All posts by មេគង្គ ប៉ុស្តិ៍

សម្តេច ហ៊ុន សែន សុំធ្វើជាប្រធានចលនាមិនចូលបក្សសម្ព័ន្ធវិញ បើCPPឈ្នះឆ្នោតទៀត

October 20, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ នាយករដ្ឋមន្ត្រីកម្ពុជា បានលើកឡើងថា បើសិនជាគណបក្សប្រជាជនបន្តឈ្នះឆ្នោត នៅអាណត្តិក្រោយនោះ សម្តេច នឹងស្នើធ្វើជាប្រធានចលនាមិនចូលបក្សសម្ព័ន្ធវិញម្តង គឺនៅបន្ទាប់ពីកម្ពុជា បានដឹកនាំកិច្ចប្រជុំអន្តរជាតិសំខាន់ៗ ចំនួន២ នៅក្នុងរាជរដ្ឋាភិបាល នីតិកាលទី៦ នេះ គឺកម្ពុជានឹងធ្វើជាប្រធានកិច្ចប្រជុំ អាស៊ី-អឺរ៉ុប នៅឆ្នាំ២០២០ និងធ្វើជាប្រធានអាស៊ានជាលើកទី៣ នៅឆ្នាំ២០២២ ខាងមុខនេះ។

នាយករដ្ឋមន្ត្រីកម្ពុជា បានថ្លែងបែបនេះ នៅក្នុងជំនួបសំណេះសំណាលជាមួយប្រជាពលរដ្ឋកម្ពុជាជាង១ពាន់នាក់ ពីប្រទេសហុងគ្រី បារាំង និងអាល្លឺម៉ង់ កាលពីយប់ថ្ងៃទី១៩ ខែតុលា កន្លងទៅនៅទីក្រុងប្រ៊ុចសែល ប្រទេសប៊ែលហ្សិក៕

សហភាពអន្តរសភាចេញសេចក្តីសម្រេចស្នើឱ្យដោះលែងលោក កឹម សុខា

October 20, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

វ៉ាស៊ីនតោន ៖ សហភាពអន្តរសភា (IPU) ស្នើសុំជាថ្មីឱ្យអាជ្ញាធរកម្ពុជាដោះលែងលោក កឹម សុខា អតីតប្រធានគណបក្សសង្គ្រោះជាតិ និងទម្លាក់ចោលការចោទប្រកាន់នានាព្រមទាំងអនុញ្ញាតឱ្យលោកបានមកដឹកនាំគណបក្សឡើងវិញ។ នេះបើតាមចេញសេចក្តីសម្រេចមួយរបស់សហភាពអន្តរសភា (IPU) ដែលចេញ ឆ្នាំ២០១៨ នេះ។

ប្រភពព័ត៌មានពី វីអីអេ បានផ្សាយថា សេចក្តីសម្រេចដែលចេញកាលពីថ្ងៃព្រហស្បតិ៍ក៏បានច្រានចោលការដកយកអាសនៈសភាទាំង៥៥របស់អតីតគណបក្សសង្គ្រោះជាតិហើយហាមអតីតអ្នកតំណាងរាស្ត្រទាំងនោះមិនឱ្យធ្វើនយោបាយរយៈពេល៥ឆ្នាំថាជា«ការដើរផ្ទុយទាំងស្រុងនឹងសិទ្ធិបុគ្គលនិងសមូហភាពក្នុងការចូលរួមបំពេញកិច្ចការសាធារណៈនិងសិទ្ធិទទួលបានការកាត់ក្តីដោយយុត្តិធម៌‍»។

សហភាពអន្តរសភាបានបើកការប្រជុំពីថ្ងៃទី១៤ ដល់១៨ ខែតុលា នៅទីក្រុងហ្សឺណែវ ប្រទេសស្វីសហើយក៏មានការចូលរួមពីប្រតិភូសភារបស់កម្ពុជា ផងដែរ។

ប្រតិភូកម្ពុជាបានប្រាប់ដល់សហភាពអន្តរសភាថា បើអតីតសមាជិកក្រុមប្រឆាំង«នៅស្ងាត់ស្ងៀម‍»គឺពួកគេអាចនឹងធ្វើនយោបាយបានវិញក្នុងរយៈពេលបួនឆ្នាំទៀតពេលដែលបំរាមបានផុតប៉ុន្តែក្នុងពេលនេះគឺពួកគេត្រូវតែទទួលតាមការសម្រេចរបស់តុលាការ‍។ នេះបើតាមការបញ្ជាក់នៅក្នុងសេចក្តីសម្រេចដែលមាន១២ចំណុចនេះ។

តុលាការកំពូលបានសម្រេចរំលាយគណបក្សសង្គ្រោះជាតិដែលជាអតីតគណបក្សប្រឆាំងកាលពីខែវិច្ឆិកាឆ្នាំ២០១៧ បន្ទាប់ពីបានចាប់ខ្លួនលោក កឹម សុខា ដាក់ពន្ធនាគារដោយចោទពីបទឃុបឃិតជាមួយនឹងបរទេសដើម្បីផ្តួលរំលំរដ្ឋាភិបាលកម្ពុជា។

ប៉ុន្តែសេចក្តីសម្រេចរបស់សហភាពអន្តរសភាបានហៅការចោទប្រកាន់ និងឯកសារវីដេអូ ប្រើប្រាស់ដាក់បន្ទុកនោះថា «គ្មានអ្វីដែលជាបទល្មើសព្រហ្មទណ្ឌទាល់តែស‍ោះ»ហើយថាលោកកឹម សុខាក៏មិនបានញុះញ៉ង់ឱ្យមានអំពើហិង្សាអ្វីទេ។ សហភាពអន្តរសភាក៏បានច្រានចោលវីដេអូនោះ។

គណៈប្រតិភូសភាកម្ពុជាបានសម្តែងការ «ខកចិត្ត‍» ចំពោះសេចក្តីសម្រេចនោះហើយចោទថាគណៈកម្មាធិការសិទ្ធិមនុស្សសហភាពអន្តរសភាផ្អែកការសម្រេចចិត្តរបស់ពួកគេ«ហាក់ពុំបានធ្វើការគិតគូពិចារណាឱ្យបានម៉ត់ចត់ឡើយ»។

សេចក្តីថ្លែងការណ៍របស់គណៈប្រតិភូកម្ពុជាដែលចេញកាលពីថ្ងៃទី១៨ តុលា នោះ ដែរ បានបន្ថែមថា គណៈកម្មាធិការបានផ្អែកលើប្រភពព័ត៌មានដែលមានលក្ខណៈនយោបាយពីភាគីម្ខាងហើយ«លាបពណ៌ប្រទេសកម្ពុជាឱ្យខ្មៅងងឹត‍»។

