All posts by មេគង្គ ប៉ុស្តិ៍

ប្លន់បាញ់សម្លាប់យកម៉ូតូទៀតហើយនៅសង្កាត់បឹងកក់ ខណ្ឌទួលគោក

December 11, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ បុរសម្នាក់អាយុប្រហែល២៤ឆ្នាំ ត្រូវខ្មាន់កាំភ្លើងបាញ់ស្លាប់ប្លន់យកម៉ូតូម៉ាកហុងដា ឌ្រីម សេ១២៥ មួយគ្រឿងយកទៅបាត់ដោយសុវត្ថិភាព កាលពីវេលាម៉ោង៥ និង៣០នាទីព្រឹក ថ្ងៃទី១១ ធ្នូ ២០១៥ នៅចំណុចមុខហាងកែសម្ផស្ស ពៅ ប៊ីយូធី សាឡន តាមបណ្ដោយផ្លូវ៥៩៨ ស្ថិតក្នុងសង្កាត់បឹងកក់២ ខណ្ឌទួលគោក ។

ប្រភពព័ត៌មាននៅកន្លែងកើតហេតុបានឲ្យដឹងថា ជនរងគ្រោះត្រូវបានគេស្គាល់ថាឈ្មោះ រិទ្ធ មានឈ្មោះក្នុងហ្វេសប៊ុក Bong Beng អាយុ២៤ឆ្នាំ ជាកម្មករលើកក្រណាត់ស្នាក់នៅជិតកន្លែងកើតហេតុ ។ ចំណែកម៉ូតូដែលត្រូវចោរប្លន់យកទៅបាត់នោះម៉ាក ហុងដា សេ១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាកលេខ ភ្នំពេញ 1CR-0063 ។

ប្រភពដដែលថា មុនពេលកើតហេតុ គេឃើញបុរសរងគ្រោះជិះម៉ូតូម្នាក់ឯងបម្រុងចូលទៅកន្លែងស្នាក់នៅវិញ (ពៅ ប៊ីយូធី សាឡន) ស្រាប់តែមានជនសង្ស័យ១ក្រុមជិះម៉ូតូ២គ្រឿង ក្នុងនោះមានម៉ូតូធំ១គ្រឿងបានមកដល់ ហើយក៏ភ្ជង់ជនរងគ្រោះប្លន់យកម៉ូតូ តែដោយជនរងគ្រោះមិនព្រមឲ្យ ក៏មានការប្រតាយប្រតប់គ្នា ។ ភ្លាមៗនោះខ្មាន់កាំភ្លើងបានបាញ់១គ្រាប់ចំកណ្ដាលក្បាលបណ្ដាលឲ្យជនរងគ្រោះដួលស្លាប់ភ្លាមៗតែម្តង ។

ក្រោយពេលកើតហេតុប្រហែលកន្លះម៉ោងទើបឃើញសមត្ថកិច្ចទៅដល់ធ្វើការឡោមព័ទ្ធកន្លែងកើតហេតុដើម្បីធ្វើការពិនិត្យ និងស្វែងរកគ្រួសារជនរងគ្រោះឲ្យមកទទួលសពយកទៅធ្វើបុណ្យតាមប្រពៃណី ព្រមទាំងដាក់កម្លាំងតាមប្រមាញ់ចាប់ខ្លួនជនសង្ស័យផងដែរ ។

គួរជម្រាបថា ឈានចូលខែ ធ្នូ ឆ្នាំ២០១៥ នេះ អំពើប្លន់បាញ់សម្លាប់យកម៉ូតូបានកើតឡើងជាបន្តបន្ទាប់លើចំណុចព្រំប្រទល់នៃទឹកដឺខណ្ឌទួលគោក និងខណ្ឌឬស្សីកែវ ។ខ្មាន់កាំភ្លើងបានចេញធ្វើសកម្មភាពជាក្រុម ដោយប្រើមធ្យោបាយម៉ូតូ២ទៅ៣គ្រឿង ក្នុងនោះមានម៉ូតូធុនធំផងដែរ ធ្វើឲ្យប្រជាពលរដ្ឋមានការព្រួយបារម្ភយ៉ាងខ្លាំងពីសុវត្ថិ ភាពផ្ទាល់ខ្លួន ខណៈដែលបុណ្យចូលឆ្នាំសកល២០១៦ជិតចូលមកដល់៕ដោយ៖រដ្ឋា

អ្នកស្លាប់ដោយពុលសាច់ឆ្កែ និងពុលស្រានៅស្រុកស្នួលកើនដល់១៤នាក់

December 10, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជា, សុខភាពមេគង្គ ប៉ុស្តិ៍

ខេត្តក្រចេះ ៖ អ្នកពុលសាច់ឆ្កែ និងពុលស្រា នៅភូមិស្រែថ្មី ឃុំខ្សឹម ស្រុកស្នួល ទាំងមុនទាំងក្រោយស្លាប់១០នាក់ ហើយនៅមានអ្នកភូមិប្រុស-ស្រីជាច្រើននាក់ទៀតក៏កំពុងតែសង្គ្រោះក្នុងមន្ទីរពេទ្យនៅឡើយ។ចំណែកអ្នកស្លាប់ ដោយពុល ស្រានៅឃុំ ស្នួល ស្រុកស្នួលបានកើនដល់ ៤នាក់ គិតត្រឹមថ្ងៃទី ១០ ខែធ្នូ នេះ ។

មន្ត្រីអាជ្ញាធរស្រុកស្នួលបានបញ្ជាក់ឲ្យដឹងថា មានស្ត្រីពីរនាក់ រស់នៅក្នុងភូមិស្រែថ្មី ឃុំឃ្សឹម ស្រុកស្នួល ដែលរងនូវការពុលធ្ងន់ធ្ងរដោយស្រាថ្នាំត្រាំសម្បកឈើ បានស្លាប់ជាបន្តបន្ទាប់គ្នានៅថ្ងៃទី៩-១០ ខែធ្នូ នេះ។

ប្រភពបន្តថា ស្ត្រីរងគ្រោះម្នាក់ឈ្មោះ ឡាច សាលី អាយុ៣៣ឆ្នាំ និងម្នាក់ទៀតឈ្មោះ ចយ សារិៈ អាយុ៥៥ឆ្នាំ ។ ក្រៅពីមានអ្នកស្លាប់ដោយការពុលសាច់ឆ្កែ និងស្រាថ្នាំ នៅក្នុងភូមិស្រែថ្មី ឃុំឃ្សឹម ក៏នៅមានអ្នករងគ្រោះកើតឡើងជាបន្តបន្ទាប់ទៀតកំពុងសម្រាក ព្យាបាល ចំណែកនៅឃុំស្នួល ស្រុកស្នួល ខេត្តក្រចេះ ក៏មានអ្នកពុលស្រា ស្លាប់២នាក់ ទៀត ដែលចំនួនសរុបកើនដល់៤នាក់ហើយ។

គួររំឭកថា ករណីពុលសាច់សត្វឆ្កែដែលងាប់ដោយសារគេដាក់ថ្នាំបំពុល ហើយអ្នកភូមិក្នុងភូមិស្នួលវត្តកើត ឃុំស្នួល បាននាំគ្នាយកឆ្កែនោះទៅធ្វើម្ហូបទទួលទានបណ្តាលឲ្យពុលស្លាប់ជាបន្តបន្ទាប់។ស្របពេលគ្នានោះដែរ ក៏មានបាតុភាពថ្មីមួយទៀតបានផ្ទុះឡើងនៅថ្ងៃរសៀលថ្ងៃទី៨ ខែធ្នូ គឺមានអ្នកភូមិជាច្រើននាក់ក្នុងឃុំចំនួន ២ ផ្សេងគ្នា ក្នុងស្រុកស្នួល រួមមានភូមិត្រពាំងលាក់កសិករ ឃុំស្នួល និងអ្នកភូមិស្រែថ្មី ឃុំឃ្សឹម ត្រូវបានស្លាប់ជាបន្តបន្ទាប់ក្នុងអំឡុងរយៈពេល ២ ថ្ងៃជាប់ៗគ្នា ក្នុងនោះក៏មានអ្នកភូមិជាង ១០ នាក់ផ្សេងទៀតត្រូវរងគ្រោះដោយការពុលផងដែរ ។

