ភ្នំពេញ ៖ តាមការស្ទង់មតិថ្មីមួយ បង្ហាញថា ប្រទេសកម្ពុជាបានជាប់ចំណាត់ថ្នាក់លេខ៤ ក្នុងចំណោមប្រទេសចំនួន១០ ដែលមានការពេញនិយមបំផុតសម្រាប់ជនបរទេស តែក៏មានការព្រួយបារម្ភដែរថា បញ្ហាសណ្តាប់ធ្នាប់ក្នុងទីក្រុងនឹងអាចប៉ះពាល់ដល់ដំណើរអ្នកទេសចរមកកម្សាន្តនៅកម្ពុជា។
យោងតាមបណ្តាញបរទេសធំបំផុតលើពិភពលោក Inter Nations ដែលបានស្ទង់មតិប្រជាជនចំនួន ១ម៉ឺន៣ពាន់នាក់ មកពី១៦៦ប្រទេស ជាលទ្ធផលបានរកឃើញថា ប្រទេសចំនួន១០ ដែលត្រូវបានគេជ្រើសរើសជាប្រទេស និងតំបន់ដែលពេញនិយមបំផុតសម្រាប់ជនបរទេស ក្នុងនោះប្រទេសកម្ពុជាជាប់ចំណាត់ថ្នាក់លេខ៤។
ទោះជាយ៉ាងណាការសិក្សានេះ មិនបានបញ្ជាក់ជាក់លាក់នូវលក្ខខ័ណ្ឌអ្វីខ្លះ ដែលបានធ្វើដើម្បីវាយតម្លៃបែបនេះនោះទេ។ បើតាមអ្នកជំនាញផ្នែកអចលនទ្រព្យ យល់ឃើញថា ការវាយតម្លៃនេះ គឺស័ក្តិសមសម្រាប់បរិយាកាសជារួមក្នុងប្រទេសកម្ពុជា ប៉ុន្តែបើគិតពីផាសុខភាព និងសុវត្ថិភាពក្នុងការរស់នៅកម្ពុជា គឺមិនទាន់មានភាពទាក់ទាញខ្លាំងនៅឡើយទេ។
ដោយឡែក បើមើលតាមស្ថានជាក់ស្តែងសម្រាប់ទីក្រុងភ្នំពេញ ដែលជាបេះដូងរបស់ប្រទេសកម្ពុជា ឃើញថា មានចំនួនតង់ស៊ីតេប្រជាពលរដ្ឋតិចនៅឡើយ ធៀបនឹងទីក្រុងធំៗនៃប្រទេសនានាក្នុងតំបន់ ប៉ុន្តែអ្វីជាបញ្ហាចោទដែលអាចនឹងបង្ករការលំបាក និង ប៉ះពាល់ដល់សោភ័ណ្ឌភាពទីក្រុងនោះ គឺការកកស្ទះចរាចរណ៍ បណ្តាលមកពី បញ្ហាសណ្តាប់ធ្នាប់សាធារណៈ ការមិនគោរពច្បាប់ចរាចរណ៍ ជាដើម។
យោងតាមការសិក្សាមួយធ្វើឡើងដោយក្រុមហ៊ុន CBRE Cambodia កាលពីឆ្នាំមុន បានរកឃើញថា តង់ស៊ីតេប្រជាពលរដ្ឋនៅរាជធានីភ្នំពេញ មានប្រជាជនរស់នៅចំនួន១៨០០នាក់ក្នុងមួយគីឡូម៉ែត្រ ខណៈទីក្រុងហូជីម៉ិញ មានប្រជាពលរដ្ឋរស់នៅ៦០០០នាក់ ទីក្រុងបាងកកចំនួន៧០០០នាក់ និងទីក្រុងរ៉ង់ហ្គូនមានតង់ស៊ីតេប្រជាពលរដ្ឋចំនួន៨០០០នាក់ក្នុងមួយគីឡូម៉ែត្រ៕
ភ្នំពេញ ៖ ក្រុមអ្នកជំនាញស្នើទៅរដ្ឋាភិបាលដាក់ចេញវិធានការជាក់លាក់ និងមានប្រសិទ្ធភាព ដើម្បីទប់ស្កាត់ការឡើងថ្លៃប្រេងសាំងក្នុងប្រទេសកម្ពុជា ខណៈ រដ្ឋាភិបាលហាក់មិនទាន់រកឃើញដំណោះស្រាយចំពោះបញ្ហានេះនៅឡើយ។នេះប់តាមការផ្សាយរបស់ វីអូឌី ចេញផ្សាយនៅថ្ងៃទី២៤ ខែឧសភា នេះ។
គួររំលឹកថា ចាប់តាំងពីសប្ដាហ៍ទី២ ដើមខែឧសភានេះ គេសង្កេតឃើញ តម្លៃប្រេងឥន្ធនៈក្នុងប្រទេសកម្ពុជា បានចាប់ផ្ដើមហក់ឡើង ដោយប្រេងសាំងធម្មតា មានតម្លៃ ៤ ១៥០រៀល និងប្រេងម៉ាស៊ូត តម្លៃ ៤ ០០០រៀល ក្នុងមួយលីត្រ។
យោងតាមសេចក្ដីប្រកាសព័ត៌មាន ក្រសួងពាណិជ្ជកម្មឲ្យដឹងទៀតថា តម្លៃប្រេងសាំងធម្មតា នឹងកើនឡើង ១៥០រៀល ពោលគឺមានតម្លៃ ៤៣០០រៀល ខណៈ ប្រេងម៉ាស៊ូតនឹងឡើងដល់ ៤ ១០០រៀល សម្រាប់រយៈពេល ១០ថ្ងៃទៅមុខទៀត ចាប់ពីថ្ងៃទី២២ឧសភា រហូតដល់ថ្ងៃទី១មិថុនា។