លោកកឹម សុខានៅបន្តជាប់ឃុំនៅក្នុងលំនៅដ្ឋាននៅឡើយហើយការស្នើសុំជួបលោកដោយប្រតិភូសហភាពអន្តរសភាត្រូវបានអាជ្ញាធរកម្ពុជាបដិសេធជាបន្តបន្ទាប់៕

សម្តេច ហ៊ុន សែន ថ្លែងថា EBA គង់តែបាត់បង់នៅពេលកម្ពុជាក្លាយជាប្រទេសមានសេដ្ឋកិច្ចខ្ពស់

October 20, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ សម្តេច ហ៊ុន សែន ថ្លែងកាលពីយប់ថ្ងៃទី១៩ ខែតុលា នាទីក្រុងប្រ៊ុចសែល ថា «EBA គង់តែបាត់បង់ពីកម្ពុជា នៅពេលកម្ពុជាបានក្លាយជាប្រទេសមានសេដ្ឋកិច្ចខ្ពស់» ។ បច្ចុប្បន្នសម្តេចកំពុងធ្វើការជាមួយប្រទេស និងស្ថាប័នអន្តរជាតិចំនួន២ ដើម្បីបន្តផ្តល់កម្ចី ក្នុងអត្រាការប្រាក់អនុគ្រោះរយៈពេល១០ឆ្នាំ និងមានលទ្ធភាពសងរយៈពេល៤០ឆ្នាំ។

ការថ្លែងបែបនេះ បានធ្វើឡើងក្នុងឱកាសជួបសំណេះសំណាលជាមួយប្រជាពលរដ្ឋជាង១ពាន់នាក់ ពីប្រទេសហុងគ្រី បារាំង និងអាល្លឺម៉ង់ កាលពីយប់ថ្ងៃទី១៩ ខែតុលា នៅទីក្រុងប្រ៊ុចសែល ប្រទេសប៊ែលហ្សិក ។

សម្តេចនាយរដ្ឋមន្ត្រីបានបញ្ជាក់បន្តថា សម្តេចបានធ្វើការមួយជំហានជាមួយជប៉ុន និងធនាគារអភិវឌ្ឍន៍អាស៊ី ដើម្បីឱ្យភាគីទាំងនេះ បន្តផ្តល់អត្រាការប្រាក់អនុគ្រោះរយៈពេល១០ឆ្នាំ ហើយលទ្ធភាពសងរយៈពេល៤០ឆ្នាំ ។
ប្រមុខរាជរដ្ឋាភិបាលកម្ពុជារូបនេះក៏បានអះអាងថា កម្ពុជាមិនទាន់បាត់បង់អ្វីទាំងអស់ ចំពោះការអនុគ្រោះពន្ធទំនិញពីសហភាពអឺរ៉ុប ។ បញ្ហានេះ ត្រូវបានគេយកធ្វើជាសង្គ្រាមចិត្តសាស្ត្រវាយប្រហារលើរាជរដ្ឋាភិបាលកម្ពុជាប៉ុណ្ណោះ។

សម្តេចនាយករដ្ឋមន្ត្រីបន្តថា កម្ពុជានៅមានលទ្ធភាពខ្ពស់ក្នុងការខ្ចីថវិកាពីបរទេស ប៉ុន្តែកម្ពុជាកំណត់ត្រាកម្ចីបរទេសត្រឹម ២៣ភាគរយ ប៉ុណ្ណោះ ធៀបជាមួយចំណូលសេដ្ឋកិច្ចជាតិ ពោលគឺកម្ពុជាមានលទ្ធភាពក្នុងការដោះស្រាយបញ្ហារបស់ខ្លួន លើបញ្ហាផ្សេងៗជាច្រើន មិនមែនសុទ្ធតែពឹងលើបំណុលបរទេសនោះទេ៕

ទឹកភ្លៀងហូរគំហុកពីភ្នំគិរីរម្យ បណ្តាលឲ្យបាក់ទំនប់មួយខ្សែនៅស្រុកភ្នំស្រួច

October 20, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ខេត្តកំពង់ស្ពឺ ៖ កាលពីរសៀលថ្ងៃទី២០ ខែតុលា ឆ្នាំ២០១៨ នេះ អាជ្ញាធរស្រុកភ្នំស្រួច បាននិយាយឲ្យដឹងថា នៅអំឡុងម៉ោង ៩និង២០នាទី ព្រឹកមានភ្លៀងធ្លាក់យ៉ាងខ្លាំង នៅលើភ្នំគិរីរម្យ ហើយទឹកបានហូរធ្លាក់ យ៉ាងកំហុគបណ្តាលអោយបាក់ទំនប់មួយខ្សែចំនួន ១២ម៉ែត្របណ្តោយ១២០ម៉ែត្រស្ថិត នៅចំណុចភូមិចំបក់ ឃុំចំបក់ ស្រុកភ្នំស្រួច ខេត្តកំពង់ស្ពឺ។

អាជ្ញាធរស្រុកបានបន្តទៀតថា ហើយបន្ទាប់ពីធ្វើការរាយការណ៍ទៅអាជ្ញាធរខេត្តភ្លាមៗនោះមានសេចក្តីរាយការណ៍បន្ទាន់ថា មានក្មេងៗដែលឃ្វាលគោ នៅទីនោះចំនួន១០នាក់ បានរត់គេចចេញពីចំណុចកើតហេតុ ខ្លះឡើងដើមឈើតោងមែកឈើ ប៉ុន្តែមិនមានគ្រោះថ្នាក់ក្មេងៗទាំងអស់នោះឡើយ ហើយ ក្នុងនោះក៏មានភ្ញៀវទេសចរ ជាជនបរទេសចំនួន៣នាក់ ស្រី២នាក់ផងដែរនៅក្នុងហេតុការណ៍នោះ តែពេលនេះបានត្រឡប់មកវិញដោយសុវត្ថិភាពអស់ហើយ។