ក្រោយពេលមានបាតុភាពផ្ទុះចេញនូវការពុលសាច់ឆ្កែរហូតបណ្តាលឲ្យមានអ្នកភូមិខ្លះ ស្លាប់ និងរងគ្រោះនេះ អាជ្ញាធរបានដាក់ការសង្ស័យចំពោះអ្នកស្លាប់ក្នុងឃុំផ្សេងទៀតថា ការស្លាប់បណ្តាលមកពីស្រា ព្រោះអ្នកភូមិទាំងនេះ បាននាំគ្នាទៅទិញស្រា.ស មានត្រាំសម្បកឈើនាងនួន ដែលបានត្រាំដាក់លក់នៅតៀមលក់គ្រឿងទេសមួយនៅកណ្តាលភូមិ មកផឹក។

សមត្ថកិច្ចបញ្ជាក់ថា ក្រុមជំនាញនឹងធ្វើកោសល្យវិច្ច័យ លើស្រាដើម្បីឲ្យដឹងថា តើស្រាដែលត្រាំសំបកឈើដាក់លក់ក្នុងភូមិនោះមានសារធាតុ ពុលមែនឬយ៉ាងណា៕

ជំនួបលោក ស ខេង និងលោក កឹម សុខា ធ្វើឡើង៤៥នាទី គ្មានរឿងលោក សម រង្ស៊ី ទេ

December 10, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ: ប្រមុខដឹកនាំគណបក្សដែលមានអាសនក្នុងសភា លោក ស ខេង និងលោក កឹមសុខា នៅល្ងាចថ្ងៃព្រហស្បតិ៍នេះ បានបើកកិវ្ចប្រជុំតាមការគ្រោងទុកដោយមានរយៈពេលតែ ៤៥ នាទីប៉ុណ្ណោះ គិតចាប់ពីម៉ោង ៥ ម៉ោងជិត៦ ល្ងាចនៅវិមានរដ្ឋសភា។

ក្រោយពីកិច្ចប្រជុំបានបញ្ចប់លោក ស ខេង និងលោក កឹម សុខា បានធ្វើសន្និសីតកាសែតរួមគ្នានៅក្រៅបន្ទប់ប្រជុំ ។ ក្នុងនោះ ក៏មានសេចក្តីថ្លែងការណ៍រួម រវាងគណបក្សទាំងពីរ ដោយព្រមព្រៀងគ្នា ៤ ចំណុច។

គួររំឭកថា ករណីសាលក្រមប្រឆាំងលោក សម រង្ស៊ី ,ការបោះឆ្នោតទម្លាក់តំណែងលោកកឹម សុខា ពីអនុប្រធានទី១រដ្ឋសភា ព្រមទាំងបញ្ហាឃុំខ្លួនសកម្មជនគណបក្សសង្គ្រោះជាតិ មិនត្រូវបានលើកឡើងនៅក្នុងកិច្ចប្រជុំនេះទេ។

កិច្ចព្រមព្រៀងរួមរបស់គណបក្សប្រជាជនកម្ពុជា និងគណបក្សសង្គ្រោះជាតិ មានដូចខាងក្រោម៖
១-ចំពោះមុខនេះ បង្កើតគណៈកម្មការចំពោះកិច្ច ដែលចូលរួមដោយគណបក្សទាំងពីរ ដើម្បីពិនិត្យ និងផ្តល់យោបល់លើសេចក្តីព្រាងច្បាប់ ស្តីពី សហជីព។

២-បង្កើត ក្រុមការងារ ដែលចូលរួមដោយគណបក្សទាំងពីរ ដើម្បីសិក្សាស្រាវជ្រាវពិនិត្យលទ្ធភាពដំឡើងកម្រិតនៃវប្បធម៌សន្ទនា ដោយឈរលើស្មារតីនៃសេចក្តីថ្លែងការណ៍រួម រវាងគណបក្សប្រជាជនកម្ពុជា និងគណបក្សសង្គ្រោះជាតិ ចុះថ្ងៃទី៨ ខែឧសភា ឆ្នាំ២០១៥ សំដៅឲ្យមានការជឿទុកចិត្តរវាងគណបក្សនយោបាយនៅក្នុងរដ្ឋសភា ក្នុងការផ្សះផ្សា បង្រួបបង្រួមជាតិ ឲ្យបានស្ថិតស្ថេរយូរអង្វែង។

៣- ពង្រឹងរបៀបរបបការងារ និងទំនាក់ទំនងការងារ ព្រមទាំងការផ្តល់មធ្យោបាយសម្រាប់ថ្នាក់ដឹកនាំតំណាងរាស្ត្រនៃ គណបក្សនយោបាយក្នុងរដ្ឋសភា សំដៅរួមគ្នាលើកកម្ពស់ប្រសិទ្ធភាពនៃស្ថាប័នរដ្ឋសភា។

៤-បន្ត ដោះស្រាយបញ្ហានានា ដែលនៅសេសសល់ ដោយឈរលើស្មារតី បង្រួបបង្រួមជាតិ ផ្សះផ្សាជាតិ និងឯកភាពជាតិ ស្របតាមគោលការណ៍នៃលទ្ធិប្រជាធិបតេយ្យសេរី ពហុបក្ស និងនីតិរដ្ឋ។

ខ្លឹមសារសំខាន់នៃសេចក្តីថ្លែងការណ៍រួមដែលចុះហត្ថលេខាដោយលោក ស ខេង និងលោក កឹម សុខា គឺសំដៅជំរុញលើកកម្ពស់ដំណើរការនៃលទ្ធិប្រជាធិបតេយ្យសេរីពហុបក្ស ការបន្តរួមគ្នាដោះស្រាយបញ្ហានានារបស់ជាតិ ការផ្សះផ្សារជាតិ ស្របតាមឆន្ទៈរបស់ប្រជាពលរដ្ឋ និងដើម្បីជាផលប្រយោជន៍ដ៏ឧត្តុង្គឧត្តមនៃប្រទេសជាតិ៕ដោយ៖ខេមរា

ពលរដ្ឋជាង៣០០គ្រួសារប្រមូលផ្តុំគ្នាប្រឆាំងការរុករករ៉ែ ក្នុងស្រុកកែវសីមា

December 10, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

មណ្ឌលគិរី៖ ប្រជាពលរដ្ឋជាង៣០០គ្រួសារ រស់នៅឃុំចុងផ្លាស់ ស្រុកកែវសីមា នៅព្រឹកថ្ងៃទី ១០ ខែធ្នូ ឆ្នាំ ២០១៥ នេះ បានប្រមូលផ្តុំគ្នានៅមុខសា លាឃុំ ចុងផ្លាស់ ស្រុកកែវសីមា ដើម្បីតវ៉ាប្រឆាំងចំពោះ វត្តមាន របស់ក្រុមហ៊ុនរុករករ៉ែ Rong cheng Industril Invent co.ltd ដោយអះអាងថា នឹងបង្កឲ្យប៉ះពាល់ដល់ការរស់នៅយ៉ាងធ្ងន់ធ្ងរ។

ការប្រឆាំងនេះ កើតឡើងនៅ ក្រោយពេលដែលពលរដ្ឋទាំងនោះទួលដំណឹងថា ក្រសួងរ៉ែ និងថាមពល ចាត់មន្ត្រីជំនាញចុះមកពិនិត្យទីតាំងសាងសង់ធ្វើអាជីវកម្មរ៉ែ របស់ក្រុមហ៊ុន RONG CHENG INDUSTRIAL INVENT CO.LTD ដែលស្ថិតនៅតំបន់មេសំ ឃុំចុងផ្លាស់ ស្រុកកែវសីមា ខេត្តមណ្ឌលគិរី ។

