ភ្នំពេញ៖សាលារាជធានីភ្នំពេញនៅថ្ងៃទី១១ ខែមករា នេះ បានបើកកិច្ចប្រជុំមួយពិភាក្សារវាងមន្ត្រីជំនាញនៃក្រសួងសាធារណការ និងដឹកជញ្ជូនកម្ពុជាជាមួយក្រុមហ៊ុនសំណង់សៀងហៃ ស្តីពីគម្រោងសាងសង់ស្ពានអាកាស និងផ្លូវខ្សែក្រវាត់ទី២ជុំវិញទីក្រុងភ្នំពេញសម្រាប់បញ្ចៀសការកកស្ទះចរាចរណ៍នាពេលអនាគត។នេះជាគម្រោងសម្រាប់ខ្សែក្រវាត់ក្រុងទី២ (Ring road II) ដែលជាជំនួយហិរញ្ញប្បទានរបស់សាធារណរដ្ឋប្រជាមានិតចិន។
មន្ត្រីសាលារាជធានីភ្នំពេញបានបញ្ជាក់ថា នៅថ្ងៃទី១១ ខែមករា ឆ្នាំ២០១៦ លោកប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ និងលោក លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំកិច្ចប្រជុំដើម្បីពិភាក្សលើគម្រោងសាងសង់ស្ពានអាកាសចំណុចស្តុបផ្សារដីហុយ និងផ្លូវក្រវាត់ក្រុងទី២។
ប្រភពបានបញ្ជាក់ថា បើតាមគម្រោង ស្ពានអាកាសនឹងត្រង់សាងសង់នៅចំណុចស្តុបផ្សារដីហុយ ចេញពីចំណុចប្រសព្វរវាងមហាវិថីសហព័ន្ធរុស្ស៊ី និងផ្លូវ១០១៩ (វិថីហាណូយ) មានប្រវែង ៦១១ ម៉ែត្រ ទទឹង ១៦,៥ម៉ែត្រ។ ចំពោះផ្លូវខ្សែក្រវាត់ក្រុងទី២ ជាប្រភេទផ្លូវពីរគន្លង មានប្រវែង ១៦,៦៧គីឡូម៉ែត្រ ចាប់ពីមហាវិថីសហព័ន្ធរុស្ស៊ីដល់ផ្លូវជាតិលេខ២ មានទទឹង ២៣ម៉ែត្រ ដាក់លូសងខាងទំហំ ១,៥ម បេតុងកម្រាស់ ២០សង់ទីម៉ែត្រ ដោយឆ្លងកាត់ភូមិសាស្ត្រខណ្ឌសែនសុខ ខណ្ឌមានជ័យ និងខណ្ឌដង្កោ ឆ្ពោះទៅទីក្រុងតាខ្មៅ ខេត្តកណ្តាល ជួបគ្នាត្រង់ស្ពានតាខ្មៅ ព្រែកសំរោង។
គួរបញ្ជាក់ថា ការកសាងសង់ស្ពានអាកាស និងផ្លូវខ្សែក្រវាត់ក្រុងទី២ នេះ ត្រូវបានកត់សម្គាល់ថា នឹងអាចជួយដោះស្រាយបញ្ហាកកស្ទះចរាចរណ៍បានមួយកម្រិតធំ នៅតំបន់ជុំវិញរាជធានីភ្នំពេញ ពិសេសការបញ្ជៀសផ្លូវសម្រាប់រថយន្ដដឹកជញ្ជូនធុនធ្ងន់ឆ្លងកាត់ចូលក្រុងភ្នំពេញ៕ដោយ៖រដ្ឋា