ហើយភ្លាមៗនោះផងដែរ លោក វ៉ី សំណាង អភិបាលនៃគណៈអភិបាលខេត្តក៏ បានបញ្ជាឲ្យគ្រប់ជំនាញ ចុះជួយបន្ទាន់ ដើម្បីស្វែងរកក្រុមក្មេងទាំង១០នាក់ ព្រមជាមួយជនបរទេសផងដែរ តែរសៀលថ្ងៃនេះ ពួកគេបានរួចផុតពីគ្រោះថ្នាក់វិញអស់ហើយ។
ក្រុមអាជ្ញាធរបានឲ្យដឹងថា ករណីបាក់ទំនប់នេះ មូលហេតុដោយសាតែកាលពីយប់មានភ្លៀងខ្លាំង ដែលជាហេតុបណ្តាលឲ្យទឹកហូរធ្លាក់ចុះយ៉ាងគំហុកមកពីលើភ្នំគិរីរម្យ ដែលទំនប់មិនអាចការពារបានបណ្តាលឲ្យបាក់តែម្តងទៅ។ ពេលនោះលោក អភិបាលខេត្ត អភិបាលស្រុក និងមន្ត្រីតាមបណ្តាលមន្ទីរជុំវិញខេត្ត រួមដំណើរផងដែរនោះ បានចុះទៅពិនិត្យ និងទប់ស្កាត់ទំនប់នោះដើម្បីកុំអោយបាក់បន្តទៅទៀត៕

វិស័យអចលនទ្រព្យឆ្នាំ២០១៨ រំពឹងថា កើនច្រើនជាង២០លានដុល្លារ

October 20, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ភ្នំពេញ ៖ បន្ទាប់ពីទទួលបានការគាំទ្រ និងជោគជ័យទៅលើការព្រឹត្តិការណ៍តាំងពិព័រណ៍ អចលនទ្រព្យ ចំនួន2 លើករួចមកហើយនោះ ក្រុមហ៊ុនគេហទំព័រអចលនទ្រព្យ www.realestate.com.kh ក៏បានបើក ពិព័រណ៍អចលនទ្រព្យនេះម្តងទៀត នៅឆ្នាំ ២០១៨ ដោយរំពឹងថា ព្រឹត្តិការណ៌នេះនឹងអាចជំរុញ ដល់ការលក់អចលនទ្រព្យ បានច្រើនជាង ២០លាន ដុល្លារអាមេរិក។

ថ្លែងប្រាប់ក្រុមអ្នកសារព័ត៌មាន នៅថ្ងៃទី១៩ ខែតុលា ឆ្នាំ២០១៨ នេះ នៅសណ្ឋាគារណាហ្គាវើល លោក ថមម៉ាស អ៊ូសអូលីវ៉ាន (Thomas O’s ullivan) នាយកគ្រប់គ្រង ក្រុមហ៊ុនគេហទំព័រអចលនទ្រព្យ www.realestate.com.kh បានបញ្ជាក់ថា ព្រឹត្តិការណ៍តាំងពិព័រណ៍អចលនទ្រព្យដ៏ធំក្នុង ឆ្នាំ២០១៨ បានបើកដំណើរការជាផ្លូវការដោយរលូន ដោយមានការចូលរួមគាំទ្រពីអ្នកវិនិយោគវិស័យអចលនទ្រព្យ ទាំងនៅក្នុងប្រទេសកម្ពុជា និងមកពីក្រៅស្រុកសរុបជាង៥០ក្រុមហ៊ុន ក្នុងនោះមានទាំងក្រុមហ៊ុនវិនិយោគវិស័យខុនដូ អាផាតមិន និងបុរីរួមជាមួយនិងស្ថាប័ន គ្រឹះស្ថានហិរញ្ញវត្ថុផងដែរ។

តាមការលើកឡើងរបស់ លោក Thomas O’s ullivan ក៏បានរំលឹកដែរថា កាលពីឆ្នាំ២០១៧ តាមរយៈព្រឹត្តិការណ៍នៃការតាំងពីពិព័រណ៍អចលនទ្រព្យនេះ បណ្តាក្រុមហ៊ុនអចលនទ្រព្យ ដែលចូលរួម បានដាក់តាំងបង្ហាញគម្រោងវិនិយោគរបស់ខ្លួនដល់អតិថិជន ដោយសកម្មភាពទាំងនោះបានជម្រុញដល់ការលក់បានរហូតដល់ជាង 20 លានដុល្លារអាមេរិក។

ដោយឡែក សម្រាប់ព្រឹត្តិការណ៍ពិព័រណ៍ប្រចាំឆ្នាំ២០១៨ នេះ ក៏រំពឹងដែរថា នឹងទទួលបានការចាប់អារម្មណ៍ និងទទួលបានលទ្ធផលកាន់តែប្រសើរជាងឆ្នាំកន្លងទៅ ខណៈដែលទីផ្សារអចលនទ្រព្យនៅកម្ពុជានាពេលបច្ចុប្បន្នកំពុងតែមានភាពពុះកញ្ជ្រោលយ៉ាងខ្លាំង ជាពិសេសការចាប់អារម្មណ៌ពីសំណាក់ជនជាតិបរទេសក្នុងនោះ វិនិយោគិនចិន ឈរនៅលំដាប់កំពូល ។

សូមបញ្ជាក់ថា ព្រឹត្តិការណ៍តាំងពិព័រណ៍អចលនទ្រព្យប្រចាំឆ្នាំ២០១៨ ដែលរៀបចំឡើងដោយ ក្រុមហ៊ុនគេហទំព័រអចលនទ្រព្យ www.realestate.com.kh ឆ្នាំ២០១៨ នេះ បានរៀបចំធ្វើចំនួន២ថ្ងៃ គឺថ្ងៃទី១៩-២០ តុលានេះ នៅសណ្ឋាគារណាហ្គាវើល ដែលអនុញ្ញាតអោយសាធារណៈជនចូលរួមទស្សនាដោយសេរី៕

ស្លាប់៣នាក់ទៀតហើយ ពុលស្រាសក្នុងពេលកំដរបុណ្យសពនៅស្រុកសំបូរ

ខេត្តក្រចេះ ៖ គិតត្រឹមរសៀលថ្ងៃទី២០ ខែតុលា នេះ មានប្រជាពលរដ្ឋចំនួន ៦នាក់ហើយ បានស្លាប់ដោយក្នុងនោះប្រជាពលរដ្ឋចំនួន បីនាក់ បានស្លាប់កាលពីថ្ងៃទី១៩ ខែតុលា និងប្រជាពលរដ្ឋចំនួនបីនាក់ទៀត បានស្លាប់កាលពីព្រឹកថ្ងៃទី២០ ខែតុលា ឆ្នាំ២០១៨ នេះ និងសរុបជាង ៧០នាក់ បានបញ្ជូនទៅសង្គ្រោះនៅមន្ទីរពេទ្យបង្អែកខេត្ត ក្នុងនោះបានអនុញ្ញាតឲ្យត្រឡប់ទៅផ្ទះវិញមានចំនួន៤២នាក់ ដោយសារបានធូរស្រាល និងជាង៣០នាក់ទៀត នៅមិនទាន់អនុញ្ញាតឲ្យចេញនៅឡើយទេ។