ប្រជាពលរដ្ឋបានបញ្ជាក់ថា កន្លងមកក្រុមហ៊ុនសិក្សារ៉ែ ឈ្មោះ RONG CHENG INDUSTRIAL INVENT CO.LTD បានលួចធ្វើអាជីវកម្មរ៉ែយ៉ាងអាណាធិបតេយ្យចាប់ពីឆ្នាំ2004រហូតដល់ឆ្នាំ2013 និងបានប្រើប្រាស់សារធាតុគីមី បង្ហូរកាកសំណល់ មកលើដីបង្កបង្កើនផល និងដីលំនៅឋានរបស់ពួកគាត់ ដែលធ្វើអោយប៉ះពាល់យ៉ាងខ្លាំងដល់ការរស់នៅរបស់ពួកគាត់ប្រចាំថ្ងៃ ពិសេស ដំណាំបន្លែ សត្វ និងប៉ះពាល់ដល់សុខភាពយ៉ាងខ្លាំង រហូតដល់ពេលបច្ចុប្បន្នពួកគាត់ទទួលដំណឹងថា ក្រុមហ៊ុន RONG CHENG INDUSTRIAL INVENT CO.LTD កំពុងរត់ការសុំធ្វើអាជៅវកម្មរ៉ែមាស។

ប្រភពបន្តថា ហេតុនេះហើយទើបធ្វើអោយពួក គាត់ មានការព្រួយបារម្ភយ៉ាងខ្លាំងចំពោះ ផលប៉ះពាល់ ហើយ ពួកគាត់បានស្នើដល់ក្រសួងពាក់ព័ន្ធពិសេស រដ្ឋមន្ត្រីក្រសួងរ៉ែ និងថាមពល ពិនិត្យឡើងវិញចំពោះការចេញអាជ្ញាប័ណ្ណអាជីវកម្មរ៉ែឲ្យក្រុមហ៊ុន RONG CHENG INDUSTRIAL INVENT CO.LTD ឬមិនត្រូវអនុញ្ញាតឲ្យធ្វើសកម្មភាពរុករករ៉ែនៅក្នុងភូមិសាស្ត្រនោះឡើយ៕ដោយ៖សុខណាត

មនុស្ស៣៧នាក់ស្លាប់ក្នុងហេតុការណ៍វាយប្រហារក្បែរព្រលានយន្តហោះអាហ្វហ្គានីស្ថាន

December 10, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អាហ្វហ្គានីស្ថាន៖ក្រុមសកម្មប្រយុទ្ធតាលីបង់បានវាយប្រហារតំបន់មួយនៅក្បែរព្រលានយន្តហោះអន្តរជាតិ ក្នុងទីក្រុងកង់ដាហា ប្រទេសអាហ្វហ្គានីស្ថានកាលពីម្សិលមិញបណ្តាលឲ្យជនស៊ីវិល ៣៧នាក់បាត់បង់ជីវិត និងច្រើននាក់ទៀតរងរបួស។
យោងតាមប្រភពសារព័ត៌មានចិនស៊ិនហួបាន ចេញផ្សាយនៅថ្ងៃព្រហស្បតិ៍នេះថា ក្រុមសកម្ម ប្រយុទ្ធតាលីបង់បានបើកការវាយប្រហារ ដោយការបាញ់រះទៅលើអគារស្នាក់នៅរបស់ប្រជាជន នៅក្បែរព្រលានយន្តហោះ ភាគខាងត្បូងទីក្រុងកង់ដាហាក្នុងអំឡុងពេល២០ម៉ោង។
គួរបញ្ជាក់ថា ការវាយប្រហារនេះ បានកើតឡើងតែមួយសប្តាហ៍ប៉ុណ្ណោះ បន្ទាប់ពីមេដឹកនាំ កំពូលតាលីបង់បានទទួលមរណភាពបន្ទាប់ពីរងរបួសធ្ងន់ដោយសារតែជម្លោះផ្ទៃក្នុង ដែលគេសង្ស័យថា បណ្តាលមកពីគម្រោងការរៀបចំកិច្ចចរចាសន្តិភាពជាមួយនឹងរដ្ឋាភិបាល៕

ក្រុមចោរកាំភ្លើងអាការប្លន់ថៅកែម៉ាស៊ីនកិនស្រូវនៅស្រុកសង្កែ

December 10, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

បាត់ដំបង៖ក្រុមគ្រួសារថៅរោងម៉ាស៊ីនកិនស្រូវនៅស្រុកសង្កែ កាលពីវេលាម៉ោង៧ះ០០យប់ថ្ងៃទី ៩ ខែធ្នូ កន្លងមកនេះ ត្រូវខ្មាន់កាំភ្លើងមានគ្នីគ្នា៣នាក់ ចូលប្លន់ដល់ក្នុងផ្ទះ ហើយប្រមូលយកទ្រព្យសម្បត្តិមានតម្លៃ និងគ្រឿងអលង្ការ សរុបប្រមាណជាង មួយម៉ឺនដុល្លារអាមេរិក។

ករណីប្លន់ប្រដាប់អាវុធដោយចោរប្លន់មួយក្រុមប្រដាប់ដោយអាវុធអាកា និងកាំភ្លើងខ្លី បានធ្វើសកម្មភាពប្លន់នៅវេលាម៉ោង ៧ ៖00នាទីយប់ ថ្ងៃទី០៩ខែធ្នូឆ្នាំ២០១៥ បានចូលប្លន់ក្នុងភូមិគ្រឹះថៅកែម៉ាស៊ីនកិនស្រូវ ស្ថិតតាមបណ្តោយផ្លូវជាតិលេខ៥នៅភូមិ-ឃុំកំពង់ព្រះ ស្រុកសង្កែ ខេត្តបាត់ដំបង ។

ក្រុមចោរប្លន់បាន ប្រមូលយកលុយបានប្រមាណជាង១ម៉ឺនដុល្លារ និងគ្រឿងអលង្ការមាស ប្រាក់ និងលុយខ្មែរមួយចំនួនទៀត ហើយគេចខ្លួនបាត់ដោយសុវត្ថិភាព។ នេះបើតាមការអះអាងប្រាប់ពីជនរងគ្រោះ។

ថៅកែម៉ាស៊ីនស្រូវដែលត្រូវចោរប្លន់ឈ្មោះ ភាញ ភឿប ភេទប្រុស អាយុ៦០ឆ្នាំ និងប្រពន្ធឈ្មោះ តាន់ ម៉ូរ៉ា រស់នៅក្នុងភូមិកើតហេតុខាងលើ បានរៀបឲ្យដឹងថា ក្រុមចោរប្លន់ប្រដាប់អាវុធមានគ្នីគ្នា៣នាក់ ប្រដាប់ដោយអាវុធអាកា១ដើម និង អាវុធខ្លី១ដើម កន្ត្រៃកាត់ដែក១ និងដែកស្បែង១ បានធ្វើសកម្មភាពសម្រុកចូលក្នុងផ្ទះ ដោយប្រើចុងកាណុងភ្ជង់គំរាមបាញ់សម្លាប់ មនុស្សចំនួន៧នាក់ ដែលមានវត្តមានក្នុងពេលកើតហេតុ ក្នុងនោះរូបគាត់ និងប្រពន្ធ កូនប្រសារ និងកូនបង្កើតចំនួន៤នាក់។

ជនរងគ្រោះបានបន្តទៀតថា ក្រុមចោរប្រដាប់អាវុធអាកា និងកាំភ្លើងខ្លីនេះបានភ្ជង់គាត់ និងកូនប្រសារប្រុសគាត់ រួចចាប់គាត់ចងភ្ជាប់ជាមួយគ្នាព្រមទាំងស្ទុះទៅភ្ជង់ប្រពន្ធ និងកូនស្រីបង្កើត ឲ្យប្រមែប្រមូលទ្រព្យ សម្បត្តិលុយកាក់មាសប្រាក់ដែលមានប្រគល់ទៅឲ្យពួកវា ។ដោយសារភ័យតក់ស្លុតពេក ពួកគាត់បានយករបស់មានតម្លៃ លុយ សរុបប្រមានណជាជាងមួយម៉ឺនដុល្លារសហរដ្ឋអាមេរិក។