នៅប្រទេសថៃឯណោះវិញ រដ្ឋាភិបាលថៃ បានត្រៀមបញ្ចប់ថវិកា ១ពាន់លានដុល្លារអាមេរិក ដើម្បីទប់ស្កាត់ការឡើងថ្លៃនៃតម្លៃប្រេងឥន្ធនៈ និងដើម្បីជួយសម្រួលជីវភាពប្រជាពលរដ្ឋ ខណៈ ប្រេងសាំងក្នុងប្រទេសនេះ មានតម្លៃ ៣៨០០រៀល ហើយនឹងបន្ដថេរបែបនេះ បើគោលនយោបាយទប់ស្កាត់កុំឲ្យសាំងឡើងថ្លៃ ទទួលបានជោគជ័យ។ នេះដោយយោងតាមសារព័ត៌មានថៃ The Nations ចេញផ្សាយកាលពីថ្ងៃម្សិលមិញ។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ យល់ថា ការបន្ដឡើងថ្លៃនៃតម្លៃប្រេងសាំងនៅប្រទេសកម្ពុជា នឹងបង្កផលប៉ះពាល់ជាច្រើន ដូចជា ប៉ះពាល់ជីវភាពប្រជាពលរដ្ឋ ធ្វើឲ្យទំនិញឡើងថ្លៃ ប៉ះពាល់ការដឹកជញ្ជូនទំនិញទៅក្រៅប្រទេស និងកំណើនសេដ្ឋកិច្ចជាតិ។
លោកជំរុញទៅរដ្ឋាភិបាល ឲ្យបោះទុនបន្ថែម ដើម្បីទប់ស្កាត់ការឡើងថ្លៃប្រេងឥន្ធនៈនេះ ដូចទៅនឹងប្រទេសក្បែរខាងកម្ពុជា ខណៈ លោកក៏រិះគន់ថា មន្ដ្រីរដ្ឋាភិបាលខ្លះ មិនសូវខ្វល់ខ្វាយពីពលរដ្ឋ ចំពោះការចំណាយលើប្រេងសាំងនោះទេ។
យើងនៅតែចង់ឃើញរដ្ឋាភិបាលបោះទុនបន្ថែមសម្រាប់ទប់ជាមួយតម្លៃសាំងដែលឡើងថ្លៃនេះ។ នៅបណ្ដាប្រទេសមួយចំនួន គេបានចេញទុនដើម្បីទប់តម្លៃសាំង ការយកចិត្តទុកដាក់ដែលមានកម្រិត គឺជាអ្វីមួយកំពុងកើតឡើង ព្រោះអ្នកធំៗ គាត់មិនសូវខ្វល់ដែរទេ ព្រោះគាត់ចាក់ គាត់មានប៉ុងសាំង ខ្ញុំមើលទៅគាត់មិនសូវជាខ្វល់ខ្វាយអ្នកជំនាញផ្នែកសេដ្ឋកិច្ច លោក ង៉ែត ជូ រិះគន់លើហ្វេសប៊ុករបស់លោកថា យន្ដការត្រួតពិនិត្យតម្លៃរបស់រដ្ឋាភិបាល ហាក់មិនទាន់ឆ្លើយតបនឹងក្ដីកង្វល់របស់ប្រជាពលរដ្ឋនៅឡើយ។ ករណីនេះ លោកផ្ដល់អនុសាសន៍ថា រដ្ឋាភិបាលគួរមានយន្ដការបន្ធូរបន្ថយកម្រិតពន្ធនៃការនាំចូលប្រេងសាំង ទើបអាចការពារកុំឲ្យសាំងឡើងថ្លៃបាន។ការឡើងថ្លៃនេះអាចជាបច្ច័យមិនល្អដែលនាំអោយមានអតិផរណា (ទំនិញឡើងថ្លៃ) និងបង្អាក់ល្បឿននៃកំណើនសេដ្ឋកិច្ចជាតិ។ រដ្ឋាភិបាលគួរមានយន្តការផ្សេងទៀត ដូចជាបន្ធូរកំរិតពន្ធនាំចូល។
លោក ង៉ែត ជូ អ្នកជំនាញផ្នែកសេដ្ឋកិច្ច បានព្យាយាមទាក់ទងអ្នកនាំពាក្យក្រសួងពាណិជ្ជកម្ម លោក ស៊ាង ថៃ ប៉ុន្ដែ ទូរសព្ទចុចចូល គ្មានអ្នកទទួល។
យ៉ាងណាក៏ដោយ លោក ស៊ាង ថៃ ប្រាប់កាសែតខ្មែរថាមស៍នៅថ្ងៃនេះថា ការឡើងថ្លៃ នៃតម្លៃប្រេងនៅទីផ្សារអន្ដរជាតិ បានធ្វើឲ្យតម្លៃប្រេងក្នុងប្រទេសកម្ពុជា ហក់ឡើង។ លោកថា ក្រសួងចំនួន៣ គឺក្រសួងពាណិជ្ជកម្ម ក្រសួងរ៉ែ និងថាមពល និងក្រសួងសេដ្ឋកិច្ច និងហិរញ្ញវត្ថុ កំពុងជួបពិភាក្សាគ្នារកដំណោះស្រាយ ប៉ុន្ដែ មិនទាន់ជ្រើសយកវិធានការណាមួយជាក់លាក់នោះទេ។លោកបន្ដថា ក្រសួងពាក់ព័ន្ធ កំពុងតាមដានពីបញ្ហាប្រេងនេះយ៉ាងយកចិត្តទុកដាក់ និងចាត់វិធានការសមស្របតាមស្ថានភាពជាក់ស្ដែង៕