សមត្ថកិច្ចបានបញ្ចាក់ថា អ្នកភូមិ៣នាក់ក្នុងនោះមានពីរនាក់ ប្តីនិងប្រពន្ឋ រស់នៅលើកោះដុព័រ ក្នុងភូមិជើង ពោត ឃុំកោះខ្ញែរ ស្រុកសំបូរ ខេត្តក្រចេះ បានស្លាប់ជាបន្តបន្ទាប់មិនអាចសង្គ្រោះទាន់ និងអ្នកភូមិជាង ២០នាក់ផ្សេងទៀត ក៏បានជួបអាការធ្ងន់ធ្ងរ និងកំពុងតែចាត់បញ្ជូនមកសង្ក្រោះនៅមន្ទីរពេទ្យខេត្ត បន្ទាប់ពីជនរងគ្រោះទាំងនោះ បានផឹកស្រា ស កំដរក្នុងពិធីបុណ្យសពមួយនៅក្នុងភូមិ ។

ការផ្ទុះបាតុភាពពុលស្រា ស កំពុងតែរីរាលដាលចេញពីភូមិមួយទៅភូមិមួយ ក្នុងរយៈពេលប៉ុន្មាន ថ្ងៃជាប់គ្នានេះ គិតត្រឹមរសៀលថ្ងៃទី២០ ខែតុលា នេះ គឺមានពលរដ្ឋប្រុសស្រី រស់នៅក្នុងភូមិ ផ្សេងគ្នា ក្នុងស្រុកសំបូរ សរុបចំនួន៦នាក់ហើយដែលបានស្លាប់ ដោយសង្ស័យពុលស្រា ស។ ចំណែក មន្ទីរជំនាញពាក់ព័ន្ឋ នៅមិនទាន់រកមូលហេតុពិតប្រាកដណាមួយបង្ហាញថា ការស្លាប់របស់ពលរដ្ឋរងគ្រោះទាំងនោះ និងអ្នកមានអាការៈពុលជាច្រើននាក់ទៀត ដោយសារស្រា ស ឬយ៉ាងណានោះទេ បានត្រឹមតែដាក់ការសន្និដ្ឋានក្រៅផ្លូវការទៅលើស្រា ស ប៉ុណ្ណោះ។

សូមជម្រាបថា ប្រៀបធៀបអាការៈពុលរបស់អ្នកភូមិរស់នៅលើកោះដុព័រ ក្នុងភូមិជើងពោត ឃុំកោះខ្ញែរ គឺមិនខុសគ្នាទៅនឹងអាការៈពុលរបស់អ្នកភូមិ រស់នៅក្នុងភូមិដំរ៉ែ ឃុំបឹងចារ ស្រុកសំបូរ គឺមានអការៈ ណែនដើមទ្រូង ស្រវាំងភ្នែក ទន់ដៃជើង និងបានស្លាប់ជាបន្តបន្ទាប់ដោយមិនអាចជួយសង្គ្រោះបាន។

អធិការរងនគរបាលស្រុកសំបូរ លោកវរៈសេនីយ៍ទោ នួន សារិន បានឱ្យដឹងថា កាលពីល្ងាចថ្ងៃទី ១៩ ខែតុលា កន្លងទៅនេះ ពលរដ្ឋចំនួន ៣នាក់ផ្សេងទៀតបានស្លាប់ជាបន្តបន្ទាប់គ្នា ក្នុងនោះមានពីរនាក់ប្តីប្រពន្ឋ និងពលរដ្ឋ២១នាក់ផ្សេងទៀត បានរងអាការៈពុល បន្ទាប់ពីជនរងគ្រោះទាំងនោះ បានទទួលទានស្រា ស ក្នុងចូលរួមកំដរពិធីបុណ្យសព មួយនៅក្នុងភូមិខាងលើ។

អ្នកភូមិទាំង៣នាក់ ដែលបានស្លាប់ដោយអាជ្ញាធរសន្និដ្ឋានថា បណ្តាលមកពីពុលស្រា ស នោះ ១.ឈ្មោះ ទូច ម៉ុល ជាប្តី អាយុ៣៦ឆ្នាំ ២.ឈ្មោះ រស់ ញៀន អាយុ៤៦ឆ្នាំ ជាប្រពន្ឋ និងទី៣ឈ្មោះ តឹក ថា ភេទប្រុស អាយុ៥៦ឆ្នាំ ។ ជនរងគ្រោះបានស្លាប់ពេលបញ្ជូនមកសង្គ្រោះ។

ក្រោយការសន្និដ្ឋានរបស់អាជ្ញាធរ ដែលថា ការស្លាប់របស់អ្នកភូមិបណ្តាលមកពីពុលស្រា ស នេះ ត្រូវបានកម្លាំងនគរបាលស្រុក បានចុះទៅពិនិត្យ និងបានដកហូតសំណាកវត្ថុតាង ស្រា ស ជាច្រើនប៊ីដុង យកទៅរក្សាទុក និងបានប្រកាសផ្សព្វផ្សាយមិនឱ្យពលរដ្ឋក្នុងភូមិឱ្យទទួលទានស្រា ស បន្តទៀតនោះទេ។
លោក ឈ្នាង សុវុត្ថា ប្រធានមន្ទីរសុខាភិបាលខេត្តក្រចេះ លោកបានបញ្ជាក់ថា តាមមការសន្និដ្ឋានបឋម គឺប្រជាពលរដ្ឋបានទទួលស្រាស។ ជាមួយគ្នានេះ ប្រធានមន្ទីរសុខាភិបាលខេត្តក្រចេះ បានអំពាវនាវទៅដល់ប្រជាពលរដ្ឋឈប់ទទួលទានស្រាស ដើម្បុះកុំឲ្យមានគ្រោះថ្នាក់៕