តាមការអះអាងបញ្ជាក់បន្ថែមពីកូនប្រុសបង្កើតរបស់ជនរងគ្រោះម្នាក់ឈ្មោះ ភឿប ផាយោ អាយុ៣៦ឆ្នាំ បានសន្និដ្ឋានថា ក្រុមចោរប្លន់ប្រដាប់អាវុធអាកាទាំងនេះទំនងមកពួនសំងំក្នុងបរិវេណភូមិគ្រឺះរបស់គាត់ជាមុន ហើយក្នុងពេលដែលពួកគាត់ត្រឡប់មកពីផ្សារវិញ បើករថយន្តចូលផ្ទះ រួចហើយដើរទៅចាក់សោរទ្វាររបងផ្ទះ ក៏ស្រាប់តែលេចមុខក្រុមចោរទាំងនោះចេញមកភ្ជង់ពួកគាត់ ខ្លួនគាត់ និងឳពុក ដោយចងរូបគាត់ជាមួយឳពុក រួចបន្តភ្ជង់ម្តាយរបស់ខ្លួន ឲ្យប្រមូលទ្រព្យសម្បត្តិដែលមានប្រគល់ទៅឲ្យពួកវា។ពេលពួកវាធ្វើសកម្មប្លន់នេះគឺមានរយៈប្រហែល១ម៉ោង ក្រោយពីប្រមែប្រមូលលុយកាក់ជាង១ម៉ឺនដុល្លារ លុយខ្មែរ និងមាសពេជ្រគ្រឿងអលង្ការមួយចំនួន ហើយវាចាកចេញដោយសុវត្ថិភាព។

ក្រុមគ្រួសារជនរងគ្រោះបានបន្ថែមទៀតថា ក្រោយក្រុមចោរប្លន់ប្រដាប់អាវុធចាកចេញ ពួកគាត់ជនរងគ្រោះបានប្តឹង និងរាយកាយការណ៍ឲ្យសមត្ថកិច្ចហើយភ្លាមៗនោះកម្លាំងសមត្ថកិច្ចប៉ូលីសស្នងការដ្ឋាននគរបាលខេត្តបាត់ដំបង ដឹកនាំដោយលោកឧត្តមសេនីយត្រី ជេត វណ្ណី ស្នងការរងប៉ូលីសខេត្ត បានចុះតាមប្រមាញ់ក្រុមចោរប្លន់ប្រដាប់អសវុធទាំងនោះភ្លាមៗដែរ ប៉ុន្តែរហូតមកដល់ពេលនេះ នៅមិនទាន់ចាប់ឃាត់ខ្លួនបានជនសង្ស័យណាម្នាក់ឡើយ ។
គួរជម្រាបថា ករណីប្លន់ប្រដាប់ដោយអាវុធអាការ បានកម្រើកឡើងវិញជាបន្តបន្ទាប់នៅតាមបណ្តាស្រុកមួយចំនួនក្នុងខេត្តបាត់ដំបងបង្កឲ្យមានការភ័យខ្លាចយ៉ាងខ្លាំងដល់ប្រជាពលរដ្ឋ៕ដោយ៖សុផល

រុស្ស៊ីព្រមានប្រើអាវុធនុយក្លេអ៊ែរកម្ទេចក្រុមឧទ្ទាម ISIS

December 10, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

រុស្ស៊ី៖ប្រធានាធិបតីរុស្ស៊ីលោក Vladimir Putin បានធ្វើការព្រមានថា ប្រព័ន្ធមីស៊ីលក្រោមសមុទ្រដែលប្រតិបត្តិការដោយនាវាមុជទឹកធ្វើ សង្គ្រាមជាមួយក្រុមជ្រុលនិយម ISIS នៅប្រទេសស៊ីរី អាចនឹងបំពាក់ក្បាលគ្រាប់នុយក្លេអ៊ែរ។ ការព្រមានបែបនេះធ្វើឡើងបន្ទាប់ពីរុស្ស៊ីបើកការវាយប្រហារទៅលើក្រុមឧទ្ទាមស៊ីរី ដោយមីស៊ីលពីនាវាមុជទឹកជាលើកដំបូង អមដោយការទម្លាក់គ្រាប់បែកពីលើអាកាស។
លោក ពូទីន បានអះអាងថា កងទ័ពរបស់លោកបានវាយប្រហារលើគោលដៅ៣០០ ផ្សេងគ្នាក្នុងរយៈពេល ៣ថ្ងៃចុងក្រោយ និងជួយឲ្យកងកម្លាំងពិសេសរបស់ប្រទេសស៊ីរីរកឃើញប្រអប់ខ្មៅនៃ យន្តហោះចម្បាំងរុស្ស៊ី ដែលត្រូវបាញ់ទម្លាក់ដោយប្រទេសទួរគីកាលពីខែវិច្ឆិកាកន្លងទៅ។
យ៉ាងណាក្ដីលោកប្រធានាធិបតីរូបនេះបញ្ជាក់ថា មិនចាំបាច់ប្រើសព្វាវុធដ៏សាហាវនេះក្នុងការធ្វើសង្គ្រាមទេ។ អ្វីដែលលោកនិយាយនៅពេលនេះ គឺក្នុងន័យចង់បង្កើនសមត្ថភាពសព្វាវុធ និងគ្រឿងបំពាក់ទាំងឡាយ ដែលផ្គត់ផ្គង់ដល់ទាហានទាំងជើងគោក និងជើងទឹករបស់ប្រទេសរុស្ស៊ីប៉ុណ្ណោះ៕

លោក ពូទីន ចាត់ទុកទង្វើរបស់តួកគី ថាលួចចាក់ពីក្រោយខ្នង

December 10, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

រុស្ស៊ី៖លោកប្រធានាធិបតីរុស្ស៊ី ពូទីន បានព្រមានថា ដោយមិនអាស្រ័យនឹងលទ្ធផលនៃការធ្វើវិភាគប្រអប់ខ្មៅយន្តហោះដែលត្រូវបានតួកគីបាញ់ទម្លាក់នោះ ក្រុងម៉ូស្គូ នឹងពុំកែប្រែ ឥរិយាបថខ្លួនឡើយ ចំពោះទង្វើប្រព្រឹត្តដោយអាជ្ញាធរតួកគីទល់នឹងរុស្ស៊ី ដ្បិតរុស្ស៊ីតែងបានចាត់ទុក តួកគីមិនគ្រាន់តែជាមិត្តប៉ុណ្ណោះទេ តែ ក៏ជាសម្ព័ន្ធមិត្តទៀតផង ក្នុងការប្រយុទ្ធ ទល់នឹងភេរវនិយម ហើយមិនបាននឹកស្មានទាល់តែសោះ ថា តួកគីស្រាប់តែក្បត់នឹងរុស្ស៊ី ដោយចាក់យើងចំពីក្រោយខ្នងតែម្តង។
លោកប្រធានាធិបតី ពូទីន បានថ្លែងថា ការធ្វើវិភាគប្រអប់ខ្មៅនោះនឹងអនុញ្ញាតឲ្យកំណត់ ផ្លូវហោះហើរ ល្បឿន កំពស់ហោះ និងកន្លែងស្ថិតនៅក្នុងអាកាសនៃយន្តហោះរុស្ស៊ី ពេលវាត្រូវបានបាញ់បំផ្លាញ ដោយកងអាកាសតួកគី។
លោក Shoigu បានរៀបរាប់ជូនលោកពូទីនថា ដែនដីដែលយន្តហោះចម្បាំងរុស្ស៊ីធ្លាក់ទៅលើ ក្រោយពីរងការបាញ់ប្រហារដោយតួកគី ត្រូវបាន “រំដោះ” រួចដោយ កងកម្លាំងពិសេសរបស់ស៊ីរី ហេតុដែលអនុញ្ញាតឲ្យគេរកឃើញប្រអប់ខ្មៅនោះ នៅត្រង់តំបន់ដែលមកទល់ពេលនោះឯង គឺបានស្ថិតនៅក្រោមការកាន់កាប់ពួកឧទ្ទាមភេរវជន។
ដោយឡែក ប្រភពការទូត បានឲ្យដឹងថា នៅឯក្រុមប្រឹក្សាសន្តិសុខអ.ស.ប. រុស្ស៊ី បានសុំឲ្យ លើកយកទៅពិនិត្យមើលក្រៅផ្លូវការ បញ្ហាពាក់ព័ន្ធនឹងអន្តរាគមន៍យោធានៃកងទ័ពតួកគី ចូលក្នុងដែនដី ស៊ីរី និង អ៊ីរ៉ាក់។ ជាការកត់សម្គាល់ រាល់តែកិច្ចប្រជុំក្រុមប្រឹក្សានេះ គឺ ត្រូវប្រព្រឹត្តទៅ ក្រោមអធិបតីភាព របស់ស.រ.អា. ដែលឡើងធ្វើជាប្រធានផ្លាស់វេនក្រុមប្រឹក្សា ពេញមួយខែធ្នូនេះ។ ដូចគេដឹងស្រាប់ អាមេរិក ជាសម្ព័ន្ធមិត្តតួកគីតែម្តង៕

