ដោយ សហការី
ក្រចេះ៖ រថយន្តសាំយ៉ុង ដឹកឈើអារ ប្រភេទក្ដា មួយគ្រឿង បើកបរក្នុងល្បឿនយ៉ាងលឿន បណ្ដាលឲ្យជ្រុលទៅបុកពេញទំហឹងនឹងរថយន្តសាំងយ៉ុងមួយគ្រឿងទៀត បើកបរក្នុងទិសដៅបញ្ច្រាសគ្នា។ ខណៈដែលព្យាយាមបើករត់គេចពីរថយន្តមន្ត្រីអង្គការ និងរថយន្តរបស់កូនលោកមេបញ្ជាការរងអាវុធហត្ថ ស្រុកសំបូរម្នាក់ ដែលគេដឹងថា ជាទម្លាប់នៃការតាមប្រដេញជំរិតទារប្រាក់ តែម្តងនេះ មិនបានសម្រេចបណ្ដាលអោយរថយន្ត ៣គ្រឿង បុកគ្នារេធ្លាក់ពីលើផ្លូវទៅក្នុងស្នាមភ្លោះ ចំណែកឯរថយន្តរបស់កូនលោកមេបញ្ជាការរងអាវុធហត្ថ ស្រុកសំបូរម្នាក់ បានបន្តបើករត់គេចបាត់។
ហេតុការណ៍គួរឲ្យភ្ញាក់ផ្អើលនេះ បានកើតឡើងនៅលើផ្លូវជាតិលេខ៧ ចំណុចប្រសាទប្រាំ ឋិតនៅក្នុងភូមិកសាង ឃុំចង្ក្រង់ ស្រុកចិត្របុរី ខេត្តក្រចេះ ។
រថយន្តបង្ក ដែលបើកប្រដេញតាមពីក្រោយរថយន្តសាំយ៉ុងដឹកឈើអារ ប្រភេទក្ដារនោះ មាន ២គ្រឿង គឺមានរថយន្តម៉ាក ហាយវ័ររីត ដែលត្រូវបានគេស្គាល់ថា បើកបរដោយបុរសម្នាក់ឈ្មោះ អ៊ំ ផានិត ត្រូវជាកូនបង្កើតប្រុសរបស់ លោក អ៊ំ មន្នីរឹទ្ធ ដែលជាមេបញ្ជាការរងកងរាជអាវុធហត្ថស្រុកសំបូរ និងរថយន្តមួយគ្រឿងទៀត ម៉ាក កាមរីគូទហើម ពណ៌ខ្មៅ ពាក់ស្លាកលេខ ភ្នំពេញ 2H-0184 បើកបរដោយបុរសឈ្មោះ ស៊ឹង គឹមស៊ារ ជានាយករងទី១ សាខាខេត្តក្រចេះ អត្តលេស 153002 អង្គភាព អង្គការចុះឃ្លាំមើលសកម្មភាពបទល្មើសព្រៃឈើ សត្វព្រៃ និងបរិស្ថាន។
ចំណែកឯខាងរថយន្តសាំយ៉ុងដឹកឈើអារក្ដានោះវិញ ដោយសារមានការភ័យខ្លាច បានព្យាយាមបើករថយន្តរត់គេចពីរថយន្តតាមប្រដេញទាំងនោះ ក៏ជ្រុលចង្កូតទៅបុករថយន្តសាំយ៉ុងមួយគ្រឿងទៀត ដែលធ្វើដំណើរក្នុងទិសដៅផ្ទុយគ្នា ចំពីមុខយ៉ាងពេញទំហឹង បណ្ដាលអោយរថយន្តទាំងនោះ ធ្លាក់ទៅក្នុងស្នាមភ្លោះ និងមនុស្សប្រុសសស្រី ៣នាក់រងរបួសស្រាល។ រីឯរថយន្តម៉ាក កាមរីហើម ដែលបើកតាមប្រដេញមកពីក្រោយនោះ ក៏បានវ៉ាក់អើគ្នា ហើយរេចង្កូតធ្លាក់ពីលើផ្លូវចូលស្នាមភ្លោះទៅមុខលែងរួមដូចគ្នា ហើយអ្នកបើកបរក៏បានរត់គេចខ្លួនបាត់ ចំណែកឯរថយន្ត ម៉ាក ហាយវ័ររីត ដែលបើកដោយលោក អ៊ំ ផានិត ដែលត្រូវជាកូនរបស់លោក អ៊ំ មន្នីរឹទ្ធ មេបញ្ជាការរងកងរាជអាវុធហត្ថស្រុកសំបូរ ក៏បានបើករត់គេចបាត់ ។
ជនរងគ្រោះទាំង ៣នាក់នោះ ទី១ ឈ្មោះ ប៉ក ណារឹន ភេទស្រី អាយុ ៣៩ឆ្នាំ ទី២ ឈ្មោះ កូយ សំអឿន ភេទប្រុស អាយុ ៤២ឆ្នាំ និងទី៣ ឈ្មោះ កូយ សារូន ភេទប្រុស អាយុ ៣៤ឆ្នាំ ជនរងគ្រោះទាំង ៣នាក់ មានទីលំនៅភូមិ/ឃុំកណ្ដោលជ្រុំ ស្រុកពញាក្រែក ខេត្តត្បូងឃ្មុំ រងរបួសស្រាល។
មន្ត្រីជំនាញមួយរូប បានបង្ហើបឲ្យដឹងថា លោក ស៊ឹង គឹមស៊ារ នៅអង្គការ ចុះឃ្លាំមើលសកម្មភាពបទល្មើសព្រៃឈើ សត្វព្រៃ និងបរិស្ថាន និងបុរសឈ្មោះ អ៊ំ ផានិត គ្មានតួនាទី គ្មានភារកិច្ច ហើយជាប្រជាពលរដ្ឋ ជាជនសាមញ្ញ ប៉ុន្តែដែលជានិច្ចកាល បុរសទាំង២នាក់ខាងលើនេះ តែងតែដើរបង្ករព្យុះភ្លៀងនៅតាមដងផ្លូវជាតិលេខ៧ ដោយដាក់កុងត្រូលជជុះ ចាំយកលុយពីរថយន្តដឹកឈើអារក្ដា ដឹកឈើអារជន្លងម្រេច គ្រប់ប្រភេទ យ៉ាងចាស់ៗដៃតែម្ដង ដោយអាងលើបុណ្យសក្តិ និងធ្វើសេដ្ឋកិច្ចអោយរបស់ឳពុកខ្លួន ដែលជាមេបញ្ជាការរងកងរាជអាវុធហត្ថស្រុកសំបូរ។
ជាក់ស្ដែង ដូចនៅក្នុងហេតុការគ្រោះថ្នាក់ចរាចខាងលើនេះ គឺកើតឡើងដោយសារតែ ការបើករថយន្តតាមប្រដេញយកលុយពីសំណាក់គ្នាគ្នី និងក្រុមរបស់លោក ដែលមានដូចជាឈ្មោះ ស៊ឹង គឹមស៊ារ នាយករងទី១ នៃអង្គការ ចុះឃ្លាំមើលសកម្មភាពបទល្មើសព្រៃឈើ សត្វព្រៃ និងបរិស្ថាន សាខាខេត្តក្រចេះ នេះជាដើម ទើបបណ្ដាលឲ្យមានហេតុការណ៍ រថយន្តបុក និងក្រឡាប់រថយន្ត ហើយថែមទាំងបង្កឲ្យមានអ្នករងរបួសធ្ងន់ស្រាលយ៉ាងដូច្នេះ៕