កិច្ចប្រជុំត្រៀមរៀបចំប្រណាំងទូក ង ខេត្តបន្ទាយមានជ័យ នៅខែវិច្ឆិកា នេះ

October 20, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

គណៈកម្មាធិការរៀបចំបុណ្យជាតិ-អន្តរជាតិខេត្តបន្ទាយមានជ័យ នៅថ្ងៃទី១៩ខែតុលា ឆ្នាំ២០១៨ បានបើកកិច្ចប្រជុំត្រៀមលក្ខណៈរៀបចំការប្រណាំងទូក-ងថ្នាក់ខេត្ត ដែលនឹងប្រព្រឹត្តទៅនៅ ថ្ងៃទី១៤-១៥ខែវិច្ឆិកាខាងមុខនេះ ។ កិច្ចប្រជុំនេះដឹកនាំដោយ ឯកឧត្ដម សួន បវរ អភិបាលនៃគណៈ អភិបាលខេត្ត ថ្នាក់ដឹកនាំគ្រប់ជាន់ថ្នាក់ មន្ទីរពាក់ព័ន្ធ អភិបាលក្រុង-ស្រុក បានចូលរួម នាសាលាប្រជុំ តូច របស់សាលាខេត្តបន្ទាយមានជ័យ ។

ដោយយោងទៅតាមលិខិតរបស់រដ្ឋបាលខេត្តបន្ទាយមានជ័យ ស្តីពីការត្រៀមរៀបចំទូក និង គណៈកម្មការគ្រប់គ្រង់ទូកដើម្បីចូលរួមប្រណាំង ក្នុងឱកាសអបអរសាទរព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ ឆ្នាំ២០១៨ ។ ដោយក្នុងនោះរដ្ឋបាលខេត្ត បន្ទាយមានជ័យ ក៏នឹងរៀបចំ ឲ្យមានការប្រណាំងទូក នៅថ្ងៃទី១៤-១៥ ខែវិច្ឆិកា ខាងមុខ នៅបរិវេណសាកលវិទ្យា ល័យ មានជ័យ ខេត្តបន្ទាយមានជ័យ ដែលស្ថិតនៅភូមិបាណយ សង្កាត់ទឹកថ្លា ក្រុងសិរីសោភ័ណ អមដោយ កីឡាប្រដាល់ ការប្រគុំតន្ត្រីសម័យ មហោស្រពប្រឡងចម្រៀងបុរាណ្យ-សម័យ និងការ តាំងពិពណ៌ភូមិ១ ផលិតផល១ ដែលប្រារព្ធធ្វើមុនថ្ងៃប្រណាំងទូកថ្នាក់ជាតិនាពេលខាងមុខ ហើយ សម្រាប់ឆ្នាំ២០១៨នេះគឺការរៀបចំលក្ខណៈធំជាងឆ្នាំ២០១៧ ដោយមានការរៀបចំវេទិការយ៉ាង ស្រស់ ស្អាតមានទីតាំងងាយស្រួលសម្រាប់បងប្អូនដែលចូលរូមទស្សនាមានភាពងាយស្រួល ។

ក្នុងឱកាសនោះ ឯកឧត្តម សួន បវរ ក៏បានមានប្រសាសន៍ជម្រុញឲ្យ គណៈកម្មការគ្រប់ គ្រង់ ទូក ទាំងអស់ ត្រូវធ្វើការរៀបចំកែលំអ រៀបចំតុបតែងទូករបស់ខ្លួនឲ្យបានស្អាត ហ្វឹកហាត់ចាប់ពីពេល នេះតទៅពិសេសចំណុះទូកនីមួយៗត្រូវមានការកំណត់ចំនួនឲ្យបានច្បាស់លាស់ដើម្បីត្រៀមលក្ខណៈ ចូលរួមប្រកួតនៅថ្ងៃទី១៤-១៥ ខែវិច្ឆិកាខាងមុខ ដោយចំរាញយកទូកដែលមានចំណាក់ថ្នាក់ល្អ ដើម្បី បន្តយកទៅប្រកួតនៅរាជធានីភ្នំពេញនៅថ្ងៃទី២១-២៣ ខែវិច្ឆិកាខាងមុខនេះ ក្នុងឱកាសអបអរសាទរ ព្រះរាជពិធីអុំទូក អកអំបុក បណ្ដែតប្រទីប និងសំពះព្រះខែ ។ ជាមួយគ្នានោះឯកឧត្តមអភិបាលខេត្ត ក៏ស្នើរសុំឲ្យកងកម្លាំងពាក់ព័ន្ធត្រូវធ្វើយ៉ាងណាថែរក្សាសន្តិសុខ សណ្តាប់ធ្នាប់ សុវត្ថិភាពជូនប្រជាពល រដ្ឋ ដែលមកលេងកំសាន្តឲ្យបានល្អប្រសើរ ក្នុងរយៈពេលនៃការប្រណាំងទូកនេះ ។

គូរជម្រាប់ថា៖ នាពេលរាត្រីនៃការប្រណាំងទូក-ងខេត្តបន្ទាយមានជ័យ ក៏មានការបណ្តែត ប្រទីប របស់មន្ទីរ អង្គភាពពាក់ព័ន្ធជុំវិញខេត្ត នៅមាត់ស្ទឹងសិរីសោភ័ណ បរិវេណស្ពានថ្មថ្មី ស្ថិតនៅ សង្កាត់ព្រះពន្លា ក្រុងសិរីសោភ័ណ ចាប់ពីថ្ងៃទី១៣ ខែវិច្ឆិកា ដល់ថ្ងៃទី២៣ ខែវិច្ឆិកា ឆ្នាំ២០១៨ រួមនឹង មានការតាំងពិពណ៌ភូមិ១ ផលិតផល១ នាបរិវេនសួនមានជ័យផងដែរ ។ សម្រាប់ទូកដែលបានចូលរួមប្រកួតមានចំនួន២២ទូកក្នុងនោះរួមមាន៖ ទូកចំណុះ៦០នាក់ឡើង មាន ២ទូក / កចំណុះ៤៥នាក់ មាន២ទូក / ទូកចំណុះ២២នាក់ មាន១១ទូក-ទូកចំណុះ៥នាក់ មាន៥ទូក និងទូកចំណុះ២នាក់ មាន២ទូក ៕

សម្តេច ហ៊ុន សែន ទៅដល់តួកគីហើយ បន្ទាប់ពីបញ្ចប់កិចប្រជុំកំពូលនៅប៊ែលហ្ស៊ិក

October 20, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ នាយករដ្ឋមន្ត្រីកម្ពុជាសម្តេចតេជោ ហ៊ុន សែន នៅព្រឹកថ្ងៃទី២០ ខែតុលា នេះ បាន ទៅកាន់ទីក្រុងអីស្តានប៊ុល សាធារណរដ្ឋតួកគី ហើយ បន្ទាប់ពីបញ្ចប់ដំណើរ នៃការអញ្ជើញចូលរួមកិច្ចប្រជុំកំពូលអាស៊ីអឺរ៉ុបលើកទី១២ នៅទីក្រុងប្រ៊ចសែល ប្រទេសប៊ែលហ្សីក ។