ប៉ូលិសបង្ហាញអត្តសញ្ញាណភេរវជនទី៣ ដែលវាយប្រហារក្នុងសាលប្រគំតន្ត្រីក្រុងប៉ារីស

December 10, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ប៉ារីស៖ប៉ូលិសបារាំងកាលពីម្សិលមិញបានទម្លាយឲ្យដឹងនូវអត្តសញ្ញាណរបស់ភេរវជនទី៣ចុងក្រោយដែលបានវាយប្រហារនៅក្នុងសាលប្រគំតន្ត្រីឈ្មោះបាតាក្លង់ ស្ថិតក្នុងទីក្រុងប៉ារីសនាថ្ងៃទី១៣ វិច្ឆិកាកន្លងទៅដែលបានបណ្តាលឲ្យមានមនុស្សស្លាប់ ១៣០នាក់ និងរបួសជាង ៣០០នាក់។
ក្រុមប៉ូលិសទើបបានទម្លាយឲ្យដឹងនូវអត្តសញ្ញាណរបស់ភេរវជនទី៣ ដែលមានឈ្មោះថា Foued Mohamed-Aggad មានអាយុ ២៣ឆ្នាំ និងជាជនជាតិបារាំងមានដើមកំណើតនៅក្នុងទីក្រុង Strasbourg។ Aggad មានបងប្អូនប្រុស ៣នាក់ និងដែលឱពុក និងម្តាយបានលែងលះគ្នាតាំងពីឆ្នាំ ២០០៧។ នៅដំណាច់ឆ្នាំ ២០១៣ Aggad និងបងប្អូនប្រុស ៣នាក់ រួមទាំងមិត្តជិតស្និតចំនួន ៨នាក់ផ្សេងទៀតរស់ក្នុងស្រុកតែមួយបាននាំគ្នាធ្វើដំណើរទៅកាន់ តំបន់ប្រយុទ្ធក្នុងប្រទេសស៊ីរី។
គួរបញ្ជាក់ថា ភេរវជនទាំងអស់៣នាក់ដែលគេដឹងថា បានចូលទៅវាយប្រហារនៅក្នុងសាលប្រគំតន្ត្រីឈ្មោះបាតាក្លង់ក្រុង ប៉ារីសនាយប់ថ្ងៃទី១៣ វិច្ឆិកាកន្លងទៅ ។ ចំណែកភេរវជនទាំង៣នាក់ក៏បានស្លាប់គ្មានសល់ម្នាក់ តែរហូតមកដល់ពេលនេះ គឺទើបមានភេរវជនតែ ២នាក់គត់ដែលគេបានស្គាល់អត្តសញ្ញាណ។ ភេរវជនទី១មានឈ្មោះ Samy Amimour និងភេរវជនទី២ មានឈ្មោះ Ismaël Omar Mostefaï៕

ក្រុម ISIS អំពាវនាវឲ្យម៉ូស្លីមនៅលើពិភពលោកចូលរួមប្រយុទ្ធ

December 10, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

បរទេស៖យោងតាមការចេញផ្សាយរបស់កាសែត The New York Timesបានផ្សាយថា ក្រុមរដ្ឋអ៊ីស្លាម (ISIS) បានអំពាវនាវឲ្យជនម៉ូស្លីម នៅជុំវិញពិភពលោក ជាពិសេសនៅប្រទេសចិនឲ្យចូលរួមជាក្រុមខ្លួនដែលបច្ចុប្បន្នកំពុងតែមានអំណាចនៅក្នុងប្រទេសអ៊ីរ៉ាក់ និងស៊ីរី ។
ក្រុម ISIS បានប្រើប្រាស់ប្រពន្ធអនឡាញ Al Hayat Media Center បង្ហោះសារជាភាសាចិន ដោយបានអំពាវនាវ ឲ្យជនម៉ូស្លីមទាំងអស់ នៅក្នុងប្រទេសចិន ចូលរួមជាមួយក្រុមរបស់ខ្លួន ដោយនៅសារនោះបានសរសេរថា៖ «ក្រោកឡើង» និង «ចាប់កាន់អាវុធទៅប្រយុទ្ធ»។
គួរបញ្ជាក់ថា កាលពីឆ្នាំ២០១៤ មេដឹកនាំក្រុម ISIS លោក Abu Bakr al-Baghdadi បានប្រកាសថា ចិនជាប្រទេសមួយ ដែលសម្បូរឲ្យជនជាតិម៉ូស្លីម៕

Mandatory Credit: Photo by REX USA (2642870a) Hayat Boumeddiene, far right Hayat Boumeddiene ‘appears in Islamic State film’ – 06 Feb 2015 The latest video released by French-speaking Islamic state (ISIS), fighters may be Hayat Boumeddiene, who is believed to have knowledge about the deadly January 9, 2015 attack on a Paris kosher grocery,The video, titled “Blow Up France 2,” was released Tuesday and shows an ISIS fighter praising previous attackers in France and calling for new attacks. The video shows a woman standing next to the speaker, wearing camouflage clothing and holding a weapon. French authorities are investigating the possibility this woman could be Hayat Boumeddiene. Her husband, Amedy Coulibaly, killed four hostages January 9 at a kosher grocery in Paris, authorities said. He was killed by police in a rescue and the remaining hostages fled to safety.

អធិការខណ្ឌដង្កោ បង្ហាញជនសង្ស័យលួចប្លន់ ១០នាក់

December 9, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖ ជនសង្ស័យលួចប្លន់យ៉ាងសកម្ម ចំនួន១០នាក់ក្នុងរាជធានីភ្នំពេញ ត្រូវបានបង្ហាញមុខជាធារណៈ កាលពីព្រឹកថ្ងៃទី ០៩ ខែធ្នូ ឆ្នាំ២០១៥ នៅអធិការដ្ឋាននគរបាលខណ្ឌដង្កោ។

ក្នុងពិធីបង្ហាញមុខជាសាធារណៈក្រោមអធិបតិភាពលោក ជឹម ស៊ីថា អធិការដ្ឋាននគរបាលខណ្ឌដង្កោ លោកព្រះរាជអាជ្ញាប្រចាំខណ្ឌដង្កោ លោក ឈឹម ប៊ុនរត្ន័ អធិការរងទទួលបនន្ទុកផ្នែកព្រហ្មទណ្ឌខណ្ឌដង្កោ និងលោក ប៊ុន សិត្យា នាយការិយាល័យទទួលបន្ទុកផ្នែកព្រហ្មទណ្ឌកម្រិតស្រាលរាជធានីភ្នំពេញ។

