉ាញវ័យ២៥ឆ្នាំរូបនេះ កំពុងតែរងសម្ពាធយ៉ាងខ្លាំងក្រោមការគ្រប់គ្រងរបស់គ្រូបង្វឹកសញ្ជាតិហូឡង់រូបនេះ បើទោះជាបានចុះកុងត្រារយៈពេលបួនឆ្នាំដើម្បីបន្តនៅកាលពីរដូវកាលមុនក៏ដោយ។
យោងតាមប្រភពព័ត៌មានពីទឹកដី Old Trafford បាននិយាយថា De Gea ដែល Real Madrid ចង់បាននោះ នឹងប្រើប្រាស់គ្រប់វិធីដើម្បីចាកចេញពីក្លឹបនារដូវកាលក្រោយនេះ។
គួរបញ្ជាក់ថា ក្លឹបបិសាចក្រហមអាចនឹងមានបញ្ហាធំប្រសិន De Gea ចាកចេញពីក្រុម ព្រោះអ្នកចាំទីរូបនេះបានជួយសង្គ្រោះគ្រាប់បាល់ជាច្រើនឲ្យ និងជួយឲ្យបានឡើងទៅវគ្គផ្តាច់ព្រ័ត្រ FA Cup ទៀតផង៕

បង្ក្រាបរថយន្តសាំយ៉ុងដឹកជញ្ជូនឈើធ្នង់លោតឆ័ត្រនៅស្រុកកូនមុំ

May 17, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តរតនគិរី៖ឈើប្រណីតប្រភេទធ្នុងមួយរថយន្តសាំយ៉ុងអត់ស្លាកលេខដែលឈ្មួញមិនស្គាល់ឈ្មោះដឹកជញ្ជូនឈើចេញពីខេត្តស្ទឹងត្រែងឆ្ពោះមកកាន់ខេត្តរតនគិរី តាមផ្លូវជាតិលេខ៧៨ ត្រូវបានសមត្ថកិច្ចនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តរតនគិរី ពួនស្ទាក់ និងបង្ក្រាបបានភ្លាមៗ។
តាមការឲ្យដឹងពីលោក នូវ ដារ៉ា ប្រធានការិយាល័យនគបាលប្រឆាំងបទល្មើសសេដ្ឋកិច្ចខេត្តបានឲ្យដឹងថា ប្រតិបត្តិការបង្ក្រាបបទល្មើសខាងលើនេះ ធ្វើឡើងនៅវេលាម៉ោង១១ និង១០នាទយប់ថ្ងៃទី១៥ខែឧសភាឆ្នាំ២០១៦នៅលើកំណាត់ផ្លូវជាតិលេខ៧៨ ស្តិតនៅក្នុងភូមិសឹក ឃុំតាអង ស្រុកកូនមុំ ហើយម្ចាស់រថយន្តបានរត់គេចខ្លួនបាត់។
លោកបន្តទៀតថា មុននឹងឈានទៅធ្វើការបង្ក្រាបបានរថយន្តដឹកឈើប្រណិតខាងលើនេះ ដោយសារការយកចិត្តទុកដាក់របស់កម្លាំងសមត្ថកិច្ច និងសហការល្អជាមួយភ្នាងារសំងាត់ក្នុងការទប់ស្កាត់រាល់បទល្មើសផ្សេងៗជាពិសេសបទល្មើសព្រៃឈើ។
បច្ចុប្បន្នទាំងរថយន្ត និងឈើប្រណីតកម្លាំងសមត្តកិច្ចបានប្រគល់ទៅឲ្យជំនាញរដ្ឋបាលព្រៃឈើខេត្តដើម្បីចាត់ការបន្តតាមនីតិវិធីច្បាប់ព្រៃឈើ។ ជំនាញរដ្ឋបាលព្រៃឈើធ្វើការរាប់ចំនួនឈើដែលបង្ក្រាបបានមុខកាត់ចម្រុះ សារុបទាំងអស់៩៤ដុំស្មើនឹង១.០១៥ម៉ែត្រគូប៕