យោងតាមសេចក្តីប្រកាសព័ត៌មាន នៅព្រឹកព្រលឹមថ្ងៃទី២០ ខែតុលា ឆ្នាំ២០១៨សម្តេចតេជោនាយករដ្ឋមន្ត្រី និងគណៈប្រតិភូជាន់ខ្ពស់រាជរដ្ឋាភិបាលកម្ពុជា បានធ្វើដំណើរចាកចេញពីអាកាសយានអន្តជាតិ អ៊ិចសេគុយជេត (Execujet) ទីក្រុងប្រ៊ុចសែល ប្រទេសប៊ែលហ្ស៊ិក ក្នុងដំណើរនៃការអញ្ជើញបន្តបំពេញទស្សនកិច្ចការងារ ទៅកាន់ទីក្រុងអីស្តានប៊ុល សាធារណរដ្ឋតួកគី ជាទីដែលសម្តេចតេជោនាយករដ្ឋមន្ត្រី ត្រូវបានអញ្ជើញចូលរួមក្នុងជំនួបកំពូលទ្វេភាគី ជាមួយឯកឧត្តម រ៉េជីប ថាយយ៉ីប អែដូហ្គាន (Recep Tayyip Erdogan) ប្រធានាធិបតី នៃសាធារណរដ្ឋតួកគី ឯកឧត្តម ប៊ីណាលី យីឌឺរីម (Binary Yidirim) ប្រធានរដ្ឋសភា និងជាអតីតនាយករដ្ឋមន្ត្រី នៃសាធារណរដ្ឋតួកគី។

យន្តហោះពិសេសបានធ្វើការចុះចតប្រកបដោយសុវត្តិភាព នៅអាកាសយានដ្ឋានអន្តរជាតិ អាតាទួក ទីក្រុងអីស្តានប៊ុល កាលពីវេលាម៉ោង ១២ និង ១០នាទី ម៉ោងនៅទីក្រុងអីស្តានប៊ុល សាធារណរដ្ឋតួកគី ត្រូវនឹងម៉ោង ១៦និង១០នាទី ម៉ោងនៅរាជធានីភ្នំពេញ ព្រះរាជាណាចក្រកម្ពុជា។

វត្តមាននៃការអញ្ជើញដល់របស់សម្តេចតេជោនាយករដ្ឋមន្ត្រី និងគណៈប្រតិភូជាន់ខ្ពស់ ត្រូវបានការធ្វើគារវកិច្ចស្វាគមន៍យ៉ាងស្និទ្ធស្នាលរ៉ាក់ទាក់បំផុត ពីឯកឧត្តមអភិបាលក្រុងអីស្តានប៊ុល ប្រមុខយោធាតួកគី អគ្គនាយកនៃក្រសួងការបរទេសតួកគី និងលោកជំទាវឯកអគ្គរាជទូតតួកគី ប្រចាំព្រះរាជាណាចក្រកម្ពុជា ព្រមទាំងឯកឧត្តម លោកជំទាវ ជាឥស្សរជនជាន់ខ្ពស់រដ្ឋាភិបាលតួកគី និងឥស្សរជនការទូតរបស់ព្រះរាជាណាចក្រកម្ពុជា ប្រចាំប្រទេសតួកគីជាច្រើនរូបផងដែរ៕

៩ខែដើមឆ្នាំនេះ កម្ពុជាប្រមូលពន្ធអាករគ្រប់ប្រភេទបានចំនួន ១.៦៩១លានដុល្លារ

October 19, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ភ្នំពេញ ៖ អគ្គនាយកដ្ឋានពន្ធដារ បានបញ្ជាក់នៅថ្ងៃទី១៨ ខែតុលា នេះថា ក្នុងរយៈពេល៩ខែ ឆ្នាំ២០១៨ នេះ បានប្រមូលចំណូលពន្ធអាករគ្រប់ប្រភេទសរុបចំនួន ១.៦៩១លានដុល្លារ កើនឡើង ១៧,៥ភាគរយ បើធៀបនឹងរយៈពេលដូចគ្នា នៅឆ្នាំ២០១៧។

ទំហំប្រាក់ពន្ធដែលប្រមូលបាន ១.៦៩១លានដុល្លារ នេះ គឺស្មើនឹងជិត ៨៨ភាគរយ នៃផែនការប្រមូលពន្ធអាករប្រចាំឆ្នាំនេះ។ ដោយឡែក ចំពោះខែកញ្ញា នេះ រដ្ឋាភិបាលរកចំណូលពន្ធបានចំនួន ១៨៨ លានដុល្លារ កើនឡើង ៤២ភាគរយនៃផែនការ។

សួមេំលឹកថា កាលពីឆ្នាំ២០១៧ កន្លងទៅ ការប្រមូលចំណូលពន្ធអាករសម្រេចបាន ១.៩៣៨លានដុល្លារអាមេរិក កើនឡើង ៣០ភាគរយ ធៀបនឹងឆ្នាំ២០១៦៕

ក្រសួងប្រកាសស៊ើបអង្កេតករណី ទាសភាពដោយការចងបំណុល នៅតាមសិប្បកម្មឡឥដ្ឋ

October 19, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ ក្រសួងការងារ នឹងចុះទៅធ្វើការស៊ើបអង្កេតទៅលើករណី«ទាសភាពសម័យទំនើប»នៅតាម សិប្បកម្មឡឥដ្ឋ តាមរយៈការចងដោយបំណុល ដែលត្រូវបានផ្សព្វផ្សាយដោយក្រុមអ្នកស្រាវជ្រាវពីសកលវិទ្យាល័យ Royal Holloway មានមូលដ្ឋាននៅទីក្រុងឡុងដ៍។

នេះជាការបញ្ជាក់របស់លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បន្ទាប់ពីមានរបាយការណ៍មួយរបស់ក្រុមអ្នកស្រាវជ្រាវនេះ មានចំណងជើងថា«ឥដ្ឋឈាម» ដោយបានបង្ហាញថា ភាពរីកចម្រើនខ្លាំងនៃវិស័យសំណង់របស់ប្រទេសកម្ពុជា បានជំរុញឲ្យពលរដ្ឋក្រីក្រជាច្រើនគ្រួសារ ធ្លាក់ចូលទៅក្នុងទាសភាពសម័យទំនើបក្នុងសិប្បកម្ម ឡឥដ្ឋ តាមរយៈការចងដោយបំណុល។