ក្មុងឱកាសនោះលោក ជឹម ស៊ីថា អធិការដ្ឋាននគរបាលខណ្ឌដង្កោបានអោយដឹងថា ចំពោះជនសង្ស័យទាំង ១០នាក់នេះបានប្រើល្បិចថ្មីក្នុងការធ្វើសក្មភាព ដោយប្រើស្ដ្រីធ្វើជាធ្នាក់អោយហៅម៉ូតូឌុបជិះ ពេលទៅដល់គោលដៅហុចលុយអោយហើយធ្ងើសកម្មភាពវាយពីក្រោយ។ ហើយលោកបានបន្ដទៀតថា ចំពោះជនស្ស័យទាំង ១០នាក់នេះបានធ្វើសកម្មភាពវាយប្លន់នេះជាញឹកញាប់ ក្នុងរាជធានីភ្នំពេញ ក៍ដូចជាតាមបណ្ដាខេត្ដ។ លោកបានបញ្ជាក់ទៀតថា ចំពោះជនសង្ស័យទាំង ១០នាក់នេះបានប្រើឧបករណ៍ដូចជា ម៉ាលេត ញញួរ និងដែកគាស់ រួមជាមួយនឹង ម៉ូតូ ០២គ្រឿងដែលជាមធ្យោបាយសំរាប់ធ្វើសកម្មភាព។ លោក ជឹម ស៊ីថា បន្ដអោយដឹងទៀតថា ជនសង្ស័យទាំង ១០នាក់មានឈ្មោះដូចខាងក្រោយ៖

ទី ១ ឈ្មោះ ធឿន រ៉ាវី ហៅ រ៉ា ហៅ រិទ្ធ ភេទប្រុស អាយុ ២៩ឆ្នាំ មុខរបរមិនពិតប្រាកដ សា្នក់នៅភូមិទី ០២ សង្កាត់ត្រពាំងក្រសាំង ខណ្ឌពោធិ៍សែនជ័យ។
ទី ២ ឈ្មោះ នី និត ភេទប្រុស អាយុ ៣០ឆ្នាំ មុខរបរមិនពិតប្រាកដ ស្នាក់នៅផ្ទះជួលម្ដុំ ក្ដាន់២ សង្កាត់មិត្ដភាព ខណ្ឌ៧មករា រាជធានីភ្នំពេញ។
ទី ៣ ឈ្មោះ សួង សុខនាង ភេទស្រី អាយុ ២២ឆ្នាំ មុខរបរមិនពិតប្រាកដ ស្នាក់នៅផ្ទះជួលភូមិព្រៃព្រីង សង្កាត់ចោមចៅ ខណ្ឌពោធិ៍សែនជ័យ។
ទី ៤ ឈ្មោះ រឿង សុវណ្ណ ហៅភ្លើង ភេទប្រុស អាយុ ៣៤ឆ្នាំ មុខរបរមិនពិតប្រាកដ ស្នាក់នៅផ្ទះជួលភូមិ ចំរើនផល សង្កាត់បឹងទំពុន ខណ្ឌមានជ័យ។
ទី ៥ ឈ្មោះ ស៊ុន តឹកឡាយ ហៅគឹម ភេទប្រុស អាយុ ២២ឆ្នាំ មុខរបរមិនពិតប្រាកដ ទីលំនៅមិនពិតប្រាកដ។
ទី ៦ ឈ្មោះ គីង គឹមស៊ន ហៅវ៉េវ ភេទប្រុស អាយុ ៣១ ឆ្នាំ មុខរបរមិនពិតប្រាកដ ស្នាក់នៅផ្ទះជួលក្បែរផែស្ងួត តេង ឡាយ សង្កាត់ចោមចៅ ខណ្ឌពោធិ៍សែនជ័យ។
ទី ៧ ឈ្មោះ វណ្ណ ដារ៉េត ភេទស្រី អាយុ ២៩ឆ្នាំ មុខរបរមិនពិតប្រាកដ ទីលំនៅភូមិព្រះពោធិ៍ ឃុំភ្នំបាទ ស្រុកពញ្ញាឮ ខេត្ដកណ្ដាល។
ទី ៨ ឈ្មោះ មឿន គន្ធា ហៅចិន្ថា ភេទស្រី អាយុ ៣៣ឆ្នាំ មុខរបរមិនពិតប្រាកដ ទីលំនៅភូមិវត្ដថ្មី ឃុំព្រែកដំបង ស្រុកមុខកំពូលខេត្ដកណ្ដាល។
ទី ៩ ឈ្មោះ រិន បុរិទ្ធ ហៅរិទ្ធ ភេទប្រុស អាយុ ២៣ឆ្នាំ មុខរបរមិនពិតប្រាកដ លំនៅភូមិ កន្ទោងជើង សង្កាត់កន្ទោក ខណ្ឌពោធិ៍សែនជ័យ។
ទី ១០ ឆឹង ពិដោរ ភេទប្រុស អាយុ ៣៧ឆ្នាំ មុខរបរមិនពិតប្រាកដ ទីលំនៅផ្ទះជួលផ្ទះជួលភូមិ ជម្ពូវន្ដ័ សង្កាត់ចោមចៅ ខណ្ឌពោធិ៍សែនជ័យ។

ពេលបច្ចុប្បន្ន ជនសង្ស័យទាំង ១០នាក់ រួមទាំងវត្ថុតាង ខាងសមត្ថកិច្ចកំពុងកសាងសំណុំរឿង ដើម្បីបញ្ជូនទៅ សាលាដំបូងរាជធានីភ្នំពេញ ដើម្បីចាត់ការតាមនិតិវិធីច្បាប់។

គួរំលឹកដែថាចំពោះករណីទាំង ១២ករណីដែលជនសង្ស័យទាំង ១០នាក់បានប្រព្រឹត្ដិកន្លងមករាជធានីភ្នំពេញ ក៍ដូចជាតាមបណ្ដាខេត្ដនានា ពេលនេះត្រូវបានសមត្ថកិច្ចខណ្ឌដង្កោ បានសហការជាមួយការិយាល័យព្រហ្មទណ្ឌកម្រិតស្រាលរាធានីភ្នំពេញង្ក្រាបបានជាស្ថាពរ៕ ដោយ៖គឹម បញ្ញា

ប៉ូលីសសេដ្ឋកិច្ចក្រសួងមហាផ្ទៃរឹបអូសសំបកកង់ ពោះវៀនកង់ម៉ូតូ ដែលនាំចូលខុសច្បាប់

December 9, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តបាត់ដំបង៖ ព្រឹកថ្ងៃទី០៩ ខែធ្នូ ២០១៥ វេលាម៉ោង៨:៣០នាទី ប៉ូលីស នៃនាយកដ្ឋាន ប្រឆាំងបទល្មើសសេដ្ឋកិច្ច ក្រសួងមហាផ្ទៃ ដឹកនាំដោយលោកឧត្តមសេនីយ៍ត្រី ឡុង ស្រេង អនុប្រធាននាយក ដ្ឋានប្រឆាំងបទល្មើស សេដ្ឋកិច្ច ក្រសួងមហាផ្ទៃ និងដោយមានកិច្ចស ហការ ពីកម្លាំងការិយាល័យ ប្រឆាំងបទល្មើស សេដ្ឋកិច្ច នៃស្នងការ ដ្ឋាននគរបាលខេត្តបាត់ ដំបង ដឹកនាំដោយលោក ម៉ៅ រង្សី ប្រធានការិ យាល័យបទល្មើសសេដ្ឋកិច្ចខេត្ត បានចុះបង្ក្រាបទីតាំងលក់គ្រឿងបន្លាស់ម៉ូតូគ្រប់ប្រភេទ នៅតាមបណ្តោយផ្លូវជាតិលេខ៥ ដែលមាន ស្លាកយីហោ គង់ ណាំ ផ្ទះលេខ១៧ ភូមិព្រែកមហាទេព សង្កាត់ស្វា យប៉ោ(ស្ថិតនៅប្លុកបុរីព្រែក មហាទេព) ក្រុង-ខេត្តបាត់ដំបងដែលមាន ឈ្មោះ គង់ ណាំ អាយុ៣៣ឆ្នាំ ជាម្ចាស់អាជីវកម្ម។

តាមការគូសបញ្ជាក់របស់លោកឧត្តមសេនីយត្រី ឡុង ស្រេង អនុប្រធាននាយកដ្ឋានប្រឆាំងបទ ល្មើសសេដ្ឋកិច្ចក្រសួងមហាផ្ទៃ បានឲ្យើដឹងថា ការចុះឆែកឆេរផ្ទះដែលមានស្លាកយីហោ គង់ ណាំ ខាងលើនេះ គឺធ្វើឡើងដោយយោងតាមពាក្យបណ្តឹង របស់ មេធាវី ចាប កែវ ដែល
ជាមេធាវី តំណាងដោយអាណត្តិ ជូនក្រុមហ៊ុន គង់ នួន គ្រុប(Koung Noun Group Co.,Ltd)។ ដែលជាក្រុមហ៊ុនទទួលបានសិទ្ធិផ្តាច់មុខ លើការនាំចូល និងចែកចាយផលិតផល សំបកកង់ និង ពោះវៀនកង់ ទោចក្រយានយន្តម៉ាកIRC ពីក្រុមហ៊ុន Inoue Rubber(Thailand) Public Company Limitedរបស់ប្រទេសថៃ នៅក្នុងទីផ្សារព្រះរាជា ណាចក្រកម្ពុជា។

លោកឧត្តមសេនីយត្រី ឡុង ស្រេង បានគូសបញ្ជាក់ឲ្យដឹងទៀត ថា៖ យោងតាមពាក្យបណ្តឹង និងកន្លងមកនេះ មានផលិតផលសំបក កង់និងពោះវៀនកង់ម៉ូតូម៉ាក IRC ក្លែងបន្លំម៉ាក និងខុសច្បាប់ជាច្រើន
កំពុងត្រូវបាននាំចូល និងចែកចាយដោយឈ្មួញមួយចំនួន នៅតាមទី ផ្សារមួយចំនួនក្នុងព្រះរាជាណាចក្រកម្ពុជាជាពិសេសនៅក្នុងខេត្តបាត់ ដំបងតែម្តង។ ដែលនេះជាសកម្មភាពបានរំលោភលើសិទ្ធិផ្តាច់មុខនិង
ធ្វើឲ្យខូចផលប្រយោជន៍ស្របច្បាប់របស់ក្រុមហ៊ុន គង់ នួន គ្រុបដែល
ជាក្រុមហ៊ុនមានសិទ្ធិនាំចូល និងចែកចាយ នូវ ផលិតផលម៉ាក IRC
ត្រឹមត្រូវតាមច្បាប់របស់ព្រះរាជាណាចក្រកម្ពុជា។

វត្ថុតាងផលិតផលក្លែងក្លាយជាក់ស្តែង ដែលកម្លាំងសមត្ថកិច្ចចុះ
បង្ក្រាបនិងរឹបអូសជាវត្ថុតាង រួមមាន៖ សំបកកង់ម៉ូតូម៉ាក IRC ចំនួន
១២៦ សំបក, ពោះវៀនម៉ូតូម៉ាក IRC ចំនួន០៣ប្រភេទ សរុបចំនួន ៦៣០ពោះវៀន។ ហើយវត្ថុតាងទាំងនេះ ត្រូវបានសមត្ថកិច្ចប៉ូលីស សេដ្ឋកិច្ចក្រសួងនិងខេត្តបានយកទៅរក្សាទុកនៅការិយាល័យប្រឆាំង
បទល្មើសសេដ្ឋកិច្ច នៃ ស្នងការដ្ឋាននគរបាលខេត្តបាត់ដំបង ដើម្បីក សាងសំណុំរឿងតាមនីតិវិធីល្មើសជាក់ស្តែង បញ្ជូនទៅតុលាការខេត្ត បាត់ដំបង។

សូមបញ្ជាក់ថា៖ យោងតាមពាក្យបណ្តឹងរបស់មេធាវីក្រុមហ៊ុន គង់
នួន គ្រុប ក្រុមហ៊ុនបានដាក់ពាក្យបណ្តឹងសំណងចំនួន ៥០ម៉ឺនដុល្លារ
ពីម្ចាស់អាជីវកម្ម ឈ្មោះ គង់ ណាំ ខាងលើ៕. ដោយ៖សំអាន

ចិនរិះគន់អាមេរិកចំពោះការដាក់យន្ត ហោះស៊ើបការណ៍ទៅកាន់ប្រទេសសិង្ហបុរី

December 9, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ប៉េកាំង៖រដ្ឋាភិបាលក្រុងប៉េកាំងបានរិះគន់អាមេរិកពាក់ព័ន្ធការដាក់ពង្រាយយន្តហោះយោធា ប្រភេទ US Navy P-8 Poseidon ទៅកាន់ប្រទេសសិង្ហបុរី ដែលស្ថិតនៅតំបន់អាស៊ីអាគ្នេយ៍មួយនេះ ខណៈភាពតានតឹងកំពុងកើតមានក្នុងជម្លោះសមុទ្រចិនខាងត្បូង ។ នេះបើតាមសារព័ត៌មាន AP ។
ការរិះគន់នេះធ្វើឡើងបន្ទាប់ពីមានការចុះហត្ថលេខា លើកិច្ចព្រមព្រៀងសហប្រតិបត្តិការការពារជាតិ រវាងរដ្ឋមន្ត្រីការពារជាតិ សហរដ្ឋអាមេរិក លោក Ash Carton និងរដ្ឋមន្ត្រីការពារជាតិសិង្ហបុរី លោក Ng Eng Hen ដែលបានធ្វើឡើងកាលពីថ្ងៃចន្ទកន្លងទៅ ចំពោះការបញ្ជូបយន្តហោះ P-8 ដែលប្រដាប់ដោយបច្ចេកវិទ្យា Sensor និងប្រព័ន្ធរ៉ាដា ដែលមានសមត្ថភាពក្នុងប្រមូលព័ត៌មាន និងបាញ់ប្រហារទៅលើនាវាមុជទឹក។
អ្នកនាំពាក្យក្រសួងការបរទេសចិន លោក Hua Chuying បានលើកឡើងថា យោធាដ៏រឹងមាំរបស់សហរដ្ឋអាមេរិក នាពេលបច្ចុប្បន្ន មិនផ្តល់ភាពងាយស្រួល ចំពោះសាធារណជន និងផលប្រយោជន៍រយៈពេលយូរអង្វែងនោះទេ ក្នុងចំណោមបណ្តាប្រទេសនៅក្នុងតំបន់ យើងសង្ឃឹមថា ភាគីដែលពាក់ព័ន្ធ នឹងផ្តល់ភាពទុកចិត្តរវាងគ្នាទៅវិញទៅមក ក្នុងចំណោមបណ្តាប្រទេសក្នុងតំបន់។
គួរបញ្ជាក់ថា ប្រទេសចិនបច្ចុប្បន្នកំពុងមានជម្លោះជាមួយបណ្តាប្រទេស អាស៊ីអាគ្នេយ៍ចំនួន៤ ក្នុងនោះរួមទាំងសម្ព័ន្ធមិត្តរបស់ សហរដ្ឋអាមេរិកផងដែរ គឺប្រទេស វៀតណាម និងហ្វីលីពីន ហើយកាលពីខែតុលាកន្លងទៅនេះ សហរដ្ឋអាមេរិកបានបញ្ជូននាវាចម្បាំងមួយគ្រឿង ល្បាតនៅក្បែរប្រជុំកោះជម្លោះ Spratly ដែលបង្កឲ្យរដ្ឋាភិបាលក្រុងប៉េកាំងមានការខឹងសម្បាជាខ្លាំង៕

ក្រុមចោរ6នាក់បាញ់បុរសម្នាក់ស្លាប់ប្លន់យកម៉ូតូ១គ្រឿងនៅសង្កាត់បឹកក់១

December 9, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ ក្រុមចោរប្លន់ប្រដាប់អាវុធមាន គ្នា៦នាក់ ជិះម៉ូតូ៣គ្រឿង បានធ្វើសកម្មភាពបាញ់សម្លាប់ ប្លន់យកម៉ូតូមួយគ្រឿងយ៉ាងសាហាវ បណ្តាលឲ្យជន រងគ្រោះស្លាប់ពេលបញ្ចូនទៅមន្ទីរពេទ្យ កាលពីវេលាម៉ោង ១និង០៥នាទី រំលងអាធ្រាតឈានចូល ថ្ងៃទី០៩ ខែធ្នូ ឆ្នាំ២០១៥ នៅតាមបណ្តោយ ផ្លូវលេខ ២៧៥ កែងផ្លូវលេខ ៥២៨ ភូមិទំបនទួលគោក សង្កាត់បឹងកក់១ ខណ្ឌទួលគោក ទល់មុខការដ្ឋានធ្វើរថយន្ត អេ ភី អេស ។