លោក រដ្ឋមន្ត្រី អ៊ិត សំហេង បានបញ្ជាក់ថា កាលពីសប្តាហ៍មុន ក្រសួងការងារបានចេញសេចក្តីថ្លែងការណ៍មួយ ដោយព្រមានផាកពិន័យ និងចាត់វិធានការតឹងរ៉ឹងតាមផ្លូវច្បាប់ ចំពោះការប្រើប្រាស់ពលកម្មកុមារនៅក្នុងឧស្សាហកម្មឡឥដ្ឋ និងទម្រង់កេងប្រវ័ញ្ចដទៃៗទៀតជាមួយនឹងការចងដោយបំណុល។

លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្ស អាដហុក បានថ្លែងថា «ការដែលក្រសួងការងារចាប់ផ្តើមធ្វើនេះ វាហាក់ដូចជាគាត់ទើបតែភ្ញាក់ពីដេក ហើយយើងគិតថាវាគួរឲ្យសោកស្តាយកន្លង បើរាជរដ្ឋាភិបាលនិងក្រសួងយកចិត្តទុកដាក់តាំងពីដើមមកពលរដ្ឋកម្ពុជាអាចនឹងមិនមានភាពរងគ្រោះដោយសារតែរឿងនេះ»។

លោកថា ការពិតក្រសួងត្រូវស៊ើបអង្កេតតាំងពីយូរមកហើយ បន្ទាប់ពីសង្គមស៊ីវិលបានធ្វើរបាយការណ៍ជាបន្តបន្ទាប់អំពីបញ្ហានៅឡឥដ្ឋ ដែលបានបង្កគ្រោះថ្នាក់ដល់កុមារ និងកម្មករ៕

ពុលស្រាសទៀតហើយនៅស្រុកសំបូរ ស្លាប់៣នាក់ និងជាង៣០នាក់កំពុងសង្គ្រោះ

October 19, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សុខភាពមេគង្គ ប៉ុស្តិ៍

ខេត្តក្រចេះ ៖ នៅព្រលប់ថ្ងៃទី១៨ ខែតុលា ឆ្នាំ២០១៨ មានករីពុលស្រា ស បណ្តាលឲ្យប្រជាពលរដ្ឋ៣ នាក់ បានស្លាប់ភ្លាមៗ និងជាង៣០នាក់ផ្សេងទៀត ត្រូវបានបញ្ជូនទៅសង្គ្រោះនៅមន្ទីរពេទ្យខេត្ត ជាបន្តបន្ទាប់។

សមត្ថកិច្ចឲ្យដឹងថា ករណីនេះកើតឡើងនៅភូមិដំរ៉ែ ឃុំបឹងចារ ស្រុកសំបូរ ខេត្តក្រចេះ ក្រោយពេលដែលពលរដ្ឋរស់នៅភូមិខាងលើបានសម្រាកពីការច្រូតស្រូវរួច ហើយនាំគ្នាហូបចុក និងផឹកស្រា ស ។ក្នុងចំណោមអ្នកស្លាប់៣នាក់ មានបុរស២នាក់ និងស្ត្រីម្នាក់ ដោយបានដាច់ខ្យល់ ស្លាប់ក្នុងសភាព ណែនដើមទ្រូង ថប់ដង្ហើម និងបានដាច់ខ្យល់ស្លាប់ជាបន្តបន្ទាប់ ក្រោយពីនាំទៅ សង្គ្រោះនៅមន្ទីរ ពេទ្យខេត្ត។

សមត្ថកិច្ចបញ្ជាក់ថា ហេតុការណ៍ដែលសង្ស័យពុលស្រា ស នេះ អាជ្ញាធរក៏បានឃាត់ខ្លួនម្ចាស់ ទី តាំងផលិតស្រា ស មួយកន្លែងនៅក្នុងភូមិនោះដើម្បីសាកសួរ ប៉ុន្តែមិនទាន់មានរបាយការណ៍ ជាក់ លាក់នៅឡើយទេ៕

ក្មេងប្រុសអាយុជាង១ខួប ប្រកាច់ស្លាប់ក្រោយពេលហូបនំកញ្ចប់ និងផឹកទឹកក្រូចដបជ័រ

October 19, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សុខភាពមេគង្គ ប៉ុស្តិ៍

ព្រះវិហារ ៖ ក្មេងប្រុសម្នាក់មានអាយុ ១ខួបកន្លះ បានស្លាប់យ៉ាងអាណោចអាធ័ម ក្រោយពេលហូបនំ កញ្ចប់ រួចផឹកទឹកក្រូចដបជ័រអស់១ដប ហើយរត់លេងបានប្រមាណ៣០នាទី ក៏កើតមានអាការៈ ទន់ដៃ ទន់ជើង ដួលប្រកាច់បែកពពុះមាត់ ត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យ តែ មិនអាចជួយទាន់សង្គ្រោះបាន បានស្លាប់បាត់ជីវិត កាលពីរសៀល ថ្ងៃទី១៨ ខែតុលា ឆ្នាំ២០១៨។

ក្មេងរងគ្រោះឈ្មោះ ហៃ វ៉ាន់ឆាយ ភេទប្រុស អាយុ១៨ខែ រស់នៅភូមិស្រយង់ជើង ឃុំស្រយង់ ស្រុកគូលែន ខេត្តព្រះវិហារ ។

ម្តាយក្មេងរងគ្រោះបានប្រាប់ថា កូនរបស់គាត់បានហូបនំកញ្ចប់ម៉ាក cookie crème ប្រភេទ សូកូឡាអស់៤កញ្ចប់ និងផឹកទឹកក្រូចដបជ័រ ម៉ាក sanumpueng អស់១ដប ហូបរួចវាបានរត់លេងប្រហែល៣០នាទីក្រោយមក ស្រាប់តែបែកពពុះមាត់ទន់ខ្លួន ក៏នាំយកទៅមណ្ឌលុខភាពកោះកេរ តែកូនគាត់បានស្លាប់តាមផ្លូវ មុនពេលទៅដល់មន្ទីរពេទ្យទៅទៀត។

ក្រោយពេលកើតមានករណីនេះ សមត្ថកិច្ចបានចុះទៅដល់កន្លែង និងបានត្រួតពិនិត្យ ធ្វើរបាយការណ៍ជូនថ្នាក់លើ និងប្រគល់សាកសពជូនអាណាព្យាបាលដើម្បីរៀបចំពិធីបុណ្យតាមប្រពៃណី៕