យោងតាមប្រភពព័ត៌មានពីយុវជនម្នាក់ត្រូវជាមិត្រភ័ក្តិរបស់ជនរងគ្រោះ បានឲ្យដឹងថា មុនពេលកើតហេតុពួកគេបានជិះម៉ូតូពីរគ្រឿង ចេញពីក្លិប អារីណា នៅម្តុំកាំកូសិតធី ដោយជិះធ្វើដំណើរតាមបណ្តោយផ្លូវលេខ ៥២៨ ក្នុងទិសដៅពីលិចទៅកើត ខណៈមកដល់ កន្លែងស្ងាត់ ក៏ស្រាប់តែមានជនសង្ស័យ៦នាក់ជិះម៉ូតូ៣គ្រឿងទីមួយម៉ាកនិច ទី២ម៉ាក ឡែត ទី៣ម៉ាកស្មាស់ មិនចាំស្លាកលេខបានជិះមកកៀរពួកគេ (ជនរងគ្រោះ) ឲ្យឈប់ម៉ូតូ តែពេលនោះពួកគេ មិនព្រមឈប់ម៉ូតូឡើយ ក៏ជនសង្ស័យនោះដកកាំភ្លើង បាញ់សំដៅមករកពួកគេមួយគ្រាប់ តែមិនត្រូវ ។ ភ្លាមៗនោះពួកគេ(ជនរងគ្រោះ)ក៏ជិះចែកផ្លូវគ្នា ដើម្បីរកកន្លែងមានសុវត្ថិភាព ដោយមានការភ័យខ្លាចពេកក៏ ធ្វើអោយមិត្តភក្តិរបស់គេដែលជិះម៉ូតូម៉ាក ហុងដាឌ្រឹមសេ ១២៥ ស៊េរី២០០៦ ឡើងស៊េរី ២០១៣ ពណ៌ ខ្មៅ ពាក់ស្លាកលេខ កំពត 1A-6665 ជិះឌុបគ្នាបីនាក់នោះ ទៅរអិលដួលនៅមុខការដ្ឋានធ្វើរថយន្ត អេ ភី អេស ស្របពេលជនសង្ស័យជិះមកពីក្រោយក៏ បាញ់ប្រហារមួយគ្រាប់ទៀត បណ្តាលអោយចំជនរងគ្រោះដែលជាអ្នកបើកម៉ូតូឈ្មោះ ផាន់ ណាឌុប អាយុ ១៦ឆ្នាំ ជាសិស្ស ស្នាក់នៅម្តុំអង់តែន ទួលគោក ត្រូវមួយគ្រាប់ក្រោមដោះ ធ្លោយពីម្ខាងទៅម្ខាងរងរបួសធ្ងន់ តែដោយស្ថានភាពជនរងគ្រោះធ្ងន់ធ្ងរពេកក៏ស្លាប់បាត់បង ជីវិត ពេលគេដឹកយកមកសង្គ្រោះដល់មន្ទីរ ពេទ្យកាល់ម៉ែត។

ទោះជាយ៉ាងណាក្រុមចោរប្លន់ធ្វើសកម្មភាពបានសម្រេចដោយយកម៉ូតូជនរងគ្រោះទៅបាត់ដោយសុវត្ថិភាព គ្មានខ្លាចរអាសមត្ថកិច្ចសូម្បីតែបន្តិច ។ ក្រោយធ្វើកោសល្យវិច័យរួច សមត្ថកិច្ចបានប្រគល់ សាកសពឲ្យទៅក្រុមគ្រួសារ ដើម្បីធ្វើបុណ្យ តាមប្រពៃណី ។

អំពើចោរកម្មប្លន់ប្រដាប់អាវុធ ចោរឆក់តាមដងផ្លូវ ចោរគាស់ផ្ទះប្រជាពលរដ្ឋយកទ្រព្យសម្បត្តិ ចោរកាច់សោ.កម៉ូតូ និងចោរលួចស្លាកលេខរថយន្តជាដើម កំពុងកើតឡើងយ៉ាងពេញបន្ទុកក្នុងរាជធានីភ្នំពេញ ហើយសមត្ថកិច្ចនគរបាលនិងសមត្ថកិច្ចកងរាជអាវុធហត្ថបង្ក្រាបមិនចេះអស់នោះទេ។ អំពើចោរកម្មគ្រប់រូបភាពកំពុងធ្វើឲ្យប៉ះពាល់យ៉ាងខ្លាំងដល់សន្តិសុខសង្គម ហេតុនេះហើយទើបនៅពេលចាប់បានចោរឆក់ចោរលួចម្ដងៗប្រជាពលរដ្ឋប្រើអំពើហិង្សាទៅលើក្រុមចោរទាំងនោះយ៉ាងចាស់ដៃ។

ប្រជាពលរដ្ឋក្នុងរាជធានីភ្នំពេញកំពុងតែអស់ជំនឿលើមន្ត្រីអាជ្ញាធរនិងសមត្ថកិច្ចក្នុងការពង្រឹងសន្តិសុខសង្គម ព្រោះបទល្មើសលួចឆក់ប្លន់កើតឡើងទាំងយប់ទាំងថ្ងៃ៕ដោយ ៖រដ្ឋា

អ៊ីរ៉ាក់៖តួកគីជាមណ្ឌលជួញដូរប្រេងខុសច្បាប់ដ៏ធំរបស់ក្រុម ISIS

December 9, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អ៊ីរ៉ាក់៖នាយករដ្ឋមន្ត្រីអ៊ីរ៉ាក់ លោក Haider Abadi បានចោទប្រកាន់ប្រទេសតួកគីថា ជាមជ្ឈមណ្ឌលជួញដូរប្រេងខុសច្បាប់ទ្រង់ទ្រាយធំមួយរបស់ពួកឧទ្ទាម ISIS ។ ការចោទប្រកាន់បែបនេះធ្វើឡើងបន្ទាប់ពីយោធាតួកគីបានបំពានយ៉ាងធ្ងន់ធ្ងរទៅលើដែនអធិបតេយ្យភាពអ៊ីរ៉ាក់។ នេះបើយោងតាម សារព័ត៌មាន RT។
ក្នុងកិច្ចប្រជុំជាមួយរដ្ឋមន្ត្រីការបរទេសអាល្លឺម៉ង់ លោក Frank-Walter Steinmeier នាយករដ្ឋមន្ត្រីរូបនេះបានសង្កត់ធ្ងន់ ពីសារៈសំខាន់នៃការបញ្ឈប់ការជួញដូរប្រេងខុសច្បាប់ក្នុងតំបន់ក្រោមការគ្រប់គ្រងរបស់ពួកជីហាតក្នុងប្រទេសអ៉ីរ៉ាក់ និងស៊ីរី។ មិនតែប៉ុណ្ណោះ លោកបានអំពាវនាវដល់សហគមន៍អន្តរជាតិ ជួយប្រទេសអ៉ីរ៉ាក់ ដើម្បីប្រឆាំងនឹងពួកឧទ្ទាម ISIS
គួរបញ្ជាក់ថា តាមរបាយការណ៍ស៊ើបអង្កេតរបស់រុស្ស៊ីបានបង្ហាញថា ប្រាក់ចំណូលរបស់ពួកឧទ្ទាម ISIS ជាង៤៣ភាគរយ បានមកពីជំនួញប្រេងខុសច្បាប់ ហើយការជួញដូរប្រេងខុសច្បាប់របស់ពួកឧទ្ទាម ភាគច្រើនធ្វើឡើងនៅក្នុងប្រទេសតួកគី៕