ក្មេងស្រីក្នុងគ្រួសារក្រីក្រ២នាក់ ត្រូវគេសម្លាប់ញាត់ដាក់ក្នុងហឹបឈើ

October 18, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ខេត្តកំពង់ឆ្នាំង ៖ ក្មេងស្រី២នាក់ ត្រូវបានគេប្រទះឃើញស្លាប់ក្នុងផ្ទះឈើមួយកន្លែង នៅភូមិថ្មី ឃុំផ្សា ស្រុកបរិបូរណ៍ ខេត្តកំពង់ឆ្នំាង កាលពីវេលាម៉ោង១១និង៣០នាទីថ្ងៃត្រង់ ថ្ងៃទី១៧ ខែតុលា ឆ្នាំ២០១៨ នេះ។

នគរបាលមូលដ្ឋានបានអោយដឹងថា ក្មេងស្រីទាំង២នាក់ មានឪពុកឈ្មោះ ប្រាក់ ជា អាយុ៣៤ឆ្នាំ ទៅធ្វើការនៅប្រទេសថៃ កាលពី៣-៤ថ្ងៃ មុនពេលកើតហេតុ ចំណែកម្តាយឈ្មោះ ជន នីតា អាយុ៣៤ឆ្នាំ ទៅធ្វើការនៅភ្នំពេញ ទុកកូននៅតែ២នាក់ ដោយផ្ញើ មីង មា នៅជិតខាង អោយជួយមើលថែទាំ។ នៅពេលកើតហេតុ ដោយបាត់ក្មេងស្រីទាំង២ ឪពុកមារបស់ក្មេងស្រី ឈ្មោះ ភី វុទ្ឋី ក៍តាមដើររក ហើយស្រាប់តែប្រទះឃើញក្មេងរងគ្រោះទំាងពីរនាក់ស្លាប់ក្នុងហឹបឈើមួយនៅលើផ្ទះ។ សមត្ថកិច្ចសង្ស័យថា ជាករណី រំលោភហើយសម្លាប់បំបិទមាត់។

ពេលនេះសមត្ថកិច្ចកំពុងស្រាវជ្រាវយ៉ាងយកចិត្តទុកដាក់ដើម្បីស្វែងរកឃាតក រីឯសាកសពបានប្រគល់ឲ្យសាច់ញាតិរៀបចំធ្វើពិធីបុណ្យតាមគន្លងប្រពៃណីសាសនា៕

សម្តេច ហ៊ុន សែន ៖ មិនចង់ឃើញសហភាពអឺរ៉ុបប្រព្រឹត្ត កំហុសជាលើកទី៣ ទេ

October 18, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ សម្តេចនាយករដ្ឋមន្ត្រីតេជោ ហ៊ុន សែន បានថ្លែងក្នុងជំនួបជាមួយក្រុមធុរកិច្ច អាស៊ាន- សហភាពអឺរ៉ុប នៅទីក្រុងប៊្រុចស៊ែល ប្រទេសប៊ែលហ្ស៊ិក ថា«សម្តេច មិនចង់ឃើញ ប្រទេសប្រជា ធិបតេយ្យនៅអឺរ៉ុប ដែលប្រព្រឹត្តនូវកំហុសជាលើកទី៣ ពោលគឺកំហុសលើក ទី១ ប្រទេសប្រជាធិប តេយ្យ នៅអឺរ៉ុប បានគាំទ្រនូវរដ្ឋប្រហារយោធាក្នុងប្រទេសកម្ពុជាកាលពីទស វត្ស ៧០។កំហុសទី២ គាំទ្រដល់របបខ្មែរក្រហមជាង ១ទសវត្ស ពិសេសគាំទ្រខ្មែរក្រហមនៅអង្គការ សហប្រជាជាតិ និង កំហុសទី៣ បើទោះបីជាស្ថិតក្នុងដំណាក់កាលពិភាក្សាលើសេចក្តីថ្លែងការណ៍ឬក្លាយទៅជាការពិតនោះ វានឹងក្លាយទៅជាកំហុសទី៣ របស់ប្រទេសប្រជាធិបតេយ្យនៅសហភាពអឺរ៉ុបសម្រាប់កម្ពុជា។

សម្តេចតេជោក៏បានស្វាគមន៍ចំពោះសេចក្តីថ្លែងការណ៍ក្រុមប្រឹក្សាធុរកិច្ចអាស៊ាន អឺរ៉ុប ស្តីពីសភាពការណ៍ពិតរបស់កម្ពុជា និងបានចាត់ទុកសេចក្តីថ្លែងការណ៍នោះថា មានលក្ខណៈត្រឹមត្រូវដែលក្រុមប្រឹក្សាអឺរ៉ុប ត្រូវតែស្តាប់នូវសម្លេងពីក្រុមធុរកិច្ច និងក្រុមសង្គមស៊ីវិល ជាដើម៕

ឃាត់ខ្លួនស្ត្រី២នាក់ ករណីនាំគ្រឿងញៀនជិត ១គ.ក្រ. ឆ្លងដែនទៅអូស្ត្រាលី

ភ្នំពេញ ៖ សមត្ថកិច្ចនៃមន្ទីរប្រឆាំងគ្រឿងញៀន បានចុះបង្ក្រាបឃាត់ខ្លួនស្ត្រី២នាក់ ខណៈដឹកជញ្ជូនគ្រឿងញៀនឆ្លងដែនខុសច្បាប់ ពីប្រទេសកម្ពុជាទៅប្រទេសអូស្ត្រាលី នៅចំណុចមុខក្រុមហ៊ុនផ្ញើបញ្ញើ នៅតាមបណ្តោយផ្លូវសហព័ន្ធរុស្សី សង្កាត់ទឹកថ្លា ខណ្ឌសែនសុខ រាជធានីភ្នំពេញ កាលពីថ្ងៃ ទី១៥ ខែតុលា ឆ្នាំ២០១៨ វេលាម៉ោង ១៦និង៥០នាទី ។

ជនសង្ស័យទី ១/ ឈ្មោះ ចាន់ ដារ៉ា ភេទស្រី ឆ្នាំកំណើត១៩៩១ ជាជនជាតិខ្មែរ ទី២ ឈ្មោះ TAM HIU TING ភេទស្រី ឆ្នាំកំណើត ១៩៦៣ ជាជនជាតិវៀតណាម សញ្ជាតិចិនកុងកុង ។ ចាប់បានយកវត្ថុតាង មានគ្រឿងញៀនប្រភេទ មេតំហ្វេតាមីន (ICE) ទម្ងន់ ៩៦១,៩០ក្រាម ដែលលាក់បង្កប់ក្នុងជញ្ជាំងកេសក្រដាស ៕